အခန်း (၆၃-၆၄)
Vol. 7 Ch. 63-64
Chapter 63+64
~
အခန်း ၆၃+၆၄ : ဧကရီ၏ ပထမဆုံး ဂိမ်းကစားခြင်း
~
"လင်းဖန်..ငါ့ သူငယ်ချင်းတွေကို လှမ်းမေးကြည့်ပြီးပြီ.. ငါ့သူငယ်ချင်းတစ်ယောက်က အွန်လိုင်းမှာ ဂိမ်းအတူဆော့ပေးတဲ့ ဆိုင်ဖွင့်ထားတယ်လေ..အဲ့ဒီကောင်ပြောတာက ဂိမ်းသိပ်မဆော့တတ်လည်း ကိစ္စမရှိဘူး.. အဓိကက အသံလေးကောင်းဖို့ပဲတဲ့.. မင်း ဘယ်လိုထင်လဲ.. "
ကျိုးယန်သည် သူ၏အဆက်အသွယ်များထဲတွင် လိုက်လံစုံစမ်းပြီးနောက် ပညာအရည်အချင်းမရှိ၊ အတွေ့အကြုံမရှိသည့်အပြင် ဘာမှလည်းမလုပ်တတ်သေးသော လုံယွဲ့ကို လက်ခံမည့် အလုပ်တစ်ခုကို နောက်ဆုံးတွင်မတော့ ရှာဖွေပေးနိုင်ခဲ့လေပြီ။
"နင်ရော ဘယ်လိုသဘောရလဲ.."
လင်းဖန်က လုံယွဲ့ဘက်သို့လှည့်ကာ သူမ၏သဘောထားကို မေးလိုက်သည်။
ဂိမ်းအတူဆော့ပေးရသည့် အလုပ်ဆိုပါက တခြားဝန်ဆောင်မှုအလုပ်များကဲ့သို့ ခိုင်းဖတ်တစ်ခုလို ဖြစ်နေမည်မဟုတ်ဘဲ အလုပ်မှာလည်း အတော်အတန် သက်သောင့်သက်သာရှိသည်ဟု ဆိုနိုင်သည်။
သူ့အနေနှင့်တော့ သိပ်ပြီးအားမပေးချင်သော်လည်း ရွေးချယ်စရာတစ်ခုအနေနှင့်တော့ ရှိနေသည်။ အဓိကဆုံးဖြတ်ချက်မှာ သူမအပေါ်တွင်သာ မူတည်၏။
"ဂိမ်းဆိုတာလား..ကလေးတွေကို ထိန်းပေးပြီး သူတို့နဲ့ ကစားပေးရတာမျိုးလား.."
လုံယွဲ့က မျက်တောင်လေးပုတ်ခတ်ပုတ်ခတ်လုပ်ရင်း ဇဝေဇဝါဖြစ်နေသော မျက်နှာပေးဖြင့် မေးလိုက်သည်။ သူမ၏စကားကြောင့် ကျိုးယန်မှာ ချက်ချင်းပင် ရယ်မောမိတော့သည်။
"ဟားဟားဟား..မရီး ပြောတာက ကလေးထိန်းတာကို ခေါ်တာလေ.."
"ဂိမ်းအတူဆော့ပေးတယ်ဆိုတာက အွန်လိုင်းကနေ အော်ဒါလက်ခံပြီး အလုပ်ရှင်တွေနဲ့ ဂိမ်းအတူတူဆော့ပေးရတာကို ပြောတာ.. ကလေးတွေနဲ့လည်း တွေ့နိုင်ပေမဲ့ အများစုကတော့ အသက် ဆယ်ကျော်သက်.. နှစ်ဆယ်ကျော်အရွယ် လူကြီးလေးတွေပဲ များတယ်.."
လင်းဖန်က ရှင်းပြရင်း သူ၏ဖုန်းထဲမှ ဂိမ်းဆော့ဖ်ဝဲလ်ကိုဖွင့်ကာ ဂိမ်းစာရင်းများကို ပြသလိုက်သည်။
"ဒီမှာကြည့်.. ဒါတွေအားလုံးက ဂိမ်းတွေပဲ.."
"ဒီလောက်တောင် များတာလား.."
