အခန်း (၁၆၇၁-၁၆၇၂)

အခန်း (၁၆၇၁) - ကျွန်တော်လည်း အဲဒီလိုပဲ ထင်တယ်

မျက်တောင်လှုပ်သွားတာလား။ ဒါဆိုရင် ဝိညာဉ်က ကိုယ်ထဲပြန်ဝင်ပြီး လူပြန်ဖြစ်တော့မှာပေါ့

လူတိုင်းသည် စိတ်လှုပ်ရှားစွာဖြင့် အနီးကပ်ကြည့်ရှုရန် အလိုအလျောက် ရှေ့သို့ တိုးလာကြသည်။

"အားလုံး တစ်ဖက်ကို ဖယ်နေကြစမ်း"

ရှဲ့အာမန်က ရုတ်တရက် အေးစက်စွာ ဟောက်လိုက်သည်။

"ဒီလိုအချိန်မျိုးမှာ ဘယ်သူကပ်ကပ်၊ ပြဿနာတက်ရင် အဲဒီလူ တာဝန်ယူရမယ်။ အကယ်၍ နံပါတ်ကိုးသာ တစ်ခုခုဖြစ်သွားရင် ဒီစာရင်းကို မင်းတို့ခေါင်းပေါ် ပုံချပစ်မယ်"

ရှုး

လူတိုင်းသည် ချက်ချင်းပင် အရပ်မျက်နှာအသီးသီးသို့ လွင့်စင်သွားသကဲ့သို့ ဖယ်ပေးလိုက်ကြပြီး အချို့မှာ မိမိတို့တွင် အပြစ်မရှိကြောင်း ပြသသည့်အနေဖြင့် လက်ကို အမြန်မြှောက်ပြကြသည်။

အကြီးကဲချန်က သက်ပြင်းချလိုက်သည်

"အားလုံးလည်း စီနီယာအစ်မကြီးရဲ့ သတိကြီးမှုကို အပြစ်မတင်ကြပါနဲ့။ အခုက အရေးကြီးတဲ့ အချိန်ဆိုတော့ အစစအရာရာ သတိထားနေကြရတာပဲ"

လူတိုင်း ခေါင်းညိတ်ကြသည်။ ရှဲ့အာမန် ဘာကို စိုးရိမ်နေသည်ကို အားလုံး သိကြသည်။

လူတိုင်းသည် တစ်ဦးနှင့်တစ်ဦး ကောင်းကောင်းသိကျွမ်းပြီး နှစ်ပေါင်းများစွာ အတူဖြတ်သန်းလာခဲ့ကြသော်လည်း၊ ယခုတစ်ကြိမ်တွင် အမာခံတပည့်များထဲမှ အဆင့် ၃ ရှိသူတစ်ဦး သေဆုံးသွားခြင်းမှာ ကျွယ်မင်နန်းတော်အတွက် နှစ်တစ်ထောင်အတွင်း အပြင်းထန်ဆုံးသော ဖြစ်ရပ်တစ်ခု ဖြစ်နေသောကြောင့်ပင်။

စက္ကန့်အနည်းငယ်အကြာတွင် ဖန့်ချန်သည် နောက်ဆုံး၌ မျက်လုံးပွင့်လာခဲ့သည်။

ရှဲ့အာမန်သည် စကားမပြောဘဲ ဖန့်ချန်ကိုသာ တိတ်ဆိတ်စွာ စိုက်ကြည့်နေသည်။

ဖန့်ချန်သည် မလှမ်းမကမ်းရှိ ချန်အင်းရွှယ်ကို လှမ်းကြည့်လိုက်သည်။ သူမ၏ ပုံပန်းသဏ္ဍာန်မှာ အသက်ရှင်စဉ်ကအတိုင်းပင် ဘာမှမပြောင်းလဲဘဲ သက်ရှိထင်ရှားရှိနေသကဲ့သို့ပင်။ သို့သော် ခန္ဓာကိုယ်ထဲမှ အသက်ဓာတ်များမှာမူ လုံးဝ ကွယ်ပျောက်သွားခဲ့ပြီ ဖြစ်သည်။

"နံပါတ်ကိုး... နံပါတ်သုံးက ဘယ်လိုဖြစ်ပြီး သေသွားတာလဲ"

ရှဲ့အာမန်က လေးပင်စွာ မေးလိုက်သည်။

"စီနီယာအစ်မသုံး မသေပါဘူး"

ဖန့်ချန်က ဆိုသည်။

မသေဘူး ဟုတ်လား

လူတိုင်း မှင်တက်သွားကြသည်။ ရှဲ့အာမန်၏ မျက်ဝန်းများတွင် အံ့အားသင့်မှုများ ဖြတ်ပြေးသွားပြီး

"နံပါတ်သုံး မသေဘူးလို့ မင်းပြောတာလား ဒါဆိုရင် သူ့ရဲ့ ဝိညာဉ်မီးအိမ်က ဘာလို့ ငြိမ်းသွားရတာလဲ"

"စီနီယာအစ်မသုံးက ယင်မသေမျိုး လမ်းစဉ်ကို လျှောက်လှမ်းနေတာပါ။ အခုသေသွားတာက သူ့ရဲ့ ရုပ်ကလာပ်ပဲ ရှိပါသေးတယ်"

ဖန့်ချန်က ရှင်းပြသည်။

လူတိုင်း တစ်ယောက်ကိုတစ်ယောက် ကြည့်လိုက်ကြသည်။

ရှဲ့အာမန်က မျက်မှောင်ကြုတ်လျက်

"သူက ယင်လောကကူးပြောင်းနေတုန်း သေသွားတာ။ ဆိုလိုတာက သူ့ရဲ့ ဝိညာဉ်က အရင်ဆုံး သေဆုံးသွားတာပဲ။ ဒါက ကျင့်ကြံသူတစ်ယောက်အတွက်တော့ လုံးဝ ကွယ်ပျောက်သွားတာပဲ မဟုတ်လား။ လူပြန်ဝင်စားဖို့ အခွင့်အရေးတောင် ရှိမှာမဟုတ်ဘူး"

