ရာထူးတိုးမြှင့်ခြင်း အခမ်းအနား (၁၁)

ယန်ချင်းနှင့် ကွေ့ရှီရန်အကြား ပြင်းထန်သော ထိပ်တိုက်တွေ့မှုတစ်ခု ဖြစ်ပွားလေသည်။

ကံကောင်းထောက်မစွာပင် နယ်ပယ်ကျွမ်းကျင်သူများနှင့် သိန်းငှက်အစောင့်တပ် တပ်ခွဲမှ ကျင့်ကြံသူသည် အခြားဧည့်သည်များထံသို့ ပျံ့နှံ့မသွားစေရန် ပူးပေါင်းထိန်းချုပ်ထားကြသည်

ထို့ပြင် ထိုသူနှစ်ဦးအကြား တိုက်ခိုက်မှုဒဏ်များကို ဟန့်တားပေးနိုင်သော အကာအကွယ်အစီအရင်များလည်း ရှိနေပေသည်။

ဧည့်သည်များ၏ ဘေးကင်းလုံခြုံမှုကို အာမခံထားသော်လည်း အားလုံး၏မျက်နှာတွင် ဇဝေဇဝါဖြစ်နေသော အရိပ်အယောင်များ ထင်ဟပ်နေသည်။

အထူးသဖြင့် အဆင့် ၃ နှင့် အောက်အဆင့်ရှိ အဖွဲ့အစည်းများမှ သူများမှာ ပို၍ဆိုးလှသည်။ တိုက်ပွဲက မြန်ဆန်လွန်းလှပြီး ယန်ချင်းနှင့် ကွေ့ရှီရန်တို့အကြား စကားပြောဆိုမှုမှာ သုံးမိနစ်ပင် မပြည့်သေးမီ ပြင်းထန်သော တိုက်ခိုက်မှုများ စတင်ခဲ့ခြင်းဖြစ်သည်။

ထို့ပြင် ဘေးပတ်ဝန်းကျင်ရှိ နယ်ပယ်ကျွမ်းကျင်သူများ၏ နယ်ပယ်စွမ်းအင်များကြောင့် ၎င်းတို့၏ ပြောစကားများကိုလည်း သဲသဲကွဲကွဲ မကြားရပေ။

ထိုဧည့်သည်များသည် မည်သည့်အကြောင်းပြချက်မျှမရှိဘဲ နောက်ထပ်ပစ်မှတ်ထားခံရမည်ကို စိုးရိမ်နေကြသည်။

အထူးသဖြင့် အင်အားကြီးအဖွဲ့အစည်းများ၏ အနိုင်ကျင့်မှုကို မကြာခဏ ခံရလေ့ရှိသော အဆင့်နိမ့်အဖွဲ့အစည်းများမှ သူများမှာ ပို၍ထိတ်လန့်နေကြသည်။

တစ်ခုတည်းသော တည်ငြိမ်နေသူများမှာ အဆင့် ၃ နှင့် အထက်ရှိသော ဝါရင့်အဖွဲ့အစည်းများမှ ဧည့်သည်များသာဖြစ်သည်။

ရုတ်တရက်တိုက်ခိုက်မှုအပေါ် ​ေကွ့ရှီရန်၏ တုံ့ပြန်ပုံကို ကြည့်ရုံဖြင့် ၎င်းတို့အနေဖြင့် အချက်အလက်အချို့ကို ခန့်မှန်းနိုင်ကြသည်။

ထို့ပြင် နှစ်ဖက်တိုက်ခိုက်မှုကို ကြည့်ရှုခြင်းဖြင့် အဖွဲ့အစည်း၏ တရားသူကြီးအသစ် မည်မျှအစွမ်းထက်သည်ကို အကဲခတ်နိုင်မည်ဖြစ်ရာ ၎င်းတို့အတွက် စိတ်ဝင်စားစရာ ဖြစ်နေပေသည်။

....

ဘုန်း... ဘုန်း... ဘုန်း...

