အခန်း (၉၂၀-၉၂၁)
Vol. 53 Ch. 920-921
Chapter 920
ဖြိုခွဲ၍ မရသော ၂
“ဒါက အံစာတုံးတစ်ခုပဲ၊၊ လူတွေ လုပ်ထားတဲ့ ပုံစံမျိုးပဲ၊၊ ဒါပေမဲ့ ကျွန်မတို့ မလုပ်နိုင်တဲ့ အရာမျိုး ဖြစ်နေတာကတော့ ထူးဆန်းတယ်”
တင်းကျန်းရီက သူမ၏ မျက်မှန်ကို ပင့်လိုက်ရင်း ပြောသည်၊၊
“ငါ သိထားသလောက်ဆိုရင် ဒီလိုပစ္စည်းမျိုးကို ထုတ်လုပ်နိုင်တာဟာ နည်းပညာက အဏုမြူဖွဲ့စည်းပုံအပေါ်မှာ လုံးဝဥဿုံ ထိန်းချုပ်နိုင်စွမ်းရှိနေပြီဆိုတာကို ပြနေတာပဲ၊၊ စကြဝဠာရဲ့ အခြေခံအင်အားစု လေးခုထဲက အားကောင်းတဲ့ နျူကလီးယားအားကို စိတ်ကြိုက် ထိန်းချုပ်နိုင်တယ်လို့ ဆိုလိုတယ်၊၊ သာမန် ဒြပ်ဝတ္ထုတွေက တည်ဆောက်ပုံကို ထိန်းထားဖို့ လျှပ်စစ်သံလိုက်အားကို အားကိုးရပေမဲ့ ဒီလိုဒြပ်ဝတ္ထုမျိုးကတော့ အစွန်းရောက် ဆွဲငင်အားမရှိဘဲနဲ့ ထူးခြားတဲ့ ပုံစံကို ထိန်းထားနိုင်တယ်၊၊ သူ့ရဲ့ အက်တမ် နျူကလီးယပ်စ်တွေကို အားကောင်းတဲ့ နျူကလီးယားအားနဲ့ ပိတ်လှောင်ထားပြီး ပရိုတွန်နဲ့ နျူထရွန် အားလုံးကို ဘာကွက်လပ်မှ မရှိအောင် စီထားတာကြောင့် ဒီလို ဖိသိပ်မှုကို ရရှိတာ ဖြစ်နိုင်တယ်”
“ဒီလောက်တောင် အစွမ်းထက်တာလား၊၊ ဒါက အမှောင်ယဉ်ကျေးမှုရဲ့ ဖန်တီးမှု ဖြစ်နိုင်မလား”
ကီကီက အံ့သြတကြီး ပြောလိုက်သည်၊၊
တင်းကျန်းရီက ခေါင်းခါပြလိုက်သည်၊၊
“ငါအသေအချာတော့ မပြောနိုင်ဘူး၊၊ ဒါပေမဲ့ ငါတို့တွင်းနက်ထဲမှာ ရှာဖွေတွေ့ရှိခဲ့တာကတော့ အမှောင်ယဉ်ကျေးမှုဟာ ငါတို့ကမ္ဘာကြီးအပေါ် ‘ဒိုင်နမေးရှင်း ပြုပြင်ပြောင်းလဲမှုတွေ’ လုပ်ဆောင်နေပြီး ဒေသအလိုက် ဆွဲငင်အားမြင့်တက်လာတဲ့ သက်ရောက်မှုတွေကို ဖြစ်စေတယ်၊၊ ဒီလိုနည်းပညာမျိုး ရှိနေနိုင်တာကတော့ ဖြစ်နိုင်ခြေရှိပါတယ်”
ထိုစကားကို ကြားသောအခါ လင်းရှန်နှင့် ကီကီတို့ ဆွံ့အသွားကြသည်၊၊
“ဒါရိုက်တာတင်း…အမှောင်ထုထဲက အကောင်တွေက တကယ်ပဲ လူသားတွေထက် အဆပေါင်းများစွာ သာလွန်တဲ့ နည်းပညာတွေကို ဖန်တီးနိုင်တယ်လို့ ပြောတာလား”
ရှားရှားက မေးလိုက်သည်၊၊
တင်းကျန်းရီက ပခုံးတွန့်လိုက်သည်၊၊
“အနည်းဆုံးတော့ လောလောဆယ်မှာ တခြားရှင်းပြချက် မရှိသေးဘူးလေ”
“ဘုရားရေ၊၊ ကြောက်စရာကြီးပဲ”
ကီကီက မျက်မှောင်ကြုတ်လိုက်သည်၊၊
