အခန်း (၂၂၀-၂၂၂)

အခန်း (၂၂၀) တော့ပ်ဖန်တစ်ယောက် မွေးဖွားလာခြင်း.. မြင့်မြတ်သောသမီးတော် တွေတောင်မှ တိုက်ရိုက်ထုတ်လွှင့်နေရပြီကွ

အလယ်ပိုင်းကုန်းမြေ ၊ ချင်းရွှေ ဂိုဏ်း။

ဤနေရာကား အလယ်ပိုင်းကုန်းမြေ ၏ အစွန်အဖျားတွင် တည်ရှိသော တတိယအဆင့် ဂိုဏ်းငယ်လေး တစ်ခု ဖြစ်၏။ ရှုခင်းတွေ သာယာလှပသည် မှန်သော်ငြား တကယ်ကို ဆင်းရဲမွဲတေလှသည်။ ဂိုဏ်း ၏ ပင်မခန်းမဆောင် တွင် လေတွေတိုးဝင်နေရုံသာမက အဝင်ဝရှိ ကျောက်ခြင်္သေ့ရုပ် တွေဆိုလျှင် နှစ်ပေါင်းများစွာ ပြုပြင်ထိန်းသိမ်းမှု မရှိသဖြင့် နားရွက်တစ်ဖက်ပင် ပြုတ်ထွက်နေတော့၏။

ထိုအချိန်တွင် ချင်းရွှေ ဂိုဏ်း ၏ မြင့်မြတ်သောသမီးတော် လင်းဝမ်အာ သည် ဟောင်းနွမ်းနေသော တရားထိုင် ဖျာလေး တစ်ချပ်ပေါ်တွင် ထိုင်ကာ စိတ်ပူပန်မှုများဖြင့် မျက်မှောင်ကြုတ်နေ၏။

“ဆရာ... ကျွန်မတို့ ဂိုဏ်း ရဲ့ တောင်စောင့် မဟာမန္တန် ကြီးကို မြန်မြန် မပြင်ရင်... တောဝက် တွေကိုတောင် တားနိုင်တော့မှာ မဟုတ်ဘူးနော်”

သူမ၏ ဘေးတွင်ရှိသော ဂိုဏ်းချုပ် အိုကြီးက သက်ပြင်းချလိုက်ပြီး သူ၏ အိတ်ကပ်ထဲမှ ကျန်ရှိနေသေးသော အဆင့်နိမ့် ဝိညာဉ်ကျောက်တုံး အနည်းငယ်ကို ဆွဲထုတ်လိုက်သည်။

“ဝမ်အာ ရယ်... ဆရာ မကြိုးစားတာ မဟုတ်ပါဘူး... ဒီရက်ပိုင်း ဈေးကွက် အခြေအနေက အရမ်း ဆိုးနေလို့ပါကွာ... ဘေးနားက ချီယန် ဂိုဏ်း ကြီး ပျက်စီးသွားပြီးတဲ့ နောက်ပိုင်း ဒီနားတစ်ဝိုက်က ကုန်ဈေးနှုန်းတွေက အဆမတန် ထိုးတက်သွားတာ... မန္တန် ပြင်ဖို့ ပစ္စည်းတွေကိုတောင် ဆရာတို့ မဝယ်နိုင်တော့ဘူး”

လင်းဝမ်အာ က ကျိုးပဲ့နေသော ဝိညာဉ်ကျောက်တုံး အနည်းငယ်ကို ကြည့်ကာ နှုတ်ခမ်းကို ကိုက်လိုက်မိသည်။ သူမက အလွန်တရာ ချောမောလှပပြီး သိမ်မွေ့နူးညံ့ကာ သေမျိုး လောက၏ အညစ်အကြေး ကင်းစင်သော အလှတရားမျိုးကို ပိုင်ဆိုင်ထားသူ ဖြစ်၏။ မိုင်ပေါင်းများစွာ အကွာအဝေးအတွင်း နာမည်ကြီးသော အလှပိုင်ရှင် တစ်ဦး ဖြစ်သော်ငြား ဆင်းရဲသော ဂိုဏ်းလေး တစ်ခုတွင် မွေးဖွားလာခဲ့ရသည်မှာ နှမြောစရာ ကောင်းလှပါသည်။

ထိုစဉ် သူမ၏ ရင်ခွင်ထဲရှိ 'ကောင်းကင်ဘုံ လျှို့ဝှက်ချက် ကျောက်စိမ်းပြား' လေးက ရုတ်တရက် တုန်ခါသွား၏။ ဒါက ကွေ့ယွမ်ဂိုဏ်း မှ ယခုလေးတင် လွှတ်တင်လိုက်သော လုပ်ဆောင်ချက်အသစ် ကြေညာချက် ပင် ဖြစ်တော့သည်။

“တိုက်ရိုက်ထုတ်လွှင့်ခြင်း လုပ်ဆောင်ချက်ကို တရားဝင် စတင်လိုက်ပါပြီ။

သင် ပြသချင်ပေမဲ့ ပြသခွင့် မရတဲ့ အရည်အချင်း တွေ ရှိနေပါသလား။ သင် ပိုက်ဆံ ပြတ်လပ်နေပါသလား။

သင့်ရဲ့ တိုက်ရိုက်ထုတ်လွှင့်မှုကို စတင်လိုက်ပြီး သန်းနဲ့ချီတဲ့ ကျင့်ကြံသူ တွေနဲ့ ချိတ်ဆက်လိုက်ပါ။ သင်က ရဲရဲဝံ့ဝံ့ ပြသရဲသရွေ့... ဝိညာဉ်ကျောက်တုံး တွေကို သုံးမကုန်နိုင်အောင် ရရှိပါလိမ့်မယ်ဗျာ။

ပထမဆုံး ငွေဖြည့်သွင်းခြင်းအတွက် အပိုဆု - ဝိညာဉ်ကျောက်တုံး (၁၀၀) ဖြည့်သွင်းပြီး ဝိညာဉ်ဒင်္ဂါး (၁၀၀၀) ကို ရယူလိုက်ပါ။ အထူးပြုလုပ်ချက်တွေ ပါဝင်တဲ့ သီးသန့် ခေါင်းစီးကြိုးလေး ကိုပါ လက်ဆောင် ပေးဦးမှာပါနော်”

“တိုက်ရိုက်ထုတ်လွှင့် ပြီး... ဝိညာဉ်ကျောက်တုံး တွေ ရှာရမယ် ဟုတ်လား”

ဆွဲဆောင်မှုရှိလှသော ကြော်ငြာစာသားကို ကြည့်ရင်း လင်းဝမ်အာ ၏ နှလုံးသားလေးမှာ ဒိန်းခနဲ ခုန်သွားတော့သည်။

မကြာသေးမီက နာမည်ကြီးနေသော 'ကောင်းကင်ဘုံ လျှို့ဝှက်ချက် ကျောက်စိမ်းပြား' အကြောင်းကို သူမ ကြားဖူးခဲ့သော်ငြား ဒါဟာ ဖျော်ဖြေရေး အတွက်သာ ဖြစ်သည်ဟု ထင်မှတ်ထားခဲ့သည်။ တကယ်ပဲ ပိုက်ဆံရှာလို့ ရနိုင်ပါ့မလား။

'ဂိုဏ်း အတွက်... မဟာမန္တန် ကြီးကို ပြင်ဖို့အတွက်... ငါ စွန့်စားရတော့မှာပဲ'

လင်းဝမ်အာ က အသက်ပြင်းပြင်းတစ်ချက် ရှူသွင်းလိုက်ပြီး အလင်းရောင် ကောင်းကောင်းရသော နေရာတစ်ခုကို ရှာကာ 'တိုက်ရိုက်ထုတ်လွှင့်မှု စတင်ရန်' ဆိုသည့် ခလုတ်လေးကို တုန်ရီနေသော လက်ချောင်းများဖြင့် နှိပ်လိုက်သည်။ ထို့နောက် သူမ၏ ပထမဆုံး တိုက်ရိုက်ထုတ်လွှင့်မှု အတွက် ခေါင်းစဉ်တစ်ခုကို ရိုက်ထည့်လိုက်သည်။

'ချင်းရွှေ ဂိုဏ်း က မိန်းမငယ်လေး လင်းဝမ်အာ ... ဂိုဏ်း ရဲ့ မန္တန် ကို ပြင်ဆင်ဖို့ ရန်ပုံငွေ ရှာတဲ့အနေနဲ့ အွန်လိုင်း ကနေ ဇိသာတီးပြပါမယ်ရှင်'

... ... ...

တစ်ချိန်တည်းမှာပင် ထျန်းလန် မြို့တော် ရှိ 'မူးယစ်နေသော အင်မော်တယ် အဆောက်အအုံ' စားသောက်ဆိုင် တွင်၊

အလယ်ပိုင်းကုန်းမြေ တွင် နာမည်ကျော် ငွေသုံးကြမ်းသူ၊ ထျန်းလန် မြို့တော် ၏ အချမ်းသာဆုံး သူဌေးကြီး၏ သားဖြစ်သူ ဝမ်ထန် သည် အလွန်တရာ ခမ်းနားထည်ဝါသော သီးသန့် အခန်းကြီး တစ်ခန်းထဲတွင် အရက်သောက်ရင်း ပျင်းရိစွာ လှဲလျောင်းနေ၏။

“ပျင်းစရာကောင်းလိုက်တာ... တကယ်ကို ပျင်းစရာကောင်းတာပဲကွာ”

ဝမ်ထန် က အရက်ခွက်ကို လှည့်ကစားနေသည်။ သူ့ဘေးပတ်လည်ရှိ ကချေသည်များက မည်မျှပင် ကောင်းမွန်စွာ ကပြဖျော်ဖြေနေပါစေ၊ သူကတော့ ငြီးငွေ့နေခဲ့ပြီ ဖြစ်၏။

အခြေခံတည်ဆောက်ခြင်းအဆင့် သာ ရှိသော်ငြား ရွှေအမြုတေအဆင့် ကျင့်ကြံသူ တစ်ယောက်ကို ဝိညာဉ်ကျောက်တုံး များဖြင့် ပစ်ပေါက်ပြီး ဖိနှိပ်နိုင်လောက်အောင် ချမ်းသာလှသော သူဌေးသား တစ်ယောက်အနေဖြင့် သူသည် အလွန်အမင်း ဟာတာတာ ဖြစ်မှုကို ခံစားနေရသည်။

“သခင်လေး... 'ဝမ်ရှန်း' ထဲကို တစ်ချက်လောက် ဝင်ကြည့်ပါလားဗျ”

သူ၏ ဘေးရှိ လက်ပါးစေ ကောင်က အနားသို့ ကပ်လာပြီး ပြောလိုက်သည်။

“ဒီည အဲဒီထဲမှာ 'တိုက်ရိုက်ထုတ်လွှင့်မှု' ဆိုတာကြီး လုပ်နေတယ်လို့ ကျွန်တော် ကြားတယ်... နတ်သမီးလေး တွေ အများကြီး ပေါ်လာတယ် ဆိုလားပဲဗျ”

“အို...”