လုံယွဲ့သည် ဖုန်းမျက်နှာပြင်အနားသို့ တိုးကပ်ကြည့်လိုက်ရာ အဆုံးမရှိသော ဂိမ်းစာရင်းများကို မြင်ပြီး အံ့အားသင့်သွားရသည်။
"အခုခေတ်မှာ ဂိမ်းတွေက အများကြီးပဲ.. အမျိုးအစားတွေလည်း အစုံပဲ.. ဒါပေမဲ့ စိတ်မပူပါနဲ့.. ဂိမ်းအတူဆော့ပေးတဲ့ ဝန်ဆောင်မှုမှာ သုံးတဲ့ဂိမ်းက သိပ်အများကြီး မဟုတ်ပါဘူး.."
"လောလောဆယ် ဖုန်းဂိမ်းတွေထဲမှာ လူကြိုက်အများဆုံးကတော့ ဒီဂိမ်းပဲ.. King of Glory တဲ့.."
လင်းဖန်က ဂိမ်းအဆင့်သတ်မှတ်ချက်ကို နှိပ်လိုက်ရာ ထိပ်ဆုံးတွင်ရှိနေသော King of Glory ဂိမ်းကို တွေ့လိုက်ရသည်။
"ဒီဂိမ်းကို လူအများကြီး ဆော့ကြတာလား.."
လုံယွဲ့က စပ်စုလိုက်သည်။
"ဒါပေါ့.. ဒါက အခုခေတ်မှာ လူကြိုက်အများဆုံး ဖုန်းဂိမ်းပဲ.. ဒီဂိမ်းမှာ အတူဆော့ပေးတဲ့သူတွေရော.. အဆင့်တက်အောင် ကူဆော့ပေးတဲ့သူတွေရော အများကြီးပဲ.. ဈေးကွက်က တော်တော်လေးကြီးတာ.."
ကျိုးယန်က ဝင်ပြောလိုက်သည်။
King of glory ထွက်ရှိလာပြီးနောက် နှစ်အနည်းငယ်အတွင်းမှာပင် မူလတန်းကျောင်းသားများမှစ၍ ရုံးဝန်ထမ်းများအထိ တစ်နိုင်ငံလုံးအတိုင်းအတာဖြင့် ရေပန်းစားသွားခဲ့သည်။ ထိုအချိန်က လူတိုင်းနီးပါး၏ဖုန်းတွင် ဤဂိမ်းရှိနေတတ်ပြီး လူမှုဆက်ဆံရေးအတွက် အကောင်းဆုံးဂိမ်းတစ်ခုဟု ဆိုလျှင်လည်း မမှားပေ။
ကျောင်းဆင်းချိန်ဖြစ်စေ၊ အလုပ်ပြီး၍ လူစုလူဝေးလုပ်ချိန်ဖြစ်စေ တစ်ယောက်ယောက်က တစ်ပွဲလောက် ဆော့ကြမလား ဟု စကားစလေ့ရှိကြသည်။
"နင် တစ်ခါမှ မဆော့ဖူးသေးတော့ အရင်ဆုံး ဂိမ်းကို ဒေါင်းလုဒ်ဆွဲပြီး စမ်းကြည့်လိုက်ဦးလေ..နင်နဲ့ ကိုက်ညီရဲ့လားဆိုတာ သိရအောင်လို့.."
လင်းဖန်က လုံယွဲ့၏လက်ထဲမှ ဖုန်းကိုယူကာ King of Glory ဂိမ်းကို ချက်ချင်းဒေါင်းလုဒ်ဆွဲပေးလိုက်သည်။
ဂိမ်းထဲသို့ ဝင်လိုက်သောအခါ လုံယွဲ့သည် အတွေ့အကြုံ လုံးဝမရှိသော အဆင့်ဖြင့် စတင်ရပေ၏။
လေ့ကျင့်ခန်း ထဲသို့ ဝင်လိုက်သောအခါ သူရဲကောင်း (Hero) ရွေးချယ်သည့် နေရာကို အရင်ဆုံး ရောက်ရှိသွားသည်။
"ဒါက ဟီးရိုး ရွေးရမယ့်နေရာပဲ.. ကိုယ်ဆော့ရမယ့် နေရာနဲ့ ရန်သူ့ဘက်က ရွေးချယ်မှုအပေါ် မူတည်ပြီး သင့်တော်တဲ့သူကို ရွေးရမယ်.."
