အခန်း (၁၆၃-၁၆၄)

အခန်း (၁၆၃) လုံးလုံးလျားလျား သဘောထားကွဲလွဲခြင်း... ကံကြမ္မာ ကုန်ဆုံးပြီ

ကောင်းကင်ပြာ၏စိတ်သည် ဤအချိန်အခိုက်အတန့်တွင် ကသောင်းကနင်း ဖြစ်နေပေ၏။

ခုံးဝူတောက်၏ စကားလုံးတိုင်းသည် သူမ၏ နှလုံးသား အနက်ရှိုင်းဆုံးနေရာရှိ ကြိုးများကို ဆွဲ၍လှုပ်ခတ်နေသည့်အလားပင်။

ရိုးရိုးသားသား ပြောရလျှင် ယနေ့ တုန်လှုပ်ချောက်ချားအင်မော်တယ်၏ စွမ်းဆောင်ရည်က သူမကို အမှန်တကယ် စိတ်ပျက်စေခဲ့သည်။

လက်ရှိတွင် တုန်လှုပ်ချောက်ချား အင်မော်တယ်သည် သူ၏ယခင်ဘဝက ကောင်းကင်ကံကြမ္မာ မဟာဧကရာဇ် မဟုတ်တော့ချေ။

တားမြစ်နယ်မြေ၏ နတ်ဘုရားသားတော်အရှင် ဖြစ်သော ခုံးဝူတောက်ကဲ့သို့ ကြောက်မက်ဖွယ်ကောင်းသည့် ပါရမီရှင်ကို ရင်ဆိုင်ရသောအခါ သူ့ထံ၌ ခုခံနိုင်စွမ်း လုံးဝ မရှိခဲ့ပေ။

သို့သော် တုန်လှုပ်ချောက်ချား အင်မော်တယ်သည် ထိုအချက်ကို သတိမပြုမိဘဲ ရှိနေခဲ့ပေ၏။

သူက ခုံးဝူတောက်ကို အလွန်အကျွံ ဆက်လက်၍ ရန်စနေခဲ့ပြီး အခြေအနေကို ဤအဆင့်အထိ ကြီးထွားလာစေခဲ့သည်။

ခုံးဝူတောက် ပြောဆိုခဲ့သည့် စကားများကလည်း သူမ၏စိတ်ကို အလွန်အမင်း ယိမ်းယိုင်သွားစေသည်။

ကောင်းကင်ဘုံ တာအိုနယ်မြေ၏ အချုပ်အနှောင်များမှ လွတ်မြောက်ကာ ပြင်ပလောကသို့ ထွက်ခွာနိုင်ရန် ရည်ရွယ်ချက်ဖြင့် မရေမတွက်နိုင်သော နှစ်ကာလများစွာ စုဆောင်းမှုများမှတစ်ဆင့် တုန်လှုပ်ချောက်ချား အင်မော်တယ်ကို သူမ ပြုစုပျိုးထောင်ခဲ့ခြင်း ဖြစ်ပေ၏။

အကယ်၍ အချိန်လေဟာနယ် တားမြစ်နယ်မြေ၏ နတ်ဘုရားသားတော်အရှင် အနေဖြင့် ခုံးဝူတောက်က သူမကို ကူညီရန် ဆန္ဒရှိမည်ဆိုပါက ထိုအချက်က နှစ်ရာပေါင်းများစွာ ကြာမြင့်မည့် အချိန်ကိုချွေတာနိုင်မည်မှာ သေချာပေါက်ပင်။

သို့သော်...

ကောင်းကင်ပြာသည် တစ်စုံတစ်ခုကို ရုတ်တရက် တွေးတောမိသွားပြီး မလိုလားမှု အရိပ်အယောင်လေးများ ပြည့်နှက်နေသော သူမ၏အကြည့်များသည် တုန်လှုပ်ချောက်ချား အင်မော်တယ်ထံသို့ ရောက်ရှိသွားပေ၏။

တုန်လှုပ်ချောက်ချား အင်မော်တယ်သည် သူမအတွက် အလွန်ထူးခြားနေပြီး သူ့ကို သူမ၏ ကလေးဟုပင် ဆိုနိုင်သည်။ ဤကိစ္စကြောင့် သူ့ကို စွန့်ပစ်လိုက်ရန်မှာ သူမအတွက် အနည်းငယ် ခံနိုင်ရည်ရှိမည် မဟုတ်ချေ။

"စီနီယာ... ဒီလို အသုံးမကျတဲ့ အမှိုက် တစ်ကောင်အတွက် မင်းရဲ့အနာဂတ်ကို တကယ်ပဲ လောင်းကြေးထပ်မှာလား..."

ခုံးဝူတောက်သည် ကောင်းကင်ပြာထံသို့ ရုတ်တရက် ပို၍နီးကပ်စွာ ချဥ်းကပ်လာခဲ့ပေ၏။

"ဒါ့ပြင်... ဒီကိစ္စကို ဒီဂျူနီယာက စီနီယာကို ပေးသနားတဲ့ မျက်နှာသာပေးမှု တစ်ခုလို့လည်း သတ်မှတ်လို့ရတယ်..."

"စီနီယာ... ဒီကိစ္စမှာ မင်းအတွက် ရွေးချယ်စရာ နှစ်ခုပဲ ရှိတယ်... လက်နက်ချမလား... အသေခံမလား..."

"နင်..."

ကောင်းကင်ပြာသည် ဒေါသထွက်နေသည့်တိုင်အောင် အကူအညီမဲ့နေသလိုလည်း ခံစားလိုက်ရ၏။

ခုံးဝူတောက်က လိမ်ပြောနေခြင်း မဟုတ်သည်မှာ သေချာပေါက်ပင်။

ကောင်းကင်တာအို၏ လူသားပုံရိပ်ယောင်တစ်ခုအနေဖြင့် သူမသည် ဥပဒေသများကို အာရုံခံနိုင်စွမ်း အမြဲတစေ အားကောင်းလှသည်။

ခုံးဝူတောက်၏ ခန္ဓာကိုယ်အတွင်းတွင် သူမ၏ စိတ်ကူးယဉ်နိုင်စွမ်းထက် များစွာကျော်လွန်သော စွမ်းအားတစ်ခု တည်ရှိနေသည်။

ထိုအရာသည် အထူးမဟာတာအို၏ ကောင်းချီး တစ်ခု ဖြစ်ပုံရသည်။

အကယ်၍ သူမသာ ခုံးဝူတောက်ကို တိုက်ခိုက်ရန် ရဲတင်းမည်ဆိုပါက သူ့အပေါ် မဟာတာအို ကောင်းချီးကို ပေးသနားခဲ့သော တည်ရှိမှုသည် အချိန်မြစ်ကို ဖြတ်ကျော်ကာ ဆင်းသက်လာပြီး သူမကို လုံးလုံးလျားလျား ဖျက်ဆီးပစ်ပေလိမ့်မည်။

ခုံးဝူတောက်က သူမကို ရွေးချယ်စရာ နှစ်ခု ပေးခဲ့သကဲ့သို့ တွေးထင်ရသော်လည်း အမှန်အားဖြင့် သူမထံတွင် ရွေးချယ်ခွင့် လုံးဝမရှိခဲ့ချေ။

"ကောင်းကင်လမ်းကြောင်းအစ်မ..."

