အခန်း (၂၆၅-၂၆၆)

အခန်း (၂၆၅) - တိုတမ်မိခင်သစ်ပင် အန္တရာယ်နှင့်ရင်ဆိုင်ရခြင်း (၂)

“လှဲနေပါ”

လင်းထျန်းလုံက လှုပ်ရှားမှုကို တားဆီးရန် လက်ဖဝါးဖြင့် ညင်သာစွာ ဖိချလိုက်သည်။ ခေါင်းငုံ့ကာ ဒဏ်ရာကို ဂရုတစိုက် စစ်ဆေးနေချိန်တွင် ငွေပြာဧကရာဇ်မျက်ဝန်းများက အလင်းရောင်ဖျော့ဖျော့ တောက်ပနေသည်။

“တိုက်စားမှုတွေကို အများစု ရှင်းလင်းပြီးပြီ၊ ကျန်တာက အချိန်နဲ့ ကြိုးစားအားထုတ်မှုပဲ လိုတော့တာ၊ ကောင်းကင်သတ်ဖြတ်ခြင်းစစ်သူရဲသွေးက ဒီစွမ်းအင်နဲ့ လိုက်လျောညီထွေဖြစ်နေတယ်၊ ပြန်ကောင်းလာတာနဲ့ အတူ ပုပ်ပွစေတဲ့စွမ်းအင်ကို မင်းရဲ့ ခုခံနိုင်စွမ်းက ပိုပြီးအားကောင်းလာလိမ့်မယ်”

ဤသည်မှာ နှစ်သိမ့်မှုမဟုတ်ဘဲ အမြင်အာရုံအပေါ် အခြေခံသည့် အမှန်တရားဖြစ်သည်။ သို့သော် ယင်းကို ကြားရသောအခါ သွေးမိစ္ဆာသည် မည်သည့် အားပေးစကားထက်မဆို ပိုမိုအားကောင်းနေသည်ဟု ခံစားလိုက်ရသည်။

သူက ပြင်းပြင်းထန်ထန် အသက်ရှူလိုက်ပြီး ဟိန်းဟောက်လိုက်သည်။ “ဟုတ်ကဲ့ပါ ဘုရင်ကြီး၊ ကျွန်တော် ပြန်ကောင်းလာတာနဲ့ အဲဒီအရာတွေရဲ့ အသိုက်အမြုံကို သေချာပေါက် မြေလှန်ပစ်မယ်”

လင်းထျန်းလုံက မည်သို့မျှ မတုံ့ပြန်ဘဲ သူ၏အကြည့်များက အနီးရှိ ပိုင်လင်းထံသို့ ရောက်ရှိသွားသည်။

တိတ်ဆိတ်စွာ ပံ့ပိုးကူညီပေးနေသော ဤဝံပုလွေမ၏ မျက်လုံးများထဲတွင် ပင်ပန်းနွမ်းနယ်မှုများ ရှိနေသော်လည်း တောက်ပနေဆဲဖြစ်သည်။

“မင်းလည်း ပင်ပန်းသွားရပြီ”

ပိုင်လင်းက ခေါင်းယမ်းပြလိုက်ပြီး သူမ၏ အသံက နူးညံ့နေသည်။ “ဘုရင်မင်းမြတ်၊ ဒါက ကျွန်မ လုပ်သင့်လုပ်ထိုက်တာပါ၊ အားလုံး ဘေးကင်းကင်း ပြန်ရောက်လာတာကို ဘာနဲ့မှမလဲနိုင်ပါဘူး”

လင်းထျန်းလုံ ခေါင်းညိတ်လိုက်ပြီး ထပ်မပြောတော့ပေ။

ဒဏ်ရာရသူများကြား ဖြတ်လျှောက်သွားပြီး တစ်ခါတစ်ရံရပ်တန့်ကာ ဒဏ်ရာပြင်းထန်သည့် မျိုးနွယ်ဝင်တစ်ဦး၏ နဖူးကို လက်သည်းဖြင့် ထိတွေ့လိုက်ပြီး ဒဏ်ရာများကို တည်ငြိမ်စေရန် ကူညီပေးသည့် သန့်စင်သော ရေခဲစွမ်းအင်အချို့ကို လွှဲပြောင်းပေးလိုက်၏။

ထို့နောက် အသိအမှတ်ပြုကြောင်း ခေါင်းညိတ်ပြလိုက်သည်။

စကားများများစားစား မပြောခဲ့သော်လည်း သိမ်မွေ့သော လုပ်ရပ်တိုင်းက ဝံပုလွေအုပ်စုဝင်များထံသို့ ခိုင်မာသော ငြိမ်းချမ်းမှုခံစားချက်ကို ဆောင်ကြဉ်းပေးခဲ့သည်။

နောက်ဆုံးတွင် တိုတမ်မိခင်သစ်ပင်အောက်သို့ ရောက်ရှိသွားသောအခါ နေရောင်ခြည်က နံနက်ခင်းမြူခိုးများကို အပြည့်အဝ ဖယ်ရှားပေးလိုက်ပြီဖြစ်သည်။

ကြီးမားလှသော သစ်သားသရဖူက နူးညံ့သော ကြယ်ရောင်များ စီးဆင်းနေပြီး နေရောင်ခြည်နှင့် ရောနှောကာ အရိပ်များကျရောက်နေသည်။

ရှောင်လန်နှင့် ရှောင်ယင်းတို့က လေထဲတွဲလောင်းကျနေသော အမြစ်တစ်ခုပေါ်တွင် ထိုင်ကာ တိုးတိုးလေး စကားပြောနေကြသည်။

လင်းထျန်းလုံ ချဉ်းကပ်လာသည်ကို မြင်သောအခါ ကလေးနှစ်ယောက်က ချက်ချင်းခုန်ဆင်းကာ ပြေးလာကြသည်။

