ရာထူးတိုးမြှင့်ခြင်း အခမ်းအနား (၉)

"ကျေးဇူးပြုပြီး မသေပါစေနဲ့"

ယန်ချင်းသည် သူ၏လက်သီးချက်၌ အင်အားအကုန် ထည့်သွင်းထားရင်း ဆုတောင်းနေမိလေသည်။

ပတ်ဝန်းကျင်ရှိ နယ်ပယ်အဆင့်ကျွမ်းကျင်သူများသည် ယန်ချင်း လှုပ်ရှားတော့မည်ကို သိရှိလိုက်သည်နှင့် တစ်ပြိုင်နက် ထိုနေရာတစ်ခုလုံးကို ချိတ်ပိတ်ထားလိုက်ကြပြီ ဖြစ်သည်။

ငှက်တောင်ဓားဂိုဏ်း၏ ထိတ်လန့်နေသော ဂိုဏ်းချုပ်ကို ဝါးမျိုသွားပြီး ၎င်းနှင့်အတူ အဖြူရောင်လျှပ်စီးတန်းများ၏ မြည်သံများလည်း ထွက်ပေါ်လာသည်။

ယန်ချင်းသည် သူ၏ လက်သီးချက်မှာ ပုံမှန်ထက် ပိုမိုသိမ်မွေ့နက်နဲလာသည်ကို ခံစားမိနေသည်။ ၎င်းမှာ သူ့အား နယ်ပယ်အဆင့် ကျွမ်းကျင်သူတစ်ဦး၏ အာရုံခံစားမှုကို ပေးစွမ်းနိုင်သော ကံကြမ္မာဖုံးကွယ်၏ အကျိုးသက်ရောက်မှုကြောင့်ပင် ဖြစ်၏။

ဤသို့ သိရှိလိုက်ရပြီးနောက် ယန်ချင်းသည် အခွင့်အရေး ရခိုက်တွင် မိမိ၏ အခြားသော နည်းစနစ်များကိုပါ စမ်းသပ်ကြည့်ရန်နှင့် ထိုနည်းစနစ်များအပေါ် နားလည်မှုကို ပိုမိုနက်ရှိုင်းစေရန် စိတ်အားထက်သန်နေသည်။

ထိုအခွင့်အရေးကို ပေးနိုင်သည့် တစ်ဦးတည်းသောသူမှာ ယခုအချိန်တွင် သူ၏ ချုပ်ငြိမ်းခြင်းလက်သီးအတွင်း၌ ဝါးမျိုခံထားရပြီ ဖြစ်သည်။

အဆုံးအဖြတ်ပေးမည့် အချိန်သို့ ရောက်ရှိလာပြီ ဖြစ်သည်။ ယန်ချင်းအတွက် နောင်နှစ်ပေါင်းများစွာ ကြွားလုံးထုတ်စရာ ဖြစ်လာမည့် အခိုက်အတန့်မှာ တစ်ချက်တည်းနှင့်ပင် ပြီးဆုံးသွားမလား၊ သို့မဟုတ် ဂိုဏ်းချုပ်က သူ၏ လျှို့ဝှက်လက်နက်ကို ထုတ်သုံးပြီး ယန်ချင်းနှင့် အကြိတ်အနယ် ယှဉ်ပြိုင်နိုင်မလား ဆိုသည်မှာ စိတ်ဝင်စားဖွယ်ပင်။

နန်းတော်အဆင့် သတ္တမအဆင့်နှင့် ထိုအောက်ရှိ မည်သည့် ကျင့်ကြံသူကိုမဆို ချက်ချင်း အမှုန့်ချေနိုင်သော သူ၏ လက်သီးချက်မှာ သေဆုံးသူတို့၏ နာကျင်စွာ အော်ဟစ်သံများနှင့်အတူ ထွက်ပေါ်လာသော အနီရောင်မီးခိုးငွေ့များ၏ ဟန့်တားခြင်းကို ခံလိုက်ရသည်။

အနီရောင်မီးခိုးငွေ့များသည် ပတ်ဝန်းကျင်ရှိ ကြီးမားလှသော အနက်ရောင်တွင်းနက်ကြီးကို တိုက်စားသွားသဖြင့် ၎င်းတွင် တိုက်စားတတ်သော အာနိသင် ရှိနေပုံရသည်။