“ကျွန်မတို့က တွင်းနက်ထဲမှာ ကြောက်စရာကောင်းတဲ့ သတ္တဝါတွေပဲ ရှိတယ်လို့ အမြဲထင်ခဲ့တယ်… ဂြိုဟ်သားကျူးကျော်မှုလို့ပဲ ယူဆခဲ့ကြတယ်၊၊ တကယ်လို့ သူတို့မှာ ဒီလိုနည်းပညာမျိုးသာ ရှိရင် လူသားတွေ အနိုင်ရဖို့ အခွင့်အရေးရော ရှိပါဦးမလား”
“ဟုတ်တယ်၊၊ တကယ်လို့ အမှောင်ယဉ်ကျေးမှုက အဲဒီလောက် အားကောင်းနေရင် ဘာလို့ လူသားတွေကို သတ်ဖြတ်ဖို့အတွက် ဦးနှောက်မရှိသလို တိရစ္ဆာန်တွေနဲ့ ထူးဆန်းတဲ့ သတ္တဝါတွေပဲ သုံးနေရတာလဲ၊၊ သူတို့မှာရော ဉာဏ်ရည်ရှိနိုင်မလား”
ရှားရှားက မျက်လုံးဝိုင်းလေးများဖြင့် မေးခွန်းထုတ်သည်၊၊
“အဲဒါကို စဉ်းစားမနေနဲ့တော့… သူတို့မှာ သေချာပေါက် ရှိတယ်”
လင်းရှန်က အသက်ပြင်းပြင်းရှူလိုက်သည်၊၊
“လောလောဆယ် ငါတို့တွေ့ထားတာက S-Class အထက်ကောင်တွေမှာ အတိုင်းအတာတစ်ခုအထိ ဉာဏ်ရည်ရှိပြီး ယုတ္တိရှိတဲ့ အပြုအမူတွေ လုပ်နိုင်တယ်၊၊ သူတို့ကို အမှောင်သတ္တဝါအစစ်အမှန်လို့ သတ်မှတ်နိုင်တယ်၊ သူတို့က မွန်းစတားတွေ ပုံပေါက်ပေမဲ့ နျူကလီးယားလက်နက်တွေကို ခုခံနိုင်သလို အနီရောင်မြူခိုးတွေနဲ့ ကာကွယ်ရေးစွမ်းအားတွေလည်း ရှိကြတယ်၊၊ ဒါတွေက သာမန် ဇီဝကမ္မစွမ်းရည်တွေ မဟုတ်ဘူး၊၊ ဒါ့အပြင် အမှောင်ကျူးကျော်မှုရဲ့ စွမ်းအားက လူသားတွေကို အားကောင်းတဲ့ စွမ်းအားရှင်တွေ ဖြစ်လာစေတယ်၊၊ တစ်နည်းအားဖြင့် ပြောရရင် အမှောင်ယဉ်ကျေးမှုဟာ အလွန်အားကောင်းတဲ့ စွမ်းအင်တစ်ခုခုကို ပိုင်ဆိုင်ထားတာ သေချာတယ်”
တင်းကျန်းရီက ခေါင်းညိတ်သည်၊၊
“မှန်တယ်၊၊ ပြီးတော့ ကျွန်မတို့က အမှောင်ယဉ်ကျေးမှုရဲ့ အုပ်စုလိုက်ယုတ္တိဗေဒကို လူသားတွေရဲ့ အတွေးအခေါ်နဲ့ နားလည်ဖို့ပဲ ကျင့်သားရနေကြတယ်၊၊ အဲဒါက တကယ်တော့ မမှန်ဘူး”
သူမက လင်းရှန်ကို ကြည့်ကာ ပြောလိုက်သည်၊၊
“S-Class အထက်ကောင်တွေက အမှောင်သတ္တဝါအစစ်တွေဖြစ်နိုင်တယ်လို့ ကျွန်မပြောခဲ့တာ မှတ်မိလား”
“မှတ်မိပါတယ်” လင်းရှန်က ခေါင်းညိတ်လိုက်သည်၊၊
“အဲဒီစကားက သိပ်တော့ မတိကျဘူး၊၊ S-Class တွေမှာ လူသားတွေလို တွေးခေါ်နိုင်တဲ့ ဦးနှောက်ရှိပြီး အသိုက်ကနေ ဖန်တီးလိုက်တဲ့ တခြား ထူးဆန်းတဲ့ သတ္တဝါတွေနဲ့ သိသိသာသာ ကွာခြားတယ်လို့ ပြောရမယ်၊၊ တကယ်လို့ ထူးဆန်းတဲ့ သတ္တဝါတွေကို သွေးအဆီအနှစ်(သွေးပဲစေ့) ဘက်ထရီသုံးထားတဲ့ ဒရုန်းတွေလို့ ယူဆရင် S-Class တွေကတော့ အမှောင်ယဉ်ကျေးမှုရဲ့ သတ္တဝါတွေလို့ ဆိုနိုင်တယ်၊၊ ဒါပေမဲ့ ဒါက S-Class တွေဟာ အမှောင်ယဉ်ကျေးမှုရဲ့ ဉာဏ်ရည်အမြင့်ဆုံးအဖွဲ့လို့ ဆိုလိုတာတော့ မဟုတ်ဘူး”
