အခန်း (၅၆၀)

မဟူရာတိမ်တိုက် ဂလက်ဆီဘက်မှ အရာရှိများမှာမူ ဤအချိန်တွင် နားစွင့်ပြီး မော့ချူး ပြောသမျှ စကားလုံးတိုင်းကို ကြားချင်နေကြသည်။

နောက်ဆုံးတွင်မူ စိတ်ဝိညာဥ်အစားအစာ ထုတ်လုပ်မှု တိုးမြှင့်နိုင်မည့် ဤနည်းလမ်းသာ ရရှိလျှင် သူတို့သည် ငွေမရှိမှာကို ကြောက်နေစရာ လိုပါဦးမည်လား။

ဤအချက်ကို တွေးမိသောအခါ သူတို့၏ အပြုံးများသည် တောက်ပသော ပါရှန် ဂန္ဓမာပန်းများကဲ့သို့ ပွင့်လန်းလာပြီး ပြန်လည် စေ့ပိတ်၍ပင် မရနိုင်တော့ပေ။

သို့သော် ကံမကောင်းစွာဖြင့် သူတို့၏ မျှော်လင့်ချက်များသည် နောက်ဆုံးတွင် ပျက်ပြားသွားခဲ့ရသည်။

မော့ချူးက စင်မြင့်အလယ်တွင် ထိုင်နေပြီး လက်ထဲမှ ပုလင်းကို ပေါ့ပါးစွာ လှုပ်ပြလိုက်ကာ တဲ့တိုးပင် ပြောလိုက်သည်။

"ဒီထဲမှာ အမဲလိုက်ပွဲတော်တုန်းက မြူခိုးထူတွေ ထည့်ထားတာပါ။ အရင်တုန်းက အမဲလိုက်ပွဲတော်မှာ ဒီအရာက မှော်အပင်တွေနဲ့ မှော်သားရဲတွေဆီက အဆိပ်တွေကို စုပ်ယူပေးနိုင်တဲ့ အံ့မခန်း အာနိသင်ရှိတယ်ဆိုတာ ကျွန်မ တွေ့ရှိခဲ့တယ်။ ဒီပြဿနာကို ဖြေရှင်းပြီးတာနဲ့ စိတ်ဝိညာဥ်အစားအစာ ထုတ်လုပ်မှု တိုးမြှင့်ဖို့က ပိုပြီး လွယ်ကူသွားပါလိမ့်မယ်"

'အမ်... ဘာ။'

မော့ချူး ဤစကားကို ပြောလိုက်သောအခါ အပြင်းထန်ဆုံး တုံ့ပြန်ကြသူများမှာ မဟူရာတိမ်တိုက် ဂလက်ဆီ မှ လူများပင် ဖြစ်သည်။

သူတို့သည် ခဏမျှ ကြောင်အမ်းသွားပြီးနောက် စိတ်ပျက်လက်ပျက်ဖြင့် ရင်ဘတ်ကို ထုကာ ခြေဆောင့်နေမိကြသည်။

'ဘာတွေ ဖြစ်ကုန်တာလဲ။'

'ဒါဆို စိတ်ဝိညာဥ်အစားအစာ ထုတ်လုပ်မှု တိုးမြှင့်ဖို့ အဓိကသော့ချက်က ဒီမြူခိုးထူထဲမှာ ရှိနေတာပေါ့။'

'ဆိုလိုတာက သူတို့ ဒီနှစ်တွေတစ်လျှောက်လုံး ရတနာကို ကိုင်ထားပြီး မိုက်မဲစွာနဲ့ သတိမထားမိခဲ့ကြဘူးလို့ ဆိုလိုတာလား။'

မော့ချူးသည် သူမ၏ စကားများက အင်တာနက်ပေါ်တွင် ကြီးမားသော လှိုင်းလုံးကြီးတစ်ခု ချက်ချင်း ဖြစ်ပေါ်သွားစေလိမ့်မည်ဟု သဘာဝကျစွာပင် မျှော်လင့်မထားခဲ့ပေ။

