အခန်း (၅၁၄-၅၁၆)

အခန်း (၅၁၄) - စတုတ္ထအဆင့် တာအိုရုပ်သေးများ၊ တာအိုဆရာ နဂါးနက် အညံ့ခံခြင်း (အပိုင်း - ၁)

မကြာသေးမီက ဖြစ်ပျက်ခဲ့သော အကြောင်းအရာများကို အပြန်အလှန် ဖလှယ် ပြောဆိုပြီးကြသောအခါ၊ စုယွီ နှင့် မာရှီချင်း တို့သည် အခင်းအကျင်း ပညာရပ်များ အကြောင်းကို စတင် ဆွေးနွေးလာကြ၏။ ယခုအခါ စုယွီ သည် ထိပ်တန်း တတိယအဆင့် အခင်းအကျင်း ပညာရှင် တစ်ဦး ဖြစ်နေပြီ ဖြစ်သလို၊ မာရှီချင်း မှာလည်း ထိပ်တန်း တတိယအဆင့် မြေဆရာ တစ်ဦး ဖြစ်နေပြီ ဖြစ်ရာ... သူ၏ အခင်းအကျင်း တာအို နှင့် ပတ်သက်သော ဗဟုသုတ များမှာ စုယွီ ထက် လုံးဝ မလျော့ချေ။

အခင်းအကျင်း များ အကြောင်း ပြောကြရာတွင်၊ အချို့သော နေရာများ၌ သူသည် စုယွီ ထက်ပင် ပိုမို နက်ရှိုင်းစွာ သိရှိ နားလည်ထားပါ၏။ သူတို့ နှစ်ဦးသည် ဆွေးနွေးမှု အတွင်း အလွန်အမင်း နစ်မြောသွားကြပြီး၊ ညမှောင်လာသည့် အချိန်အထိ လုံးဝ မရပ်တန့်ဖြစ်ကြချေ။

မာရှီချင်း သည် စုယွီ နှင့် လော့ချန်ယွီ တို့ကို ကြည့်ကာ မေးလိုက်သည်။

"တာအိုမိတ်ဆွေ စု နဲ့ တာအိုမိတ်ဆွေ လော့... ခင်ဗျား တို့ရော အိမ်ပြန်ဖို့ အစီအစဉ် ဆွဲထားပြီးပြီလား"

စုယွီ သည် ခေတ္တမျှ မျက်မှောင်ကြုံ့ကာ စဉ်းစားလိုက်ပြီးနောက် ဖြေသည်။

"နောက်ထပ် အနှစ် သုံးဆယ်၊ လေးဆယ် လောက် နေရင်တော့ ဖြစ်နိုင်ပါတယ်ဗျာ"

မာရှီချင်း က သူ့အား နားမလည်နိုင်စွာဖြင့် ကြည့်နေသည်ကို မြင်သောအခါ၊ စုယွီ က ဆက်လက် ရှင်းပြလာ၏။

"ကျွန်တော်တို့ မြေကမ္ဘာအင်မော်တယ် နယ်မြေ မှာ ခြေကုပ် မြဲသွားပြီ၊ အတော်လေးလည်း အကျွမ်းတဝင် ရှိသွားပြီ ဆိုပေမဲ့... အရာအားလုံး က လုံခြုံ စိတ်ချရတဲ့ အနေအထား ကို ရောက်ဖို့ အများကြီး လိုသေးတယ်ဗျ"

"ဥပမာ အနေနဲ့ ကျွန်တော်တို့ တံခါးပိတ် ကျင့်ကြံမယ့် နေရာ ကိစ္စကိုပဲ ကြည့်လေ... ဂိုဏ်း က ပေးထားတဲ့ တံခါးပိတ် ကျင့်ကြံရာ နေရာ ရဲ့ အပြင်ဘက်မှာ ဆိုရင်၊ ကျွန်တော်တို့ ကိုယ်ပိုင် လို့ ခေါ်လို့ရမယ့် နေရာလေး တစ်ခုတောင် မရှိသေးဘူး"

"အင်မော်တယ် မြို့တော် ထဲက တတိယအဆင့် ဝိညာဉ် သွေးကြော ပေါ်မှာ ရှိတဲ့ တံခါးပိတ် ဂူစံအိမ် တစ်ခုကို ဝယ်ဖို့ ဆိုတာက ဈေးမပေါဘူးဗျ... ပြီးတော့ အဲဒီ ပတ်ဝန်းကျင် ကလည်း ကျွန်တော်တို့ရဲ့ ကျင့်ကြံခြင်း အတွက် သိပ်ပြီး အထောက်အကူ ဖြစ်မှာ မဟုတ်ဘူး"

"တကယ်လို့များ အခု အိမ်ပြန်သွားပြီး... ခယ်အာ တို့၊ ထျန်းလင်း တို့ နဲ့ တခြား လူတွေကို ဒီမှာ လာကျင့်ကြံဖို့ ခေါ်လာခဲ့မယ် ဆိုရင်တောင်... ဘာအကျိုးကျေးဇူး မှ ရှိမှာ မဟုတ်ဘူးလေ"

"သူတို့ကို တကယ် ခေါ်လာမယ် ဆိုရင်တောင်... အရင်ဆုံး ဘေးကင်းကင်း နဲ့ ကျင့်ကြံလို့ ရမယ့် သင့်တော်တဲ့ နေရာ တစ်ခုကို ရှာထားသင့်တယ်"

ခေတ္တမျှ စဉ်းစား တွေးတော ပြီးနောက်၊ မာရှီချင်း က ပြောလိုက်သည်။

"ထျန်းလင်း ရဲ့ ကျင့်ကြံခြင်း ကိစ္စကို ခင်ဗျား က အပျက်အစီး နေရာ ထဲမှာ စီစဉ်ပေးဖို့ ကျွန်တော် က ဝင်ပူပန်ပေးနေစရာ မလိုပါဘူးလေ... ခင်ဗျား တို့က လောလောဆယ် အိမ်ပြန်ဖို့ အစီအစဉ် မရှိဘူး ဆိုတော့လည်း... ကျွန်တော် အားတဲ့ အချိန်ကျရင် ကျွန်တော့် မိသားစု ဆီကို ခဏ ပြန်သွားလိုက်ဦးမယ်"

"ကျွန်တော့် မာ မိသားစု မှာက လူ သိပ်မများပါဘူး... တကယ်လို့ ဖြစ်နိုင်မယ် ဆိုရင်တော့... ကျွန်တော့် မိသားစု တစ်ခုလုံးကို ကြယ်စင်ခူး မျှော်စင် က အုပ်ချုပ်တဲ့ အင်မော်တယ် မြို့တော် ကို ပြောင်းရွှေ့ပြီး အဲဒီမှာပဲ ကျင့်ကြံခိုင်းချင်တယ်"

ထိုစကားကို ကြားလိုက်ရသောအခါ စုယွီ က ကပျာကယာ ပြန်ပြောလိုက်၏။

"အဲဒါက ဖြစ်တော့ ဖြစ်နိုင်ပါတယ်... ဒါပေမဲ့ မဆုံးဖြတ်ခင် သေချာတော့ စဉ်းစားသင့်တယ်ဗျ။ မိသားစု တစ်ခုလုံး နေလို့ရမယ့် တံခါးပိတ် ဂူစံအိမ် တစ်ခု ဝယ်ဖို့က အရမ်းကြီး မခက်ခဲပေမဲ့... အဲဒီကို ရောက်သွားပြီးရင် မိသားစု က ရေရှည် ဘယ်လို ရပ်တည်မလဲ ဆိုတာကိုတော့ ခင်ဗျား သေချာ ထည့်တွက်ရမယ်"

"အဲဒီလိုမှ မဟုတ်ဘဲ... ခင်ဗျား တစ်ယောက်တည်း ရဲ့ ထောက်ပံ့မှု ကိုပဲ အားကိုးနေရမယ် ဆိုရင်တော့... မိသားစု ကို တာ့ယွဲ့ နန်းတော် မှာပဲ ထားခဲ့တာက ပိုကောင်းလိမ့်မယ်... နေရာပြောင်းလိုက်လို့ မိသားစု တစ်ခုလုံး ပျက်စီးသွားတာမျိုး မဖြစ်အောင်လို့လေ"

"တာအိုမိတ်ဆွေ စု ပြောတာလည်း ယုတ္တိ ရှိပါတယ်"

မာရှီချင်း သည် မျက်မှောင် အနည်းငယ် ကြုံ့သွားပြီး၊ ထပ်မံ၍ အခက်တွေ့သွားပုံ ရသည်။

ဒီကိစ္စ က သူ၏ မိသားစု တစ်ခုလုံး ၏ အနာဂတ် နှင့် သက်ဆိုင်နေသဖြင့်၊ ပြောင်းရွှေ့ရေး ကိစ္စကို သူ အလောတကြီး ဆုံးဖြတ်၍ မရနိုင်ချေ။

