အခန်း (၅-၆)

အခန်း (၅) အစွမ်းထက်ပြီး ကြောက်မက်ဖွယ်ကောင်းသော စနစ်၏ လုပ်ဆောင်ချက်ကို ကျိုးယွမ် ရှာဖွေတွေ့ရှိခြင်း

ခရမ်းရောင်ဝါးတောင်ပေါ်တွင် ကျိုးယွမ်နှင့် ဝမ်ချန်တို့သည် သစ်ခုတ်ဓားမများကိုယ်စီ ကိုင်ဆောင်ထားကြပြီး ကလေးလက်မောင်းခန့် တုတ်သော ခရမ်းရောင်ဝါးများကို ခုတ်ထစ်နေကြသည်။

ကျိုးယွမ်သည် ချီသန့်စင်ခြင်းအဆင့်တစ်သာ ရှိသေးသော်လည်း ဝိညာဉ်စွမ်းအင်များက သူ၏ခန္ဓာကိုယ်ကို ပြုပြင်ပြောင်းလဲပေးထားသဖြင့် သူ၏ လက်မောင်းများတွင် ဂျင်ပေါင်းရာနှင့်ချီသော ခွန်အားများ ရှိနေပေ၏။

သို့သော် ခရမ်းရောင်ဝါးများသည် အလွန်တရာ မာကျောပြီး ဝါးတစ်ပင် ပြတ်ကျစေရန် ကျိုးယွမ် ဆယ်ချက်ထက်မက ခုတ်ရပေသည်။

ဝမ်ချန်သည် ကျိုးယွမ်ထက် အများကြီး ပိုမြန်၏။ သူသည် ခရမ်းရောင်ဝါးတစ်ပင်ကို ငါးချက် ခြောက်ချက်ခန့်ခုတ်ရုံဖြင့် ပြတ်ကျစေနိုင်သည်။

မကြာမီ တစ်နေ့တာ ကုန်ဆုံးသွားပြီး သူနှင့် ဝမ်ချန်တို့သည် ခရမ်းရောင်ဝါး စုစုပေါင်း နှစ်ရာ့သုံးဆယ် ခုတ်နိုင်ခဲ့ကြသည်။ ၎င်းတို့အနက် ငါးပုံသုံးပုံကို ဝမ်ချန်က ခုတ်ခဲ့ပြီး ကျိုးယွမ်က ငါးပုံနှစ်ပုံသာ ခုတ်နိုင်ခဲ့ပေ၏။

ကျားဖြူဂိုဏ်းမှ ချီသန့်စင်ခြင်း အဆင့်လေး ကျင့်ကြံသူတစ်ဦးရောက်လာပြီး ဝါးများကို ရေတွက်ကာ သူတို့အား အဆင့်နိမ့် ဝိညာဉ်ကျောက်တုံးနှစ်တုံး ပေးလေသည်။

အပိုပါလာသော ဝါးသုံးဆယ်အတွက်ကိုမူ မနက်ဖြန်မှ ရှင်းပေးမည် ဖြစ်၏။

ကျိုးယွမ်က အတော်လေး အားနာသွားပြီး အဆင့်နိမ့် ဝိညာဉ်ကျောက်တုံး တစ်တုံးကိုသာ ယူလိုက်သည်။ အကြောင်းမှာ ဝမ်ချန်သည် အမှန်တကယ်ပင် သူ့ထက် အလုပ်ပိုလုပ်ခဲ့သောကြောင့် ဖြစ်ပေ၏။

တစ်နေကုန် အလုပ်လုပ်ပြီးနောက် ကျိုးယွမ် သူ၏လက်များ ကိုက်ခဲနေကြောင်း ခံစားလိုက်ရသည်။ ဤအလုပ်သည် သာမန်လူများအတွက် အမှန်တကယ် မဟုတ်ချေ။ ချီသန့်စင်ခြင်းအဆင့်တစ် ရှိနေသော်လည်း တစ်နေကုန် လုပ်ပြီးနောက် သူ အနည်းငယ် မခံနိုင်ဖြစ်သွားပေ၏။

နောက်ထပ် လဝက်ခန့်အတွင်း ကျိုးယွမ်နှင့် ဝမ်ချန်တို့သည် အစောကြီးထွက်ပြီး နောက်ကျမှ ပြန်လာခဲ့ကြသည်။ သူသည် တစ်နေ့လျှင် ဝိညာဉ်ကျောက်တုံးတစ်တုံးသာ ယူပြီး အပိုများကို ဝမ်ချန်အား ပေးလေ၏။

ဝမ်ချန်က တစ်ဝက်စီ ခွဲယူရန် အကြံပြုသော်လည်း ကျိုးယွမ်က ငြင်းပယ်ခဲ့ပြီး သူ ထိုက်တန်သည်ကိုသာ ယူမည်ဟု ပြောဆိုခဲ့သည်။

ရလဒ်အနေဖြင့် ဝမ်ချန်၏ ကျိုးယွမ်အပေါ် အမြင်မှာ သိသိသာသာ ကောင်းမွန်လာခဲ့ပြီး သူ၏ညီမဖြစ်သူ၏ အကဲဖြတ်မှုကို တိတ်တဆိတ် ချီးကျူးမိလေ၏။

ယနေ့သည် သူတို့ အနောက်ကျဆုံး ပြန်လာရသောနေ့ဖြစ်သည်။ အကြောင်းမှာ မနက်ဖြန်မှစ၍ ကျားဖြူဂိုဏ်းက ခရမ်းရောင်ဝါးများကို ယာယီ လိုအပ်မည်မဟုတ်သောကြောင့် ဖြစ်ပေ၏။

သို့သော် သူနှင့် ဝမ်ချန်တို့ မြို့ထဲသို့ ဝင်ရန် ပြင်ဆင်နေစဉ်မှာပင် လူသုံးဦးက သူတို့၏ လမ်းကို ပိတ်ဆို့လိုက်လေသည်။

ထိုသုံးဦးအနက် တစ်ဦးမှာ ချီသန့်စင်ခြင်း အဆင့်သုံးတွင်ရှိပြီး ကျန်နှစ်ဦးမှာ

ချီသန့်စင်ခြင်း အဆင့်တစ်တွင် ရှိပေ၏။

"မင်းတို့ ဘာလုပ်ရမလဲဆိုတာသိရင် မင်းတို့ဆီမှာရှိတဲ့ ဝိညာဉ်ကျောက်တုံးတွေ အကုန်ပေးစမ်း... အဲ့လိုမှမဟုတ်ရင် ငါကိုယ်တိုင် မင်းတို့ကို သတ်ပြီး ယူရတာကို စိတ်မကွက်ဘူးနော်..."