ထိုမီးခိုးငွေ့များ ရုန်းကန်နေရသည့် တစ်ခုတည်းသော အရာမှာ အပေါက်အတွင်း၌ လျင်မြန်စွာ ဖြတ်သန်းနေသော အဖြူရောင် လျှပ်စီးတန်းများပင် ဖြစ်သည်။

မီးခိုးငွေ့များက အဖြူရောင်လျှပ်စီးနှင့် ထိတွေ့မိတိုင်း တစ်ခုခု လောင်ကျွမ်းသွားသကဲ့သို့ တရှဲရှဲ အသံများ ထွက်ပေါ်လာလေသည်။

သို့သော်လည်း အနီရောင်မီးခိုးငွေ့များနှင့်အတူ ပါလာသော ငိုကြွေးမြည်တမ်းသံများက အဖြူရောင်လျှပ်စီးတန်းများကို ချုပ်နှောင်ထားသည့် အစွမ်းရှိနေသည်။

ထို့ကြောင့် အနီရောင်မီးခိုးငွေ့များသည် အနက်ရောင်အပေါက်ကြီးကို တိုက်စားရန် အသက်ရှူချောင်သွားပြီးနောက် အဖြူရောင်လျှပ်စီးတန်းများဆီသို့ ဦးတည်သွားပြန်သည်။

မိမိ၏ နည်းစနစ်မှာ ဟန့်တားခြင်း ခံလိုက်ရသော်လည်း ယန်ချင်း၏ မျက်နှာတွင်မူ သတင်းကောင်းတစ်ခုခု ကြားလိုက်ရသကဲ့သို့ ဝင်းပသော အပြုံးတစ်ခု ရှိနေသည်။

"ဂိုဏ်းချုပ်အိုက်ရှန်း ကျေးဇူးတင်ပါတယ်ဗျာ"

ယန်ချင်းက တိုးတိုးလေး ရေရွတ်လိုက်ရင်း သူတို့နှစ်ဦး၏ တိုက်ခိုက်မှုများ ငြိမ်သက်သွားသည်အထိ တည်ငြိမ်စွာ စောင့်ဆိုင်းနေလိုက်သည်။

....

"ဒီကောင်လေးကတော့"

အခြားတစ်နေရာမှ အခြေအနေကို စောင့်ကြည့်နေသော လဲ့ဝေယွမ်က ရေရွတ်လိုက်သည်။

သူ၏အနီးတွင် မုန့်ချောင်၊ ကျူလောင်နှင့် သူ၏ဇနီး၊ ယွီဇနီးမောင်နှံ၊ ချူကျန်း၊ ဆေးတောင်ကြား၏ ခန်းမဒုတိယသခင် ရန်ရှုနှင့် အကျဉ်းထောင်၏ ဒုတိယအကျဉ်းဦးစီးမှူး ရှောက်အန်းတို့ ရှိနေကြသည်။

၎င်းတို့အားလုံးသည် အဖွဲ့အစည်းမှ အခြားဝန်ထမ်းများနှင့်အတူ တစ်နေရာတည်းတွင် ရပ်နေရင်း အခြေအနေကို အကဲခတ်နေကြခြင်း ဖြစ်သည်။

"သူက မဆိုးပါဘူး။ တိုက်ခိုက်ပုံကို ကြည့်ရသလောက်တော့ သူ ဘာမှချန်မထားဘဲ အစွမ်းကုန် လုပ်ဆောင်ခဲ့တာပဲ"

ရှင်သန်ခြင်းနှင့် လိုက်လျောညီထွေဖြစ်မှုဆိုင်ရာ ဌာန၏အကြီးအကဲ ချူကျန်းက ပြောသည်။

"အပေါ်ယံကြည့်ရင် သူက ပေါ့ပေါ့ပါးပါးနဲ့ ပြောင်ချော်ချော် နိုင်တယ်လို့ ထင်ရပေမဲ့ တကယ်တော့ သူက တော်တော်လေး လည်တာရှင့်"