"နံပါတ်ကိုးက ကြောက်လန့်သွားလို့ ဖြစ်မှာပါ။ ရပါတယ်... ဖြည်းဖြည်းချင်းပဲ ပြောပါ။ စီနီယာအစ်မသုံးကို ဘယ်သူသတ်တာလဲဆိုတာ ငါတို့ကို ပြောပြ။ ကျွယ်မင်နန်းတော်ထဲမှာ မင်းက လုံးဝ ဘေးကင်းပါတယ်"

နန်မင်ရုယွဲ့က အားပေးစကား ဆိုသည်။

"စီနီယာအစ်မသုံးကို ဘယ်သူသတ်လဲလို့ တကယ်မေးမယ်ဆိုရင်... သူကိုယ်တိုင်ပဲလို့ ပြောရပါလိမ့်မယ်"

ဖန့်ချန်သည် ခဏမျှ တိတ်ဆိတ်သွားပြီးနောက် လေးလေးပင်ပင် ဆိုလိုက်သည်။

သူကိုယ်တိုင် ဟုတ်လား

လူတိုင်းမှာ ပို၍ပင် ဝေဝါးသွားကြသည်။ ရှေ့ကလူငယ်မှာ ကြောက်လန့်ပြီး စိတ်နောက်သွားပြီလား

ချန်အင်းရွှယ်က မိမိကိုယ်ကိုယ် ဘယ်လိုလုပ် သတ်မှာလဲ။

"မင်းပြောချင်တာက... သူက ကိုယ့်ကိုယ်ကိုယ် သတ်သေတာပေါ့ ဟုတ်လား"

ရှဲ့အာမန်၏ အကြည့်မှာ ပို၍ လေးနက်လာသည်။

"ဟုတ်ပါတယ်။ အသေးစိတ် အကြောင်းရင်းကိုတော့ စီနီယာအစ်မကြီးက အစ်မသုံးကို ကိုယ်တိုင် မေးကြည့်လို့ ရပါတယ်။ သူ ကျွယ်မင်ယင်လောကကို ပြန်ရောက်နေလောက်ပါပြီ"

ဖန့်ချန်က ဆိုသည်။

နောက်တစ်ခဏတွင် အမာခံတပည့်တစ်ဦးမှာ အပြေးအလွှား ရောက်ရှိလာသည်။

"စီနီယာအစ်မကြီး... ကျွန်တော်တို့ စီနီယာအစ်မသုံးကို တွေ့ပါပြီ။ သူက ယင်စစ်သည်ဌာန မှာ ရှိနေပါတယ်။ ဒါပေမဲ့ ကိုးယောက်မြောက် ရဲ့ သဲလွန်စကိုတော့ မရသေး... အင်"

ထိုတပည့်သည် ခန်းမထဲသို့ ဝင်လာစဉ် ဖန့်ချန်က သက်ရှိထင်ရှားဖြင့် သူ့ကို စိုက်ကြည့်နေသည်ကို မြင်လိုက်ရသောအခါ စကားစပြတ်သွားတော့သည်။

ချန်အင်းရွှယ်သည် ကျွယ်မင်ယင်လောကတွင် တကယ်ရှိနေကြောင်း ကြားလိုက်ရသောအခါ လူတိုင်း အံ့အားသင့်သွားကြသည်။

ဒါဆိုရင် ဖန့်ချန် ခုနကပြောခဲ့တာတွေက အမှန်တရားပေါ့... ချန်အင်းရွှယ်က တကယ်ပဲ ကိုယ့်ကိုယ်ကိုယ် သတ်သေခဲ့တာလား။

"အကြီးကဲချန်... အကြီးကဲကျန်း... ကျွန်မနဲ့ နံပါတ်ကိုးတို့ ဒီနေရာမှာတင် ယင်လောကထဲကို ခဏသွားကြပါဦးမယ်။ အကြီးကဲတို့နှစ်ဦး စောင့်ရှောက်ပေးဖို့ အကူအညီတောင်းချင်ပါတယ်"

ရှဲ့အာမန်က ဆိုလိုက်သည်။

အကြီးကဲနှစ်ဦးက ခေါင်းညိတ်ပြကြသည်။

"စီနီယာအစ်မကြီး... ကျုပ်တို့လည်း လိုက်ခဲ့ရမလား"

နန်မင်ရုယွဲ့က မေးသည်။

"မင်းတို့ လိုက်ခဲ့ဖို့ မလိုဘူး။ ဒီမှာပဲ စောင့်နေကြ"

ရှဲ့အာမန်က ငြင်းပယ်လိုက်သည်။

ခဏအကြာတွင် သူမနှင့် ဖန့်ချန်တို့နှစ်ဦးစလုံး ကျွယ်မင်ယင်လောကရှိ ယင်စစ်သည်ဌာနတွင် ပေါ်လာကြသည်။

"ပြောစမ်းပါဦး... ဘာတွေ ဖြစ်ကုန်တာလဲ"

ရှဲ့အာမန်သည် တည်ကြည်သော မျက်နှာဖြင့် ချန်အင်းရွှယ်ကို ကြည့်ကာ မေးလိုက်သည်။

ချန်အင်းရွှယ်က အသာအယာ ပြုံးပြသည်။ ထိုအပြုံးမှာ ပုံမှန်နှင့်မတူဘဲ ရန်စလိုသော အမူအရာများ လျော့နည်းနေပြီး ပို၍ နူးညံ့သိမ်မွေ့နေသည်။

ရှဲ့အာမန်သည် ဤမြင်ကွင်းကို မြင်လိုက်ရသောအခါ ရုတ်တရက် မယုံနိုင်ဟန်ဖြင့် မျက်လုံးများပင် ပြူးကျယ်သွားရသည်။

"ငါ နံပါတ်ကိုးအတွက် ကဲ့စားချေပေးလိုက်ပြီ"

ချန်အင်းရွှယ်က ပြုံးလျက် ဆိုသည်။

"မင်း... နံပါတ်ကိုးအတွက် ကဲ့စားချေပေးလိုက်တယ် နံပါတ်ကိုးရဲ့ ရန်ငြိုးက..."