ချီသန့်စင်ခြင်းအဆင့်သုံးရှိ အမျိုးသားက အေးစက်စွာ ပြောဆိုလိုက်ပြီး သူ၏ခန္ဓာကိုယ်မှ အစွမ်းထက်သော အရှိန်အဝါတစ်ခု ချက်ချင်း ထွက်ပေါ်လာလေ၏။

"ကျန်းမင်... မင်းတို့ ထပ်ပြီးတော့လား..."

ဝမ်ချန်သည် ခေါင်းဆောင်ဖြစ်သူကို ရှင်းလင်းစွာ မှတ်မိနေပြီး သူ၏ မျက်ခုံးများ အနည်းငယ် တွန့်ကွေးသွားကာ မျက်နှာပေါ်တွင် ဒေါသအရိပ်အယောင်များ ပေါ်လာပေ၏။

"ဟဲဟဲ... ဝမ်ချန်... အကယ်၍ မင်းရဲ့ညီမကို ငါနဲ့ လိုက်ခိုင်းမယ်ဆိုရင် ဒီတစ်ခါ မင်းကို လွှတ်ပေးမယ်... ဘယ်လိုလဲ..."

ကျန်းမင်က ရယ်မောလိုက်ပြီးနောက် ပြောဆိုလေသည်။

“သူတောင်းစား... မင်းရဲ့ စုတ်ပြတ်နေတဲ့ ရုပ်နဲ့များ ငါ့ညီမကို မင်းနဲ့ လိုက်စေချင်သေးတယ်ပေါ့... သွားပြီး မှန်လေးဘာလေး ကြည့်ပါဦးလား..."

ကျန်းမင်၏ စကားကိုကြားချိန်တွင် ဝမ်ချန်က အလွန်တရာ ဒေါသထွက်သွားလေ၏။

ဤကျန်းမင်သည် သူ၏ညီမကို တပ်မက်နေသည်မှာ ကြာပြီဖြစ်သည်။ အကယ်၍ သူ၏ညီမက သူ့ကို မဖျောင်းဖျခဲ့ပါက သူသည် ကျန်းမင်နှင့် သေချာပေါက် တိုက်ခိုက်ခဲ့သည်မှာ ကြာပြီဖြစ်ပေ၏။

ဤစကားကို ကြားချိန်တွင် ကျန်းမင်၏ မျက်နှာ ချက်ချင်း မည်းမှောင်သွားလေသည်။ ထို့နောက် ဝမ်ချန်ကို အေးစက်စွာ ကြည့်ကာ ပြောလိုက်၏။

"ဝမ်ချန်... မင်းက သေချင်နေတာပဲ..."

ကျန်းမင် စကားပြောပြီးနောက် သူ၏ ချီသန့်စင်ခြင်း အဆင့်သုံး ကျင့်ကြံမှုကို တိုက်ရိုက် ထုတ်ဖော်ပြသလိုက်ပြီး သတ်ဖြတ်လိုသော အငွေ့အသက်များကို ထုတ်လွှတ်လိုက်လေ၏။

ဤမြင်ကွင်းကိုကြည့်ရင်း ကျိုးယွမ် မျက်မှောင်ကြုတ်သွားသည်။ ယနေ့ကိစ္စကို အေးချမ်းစွာ ဖြေရှင်း၍မရနိုင်တော့ကြောင်း သူ သိလိုက်ပေ၏။

တစ်ဖက်တွင်သုံးဦးရှိပြီး သူတို့ဘက်တွင် နှစ်ဦးသာ ရှိသည်။ ဝမ်ချန်အနေဖြင့် ကျန်းမင်ကို အချိန်ဆွဲထားနိုင်လျှင်တောင် သူသည် သူနှင့်အဆင့်တူ ချီသန့်စင်ခြင်း အဆင့်တစ် နှစ်ဦးကို ရင်ဆိုင်ရဦးမည် ဖြစ်သည်။

"ဒီလိုလုပ်လို့ မဖြစ်ဘူး... တစ်ယောက်ယောက်ကို အရင်သတ်ဖို့ နည်းလမ်းရှာရမယ်..."

ကျိုးယွမ်က ချက်ချင်း ဆုံးဖြတ်ချက်ချလိုက်၏။ သူ၏ ဘယ်ဘက်လက်ထဲတွင် ပျံလွှားဓားမြောင်သုံးလက် ပေါ်လာသည်။ ၎င်းတို့ကို လျိုမိသားစုမှ သိုင်းပညာရှင် နှစ်ဦးကို သတ်ဖြတ်စဉ်က သူ ရရှိခဲ့ခြင်း ဖြစ်ပေ၏။

တစ်ချိန်တည်းမှာပင် ကျိုးယွမ်သည် သူ၏ သိုလှောင်အိတ်ထဲမှ ဓားရှည်ကို မျက်ခြည်မပြတ် စောင့်ကြည့်နေပြီး အချိန်မရွေး ထုတ်ယူရန် အသင့်ပြင်ထားလေသည်။

"ကျားဖြူဂိုဏ်းမှာ စည်းမျဉ်းတွေ ရှိတယ်... ကျင့်ကြံသူတွေ အချင်းချင်း တိုက်ခိုက်ခွင့် မရှိဘူး... အကယ်၍ တွေ့သွားရင် ပြင်းထန်တဲ့ အပြစ်ပေးခံရလိမ့်မယ်..."

ကျိုးယွမ်က ထိုသုံးဦးကို ကြည့်ကာ အေးစက်စွာ ပြောဆိုလိုက်၏။

ကျန်းမင် လှောင်ပြုံးပြုံးလိုက်ပြီးနောက် ပြောလေသည်။

"အဲ့ဒါက မြို့ထဲမှာပဲ အကျုံးဝင်တာ... မြို့အပြင်ဘက်မှာ တိုက်ခိုက်တာကို ကျားဖြူဂိုဏ်းက ဂရုမစိုက်ဘူးကွ..."