ယွီဟုန်က သူမ၏မျက်လုံးများထဲတွင် အရောင်များ တောက်ပလျက် ရယ်မောရင်း ပြောလိုက်သည်။

"အင်း... သူရွေးချယ်တဲ့ နည်းလမ်းက မှန်ပါတယ်။ ရုတ်တရက်ကြီး ဒီလောက်ပြင်းထန်တဲ့ စွမ်းအားနဲ့ တိုက်ခိုက်လိုက်တာက ပြိုင်ဘက်ကို တုံ့ပြန်မှုဖြစ်အောင် ဖိအားပေးလိုက်သလို ဖြစ်သွားတာပေါ့။ အဲဒီလိုလုပ်မှ သူတို့ရဲ့ ပင်ကိုယ်ပုံစံအစစ်အမှန် ပေါ်လာဖို့ အခွင့်အရေး ပိုများတာ။”

“သွေးလက်တစ္ဆေဂိုဏ်းအဖွဲ့ဝင်တွေက သူတို့ရဲ့ လုံခြုံရေးနဲ့ သူတို့ ဘယ်သူဘယ်ဝါဆိုတာ ဖုံးကွယ်ဖို့အတွက် ကိစ္စရပ်တိုင်းကို ခွဲခြားထားပြီး တစ်ယောက်နဲ့တစ်ယောက်တောင် လျှို့ဝှက်ထားတတ်ကြတာ နာမည်ကြီးပဲ။”

“ဒါကြောင့် သူတို့ရဲ့ ခေါင်းဆောင် ဒါမှမဟုတ် အဆက်အသွယ်လုပ်ပေးသူကလွဲရင် ကျန်တဲ့သူတွေရဲ့ အထောက်အထားက တစ်ယောက်နဲ့တစ်ယောက် လုံးဝမသိအောင် ဖုံးကွယ်ထားကြတာ။”

“အဲဒီတော့ အဖွဲ့ဝင်တစ်ယောက်ကို သုံးပြီး နောက်တစ်ယောက်ကို လိုက်ဖို့ဆိုတာ မဖြစ်နိုင်သလောက်ပဲ။”

“ဒါပေမဲ့ တစ်ယောက်နဲ့တစ်ယောက် မရင်းနှီးကြပေမဲ့ သူတို့ကို ဖော်ထုတ်ပေးနိုင်မယ့် အရာတစ်ခုတော့ ရှိတယ်...”

“အဲဒါက သူတို့ရဲ့ အဓိကကျင့်စဉ်ပဲ"

ကျင့်စဉ်ခွဲခြမ်းစိတ်ဖြာမှုနှင့် သမိုင်းဆိုင်ရာ ဒုတိယကျောင်းအုပ် ယွီလုံက ရှင်းပြလေသည်။

"မင်း ဘယ်နှစ်ယောက် တွေ့လဲ"

မုန့်ချောင်က အပြုံးဖြင့် မေးလိုက်သည်။

"၁၁ ယောက်" ယွီလုံက ဖြေလိုက်သည်။

"၁၀ ယောက်" ရန်ရှုက ဆိုသည်။

"၁၁ ယောက်"

လင်းမေ့မေ့၊ ယွီဟုန်၊ ချူကျန်းတို့က အသီးသီးဖြေလိုက်ကြသည်။

"၁၂ ယောက်"

လဲ့ဝေယွမ်က ဆိုသည်။

"၁၂ ယောက်"

ရှောက်အန်းက ဖြေသည်။

"ကျူလောင်... မင်းကော ဘယ်လိုလဲ"

မုန့်ချောင်က တိတ်ဆိတ်နေသော ကျူလောင်ကို လှမ်းမေးလိုက်သည်။

"လွှတ်ထားလိုက်စမ်းပါ၊ သူ့စိတ်က ဒီမှာရှိနေမှာ မဟုတ်ဘူး"

လင်းမေ့မေ့က ယန်ချင်းရှိရာသို့ မျက်တောင်မခတ် စိုက်ကြည့်နေသော သူမ၏ ခင်ပွန်းကို ကြည့်ကာ ခေါင်းခါရင်း ပြောလိုက်သည်။

"သူက တခြားကျင့်စဉ်သစ်တစ်ခုအတွက် စိတ်ကူးတွေ ထွက်လာတာလည်း ဖြစ်နိုင်တာပဲ"