“ဖေဖေ” ရှောင်ယင်းက တုတ်ခိုင်သော ရှေ့ခြေထောက်ကို ဖက်တွယ်လိုက်ပြီး မော့ကြည့်လိုက်၏။ သူမ၏ အရောင်ဖျော့ဖျော့ ခရမ်းရောင်အမွေးအမျှင်များက နေရောင်အောက်တွင် တောက်ပနေသည်။

“အန်တီပိုင်လင်းက အားလုံး မကြာခင်ပြန်ကောင်းလာတော့မယ်လို့ ပြောတယ်၊ အဲ့တာ တကယ်လား”

“အင်း” လင်းထျန်းလုံ ခေါင်းငုံ့ကာ သမီးဖြစ်သူ၏ ဦးခေါင်းလေးကို နှာခေါင်းဖြင့် ညင်သာစွာ ပွတ်သပ်လိုက်သည်။

ရှောင်လန်က အနည်းငယ် ဝေးရာတွင် ရပ်နေပြီး များစွာ ပိုမိုတိတ်ဆိတ်နေပုံရသည်။ အရောင်ဖျော့ဖျော့ ရွှေရောင်နှင့် ငွေရောင် ရောနှောနေသော သူမ၏ ဆံပင်များက သူမကို အလွန် ထူးဆန်းနက်နဲနေစေသည်။

“ဖေဖေ၊ မိခင်သစ်ပင်က နည်းနည်း ကွာခြားနေသလိုပဲနော်” သူမ တစ်စုံတစ်ခုကို စူးရှစွာ ခံစားမိနေသည်။

“ရှောင်ယင်း၊ နင် ခံစားမိလား၊ မိခင်သစ်ပင်ရဲ့ အသက်စွမ်းအင် လှုပ်ရှားမှုတွေထဲမှာ တခြားတစ်ခုခု ရောနှောနေသလိုပဲ၊ အရမ်းအားနည်းပေမဲ့ စိတ်ကို အနှောင့်အယှက်ဖြစ်စေတယ်”

“အင်း၊ အရှေ့ဘက် စစ်မြေပြင်မှာ ငါတို့တွေ့ခဲ့ရတဲ့ အမည်းရောင်အရာတွေရဲ့ ခံစားချက်နဲ့ နည်းနည်းတူတယ်၊ ဒါပေမဲ့ နည်းနည်းကွာခြားတယ်၊ ပိုပြီးရှေးကျတယ်”

လင်းထျန်းလုံ၏ မျက်လုံးများတွင် သဘောတူညီမှု အရိပ်အယောင်တစ်ခု ဖြတ်ပြေးသွားသည်။

ဟင်းလင်းပြင်အပေါ် ရှောင်လန်၏ စွမ်းအင်ဂုဏ်သတ္တိများအပေါ် ခံစားသိမြင်နိုင်စွမ်းနှင့် ရှောင်ယင်း၏ အလိုအလျောက်သိစိတ်တို့သည် ပိုမိုထက်မြက်လာနေသည်။

သူ စကားပြောရန် ပြင်လိုက်စဉ် မျက်နှာထား ရုတ်တရက် မည်းမှောင်သွားတော့သည်။

ရန်သူ ဝင်ရောက်လာခြင်း သတိပေးချက် မဟုတ်ဘဲ ဝိညာဉ်ဆက်သွယ်မှုမှတစ်ဆင့် မိခင်သစ်ပင်မှ လာသော ပြင်းထန်သည့် တုန်ခါမှုနှင့် နာကျင်စွာ တုန်လှုပ်မှုတစ်ခုဖြစ်သည်။

ရုတ်တရက် မော့ကြည့်လိုက်ရာ သူ၏ ငွေပြာဧကရာဇ်မျက်ဝန်းများက ချက်ချင်း အကန့်အသတ်အထိ အလုပ်လုပ်လာသည်။

ရေခဲပြာမျက်ဝန်းများက သာမန်လူများ မမြင်နိုင်သော မြင်ကွင်းတစ်ခုကို ထင်ဟပ်ပြသနေသည်။

တစ်ချိန်က ရှေးဟောင်းသစ်ပင်ဝိညာဉ် အကြွင်းအကျန် ဆုတ်ဖြဲခံခဲ့ရပြီး အမှတ်အသား အနည်းငယ်သာ ကျန်ရစ်ကာ ကြာမြင့်စွာကတည်းက ပျောက်ကင်းသွားခဲ့သော မိခင်သစ်ပင်၏ ပင်စည်ကြီးရှိ ဒဏ်ရာဟောင်းနေရာတွင် ဟင်းလင်းပြင်က ထူးဆန်းစွာ လိမ်ကောက်နေသည်။

မြစိမ်းရောင် အသက်စွမ်းအင်နှင့် မီးခိုးရောင် သေမင်းတမန် စွမ်းအင်တို့က ရစ်ပတ်နေသော အဆိပ်ပြင်းမြွေများကဲ့သို့ ယိုစိမ့်ထွက်လာပြီး လောဘကြီးပြီး ကြီးမြတ်မှုအပြည့်ရှိသည့် ဝေဝါးဝါး ရှေးဟောင်းမျက်နှာတစ်ခုအဖြစ် လျင်မြန်စွာ ပုံပေါ်လာသည်။

“နောက်ဆုံးတော့….. ငါ ဒီအခွင့်အရေးကို စောင့်နေခဲ့ရတာ”

ထိုစွမ်းအင်မျက်နှာက ကြာရှည်စွာ ဖိနှိပ်ထားသည့်အလား ဝမ်းမြောက်မှုများနှင့် ပြည့်နှက်နေသည့် ကြီးကျယ်ခမ်းနားသော အတွေးလှိုင်းတစ်ခုကို ထုတ်လွှတ်လိုက်သည်။

“တက်ကြွမှုနဲ့ အကန့်အသတ်မရှိတဲ့ အလားအလာတွေ ပြည့်နှက်နေတဲ့ ဒီပြီးပြည့်စုံတဲ့ခန္ဓာကိုယ်၊ ဟိုပုရွက်ဆိတ်တွေကိုကုသဖို့ စွမ်းအင်တွေကုန်ခမ်းပြီး အားအနည်းဆုံးဖြစ်နေတဲ့ဒီအချိန်မှာ ငါ့အတွက် လုံးဝပွင့်ဟသွားပြီ”