ဤစကားကို ကြားချိန်တွင် ကျိုးယွမ်က ချက်ချင်း နားလည်သွားပေ၏။

ဤနေရာတွင် တိုက်ခိုက်ပါက ကျားဖြူဂိုဏ်း၏ အပြစ်ပေးသူများကို ဆွဲဆောင်မိမည်ကို ယခုလေးတင် သူ စိုးရိမ်နေခဲ့ခြင်း ဖြစ်သည်။ သူတို့ ဂရုမစိုက်ဘူးဆိုမှတော့ သူ စိတ်အေးသွားလေ၏။

"ဝမ်ချန်... ငါ ရက်စက်တယ်လို့ မပြစ်တင်နဲ့နော်... စိတ်မပူပါနဲ့... မင်းသေသွားရင် မင်းညီမကို ငါ သေချာ စောင့်ရှောက်ပေးပါ့မယ်..."

ကျန်းမင်က စကားပြောပြီးနောက် ဝမ်ချန်ဆီသို့ တိုက်ရိုက် ခုန်အုပ်သွားပြီး မျက်တောင်တစ်ခတ်အတွင်းမှာပင် သူတို့ နှစ်ဦး တိုက်ခိုက်နေကြလေတော့၏။

ဝမ်ချန်သည် ချီသန့်စင်ခြင်း အဆင့်နှစ်သာ ရှိသော်လည်း သူသည် နွားတစ်ကောင်ကဲ့သို့ သန်မာလှပေသည်။ ချီသန့်စင်ခြင်း အဆင့်သုံးရှိသော ကျန်မင်နှင့် တိုက်ခိုက်ရာတွင် သူသည် မထင်မှတ်ထားလောက်အောင်ပင် အရေးနိမ့်မနေခဲ့ချေ။

ကျိုးယွမ်က သူတို့ကို တစ်ချက်ကြည့်လိုက်ပြီး ချက်ချင်းပင် စိတ်အေးသွားလေ၏။

ထိုအခိုက်အတန့်တွင် အခြားနှစ်ဦးသည် ကျိုးယွမ်အနီးသို့ ဘယ်ညာ တစ်ယောက်တစ်ဖက် ချဉ်းကပ်လာကြပြီး သူတို့နှစ်ဦးစလုံး၏ မျက်နှာပေါ်တွင် အေးစက်သော အပြုံးများ ရှိနေပေသည်။

ကျိုးယွမ်သည် ကြောက်ရွံ့ဟန်ဆောင်ကာ အဆက်မပြတ် နောက်ဆုတ်နေရင်း တစ်ပြိုင်နက်တည်း ပြောဆိုလိုက်၏။

"အစ်ကိုကြီးနှစ်ယောက်... ကျွန်တော်တို့ကြားမှာ ဘာရန်ငြိုးရန်စမှ မရှိပါဘူး... သေချာပေါက် တိုက်ခိုက်ဖို့ မလိုဘူး မဟုတ်လား... ကျွန်တော် အရှုံးပေးလို့ မရဘူးလား..."

"ကောင်လေး... ဝမ်ချန်နဲ့ အတူရှိနေတဲ့ မင်းရဲ့ ကံဆိုးမှုကိုပဲ အပြစ်တင်လိုက်တော့..."

"ငါတို့ရဲ့ အစ်ကိုမင်က သူ့ညီမကို သဘောကျနေတာ... သူက ငါတို့ကို အကြိမ်များစွာ တားဆီးခဲ့တယ်... အကယ်၍ တစ်ယောက်ယောက်ကို အပြစ်တင်ချင်ရင် ဝမ်ချန်ကိုသာ အပြစ်တင်လိုက်..."

လူတစ်ဦးက လှောင်ပြုံးပြုံးကာ အချိန်မရွေး လှုပ်ရှားရန် အသင့်ပြင်လိုက်လေ၏။

ကျိုးယွမ်သည် သူတို့၏ အနောက်ဘက်သို့ ရုတ်တရက် စိုက်ကြည့်လိုက်ပြီး အသံကျယ်ကျယ်ဖြင့် အော်လိုက်သည်။

"ဝမ်လင်း... မင်း ဘာလို့ ဒီကို ရောက်နေတာလဲ..."

ကျိုးယွမ်အနီးသို့ ချဉ်းကပ်လာသော လူနှစ်ဦး အံ့အားသင့်သွားပြီး သူတို့၏ အနောက်ဘက်သို့ မကြည့်ဘဲ မနေနိုင်တော့ချေ။ သို့သော် ထိုနေရာတွင် ဘာမှ လုံးလုံးလျားလျား မရှိပေ။

ထိုနှစ်ဦးစလုံး စိတ်ထဲမှ 'ဒုက္ခပဲ' ဟု အော်ဟစ်လိုက်ပြီး အလျင်အမြန် ခေါင်းပြန်လှည့်ကြည့်လိုက်သော်လည်း နောက်ကျသွားခဲ့ပြီ ဖြစ်၏။

ကျိုးယွမ်၏ မျက်လုံးများတွင် သတ်ဖြတ်လိုသော အငွေ့အသက်များ တောက်ပသွားသည်။ သူသည် သူတို့ထဲမှ တစ်ဦးအနီးသို့ လျှပ်စီးကဲ့သို့ အလျင်အမြန် ချဉ်းကပ်သွားပြီး ယခုလေးတင် သူ ဆွဲထုတ်လိုက်သော ဓားရှည်ဖြင့် ထိုလူ၏ လည်ချောင်းကို တိုက်ရိုက် ဖြတ်တောက်လိုက်လေ၏။

ဤတစ်ကြိမ်တွင် ကျိုးယွမ်က အားအလွန်အကျွံ သုံးလိုက်သဖြင့် ခေါင်းပင် ပြတ်ထွက်လုနီးပါး ဖြစ်သွားခဲ့သည်။

တစ်ချိန်တည်းမှာပင် ကျိုးယွမ်သည် သူ၏ ဘယ်ဘက် အင်္ကျီလက်စထဲမှ ပျံလွှားဓားမြောင်သုံးလက်ကို ပစ်လွှတ်လိုက်ရာ အခြားတစ်ဦး၏ ရင်ဘတ်ဆီသို့ တိုက်ရိုက် ဦးတည်သွားလေ၏။