ဤမြင်ကွင်းကို တုန်လှုပ်ချောက်ချား အင်မော်တယ်က အပြည့်အဝ မြင်တွေ့လိုက်ရသည်။

ခုံးဝူတောက်သည် ကောင်းကင်ပြာထံသို့ ရင်းနှီးစွာ မှီလာခဲ့ပြီး တီးတိုးစကားတချို့ကို ပြောဆိုပြီးနောက် ကောင်းကင်ပြာ၏ မျက်နှာအမူအရာ ရုတ်တရက် ပြောင်းလဲသွားကာ သူမ၏စိတ် ယိမ်းယိုင်နေသည့်အလားပင်။

ဤအရာက တုန်လှုပ်ချောက်ချား အင်မော်တယ်၏ စိုးရိမ်ပူပန်မှုကို ပို၍ပင် ကြီးထွားလာစေခဲ့သည်။

ဖြစ်နိုင်သည်မှာ သူအလေးစားဆုံး ကောင်းကင်လမ်းကြောင်းအစ်မက အမှန်တကယ်ပင် ခုံးဝူတောက်၏ လက်အောက်ငယ်သား ဖြစ်သွားတော့မည်လော...

သူမက သူတို့၏ နှစ်ပေါင်းများစွာ ကြာခဲ့သော သံယောဇဉ်များကို အမှန်တကယ်ပင် လျစ်လျူရှုပြီး သူ့ကို စွန့်ပစ်လိုက်တော့မည်လော...

"မဖြစ်နိုင်ဘူး... ကောင်းကင်လမ်းကြောင်းအစ်မက သေချာပေါက် အဲ့ဒီလို လူစားမျိုး မဟုတ်ဘူး..."

တုန်လှုပ်ချောက်ချား အင်မော်တယ်က ငြင်းဆိုပြီး သူ၏စိတ်နှလုံးသားထဲတွင် ဟိန်းဟောက်လိုက်၏။

သို့သော် သူ မသိခဲ့သည့်အရာမှာ သူ၏မျက်နှာအမူအရာကို ခုံးဝူတောက်က အမြဲတစေ စောင့်ကြည့်နေခဲ့ခြင်းပင်။

ခုံးဝူတောက်၏ နှုတ်ခမ်းများ အနည်းငယ် ကွေးတက်သွားပြီး သူ၏အသံကို ရုတ်တရက် မြှင့်လိုက်၏။

"စီနီယာ... မင်းရဲ့ ရွေးချယ်မှုက အရမ်းပညာရှိပါတယ်... မင်း နောင်တရမှာ မဟုတ်ဘူးလို့ ငါ အာမခံတယ်..."

ဤစကားကို ကြားလိုက်ရသောအခါ ကောင်းကင်ပြာ အနည်းငယ် တွေဝေသွားသည်။

သူမ စကားတစ်ခွန်းမျှပင် မပြောရသေးပေ။

သူမ မည်သည့်အချိန်က ရွေးချယ်မှု ပြုလုပ်လိုက်သနည်း...

သို့သော် နံဘေးမှနေ၍ ဤစကားများကို ကြားလိုက်ရသော တုန်လှုပ်ချောက်ချား အင်မော်တယ်သည် မိုးကြိုးပစ်ခံလိုက်ရသကဲ့သို့ ခံစားလိုက်ရပြီး နေရာတွင် လုံးလုံးလျားလျား မှင်သက်သွားတော့သည်။

အစောပိုင်းက ခုံးဝူတောက်၏ အသံသည် အလွန်တိုးညှင်းနေခဲ့ပြီး သူတို့ကြားမှ စကားပြောဆိုမှုကို သူ ရှင်းရှင်းလင်းလင်း မကြားခဲ့ရချေ။

ယခုအချိန်၌ ခုံးဝူတောက်က ဤအဓိပ္ပာယ် ဝေဝါးသော စကားများကို ရုတ်တရက် ထပ်ပြောလိုက်ခြင်းက တုန်လှုပ်ချောက်ချား အင်မော်တယ်၏ နှလုံးသားထဲရှိ ခန့်မှန်းချက်များကို ပို၍ပင် ကြီးထွားလာစေခဲ့သည်။

သူ မမှားနိုင်ပေ။

သူ အလေးစားဆုံး ကောင်းကင်လမ်းကြောင်းအစ်မက သူ့ကို စွန့်ပစ်လိုက်လေပြီ။

သူမက ခုံးဝူတောက်ထံသို့ ဆန္ဒအလျောက် လက်နက်ချလိုက်ပြီး သူ့ရန်သူတော်ကြီး၏ လက်အောက်ငယ်သားတစ်ယောက် ဖြစ်သွားခဲ့လေပြီ

မကောင်းဆိုးဝါးမ...

သူမက မည်သည်ကြောင့် သူ့ကို ဤကဲ့သို့ သစ္စာဖောက်ရဲသနည်း...

ကြီးမားသော အရှက်ရမှုတစ်ခုက သူ၏ နှလုံးသားထဲတွင် တလိမ့်လိမ့်ထလာပြီး တုန်လှုပ်ချောက်ချား အင်မော်တယ်၏ စိတ်ပိုင်းဆိုင်ရာ အခြေအနေကို ကွဲအက်လုနီးပါး ဖြစ်သွားစေခဲ့သည်။

"ရှန်းအာ... ငါ..."

ကောင်းကင်ပြာ အလျင်အမြန် တုံ့ပြန်လိုက်၏။ ခုံးဝူတောက်က သူမအတွက် ကျင်းတစ်ခုကို တမင်သက်သက် တူးထားကြောင်း သူမ သိလိုက်သည်။

သူမ ရှင်းပြရန် ဟန်ပြင်လိုက်စဉ်မှာပင်..

ခုံးဝူတောက်သည် တုန်လှုပ်ချောက်ချား အင်မော်တယ်အပေါ် ဖိနှိပ်ထားမှုကို လွှတ်ပေးရန် ခုံးကျန်ယွဲ့နှင့်တခြားသူများကို အချက်ပြပြီးဖြစ်ပေ၏။

တစ်ချိန်တည်းမှာပင် မမြင်နိုင်သော အရှိန်အဝါတစ်ရပ်က ခုံးဝူတောက်၏ခန္ဓာကိုယ်မှ ထွက်ပေါ်လာခဲ့သည်။

ထိုအရာက တုန်လှုပ်ချောက်ချား အင်မော်တယ်၏ ပြိုလဲကျနေနှင့်ပြီးဖြစ်သော စိတ်ခံစားမှုများကို ပို၍ပင် ပြိုလဲပျက်စီးသွားစေခဲ့သည်။

သူ၏ခန္ဓာကိုယ်ပေါ်ရှိ အချုပ်အနှောင်များ ပျောက်ကွယ်သွားသည့် အချိန်အခိုက်အတန့်တွင် ကျိုးပေါက်သွားသော ဆည်တစ်ခုအလား အဆုံးမဲ့ ဒေါသများ ပေါက်ကွဲထွက်လာခဲ့သည်။

တုန်လှုပ်ချောက်ချား အင်မော်တယ်၏ မျက်လုံးများက သွေးရောင်လွှမ်းနေပြီး သူ့အရင်းနှီးဆုံး ဆွေမျိုးများ၏ သစ္စာဖောက်ခြင်းကို ခံလိုက်ရသည့်အလား ရူးသွပ်စွာ ဟိန်းဟောက်လိုက်၏။

"ကောင်းကင်ပြာ... ဒီနှစ်တွေ တလျှောက်လုံး မင်းကို ငါ့ရဲ့ အစ်မတစ်ယောက်လို အမြဲတမ်း သတ်မှတ်ခဲ့တာ..."

