အခန်း (၂၅၁-၂၅၂)

အခန်း (၂၅၁) - ယွဲ့ရီ၏ အတွေးများကို ပြောင်းလဲသွားစေခဲ့သော နှင်းဝံပုလွေအုပ်စု

ဤ ‘ရူးသွပ်သားရဲ’ ဟုခေါ်သော အရာများသည် အသိဉာဏ်ကင်းမဲ့နေသော်လည်း သူတို့၏ လုပ်ဆောင်ချက်များတွင် လမ်းညွှန်ခံထားရသည့် အရိပ်အယောင်များ ခပ်ရေးရေး ပါဝင်နေကြောင်းကို သူ သတိပြုမိလိုက်သည်။

စွမ်းအားတစ်ခုခုက သူတို့ကို ဤနေရာသို့ တမင်တကာ မောင်းနှင်လာခဲ့သည့်အလားပင်။

“ဘုရင်ကြီး” ယင်းဖုန်း၏ပုံရိပ်က သူ့ဘေးရှိ အရိပ်များထဲမှ ထွက်ပေါ်လာပြီး အတွေးတစ်ခု ပို့လွှတ်လာခဲ့သည်။

“ဒီမိစ္ဆာသားရဲကောင်တွေရဲ့ ဝိညာဉ်အခြေအနေက အရမ်းကို ထူးဆန်းလွန်းနေ‌တယ်၊ ပြင်ပက ညစ်ညမ်းတဲ့ စိတ်စွမ်းအားတစ်ခုရဲ့ အတင်းအကြပ် ဖျက်ဆီးပြီး ပုံစံပြောင်းခံထားရသလိုပဲ”

“ပြီးတော့... သူတို့ ရောက်လာတဲ့ လမ်းကြောင်းမှာ စောစောက အနောက်မြောက်ဘက်ကဟာနဲ့ ထပ်တူကျပြီး အလွန်အမင်း သိမ်မွေ့ပေမယ့် သန့်စင်တဲ့ စိတ်ပိုင်းဆိုင်ရာ တုန်ခါမှုတစ်ခုကို ကျွန်တော်ဖမ်းယူရရှိခဲ့တယ်”

လင်းထျန်းလုံက အနည်းငယ် ခေါင်းငြိမ့်ပြလိုက်၏။

ဤသည်မှာ သူ၏ ကိုယ်ပိုင် ဆုံးဖြတ်ချက်နှင့် တိုက်ဆိုင်နေခဲ့သည်။

“ဧည့်သည်တစ်ယောက်က ငါတို့ကို စမ်းသပ်နေပြီး လက်ဆောင်ကြီးတစ်ခု ပို့လိုက်ပုံရတယ်” သူ၏ အကြည့်များက ဝေးကွာသော ဥက္ကာပျံတောင်တန်းဆီသို့ ကျရောက်သွားပြီး ငွေပြာဧကရာဇ်မျက်ဝန်း၏ ထူးဆန်းသော အလင်းရောင်များက တောင်တန်းအလွှာများကို ဖောက်ထွင်းကြည့်ရှုလိုသည့်အလား လည်ပတ်နေခဲ့သည်။

“ခံစစ်‌အနေအထားကို တိုးမြှင့်ပြီး အနောက်မြောက်နဲ့ အရှေ့ဘက် လမ်းကြောင်းတွေကို စောင့်ကြည့်ဖို့ အာရုံစိုက်ထား၊ ပြီးတော့ ပိုင်လင်းနဲ့ ကုသရေး နားလည်တဲ့သူတွေကို ဒဏ်ရာရထားတဲ့သူတွေ အဲဒီ ညစ်ညမ်းတဲ့ စိတ်စွမ်းအား ကူးစက်ခံထားရလား၊ ကူးစက်မခံရဘူးလားဆိုတာ သေချာ စစ်ဆေးခိုင်းလိုက်”

“ဟုတ်ကဲ့ပါ” ယင်းဖုန်းက အမိန့်ကို လက်ခံလိုက်ပြီး အရိပ်များထဲသို့ ပြန်လည် ပေါင်းစပ်သွားခဲ့သည်။

အောက်ဘက်တွင် ဝံပုလွေအုပ်၏ုက အမိန့်များကို ထိရောက်စွာ အကောင်အထည်ဖော်နေကြသည်။

အစောင့်အရှောက်များက သူတို့ရဲဘော်များ၏ အလောင်းများကို လေးနက်သော မျက်နှာထားများဖြင့် သယ်ဆောင်နေကြသည်။

လုပ်ကြံသတ်ဖြတ်သူများက ရူးသွပ်သားရဲများ၏ အလောင်းများကို ခပ်သွက်သွက် ရှင်းလင်းပြီး အသုံးဝင်သော ပစ္စည်းများကို ခွာယူနေကြသည်။

ကင်းလှည့်အမဲလိုက်တပ်ရင်း အဖွဲ့ဝင်များက ကင်းလှည့်နယ်ပယ်ကို ချဲ့ထွင်ရန် ပတ်ဝန်းကျင်ရှိ တောင်တန်း သစ်တောများအတွင်းသို့ တစ္ဆေများပမာ ပြန့်ကျဲသွားကြသည်။

အချိန်တို ဖရိုဖရဲဖြစ်ပြီးနောက် ဝံပုလွေအသိုက်တစ်ခုလုံးက စနစ်ကျသော လုပ်ဆောင်မှုကို အလျင်အမြန် ပြန်လည်ရရှိသွားခဲ့သည်။

ဤအရာအားလုံးကို သူမ၏ အထူးပင်ကိုစွမ်းရည်ဖြစ်သော ‘ရေကြေးမုံအလင်း’ ကို အသုံးပြု၍ တောင်ထွတ်ပေါ်မှ အဝေးမှနေ၍ လျှို့ဝှက်ကြည့်ရှုနေသော ယွဲ့ရီက မြင်တွေ့နေခဲ့ရလေသည်။