တင်းကျန်းရီက အသက်ပြင်းပြင်းရှူလိုက်သည်၊၊
“ကျွန်မ ရဲရဲတင်းတင်း ခန့်မှန်းရရင် S-Class တွေဟာလည်း အမှောင်ယဉ်ကျေးမှုက ထုတ်လုပ်ထားတဲ့ ကလုန်းတွေ ဒါမှမဟုတ် အမဲလိုက်ခွေးတွေလို ဖြစ်တည်မှုမျိုးပဲ ဖြစ်နိုင်တယ်၊၊ ဒါပေမဲ့ ဒီဖြစ်တည်မှုက ထူးဆန်းတဲ့ သတ္တဝါတွေကို အတိုင်းအတာတစ်ခုအတွင်း ထိန်းချုပ်နိုင်စွမ်းရှိသလို.. အမှောင်စွမ်းအင်အားလုံးကို စုပ်ယူနိုင်တဲ့ အမှောင်စွမ်းအင် ဆဲလ်ဖွဲ့စည်းပုံလည်း ရှိတယ်”
လင်းရှန်က သဘောတူလိုက်သည်၊၊
“ကြယ်တာရာတွေကြား ခရီးသွားနိုင်ပြီး ဒိုင်နမေးရှင်းကို ပြောင်းလဲနိုင်တဲ့ ယဉ်ကျေးမှုတစ်ခုဟာ သာမန်မွန်းစတားကျူးကျော်မှုလောက်တော့ မဖြစ်နိုင်ဘူး၊၊ ဒီမွန်းစတားတွေနဲ့ ထူးဆန်းတဲ့ သတ္တဝါတွေဟာ လူသားတွေကို ရှင်းထုတ်ဖို့ သုံးတဲ့ ကိရိယာတွေပဲ၊၊ အရင်က ပရော်ဖက်ဆာယဲ့နဲ့ ဆွေးနွေးတုန်းကလည်း သူက ဒီလိုအမြင်မျိုးပဲ ပြောခဲ့ဖူးတယ်၊၊ ဒါပေမဲ့ ငါတို့ နားမလည်တာက အမှောင်ယဉ်ကျေးမှုက ဘာလို့ ဒါတွေကို လုပ်နေတာလဲ၊၊ သူတို့ရဲ့ လှုံ့ဆော်မှုတွေ၊ ရည်ရွယ်ချက်တွေက ဘာလဲ… လူသားတွေရဲ့ အတွေးနဲ့ ကြည့်ရင် သူတို့ရဲ့ နည်းပညာအဆင့်အတန်းအရ လူသားတွေဟာ ရက် ၁၀၀ တောင် တောင့်ခံနိုင်မှာ မဟုတ်ဘူး”
“အသေချာပဲ”
တင်းကျန်းရီက သတ္တုအံစာတုံးကို ကြည့်ကာ ပြောလိုက်သည်၊၊
“ဒီအံစာတုံးကိုပဲ ကြည့်လေ… တကယ်လို့ ဒါဟာ လက်နက်တစ်ခုဖြစ်ခဲ့ရင် လူသားယဉ်ကျေးမှုရဲ့ ခုခံကာကွယ်မှုတွေအကုန် အလကားဖြစ်သွားလိမ့်မယ်၊၊ ဘယ်လောက်ခိုင်မာတဲ့ ကာကွယ်ရေးဖြစ်ဖြစ် ဒီအရာရဲ့ ရှေ့မှာတော့ စက္ကူလို ဖြစ်သွားမှာပဲ”
“တကယ်လို့ ဒီအံစာတုံးက ဥက္ကာခဲလို အရှိန်နဲ့ ကျလာရင် ဖြစ်ပေါ်လာမယ့် စွမ်းအင်ဟာ အနည်းဆုံး GJ ဘီလီယံတစ်ထောင်ကျော်လောက် ရှိလိမ့်မယ်၊၊ အဲဒါက တန်ချိန် သန်းပေါင်းများစွာရှိတဲ့ TNT ပေါက်ကွဲအားနဲ့ ညီမျှတယ်၊၊ ငါတို့ ဒါကို ဘယ်လိုမှ တောင့်ခံနိုင်မှာ မဟုတ်ဘူး”
လင်းရှန်သည် တောင်ဘက်ကောင်းကင်ဂိတ်၏ ဆိုလာပြားများပေါ်တွင် ရေးထားသော “ခုခံခွင့် မရှိ” ဆိုသည့် စကားလုံးများကို ပြန်လည်အမှတ်ရကာ စိုးရိမ်ထိတ်လန့်သွားသည်၊၊
သူသည် သတ္တုအံစာတုံးကို လေးနက်စွာ ကြည့်ရင်း ပြောလိုက်သည်၊၊
“အခု မေးစရာရှိတာက... ဒါက ဘာလို့ အံစာတုံးပုံစံ ဖြစ်နေရတာလဲ”
ဝှူး...