မဟူရာတိမ်တိုက် ဂလက်ဆီမှ ပြည်သူများသည် ပြင်းထန်သော ဒေါသများဖြင့် ပြည့်နှက်နေကြသည်။ သူတို့သည် တံတွေးများ ပျံထွက်လုမတတ် ပြောဆိုနေကြသည်။

"ငါ မေးချင်တာက... ငါတို့ မဟူရာတိမ်တိုက် ဂလက်ဆီ က သုတေသီတွေ တစ်နေ့တစ်နေ့ ဘာတွေ လုပ်နေကြတာလဲ။ လစာကျတော့ အများကြီးယူပြီး 'မြူခိုးထူက အဆိပ်စုပ်နိုင်တယ်' ဆိုတာကိုတောင် သတိမထားမိကြဘူးလား"

ဤစကား ထွက်ပေါ်လာသည်နှင့် တစ်ပြိုင်နက် အွန်လိုင်းအသုံးပြုသူ အများအပြား၏ ထောက်ခံမှုကို ရရှိသွားခဲ့သည်။

"ဟုတ်တယ်... ဒီအချိန်မှာ သူတို့က အဖွဲ့ချုပ်က ကောင်မလေးတစ်ယောက်ကို အရင် သတိထားမိခွင့် ပေးလိုက်တယ်ပေါ့။ တောက်... ပါးရိုက်ခံရလွန်းလို့ ငါ့မျက်နှာတောင် ရောင်နေပြီ သိလား"

"အခုချိန်မှာ ငါ ဘာမှတောင် မပြောချင်တော့ဘူး"

"ဒါနဲ့ ငါ စကားလေးတစ်ခွန်းလောက် တိတ်တိတ်လေး ဖြတ်ပြောပါရစေ။ မော့ချူးက အမဲလိုက်ပွဲတော်မှာ နေ့ဝက်လောက်ပဲနေပြီး ဒီလို အရေးကြီးတဲ့ တွေ့ရှိမှုကို ရှာဖွေနိုင်ခဲ့တယ်လို့ ပြောတယ်... ဒီကောင်မလေးက လူသားပုံစံ လူသတ်လက်နက်ကြီး ဖြစ်နေမလားလို့ ငါ ရုတ်တရက် ခံစားမိလိုက်တယ်။ နောက်ဆိုရင် သူ့ကို ဝင်ထွက်ခွင့် အချိန် ကန့်သတ်ထားဖို့ စဉ်းစားသင့်မလား။ မဟုတ်ရင် နောက်ထပ် ဘာတွေ ထပ်တွေ့ဦးမလဲ ဘယ်သူသိမှာလဲ"

"ငါကတော့ အဲဒီအမြင်ကို သဘောမတူဘူး။ မော့ချူးက ဒီအချက်ကို ရှာတွေ့နိုင်တာက သူ့အရည်အချင်းပဲ။ ပြီးတော့ သူ ရှာတွေ့ခဲ့ရင်လည်း လူတိုင်း အကျိုးရှိအောင် အသုံးပြုပေးဦးမှာပဲလေ။ မင်းရဲ့ အကြံဉာဏ်က တံခါးပိတ် ကျင့်ကြံနေသလိုမျိုး လုံးဝ တစ်ခြားစီပဲ။ မင်းက အရူးလား"

"ဝါး... မင်းပြောတာ မှန်တယ်၊ ငါ သဘောကျတယ်"

"ဒါပေမဲ့ ပြန်တွေးကြည့်လိုက်တော့လည်း ငါ အသက်ရှူကျပ်သလို ခံစားရတုန်းပဲ..."