"အခု အရေးကြီးတဲ့ အချိန်ကျတော့... မင်းက တကယ်ပဲ ငါ့ကို စွန့်ပစ်ပြီး ဒီနတ်မိစ္ဆာခုံးဝူတောက်ရဲ့ လက်အောက်ငယ်သားအဖြစ် မင်းရဲ့ဆန္ဒအလျောက် ခံယူလိုက်တယ်ပေါ့လေ..."

"ရှန်းအာ... ငါ ရှင်းပြတာကို နားထောင်ပါအုံး..."

သို့သော် ကြီးမားသော ထိုးနှက်ချက်များကို ဆက်တိုက်ခံစားခဲ့ရပြီးနောက် စိတ်ပိုင်းဆိုင်ရာ အခြေအနေ ပြိုကျပျက်စီးနေပြီဖြစ်သော တုန်လှုပ်ချောက်ချား အင်မော်တယ်သည် သူ၏ စိတ်ခံစားမှုများကို ထပ်မံ၍ ထိန်းချုပ်မထားနိုင်တော့ချေ။

"ပါးစပ်ပိတ်ထားစမ်း... သေသင့်တဲ့ ခွေးမ..."

"ငါ့ရဲ့အရင်ဘဝတုန်းက မင်းအတွက် ငါ အရမ်းကြိုးစားပြီး ကျင့်ကြံခဲ့လို့ နောက်ဆုံးမှာ ကောင်းကင်ကံကြမ္မာ မဟာဧကရာဇ် ဖြစ်လာခဲ့တာ... ဒီဘဝမှာတော့ ငါက အရင်ဘဝလောက် မကောင်းတော့လို့ မင်းက ငါ့ကို ခွေးတစ်ကောင်လို စွန့်ပစ်လိုက်တာလား..."

တုန်လှုပ်ချောက်ချား အင်မော်တယ်၏ ပြင်းထန်သော စကားများကို ကြားလိုက်ရသောအခါ ကောင်းကင်ပြာ၏ မျက်နှာအမူအရာ ချက်ချင်းဖြူရော်သွားပေ၏။

ဝမ်းနည်းမှုနှင့်ဒေါသကြောင့် သူမ၏ ခန္ဓာကိုယ်သည် အနည်းငယ် တုန်ယင်နေခဲ့သည်။

"ရှန်းအာ... ဒီအချိန်တွေ အားလုံးမှာ... နင်က ငါ့ကို အဲ့ဒီလို ထင်နေခဲ့တာလား..."

ကောင်းကင်ပြာ၏အသံ အက်ကွဲနေသည်။

သူမ အလွန်အမင်း နှလုံးကွဲကြေမှုကြောင့် ဖြစ်နိုင်ပြီး မျက်ရည်များ သူမ၏မျက်နှာပေါ်သို့ ယိုစီးကျလာခဲ့သည်။

သူမသည် တုန်လှုပ်ချောက်ချား အင်မော်တယ်ကို ရိုးသားစွာ ဆက်ဆံခဲ့ပေ၏။

သူမသည် ခုံးဝူတောက်နှင့် ရန်သူဖြစ်ရမည့် အန္တရာယ်ကိုပင် စွန့်စားကာ ကောင်းကင်တာအို အမိန့်တစ်ခုကို ထုတ်ပြန်ခဲ့ပြီး သူ၏ တက်လှမ်းမှုကို အပြည့်အဝ ကူညီပေးကာ ရှေးဟောင်းမဟာတာအို အမှတ်အသားကို ရရှိရန် သူ့ကို ကူညီပေးခဲ့သည်။

သို့သော် ယခုအချိန်၌ သူ၏ အမြင်တွင် သူမသည် အမှန်တကယ်ပင် ထိုမျှထိ ညစ်ပတ်ပြီး ယုတ်မာနေခဲ့သလော...

သူမ၏ မှတ်ဉာဏ်ထဲရှိ တုန်လှုပ်ချောက်ချား အင်မော်တယ်သည်လည်း လုံးလုံးလျားလျား ဝေဝါးသွားခဲ့လေပြီ။

"ဟန်ဆောင် သနားနေတာတွေကို ရပ်လိုက်တော့..."

ဤအချိတ်အခိုက်အတန့်တွင် တုန်လှုပ်ချောက်ချား အင်မော်တယ်၏ အသိဉာဏ်အားလုံး လုံးလုံးလျားလျား ပျောက်ကွယ်သွားခဲ့လေပြီ။

ခုံးဝူတောက်၏ အကြွင်းမဲ့ ချေမှုန်းမှု...

သူ၏အရင်းနှီးဆုံး ဆွေမျိုးတစ်ဦးကဲ့သို့ ဖြစ်နေသော ကောင်းကင်လမ်းကြောင်းအစ်မ၏ သစ္စာဖောက်မှု...

ထို့ပြင် အလွန်အမင်း သိမ်ငယ်စိတ်များ ပြည့်နှက်နေပြီး ရယ်စရာကောင်းသော သူ၏ ဂုဏ်သိက္ခာ လုံးလုံးလျားလျား ကျိုးပဲ့သွားခြင်း...

မရေမတွက်နိုင်သော အဆိုးမြင် စိတ်ခံစားမှုများက သူ၏အသိဉာဏ်ကို လုံးလုံးလျားလျား လွှမ်းမိုးသွားခဲ့သည်။

သူသည် သူ၏ နှလုံးသားထဲရှိ ဆန္ဒမရှိမှုများနှင့် ဒေါသများကို အယုတ်မာဆုံး စကားလုံးများဖြင့် အဆက်မပြတ် ထုတ်ဖော်နေခဲ့သည်။

ဤကာလအတွင်း ခုံးဝူတောက်သည် မည်သည့် တုံ့ပြန်ကိုမှုမျှ မပြသခဲ့ဘဲ သူ၏နှုတ်ခမ်းများတွင် ခပ်ဖျော့ဖျော့အပြုံးတစ်ခု ရှိနေပြီး ထိုမြင်ကွင်းကို ကြည့်နေရုံသာ ဖြစ်ပေ၏။

တုန်လှုပ်ချောက်ချား အင်မော်တယ် ပို၍ပြင်းပြင်းထန်ထန် ကျိန်ဆဲလေလေ ကောင်းကင်ပြာ ဆန္ဒအလျောက် အညံ့ခံလိမ့်မည်ဟု သူ ပို၍ ယုံကြည်မှု ရှိလေလေပင်။

ဤသည်မှာ တုန်လှုပ်ချောက်ချား အင်မော်တယ်၏အသံ အက်ကွဲသွားပြီး သူ မောပန်းသွားသည်အထိပင်။

ကောင်းကင်ပြာသည် ဝမ်းနည်းမှု မျက်ရည် တစ်ပေါက်မျှ ထပ်မကျနိုင်တော့ချေ။

ထိုအခါမှသာ ခုံးဝူတောက်က အဆုံးသတ်ပေးသူ အနေဖြင့် စကားပြောဆိုလိုက်၏။

"ဘယ်လောက်တောင် ရှင်းလင်းတဲ့ လမ်းခွဲမှုလဲ..."

