အခန်း (၅၇၈)

ဘေးရှိ အခမ်းအနားမှူးမှာ တံတွေးကို ခက်ခက်ခဲခဲ မျိုချလိုက်ရသည်။

အာ... သူသည် အရွယ်ရောက်ခြင်း အခမ်းအနားများကို နှစ်ပေါင်း ၅၀ မှ ၆၀ အထိ ကျင်းပပေးခဲ့ဖူးသည်။ အတွေ့အကြုံ အလွန်ရင့်ကျက်သည်ဟု ပြော၍ ရသည်။

သို့သော် မည်မျှပင် အတွေ့အကြုံ ရှိစေကာမူ ဤကဲ့သို့ အဖြစ်မျိုးကို မမြင်ဖူးခဲ့ချေ။

ပုံမှန်အားဖြင့် လူကြီးမိဘများက ‘ဘေးကင်းပါစေ၊ ကျန်းမာပါစေ’ ဟူသော ဆုတောင်းစကားများကိုသာ ပြောလေ့ရှိသည်။ ယခုမူ ပုံမှန်မဟုတ်ဘဲ မိမိဘက်သားကို အစွမ်းကုန် ကာကွယ်ပေးမည်ဟု ပြောနေခြင်း ဖြစ်သည်။

မော့ချူး၏ အရွယ်ရောက်ခြင်း အခမ်းအနား ပီပီ တကယ့်ကို ထူးခြားဆန်းသစ်လှပေသည်။

"အဟမ်း... အဟမ်း..." အခမ်းအနားမှူးက နှစ်ကြိမ်ခန့် ချောင်းဟန့်ကာ စိတ်ထဲမှ အံ့အားသင့်မှုများကို ထိန်းချုပ်လိုက်ပြီး နောက်ထပ် အစီအစဉ်ကို ကြေညာလိုက်သည်။ ‘ကောင်းချီးဇလုံ’

"အားလုံးပဲ.. ကျေးဇူးပြုပြီး ဆုတောင်းစကားတွေနဲ့အတူ 'ကောင်းချီးဇလုံ' ထဲကို လက်ဆောင်ပစ္စည်းတွေ ထည့်ပေးကြပါဦး"

ဤအစီအစဉ်တွင် ဝန်ထမ်းတစ်ဦးက ဇလုံအကြီးကြီးတစ်ခုကို သယ်ဆောင်၍ ဧည့်သည်တိုင်း၏ ရှေ့တွင် ခဏတာ လှည့်လည်ပေးမည် ဖြစ်သည်။ ထိုအတောအတွင်း ဧည့်သည်များကလည်း သူတို့ ပြင်ဆင်လာသော လက်ဆောင်များကို ဇလုံထဲသို့ ထည့်ကြမည်ဖြစ်သည်။ ဒါက မော့ချူး အတွက် ဆုတောင်းမေတ္တာ ပေးပို့ခြင်းကို ဆိုလိုသည်။

အများအားဖြင့် လက်ဆောင်များလေလေ၊ ဇလုံကြီး ပြည့်လေလေဖြစ်ရာ ထိုမိန်းကလေးမှာ ကောင်းချီးမင်္ဂလာ ပိုခံစားရမည်ဟု ယူဆကြသည်။

လူတိုင်းက ဤအချက်ကို ကောင်းစွာ သိကြသည်။ ထို့အပြင် ယနေ့ အခမ်းအနားသို့ တက်ရောက်ခွင့် ရသူများမှာလည်း ငွေကြေးချမ်းသာသူများ ဖြစ်ကြသည်။

ထို့ကြောင့် မကြာမီမှာပင် ခန်းမအတွင်း၌ အသံမျိုးစုံ ထွက်ပေါ်လာတော့သည်။ ဧည့်သည်တစ်ဝက်ခန့်ပင် မရောက်သေးမီမှာပင် ဇလုံကြီးမှာ ပြည့်လုနီးပါး ဖြစ်နေချေပြီ။

အနီးကပ် ကြည့်လိုက်ပါက အချို့က ရှေးဟောင်းပစ္စည်းများ၊ အချို့က ငွေသားများ၊ အချို့က အခန်းကတ်များကို ပေးကြသည်...။ အထူးခြားဆုံး လက်ဆောင်မှာ ပညာရှင်ချန်းပိုင် ပေးသော လက်ဆောင်ဖြစ်သည်။ သူက ရိုးရိုးစိမ်းလန်းသော အပင်အိုးလေး တစ်လုံးကို ပေးခဲ့သည်။ ၎င်းသည် အလွန်ဖန်တီးမှု ရှိလှသလို အလွန်လည်း တန်ဖိုးကြီးလှသည်။