ယခုအခါ သူသည် ကြယ်စင်ခူး မျှော်စင် သို့ ဝင်ရောက်ခဲ့ပြီ ဖြစ်ရာ၊ သူ၏ မိသားစုကို ကြယ်စင်ခူး မျှော်စင် မှ ထိန်းချုပ်ထားသော အင်မော်တယ် မြို့တော် သို့မဟုတ် ဈေးတန်း တစ်ခုခုသို့ ပြောင်းရွှေ့ပေးရန်မှာ မခက်ခဲပါပေ။ သို့သော် အဓိက ပြဿနာ အစစ်အမှန် မှာ... ထိုနေရာသို့ ရောက်သွားပြီးပါက မာ မိသားစု သည် မည်သို့ အသက်မွေးဝမ်းကျောင်း ပြုကြမည်နည်း ဆိုသည်ပင်။

သူတို့ မိသားစု သည် အသက်ရှင် ရပ်တည်ရေး အတွက် မြေဆရာ လမ်းစဉ် အမွေအနှစ် တစ်ခုတည်း အပေါ်မှာသာ ဆက်လက် မှီခို နေကြရဦးမည်လား။

ညဉ့်နက်လာပြီ ဖြစ်သည်ကို သတိပြုမိကြသောအခါ၊ သူတို့ သုံးဦးသည် အချင်းချင်း နှုတ်ဆက်ကာ လမ်းခွဲခဲ့ကြ၏။

စုယွီ နှင့် လော့ချန်ယွီ တို့ နှစ်ဦးသည် မြေကမ္ဘာအင်မော်တယ် နယ်မြေ ၏ အခြေစိုက် စခန်းဆီသို့ ဦးတည်လျက်၊ လူစည်ကားလှသော ညဈေးတန်း လမ်းမများ အတိုင်း လျှောက်လှမ်း လာခဲ့ကြ၏။ လော့ချန်ယွီ သည် တာ့ယွဲ့ နယ်မြေ ရှိရာ အရပ်ဆီသို့ လှမ်းကြည့်ရင်း၊ လေသံတိုးတိုးဖြင့် ပြောလိုက်သည်။

"ဂိုဏ်း ကရော ဘယ်လို အခြေအနေ တွေ ရှိနေမလဲ မသိဘူး... ဂျူနီယာ ညီမလေး စုဇီ တို့ရော ဘယ်လို နေကြမလဲ နော်"

တာ့ယွဲ့ နယ်မြေ သို့ ပြန်မည့် အကြောင်း ပြောလိုက်မိသဖြင့်၊ လော့ချန်ယွီ ၏ စိတ်ထဲတွင် ယွင်ကျန်းဂိုဏ်း နှင့် စုဇီ၊ ထျဲ့မန်ကျူ တို့ ကဲ့သို့သော လူများ အတွက် စိုးရိမ် ပူပန်မှုများ ဝင်ရောက်လာခဲ့ခြင်း ဖြစ်သည်။

စုယွီ သည် သူမအား ကြည့်ကာ အသာအယာ ပြုံးလျက် ပြောလိုက်၏။

"အစ်မ က တကယ် စိတ်ပူနေတယ် ဆိုရင်... အချိန် နည်းနည်းလေး ပေးပြီး ပြန်သွားကြည့်လို့ ရတာပဲလေ။ အရှင်သခင်ဆယ်ပါး အင်မော်တယ် မြို့တော် နဲ့ ကြယ်စင်ခူး မျှော်စင် က နေရာရွှေ့ပြောင်းခြင်း အခင်းအကျင်း တွေကို သုံးမယ် ဆိုရင်... အစ်မ အိမ်ပြန်ရောက်ဖို့ တစ်နှစ်တောင် ကြာမှာ မဟုတ်ဘူး"

လော့ချန်ယွီ သည် ခေါင်းကို ညင်သာစွာ ခါယမ်းလိုက်ပြီး ပြောလိုက်၏။

"ပြန်သွားဖို့ မလိုပါဘူး... ငါ့မှာ အဲဒီကို ပြန်သွားပြီး လုပ်စရာ ဘာမှမှ မရှိတာ"

"စောင့်ကြတာပေါ့... နင် လည်း ပြန်ချင်တဲ့ အချိန်ကျမှ... ငါတို့ အတူတူ ပြန်ကြတာပေါ့"

"အဲဒီ အချိန်ကျရင်... ဂျူနီယာ ညီမလေး ရှောင်ဇီ တို့ကို ဒီမှာ လာပြီး ကျင့်ကြံချင်သလား ဆိုတာ သူတို့ဘာသာ ဆုံးဖြတ်ခိုင်းဖို့ ငါတို့ စဉ်းစားပေးလို့ ရတာပဲ"

"ဂိုဏ်း အတွက် ကတော့... ဂိုဏ်း ကို စောင့်ရှောက်ဖို့ လူ တစ်ယောက် နှစ်ယောက် လောက် ချန်ထားခဲ့ရင် လုံလောက်ပါပြီ"

စုယွီ တွင်မူ ထိုကဲ့သို့သော စိုးရိမ် ပူပန်မှုများ မရှိခဲ့ချေ။

သူ၏ အစွမ်းအစ များ လုံလောက်စွာ မရှိသေးသရွေ့... သူ၏ မိသားစုကို ဤနေရာသို့ ခေါ်ဆောင်လာပြီး အခြေချ ကျင့်ကြံခိုင်းမည် မဟုတ်ချေ။ တာ့ယွဲ့ နန်းတော် တွင် အဆင့်မြင့် ကျင့်ကြံခြင်း အရင်းအမြစ် များ ရှားပါးကောင်း ရှားပါးနိုင်သော်ငြားလည်း၊ စု မိသားစု အတွက်မူ အဆင့်နိမ့် ကျင့်ကြံခြင်း အရင်းအမြစ် များမှာ လုံးဝ မပြတ်လပ်နေပေ။

တတိယအဆင့် သို့မဟုတ် စတုတ္ထအဆင့် ဝိညာဉ် သွေးကြော ရှိသော ကျင့်ကြံခြင်း ပတ်ဝန်းကျင် မျိုး ဆိုလျှင် စု မိသားစု အတွက် ကာလတို အတွင်း လုံလောက်မှု ရှိသည်။

တာ့ယွဲ့ နန်းတော် တွင်သာ ဆက်လက် နေထိုင်ပြီး မိသားစု ၏ ပိုင်ဆိုင်မှု များကို တဖြည်းဖြည်း စုဆောင်းသွားခြင်းက... စု မိသားစု ကို ရင်းနှီးကျွမ်းဝင်မှု မရှိသော မြေကမ္ဘာအင်မော်တယ် နယ်မြေ သို့ ရုတ်တရက်ကြီး ပြောင်းရွှေ့ပစ်လိုက်ခြင်းထက် အများကြီး ပိုကောင်း၏။

အင်အား နည်းပါးလှသော စု မိသားစု သာ မြေကမ္ဘာအင်မော်တယ် နယ်မြေ သို့ ပြောင်းရွှေ့လာခဲ့မည် ဆိုပါက... သူတို့သည် အောက်ဆုံး အဆင့် ကျင့်ကြံခြင်း မိသားစု အဖြစ် အမှန်တကယ် ကျရောက်သွားမည် ဖြစ်သည်။

'ဖီးနစ် ရဲ့ အမြီး ဖြစ်ရတာထက်... ကြက် ရဲ့ ခေါင်း ဖြစ်ရတာက အများကြီး ပိုကောင်းတယ်လေ'

သူ့ကို ဒုက္ခပေးချင်သော ရန်သူများက သူ၏ မိသားစုကို ပစ်မှတ်ထား လာနိုင်ပြီး၊ မိသားစု တစ်ခုလုံး အမြစ်ပြတ် သုတ်သင် ခံရမည့် အန္တရာယ်မျိုးကို သူတို့ စိုးရိမ် ပူပန်နေစရာ မလိုတော့ချေ။

အလုံးစုံ ခြုံငုံ၍ ပြောရလျှင်... စု မိသားစု အနေဖြင့် ဤနေရာသို့ ပြောင်းရွှေ့လာခြင်းထက် တာ့ယွဲ့ နန်းတော် တွင်သာ ဆက်လက် နေထိုင်ခြင်းက အဘက်ဘက်မှ ပို၍ အဆင်ပြေ ကောင်းမွန်၏။

မာ မိသားစု နှင့် ယွင်ကျန်းဂိုဏ်း တို့ အတွက်ကတော့...