ရှဲ့အာမန်၏ စကားစ ရပ်သွားပြီး အမူအရာမှာ အလွန်ပင် လေးနက်သွားသည်။

"ငါတို့ အရင်က လူမှားရှာခဲ့တာလား"

"မမှားပါဘူး။ ဒါပေမဲ့ နောက်ကွယ်မှာ ပိုပြီး နက်နက်ရှိုင်းရှိုင်း ပုန်းကွယ်နေတဲ့ လူတစ်ယောက် ရှိနေသေးတာ။ ဒီနှစ်တွေမှာ ငါ သူ့ကိုပဲ အမြဲလိုက်ရှာနေခဲ့တာ။ ရှဲ့ကျစ်ဌာန ထူထောင်ပြီးတဲ့နောက်မှာတော့ ငါ နောက်ဆုံးမှာ သူ့ကို ရှာတွေ့ခဲ့တယ်"

ချန်အင်းရွှယ်က အေးအေးဆေးဆေးပင် ဆက်ပြောသည်။

"လူကို တွေ့ပြီးတာနဲ့ ငါ နံပါတ်ကိုးကို ခေါ်သွားပြီး အဲဒီလူကို အပြတ်ရှင်းလိုက်တယ်။"

သူမ ခေတ္တရပ်ပြီး

"ပြောရရင် နံပါတ်ကိုးကို ကျေးဇူးတင်ရမယ်၊ သူ့ကြောင့်သာ ငါ ဒီအခွင့်အရေး ရခဲ့တာ"

"မင်း ပြောတာတွေက ငါ့ကို ဝေဝါးသွားစေပြီ။ မရေမရာတွေ ပြောမနေနဲ့။ မင်းက ကျွယ်မင်နန်းတော်ရဲ့ အမာခံတပည့်တစ်ယောက်ပဲ၊ ရုပ်ကလာပ် သေဆုံးသွားခဲ့ရင်တောင် ဒီလောက် ဝေဝါးဝေဝါးနဲ့ သေလို့မဖြစ်ဘူး"

ရှဲ့အာမန်က ထိုင်လိုက်ပြီး

"မင်း အရင်ပြော... မင်းပြောပြီးမှ နံပါတ်ကိုး ပြောရမယ်"

ချန်အင်းရွှယ်က ဖန့်ချန်ကို တစ်ချက်ကြည့်ကာ မျက်စိတစ်ဖက်ကို နောက်ပြောင်သည့်အနေဖြင့် မှိတ်ပြလိုက်သည်။ ထို့နောက် ချောင်းတစ်ချက်ဟန့်လိုက်ပြီး

"ဒီကိစ္စက နံပါတ်ကိုး ရှဲ့ကျစ်ဌာနထဲကို စဝင်ကတည်းက စတာပဲ..."

ရှဲ့ကျစ်ဌာနထဲကို စဝင်ကတည်းက ဟုတ်လား

ရှဲ့အာမန်သည် ဖန့်ချန်ကို တစ်ချက် လှမ်းကြည့်လိုက်သည်။ သူမ စိတ်ထဲတွင် အလွန်ထူးဆန်းနေသည်။ ရှဲ့ကျစ်ဌာနထဲကို ဝင်တာ မကြာသေးဘဲနဲ့ ဒီကိစ္စကြီးနဲ့ ဘယ်လိုလုပ် ပတ်သက်ကုန်တာလဲ။

"နံပါတ်ကိုးက တာဝန်တစ်ခု လက်ခံခဲ့တယ်။ ဒါပေမဲ့ ဒီတာဝန်ရဲ့ ပစ်မှတ်က အကြောင်းရင်းမရှိဘဲ သေသွားတယ်၊ အဲဒီနောက်တော့..."

ချန်အင်းရွှယ်သည် ဖန့်ချန်၏ တာဝန်မှ စတင်၍ မော်ထျန်းဌာန၊ တိကျန်းအရှင်နှင့် ရှဲ့ကျစ်ဌာနတွင် သူ၏ အဆင့်အတန်းများအထိ အကုန်ပြောပြလိုက်သည်။

"နောက်ဆုံးမှာတော့ ငါက အဆင့် ၈ ယင်မသေမျိုး ကျင့်ကြံခြင်းနဲ့ အဲဒီလူကို အသေအလဲ နှိမ်နင်းလိုက်တယ်။ ပြီးတော့ နံပါတ်ကိုးကို ခေါ်ပြီး ခန့်ခန့်ညားညားပဲ ထွက်လာခဲ့လိုက်တာ။ အဲဒီ တိကျန်းမြို့တော်ကြီးကတော့ ပျက်စီးသွားပြီ၊ သူတို့အတွက် ဘာသက်သေမှ ကျန်ခဲ့မှာ မဟုတ်ဘူး"

ချန်အင်းရွှယ်က စကားဆုံးသောအခါ လက်ဖက်ရည်တစ်ခွက် သောက်လိုက်ပြီး ရှဲ့အာမန်၏ တုံ့ပြန်မှုကို စောင့်နေသည်။

"မော်ထျန်းဌာန... ရှဲ့ကျစ်ဌာနထဲမှာ မော်ထျန်းဌာနနဲ့ ပတ်သက်တဲ့ တာဝန်တွေ ရှိနေတယ်ဆိုတော့... ကြည့်ရတာ မော်ထျန်းဌာနရဲ့ နောက်ခံကို ငါ ခန့်မှန်းလို့ ရလောက်ပြီ"

ရှဲ့အာမန်က တိုးတိုးလေး ရေရွတ်လိုက်သည်။

"နင်သာ မခန့်မှန်းနိုင်သေးရင် ဒီစီနီယာအစ်မကြီး နေရာကို ငါ့ကိုပဲ ပေးထိုင်လိုက်တော့။ ငါက အခု အဆင့် ၈ ယင်မသေမျိုးပဲ၊ ကျင့်ကြံခြင်းက နင့်ထက် မနိမ့်ဘူး"

ချန်အင်းရွှယ်က ပါးစပ်ထောင့်ကလေး အသာအယာ ကွေးညွှတ်ကာ ပြုံးလိုက်သည်။

"စီနီယာအစ်မနှစ်ဦးခင်ဗျာ... မော်ထျန်းဌာနရဲ့ နောက်ခံက ဘာလဲ"

ဖန့်ချန်က သိချင်စိတ် ပြည့်နှက်နေသော မျက်နှာဖြင့် မေးလိုက်သည်။

သူတို့နှစ်ဦးက ဖန့်ချန်ကို တစ်ချက်ကြည့်လိုက်ကြသည်။ ရှဲ့အာမန်က ညင်သာစွာ ဆိုသည်။

"မော်ထျန်းဌာနရဲ့ တည်ရှိမှုက အခုလက်ရှိ ဖူထူလောက ထဲက ယင်လောက အသီးသီးနဲ့ ဆက်စပ်မှု ရှိနေတယ်"