နှစ်ဦးသားအကြား တိုက်ခိုက်မှုအရှိန်မှာ တစ်စက္ကန့်ထက်တစ်စက္ကန့် ပိုမိုပြင်းထန်လာသည်။

တစ်ဖက်တွင် ကောင်းကင်နှင့် ပတ်ဝန်းကျင်တစ်ခုလုံးကို ဝါးမြိုတော့မည့်အလား ကြီးမားသော ဖြူဖွေးသည့် မီးတောက်ကြီးများ ရှိနေသည်။

ထိုမီးတောက်များအတွင်း သိန်းငှက်၊ သာလိကာ၊ ဇီးကွက်၊ ကျီးနက်နှင့် ကျီးကန်း စသည့် ငှက်မျိုးစုံတို့၏ အရိပ်သဏ္ဌာန်များကို မြင်တွေ့နိုင်ပေသည်။

၎င်းတို့အားလုံးသည် ဖြူဖွေးသော မီးတောက်များအတွင်း အတောင်ပံများကို ခတ်ကာ ကခုန်နေကြသည်။

အခြားတစ်ဖက်တွင်မူ မှောင်မိုက်ပြီး ဟောက်ပက်ဖြစ်နေသော မျက်လုံးများရှိသည့် နွားခေါင်းနှင့် သတ္တဝါကြီးတစ်ကောင် ရှိနေသည်။

၎င်းတွင် ၁၀ မီတာခန့် ရှည်လျားပြီး ကောက်ချိတ်နေသော ဦးချိုနှစ်ခုရှိကာ ထိုဦးချိုများသည် ဟင်းလင်းပြင်ကိုပင် ဖောက်ထွင်းနိုင်လောက်သော စူးရှသည့် အရှိန်အဝါများ ရှိနေသည်။

ထိုသတ္တဝါကြီးမှာ အပေါ်ပိုင်းဗလာကျင်းနေပြီး ရင်ဘတ်တွင် ထူးဆန်းသော သင်္ကေတများ ရေးထိုးထားသည်။

ထိုသင်္ကေတများသည် တစ်ခါတစ်ရံတွင် အော်ဟစ်နေသော လူတစ်ယောက်၏ အရိပ်အယောင်အဖြစ် ပြောင်းလဲသွားတတ်သည်။

၎င်း၏ခန္ဓာကိုယ်မှ အနီရောင် အခိုးအငွေ့များ စဉ်ဆက်မပြတ် ထွက်ပေါ်နေပြီး လေပူများကို မှုတ်ထုတ်လိုက်တိုင်း ထိုအခိုးအငွေ့များက ပို၍ထူထပ်လာသည်။

၎င်း၏ လက်များထဲတွင် သွေးကဲ့သို့ နီရဲသော ဓားနှစ်လက်ကို ကိုင်ဆောင်ထားပြီး ဖြူဖွေးသော မီးတောက်များကို ခုခံတိုက်ခိုက်နေသည်။

၎င်း၏ ပြိုင်ဘက်မှာ တိုက်ခိုက်မှုတိုင်းတွင် လောင်ကျွမ်းစေသည့် မီးတောက်များသာမက မီးတောက်များအပေါ်တွင် ပျံသန်းနေသော ငှက်များလည်း ဖြစ်သည်။ ငှက်အမျိုးအစားတစ်ခုစီတွင် ကိုယ်ပိုင်စွမ်းရည်များ ရှိပုံရသည်။

သာလိကာများသည် နွားခေါင်းနှင့် သတ္တဝါကြီး၏ အနီရောင်အခိုးအငွေ့များမှ ထွက်ပေါ်လာသော နာကျင်စွာ အော်ဟစ်သံများကို ဖုံးလွှမ်းသွားစေသည့် ငြိမ်းချမ်းသော တေးသံများကို သီဆိုနေကြသည်။