မာ မိသားစု တွင် လူဦးရေ မများပြားသဖြင့်... ပြောင်းရွှေ့ခြင်းမှာ ပြဿနာ ကြီးကြီးမားမား မရှိနိုင်ချေ။ ထို့ကြောင့် စုယွီ အနေဖြင့် သူတို့ အတွက် အကျိုးအပြစ် များကို ဝင်ရောက် တွက်ချက် ပေးနေစရာ မလိုပေ။

ထို့အပြင် လော့ချန်ယွီ သည်လည်း ယွင်ကျန်းဂိုဏ်း မှ လူအချို့ကို ဤနေရာသို့ ခေါ်ဆောင်လာပြီး ကျင့်ကြံခိုင်းနိုင်သည်။

သို့သော် ဂိုဏ်း တစ်ခုလုံး ပြောင်းရွှေ့လာရန် ဆိုသည်မှာတော့ လုံးဝ မဖြစ်နိုင်သော ကိစ္စ ပင်။

ဒါကလည်း တကယ်တော့ ပြဿနာ ကြီးကြီးမားမား မဟုတ်ပါချေ။

"နောက်ထပ် အနှစ် သုံးဆယ်၊ လေးဆယ် လောက် နေရင်တော့... ငါ့ရဲ့ ကျင့်ကြံခြင်း အဆင့် က ရွှေအမြုတေ အဆင့် (၉) ကို ရောက်သွားလောက်ပြီ... ပြီးတော့ ငါ့ရဲ့ ရွှေအမြုတေ ကလည်း အဆင့် (၈) ဒါမှမဟုတ် (၉) ရွှေအမြုတေ အဖြစ် အဆင့်မြှင့်တင်ပြီးလောက်ပြီ"

"အဲဒီ အချိန်ကျရင်... ငါ မူလဝိညာဉ် အဆင့် ကို တက်လှမ်းဖို့ စဉ်းစားလို့ ရပြီ"

"ဒါမှမဟုတ် ပိုပြီး ဘေးကင်းချင်တယ် ဆိုရင်တော့... ငါ မူလဝိညာဉ် အဆင့် ကို ရောက်ပြီးတဲ့ အချိန်အထိ စောင့်ပြီးမှ... လူတွေကို ဒီကို ခေါ်လာဖို့ စဉ်းစားတာ ပိုကောင်းမယ်"

စုယွီ သည် စိတ်ထဲမှ တိတ်တဆိတ် တွေးတောနေမိသည်။

သူတို့ နှစ်ဦးသည် ညဈေးတန်း အတိုင်း အေးအေးလူလူ လမ်းလျှောက်ရင်း စကားစမြည် ပြောဆို လာခဲ့ကြပြီး၊ နောက်ဆုံးတွင် သူတို့၏ အခန်းများ အသီးသီး သို့ ပြန်လည် ဝင်ရောက်ကာ ကျင့်ကြံခြင်း များကို ဆက်လက် ပြုလုပ်ကြ၏။

အချိန်ကာလ များသည် လျင်မြန်စွာ ကုန်လွန်သွားခဲ့ပြီး၊ သူတို့ မသိလိုက်မီ အချိန်လေး အတွင်းမှာပင် တစ်လကျော်ခန့် ကြာမြင့်သွားတော့၏။

ထိုနေ့တွင်၊

စုယွီ၊ လော့ချန်ယွီ၊ ကျန်းမန်သဲ့၊ ကျန်းမန်ယောင်၊ လီချင်းနျူ နှင့် အခြားသူများသည်... အရှင်သခင်ဆယ်ပါး အင်မော်တယ် မြို့တော် မှ ထွက်ခွာသွားကြသော တာအိုဆရာ ထျန်းယွီ နှင့် သူ၏ အဖွဲ့ကို လိုက်လံ ပို့ဆောင် နှုတ်ဆက်ကြ၏။

တာအိုဆရာ ထျန်းယွီ၊ အရှင်သခင်ကြီး ခြောက်မြီး မြေခွေး၊ အရှင်သခင်ကြီး လမင်း အဆောင်လက်ဖွဲ့ နှင့် အရှင်သခင်ကြီး ကုလန် တို့ ပါဝင်သော မူလဝိညာဉ် အဆင့် အရှင်သခင်ကြီး လေးပါး သည်... သူတို့၏ ဂိုဏ်းမှ ရွှေအမြုတေ အဆင့် ကျင့်ကြံသူ သုံးဆယ်ခန့် ကို ခေါ်ဆောင်ကာ အာရုံလှည့်စားမှု ရွှံ့ညွန်တော အပျက်အစီး နေရာ ဆီသို့ ထွက်ခွာသွားကြ၏။

တစ်ချိန်တည်းမှာပင် အခြားသော အင်မော်တယ် ဂိုဏ်း များ သည်လည်း ယခင်ကထက် ပိုမို ကြီးမားသော အဖွဲ့အစည်း များကို ဖွဲ့စည်းကာ အရှင်သခင်ဆယ်ပါး အင်မော်တယ် မြို့တော် မှ တစ်ဖွဲ့ပြီး တစ်ဖွဲ့ ထွက်ခွာသွားကြ၏။ သူတို့သည် ယာဉ်ပျံ များ၊ မိစ္ဆာသားရဲ များ ကဲ့သို့သော မှော်လက်နက် များကို အသုံးပြုကာ အပျက်အစီး နေရာ ဆီသို့ ဦးတည် ပျံသန်း သွားကြ‌တော့သည်။

အခန်း (၅၁၅) - စတုတ္ထအဆင့် တာအိုရုပ်သေးများ၊ တာအိုဆရာ နဂါးနက် အညံ့ခံခြင်း (အပိုင်း - ၂)

အင်မော်တယ် အင်အားစုကြီးများ၏ ဦးဆောင်မှုအောက်တွင်၊ သတင်းကြား၍ ရောက်ရှိလာကြသော ကျန်ရှိနေသည့် အင်အားစုများ အားလုံးသည်လည်း တစ်ခဲနက် ထွက်ခွာသွားကြ၏။

အရှင်သခင်ဆယ်ပါး အင်မော်တယ် မြို့တော် အတွင်းမှ မရေမတွက်နိုင်သော ယာဉ်ပျံများ နှင့် ယဉ်ပါးသော မိစ္ဆာသားရဲ အုပ်ကြီးသည် အာရုံလှည့်စားမှု ရွှံ့ညွန်တော ပင်လယ် ဆီသို့ လှိုင်းလုံးကြီးများအလား ဦးတည် ထွက်ခွာသွားကြ‌တော့သည်။

ထို ကြီးကျယ် ခမ်းနားလှသော မြင်ကွင်းကြီးမှာ... ယခင်က စုယွီ မြင်တွေ့ခဲ့ဖူးသော လူသား ကျင့်ကြံသူများ မိစ္ဆာသားရဲ လှိုင်းတံပိုးကြီးကို ခုခံ ကာကွယ်ခဲ့စဉ်က မြင်ကွင်းထက်ပင် အဆပေါင်းများစွာ ပိုမို ကြီးကျယ် ခမ်းနားနေပါ၏။

'ဟူး... ကြည့်စမ်းပါဦး။ လူတွေ အုံနဲ့ကျင်းနဲ့ ပါလား။ အရင်တုန်းက မိစ္ဆာသားရဲ လှိုင်းကြီး လာတုန်းကတောင် ဒီလောက် မများပါဘူး... ဒီ ရတနာ အပျက်အစီး နေရာ အတွက်တော့ အားလုံး အသေအလဲကို ရင်းကြတော့မယ့် ပုံပဲ'

အင်အားစု အသီးသီး မျက်စိအောက်မှ ပျောက်ကွယ်သွားသောအခါ၊ စုယွီ၊ လော့ချန်ယွီ နှင့် အခြားသူများသည် သူတို့၏ အခြေစိုက် စခန်းဆီသို့ ပြန်လှည့်လာခဲ့ကြပြီး တိတ်ဆိတ်စွာ စောင့်ဆိုင်းနေကြ၏။

လဝက်မျှပင် မပြည့်မီ အချိန်အတွင်းမှာပင်၊ အရှင်သခင်ဆယ်ပါး အင်မော်တယ် မြို့တော် ဆီသို့ သတင်းများ ပြန်လည် ရောက်ရှိလာခဲ့သည်။

ထိပ်သီး အင်မော်တယ် ဂိုဏ်းကြီး ဆယ်ခု သည် လူသား ကျင့်ကြံသူ များပြားစွာဖြင့် အာရုံလှည့်စားမှု ရွှံ့ညွန်တော ပင်လယ် အတွင်းသို့ ဝင်ရောက်သွားပြီး သိပ်မကြာမီမှာပင်... ဧရာမ မိစ္ဆာသားရဲ လှိုင်းတံပိုးကြီး နှင့် ထိပ်တိုက် တိုးခဲ့ပြီး မိစ္ဆာမျိုးနွယ်စုများ ထံမှ မိစ္ဆာကောင် အများအပြား၏ ခြုံခို တိုက်ခိုက်ခြင်းကို ခံလိုက်ကြရသည်။

အလွန် များပြားလှသော မိစ္ဆာမျိုးနွယ်စု များ၏ ပြင်းထန် ကြမ်းရမ်းလှသော တိုက်ခိုက်မှုများ အောက်တွင်၊ ထိပ်သီး အင်မော်တယ် ဂိုဏ်းကြီး ဆယ်ခု သည် ကြိုတင် ကာကွယ်သည့် အနေဖြင့် တိုက်ရင်းဆုတ်ရင်း ပြုလုပ်ခဲ့ကြပြီး... အာရုံလှည့်စားမှု ရွှံ့ညွန်တော ၏ ကြမ်းတမ်းလှသော ပတ်ဝန်းကျင် အတွင်းမှ ယာယီ ဆုတ်ခွာလာခဲ့ကြ၏။

သူတို့သည် မိစ္ဆာမျိုးနွယ်စု များနှင့် အပြင်ဘက်တွင်သာ အဆုံးအဖြတ် တိုက်ပွဲကြီး ဆင်နွှဲရန် စီစဉ်ထားကြ၏။