“ဒါပေါ့... ဒါကြောင့်လည်း ဒီယင်လောကတွေက ယင်မသေမျိုး လမ်းစဉ်ကို ရနေကြတာပဲ ”

ဖန့်ချန် စိတ်ထဲမှ ရေရွတ်လိုက်သည်။ သူ အခု စိုးရိမ်နေသည်မှာ အင်အားစုအသီးသီးမှ အဆင့် ၉ ကျင့်ကြံသူများသည် ထို မော်ထျန်းတိကျန်း နှင့် တစ်စုံတစ်ရာသော မဟာမိတ် စာချုပ်များ ချုပ်ဆိုထားကြသလား ဆိုသည်ကိုပင်။

"ဒီကိစ္စကို နံပါတ်ကိုးကို မပြောပြတာ ပိုကောင်းပါတယ်။ နံပါတ်ကိုးရဲ့ ကျင့်ကြံခြင်းက မမြင့်သေးဘူး၊ ဒါတွေထဲမှာ ဝင်မရှုပ်စေချင်ဘူး။ ဒါပေမဲ့..."

ချန်အင်းရွှယ်က ရှဲ့အာမန်ကို တစ်ချက်ကြည့်လိုက်ပြီး

"မိစ္ဆာမျိုးနွယ် နဲ့ ပတ်သက်တဲ့ သတင်းတွေကိုတော့ သူ့ကို ပြောပြလို့ ရပါတယ်။ သူက ဒီကိစ္စကို တော်တော် စိတ်ဝင်စားပုံရတယ်။ ငါက သူ့ကို ဒီထဲမှာ ထပ်မပါဖို့ အရိပ်အမြွက် ပြောခဲ့ပေမဲ့ သူကတော့ ဇွဲမလျှော့ဘဲ ဆက်လုပ်နေတုန်းပဲ"

"မိစ္ဆာမျိုးနွယ် ကိစ္စကို သူ့ကို ပြောပြလို့ရမယ်လို့ မင်းထင်တာလား"

ရှဲ့အာမန်က မျက်မှောင်ကြုတ်လျက် ဖန့်ချန်ကို အကဲခတ်လိုက်သည်။

တစ်ဖက်လူက ယခုကဲ့သို့ မိစ္ဆာမျိုးနွယ်အကြောင်းကို တိုက်ရိုက် ထုတ်ပြောလာခြင်းမှာ သူမ၏ သဘောထားကို ဖော်ပြလိုက်ခြင်းပင် ဖြစ်သည်။

"သူ့ရဲ့ ကျင့်ကြံခြင်းက မလုံလောက်သေးလို့ ဒီကိစ္စထဲမှာ မပါစေချင်ဘူးလို့ နင်ပြောခဲ့တာ မဟုတ်လား"

ရှဲ့အာမန်က ဆက်မေးသည်။

"ဒါပေမဲ့ သူက ငါနဲ့အတူတူ အဆင့် ၈ ယင်မသေမျိုး တစ်ဦးကို သတ်ခဲ့ပြီးပြီလေ။ အတွေ့အကြုံလည်း ရနေပြီပဲ။ ပြီးတော့ သူက စစ်သည်အဆင့် ရှဲ့ကျစ် တစ်ယောက် ဖြစ်နေတဲ့အပြင် အစီရင်မသေမျိုး အတတ်ပညာ နှစ်မျိုးတောင် တတ်ထားတာ။ ငါထင်တယ်... သူ အခု ဒီကိစ္စထဲမှာ ပါဝင်ဖို့ အရည်အချင်း ရှိနေပြီ"

ချန်အင်းရွှယ်က ဆိုသည်။

ဖန့်ချန်က ခေါင်းကို ညင်သာစွာ ညိတ်လိုက်ပြီး

"ကျွန်တော်လည်း အဲဒီလိုပဲ ထင်တယ်"

အရင်က ခံစားခဲ့ရတဲ့ ထူးဆန်းမှုက တကယ်ပဲ စိတ်ထင်တာ မဟုတ်ဘူး။

အစပိုင်းမှာ ချန်အင်းရွှယ်က သူ့ကို မိစ္ဆာမျိုးနွယ်ဆိုတဲ့ လမ်းကြောင်းပေါ်ကနေ တမင် ဖယ်ထုတ်ဖို့ ကြိုးစားခဲ့တာပဲ။

"မင်းရဲ့ ဒီကိစ္စ အသေးစိတ်တွေကို ရှင်းရှင်းလင်းလင်း မသိရသေးဘူး။ မိစ္ဆာမျိုးနွယ် ကိစ္စကိုတော့ ခဏစောင့်ဦး။ ငါ သိချင်တာက မင်း ဘယ်လိုမျိုး အဆင့် ၈ ရှေးဟောင်းမသေမျိုး တစ်ဦးကို သတ်ဖြတ်နိုင်ခဲ့တာလဲ သူက မင်းကို မနိုင်ရင်တောင်မှ မပြေးနိုင်ဘူးလား"

ရှဲ့အာမန်က မျက်မှောင်ကြုတ်လျက် မေးသည်။

ချန်အင်းရွှယ်က ယုံကြည်မှု အပြည့်ဖြင့် ပြန်ပြောသည်။

"ဘာလို့လဲဆိုတော့ ငါက ချန်အင်းရွှယ် မလို့ပဲ။ ငါက ကျွယ်မင်နန်းတော်ရဲ့ နံပါတ်သုံးပဲလေ။ သူက ငါ့လက်ထဲကနေ ဘာလို့ ထွက်ပြေးနိုင်ရမှာလဲ"

ဖန့်ချန်က ရှဲ့အာမန်တစ်ယောက် ဒါကို လှောင်ပြောင်လိမ့်မည်ဟု ထင်နေသော်လည်း၊ သူမက ခဏမျှ စဉ်းစားပြီးနောက် ခေါင်းညိတ်ပြသည်။

"ဒါကလည်း ကျိုးကြောင်းဆီလျော်ပါတယ်"

ခဏအကြာတွင် သူမသည် ဖန့်ချန်ဘက်သို့ လှည့်၍ ညင်သာစွာ မေးလိုက်သည်။

"နံပါတ်ကိုး... မင်းလည်း မိစ္ဆာမျိုးနွယ်နဲ့ ပတ်သက်လို့ သိပ်ပြီး အစိမ်းသက်သက်တော့ မဟုတ်တော့ဘူးမလား"

“စီနီယာအစ်မကြီးက ဝမ်အိုကြီး လုပ်နေတဲ့ ကိစ္စအချို့ကို သိနေတာပဲ...”