သူမ၏ ခရမ်းရောင် သလင်းကျောက် မြေခွေးမျက်ဝန်းများထဲတွင် စိတ်ဝင်စားမှု အရိပ်အယောင်များ ပိုမိုအားကောင်းလာခဲ့သည်။

ဤငွေရောင် ဝံပုလွေဘုရင်က စွမ်းအားကြီးမားရုံသာမက ၎င်း၏ ကွပ်ကဲမှုအောက်ရှိ ဝံပုလွေအုပ်စု၏ မတူညီသော တပ်ဖွဲ့များကြားမှ စည်းကမ်း၊ အကောင်အထည်ဖော်မှုနှင့် ပူးပေါင်းဆောင်ရွက်မှုတို့က သူမ မျှော်လင့်ထားသည်ထက် များစွာ သာလွန်နေသည်။

အထူးသဖြင့် တိုက်ပွဲအပြီးတွင် စည်းမျဉ်းစည်းကမ်းများကို အလျင်အမြန် ပြန်လည်ထိန်းသိမ်းပြီး သူတို့၏ သက်ဆိုင်ရာတာဝန်များကို ထမ်းဆောင်သည့် ဤစွမ်းဆောင်ရည်က သာမန် မိစ္ဆာသားရဲ မျိုးနွယ်စုတစ်ခု လုပ်ဆောင်နိုင်သည့်အရာမျိုး လုံးဝမဟုတ်ပေ။

“တကယ်ပဲ... ပိုပိုပြီး စိတ်ဝင်စားစရာကောင်းလာပြီ” ယွဲ့ရီက သူမ၏မေးစေ့ကို ပျော့ပျောင်းသော အမြီးဖျားလေးဖြင့် ဖွဖွလေး ပွတ်သပ်လိုက်သည်။

“သူက ခွန်အားပဲရှိတဲ့ သားရဲတစ်ကောင်တင်မဟုတ်ဘဲ... အင်အားစုတစ်ခုကို တကယ် စီမံခန့်ခွဲနေတာလား”

မိစ္ဆာသားရဲများအပေါ် ဤစကားလုံးကို အသုံးပြုရန်မှာ အနည်းငယ် ထူးဆန်းနေသော်လည်း ဤအခိုက်အတန့်တွင် ၎င်းက ပြီးပြည့်စုံစွာ သင့်လျော်နေသည်ဟု သူမ ခံစားလိုက်ရသည်။

လင်းထျန်းလုံ၏ လက်သည်းတိုက်ခိုက်မှုနှင့် သူ၏ နောက်ဆက်တွဲ တိကျသော စစ်မြေပြင်ကွပ်ကဲမှုတို့ကို သူမ ပြန်လည် သတိရလိုက်သည်။

“စွမ်းအား၊ ဉာဏ်ပညာ၊ လွှမ်းမိုးနိုင်စွမ်း... အဲဒါတွေ အားလုံးက ဝံပုလွေတစ်ကောင်တည်းဆီမှာ စုစည်းနေတယ်လို့ တစ်ခါမှ မတွေးမိခဲ့ဖူးဘူး”

သူမက မိမိကိုယ်ကိုယ် တိုးတိုးလေးပြောလိုက်ကာ အဆင့်မြင့် မျိုးနွယ်စု မွေးဖွားလာသောကြောင့် အဆင့်နိမ့် မိစ္ဆာသားရဲများအပေါ် အထင်သေးမှုများ ပျောက်ကွယ်သွားပြီး စူးစမ်းလေ့လာလိုစိတ်၊ အကဲဖြတ်လိုစိတ်တစ်ခုဖြင့် အစားထိုးခံလိုက်ရသည်။

“ဖြစ်နိုင်တာက...” သူမ၏စိတ်ထဲတွင် အတွေးတစ်ခု ပေါက်ဖွားလာခဲ့သည်။

“ဒီလို တည်ရှိမှုမျိုးနဲ့ ပူးပေါင်းတာက၊ ဒါမှမဟုတ်... လေ့လာစောင့်ကြည့်ပြီး သင်ယူတာက ရိုးရိုးရှင်းရှင်းအသုံးချတာ ဒါမှမဟုတ် ရန်သူအဖြစ်ခံလိုက်တာထက် ပိုတန်ဖိုးရှိမလားပဲ”

သူမက အရူးတစ်ယောက်မဟုတ်ပေ။ သူမ စိတ်ဝင်စားနေသော်လည်း ယခုအချိန်အထိ သူမ၏အသက်ရှင်သန်မှု အတွေ့အကြုံများက သူမကို အမြဲတမ်း သတိအပြည့်ဖြင့် ဖြစ်နေစေခဲ့ငည်။

“ငါ လိုအပ်နေသေးတယ်... ပိုပြီးစောင့်ကြည့်ဖို့ပေါ့”

သူမက လောလောဆယ်တွင် လက်ရှောင်နေရန်နှင့် ‘ရေကြေးမုံအလင်း’ မှတစ်ဆင့် ဝံပုလွေအသိုက်၏ လှုပ်ရှားမှုများကို ဆက်လက်စောင့်ကြည့်ရန်သာ ဆုံးဖြတ်လိုက်သည်။

အထူးသဖြင့် ထိုငွေရောင်ဝံပုလွေဘုရင်ပင်...