ဤတစ်ကြိမ်တွင် အဖွဲ့ချုပ်မှ ပြည်သူများ ဝင်ရောက်စွက်ဖက်ခြင်း မရှိကြပေ။

'ဟဟ... ငါတို့က ဘေးကနေ ထိုင်ပြီး ပျော်ပျော်ကြီး ကြည့်နေလိုက်မယ်။'

သို့သော် ပြောရမည်ဆိုလျှင် မဟူရာတိမ်တိုက် ဂလက်ဆီ က ကိုယ့်ကိုယ်ကိုယ် ပြန်ဆွဲဖြဲနေတာကို ကြည့်ရတာ သူတို့ကို အရမ်း ကျေနပ်စေတာပဲ။

မော့ချူးသည် ယခုအချိန်၌ အွန်လိုင်းအသုံးပြုသူများ၏ ခံစားချက်များကို ရှင်းလင်းစွာ မသိရှိပေ။

ခန်းမတွင်း ငြိမ်သက်သွားပြီးနောက် သူမက ဆက်ပြောလိုက်သည်။

"ဒါပေမဲ့ အဲဒါက ပြဿနာပဲ။ အဲဒီအချိန်တုန်းက သူတို့က ပုလင်းကို ယူပြီး ဇွတ်ဖွင့်လိုက်ကြတယ်။ ရလဒ်အနေနဲ့ ပုလင်းထဲက မြူခိုးထူတွေ ပျံ့ထွက်သွားပြီး... အရမ်းမြန်တဲ့ အရှိန်နဲ့ သူတို့ သုံးယောက်လုံးကို တိုက်စားသွားခဲ့တယ်"

"ရေတစ်အိုင်ကလွဲလို့ ဘာမှ မကျန်ခဲ့ဘူး"

မော့ချူး ပြောပြီးသွားသောအခါ ခန်းမတစ်ခုလုံး တိတ်ဆိတ်သွားခဲ့သည်။

ယခင်က တီးတိုးပြောဆိုသံများပင် ပျောက်ကွယ်သွားသည်။

ပုလင်းကို ကြည့်နေသော လူတိုင်း၏ အကြည့်များသည် ယခင်ကကဲ့သို့ ရူးသွပ်ခြင်း မရှိတော့ပေ။ ထိုအစား ကြောက်ရွံ့မှု အရိပ်အယောင်များ သိုသိပ်စွာ ပါဝင်လာသည်။ အချို့လူများဆိုလျှင် မသိစိတ်ဖြင့် ခြေလှမ်းအနည်းငယ်ပင် နောက်ဆုတ်သွားကြသည်။

ဟုတ်သားပဲ... အတွင်းမှ မြူခိုးထူများသည် တိုက်စားနိုင်သော အာနိသင် ရှိပေလိမ့်မည်။

ဒါဆို... ဒီပုလင်းမှာ တစ်ခုခု မှားယွင်းနေတာများ ရှိလား။ ရှိရင်လည်း သူမက စောစောစီးစီး ပြောပြသင့်တာပေါ့။

ဉာဏ်ကောင်းသော သူအချို့က တစ်စုံတစ်ခု လွဲချော်နေသည်ကို လျင်မြန်စွာ သတိထားမိလိုက်ကြသည်။ သူတို့က ချက်ချင်း မေးမြန်းလိုက်သည်။

"နေပါဦး... တစ်ခုခုတော့ မဟုတ်သေးဘူး။ ဒါဆို... မင်းကျတော့ ဘာလို့ အကောင်းတိုင်း ရှိနေတာလဲ"

မော့ချူးနှင့် ထိုလူသုံးဦးသည် အခန်းတစ်ခုတည်းတွင် ရှိနေခဲ့ကြသည် ဖြစ်ရာ အဘယ်ကြောင့် သူမတစ်ယောက်တည်းသာ ဘေးကင်းစွာ အသက်ရှင်ကျန်ရစ်ခဲ့သနည်း။ ဤအချက်သည် သိသာထင်ရှားစွာပင် ယုတ္တိမရှိပေ။

"ဒီအချက်နဲ့ ပတ်သက်ပြီးတော့က…” မော့ချူးက မျက်မှောင်ကြုတ်လိုက်ပြီး ပြောလိုက်သည်။

“ကျွန်မလည်း သိပ်မသေချာဘူး။ ဒါပေမဲ့ ကျွန်မက အလင်းစွမ်းအားရှင် ဖြစ်နေလို့များလားလို့ ထင်မိတယ်"

