အခန်း (၅၂၀-၅၂၂)

အခန်း (၅၂၀) - အင်ပါယာ သင်္ချိုင်း ကျွန်းသခင် အသစ် (အပိုင်း - ၁)

ဟွမ်လင်း ကျွန်း ဆိုသည်မှာ ဖူလင်း ပင်လယ်ပြင်၏ အစွန်အဖျားတွင် တည်ရှိသော အလယ်အလတ်အဆင့် ထောက်ပံ့ရေး ကျွန်းတစ်ကျွန်း ဖြစ်ပြီး၊ ပိုးစာပင် နယ်မြေ ကုန်းမြေမကြီး နှင့်လည်းကောင်း၊ ပိုးစာပင် အင်မော်တယ် မြို့တော် နှင့်လည်းကောင်း အလွန် နီးကပ်စွာ တည်ရှိသည်။

၎င်း၏ အချက်အချာကျသော ပထဝီဝင် အနေအထားကြောင့်၊ ဟွမ်လင်း ကျွန်း သည် ဖူလင်း ပင်လယ်ပြင် နှင့် ပိုးစာပင် နယ်မြေ အကြားရှိ ကုန်သွယ်ရေး လမ်းကြောင်းများ အတွက် အဓိက ဆိပ်ကမ်း ကျွန်းကြီး တစ်ကျွန်း အဖြစ် ရပ်တည်လာခဲ့၏။

လွန်ခဲ့သော နှစ်အနည်းငယ် ခန့်က... ဟွမ်လင်း ကျွန်း ၏ "ကျွန်းသခင်လေး" ဖြစ်သူ ဟွမ်ရှိုးရီ သည် သူ၏ လက်အောက်ငယ်သား များကို ခေါ်ဆောင်ကာ၊ ကျွန်း၏ ဘိုးဘေးကြီး ဖြစ်သော ဟွမ်ချန်လုံ ၏ မူလဝိညာဉ် ဝင်ရောက် ပူးကပ်နေသည့် အရာကို သယ်ဆောင်လျက် ကုန်းယွဲ့ အင်မော်တယ် မြို့တော် သို့ သွားရောက်ခဲ့သည်။

မူလက သူတို့၏ အစီအစဉ်မှာ... တာအို ရုပ်သေး များကို ဖမ်းဆီးပြီး ဟွမ်လင်း ကျွန်း သို့ ပြန်လည် ခေါ်ဆောင်သွားကာ၊ အဆောင်လက်ဖွဲ့ များ ရေးဆွဲရန် အတွက် သူတို့၏ ကိုယ်ပိုင် အစေခံများ အဖြစ် ခိုင်းစေရန် ဖြစ်၏။

သို့သော်လည်း ကံတရားက မျက်နှာသာ မပေးခဲ့ချေ။ အခြေအနေများမှာ ပြောင်းပြန်လန် သွားခဲ့ပြီး... သူတို့ ကိုယ်တိုင်က သူတို့ ထိန်းချုပ်ရန် ရည်ရွယ်ထားသော တာအို ရုပ်သေး များ၏ လက်အောက်သို့ ကျရောက် သွားခဲ့ရသည်။ ထို့အပြင်... ဟွမ်ချန်လုံ ၏ မူလဝိညာဉ် မှာ ဝိညာဉ် ရုပ်သေး ကို တတိယအဆင့် မှနေ၍ စတုတ္ထအဆင့် သို့ အပြည့်အဝ အသွင်ပြောင်းလဲ နိုင်ရန် အတွက် အကောင်းဆုံးသော အခွင့်အရေး တစ်ရပ် ဖြစ်သွားခဲ့‌တော့၏။

"ဝီ..."

အဆုံးအစ မရှိ ကျယ်ပြန့်လှသော ပင်လယ်ပြင်ကြီး ၏ အထက် ကောင်းကင်ယံ တွင်၊ ဧရာမ မှော်လက်နက် စစ်သင်္ဘောကြီး တစ်စင်း သည် သတ်မှတ်ထားသော လမ်းကြောင်း အတိုင်း လျင်မြန်စွာ ပျံသန်း နေသည်။

စစ်သင်္ဘောကြီး ပေါ်တွင်မူ... ယခင်က နဂါးနက် ကုန်သွယ်ရေး အသင်း ၏ လက်အောက်တွင် ရှိခဲ့သော ကျင့်ကြံသူ ထောင်ပေါင်းများစွာ သည် တိတ်ဆိတ်စွာ တင်ပျဉ်ခွေ ထိုင်လျက်၊ သူတို့၏ ကျင့်ကြံခြင်း ကိုသာ အာရုံစိုက် နေကြ၏။

ရှေ့ပိုင်းရှိ အခန်း တစ်ခန်း အတွင်း၌၊

စုယွီ၊ တာအိုဆရာ နဂါးနက်၊ တာအိုဆရာ ဖူကျန်း နှင့် တာအိုဆရာ ကျင်းဖုန်း တို့သည် တစ်ဦးနှင့် တစ်ဦး မျက်နှာချင်းဆိုင် ထိုင်နေကြသည်။ စစ်သင်္ဘောကြီး ကို ဟွမ်လင်း ကျွန်း ရှိရာ အရပ်ဆီသို့ လေဆင်နှာမောင်း တစ်ခု အလား အရှိန်ပြင်းပြင်းဖြင့် ဦးတည် မောင်းနှင် နေကြ၏။

ဤ စစ်သင်္ဘောကြီး မှာ အဆင့်နိမ့် စစ်သင်္ဘော တစ်စင်း ဖြစ်ပြီး၊ စုယွီ သည် ၎င်းကို ပိုးစာပင် အင်မော်တယ် မြို့တော် မှ ကုန်ကျစရိတ် အမြောက်အမြား အကုန်အကျ ခံကာ ဝယ်ယူခဲ့ခြင်း ဖြစ်သည်။

ဤကဲ့သို့သော စစ်သင်္ဘော မျိုးကို... ပင်လယ်ပြင်ရှိ အင်အားစု ကြီးများ အကြား ဖြစ်ပွားသော စစ်ပွဲများ တွင် စံသတ်မှတ်ချက် တစ်ခု အဖြစ် အသုံးပြုကြ၏။

အဘယ်ကြောင့်ဆိုသော်... ၎င်းသည် ကျင့်ကြံသူ အများအပြား ကို တင်ဆောင်နိုင်လောက်အောင် ကျယ်ဝန်းသောကြောင့် ဖြစ်ပြီး၊ ပိုမို သေးငယ် ကျစ်လျစ်သော ယာဉ်ပျံ များ နှင့် မတူဘဲ... စစ်သင်္ဘော သည် အင်အားစု များ အကြား စစ်ပွဲများ ဆင်နွှဲရန် အတွက် အထူး တည်ဆောက်ထားခြင်း ဖြစ်သည်။

သူတို့ ဟွမ်လင်း ကျွန်း ဆီသို့ ခရီးဆက် နေကြစဉ်၊ စုယွီ နှင့် တာအိုဆရာ နဂါးနက် တို့သည် တာအိုဆရာ ဖူကျန်း နှင့် တာအိုဆရာ ကျင်းဖုန်း တို့ ဟွမ်လင်း ကျွန်း ၏ လက်ရှိ အခြေအနေ များကို ဆွေးနွေး နေကြသည်ကို နားထောင် နေကြ၏။

တာအိုဆရာ ဖူကျန်း က ပြောသည်။

"အရင်တုန်းကတော့ ဟွမ်လင်း ကျွန်း ကို ဟွမ် မိသားစု က ထိန်းချုပ်ထားခဲ့တာပါ။ သူတို့က ကျွန်းပေါ်မှာ အင်အား အကြီးဆုံး နဲ့ ဩဇာ အလွှမ်းမိုးဆုံး အင်အားစု ဖြစ်ပြီး၊ အခိုင်မာဆုံး အခြေခံ အုတ်မြစ် တွေ လည်း ရှိကြတယ်။ အဲဒါတွေ အားလုံးက ဟွမ် မိသားစု ရဲ့ ဘိုးဘေးကြီး ဖြစ်တဲ့ မူလဝိညာဉ် အဆင့် အရှင်သခင်ကြီး ရဲ့ အုပ်ချုပ်မှု အောက်မှာ တည်ရှိနေခဲ့တာပေါ့"

"ဟွမ် မိသားစု အပြင်... ကျွန်းပေါ်မှာ တခြား အင်အားကြီး မိသားစု သုံးခု ရှိသေးတယ်ဗျ။ လျူ မိသားစု၊ မင် မိသားစု နဲ့... တာအိုမိတ်ဆွေ ကျင်းဖုန်း ရဲ့ မိသားစု ဖြစ်တဲ့ ကျင်း မိသားစု တို့ပေါ့။ ဟွမ် မိသားစု ရဲ့ ကြီးစိုး လွှမ်းမိုးမှု တွေကြောင့် သူတို့ အားလုံးက ဟွမ် မိသားစု ရဲ့ လက်အောက်ခံ တွေ ဖြစ်ခဲ့ရတာလေ... အဲဒီ မိသားစု တစ်ခုစီတိုင်းမှာ ရွှေအမြုတေ အဆင့် (၉) ကို ရောက်နေတဲ့ ကျင့်ကြံသူ တစ်ယောက် ဒါမှမဟုတ် နှစ်ယောက် လောက်တော့ ရှိကြတယ်"