ထိုလူသည် အထိတ်တလန့် နောက်ဆုတ်သွားပြီး သူ၏ မျက်လုံးများက ပျံလွှားဓားမြောင် သုံးလက်ကိုသာ ကြည့်နေကာ ၎င်းတို့ကို ကာကွယ်ရန် သူ၏ဓားကို အလျင်အမြန် ဝှေ့ယမ်းလိုက်သည်။

သို့သော် ကျိုးယွမ်က ပို၍မြန်ဆန်ပေ၏။ ရှေ့သို့ ပြေးဝင်သွားပြီး သူ၏ ဓားရှည်က ထိုလူ၏ ရင်ဘတ်ထဲသို့ တိုက်ရိုက် ထိုးဖောက်ဝင်ရောက်သွားကာ နှလုံးကို တစ်ချက်တည်းဖြင့် ကြေမွသွားစေရန် လှည့်ပတ်လိုက်လေသည်။

ဤအရာအားလုံးသည် ရိုးရှင်းပုံရသော်လည်း ခြေလှမ်းတိုင်းသည် ကျိုးယွမ်၏ ဂရုတစိုက် တွက်ချက်မှုအောက်တွင် ရှိနေပေ၏။

သို့သော် လူနှစ်ဦးကို ဆက်တိုက် သတ်ဖြတ်ပြီးနောက် သူလည်း အတော်လေး မောပန်းသွားကြောင်း ခံစားလိုက်ရသည်။ သူ၏ ခန္ဓာကိုယ်အတွင်းရှိ ဝိညာဉ်စွမ်းအင် ထက်ဝက်ခန့် ကုန်ဆုံးသွားသဖြင့် ချက်ချင်းပင် အသက်ရှူမဝ ဖြစ်သွားလေ၏။

"ဒင်... ကံကြမ္မာတန်ဖိုး +၃၊ သက်တမ်း +၅၆၊ ကျင့်ကြံခြင်းတန်ဖိုး +၄၆၊ လေခွဲဓားသိုင်း တိုက်ခိုက်ရေးသိုင်းကျမ်းတစ်အုပ် ရရှိပါသည်..."

"ဒင်... ကံကြမ္မာတန်ဖိုး +၃၊ သက်တမ်း +၅၉၊ ကျင့်ကြံခြင်းတန်ဖိုး +၅၁၊ ယွမ်စုစည်းခြင်း ကျင့်စဉ် တစ်အုပ် ရရှိပါသည်..."

ထိုစဉ် စနစ်၏ အသံသည် ကျိုးယွမ်၏ စိတ်ထဲ၌ ချက်ချင်း ထွက်ပေါ်လာလေ၏။

အသံထွက်ပေါ်လာသည်နှင့် တစ်ပြိုင်နက် ကျိုးယွမ်၏ ခန္ဓာကိုယ်အတွင်း၌ များပြားလှသော ဝိညာဉ်စွမ်းအင်များ ရုတ်တရက် ပေါ်ထွက်လာပြီး ကျိုးယွမ်၏ ကျင့်ကြံမှုသည် ချီသန့်စင်ခြင်း အဆင့်နှစ်သို့ တိုက်ရိုက် အောင်မြင်စွာ တက်လှမ်းသွားလေတော့သည်။

ကျိုးယွမ်သည် အဆပေါင်းများစွာ ပိုမို အစွမ်းထက်လာကြောင်း ချက်ချင်း ခံစားလိုက်ရ၏။ ဤအခိုက်အတန့်တွင် ဓားပြတိုက် လုယက်ခြင်း စနစ်၏ ကြောက်မက်ဖွယ် ကောင်းပုံကို သူ နားလည်သွားလေပြီ။

ကံကြမ္မာကို လုယက်ခြင်း၊ ကျင့်စဉ်ကို လုယက်ခြင်း၊ တိုက်ခိုက်ရေးသိုင်းများကို လုယက်ခြင်း၊ သက်တမ်းကို လုယက်ခြင်း၊ ကျင့်ကြံမှုကို လုယက်ခြင်း။

ယခင်က သူ သတ်ဖြတ်ခဲ့သော သူများသည် ကျင့်ကြံသူများ မဟုတ်သဖြင့် ကံကြမ္မာတန်ဖိုးနှင့် သက်တမ်းကိုသာ သူ ရရှိခဲ့သည်။ သို့သော် ယခု ကျင့်ကြံသူနှစ်ဦးကို သူ သတ်ဖြတ်လိုက်သောအခါ စနစ်၏ စွမ်းရည်များက ဖြည်းဖြည်းချင်း ပေါ်လွင်လာပေ၏။

ဤသည်မှာ အမှန်တကယ်ပင် အလွန်တရာ အံ့မခန်း ဖြစ်ပေသည်။

သေချာပေါက် ကျိုးယွမ်သည် ဤစနစ် ပို၍ အစွမ်းထက်လာသင့်ပြီး လုယက်စရာ အရာများ ပိုမို ရှိသင့်သည်ဟု ခံစားရသော်လည်း သူ ရှာမတွေ့သေးခြင်းသာ ဖြစ်ပေ၏။

"ငါ ချမ်းသာပြီ... ငါ ချမ်းသာပြီ... ငါတော့ ပိုက်ဆံတွေ အများကြီးရပြီကွ..."

ကျိုးယွမ်က စိတ်ကို တည်ငြိမ်အောင် ထိန်းလိုက်ပြီး အဝေးရှိ ကျန်းမင်နှင့် ဝမ်ချန်တို့ကို ကြည့်လိုက်ရာ သူ၏ မျက်လုံးများတွင် ပြင်းပြသော ဆန္ဒများ တောက်လောင်နေပြီး သတ်ဖြတ်လိုသော

အငွေ့အသက်များ ဖြတ်ပြေးသွားလေ၏။

"ကျန်းမင်... မင်းရဲ့ နောက်လိုက်လေး နှစ်ကောင်ကို ငါ သတ်လိုက်ပြီကွ..."