သိန်းငှက်မှာမူ အရှေ့တည့်တည့်မှ တိုက်ခိုက်ရန် တာဝန်ယူထားပြီး သတ္တဝါကြီးကို ၎င်း၏ခြေသည်းများဖြင့် ဆွဲဖြဲရန် ကြိုးစားနေသည်။

ဇီးကွက်များမှာမူ အကောင်ရေအများအပြား ကွဲထွက်သွားပြီး သတ္တဝါကြီးကို အလယ်တွင်ထားကာ ဝိုင်းရံထားကြသည်။

၎င်းတို့သည် သတ္တဝါကြီးကို အရပ်မျက်နှာအားလုံးမှ ပိတ်ဆို့ထားသည့် ရေကဲ့သို့ ကြည်လင်သော အကာအရံတစ်ခုကို ဖန်တီးထားသည်။

ကျီးကန်းများသည် ၎င်းတို့၏ ပါးစပ်များမှ စိမ်းဖန့်ဖန့် အစက်များကို သတ္တဝါကြီးထံသို့ ပစ်လွှတ်နေသည်။

ထိုအရည်စက်များ ခန္ဓာကိုယ်ပေါ် ကျရောက်တိုင်း သတ္တဝါကြီးမှာ နာကျင်စွာ အော်ဟစ်ရပြီး ပြင်းထန်သော ပေါက်ကွဲသံများ ထွက်ပေါ်လာသည်။ ၎င်း၏ ခန္ဓာကိုယ်ပေါ်ရှိ သင်္ကေတများသည်လည်း တိုက်ခိုက်မှုခံရတိုင်း မှေးမှိန်သွားသည်။

ကျီးနက် တစ်ကောင်တည်းသာ လှုပ်ရှားမှုမရှိဘဲ ရှိနေသည်။ ၎င်းသည် တစ်နေရာရာတွင် နားနေသည့်အလား ငြိမ်သက်စွာ ထိုင်နေပြီး နွားခေါင်းနှင့် သတ္တဝါကြီးကို အေးစက်သော အကြည့်ဖြင့် စောင့်ကြည့်နေသည်။

၎င်း၏ မျက်လုံးတစ်ဖက်မှာ အမည်းရောင်ဖြစ်ပြီး အခြားတစ်ဖက်မှာမူ အဖြူရောင်ဖြစ်သည်။ ၎င်း၏ အတောင်ပံများမှာလည်း အဖြူနှင့် အမည်း ရောယှက်နေပေသည်။

ယန်ချင်း၏ ပုံရိပ်မှာ အချိန်နှင့်အမျှ မီးတောက်များအတွင်း ပျောက်ကွယ်သွားသည်။

ဤသို့ ဖြစ်ပျက်နေစဉ်အတွင်း အပြာရောင်အပ်အပါးစားလေးတစ်ချောင်း ထိုးစိုက်ခံလိုက်ရပြီးနောက် ဧည့်သည်ခုနစ်ဦးမှာ ရပ်နေသည့်နေရာမှ ပျောက်ကွယ်သွားသည်။

ထိုရုတ်ရုတ်သဲသဲ အခြေအနေအတွင်း ဝါရင့်နယ်ပယ်ကျွမ်းကျင်သူ အနည်းငယ်နှင့် နန်းတော်နယ်ပယ် နောက်ဆုံးအဆင့်တွင် ရှိနေသည့် အမျိုးသမီးငယ်တစ်ဦးမှလွဲ၍ မည်သူမျှ သတိမထားမိကြပေ။

သူမတွင် ခရမ်းရောင်ဆံပင်တိုလေးရှိပြီး လူအများကြားတွင် ထူးထူးခြားခြား ထင်ပေါ်ခြင်းမရှိသော်လည်း လူနည်းသောနေရာတွင်ဆိုလျှင် လူတိုင်းငေးကြည့်ရမည့် အလှမျိုးကို ပိုင်ဆိုင်ထားသည်။