လင်းထျန်းလုံ၏ မျက်လုံးများမှာ ရေခဲအလင်းရောင်များ လွှမ်းမိုးသွားပြီး သူ၏ သတ်ဖြတ်လိုသော စိတ်ဆန္ဒများက ရုပ်ဝတ္ထုတစ်ခုပမာ ပျံ့နှံ့သွားကာ ပတ်ဝန်းကျင်အပူချိန်ကို ချက်ချင်း ထိုးကျသွားစေသည်။

“မကျွတ်လွတ်သေးတဲ့ တစ္ဆေ”

“ဟမ့်၊ ဒီနေရာကို အပိုင်စီးထားတဲ့ ဝံပုလွေဘုရင်” ရှေးဟောင်းမျက်နှာ၏ အတွေးထဲတွင် နှိမ့်ချဟန်ရသော မထီမဲ့မြင်ပြုမှုများ ပါဝင်နေသည်။

“မင်း ဘာကိုယူထားတယ်ဆိုတာ လုံးဝနားမလည်ဘူးပဲ၊ ဒါက သာမန်သစ်ပင်မဟုတ်ဘူး၊ တစ်ချိန်က ကောင်းကင်နဲ့မြေကြီးရဲ့ ထောင့်တစ်နေရာကို ထောက်ပံ့ပေးခဲ့တဲ့ ‘ကမ္ဘာ့အမြစ်’ ရဲ့ အပိုင်းအစတစ်ခုပဲ၊ ဒါကို လွှဲပေးလိုက်ရင် မင်းနဲ့ မင်းရဲ့ မျိုးနွယ်တွေကို အစေခံလုပ်ခွင့် ပေးမယ်၊ မဟုတ်ရင်တော့….”

“မဟုတ်ရင် ဘာဖြစ်မှာလဲ” လင်းထျန်းလုံ ရှေ့တစ်လှမ်းတိုးလိုက်သည်။

ရေခဲအကျဉ်းထောင်ပလ္လင်၏ ပုံရိပ်က သူ၏အနောက်တွင် တိတ်ဆိတ်စွာ ပုံပေါ်လာပြီး အေးစက်စက် ဘုရင်နယ်ပယ်က မိခင်သစ်ပင်၏ အသက်စွမ်းအင်နယ်ပယ်နှင့် အတင်းအဓမ္မ ချိတ်ဆက်သွားကာ ဝိညာဉ်အကြွင်းအကျန်မှ ထုတ်လွှတ်သော ပုပ်ပွစေသည့် စွမ်းအင်များကို တန်ပြန်လိုက်သည်။

“မဟုတ်ရင် သူ့ရဲ့ မူလအသက်စွမ်းအင် ကို ငါ စုပ်ယူပြီး မင်းရဲ့ အသိုက်ကို သက်ရှိအားလုံးအတွက် တားမြစ်နယ်မြေတစ်ခုအဖြစ် ပြောင်းလဲပစ်မယ်”

ရှေးဟောင်းမျက်နှာက ခြိမ်းခြောက်လိုက်ပြီး တစ်ချိန်တည်းမှာပင် ကြာရှည်စွာ ပုန်းအောင်းနေစဉ်အတွင်း ခိုးယူထားသော စွမ်းအင်များကို လှုံ့ဆော်လိုက်သည်။

မိခင်သစ်ပင်၏ တစ်ဖက်ခြမ်းရှိ သစ်ကိုင်းအချို့က မျက်စိဖြင့်မြင်နိုင်သော အမြန်နှုန်းဖြင့် ညှိုးနွမ်းသွားကာ တောက်ပမှုများ ပျောက်ဆုံးသွားသည်။

ကြီးမားလှသော အသက်စွမ်းအင်များကို အတင်းအဓမ္မ ထုတ်ယူကာ ဖိသိပ်လိုက်ပြီး အစွန်းရောက် ဖိသိပ်ထားကာ ဖျက်ဆီးခြင်းရောင်ဝါကို ထုတ်လွှတ်နေသည့် မြစိမ်းရောင် အလင်းတန်းတစ်ခုအဖြစ် ပြောင်းလဲသွားသည်။

လေးမှထွက်လာသော မြားတစ်စင်းကဲ့သို့ လင်းထျန်းလုံဆီသို့ တိုက်ရိုက် ပစ်လွှတ်လိုက်သည်။

ဤတိုက်ခိုက်မှုတွင် တိုက်စားမှု မပါဝင်သော်လည်း အသန့်စင်ဆုံး အသက်စွမ်းအင်၏ ဆန့်ကျင်ဘက်၊ ‘ညှိုးနွမ်းခြင်း’ ဥပဒေသ ပါဝင်သည်။

“အားလုံး၊ အမြင့်ဆုံး တိုက်ပွဲဝင်အသင့်အနေအထားပြင်ကြ”

လင်းထျန်းလုံ၏ ဟိန်းဟောက်သံက မိုးခြိမ်းသံတစ်ခုကဲ့သို့ ဝံပုလွေအုပ်စုဝင်အားလုံး၏ စိတ်ထဲတွင် ပေါက်ကွဲထွက်လာပြီး ဝံပုလွေအသိုက်၏ နံနက်ခင်း ငြိမ်းချမ်းမှုကို ချိုးဖျက်လိုက်သည်။

နောက်ထပ် ညွှန်ကြားချက်များ မလိုအပ်တော့ပေ။

ရန့်မြဲ့၏ တောင်ကဲ့သို့မာကျောသော ပုံရိပ်က လင်းထျန်းလုံ၏ ဘေးတွင် ချက်ချင်းပေါ်လာသည်။

