အခန်း (၁၆၅၁-၁၆၅၂)

အခန်း (၁၆၅၁) - ကျွန်ပြုခံရသူများ

ဖန့်ချန်သည် ထိုအကြီးကဲတုန်းဟွာနှင့် တစ်ခါမှ မဆုံဖူးချေ။ ရှဲ့အာမန်က ခပ်ဖွဖွခေါင်းညိတ်ပြသည်ကို မြင်မှသာ သူသည် ထိုသူ၏ ရှေ့မှောက်သို့ လျှောက်သွားလိုက်သည်။

အကြီးကဲတုန်းဟွာသည် ဖန့်ချန်ကို ခေတ္တမျှ စိုက်ကြည့်နေပြီးနောက် ရုတ်တရက် မြစိမ်းရောင် ဝိုင်ခွက်တစ်ခွက်ကို ထုတ်ယူလိုက်သည်။

"အရင်က နံပါတ် ၉ ဟာ ရှေးဟောင်းတားမြစ်နယ်မြေကနေ ပြန်လာတိုင်း ငါ့အတွက် မသေမျိုးဝိုင် အမျိုးမျိုး ယူလာပေးလေ့ရှိတယ်။ သူက ဝိုင်သောက်ရတာ ဝါသနာပါသလို ငါလည်း ဝါသနာပါတယ်။ ငါ သူစိမ်းဖြစ်သွားမှာစိုးလို့ ဝိုင်ခွက်တစ်ခွက် လက်ဆောင်ပေးမယ်လို့ ကတိပေးခဲ့ဖူးပေမဲ့ ဂူအောင်းကျင့်ကြံနေတာနဲ့ မေ့သွားခဲ့တယ်။ အခုတော့ ဒါကို မင်းပဲ ယူထားလိုက်တော့"

ဖန့်ချန် ခေတ္တမျှ ကြောင်အသွားသည်။ အရင်က နံပါတ် ၉ ဟုတ်လား။

ရှဲ့အာမန်၏ အသံက သူ၏နားတွင် ပေါ်ထွက်လာသည်။

"အရင်ကလည်း နံပါတ် ၉ တစ်ယောက် ရှိခဲ့ဖူးတယ်။ ဒါပေမဲ့ ပါရမီရှင်တစ်ယောက်ဖြစ်ပေမဲ့ ငယ်ငယ်ရွယ်ရွယ်နဲ့ ကွယ်လွန်သွားခဲ့ရှာတယ်။ သူမက အကြီးကဲတုန်းဟွာနဲ့ အသက်ကွာပေမဲ့ ရင်းနှီးတဲ့ မိတ်ဆွေတွေ ဖြစ်ခဲ့ကြတာ။ ဒီဝိုင်ခွက်က သိပ်ပြီး တန်ဖိုးကြီးလှတာမဟုတ်ပေမဲ့ အရင်ဆုံး လက်ခံလိုက်ပါ။ လူကြီးတွေဆိုတာ အသက်ကြီးလာရင် စိတ်နုတတ်ကြတာ ထုံးစံပဲ"

ဖန့်ချန်သည် ထိုစကားကို ကြားမှ အခြေအနေကို နားလည်သွားတော့သည်။ သူသည် မြစိမ်းရောင် ဝိုင်ခွက်ကို လှမ်းယူလိုက်ပြီး အကြီးကဲတုန်းဟွာကို လက်အုပ်ချီကာ ဂါရဝပြုလိုက်သည်။

"ကျေးဇူးတင်ပါတယ် စီနီယာ"

"အင်း..."

အကြီးကဲတုန်းဟွာက ခပ်ဖွဖွ ခေါင်းညိတ်ပြပြီးနောက် မျက်လုံးကို ပြန်မှိတ်လိုက်ရာ အနည်းငယ် ပင်ပန်းနွမ်းနယ်နေပုံ ပေါ်သည်။

"နံပါတ် ၉... မင်း ဒီတစ်ခေါက် နတ်လမ်းစဉ်ဂိုဏ်းနဲ့ ပတ်သက်ပြီး ကြုံခဲ့ရတာတွေကို တစ်ခေါက် ပြန်ပြောပြလိုက်ဦး"

ရှဲ့အာမန်က ဆိုသည်။

ဖန့်ချန်ကလည်း ထိုစကားကို ကြားသည်နှင့် ရှန်းယွမ်ဈေးအတွင်း ကြုံတွေ့ခဲ့ရသည်များကို တစ်လုံးမကျန် ပြန်လည်ပြောပြလိုက်သည်။

အားလုံး နားထောင်ပြီးသွားသောအခါ မျက်နှာများတွင် အံ့အားသင့်သော အရိပ်အယောင်များ အသီးသီး ပေါ်လာကြ၏။

"နတ်လမ်းစဉ်ဂိုဏ်းနဲ့ ကျိရှန်းအင်ပါယာက ကျဆုံးမသေမျိုးတွေ ပူးပေါင်းနေကြတာလား"

"ဒါကတော့ ဖြစ်နိုင်ခြေ နည်းနည်းနည်းတယ်"

"ဒီကျဆုံးမသေမျိုးတွေက နတ်လမ်းစဉ်ဂိုဏ်းကို အသုံးချပြီး အတိုက်အခံတွေကို ရှင်းထုတ်ချင်နေတာမျိုး မဟုတ်ရင်ပေါ့"

"ဒါပေမဲ့... နတ်လမ်းစဉ်ဂိုဏ်းက အဆင့် ၆ ကျဆုံးမသေမျိုး လေးယောက်ကို အရှင်ဖမ်းဖို့ ကြိုးစားတာက ဘာအတွက်လဲ သူတို့ဆီက ကျဆုံးမသေမျိုး အမွေအနှစ်တွေကို မက်မောလို့လား"

"အတိုက်အခံတွေကို ရှင်းဖို့သက်သက်ဆိုရင် ဒီလောက်အထိ ရင်းစရာမလိုပါဘူး။ ကျဆုံးမသေမျိုးတွေက အမွေအနှစ်ကို အရမ်းအလေးထားကြတာ။ ငါသာ သူတို့နေရာမှာဆိုရင် လူသားဘုံ ကိုးခုထဲမှာ ကိုယ့်ထိန်းချုပ်မှုအောက်မှာ မရှိတဲ့ ကျဆုံးမသေမျိုးတွေ ပေါ်လာမှာကို မလိုလားဘူး"