သူက တုန်လှုပ်ချောက်ချား အင်မော်တယ်၏ ရှေ့သို့ ရောက်လာပြီး သူ့ကို အပေါ်မှ ငုံ့ကြည့်ကာ သူ၏အေးစက်သော မျက်လုံးများတွင် မထီမဲ့မြင်ပြုမှုများ ရွံရှာစက်ဆုပ်မှုများဖြင့် ပြည့်နှက်နေသည်။

"မင်းရဲ့အရင်ဘဝတုန်းက စီနီယာ ကောင်းကင်ပြာရဲ့ ကြင်နာမှုတွေကို အားကိုးပြီး ကောင်းကင်ကံကြမ္မာ မဟာဧကရာဇ် ဖြစ်လာခဲ့တာက တကယ့်ကို နှမြောစရာပဲ..."

"အခု မင်းက စီနီယာကောင်းကင်ပြာနဲ့ ကြင်နာမှု သံယောဇဉ် အားလုံးကို လုံးဝဖြတ်တောက်လိုက်ပြီ... ပြီးတော့ မင်းက အရမ်း ညစ်ပတ်ပြီး အကျည်းတန်နေတုန်းပဲ... မင်းက တကယ်ကို မဟာဧကရာဇ်ဆိုတဲ့ ဘွဲ့ကို အရှက်ရစေတာပဲ..."

"ခုံးဝူတောက်..."

တုန်လှုပ်ချောက်ချား အင်မော်တယ်၏ မျက်လုံးများက သွေးရောင်လွှမ်းနေပြီး သူက ရုန်းကန်ထကာ ပြန်လည်တိုက်ခိုက်လိုခဲ့သည်။

ဘန်း...

သို့သော် ခုံးဝူတောက်က သူ့ကို ပြင်းပြင်းထန်ထန် ကန်ထုတ်လိုက်ရာ တုန်လှုပ်ချောက်ချား အင်မော်တယ် လွင့်ထွက်သွားသည်။ ထို့နောက် သူက တုန်လှုပ်ချောက်ချား အင်မော်တယ်၏ရင်ဘတ်ပေါ်သို့ ပြင်းပြင်းထန်ထန် တက်နင်းထားလိုက်သည်။

"တုန်လှုပ်ချောက်ချား အင်မော်တယ်... မင်းရဲ့ အရင်ဘဝတုန်းက မင်းရဲ့ ပြိုင်ဘက်ကင်း ပါရမီကို အားကိုးပြီး ကောင်းကင်ကံကြမ္မာ မဟာဧကရာဇ် ဖြစ်လာတယ်လို့ မင်း တကယ်ကြီး ယုံကြည်နေတာလား..."

"မင်းရဲ့ ကိုးရောင်ခြယ် သွေးကို စီနီယာ ကောင်းကင်ပြာက မင်းကို ပေးသနားခဲ့တာ..."

"မင်းရဲ့ ခန္ဓာကိုယ်ပေါ်က အဆင်ပြေချောမွေ့တဲ့ ကြီးမားတဲ့ ကံကြမ္မာ အပါအဝင်ပဲ... ကောင်းကင်ဘုံ တာအိုနယ်မြေ တစ်ခုလုံးရဲ့ မရေမတွက်နိုင်တဲ့ ကံကြမ္မာတွေကို စတေးပြီး မင်းအတွက် ကံကြမ္မာကောင်းတွေကို ပေးသနားခဲ့တာကလည်း စီနီယာ ကောင်းကင်ပြာပဲ..."

ခုံးဝူတောက်သည် အရာအားလုံးကို ဖောက်ထွင်းမြင်နေရပုံ ရပေ၏။

"မဟုတ်ရင်... ကောင်းကင်တာအိုရဲ့ လူသားပုံရိပ်ယောင်တစ်ခုအနေနဲ့ စီနီယာကောင်းကင်ပြာက ဘာလို့ သာမန်မဟာဧကရာဇ်တစ်ပါးထက်တောင် နိမ့်ကျတဲ့ ဒီလောက်ထိ အားနည်းတဲ့ ကျင့်ကြံခြင်းမျိုး ရှိနေရတာလဲလို့ မင်း ထင်လဲ..."

"နင် ဘယ်လိုလုပ်..."

ဝမ်းနည်းနေသော ကောင်းကင်ပြာက ရုတ်တရက် အံ့အားသင့်စွာ မော့ကြည့်လိုက်သည်။

ခုံးဝူတောက်က ဒီအရာအားလုံးကို ဘယ်လို သိတာလဲ...

သူမကိုယ်တိုင်ကလွဲရင် သူမ တခြား ဘယ်သူ့ကိုမှ မပြောခဲ့ဖူးဘူးလေ...

ဤအရာအားလုံးကို ခုံးဝူတောက်ကိုယ်တိုင် စဉ်းစားတွက်ချက်ခဲ့ခြင်း ဖြစ်ပေ၏။

သူက ဝက်ဦးနှောက်သာရှိသော လူတချို့နှင့် မတူညီချေ။

အနည်းငယ် ခွဲခြမ်းစိတ်ဖြာလိုက်ရုံဖြင့် အကြောင်းနှင့်အကျိုးကို သူ တွက်ချက်နိုင်သည်။

"မင်း... မင်းက အဓိပ္ပာယ်မရှိတာတွေ ပြောနေတာပဲ..."

အချိန်တခဏကြာ အံ့အားသင့်သွားပြီးနောက် တုန်လှုပ်ချောက်ချား အင်မော်တယ်သည် ထိုကိစ္စကို ဝန်ခံရန် ဆန္ဒမရှိသည့်အလား နောက်တစ်ကြိမ် ဟိန်းဟောက်လိုက်သည်။

"ကောင်းကင်ကံကြမ္မာ မဟာဧကရာဇ် ဖြစ်လာဖို့ ငါ့ရဲ့ကိုယ်ပိုင်ပါရမီနဲ့ ခွန်အားကို ငါ အားကိုးခဲ့တာ... မင်း ငါ့ကို ထပ်ပြီး စော်ကားလို့ မရဘူး..."

"ဟမ့်..."

ခုံးဝူတောက်က လှောင်ပြောင်လိုက်ပြီး သူ၏ ခေါင်းကို အနည်းငယ် ခါယမ်းလိုက်၏။

"ပါရမီနဲ့ ခွန်အား..."

"မင်းရဲ့ အမှိုက်လို ပါရမီနဲ့ ခွန်အား အကြောင်း မင်း ပြောနေတာလား..."

"တကယ်လို့ မင်းလို ပုရွက်ဆိတ် တစ်ကောင်က ကိုယ့်ကိုယ်ကိုယ် အားကိုးပြီး ကောင်းကင်ကံကြမ္မာ မဟာဧကရာဇ် ဖြစ်လာနိုင်တယ်ဆိုရင်..."

"ဒါဆို ငါ ခုံးဝူတောက်က ဒီခေတ်မှာ ထာဝရ ပထမကောင်းကင်ဧကရာဇ် ဖြစ်လာလိမ့်မယ်..."

ထိုစကားသံများ ကျဆင်းသွားသည့် အချိန်အခိုက်အတန့်မှာပင် ခုံးဝူတောက်က သူ၏ ခြေထောက်ကို ရုတ်တရက် အားစိုက်လိုက်၏။

အဆုံးမဲ့ အချိန်လေဟာနယ်အက္ခရာများက သူ၏ခန္ဓာကိုယ်မှ တလိမ့်လိမ့်ထလာခဲ့သည်။

ခုံးဝူတောက်၏ နင်းချေခြင်းကို ခံထားရသော တုန်လှုပ်ချောက်ချား အင်မော်တယ်သည် ဤအချိန်အခိုက်အတန့်တွင် နတ်ဘုရားစွမ်းအားတစ်ခု၏ခြေမွှဖျက်ဆီးခြင်းကို ခံနေရသည့်အလား ခံစားလိုက်ရပြီး သူ့ကို ခုခံရန် လုံးလုံးလျားလျား စွမ်းအားမဲ့သွားစေခဲ့သည်။

ဝုန်း...