သူ၏ လက်သည်းများက မြေကြီးပေါ်သို့ ပြင်းထန်စွာ ဖိချလိုက်ပြီး ထာဝရရေခဲကာကွယ်မှု နယ်ပယ်ကို အပြည့်အဝ ချဲ့ထွင်လိုက်သည်။

မိုးပြာရောင် ရေခဲသလင်းကျောက်အတားအဆီးအလွှာများ မြင့်တက်လာခဲ့၏။

ထိုအကာအကွယ်က မျက်နှာချင်းဆိုင်တားဆီးရန် မဟုတ်ဘဲ လမ်းလွှဲရန်နှင့် ရန်သူကိုအားနည်းစေရန်ဖြစ်သည်။

တစ်ချိန်တည်းမှာပင် ထျန်းပင်းက မိုးခြိမ်းသံကဲ့သို့ တိုးညင်းစွာ ဟိန်းဟောက်လိုက်သည်။ သူ၏ မိုးကြိုးတိုက်ပွဲဝင်ခန္ဓာမှ ရွှေရောင်အလင်းတန်းနှင့် မိုးကြိုးအကျဉ်းထောင်နယ်ပယ်မှ ခရမ်းပြာရောင် လျှပ်စစ်မြွေများ တောက်ပသွားသည်။

ပြင်းထန်သော မိုးကြိုးစွမ်းအားက အလင်းတန်းစွမ်းအင်ကို အဆက်မပြတ် တိုက်ခိုက်ပြီး စားသုံးနေစဉ် သန့်စင်သော လျှပ်စီးများဖြင့် ဖွဲ့စည်းထားသည့် ကြီးမားသောပိုက်ကွန်ကြီးတစ်ခုက မြစိမ်းရောင်အလင်းတန်း၏ လမ်းကြောင်းကို ကြားဖြတ်ဟန့်တားလိုက်သည်။

ယင်းဖုန်း၏ပုံရိပ်က တစ္ဆေတစ်ကောင်ကဲ့သို့ မြစိမ်းရောင်အလင်းတန်းဘေးရှိ အရိပ်များထဲမှ ထွက်ပေါ်လာသည်။

အရိပ်တိုက်စားခြင်း စွမ်းအားက မရေမတွက်နိုင်သော အမည်းရောင် ရေဘဝဲလက်တံများကဲ့သို့ အလင်းတန်းကို ရစ်ပတ်ကာ ၎င်း၏ဖွဲ့စည်းပုံကို တိတ်ဆိတ်စွာ တိုက်စားပြီး ပြိုကွဲစေလိုက်သည်။

မဟာစစ်သူကြီးသုံးဦး၏ တုံ့ပြန်မှုက ပြီးပြည့်စုံသော အချိတ်အဆက်များဖြင့် မျက်တောင်တစ်ခတ်အတွင်း ပြီးမြောက်သွားသည်။

“အသေးအဖွဲ လှည့်ကွက်တွေနဲ့ ငါ့နေရာကို ငါပြန်ယူတာကို တားရဲတယ်ပေါ့”

ရှေးဟောင်းမျက်နှာက နှာမှုတ်လိုက်သည်။ အသက်စွမ်းအင်များ အတင်းအဓမ္မ ထုတ်ယူခံရသည်နှင့်အမျှ မိခင်သစ်ပင်၏ သစ်ကိုင်းများ ပိုမိုတုန်ရီလာသည်။

မြစိမ်းရောင်အလင်းတန်း၏ အလင်းရောင်က ပိုမိုတောက်ပလာပြီး အဆင့်သုံးဆင့်ရှိသော ပိတ်ဆို့မှုကို ဖြတ်ကျော်မည့်လက္ခဏာများ ပြသလာသည်။

“မင်း စကားများလွန်းတယ်” လင်းထျန်းလုံ၏ အသံက ဝိညာဉ်ကိုပင် အေးခဲသွားစေနိုင်သည့်နှယ် အရိုးတိုက်ခိုက်လောက်အောင် အေးစက်နေသည်။

အချိန်-ဟင်းလင်းပြင် ရပ်တန့်ခြင်း။

အချိန်-ဟင်းလင်းပြင် ရပ်တန့်ခြင်း စွမ်းအားကို ကျယ်ပြန့်သော နေရာတစ်ခုတွင် မထုတ်လွှတ်ဘဲ ငွေပြာဧကရာဇ်မျက်ဝန်းများဖြင့် ပစ်မှတ်ထားပြီး ရှေးဟောင်းမျက်နှာ၏ အလယ်ဗဟို လက်မအနည်းငယ်အတွင်း တိကျစွာ ဖိသိပ်ထားလိုက်သည်။

စွမ်းအင်များဖြင့် ဖွဲ့စည်းထားသော မျက်နှာပေါ်ရှိ အမူအရာက ချက်ချင်း အေးခဲသွားသည်။

လှောင်ပြောင်မှု၊ လောဘကြီးမှုနှင့် မထီမဲ့မြင်ပြုမှုအားလုံးက မျက်နှာပေါ်တွင် အေးခဲသွားသည်။ စွမ်းအင်ထုတ်ယူခြင်းနှင့် တိုက်ကွက်အားဖြည့်ခြင်း လုပ်ရပ်များလည်း ရုတ်တရက် ရပ်တန့်သွားသည်။

‘အခုပဲ၊ အချိန်ကျပြီ'

ငွေပြာဧကရာဇ်မျက်ဝန်းများက မူလအစကို ရှင်းလင်းစွာ မြင်တွေ့နေရပြီး ဝိညာဉ်အကြွင်းအကျန်နှင့် မိခင်သစ်ပင်ကြားရှိ အာရုံကြောကွန်ရက်တစ်ခုကဲ့သို့ သေးငယ်သော စွမ်းအင်ချိတ်ဆက်မှု အမှတ်များကို ခံစားမိနေသည်။

အခန်း (၂၅၆) - ပုံရိပ်ယောင်မျက်၀န်း မြေခွေးမျိုးနွယ်စုမှ သံတမန်စေလွှတ်ခြင်း (၁)