အကြီးကဲ အတော်များများက ခေါင်းညိတ် ထောက်ခံကြသည်။

ကျဆုံးမသေမျိုးတွေက ဘယ်လောက်အထိ လက်ပေါက်ကပ်လဲဆိုတာ သူတို့ကိုယ်တိုင် အသိဆုံး ဖြစ်သည်။ မိမိတို့လိုပဲ ကောက်ကျစ်ပြီး၊ ရက်စက်တဲ့အပြင် မသေမျိုးလမ်းစဉ်ရဲ့ ကန့်သတ်ချက်တွေထဲမှာ မရှိတဲ့ ကျဆုံးမသေမျိုးတွေ လူသားဘုံထဲ ပေါ်လာမှာကို သူတို့ ဘယ်လိုလုပ် လိုလားပါ့မလဲ။

"ကျဆုံးမသေမျိုးတွေက နတ်လမ်းစဉ်ဂိုဏ်းနဲ့ ပူးပေါင်းတယ်ဆိုတာ အကျိုးအမြတ်ကြောင့်ပဲ ဖြစ်မယ်။ နတ်လမ်းစဉ်ဂိုဏ်းက ဆွဲဆောင်မှုရှိတဲ့ ကမ်းလှမ်းချက်တစ်ခုခု ပေးထားလို့သာ ဒီကျဆုံးမသေမျိုးတွေက ကိုယ့်လူမျိုးအချင်းချင်း သစ္စာဖောက်ပြီး သူတို့နဲ့ အရောင်းအဝယ် လုပ်ကြတာ ဖြစ်လိမ့်မယ်"

ရှဲ့အာမန်က တိုးတိုးလေး ဆိုသည်

"ဒီကိစ္စမှာ အရေးကြီးဆုံး အချက်ကတော့... ကျွန်မ နတ်လမ်းစဉ်ဂိုဏ်းက အဆင့် ၈ ကျင့်ကြံသူကို သွားတားတဲ့အချိန်မှာ သွေးတံခါးနယ်စပ်မှာ သူတို့ရဲ့ အဝင်အထွက်မှတ်တမ်း လုံးဝ မရှိနေတာပဲ"

"အဝင်အထွက်မှတ်တမ်း မရှိဘူး ဟုတ်လား ဒါဆို သူတို့ နတ်ဘုရားလောကကို မသွားခဲ့ဘူးလို့ ဆိုလိုတာပေါ့"

"ဒီမှတ်တမ်းက အနည်းဆုံး နှစ်တစ်ရာအထိ ရှိနေမှာ။ ဆိုလိုတာက လွန်ခဲ့တဲ့ နှစ်တစ်ရာအတွင်း သူတို့ နတ်ဘုရားလောကကို မသွားခဲ့ဘူး"

"နံပါတ် ၉... သူတို့ နတ်ဘုရားလောကကို မသွားခဲ့ဘူးဆိုရင် မင်းက သူတို့ကို ဘယ်လိုလုပ် မြင်နိုင်မှာလဲ"

"ငါသာ သူတို့နေရာမှာဆိုရင် ဒီလိုကိစ္စမျိုးကို လုပ်တော့မယ်ဆိုရင် အဲဒီရှန်းယွမ်ဈေးမှာ အင်အားစုအသီးသီးရဲ့ အမာခံတပည့်တွေ မရှိဖို့ အရင်ဆုံး သေချာအောင် လုပ်မှာပဲ"

"ဟုတ်တယ်။ အခုလိုမျိုး အမြင်ခံလိုက်ရရင် ဖူးစာဖက်... အဲ... အမှားအယွင်းတွေ ပေါ်ကုန်မှာပေါ့"

"မင်းက အမာခံတပည့်ဖြစ်ပြီး မင်းမှာ အစီရင်ဗဟိုချက် ရှိတယ်။ သူတို့က ရှန်းယွမ်ဈေးမှာ မင်းလို အမာခံတပည့်မျိုး ရှိမရှိ စုံစမ်းဖို့ဆိုတာ အရမ်းလွယ်ပါတယ်။ အဆင့် ၇ ရှေးဟောင်းမသေမျိုးတောင် အလွယ်တကူ လုပ်နိုင်တာ၊ အဆင့် ၈ ဆိုရင် ပြောနေစရာတောင် မလိုဘူး"

အကြီးကဲတစ်စုက သံသယဖြစ်ဖွယ် အချက်အလက်များကို တစ်ခုပြီးတစ်ခု တင်ပြလာကြသည်။

ဖန့်ချန် စိတ်ထဲ လှုပ်ရှားသွား၏။

သူသည် အမာခံတပည့် ဖြစ်သည်မှာ မှန်သော်လည်း ထိုစဉ်က ရှန်းယွမ်ဈေးသို့ သွားခဲ့သည်မှာ သူ၏ ဖန့်လူသား အသွင်ကွဲသာ ဖြစ်ပြီး သူ၏မူလခန္ဓာ မဟုတ်ပေ။

ကြည့်ရသည်မှာ ထိုအဆင့် ၈ ကျင့်ကြံသူသည် အကြီးကဲများ ပြောသကဲ့သို့ပင် ရှန်းယွမ်ဈေးအတွင်း အမာခံတပည့်များ မရှိကြောင်း အရင်ဆုံး အတည်ပြုပြီးမှ လက်လှမ်းခဲ့ခြင်း ဖြစ်ပေလိမ့်မည်။

သို့သော်လည်း အင်အားစုအသီးသီးမှ အမာခံတပည့်များသာလျှင် သူတို့၏ တကယ့်အထောက်အထားကို ရိပ်မိနိုင်စွမ်း ရှိသည်။

ထို့ကြောင့် ထိုနေ့က ထိပ်တိုက်တွေ့စဉ်တွင် ရှေးဦး နတ်ဘုရားမျက်လုံး ပိုင်ဆိုင်ထားသော ဖန့်ချန်သည် နတ်လမ်းစဉ်ဂိုဏ်းသား လေးဦး၏ မျက်ဝန်းနက်ရှိုင်းသော နေရာတွင် ဖုံးကွယ်ထားသော ထိတ်လန့်မှုကို သိသိသာသာ မြင်တွေ့ခဲ့ရခြင်း ဖြစ်သည်။

"အကြီးကဲတို့... ဒါက အဓိကအချက် မဟုတ်ပါဘူး"