"ဥက္ကဋ္ဌ ကောင်း ရှာဖွေ စုဆောင်းထားတဲ့ ဟွမ်လင်း ကျွန်း ရဲ့ သတင်း အချက်အလက် တွေ အရ ဆိုရင်တော့... အဲဒီမှာ အခြေအနေ တွေက တည်ငြိမ်နေသေးတဲ့ ပုံပါပဲ။ ကျွန်းက ဟွမ် မိသားစု ရဲ့ ထိန်းချုပ်မှု အောက်မှာပဲ ရှိနေသေးပြီး... ဟွမ် မိသားစု ရဲ့ ဘိုးဘေးကြီး ဒုက္ခရောက်သွားတယ် ဆိုတဲ့ သတင်း ကလည်း ပြင်ပ ကို ပေါက်ကြားသွားတာ မျိုး မရှိသေးဘူး"

"ဒါပေမဲ့... နောက်ကွယ်မှာတော့... လျူ မိသားစု ရော၊ မင် မိသားစု ရော... ပြီးတော့ ဟွမ်လင်း ကျွန်း ရဲ့ အပြင်ဘက်က တချို့ အင်အားစု တွေကပါ တစ်ခုခုကို အနံ့ခံ မိသွားပုံ ရပြီး၊ ဟွမ် မိသားစု ရဲ့ အခြေအနေ ကို စမ်းသပ်ဖို့ ကြိုးစားနေကြတယ်"

"တကယ်လို့များ အရှင်သခင်ကြီး ဘက်က ဘာမှ မလှုပ်ရှားဘူး ဆိုရင်... နောက်ထပ် နှစ်အနည်းငယ်... ဒါမှမဟုတ် ဆယ်စုနှစ် တစ်ခုလောက် အတွင်းမှာ... ဟွမ်လင်း ကျွန်း ရဲ့ အခြေအနေ တွေက ပြောင်းလဲသွားနိုင်တယ်"

"ဘာလို့လဲဆိုတော့... ဟွမ် မိသားစု ရဲ့ ဘိုးဘေးကြီး မရှိတော့ဘူး ဆိုရင်... သူတို့ အနေနဲ့ ဟွမ်လင်း ကျွန်း ကို ဆက်ပြီး ထိန်းသိမ်းထားနိုင်ဖို့ ဆိုတာ မဖြစ်နိုင်တော့ဘူးလေ"

'အေးပေါ့... ခြင်္သေ့ကြီး မရှိတော့မှတော့... ခွေးအ တွေ၊ မြေခွေး တွေက ဝင်လုကြတော့မှာပေါ့'

စုယွီ သည် ခေါင်းကို ညင်သာစွာ ညိတ်လိုက်ပြီး၊ တာအိုဆရာ ကျင်းဖုန်း ထံသို့ လှည့်ကြည့်လိုက်သည်။

တာအိုဆရာ ကျင်းဖုန်း က ရိုသေ ကျိုးနွံစွာဖြင့် ပြန်လည် တင်ပြသည်။

"အရှင်သခင်ကြီး... မကြာသေးခင် ကမှ ကျွန်တော် မိသားစု ကို ဆက်သွယ်ကြည့်လိုက်တော့... လျူ မိသားစု ရော၊ မင် မိသားစု ပါ မဟာမိတ် ဖွဲ့ဖို့ အတွက် ကျွန်တော်တို့ ဆီကို လာရောက် ကမ်းလှမ်းထားတယ် လို့ သိရပါတယ် ခင်ဗျ။ အဲဒီအပြင်... အင်အားကြီး ကုန်သွယ်ရေး အသင်း သုံးခု နဲ့ ကျွန်း အခြေစိုက် အင်အားစု နှစ်ခု ကလည်း ကျင်း မိသားစု ကို ဆက်သွယ်လာကြတယ်... သူတို့ အားလုံးက ဟွမ်လင်း ကျွန်း ကို သိမ်းပိုက်ဖို့ အကြံအစည် တွေ ရှိနေကြပုံ ရတယ်"

ခေတ္တမျှ စကားကို ရပ်တန့်လိုက်ပြီးနောက်၊ ကျင်းဖုန်းက လေသံကို နှိမ့်ကာ ဆက်ပြောလာပါသည်။

"အဲဒီ ကုန်သွယ်ရေး အသင်း သုံးခု ထဲက နှစ်ခု ရဲ့ နောက်ကွယ်မှာ... အတုအယောင် မူလဝိညာဉ် အဆင့် အရှင်သခင်ကြီး တွေ ကျောထောက်နောက်ခံ ပြုထားတယ် လို့ ကောလာဟလ တွေ ထွက်နေတယ်ဗျ။ ပြီးတော့ ကျန်တဲ့ ကုန်သွယ်ရေး အသင်း တစ်ခု နဲ့ ကျွန်း အခြေစိုက် အင်အားစု နှစ်ခု ရဲ့ နောက်ကွယ်မှာ ကတော့... မူလဝိညာဉ် အဆင့် အရှင်သခင်ကြီး တစ်ပါး ရှိနေတယ် တဲ့"

"လောလောဆယ် အချိန်မှာတော့... သူတို့တွေ ဟွမ်လင်း ကျွန်း ပေါ်မှာ သူလျှို ဘယ်နှစ်ယောက် လွှတ်ထားတယ် ဆိုတာရယ်... လျူ မိသားစု၊ မင် မိသားစု တို့နဲ့ ပူးပေါင်း ကြံစည်နေတာ မျိုးတွေ ရှိသလား ဆိုတာကိုတော့ ကျွန်တော်တို့ သေချာ မသိရသေးပါဘူး ခင်ဗျာ"

ထိုစကားများကို ကြားလိုက်ရသောအခါ စုယွီ သည် နက်ရှိုင်းသော တွေးတောမှု အတွင်းသို့ နစ်မြောသွားသည်။ ထို့နောက် သူသည် တာအိုဆရာ နဂါးနက် နှင့် အခြားသူများ ထံသို့ လှည့်ကြည့်ကာ မေးလိုက်သည်။

"ကဲ... ပြောကြပါဦး။ တကယ်လို့များ ငါတို့က ဟွမ်လင်း ကျွန်း ပေါ်မှာ ခြေချချင်တယ် ဆိုရင်... ဘာလုပ်သင့်သလဲ"

"ငါတို့ က ဟွမ် မိသားစု ကို တိုက်ရိုက် သွားပြီး သိမ်းပိုက်ပစ်ရမလား... ဒါမှမဟုတ် ခဏလောက် ငြိမ်နေပြီး စောင့်ကြည့်နေရမလား... ဒါမှမဟုတ်ရင်လည်း ဟွမ်လင်း ကျွန်း ပေါ်မှာ ဆူပူ အုံကြွမှု တွေ ဖြစ်လာအောင် ဖန်တီးလိုက်ရမလား... အဲဒီလို လုပ်လိုက်ရင် ငါတို့ အတွက် အခွင့်အရေး ရလာနိုင်တယ်လေ"

တာအိုဆရာ နဂါးနက် သည် စဉ်းစား တွေးတော နေသော်လည်း၊ ဘာတစ်ခွန်းမျှ ဝင်မပြောသေးချေ။

တာအိုဆရာ ဖူကျန်း မှာမူ ခေတ္တမျှ တွေဝေသွားပြီးနောက်၊ စုယွီ အား သတိထားကာ လေသံတိုးတိုးဖြင့် ပြောလိုက်၏။

"အရှင်သခင်ကြီး... ကျွန်တော့် အမြင်ကို ပြောရရင်တော့... ဟွမ် မိသားစု ကို တိတ်တဆိတ် သွားရောက် သိမ်းပိုက်လိုက်တာ အကောင်းဆုံး ဖြစ်မယ် ထင်ပါတယ်ဗျာ။ သူတို့ကို အရှင်သခင်ကြီး ရဲ့ အုပ်ချုပ်မှု အောက်မှာ အညံ့ခံခိုင်းလိုက်ပေါ့... အဲဒီနောက်မှ ဟွမ်လင်း ကျွန်း ပေါ်က အတွင်းရေး ပြဿနာ တွေကို ဖြေရှင်းပြီး... အပြင်က ရန်သူ တွေကို ပြန်တွန်းလှန်တာ ပိုကောင်းမယ် ထင်ပါတယ်"

"အဲဒီလို နည်းလမ်း မျိုး သုံးမယ် ဆိုရင်... ကျွန်တော်တို့ အနေနဲ့ တခြား အင်အားစု ကြီးတွေ နဲ့ တိုက်ရိုက် ထိပ်တိုက် တွေ့ရမယ့် အန္တရာယ် ကို ရှောင်လွှဲနိုင်မှာ ဖြစ်သလို... သူတို့ကို လည်း နောက်ဆုတ်သွားအောင် လုပ်နိုင်ပြီး၊ အေးအေးချမ်းချမ်း နဲ့ ကိစ္စ ပြတ်သွားနိုင်ပါတယ်"