ကျိုးယွမ်သည် အသက်ရှူမဝတော့သလို၊ အချိန်မရွေး လဲကျသွားနိုင်သလို မတ်တတ်ပင် ကောင်းကောင်း မရပ်နိုင်တော့သည့်ဟန် ဆောင်လိုက်လေ၏။

သူသည် ချီသန့်စင်ခြင်း အဆင့်နှစ်သို့ ရောက်ရှိနေပြီ ဖြစ်သော်လည်း ကျန်းမင်ကို သတ်လိုပါက သူ့ကို အလစ်အငိုက်ယူခြင်းက အကောင်းဆုံးဖြစ်ကြောင်း ကျိုးယွမ် အလွန်တရာ ကောင်းစွာ သိထားပေသည်။

အခန်း (၆) လူသတ်ပြီး အရိုးပြာကြဲသည့် ကျွမ်းကျင်သော တစ်နေရာတည်းအပြီး ဝန်ဆောင်မှု

ကျိုးယွမ်၏ စကားသံ ထွက်ပေါ်လာသည်နှင့် တစ်ပြိုင်နက် ကျန်းမင်နှင့် ဝမ်ချန်တို့ နှစ်ဦးစလုံး အံ့အားသင့်သွားကြသည်။ သူတို့ တိုက်ခိုက်နေရသည်မှာ အလွန်တရာ အာရုံစိုက်နေရသဖြင့် ဤနေရာရှိ အခြေအနေကို သတိမထားမိခဲ့ကြချေ။

သူတို့နှစ်ဦးစလုံး လှမ်းကြည့်လိုက်ရာ သူတို့၏ မျက်နှာပေါ်တွင် မယုံကြည်နိုင်မှုများ ပြည့်နှက်နေပေ၏။

"မင်းလို ကောင်လေးကများ... မင်းကို ငါ သတ်မယ်..."

ကျန်းမင်က ဒေါသတကြီး ပေါက်ကွဲသွားပြီး သူ၏ သတ်ဖြတ်လိုသော အငွေ့အသက်မှာ ထင်ရှားလှပေသည်။ ဓားတစ်ချက်တည်းဖြင့် သူသည် ဝမ်ချန်ကို ခြေသုံးလှမ်း နောက်ဆုတ်သွားစေ၏။

ထို့နောက် သတ်ဖြတ်လိုသော အငွေ့အသက်များ အပြည့်ရှိနေသည့် ကျန်းမင်သည် ကျိုးယွမ်ဆီသို့ ပြေးဝင်သွားလေသည်။

ကျိုးယွမ်က အလျင်အမြန် နောက်ဆုတ်သွားပြီး သူ၏ မျက်နှာပေါ်တွင် အထိတ်တလန့် ဖြစ်နေသော အရိပ်အယောင်များ ပေါ်လာရာ၊ ၎င်းအားလုံးကို ကျန်းမင် မြင်တွေ့သွားပေ၏။

ကျိုးယွမ်က အကြံအိုက်နေပြီဖြစ်ကြောင်း မြင်ချိန်တွင် ကျန်းမင်က အေးစက်စွာ နှာခေါင်းရှုံ့လိုက်ပြီး သူ့ဓားကို ကျိုးယွမ်၏ ခေါင်းပေါ်သို့ ခုတ်ချလိုက်လေသည်။

ထိုစဉ် ဝမ်ချန်က ဟိန်းဟောက်လိုက်ပြီး ကျိုးယွမ်ကို ကယ်တင်ရန် ကျန်းမင်ဆီသို့ ခုန်အုပ်သွား၏။

ဓားရှည်က ကျိုးယွမ်နှင့် ပိုပို၍ နီးကပ်လာချိန်တွင် ကျန်းမင်က ရက်စက်သော အပြုံးတစ်ခု ပြုံးလိုက်သည်။ ချီသန့်စင်ခြင်း အဆင့်တစ်ရှိသော အမှိုက်တစ်ကောင်ကို သတ်ရသည်မှာ သေချာပေါက် သူ၏ လက်ကို လှည့်လိုက်သကဲ့သို့ လွယ်ကူလှပေ၏။

ထိုအခိုက်အတန့်တွင် ကျိုးယွမ်၏ အမူအရာ ပြောင်းလဲသွားလေသည်။ သူ၏ မျက်နှာပေါ်ရှိ အထိတ်တလန့်ဖြစ်မှုများ ပျောက်ကွယ်သွားပြီး အေးစက်သော သတ်ဖြတ်လိုသည့် အငွေ့အသက်များဖြင့် အစားထိုးခံလိုက်ရ၏။

ကျိုးယွမ်၏ ခန္ဓာကိုယ်က ယိမ်းယိုင်သွားပြီး နောက်ဆုံးအချိန်လေးတွင် ကျန်းမင်၏ ဓားကို သူ ရှောင်တိမ်းလိုက်လေသည်။ သူ၏ လက်ထဲရှိ ဓားရှည်သည် လျှပ်စီးကဲ့သို့ မြန်ဆန်စွာဖြင့် တစ်ချက်တည်း ခုတ်ချလိုက်၏။

"အား..."

ကျန်းမင်က စူးစူးဝါးဝါး အော်ဟစ်လိုက်သည်။ သူ၏ ညာဘက်လက်သည် ဓားရှည်နှင့်အတူ လေထဲသို့ လွင့်စင်သွားပြီး သွေးများ ပန်းထွက်လာလေ၏။

သို့သော် ထိုစဉ်မှာပင် သူ၏ လည်ပင်း၌ အေးစက်မှုကို ခံစားလိုက်ရပြီး သူ၏ မျက်လုံးများထဲတွင် ထိတ်လန့်ကြောက်ရွံ့မှုများ ပေါ်လာပေသည်။

"ဒါ ဘယ်လိုလုပ် ဖြစ်နိုင်မှာလဲ... ငါက ချီသန့်စင်ခြင်း အဆင့်သုံးလေ... ချီသန့်စင်ခြင်း အဆင့်တစ်က ကောင်ရဲ့ လက်ချက်နဲ့ ငါ ဘယ်လိုလုပ် သေရမှာလဲ..."