ဝံပုလွေအသိုက်အတွင်းတွင် အချိန်တိုလေးအတွင်း တင်းမာမှုများ ဖြစ်ပေါ်သွားပြီးနောက် ဘဝနှင့် လေ့ကျင့်ရေးများက တဖြည်းဖြည်း ပုံမှန်အခြေအနေသို့ ပြန်လည်ရောက်ရှိသွားသော်လည်း သတိပေးအဆင့်ကိုမူ တိုးမြှင့်ထားခဲ့သည်။

လင်းထျန်းလုံသည် နောက်ဆက်တွဲ ခံစစ်အစီအစဉ်များကို ရန့်မြဲ့ထံ အပြည့်အဝလွှဲအပ်လိုက်ပြီးနောက် မိခင်သစ်ပင်ထံသို့ ပြန်လာခဲ့သည်။

ရှောင်လန်နှင့် ရှောင်ယင်းတို့က ချက်ချင်း ရှေ့ထွက်လာကြပြီး သူတို့၏မျက်လုံးကျယ်ကြီးများထဲတွင် စိုးရိမ်မှုများဖြင့် ပြည့်နှက်နေခဲ့သည်။

“ဖေဖေ၊ အဆင်ပြေရဲ့လား” ရှောင်ယင်းက စိုးရိမ်တကြီး မေးလိုက်သည်။

“အင်း၊ ပြဿနာအသေးစားလေးတွေပါ၊ ဖြေရှင်းပြီးသွားပြီ” လင်းထျန်းလုံက သူ၏သမီးနှစ်ဦးကို နှစ်သိမ့်ရန် နှာခေါင်းဖြင့် ညင်သာစွာ ထိတွေ့လိုက်သည်။

သူမတို့ကို ဤအမှောင်ထု အကြံအစည်များနှင့် စောစောစီးစီး မထိတွေ့စေလိုသဖြင့် သူက အသေးစိတ် ရှင်းပြမနေတော့ပေ။

“ဝံပုလွေဖေဖေက သက်တောင့်သက်သာ ရှိပုံမရဘူး” လင်းထျန်းလုံ၏ မျက်လုံးများထဲရှိ နက်ရှိုင်းသော လေးနက်မှု အရိပ်အယောင်တစ်ခုကို ရှောင်လန်က ထက်မြက်စွာ သတိပြုမိလိုက်သည်။

“ဟုတ်တယ်၊ အဲဒါက ရူးသွပ်သားရဲတွေလောက်နဲ့တင် ပြီးပြတ်တာမျိုးမဟုတ်ပဲ အဲ့လောက် ရိုးရှင်းမှာမဟုတ်ဘူး၊ ငါတို့ ပိုမြန်မြန် စွမ်းအားကြီးလာဖို့ လိုတယ်၊ ဝံပုလွေဖေဖေ့ကိုချည်းပဲ အရာအားလုံး အမြဲတမ်း ထမ်းပိုးခိုင်းထားလို့ မဖြစိဘူး”

ရှောင်ယင်းက သူမ၏ လက်သေးသေးလေးများကို တိတ်တဆိတ် ဆုပ်ထားရင်း နှလုံးသားထဲမှ လှိုက်လှိုက်လှဲလှဲ တုံ့ပြန်လိုက်သည်။

ဖခင်ကို ကူညီပံ့ပိုးပေးနိုင်မည့် ခွန်အားကြီးသူတစ်ဦး ဖြစ်လာရန် သူမ၏ရည်မှန်းချက်က ပိုမိုခိုင်မာလာသည်။

လင်းထျန်းလုံက သမီးငယ်နှစ်ဦးကို ကြည့်လိုက်ပြီး သူ၏ စိတ်ထဲတွင် အတွေးတစ်ခု ရုတ်တရက် ပေါ်လာခဲ့သည်။

“ရှောင်လန်၊ ရှောင်ယင်း၊ သမီးတို့ရဲ့ စွမ်းရည်အသစ်တွေကို ကျွမ်းကျင်မှုက ဘယ်လိုနေလဲ၊ အထူးသဖြင့် အရေးပေါ် အခြေအနေတွေကို ဖြေရှင်းဖို့နဲ့... ရန်သူတွေကို လှည့်စားဖို့ နည်းစနစ်တွေပေါ့”

ရှောင်လန်က ခေါင်းငြိမ့်လိုက်ပြီး သူမ၏ စိတ်ကို အာရုံစိုက်ကာ အနီးအနားရှိ ကျောက်တုံးတစ်ခုအပေါ် ‘အချိန်အက်ကွဲကြောင်း’ ကို အသုံးပြုလိုက်သည်။

ကျောက်တုံးပတ်လည်ရှိ အလင်းရောင်က အလွန်တရာသိမ်မွေ့စွာ ပုံပျက်သွားပြီး ၎င်း၏ အရှိန်က ခဏမျှ အလွန်သိသိသာသာ နှေးကွေးသွားကာ အနီးကပ် မကြည့်ပါက ထင်ယောင်ထင်မှားဖြစ်နေသည်ဟုပင် ထင်မှတ်ရနိုင်သည်။

“သမီးက အရမ်းတိုတောင်းတဲ့ အချိန်လေးအတွင်း အလွန်သေးငယ်တဲ့ ဧရိယာတစ်ခုကိုပဲ သက်ရောက်နိုင်သေးတယ်” သူမက အနည်းငယ် ရှက်ရွံ့စွာဖြင့် ပြောလိုက်သည်။

ရှောင်ယင်း၏ပုံရိပ်က ဖျတ်ခနဲ ဖြစ်သွားပြီး သူမ ရှိနေသည့် အနေအထားအတိုင်း ဖျော့တော့တော့ ပုံရိပ်ယောင်တစ်ခုကို ချန်ရစ်ထားကာ သူမ၏ အစစ်အမှန်ခန္ဓာကိုယ်က နှစ်မီတာအကွာတွင် ချက်ချင်း ပေါ်လာခဲ့သည်။

“ပု‌ေ့ရိပ်ယောင်က တစ်စက္ကန့်ပဲ တည်ရှိနိုင်ပြီး မလှုပ်ရှားနိုင်သေးဘူး” သူမက ထပ်လောင်းပြောလိုက်သည်။