တာအိုဆရာ ကျင်းဖုန်း သည် မျက်မှောင်ကြုံ့ကာ စဉ်းစားလိုက်ပြီး ပြောသည်။

"တကယ်လို့များ ဟွမ် မိသားစု က အညံ့မခံဘဲ... ကျွန်တော်တို့ ရဲ့ ရှိနေမှုကို တခြား အင်အားစု တွေ အကုန်လုံး သိအောင် ဖွင့်ချပစ်လိုက်မယ် ဆိုရင်ရော... ဘယ်လို လုပ်မလဲ"

"အဲဒီလို ဆိုရင် ကျွန်တော်တို့ က တခြား အင်အားစု တွေရဲ့ ခြုံခို တိုက်ခိုက်တာကို ခံရနိုင်တယ်... အဲဒါက အရမ်းကို အန္တရာယ် များလွန်းတယ်"

"ကျွန်တော့် အမြင်ကို ပြောရရင်တော့... ခုနက အရှင်သခင်ကြီး ပြောသွားသလိုမျိုး ခဏလောက် ငြိမ်ပြီး စောင့်ကြည့်နေတာက အသေချာဆုံး နဲ့ အလုံခြုံဆုံး နည်းလမ်းပဲဗျ။ အဲဒီအခါကျမှ ဘယ် အင်အားစု တွေက ဟွမ်လင်း ကျွန်း ကို မျက်စိကျနေတာလဲ၊ ပြီးတော့ သူတို့ ဘယ်အတိုင်းအတာ ထိ လှုပ်ရှားမလဲ ဆိုတာကို ကျွန်တော်တို့ ရှင်းရှင်းလင်းလင်း မြင်ရမှာ"

"အဲဒီအပြင်... သူတို့ စတင် လှုပ်ရှားလာတဲ့ အချိန်ကျရင် ဟွမ် မိသားစု ရဲ့ အစွမ်းအစ တွေ နဲ့ အခြေခံ အုတ်မြစ် က ဘယ်လောက် တောင့်တင်းသလဲ ဆိုတာကိုလည်း စမ်းသပ်ပြီးသား ဖြစ်သွားမှာပေါ့"

"တိုက်မလား၊ ဒါမှမဟုတ် ဟွမ်လင်း ကျွန်း ကို သိမ်းပိုက်မလား ဆိုတာကတော့... နောက်ဆုံးကျရင် အရှင်သခင်ကြီး ရဲ့ ဆုံးဖြတ်ချက် အပေါ်မှာပဲ မူတည်နေမှာပါ။ အဲဒီလို လုပ်တာက ရှေ့တိုး နောက်ဆုတ် လုပ်ဖို့ အတွက် အခွင့်အရေး ပိုများတယ်လေ"

စကားကို ခေတ္တမျှ ရပ်တန့်လိုက်ပြီးနောက် သူက ဆက်ပြောလာ၏။

"ကျွန်တော်တို့ ကျင်း မိသားစု က ဟွမ်လင်း ကျွန်း ပေါ်မှာ ရှိနေတဲ့ အတွက်... အရှင်သခင်ကြီး အနေနဲ့ အဲဒီမှာ အခြေချဖို့ ဆိုတာ သိပ်ပြီး ခက်ခဲမယ့် ကိစ္စတော့ မဟုတ်ပါဘူး ခင်ဗျာ"

စုယွီ သည် မည်သို့မျှ ပြန်လည် မတုံ့ပြန်ဘဲ၊ တာအိုဆရာ နဂါးနက် ထံသို့ လှည့်ကြည့်ကာ မေးလိုက်သည်။

"နဂါးနက်... မင်းရော ဘယ်လို ထင်လဲ"

တာအိုဆရာ နဂါးနက် သည် ခေတ္တမျှ စဉ်းစား တွေးတော လိုက်သော်လည်း၊ တာအိုဆရာ ဖူကျန်း နှင့် တာအိုဆရာ ကျင်းဖုန်း တို့၏ အကြံပြုချက် များနှင့် ပတ်သက်၍ မည်သည့် မှတ်ချက်မျှ မပေးခဲ့ချေ။ ထို့အစား သူက ပြောလိုက်၏။

"နဂါးနက် မြစ်ကြီး ပေါ်မှာတော့လေ... ရက်စက် ကြမ်းကြုတ်မှု နဲ့ သွေးထွက်သံယို ဖြစ်မှု တွေကသာ... တခြား လူတွေ ရဲ့ လောဘတကြီး စောင့်ကြည့်နေတဲ့ အကြည့် တွေကို ဟန့်တားနိုင်တာပဲ"

"အချိန်ဆွဲပြီး ပုန်းအောင်းနေရုံ သက်သက် နဲ့တော့ ဝံပုလွေ တွေကို နောက်ဆုတ်သွားအောင် မလုပ်နိုင်ပါဘူး... ဆန့်ကျင်ဘက် အနေနဲ့ ပြောရရင်... သူတို့က ကိုယ့်ရဲ့ အားနည်းချက် ကို သိသွားပြီး အလုံးစုံ ဝင်ရောက် တိုက်ခိုက် လာကြလိမ့်မယ်"

"ဒါပေမဲ့... တကယ်လို့ ကိုယ်ကသာ ရက်စက် ကြမ်းကြုတ်မှု တွေ နဲ့ သွေးဆာနေမှု တွေကို ထုတ်ပြလိုက်မယ် ဆိုရင်တော့... ရန်သူ တချို့ကို နောက်တွန့်သွားအောင် လုပ်နိုင်လိမ့်မယ်"

အခန်း (၅၂၁) - အင်ပါယာ သင်္ချိုင်း ကျွန်းသခင် အသစ် (အပိုင်း - ၂)

"အဲဒီလို လုပ်လိုက်ရင်... ခင်ဗျား ကို လာပြီး လက်တည့်စမ်းချင်နေတဲ့ ကောင်တွေ ရှိလာရင်တောင်... ခင်ဗျား အနေနဲ့ အသာလေး ကိုင်တွယ် ဖြေရှင်းနိုင်သွားလိမ့်မယ်"

"အနည်းဆုံးတော့ ကိုယ့်ရဲ့ တကယ့် အစွမ်းအစ အစစ်အမှန် ကို ဖုံးကွယ်ထားတာထက်တော့ အများကြီး ပိုကောင်းပါတယ်"

"ကျွန်တော် ယုံကြည်တာ တစ်ခုက... နဂါးနက် မြစ်ကြီး ပေါ်မှာပဲ ဖြစ်ဖြစ်၊ ဒီ သမုဒ္ဒရာ ကြီးထဲမှာပဲ ဖြစ်ဖြစ်... အရာအားလုံး က တောတွင်း ဥပဒေ အတိုင်းပဲ သွားနေတာ။ ဘယ်သူ ပိုပြီး အစွမ်းထက်လဲ... အဲဒီလူ က စည်းမျဉ်း တွေကို သတ်မှတ်တဲ့ သူပဲ"

"တကယ်လို့ ကိုယ့်ရဲ့ အစွမ်းအစ က မလုံလောက်ဘူး ဆိုရင်တော့... ဘာမှ ဆွေးနွေး ငြင်းခုံ နေစရာ အကြောင်း မရှိဘူး။ ကိုယ့်အသက် ကိုယ် ကာကွယ်နိုင်ဖို့ အတွက် ခေါင်းငုံ့ပြီး ဝင်ဆံ့အောင် နေတာက အကောင်းဆုံးပဲ"

"ဒါပေမဲ့... တကယ်လို့ ကိုယ့်ရဲ့.. အစွမ်းအစ က လုံလောက်နေမယ်၊ ပြိုင်ဘက် တွေ အားလုံးကို အပြတ်အသတ် ချေမှုန်းနိုင်တဲ့ အထိ စွမ်းအား ရှိနေမယ် ဆိုရင်... ဘာလို့ သွားပြီး ပုန်းကွယ် နေရဦးမှာလဲ"

"တကယ်လို့ မင်းရဲ့ ရန်သူ က မင်းကို မကြောက်ဘူး ဆိုရင်... မင်း က ဘယ်လို လုပ်ပြီး ငြိမ်းချမ်း တည်ငြိမ်မှု ကို ရနိုင်တော့မှာလဲ"

စုယွီ သည် မျက်ခုံး တစ်ချက် ပင့်လိုက်ပြီး ပြောသည်။

"တိုက်ရိုက် သွားပြီး သိမ်းပိုက်လိုက်ဖို့ ပေါ့"

တာအိုဆရာ နဂါးနက် သည် အလွန်တရာ ရိုသေ ကျိုးနွံစွာဖြင့် ဦးညွှတ်လိုက်ပြီး ပြန်ဖြေသည်။

"ဟွမ် မိသားစု ကို တိုက်ရိုက် သွားပြီး သိမ်းပိုက်လိုက်ပါ... ဟွမ်လင်း ကျွန်း ကို လာပြီး ချောင်းမြောင်း အကဲခတ်နေတဲ့ ကောင်တွေ အားလုံးကို လည်း... သတ်ပစ်လိုက်ပါ"

ထိုသို့ ပြောပြီးနောက် တာအိုဆရာ နဂါးနက် သည် ခေတ္တမျှ တွန့်ဆုတ် သွားပြီးမှ ဆက်ပြောလာ၏။

"ဒါပေမဲ့... ဒါက ခုနက တာအိုမိတ်ဆွေ ကျင်းဖုန်း ပြောသွားသလိုမျိုး... အဲဒီ အင်အားစု တွေရဲ့ နောက်ကွယ်က မူလဝိညာဉ် အဆင့် အရှင်သခင်ကြီး တွေ ရဲ့ လက်တုံ့ပြန်မှု ကို ခင်ဗျား က မကြောက်ဘူး ဆိုတဲ့ အခြေအနေ မျိုးမှာမှ လုပ်သင့်တာပါ"

"တကယ်လို့များ သူတို့ရဲ့ နောက်ကွယ်က ပုန်းအောင်းနေတဲ့ အရှင်သခင်ကြီး တွေ ထွက်လာခဲ့မယ် ဆိုရင်တော့... အဲဒါက..."