သွေးမြူလှိုင်းလုံးကြီးတစ်ခု ရုတ်တရက် ပေါက်ကွဲထွက်လာသည်နှင့်အမျှ ခုံးဝူတောက်၏ခြေထောက်အောက်ရှိ မြေပြင် ပြိုကျသွားပြီး ဧရာမ ချောက်နက်ကြီး တစ်ခု ဖြစ်ပေါ်လာခဲ့သည်။

ကျယ်ပြောသော အချိန်လေဟာနယ် ရေစီးကြောင်း၏ တိုက်စားမှုအောက်တွင် တုန်လှုပ်ချောက်ချားအင်မော်တယ်၏ နတ်ဘုရားစိတ်ဝိညာဉ်သည် ခြေမွှဖျက်ဆီးခြင်းခံလိုက်ရပြီး သဲလွန်စတစ်ခုမျှပင် မကျန်ရစ်ခဲ့တော့ချေ။

အခန်း (၁၆၄) ကောင်းကင်ပြာ အညံ့ခံခြင်း... အစစ်အမှန် ကြောက်မက်ဖွယ်ကောင်းသော ခွန်အား

"ပုရွက်ဆိတ်တွေက တကယ်ကို အသိဉာဏ်မဲ့တာပဲ..."

ခုံးဝူတောက်က လှောင်ပြောင်လိုက်ပြီး ပတ်ဝန်းကျင်ရှိ သွေးမြူတချို့ကို ပေါ့ပေါ့ပါးပါး ဖယ်ရှားရန် သူ၏လက်ကို ဝှေ့ယမ်းလိုက်၏။

တစ်ချိန်တည်းမှာပင် စနစ်၏ကြေညာချက်က ပဲ့တင်ထပ်လာခဲ့သည်။

"ဒင်... ပုံမှန်မဟုတ်တဲ့ ကောင်းကင်ကံကြမ္မာပိုင်ရှင် တုန်လှုပ်ချောက်ချား အင်မော်တယ်ကို အောင်မြင်စွာ အမဲလိုက်နိုင်ခဲ့ပြီးတော့ သူ့ရဲ့ကျန်ရှိနေသော ကောင်းကင်ကံကြမ္မာအမှတ် ၃၀၀၀ ကို ရရှိသွားသည့်အတွက် သခင်ကို ဂုဏ်ပြုပါတယ်..."

"သခင်က လေးဆပြင်းထန်တဲ့ တိုက်ခိုက်မှုကို ဖြစ်ပေါ်စေခဲ့ပြီးတော့ ကောင်းကင်ကံကြမ္မာအမှတ် ၁၂၀၀၀ ကို ရရှိသွားတဲ့အတွက် ဂုဏ်ယူပါတယ်..."

"ပထမဆုံး ပုံမှန်မဟုတ်တဲ့ ကောင်းကင်ကံကြမ္မာပိုင်ရှင်ကို အောင်မြင်စွာ အမဲလိုက်နိုင်ခဲ့တာကြောင့် အပိုဆောင်း ကောင်းကင်ကံကြမ္မာအမှတ် ၅၀၀၀၀ကို ရရှိသွားတဲ့အတွက် သခင်ကို ဂုဏ်ပြုပါတယ်..."

"တုန်လှုပ်ချောက်ချား အင်မော်တယ်ရဲ့ နောက်ဆုံး တန်ဖိုးကို ထုတ်ယူနိုင်ခဲ့ပြီး အကြံပိုင်သော မဟာဗီလိန်ဆိုသည့် အထူးဘွဲ့ကို ရရှိသွားတဲ့အတွက် သခင်ကို ဂုဏ်ပြုပါတယ်..."

"အထူး ဆုလာဘ် ရရှိပါတယ်...အလင်းကိုးဖြာ မဟာဧကရာဇ် တုန်လှုပ်ချောက်ချား အင်မော်တယ်ရဲ့ ယခင်ဘဝက မှတ်ဉာဏ်များ..."

"အထူး ဆုလာဘ် ရရှိပါတယ်...ကိုးရောင်ခြယ် အင်မော်တယ်သွေး တစ်စက် အလင်းကိုးဖြာ ဧကရာဇ် ဥပဒေသ ဧကရာဇ် မူလအစ ပုံကြမ်း...."

စနစ်၏ ဆက်တိုက်ကြေညာချက်များကို နားထောင်ရင်း ခုံးဝူတောက်၏ စိတ်အခြေအနေမှာ အလွန်ကောင်းမွန်နေခဲ့သည်။

တုန်လှုပ်ချောက်ချားအင်မော်တယ်သည် ပုံမှန်မဟုတ်သော ကောင်းကင်ကံကြမ္မာပိုင်ရှင်တစ်ယောက်ဖြစ်ရန် အမှန်တကယ်ကို ထိုက်တန်လှသည်။ သူ့ကို သတ်လိုက်ခြင်းက နောက်ဆက်တွဲ ဆုလာဘ်များစွာကိုပင် ရရှိစေပေ၏။

စနစ်အရဆိုလျှင် သူသည် တခြားအထူး စနစ် ပိုင်ရှင်များကိုလည်း အမဲလိုက်နိုင်ပုံရသည်။

သို့မဟုတ် လောကတွင် ဆော့ကစားရင်း နောက်ကွယ်မှ ကြိုးကိုင်သူများ အဖြစ် နေရသည်ကို နှစ်သက်သော ထိပ်တန်းတည်ရှိမှုများကိုပင် သူ အမဲလိုက်နိုင်ပေမည်။

အကယ်၍ သူသာ ဤလူများ အားလုံးကို အမဲလိုက်နိုင်မည်ဆိုပါက မည်မျှထိ စိတ်ဝင်စားစရာကောင်းသော အရာများကို သူ ရရှိမည်နည်း....

တုန်လှုပ်ချောက်ချား အင်မော်တယ်၏ မှတ်ဉာဏ်များ အတွက်မူ ဤနေရာမှ ထွက်ခွာပြီးနောက် သူ ထိုအရာများကို ပေါင်းစပ်ရပေလိမ့်မည်။

သူ၏အကျိုးအမြတ်များကို အကြမ်းဖျင်း တွက်ချက်ပြီးနောက် ခုံးဝူတောက်သည် အချိန်အတော်ကြာကတည်းက တွေဝေပြီး နေရာတွင် မှင်သက်နေသော ကောင်းကင်ပြာကို ဘာမှမဖြစ်ခဲ့သည့်အလား ကြည့်လိုက်၏။

"စီနီယာ... အခု ဒီအသုံးမကျတဲ့လူ သေသွားပြီ... မင်းလည်း သူ့ရဲ့ အစစ်အမှန် မျက်နှာကို မြင်တွေ့ခဲ့ရပြီပဲ..."

ခုံးဝူတောက်က ခပ်ဖျော့ဖျော့ရယ်မောကာ မေးလိုက်သည်။

"စီနီယာ... အခု မင်းမှာ ဆုံးဖြတ်ချက် တစ်ခု ရှိပြီလား..."