ဝမ်ထန် က သူ၏ ကျောက်စိမ်းပြား ကို ပေါ့ပေါ့ပါးပါး ဆွဲထုတ်လိုက်ပြီး အပြစ်ကင်းစင်ဆုံးဟု ထင်ရသော မျက်နှာဖုံးပုံလေး ရှိသည့် တိုက်ရိုက်ထုတ်လွှင့်မှု တစ်ခုထဲသို့ ကျပန်း ဝင်ရောက်ကြည့်လိုက်သည်။

မြင်ကွင်းက လင်းလက်သွား၏။ မိတ်ကပ် အလိမ်းလိမ်း မခြယ်သထားသော်ငြား အသက်ရှူမှားလောက်အောင် လှပလှသော မျက်နှာလေး တစ်ခု မျက်နှာပြင်ပေါ်တွင် ပေါ်ထွက်လာတော့သည်။ နောက်ခံမြင်ကွင်းက ရိုးရှင်းလှသော်ငြား ထို သိမ်မွေ့နူးညံ့ပြီး သနားကမန်း နိုင်လှသော အသွင်အပြင်လေးက ဝမ်ထန် ၏ နှလုံးသားကို ချက်ချင်း ထိမှန်သွားလေတော့၏။

ထိုအချိန်တွင် တိုက်ရိုက်ထုတ်လွှင့်မှု ထဲ၌ လူအနည်းငယ်ခန့်သာ ရှိနေပြီး အများစုမှာ ပွဲလာကြည့်သော ဆင်းရဲသည့် အမှီအခိုကင်း ကျင့်ကြံသူ များသာ ဖြစ်၏။ မှတ်ချက်များမှာလည်း ကျဲပါးလှ၏။

“ဒါ ဘယ်သူလဲ... လှလိုက်တာ”

“စောင်းတီးပြမှာလား... ပျင်းစရာကြီးကွာ... ဘေးအခန်းက ရင်ဘတ်ပေါ်မှာ ကျောက်ခဲ တင်ပြီး ခွဲပြနေတဲ့ ရုပ်ခန္ဓာ ကျင့်ကြံသူ လောက်တောင် ကြည့်ကောင်းမှာ မဟုတ်ဘူး”

“ဒီအဘိုးကြီးကို ပြုံးပြပါဦး ကောင်မလေးရယ်”

လင်းဝမ်အာ မှာ ထို မလေးမစား မှတ်ချက်များကို ကြည့်ကာ မျက်နှာတစ်ခုလုံး နီရဲသွားပြီး ဘာပြောရမှန်းမသိအောင် ပျာယာခတ်သွားတော့သည်။

“တာအိုမိတ်ဆွေ တို့ မင်္ဂလာပါရှင်... ကျွန်မက... အခု 'စိတ်နှလုံး သန့်စင်ခြင်းနှင့် လောကတစ်ခုလုံး အပေါ် မေတ္တာထားခြင်း မန္တန်' ဆိုတဲ့ တေးသွားလေးကို တီးခတ်ပြပါမယ်ရှင်...”

သူမ ဤကဲ့သို့ အခြေအနေမျိုးကို တစ်ခါမှ မကြုံဖူးခဲ့သဖြင့် အရမ်း စိတ်လှုပ်ရှားနေကာ စောင်းတီးသံလေးများပင် တုန်ရီနေတော့၏။

အလှပိုင်ရှင်လေး ရှက်ရွံ့နေသည်ကို မြင်လိုက်ရသောအခါ ဝမ်ထန် ၏ ကာကွယ်ပေးလိုစိတ် များ ချက်ချင်း ပေါက်ကွဲထွက်လာတော့သည်။

“ဆင်းရဲမွဲတေနေတဲ့ ကောင်တွေ... ပိုက်ဆံ တစ်ပြားမှ မသုံးဘဲနဲ့ အလကား လာကြည့်ပြီး ပရောပရည် လာလုပ်နေကြတယ်ပေါ့လေ”

ဝမ်ထန် က လှောင်ပြုံး ပြုံးလိုက်ပြီး မျက်နှာပြင် အောက်ခြေရှိ လက်ဆောင် ကဏ္ဍ ကို ကြည့်လိုက်သည်။

ထိုနေရာတွင် တောက်ပလှသော သင်္ကေတလေး မျိုးစုံကို ပြသထား၏။

ဝိညာဉ် ပန်းပွင့် (၁ ဝိညာဉ်ဒင်္ဂါး)။

ဓားပျံ (၁၀၀ ဝိညာဉ်ဒင်္ဂါး)... အစရှိသည်ဖြင့် အဈေးဆုံး ပစ္စည်းအထိ ပါဝင်သည်။

ကောင်းကင်ဘုံ ကိုးလွှာ နတ်မိုးကြိုး (၁၀၀,၀၀၀ ဝိညာဉ်ဒင်္ဂါး ညီမျှသော ၁၀,၀၀၀ ဝိညာဉ်ကျောက်တုံး )။

အထူးပြုလုပ်ချက် - ဆိုက် တစ်ခုလုံးတွင် ဆိုင်းဘုတ် ဖြင့် ကြေညာပေးမည်။ အလွန် ခမ်းနားပြီး ပေါက်ကွဲစေနိုင်သော အထူးပြုလုပ်ချက်များ ပါဝင်ကာ သင့်ရဲ့ ဂုဏ်သိက္ခာကို အမြင့်မားဆုံး မြှင့်တင်ပေးပါလိမ့်မည်။

“ဝိညာဉ်ကျောက်တုံး တစ်သောင်း တဲ့လား... ဒါက ငါ့အတွက် တစ်နပ်စာ စားဖိုးလေးပဲ ရှိတာပါကွာ”

ဝမ်ထန် ၏ နှုတ်ခမ်းများက မောက်မာသော အပြုံးတစ်ခုအဖြစ် ကွေးတက်သွားပြီး သူ၏ လက်ချောင်းကို ရိုက်ချလိုက်တော့၏။

“ဝုန်း... ”

မူလက အေးချမ်းနေခဲ့သော တိုက်ရိုက်ထုတ်လွှင့်မှု လေးသည် ရုတ်တရက် ကောင်းကင်ယံ အပြည့် ဖုံးလွှမ်းလာသော ခရမ်းရောင် လျှပ်စီးတန်းများကြောင့် ရိုက်ချိုးခံလိုက်ရတော့သည်။

ဧရာမ ရွှေရောင် ဆိုင်းဘုတ်ကြီး တစ်ခုက နားကွဲမတတ် မိုးခြိမ်းသံကြီးများနှင့်အတူ 'ဝမ်ရှန်း' ပလက်ဖောင်း ပေါ်ရှိ တိုက်ရိုက်ထုတ်လွှင့်မှု အခန်းတိုင်းကို ဖြတ်သန်းသွား၏။

'ငါ့သား ဝမ်ထန် က ဧကရာဇ် ဖြစ်လာမယ့် အလားအလာ ရှိတယ်' ဟု အမည်ရသူက 'လင်းဝမ်အာ' ၏ တိုက်ရိုက်ထုတ်လွှင့်မှု တွင် ကောင်းကင်ဘုံ ကိုးလွှာ နတ်မိုးကြိုး ၁ ခု လက်ဆောင် ပေးလိုက်ပါပြီ... ဂုဏ်ပြုပါတယ်ဗျာ။

ထိုအခိုက်အတန့်၌ အင်မော်တယ် လောက ၏ ဗီဒီယိုများကို ကြည့်ရှုနေကြသော ကျင့်ကြံသူ သိန်းပေါင်းများစွာမှာ လုံးဝ ဆွံ့အသွားကြတော့သည်။

“သောက်ကျိုးနည်း... အဲဒါ ဘယ်သူလဲကွ”

“ကောင်းကင်ဘုံ ကိုးလွှာ နတ်မိုးကြိုး တဲ့လား... အဲဒါ ဝိညာဉ်ကျောက်တုံး တစ်သောင်း တောင် တန်တာနော်”

“သွားကြည့်ကြစို့... ဒီ သူဌေးကြီး ကို သွားကြည့်ကြစို့ဟေ့”

လင်းဝမ်အာ ၏ တိုက်ရိုက်ထုတ်လွှင့်မှု အခန်းထဲရှိ ကြည့်ရှုသူ အရေအတွက်မှာ လူရာဂဏန်းမှသည် မျက်စိတစ်မှိတ်အတွင်း တစ်သိန်းအထိ ဒုံးပျံပမာ ထိုးတက်သွားတော့၏။ အစောပိုင်းက ကျဲပါးနေခဲ့သော မှတ်ချက်များမှာ 'သခင်ကြီး ကို ရှိခိုးပါတယ်'၊ 'ဘော့စ်ကြီး က အမိုက်စားပဲ'၊ '၆၆၆' (တရုတ်အင်တာနက် အသုံးအနှုန်းဖြစ်ပြီး အလွန်မိုက်သည်ဟု အဓိပ္ပာယ်ရပါသည်။) စသည့် စာသားများဖြင့် ချက်ချင်း ရေလွှမ်းမိုးသွားတော့သည်။

လင်းဝမ်အာ မှာ ရုတ်တရက် ထွက်ပေါ်လာသော နိုတီသံကြီးကြောင့် လန့်ဖြန့်သွားပြီး သူမ၏ လက်ထဲမှ စောင်းလေးပင် ပြုတ်ကျသွား၏။ သူမက မျက်နှာပြင်ပေါ်ရှိ တောက်ပနေသော ရွှေရောင် အိုင်ဒီ နာမည်ကြီးကို ကြောင်တောင်တောင် စိုက်ကြည့်နေမိသည်။ ထိုစဉ် စနစ် ၏ အသိပေးသံ တစ်ခုက သူမ၏ နားထဲတွင် ထွက်ပေါ်လာတော့သည်။ (ကျန်းချန် က အထူး သတ်မှတ်ပေးထားသော အရာပါ။)

“အော်ပြောလိုက်ပါ... အစ်ကိုကြီး ဝမ် ရဲ့ ကောင်းကင်ဘုံ ကိုးလွှာ နတ်မိုးကြိုး အတွက် ကျေးဇူးတင်ပါတယ် လို့... အစ်ကိုကြီး ဝမ် က အမိုက်စားပဲ လို့ ပြောလိုက်ပါ”

လင်းဝမ်အာ ၏ စိတ်အာရုံများ လုံးဝ ဟာလာဟင်းလင်း ဖြစ်သွားတော့သည်။ သူမက မသိစိတ်ဖြင့် ကင်မရာ ကို ကြည့်ကာ တုန်ရီပြီး နူးညံ့လှသော အသံလေးဖြင့် အော်ခေါ်လိုက်၏။

“ကျေးဇူးတင်ပါတယ်... အစ်ကိုကြီး ဝမ် ရဲ့ ကောင်းကင်ဘုံ ကိုးလွှာ နတ်မိုးကြိုး အတွက် ကျေးဇူးတင်ပါတယ်ရှင်... အစ်ကိုကြီး ဝမ်... အစ်ကိုကြီး ဝမ် က တကယ့်ကို ကြီးမြတ်တာပဲ... အစ်ကိုကြီး ဝမ်... ထာဝရ ပျော်ရွှင်မှုတွေကို ခံစားရပြီး ကမ္ဘာတည်သရွေ့ အသက်ရှည်ပါစေရှင်”

အမိုက်စားပဲ... တကယ့်ကို အမိုက်စားပဲကွာ။

မူးယစ်နေသော အင်မော်တယ် အဆောက်အအုံ တွင် လှဲလျောင်းနေသော ဝမ်ထန် သည် ပုံမှန်အားဖြင့် အလွယ်တကူ ချဉ်းကပ်၍ မရနိုင်သော မြင့်မြတ်သောသမီးတော် က လူတစ်သိန်းရှေ့တွင် သူ့ကို 'အစ်ကိုကြီး ဝမ်' ဟု ခေါ်လိုက်သည်ကို ကြားလိုက်ရသောအခါ ဂျင်ဆင်းသီး (အသက်ရှည်စေသော သစ်သီး) ကို စားလိုက်ရသည်ထက်ပင် ပိုမို ကြီးမားသော ဂုဏ်ယူဝင့်ကြွားမှုကြီးကို ခံစားလိုက်ရတော့သည်။ သူ၏ တစ်ကိုယ်လုံးရှိ ချွေးပေါက်များအားလုံး ပွင့်ဟသွားသည့်အလား ပင်။

“ဒါမှ... ဒါမှ အင်မော်တယ် ကျင့်ကြံရကျိုး နပ်တာပေါ့ကွ... ဒါမှ ဘဝ ဆိုတာကွ”

ဝမ်ထန် ၏ မျက်လုံးများ နီရဲသွားပြီး သူ၏ လက်ချောင်းကို ထပ်မံ ရိုက်ချလိုက်ပြန်တော့သည်။

ကောင်းကင်ဘုံ ကိုးလွှာ နတ်မိုးကြိုး x၂။

ကောင်းကင်ဘုံ ကိုးလွှာ နတ်မိုးကြိုး x၃။

...