သူမ၏ လက်ရှိအခြေအနေတွင် သူမ၏ ခန္ဓာကိုယ်ပေါ်၌ အကာအကွယ် ဒိုင်းတစ်ခု ဝတ်ဆင်ထားသကဲ့သို့ ဖြစ်နေပြီး မြူခိုးထူများ၏ တိုက်စားခြင်းမှ ကာကွယ်နိုင်ခဲ့ခြင်း ဖြစ်သည်။

ဒါက သူမ မြူခိုးထူများ၏ တိုက်စားခြင်းကို မခံရသည့် အကြောင်းရင်းလည်း ဖြစ်သည်။

မော့ချူးက နှုတ်ခမ်းကို စေ့လိုက်ပြီး သူမ၏ ခန့်မှန်းချက်ကို အသေးစိတ် ရှင်းပြလိုက်သည်။

"ပြီးတော့ အဲဒီတုန်းက မှော်ဒေသမှာ ကျွန်မ စုဆောင်းခဲ့တဲ့ မြူခိုးထူတွေက လုံးဝ အန္တရာယ် မရှိပါဘူး။ ယုတ္တိနည်းအရ ပြောရရင် လူတွေကို ဘာမှ မထိခိုက်စေသင့်ဘူး။ ဒါပေမဲ့ ပုလင်းထဲကနေ မြူခိုးထူတွေ စပြီး လျှံထွက်လာတဲ့အချိန်မှာ သိပ်သည်းဆ ပြောင်းလဲသွားပြီး ပြန်လည် တိုက်စားနိုင်စွမ်း ရှိသွားတာ ဖြစ်နိုင်တယ်။ အဲဒါကြောင့် သူတို့ သုံးယောက်လုံး..."

မော့ချူးသည် ဤမေးခွန်းများနှင့် ပတ်သက်၍ အတော်အတန် ရုန်းကန်ခဲ့ရသော်လည်း နောက်ဆုံးတွင် သူမ အဖြေရှာနိုင်ခဲ့သည်။

မော့ချူး ပြောသည်ကို ကြားလိုက်ရသောအခါ စိတ်ဝိညာဥ်အစားအစာ ထုတ်လုပ်မှု တိုးမြှင့်သည့် အဓိကသော့ချက်ကို လူတိုင်းအား မော့ချူး ဘာကြောင့် ဒီလောက် ပွင့်ပွင့်လင်းလင်း ပြောပြရဲသည်ကို လူတိုင်း နားလည်သွားကြသည်။

အလွန် ရိုးရှင်းပါသည်။ သူမ လုံးဝ မကြောက်သောကြောင့် ဖြစ်သည်။

'ဟဟ... ရှင်တို့က သူမဆီက သင်ယူချင်တယ်၊ ပြီးတော့ သူမကို အတုခိုးချင်ကြတယ်ပေါ့။'

'ပြောလိုက်မယ်နော်... ရှင်တို့ မလုပ်နိုင်ဘူး။'

ဂလက်ဆီတစ်ခုလုံးတွင် မော့ချူးသည် တစ်ဦးတည်းသော လူသိများသည့် အလင်းစွမ်းအားရှင် ဖြစ်သည်။ တစ်နည်းအားဖြင့် ပြောရလျှင် အခြားသူများက မြူခိုးထူများကို သွားရောက် စုဆောင်းခဲ့လျှင်ပင် စိတ်ဝိညာဥ်အစားအစာ ပြုလုပ်ရဲသော သတ္တိ ရှိပါမည်လော။ သူတို့သာ သတိမထားပါက သူတို့၏ အလောင်းပင် ကျန်ရစ်မည် မဟုတ်ပေ။

နောက်ဆုံးတွင်မူ ငွေကြေးနှင့် အသက်သည် ဒင်္ဂါးပြားတစ်ပြား၏ ခေါင်းနှင့်ပန်း ကဲ့သို့ပင်။ လူအများစုသည် နောက်တစ်ခုကိုသာ ရွေးချယ်ကြလိမ့်မည်။