တန်ဖိုးအရ ဆိုပါက ဤအပင်လေး၏ တန်ဖိုးမှာ ရွှေငွေရတနာများထက်ပင် သာလွန်ပေသည်။

ဧည့်သည်များမှာ မနေနိုင်ဘဲ လှမ်းကြည့်မိကြသည်။ ဝိုး! ဒီအစိမ်းရောင်လေးကို ကြည့်စမ်းပါဦး။ အပင်လေးက ခုန်ထွက်လာတော့မည့်အလား အသက်ဝင်နေပြီး ရနံ့သင်းသင်းလေးလည်း ထွက်နေသည်။ အလွန်ပင် လှပလွန်းလှသည်။

ဤကဲ့သို့သော ကြွယ်ဝမှုမျိုးကို မြင်တွေ့နေကျဖြစ်သော ဝန်ထမ်းများပင် လန့်ဖျပ်သွားကြသည်။

ပို၍ ဆိုးသည်မှာ သူတို့ ပြင်ဆင်ထားသော ဇလုံမှာ ရေချိုးကန်နီးပါး ကြီးမားခြင်း ဖြစ်သည်။

ထို့ကြောင့် အလွန်ချမ်းသာသော မိသားစုဖြစ်လျှင်ပင် ဇလုံ၏ တစ်ဝက်ခန့်သာ ပြည့်လေ့ရှိသည်။ ယခုမူ ဧည့်သည်များ တစ်ပတ်ပင် မပြည့်သေးမီ ဇလုံကြီးမှာ လျှံကျနေပြီ ဖြစ်သည်။

ဇလုံသယ်သော ဝန်ထမ်းနှစ်ဦးမှာ ငိုချင်စိတ်ပင် ပေါက်လာတော့သည်။ ဒီလူတွေ ဘယ်လောက်တောင် ချမ်းသာကြတာလဲ။

ပို၍ ရှက်စရာကောင်းသည်မှာ သူတို့တွင် အပိုဇလုံများ မရှိခြင်းပင် ဖြစ်သည်။

ကံကောင်းစွာဖြင့် အခြားဝန်ထမ်းများက အခြေအနေကို ရိပ်မိသဖြင့် အပြင်သို့ အမြန်ပြေး၍ ဇလုံအချို့ ထပ်ဝယ်ခဲ့ရသည်။ သို့မဟုတ်ပါက အခမ်းအနား ပျက်ရချေတော့မည်။

ယနေ့၏ 'လူသားချင်းမစာနာလောက်အောင်' ချမ်းသာပြသော ဤအခမ်းအနားမှာ သူတို့၏ စိတ်တွင် နက်ရှိုင်းစွာ စွဲထင်ကျန်ရစ်ခဲ့သည်။

အကြီးအကဲနျဥ်က ဂုဏ်ယူစွာဖြင့် ခေါင်းမော့လိုက်သည်။ "ဟားဟား၊ ငါတို့ ချူးလေးက တကယ့်ကို ကံကောင်းတာပဲ!"

ကောင်းချီးဇလုံမှာ နျဥ်ယွိယွမ်၏ ရှေ့သို့ ရောက်လာသောအခါ လူတိုင်းက သူ မည်ကဲ့သို့သော လက်ဆောင်ကြီး ပေးမည်ကို သိလိုသဖြင့် လည်ပင်းရှည်အောင် စောင့်ကြည့်နေကြသည်။

ထို့နောက် လူတိုင်းကို အံ့အားသင့်စေသော မြင်ကွင်းတစ်ခု ပေါ်လာခဲ့သည်။

နျဥ်ယွိယွမ်သည် ကောင်းချီးဇလုံထဲသို့ ကိုယ်တိုင် ခုန်ဝင်လိုက်လေတော့သည်။

ဒါဆို သူက သူ့ကိုယ်သူ မော့ချူး အတွက် လက်ဆောင်အဖြစ် ပေးလိုက်တာလား။

အကြီးအကဲနျဥ်၏ ဂုဏ်ယူနေသော မျက်နှာမှာ နီရာမှ ဖြူ၊ ဖြူရာမှ မည်းသွားတော့သည်။ သူ အလွန်စိတ်တိုသွားပြီး အော်ဟစ်လိုက်သည်။

"မင်း ဘာလုပ်နေတာလဲ ကောင်လေး! မြန်မြန် ထွက်ခဲ့စမ်း!"