တာအိုဆရာ နဂါးနက် သည် စုယွီ ကို သတိထားကာ လှမ်းကြည့်လိုက်ပြီး စကားကို ဆက်မပြောတော့ဘဲ ရပ်လိုက်သည်။

တာအို ရုပ်သေး သည် ထိုအချက်ကို သေချာစွာ စဉ်းစား တွေးတော လိုက်၏။

တာအိုဆရာ ကျင်းဖုန်း ပြောသွားသော ထို အင်အားစု များ၏ နောက်ကွယ်တွင် ရှိနေသည့် မူလဝိညာဉ် အဆင့် အရှင်သခင်ကြီး များနှင့် ပတ်သက်၍မူ... သူ သိပ်ပြီး ကြောက်ရွံ့နေခြင်း မရှိလှချေ။

အဘယ်ကြောင့်ဆိုသော် ဟွမ်လင်း ကျွန်း ၏ မူလ ဘိုးဘေးကြီး ဖြစ်သော ဟွမ်ချန်လုံ ပင်လျှင် သိပ်ပြီး အစွမ်းထက်လှသည် မဟုတ်ချေ။ သူသည် မူလဝိညာဉ် အဆင့် (၁) တွင်သာ ရှိသော သာမန် အရှင်သခင်ကြီး တစ်ပါးသာ ဖြစ်ကောင်း ဖြစ်နိုင်သည်။

ထိုကဲ့သို့သော သာမန် အရှင်သခင်ကြီး တစ်ပါး ၏ ရှိနေမှု ကပင် ထို အင်အားစု များကို သတိထား နောက်တွန့် သွားစေရန် လုံလောက် ခဲ့သည် မဟုတ်ပါလော။ သူတို့သည် ဟွမ်ချန်လုံ အသက်ရှင်လျက် ရှိသေးသလား၊ ပြီးတော့ သူတို့ အနေဖြင့် ဟွမ်လင်း ကျွန်း ကို ဝင်ရောက် သိမ်းပိုက်နိုင်မလား ဆိုသည်ကို သေချာစွာ စမ်းသပ် အကဲခတ် နေကြရသေး၏။

ဤအချက် တစ်ခုတည်း ကပင်... ထို အင်အားစု ကြီးများ ဆိုသည့် အဖွဲ့အစည်း များ၏ နောက်ကွယ်ရှိ မူလဝိညာဉ် အဆင့် အရှင်သခင်ကြီး များ သည်လည်း သိပ်ပြီး ကြောက်မက်ဖွယ် ကောင်းလောက်အောင် အစွမ်းမထက်နေကြကြောင်း သက်သေပြနေသည်။

သူ၏ လက်ရှိ ရုပ်သေး ခန္ဓာကိုယ် ၏ စွမ်းအား များ၊ ဟင်းလင်းပြင် စွမ်းအား များကို ထိန်းချုပ်နိုင်စွမ်း များ၊ သူ၏ မှော်လက်နက် များ နှင့် အခြားသော နည်းလမ်း များကို ပေါင်းစပ် အသုံးပြုလိုက်မည် ဆိုပါက...

မူလဝိညာဉ် အဆင့် (၂) ရှိသော အရှင်သခင်ကြီး တစ်ပါး နှင့် ရင်ဆိုင်ရမည် ဆိုလျှင်တောင်မှ... သူတို့ကို အနိုင်ယူပြီး နောက်ဆုတ်သွားအောင် ပြုလုပ်နိုင်စွမ်း ရှိကြောင်း.. ယုံကြည်ထား၏။

မူလဝိညာဉ် အဆင့် (၃) ရှိသော အရှင်သခင်ကြီး မျိုး ဆိုလျှင်တော့...

သူ၏ ဤ ရုပ်သေး ခန္ဓာကိုယ် က အနိုင်မတိုက်နိုင်လျှင်တောင်မှ... ပြဿနာ မရှိဘဲ အလွယ်တကူ လွတ်မြောက်သွားနိုင်စွမ်း ရှိပါသည်။

ထိုကဲ့သို့သော နည်းလမ်း များဖြင့်၊ သူသည် တစ်ဖက်လူ ကို စားပွဲဝိုင်းတွင် ထိုင်ကာ ဆွေးနွေး ညှိနှိုင်းလာစေရန် အတင်းအကျပ် ဖိအားပေးနိုင်ပြီး၊ သူ့အား ဆန့်ကျင် တိုက်ခိုက်ခြင်း မပြုရဲအောင် ဟန့်တားနိုင်မည်ပင်။

'ဒါက ကျွန်းလေး တစ်ကျွန်း အတွက် ပါကွာ... သေရေးရှင်ရေး ရန်ငြိုးကြီး တွေမှ မဟုတ်တာ။ အားလုံးက ကိုယ့်အစွမ်းအစ နဲ့ ကိုယ် ရှိနေကြတာပဲ... ဘာလို့ အသေအလဲ ဖြစ်တဲ့ အထိ အခြေအနေကို တွန်းပို့နေကြတော့မှာလဲ'

ထို့အပြင် သူ၏ တာအို ရုပ်သေး အတွက်... အသက်အန္တရာယ် ခြိမ်းခြောက်မှု ဆိုသည်မှာ လုံးဝ မရှိသလောက် ပင် ဖြစ်သည်။

သူ၊ စုယွီသည် ဤ သမုဒ္ဒရာ ဒေသ တစ်ခုလုံးတွင် သူ စိတ်တိုင်းကျ လွတ်လပ်စွာ သောင်းကျန်း သွားလာနိုင်၏။

သူသည် မည်သည့် ကိစ္စကိုမျှ ပူပန် သောက ရောက်နေစရာ မလိုချေ။

ဟွမ် မိသားစု ကို ဝင်ရောက် သိမ်းပိုက်ရေး ကိစ္စ နှင့် ပတ်သက်၍မူ... တာအို ရုပ်သေး အနေဖြင့် ထိုကိစ္စမှာ လုံးဝ မခက်ခဲလှပါ။

ဟွမ် မိသားစု တွင် အခြေခံ အုတ်မြစ် အချို့ ရှိနေပြီး၊ သူတို့၏ မိသားစု နယ်မြေ အတွင်း၌ အစွမ်းထက်သော အခင်းအကျင်း ကြီး တစ်ခုကို ခင်းကျင်းထားသည် ဆိုလျှင်တောင်မှ... သူသည် အလွယ်တကူပင် ခိုးဝင်သွားပြီး တစ်ဖက်လူ ၏ ဆုံးဖြတ်ချက် ချမှတ်သူ များကို အရှင် ဖမ်းဆီးနိုင်စွမ်း ရှိသည်။

တကယ့် ပြဿနာ က... ဟွမ် မိသားစု ကို သိမ်းပိုက်ပြီးသည့် နောက်ပိုင်းမှာ အပြင်ဘက် ကနေ ချောင်းမြောင်းနေသည့် ရန်သူ တွေကို ဖြေရှင်းရမယ့် ကိစ္စပင် ဖြစ်လောက်၏။

သေချာစွာ စဉ်းစား တွေးတော ပြီးနောက်၊ တာအို ရုပ်သေး သည် တာအိုဆရာ နဂါးနက်၊ တာအိုဆရာ ဖူကျန်း နှင့် တာအိုဆရာ ကျင်းဖုန်း တို့ကို ကြည့်ကာ ပြောလိုက်သည်။

"ဒါဆိုရင်... ဟွမ် မိသားစု ကို တိုက်ရိုက် သွားပြီး သိမ်းပိုက်လိုက်မယ်။ အဲဒီနောက်မှာ နဂါးနက် က ဟွမ်လင်း ကျွန်း ပေါ်က ကျင့်ကြံသူ တွေကို ကုန်သွယ်ရေး အသင်း နဲ့ လာရောက် ပူးပေါင်းအောင် စည်းရုံး သိမ်းသွင်းရမယ်။ နာခံတဲ့ သူကို အသက်ရှင်ခွင့် ပေးမယ်... ပုန်ကန်တဲ့ သူကို သတ်မယ်"