သို့သော်ငြားလည်း မိစ္ဆာမျိုးနွယ်စု များမှာလည်း အ တတ်ကြသူများ မဟုတ်ပေ။ အာရုံလှည့်စားမှု ရွှံ့ညွန်တော ပင်လယ် သည် အဆိပ်ငွေ့များဖြင့် ကောင်းကင် တစ်ခုလုံးကို ဖုံးလွှမ်းထားသော အလွန် အန္တရာယ် များပြားပြီး ကြမ်းတမ်းလှသည့် ပတ်ဝန်းကျင် တစ်ခု ဖြစ်သည်။ ထိုနေရာတွင် ဝိညာဉ် စွမ်းအင်များ သိပ်သည်းစွာ ရှိနေသော်ငြားလည်း၊ ထို ဝိညာဉ် စွမ်းအင်များမှာ အဆိပ်ငွေ့များ နှင့် ရောနှောနေသည်။ ထိုအရာများက မိစ္ဆာသားရဲ များ နှင့် မိစ္ဆာမျိုးနွယ်စု များ အတွက်မူ စုပ်ယူ သန့်စင်ရန် မည်သည့် ပြဿနာမျှ မရှိချေ။

ဆန့်ကျင်ဘက် အားဖြင့်၊ လူသား ကျင့်ကြံသူ များမှာမူ ဤကဲ့သို့သော ပတ်ဝန်းကျင်မျိုး နှင့် လုံးဝ အကျွမ်းတဝင် မရှိကြပေ။

မန္တန်စွမ်းအားများ ကုန်ခမ်းသွားပါက၊ သူတို့သည် ဝိညာဉ် ကျောက်တုံးများ၊ ဝိညာဉ် ဆေးလုံးများ နှင့် အခြားသော နည်းလမ်းများကို အသုံးပြု၍သာ ပြန်လည် ဖြည့်တင်းနိုင်ကြ၏။

ထိုကဲ့သို့သော အခြေအနေမျိုး ကြောင့်...

ထိပ်သီး အင်မော်တယ် ဂိုဏ်းကြီး ဆယ်ခု သည် အခြားသော လူသား ကျင့်ကြံသူ အင်အားစု များနှင့်အတူ အာရုံလှည့်စားမှု ရွှံ့ညွန်တော ပင်လယ် အတွင်းသို့ အကြိမ်ကြိမ် အဖန်ဖန် ဝင်ရောက် တိုက်ခိုက်ခဲ့ကြ၏။ ဝင်ရောက် တိုက်ခိုက်သည့် အကြိမ်တိုင်းတွင် မိစ္ဆာသားရဲ များ နှင့် မိစ္ဆာမျိုးနွယ်စုဝင် အများအပြားကို သတ်ဖြတ်နိုင်ခဲ့သော်ငြားလည်း... သူတို့သည် အနက်ပိုင်းသို့ ဆက်လက် ဝင်ရောက်ရန် မဝံ့ရဲခဲ့ကြချေ။

များသောအားဖြင့် မိစ္ဆာမျိုးနွယ်စု များ နောက်ဆုတ်သွားသောအခါ၊ လူသား အင်အားစု များ သည်လည်း အင်အားများ ယာယီ ပြန်လည် ဖြည့်တင်းရန် အတွက် အာရုံလှည့်စားမှု ရွှံ့ညွန်တော အတွင်းမှ ပြန်လည် ဆုတ်ခွာလာခဲ့ကြ၏။

မယုံကြည်နိုင်စရာ ကောင်းလောက်အောင်ပင်၊ အာရုံလှည့်စားမှု ရွှံ့ညွန်တော ၏ အစွန်အဖျားတွင် နှစ်ဖက် အင်အားစုများ အကြား ရှေ့မတိုး နောက်မဆုတ်နိုင်သော အခြေအနေ တစ်ရပ် ဖန်တီး ဖြစ်ပေါ်လာခဲ့သည်။

လီချင်းနျူ ၏ ပါးစပ်မှတစ်ဆင့် ထိုအခြေအနေ များကို ကြားသိလိုက်ရသောအခါ၊ စုယွီ သည် အကြောင်းစုံကို ချက်ချင်း သဘောပေါက် သွားသည်။ လီချင်းနျူ က ဆက်ပြောသည်။

"အင်မော်တယ် ဂိုဏ်း ကလည်း နောက်ထပ် အမိန့် တစ်ခု ထပ်ထုတ်ထားတယ်... အတွင်းတပည့် တွေနဲ့ အပြင်စည်း ခန်းမဆောင် က ကျင့်ကြံသူ တွေကို စစ်ကူ အဖြစ် ထပ်ခေါ်နေတာ။ ငါလည်း သွားပြီး အတွေ့အကြုံ နည်းနည်းပါးပါး ယူချင်သေးတယ်"

ထိုသတင်း ကြားပြီး သိပ်မကြာမီ အချိန်အတွင်းမှာပင်၊

မူလဝိညာဉ် အဆင့် အရှင်သခင်ကြီး နှစ်ပါး နှင့် ရွှေအမြုတေ အဆင့် တပည့် တစ်ရာကျော်ခန့် သည် မြေကမ္ဘာအင်မော်တယ် နယ်မြေ ၏ အခြေစိုက် စခန်းသို့ ရောက်ရှိလာကြ၏။

သူတို့ အာရုံလှည့်စားမှု ရွှံ့ညွန်တော သို့ မထွက်ခွာမီလေးတွင်၊ လီချင်းနျူ၊ လော့ချန်ယွီ၊ ကျန်းမန်သဲ့ နှင့် ကျန်းမန်ယောင် တို့သည်လည်း အဖွဲ့ထဲသို့ ဝင်ရောက် ပူးပေါင်းလိုက်ကြ၏။ သူတို့ သည်လည်း မိစ္ဆာမျိုးနွယ်စု များနှင့် တိုက်ပွဲဝင်လိုကြခြင်း ဖြစ်သည်။

ဒါက တကယ့်ကို ကြီးကျယ် ခမ်းနားသော မြင်ကွင်းကြီး တစ်ခု ဖြစ်သလို၊ ကျင့်ကြံခြင်း အတွက်လည်း အလွန် ရှားပါးလှသော အခွင့်အရေး ကောင်း တစ်ရပ် ပင် ဖြစ်သည်။

ဖြစ်နိုင်သည်မှာ... ဤတိုက်ပွဲများမှ တစ်ဆင့် သူတို့ အတွက် အတော်အသင့် များပြားသော ဂိုဏ်း အကျိုးပြု ရမှတ် များကို ရှာဖွေနိုင်မည် ဖြစ်သည်။

စုယွီ အတွက် ကတော့...

သူသည် တံခါးပိတ် ကျင့်ကြံနေလိုက်‌တော့သည်။

'ဟက်... မိစ္ဆာ တွေက ဒီလောက်တောင် သောင်းကျန်းနေတာ။ ဒီတစ်ခါ အာရုံလှည့်စားမှု ရွှံ့ညွန်တော အပျက်အစီး နေရာ ပွင့်တဲ့ အချိန်ကိုတော့ ငါ မှီတော့မှာ မဟုတ်ဘူး... နောက်တစ်ခါ ပွင့်မယ့် အချိန်ကိုပဲ စောင့်ရတော့မှာပေါ့'

အာရုံလှည့်စားမှု ရွှံ့ညွန်တော အတွင်းသို့ သွားရောက်ကာ မန္တန် စွမ်းအားများဖြင့် အပြိုင်အဆိုင် အသေအလဲ တိုက်ခိုက်နေရမည့် အစား၊ အရှင်သခင်ဆယ်ပါး အင်မော်တယ် မြို့တော် တွင်သာ ကျန်ရစ်ခဲ့ပြီး အေးအေးချမ်းချမ်း ကျင့်ကြံနေခြင်းက အများကြီး ပိုကောင်းသည် မဟုတ်ပါလော။

မည်သည့် ဖိအား မှလည်း မရှိချေ။

'မင်းတို့ ဘာသာ သေမလို ရှင်မလို သွားတိုက်နေကြ... ငါကတော့ လေအေးအေးလေး ရှူပြီး ဒီမှာပဲ လယ်ဗယ် တင်နေလိုက်မယ်'

သူသည် နေ့စဉ် ပုံမှန် ကျင့်ကြံခြင်း များကို ပြုလုပ်ကာ၊ အထက်ဘုံ သန့်စင်သော မူလ တာအို နိယာမ ကို လေ့လာ ဆင်ခြင်ခြင်းဖြင့် သူ၏ ရွှေအမြုတေ ကို ဆက်လက် သန့်စင်နေသည်။

အားလပ်ချိန် များတွင်၊ သူသည် အဆောင်လက်ဖွဲ့ ပုံစံကြမ်း အချို့ နှင့် မျိုးစေ့ ကို ထုတ်ယူကာ အာဟာရ ဖြည့်တင်းပေး၏။

သူ၏ နေ့ရက်များမှာ အလွန်တရာ သက်သောင့်သက်သာ ရှိလှပြီး၊ သူ၏ ကျင့်စဉ် နည်းလမ်း အမျိုးမျိုး ၏ ကျွမ်းကျင်မှု အဆင့်များမှာလည်း အဆက်မပြတ် တိုးတက် မြင့်မားနေသည်။ တကယ့်ကို ဇိမ်ကျလွန်းလှသည်။