“အဲဒါက အရမ်းကောင်းနေပါပြီ” လင်းထျန်းလုံက အားပေးစကား ပြောလိုက်သည်။

“ဘယ်စွမ်းရည်မဆို သေးငယ်တဲ့ စမှတ်ကနေမှ ကြီးထွားလာတာပဲ၊ မှတ်ထား၊ တကယ်ကို အရေးကြီးတဲ့အချိန်ကျရင် အချိန်တိုလေးတစ်ခု ရလိုက်တာ၊ ဒါမှမဟုတ် သေးငယ်တဲ့ လှည့်စားမှုလေးတစ်ခု ဖန်တီးနိုင်တာက ရလဒ်ကို ပြောင်းလဲသွားစေနိုင်တယ်”

သူက ဤစွမ်းရည်များကို ပိုမို ထိရောက်စွာ မည်သို့အသုံးပြုရမည်ကို စိတ်ရှည်ရှည်ဖြင့် လမ်းညွှန်ပေးခဲ့၏။

အထူးသဖြင့် ခွန်အား အဆမတန် ကွာခြားလွန်းသော ရန်သူနှင့် ကြုံတွေ့ရသည့်အခါ အချိန်-ဟင်းလင်းပြင် လက္ခဏာရပ်များကို အသုံးပြု၍ မည်သို့ လှုပ်ရှား ထွက်ပြေးရမည်ကို သင်ကြားပေးခဲ့သည်။

ဤမြင်ကွင်းကို အဝေးမှ ယွဲ့ရီက သဘာဝအတိုင်း မြင်တွေ့ခဲ့ရသည်။

သူမက လင်းထျန်းလုံသည် ‘အားနည်းသော’ လူသားကလေးငယ် နှစ်ဦးကို ဤမျှစိတ်ရှည်စွာ သင်ကြားပေးနေသည်ကို မြင်သောအခါ သူမ၏ ခရမ်းရောင်သလင်းကျောက် မျက်ဝန်းများထဲတွင် ရှင်းလင်းသော အံ့ဩမှု အရိပ်အယောင်တစ်ခု ဖြတ်ပြေးသွားခဲ့သည်။

“ထူးဆန်းလွန်းလိုက်တာ... သူက တခြား မျိုးနွယ်စုက အားနည်းတဲ့ လက်အောက်ငယ်သားတွေကို ဒီလောက်တန်ဖိုးထားပြီး ကိုယ်တိုင် သင်ကြားပေးနေတာလား၊ စဉ်းစားလို့ကိုမရဘူး” သူမ နားလည်ရန် ခက်ခဲနေခဲ့သည်။

မိစ္ဆာသားရဲများ၏အမြင်တွင် ဤသည်မှာ တွေးကြည့်၍ပင် မရနိုင်သော အရာဖြစ်သည်။

ခွန်အားကြီးသူများကခွန်အားကြီးသူများက အားနည်းသူများကို ကာကွယ်ခြင်းမှာ ပုံမှန်ဖြစ်သော်လည်း သူတို့ကို လေ့ကျင့်ပေးရန် ဤမျှ ကြိုးစားအားထုတ်ကာ အချိန်များ ရင်းနှီးမြှုပ်နှံခြင်းက……၊

အထူးသဖြင့် လေ့ကျင့်ပေးခံရသူများမှာ ‘အစာ’ အမျိုးအစားထဲတွင် ပါဝင်သော လူသားကလေးငယ် နှစ်ဦး ဖြစ်နေခြင်းက သူမ နားလည်ထားသည့်အရာများနှင့် လုံးဝ ဆန့်ကျင်ဘက်ဖြစ်နေခဲ့သည်။

“ဒီငွေရောင်ဝံပုလွေဘုရင်... သူ့ရဲ့ အပြုအမူ ပုံစံတွေက ငါသိတဲ့ ဘယ်ဝံပုလွေဘုရင်နဲ့မှ မတူဘူး၊ ဘယ်မိစ္ဆာသားရဲ ခေါင်းဆောင်နဲ့မှလည်း မတူဘူး”

ယွဲ့ရီက တစ်ဦးတည်း တီးတိုး ရေရွတ်နေခဲ့ရင်း သူမ၏ စူးစမ်းလိုစိတ်များကလည်း နွယ်ပင်တစ်ခုပမာ ကြီးထွားလာခဲ့သည်။

သူမသည် ဤငွေရောင်ဝံပုလွေဘုရင်၏ လုပ်ဆောင်ချက်များ နောက်ကွယ်ရှိ အကြောင်းအရာကို မသိစိတ်မှ စတင်ဖော်ထုတ်လိုနေမိကြောင်းကို သတိထားမိလိုက်သည်။

“အဝေးကနေ ကြည့်နေရုံနဲ့တင် ငါ့ရဲ့ စူးစမ်းလိုစိတ်ကို မဖြည့်ဆည်းပေးနိုင်တော့ဘူး ထင်တယ်”

သူမက မြူခိုးအငွေ့တိုက်တစ်ခုကို အမြီးဖျားဖြင့် ကျော့ရှင်းစွာ ရစ်ခွေလိုက်ရင်း သူမ၏ ခရမ်းရောင်သလင်းကျောက် မြေခွေးမျက်ဝန်းများက စူးစမ်းလိုသော အလင်းရောင်များဖြင့် တလက်လက်ဖြစ်နေခဲ့လေသည်။

“ဖြစ်နိုင်တာက... နည်းနည်း ပိုပြီး နီးနီးကပ်ကပ်စောင့်ကြည့်ဖို့ အခွင့်အရေးတစ်ခု ရှာသင့်တယ်”

အခန်း (၂၅၂) - ရူးသွပ်သားရဲများ၏ ညစ်ညမ်းမှု အရင်းအမြစ်နေရာ (၁)