"ဖူကျန်း နဲ့ ကျင်းဖုန်း... မင်းတို့ နှစ်ယောက် က နဂါးနက် ကို ကူညီပေးရမယ်။ အထူးသဖြင့် မင်း၊ ကျင်းဖုန်း... မင်း က ကျင်း မိသားစု ရဲ့ အင်အား ကို ဦးဆောင်ပြီး၊ တခြား အင်အားစု တွေကို နှိမ်နှင်းဖို့ နဲ့ ဟွမ်လင်း ကျွန်း ပေါ်က အခြေအနေ တွေကို တည်ငြိမ်အောင် လုပ်ဖို့ အတွက် နဂါးနက် ကို ကူညီပေးရမယ်"

"ဟွမ်လင်း ကျွန်း ကို ကုန်းယွဲ့ ကုန်သွယ်ရေး အသင်း ရဲ့ ကိုယ်ပိုင် ကျွန်း တစ်ကျွန်း ဖြစ်လာအောင် ပြောင်းလဲပစ်ရမယ်"

'ပြီးတော့ ငါ... တာအိုဆရာ အရိပ်နီ က ဟွမ်လင်း ကျွန်း ရဲ့ ကျွန်းသခင် အသစ် ဖြစ်လာလိမ့်မယ်ကွ'

တာအိုဆရာ နဂါးနက်၊ တာအိုဆရာ ဖူကျန်း နှင့် တာအိုဆရာ ကျင်းဖုန်း တို့ သုံးဦးစလုံး သည် သူတို့၏ ရင်ထဲတွင် ကျောချမ်းသွားသည်ကို ခံစားလိုက်ကြရသည်။ သူတို့ သုံးဦးစလုံး သည် သူတို့၏ ရှေ့မှောက်တွင် ရှိနေသော ပုဂ္ဂိုလ်မှာ... မည်သူမှန်း မသိရသော အစွမ်းထက် တည်ရှိမှု တစ်ခု ၏ ရုပ်သေး ခန္ဓာကိုယ် မျှသာ ဖြစ်ပြီး၊ စစ်မှန်သော ခန္ဓာကိုယ် အစစ်အမှန် မဟုတ်ကြောင်းကို ကောင်းစွာ သိရှိထားကြ၏။

ဤ ရုပ်သေး ခန္ဓာကိုယ် တစ်ခုတည်း ကပင်... မူလဝိညာဉ် အဆင့် အရှင်သခင်ကြီး တစ်ပါး ၏ စွမ်းအား များနှင့် ညီမျှနေတော့၏။

တကယ်လို့များ နောက်ကွယ်က ကြိုးကိုင်နေတဲ့ ပုဂ္ဂိုလ်ကြီး သာ ကိုယ်တိုင် ထွက်လာခဲ့မယ် ဆိုရင်... အဲဒါက မူလဝိညာဉ် အဆင့် အရှင်သခင်ကြီး နှစ်ပါး တောင် ဖြစ်သွားမှာပေါ့။

ထို့အပြင်... ထို နောက်ကွယ်မှ ပုဂ္ဂိုလ်ကြီး ၏ စွမ်းအား များမှာ ယခုထက်ပင် ပို၍ ကြောက်မက်ဖွယ် ကောင်းနေနိုင်သေးသည် မဟုတ်ပါလော။

ယခုလေးတင် ပြုလုပ်ခဲ့သော ဆွေးနွေးမှု များ အရ၊ သူတို့၏ သခင် ဖြစ်သော ဤ တာအို ရုပ်သေး သည် ဟွမ်လင်း ကျွန်း ကို စောင့်ကြည့်နေကြသော ထို အင်အားစု ကြီးများ ကို လည်းကောင်း၊ သူတို့၏ နောက်ကွယ်ရှိ မူလဝိညာဉ် အဆင့် အရှင်သခင်ကြီး များ ကို လည်းကောင်း... လုံးဝ (လုံးဝ) ကြောက်ရွံ့နေခြင်း မရှိကြောင်းကို အထင်အရှား သိမြင်နိုင်သည်။

ဤအချက်ကို ထောက်ရှုခြင်း အားဖြင့်၊ တာအို ရုပ်သေး ၏ နောက်ကွယ်မှ ပုဂ္ဂိုလ်ကြီး ၏ စွမ်းအား မည်မျှ ကြီးမားနိုင်မည်ကို သူတို့ အကြမ်းဖျင်း ခန့်မှန်း သိရှိနိုင်ကြ၏။

ဒါပေါ့လေ။

တာအို ရုပ်သေး ၏ နောက်ကွယ်မှ ပုဂ္ဂိုလ်ကြီး ပိုပြီး အစွမ်းထက်လာလေလေ... သူတို့ ပိုပြီး စိတ်လှုပ်ရှား ဝမ်းသာရလေလေ ပင် ဖြစ်သည်။

အဘယ်ကြောင့်ဆိုသော် ယခုအခါ သူတို့ သုံးဦးစလုံး သည် တာအို ရုပ်သေး ၏ လက်အောက်သို့ ဝင်ရောက် ခစားနေကြပြီ ဖြစ်ပြီး၊ တာအို ရုပ်သေး ကို သူတို့၏ သခင် အဖြစ် သတ်မှတ်ကာ အလုပ်အကျွေး ပြုနေကြပြီ ဖြစ်သောကြောင့်တည်း။

သူတို့ သည် ဂုဏ်ကျက်သရေ နှင့် အရှက်ကွဲမှု များကို အတူတကွ မျှဝေ ခံစားကြရမည့် အသိုက်အဝန်း တစ်ခု ဖြစ်လာခဲ့ကြလေပြီ။

သူတို့ နောက်ကွယ် က သခင်ကြီး ပိုပြီး အစွမ်းထက်လာလေလေ... သူတို့ အတွက် ရနိုင်မယ့် အကျိုးအမြတ် တွေ က ပိုပြီး ကြီးမားလာလေပါပင်။

သို့သော်ငြားလည်း... တကယ်လို့များ ထို တာအို ရုပ်သေး ၏ နောက်ကွယ်မှ ကြိုးကိုင်နေသော ပုဂ္ဂိုလ်ကြီး မှာ ရွှေအမြုတေ အဆင့် (၆) မျှသာ ရှိသေးသော လူငယ်လေး တစ်ဦး ဖြစ်ကြောင်းကို သူတို့ သိရှိသွားကြမည် ဆိုပါက... သူတို့၏ မျက်နှာ အမူအရာ များမှာ မည်သို့များ ဖြစ်သွားကြမည်နည်း။

တာအိုဆရာ နဂါးနက်၊ တာအိုဆရာ ဖူကျန်း နှင့် တာအိုဆရာ ကျင်းဖုန်း တို့သည် နေရာမှ မတ်တပ် ထရပ်လိုက်ကြပြီး၊ တာအို ရုပ်သေး အား ရိုသေ ကျိုးနွံစွာ ဦးညွှတ်ကာ ပြိုင်တူ ဖြေကြားလိုက်ကြ၏။

"ဟုတ်ကဲ့ပါ ..အရှင်သခင်ကြီး"

တာအို ရုပ်သေး က လက်တစ်ချက် ဝှေ့ယမ်းလိုက်ပြီး ပြောသည်။

"ထိုင်ကြပါ"

"ကဲ... အခု ငါတို့ ဟွမ်လင်း ကျွန်း ကို ရောက်သွားပြီးရင် ဘာတွေ ဆက်လုပ်ကြမလဲ၊ ပြီးတော့ ဟွမ် မိသားစု ကို သိမ်းပိုက်ပြီးတဲ့ နောက်ပိုင်းမှာ ဘယ်လို ရှေ့ဆက်ကြမလဲ ဆိုတာကို ဆွေးနွေးကြတာပေါ့။ အစီအစဉ် တစ်ခုလောက် ဆွဲကြတာပေါ့"

တာအိုဆရာ နဂါးနက် နှင့် အခြားသူများ ၏ အသေးစိတ် ရှင်းလင်း တင်ပြမှု များ အောက်တွင်၊ ဖြစ်လာနိုင်သော ပြဿနာ များ အားလုံးကို တစ်ခုချင်းစီ ထောက်ပြ ဆွေးနွေးခဲ့ကြသည်။ ထို့နောက် သူတို့ သုံးဦး နှင့် တာအို ရုပ်သေး တို့၏ တွေးတော ကြံဆမှု များကို ပေါင်းစပ်ကာ၊ အကောင်းဆုံး အဖြေ တစ်ခုကို ရွေးချယ် သတ်မှတ်ခဲ့ကြ၏။

ဥပမာအားဖြင့်၊ တာအိုဆရာ ကျင်းဖုန်း က ဟွမ် မိသားစု ၏ ဘိုးဘေး နယ်မြေ တွင် ခင်းကျင်းထားသော ဧရာမ အခင်းအကျင်း ကြီးမှာ ပြဿနာ တစ်ခု ဖြစ်နိုင်ကြောင်း ထောက်ပြခဲ့သည်။