ကြည်လင်သော ကောင်းကင်အောက်ရှိ ပင်လယ်ပြင် ရထားလမ်းပေါ်တွင် အနန္တရထားသည် အရှိန်ဖြင့် ပြေးနေသည်၊၊ ရထားတွဲအတွင်း၌ လင်းရှန်နှင့် အခြားသူများမှာ မည်သည့် အဆုံးသတ်ကောက်ချက်ကိုမျှ မချနိုင်ကြသဖြင့် လင်းရှန်သည် သတ္တုအံစာတုံးကို အသေးစိတ်လေ့လာရန် ကြယ်နက်ပန်းပဲဖိုအတွင်းသို့ ရွှေ့ပြောင်းလိုက်သည်၊၊
ကြယ်နက်ပန်းပဲဖိုအတွင်း၌ လင်းရှန်သည် လေထဲတွင် ဝဲနေသော သတ္တုအံစာတုံးကို ကြည့်ရင်း တစ်ယောက်တည်း ရေရွတ်လိုက်သည်၊၊
“တော်သေးတာပေါ့ ကြယ်နက်ပန်းပဲဖို ရှိနေလို့… မဟုတ်ရင် ဒီ တန်တစ်ထောင် လေးတဲ့အရာကို ဘယ်နားထားရမှန်းတောင် သိမှာမဟုတ်ဘူး”
ကီကီသာ ဒီအံစာတုံးကို မြှောက်ထားရမည်ဆိုလျှင် စွမ်းအားကို အလွန်သုံးရသဖြင့် စွမ်းအင် အမြောက်အမြား ကုန်ဆုံးသွားပေလိမ့်မည်၊၊ ကြယ်နက်ပန်းပဲဖိုသာမရှိလျှင် လင်းရှန်အနေဖြင့် ဤမျှလေးသော အရာကို မည်သည့်ပစ္စည်းနှင့် မရမည်ကို မသိနိုင်ပေ၊၊ ၎င်းက ရထားတွဲကို သေချာပေါက် ဖိစီးမှုဖြစ်စေလိမ့်မည်၊၊ ယခုမှပင် လင်းရှန် နားလည်သွားသည်မှာ ဆိပ်ကမ်းမြေပြင်ပေါ်က အက်ကြောင်းသည် ပေါက်ထွက်သွားခြင်း မဟုတ်ဘဲ အရာဝတ္ထု၏ သဘာဝအတိုင်း ကျဆင်းမှုကြောင့် မြေပြင် ကွဲအက်သွားခြင်းသာ ဖြစ်သည်၊၊ တကယ်လို့ တင်းကျန်းရီ ပြောသလို ကောင်းကင်ကသာ ကျလာခဲ့လျှင် တာ့ကူးရေနက်ဆိပ်ကမ်းတစ်ခုလုံး ရှိတော့မည် မဟုတ်ပေ၊၊
“ဘယ်လို ယဉ်ကျေးမှုမျိုးက ဒီလိုအရာမျိုးကို ဖန်တီးနိုင်တာလဲ၊၊ ဘာရည်ရွယ်ချက်နဲ့များ ဒါကို လုပ်တာလဲ”
သူသည် သူ၏ ယန္တရားစွမ်းအားကို အသုံးပြု၍ စကင်ဖတ်ရန် ချက်ချင်း ကြိုးစားလိုက်သည်၊၊ သို့သော် ခဏချင်းတွင်ပင် လင်းရှန်၏ မျက်နှာအနည်းငယ်ပျက်သွားသည်၊၊
အကြောင်းမှာ သူ၏ ယန္တရားနှလုံးသားက မည်သည့် တုံ့ပြန်မှုမျှ မရှိသောကြောင့် ဖြစ်သည်၊၊
ယန္တရားနှလုံးသားသည် ၎င်းကို ဖြိုခွဲနိုင်ခြင်း ရှိ၊မရှိ သို့မဟုတ် ဝါးမျိုနိုင်ခြင်း ရှိ၊မရှိကိုလည်း ဘာမှ အချက်မပြသလို စွမ်းအင်စုပ်ယူနိုင်သည့် လက္ခဏာလည်း မရှိပေ၊၊ ရိုးရိုးရှင်းရှင်းပင်... ဘာတုံ့ပြန်မှုမှ မရှိခြင်းဖြစ်သည်၊၊
Chapter 921
ဖြိုခွဲ၍ မရသော ၃
“ဟင်...”