ရှဲ့အာမန်က ခေါင်းခါယမ်းကာ သူတို့၏ အခြေအတင် ဆွေးနွေးမှုများကို ဖြတ်ပြောလိုက်သည်။

"နံပါတ် ၉ ဟာ အထက်ဘုံသုံးဘုံကို ရောက်တာ နှစ်အနည်းငယ်ပဲ ရှိသေးပြီး ကျွယ်မင်နန်းတော်မှာပဲ အမြဲကျင့်ကြံနေခဲ့တာပါ။ နတ်ဘုရားဘုရင်နယ်မြေ က ကျင့်ကြံသူတွေနဲ့ သိကျွမ်းဖို့ အခွင့်အရေး မရှိခဲ့ပါဘူး။ အတွေ့အကြုံ ရင့်ကျက်တဲ့ အမာခံတပည့်တွေတောင် နတ်ဘုရားဘုရင်နယ်မြေကို ခြေမချဖူးကြဘူး။ ဒါပေမဲ့ ဒီတစ်ခေါက်မှာ နံပါတ် ၉ က အဲဒီလူငါးယောက်လုံးဟာ နတ်လမ်းစဉ်ဂိုဏ်းကဆိုတာကို တစ်ချက်ကြည့်ရုံနဲ့ သိခဲ့တယ်"

"ဒါကလည်း ခိုင်လုံတဲ့ သက်သေတော့ မဟုတ်သေးဘူးလေ"

အကြီးကဲအချို့က တိုးတိုးလေး ရေရွတ်ကြသည်။

"အရေးအကြီးဆုံး အချက်ကတော့... အဲဒီငါးယောက်ဟာ နတ်ဘုရားလောကကို တကယ်သွားခဲ့ပြီး ဟိုဘက်က ကျဆုံးမသေမျိုးတွေနဲ့ ခေတ္တမျှ ထိတွေ့မှု ရှိခဲ့တယ်ဆိုတာကို ကျွန်မ အာမခံနိုင်တာပဲ"

ရှဲ့အာမန်က အေးစက်စွာ ပြောလိုက်သည်။

"နင် တကယ်ပဲ သေချာလား"

အကြီးကဲအားလုံး၏ အမူအရာ လှုပ်ရှားသွားသည်။

သူတို့သည် ဖန့်ချန်ကို သံသယဝင်ကြသည်မှာ ဖန့်ချန်၏ အတွေ့အကြုံက နုနယ်လွန်းသောကြောင့် ဖြစ်သည်။ သို့သော် ရှဲ့အာမန်မှာ ကျွယ်မင်နန်းတော်၏ အမာခံတပည့်များ၏ ခေါင်းဆောင် ဖြစ်ပြီး အဆင့်အတန်းမှာ အလွန်မြင့်မားလှသည်။

နောင်တစ်ချိန်တွင် သူမသည် ၎င်းတို့ကဲ့သို့ အကြီးကဲ ဖြစ်လာမည်မဟုတ်ဘဲ ဂိုဏ်းချုပ်လောင်းအဖြစ် မွေးမြူခြင်းခံရသူ ဖြစ်သည်။ အနာဂတ်၏ အဆင့် ၉ ကျင့်ကြံသူပင် ဖြစ်သည်။ ထို့ကြောင့် ရှဲ့အာမန်၏ စကားသည် သူတို့အတွက် အလွန်ပင် လေးနက်လှသည်။

"သေချာပါတယ်။ ကျွန်မ သူတို့ဆီက ကျဆုံးမသေမျိုးတွေရဲ့ အနံ့ကို ရခဲ့တယ်"

ရှဲ့အာမန်က ခေါင်းညိတ်ပြပြီး ဆက်ပြောသည်

"တကယ်လို့ သူတို့ နတ်ဘုရားလောကကို တကယ်သွားခဲ့ပြီး အဝင်အထွက်မှတ်တမ်း မရှိဘူးဆိုရင် ဒါက ဘာကို ဆိုလိုတာလဲ"

"ဒါက..."

အကြီးကဲဟောက်က သက်ပြင်းတစ်ချက်ချလိုက်သည်။

"စစ်မှန်သော နတ်ဘုရားမှန် က သူတို့အတွက် ခရီးစဉ်ကို ဖုံးကွယ်ပေးထားတယ်လို့ ဆိုလိုတာပဲ"

"အော်... ခေါင်းဆောင်ပြောတဲ့ နိုးလာပြီ ဆိုတာ ဒါကို ပြောတာကိုး..."

တစ်ချိန်လုံး တိတ်နေခဲ့သော ချန်အင်းရွှယ်၏ မျက်ဝန်းထဲတွင် ထိတ်လန့်မှုများ ပေါ်လာပြီး ရှဲ့အာမန်ကို မသိစိတ်ဖြင့် လှမ်းကြည့်လိုက်သည်။

"စစ်မှန်သော နတ်ဘုရားမှန် နိုးလာပြီ ဟုတ်လား "

"မဖြစ်နိုင်တာ..."

"တကယ်လို့ ဒီလို ဝိညာဉ်ရတနာမျိုး နိုးထလာပြီဆိုရင် အဲဒါကို အဆင့် ၉ ကျင့်ကြံသူက ထိန်းချုပ်နိုင်ဦးမှာလား"

"အရင်တုန်းကတောင်... လူနည်းစုလောက်ပဲ အဲဒီမှန်ရဲ့ သခင်ဖြစ်ဖို့ အရည်အချင်းရှိခဲ့တာ။ ကျန်တဲ့သူတွေကတော့... ၎င်းရဲ့ ကျွန်ပြုခြင်းကို ခံခဲ့ရတဲ့သူတွေချည်းပဲ..."

အကြီးကဲအဖွဲ့အတွင်း ရုတ်ရုတ်သဲသဲ ဖြစ်သွားတော့သည်။

ဖန့်ချန် စိတ်ထဲတွင် ထိတ်လန့်သွားမိသည်။ ရှဲ့အာမန်သည် ထိုစဉ်က မသေမျိုးလောကငယ်သည် မလုံခြုံတော့ဟု ယူဆကာ သူတို့ကို အလျင်အမြန် ခေါ်ထုတ်လာခဲ့ခြင်းမှာ စစ်မှန်သော နတ်ဘုရားမှန် က တစ်ခုခု ကြံစည်နေသည်ဟု ယူဆခဲ့သောကြောင့်လား။

စစ်မှန်သော နတ်ဘုရားမှန် နိုးလာပြီဟု အဘယ်ကြောင့် ဆိုသနည်း ဤကဲ့သို့သော ဝိညာဉ်ရတနာများသည် အရင်က အိပ်ပျော်နေခဲ့ကြသလော။