ဤအခိုက်အတန့်တွင် အဆင့်မြင့် စိတ်ထိန်းချုပ်ခြင်းကို အမြင့်ဆုံးအထိ လှုံ့ဆော်လိုက်ပြီး ဆံပင်ထက်ပါးလွှာသော်လည်း မယုံနိုင်လောက်အောင် ခိုင်မာပြီး ထက်မြက်သည့် မမြင်နိုင်သော ဓားသွား ဘီလီယံပေါင်းများစွာအဖြစ် ပြောင်းလဲလိုက်သည်။

ထို့‌နောက် ချိတ်ပိတ်ထားသော ချိတ်ဆက်မှုအမှတ်များကို တိကျမြန်ဆန်စွာဖြင့် ခုတ်ချလိုက်သည်။

“အား”

ရှေးဟောင်းမျက်နှာက စူးရှသော ဝိညာဉ်အော်ဟစ်သံကို ထုတ်လွှတ်လိုက်၏။ အခြေခံအုတ်မြစ်အထိ တုန်လှုပ်သွားကာ မူလစွမ်းအင်ဆုတ်ဖြဲခံရသည့် နာကျင်မှုဖြစ်သည်။

“မင်း၊ မင်းလို ပုရွက်ဆိတ်က ငါ့ရဲ့ အင်မော်တယ် မူလ၀ိညာဥ်ကို ထိခိုက်အောင်လုပ်ရဲတယ်ပေါ့”

“မင်းကို ထိခိုက်အောင်လုပ်တယ် ဟုတ်လား”

လင်းထျန်းလုံ၏ ဝံပုလွေမျက်လုံးများထဲတွင် မည်သည့် စိတ်ခံစားမှုမျှ မရှိဘဲ ပကတိ တည်ငြိမ်မှုနှင့် ထိန်းချုပ်မှုသာ ရှိသည်၊။

“ငါက ပုပ်ဟောင်နေတဲ့ အသားစဖြစ်တဲ့ မင်းကို မိခင်သစ်ပင်ဆီကနေ လုံးဝဖြတ်ထုတ်ပစ်မှာ”

ခွာချခြင်း လုပ်ငန်းစဉ်သည် ခုန်နေသော နှလုံးသားပေါ်တွင် အတိကျဆုံး ခွဲစိတ်မှုတစ်ခု ပြုလုပ်ရသကဲ့သို့ အလွန်အန္တရာယ်ကြီးမားသည်။

စိတ်ထိန်းချုပ်ခြင်း ဓားသွားများသည် မိခင်သစ်ပင်၏ ကိုယ်ပိုင် အသက်စွမ်းအင်သွေးကြောများကို အနည်းငယ်မျှ မထိခိုက်စေဘဲ ပြင်ပချိတ်ဆက်မှု အားလုံးကို တိကျစွာ ဖြတ်တောက်ရမည်ဖြစ်သည်။

လင်းထျန်းလုံ၏ စိတ်ပိုင်းဆိုင်ရာ အာရုံစိုက်မှုမှာ ဤအခိုက်အတန့်တွင် အလွန်မြင့်မားနေသည်။

ရှေးဟောင်းကန္တာရတိုက်ပွဲခန္ဓာက အကန့်အသတ်မရှိလုနီးပါး ခံနိုင်ရည်ကို ပေးစွမ်းပြီး ထာဝရတိုက်ပွဲဝိညာဉ်က ပြိုင်ဘက်၏ ရူးသွပ်သော စိတ်ပိုင်းဆိုင်ရာ တန်ပြန်တိုက်ခိုက်မှုများအောက်တွင် သူ၏စိတ်ဆန္ဒကို ခိုင်မာလာစေသည်။

မိခင်သစ်ပင်ကလည်း ရှင်သန်ခြင်းနှင့် သေဆုံးခြင်း အခိုက်အတန့်ဖြစ်ကြောင်း နားလည်နေသည့်အလား ကျန်ရှိနေသော ခွန်အားအားလုံးကို စုစည်းကာ လင်းထျန်းလုံ၏ လှုပ်ရှားမှုများနှင့် ပူးပေါင်းဆောင်ရွက်ပြီး ပြင်ပအရာ၏ တည်ရှိမှုကို ပြင်းထန်စွာ ငြင်းပယ်ကာ ခွဲထုတ်နေသည်။

၎င်း၏ ခန္ဓာကိုယ်အတွင်းတွင် ရှင်သန်ခြင်းနှင့် သေဆုံးခြင်း ဥပဒေသများက အပြင်းထန်ဆုံး ထိပ်တိုက်ရင်ဆိုင်နေကြလေသည်။

“ဟင့်အင်း၊ ငါက ရှေးဟောင်းဝိညာဉ်၊ ရှေးခေတ်ကာလ ဘေးအန္တရာယ်ကနေ အသက်ရှင်ကျန်ရစ်သူ၊ ငါ့မှာ ပြန်လည်နိုးထရေး တာ၀န်ရှိတယ်၊ ငါ မဖြစ်နိုင်ဘူး၊ ငါ ဒီလိုအသေမခံနိုင်ဘူး”

ဝိညာဉ်အကြွင်းအကျန်၏ အသိစိတ် လှုပ်ရှားမှုများသည် စိတ်ပျက်အားငယ်မှုများ၊ ရူးသွပ်မှုများဖြင့် ပြည့်နှက်နေသည်။

ခိုးယူထားသော စွမ်းအားအားလုံးကို လှုံ့ဆော်ကာ မိခင်သစ်ပင်၏အလယ်ဗဟိုတွင် မီးခိုးရောင်ရုန်းများကို ပုံဖော်ရန် ကြိုးစားရင်း နောက်ဆုံးတန်ပြန်တိုက်ခိုက်မှုတစ်ခု ပြုလုပ်ရန် ကြိုးစားနေလေသည်။