လင်းရှန် မျက်မှောင်ကြုတ်လိုက်သည်၊၊ သူသည် ဤပစ္စည်းကို ဝါးမျိုပြီး ဖြိုခွဲနိုင်မလား သိချင်သော်လည်း စကင်ဖတ်ခြင်းပင် အရာမထင်ပေ၊၊ ဤသည်မှာ ယန္တရားနှလုံးသားအနေဖြင့် ဤကဲ့သို့ အခြေအနေမျိုးနှင့် ပထမဆုံးအကြိမ် ကြုံဖူးခြင်း ဖြစ်သည်၊၊ အရင်က ထူးဆန်းသောကုဗတုံးများ သို့မဟုတ် SIID က အကြီးစား ဆိုင်းငံ့အရည်များ ထည့်ထားသည့် ပုံးများကို စမ်းသပ်စဉ်က တုံ့ပြန်မှုများ ရှိခဲ့ဖူးသည်၊၊ သို့သော် ယခုတစ်ကြိမ်တွင်မူ ဘာမှ မရှိပေ၊၊ ယန္တရားနှလုံးသားက ဤအရာ ရှိနေသည်ကိုပင် အသိအမှတ် မပြုနိုင်သကဲ့သို့ ဖြစ်နေသည်၊၊၊၊
“ဒါက ဘယ်လိုဖြစ်တာလဲ...”
လင်းရှန်သည် အရှုံးမပေးလိုဘဲ ဆက်လက်ကြိုးစားနေဆဲဖြစ်သည်၊၊ သူသည် ကြယ်နက်ပန်းပဲဖို၏ ယန္တရားဝါးမျိုမှု အစီအစဉ်ကို တိုက်ရိုက်လုပ်ဆောင်စေသော်လည်း အရာမထင်ခဲ့ပေ၊၊ ထို့နောက် သူသည် ထိုအရာကို လုံးဝပိတ်ဆို့ထားသည့် သတ္တုသေတ္တာတစ်ခု ပြုလုပ်ကာ ယန္တရားပစ္စည်းတစ်ခုနှင့် ချိတ်ဆက်ပြီး နောက်တစ်ကြိမ် ဝါးမျိုရန် ကြိုးစားပြန်သည်၊၊
သို့သော် ယန္တရားဝါးမျိုမှု လုပ်ဆောင်နေစဉ်အတွင်း ထိုယန္တရားပစ္စည်းမှာသာ ကုန်ကြမ်းများအဖြစ် လျင်မြန်စွာ ပြိုကွဲသွားပြီး အာကာသထဲပျော်ဝင်ခြင်း နယ်ပယ်ထဲသို့ ရောက်ရှိသွားကာ သတ္တုအံစာတုံးမှာမူ ဘာမှမဖြစ်ဘဲ ကျန်ရစ်ခဲ့သည်၊၊
၎င်းကို မြင်သောအခါ လင်းရှန်မှာ ဘာဆက်လုပ်ရမှန်းမသိ ဖြစ်သွားသည်၊၊ ဤအရာမှာ သူထင်ထားသည်ထက်ပင် ပိုမိုနက်နဲနေပုံရသည်၊၊ သူသည် အံစာတုံး၏ မျက်နှာပြင်ခြောက်ဖက်ကို ကြည့်ကာ အတွေးနက်နေမိသည်၊၊
“ဒီလောက်အဆင့်မြင့်တဲ့ ယဉ်ကျေးမှုတစ်ခုက ဘာလို့ အံစာတုံးတစ်ခု လုပ်ထားရတာလဲ၊၊ ဒါက ဘာအတွက် သုံးတာလဲ”
သူသည် အကြာကြီးစဉ်းစားပြီးနောက် ဆွဲငင်အားမဲ့နေသော ထိုနေရာတွင် သတ္တုအံစာတုံး၏ မျက်နှာပြင်တစ်ခုကို လက်ထိပ်ဖြင့် တို့ထိကြည့်လိုက်သည်၊၊ သူ၏ လက်နှင့် ထိမိသည်နှင့် အလွန်အမင်း အေးစက်ချောမွေ့သော အထိအတွေ့မှာ ချက်ချင်းပင် ကူးစက်လာသည်၊၊ အံစာတုံးမှာ သူ၏ထိတွေ့မှုကြောင့် အနည်းငယ် လည်ပတ်သွားပြီးနောက် နံပါတ်တစ်ခုမှာ သူ၏ဘက်သို့ ဖြည်းညှင်းစွာ ပေါ်လာသည်၊၊
[၃]
လင်းရှန်သည် ၎င်းကို ခဏမျှ စိုက်ကြည့်နေပြီးနောက် လက်လျှော့လိုက်သည်၊၊