အရှင်သခင်ဆယ်ပါး အင်မော်တယ် မြို့တော် သည် အာရုံလှည့်စားမှု ရွှံ့ညွန်တော နှင့် သိပ်မဝေးလှသဖြင့်၊ လူသား ကျင့်ကြံသူ များ နှင့် မိစ္ဆာမျိုးနွယ်စု များ အကြားမှ တိုက်ပွဲ သတင်းများမှာ အလွန် လျင်မြန်စွာပင် မြို့တော်သို့ ပြန်လည် ရောက်ရှိလာတတ်သည်။

တစ်ခါတစ်ရံတွင် စုယွီ နှင့် လော့ချန်ယွီ တို့သည် ဆက်သွယ်ရေး တံဆိပ်ပြား များမှ တစ်ဆင့် အချင်းချင်း၏ အခြေအနေ များကို အပြန်အလှန် မေးမြန်းရင်း စကားစမြည် ပြောဖြစ်ကြသလို၊ ဆရာ ဖြစ်သူ တာအိုဆရာ ထျန်းယွီ ၏ အခြေအနေ ကိုလည်း သိရှိနိုင်ရန် စုံစမ်းဖြစ်ကြ၏။

မျက်စိတစ်မှိတ် အတွင်းမှာပင်၊ လူသား ကျင့်ကြံသူများ နှင့် မိစ္ဆာမျိုးနွယ်စု များသည် အာရုံလှည့်စားမှု ရွှံ့ညွန်တော ၏ အစွန်အဖျားတွင် တိုက်ပွဲများ ဆင်နွှဲနေခဲ့ကြသည်မှာ သုံးနှစ် နီးပါးခန့်ပင် ရှိသွားတော့၏။

*

အရှင်သခင်ဆယ်ပါး အင်မော်တယ် မြို့တော် ရှိ မြေကမ္ဘာအင်မော်တယ် နယ်မြေ ၏ အခြေစိုက် စခန်း အတွင်း၌၊

သူ၏ အခန်း အတွင်းရှိ လျှို့ဝှက် အခန်းလေး ထဲတွင်မူ၊

စုယွီ သည် ကျောက်စိမ်း ကုတင်ပေါ်တွင် တင်ပျဉ်ခွေ ထိုင်လျက်၊ တတိယအဆင့် အဆင့်မြင့် ဝိညာဉ် အရည် တစ်သုတ်ကို နောက်ထပ် တစ်ကြိမ် အော့သောက်လိုက်သည်။ သူ၏ စိတ်အာရုံမှာ အလွန်တရာ ကြည်လင် နေပြီး၊ သူ၏ စိတ်စွမ်းအင် အားလုံးကို အသုံးပြုကာ ခန္ဓာကိုယ် အတွင်း၌ ကောင်းကင် အင်မော်တယ် ကိုယ်ခန္ဓာ သန့်စင်ခြင်း အဆင့် ၏ တာအို အမှတ်အသား များကို တည်ဆောက် ပုံဖော်နေသည်။

သူ၏ ခန္ဓာကိုယ် အတွင်းသို့ တာအို အမှတ်အသား တစ်ခုပြီးတစ်ခု ခတ်နှိပ် ဝင်ရောက်သွားသည်နှင့်အမျှ၊ သူ၏ အရှိန်အဝါမှာ တစ်စထက်တစ်စ ပိုမို နက်ရှိုင်းလာပြီး ကြောက်မက်ဖွယ် ကောင်းလာသည်။

ပတ်ဝန်းကျင်ရှိ ဟင်းလင်းပြင်မှာပင် အခဲ အဖြစ်သို့ ပြောင်းလဲသွားသကဲ့သို့ ထင်မှတ်ရပြီး၊ စကားဖြင့် ဖော်ပြ၍ မရနိုင်လောက်အောင် လေးလံလှသော ဆွဲငင်အား စက်ကွင်းကြီး တစ်ခု စိမ့်ထွက်လာ၏။

ကောင်းကင် အင်မော်တယ် ကိုယ်ခန္ဓာ သန့်စင်ခြင်း အဆင့် ၏ တတိယ အလွှာမှာ နောက်ပိုင်း အဆင့်သို့ ရောက်ရှိသွားပြီးနောက်၊ တာအို အမှတ်အသား တစ်ခု သူ၏ ခန္ဓာကိုယ်ပေါ်သို့ ခတ်နှိပ်လိုက်သည့် အကြိမ်တိုင်းတွင်၊ သူ၏ ရုပ်ခန္ဓာသည် ကြီးမားလှသော ဆွဲငင်အား အလေးချိန် တစ်ခု တိုးလာသည်ကို သိသာ ထင်ရှားစွာ အာရုံခံ သိရှိနိုင်သည်။

'သောက်ကျိုးနည်း... ငါ့ကိုယ်ငါတောင် မနိုင်တော့ဘူး။ ဒီ လေးလံတဲ့ ဆွဲငင်အားကြီးက နောက်ပြောင်နေတာ မဟုတ်ဘူး'

အကယ်၍ သူ၏ အောက်တွင် ရှိနေသော ကုတင်သာ လက်နက် သန့်စင်သူ တစ်ဦး နှင့် သူ၏ ကိုယ်ပိုင် တည်ငြိမ်ရေး အခင်းအကျင်း တို့ဖြင့် အထူး ပြုပြင် မွမ်းမံထားခြင်း မရှိသော စတုတ္ထအဆင့် အဆင့်နိမ့် ဝိညာဉ် ကျောက်စိမ်း ကုတင် မဟုတ်ခဲ့လျှင်..ထို ဝိညာဉ် ကျောက်စိမ်း ကုတင် မှာ သူ၏ အလေးချိန်ကို ခံနိုင်ရည် ရှိမည် မဟုတ်ဘဲ တစ်စစီ ကျိုးပဲ့သွားလောက်ချေပြီ။

"ဝီ..."

စုယွီ သည် သူ၏ အရိုး တစ်ခု အတွင်းသို့ နောက်ထပ် တာအို အမှတ်အသား တစ်ခုကို အောင်မြင်စွာ ခတ်နှိပ်လိုက်နိုင်သောအခါ၊ ခန္ဓာကိုယ် သန့်စင်ခြင်း အဆင့် ၏ တတိယ အလွှာ မှ အကြိမ် ရှစ်ထောင်မြောက် တာအို အမှတ်အသား မှာ နောက်ဆုံးတွင် အောင်မြင်စွာ ပုံဖော် ပြီးစီးသွား‌တော့၏။

ထိုအခိုက်အတန့်မှာပင်၊

ပထမ အလွှာ နှင့် ဒုတိယ အလွှာ တွင် သန့်စင်ခဲ့သော အမှတ်အသားများ အပါအဝင် သူ၏ ခန္ဓာကိုယ် အတွင်းရှိ တာအို အမှတ်အသား များ အားလုံးသည် မျက်စိကျိန်းမတတ် တောက်ပလှသော ကောင်းကင် အင်မော်တယ် အလင်းတန်းများ အဖြစ် ရုတ်တရက် ပေါက်ကွဲ ထွက်ပေါ်လာသည်။

ခမ်းနား ကြီးကျယ်လှသော အရှိန်အဝါကြီး တစ်ခုသည် နေရာအနှံ့သို့ တိုးဖောက်သွား‌တော့၏။

"ဝုန်း..."

တည်ငြိမ်နေသော ရေကန်ကြီး တစ်ခု အတွင်းသို့ ကျောက်တုံးကြီး တစ်တုံး ရုတ်တရက် ပြုတ်ကျသွားသည့် အလား၊ လျှို့ဝှက် အခန်းလေး အတွင်းရှိ လေထုမှာ ဖရိုဖရဲ.. လှိုင်းထသွားပြီး ကြမ်းတမ်းလှသော လေမုန်တိုင်းကြီး တစ်ခု ဖြစ်တည်သွားစေသည်။

စုယွီ ၏ ခန္ဓာကိုယ် အတွင်းရှိ တာအို အမှတ်အသား များ အားလုံး၏ အရှိန်အဝါများ သည် တစ်နေရာတည်းသို့ စုဆုံသွားပြီး၊ အလွန်တရာ ကြောက်မက်ဖွယ် ကောင်းသော အခြေအနေ သို့ ရောက်ရှိသွား‌တော့၏။

တစ်ချိန်တည်းမှာပင်၊

စုယွီ ၏ ခန္ဓာကိုယ် အတွင်း၌ သိမ်မွေ့လှသော အပြောင်းအလဲ များ ဖြစ်ပေါ်နေသည်။

ကိုယ်ခန္ဓာ သန့်စင်ခြင်း နည်းစနစ် တွင် နောက်ထပ် အဆင့် တစ်ခုသို့ အောင်မြင်စွာ ကျော်ဖြတ် ဝင်ရောက်သွားမှု နှင့်အတူ၊ သူ၏ ခန္ဓာကိုယ် အတွင်းရှိ ဆဲလ် များသည် အဆက်မပြတ် ပွားများလာပြီး ကွဲထွက်သွားကာ... ပျက်စီးခြင်း နှင့် ယိုယွင်းခြင်း များကို ဆက်တိုက် ဖြစ်ပေါ်စေ၏။