ကောင်းကင်ဘုံ ကိုးလွှာ နတ်မိုးကြိုး x၁၀။

ဝိညာဉ်ကျောက်တုံး တစ်သိန်း တိတိ။ သူ အကုန်အကျ ခံလိုက်ပြီ။ တိုက်ရိုက်ထုတ်လွှင့်မှု တစ်ခုလုံး ပေါက်ကွဲထွက်သွားတော့သည်။ လင်းဝမ်အာ မှာ အလွန်အမင်း ထိတ်လန့်သွားပြီး ငိုချလိုက်တော့သည်။ သူမ တကယ်ကို ငိုချလိုက်ခြင်း ဖြစ်၏။ ထိုပိုက်ဆံ ပမာဏမှာ ချင်းရွှေ ဂိုဏ်း တစ်ဝက်ကို ဝယ်ယူရန်ပင် လုံလောက်နေသည် မဟုတ်ပါလား။

“မပို့ပါနဲ့တော့ရှင်... ဟီးဟီး... အစ်ကိုကြီး ဝမ်... မပို့ပါနဲ့တော့... တော်ပါပြီ... တကယ်ကို တော်ပါပြီရှင်...”

အလှပိုင်ရှင်လေး၏ မျက်ရည်ကျနေသော အမူအရာက ကြည့်ရှုသူ မရေမတွက်နိုင်အောင် များပြားလှသော သူများ၏ နှလုံးသားကို ရိုက်ချိုးပစ်လိုက်ပြီး သူတို့အားလုံးမှာ ရင်ကွဲနာကျမှုများနှင့် မနာလိုမှုများ တစ်ပြိုင်နက်တည်း ဖြစ်ပေါ်လာကြတော့သည်။

ဤညကို 'အင်မော်တယ် လောက ၏ တိုက်ရိုက်ထုတ်လွှင့်ခြင်း ပထမနှစ်' ဟု အမည်တပ်ခဲ့ကြ၏။ ထိုညမှာပင် ကျင့်ကြံသူ များအားလုံးသည် အခြေခံ သဘောတရား တစ်ခုကို နားလည်သွားခဲ့ကြ၏။

'လျှို့ဝှက် နယ်မြေ တွေထဲမှာ သွားပြီး အသေအလဲ ပင်ပန်းခံနေမယ့်အစား... တိုက်ရိုက်ထုတ်လွှင့်တဲ့ အခန်းထဲမှာ 'အစ်ကိုကြီး... အမိုက်စားပဲ' လို့ သွားအော်တာကမှ ပိုကောင်းသေးတယ်ကွ'

ထိုအချိန်တွင် ကွေ့ယွမ်ဂိုဏ်း ၏ နောက်ကွယ်၌ ဘဏ္ဍာရေးကို တာဝန်ယူထားသော ချောင်ရှန်း သည် ဝင်လာသော ငွေလွှဲခများကို ကြည့်ကာ (ပလက်ဖောင်း က ၅၀ ရာခိုင်နှုန်း ဖြတ်ယူသည်။) ပြုံးဖြီးနေတော့သည်။

“သူတို့တွေ ရူးနေကြပြီ... ဒီ ဒေသခံတွေ အကုန်လုံး ရူးနေကြပြီကွ”

သူက အော်ဟစ်လိုက်၏။

“ငါတို့ ဘာမှတောင် မလုပ်ရဘူး... ပလက်ဖောင်း လေး တစ်ခု ထောင်ပေးလိုက်ရုံနဲ့... ပိုက်ဆံတွေက ရေတွေလို ဝင်လာနေတာပဲကွာ”

ကျန်းချန်က သူ၏ အလုပ်စားပွဲ ကုလားထိုင်ပေါ်တွင် ထိုင်ကာ လက်ဖက်ရည်ကို တည်ငြိမ်စွာ သောက်သုံးရင်း မျက်နှာပြင်ပေါ်ရှိ ဝမ်ထန် ၏ မာနထောင်လွှားနေသော ပုံရိပ်ကို ကြည့်လိုက်သည်။

“ဒါက ဘာမှ မဟုတ်သေးဘူး”

“မနက်ဖြန်... 'တိုက်ရိုက် ယှဉ်ပြိုင်ခြင်း' နဲ့ 'ဂုဏ်သရေရှိ ဘွဲ့ထူး' စနစ်တွေ အွန်လိုင်းပေါ် ရောက်လာတဲ့ အခါကျရင်... သူတို့တွေ ဘယ်လောက်တောင် ရူးသွပ်သွားမလဲ ဆိုတာ မင်း မြင်ရပါလိမ့်မယ်”

“အို... ဟုတ်သားပဲ... ဟို ဝမ်ထန် ဆိုတဲ့ ကောင်ဆီ သီးသန့် စာတို ပို့ပြီး အထူးပြုလုပ်ထားတဲ့ 'အထွတ်အထိပ် သူဌေးကြီး' ကိုယ်စားပြု ပုံရိပ်ဘောင်လေး တစ်ခု လက်ဆောင် ပေးလိုက်ဖို့ မမေ့နဲ့နော်... ဒီ သိုးဆူကြီး ကို... အဲ... မဟုတ်ဘူး... ဒီ တော့ပ်ဖန် ကို အလယ်ပိုင်းကုန်းမြေ တစ်ခုလုံး အတုယူစရာ စံပြ ပုဂ္ဂိုလ် တစ်ယောက် ဖြစ်လာအောင် ငါတို့ လုပ်ပေးရမယ်ကွ”

အခန်း (၂၂၁) လူတိုင်း တိုက်ရိုက်ထုတ်လွှင့်ကြတဲ့ ခေတ်ကြီး.. ဘိုးဘေး ကြီး... ခင်ဗျားလည်း တိုက်ရိုက် လွှင့်ပြီး ပစ္စည်းလေး ဘာလေး ရောင်းကြည့်ပါလားဗျာ

အလယ်ပိုင်းကုန်းမြေ တစ်ခုလုံး ကစဉ့်ကလျား ဖြစ်နေတော့၏။

တိတိကျကျ ပြောရလျှင် လင်းဝမ်အာ ၏ နေ့ချင်းညချင်း ချမ်းသာသွားသော ဒဏ္ဍာရီ ကြောင့် သူတို့အားလုံး ရူးသွပ်သွားကြခြင်း ဖြစ်၏။ စောင်းတီးပြရုံနဲ့ တစ်နာရီတည်းကို ဝိညာဉ်ကျောက်တုံး တစ်သိန်းတောင် ရတယ် ဟုတ်လား။ အဲဒီလောက်ရဖို့ သတ္တုတွင်း ထဲမှာ ဘယ်နှစ်နှစ်တောင် တူးရမှာလဲ။ မိစ္ဆာကောင် တွေ ဘယ်နှစ်ကောင်တောင် သတ်ရမှာလဲ။

တစ်ညတည်း အတွင်းမှာပင် အင်မော်တယ် လောက ၏ အကြီးမားဆုံးသော အိပ်မက်ကြီးမှာ 'အင်မော်တယ် အဖြစ်သို့ တက်လှမ်းခြင်း' မဟုတ်တော့ချေ။

'အင်မော်တယ် မဖြစ်ချင်တော့ဘူး... အင်တာနက် ဆယ်လီ ပဲ ဖြစ်ချင်တော့တယ်' ဟူ၍ ပြောင်းလဲသွားခဲ့တော့၏။

ထျန်းလန် မြို့တော် ၏ လမ်းမများပေါ်တွင် လမ်းလျှောက်သွားပါက အလွန်တရာ ထူးဆန်းပြီး ကြက်သီးမွေးညင်းထစရာ ကောင်းလှသော မြင်ကွင်းများကို တွေ့မြင်ရပါလိမ့်မည်။

အခြေခံတည်ဆောက်ခြင်းအဆင့် ရှိ ဓားသိုင်း ကျင့်ကြံသူ တစ်ယောက်သည် လမ်းဘေးရှိ လေထဲတွင် လွင့်မျောနေသော ပုံရိပ်ဖမ်း ကျောက်တုံး ၏ အရှေ့၌ ရူးသွပ်စွာ ကိုယ်ဟန်ပြနေပြီး သူ၏ ခေါင်းပေါ်တွင် ဓားပျံ တစ်လက်က ပန်ကာ တစ်လုံးပမာ လည်ပတ်နေ၏။

“ဟေး... မိသားစုဝင်တို့... ငါ့ရဲ့ 'ဓားပျံ ရေစီးကြောင်း' လှုပ်ရှားမှုလေးက မမိုက်ဘူးလား... မိုက်တယ်ထင်ရင် ၆ လို့ ရိုက်ပေးခဲ့... လမ်းမပျောက်သွားအောင်လို့ Follow လေး လုပ်ထားဖို့လည်း မမေ့နဲ့နော်”

နောက်တစ်စက္ကန့်တွင် ဓားပျံ မှာ အထိန်းအကွပ်မဲ့သွားပြီး လမ်းသွားလမ်းလာ တစ်ယောက်၏ ဆံထုံးကို ဖြတ်တောက်ပစ်လိုက်တော့သည်။

မြို့တံခါးဝတွင်ကား ရုပ်ခန္ဓာ ကျင့်ကြံသူ လူသန်ကြီး တစ်ယောက်က အင်္ကျီချွတ်ထားပြီး ရင်ဘတ်ပေါ်တွင် ကျောက်တုံးတင်ကာ ခွဲပြနေ၏။

“မိသားစုဝင်တို့ရေ... အသည်းအသန်လေး နှိပ်ပေးကြပါဦး... အသည်းလေး (၁၀,၀၀၀) ပြည့်သွားတာနဲ့ ဟောဒီ သံမည်း ဓားကြီးကို မျိုချပြပါမယ်ဗျာ”

သူက ကျယ်လောင်စွာ အော်ဟစ်နေ၏။

ပုံမှန်အားဖြင့် မာနထောင်လွှားလှသော ဆေးဖော်စပ်သူပင်လျှင် ယခုအခါ ဆေးဖို ကြီး၏ အရှေ့တွင် ဆောင့်ကြောင့်ထိုင်ကာ ဖရိုဖရဲ ပုံစံဖြင့် အော်ဟစ်နေ၏။

“ဘယ်မှ ထွက်မသွားကြနဲ့နော်... ဒီတစ်ခါ ဆေးဖို ထပ်ပေါက်ကွဲရင် ဒီ ဆေးဖို ကြီးကို ကိုက်စားပြမယ်... လက်ဆောင်လေးတွေ ပေးကြပါဦး... ပေးတဲ့သူတိုင်း အသက် (၉၉) နှစ်အထိ နေရပါစေဗျာ”

အလယ်ပိုင်းကုန်းမြေ တစ်ခုလုံးသည် 'ကြည့်ရှုသူ အရေအတွက်အပေါ် စိုးရိမ်ပူပန်ခြင်း' ဟုခေါ်သော ရူးသွပ်မှုကြီး တစ်ခု၏ လွှမ်းမိုးမှုကို ခံနေရတော့၏။

... ... ...