ရုတ်တရက် ကောင်းကင်ပြာသည် အိပ်မက်မှ နိုးလာသကဲ့သို့ ဖြစ်သွားခဲ့သည်။

အစောပိုင်းက တုန်လှုပ်ချောက်ချား အင်မော်တယ်၏ဆူပူကြိမ်းမောင်းမှုက သူမ၏ ဝမ်းနည်းမှု အားလုံးကို ဖယ်ရှားပစ်လိုက်ပြီးဖြစ်သောကြောင့် ဖြစ်နိုင်သည်။

ယခုအချိန်၌ တုန်လှုပ်ချောက်ချား အင်မော်တယ်သည် သူမ၏မျက်စိရှေ့တွင် သေဆုံးသွားသည်ကို မျက်မြင်တွေ့ရှိရသော်လည်း သူမသည် ပုံမှန်ထက်ပို၍ များစွာဝမ်းနည်းမနေခဲ့ချေ။

ထိုဝမ်းနည်းမှုနှင့် နှိုင်းယှဉ်ပါက သူမ၏စိတ်နှလုံးသားထဲတွင် ကူကယ်ရာမဲ့မှုနှင့် ကိုယ့်ကိုယ်ကိုယ် လှောင်ပြောင်မှုများသာ ပို၍ရှိနေခဲ့သည်။

သူမ ခက်ခက်ခဲခဲ ပြုစုပျိုးထောင်ခဲ့သော ကလေးက သူမကို ထိုကဲ့သို့ ရှုမြင်နေခဲ့သည် မဟုတ်လော....

သူမ သူ့အပေါ် ဆက်လက်၍ တွယ်တာနေရန် မလိုအပ်တော့ချေ။

ဆန့်ကျင်ဘက်အနေဖြင့် သူမသည် ခုံးဝူတောက်အပေါ် ကျေးဇူးတင်မှုအနည်းငယ်ပင် ခံစားလိုက်ရ၏။

မည်သို့ပင်ဆိုစေကာမူ အကယ်၍ ခုံးဝူတောက်သာ အလိုရှိခဲ့မည်ဆိုပါက သူသည် သူမကို လုံးလုံးလျားလျား အမြစ်ပြတ်သတ်ဖြတ်နိုင်သည်။

သို့သော် တစ်ဖက်လူက သူမကို သနားညှာတာစွာဖြင့် အခွင့်အရေးတစ်ခု ပေးခဲ့သည်။

အကယ်၍ သူမက မည်သည့်အရာက ပိုကောင်းသည်ကို မသိသေးလျှင်...

သူမသည် အမှန်တကယ်ကို အရူးတစ်ယောက် ဖြစ်နေပေလိမ့်မည်။

"ကောင်းကင်ပြာက နတ်ဘုရားသားတော်အရှင် ခုံးဝူတောက်ဆီကို အညံ့ခံဖို့ ဆန္ဒရှိပါတယ်..."

ကောင်းကင်ပြာသည် သူမ၏စိတ်ခံစားမှု အမျိုးမျိုးကို ထိန်းချုပ်လိုက်ပြီး ခုံးဝူတောက်ထံသို့ ရိုသေလေးစားစွာ ဦးညွှတ်လိုက်၏။

"နတ်ဘုရားသားတော်အရှင်ရဲ့ စိုးရိမ်ပူပန်မှုတွေနဲ့ အခက်အခဲတွေကို ဖြေရှင်းဖို့ ကူညီပေးမယ့် အရှင့်ရဲ့ လက်အောက်ခံတစ်ယောက် ဖြစ်လာဖို့ ငါက ဆန္ဒရှိပါတယ်..."

"ကောင်းပြီ... မင်းရဲ့ အသိစိတ်ကို ဖွင့်ပြီး ကျေးကျွန်အမှတ်အသားတစ်ခု ခတ်နှိပ်ခွင့် ပေးလိုက်..."

ခုံးဝူတောက်က ဂရုမစိုက်သောလေသံဖြင့် ပြောဆိုသည်။

ဤစကားကို ကြားလိုက်ရသောအခါ ကောင်းကင်ပြာက မခုခံခဲ့ချေ။

အခြေအနေက ဤအထိ ရောက်လာပြီဖြစ်ရာ သူမထံတွင် တခြားရွေးချယ်စရာ မရှိတော့ပေ။

မကြာမီပင် ခုံးဝူတောက်သည် ကောင်းကင်ပြာ၏အသိစိတ်ပင်လယ်တွင် ကျေးကျွန် အမှတ်အသား တစ်ခုကို အောင်မြင်စွာ ခတ်နှိပ်နိုင်ခဲ့ပေ၏။

ဤအချက်က သူမနှင့် ပတ်သက်သမျှ အရာအားလုံးသည် ခုံးဝူတောက်၏ပိုင်ဆိုင်မှုအဖြစ် လုံးလုံးလျားလျား ပြောင်းလဲသွားပြီဟုလည်း ဆိုလိုသည်။

"စိတ်မပူပါနဲ့... ဒီခရီးစဉ် ပြီးဆုံးသွားရင်... မင်းရဲ့ အချုပ်အနှောင်တွေကို ချိုးဖျက်ဖို့ အချိန်လေဟာနယ် တားမြစ်နယ်မြေက ကျွမ်းကျင်သူတွေကို ငါ ကူညီခိုင်းပါ့မယ်..."

ကောင်းကင်ပြာကို အောင်မြင်စွာ သိမ်းသွင်းပြီးနောက် ခုံးဝူတောက် အလွန်စိတ်ကျေနပ်သွားခဲ့သည်။

တာအိုနယ်မြေတစ်ခုစီတွင် ကိုယ်ပိုင်သီးသန့် ကောင်းကင်တာအို ရှိကြသည်။

ထိုအရာများသည် အသန့်စင်ဆုံး ကောင်းကင် ဥပဒေသမှ ဖြစ်ပေါ်လာခြင်းဖြစ်ပြီး ကောင်းကင်နှင့်မြေကြီး၏ အမြင့်မြတ်ဆုံးဆန္ဒကို ကိုယ်စားပြုပေ၏။

အတိတ်က ကောင်းကင်တာအိုကို ယဉ်ပါးအောင် သွေးဆောင်ရန် ကြိုးစားခဲ့သူများ အမှန်တကယ်ကို ရှိခဲ့သည်။

သို့သော် တခြားတာအိုနယ်မြေများ၏ ကောင်းကင်တာအိုသည် မူလတာအိုနယ်မြေမှ လွတ်လပ်စွာ ထွက်ခွာနိုင်ပြီး ကောင်းကင်ဘုံများနှင့်အသင်္ချေနယ်မြေများသို့ ခရီးသွားနိုင်ကြသည်။

တာအိုနယ်မြေတစ်ခုအတွင်း ပိတ်မိနေသော ကောင်းကင်ပြာကဲ့သို့ ကောင်းကင်တာအိုသည်ပင် ကောင်းကင်ဥပဒေသအတွင်း ပြီးပြည့်စုံစွာ ပုန်းအောင်းနေနိုင်ပြီး မည်သည့် တည်ရှိမှုမဆို သူ၏တိကျသော တည်နေရာကို ရှာဖွေရန် ခက်ခဲစေသည်။

ကောင်းကင်တာအိုကို ယဉ်ပါးအောင် သွေးဆောင်ခြင်းသည် ကောင်းကင်ကံကြမ္မာ မဟာဧကရာဇ်တစ်ပါးပင် စိတ်ကူးမယဥ်ရဲသည့် အရာတစ်ခုဖြစ်သည်။

တုန်လှုပ်ချောက်ချား အင်မော်တယ်ကဲ့သို့ လူကောင်းတစ်ယောက်နှင့် ဆုံတွေ့ခဲ့ရခြင်းက သူ ခုံးဝူတောက်၏ ကံကောင်းမှုသာ ဖြစ်ပေ၏။

တုန်လှုပ်ချောက်ချား အင်မော်တယ်သည် သူ့ကိုယ်သူ ပေးအပ်ခဲ့ပြီး ကောင်းကင်တာအို တစ်ပါးကိုပင် ခုံးဝူတောက်ထံသို့ အဆင်ပြေပြေ ပို့ဆောင်ပေးခဲ့သေးသည် မဟုတ်လော။

သူမ၏စွမ်းအားသည် အနည်းငယ် အားနည်းနေသော်လည်း သူမအပေါ် သူ အလွန်စိတ်ကျေနပ်နေခဲ့သည်။

"နတ်ဘုရားသားတော်အရှင်က တကယ့်ကို နတ်ဘုရားသားတော်အရှင်ပါပဲ....."