သို့သော် အချိန်-ဟင်းလင်းပြင် ရပ်တန့်ခြင်း၏ အဆက်မပြတ် သက်ရောက်မှုနှင့် လင်းထျန်းလုံ၏ လုံးဝတိကျသော ဖြတ်ပိုင်းမှုများအောက်တွင် ၎င်း၏ ရုန်းကန်မှုများက လုံးဝ အချည်းအနှီးဖြစ်ကာ အလွန်အားနည်းသွားရလေသည်။

နောက်ဆုံးတွင် ဝိညာဉ်တစ်ခုလုံး ဆုတ်ဖြဲခံရသကဲ့သို့ ပြင်းထန်သော လှုပ်ရှားမှုတစ်ခုနှင့်အတူ အဆက်မပြတ် လိမ်ကောက်နေပြီး ပြင်းထန်သော နာကြည်းမှုကို ထုတ်လွှတ်နေသည့် အစိမ်းရောင် မီးခိုးအစုအဝေးသည် မိခင်သစ်ပင်၏ အရင်းအမြစ်မှ လုံးလုံးလျားလျား ဆွဲထုတ်ခံလိုက်ရသည်။

ထိုအစိမ်းရောင် မီးခိုးအစုအဝေးသည် အဆိပ်ပြင်းသော နှလုံးသားတစ်ခုကဲ့သို့ လေထဲတွင် လွင့်မျောနေပြီး ၎င်းဘာသာ ခုန်လှုပ်နေဆဲဖြစ်သည်။

၎င်းကို ကြိုဆိုနေသည်က ဝံပုလွေအုပ်စု စစ်သူကြီးများ၏ ဖုံးကွယ်ထားခြင်းမရှိသော ပူးပေါင်းဖျက်ဆီးရေး တိုက်ခိုက်မှုဖြစ်သည်။

ရန့်မြဲ့၏ အကြွင်းမဲ့ရေခဲဝိညာဉ်က သုညဒီဂရီ အေးခဲမှုကို ယူဆောင်လာပြီး ထျန်းပင်း၏ မိုးကြိုးအလင်းလက်သီးတွင် ကောင်းကင်ဘေးဒဏ်ကဲ့သို့ သန့်စင်သော စွမ်းအားများ ပါဝင်ကာ ယင်းဖုန်း၏ အရိပ်ကူးပြောင်းခြင်းက အတွင်းပိုင်းမှ အလုံးစုံတိုက်စားမှုကို ပြုလုပ်နေသည်။

နောက်ဆုံးတွင် ဝိညာဉ်အကြွင်းအကျန်သည် ရက်စက်ယုတ်မာသော ကျိန်စာကိုပင် အဆုံးမသတ်နိုင်မီ ၎င်း၏ အသိစိတ်က လုံးဝ ဖျက်ဆီးခံလိုက်ရပြီး ကွဲပြားသော်လည်း အားကောင်းလွန်းသော ဥပဒေသ စွမ်းအားသုံးခု၏ ဖိချေမှုအောက်တွင် ဗလာနတ္တိသို့ ပြန်လည်ရောက်ရှိသွားသည်။

၎င်း၏နေရာတွင် မယုံနိုင်လောက်အောင် သန့်စင်သော၊ နူးညံ့ပြီးကြီးမားလှသည့် ပိုင်ရှင်မဲ့အသက်စွမ်းအင်နှင့် မူလဝိညာဉ်အစုအဝေးတစ်ခုသာ ကျန်ရှိနေခဲ့သည်။

လင်းထျန်းလုံသည် လက်သည်းထိပ်ဖျားဖြင့် ညင်သာစွာ ညွှန်လိုက်ပြီး စိတ်ထိန်းချုပ်ခြင်းကို အသုံးပြုကာ အသိစိတ်အားလုံး ဆုံးရှုံးသွားပြီး အသန့်စင်ဆုံး စွမ်းအင်သာ ကျန်ရှိတော့သော ဤမူလအစုအဝေးကို မိခင်သစ်ပင်၏ ခန္ဓာကိုယ်ထဲသို့ ပြန်လည်တွန်းပို့လိုက်သည်။

ပျိုးပင်လေးကို အာဟာရဖြည့်တင်းပေးသော ချိုမြိန်သည့် စမ်းရေပေါက်လေးအလား နှေးကွေးပြီး ညီညာစွာဖြင့် စိမ့်၀င်သွားတော့ငည်။

ဝုန်း…။

တိုတမ်မိခင်သစ်ပင် တစ်ကိုယ်လုံး တုန်ရီသွားပြီး စိတ်သက်သာရာရမှုနှင့် ဝမ်းမြောက်မှုများ ပြည့်နှက်နေသည့် ရှေးခေတ်မှ လာပုံရသော အသံတစ်ခု ထွက်ပေါ်လာသည်။

ပင်စည်မကြီးပေါ်ရှိ ဒဏ်ရာဟောင်း အမှတ်အသားသည် ချက်ချင်း လုံးဝပျောက်ကွယ်သွားပြီး သစ်ခေါက်က ချောမွေ့ကာ အသက်ဝင်မှုအပြည့်ရှိလာသည်။

စွမ်းအင်သုံးစွဲမှုနှင့် တိုက်စားမှုတို့ကြောင့် အနည်းငယ် မှေးမှိန်သွားခဲ့သော သစ်သားသရဖူက ယခုအခါ မကြုံစဖူး တောက်ပလှသော ကြယ်ရောင်များနှင့်အတူ ပေါက်ကွဲထွက်လာသည်။

အလင်းရောင်က အလွန်တောက်ပလွန်းသဖြင့် ကောင်းကင်မှနေမင်းကိုပင် ခေတ္တမျှ ဖုံးကွယ်သွားလေသည်။