ရူးသွပ်သားရဲများ၏ တိုက်ခိုက်မှုမှ ထွက်ပေါ်လာသော မီးခိုးငွေ့များ လုံးဝမပြယ်သေးသော်လည်း ဝံပုလွေအသိုက်အတွင်းပိုင်းတွင် အောင်ပွဲခံခြင်းမှ စစ်ရေးပြင်ဆင်မှုအဖြစ်သို့ လုံးဝ ကူးပြောင်းပြီးစီးနေပြီဖြစ်သည်။

လေထုထဲတွင် ဝိညာဉ်သစ်သီးများ၏ ချိုမြိန်သော ရနံ့များ မရှိတော့ချေ။

အသက်သွင်းထားသော ရေခဲပင်မသလင်းကျောက်များမှ ထုတ်လွှတ်လိုက်သည့် ထိုးဖောက်ဝင်ရောက်နိုင်စွမ်း အားကောင်းသော အအေးဓာတ်များနှင့် မြောက်မြားစွာသော နှင်းဝံပုလွေများထံမှ မြင့်တက်လာနေသည့် ပြင်းထန်သော တိုက်ပွဲဝင်လိုစိတ်များသာ ပြည့်နှက်နေတော့သည်။

လက်ရှိတွင် အရှေ့ဘက် ခံစစ်မျဉ်းသည် ဝံပုလွေအသိုက်တစ်ခုလုံး၏ အခိုင်မာဆုံးသော ဒိုင်းကာကြီး ဖြစ်နေ၏။ ရန့်မြဲ့၏ မီးခိုးရောင်ပုံရိပ်ကြီးသည် အမြင့်ဆုံး ရေခဲတံတိုင်းကင်းစင်ပေါ်တွင် ထာဝရ ရေခဲမြစ်ကြီးတစ်ခုပမာ ရပ်နေသည်။

သူသည် ထုံးစံအတိုင်း ဟိန်းဟောက်ခြင်း မပြုလုပ်ဘဲ သူ၏ရှေ့လက်သည်းတစ်ဖက်ကို ရေခဲတံတိုင်း၏ အကာအကွယ်ပေါ်သို့ ညင်သာစွာ ဖိတင်ထားလိုက်သည်။

သူ၏ လက်သည်းကို ဗဟိုပြုကာ မြင်သာသော အပြာရောင်ဖျော့ဖျော့ အလင်းဝန်းတစ်ခု ချက်ချင်း ပြန့်ကျဲသွားခဲ့သည်။ ‘ထာဝရရေခဲအကာအကွယ်’ ၏ နယ်ပယ်ကို အပြည့်အဝ ဖြန့်ကြက်လိုက်ခြင်းပင်။

ဤအလင်းဝန်းသည် ရေခဲတံတိုင်း၏ အောက်ခြေတွင် စီးဆင်းနေသော ရေခဲပင်မသလင်းကျောက် စွမ်းအင်များနှင့် အလျင်အမြန် ပဲ့တင်ထပ်သွားပြီး အေးစက်သော ရုန်းစာလုံးများ တစ်ခုပြီးတစ်ခု လင်းလက်လာကာ မီတာရာပေါင်းများစွာ ရှည်လျားသော ခံစစ်မျဉ်းတစ်ခုလုံးရှိ အပူချိန်ကို ထိုးကျသွားစေခဲ့သည်။

တံတိုင်း၏ မျက်နှာပြင်ပေါ်တွင် အပြာရောင်ရင့်ရင့် ရေခဲပွင့်လွှာပါးလေးတစ်ခုပင် စုစည်းလာပြီး ရင်တုန်ဖွယ်ကောင်းသော အအေးဓာတ်ကို ထုတ်လွှတ်နေခဲ့သည်။

“အစောင့်အရှောက်တွေ၊ ‘ခိုင်မာတံတိုင်း’ ဖွဲ့စည်းပုံ ပြင်ဆင်ကြ” ရန့်မြဲ့၏ အေးစက်စက် အတွေးက ခံစစ်မျဉ်းပေါ်ရှိ အဖွဲ့ဝင်တိုင်း၏ စိတ်ထဲသို့ ဝင်ရောက်သွားခဲ့သည်။

အောက်ဘက်တွင် သာမန် အစောင့်အရှောက် ရာပေါင်းများစွာက တစ်ပြိုင်နက်တည်း တိုးညှင်းစွာ ဟိန်းလိုက်ကြပြီး သူတို့၏ လေးလံသော ခြေဖဝါးများဖြင့် ရေခဲပြင်ကို အပြင်းအထန် နင်းချလိုက်ကြသည်။

အက်ကွဲသံတစ်ခုနှင့်အတူ ‘နှင်းခဲချပ်ဝတ်’ များက အသက်ဝင်နေသော အရာများပမာ ပြန့်ကျဲပြီး ချိတ်ဆက်သွားကာ ခံစစ်မျဉ်း၏ အရှေ့ဆုံးတွင် ပိုမိုထူထဲပြီး ညီညာမှုမရှိသော နှင်းခဲအကာအကွယ်တစ်ခုကို ဖန်တီးလိုက်သည်။

သူတို့၏ ဧရာမခန္ဓာကိုယ်ကြီးများသည် ဤရွေ့လျားနေသော ရေခဲတံတိုင်းထဲသို့ ကျောက်တုံးကြီးများပမာ နစ်မြုပ်သွားကြပြီး တည်ငြိမ်ကာ ပြတ်သားသော ဝံပုလွေမျက်လုံး တစ်စုံစီကိုသာ မြင်တွေ့ရတော့သည်။

ခံစစ်စနစ်တွင် သက်ဝင်လှုပ်ရှားနေသော အခြေခံအုတ်မြစ်တစ်ခု ဖြစ်လာလိုသည့် သူတို့၏ရည်မှန်းချက်က အမူအရာများတွင် အထင်းသား ပေါ်လွင်နေသည်။