အပြင်ပန်း အားဖြင့် ကြည့်မည် ဆိုလျှင်တော့ စုယွီ ၏ ရုပ်ပိုင်းဆိုင်ရာ ပုံသဏ္ဌာန် မှာ ဘာမှ ပြောင်းလဲသွားခြင်း မရှိချေ။

သို့သော်ငြားလည်း၊ ဤအခိုက်အတန့်တွင် စုယွီ ၏ အသားစများ နှင့် အရိုးများမှာ အတွင်းပိုင်းမှ နေ၍ အကြီးအကျယ် ပြောင်းလဲနေပြီး၊ သူ၏ အရိုး သိပ်သည်းဆ မှာလည်း အဆမတန် မြင့်တက်လာတော့၏။

အခြား အရာများကို ထည့်မပြောလျှင်တောင်မှ၊ ယခုအခါ စုယွီ ၏ ခန္ဓာကိုယ်မှ အရိုး တစ်ချောင်း သည် သာမန် အဆင့်မြင့် ကာကွယ်ရေး မှော်လက်နက် တစ်ခု ထက်ပင် ပို၍ မာကျော နေလောက်ချေပြီ။

သူ၏ ခန္ဓာကိုယ် အတွင်းရှိ အသားစများ သည် သာမန် တတိယအဆင့် ဝိညာဉ် ဆေးလုံး တစ်လုံး ကဲ့သို့ပင် အာဟာရ ပြည့်ဝစွာ ဖြည့်တင်းပေးနိုင်စွမ်း ရှိနေလောက်ပြီ ဖြစ်၏။

'ဟာ... ငါ့အရိုးတွေက ဒိုင်းကာထက်တောင် မာနေပြီပဲ။ ငါ့အသားတွေကရော... တတိယအဆင့် ဆေးလုံးလို အာဟာရဖြစ်တယ် ဟုတ်လား။ သေစမ်း... ဟိုအပြင်က မိစ္ဆာကောင်တွေသာ သိသွားရင် ငါ့ကို ဝိုင်းကိုက်စားကြတော့မှာပဲ'

အချိန် အတော်ကြာ လွန်မြောက်သွားပြီးနောက်၊

"ဟူး..."

စုယွီ သည် သက်ပြင်းရှည်ကြီး တစ်ချက်ကို မှုတ်ထုတ်လိုက်သည်။ ထို သက်ပြင်း မှုတ်ထုတ်လိုက်သည့် လေပြင်းလေး တစ်ချက်တည်း နှင့်ပင် လျှို့ဝှက် အခန်းလေး အတွင်း၌ လေမုန်တိုင်း တစ်ခုကို ဖြစ်ပေါ်သွားစေ၏။ သူသည် မျက်လုံးများကို ဖွင့်လိုက်ရာ... သူ၏ မျက်ဝန်းများမှာ ကောင်းကင်ယံ ထက်ရှိ နေ နှင့် လ ထက်ပင် ပို၍ တောက်ပနေသယောင် စူးရှ တောက်ပနေသည်။

သူ၏ ခန္ဓာကိုယ် အတွင်းရှိ တာအို အမှတ်အသား များ တစ်ခုပြီးတစ်ခု လင်းလက်လာမှု နှင့်အတူ၊ သူ၏ ခန္ဓာကိုယ် တစ်ခုလုံးသည် မှေးမှိန်သော ကောင်းကင် အင်မော်တယ် အလင်းတန်း များဖြင့် လွှမ်းခြုံ ဖုံးအုပ်သွား၏။

သူ၏ ပတ်လည်တွင် အင်မော်တယ် တစ်ပါး၏ အရှိန်အဝါများ ပြည့်နှက်နေပြီး၊ သူ၏ ဆံပင်များမှာ လေထဲတွင် လွင့်ပျံနေကာ... အစိမ်းရောင် ဝတ်ရုံကြီး ဖြင့် ကြည့်ကောင်း ခန့်ညားနေမှုမှာ ကောင်းကင်ဘုံ မှနေ၍ လူ့ပြည်သို့ ဆင်းသက်လာသော အင်မော်တယ် တစ်ပါး အလား ထင်မှတ်ရ‌ပါတော့သည်။

အခန်း (၅၁၆) - စတုတ္ထအဆင့် တာအိုရုပ်သေးများ၊ တာအိုဆရာ နဂါးနက် အညံ့ခံခြင်း (အပိုင်း - ၃)

ခဏအကြာတွင် စုယွီ၏ မျက်ဝန်းများထဲမှ တောက်ပနေသော အလင်းရောင်များ တဖြည်းဖြည်း မှေးမှိန်သွားပြီး၊ သူ၏ ပတ်လည်ရှိ ကောင်းကင် အင်မော်တယ် အလင်းတန်းများမှာလည်း ကွယ်ပျောက်သွားသည်။ သူ၏ အရှိန်အဝါ နှင့် အမူအရာများမှာ ပုံမှန် အေးချမ်း တည်ငြိမ်သော သာမန် အခြေအနေသို့ ပြန်လည် ရောက်ရှိသွားတော့၏။

သူသည် သူ၏ ကျွမ်းကျင်မှု မျက်နှာပြင် ကို ဖွင့်ကြည့်လိုက်သည်။

[ကျင့်စဉ် - ကောင်းကင် အင်မော်တယ် ကိုယ်ခန္ဓာ သန့်စင်ခြင်း (တတိယ အလွှာ၊ ကျွမ်းကျင်မှု - ၈၀.၀၀%)]

ကောင်းကင် အင်မော်တယ် ကိုယ်ခန္ဓာ သန့်စင်ခြင်း နည်းစနစ် ၏ တတိယ အလွှာ သည် မန္တန်စွမ်းအား ကျင့်စဉ်များ၏ ရွှေအမြုတေ အဆင့် ကြီး နှင့် ညီမျှသည်။

ကျွမ်းကျင်မှု အဆင့် (၈၀) ရာခိုင်နှုန်း သို့ ရောက်ရှိသွားပြီ ဖြစ်ရာ၊ သူ၏ ရုပ်ပိုင်းဆိုင်ရာ ကျင့်ကြံခြင်း အဆင့်မှာ ရွှေအမြုတေ အဆင့် (၈) နှင့် ညီမျှနေပြီ ဖြစ်သည်။

ထို့နောက် သူသည် ဓာတ်ကြီးငါးပါး ကျင့်စဉ် ၏ ကျွမ်းကျင်မှု အဆင့်ကို ထပ်မံ စစ်ဆေးကြည့်လိုက်သည်။

နှစ်ပေါင်းများစွာတိုင်အောင် မရပ်မနား အဆက်မပြတ် ကျင့်ကြံလာခဲ့မှုကြောင့်၊ ဓာတ်ကြီးငါးပါး ကျင့်စဉ် ၏ ကျွမ်းကျင်မှု အဆင့်မှာ (၆၉) ရာခိုင်နှုန်း သို့ ရောက်ရှိနေတော့၏။

'ဟဲဟဲ... ရွှေအမြုတေ အဆင့် (၇) ကို တက်ဖို့ သိပ်မလိုတော့ဘူးပဲ... လက်တစ်ကမ်း အလိုမှာတင်'

အာရုံလှည့်စားမှု ရွှံ့ညွန်တော ပင်လယ် အတွင်း၌ လူသား ကျင့်ကြံသူများ နှင့် မိစ္ဆာမျိုးနွယ်စုများ အကြား ဖြစ်ပွားနေသော ကြီးမားလှသည့် စစ်ပွဲကြီး၏ လက်ရှိ တင်းမာနေသော အခြေအနေကို ပြန်လည် စဉ်းစားမိလိုက်၏။ လူသား အင်အားစု အသီးသီး မှ ပါဝင် တိုက်ခိုက်နေကြသော ကျင့်ကြံသူ အရေအတွက်မှာ မနည်းလှသော်ငြားလည်း၊ ယေဘုယျ အားဖြင့် ကြည့်မည် ဆိုလျှင်တော့ အခြေအနေကို ထိန်းချုပ်ထားနိုင်ဆဲ အနေအထား တွင်သာ ရှိနေသေးသည်။

မိစ္ဆာမျိုးနွယ်စု များ၏ အင်အားမှာလည်း အလွန် တောင့်တင်း ခိုင်မာလှသည်။ ယခု တိုက်ခိုက်နေကြသည်မှာ အာရုံလှည့်စားမှု ရွှံ့ညွန်တော အတွင်းရှိ မိစ္ဆာများ သက်သက်သာ မဟုတ်တော့ချေ။

ဒါက တာ့ချန် ကျင့်ကြံခြင်း လောက တစ်ခုလုံးရှိ လူသား ကျင့်ကြံသူများ နှင့် မိစ္ဆာမျိုးနွယ်စုများ အကြားမှ အားပြိုင်မှု ကြီး တစ်ခု ဖြစ်လာခဲ့လေပြီ။

စုယွီ ၏ ခန့်မှန်းချက် အရ ဆိုလျှင်... ဤစစ်ပွဲကြီး အဆုံးအဖြတ် ပေါ်လာရန် အတွက် နောက်ထပ် အနှစ် တစ်ဆယ် သို့မဟုတ် အနှစ် နှစ်ဆယ် ခန့် အချိန် ယူရနိုင်သေးသည်။