ကျန်းမင်သည် ပြင်းထန်သော မကျေနပ်မှုများ ဖုံးလွှမ်းလျက် နောက်သို့ လဲကျသွားပြီး သူ၏ လည်ချောင်းမှ သွေးများ စမ်းရေကဲ့သို့ ပန်းထွက်လာလေတော့၏။

ဝမ်ချန်သည် သူ့ရှေ့ရှိ မြင်ကွင်းကို စိုက်ကြည့်ရင်း လုံးလုံးလျားလျား ကြက်သေ သေသွားလေသည်။ ဤသို့သော ရလဒ်မျိုး ဖြစ်လာမည်ဟု သူ လုံးဝ မထင်ထားခဲ့ချေ။

ဝမ်ချန်သည် ကျိုးယွမ်ကို ကြည့်လိုက်ရာ သူ၏ မျက်လုံးများထဲတွင် ကြောက်ရွံ့မှု အရိပ်အယောင်များ ပေါ်လာပေ၏။

သူသည် ကျိုးယွမ်နှင့် အတူရှိနေသည်မှာ လဝက်ခန့် ရှိပြီဖြစ်သည်။ သူ၏ ညီမစကားကို နားထောင်သော်လည်း ကျိုးယွမ်အပေါ် အနည်းငယ် မကျေနပ်မှု ရှိနေဆဲဖြစ်၏။

သို့သော် ဤအခိုက်အတန့်တွင် သူသည် သူ၏ညီမလောက် အကဲမခတ်တတ်ကြောင်း သူ နားလည်သွားလေပြီ။

ဤအချိန်တွင် ကျိုးယွမ်သည် ဝမ်ချန်ကို ဂရုစိုက်ရန် အချိန်မရှိချေ။ ကျန်းမင်၏ အမွေအနှစ်များကို လက်ခံရယူရန် သူ အလုပ်များနေပေ၏။

"ဒင်... ကံကြမ္မာတန်ဖိုး +၇၊ သက်တမ်း +၅၂၊ ကျင့်ကြံခြင်းတန်ဖိုး +၁၆၁၊ အရှိန်အဝါဖုံးကွယ်ခြင်းကျင့်စဉ်တစ်အုပ် ရရှိပါသည်..."

"ဒင်... ဝိညာဉ်သွေးကြောလေးခု ပါရမီကို ရရှိပါသည်... ပါရမီတိုးတက်သွားပါပြီ..."

ကျိုးယွမ်၏ မျက်လုံးများ အရောင်လက်သွားလေ၏။ သူ၏ ခန္ဓာကိုယ်အတွင်း၌ များပြားလှသော ဝိညာဉ်စွမ်းအင်များ ထပ်မံပေါ်ထွက်လာကြောင်း သူ ခံစားလိုက်ရပြီး သူ၏ ကျင့်ကြံမှုသည် ချီသန့်စင်ခြင်း အဆင့်သုံးသို့ တိုက်ရိုက် အောင်မြင်စွာ တက်လှမ်းသွားလေတော့သည်။

ကျိုးယွမ်က အလွန်တရာ ဝမ်းသာသွားပြီး သူ၏ စနစ် အချက်အလက်ပြဘုတ်ကို အလျင်အမြန် စစ်ဆေးလိုက်၏။

"ပိုင်ရှင် - ကျိုးယွမ်"

"ကျင့်စဉ် - ချီသန့်စင်ခြင်း အဆင့်သုံး (၃၄/၂၀၀)"

"သက်တမ်း - ၂၀/၄၂၃"

"ပါရမီ - ဝိညာဉ်သွေးကြောလေးခု"

"ကံကြမ္မာတန်ဖိုး - ၂၄"

"ကျွမ်းကျင်မှုများ - အဆင့်နိမ့် မီးတောက်မန္တန်"

"အထူးစွမ်းရည်များ - မရှိ"

ကျိုးယွမ်က အလွန်တရာ ဝမ်းသာသွားလေ၏။ ဓားပြစနစ်သည် မည်မျှ ကြောက်မက်ဖွယ် ကောင်းကြောင်း နောက်ဆုံးတွင် သူ အမှန်တကယ် နားလည်သွားပြီ ဖြစ်သည်။

ကောင်းကင်ကြီးကို လုယက်ခြင်း၊ မြေကြီးကို လုယက်ခြင်း၊ သက်ရှိသတ္တဝါအားလုံးကို လုယက်ခြင်းဆိုသည်မှာ စကားသက်သက် မဟုတ်ချေ။

ယခုအခါ သူ၏သက်တမ်းမှာ ၄၂၃ နှစ် ရှိနေပြီဖြစ်ရာ ရွှေအမြုတေအဆင့် ကျင့်ကြံသူတစ်ဦးနှင့်နီးပါး တူညီနေပေပြီ။

အရေးအကြီးဆုံးအချက်မှာ သူ၏ ပါရမီသည် ဝိညာဉ်သွေးကြောလေးခုသို့ အဆင့်တက်သွားခြင်းဖြစ်ပြီး ဤဝိညာဉ်သွေးကြော ပါရမီမှာ ကျန်းမင်ထံမှ ရရှိခဲ့ခြင်းဖြစ်၏။

အစောပိုင်းက သူသတ်ခဲ့သော လူနှစ်ဦးနှင့် ပတ်သက်၍ ကျိုးယွမ် ခန့်မှန်းရမည်ဆိုလျှင် သူတို့သည်လည်း ဝိညာဉ်သွေးကြောငါးခု ပိုင်ရှင်များဖြစ်သောကြောင့် အပြောင်းအလဲ လုံးလုံးလျားလျား မရှိခဲ့ခြင်း ဖြစ်ပေမည်။

သူ ဆက်လက် သတ်ဖြတ်နေသရွေ့ သူ၏ ခန္ဓာကိုယ်သည် နောက်ဆုံးတွင် အထွတ်အထိပ် ခန္ဓာကိုယ်ဖြစ်လာမည် ဖြစ်သည်။

ဤအကြောင်းကို တွေးမိချိန်တွင် ကျိုးယွမ်၏ ရင်ထဲ၌ စိတ်လှုပ်ရှားမှုများ ပြည့်နှက်သွားလေ၏။

ယခုလေးတင် သူ ရရှိခဲ့သော အရှိန်အဝါဖုံးကွယ်ခြင်းကျင့်စဉ်ကို ကျိုးယွမ် ရုတ်တရက် သတိရသွားသည်။ ဤသည်မှာ မိမိ၏ အရှိန်အဝါကို ဖုံးကွယ်ရန် အသုံးပြုသော ကျင့်စဉ်တစ်ခု ဖြစ်ရပေမည်။

သို့သော် ဤနေရာသည် အချိန်ဆွဲနေရန် နေရာမဟုတ်ချေ။ ကျိုးယွမ်သည် ပြန်သွားပြီးမှ သေချာစွာ လေ့လာရန် စီစဉ်လိုက်လေ၏။