တစ်နည်းအားဖြင့် ပြောရလျှင် စိတ်ဝိညာဥ်အစားအစာ ပြုလုပ်နည်း ဖြစ်စေ၊ စိတ်ဝိညာဥ်စာ ထုတ်လုပ်မှု တိုးမြှင့်သည့် နည်းလမ်းဖြစ်စေ ဤနှစ်ချက်စလုံးသည် မော့ချူး၏ လက်ထဲတွင် မြဲမြံစွာ ရှိနေသည်။ ထို့အပြင် ၎င်းတို့သည် မော့ချူး လက်ထဲ၌သာ ရှိနေမည် ဖြစ်သည်။

ယခုအချိန်၌ မဟူရာတိမ်တိုက် ဂလက်ဆီ တစ်ခုလုံးရှိ အဆင့်မြင့် အရာရှိများ အားလုံး ကြောင်အမ်းနေကြသည်။

သူတို့ စိတ်ထဲတွင် ရှိနေခဲ့သော လှပသော အတွေးများသည် မျက်တောင်တစ်ခတ်အတွင်း အချည်းနှီး ဖြစ်သွားခဲ့သည်။ 'သဘောတူထားတဲ့ နည်းလမ်းက ဘယ်ရောက်သွားတာလဲ။ သဘောတူထားတဲ့ ငွေလမ်းကြောင်းက ဘယ်မှာလဲ။ မင်း လိမ်နေတာပဲ။'

အဖွဲ့ချုပ်၏ အဆင့်မြင့် အရာရှိများသည် သူတို့နှင့် လုံးဝ ဆန့်ကျင်ဘက် ဖြစ်နေသည်။

ယခင်က သူတို့သည် မျှော်လင့်ထားသလို ဖြစ်မလာသည့်အတွက် မော့ချူးကို မုန်းတီးခဲ့ကြသော်လည်း ယခုအခါတွင်မူ သူတို့သည် သူမကို အပြည့်အဝ လေးစားအားကျသွားကြသည်။

အထူးသဖြင့် တစ်ဖက်လူများ၏ အတင်း ညှစ်ထုတ်ထားရသော အပြုံးများကို တွေးမိသောအခါ သူတို့၏ နှလုံးသားများသည် ပျော်ရွှင်မှုဖြင့် ပြည့်နှက်သွားသည်။ 'အို... နျဥ်ယွိယွမ်ရဲ့ ဇနီးသည်လေး ပီသပါပေတယ်။ သူမမှာ လှည့်ကွက်တွေ အများကြီး ရှိတာပဲ။'

:ကောင်းတယ်... ငါတို့ သဘောကျတယ်။'

သတင်းစာရှင်းလင်းပွဲ ပြီးဆုံးသွားပြီ ဖြစ်သည်။

ခန်းမထဲမှ ထွက်လာကြသော သတင်းထောက်များသည် ခေါင်းအနည်းငယ် မူးဝေနေဆဲ ဖြစ်သည်။ အဘယ်ကြောင့်ဆိုသော် မော့ချူးက သူတို့အပေါ် ဗုံးအများအပြား ကြဲချခဲ့သောကြောင့် ဖြစ်သည်။ တစ်လုံးပြီးတစ်လုံး ပေါက်ကွဲနေသဖြင့် သူတို့မှာ အချိန်မီပင် မတုံ့ပြန်နိုင်ခဲ့ကြပေ။

သို့သော် သူတို့သည် လက်ထဲမှ အသံဖမ်းစက်များကို မသိစိတ်ဖြင့် ဆုပ်ကိုင်ထားမိကြသည်။ 'အင်း... သူမရဲ့ ဇာတ်လမ်းက မေးခွန်းတွေ အားလုံးကို ဖြေရှင်းပေးလိုက်သလိုပဲ။'

ယခုအချိန်တွင် မော့ချူးနှင့် အခြားသူများသည် ခန်းမထဲတွင် ဆက်ရှိနေပြီး နောက်ဆက်တွဲ ကိစ္စရပ်များကို ကိုင်တွယ်ဖြေရှင်းနေကြသည်။

ကိစ္စရပ်များကို ကိုင်တွယ်ဖြေရှင်းသည်ဟု ဆိုသော်လည်း လက်တွေ့တွင် အားစိုက်ထုတ်နေသူများမှာ နျဥ်ယွိယွမ် ဦးဆောင်သော အမျိုးသားအနည်းငယ်သာ ဖြစ်သည်။ မော့ချူးမှာမူ ထိုင်ခုံပေါ်တွင် တစ်ဝက်တစ်ပျက် မှီထိုင်ကာ မျက်လုံးမှိတ်ပြီး အနားယူနေလေသည်။