ကြယ်နက်ပန်းပဲဖို နေရာလပ်ထဲမှ ပြန်ထွက်လာပြီးနောက် လင်းရှန်သည် မျက်လုံးများကို ဖြည်းဖြည်းချင်း ဖွင့်လိုက်သည်၊၊ ထိန်းချုပ်ခန်းအတွင်း၌ ချန်ဆီရွှမ်က သူ့ကို မေးလိုက်သည်၊၊
“ဒီအကြောင်းကို ချူယန်ကို မပြောရသေးဘူး မဟုတ်လား”
“မပြောရသေးဘူး” လင်းရှန်က တည်ငြိမ်စွာ ပြန်ဖြေသည်၊၊
ချန်ဆီရွှမ်က သက်ပြင်းချလိုက်သည်၊၊
“ဖီးနစ်နဲ့ အသက်ရှင်ကျန်ရစ်သူတွေကြားမှာ စိတ်ဓာတ်ကျစရာတွေဖြစ်လာမှာ စိုးလို့လား”
“အဲဒါချည်းပဲတော့ မဟုတ်ပါဘူး၊၊ အခုပြောပြလည်း ငါတို့က ဒါကို သုတေသန မလုပ်နိုင်သလို ဘာကောက်ချက်မှလည်း မချနိုင်သေးတော့ ဘာမှ ထူးမှာမဟုတ်ဘူး”
လင်းရှန်က ရှေ့သို့ ကြည့်ရင်း ပြောသည်၊၊
“ဥက္ကဋ္ဌချူရဲ့ ‘လူသားတွေ ပျက်သုဉ်းတော့မယ်’ ဆိုတဲ့ ဟောကိန်းကို ပိုပြီး ဟုတ်လိမ့်နိုးနိုး ဖြစ်စေတာကလွဲရင်ပေါ့...”
ချန်ဆီရွှမ်၏ မျက်နှာက ရှုပ်ထွေးသွားသည်၊၊
“ကျွန်မတို့က တွင်းနက်ကြီးကို စိုက်ကြည့်နေသလို… တွင်းနက်ကြီးကလည်း ကျွန်မတို့ကို ပြန်စိုက်ကြည့်နေတယ်၊၊ ကျွန်မတို့ ပိုပြီး ရှာဖွေတွေ့ရှိလေလေ ပိုပြီး မျှော်လင့်ချက်မဲ့လေလေပဲ”
ရထားကြီး အရှိန်ဖြင့် ပြေးလွှားနေစဉ် လင်းရှန်သည် ငြိမ်သက်နေသော ပင်လယ်ရေပြင်ကို ကြည့်ကာ တိတ်ဆိတ်သွားသည်၊၊
ခဏအကြာတွင် သူက ချန်ဆီရွှမ်ကို ရုတ်တရက် မေးလိုက်သည်၊၊
“ဆရာမချန်… အမှောင်ယဉ်ကျေးမှုနဲ့ လူသားယဉ်ကျေးမှုအပြင် တခြားယဉ်ကျေးမှုတစ်ခုခု ရှိနိုင်သေးတယ်လို့ ထင်လား”
ချန်ဆီရွှမ်လည်း သူ၏ အတွေးကြောင့် အံ့သြသွားသည်၊၊
“ဘာလို့ အဲဒီလို ပြောတာလဲ”
လင်းရှန်က တိုးတိုးလေး ပြောသည်၊၊
“တွင်းနက်ရဲ့ စွမ်းအားက ငါတို့ မှန်းဆထားတာထက် အများကြီး သာလွန်တယ်၊၊ အချိန်တွေ ကျယ်ပြန့်လာတာ၊ ဒိုင်နမေးရှင်း ပြုပြင်ပြောင်းလဲတာ၊ လူသားအားလုံးကို သန္ဓေပြောင်းစေပြီး စွမ်းအားရှင်တွေ ဖြစ်လာစေတာ၊ တွင်းနက်ထဲမှာ ထူးဆန်းတဲ့ သတ္တဝါတွေထက် ပိုတဲ့အရာတွေ ရှိနေမယ်လို့ ငါထင်တယ်၊၊ ဘာလို့ တွင်းနက်က ၁၃ ခု ဖြစ်နေရတာလဲ၊၊ သူတို့က နျူကလီးယားဗုံးကိုတောင် မကြောက်ဘူး… လူသားအားလုံးကို အမြစ်ဖြတ်ဖို့ဆိုတာ သူတို့အတွက် လွယ်လွယ်လေးပါ”