ကျိုးယွမ်သည် လုံးလုံးလျားလျား တုံ့ဆိုင်းမနေဘဲ သိုလှောင်အိတ်သုံးလုံးကို သိမ်းဆည်းလိုက်သည်။ ထို့နောက် သူသည် အလောင်းသုံးလောင်းကို အတူတကွ ပုံထားလိုက်ပြီး မီးတောက်တစ်ခု ပေါ်လာလေ၏။

မီးတောက် ကျဆင်းသွားပြီး အလောင်းသုံးလောင်း ချက်ချင်း မီးလောင်သွားသည်။ မျက်တောင်တစ်ခတ်အတွင်းမှာပင် ၎င်းတို့သည် ပြာအဖြစ် ပြောင်းလဲသွားလေ၏။

ကျိုးယွမ် သူ့လက်ကို ဝှေ့ယမ်းလိုက်ရာ လေပြင်းတစ်ချက် တိုက်ခတ်သွားပြီး မြေပြင်ပေါ်ရှိ ပြာများကို အရိပ်အယောင်ပင် မကျန်တော့အောင် လွင့်စင်သွားစေသည်။

ဝမ်ချန်သည် အဝေးတွင် ရပ်နေကာ ဤမြင်ကွင်းကို ကြောင်တောင်တောင်ဖြင့် စိုက်ကြည့်နေပြီး သူ၏ မျက်လုံးများထဲရှိ ကြောက်ရွံ့မှုများမှာ ပိုမို ပြင်းထန်လာပေ၏။

ဤလူတွင် ချီသန့်စင်ခြင်း အဆင့်သုံး ကျင့်ကြံမှု ရှိနေသည်မှာ ရှင်းလင်းသော်လည်း ချီသန့်စင်ခြင်းအဆင့်တစ်အဖြစ် ဟန်ဆောင်ထားခြင်းမှာ ကျားကို စားရန် ဝက်အဖြစ် ဟန်ဆောင်နေခြင်းပင် ဖြစ်ပေသည်။

ထို့အပြင် လူသတ်ခြင်း၊ အလောင်းများကို မီးရှို့ခြင်းနှင့် ပြာများကို ကြဲပစ်ခြင်း အားလုံးကို တစ်ဆက်တည်း ပြုလုပ်သွားပုံမှာ ကျွမ်းကျင်သူ တစ်ဦးဖြစ်ကြောင်း ရှင်းလင်းနေပေ၏။

ဝမ်ချန်သည် သူ၏ ခန္ဓာကိုယ်ပေါ်ရှိ မွေးညင်းများအားလုံး ထောင်ထလာကြောင်း ခံစားလိုက်ရပြီး သူ၏ ခန္ဓာကိုယ် တင်းမာသွားလေသည်။ ကျိုးယွမ်က သူ့ကို ရုတ်တရက် တိုက်ခိုက်မည်ကိုလည်း သူ ကြောက်ရွံ့နေပေ၏။

"သွားကြစို့... ပြန်ကြမယ်..."

ကျိုးယွမ်သည် ဝမ်ချန်၏ အမူအရာကို ဂရုစိုက်ရန် ပျင်းရိနေပေ၏။ သူသည် အမြန်ပြန်သွားပြီး ယနေ့ ရရှိခဲ့သည်များကို စီစစ်ရန်သာ ဆန္ဒရှိလေသည်။

ထို့ကြောင့် ကျိုးယွမ်က ရှေ့မှ ဦးဆောင်သွားပြီး ဝမ်ချန်က အနောက်မှ လိုက်ပါသွား၏။ သူတို့နှစ်ဦးစလုံး စကားတစ်ခွန်းမျှ မပြောဘဲ မကြာမီ သူတို့၏ နေအိမ်သို့ ပြန်ရောက်သွားကြသည်။

ဝမ်ချန် နောက်ဆုံးတွင် သက်ပြင်းချနိုင်သွားပြီး ကျိုးယွမ်ကို နှုတ်ဆက်ကာ အိမ်ပြန်သွားလေ၏။

အိမ်ပြန်ရောက်သည်နှင့် တစ်ပြိုင်နက် ဝမ်ချန်သည် ယခုလေးတင် ဖြစ်ပျက်ခဲ့သည်များကို ဝမ်လင်းအား ပြောပြလိုက်သည်။ ဝမ်လင်းလည်း ကြားချိန်တွင် အံ့အားသင့်သွားပေ၏။

"အစ်ကို... ဒီကိစ္စက နည်းနည်းတော့ ပြဿနာရှိတယ်... ကျန်းမင်ရဲ့ အစ်ကိုဝမ်းကွဲ ကျန်းဖုန်းက ကျားဖြူဂိုဏ်းက လူတစ်ယောက်လေ..."

"အကယ်၍ သူ့ညီက အစ်ကိုတို့လက်ချက်နဲ့ သေသွားတယ်ဆိုတာ သူသိရင် သူ သေချာပေါက် အစ်ကိုကို လွှတ်ထားမှာ မဟုတ်ဘူး..."

ဝမ်လင်း၏ မျက်ခုံးများ စိုးရိမ်ပူပန်မှုများဖြင့် တွန့်ကွေးသွားလေ၏။

"ညီမလေး... အဲ့ဒါ ငါနဲ့ မဆိုင်ဘူးနော်... ကျိုးယွမ်က အကုန်လုံးကို သတ်တာ... ငါ ဘယ်သူ့ကိုမှ မသတ်ခဲ့ဘူး..."

ဤစကားကို ကြားချိန်တွင် ဝမ်ချန် အလျင်အမြန် လက်ဝှေ့ယမ်းကာ ပြောလိုက်၏။

ဝမ်လင်းသည် သူမ၏ အစ်ကို ဝမ်ချန်ကို တစ်ချက်ကြည့်လိုက်ပြီး သက်ပြင်းချလိုက်သည်။ သူမ၏ အစ်ကိုမှာ အလွန်တရာ ရိုးအလွန်းနေဆဲ ဖြစ်၏။

"အစ်ကို... အကယ်၍ ကျန်းဖုန်းသာ အဲ့ဒါကို သိသွားရင် သူ ယုံမယ်လို့ အစ်ကိုထင်နေတာလား..."