"သွေးတံခါးနယ်စပ်ကို ဒါက စီမံခန့်ခွဲနေတာ။ သူရှိနေလို့လည်း ဒီနှစ်ပေါင်းများစွာအတွင်း သွေးတံခါးနယ်စပ်က အေးအေးချမ်းချမ်း ရှိနေခဲ့တာ။ တကယ်လို့ စစ်မှန်သော နတ်ဘုရားမှန် နိုးလာပြီဆိုရင်တော့ အရာအားလုံးက ပြောင်းလဲသွားပြီ"

ရှဲ့အာမန်၏ မျက်နှာမှာ လေးနက်နေသည်

"သူက လူသားမျိုးနွယ် မဟုတ်ဘူး။ သူလုပ်ဆောင်သမျှကို ဘယ်သူမှ ခန့်မှန်းလို့ မရဘူး။ ဒါပေမဲ့ အရင်က သူ့ရဲ့ လုပ်ရပ်တွေအရ တွက်ချက်ကြည့်မယ်ဆိုရင်... သူက နတ်ဘုရားလောကထဲမှာ နှစ်ပေါင်းများစွာ ရှိနေခဲ့တာမို့ လူသားဘုံ ကိုးခုထက်စာရင် မနတ်ဘုရားလောကဘက်ကို ပိုပြီး ဘက်လိုက်တတ်တယ်"

သူမက ခေတ္တမျှ ရပ်ကာ ဆက်ပြောသည်

"နတ်လမ်းစဉ်ဂိုဏ်းမှာလည်း ဝိညာဉ်ရတနာတစ်ခု ရှိတယ်။ အဲဒီရတနာဟာ အရင်က စစ်မှန်သော နတ်ဘုရားမှန်နဲ့အတူ စီနီယာတစ်ယောက်ရဲ့ လက်ထဲမှာ ခေတ္တမျှ ရှိခဲ့ဖူးလို့ သူတို့ အချင်းချင်း သိကြတယ်။ တကယ်လို့ အခု နတ်လမ်းစဉ်ဂိုဏ်းက နတ်ဘုရားလောကထဲကို တိတ်တဆိတ် ဝင်နိုင်ခဲ့တယ်ဆိုရင် အဲဒီရတနာလည်း နိုးလာပြီ ဖြစ်နိုင်တယ်"

"နတ်လမ်းစဉ်ဂိုဏ်းက ဝိညာဉ်ရတနာပါ နိုးလာပြီဆိုရင်တော့... တကယ့်ကို ပွဲကြီးပွဲကောင်းပဲ"

အကြီးကဲဟောက်က တိုးတိုးလေး ရေရွတ်လိုက်သည်။ လှောင်ပြောင်သလို ပြောနေသော်လည်း လေသံမှာ အလွန်ပင် လေးလံနေသည်။

"ခေါင်းဆောင်...မင်းပြောချင်တာက နတ်လမ်းစဉ်ဂိုဏ်းက ကျဆုံးမသေမျိုးတွေနဲ့ ပူးပေါင်းတာဟာ တကယ်တော့ အဲဒီ ဝိညာဉ်ရတနာ နှစ်ခုရဲ့ ကြိုးကိုင်မှုကြောင့်လို့ ဆိုလိုတာလား"

အကြီးကဲတုန်းဟွာက မျက်လုံးကို ဖြည်းဖြည်းချင်း ဖွင့်ကာ မေးလိုက်သည်။

"ဖြစ်နိုင်ခြေ ရှိပါတယ်။ ဒါကြောင့်လည်း အကြီးကဲတို့ရဲ့ အမြင်တွေကို သိချင်တာပါ"

ရှဲ့အာမန်က ခေါင်းညိတ်ပြသည်။

"ဒါဆိုရင်တော့ အဘိုးကြီး ငါကိုယ်တိုင် နတ်လမ်းစဉ်ဂိုဏ်းဆီ တစ်ခေါက်လောက် သွားကြည့်ရမှာပေါ့။ မိတ်ဆွေဟောင်းတွေနဲ့လည်း တွေ့ရတာပေါ့"

အကြီးကဲတုန်းဟွာက ရုတ်တရက် ရယ်မောလိုက်သည်။

"အပြင်မထွက်တာ ကြာပြီဆိုတော့ ဒီအရိုးတွေတောင် တောင့်တင်းနေပြီ"

လူတိုင်း၏ အမူအရာမှာ အလွန်ပင် လေးနက်သွားကြသည်။

ရှဲ့အာမန်က မျက်မှောင်ကြုတ်ကာ

"အကြီးကဲတုန်းဟွာ... တကယ်ပဲ ကိုယ်တိုင်သွားမယ်ဆိုရင် အဲဒီထဲက အန္တရာယ်တွေကို သိရဲ့လား"

"အဆိုးဆုံးဖြစ်ရင်လည်း ယင်မသေမျိုးအဖြစ် စောစောပြောင်းလိုက်ရုံပေါ့၊ ကိစ္စမရှိပါဘူး"

အကြီးကဲတုန်းဟွာက အေးအေးဆေးဆေးပင် ဆိုသည်။

"တကယ်တော့ ဒါကလည်း နည်းလမ်းကောင်းတစ်ခုပဲ။ ဂိုဏ်းချုပ်ကိုယ်တိုင် သွားလို့ မဖြစ်ဘူးလေ။ အဲဒီ ဝိညာဉ်ရတနာတွေရဲ့ နည်းလမ်းတွေကို လျှော့တွက်လို့ မရဘူး။ အကြီးကဲတုန်းဟွာ သွားတာက ပိုသင့်တော်ပါတယ်၊ ကျွန်တော် သဘောတူတယ်"

အကြီးကဲဟောက်က ခေါင်းညိတ်လိုက်သည်။

အခြားသော အကြီးကဲများကလည်း တစ်ဦးပြီးတစ်ဦး ထောက်ခံကြသည်။

ထိုအခါ အကြီးကဲတုန်းဟွာသည် ထရပ်ကာ သူ၏ အင်္ကျီလက်စကို ခါလိုက်ပြီးနောက် အလင်းတန်းတစ်ခုအဖြစ် ပြောင်းလဲကာ ခန်းမထဲမှ ထွက်ခွာ၍ မိုးကုတ်စက်ဝိုင်းဆီသို့ ပျောက်ကွယ်သွားတော့သည်။

အစည်းအဝေး ပြီးဆုံးသွားသောအခါ ရှဲ့အာမန်သည် ဖန့်ချန်ကို တစ်ယောက်တည်း ခေါ်ထုတ်သွားခဲ့သည်။ ချန်အင်းရွှယ်က လိုက်ပါရန် ကြိုးစားသော်လည်း သူမက ငြင်းပယ်ခဲ့၏။