"ဒါပေမဲ့ ဒါက ပထမဆုံးအကြိမ်ဆိုတော့ အများကြီး စဉ်းစားမနေပါနဲ့ဦး.. နင် ကြိုက်တဲ့သူကိုပဲ ရွေးလိုက်.."
"အများကြီးပါလား . . ."
လုံယွဲ့သည် စီရီနေသော သူရဲကောင်းရုပ်ပုံများကို ကြည့်ရင်း ဘယ်သူ့ကို ရွေးရမှန်းမသိ ဖြစ်နေသည်။
သို့သော် များပြားလှသော သူရဲကောင်းစာရင်းထဲတွင် သူမ ရင်းနှီးနေသော နာမည်တစ်ခုကို တွေ့လိုက်ရသည်။ ၎င်းမှာ နွားနတ်ဆိုး (Bull Demon)ပင် ဖြစ်သည်။
အင်မော်တယ်နယ်မြေတွင်လည်း နွားနတ်ဆိုးဟု ခေါ်သော မိစ္ဆာများ ရှိသည်။ ၎င်းမှာ သူမ၏ဘဝတွင် ပထမဆုံး သတ်ဖြတ်ခဲ့ဖူးသော မိစ္ဆာဖြစ်သဖြင့် ထိုနာမည်ကို မြင်လိုက်ရသောအခါ ရင်းနှီးမှုရှိသည်ဟု ခံစားလိုက်ရသည်။
"ဒီတစ်ယောက်ပဲ.."
လုံယွဲ့က နွားနတ်ဆိုးကို တွန့်ဆုတ်ခြင်းမရှိဘဲ ရွေးချယ်လိုက်သည်ကို မြင်သောအခါ လင်းဖန်နှင့် ကျိုးယန်တို့မှာ အတော်လေး အံ့သြသွားကြသည်။
ပုံမှန်အားဖြင့် မိန်းကလေးများသည် ချောမောလှပသော သူရဲကောင်းများ သို့မဟုတ် ချစ်စရာကောင်းသော ဇာတ်ကောင်များကိုသာ ရွေးချယ်လေ့ရှိကြသည်။ နွားနတ်ဆိုးကဲ့သို့ ရုပ်ဆိုးဆိုးဇာတ်ကောင်ကို ပထမဆုံးအနေနှင့် ရွေးချယ်သည်ကို သူတို့ ပထမဆုံး မြင်ဖူးခြင်းဖြစ်သည်။
သို့သော် ထိုကိစ္စက အခုချိန်မှာ အရေးမကြီးသေးပေ။ အဓိကမှာ သူမကို ဂိမ်းထိန်းချုပ်ပုံနှင့် စည်းကမ်းများကို ရင်းနှီးသွားအောင် ကူညီပေးရန်သာ ဖြစ်သည်။
ဂိမ်းစတင်သည်နှင့် လုံယွဲ့သည် လင်းဖန်နှင့် ကျိုးယန်တို့၏ အနီးကပ်လမ်းညွှန်မှုဖြင့် ဂိမ်းထဲရှိ လမ်းညွှန်ချက်များကို လိုက်နာကာ ဂိမ်းဆော့ပုံကို သင်ယူတော့သည်။
"နင် ရွေးထားတဲ့သူက တန့် (Tank) အမျိုးအစားပဲ.. အဓိကကတော့ mmကို အောက်လမ်းမှာ ကူညီပေးရမယ်.."
"ဒါက သာမန်တိုက်ခိုက်တာ.. ဒါတွေကတော့ စွမ်းရည် (Skill) တွေပေါ့..စွမ်းရည်တစ်ခုချင်းစီမှာ မတူညီတဲ့ အာနိသင်တွေ ရှိတယ်.. ဥပမာ နွားနတ်ဆိုးရဲ့ ပထမစကေးက ရန်သူကို မူးသွားစေပြီး ဒမ်းမေ့ ထိစေတယ်.."
"ပထမတစ်ခုကို နှိပ်ပြီးရင် တခြားဟာတွေကို ဘာလို့ နှိပ်လို့မရတာလဲ.."