ကွေ့ယွမ်ဂိုဏ်း ၊ အထွေထွေ အမိန့်ပေး ထိန်းချုပ်ရေး အခန်း။

နောက်ကွယ်ရှိ စနစ် ထဲတွင် ဒုံးပျံပမာ ထိုးတက်နေသော အသုံးပြုသူ အရေအတွက် များနှင့် ကြောက်မက်ဖွယ်ကောင်းလှသော ဝိညာဉ်ကျောက်တုံး ဝင်ငွေများကို ကြည့်ရင်း ကျန်းချန်၏ မျက်နှာပေါ်ရှိ အပြုံးမှာ တဖြည်းဖြည်း... အရင်းရှင် ဆန်လာတော့သည်။

“ဂိုဏ်းချုပ်... အခုလောလောဆယ် ဖျော်ဖြေရေး လိုက်ဗ်တွေက နာမည်ကြီးနေတယ် ဆိုပေမဲ့ ကျင့်ကြံသူ အများစုက ကြည့်ရုံပဲ ကြည့်ပြီး ပိုက်ဆံမသုံးတဲ့ ဆင်းရဲသားတွေ များပါတယ်”

လုပ်ငန်းလည်ပတ်မှုကို တာဝန်ယူထားသော ကစားသမား 'မာယွင်ယွင်'က သူ၏ မျက်မှန်ကို ပင့်တင်လိုက်ပြီး အချက်အလက် အစီရင်ခံစာ တစ်စောင်ကို ထုတ်ယူလိုက်သည်။

“ဒါ့အပြင် ဂိုဏ်း တော်တော်များများက ပိုက်ဆံရှာချင်ပေမဲ့ သူတို့ကိုယ်သူတို့ အောက်ခြေအဆင့်ထိ ဆင်းပြီး ဖျော်ဖြေဖို့တော့ ဝန်လေးနေကြတယ်ဗျ... ဒါကြောင့်မို့လို့ သက်ကြီးပိုင်း အားကောင်းတဲ့ ကစားသမား တွေတောင် ငြင်းဆန်လို့ မရနိုင်လောက်တဲ့ ပိုပြီး တိုက်ရိုက်ကျပြီး ပိုပြီး အမြတ်အစွန်း ထွက်နိုင်မယ့် ပုံစံမျိုးကို ကျွန်တော်တို့ ဖန်တီးဖို့ လိုနေပါပြီ”

ကျန်းချန်က လက်ဖက်ရည်ပန်းကန်ကို ကောက်ယူလိုက်ပြီး အပေါ်ယံရှိ အမြှုပ်များကို ညင်သာစွာ မှုတ်ထုတ်လိုက်သည်။

“မင်း ဆိုလိုတာက... လိုက်ဗ် လွှင့်ပြီး ဈေးရောင်းတာကို ပြောတာလား”

“မှန်ပါတယ်ဗျာ”

မာယွင်ယွင် ၏ မျက်လုံးများထဲတွင် စိတ်အားထက်သန်မှုများ လင်းလက်နေ၏။

“အလယ်ပိုင်းကုန်းမြေ မှာ အရင်းအမြစ်တွေက ပေါများပါတယ်... ဒါပေမဲ့ ကုန်သွယ်မှု စီးဆင်းတဲ့ နှုန်းကတော့ အလွန်အမင်း နိမ့်ကျနေတယ်ဗျ... ဆေးဘုရင် တောင်ကြား မှာ ဆေးလုံး တွေက ရောင်းမထွက်ဘဲ ပုံနေတယ်... အမှီအခိုကင်း ကျင့်ကြံသူ တွေကျတော့ ဈေးပေါတဲ့ ဆေးလုံး တွေကို ဝယ်လို့ မရဘူး... အဲဒါက သတင်းအချက်အလက် ကွာဟချက် ပဲဗျ... အဲဒါ စီးပွားရေး အခွင့်အလမ်း ပဲကွ”

ကျန်းချန်က လက်ဖက်ရည်ပန်းကန်ကို ချလိုက်ပြီး လက်ဖျစ်တစ်ချက် တီးလိုက်သည်။

“ဒါဆိုရင် သူတို့ကို သင်ခန်းစာ တစ်ခုလောက် ပေးလိုက်ကြတာပေါ့... သွား... ဆေးဘုရင် တောင်ကြား ကို သွားပြီး ဆက်သွယ်လိုက်... သူတို့ ပုံနေတဲ့ ဆေးလုံး တွေကို ရှင်းထုတ်ချင်တယ်ဆိုရင် သူတို့ရဲ့ မဟာ အကြီးအကဲ ကြီးကို... လိုက်ဗ်လွှင့်ခိုင်းလိုက် လို့ သွားပြောလိုက်ပါ”

... ... ...

ဆေးဘုရင် တောင်ကြား ၊ ဆေးဖို မျှော်စင် ၏ အပေါ်ဆုံးထပ်။

ဆေးဘုရင် တောင်ကြား သည် အလယ်ပိုင်းကုန်းမြေ တွင် ဆေးဖော်စပ်ခြင်း ဖြင့် နာမည်ကြီးသော ဂိုဏ်း တစ်ခု ဖြစ်၏။ သို့သော် မကြာသေးမီက ဂိုဏ်း ၏ အခြေအနေမှာ သိပ်မကောင်းလှချေ။ နှစ်ပေါင်းများစွာ စစ်ပွဲများ ဖြစ်ပွားနေခဲ့ခြင်းကြောင့် ကုန်ကြမ်းဈေးနှုန်းများ မြင့်တက်လာပြီး ဆေးလုံး များ၏ ဈေးနှုန်းမှာလည်း မတန်တဆ မြင့်တက်ကာ ရောင်းမထွက်တော့ချေ။ ဂိုဏ်းဂ်ိုဒေါင် ထဲတွင် ပုံနေသော အဆင့်နိမ့် ဆေးလုံး များဆိုလျှင် မှိုပင် တက်နေတော့၏။

ထိုအချိန်တွင် လူငယ် တပည့် တစ်သိုက်သည် ဆံဖြူနေသော ဂုဏ်သရေရှိ အဘိုးကြီး တစ်ယောက်ကို ဝိုင်းရံကာ တောင်းပန်နေကြသည်။ ထိုအဘိုးကြီးကား အခြားသူ မဟုတ်ဘဲ ဆေးဘုရင် တောင်ကြား ၏ မဟာ အကြီးအကဲ ၊ အဆင့် (၇) ဆေးဖော်စပ်ခြင်း မဟာဆရာကြီး... ရွှမ်ကျီဇီး ပင် ဖြစ်၏။

“ပေါက်ကရတွေ... ပေါက်ကရတွေ ပြောနေကြတာပဲ”

ရွှမ်ကျီဇီး က မျက်လုံးပြူးကာ သူ၏ မုတ်ဆိတ်မွေးများကို ပွတ်သပ်ရင်း ဒေါသတကြီး ပြောလိုက်သည်။

“ငါလို ဂုဏ်သိက္ခာကြီးမားလှတဲ့ ဆေးဖော်စပ်ခြင်း မဟာဆရာကြီး... လူထောင်သောင်းချီပြီး လေးစားခံရတဲ့ ပုဂ္ဂိုလ်ကြီး ကိုများ... ဟို ကျောက်တုံး အကွဲလေး ရဲ့ အရှေ့မှာ ဇာတ်သမား တစ်ယောက်လို ဆေးတွေ လိုက်ရောင်းခိုင်းရတယ်လို့... ဒါ ဘယ်လို အပြုအမူမျိုးလဲ... မင်းတို့တွေ အရှက်မရှိကြဘူးလား”

“ဘိုးဘေး ကြီးရေ... ”

အကြီးဆုံး တပည့် က မျက်ရည်များ စီးကျလျက် မြေကြီးပေါ်တွင် ဒူးထောက် ချလိုက်တော့သည်။

“ဂိုဏ်ဒေါင် ထဲမှာ ပုံနေတဲ့ 'စွမ်းအင် ပြန်လည်ဖြည့်တင်းရေး ဆေးလုံး' တစ်သိန်း ကို မရောင်းရဘူးဆိုရင် အဲဒီ ဆေးလုံး တွေရဲ့ အာနိသင်တွေ ပျောက်ဆုံးသွားပြီး အကုန်လုံး အလဟဿ ဖြစ်သွားတော့မှာပါဗျာ... အဲဒါက ဂိုဏ်း တစ်ခုလုံးရဲ့ ခြောက်လစာ စားစရိတ်နော်”

“ဟုတ်ပါတယ် ဘိုးဘေး ကြီး... ကွေ့ယွမ်ဂိုဏ်း က ပြောပါတယ်... ဘိုးဘေး ကြီးသာ ဝင်ပါပေးမယ်ဆိုရင် ပုံနေတဲ့ ပစ္စည်းတွေ အကုန်လုံး ပြောင်သွားအောင် ကူညီပေးပါ့မယ်လို့ သူတို့ အာမခံပါတယ်တဲ့ဗျာ”

ရွှမ်ကျီဇီး က စိုးရိမ်ပူပန်မှုများ ပြည့်နှက်နေသော သူ၏ တပည့်များနှင့် မြေးတပည့်များကို ကြည့်ကာ၊ ထို့နောက် အဝေးတွင် တောင်လိုပုံနေသော ဆေးလုံး များကို လှမ်းကြည့်လိုက်ပြီး သက်ပြင်းရှည်ကြီး တစ်ချက်ချလိုက်သည်။

“ကောင်းပြီလေ... ကောင်းပြီ... ဂိုဏ်း အတွက်ဆိုတော့လည်း... ဒီ အဘိုးကြီး ရဲ့ မျက်နှာကို... အကုန်ခံလိုက်ပါတော့မယ်ကွာ”

... ... ...