ကြီးမားလှသော အသက်စွမ်းအင် လှုပ်ရှားမှုက ကြာရှည်စွာ စုဆောင်းထားသော မီးတောင်တစ်ခုကဲ့သို့ ပေါက်ကွဲထွက်လာပြီး ဝံပုလွေအသိုက်တစ်ခုလုံး၏ ကောင်းကင်နှင့် မြေကြီး ဝိညာဉ်စွမ်းအင်များကို ဆွဲငင်ကာ မျက်စိဖြင့်မြင်နိုင်သော ကြီးမားသည့် စွမ်းအင်လေဝဲကြီးတစ်ခု ဖြစ်ပေါ်လာသည်။

[စနစ်အသိပေးချက်]။ ။တိုတမ်မိခင်သစ်ပင်က ရှေးဟောင်းသစ်ပင်ဝိညာဉ် အကြွင်းအကျန်ကို ရှင်းလင်းခဲ့ပြီး ၎င်း၏သန့်စင်သော မူလစွမ်းအင်ကို စုပ်ယူခဲ့ပါသည်၊ အဆင့် ၄၀ (ဒုတိယ ဘုရင်အဆင့် အစောပိုင်း) သို့ တိုးလာပါသည်။

[စနစ်အသိပေးချက်]။ ။တိုတမ်မိခင်သစ်ပင်၏ ပင်ကိုစွမ်းရည် အသက်စွမ်းအင်ပဲ့တင်ထပ်ခြင်း အကျိုးသက်ရောက်မှု တိုးမြှင့်လာသည်။ ဝံပုလွေအုပ်စု၏ လက္ခဏာရပ်အားလုံး ၃၀ ရာခိုင်နှုန်း တိုးလာပါသည်။

[စနစ်အသိပေးချက်]။ ။တိုတမ်မိခင်သစ်ပင်က လက္ခဏာရပ်အသစ်တစ်ခုကို နိုးထစေခဲ့ပါသည်၊ ဝိညာဉ်အကာအကွယ် (ခရမ်းရောင် အဆင့်မြင့်) - စိတ်ပိုင်းဆိုင်ရာတိုက်စားမှု၊ ဝိညာဉ်တိုက်စားမှု၊ ဝိညာဉ်ထိန်းချုပ်မှုနှင့် ဝိညာဉ်တိုက်ခိုက်မှုများကို ခုခံနိုင်စွမ်း သိသိသာသာ တိုးမြှင့်လာပါသည်။

အောင်မြင်သွားပြီ။

ဤအရာအားလုံးကို တင်းမာစွာ စောင့်ကြည့်နေခဲ့သော ဝံပုလွေအုပ်စုဝင်များသည် ယခုအခါ တိုးညှင်းပြီး စိတ်လှုပ်ရှားဖွယ်ကောင်းသော ဟိန်းဟောက်သံများနှင့် ညည်းတွားသံများ ထွက်ပေါ်လာကြသည်။

ကြီးမားသော ဝမ်းမြောက်မှုနှင့် ဂုဏ်ယူမှု ခံစားချက်တို့ လေထုထဲတွင် ပြည့်နှက်နေသည်။

ဒဏ်ရာပြင်းထန်သူများပင်လျှင် ခေါင်းမော့ရန် အားပြုကာ ဘဝသစ်တစ်ခု ရရှိသွားပုံရသော မိခင်သစ်ပင်ဆီသို့ မျှော်လင့်ချက်အပြည့်ရှိနေသည့် မျက်လုံးများဖြင့် ကြည့်ရှုနေကြသည်။

လင်းထျန်းလုံ ဖြည်းညင်းစွာ သက်ပြင်းချလိုက်သည်။ အဆက်မပြတ် ပြင်းထန်သော တိကျသည့်စစ်ဆင်ရေးများမှ စိတ်ပိုင်းဆိုင်ရာ ပင်ပန်းနွမ်းနယ်မှုများက ဒီရေလှိုင်းများကဲ့သို့ ရိုက်ခတ်လာသော်လည်း သူ၏ ရေခဲပြာမျက်ဝန်းများက ကြည်လင်ပြီး ကျေနပ်မှု အရိပ်အယောင်များပြသနေသည်။

နောက်ဆုံးတွင် ရှေးယခင်ကတည်းက မြှုပ်နှံထားခဲ့သော ဤလျှို့ဝှက်အန္တရာယ်ကို ယနေ့ လုံးဝ အမြစ်ပြတ် ချေမှုန်းနိုင်ခဲ့ပြီဖြစ်သည်။

လက်ချင်းချိတ်ထားသော သမီးနှစ်ယောက်ကို ကြည့်ရန် ခေါင်းလှည့်လိုက်ရာ သူတို့၏မျက်နှာလေးများတွင် ကြောက်ရွံ့မှုများ ကျန်ရစ်နေသေးသော်လည်း သူ့အတွက်ဂုဏ်ယူနေကြကို တွေ့လိုက်ရ၏။

သူ အနည်းငယ် ခေါင်းညိတ်ပြလိုက်သည်။

မိုင်တစ်ရာအကွာ၊ ဥက္ကာပျံတောင်တန်း၏ အစွန်းတွင်၊ ပုံရိပ်ယောင်မျက်ဝန်း မြေခွေးမျိုးနွယ်စု ပိုင်နက်၏ လျှို့ဝှက်နယ်မြေအတွင်း နက်နက်ရှိုင်းရှိုင်းတွင်။

ယွဲ့ရီက ထိုရှေးဟောင်းရေကြေးမုံမှန်အရှေ့တွင် တိတ်ဆိတ်စွာ ထိုင်နေသည်။

သူမပတ်လည်တွင် စီးဆင်းနေသော ငွေရောင်အလင်းတန်းက ဖြည်းညင်းစွာ ဆုတ်ခွာသွားပြီး အမြီးရှည်ကိုးချောင်း၏ လှုပ်ရှားမှုများက တဖြည်းဖြည်း နှေးကွေးသွားသည်။

သူမ၏ ခရမ်းရောင်မြေခွေးမျက်ဝန်းများက ဖြည်းညင်းစွာ ပွင့်လာပြီး ထိုထူးခြားလွန်းသော လေ့လာစောင့်ကြည့်မှု အခြေအနေမှ ဖြတ်တောက်လိုက်သည်။