ပတ်ဝန်းကျင်ရှိ အချိန်လေဟာနယ် တားမြစ်နယ်မြေမှ လူများကလည်း ကောင်းကင်တာအိုက မည်သည့်အရာကို ကိုယ်စားပြုကြောင်း ရှင်းလင်းစွာ သိထားကြပုံရသည်။

ကောင်းကင်ဘုံများနှင့်အသင်္ချေနယ်မြေများရှိ မရေမတွက်နိုင်သော လူများ အိပ်မက်ပင် မမက်ရဲသည့် အရာတစ်ခုကို သူတို့၏ နတ်ဘုရားသားတော်အရှင်က ယနေ့တွင် ပြီးမြောက်အောင်မြင်ခဲ့လေပြီ။

ထိုအရာက တာအိုနယ်မြေတစ်ခု၏ ကောင်းကင်တာအို၏လူသားပုံရိပ်ယောင်ပင်။

သို့သော် ယခုအချိန်၌ သူမသည် သူတို့ နတ်ဘုရားသားတော်အရှင်၏ ယဉ်ပါးအောင် သွေးဆောင်ခြင်းကို ခံလိုက်ရလေပြီ။

ဤအရာအားလုံးကို ပြီးမြောက်ပြီးနောက် ခုံးဝူတောက်သည် သူ၏ရှေ့ရှိ ရွှေရောင် ဟင်းလင်းပြင်ကို နောက်တစ်ကြိမ် ကြည့်လိုက်၏။

ရှေးဟောင်းမဟာတာအို အမှတ်အသားသည် ထိုအရာအတွင်း၌ လွင့်မျောနေပြီး ကြွယ်ဝကာ ခမ်းနားကြီးကျယ်သော တာအိုစည်းချက်တစ်ခုကို ထုတ်လွှတ်ထားသည်။

ခုံးဝူတောက်သည် တုံ့ဆိုင်းမနေဘဲ တောက်ပသော အလင်းရောင်များဖြင့် လွှမ်းခြုံထားသည့် ဧရိယာထဲသို့ ဝင်ရောက်သွားခဲ့သည်။

သူက ရှေးဟောင်းမဟာတာအို အမှတ်အသားထံသို့ ချဉ်းကပ်ရန် ရွေးချယ်လိုက်သည့် အချိန်အခိုက်အတန့်မှာပင် ရွှေရောင်အလင်းတန်းများသည် ကျယ်ပြန့်သော သမုဒ္ဒရာတစ်ခုကဲ့သို့ တလိမ့်လိမ့်ထလာသည်။ ဤသည်က လွှမ်းမိုးနိုင်သော စွမ်းအားများဖြင့် လူးလွန့်လာသော ဥပဒေသလှိုင်းလုံးများကို ဖြစ်ပေါ်စေခဲ့သည်။

ထိုကဲ့သို့ ကြောက်မက်ဖွယ်ကောင်းသော တာအို ဖိအားအောက်တွင် သူတော်စင်နယ်ပယ် ကျွမ်းကျင်သူတစ်ဦးပင်လျှင် ခုခံရန် ရုန်းကန်ရဖွယ်ရှိပြီး သွေးမြူများအဖြစ် ခြေမွှဖျက်ဆီးခြင်းခံရနိုင်ပေ၏။

အလွန်အလှမ်းဝေးသော နေရာတွင် ရှိနေသော ခုံးကျန်ယွဲ့နှင့် တခြားသူများပင်လျှင် သူတို့၏ မျက်နှာအမူအရာများ အနည်းငယ် ပြောင်းလဲသွားကြသည်။ ထိုနေရာအတွင်းမှ တလိမ့်လိမ့်ထလာသော ကြောက်မက်ဖွယ်ကောင်းသည့် အရှိန်အဝါက သူတို့ကို အလွန်အမင်း စိတ်မသက်မသာ ဖြစ်စေခဲ့သည်။

သို့သော် ဤလွှမ်းမိုးနိုင်သော ဖိအားက ခုံးဝူတောက်အပေါ် မည်သည့် သက်ရောက်မှုမျှ မရှိပုံရသည်။

ခုံးဝူတောက်၏မျက်နှာအမူအရာမှာ တည်ငြိမ်နေပြီး ထိုနယ်မြေအတွင်း၌ ပေါ့ပေါ့ပါးပါး လမ်းလျှောက်နေပေ၏။

ဝီ...

နောက်တခဏတွင် မူလဘူတ ခရမ်းရောင်ချီ အမျှင်များသည် သူ၏ခေါင်းပေါ်သို့ စတင်၍ ကျဆင်းလာခဲ့သည်။

သူ၏အရေပြားများ တောက်ပစွာ လင်းထိန်လာပြီး သူ၏တစ်ကိုယ်လုံးမှ ကြောက်မက်ဖွယ်ကောင်းသော ဟင်းလင်းပြင်ဖရိုဖရဲချီများကို ထုတ်လွှတ်နေသည်။

သူ့ကိုဗဟိုပြု၍ မိုင်ဆယ်နှင့်ချီသော ဧရိယာသည် လေဟာနယ်နယ်မြေတစ်ခုအဖြစ် လုံးလုံးလျားလျား အသွင်ပြောင်းသွားတော့သည်။

စုစည်းလာသော တလိမ့်လိမ့်ထနေသည့် ဥပဒေသများကို ခုံးဝူတောက်က အတင်းအကျပ် ဆွဲဖြဲလိုက်ပြီး အက်ကွဲကြောင်း တစ်ခုကို ဖန်တီးလိုက်သည်။

သူ ဆက်လက်၍ ရှေ့တိုးလိုက်သည်နှင့်အမျှ အက်ကွဲကြောင်းက အဆက်မပြတ် ကျယ်ပြန့်လာပေ၏။

ဤမြင်ကွင်းက အလွန်ထိတ်လန့်ဖွယ် ကောင်းလှသည်။

ရွှေရောင် လှိုင်းလုံးများ တစ်ခုပြီးတစ်ခု ရိုက်ခတ်လာပြီး ဧရာမ လှိုင်းလုံးကြီးများသည် လောကရှိ အရာအားလုံးကို ဝါးမျိုတော့မည့်အလားပင်။

သို့သော် ခုံးဝူတောက်သည် ရှေးဟောင်းဆန်ကြီး မယိမ်းယိုင်သော နတ်ဘုရားတောင်တစ်လုံးကဲ့သို့ ဖြစ်နေလေ၏။

သူ လှမ်းလိုက်သော ခြေလှမ်းတိုင်းတွင် သူ၏ ခြေထောက်အောက်ရှိ တလိမ့်လိမ့်ထနေသော ဥပဒေသ လှိုင်းလုံးများသည် ကြေးမုံမှန်တစ်ချပ်ကဲ့သို့ ချက်ချင်းအေးခဲတောင့်တင်းသွားပြီး ရပ်တန့်သွားတော့သည်။

"အရမ်းအားကောင်းတာပဲ......"