နာရီဝက် အကြာတွင် 'ဝမ်ရှန်း' ပလက်ဖောင်း ပေါ်ရှိ ပထမဆုံးသော 'တရားဝင် ရွေးချယ်မှု' တိုက်ရိုက်ထုတ်လွှင့်မှုကြီး စတင်လေတော့သည်။

မည်သည့် အရည်အချင်း ပြသမှု မျိုးမှ မပါဝင်ချေ။ မြင်ကွင်းထဲတွင် ဆေးလုံး ပုလင်းများ အပြည့် တင်ထားသော စားပွဲတစ်လုံးနှင့် မျက်နှာထား တင်းတင်းမာမာဖြင့် မတ်မတ် ထိုင်နေသော အဘိုးကြီး တစ်ယောက်သာ ရှိသည်။

ကြိုတင် ကြေညာထားခြင်းမျိုး မရှိခဲ့သော်ငြား ဆေးဘုရင် တောင်ကြား ၏ မဟာ အကြီးအကဲ ဆိုသော ဂုဏ်ပုဒ်က အရမ်းကို ကျော်ကြားလွန်းလှ၏။

လိုက်ဗ် စတင်ပြီး သုံးမိနစ် အတွင်းမှာပင် ကြည့်ရှုသူ အရေအတွက်က ငါးသိန်း ကို ကျော်လွန်သွားတော့သည်။

မှတ်ချက် နေရာတွင် စာသားများ ရေလွှမ်းမိုးသွားသည်။

“သောက်ကျိုးနည်း... အရှင်လတ်လတ် ရွှမ်ကျီဇီး မဟာဆရာကြီး ကွ”

“တာအို ဆေးဖော်စပ်ခြင်း မဟာဆရာကြီး ကို ဂါရဝပြုပါတယ်ဗျာ”

“မဟာဆရာကြီး က တာအို သဘောတရားတွေ အကြောင်း ဟောပြောပြမှာလားဟင်”

ရွှမ်ကျီဇီး သည် မှတ်ချက်များကို စိမ်းစိမ်းကြည့်နေပြီး အလွန်အမင်း စိတ်လှုပ်ရှားနေသဖြင့် သူ၏ လက်ဖဝါးများမှ ချွေးများပင် ထွက်လာတော့၏။ သူက မသိစိတ်ဖြင့် ကင်မရာ အပြင်ဘက်တွင် ရပ်နေသော 'ဒါရိုက်တာ' (ကစားသမား လီကျားချီ) ကို ကြည့်လိုက်မိသည်။

'လီကျားချီ' က ဧရာမ ဆိုင်းဘုတ်ကြီး တစ်ခုကို မြှောက်ပြလိုက်သည်။ ထိုဆိုင်းဘုတ်ပေါ်တွင် စာလုံးကြီး သုံးလုံး ရေးထားသည်က …

‘ပြုံးပါ... ရင်းနှီးတဲ့ ပုံစံလေး လုပ်ပါ’ ဟူ၍။

ရွှမ်ကျီဇီး က အတင်းအဖျင်း ပြုံးလိုက်ရာ သူ၏ အပြုံးမှာ မျက်နှာ ရှုံ့မဲ့နေသည်နှင့် ပိုတူနေ၏။ သူ၏ အသံက ဩရှနေ၏။

“တာအိုမိတ်ဆွေ တို့... ထမင်းစားပြီးကြပြီလား”

နေရာတစ်ခုလုံး တိတ်ဆိတ်သွားတော့သည်။

'လီကျားချီ' က သူ၏ နဖူးကို ရိုက်လိုက်ပြီး မြင်ကွင်းထဲသို့ ပြေးဝင်လာကာ အသံချဲ့စက် မှော်ရတနာ ကို ကိုင်ဆောင်လျက် အခြေအနေကို ချက်ချင်း ထိန်းချုပ်လိုက်၏။

“အိုးမိုင်ဂေါ့... မိန်းကလေးတို့ရေ... အဲ... မဟုတ်ဘူး... ကျင့်ကြံသူ တာအိုမိတ်ဆွေ တို့ရေ... ခင်ဗျားတို့တွေ ဆိုင်တွေမှာ ဆေးလုံး ဝယ်ရင်း အမြတ်ကြီးစား အလိမ်ခံနေရတုန်းပဲလား... ဆိုင်ရှင်တွေရဲ့ မောက်မာတဲ့ ဆက်ဆံမှုတွေကို သည်းခံနေရတုန်းပဲလား”

“ဒီနေ့... ဘိုးဘေး ကြီး ရွှမ်ကျီ က စေတနာ အပြည့်နဲ့ ရောက်ရှိလာပါပြီဗျာ”

“ဘိုးဘေး ကြီး... လူတိုင်းကို ပြောပြလိုက်ပါဦး... ပုံမှန်ဆိုရင် ဝိညာဉ်ကျောက်တုံး (၅၀) ပေးရတဲ့ ဒီ စွမ်းအင် ပြန်လည်ဖြည့်တင်းရေး ဆေးလုံး ကို ဒီနေ့ ဘယ်လောက်နဲ့ ရောင်းပေးမလဲဆိုတာ...”

ရွှမ်ကျီဇီး က တစ်ခဏမျှ တုံ့ဆိုင်းသွားပြီးနောက် ဇာတ်ညွှန်းအတိုင်း ဗလုံးဗထွေးဖြင့် ပြန်ဖြေလိုက်သည်။

“လေးဆယ်... အဲ... မဟုတ်ဘူး... သုံးဆယ် လား”

“မှားတယ်”

'လီကျားချီ' က စားပွဲကို ဝုန်းခနဲ ရိုက်ချလိုက်ပြီး အားကုန် အော်ဟစ်လိုက်၏။

“သုံးဆယ် လည်း မဟုတ်ဘူး... နှစ်ဆယ် လည်း မဟုတ်ဘူးဗျာ... ဒီနေ့ ဘိုးဘေး ကြီးရဲ့ လိုက်ဗ် မှာ (၉ ဒသမ ၉) ယွမ် တည်းပါ... (၉ ဒသမ ၉) ယွမ် တည်းပါနော်... ပုလင်း (၁၀) လုံး ဝယ်ရင် အင်မော်တယ် ဂူ အပေါက်ဝ အထိ အခမဲ့ ပို့ဆောင်ပေးဦးမှာပါဗျာ”

“ဘိုးဘေး ကြီး... လင့်ခ် ချပေးလိုက်တော့”

ရွှမ်ကျီဇီး မှာ လန့်ဖြန့်သွားသဖြင့် သူ၏ လက်များပင် တုန်ရီသွားပြီး မသိစိတ်က အော်ဟစ်လိုက်မိသည်။

“လင့်ခ်... လင့်ခ် တင်ပေးလိုက်စမ်း”

“ဝုန်း... ”

ထိုအမိန့်ပေးသံနှင့်အတူ မျက်နှာပြင်၏ ညာဘက် အောက်ထောင့်တွင် ရွှေရောင် 'စက်ဘီးအဝါလေး' သင်္ကေတ လေး တစ်ခု ရုတ်တရက် ပေါ်လာတော့၏။

ကြည့်ရှုသူ ငါးသိန်းလုံး လုံးဝ ဆွံ့အသွားကြတော့သည်။

(၉ ဒသမ ၉) တဲ့လား။ ပြီးတော့ ဒါက ဆေးဘုရင် တောင်ကြား က အစစ်အမှန် စွမ်းအင် ပြန်လည်ဖြည့်တင်းရေး ဆေးလုံး နော်။ အလကား ပေးတာနဲ့ ဘာကွာတော့လို့လဲ။

“လုကြဟေ့... ”

“အရင်လာသူ အရင်ရမယ်ဟေ့”

“ဆယ်ဆ ပေးမယ်... ငါ့အတွက် တစ်ပုလင်း ဖယ်ထားပေးပါကွာ”

မျက်စိတစ်မှိတ်အတွင်းမှာပင် နောက်ကွယ်ရှိ ဂိုဏ်ဒေါင် လက်ကျန် အရေအတွက်ကို ပြသနေသော '၁၀၀,၀၀၀' ဆိုသည့် ဂဏန်းကြီးမှာ '၀' အဖြစ်သို့ ချက်ချင်း ပြောင်းလဲသွားသည်ကို ရွှမ်ကျီဇီး တွေ့လိုက်ရသည်။

“ကုန်... ကုန်သွားပြီလား”

ရွှမ်ကျီဇီး က မယုံကြည်နိုင်စွာဖြင့် သူ၏ မျက်လုံးများကို ပွတ်သပ်လိုက်သည်။

လွန်ခဲ့သည့် နှစ်နှစ်ကတည်းက ပုံနေခဲ့သော ပစ္စည်း တစ်သိန်း နော်။ မျက်တောင်တစ်ခတ် အတွင်းမှာတင် ကုန်သွားပြီလား။

“ကုန်သွားပါပြီဗျာ”

'လီကျားချီ' က စိတ်လှုပ်ရှားစွာ အော်ဟစ်လိုက်သည်။

“မိသားစုဝင် တွေက အရမ်းကို အားပေးကြတာပဲဗျာ... ဘိုးဘေး ကြီးရေ... အားလုံးက ဟို 'ခြင်ဆီ သန့်စင်ရေး အရည်' ကော ရှိသေးလားလို့ မေးနေကြတယ်ဗျ... ဘိုးဘေး ကြီးက နောက်ထပ် လက်ဆောင် တစ်သုတ်လောက် ထပ်ပေးလိုက်ဦးမလားဟင်”

မျက်နှာပြင် အပြည့် 'ဘိုးဘေး ကြီး အမိုက်စားပဲ'၊ 'ဘိုးဘေး ကြီး ကြီးမြတ်တယ်'၊ 'ဘိုးဘေး ကြီး... ကျွန်တော်က ဘိုးဘေး ကြီးရဲ့ ပျောက်ဆုံးနေတဲ့ မြေးလေးပါ' စသည့် စာသားများကို မြင်လိုက်ရသောအခါ မူလက တည်ငြိမ်နေခဲ့သော ရွှမ်ကျီဇီး ၏ တာအို စိတ်နှလုံး မှာ ရုတ်တရက် ပြင်းထန်စွာ ခုန်ပေါက်လာတော့၏။

လူသိန်းပေါင်းများစွာ၏ ရူးသွပ်စွာ အားပေးမှုကို ခံရပြီး ပြောလိုက်သည့် စကားတစ်ခွန်းတည်းဖြင့် အရာအားလုံးကို ထိန်းချုပ်နိုင်သည့် ဤခံစားချက်ကြီးက... ထိပ်တန်းအဆင့် ဆေးလုံး တစ်အိုးကို အောင်မြင်စွာ ဖော်စပ်နိုင်လိုက်သည်ထက်ပင် ပိုပြီး စိတ်လှုပ်ရှားစရာ ကောင်းနေပါပြီ။

ရွှမ်ကျီဇီး ၏ မျက်နှာထားများ နူးညံ့သွားပြီး သူ၏ ကိုယ်ဟန်ကလည်း မတ်မတ် ဖြစ်သွားတော့သည်။ သူက စားပွဲကို ဝုန်းခနဲ ရိုက်လိုက်ပြီး သူ၏ မုတ်ဆိတ်မွေးများ ထောင်မတ်သွားသည်အထိ ဟိန်းဟောက်လိုက်၏။

“သွားစမ်း... အကုန်လုံး သွားယူခဲ့ကြစမ်း”

“ဒီနေ့ ငါ အရမ်း ပျော်နေတယ်ကွ... ငါ သီးသန့် သိမ်းထားတဲ့ ခြင်ဆီ သန့်စင်ရေး အရည် ပုလင်း ငါးရာ လုံးကို တစ်ဝက်ဈေး နဲ့ ရောင်းပေးမယ်... မိသားစုဝင် တွေအတွက် အထူး လက်ဆောင်ပဲဟေ့”

ထိုအခိုက်အတန့်၌ ရွှမ်ကျီဇီး သည် မာနထောင်လွှားလှသော မဟာဆရာကြီး မဟုတ်တော့ချေ။ သူသည် အလယ်ပိုင်းကုန်းမြေ ၏ သရဖူဆောင်း တိုက်ရိုက်ထုတ်လွှင့်သူ အသစ် တစ်ဦး ဖြစ်လာခဲ့တော့၏။

... ... ...