“ဟင်း” အကြီးအကဲချင်က သူ့ကို အမြန်တားကာ ပြုံးလျက် ပြောလိုက်သည်။ "ဒါက လူငယ်တွေရဲ့ ကိစ္စပဲ၊ မင်းက ဘာလို့ ဝင်ပါနေတာလဲ!"

ဤအရာအားလုံးကို ကြည့်နေသော အခမ်းအနားမှူးမှာ နဖူးမှ ချွေးများကို သုတ်လိုက်ရသည်။

'တောက်! ဒီအရွယ်ရောက်ခြင်း အခမ်းအနားတစ်ခုကို ကျင်းပပေးရတာ တခြားအခမ်းအနား ငါးခုဆက်တိုက် ကျင်းပရတာထက် ပိုပင်ပန်းသေးတယ်။'

နောက်ဆုံးတွင် နောက်ဆုံးအစီအစဉ်သို့ ရောက်ရှိလာသည်။ အခမ်းအနားမှူးက စိတ်သက်သာရာရစွာ သက်ပြင်းချလိုက်ပြီး သူ၏အသံမှာပင် ပျော်ရွှင်မှုများ ပါဝင်နေသည်။ "နောက်ဆုံးအနေနဲ့ မော့ချူး၊ ကျေးဇူးပြုပြီး ဆံပင်စည်းပေးပါဦး"

ဤအစီအစဉ်မှာ လွန်ခဲ့သော နှစ်ပေါင်း ရာချီကတည်းက အသုံးပြုခဲ့ပြီး ယနေ့တိုင် လက်ဆင့်ကမ်းလာခဲ့ခြင်း ဖြစ်သည်။

မော့ချူးက သူမ၏ စကတ်အနားကို မကာ ရှေ့ရှိ ပျော့ပျောင်းသော ကူရှင်ပေါ်တွင် ဒူးထောက်ထိုင်လိုက်သည်။ သူမ၏ ခေါင်းကို အနည်းငယ် ငုံ့ထားသည်။

အနောက်မှ ဝန်ထမ်းတစ်ဦးက နုနယ်လှပသော ဆံပင်စည်းကြိုးကို လက်နှစ်ဖက်ဖြင့် ကိုင်ဆောင်ကာ ရှေ့သို့ လှမ်းလာခဲ့သည်။ ထို့နောက် လှည့်ကာ သူမဘေးရှိ မော့ယန်ထံသို့ ကမ်းပေးလိုက်သည်။

သူ့လက်ထဲရှိ ဆံပင်စည်းကြိုးကို ကြည့်ရင်း မော့ယန်၏ မျက်လုံးများမှာ အနည်းငယ် နာကျင်နေပုံ ပေါက်နေသည်။

အဆုံးတွင် သူက ရှေ့သို့ ခြေလှမ်းနှစ်လှမ်း တိုးလိုက်သည်။ သူ၏ လက်များ တုန်ယင်နေသော်လည်း မော့ချူး၏ ဆံပင်ကို စည်းနှောင်ပေးလိုက်သည်။ လေတိုက်လိုက်သောအခါ ဆံပင်လေးများမှာ အနည်းငယ် လွင့်ပျံသွားသည်။

"အခမ်းအနားကို ယခုမှာပဲ အောင်မြင်စွာ ရုပ်သိမ်းလိုက်ပါပြီ!" အခမ်းအနားမှူးက အော်ဟစ်ကြေညာလိုက်သည်

ထိုအခါမှသာ မော့ချူး မတ်တပ်ရပ်လိုက်တော့သည်။

ယခုအချိန်မှစ၍ သူမသည် တရားဝင် အရွယ်ရောက်သူတစ်ဦး ဖြစ်သွားခဲ့ပြီပင်။

......