လူသားများ နှင့် မိစ္ဆာမျိုးနွယ်စုများ အကြား ဖြစ်ပွားလေ့ရှိသော သာမန် ပွတ်တိုက်မှုလေး တစ်ခု အတွက် ဆိုလျှင်တော့ ဤအချိန်ကာလမှာ အရမ်းကြီး ကြာမြင့်လှသည်ဟု မဆိုသာပေ။

စုယွီ ကိုယ်တိုင် ဤစစ်ပွဲကြီး အတွင်း တိုက်ရိုက် ပါဝင် ပတ်သက်နေခြင်း မရှိသော်ငြားလည်း၊ အရှင်သခင်ဆယ်ပါး အင်မော်တယ် မြို့တော် မှာ စစ်ပွဲ နှင့် အနီးဆုံး ဖြစ်နေသဖြင့်... တတိယအဆင့် မိစ္ဆာသားရဲ များ နှင့် မိစ္ဆာမျိုးနွယ်စု များထံမှ ရရှိသော ပစ္စည်းများ အပါအဝင်၊ မိစ္ဆာမျိုးနွယ်စု များနှင့် သက်ဆိုင်သော အရင်းအမြစ် အမြောက်အမြား သည် မြို့တော် အတွင်းသို့ အရင်ဆုံး စီးဝင်လာခဲ့သည်။

အင်အားစု များစွာသည် သူတို့ ရရှိလာသော ပစ္စည်းများ အားလုံးကို ထုတ်ရောင်းကြခြင်း မရှိလျှင်တောင်မှ... ဂိုဏ်း အသီးသီး မှ စိမ့်ထွက်လာသော၊ အပြင်သို့ ရောက်ရှိလာသော ပစ္စည်းများ၏ ပမာဏ မှာပင် အတော်လေး များပြားလှသည်။

ထို့အပြင် ဤစစ်ပွဲကြီး ကြောင့် အရှင်သခင်ဆယ်ပါး အင်မော်တယ် မြို့တော် အတွင်းရှိ ဝိညာဉ် ဆေးလုံးများ၊ အဆောင်လက်ဖွဲ့များ၊ အခင်းအကျင်း များ နှင့် ရုပ်သေး များ ကဲ့သို့သော ထောက်ပံ့ရေး ပစ္စည်းများ၏ ဈေးနှုန်းများမှာ အဆမတန် မြင့်တက် သွားခဲ့သည်။

လွန်ခဲ့သော သုံးနှစ်တာ ကာလ အတွင်း၊ စုယွီ သည် မြို့တော် အတွင်း၌ သူ လိုအပ်သော ပစ္စည်းများကို ဝယ်ယူရင်း တစ်ဖက်မှလည်း... ဝိညာဉ် ဆေးလုံးများ၊ အဆောင်လက်ဖွဲ့များ နှင့် အခင်းအကျင်း အခြေခံ များ ကဲ့သို့သော သူကိုယ်တိုင် ဖန်တီး ပြုလုပ်ထားသည့် ထုတ်ကုန် များကို ထုတ်ရောင်း နေခဲ့၏။ သူ၏ ဂိုဏ်း အကျိုးပြု ရမှတ် များ မတိုးလာခဲ့သော်ငြားလည်း... ဝိညာဉ် ကျောက်တုံး များကိုတော့ အမြောက်အမြား ရှာဖွေ စုဆောင်း နိုင်ခဲ့လေပြီ။

အရင်းအမြစ် အများအပြား စုဆောင်း ရရှိလာသည်နှင့်အမျှ၊ သူ၏ နေထိုင်မှု ဘဝမှာ တစ်နေ့တခြား ပိုမို သာယာ ဝပြော လာခဲ့သည်။

ကိုယ်ခန္ဓာ သန့်စင်ခြင်း ကျင့်စဉ် တွင် အဆင့်သစ် တစ်ခုသို့ တက်လှမ်းသွားနိုင်ခဲ့သဖြင့်၊ စုယွီ သည် သူ၏ တံခါးပိတ် လျှို့ဝှက် အခန်းလေး အတွင်းမှ ထွက်လာခဲ့ပြီး မြို့တော် အတွင်းရှိ အရက်ဆိုင် တစ်ဆိုင်သို့ သွားကာ ဝိညာဉ် အရက် အချို့ ဝယ်ယူခဲ့၏။ အခန်းသို့ ပြန်ရောက်သောအခါ သူသည် ဝမ်းပန်းတသာဖြင့် အရက် အနည်းငယ်ကို သောက်သုံး အောင်ပွဲခံ လိုက်ပါသည်။

ညနေခင်း ရောက်သောအခါ၊ သူသည် အထက်ဘုံ သန့်စင်သော မူလ တာအို နိယာမ ကို ဆက်လက် ကျင့်ကြံ အားထုတ်၏။

'တကယ်လို့သာ ငါက အာရုံလှည့်စားမှု ရွှံ့ညွန်တော ထဲကို သွားပြီး မိစ္ဆာကောင် တွေ နဲ့ သွားချနေရမယ် ဆိုရင်... အခုလို ဇိမ်ကျကျ ဘဝမျိုးကို ဘယ်လိုလုပ် ရနိုင်ပါ့မလဲ။ ဟင်း... နေ့ရော ညပါ အသေအလဲ တိုက်နေရတာ တကယ် ပင်ပန်းတဲ့ အလုပ်ပဲ'

...

ပိုးစာပင် နယ်မြေ။

ကုန်းယွဲ့ အင်မော်တယ် မြို့တော်။

ကောင်း မိသားစု ၏ အင်မော်တယ် နန်းတော် အနက်ပိုင်းရှိ မြေအောက် လှိုဏ်ဂူ တစ်ခု အတွင်း၌၊

အနီရောင် ရုပ်သေး သည် လှိုဏ်ဂူ ၏ အလယ်ဗဟို တွင် တင်ပျဉ်ခွေ ထိုင်နေသည်။

၎င်း၏ ရှေ့တည့်တည့် တွင်မူ ၎င်း၏ အရပ်အမောင်း နီးပါးခန့် မြင့်မားသော စတုတ္ထအဆင့် အဆင့်နိမ့် ရွှေရောင်ဖျော့ဖျော့ ဝိညာဉ် သတ္တုရိုင်း တုံးကြီး တစ်တုံး ရှိနေ၏။ ထို သတ္တုရိုင်း တုံးကြီး ကို ရုပ်သေး ဝိညာဉ် ၏ အနှစ်သာရ များဖြင့် ဖုံးလွှမ်း ထားသည်။ ဝိညာဉ် သတ္တုရိုင်း တုံးကြီး သည် အပြင်ဘက်မှ နေ၍ တဖြည်းဖြည်း ကြွေကျလာပြီး၊ အမှုန့်များ အဖြစ်သို့ ပြောင်းလဲကာ လေထဲသို့ လွင့်စင် သွား၏။

ရွှေရောင်ဖျော့ဖျော့ ဝိညာဉ် သတ္တုရိုင်း ၏ အနှစ်သာရ အမျှင်တန်းလေး များသည် သတ္တုရိုင်း တုံးကြီး ထံမှ စုပ်ယူခံရပြီး၊ အနီရောင် ရုပ်သေး ၏ ခန္ဓာကိုယ် အတွင်းသို့ စီးဝင် ပေါင်းစပ် သွား‌တော့သည်။

ဤ ဧရာမ စတုတ္ထအဆင့် အဆင့်နိမ့် ဝိညာဉ် သတ္တုရိုင်း တုံးကြီး ၏ တစ်ဝက် နီးပါးခန့်ကို စုပ်ယူ သန့်စင်ပြီးသွားသော အခါ၊ အနီရောင် ရုပ်သေး ၏ အရှိန်အဝါ မှာ ရုတ်တရက် ပြောင်းလဲသွား၏။

ထိုအခိုက်အတန့် တွင်ပင်၊ အနီရောင် ရုပ်သေး သည် ၎င်း၏ ပတ်လည်ရှိ လောကကြီး ပြောင်းလဲသွားသကဲ့သို့ ခံစားလိုက်ရသည်။

ထိုအချိန်တွင် အနီရောင် ရုပ်သေး သည် ၎င်း၏ ရှေ့ရှိ စတုတ္ထအဆင့် အဆင့်နိမ့် ဝိညာဉ် သတ္တုရိုင်း ကို သန့်စင်နေခြင်း မှ ရပ်တန့်လိုက်ပြီး... ၎င်း၏ အနီရောင် မျက်လုံးကြီး များကို ဖွင့်လိုက်ရာ အေးစက်သော အလင်းတန်း တစ်ခု ရုတ်တရက် ပေါက်ကွဲ ထွက်ပေါ်လာ၏။

၎င်းသည် ၎င်း၏ ခန္ဓာကိုယ် အတွင်း ဖြစ်ပေါ်နေသော အပြောင်းအလဲ များကို သေချာစွာ အာရုံခံ ကြည့်လိုက်သည်။