ထျန်းလန် မြို့တော် ၊ ရတနာ တစ်‌သောင်း ဆိုင်ခွဲ ၏ ပင်မဌာနချုပ်။

အလယ်ပိုင်းကုန်းမြေ ၏ အကြီးမားဆုံး ကုန်သည်အဖွဲ့အစည်းကြီး တစ်ခုအနေဖြင့် ရတနာ တစ်‌သောင်း ဆိုင်ခွဲ သည် ဆေးလုံး များနှင့် မှော်ရတနာ များ ဖြန့်ဖြူးမှု၏ (၈၀) ရာခိုင်နှုန်းကို ထိန်းချုပ်ထားသည်။ သို့သော် ယနေ့တွင်မူ ရတနာ တစ်‌သောင်း ဆိုင်ခွဲ ၏ အကြီးအကဲ တာဝန်ခံ စုန့်ချန် သည် ကြက်သီးထသွားရသည်။

တစ်ချိန်က စည်ကားလှသော ဆိုင်ကြီးမှာ ယနေ့တွင် လုံးဝ တိတ်ဆိတ် ခြောက်ကပ်နေ၏။ ဆိုင်အကူ ကလေးများပင်လျှင် ကောင်တာ နောက်တွင် ပုန်းကာ သူတို့၏ ကျောက်စိမ်းပြား များကို အသုံးပြု၍ 'တိုက်ရိုက်ထုတ်လွှင့်မှု' ဆိုတာကြီးကို ခိုးကြည့်နေကြ၏။

“တာဝန်ခံကြီး... ဒုက္ခရောက်ပါပြီ”

တာဝန်ခံ တစ်ယောက်က ချွေးသံတရွှဲရွှဲဖြင့် ပြေးဝင်လာသည်။

“ဆေးဘုရင် တောင်ကြား က... ဆေးဘုရင် တောင်ကြား က ဒီသုံးလပတ်စာ ဆေးလုံး တွေ အကုန်လုံးကို 'ဝမ်ရှန်း' ပလက်ဖောင်း ပေါ်မှာ ရောင်းကုန်သွားပြီတဲ့ဗျ... ပြီးတော့ ဈေးနှုန်းကလည်း... ကျွန်တော်တို့ ဝယ်တဲ့ ဈေးထက်တောင် နည်းနေသေးတယ်ဗျာ”

“ဘာ”

စုန့်ချန် ၏ လက်ထဲမှ အလွန်တရာ လက်ရာမြောက်လှသော ဝိညာဉ် လက်ဖက်ရည်ပန်းကန်လေး ကွဲကြေသွားတော့သည်။ ပြတင်းပေါက် အပြင်ဘက်ရှိ လမ်းသွားလမ်းလာများက ကျောက်စိမ်းပြား များကို ရူးသွပ်စွာ ဝယ်ယူနေကြသည်ကို ကြည့်ရင်း သူ၏ မျက်နှာမှာ ပြာနှမ်းသွားပြီး အခြေအနေ၏ ကြီးလေးမှုကို နောက်ဆုံးတွင် သူ သဘောပေါက်သွားတော့သည်။

“ဒါက အတိုင်းအတာ လျှော့ချ တိုက်ခိုက်ခြင်းပဲ...”

“ဟို ကျန်းချန် ဆိုတဲ့ ကောင်က ဂိုဏ်း အသစ် တည်ထောင်နေတာ မဟုတ်ဘူး... သူက ရတနာ တစ်‌သောင်း ဆိုင်ခွဲ ကြီးကို အမြစ်ကပါ ဆွဲနှုတ်ပစ်ဖို့ ကြိုးစားနေတာပဲကွ”

စုန့်ချန် ၏ မျက်လုံးများထဲတွင် ရက်စက်သော အရိပ်အယောင်တစ်ခု လင်းလက်သွားသည်။

“သူတို့ကို ဒီအတိုင်း ဆက်လွှတ်ထားလို့ မဖြစ်တော့ဘူး”

“အမိန့်ပေးလိုက်... 'အမှောင် ကွန်ရက်'ကို အသက်သွင်းလိုက်... သူတို့က အင်တာနက် ပေါ်မှာ ပြဿနာ ရှာချင်နေမှတော့... ငါတို့က... သူတို့ရဲ့ အင်တာနက် လိုင်း ကို ဖြတ်ပစ်လိုက်ရုံပေါ့ကွာ”

အခန်း (၂၂၂) မှော်မန္တန် ကို မှော်မန္တန် နဲ့ပဲ အနိုင်ယူနိုင်တယ်ကွ.. ကွေ့ယွမ်ဂိုဏ်း ရဲ့ '၁၁ လပိုင်း ၁၁ ရက်' ထိုးစစ်ကြီး

အလယ်ပိုင်းကုန်းမြေ ၊ လေမည်း တောင်ကြော။

ဤနေရာသည် ထျန်းလန် မြို့တော် နှင့် ဆေးဘုရင် တောင်ကြား ကို ဆက်သွယ်ထားသော တစ်ခုတည်းသော လမ်းမကြီး ဖြစ်ပြီး ဓားပြများ ကျက်စားလေ့ရှိသော အန္တရာယ်များသည့် နေရာတစ်ခု ဖြစ်၏။ သို့သော် ယနေ့ ဤနေရာတွင် ကင်းပုန်းဝပ်နေကြသူများမှာ သာမန် ဓားပြများ မဟုတ်ဘဲ ရတနာ တစ်‌သောင်း ဆိုင်ခွဲ မှ ကြီးမားလှသော ကုန်ကျစရိတ်များ အကုန်အကျခံကာ ငှားရမ်းထားသည့် ထိပ်တန်း လုပ်ကြံသတ်ဖြတ်ရေး အဖွဲ့အစည်း 'အရိပ်မျှော်စင်' ပင် ဖြစ်၏။

“ခေါင်းဆောင်... သတင်းရထားတာ သေချာရဲ့လား”

အမည်းရောင် ဝတ်စုံဝတ် လုပ်ကြံသူ တစ်ယောက်က သူ၏ လက်ထဲမှ အဆိပ်သုတ်ထားသော ဓားကို သုတ်ရင်း တိုးတိုးလေး မေးလိုက်သည်။

“ဟို 'ကွေ့ယွမ် ထောက်ပံ့ပို့ဆောင်ရေး' ဓားပျံ အဖွဲ့က ဒီနေရာကနေ တကယ် ဖြတ်သွားမှာ သေချာလို့လား”

ရွှေတံဆိပ်ဆုရှင် လုပ်ကြံသူ ခေါင်းဆောင်က လှောင်ပြုံး ပြုံးလိုက်သည်။

“လုံးဝ မမှားနိုင်ဘူး... တာဝန်ခံ စုန့်က အသေအမိန့် ပေးထားတာ... ဘာဇာတ်လမ်းပဲ ဖြစ်ဖြစ် ကွေ့ယွမ်ဂိုဏ်း ရဲ့ ကုန်စည်ပို့ဆောင်ရေး လမ်းကြောင်းတွေကို ဖြတ်တောက်ပစ်ရမယ်တဲ့... ပစ္စည်းတွေသာ ပို့လို့ မရတော့ဘူးဆိုရင် အဲဒီ 'တိုက်ရိုက်ထုတ်လွှင့်ပြီး ဈေးရောင်းတာ' ဆိုတာကြီးက ဟာသ တစ်ခု ဖြစ်သွားတော့မှာပဲကွ”

သူ စကားပင် မဆုံးလိုက်ရချေ။ မိုးကုတ်စက်ဝိုင်းဆီမှ ထူးဆန်းသော တဝီဝီ မြည်သံကြီးတစ်ခု ထွက်ပေါ်လာတော့သည်။

အဝါရောင် ဝတ်စုံများ တူညီစွာ ဝတ်ဆင်ထားသော ကျင့်ကြံသူ ဒါဇင်ပေါင်းများစွာက မွမ်းမံထားသော ဧရာမ ဓားပျံ များကို စီးနင်းကာ မာန်သွင်းလျက် ရောက်ရှိလာကြ၏။ ဓားပျံ တစ်လက်ချင်းစီ၏ အနောက်တွင် မန္တန်စာလုံး အမှတ်တံဆိပ်များ ပြည့်နှက်နေပြီး '[အမြန်ဆုံး ပို့ဆောင်ရေး]' ဟု ရေးသားထားသည့် ဧရာမ သေတ္တာကြီး တစ်လုံးစီကို ဆွဲလာကြ၏။

“သူတို့ လာပြီ... လှုပ်ရှားကြတော့”

ရွှေတံဆိပ်ဆုရှင် လုပ်ကြံသူ က အမိန့်ပေးလိုက်သည်။

“ဝှစ်... ဝှစ်... ဝှစ်... ”

မရေမတွက်နိုင်သော အဆိပ်လူး လေးမြှားများနှင့် ယုတ်မာလှသော မှော်မန္တန် များက ချက်ချင်းဆိုသလို ကောင်းကင်ယံ အပြည့် ဖုံးလွှမ်းသွားတော့သည်။

ယုတ္တိဗေဒအရ ဆိုလျှင် ဤမျှကြီးမားသော ကင်းပုန်းဝပ် တိုက်ခိုက်မှုကို ရင်ဆိုင်ရပါက ကုန်ပစ္စည်းများ သယ်ဆောင်လာသော ကျင့်ကြံသူ များသည် ကုန်ပစ္စည်းများကို စွန့်ပစ်ကာ အသက်လု ထွက်ပြေးကြမည်မှာ သေချာသည်။ သို့ရာတွင် ဤ အဝါရောင် ဝတ်စုံဝတ် ကျင့်ကြံသူ များ (ကစားသမားများ) ၏ တုံ့ပြန်မှုကမူ လုပ်ကြံသူများ၏ မျှော်လင့်ချက်များကို လုံးဝ ကျော်လွန်နေခဲ့၏။

“သောက်ကျိုးနည်း... မိစ္ဆာကောင် တွေကွ”

ကစားသမားများ၏ ခေါင်းဆောင်ဖြစ်သူ 'SF အမြန်ချောပို့သမား' မှာ ထွက်မပြေးသည့်အပြင် စိတ်လှုပ်ရှားစွာပင် အော်ဟစ်လိုက်သည်။