"နံပါတ် ၉... မင်း လွန်ခဲ့တဲ့ တစ်ခေါက် မသေမျိုးလောကငယ်မှာ နယ်မြေကိုးခု မသေမျိုးမဟာမိတ်အကြောင်း ပြောခဲ့တာ မှတ်မိလား။ အခု ဒီကိစ္စက တကယ်ပဲ သူတို့နဲ့ ပတ်သက်နေတာ ဖြစ်နိုင်တယ်"

ရှဲ့အာမန်က တိုးတိုးလေး ပြောလိုက်လေသည်။

အခန်း (၁၆၅၂) - ကြေးညိုရောင် တစ္ဆေမျက်နှာဖုံး

ဖန့်ချန်၏ စိတ်ထဲတွင် အနည်းငယ် ထိတ်လန့်သွားရသည်။

ရှဲ့အာမန်သည် နယ်မြေကိုးခု မသေမျိုးမဟာမိတ်အကြောင်းကို ရုတ်တရက် ထုတ်ဖော်ပြောဆိုလာခြင်းမှာ သူမ တစ်စုံတစ်ရာသော သဲလွန်စကို ဆက်စပ်မိသွားခြင်း သို့မဟုတ် တိုက်ရိုက်သက်သေ အထောက်အထား တစ်ခုခုကို ရရှိထားခြင်းကြောင့် ဖြစ်ပေလိမ့်မည်။ ယခုဖြစ်ပျက်နေသော ကိစ္စရပ်များသည် နယ်မြေကိုးခု မသေမျိုးမဟာမိတ်နှင့် ဆက်နွှယ်နေကြောင်း ပြသနေသည်။

"ငါတို့ ကျွယ်မင်နန်းတော်ရဲ့ အကြီးကဲတွေထဲမှာလည်း နတ်ဆိုးမျိုးနွယ်ကနေ ဆင်းသက်လာတဲ့သူတွေ အများကြီးရှိတယ်၊ ဒါကြောင့် ခုနက အစည်းအဝေးမှာ ငါ အချို့စကားတွေကို ထုတ်မပြောခဲ့တာ"

ရှဲ့အာမန်၏ မျက်နှာမှာ လေးနက်တည်ကြည်နေသည်။

"နတ်လမ်းစဉ်ဂိုဏ်းရဲ့ နောက်ခံအကြောင်းအရင်းကို မင်း သိလား"

"မသိပါဘူး"

ဖန့်ချန်က ခေါင်းခါယမ်းလိုက်သည်။ နတ်လမ်းစဉ်ဂိုဏ်းတွင် သူများထက်သာလွန်သော ရှန်းယွမ်အတတ်ပညာများ ရှိသည်ကိုသာ သူသိထားခြင်းဖြစ်သည်။

"နတ်လမ်းစဉ်ဂိုဏ်းရဲ့ သမိုင်းကြောင်းကို တကယ်ပြောရမယ်ဆိုရင်... သမိုင်းမှတ်တမ်းတင်တဲ့ မသေမျိုး တွေတောင် ပြည့်ပြည့်စုံစုံ မှတ်တမ်းတင်နိုင်မှာ မဟုတ်ဘူး"

ရှဲ့အာမန်က အေးဆေးစွာ ဆိုသည်။

ရှေးဟောင်းမသေမျိုးတွေတောင် ပြည့်စုံအောင် မှတ်တမ်းမတင်နိုင်ဘူး ဟုတ်လား ဖန့်ချန်သည် ဖြစ်နိုင်ခြေ တစ်ခုကို ခန့်မှန်းမိသွားသလိုမျိုး တိုးတိုးလေး မေးလိုက်သည်။

"နတ်ဆိုးမျိုးနွယ် နဲ့ ပတ်သက်နေတာလား"

"မှန်တယ်"

ရှဲ့အာမန်က ဖြည်းဖြည်းချင်း ခေါင်းညိတ်သည်။

"လူသားလောက ကိုးခုကို နတ်ဆိုးမျိုးနွယ်တွေ စိုးမိုးပြီး မသေမျိုးလောကကို အုပ်စိုးခဲ့စဉ်ကတည်းက နတ်လမ်းစဉ်ဂိုဏ်းက ရှိနေခဲ့တာ။ ရှေးဟောင်းကာလတုန်းက ဒီနေရာမှာရှိတဲ့ အရာအားလုံးကို နတ်ဆိုးမျိုးနွယ်တွေကပဲ အုပ်ချုပ်ခဲ့တာ။ မင်းမြင်နေရတဲ့ လူသားလောက ကိုးခုကို နတ်ဆိုးမျိုးနွယ်တွေက စောင့်ကြပ်ခဲ့တယ်။ နတ်ဘုရားလောကမှာလည်း နတ်ဆိုးမျိုးနွယ်တွေကပဲ ဧကရာဇ်ဘွဲ့ခံခဲ့သလို၊ ယင်လောကမှာလည်း နတ်ဆိုးမျိုးနွယ်တွေကပဲ ဘုရင်လုပ်ခဲ့ကြတာ"

ဤအချက်များနှင့် ပတ်သက်၍ ဖန့်ချန်သည် အစောကတည်းက အနည်းငယ် သိရှိထားပြီးသားဖြစ်၍ အလွန်အမင်း ထိတ်လန့်သွားခြင်း မရှိပေ။

"မင်း သိထားတဲ့ ဝိညာဉ်ရတနာ အတော်များများဟာလည်း ငါတို့ လူသားမျိုးနွယ်ရဲ့ ရတနာတွေ မဟုတ်ဘူး။ အဲဒီရတနာတွေကို အစောဆုံးမှာ နတ်ဆိုးမျိုးနွယ်ထဲက အစွမ်းထက်တဲ့ ပုဂ္ဂိုလ်တွေက ကိုယ်တိုင် သွန်းလုပ်ခဲ့ကြတာ၊ အဲဒီကမှတစ်ဆင့် ဝိညာဉ်အသိတွေ ပေါက်ဖွားလာခဲ့တာပဲ"

ရှဲ့အာမန်က အလွန်အရေးကြီးသော သတင်းစကားတစ်ခုကို ပြောလိုက်ပြန်သည်။

ဖန့်ချန် ကြောင်အသွားပြီးနောက် အသက်ကို ပြင်းပြင်းရှူလိုက်မိသည်။

"ဝိညာဉ်ရတနာမှတ်တမ်း ပေါ်က ရတနာတွေ အားလုံးက နတ်ဆိုးမျိုးနွယ်တွေရဲ့ လက်ရာတွေလား"