ဖန့်ချန် စိတ်ထဲမှ တိတ်တဆိတ် အံ့ဩသွားမိသည်။ တကယ်တော့ လူတိုင်းက တစ်ယောက်ထက်တစ်ယောက် ဟန်ဆောင်ကောင်းကြသလို၊ တစ်ယောက်ထက်တစ်ယောက်လည်း ပါးနပ်လွန်းကြသည် မဟုတ်ပါလား။

အခန်း (၁၆၇၂) - တစ်ဝက်တစ်ပျက် ကောင်းကင်ဘုံနိယာမ

ဖန့်ချန်၏ အမြင်အရ ရှဲ့အာမန်၏ ဤစကားတစ်ခွန်း ထွက်ပေါ်လာခြင်းမှာ သူမသည် မိစ္ဆာမျိုးနွယ်များ တည်ရှိနေမှုကို စောစီးကတည်းက သိရှိထားကြောင်း သက်သေပြနေသည်။

ယခင်က ရှောက်ကွမ်းယင် သူမကို ခြုံခိုတိုက်ခိုက်ခဲ့စဉ်ကသော်လည်းကောင်း၊ ထို့နောက်တွင် ရှောက်ကွမ်းယင်တစ်ယောက် တာ့လေ့ယင် တွင် မိစ္ဆာအသွင် ပြောင်းသွားခြင်းနှင့် မသေမျိုးလောကငယ်တွင် စောင့်ကြိုနေခဲ့ခြင်းများအားလုံး၌ သူမသည် မိစ္ဆာမျိုးနွယ်များအကြောင်းကို သိရှိပြီးသား ဖြစ်ပေလိမ့်မည်။

"စီနီယာအစ်မကြီး... ဘာလို့ အဲဒီလို ပြောရတာလဲ။ နံပါတ်ကိုးက မိစ္ဆာမျိုးနွယ်တွေအကြောင်း ကောင်းကောင်းသိတယ်လို့ ဘာလို့ ထင်နေရတာလဲ"

ချန်အင်းရွှယ်၏ အမူအရာမှာ ထူးဆန်းသွားပြီး ရှဲ့အာမန်၏ စကားထဲမှ တစ်စုံတစ်ခု လွဲချော်နေသည်ကို သတိပြုမိသွားသည်။

"အရင်က နံပါတ်ကိုး ငါ့ဆီ လာသတင်းပို့တုန်းကလည်း သူက သေသေချာချာ မပြောနိုင်ခဲ့ဘူး၊ သံသယရှိရုံလောက်ပဲ ရှိတာပါ"

"မပြောပြနိုင်ဘူး"

ရှဲ့အာမန်က မျက်စောင်းတစ်ချက် ထိုးလိုက်သည်။

မူလကဆိုလျှင် ချန်အင်းရွှယ်မှာ အရင်လိုပင် ဒေါသတကြီး ခုန်ပေါက်ပြီး ပြန်လည် ရန်တွေ့ပေလိမ့်မည်။

သို့သော် ယခုတွင်မူ ချန်အင်းရွှယ်က ခေါင်းညိတ်ရုံသာ ညိတ်ပြပြီး

"မပြောချင်လည်း မပြောနဲ့ပေါ့" ဟု အေးဆေးစွာ ဆိုသည်။

"နင် အခုလို ဖြစ်နေတာက... နင် ကျွယ်မင်နန်းတော်ကို ပထမဆုံး ရောက်လာတဲ့ အချိန်ကို သတိရစေတယ်"

ရှဲ့အာမန်က ချန်အင်းရွှယ်ကို ကြည့်လိုက်သည်

"မှတ်မိသေးတယ်... အဲဒီတုန်းက နင် ငါ့ကို ကြည့်တဲ့ အကြည့်တွေမှာ အားကျမှုတွေနဲ့ မျှော်လင့်ချက်တွေ ပြည့်နေတာလေ။ ငါက နင့်ကို စကားတစ်ခွန်းလောက် ပြောလိုက်ရင်တောင် နင်က အကြာကြီး ပျော်နေတတ်တာ"

"အခုလည်း အတူတူပါပဲ၊ ကျွန်မက စီနီယာအစ်မကြီးကို အရမ်း အားကျတာပါ"

ချန်အင်းရွှယ်က ပြုံးလျက် ဆိုသည်။

ရှဲ့အာမန်က နှာခေါင်းတစ်ချက် ရှုံ့လိုက်ပြီး ထိုအကြောင်းကို ဆက်မပြောတော့ဘဲ ဖန့်ချန်ဘက်သို့ အကြည့် ပြန်လွှဲလိုက်သည်။

"ပြောစမ်းပါဦး... မိစ္ဆာမျိုးနွယ်တွေအကြောင်း မင်း ဘယ်လောက် သိထားလဲ"

ချန်အင်းရွှယ်ကလည်း ဖန့်ချန်ကို စူးစမ်းလိုသော မျက်ဝန်းများဖြင့် ကြည့်လိုက်သည်။

တိကျန်းမြို့တော်က ကိစ္စကို ကြုံတွေ့ပြီးနောက်တွင် ဖန့်ချန်၏ နည်းလမ်းများမှာ လူတိုင်း မြင်တွေ့နေရသည်ထက် အဆပေါင်းများစွာ ပို၍ အစွမ်းထက်ကြောင်း သူမ အသေအချာ သိရှိသွားခဲ့ပြီ ဖြစ်သည်။

တိကျန်းအရှင်ကိုပင် အပြစ်ပေးတုတ်နွယ် နှင့် ရိုက်သတ်နိုင်ခဲ့ခြင်းမှာ လူ့လောက နယ်မြေကိုးခု၏ လူငယ်မျိုးဆက်သစ်များထဲတွင် အထွတ်အထိပ်သို့ ရောက်ရှိနေသည့် လူနည်းစုထဲမှ တစ်ဦး ဖြစ်နေပြီ ဖြစ်သည်။