ကြယ်ရောင်များ ကောင်းကင်သို့ ထိုးတက်နေပြီး ပင်လယ်ကဲ့သို့ ကျယ်ပြောလှသော အသက်စွမ်းအင်ရောင်ဝါရှိသည့် မိခင်သစ်ပင်၏မြင်ကွင်းက တဖြည်းဖြည်း မှေးမှိန်သွားခဲ့လေသည်။

“အဟွတ်...” အရှေ့ဘက်စစ်မြေပြင်မှ ဒဏ်ရာဟောင်းက ပိုဆိုးလာပြီး ချောင်းဆိုးလိုက်ရသည်။

သူမ၏ လှပသော နှုတ်ခမ်းထောင့်မှ ငွေရောင်သွေးအချို့ ယိုစိမ့်ထွက်လာသော်လည်း အရေးမပါသော ဆီးနှင်းများကဲ့သို့ နည်းနည်းလေးပင် ဂရုစိုက်မနေဘဲ လျှာဖျားကို ဆန့်ထုတ်ကာ လျှာဖြင့်လျက်လိုက်သည်။

သို့သော် ပုံမှန်အားဖြင့် ပျင်းရိမှုနှင့် တွက်ချက်မှုများ ပြည့်နှက်နေသော သူမ၏ မြေခွေးမျက်ဝန်းများက ယခုအခါ အံ့ဩဖွယ်ကောင်းလောက်အောင် တောက်ပနေပြီး ဖြေရှင်းရန်ခက်ခဲသော စိတ်ခံစားမှုလှိုင်းလုံးများ လှုပ်ခတ်နေသည်။

လုပ်ငန်းစဉ်တစ်ခုလုံးကို သူမ စောင့်ကြည့်နေခဲ့သည်။

ထို ရှေးဟောင်းဝိညာဉ်အကြွင်းအကျန်၏ ရုတ်တရက် တိုက်ခိုက်မှုမှသည်၊ ဝံပုလွေအုပ်စု၏ အံ့မခန်းစရာ ချက်ချင်းတုံ့ပြန်မှုနှင့် ပြီးပြည့်စုံသော ပူးပေါင်းဆောင်ရွက်မှု၊ ထို ဝံပုလွေဘုရင်၏... ကြောက်မက်ဖွယ်ကောင်းလောက်အောင် တိကျသော အချိန်ထိန်းချုပ်မှု၊

မိခင်သစ်ပင်၏ မူလဝိညာဥ်တွင် ခွဲစိတ်မှုတစ်ခု ပြုလုပ်ခဲ့သည့် အနုပညာဆန်သော စိတ်ထိန်းချုပ်မှု၊ နောက်ဆုံးတွင် သံသယဖြစ်စရာမလိုသော အကြွင်းမဲ့ဖိနှိပ်မှုနှင့် ပြီးပြည့်စုံသော စုပ်ယူမှုအထိ….။

လုပ်ငန်းစဉ်တစ်ခုလုံးသည် အကြွင်းမဲ့ခွန်အားနှင့် အကြွင်းမဲ့ထိန်းချုပ်မှုကို ပြသနေသည့် ဂရုတစိုက်စီစဉ်ထားသော ဖျော်ဖြေမှုတစ်ခုနှင့် တူနေသည်။

ဝံပုလွေဘုရင်သည် သင့်လျော်သော ခွန်အား၊ ပို၍ပင်ကောင်းမွန်သော ကံကြမ္မာနှင့် သူ၏ကွပ်ကဲမှုအောက်တွင် ထူးဆန်းသော ဝံပုလွေအုပ်စုရှိသည့် ကံကောင်းသောသူတစ်ဦးမျှသာဖြစ်သည်ဟု သူမ မူလက ထင်မြင်ခဲ့သည်။

အများဆုံးမှ သူသည် အသုံးချရန်နှင့် သတိထားပူးပေါင်းဆောင်ရွက်ရန် ထိုက်တန်သော အလားအလာရှိသည့် မဟာမိတ်တစ်ဦးသာ။

သို့သော် ယခုအခါ သူမ လုံးဝမှားယွင်းသွားကြောင်း တွေ့ရှိလိုက်ရသည်။

ထိုခွန်အား၊ ထိုစိတ်နေသဘောထား၊ ထိုထိန်းချုပ်မှု… အရာအားလုံးက ဘယ်လိုမှ သာမန်မဟုတ်ပေ။

“တကယ်ကို... ရင်သပ်ရှုမောဖွယ်ပဲ” သူမ တိုးတိုးလေး ရေရွတ်လိုက်သည်။

သူမ၏ အသံထဲတွင် ဆွဲဆောင်မှုနှင့် လှည့်ဖြားမှုများ မပါဝင်တော့ဘဲ သန့်စင်သော လေးစားမှုတစ်ခုနှင့်… သူမကိုယ်တိုင်ပင် သတိမထားမိသေးသော ဖော်ပြ၍မရသည့် လှုပ်ရှားမှုတစ်ခု ပါဝင်နေသည်။

သူမ၏ ရှည်လျားလှသော ဘဝတစ်လျှောက်လုံး မြင်တွေ့ခဲ့ဖူးသည့် ပါရမီရှင်များနှင့် ဘုရင်များဆိုသူများကို သူမ ပြန်လည်အမှတ်ရနေမိသည်။

ဤလူနှင့် နှိုင်းယှဉ်ပါက သူတို့သည် အမှန်တကယ်ပင် အနည်းငယ် မှေးမှိန်သွားပုံရသည်။

“ဝံပုလွေဘုရင်…” ထိုစကားလုံးနှစ်လုံးကို ညင်သာစွာ ရေရွတ်လိုက်ပြီးနောက် သူမ၏ ခရမ်းရောင်မျက်ဝန်းများရှိ အလင်းရောင်များက တဖျတ်ဖျတ်လက်သွားသည်။