တာအို ရုပ်သေး က ထိုကိစ္စကို သူကိုယ်တိုင် ကိုင်တွယ် ဖြေရှင်းမည် ဖြစ်ကြောင်း၊ အချိန်တန်သောအခါ သူသည် အခင်းအကျင်း ကြီး အတွင်းသို့ တိုက်ရိုက် ဝင်ရောက် ချိုးဖျက်မည် ဖြစ်ပြီး၊ သူတို့ သုံးဦး အနေဖြင့် စစ်သင်္ဘောကြီး များဖြင့် အတင်း ဝင်ရောက်ကာ ဟွမ် မိသားစု ကို ဝင်ရောက် ထိန်းချုပ်ရုံသာ ဖြစ်ကြောင်း ပြောကြားခဲ့သည်။

ထိုစကားကို ကြားလိုက်ရသောအခါ တာအိုဆရာ ကျင်းဖုန်း မှာ ခေတ္တမျှ ဆွံ့အ မှင်သက် သွားခဲ့၏။

'ဒီလောက် လွယ်လွယ်ကူကူ နဲ့ ဖြေရှင်းလို့ ရသွားတာပဲလား'

ထို့နောက် ဥပမာ တစ်ခု အနေဖြင့်... တကယ်လို့များ ကျွန်းပေါ်ရှိ လျူ မိသားစု နှင့် မင် မိသားစု တို့က ပြင်ပ ရန်သူများ နှင့် ပူးပေါင်းကာ သူတို့ကို ဝင်ရောက် တိုက်ခိုက်လာမည် ဆိုပါက...

တာအို ရုပ်သေး က ရွှေအမြုတေ အဆင့် အထက် ကျင့်ကြံသူ များကို သူ တာဝန်ယူ ဖြေရှင်းမည် ဖြစ်ပြီး၊ ရွှေအမြုတေ အဆင့် အောက်ရှိ ကျင့်ကြံသူ များကိုမူ သူတို့ သုံးဦး က တာဝန်ယူ ဖြေရှင်းရမည် ဖြစ်ကြောင်း ပြောကြားခဲ့သည်။

“သတ်သင့်တဲ့ ကောင်ကို သတ်... စည်းရုံး သိမ်းသွင်းလို့ ရမယ့် ကောင်ကို စည်းရုံး... လုံးဝ တွန့်ဆုတ် မနေနဲ့”

ထိုစကားများကို ကြားလိုက်ရသောအခါ တာအိုဆရာ နဂါးနက် နှင့် အခြားသူများ မှာ တာအို ရုပ်သေး အား မရိုသေဘဲ မနေနိုင်အောင် ဖြစ်သွားကြရသည်။

'ရွှေအမြုတေ အဆင့် အထက် က သူ့တာဝန်... ရွှေအမြုတေ အဆင့် အောက် က ငါတို့ တာဝန် တဲ့လား…’

အခန်း (၅၂၂) - အင်ပါယာ သင်္ချိုင်း ကျွန်းသခင် အသစ် (အပိုင်း - ၃)

ဤစကားမှာ အလွန်တရာ အာဏာပါပြီး ပြတ်သားလွန်းလှသည်။

သူတို့ ဆွေးနွေးနေကြစဉ် အချိန်များ မည်သို့ ကုန်လွန်သွားမှန်းပင် မသိလိုက်ကြချေ။

စစ်သင်္ဘောမှာ အနိမ့်ဆုံး အဆင့်သာ ဖြစ်ပြီး၊ ၎င်းပေါ်ရှိ အခင်းအကျင်းမှာလည်း တတိယအဆင့် အမြင့်ပိုင်းသာ ရှိလေရာ အရှိန်အဟုန်မှာ သိပ်မမြန်လှချေ။ တူညီသော အဆင့်ရှိ အခြား ယာဉ်ပျံ အများစုထက်ပင် ပို၍ နှေးကွေးနေသေး၏။

သို့သော် ပင်လယ်ပြင်ထက်တွင် ရွက်လွှင့်နေသော ဧရာမ ကုန်တင်သင်္ဘောကြီးများ နှင့် နှိုင်းယှဉ်လျှင်မူ၊ ဤ စစ်သင်္ဘော ၏ အရှိန်မှာ ဆယ်ဆမက ပိုမို မြန်ဆန်နေသေးသည်ပင်။

*

သုံးလခန့် ကြာမြင့်ပြီးနောက်၊

စစ်သင်္ဘောကြီး သည် ဟွမ်လင်း ကျွန်း အနီးရှိ ပင်လယ်ပြင် ဒေသသို့ ချဉ်းကပ်လာခဲ့လေပြီ။ ဤ အလယ်အလတ်အဆင့် ကျွန်းကြီး ၏ အပြင်ဘက် ပတ်လည်တွင် ကျွန်းငယ်လေးများ၊ သို့မဟုတ် ကျောက်ဆောင် ကျွန်းလေးများ တည်ရှိနေသည်။

ထိုကျွန်းငယ်များ ပေါ်တွင် အစီအရင် အချို့ကို ပြင်ဆင်ထားပြီး၊ ကင်းစောင့်ရန် လူများ ချထားလေရာ... ဤ ပင်လယ်ပြင် ဒေသ တစ်ခုလုံးမှာ ဟွမ်လင်း ကျွန်း ၏ စောင့်ကြည့် ကွပ်ကဲမှု အောက်တွင် အပြည့်အဝ ရှိနေသည်။

ကောင်းကင်ယံ ထက်မှ စစ်သင်္ဘောကြီး မှာ အရှိန် လုံးဝ မလျှော့ဘဲ ဟွမ်လင်း ကျွန်း ဆီသို့ တည့်တည့်မတ်မတ် ဦးတည် လာသည်ကို မြင်လိုက်ရသော အခိုက်အတန့်တွင်၊ ကင်းစောင့်ရန် တာဝန်ကျနေသော ကျင့်ကြံသူများ ၏ မျက်နှာ အမူအရာများမှာ သိသိသာသာ ပြောင်းလဲသွားကြ၏။

"ဝှစ်... ဝှစ်... ဝှစ်..."

အခြေခံ တည်ဆောက်ခြင်း အဆင့် ကျင့်ကြံသူ အနည်းငယ် သည် သူတို့၏ မှော်လက်နက် ဓားများကို ကိုင်ဆောင်ကာ ကောင်းကင်သို့ ပျံတက်လာကြပြီး၊ စစ်သင်္ဘောကြီး ၏ လမ်းကြောင်းကို ပိတ်ဆို့လိုက်ကြ၏။

ထိုအထဲမှ တစ်ယောက် က တင်းမာသော လေသံဖြင့် အော်ဟစ်လိုက်သည်။

"ရှေ့က စစ်သင်္ဘော... ရပ်လိုက်စမ်း။ ဒီနေရာ က ဟွမ်လင်း ကျွန်း ရဲ့ ပင်လယ်ပြင် နယ်နိမိတ် ဖြစ်တယ်။ ကောင်းကင် ကနေ ဖြတ်ပျံတဲ့ ဘယ် ယာဉ်ပျံ၊ ဘယ် စစ်သင်္ဘော ကိုမှ ခွင့်မပြုဘူး။ ချက်ချင်း ပင်လယ်ပြင် ပေါ် ဆင်းပြီး ဆိပ်ကမ်း ဘက်ကိုပဲ ရွက်လွှင့် သွားကြ"

"ဝီ..."

သို့သော် နောက်တစ်စက္ကန့် တွင်မူ၊ စစ်သင်္ဘောကြီး ပေါ်မှ အလင်းတန်း တစ်ခု ပစ်လွှတ် ထွက်ပေါ်လာပြီး သူတို့၏ ရှေ့တည့်တည့် သို့ ကျရောက်လာသည်။

တစ်ချိန်တည်းမှာပင် တာအိုဆရာ ကျင်းဖုန်း ၏ အသံ ထွက်ပေါ်လာပြီး၊ ပြင်းထန်စွာ ဟိန်းဟောက် ကြိမ်းမောင်းလိုက်၏။

"ငါ က ကျင်း မိသားစု ရဲ့ ဘိုးဘေး... ပြီးတော့ ဟွမ်လင်း ကျွန်း ရဲ့ အထွတ်အမြတ် တာအိုဆရာ ကျင်းဖုန်း ပဲ။ ဘိုးဘေးကြီး က ငါ့ကို အရေးကြီး ဧည့်သည်တော် တွေကို ခေါ်လာဖို့ အမိန့်ပေးထားတာ... အခုချက်ချင်း ဖယ်ကြစမ်း"

"မင်းတို့ ကများ လမ်းလာပိတ်ရဲတယ်... သေချင်နေကြတာလား"

'ဒီကောင်တွေ အချိုးကို မပြေဘူး... ငါ့အသံ ကြားတာတောင် လမ်းမဖယ်သေးဘူး... သခင်ကြီး ရှေ့မှာ ငါ့မျက်နှာကို အိုးမဲ သုတ်နေတာပဲ'