“ညီအစ်ကိုတို့... ပါဆယ်ကို ကာကွယ်ကြ... ဒီအော်ဒါသာ နောက်ကျသွားရင် ငါတို့ရဲ့ စွမ်းဆောင်ရည် အမှတ်တွေ လျော့သွားလိမ့်မယ်ဟေ့”

သူက သူ၏ သိုလှောင်အိတ် ကို ရုတ်တရက် ဝုန်းခနဲ ရိုက်လိုက်သည်။ သို့သော် မှော်ရတနာ ကို ဆွဲထုတ်မည့်အစား အလွန် ထူထဲလှသော... ပူဖောင်း အခင်းအကျင်းကြီးကို ဆွဲထုတ်လိုက်သည်။

“အရိပ် ကိုယ်ပွား မန္တန်... ပူဖောင်း အခင်းအကျင်းကွ”

ကစားသမား ဒါဇင်ပေါင်းများစွာက ပြီးပြည့်စုံသော ညီညွတ်မှုဖြင့် လှုပ်ရှားလိုက်ကြ၏။ သူတို့၏ ပထမဆုံး တုံ့ပြန်မှုမှာ မိမိကိုယ်ကိုယ် ကာကွယ်ရန် မဟုတ်ဘဲ သူတို့၏ အနောက်ဘက်ရှိ သေတ္တာများကို အသေအလဲ ကာကွယ်ရန်ပင် ဖြစ်၏။

“ဒုတ်... ဒုတ်... ဒုတ်... ”

လေးမြှားများက ကစားသမားများ၏ ခန္ဓာကိုယ်များကို ဖောက်ထွင်းဝင်ရောက်သွားပြီး သွေးများ ပန်းထွက်လာတော့သည်။ သို့သော် ကစားသမားများမှာ အနည်းငယ်မျှပင် မတွန့်ဆုတ်သွားကြချေ။ ထိုအစား သူတို့က သေတ္တာပေါ်ရှိ ခြစ်ရာ အသေးစားလေးကို ကြည့်ကာ စိုးရိမ်တကြီး အော်ဟစ်နေကြ၏။

“သေစမ်း... ဖောက်သည် ရဲ့ 'စွမ်းအင် ပြန်လည်ဖြည့်တင်းရေး ဆေးလုံး' ကို မင်းတို့က ဖျက်ဆီးရဲတယ်ပေါ့လေ”

SF အမြန်ချောပို့သမား က သူ၏ လေးမြှားစက်ကို ဆွဲထုတ်လိုက်ပြီး မျက်လုံးများ နီရဲကာ ဟိန်းဟောက်လိုက်သည်။

“ဒီအော်ဒါ အတွက်ဆို ငါ ကြယ်ငါးပွင့် ရီဗျူး ရနိုင်တာကွ... မင်းတို့ အဲဒီရီဗျူးအတွက် ငါ့ကို အကြွေးဆပ်ရမယ်ဟေ့”

“ညီအစ်ကိုတို့... ရက်မှန်ကြေး အတွက်... တိုက်ကြဟေ့”

နောက်တစ်စက္ကန့်တွင် လုပ်ကြံသူ များမှာ ဤ 'ချောပို့သမားများ' လုံးဝ ရူးသွပ်သွားပြီဖြစ်ကြောင်း ထိတ်လန့်တကြား တွေ့ရှိလိုက်ရတော့၏။ အချို့က သူတို့၏ ခြေထောက်များကို ဖက်တွယ်ကာ အသေခံ ဖောက်ခွဲနေကြပြီး အချို့ကမူ သူတို့၏ လက်နက်များကို သွားများဖြင့် ကိုက်ဖြတ်နေကြ၏။ သူတို့က လုံးဝကို သေချင်နေသည့်အလား အသေအလဲ တိုက်ခိုက်နေကြသည် မဟုတ်ပါလား။

“အရူးတွေ... သူတို့အကုန်လုံး ရူးနေကြပြီကွ”

ရွှေတံဆိပ်ဆုရှင် လုပ်ကြံသူ မှာ အူတွေ ထွက်ကျနေတာတောင် သူ၏ ကိုယ်ပေါ်တွင် အသေခံ ဖောက်ခွဲရေး အဆောင် များ အပြည့် ကပ်နေဆဲဖြစ်သော ကစားသမား တစ်ယောက်ကို ကြည့်ကာ လုံးဝကို စိတ်ပျက်သွားတော့၏။

“ဒါ ချောပို့သမား တွေရော ဟုတ်ရဲ့လား... ဒီလောက်တောင် လုပ်ဖို့ လိုလို့လားကွာ”

... ... ...

ကွေ့ယွမ်ဂိုဏ်း ၊ အထွေထွေ အမိန့်ပေး ထိန်းချုပ်ရေး အခန်း။

“ဂိုဏ်းချုပ်... ရတနာ တစ်‌သောင်း ဆိုင်ခွဲ က လှုပ်ရှားလာပြီဗျ”

ထောက်ပံ့ပို့ဆောင်ရေးကို တာဝန်ယူထားသော ကစားသမား 'တုန်းကော' က မြေပုံပေါ်တွင် အဆက်မပြတ် လင်းလက်နေသော အနီရောင် အစက်လေးများကို ကြည့်ကာ လေးနက်သော အမူအရာဖြင့် ဆိုသည်။

“ဒါ့အပြင် ထျန်းလန် မြို့တော် အနီးက 'ကောင်းကင်ဘုံ လျှို့ဝှက်ချက် ကျောက်စိမ်းပြား' ရဲ့ လှိုင်းတွေလည်း အတက်အကျ ဖြစ်နေတယ်... မန္တန် မဟာဆရာကြီး တစ်ယောက်က ငါတို့ရဲ့ အချက်ပြ တာဝါတိုင် ကို လာနှောင့်ယှက်နေပုံရတယ်”

“အင်တာနက် ကို ဖြတ်ချင်တာလား... ကွန်ရက် ကို ဖြတ်ချင်တာလား”

ကျန်းချန်က မျက်နှာပြင်ကို ကြည့်ရင်း သူ၏ နှုတ်ခမ်းထက်တွင် အေးစက်သော အပြုံးတစ်ခု ကွေးတက်လာ၏။

“ရတနာ တစ်‌သောင်း ဆိုင်ခွဲ က အတော်လေး စိတ်အားထက်သန်နေပုံပဲ... သူတို့က အကြမ်းနည်းနဲ့ လာချင်နေမှတော့... ငါတို့ကလည်း အကြမ်းနည်းနဲ့ပဲ တုံ့ပြန်ပေးရမှာပေါ့”

သူ မတ်တတ်ရပ်လိုက်ပြီး အလယ်ပိုင်းကုန်းမြေ ၏ ဧရာမ မြေပုံကြီးဆီသို့ လျှောက်သွားကာ လက်ကို ဝှေ့ယမ်းလိုက်သည်။

“အမိန့်ပေးလိုက်... '၁၁ လပိုင်း ၁၁ ရက်' စစ်ဆင်ရေး စီမံကိန်း ကို စတင်လိုက်စမ်း”

“သူတို့က ငါတို့ကို တားချင်နေမှတော့... သူတို့ ဘယ်လိုမှ တားလို့မရနိုင်မယ့် ပြည်သူ့စစ်ပွဲ ကြီး တစ်ခုကို ဖန်တီးပေးလိုက်ရတာပေါ့ကွာ”

'ဒင်-ဒေါင်... ။'

ဆာဗာ တစ်ခုလုံးဆိုင်ရာ ကြေညာချက်က ကစားသမားတိုင်း၏ စိတ်ထဲတွင် တစ်ဖန် ပဲ့တင်ထပ်သွားပြန်၏။

“ကမ္ဘာလုံးဆိုင်ရာ အခမ်းအနားကြီး စတင်ပါပြီ - လူပျိုကြီးများနေ့ ကို ကာကွယ်ကြ။

နောက်ခံအကြောင်းအရာ - အကျင့်ပျက် အရင်းရှင် အင်အားစု ဖြစ်တဲ့ ရတနာ တစ်‌သောင်း ဆိုင်ခွဲ ဟာ ငါတို့ရဲ့ ဈေးဝယ်ထွက်တဲ့ ပွဲတော်ကြီးကို တားဆီးဖို့ ကြိုးစားနေပါတယ်... ဒါဟာ 'စတုတ္ထမြောက် ကပ်ဘေးကြီး' ကို စိန်ခေါ်လိုက်တာပါပဲ”

တာဝန် (၁) - အခြေခံအဆောက်အအုံ ရူးသွပ်သူ။

အလယ်ပိုင်းကုန်းမြေ တစ်ခုလုံးမှာ 'နတ်ကွန်း' တွေအဖြစ် ဟန်ဆောင်ထားတဲ့ အချက်ပြ အခြေစိုက် စခန်း (၅,၀၀၀) ကို တည်ဆောက်ပါ။ စခန်းတစ်ခု ပြီးစီးတိုင်း ဂိုဏ်း မှ ဆုလာဘ် ရရှိပါမည်။

ကူညီမှုအမှတ် (၅၀၀)။

တာဝန် (၂) - တာဝန် ပြီးမြောက်ခြင်း..

ကစားသမားများ အားလုံး 'အစောင့်အရှောက် တာဝန်'ကို လက်ခံနိုင်ပါသည်။ သင့်ကို လာတားဆီးသော အရိပ်မျှော်စင် လုပ်ကြံသူ တစ်ယောက်ကို သတ်တိုင်း ဝိညာဉ်ကျောက်တုံး (၁၀၀) ဆုရရှိမည့်အပြင် ထို လုပ်ကြံသူ ၏ လက်နက်ပစ္စည်းများ အကုန်လုံး ကျလာပါလိမ့်မည်။

အထူး အားဖြည့်မှု- အစောင့်အရှောက် တာဝန် ထမ်းဆောင်နေစဉ်အတွင်း ကစားသမားများ၏ စွမ်းရည်များအားလုံး (၂၀) ရာခိုင်နှုန်း မြင့်တက်လာမည်ဖြစ်ပြီး ရှင်သန်ပြန်ထမြောက်မည့် အချိန်ကိုလည်း ထက်ဝက် လျှော့ချပေးပါမည်။

... ... ...