"အဲဒါက နင့်ရဲ့ အဆင့် (Level) မတက်သေးလို့လေ.. လယ်ဗယ်တက်မှ နှိပ်လို့ရမယ်"
"မရီး.. ဟိုမှာတွေ့လား.. ဟိုမီနီယံတွေကို သတ်ရင် ပိုက်ဆံနဲ့ အတွေ့အကြုံ ရလိမ့်မယ်.. အဲ့ဒါမှ စကေးတွေ မြှင့်လို့ရမယ်..ပစ္စည်းတွေ ဝယ်လို့ရမယ်.."
"ပြီးတော့ ဒါတွေက အထူးစွမ်းရည်တွေပေါ့ . . ."
" . . ."
လုံယွဲ့သည် ဖုန်းကို လက်နှစ်ဖက်ဖြင့် ကျစ်ကျစ်ပါအောင်ဆုပ်ကိုင်ထားပြီး သူမ၏ မျက်နှာလှလှလေးမှာ အလွန်တည်ကြည်လေးနက်နေ၏။ သူမ၏ မျက်လုံးများက မျက်နှာပြင်ပေါ်တွင်သာ ရှိနေပြီး လက်ချောင်းလေးများကလည်း အဆက်မပြတ် ရွေ့လျားနှိပ်နေသည်။
အလုပ်ရရှိရန်အတွက် သူမ၏ ကြိုးစားအားထုတ်မှုမှာ အင်မော်တယ်နည်းလမ်းများနှင့် လက်နက်သွန်းလုပ်နည်းများကို စတင်သင်ယူစဉ်ကထက်ပင် ပို၍ လေးနက်နေပုံရသည်။
လင်းဖန်နှင့် ကျိုးယန်တို့ကလည်း ဘေးတစ်ဖက်တစ်ချက်စီမှနေ၍ ဘယ်လိုဆော့ရမည်ကို အဆက်မပြတ် ရှင်းပြပေးနေကြသည်။
မကြာမီမှာပင် အဆင့်မြင့်ကစားသမားဟောင်းနှစ်ယောက်၏ သင်ကြားပေးမှုကြောင့် သူမသည် ဂိမ်း၏ အခြေခံစည်းမျဉ်းများနှင့် ထိန်းချုပ်ပုံများကို နားလည်သွားခဲ့သည်။
"ကောင်းပြီ.. နင် ဒီဂိမ်းရဲ့ အနှစ်သာရကို သဘောပေါက်သွားပြီ..အခု တကယ့်ပွဲကို စဆော့ကြည့်ရအောင်.."
လင်းဖန်နှင့် ကျိုးယန်တို့မှာ သက်ပြင်းချနိုင်သွားကြပြီး ချီးကျူးအားပေးသော မျက်လုံးများဖြင့် ကြည့်လိုက်ကြသည်။
လုံယွဲ့သည် ဂိမ်းကို ပထမဆုံးအကြိမ် ဆော့ဖူးခြင်းဖြစ်သော်လည်း သူမ၏ နားလည်နိုင်စွမ်းမှာ အလွန်မြင့်မားလှသည်။ သူတို့ရှင်းပြသမျှကို ချက်ချင်းနားလည်သွားသဖြင့် သူတို့ထင်ထားသည်ထက် ပို၍ ထက်မြက်ကြောင်း သက်သေပြလိုက်ခြင်းပင် ဖြစ်သည်။
"အင်း.."
လုံယွဲ့က လေးနက်စွာ ခေါင်းညိတ်လိုက်ပြီး တကယ့်ပွဲစဉ်ထဲသို့ ဝင်လိုက်သည်။
တခြားသူများအတွက်တော့ သာမန်ဂိမ်းတစ်ခုသာ ဖြစ်သော်လည်း သူမအတွက်မူ ဤသည်က ဂိုဏ်းဝင်စာမေးပွဲတစ်ခုကဲ့သို့ပင် ဖြစ်ချေသည်။ ဒါဟာ ကိုယ့်ကိုယ်ကိုယ် သက်သေပြဖို့ အကောင်းဆုံး အခွင့်အရေးပင်။
မကြာမီမှာပင် ပြိုက်ဘက်များနှင့် တွေ့ဆုံသွားပြီး ပွဲစတင်ခဲ့သည်။
လုံယွဲ့သည် တွန့်ဆုတ်နေခြင်းမရှိဘဲ ခုနက လေ့ကျင့်ထားသော ဟီးရိုးကိုသာ ရွေးချယ်လိုက်၏။
နွားနတ်ဆိုး။ အတည်ပြုလိုက်ပြီ။
ဂိမ်းစတင်သည်နှင့် သူမသည် နွားနတ်ဆိုးကို ထိန်းချုပ်ကာ ပစ္စည်းများဝယ်ယူပြီး အပေါ်လမ်းသို့ တန်းတန်းမတ်မတ် လျှောက်သွားတော့သည်။
လမ်းတွင် ပြိုင်ဘက်နှင့် စတင်တွေ့ဆုံချိန်မှာပင် ယုံကြည်မှုအပြည့်ရှိနေသော ဧကရီမှာ ပြိုင်ဘက်၏ တိုက်ခိုက်မှုများကြောင့် ဇဝေဇဝါ ဖြစ်သွားရသည်။
"သူက ဘာလို့ ဒီလောက် အဝေးကြီးကနေ ငါ့ကို လှမ်းပစ်နိုင်တာလဲ.."