ခုံးကျန်ယွဲ့တို့အုပ်စု၏ တည်ငြိမ်ပြီး ကျင့်သားရနေသော ဟန်ပန်များနှင့် နှိုင်းယှဉ်ပါက...

ခုံးဝူတောက် သူ၏စွမ်းအား အပြည့်အဝကို ထုတ်လွှတ်လိုက်သည်အား ပထမဆုံးအကြိမ် မျက်မြင်တွေ့ရှိရသော ကောင်းကင်ပြာသည် သူမ၏ နတ်ဘုရားစိတ်ဝိညာဉ် ထုံကျင်သွားသည်အထိ အလွန်အမင်း အံ့အားသင့်နေသည်။

သူမ၏ ယခင်အစီအစဉ်အရ တုန်လှုပ်ချောက်ချား အင်မော်တယ်သည် ရှေးဟောင်းမဟာတာအို အမှတ်အသား၏ စမ်းသပ်မှုကို အောင်မြင်ရန်အတွက် သူမက သူ့ကို လျှို့ဝှက်စွာ ကူညီပေးရန် လိုအပ်ပေလိမ့်မည်။

ပြီးတော့ သူသည် မရေမတွက်နိုင်သော ကြိုးပမ်းအားထုတ်မှုများနှင့် အချိန်များကိုပင် လိုအပ်နိုင်သည်။

ထိုသို့ဆိုသည့်တိုင် တစ်စုံတစ်ယောက်က တာအို ဖိအားကို ဤကဲ့သို့ လျစ်လျူရှုနိုင်ပြီး ပေါ့ပေါ့ပါးပါး လမ်းလျှောက်နေသည့်အလား ထိုနယ်မြေအတွင်းသို့ ဝင်ရောက်သွားနိုင်လိမ့်မည်ဟု သူမ လုံးဝတွေးထင်မထားဖူးခဲ့ချေ။

သူမ၏အမြင်အရ သူ၏ယခင်ဘဝက တုန်လှုပ်ချောက်ချား အင်မော်တယ်သည် အမြဲတစေ အထူးချွန်ဆုံး ပါရမီရှင် ဖြစ်ခဲ့သည်။

ယခုအချိန်၌ ခုံးဝူတောက်၏ ကြောက်မက်ဖွယ်ကောင်းသော စွမ်းအားနှင့် နှိုင်းယှဉ်ပါက ကွာခြားချက်မှာ ချက်ချင်းသိသာရှင်းလင်းသွားခဲ့သည်။ ဤလူနှစ်ယောက်ကို မည်သို့မျှ နှိုင်းယှဉ်၍မရနိုင်ချေ။

........

ခုံးဝူတောက် အဆက်မပြတ် ချဉ်းကပ်လာသည်နှင့်အမျှ ရှေးဟောင်းမဟာတာအို အမှတ်အသားသည် လောကကြီးတစ်ခုလုံး လုံးလုံးလျားလျား လောင်ကျွမ်းသွားသည့်အလား စည်းမျဉ်းနတ်ဘုရားသံကြိုးများကို သန်းရာနှင့်ချီ၍ ထုတ်လွှတ်လိုက်ပြီး မရေမတွက်နိုင်သော အလင်းတန်းများ ပေါက်ကွဲထွက်လာခဲ့သည်။

ခုံးဝူတောက်၏တစ်ကိုယ်လုံးသည် ဟင်းလင်းပြင်ဖရိုဖရဲချီများဖြင့် ဖုံးလွှမ်းနေပေ၏။

ဤတာအိုဖိအားသည် အလွန်ကြောက်မက်ဖွယ်ကောင်းသော်လည်း ဤသည်က ခုံးဝူတောက်အပေါ် များစွာသက်ရောက်မှု မရှိခဲ့ဘဲ သူသည် ရှေးဟောင်းမဟာတာအို အမှတ်အသားထံသို့ စနစ်တကျ ဆက်လက်၍ ချဉ်းကပ်သွားခဲ့သည်။

ဝုန်း...

ရှေးဟောင်းမဟာတာအို အမှတ်အသားက စွမ်းအားများကို ရူးသွပ်စွာ ထုတ်လွှတ်လိုက်သည်နှင့်အမျှ နတ်ဘုရားတောင်တစ်တောင်လုံး ပြင်းထန်စွာ စတင်၍ တုန်ခါလာခဲ့သည်။

ဆန်းကြယ်မြူခိုးဧရိယာတွင် နတ်ဘုရားတောင်သို့ ချဉ်းကပ်လာသော ကျင့်ကြံသူများကို တိုက်ခိုက်နေသည့် မကောင်းဆိုးဝါး အများအပြားသည်လည်း သက်ရောက်မှု ခံလိုက်ရပြီး ကြောက်လန့်တကြားဖြင့် အစုကွဲကာ ထွက်ပြေးသွားကြတော့သည်။

ဤမြင်ကွင်းက ဆန်းကြယ်မြူခိုး ဧရိယာရှိ ကျင့်ကြံသူအများအပြားကို မှင်သက်သွားစေပေ၏။

သို့သော် မကြာမီတွင် သူတို့အားလုံးသည် ပုံမှန်မဟုတ်သော ပြောင်းလဲမှုများ ဖြစ်ပေါ်နေသည့် ဧရာမနတ်ဘုရားတောင်ကို သတိပြုမိသွားကြသည်။

"မကောင်းတော့ဘူး... တစ်ယောက်ယောက်က နတ်ဘုရားတောင်ထဲကို ဝင်သွားပြီ..."

"ရှေးဟောင်းမဟာတာအို အမှတ်အသားက ထူးကဲတယ်... အဲ့ဒီကောင်ကို ယူသွားခွင့် လုံးဝပေးလို့မရဘူး..."

ဆန်းကြယ်မြူခိုးဧရိယာရှိ မကောင်းဆိုးဝါး အများအပြား ဆုတ်ခွာသွားမှုကို အခွင့်ကောင်းယူ၍ အသက်ရှင်ကျန်ရစ်သော မရေမတွက်နိုင်သည့် ကျင့်ကြံသူများသည် နတ်ဘုရားတောင် တည်ရှိသောနေရာသို့ ရူးသွပ်စွာ ပြေးဝင်သွားကြပေ၏။

သူတို့၏မျက်လုံးများတွင် ရူးသွပ်မှုများ ဒေါသများဖြင့် ပြည့်နှက်နေသည်။

သူတို့သည် ဤဆန်းကြယ်မြူခိုးဧရိယာတွင် လူအများအပြားကို ဆုံးရှုံးခဲ့ရပြီး ထိုအရာအားလုံးမှာ ဒဏ္ဍာရီလာ ရှေးဟောင်းမဟာတာအို အမှတ်အသားအတွက်သာ ဖြစ်သည်။

တခြားသူတစ်ယောက်ကို ထိုအရာအား ဤမျှထိ လွယ်ကူစွာ ယူသွားခွင့် သူတို့ မည်သို့ ပေးနိုင်မည်နည်း။