သူမ၏ ရင့်ကျက်သော ရုပ်ရည်ကြောင့်သာမဟုတ်လျှင် သူမ၏ အရပ်အမောင်းကြောင့် ဆယ်ကျော်သက်တစ်ဦးဟု အလွယ်တကူ မှားယွင်းသွားနိုင်သည်။

သူမသည် အနက်ရောင်နှင့် အဝါရောင်ဝတ်စုံကို ဝတ်ဆင်ထားပြီး သူမနှင့် ဆင်တူသော ဝတ်စုံဝတ်ထားသည့် နယ်ပယ်အစောပိုင်းအဆင့် ကျွမ်းကျင်သူတစ်ဦး၏ ဘေးတွင် ရပ်နေသည်။

အခြားဧည့်သည်များကဲ့သို့ပင် သူမသည် ယန်ချင်းနှင့် ကွေ့ရှီရန်တို့၏ တိုက်ပွဲကို အနီးကပ် စောင့်ကြည့်နေသည်။

သို့သော်လည်း တောင်ကြား၏ နေရာအနှံ့အပြားမှ လူသုံးဦး တစ်ပြိုင်နက်တည်း ပျောက်ကွယ်သွားသည်ကို မြင်လိုက်ရသောအခါ သူမ၏မျက်လုံးထဲတွင် ကြောက်ရွံ့တုန်လှုပ်မှုများ ခဏတာ ဖြတ်ပြေးသွားသည်။

"နင်အာ မင်းလည်း သူတို့နဲ့အတူ ဝင်တိုက်ချင်လို့လား"

ထိုစကားကို ကြားလိုက်ရသည့်ခဏတွင် ခရမ်းရောင်ဆံပင်နှင့် အမျိုးသမီးမှာ တောင့်တင်းသွားသည်။ တစ်စက္ကန့်အကြာတွင် သူမ၏ ဝတ်စုံအောက်တွင် ဆုပ်ကိုင်ထားသော လက်သီးများကို ပြန်လည်ဖြေလျှော့လိုက်သည်။

"စီနီယာချန်ကလည်း နောက်နေပြန်ပြီ။ ကျွန်မရဲ့ အားနည်းလှတဲ့ စွမ်းရည်တွေက အဖွဲ့အစည်းက ပါရမီရှင် ဒါမှမဟုတ် သူနဲ့ ရင်ဆိုင်နေရတဲ့ ပြိုင်ဘက်ကို ယှဉ်နိုင်ဖို့ မဖြစ်နိုင်ပါဘူး။ သူတို့နေရာမှာသာ ကျွန်မဆိုရင် တစ်စက္ကန့်တောင် ခံမှာမဟုတ်ဘူး။"

"ပြီးတော့ ကျွန်မက ဆေးလုံးဖော်စပ်သူ တစ်ယောက်လေ။ တိုက်ခိုက်ရေးဆိုတာ ကျွန်မ ကျွမ်းကျင်တဲ့ နယ်ပယ်ထဲမှာ နည်းနည်းတော့ အလှမ်းဝေးတယ်လို့ ပြောရမှာပေါ့။"

ခရမ်းရောင်ဆံပင်နှင့် အမျိုးသမီးက သူမ၏ဘေးတွင်ရှိသော အလားတူဝတ်စုံ ဝတ်ဆင်ထားသည့် လူကြီးကို မိမိကိုယ်ကိုယ် နှိမ့်ချသော အပြုံးဖြင့် ပြန်လည်ဖြေကြားလိုက်သည်။

"မင်းပြောတာကတော့ သိပ်တော့မမှန်သေးဘူး။ ဆေးလုံးဖော်စပ်သူတွေက တိုက်ခိုက်ရေးမှာ ညံ့ဖျင်းရမယ်လို့ မဆိုလိုပါဘူး။ တကယ်တော့ ငါ့အမြင်မှာတော့ အဲဒါရဲ့ ဆန့်ကျင်ဘက်ပဲ။"

ဘေးနားရှိ လူကြီးက ပြန်လည်ပြောဆိုလိုက်သည်။