“ပရော်ဖက်ဆာယဲ့ရဲ့ ယူဆချက်ကို ငါ သဘောတူပါတယ်၊၊ အာရုဏ်ဦးမြို့တော်က လူသားတွေရဲ့ တန်ပြန်တိုက်ခိုက်မှုတွေနဲ့ ယဉ်ကျေးမှုနှစ်ခုကြားက သတင်းအချက်အလက် မညီမျှမှုတွေကြောင့် ဒီသံသယကွင်းဆက်က လူသားတွေကို သိမ်မွေ့တဲ့ ဟန်ချက်တစ်ခု ရရှိစေခဲ့တယ်၊၊ ဒါပေမဲ့ ပရော်ဖက်ဆာယဲ့နဲ့ ငါ ဆွေးနွေးခဲ့တာကတော့ ကမ္ဘာပျက်ကပ် စတင်ဖြစ်ပွားခဲ့တဲ့ အစောပိုင်း အခြေအနေတွေဟာ ဒီဟန်ချက်ညီမှုနဲ့ နည်းနည်းတော့ ဆန့်ကျင်ဘက် ဖြစ်နေသလိုပဲ”
“ရှင်ပြောတာကို ကျွန်မနားလည်ပါတယ်” ချန်ဆီရွှမ်က ပြောသည်၊၊
“တကယ်လို့ အဆင့်မြင့်ယဉ်ကျေးမှုတစ်ခုက အပြာရောင်ဂြိုဟ်ကို ကျူးကျော်ချင်တယ်ဆိုရင် ယုတ္တိဗေဒနည်းအရ မုဆိုးဟာ သားကောင်ကို အရင် လေ့လာရမှာပေါ့၊၊ အခု အခြေအနေကတော့ ကမ္ဘာပျက်ကပ်ဖြစ်ပြီးနောက် လူသားတွေက အမှောင်ထုထဲမှာ ရုန်းကန်နေရချိန်မှာ အမှောင်ယဉ်ကျေးမှုကလည်း ကျွန်မတို့နဲ့ ပတ်သက်ပြီး ရှုပ်ထွေးနေသလို သတင်းအချက်အလက် မညီမမျှ ဖြစ်နေပုံရတယ်၊၊ ရှင်နဲ့ ပရော်ဖက်ဆာယဲ့က အမှောင်ယဉ်ကျေးမှုဟာ အပြာရောင်ဂြိုဟ်ကို ဘာကြောင့် ရောက်လာသလဲဆိုတဲ့ လှုံ့ဆော်ချက်ကို စိုးရိမ်နေကြတာ ဒါကြောင့်ပဲလို့ ကျွန်မထင်တယ်”
လင်းရှန်က ခေါင်းညိတ်ပြလိုက်သည်၊၊
“ဒါကြောင့် လူသားယဉ်ကျေးမှုနဲ့ အမှောင်ယဉ်ကျေးမှု နှစ်ခုလုံးကို ကန့်သတ်ထားတဲ့ တခြားယဉ်ကျေးမှု ဒါမှမဟုတ် တခြားတည်ရှိမှုတစ်ခုခု ရှိနေမလားလို့ ငါ တွေးနေမိတာပဲ၊၊ ဒါကတော့ ငါ့ရဲ့ အကောင်းမြင်လွန်းတဲ့ အတွေးပါ၊၊ မဟုတ်ရင် ဒိုင်နမေးရှင်းကိုတောင် ပြုပြင်ပြောင်းလဲနိုင်တဲ့ ယဉ်ကျေးမှုတစ်ခုက ငါတို့ရဲ့ အမြောက်တွေနဲ့ လေဆာတွေကို ဘာလို့ ဗျူဟာမြောက် ဟန့်တားမှုလို့ ယူဆနေမှာလဲဆိုတာ ငါ စဉ်းစားလို့ မရဘူး”
ချန်ဆီရွှမ်မှာ ထိုစကားကို ကြားသောအခါ ဘာမှပြန်မပြောဘဲ လင်းရှန်၏ စကားများကို တိတ်ဆိတ်စွာ စဉ်းစားနေသည်၊၊
လေများ တဝေါဝေါ တိုက်ခတ်နေပြီး ရှေ့ဘက် ကမ်းရိုးတန်းတွင် ကုန်းမြေ၏ အနက်ရောင် အရိပ်တစ်ခု ပေါ်လာသည်၊၊ ရထားကြီး ရှေ့သို့ ဆက်သွားသည်နှင့်အမျှ ၎င်းမှာ ကုန်းမြေမဟုတ်ဘဲ ကျွန်းကြီးတစ်ကျွန်း ဖြစ်ကြောင်း သိသာလာသည်၊၊