"အားလုံးတော့ မဟုတ်ပါဘူး"

ရှဲ့အာမန်က ရှင်းပြသည်

"ခုခေတ် ဝိညာဉ်ရတနာမှတ်တမ်းပေါ်က ရတနာ ၇၀ ကနေ ၈၀ ရာခိုင်နှုန်းလောက်က နောက်မှ ပေါ်လာတာတွေပါ။ ၂၀ ကနေ ၃၀ ရာခိုင်နှုန်းလောက်ပဲ ရှေးဟောင်းခေတ်ကနေ အခုထိ လက်ဆင့်ကမ်းလာခဲ့တာ။

စစ်မှန်သော နတ်ဘုရားမှန် တို့၊ နတ်လမ်းစဉ်ဂိုဏ်းရဲ့ နတ်ဘုရားဘွဲ့နှင်းသဘင် တို့လိုမျိုး ရတနာတွေဟာ မိစ္ဆာမျိုးနွယ်တွေဆီက ဆင်းသက်လာတဲ့ ရတနာတွေပဲ။

ဒါကြောင့် ရှေးခေတ်တုန်းက အဲဒီရတနာတွေဟာ ငါတို့ လူသားမျိုးနွယ်နဲ့ သတ်ဖြတ်တိုက်ခိုက်ခဲ့ဖူးတယ်။ ငါတို့ လူသားတွေအပေါ် ထားတဲ့ သူတို့ရဲ့ အမုန်းတရားဟာ ဘယ်တုန်းကမှ လျော့ပါးသွားမှာ မဟုတ်ဘူး။

ဒါပေမဲ့ လွန်ခဲ့တဲ့ နှစ်ပေါင်းများစွာက ငါတို့မျိုးနွယ်က အစွမ်းထက်သူတွေ စုပေါင်းပြီး အဲဒီရတနာတွေကို ချိပ်ပိတ်ခဲ့ကြတယ်၊ သူတို့ရဲ့ ဝိညာဉ်အသိတွေကို အိပ်ပျော်သွားအောင် လုပ်ခဲ့လို့သာ လူသားတွေက သူတို့ကို ထိန်းချုပ်နိုင်ခဲ့တာ"

ဖန့်ချန်သည် ထိုအချက်အလက်များကို အစာကြေညက်အောင် ခေတ္တမျှ တိတ်ဆိတ်စွာ စဉ်းစားနေမိသည်။ ဤဝိညာဉ်ရတနာများမှာ နတ်ဆိုးမျိုးနွယ်များ၏ လက်ရာဖြစ်လိမ့်မည်ဟု သူ အရင်က လုံးဝ မတွေးခဲ့မိပေ။

"စီနီယာအစ်မကြီး... ဆိုလိုတာက စစ်မှန်သော နတ်ဘုရားမှန် နိုးထလာသလို၊ နတ်လမ်းစဉ်ဂိုဏ်းရဲ့ နတ်ဘုရားဘွဲ့နှင်းသဘင် လည်း နိုးလာပြီလို့ ယူဆနေတာလား။ ဝိညာဉ်ရတနာ နှစ်ခုက အချင်းချင်း ဆက်သွယ် ကြံစည်ပြီး ကျဆုံးမသေမျိုးတွေရဲ့ အစွမ်းကို အသုံးချကာ နတ်ဆိုးမျိုးနွယ်တွေရဲ့ ဂုဏ်သိက္ခာကို ပြန်လည် ထူထောင်ဖို့ ကြိုးစားနေကြတာလား"

ဖန့်ချန်၏ မျက်နှာမှာ လေးနက်နေသည်။ ဤသို့သာဆိုလျှင် လူသားမျိုးနွယ် ရင်ဆိုင်ရမည့် ရန်သူမှာ စတင်လှုပ်ရှားနေပြီဖြစ်သော မိစ္ဆာမျိုးနွယ်များသာမကတော့ပေ။ အစအဆုံး ကွယ်ပျောက်နေခဲ့သော နတ်ဆိုးမျိုးနွယ်များလည်း ပါဝင်လာပြီ ဖြစ်သည်။ ယခုအခါ ထိုနတ်ဆိုးမျိုးနွယ်များသည်လည်း ရှေ့တန်းသို့ ထွက်လာကြတော့မည် ဖြစ်သည်။

"တကယ်ပဲ ဖြစ်နိုင်ခြေ ရှိတယ်"

ရှဲ့အာမန်က ခေါင်းညိတ်ပြသည်

"ပြီးတော့ အခုရှိနေတဲ့ သဲလွန်စတွေအရ တွက်ချက်ကြည့်မယ်ဆိုရင် ဒီဖြစ်နိုင်ခြေက အတော်လေး မြင့်မားနေတယ်။ ထိုက်ချန်းနယ်မြေ ကိစ္စမှာ သူတို့ ပါဝင်ပတ်သက်နေသလားဆိုတာကိုတော့ ငါ အတည်မပြုနိုင်သေးဘူး။ ဒီနေ့ မင်းကို ဒါတွေ ပြောပြရတာက မင်း ရှဲ့ကျစ် ဖြစ်လာတဲ့အခါ တိကျတဲ့ စုံစမ်းစစ်ဆေးမှု လမ်းကြောင်းတစ်ခု ရှိနေအောင်လို့ပဲ"

"စီနီယာအစ်မကြီး... ရှဲ့ကျစ် အကြောင်းကို အသေးစိတ် ပြောပြပေးလို့ ရမလား"

ဖန့်ချန် စိတ်ဝင်တစား မေးလိုက်သည်။

မိစ္ဆာမျိုးနွယ်တွေရဲ့ လှုပ်ရှားမှုကြောင့် ထိပ်တန်းအင်အားစုတွေ စုပေါင်းဖွဲ့စည်းထားတဲ့ ဌာနတစ်ခုဖြစ်နေမှတော့၊ နတ်ဆိုးမျိုးနွယ်ကို ဖြစ်စေ၊ မိစ္ဆာမျိုးနွယ်ကို ဖြစ်စေ ရင်ဆိုင်ရာမှာ ဒီဌာနဟာ အရေးအကြီးဆုံး အခန်းကဏ္ဍကနေ ပါဝင်လာမှာ ဖြစ်သည်။