"သူ ယုံရင်တောင်မှဘာဖြစ်လဲ... အစ်ကို့ကို သတ်ဖို့ဆိုတာ သူ့အတွက် အတွေးတစ်ချက်ပဲလေ..."

ဝမ်လင်းက သူမ၏ အစ်ကိုကို အလျင်အမြန် ရှင်းပြလိုက်ပြီးနောက် စဉ်းစားခန်း ဝင်သွားလေ၏။

ဝမ်ချန်သည် မိုက်မဲသူ မဟုတ်ချေ။ ဤအခိုက်အတန့်တွင် ဝမ်လင်း၏ စကားကို ကြားပြီးနောက် သူ၏ မျက်နှာ ဖြူရော်သွားလေသည်။

ဝမ်ချန်က အလျင်အမြန် ပြောလိုက်၏။

"ညီမလေး... ပြောပါဦး... အခု ငါတို့ ဘာလုပ်သင့်လဲ..."

ဝမ်လင်းက ခေတ္တမျှ စဉ်းစားလိုက်ပြီးနောက် ပြောဆိုလေသည်။

"ဒီကိစ္စကို အစ်ကို့စိတ်ထဲမှာပဲ ထားရမယ်... ဘယ်သူ့ကိုမှ မပြောနဲ့... မဟုတ်ရင် ငါတို့ သွားပြီပဲ..."

"မနက်ဖြန် တာအိုမိတ်ဆွေကျိုးယွမ်ကို ကျွန်မ သွားပြီး သတိပေးလိုက်မယ်... ငါတို့ ရှင်းအန်းမြို့ကနေ မထွက်သွားသရွေ့ ကျန်းဖုန်း သိသွားရင်တောင် ငါတို့ကို ဘာမှ လုပ်နိုင်မှာ မဟုတ်ဘူး..."

"ကျန်းဖုန်းက ချီသန့်စင်ခြင်းအဆင့်လေး ကျင့်ကြံသူလေ... တာအိုမိတ်ဆွေ ကျိုးယွမ်က သူ့ရဲ့ စွမ်းအားကို ဖုံးကွယ်တဲ့နေရာမှာ တော်တယ်ဆိုတော့ သူ့ကို ရင်ဆိုင်နိုင်ကောင်း ရင်ဆိုင်နိုင်လိမ့်မယ်..."

"ကျွန်မ အစိုးရိမ်ဆုံးက ဒီကိစ္စက ကျားဖြူဂိုဏ်းက တခြားလူတွေကိုပါ ပါဝင်ပတ်သက်သွားမှာကိုပဲ... အဲ့ဒီလိုသာဆိုရင်တော့ တကယ် ပြဿနာတက်ပြီ..."

ဝမ်လင်း၏ ဉာဏ်ရည်မှာ ဝမ်ချန်နှင့် နှိုင်းယှဉ်၍မရချေ။ သူမသည် တိကျသော အကဲဖြတ်မှုကို အလျင်အမြန် ပြုလုပ်နိုင်ခဲ့၏။

ဤစကားကို ကြားပြီးနောက် ဝမ်ချန် ခေါင်းညိတ်လိုက်သည်။ ဤကိစ္စသာ ပြန့်သွားပါက သက်ရောက်မှု အလွန်ကြီးမားမည်ကို သူလည်း သိထားပေ၏။

ဝမ်ချန်နှင့် ကျိုးယွမ်တို့ အိမ်ပြန်ရောက်သွားချိန်တွင် သူတို့ ယခုလေးတင် တိုက်ခိုက်ခဲ့သော နေရာ၌ လူတစ်ဦး ပေါ်လာကြောင်း သူတို့ မသိခဲ့ကြချေ။

ဤလူမှာ အခြားသူမဟုတ်ဘဲ လွန်ခဲ့သော လဝက်ခန့်က ခရမ်းရောင်ဝါးများကို လာရောက် သိမ်းဆည်းကာ ဝိညာဉ်ကျောက်တုံးများ ပေးခဲ့သော ကျန်းမင်၏ အစ်ကိုဝမ်းကွဲ ကျန်းဖုန်းပင် ဖြစ်လေ၏။

ဤတစ်ကြိမ်တွင် ကျနမင်နှင့် သူ၏ အဖော်နှစ်ဦးသည် သူ့အမိန့်အရ ဝမ်ချန်နှင့် ကျိုးယွမ်တို့ကို အမဲလိုက်ရန် လာရောက်ခဲ့ခြင်း ဖြစ်ပေသည်။

ကျိုးယွမ်နှင့် ဝမ်ချန်တို့သည် လွန်ခဲ့သော လဝက်အတွင်း ဝိညာဉ်ကျောက်တုံး သုံးဆယ်ကျော် ရရှိခဲ့ကြပြီး ကျန်းဖုန်းမှာ အပြင်စည်းတပည့် တစ်ဦးသာ ဖြစ်သဖြင့် မချမ်းသာချေ။

ဤဝိညာဉ်ကျောက်တုံးများသည် မများပြားသော်လည်း ကျန်းဖုန်းအတွက်မူ အတော်အတန် များပြားသော ပမာဏ ဖြစ်ပေ၏။

ကျန်းဖုန်း၏ အကြည့်များက ပတ်ဝန်းကျင်ကို ဝေ့ဝဲကြည့်လိုက်သော်လည်း တိုက်ပွဲဖြစ်ပွားခဲ့သည့် အရိပ်အယောင် လုံးလုံးလျားလျား မတွေ့ရသဖြင့် သူ မျက်မှောင်ကြုတ်သွားလေသည်။

"ငါ ပြောတဲ့အတိုင်း ကျန်းမင် မလုပ်ခဲ့တာများလား..."

ဤအကြောင်းကို တွေးမိသည်နှင့် တစ်ပြိုင်နက် ကျန်းဖုန်း၏ မျက်လုံးများထဲတွင် ဒေါသအရိပ်အယောင်များ ပေါ်လာပေ၏။

သို့သော် သူသည် သတင်းပို့ရန် ကျားဖြူဂိုဏ်းသို့ ပြန်သွားရမည်ဖြစ်သဖြင့် လောလောဆယ် ဤကိစ္စများကို ကိုင်တွယ်ရန် အချိန်မရှိချေ။ သတင်းပို့ပြီးနောက် ပြန်လာ၍ ၎င်းတို့ကို သေချာစွာ ရှင်းလင်းမည် ဖြစ်ပေသည်။