"ပြောစမ်းပါဦး၊ ဘာတွေဖြစ်နေတာလဲ"

အစ်မလျိုသည် ကုလားထိုင်ပေါ်တွင် ထိုင်ပြီး ရေအနည်းငယ်ကို ဂလုခနဲမြည်အောင် သောက်လိုက်သည်။ ထိုအခါမှသာ သူမ၏ ရင်ထဲမှ ဒေါသများကို ထိန်းချုပ်နိုင်ခဲ့သည်။ အဆုံးတွင် သူမသည် မအောင့်နိုင်တော့ဘဲ ခေါင်းကိုလှည့်၍ ချန်ချူးချူးကို စူးစိုက်ကြည့်ကာ မေးလိုက်သည်။

"အစ်မလျို ဘာတွေပြောနေတာလဲ။ ကျွန်မ နားမလည်ဘူး..."

ချန်ချူးချူးသည် အပြစ်ကင်းစင်ဟန်ဖြင့် သူမ၏ မျက်ခုံးများကို တွန့်ချိုးလိုက်သည်။

ကံဆိုးစွာဖြင့် သူမ၏ စကားမဆုံးမီမှာပင် အစ်မလျိုက ကြားဖြတ်ပြောလိုက်သည်။

"ဟန်ဆောင်နေလိုက်၊ ဆက်ပြီး ဟန်ဆောင်နေလိုက်စမ်း! နင် နောက်ကျရင် ဘယ်လိုဖြစ်သွားမလဲဆိုတာ ငါ ကြည့်ချင်သေးတယ်!"

အစ်မလျိုသည် ပြောရင်းနှင့်ပင် ခလုတ်ခုံမှ ပြီးခဲ့သည့် နှစ်ရက်အတွင်းက အစီရင်ခံစာများကို ထုတ်ယူကာ စားပွဲပေါ်သို့ ‘ဒုန်း’ ခနဲမြည်အောင် ရိုက်ချလိုက်သည်။ သူမသည် စိတ်ပျက်လက်ပျက် သက်ပြင်းချကာ ပြောလိုက်သည်။

"ထားလိုက်တော့၊ နင့်ဘာသာနင်ပဲ ကြည့်လိုက်တော့။ နင့်ရဲ့ ပုံရိပ်တွေ ဘယ်လောက်တောင် ပျက်စီးကုန်ပြီလဲဆိုတာ ကြည့်စမ်း!"

အစ်မလျို၏ အလွန်တရာ တည်ကြည်လေးနက်နေသော အမူအရာကို မြင်သောအခါ ချန်ချူးချူး တစ်ယောက် ကြောင်အသွားရသည်။ ထိုအခါမှသာ သူမသည် စားပွဲပေါ်ရှိ အစီရင်ခံစာကို လှမ်းယူလိုက်သည်။ သူမ၏ မျက်နှာသည် ချက်ချင်းပင် ဖြူလျော်သွားခဲ့သည်။

“မင်းသမီးသစ် ချန်ချူးချူးသည် နေရာရရှိရန်အတွက် သူမကိုယ်သူမ ဖွင့်ချပြရန် ဝန်မလေးပေ။”

“ဖြူစင်အေးချမ်းသော ကောင်မလေးမှ ဆွဲဆောင်မှုရှိသော အလှလေးအဖြစ် ပြောင်းလဲသွားခြင်း!”

“ချန်ချူးချူးသည် အံ့ဩစရာအကောင်းဆုံး ထိပ်တန်း အမျိုးသမီးကြယ်ပွင့် ၁၀ ဦးစာရင်းတွင် နံပါတ်တစ် ရရှိခဲ့သည်။”

ဤအစီရင်ခံစာများအားလုံးမှာ သူမ၏ နာမည်ဂုဏ်သတင်းကို ဖျက်ဆီးရန်နှင့် အတိတ်က သူမ တည်ဆောက်ခဲ့သော ပုံရိပ်ကောင်းများကို ချေမှုန်းရန် ရည်ရွယ်ထားခြင်း ဖြစ်သည်။

"မဟုတ်ဘူး၊ ဒါတွေက အမှန် မဟုတ်ဘူး!"