အစောင့်အရှောက်များ၏ အနောက်ဘက် အနည်းငယ်မြင့်သော ကုန်းစောင်းပေါ်တွင် မဟာနှင်းအစောင့်အရှောက်ခြောက်ဦးသည် ရေခဲဖြင့် ထွင်းထုထားသော စစ်နတ်ဘုရား ခြောက်ပါးပမာ တိတ်ဆိတ်စွာ ရပ်နေကြသည်။

သူတို့၏ ခန္ဓာကိုယ်ပေါ်ရှိ ‘မဟာနှင်းအကာအကွယ်’ သည် ရိုးရှင်းသော အလင်းစီးဆင်းမှုပုံစံမျိုး မဟုတ်တော့ဘဲ ရှေးဟောင်း ရေခဲအမှတ်အသားများနှင့် ဆင်တူကာ ပိုမိုရှုပ်ထွေးပြီး နက်ရှိုင်းသည့် အပြာရောင်ပုံစံများကို ဖော်ပြနေခဲ့သည်။

အစွန်းရောက်အေးခဲခြင်း စွမ်းအားများ ပါဝင်သော အားကောင်းသည့် စီးကြောင်းခြောက်ခုက မသိမသာ ချိတ်ဆက်နေပြီး ဝိညာဉ်ကိုပင် အေးခဲသွားစေနိုင်သည့်အလား ပိုမိုခိုင်မာသော ဒုတိယမြောက် ရေခဲအကာအကွယ်တစ်ခုကို ဖန်တီးနေခဲ့သည်။

သူတို့၏ ရှေ့လက်သည်းများကို အနည်းငယ်မြှောက်ထားပြီး လေထဲရှိ များစွာသော သေးငယ်သည့် ရေခဲပွင့်လေးများက သူတို့၏ လက်သည်းဖျားတွင် စုစည်းလာနေသည်။

‘ရေခဲဥက္ကာပျံ ကြွေကျခြင်း’ ကို စုစည်းနေခြင်းဖြစ်ပြီး ပထမခံစစ်မျဉ်းကို ထိုးဖောက်ဝင်ရောက်လာမည့် မည်သည့်နေရာကိုမဆို ဖျက်ဆီးပစ်နိုင်မည့် ဧရိယာအကျယ် တိုက်ခိုက်မှုတစ်ခု ပြုလုပ်ရန် အသင့်ဖြစ်နေပြီဖြစ်သည်။

ရေပြာကြေးခွံအစောင့်အရှောက် လေးဦးကို ရန့်မြဲ့က ခံစစ်မျဉ်း၏ အရေးအကြီးဆုံး ထောက်ပံ့ရေးအမှတ်များနှင့် လမ်းကြောင်းအချို့တွင် တိကျစွာ နေရာချထားပေးခဲ့သည်။

သူတို့၏ ထူထဲသော ‘နက်နဲရေခဲချပ်ဝတ်’ သည် နယ်ပယ်၏ အလင်းရောင်အောက်တွင် ခံတပ်ငယ်လေး လေးခုပမာ သတ္တုအလင်းရောင်များ ရောင်ပြန်ဟပ်နေခဲ့သည်။

ဖျော့တော့သော ခံတပ်ဒိုင်းကာ ရောင်ဝါတစ်ခုက သူတို့ကို ဗဟိုပြု၍ ပြန့်ကျဲသွားပြီး ဝန်းရံနေသော အစောင့်အရှောက်များစွာ၏ ရုပ်ပိုင်းဆိုင်ရာ ခံစစ်ကို အနည်းငယ် တည်ငြိမ်စွာ တိုးမြင့်ပေးနေခဲ့သည်။

သူတို့၏ ထူထဲသော အမြီးများက ဂနာမငြိမ် လှုပ်ရမ်းနေပြီး သူတို့၏ လေးလံသော အကြေးခွံများအောက်ရှိ ကြွက်သားများမှာ တင်းမာနေခဲ့သည်။

‘အကြေးခွံချပ်ဝတ် ပစ်ခတ်ခြင်း’ စွမ်းရည်မှာ အသင့်အနေအထားဖြစ်နေပြီဖြစ်ပြီး ချဉ်းကပ်လာရန် ရဲတင်းသော မည်သည့် စွမ်းအားကြီး ရန်သူကိုမဆို ထူထပ်သော အကြေးခွံမုန်တိုင်းများဖြင့် ဆုတ်ဖြဲပစ်ရန် အမိန့်ကို စောင့်ဆိုင်းနေကြသည်။

အနောက်ဘက် လေ့ကျင့်ရေးကွင်းသည် ယခုအခါတွင် ဆူပွက်နေသော မီးဖိုကြီးတစ်ခုအဖြစ် ပြောင်းလဲသွားခဲ့ပြီဖြစ်သည်။

ထျန်းပင်း၏ ဧရာမ ရွှေရောင်ရင့်ရင့် ပုံရိပ်ကြီးသည် မောပန်းခြင်းကို မသိသော စစ်နတ်ဘုရားတစ်ပါးပမာ အရေအတွက် အများဆုံးရှိသည့် သာမန် လုပ်ကြံသတ်ဖြတ်သူများကို ဦးဆောင်ကာ ‘ရူးသွပ်စွာ ပြေးဝင်တိုက်ခိုက်ခြင်း’ ကို ထပ်တလဲလဲ လေ့ကျင့်နေခဲ့သည်။