"ငါ ဘာလို့ သူ့ကို ထိအောင် မလုပ်နိုင်ရတာလဲ.."
"သူက ငါ့ထက် ပိုမြန်နေသလိုပဲ.. ဘာကြောင့်လဲ.."
လုံယွဲ့၏ ဂိမ်းကစားပုံကို ငြိမ်ငြိမ်လေး စောင့်ကြည့်နေကြသော လင်းဖန်နှင့် ကျိုးယန်တို့မှာ ဆက်၍ သည်းမခံနိုင်တော့ပေ။
"သူက ဖိနပ်ဝယ်ထားတာဆိုတော့ ပိုမြန်မှာပေါ့ . . ."
"ဒါပေမဲ့ ကိစ္စမရှိပါဘူး.. မနိုင်ရင် ရှောင်လိုက်လေ.. ဇွတ်မတိုက်နဲ့ဦး.. လမ်းကိုပဲ ထိန်းထား.."
"မဖြစ်ဘူး.. ငါက ဂျီရှန်းထျန်းကုန်းရဲ့ ဧကရီပဲ.. ဒီလိုလူကို ငါက ဘယ်လိုလုပ် ရှုံးပေးနိုင်မှာလဲ.. ငါ့ပုဆိန်ကို ခံစားကြည့်စမ်း.. သေပေတော့.."
လုံယွဲ့သည် ဖုန်းမျက်နှာပြင်ကို အပြင်းအထန် ပွတ်ဆွဲရင်း စူးစူးရှရှ အော်ဟစ်လိုက်သည်။
ဂိမ်းထဲတွင် အာရုံအပြည့်ရောက်နေသဖြင့် ဘေးနားက ကျိုးယန်ရှိနေသည်ကိုပင် သူမ မေ့သွားပုံရသည်။
ကျိုးယန်ကတော့ စိုးရိမ်သောမျက်နှာဖြင့် လင်းဖန်ဘက်သို့ လှည့်ကာ ပါးစပ်ကိုလက်ဖြင့်အုပ်ပြီး တိုးတိုးလေး မေးလိုက်သည်။
"လင်းဖန်..မရီးက ထူးဆန်းတာတွေ ထပ်အော်နေပြန်ပြီ.. တကယ်ပဲ အဆင်ပြေရဲ့လား.."
"အဆင်ပြေပါတယ်.. သူ ဂိမ်းထဲ စိတ်ပါသွားလို့ပါ.. စိတ်လှုပ်ရှားလာရင် အဲ့လို ထူးဆန်းတာတွေ အော်တတ်တာ သဘာဝပဲလေ.."
"မင်းရော ဆွန်းဝူခုန်း (Sun Wukong) နဲ့ ဆော့ရင် ငါ့တုတ်ကို စားလိုက် လို့ အော်တတ်တာပဲ မလား.."
"ဟီးဟီး.. အဲ့လိုပြောတော့လည်း ဟုတ်သားပဲ . . ."
ကျိုးယန် စဉ်းစားကြည့်တော့လည်း ဟုတ်နေသဖြင့် ဆက်၍ မတွေးတော့ပေ။
'ဒါက ဂိမ်းဆော့နေတာပဲလေ.. တစ်ခါတလေ ထူးထူးဆန်းဆန်းတွေ အော်တာက သဘာဝပဲ မလား..'