"ရှဲ့ကျစ် စီမံကိန်း ဟာ အမြဲတမ်း ရှိနေခဲ့တာ၊ ဒါပေမဲ့ တစ်ခါမှ အကောင်အထည် မဖော်ခဲ့ရဘူး"

ရှဲ့အာမန်က တိုးတိုးလေး ဆိုသည်

"ဘာလို့လဲဆိုတော့ အင်အားစုအသီးသီးရဲ့ တောင်းဆိုချက်တွေက မတူညီကြတော့ မျှခြေတစ်ခုကို မဖန်တီးနိုင်ခဲ့ကြလို့ပဲ။ အခု ထိုက်ချန်းနယ်မြေ ကိစ္စကြောင့်သာ ရှဲ့ကျစ်စီမံကိန်းက တကယ်ပဲ စတင် လှုပ်ရှားလာတာ "

သူမသည် ကြေးညိုရောင် တစ္ဆေမျက်နှာဖုံး တစ်ခုကို ထုတ်ယူကာ ဖန့်ချန်ကို ကမ်းပေးလိုက်သည်။

"မင်း ကျွယ်မင်နန်းတော်ကို မဝင်ခင်ကတည်းက ဒီစီမံကိန်းက စတင်နေခဲ့တာ နှစ်အတော်ကြာပြီ၊ အခုဆိုရင် အတော်လေး ခရီးပေါက်နေပြီလို့ ပြောလို့ရတယ်။ ရှဲ့ကျစ်ရဲ့ နောက်ကွယ်မှာ ဘယ်လို အဆင့် ၉ မသေမျိုးတွေ ရှိနေမလဲဆိုတာ ဘယ်သူမှ မသိဘူး။ ဒီကြေးညိုရောင် တစ္ဆေမျက်နှာဖုံးဟာ မင်း ရှဲ့ကျစ် ကျင့်ကြံသူ ဖြစ်လာတဲ့ အထောက်အထားပဲ။

ဒါကို တပ်ဆင်ပါ၊ နာမည်အတု တစ်ခု သုံးပြီး ရှဲ့ကျစ်ဌာန ကို သွားနိုင်ပြီ။ ဟိုရောက်ရင်တော့ ဘာလုပ်ရမလဲဆိုတာ သင်ပေးမယ့်သူ ရှိလိမ့်မယ်။ ရှဲ့ကျစ်ဌာနက ပေးအပ်တဲ့ အထူးစွမ်းရည်အချို့ကို အသုံးချပြီး စုံစမ်းစစ်ဆေးမှုတွေ လုပ်နိုင်လိမ့်မယ်"

ဖန့်ချန်သည် လက်ထဲက ကြေးညိုရောင် တစ္ဆေမျက်နှာဖုံးကို ကြည့်လိုက်ရာ အလွန် ထူးဆန်းသော အရှိန်အဝါတစ်ခုကို ခံစားလိုက်ရပြီး လူကို နက်နဲဆန်းကြယ်သော ခံစားချက်မျိုး ပေးစွမ်းနေသည်။

"ရှဲ့ကျစ်ဌာနမှာလည်း မင်း ဘယ်သူ့ကိုမှ အလွယ်တကူ မယုံနဲ့၊ စုံစမ်းစစ်ဆေးမှုနဲ့ လှုပ်ရှားမှု မှန်သမျှကို တစ်ယောက်တည်း လုပ်တာ အကောင်းဆုံးပဲ။ တကယ်လို့ မလွှဲမရှောင်သာဘဲ ပူးပေါင်းဆောင်ရွက်ရမယ်ဆိုရင်လည်း အခြေအနေအမျိုးမျိုးကို ရင်ဆိုင်နိုင်အောင် ကိုယ့်ဖဲချပ်ကို ကိုယ်အသင့်ပြင်ထားပါ"

ရှဲ့အာမန်သည် ဖန့်ချန်ကို အလွန်လေးနက်စွာ ကြည့်နေသည်။

"ရှဲ့ကျစ် တစ်ယောက် ဖြစ်လာဖို့ဆိုတာ တာဝန်က အရမ်းကြီးသလို၊ အန္တရာယ်လည်း အရမ်းများတယ်။ သေချာ စဉ်းစားပြီးမှ ခေါင်းညိတ်ပါ။ တကယ်လို့ မသွားချင်ဘူးဆိုရင် ဒါကို ငါ့ကို ပြန်ပေးလိုက်ရုံပဲ"

သူမက ကြေးညိုရောင် တစ္ဆေမျက်နှာဖုံးကို ပြန်ယူရန် လက်ဝါးကို ဖြန့်လိုက်သည်။ ဖန့်ချန်သည် ခေတ္တမျှ တိတ်ဆိတ်စွာ စဉ်းစားပြီးနောက် မျက်နှာဖုံးကို သိမ်းဆည်းလိုက်ကာ ပြုံး၍ ဆိုသည်။

"စီနီယာအစ်မကြီး... မသေမျိုးဖြစ်အောင် ကျင့်ကြံတဲ့လမ်းမှာ အန္တရာယ်မရှိတာ ဘယ်မှာရှိမှာလဲ"

ရှဲ့အာမန် ပြုံးသွား၏။ သူမက ဖြည်းဖြည်းချင်း ခေါင်းညိတ်ပြသည်။

"မင်းကို ဆယ်နှစ် အချိန်ပေးမယ်။ ဆယ်နှစ်ပြည့်ရင်တော့ ရှဲ့ကျစ်ဌာနကို မဖြစ်မနေ သွားပြီး သတင်းပို့ရမယ်။ အချိန်ကျော်သွားရင် မင်းရဲ့ အခွင့်အရေးကို ပယ်ဖျက်ခံရလိမ့်မယ်။ ဘယ်လိုသွားရမလဲဆိုတာကိုတော့ ဒီမျက်နှာဖုံးကို တပ်လိုက်ရင် မင်း နားလည်သွားလိမ့်မယ်"

ဆယ်နှစ်လား။ ဖန့်ချန် ခေါင်းညိတ်လိုက်သည်။

ဖန့်ချန်သည် ဖန့်ထုံကို ရှာဖွေတွေ့ရှိပြီးနောက် သူ့ကို လူသားဘိုးဘေးတောင် သို့ ခေါ်ဆောင်လာခဲ့သည်။ ဖန့်ကျစ်ရွှယ်တို့ မရှိသည်ကို မြင်သောအခါ သူသည် မုံ့ချင်းလင် ကို ခေါ်ယူ၍ ဖန့်ထုံအား ဤနေရာနှင့် ရင်းနှီးအောင် လိုက်လံပြသပေးရန် မှာကြားလိုက်သည်။