စုယွီ က အနီရောင် ရုပ်သေး ကို စတင် ရရှိခဲ့စဉ်က အက်ကွဲကြောင်း များဖြင့် ပြည့်နှက်နေခဲ့သော အခြေအနေ နှင့် နှိုင်းယှဉ်လိုက်ပါက၊ ယခုအခါ အနီရောင် ရုပ်သေး ၏ ခန္ဓာကိုယ်ပေါ်ရှိ အက်ကွဲကြောင်း များမှာ အစအနပင် မကျန်အောင် လုံးဝ ပျောက်ကင်း သွားတော့၏။

၎င်း၏ မူလ စတုတ္ထအဆင့် အဆင့်နိမ့် စွမ်းအား အပြည့်အဝ သို့ ပြန်လည် မရောက်ရှိသေးသော်ငြားလည်း၊ အနီးကပ် သေချာ မကြည့်လျှင် အားနည်းချက်ကို သိသာရန် ခက်ခဲလှ၏။

ဒါပေါ့လေ။

အကြီးမားဆုံးသော အပြောင်းအလဲ ကတော့ အနီရောင် ရုပ်သေး ၏ အလယ်ဗဟို အူတိုင် တွင် ဖြစ်ပေါ်သွားခြင်း ပင်။

မျက်စိတစ်မှိတ် အတွင်းမှာပင် အနီရောင် ရုပ်သေး ၏ အနှစ်သာရ မှာ အရည်အသွေးပိုင်း ဆိုင်ရာ အကြီးအကျယ် ပြောင်းလဲသွားခဲ့လေပြီ။

စကားဖြင့် ဖော်ပြ၍ မရနိုင်လောက်သော စွမ်းအား တစ်ခု စုစည်း ထွက်ပေါ်လာ၏။

ယခင်က အနီရောင် ရုပ်သေး သည် ၎င်း၏ ပတ်လည်ရှိ လောကကြီး ၏ စွမ်းအင် အပြောင်းအလဲ များကိုသာ အာရုံခံ သိရှိနိုင်ခဲ့သော်လည်း၊ ယခုအခါတွင်မူ ၎င်း၏ ခန္ဓာကိုယ်ကြီး ကိုယ်တိုင်က လောကကြီး ၏ အစိတ်အပိုင်း တစ်ခု ဖြစ်သွားသကဲ့သို့ ခံစားလိုက်ရသည်။

လှိုဏ်ဂူ အတွင်းရှိ လောက တစ်ခုလုံး ၏ စွမ်းအင်များ သည် ၎င်း၏ အလိုကျ အသုံးပြုရန် အသင့် ဖြစ်နေလေပြီ။

'ဟားဟားဟား... ငါ ပြန်လာပြီကွ။ လောကကြီး ရဲ့ စွမ်းအားတွေ အားလုံး ငါ့လက်ထဲမှာပဲ'

လောက တစ်ခုလုံး ၏ စွမ်းအားများ ကို ၎င်းက အကြွင်းမဲ့ ထိန်းချုပ်ထားနိုင်ပုံ ရပြီး၊ ဤနေရာ ၏ စစ်မှန်သော အရှင်သခင် အဖြစ်သို့ ပြောင်းလဲသွားတော့၏။

ထို့အပြင် အနီရောင် ရုပ်သေး ၏ အလယ်ဗဟို အူတိုင် တွင် မီး ဓာတ် သဘာဝ စွမ်းအား များဖြင့် ပြည့်နှက်နေလေရာ၊ ဤအခိုက်အတန့်တွင် အနီရောင် ရုပ်သေး ၏ စိတ်အာရုံ တစ်ချက် လှုပ်ရှားလိုက်ရုံဖြင့် လှိုဏ်ဂူ တစ်ခုလုံးမှာ မီးတောက် မီးလျှံ များ တောက်လောင်နေသော ငရဲခန်း တစ်ခု အလား ပြောင်းလဲသွား‌တော့၏။

အနီရောင် ရုပ်သေး သည် ဤစွမ်းအား နှင့် တတိယအဆင့် စွမ်းအား များ အကြားရှိ ကွာခြားချက်ကို သေချာစွာ အာရုံခံ ကြည့်လိုက်ပြီး တိတ်ဆိတ်စွာ စဉ်းစား တွေးတော နေမိသည်။

"ကြည့်ရတာ... ဒါက မီးတောက် နယ်ပယ် ရဲ့ စွမ်းအား ဖြစ်ရမယ်"

ရွှေအမြုတေ အဆင့် တတိယအဆင့် ရုပ်သေး များသည်... သူတို့၏ ကိုယ်ပိုင် နတ်ဘုရား အာရုံ နှင့် မန္တန်စွမ်းအား များကို အသုံးပြု၍ လောကကြီး ၏ စွမ်းအင် အနည်းငယ် ကိုသာ ထိန်းချုပ်နိုင်ကြပြီး၊ 'ဝိညာဉ် ဖိအား' ဟု ခေါ်ဆိုသော အရာကို ဖန်တီးနိုင်ကြ၏။

သို့သော် အနီရောင် ရုပ်သေး သည် စတုတ္ထအဆင့် အဆင့်နိမ့် စွမ်းအား သို့ ပြန်လည် ရောက်ရှိသွားသောအခါ၊ ၎င်း၏ ကိုယ်ပိုင် မီး ဓာတ် သဘာဝ စွမ်းအား များသည် တာအို နယ်ပယ် တစ်ခု အဖြစ်သို့ အသွင်ပြောင်းသွားသကဲ့သို့ ရှိသည်။

ယခင်က ရုပ်သေး ဝိညာဉ် သည် စစ်မှန်သော စတုတ္ထအဆင့် ရတနာ တစ်ခု အဖြစ်သို့ အသွင်ပြောင်းသွားခဲ့စဉ် ကတောင် ဤခံစားချက်မှာ သိပ်ပြီး သိသာ ထင်ရှားမှု မရှိခဲ့ချေ။

သို့သော်လည်း ယခုအခါ စစ်မှန်သော စတုတ္ထအဆင့် အဆင့်နိမ့် စွမ်းအား သို့ ပြန်လည် ရောက်ရှိသွားသောအခါ၊ အနီရောင် ရုပ်သေး အနေဖြင့် ထိုကွာခြားချက် များကို နားလည် သဘောပေါက်ရန် ပိုမို လွယ်ကူသွားခဲ့လေပြီ။

ယခင်က စုယွီ သည် မြေကမ္ဘာအင်မော်တယ် နယ်မြေ ၏ စာကြည့်တိုက် အတွင်း၌ ရွှေအမြုတေ အဆင့် မှ မူလဝိညာဉ် အဆင့် သို့ ကျော်ဖြတ် ဝင်ရောက်ခြင်း နှင့် ပတ်သက်သော စာအုပ်စာပေ အများအပြား ကို ဖတ်ရှု လေ့လာခဲ့ဖူး၏။ သို့သော်လည်း ထိုစာအုပ် အများစုမှာ မူလဝိညာဉ် ကို မည်သို့ အသွင်ပြောင်း ဖန်တီးရမည် ဆိုသည့် အချက်ကိုသာ အဓိက အလေးပေး ရေးသားထားကြသည်။

မူလဝိညာဉ် အဆင့် နှင့် ရွှေအမြုတေ အဆင့် ကြားရှိ စွမ်းအား ကွာခြားချက် အကြောင်းကို ထိုစာအုပ်များထဲတွင် အသေးစိတ် ရှင်းလင်း ရေးသားထားခြင်း မရှိခဲ့ချေ။

ဒါက လျှို့ဝှက်ထားရမည့် အသိပညာ မျိုး ဖြစ်နေလို့တော့ မဟုတ်ပါ။

တကယ်တော့...

ရွှေအမြုတေ အဆင့် မှာပဲ ရှိနေသေးသော အချိန်မှာ ထို အဆင့် နှစ်ခု ကြားက စွမ်းအား ကွာခြားချက် ကို ကြိုသိနေလျှင်လည်း ဘာအကျိုးကျေးဇူး မှ သိပ်ရှိလာမှာ မဟုတ်သောကြောင့်ပါ။

တစ်ချိန်တွင်... ကိုယ်တိုင် မူလဝိညာဉ် အဆင့် ကို တကယ် ရောက်သွားပြီ ဆိုလျှင်တော့ သဘာဝအလျောက် အလိုလို နားလည် သဘောပေါက် သွားမည်ပါပင်။

စုယွီ ၏ မန္တန်စွမ်းအား ကျင့်ကြံခြင်း အဆင့်မှာ မူလဝိညာဉ် အဆင့် သို့ တက်လှမ်းရန် အတွက် အချိန် အတန်ကြာ လိုအပ်နေသေးသော်ငြားလည်း၊ ယခုအခါ သူ၏ အနီရောင် ရုပ်သေး သည် စတုတ္ထအဆင့် အဆင့်နိမ့် သို့ ပြန်လည် ရောက်ရှိသွားသောအခါ၊ ရွှေအမြုတေ အဆင့် နှင့် မူလဝိညာဉ် အဆင့် ကြားရှိ ကွာခြားချက် များကို မည်သူတစ်ဦးတစ်ယောက် ကမျှ သင်ပြပေးစရာ မလိုဘဲ သူ အလိုလို နားလည် သဘောပေါက် သွားတော့၏။