"မိစ္ဆာမျိုးနွယ်... သူတို့က အပြင်က လာတဲ့ ကျူးကျော်သူတွေ"

"သူတို့မှာ ကိုယ်ပိုင် စစ်မှန်သော မိစ္ဆာလမ်းစဉ် ရှိတယ်"

"သူတို့ရဲ့ ပစ်မှတ်က လူ့လောက နယ်မြေကိုးခုကို လုယက်တိုက်ခိုက်ဖို့ပဲ"

"မင်း သိထားတာတွေက အရမ်း ယေဘုယျ ဆန်လွန်းတယ်၊ ဒီထက် ပိုပြီး အသေးစိတ်တာမျိုး မရှိဘူးလား"

ချန်အင်းရွှယ်က မနေနိုင်ဘဲ ရယ်မောလိုက်သည်။

ပိုပြီး အသေးစိတ်တာလား

ဖန့်ချန်က ခဏမျှ စဉ်းစားပြီးနောက်

"အောက်ပိုင်း နယ်မြေခြောက်ခု က မိစ္ဆာဘေးဒုက္ခတွေဟာ မိစ္ဆာမျိုးနွယ်တွေရဲ့ လက်ချက် ဖြစ်သင့်တယ်"

ဟု ဆိုသည်။

ရှဲ့အာမန်နှင့် ချန်အင်းရွှယ်တို့က ခေါင်းကို နှေးကွေးစွာ ညိတ်ပြကြသည်။ သို့သော် ရှဲ့အာမန်က ပြုံးလျက်

"နယ်မြေကိုးခု မဟာမိတ်အဖွဲ့ ရဲ့ လက်ချက်လည်း ဖြစ်နိုင်တာပဲလေ"

"နယ်မြေကိုးခု မဟာမိတ်အဖွဲ့ကတော့ ကျရှုံးမသေမျိုး တွေနဲ့ မဟာမိတ်ဖွဲ့ဖို့ အလုပ်ရှုပ်နေတာ နေမှာပါ"

ဖန့်ချန်က ရှဲ့အာမန်ကို တစ်ချက် လှမ်းကြည့်လိုက်သည်။

ရှဲ့အာမန်က ဘာမှပြန်မပြောဘဲ ဖန့်ချန်ကို ဆက်ပြောရန် အချက်ပြသည်။

ထပ်ပြောရဦးမှာလား

ဖန့်ချန်၏ အမူအရာမှာ ထူးဆန်းသွားပြီး

"စီနီယာအစ်မနှစ်ဦးက မိစ္ဆာမျိုးနွယ်နဲ့ ပတ်သက်ပြီး ဘယ်လို သတင်းအချက်အလက်တွေ သိထားကြလဲ ကျွန်တော် သိတာကတော့ ဒါအကုန်ပါပဲ"

ဆက်ပြောလျှင် အချို့ကိစ္စများကို ရှင်းပြရန် ခက်ခဲသွားလိမ့်မည်။ ထုတ်ပြောလိုက်ပါက မိမိ၏ သိမြင်နားလည်မှု မှာ ထပ်မံ၍ ချုပ်နှောင်ခြင်း ခံရနိုင်ချေ ရှိသည်။

"ကြည့်ရတာ မင်း သိထားတာက သိပ်မများသေးဘူးပဲ၊ မိစ္ဆာမျိုးနွယ်တွေ ရှိနေတယ်ဆိုတာကို သံသယပဲ ရှိနေတာ၊ လက်ရှိ မိစ္ဆာမျိုးနွယ်တွေက ဘယ်လိုမျိုးလဲဆိုတာ မသိသေးဘူးပဲ"

ချန်အင်းရွှယ်က ရယ်မောကာ

"ကျွန်မတို့ ပြောနိုင်တာကတော့... အခုရှိနေတဲ့ မိစ္ဆာမျိုးနွယ်တွေက မင်းနဲ့ ငါတို့လိုပဲ၊ အပြင်ပန်းကြည့်ရင် အတူတူပဲ ဖြစ်နေပေမဲ့ တကယ်တမ်းမှာတော့ သူတို့က တစ်ခြားမျိုးနွယ်စုတွေ ဖြစ်နေတာ"

"စီနီယာအစ်မသုံး ပြောချင်တာက... လူသားမျိုးနွယ်တွေဟာ မိစ္ဆာအသွင် ပြောင်းသွားပြီးတဲ့နောက်မှာ မိစ္ဆာမျိုးနွယ် ဖြစ်သွားတာကို ပြောတာလား"

ဖန့်ချန်က ရုတ်တရက် မေးလိုက်သည်။

ရှဲ့အာမန်နှင့် ချန်အင်းရွှယ်တို့ ခေတ္တမျှ တိတ်ဆိတ်သွားကြပြီးနောက် ရှဲ့အာမန်က အေးဆေးစွာပင်

"မင်း အဲဒီလို တွေးတာလည်း မှန်ပါတယ်"

ဖန့်ချန် တွေးတောနေမိသည်။ အကယ်၍ မတော်တဆမှု တစ်စုံတစ်ရာ မရှိခဲ့လျှင် ဤစီနီယာအစ်မနှစ်ဦးစလုံးသည်လည်း သူကဲ့သို့ပင် ပိတ်ဆို့ထားသော သိမြင်နားလည်မှု ကို ချိုးဖျက်နိုင်ခဲ့ကြသူများ ဖြစ်ပေလိမ့်မည်။

"နံပါတ်ကိုး... လက်ရှိ ကမ္ဘာ့အခြေအနေ ကို မင်း ဘယ်လို မြင်သလဲ"

ရှဲ့အာမန်က မေးသည်။

"ကမ္ဘာ့အခြေအနေ ဟုတ်လား"

"အင်း... လူ့လောက နယ်မြေကိုးခုထဲမှာတင် ကန့်သတ်မထားဘူး"

ရှဲ့အာမန်က ဆိုသည်။

"ကျရှုံးမသေမျိုး တွေကိုလည်း တစ်ခုအပါအဝင်လို့ သတ်မှတ်လို့ ရမလား"

ဖန့်ချန်က မေးသည်။

"ကျရှုံးမသေမျိုးတွေကတော့ အဓိက တစ်ခုပေါ့"