ထိုနေရာတွင် ဖန့်ထုံ လေ့လာဆည်းပူးရန်အတွက် လုံလောက်သော ကျင့်စဉ်များနှင့် အတတ်ပညာများ ရှိနေသည်။ ကျင့်ကြံရန်အတွက်လည်း အလွန်ကောင်းမွန်သော ပတ်ဝန်းကျင် ရှိနေသည်။ ဤနေရာသို့ ရောက်ရှိလာခြင်းဖြင့် ဖန့်ထုံအတွက် အရာအားလုံး ပြည့်စုံသွားပြီဟု ပြောနိုင်ပါသည်။ ကျန်ရှိနေသည်မှာ အချိန်ပေးရန်သာ လိုတော့သည်။

ဖန့်ထုံကို နေရာချထားပေးပြီးနောက် ဖန့်ချန်သည် လှည့်ထွက်ကာ အလွန်ထူထပ်သော မြူဖြူများအတွင်းသို့ တိုးဝင်သွားတော့သည်။

ကျွယ်မင် ယင်လောက

နတ်မိမယ်ယွီ သည် လက်ဖက်ရည်ဆိုင်တွင် ထိုင်ကာ ပဲစေ့များကို စားရင်း ဘေးနားရှိ ဝိညာဉ်များ၏ စကားဝိုင်းကို နားထောင်နေသည်။ ဤဝိညာဉ်များသည် သူမကဲ့သို့ပင် ပြန်လည်ဝင်စားရန် စောင့်ဆိုင်းနေကြသူများဖြစ်ပြီး၊ မဝင်စားမီအချိန်အတွင်း ကျွယ်မင်ယင်လောက တွင် သာမန်မြို့သူမြို့သားများကဲ့သို့ နေထိုင်နိုင်ကြသည်။

"လူဆိုးဆရာကြီး... လူအိုကြီး... ထွက်သွားလိုက်တာ နှစ်တွေ အများကြီးတောင် ကြာသွားပြီ"

ရုတ်တရက်ဆိုသလို နတ်မိမယ်ယွီ သည် စားပွဲပေါ်က ပဲစေ့များကို ရန်သူသဖွယ် သဘောထားကာ သူမ၏ သွယ်လျသော လက်ချောင်းလေးများဖြင့် တစ်ခုပြီးတစ်ခု ထိုးဆွနေတော့သည်။ သူမ ဆဲဆိုနေတုန်းမှာပင် နားထဲသို့ ရင်းနှီးသော အသံတစ်ခု တိုးဝင်လာသည်။

"ပဲစေ့ဆိုတာ စားဖို့လေ"

ဖန့်ချန်က အင်္ကျီလက်စကို တစ်ချက်ဝှေ့ယမ်းကာ နတ်မိမယ်ယွီ ၏ မျက်နှာချင်းဆိုင်တွင် ဝင်ထိုင်လိုက်သည်။

"အမလေး"

ယွိနတ်မိမယ်မှာ ပျာပျာသလဲ ဖြစ်သွားပြီး စားပွဲပေါ်တွင် ပြန့်ကျဲနေသော ပဲစေ့များကို ပန်းကန်ထဲသို့ အလျင်အမြန် သိမ်းဆည်းလိုက်သည်။

သူမက ဖန့်ချန်ကို အပြစ်လုပ်ထားသူသဖွယ် ကြည့်ကာ

"ဆရာ... ဘယ်တုန်းက ရောက်တာလဲ"

"မင်း သူတို့ကို ထိုးဆွနေတဲ့ အချိန်တုန်းကပေါ့"

ဖန့်ချန်က ရယ်မောလိုက်သည်။

နတ်မိမယ်ယွီသည် သူမ၏ စိုးရိမ်စိတ်ကို ဖုံးကွယ်ကာ ခါးထောက်ပြီး နှုတ်ခမ်းဆူလိုက်သည်။

"ဆရာက ဘာလို့ တစ်ခါသွားရင် နှစ်တွေ အများကြီး ကြာသွားရတာလဲ။ ကျွန်မ ဒီမှာ ဘယ်လောက် ပျင်းနေလဲဆိုတာ ရှင် မသိဘူးလား"

"အလုပ်လေးတွေ ရှိလို့ နှောင့်နှေးသွားတာပါ"

ဖန့်ချန်က ရယ်မောရင်း ပဲစေ့တစ်စေ့ကို ကောက်ယူကာ ပါးစပ်ထဲ ထည့်လိုက်သည်။

အင်း... စားလို့မကောင်းဘူး။

သူက မသေသေးသဖြင့် ထိုပဲစေ့၏ အရသာကို တကယ်မခံစားနိုင်ပေ။

"ဒါဆို ဆရာ အလုပ်တွေ ပြီးပြီလား။ ကျွန်မကို သေသေချာချာ အချိန်ပေးနိုင်ပြီလား"

ယွိနတ်မိမယ်က ဝမ်းသာအားရ မေးလိုက်သည်

"ကျွန်မ ဒီကျွယ်မင်ယင်လောက ကနေ ထွက်လို့မရဘူး ဖြစ်နေတယ်။ ဒါပေမဲ့ အပြင်လောကကိုလည်း ထွက်ကြည့်ချင်သေးတယ်..."

ဖန့်ချန်သည် မူလက သူမကို အမြန်ဆုံး ဝင်စားခိုင်းရန် ငြင်းပယ်ဖို့ ရည်ရွယ်ထားသော်လည်း စိတ်ကူးတစ်ခု ရသွားသဖြင့် ခေတ္တမျှ တိတ်ဆိတ်သွားပြီးနောက် ခေါင်းညိတ်ပြလိုက်သည်။

"ကောင်းပြီလေ... ငါ ကိစ္စတစ်ခု သွားလုပ်လိုက်ဦးမယ်၊ ပြီးရင် မင်းကို အပြင်ကို လိုက်ပြမယ်"

"နောက်ထပ် အလုပ်သွားလုပ်ဦးမလို့လား"

ယွိနတ်မိမယ်၏ မျက်နှာလေး ညိုးနွမ်းသွားသည်။

"သိပ်မဝေးပါဘူး၊ ခဏလေးပဲ။ မင်း ဒီမှာ စောင့်နေနော်"

ဖန့်ချန်က ပြုံးရင်း အဝေးက ဝိညာဉ်ကူးပြောင်းရေးဌာန ကို ညွှန်ပြကာ ထရပ်ပြီး ထွက်ခွာသွားတော့သည်။