နျဥ်ယွိယွမ်က ပြောထားပြီး ဖြစ်သည်။ "ချူးလေး တစ်ယောက်တည်း သတင်းစာရှင်းလင်းပွဲ လုပ်ရတာ ပင်ပန်းတယ် မဟုတ်လား။ မြန်မြန် အနားယူခိုင်းလိုက်။ တကယ်လို့ ဘယ်သူမဆို သူ့ကို ခိုင်းရဲရင်တော့... ဟဟ"

ကျုံးဝမ်က ခလုတ်ခုံကို ကြည့်လိုက်သည်။ သတင်းစာရှင်းလင်းပွဲ စတင်ပြီးသည်မှာ တစ်နာရီခန့်သာ ရှိသေးပြီး မော့ချူးသည် အချိန်အများစုတွင် ထိုင်နေခဲ့ခြင်း ဖြစ်သည်။ ဒါကို ပင်ပန်းသည်ဟု ခေါ်၍ ရပါသလား။

'အယ်... ဘော့စ်ရေ၊ ခင်ဗျားရဲ့ တင်းကျပ်တဲ့ စည်းကမ်းချက်တွေကရော... မော့ချူးနဲ့ ပတ်သက်လာရင် အကုန်လုံး စွန့်လွှတ်လိုက်ပြီလား။'

"အိုကေ"

အွန်လိုင်း ဆွေးနွေးမှုများကို ဖတ်ရှုပြီးနောက် အယ်ရွန်၏ မျက်နှာပေါ်မှ အပြုံးက ပိုနက်ရှိုင်းလာသည်။ သူသည် လက်ချောင်းများကို မတီးဘဲ မနေနိုင်တော့ပေ။

"ချူးလေး ကောင်းကောင်း လုပ်နိုင်ခဲ့တယ်။ ဒါဆို အရင်က ကိုယ်ထိလက်ရောက် ကျူးလွန်မှု အမှုက ဘာပြဿနာမှ မရှိလောက်တော့ဘူး"

"တကယ်လား" ဒါကို ကြားလိုက်တော့ မော့ယန်၏ မျက်လုံးများ အရောင်တောက်လာပြီး မေးလိုက်သည်။

"ဒါပေါ့" အယ်ရွန်သည် ကိုယ့်ကိုယ်ကိုယ် သဘောကျစွာဖြင့် ဆံပင်ကို သပ်တင်လိုက်သည်။ သူက မျက်ခုံးပင့်ကာ ပြန်မေးလိုက်သည်။

"ငါပြောတဲ့စကား ဘယ်တုန်းကများ လိမ်ဖူးလို့လဲ"

ရှဲ့ချွင်ရှီးက မျက်မှောင်အနည်းငယ် ကြုတ်ကာ ပြောလိုက်သည်။

"ဒါပေမဲ့ အမှုက တရားရုံး မရောက်သေးဘူး မဟုတ်လား"

အယ်ရွန်၏ ယုံကြည်မှု ဘယ်က ရောက်လာသည်ကို သူ ကောင်းစွာ နားမလည်ပေ။ နောက်ဆုံးတွင်မူ အမှုက မပိတ်သိမ်းရသေးသဖြင့် ကိစ္စရပ်များတွင် အပြောင်းအလဲများ ရှိနေနိုင်သေးသည်။ မည်သူမျှ အာမခံရဲမည် မဟုတ်ဘူးလေ။

နျဥ်ယွိယွမ်၏ နှုတ်ခမ်းထောင့်စွန်းများ အနည်းငယ် ကွေးညွတ်သွားပြီး မော့ချူးထံ ကြည့်သော သူ၏ အကြည့်များတွင် ဖော်ပြ၍မရနိုင်သော ဂုဏ်ယူမှုများ ပြည့်နှက်နေသည်။