ထို အလင်းတန်းလေး မှာ ဟွမ်လင်း ကျွန်း မှ ဟွမ် မိသားစု ၏ ဘိုးဘေးကြီး ဟွမ်ချန်လုံ ၏ အမှတ်အသား တံဆိပ်ပြား ပင် ဖြစ်သည်။ ၎င်းသည် ယနေ့ခေတ် ဟွမ်လင်း ကျွန်း ကုန်သွယ်ရေး အသင်း ၏ အမြင့်ဆုံး ဘိုးဘေးကြီး ကို ကိုယ်စားပြုပြီး၊ ဟွမ်လင်း ကျွန်း ပေါ်ရှိ ကျင့်ကြံသူ တိုင်း က ၎င်းကို ကောင်းစွာ သိရှိ မှတ်မိကြ၏။

ထို့အပြင် ကျွန်းပေါ်ရှိ ကျင်း မိသားစု ၏ ဘိုးဘေး ဖြစ်သော ရွှေအမြုတေ အဆင့် (၉) တွင် ရှိသည့် တာအိုဆရာ ကျင်းဖုန်း ကိုလည်း သူတို့ ကောင်းစွာ သိကြ၏။

ထို့ကြောင့် သူတို့၏ ရှေ့မှောက်တွင် ဘိုးဘေးကြီး ၏ တံဆိပ်ပြား ပေါ်လာသည်ကို မြင်လိုက်ရသောအခါ၊ ကျင့်ကြံသူ များ၏ မျက်နှာများမှာ ချက်ချင်းပင် ပျက်ယွင်းသွားကြ‌တော့သည်။

တာအိုဆရာ ကျင်းဖုန်း ၏ ကြိမ်းမောင်းသံ ကို ကြားလိုက်ရသောအခါ၊ သူတို့၏ မျက်နှာများမှာ သွေးဆုတ်သွားသကဲ့သို့ ဖြူရော်သွားကြပြီး၊ အကြွင်းမဲ့ ထိတ်လန့် ကြောက်ရွံ့မှုများ ပြည့်နှက်သွားသည်။

"အရှင်သခင်ကြီး... ဒေါသ ထိန်းပါ... ဒေါသ ထိန်းပါ ခင်ဗျာ"

"ကျွန်တော်တို့ မျက်စိရှင်ရှင် မထားမိတာပါ... အခုချက်ချင်း လမ်းဖယ်ပေးပါ့မယ် ခင်ဗျာ"

'သေစမ်း... ငါတို့တော့ သွားပြီ။ ဘိုးဘေးကြီး ရဲ့ တံဆိပ်ပြားကြီး ပါလာမှတော့ ဘယ်ကောင် က တားရဲတော့မှာလဲ'

အခြေခံ တည်ဆောက်ခြင်း အဆင့် ကျင့်ကြံသူ များသည် ထိတ်လန့်တကြား နောက်ဆုတ်သွားကြပြီး၊ သူတို့ တာဝန်ကျရာ ကျွန်းငယ်လေး များဆီသို့ အလျင်စလို ပြန်ဆင်းသွားကြ၏။ စစ်သင်္ဘောကြီး ကောင်းကင်ယံ မှ ဖြတ်ကျော်ကာ ဟွမ်လင်း ကျွန်း ဆီသို့ ပျံသန်း သွားသည်ကို မြင်လိုက်ရမှသာ၊ သူတို့သည် သေမင်း ၏ တံခါးဝ မှ သီသီလေး လွတ်မြောက်လာခဲ့ရသလို ခံစားလိုက်ရသည်။ နဖူးမှ ချွေးစေး များကို သုတ်ဖယ်ရင်း၊ သူတို့၏ ရင်ထဲတွင် ကြောက်စိတ်များ မပြယ်နိုင်အောင် ဖြစ်နေကြ၏။

သူတို့ထဲမှ တစ်ယောက် က တီးတိုး ရေရွတ်လိုက်သည်။

"ဘိုးဘေးကြီး က ဘာလို့ တာအိုဆရာ ကျင်းဖုန်း ကို စစ်သင်္ဘောကြီး တစ်စင်း ခေါ်လာခွင့် ပေးလိုက်ရတာလဲ... အရင်က ဒီလိုမျိုး တစ်ခါမှ မရှိခဲ့ဖူးပါဘူး"

"ပြီးတော့... ဘိုးဘေးကြီး က အချိန် အတန်ကြာ ခရီးထွက်သွားမယ် လို့ ပြောထားတာ မဟုတ်ဘူးလား။ တလောကတောင် သူ့ကို တစ်ခုခု ဒုက္ခရောက်သွားပြီ လို့ ကောလာဟလ တွေ ထွက်နေသေးတာ"

အခြား တစ်ယောက် က သက်ပြင်းချကာ ဝင်ပြောသည်။

"အာ... ဘယ်သူက ဂရုစိုက်နေမှာလဲ။ တာအိုဆရာ ကျင်းဖုန်း က ဘိုးဘေးကြီး ရဲ့ တံဆိပ်ပြား ကို ကိုင်ပြီး ရှေ့ကနေ လမ်းပြ လာမှတော့... ငါတို့က သွားပြီး တားလို့ ဘယ်ရပါ့မလဲ။ ဘိုးဘေးကြီး က အပြင်က အကူအညီ တွေများ ဖိတ်ခေါ်လာတာ လား မသိပါဘူးကွာ"

"မကြာသေးခင်ကမှ ကုန်သွယ်ရေး အသင်း က လုံခြုံရေး တွေ ပိုချထားဖို့ အမိန့် ထုတ်ထားတယ် မဟုတ်ဘူးလား... တစ်ခုခုတော့ ပြဿနာ အကြီးအကျယ် ဖြစ်တော့မယ့် ပုံပဲ"

အခြေခံ တည်ဆောက်ခြင်း အဆင့် ကျင့်ကြံသူ များမှာ သူတို့ အချင်းချင်း ကြောက်လန့်တကြား တီးတိုး ပြောဆိုနေကြ၏။

သူတို့ထံမှ ခွင့်ပြုချက် ရရှိသွားပြီ ဖြစ်သဖြင့်၊ အခြားသော ကျွန်းငယ်များတွင် ကင်းစောင့်နေကြသည့် ကျင့်ကြံသူ များသည်လည်း စစ်သင်္ဘောကြီး ကို လုံးဝ မတားဆီးဝံ့ကြတော့ချေ။

စစ်သင်္ဘောကြီး ပေါ်တွင်မူ၊

ဤအခိုက်အတန့်တွင် တာအို ရုပ်သေး သည် တာအိုဆရာ နဂါးနက်၊ တာအိုဆရာ ဖူကျန်း နှင့် တာအိုဆရာ ကျင်းဖုန်း တို့ကို စစ်သင်္ဘော ၏ ကုန်းပတ်ပေါ်သို့ ခေါ်ဆောင်လာခဲ့ပြီး၊ ရှေ့ရှိ ဧရာမ ကျွန်းကြီး ကို အပေါ်မှ စီးမိုး ကြည့်ရှုနေသည်။

၎င်းကို ကျွန်း တစ်ကျွန်း ဟု ခေါ်ဆိုကြသော်ငြားလည်း၊ ၎င်း၏ အမှန်တကယ် အကျယ်အဝန်းမှာ တာ့ယွဲ့ နယ်မြေ ၏ ထက်ဝက်ခန့်ပင် ရှိမည်ဟု ခန့်မှန်းရပြီး၊ မျက်စိတစ်ဆုံး ကျယ်ပြန့်နေလေ၏။

အောက်ဘက်ရှိ ဟွမ်လင်း ကျွန်း ပေါ်တွင် ဧရာမ ဆိပ်ကမ်းကြီး တစ်ခုကို တည်ဆောက်ထားသည်။ ၎င်းမှာ အလွန်တရာ စည်ကား သိုက်မြိုက် နေသည်။ အချိန်အခါ အားလျော်စွာ ကြီးမားသော ကုန်သွယ်ရေး သင်္ဘောအုပ်စု ကြီးများ သည် ဆိပ်ကမ်း သို့ ဝင်ရောက် ဆိုက်ကပ်ကာ အနားယူခြင်း၊ ရိက္ခာ ဖြည့်တင်းခြင်း များ ပြုလုပ်ကြသလို... ဟွမ်လင်း ကျွန်း ကို ကြားခံ စခန်း တစ်ခု အဖြစ် အသုံးပြုကာ အခြားသော သင်္ဘောအုပ်စု များ နှင့် ကုန်သွယ်မှု များ ပြုလုပ်ကြ၏။

အဘယ်ကြောင့်ဆိုသော်... သင်္ဘောအုပ်စု တစ်ခု အနေဖြင့် ကုန်းမြေမကြီး မှနေ၍ ဟွမ်လင်း ကျွန်း သို့ အမြန်ဆုံး အရှိန်နှုန်း ဖြင့် ရွက်လွှင့်မည် ဆိုလျှင်ပင် အချိန် တစ်နှစ်ခန့် ကြာမြင့်မည် ဖြစ်သောကြောင့်တည်း။