ပါးနီများကို သုတ်ပစ်လိုက်သည့်တိုင်အောင် ချန်ချူးချူး၏ မျက်နှာမှာ အနည်းငယ် ဖြူဖျော့နေဆဲပင်။ သူမ၏ လက်များသည် ထိုဆောင်းပါးများကို တင်းတင်းကြပ်ကြပ် ဆုပ်ကိုင်ထားပြီး မျက်လုံးများမှာလည်း ပြူးကျယ်နေခဲ့သည်။

အမှန်အတိုင်း ပြောရလျှင် သူမသည် ယခုရက်ပိုင်းအတွင်း ကံဆိုးနေခဲ့သည်မှာ အမှန်ပင်။ မတော်တဆမှု အမျိုးမျိုးမှာ မကြာခဏ ဖြစ်ပွားခဲ့သည်။ စင်ပေါ်တက်သည့်အခါ သူမ၏ အဝတ်အစားများတွင် ပြဿနာရှိနေခြင်း သို့မဟုတ် လူအများရှေ့တွင် မတော်တဆ လဲကျခြင်းတို့ ဖြစ်ခဲ့သည်။

အရေးကြီးဆုံးမှာ ထိုပွဲအတွင်း သူမသည် စကတ်ကိုသာ အဓိက ဝတ်ဆင်ထားခြင်း ဖြစ်သည်။ ထို့ကြောင့် သူမ၏ ကိုယ်ခန္ဓာ အစိတ်အပိုင်းများမှာ မလွဲမသွေ ပေါ်ထွက်သွားခဲ့ရသည်။

အစပိုင်းတွင် ဤဖြစ်ရပ်မှာ လူအများ စိတ်ဝင်စားမှုကို အနည်းငယ် ရရှိခဲ့ပြီး သူမအပေါ် အာရုံစိုက်မှုမှာ လျင်မြန်စွာ မြင့်တက်လာခဲ့သည်။ ဤအကြောင်းကြောင့်ပင် သူမသည် အချိန်အတန်ကြာ တိတ်တဆိတ် ပျော်ရွှင်နေခဲ့သည်။

သို့သော် နောက်ပိုင်းတွင် အခြေအနေများမှာ ချက်ချင်းပင် ထိန်းချုပ်မရအောင် ဖြစ်သွားခဲ့သည်။ ဤကဲ့သို့သော မတော်တဆမှုများ ဆက်တိုက် ဖြစ်ပွားခြင်းကြောင့် သူမသည် ‘နာမည်ကြီးရန်အတွက် ကိုယ်ခန္ဓာကို ပြသရန် ဝန်မလေးသော’ ပရိယာယ်များသည့် မိန်းမတစ်ဦးအဖြစ် သတ်မှတ်ခံလိုက်ရသည်။

အင်တာနက်ပေါ်တွင် သူမအပေါ် ဆဲဆိုလှောင်ပြောင်မှုများဖြင့် ပြည့်နှက်သွားခဲ့သည်။ သူမ၏ ပရိသတ်များမှာလည်း မခုခံနိုင်တော့ပေ။ ပရိသတ်များ ဆုံးရှုံးသွားသည့် အရှိန်မှာ စီးဆင်းနေသော ရေကဲ့သို့ပင် ဖြစ်သည်။ သူမကို ကြည့်ရုံနှင့်ပင် ရင်နာစရာ ကောင်းလှသည်။

ဤကောလာဟလများကို နှိမ်နင်းရန်အတွက် သူမသည် နာမည်ဂုဏ်သတင်းကို ပြန်ကောင်းမွန်စေမည့်မျှော်လင့်ချက်ဖြင့် အင်တာနက်ပေါ်မှ တိုက်ခိုက်သူ တစ်စုကိုပင် ငွေအမြောက်အမြားပေး၍ လာဘ်ထိုးခဲ့သေးသည်။

မူလက လွန်ခဲ့သည့် ရက်အနည်းငယ်အတွင်း အခြေအနေမှာ တိုးတက်ကောင်းမွန်လာခဲ့သော်လည်း သူမ၏ မန်နေဂျာ ယူဆောင်လာခဲ့သော အစီရင်ခံစာ အနည်းငယ်မှာ သူမအား ပြင်းထန်သော ရိုက်ခတ်မှုတစ်ခုကို ပေးလိုက်ခြင်းပင်။

ဤသတင်းများသည် သာမန် သတင်းများ မဟုတ်သည်ကို သိထားရမည်။ ထိုအစား သူတို့သည် အဖွဲ့ချုပ်မှ အသိအမှတ်ပြုထားသော သြဇာအရှိဆုံး သတင်းဌာနအချို့မှ ထုတ်ဝေခဲ့ခြင်း ဖြစ်သည်။