"အမှုက တရားရုံး ရောက်သည်ဖြစ်စေ၊ မရောက်သည်ဖြစ်စေ အရေးမကြီးတော့ပါဘူး။ ချူးလေးရဲ့ စိတ်ဝိညာဥ်အစားအစာ ထုတ်လုပ်မှု တိုးမြှင့်နိုင်တာနဲ့ မဟူရာတိမ်တိုက် ဂလက်ဆီ ဘက်ကလည်း သေချာပေါက် အကျိုးအမြတ် ရမှာပဲ။ အဲဒီတော့ သူတို့ စိတ်မလှုပ်ရှားဘဲ နေမယ်လို့ မင်းထင်လား"

အဖြေက သေချာပေါက် 'ဟုတ်တယ်' ပင် ဖြစ်သည်။

နျဥ်ယွိယွမ်၏ မျက်လုံးများထဲတွင် နားလည်သဘောပေါက်မှု အရိပ်အယောင်များ သိုသိပ်စွာ ပေါ်ထွက်လာသည်။

"ဒါကြောင့် သူတို့က ဒီလို အရေးကြီးတဲ့ အချိန်မျိုးမှာ ချူးလေးနဲ့ အဖွဲ့ချုပ်ကို သေချာပေါက် စိတ်အနှောင့်အယှက် ပေးမှာ မဟုတ်ဘူး။ အကျိုးအမြတ်ဆိုတာ သူတို့ရဲ့ ထာဝရ ရည်မှန်းချက်ပဲ။ လူတစ်ယောက်ကို နာကျင်စေတဲ့ ကိစ္စနဲ့ ပတ်သက်ပြီး ပြောရရင် ချူးလေး က ကိုယ့်ကိုယ်ကိုယ် ကာကွယ်ဖို့ လုပ်ခဲ့တယ်ဆိုတာ ထားဦး၊ တကယ်လို့ သူမက အန်းယောက်ကို တမင်သက်သက် နာကျင်အောင် လုပ်ခဲ့တယ် ဆိုရင်တောင် ဘာဖြစ်လဲ"

အယ်ရွန်က ဤသတင်းစာရှင်းလင်းပွဲကို ဦးဆောင်ကျင်းပပြီး မော့ချူး၏ တန်ဖိုးကို ထုတ်ဖော်ပြသလိုက်သည့် အချိန်မှစ၍ ချူးလေး ဘာမှမဖြစ်စေရ ဟူသည်မှာ သေချာသွားပြီ ဖြစ်သည်။

ထို့နောက်ပိုင်း အမှုကိစ္စသည် လုပ်ရိုးလုပ်စဉ် သဘောမျှသာ ဖြစ်သည်။

ဤစကားကို ကြားလိုက်ရသောအခါ သူတို့အနည်းငယ်မှာ နောက်ဆုံးတွင် နားလည်သွားကြပြီး မပြုံးဘဲ မနေနိုင်ကြတော့ပေ။

ထင်ထားသည့်အတိုင်း နျဥ်ယွိယွမ် ခန့်မှန်းထားသကဲ့သို့ပင် တစ်ပတ်အကြာတွင် တရားခွင်၏ စီရင်ချက် ထွက်ပေါ်လာခဲ့သည်။

စိစစ်ပြီးနောက် မော့ချူးသည် ကိုယ့်ကိုယ်ကိုယ် ကာကွယ်ရင်း တစ်ဖက်လူကို နာကျင်စေခဲ့ခြင်း ဖြစ်ကြောင်း တွေ့ရှိရသည်။ သူမသည် အပြစ်ကင်းစင်ပြီး ချက်ချင်း ပြန်လည် လွတ်မြောက်ခွင့် ရရှိသည်။

အန်းယောက်နှင့် အခြားနှစ်ဦးမှာ တရားခံကို မတရား စွပ်စွဲခဲ့သဖြင့် မဟူရာတိမ်တိုက် ဂလက်ဆီ၏ ဖွဲ့စည်းပုံအခြေခံဥပဒေအရ ထောင်ဒဏ် သုံးလ ကျခံစေရန် အမိန့်ချမှတ်လိုက်သည်။