အကယ်၍ သူတို့ အနေဖြင့် ပင်လယ်ပြင်ရှိ အခြားသော ဒေသများသို့ ဆက်လက် ခရီးဆက်လိုပါက... သာမန် သင်္ဘောအုပ်စု တစ်ခု အတွက် ထိုသို့ ပြုလုပ်ရန်မှာ လုံးဝ လက်တွေ့ မဆန်လှချေ။

ထို့ကြောင့် သူတို့သည် ပိုမို မြန်ဆန်သော မှော်လက်နက် ကုန်တင် သင်္ဘောများကို အားကိုးရမည် ဖြစ်သလို၊ ဟင်းလင်းပြင် ရတနာ များကို အသုံးပြု၍ သယ်ယူ ပို့ဆောင်ရမည် ဖြစ်ပါသည်။

မည်သည့် နည်းလမ်းကို အသုံးပြုသည် ဖြစ်စေ... အစွမ်းအစ ကြီးမားသော ကုန်သွယ်ရေး မဟာမိတ် အဖွဲ့များ သာလျှင် ထိုကိစ္စများကို တတ်နိုင်စွမ်း ရှိကြ၏။

ထိုအချိန်တွင်၊

ဆိပ်ကမ်း ၌ ဟွမ်လင်း ကျွန်း ကုန်သွယ်ရေး အသင်း မှ ရွှေအမြုတေ အဆင့် ကျင့်ကြံသူ သုံးဦး ရှိနေပြီး၊ သူတို့ကို ဟွမ် မိသားစု မှ ရွှေအမြုတေ အဆင့် (၇) ရှိသော အကြီးအကဲ တစ်ဦးက ဦးဆောင်ထားသည်။

သီးသန့် အခန်း တစ်ခန်း အတွင်း၌၊ ဟွမ် မိသားစု ၏ ရွှေအမြုတေ အဆင့် (၇) အကြီးအကဲ ဖြစ်သူ ဟွမ်မင် သည် ဧည့်သည်တော် အချို့ အတွက် လက်ဖက်ရည် ဖျော်စပ် ပေးနေသည်။ ဒုတိယ အကြိမ်မြောက် လက်ဖက်ရည် ကျက်သွားသောအခါ၊ ဟွမ်မင် သည် ဧည့်သည်များ အတွက် လက်ဖက်ရည် ငဲ့ထည့် ပေးလိုက်၏။

ဟွမ်မင် က တစ်ချက် ရယ်လျက် ဖိတ်ခေါ်လိုက်သည်။

"တာအိုမိတ်ဆွေ တို့... လက်ဖက်ရည် လေး သုံးဆောင်ကြပါဦး။ အခုလိုမျိုး တာအိုမိတ်ဆွေ တို့ အားလုံး သင်္ဘောအုပ်စု တွေ ကိုယ်စီ ဦးဆောင်ပြီး ဒီကို တစ်ပြိုင်တည်း ရောက်လာကြတာ ရှားပါတယ်။ ဒီတစ်ခါတော့ ကျွန်တော်တို့ သေချာပေါက် ဆုံတွေ့ပြီး စကားစမြည် ပြောကြရအောင်ဗျာ"

ဟွမ်မင်သည် ရှေ့မှ လူများကို နွေးထွေးသော အပြုံးဖြင့် ကြည့်နေသော်ငြားလည်း၊ သူ၏ အတွင်းစိတ် ထဲတွင်မူ အလွန်အမင်း သတိထားနေသည်။ သူ၏ မျက်ဝန်း အောက်ခြေတွင် စိုးရိမ် ပူပန်မှု အရိပ်အယောင် အချို့ ခိုအောင်း နေ၏။

'ဒီကောင်တွေ အကုန်လုံး အကြောင်းမဲ့ လာတာမှ မဟုတ်တာ။ ငါတို့ ဟွမ် မိသားစု ရဲ့ အားနည်းချက်ကို အနံ့ခံမိပြီး လာစမ်းနေကြတာပဲ။ တစ်ချက်လေး မှားတာနဲ့ ငါတို့ မိသားစု တစ်ခုလုံး ပြာကျသွားနိုင်တယ်'

မုဖုန်း ကုန်သွယ်ရေး မဟာမိတ် အဖွဲ့၊ ထိုက်ယွမ် ကုန်သွယ်ရေး မဟာမိတ် အဖွဲ့၊ နှင့် ဟွမ်လင်း ကျွန်း နှင့် သိပ်မဝေးလှသော ရှီကျဲ့ ကျွန်း မှ ကျောက် မိသားစု။

ဤ အင်အားစု သုံးခု ၏ နောက်ကွယ်တွင် အတုအယောင် မူလဝိညာဉ် အဆင့် အရှင်သခင်ကြီး၊ သို့မဟုတ် ၊ စစ်မှန်သော မူလဝိညာဉ် အဆင့် အရှင်သခင်ကြီး များ ကျောထောက်နောက်ခံ ပြုထားကြ၏။

အင်အားစု တစ်ခုစီတိုင်း မှာ လုံးဝ အထင်သေး၍ မရနိုင်သော သူများ ဖြစ်ကြ၏။

ဟွမ်လင်း ကျွန်း နှင့် ဟွမ် မိသားစု ၏ လက်ရှိ အခြေအနေ အရ... အကယ်၍ ဤ မိသားစုများ က သာ ဟွမ် မိသားစု ၏ လက်ရှိ အခြေအနေ အစစ်အမှန် ကို စမ်းသပ် ဖော်ထုတ် သွားနိုင်ခဲ့မည် ဆိုပါက... ဟွမ် မိသားစု အတွက် ကျရောက်လာမည့် အရာမှာ လုံးဝ ပြန်လည် ကုစား၍ မရနိုင်သော ပျက်စီး ဆုံးရှုံးမှုကြီး ပင် ဖြစ်ပေလိမ့်မည်။

မုဖုန်း ကုန်သွယ်ရေး မဟာမိတ် အဖွဲ့ ၏ တတိယ အကြီးအကဲ ဖြစ်သော တာအိုဆရာ ပိုင်ရင် သည် လက်ဖက်ရည် ပန်းကန်လုံးလေး ကို အပြုံးဖြင့် လှမ်းယူလိုက်သည်။

လက်ဖက်ရည် ပန်းကန် ထဲမှ အငွေ့လေးများ အထက်သို့ လွင့်ပျံလာစဉ်၊ သူသည် လက်ဖက်ရည် ကို ဖြည်းညင်းစွာ တစ်ငုံ သောက်လိုက်ပြီးနောက် အားရပါးရ ချီးကျူးလိုက်သည်။

"ကောင်းလိုက်တဲ့ လက်ဖက်ရည်... မွှေးရနံ့ က လေထဲမှာ အပြည့်ပဲ။ သောက်လိုက်တဲ့ အချိန်မှာ နည်းနည်းလေး ခါးသက်သယောင် ရှိပေမဲ့... လည်ချောင်း ထဲ ရောက်တော့ ချိုမြိန်တဲ့ အရသာလေး က ကျန်ရစ်နေခဲ့တယ်။ လက်ဖက်ရည် ရဲ့ ရနံ့ က နှုတ်ခမ်း ပေါ်မှာ အကြာကြီး စွဲကျန်နေပြီး... ရင်ဘတ် ထဲမှာ ဝိညာဉ် စွမ်းအင် တွေ လှိုင်းထသွားသလိုပဲ"

"ဒီ လက်ဖက်ရည် ပန်းကန်လေး က ကျွန်တော့်ကို တကယ်ပဲ မနာလို ဖြစ်သွားစေတယ်။ နောက်တစ်ခါ ဘယ်တော့များမှ ဒီအရသာ မျိုးကို ပြန်သောက်ခွင့် ရမလဲ မသိဘူးဗျာ"

'ဟက်... လက်ဖက်ရည် က ကောင်းပါတယ်။ ဒါပေမဲ့ ဟွမ် မိသားစု ရဲ့ အခြေအနေ ကရော ဒီလက်ဖက်ရည် လို ကောင်းနေပါ့မလား'

သူ၏ ဘေးတွင် ထိုင်နေသော... အသက် လေးဆယ် သို့မဟုတ် ငါးဆယ် အရွယ်ခန့် ထင်ရသည့်၊ နှုတ်ခမ်းမွေး တိုတိုလေး နှင့် အလွန် ခမ်းနားသော အပြာရင့်ရောင် ဝတ်ရုံကြီး ကို ဝတ်ဆင်ထားပြီး အနည်းငယ် ဩဇာတိက္ကမ ရှိသော ရုပ်ရည် ရှိသည့် လူလတ်ပိုင်း အရွယ် လူတစ်ဦး ကမူ ခပ်ဟဟ ပြုံးလိုက်သည်။ တစ်ငုံ သောက်ပြီးနောက်၊ သူသည် မျက်လုံးများကို မှိတ်ကာ အရသာခံရင်း ပြောလိုက်သည်။

"ဒီ လက်ဖက်ရည် ထက်စာရင်... ကျွန်တော် က ဒီ လက်ဖက်ရည် ကို ဖျော်ဖို့ သုံးထားတဲ့ ဝိညာဉ် စမ်းရေ ကို ပိုပြီး စိတ်ဝင်စားတယ်ဗျ"