ယွီလုံက ချီးကျူးသည့်လေသံဖြင့် ဆိုသည်။

"မုန့်ချောင်... မင်းကော ဘယ်နှစ်ယောက် တွေ့သလဲ"

လဲ့ဝေယွမ်က မေးလိုက်သည်။

"မင်းတို့လိုပဲ ငါလည်း ၁၂ ယောက် တွေ့တယ်"

မုန့်ချောင်က ဧည့်သည်များထဲတွင် ရောနှောနေသော အမျိုးသမီးငယ်တစ်ဦးကို စိုက်ကြည့်ရင်း ဖြေလိုက်သည်။

"တကယ်တော့ ၁၃ ယောက် ရှိတာပါ၊ ဒါပေမဲ့ ၁၂ ယောက်လို့ ပြောတာကလည်း မှန်သလောက် ရှိပါတယ်"

မုန့်ချောင် ဝတ်ဆင်ထားသည့် ဝတ်ရုံနှင့် ဆင်တူသော အနက်ရောင်ဝတ်ရုံကို ဝတ်ဆင်ထားသည့် လူငယ်တစ်ဦးက ဝင်ပြောလိုက်သည်။ သူ၏ ရုပ်ရည်မှာ သာမန်မျှသာ ဖြစ်ပြီး လှိုင်းတွန့်ပါသော ဆံပင်တိုတို ရှိသည်။

သို့သော် သူ့အား ထူးခြားစေသည့်အရာမှာ သူ၏ မျက်လုံးများပင် ဖြစ်သည်။ သူ၏ မျက်လုံးသူငယ်အိမ်မှာ ကြယ်ပုံစံ ဖြစ်ပြီး လိမ္မော်နုရောင် ရှိသည်။

မျက်လုံးတစ်ဖက်စီတွင် မျက်ဆံငါးခုစီ ပါရှိ၏။ လေးခုမှာ သူ၏ ကြယ်ပုံစံ သူငယ်အိမ်၏ အရပ်မျက်နှာ လေးခုတွင် ရှိနေပြီး ပဉ္စမမြောက်တစ်ခုမှာမူ အလယ်ဗဟိုတည့်တည့်တွင် ရှိနေသည်။

"မင်းရဲ့ မျက်လုံးတွေကနေ ဘယ်အရာမှ ပုန်းကွယ်လို့ မရဘူးပဲ ဟို့ထယ်ဟွေ့"

မုန့်ချောင်က ဆိုသည်။

အကယ်၍ ယန်ချင်းသာ ဤနေရာတွင် ရှိနေပါက ထိုအမည်ကို ကြားသည်နှင့် ရွှေဝါးရုံစံအိမ်၏ ခေါင်းဆောင်က သူ၏သားအမှုတွင် ဝင်ရောက်စွက်ဖက်လာပါက သူ့အတွက် ကူညီပေးမည့် အတွင်းနန်းဆောင်မှ နယ်ပယ်အဆင့် တရားသူကြီး ဖြစ်ကြောင်း ချက်ချင်း သိလိမ့်မည်။

"၁၃ ယောက်မြောက်က ဘယ်သူလဲ"

စကားနည်းသော ရှောက်အန်းက ယန်ချင်းနှင့် ငှက်တောင်ဓားဂိုဏ်းချုပ် တိုက်ခိုက်ခဲ့သော နေရာတဝိုက်ရှိ ဧည့်သည်များကို မျက်မှောင်ကြုတ် ကြည့်ရင်း မေးလိုက်သည်။

"ရှောက်အန်း... မင်းကလည်း တစ်ခါတလေကျရင် တော်တော်လေး ပြိုင်ဆိုင်ချင်စိတ် ရှိတာပဲလား။ ထင်တောင်မထားဘူး"

ဟို့ထယ်ဟွေ့က ရယ်မောရင်း ပြောလိုက်သည်။ အခြားသူများကလည်း လိုက်လံရယ်မောကြသဖြင့် ရှောက်အန်းခမျာ ရှက်ကိုးရှက်ကန်းနှင့် ပြုံးလိုက်မိလေတော့သည်။