စုပေါင်းဝင်ရောက်တိုက်ခိုက်မှုတိုင်းက ရွှေရောင် ဆူနာမီလှိုင်းလုံးကြီးတစ်ခုပမာဖြစ်ပြီး ရေခဲကျောက်တုံးများဖြင့် တည်ဆောက်ထားသော ပစ်မှတ်တံတိုင်းများကို နားကွဲမတတ် ဟိန်းဟောက်သံကြီးတစ်ခုနှင့်အတူ အမှုန့်ဖြစ်သွားသည်အထိ ကြိတ်ချေပစ်နေခဲ့သည်။

အခြားတစ်ဖက်တွင် သွေးမိစ္ဆာနှင့် “သွေးအစွယ်တော် အစောင့်အရှောက်” များကလည်း သူတို့၏ ကြမ်းတမ်းသော အတွင်းပိုင်း စစ်‌ရေးလေ့ကျင့်ရေးများကို အဆုံးသတ်လိုက်ကြသည်။

မငြိမ်သက်သေးသော သေမင်းတမန် အရှိန်အဝါများကို သယ်ဆောင်ထားသည့် အနီရောင်ရင့်ရင့် ပုံရိပ်ဆယ်ခုက သွေးမိစ္ဆာ၏အနောက်တွင် တိတ်ဆိတ်လျင်မြန်စွာ စုဝေးလာကြသည်။

သူတို့က ဟိန်းဟောက်ခြင်း မပြုလုပ်ကြသော်လည်း အနီရောင်ရင့်ရင့် မျက်လုံးဆယ်စုံမှာ အသန့်စင်ဆုံး၊ အကြမ်းတမ်းဆုံး ဖျက်ဆီးလိုစိတ်များဖြင့် တောက်လောင်နေခဲ့သည်။

သွေးမိစ္ဆာ၏ အကြည့်က သူ၏ လက်အောက်ငယ်သားများအပေါ်သို့ ဝေ့ဝဲသွားပြီး နီရဲနေသော လျှာကြီးဖြင့် ထက်ရှသော အစွယ်များကို သပ်လိုက်ကာ တိုးညှင်းစွာ ဟိန်းဟောက်လိုက်သည်။

“တပ်ဖွဲ့တွေကို ရက်ထောင်ချီ လေ့ကျင့်တာက တစ်ခဏတာ အသုံးပြုဖို့အတွက်ပဲ မဟုတ်ဘူး၊ ဘုရင်ကြီးရဲ့ လက်အောက်မှာ ဘယ်သူက အထက်ရှဆုံး အစွယ်လဲဆိုတာ ပြသလိုက်ကြစို့”

“အာ၀ူး”

သွေးအစွယ်တော် အစောင့်အရှောက် ဆယ်ဦးက တိုးညှင်းသည့် ဟိန်းဟောက်သံများဖြင့် တစ်ပြိုင်နက်တည်း တုံ့ပြန်လိုက်ကြရာ သူတို့၏ပတ်လည်ရှိ သွေးနီရောင် သေမင်းတမန် အရှိန်အဝါများက ရုပ်၀တ္တုရှိသော အရာတစ်ခုအဖြစ် ပြောင်းလဲလုနီးပါး ဖြစ်သွားခဲ့သည်။

အသစ်ဖွဲ့စည်းထားသော ရေပြာကြေးခွံအစောင့်အရှောက် ငါးဦးကလည်း သူတို့၏ ‘မိုးပြာဝံပုလွေ အဆက်မပြတ်ခုတ်ပိုင်းခြင်း’ လေ့ကျင့်မှုများကို ရပ်တန့်လိုက်ကြသည်။

ရန့်မြဲ့ တာဝန်ပေးထားသော တပ်စုမှူး၏ အားကောင်းသော တိုးညှင်းသည့် ဟိန်းဟောက်သံ အမိန့်အောက်တွင် သူတို့သည် လုပ်ကြံသတ်ဖြတ်သူ တပ်ရင်း၏ ဘေးဘက်များသို့ လျင်မြန်စွာ စနစ်တကျ ရွှေ့လျားသွားကြသည်။

သူတို့၏ အရှိန်အဝါမှာ လုပ်ကြံသတ်ဖြတ်သူများကဲ့သို့ ကြမ်းတမ်းခြင်းမရှိ၊ သွေးအစွယ်တော် အစောင့်အရှောက်များကဲ့သို့ ကြမ်းကြုတ်ခြင်းမရှိသော်လည်း တမူထူးခြားပြီး ကျောက်တောင်ပမာ တည်ငြိမ်ကာ အဆက်မပြတ် စီးဆင်းနေသည့် စွမ်းအင်စည်းချက်တစ်ခု ပါဝင်နေခဲ့သည်။

‘မိုးပြာဝံပုလွေတိုက်ပွဲဝိညာဉ်’ မှ ယူဆောင်လာသော မျှတသည့် စွမ်းရည်များနှင့် အချိန်ကြာမြင့်စွာ ခံနိုင်ရည်ရှိမှုတို့က သူတို့ကို အဓိကတိုက်ခိုက်ရေးတပ်ဖွဲ့၏ ဘေးဘက်မှ ကာကွယ်ပေးနိုင်မည့် ယုံကြည်စိတ်ချရဆုံးသော အရန် ဓားသွားများနှင့် ခိုင်မာသည့် ဒိုင်းကာများ ဖြစ်လာစေသည်။

အရိပ်များထဲတွင် မျက်စိဖြင့် မမြင်နိုင်သော စစ်ပွဲကြီးက ကြီးထွားလာနေပြီဖြစ်သည်။

ယင်းဖုန်း၏ ပုံရိပ်သည် မိခင်သစ်ပင်၏ပင်စည်မှ ကျဆင်းလာသော အရိပ်ထဲသို့ လုံးဝ ပေါင်းစပ်သွားသည့်အလားဖြစ်ပြီး ၎င်း၏ ငွေဖြူရောင်မျက်ဝန်းများသာ တစ်ခါတစ်ရံ အေးစက်စက် လင်းလက်တောက်ပနေခဲ့သည်။