ရှဲ့အာမန်က ပြုံးလျက် ခေါင်းညိတ်ပြသည်။

"ဒါဆိုရင် အခု ကမ္ဘာကြီးကို လုယူဖို့ အပြိုင်အဆိုင် ဖြစ်နေတဲ့ အင်အားစု ငါးခု ရှိနေတာပေါ့"

ဖန့်ချန်က ဆိုသည်

"လူသားမျိုးနွယ်၊ မိစ္ဆာမျိုးနွယ်၊ နတ်ဆိုးမျိုးနွယ် ၊ ကျရှုံးမသေမျိုးတွေနဲ့ မော်ထျန်းဌာန"

"မော်ထျန်းဌာနကလည်း ပါတယ်လို့ မင်းထင်တာလား သူက လူသားမျိုးနွယ်နဲ့ ယှဉ်နိုင်လို့လား ကျရှုံးမသေမျိုးတွေနဲ့ရော ယှဉ်နိုင်လို့လား "

ရှဲ့အာမန်မှာ အတော်လေး အံ့အားသင့်သွားဟန် ရှိသည်။

ချန်အင်းရွှယ်ကလည်း ဖန့်ချန်ကို စိတ်ဝင်တစား ကြည့်နေသည်။

"နံပါတ်ကိုး... မင်း တကယ်ပဲ အတော်များများ သိထားတာပဲ"

စကားက ဤအဆင့်အထိ ရောက်လာသောအခါ ဖန့်ချန်သည် မိမိအပေါ်တွင် ရှိနေသော ကန့်သတ်ချက်များမှာ ရုတ်တရက် လျော့နည်းသွားသကဲ့သို့ ခံစားရပြီး အချို့သော ကိစ္စရပ်များကို ပွင့်ပွင့်လင်းလင်း ပြောဆို၍ ရနိုင်ပြီဟု ယူဆလိုက်သည်။

"တကယ်တော့ အရင်က ဝိညာဥ်မယ်တော် က ကျွန်တော့်ကို ယင်လောကရဲ့ လျှို့ဝှက်ချက်အချို့ ပြောပြခဲ့ဖူးတယ်"

"သူပြောတာက... ရှေးဟောင်းယင်လောကမှာ ငရဲမင်း အုပ်ချုပ်မှု အရှိန်အဝါ အထွတ်အထိပ် ရောက်နေတဲ့ အချိန်တုန်းက သူပုန်တပ်ဖွဲ့တစ်ခု ပေါ်ခဲ့ဖူးတယ်တဲ့"

"အဲဒီသူပုန်တွေက မော်ထျန်းတိကျန်း ကို ခေါင်းဆောင်တင်ထားကြတာ။ အဲဒီ အတုမရှိ ယင်မိစ္ဆာကြီးက ယင်လောကရဲ့ စစ်မှန်တဲ့ နတ်ဘုရားတွေနဲ့ ဆင်တူတဲ့ ယင်မသေမျိုးလမ်းစဥ် ကိုတောင် တီထွင်ခဲ့သေးတယ်"

"မော်ထျန်းဌာနရဲ့ နောက်ကွယ်မှာ ရှိနေတာကတော့ သိသာထင်ရှားလှတဲ့ ဒီမိစ္ဆာတိရစ္ဆာန်ကြီးပဲ။ သူ့ရဲ့ အခုလက်ရှိ စွမ်းအားက သာမန် အဆင့် ၉ မသေမျိုးတွေထက် အများကြီး သာလွန်နေမှာ အသေအချာပဲ"

"ဒါကို ကြည့်ရင်... မော်ထျန်းဌာနကလည်း ကမ္ဘာကြီးကို လုယူဖို့ အရည်အချင်း အပြည့်အဝ ရှိနေတာပဲ"

ဖန့်ချန် စကားဆုံးသောအခါ စီနီယာအစ်မနှစ်ဦးကို ကြည့်လိုက်သည်။ သူတို့နှစ်ဦးမှာ တွေးတောနေဟန် ရှိကြပြီး ၎င်းတို့သည်လည်း မော်ထျန်းဌာနအကြောင်းကို သူ သိထားသည်ထက် မနည်း သိထားကြကြောင်း နားလည်လိုက်သည်။

ဒါကလည်း သဘာဝကျပါသည်။ အကယ်၍ သိမြင်နားလည်မှု ကန့်သတ်ချက်ကို ချိုးဖျက်နိုင်ခဲ့လျှင် အခွံထဲမှ ရုန်းထွက်လာနိုင်သကဲ့သို့ ဖြစ်ပြီး လောကကြီး၏ အရာအားလုံးကို ရှင်းလင်းစွာ သိမြင်လာနိုင်သောကြောင့် ဖြစ်သည်။ ယာယီအားဖြင့် မသိသေးလျှင်တောင် သဲလွန်စများကို လိုက်လံရှာဖွေပြီး ထိုကွယ်ကာထားသော မျက်နှာဖုံးကို ခွာပစ်ရန် နည်းလမ်းရှာကြပေလိမ့်မည်။

"မင်းရဲ့ မှန်းဆချက်က မှန်ပါတယ်။ မော်ထျန်းဌာနမှာ ကမ္ဘာကြီးကို လုယူနိုင်တဲ့ စွမ်းအား ရှိတယ်"

"အဲဒီ မော်ထျန်းတိကျန်းရဲ့ နည်းလမ်းတွေကို သာမန် အဆင့် ၉ လို့ ရိုးရိုးရှင်းရှင်း ခေါ်လို့မရဘူး။ နန်းတော်သခင် ပြောဖူးတာကတော့... အဲဒီပုဂ္ဂိုလ်ဟာ တစ်ဝက်တစ်ပျက် ကောင်းကင်ဘုံနိယာမ ဖြစ်နေနိုင်တယ်တဲ့"

ရှဲ့အာမန်က ညင်သာစွာ ခေါင်းညိတ်သည်

"ဒါကြောင့် မော်ထျန်းဌာနမှာ သူတစ်ယောက်တည်း ရှိနေရင်တောင် ကမ္ဘာကြီးကို လုယူဖို့ စွမ်းအား အလုံအလောက် ရှိနေတာပဲ"