ကျောက်ခဲတစ်လုံး ပစ်ချလိုက်သဖြင့် လှိုင်းဂယက် ထောင်ပေါင်းများစွာ ဖြစ်ပေါ်သွားသည့်အလား ပင်။

အရင်က တိုက်ပွဲတွေ မရှိလို့ ညည်းညူနေခဲ့ကြသော တိုက်ခိုက်ရေး ကစားသမားများမှာ ဤကြေညာချက်ကို မြင်လိုက်ရသည်နှင့် တစ်ပြိုင်နက် မနာလိုမှုများဖြင့် မျက်လုံးများ ချက်ချင်း စိမ်းသွားကြတော့၏။

“အမေးဇင်း... လုပ်ကြံသူ တွေက ပစ္စည်းတွေ အကုန်လုံး ချပေးမယ် ဟုတ်လား... ဒါက လမ်းလျှောက်နေတဲ့ ရတနာသေတ္တာ ကြီးတွေပဲကွ”

“ဆောက်လုပ်ရေး လုပ်ရင်လည်း အတွေ့အကြုံမှတ် ရတယ်လား... ပန်းရန် အဖွဲ့တွေ... စုကြဟေ့... ရတနာ တစ်‌သောင်း ဆိုင်ခွဲ ရဲ့ အိမ်နောက်ဖေးကို အချက်ပြ တာဝါတိုင် တွေနဲ့ အပြည့် ဖုံးလွှမ်းပစ်လိုက်ကြစမ်း”

ရလဒ်အနေဖြင့် အလယ်ပိုင်းကုန်းမြေ ၏ အနုပညာပုံစံကြီးမှာ လုံးဝ ပြောင်းလဲသွားတော့သည်။

ထျန်းလန် မြို့တော် အပြင်ဘက်ဝယ်၊

ရတနာ တစ်‌သောင်း ဆိုင်ခွဲ မှ ကြီးမားသော ကုန်ကျစရိတ်များ အကုန်အကျခံကာ ငှားရမ်းထားသည့် မန္တန် မဟာဆရာကြီး သည် အနှောင့်အယှက်ပေးသော မန္တန် ကို ချွေးသံတရွှဲရွှဲဖြင့် ဆင်ယင်နေ၏။ ရုတ်တရက် သူ..ကြက်သီးထသွားရသည်။ သူ လှည့်ကြည့်လိုက်ရာ အင်္ကျီဗလာဖြင့် အုတ်ခဲများကို ကိုင်ဆောင်ထားကြပြီး မိစ္ဆာဆန်သော အပြုံးများကို ပြုံးနေကြသည့် လူသန်ကြီး (ကစားသမား) ရာပေါင်းများစွာက သူ့ကို ဝိုင်းရံထားသည်ကို တွေ့လိုက်ရ၏။

“မဟာဆရာကြီး... အလုပ်များနေလား”

“ကျုပ်တို့ရဲ့ ကွန်ရက် ကို ခင်ဗျားက ဖျက်ချင်နေတာဆို”

“ညီအစ်ကိုတို့... သူ့အတွက် 'သင်္ချိုင်း' အခြေစိုက် စခန်းလေး တစ်ခုလောက် တည်ဆောက်ပေးလိုက်ကြ... သူ့ကို အဲဒီအထဲမှာ အူတိုင် အနေနဲ့ မြှုပ်ထားလိုက်ကွာ”

လေမည်း တောင်ကြော တွင်၊

ချောပို့သမား များကို သတ်ဖြတ်နေခဲ့သော အရိပ်မျှော်စင် လုပ်ကြံသူ များမှာ တစ်ခုခု မှားယွင်းနေပြီဖြစ်ကြောင်း ရုတ်တရက် သတိထားမိလိုက်ကြ၏။ လူဒါဇင် အနည်းငယ်မျှသာ ရှိခဲ့သော ချောပို့အဖွဲ့မှာ ရုတ်တရက် ထောင်ချီသော တပ်မတော်ကြီး အဖြစ်သို့ ပြောင်းလဲသွားခဲ့တော့၏။ တောင်စောင်း တစ်ခုလုံးတွင် အနီရောင် နာမည်များ ရှိကြပြီး ထူးဆန်းသော စီးတော်ယာဉ် မျိုးစုံကို စီးနင်းထားသော (အချို့က ဝက်များကို စီးထားပြီး အချို့က တံမြက်စည်း များကို စီးထားကာ အချို့က ဖမ်းဆီးရမိထားသော သံမဏိ သွေး မဟာမိတ်အဖွဲ့ မှ အကြီးအကဲ ကိုပင် စီးထားကြ၏။) ကစားသမားများက အူဟစ်လျက် ပြေးဝင်လာကြသည်။

“မိစ္ဆာကောင် တွေကို လုကြဟေ့... ဟို ရွှေတံဆိပ်ဆုရှင် လုပ်ကြံသူ က ငါ့အကောင်ကွ”

“မလုကြနဲ့လေ... ဟို အဆိပ် ဓားမြှောင် နဲ့ကောင်က ပစ္စည်း ပိုကောင်းတယ်... သူ့ကို ငါ့ကို ပေးပါကွာ”

“လူပျိုကြီးများနေ့ အတွက်ကွ... လျှော့ဈေး ကူပွန် တွေအတွက်ကွ... ချီတက်ကြဟေ့”

ရွှေတံဆိပ်ဆုရှင် လုပ်ကြံသူ သည် ပြေးဝင်လာသော လူအုပ်ကြီးကို ကြည့်ကာ သူ၏ လက်ထဲမှ အဆိပ်သုတ်ထားသော ဓားကို မြေကြီးပေါ်သို့ 'ချွင်' ခနဲ ပြုတ်ကျသွားစေခဲ့သည်။ သူ တစ်သက်လုံး လူသတ်လာခဲ့သော်ငြား အသတ်ခံရဖို့ ဒီလောက်တောင် စိတ်အားထက်သန်နေပြီး သေဖို့ကိုပင် လုယက်နေကြသော ပြိုင်ဘက်မျိုးကို တစ်ခါမှ မမြင်ဖူးခဲ့ချေ။

“ဆုတ်ခွာကြ... မြန်မြန် ဆုတ်ခွာကြဟေ့... ”

သို့သော် သူ ခြေနှစ်လှမ်းပင် မရွေ့လိုက်ရမီမှာပင် မရေမတွက်နိုင်သော ဓားအလင်းတန်းများ၏ လွှမ်းခြုံမှုကို ခံလိုက်ရတော့သည်။ သူ မသေဆုံးမီ နောက်ဆုံး ကြားလိုက်ရသည်ကား လျှို့ဝှက်ဆန်းကြယ်လှသော စကားတစ်ခွန်းသာ ဖြစ်၏။

“လက်နက်ပစ္စည်း တွေအတွက် ကျေးဇူးပဲ ညီအစ်ကို... ငါ့ကို ရီဗျူး အကောင်း လေး ပေးဖို့ မမေ့နဲ့ဦးနော်”

... ... ...

သုံးရက် အကြာတွင်၊ လူပျိုကြီးများနေ့ (နိုဝင်ဘာလ ၁၁ ရက်) ည၌။

ရတနာ တစ်‌သောင်း ဆိုင်ခွဲ ၏ တာဝန်ခံ စုန့်ချန် သည် ခြောက်ကပ်နေသော သူ၏ ဆိုင်ထဲတွင် မျှော်လင့်ချက်မဲ့စွာ ထိုင်နေ၏။ သူ၏ 'အင်တာနက် ဖြတ်တောက်ရေး စီမံကိန်း' မှာ လုံးဝကို ကျရှုံးသွားခဲ့တော့၏။ ထိုမျှသာမက ကွေ့ယွမ်ဂိုဏ်း ၏ အချက်ပြ တာဝါတိုင် မှာ ရတနာ တစ်‌သောင်း ဆိုင်ခွဲ ၏ ခေါင်မိုးပေါ်တွင်ပင် စိုက်ထူခံထားရသေး၏။

ထိုအခိုက်အတန့်၌ အလယ်ပိုင်းကုန်းမြေ တစ်ခုလုံး လင်းထိန်နေသည်။

အထက်စီးဆန်သော ဂိုဏ်းချုပ်ကြီး ပင် ဖြစ်စေ၊ ချီစုဆောင်းခြင်း အဆင့် ရှိသော သာမန် အမှီအခိုကင်း ကျင့်ကြံသူ ပင် ဖြစ်စေ... အားလုံးက သူတို့၏ 'ကောင်းကင်ဘုံ လျှို့ဝှက်ချက် ကျောက်စိမ်းပြား' များကို ကိုင်ဆောင်ထားကြပြီး အချိန်မှတ်နေသော ဂဏန်းများကို သွေးကြောများ နီရဲသည်အထိ စိမ်းစိမ်းကြည့်နေကြ၏။

'ဝမ်ရှန်း' ပလက်ဖောင်း ပေါ်တွင် ကျန်းချန် ကိုယ်တိုင် ပျော်ရွှင်ဖွယ် အနီရောင် ဝတ်ရုံကြီးကို ဝတ်ဆင်ကာ သစ်သား တူငယ်လေး တစ်ချောင်းကို ကိုင်ဆောင်လျက် ထွက်ပေါ်လာသည်။

“တာအိုမိတ်ဆွေ တို့ရေ... စိတ်လှုပ်ရှားစရာ အကောင်းဆုံး အချိန်လေး ရောက်လာပါပြီဗျာ”

“အရာအားလုံး (၅၀) ရာခိုင်နှုန်း လျှော့ဈေးပါဗျာ... ဆိုင်ပေါင်းစုံ လျှော့ဈေးတွေလည်း ရှိပါတယ်... ပထမဆုံး အော်ဒါ တစ်သောင်း ကို အခြေခံတည်ဆောက်ခြင်း ဆေးလုံး တစ်လုံးစီ လက်ဆောင် ပေးသွားမှာပါဗျာ”

“၃၊ ၂၊ ၁... လုကြဟေ့”

“ဝုန်း... ”

ထိုအခိုက်အတန့်မှာပင် ဧရာမ ဒေတာ စီးဆင်းမှုကြီးက ကွေ့ယွမ်ဂိုဏ်း ၏ ဆာဗာများကို လုံးဝ ပြိုကျလုမတတ် ဖြစ်သွားစေခဲ့သည်။ မရေမတွက်နိုင်သော ဝိညာဉ်ကျောက်တုံး များသည် ကွေ့ယွမ်ဂိုဏ်း ၏ အကောင့်များထဲသို့ ရေစီးကြောင်းကြီးပမာ ဝင်ရောက်လာတော့သည်။ ညကောင်းကင်ယံတွင်လည်း မရေမတွက်နိုင်သော အလင်းတန်းများ လင်းလက်သွား၏။ ထိုအရာများကား ပါဆယ်ထုပ် များကို အိမ်ပေါက်စေ့ အသံထက်မြန်သော အရှိန်ဖြင့် အတိအကျ ပို့ဆောင်ပေးနေကြသည့် 'ချောပို့ ဓားအင်မော်တယ်' ကစားသမားများပင် ဖြစ်တော့သည်။

ထိုညတွင် ရတနာ တစ်‌သောင်း ဆိုင်ခွဲ ၏ ရာစုနှစ်ပေါင်းများစွာ ကြာမြင့်ခဲ့ပြီဖြစ်သော အမွေအနှစ်ကြီးမှာ ကွေ့ယွမ်ဂိုဏ်း ၏ တစ်ညစာ ပျော်ပွဲရွှင်ပွဲကြီးကြောင့် လုံးဝကို ကျိုးပဲ့ပျက်စီးသွားခဲ့ရတော့၏။

စုန့်ချန် သည် ကျောက်စိမ်းပြား ပေါ်ရှိ ကြောက်မက်ဖွယ်ကောင်းလှသော အရောင်းအဝယ် ဂဏန်းများကို ကြည့်ကာ မျက်နှာ ပြာနှမ်းသွားပြီး သူ၏ ကုလားထိုင်ပေါ်သို့ ခွေကျသွားတော့၏။

“ငါတို့... ရှုံးသွားပြီ...”

“မှော်မန္တန် ကို... မှော်မန္တန် နဲ့ပဲ အနိုင်ယူလို့ ရနိုင်တာပါလားကွာ…”