သူသည် ဟိုဟိုဒီဒီ ပြေးလွှားနေရန် မလိုအပ်တော့ပေ။

ကြီးမားလွန်းသော စိတ်ဆန္ဒက သေးငယ်သော ပင့်ကူအိမ်တစ်ခုပမာ သူ့ကို ဗဟိုပြုကာ ဝံပုလွေအသိုက်ကို ဝန်းရံထားသော မိုင်ဆယ်နှင့်ချီ ကျယ်ဝန်းသည့် တောင်တန်း သစ်တောများတစ်လျှောက် ပြန့်ကျဲနေသော ကင်းလှည့်အမဲလိုက်တပ်ရင်း အဖွဲ့ဝင်တိုင်းနှင့် ဆက်သွယ်ထားခဲ့သည်။

လျှို့ဝှက်ချက်များကို အစိုးရသော သူ၏ စွမ်းရည်များက စုံစမ်းထောက်လှမ်းရေးကွန်ရက်ကို ပိုမိုခိုင်မာလာစေသည်။

သာမန် ကင်းလှည့်အမဲလိုက်တပ်ရင်း အဖွဲ့ဝင်များက သူတို့၏ ‘အရိပ်ပုန်းကွယ်ခြင်း’ ပင်ကိုစွမ်းရည်ကို အမြင့်ဆုံးအထိ တွန်းတင်ထားလိုက်ကြသည်။

သူတို့သည် ရိုးရှင်းစွာ ပုန်းကွယ်နေခြင်း မဟုတ်တော့ဘဲ သုံးဖက်မြင် အလွှာပေါင်းများစွာ ပါဝင်သော ပတ်ဝန်းကျင် စောင့်ကြည့်ရေး ကွန်ရက်တစ်ခုကို ဖန်တီးထားလိုက်ကြပြီဖြစ်သည်။

အမြင့်ပိုင်း သစ်သီးပင်များ၊ မြေပြင်ရှိ ချုံပုတ်များ၊ ကျောက်တုံးများကြားရှိ အက်ကွဲကြောင်းများ...

နေရာအနှံ့ရှိ အရိပ်များက သူတို့၏ မျက်စိနှင့် နားများ ဖြစ်လာကြသည်။ မည်သည့် လှုပ်ရှားမှုကိုမဆို ယင်းဖုန်းထံသို့ စိတ်စွမ်းအင်ကွန်ရက်မှတစ်ဆင့် ချက်ချင်း ပြန်လည် ပေးပို့သွားမည်ဖြစ်သည်။

အစစ်အမှန် သေမင်းတမန်များ ဖြစ်ကြသော နှင်းခဲအရိပ်လျှို့ဝှက်အစောင့်အရှောက် ကိုးဦးကမူ ရူးသွပ်သားရဲများ၏ အရင်းအမြစ်ကို ရှာဖွေရန်ဟူသော အန္တရာယ်များလွန်းသည့် မစ်ရှင်ကို လက်ခံရယူထားသည်။

ထိုမစ်ရှင်ကို အကောင်အထည်ဖော်ရန် သမုဒ္ဒရာထဲသို့ ပေါင်းစပ်သွားသော ရေစက်ကိုးစက်ပမာ အရှေ့ဘက်၏ အနက်ရှိုင်းဆုံးနေရာများသို့ တိတ်ဆိတ်စွာ ဝင်ရောက်သွားကြပြီဖြစ်သည်။

မထွက်ခွာမီ သူတို့သည် နောက်ဆုံး စမ်းသပ်မှုများကို ပြုလုပ်ခဲ့ကြသည်- ‘အရိပ်ကိုယ်ပွား’ ဖြင့် ဖန်တီးထားသော ထောင်ချောက်များမှာ အစစ်အမှန်ဟု ထင်မှတ်ရလောက်အောင် လက်တွေ့ကျပြီး သူတို့၏ အငွေ့အသက်များကိုပင် အတုယူထားနိုင်သည်။

ထို့အပြင် ‘အသံတိတ် ထိုးသွင်းခြင်း’ က မီတာဝက်ကျော် ထူထဲပြီး စွမ်းအင်များဖြင့် အားဖြည့်ထားသည့် မာကျောသော သံသစ်သားများကို အလွယ်တကူ ဖောက်ထွင်းနိုင်ခဲ့သည်။

သူတို့သည် ရန်သူ၏နှလုံးသားထဲအထိ တိုက်ရိုက်ထိုးစိုက်မည့် ဝံပုလွေအသိုက်၏ အထက်ရှဆုံး၊ အန္တရာယ်အများဆုံး အရိပ်များပင်ဖြစ်သည်။

မိခင်သစ်ပင်၏အောက်တွင် ဧရိယာများကို ရှင်းလင်းစွာ ခွဲခြားထားပြီး လေထုမှာ တင်းမာနေသော်လည်း စနစ်တကျ ရှိနေခဲ့သည်။

ပိုင်လင်းသည် အတည်ငြိမ်ဆုံး မြေခွေးမလေး အချို့ကို ဦးဆောင်ကာ သီးသန့်ဖယ်ထားသော တိတ်ဆိတ်သည့် ထောင့်တစ်နေရာတွင် အလုပ်များနေခဲ့သည်။

မွှေးကြိုင်သော ဆေးဖက်ဝင်အပင် အမျိုးမျိုးကို ဂရုတစိုက် ထောင်းကြိတ်ပြီး ရောစပ်နေကြသည်။ သူတို့သည် စိတ်ကို တည်ငြိမ်စေပြီး စိတ်စွမ်းအင် ညစ်ညမ်းမှုများကို ခုခံနိုင်သည့် လိမ်းဆေးများနှင့် နံ့သာများ ထုတ်လုပ်မှုကို အရှိန်မြှင့်လုပ်ဆောင်နေကြသည်။