တစ်ဝက်တစ်ပျက် ကောင်းကင်ဘုံနိယာမ

ဖန့်ချန် ဤအခေါ်အဝေါ်ကို ပထမဆုံးအကြိမ် ကြားဖူးခြင်း ဖြစ်သည်။ စာသားအရ နားလည်ရန် လွယ်ကူလှသည် - ၎င်းမှာ ကောင်းကင်ဘုံနိယာမ နှင့် အနီးစပ်ဆုံး တည်ရှိမှုမျိုးလား။

ကောင်းကင်ဘုံနိယာမထက် အားနည်းသော်လည်း သာမန် အဆင့် ၉ ထက် ပို၍ အစွမ်းထက်သည်လား။

"ဒါပေမဲ့ မင်း ပြောတာ တစ်ခုတော့ မှားနေတယ်"

ရှဲ့အာမန်က ဆက်ပြောသည်။

"ကြားသိပါရစေ"

ဖန့်ချန်၏ အမူအရာ လှုပ်ခတ်သွားပြီး စိတ်ဝင်တစား ရှိနေသည်။

"ငါတို့ အခုလက်ရှိ ရထားတဲ့ သတင်းတွေအရဆိုရင်... မော်ထျန်းဌာနရဲ့ တကယ်တမ်း ပစ်မှတ်က ယင်လောကငယ် ပဲ။ အဲဒီ ယင်မိစ္ဆာကြီးက ယင်လောကကိုပဲ အုပ်ချုပ်ချင်တာ၊ လူ့လောကအပေါ်မှာ စိတ်ဝင်စားမှု သိပ်မရှိဘူး"

ရှဲ့အာမန်က ဆိုသည်။

ဖန့်ချန်က သံသယဖြစ်ဟန်ဖြင့်

"ဒါဆိုရင် သူတို့ ဘာလို့ ထိုက်ချန်းနယ်မြေ ရဲ့ စစ်ပွဲတွေမှာ ပါဝင်နေရတာလဲ"

"မင်း အဲဒါကိုတောင် သိနေတာလား"

ရှဲ့အာမန်က မနေနိုင်ဘဲ ရယ်မောလိုက်သည်

"ဘာလို့လဲဆိုတော့ မော်ထျန်းတိကျန်းက ယင်လောကကို အုပ်ချုပ်ချင်ပေမဲ့ အဲဒါက လွယ်ကူတဲ့ကိစ္စ မဟုတ်လို့ပဲ"

"သူက တစ်ဝက်တစ်ပျက် ကောင်းကင်ဘုံနိယာမ ဖြစ်နေပါစေဦး... တကယ်လို့ သူသာ ကောင်းကင်ဘုံနိယာမ စစ်စစ် ဖြစ်လာရင်တောင်မှ ယင်လောကတွေကို တစ်ခုတည်းဖြစ်အောင် ပေါင်းစည်းနိုင်ဖို့ မသေချာဘူး။ အဲဒီထဲမှာ အရမ်း အရေးကြီးတဲ့ အရာအချို့ လိုအပ်နေသေးတယ်"

"ဒါကြောင့် သူတို့က တစ်ခြားသူတွေနဲ့ ပူးပေါင်းဖို့ လိုအပ်တာပေါ့"

"အရေးကြီးတဲ့ အရာတွေ လိုနေတယ်ဆိုတာ... အရင်က ယင်လောကကနေ မိစ္ဆာမျိုးနွယ်တွေ လုယူသွားတဲ့ နတ်ဘုရားပစ္စည်း တွေကို ပြောတာလား"

ဖန့်ချန်၏ အမူအရာ သိသိသာသာ ပြောင်းလဲသွားသည်။

အကယ်၍ ထိုအရာများက ဖူထူလောက နှင့် ယင်လောကငယ်တို့ကို တစ်ခုတည်းဖြစ်အောင် ပေါင်းစည်းပေးနိုင်မည်ဆိုလျှင်... သူ၏ လက်ရှိစွမ်းအားဖြင့် မော်ထျန်းတိကျန်းကို ရင်ဆိုင်ရန် မည်သို့ အရည်အချင်း ရှိတော့မည်နည်း။

မော်ထျန်းတိကျန်းကို တားဆီးထားနိုင်သည်မှာ ထိုလောကနှစ်ခုကြားက တံတိုင်း မဟုတ်ခဲ့ဘူးလား။

"အင်း... လောကနှစ်ခုကြားက တံတိုင်းကို ဖြိုဖျက်ပြီး လောကနှစ်ခုလုံးကို တစ်ခုတည်းဖြစ်အောင် လုံးဝ ပေါင်းစည်းပေးနိုင်တဲ့ အရာတစ်ခု ရှိတယ် "

"အဲဒီအချိန်ကျရင် ယင်လောကဟာ ပြည့်စုံတဲ့ ယင်လောကကြီး ဖြစ်လာလိမ့်မယ်။ မော်ထျန်းတိကျန်းကလည်း အလိုအလျောက်ပဲ မျိုးဆက်သစ် ငရဲမင်း ဖြစ်လာလိမ့်မယ်။"

ရှဲ့အာမန်က ခပ်အေးအေး ပြုံးလျက်

"ရှေးခေတ်ကနေ အခုအထိ ဘယ် ငရဲမင်းမှ တစ်ဝက်တစ်ပျက် ကောင်းကင်ဘုံနိယာမ မဖြစ်ခဲ့ဖူးဘူး။ အကယ်၍ သူသာ အဲဒီနေရာကို ထိုင်လိုက်နိုင်ရင် နောက်ပိုင်းမှာ ယင်လောကရဲ့ ဘယ်ကိစ္စမဆို သူပြောတာပဲ အတည်ဖြစ်သွားလိမ့်မယ်။ လောကမှာ ဘယ်သူမှ ကန့်ကွက်နိုင်မှာ မဟုတ်ဘူး"

"အဲဒီပစ္စည်းက မိစ္ဆာမျိုးနွယ်တွေ လက်ထဲမှာ ရှိနေတာကြောင့်... မော်ထျန်းဌာနက မိစ္ဆာမျိုးနွယ်တွေနဲ့ ပူးပေါင်းပြီး သူတို့အတွက် ထိုက်ချန်းနယ်မြေမှာ နယ်မြေချဲ့ထွင်ပေးပြီး အခြေခံ အုတ်မြစ်တွေ ချပေးနေတာပေါ့ ဟုတ်လား"

ဖန့်ချန်၏ အမူအရာမှာ အလွန်ပင် လေးနက်သွားတော့သည်။