သူတို့က အမှန်တရားကို အတည်ပြုပြီးသည်နှင့် ထိုအချက်မှာ အပြီးအပိုင် ဖြစ်သွားမည်ဖြစ်ပြီး သံသယဖြစ်ဖွယ် မရှိတော့ပေ။ တောက်ပသော အနာဂတ်ရှိသည့် အမျိုးသမီး ကြယ်ပွင့်တစ်ဦးမှာ ဒီဖြစ်ရပ်အနည်းငယ်ကြောင့် ပျက်စီးသွားရတော့မည်လား။

ထိုအချိန်ကျမှသာ ချန်ချူးချူးသည် အကြီးအကျယ် ထိတ်လန့်သွားခဲ့သည်။ သူမ၏ အရည်လဲ့နေသော မျက်လုံးကြီးများသည် ချက်ချင်းပင် နီမြန်းလာသည်။ သူမသည် မျှော်လင့်ချက်အပြည့်ဖြင့် သူမ၏ မန်နေဂျာကို မော့ကြည့်ကာ ရှေ့နောက်မညီသော စကားများဖြင့် ရှင်းပြလိုက်သည်။ "မဟုတ်ဘူး အစ်မလျို၊ ကျွန်မကို ယုံပေးပါ။ ဒါတွေက... အစစ်မဟုတ်ဘူး..."

"တော်တော့။” ချန်ချူးချူး၏ အမူအရာကို မြင်သောအခါ အစ်မလျိုသည် သူမ၏ မျက်ခုံးကြားကို ပွတ်သပ်လိုက်ပြီး သက်ပြင်းတစ်ချက် ညင်သာစွာ ချလိုက်သည်။ “ဒီကိစ္စမှာ ငါတစ်ယောက်တည်း ယုံနေလို့ ဘာထူးမှာလဲ။ လူတိုင်းက နင့်ကို ယုံကြည်နေရမှာလေ!"

“ပြီးတော့..” ဖျော်ဖြေရေးလောကမှ ထက်မြက်သူတစ်ဦးပီပီ အစ်မလျိုသည် တစ်စုံတစ်ခု မှားယွင်းနေသည်ကို လျင်မြန်စွာ သတိပြုမိသွားသည်။ သူမ တစ်ယောက်တည်း ရေရွတ်လိုက်သည်။

"ဘာဖြစ်လို့လဲတော့ မသိဘူး၊ ဒါပေမဲ့ ဒီကိစ္စမှာ တစ်ခုခု ထူးဆန်းနေသလို ငါ ခံစားနေရတယ်"

တစ်စုံတစ်ယောက်က သူမ၏ နောက်ကွယ်တွင် တစ်ခုခု လုပ်ဆောင်နေပုံရသည်။ အတော်ကြာပြီးနောက် အစ်မလျိုသည် နောက်ဆုံးတွင် တုံ့ပြန်လိုက်နိုင်သည်။ သူမနဖူးကို သူမရိုကကာ ချန်ချူးချူးကို လှည့်ကြည့်လိုက်သည်။ သူမ၏ လေသံမှာ အနည်းငယ် တည်ကြည်နေသည်။

"ဟုတ်သားပဲ! သေချာ ပြန်စဉ်းစားကြည့်ဦး... နင် အရင်က တစ်ယောက်ယောက်ကို စိတ်ဆိုးအောင် လုပ်ခဲ့ဖူးလား"

သို့မဟုတ်ပါက ချန်ချူးချူး တစ်ယောက်တည်း၏ စွမ်းဆောင်ရည်ဖြင့် ဤကဲ့သို့ နာမည်ကျော် မီဒီယာကုမ္ပဏီကြီးများကို သူမအတွက် ဆောင်းပါးများ ရေးခိုင်းရန် မည်သို့ တိုက်တွန်းနိုင်ပါမည်နည်း။ ဤကိစ္စ၏ နောက်ကွယ်တွင် ကြိုးကိုင်သူ တစ်ဦးဦး ရှိနေရမည်။

"... ဘယ်သူ့ကို စိတ်ဆိုးအောင် လုပ်ခဲ့မိလို့လဲ" ထိုစကားကို ကြားသောအခါ ချန်ချူးချူး မျက်မှောင်ကြုတ်လိုက်မိသည်။