ပင်လယ်ကျောက်ဆောင်ကျွန်းသည် ရီပက်ဘလစ်ကန်ကျွန်းစုနှင့် ကျွန်းနက်တို့အပြင် အနောက်ပစိဖိတ်သမုဒ္ဒရာတွင် အကြီးဆုံးကျွန်းဖြစ်သည်၊၊ ကျွန်းဆွယ်တန်းတွင် အရွယ်စားစုံ ကျွန်းငယ်ပေါင်း ရာနှင့်ချီ ပါဝင်ပြီး ပင်မကျွန်းမှာ ဧရိယာ စတုရန်းကီလိုမီတာ ၂၀,၀၀၀ နီးပါး ကျယ်ဝန်းသည်၊၊ ပင်လယ်ကျောက်ဆောင်မြို့သည် တစ်ချိန်က လူဦးရေ တစ်သန်းကျော် နေထိုင်ပြီး လှပသော သဲသောင်ပြင်များရှိသည့် နာမည်ကြီး ကမ္ဘာလှည့်ခရီးသွား မြို့တစ်မြို့ ဖြစ်ခဲ့ဖူးသည်၊၊
သို့သော် လင်းရှန်သည် ကျွန်း၏ မြင်ကွင်းအပြည့်ကို မမြင်ရသေးမီမှာပင် အောက်ဘက် ရေပြင်ပေါ်တွင် မျောပါနေသော အမှိုက်သရိုက် အမြောက်အမြားကြောင့် အာရုံပျံ့လွင့်သွားသည်၊၊ သူသည် အနီးကပ်ကြည့်ရန် ပြတင်းပေါက်သို့ သွားလိုက်ရာ ကမ်းရိုးတန်း နှစ်ဖက်စလုံး တစ်လျှောက် ကီလိုမီတာ တစ်ရာကျော်အထိ ရှည်လျားနေသော သစ်သားပြားများ၊ ခရီးဆောင်အိတ်များ၊ ဆီတိုင်ကီများ၊ အဝတ်အထည်များ၊ ပလတ်စတစ်များနှင့် တခြား အပျက်အစီးများကို တွေ့လိုက်ရသည်၊၊ ကျွန်းပေါ်သို့ မရောက်သေးခင်မှာပင် ပြင်းထန်သော ကမ္ဘာပျက်ကပ် အငွေ့အသက်ကို ခံစားနေရသည်၊၊
ဂြိုဟ်ပတ်ရထားလမ်းက ကျယ်ပြန့်လာသည်၊၊ လမ်းညွှန်တံတား လက်ရန်းများပေါ်က သတိပေးစည်းများမှာ အရောင်များ မှိန်ဖျော့နေပြီ ဖြစ်သည်၊၊ အဝါရောင်နှင့် အနက်ရောင် သတိပေးတိပ်များမှာ ဆားငန်လေနှင့်အတူ တဖျတ်ဖျတ် လွင့်နေပြီး ၎င်းပေါ်တွင် “ဝင်ခွင့်မပြု” နှင့် “ရောဂါပိုးကူးစက်ခံရသည့် ဧရိယာ” ဟု ကြမ်းတမ်းစွာ ရေးသားထားသည်၊၊ ကာကွယ်ရေးဝတ်စုံ ဝတ်ထားသည့် အလောင်းအချို့မှာ အတားအဆီးများ အနားတွင် လဲကျနေပြီး ၎င်းတို့၏ မျက်နှာဖုံးများမှာ ကွဲအက်ကာ အောက်တွင် ခြောက်ကပ်နေသော ဦးခေါင်းခွံများ ပေါ်နေသည်၊၊
ကျွီးးး...
အနန္တရထားသည် အရှိန်လျှော့ကာ ရပ်တန့်သွားသည်၊၊ ရှေ့ဘက်တွင် ကျွန်းပေါ်သို့ သွားသည့် လမ်းကြောင်းကို ရထားမျိုးစုံ ဒါဇင်ပေါင်းများစွာက လုံးဝ ပိတ်ဆို့ထားပြီး နေရာတိုင်းတွင် သုဿန်တစ်စပြင်လို တိတ်ဆိတ်နေသည်၊၊ ကမ္ဘာပျက်ကပ်ရထားအချို့၏ အပြင်ဘက် သံချပ်ကာများပေါ်တွင် ခြောက်ကပ်နေသော သွေးကွက်များ ဖုံးလွှမ်းနေသည်၊၊
လင်းရှန်သည် တံခါးကို ဖွင့်လိုက်ရာ ပင်လယ်လေနှင့်အတူ “အမှောင်ကပ်ဘေး ရောက်ရှိလာခြင်း၊၊ နိုင်ငံလုံးဆိုင်ရာ သီးသန့်ခွဲခြားမှု” ဟု ရေးထားသော ပိုစတာတစ်ခု လွင့်ပါလာပြီး ရထားအမိုးများပေါ်သို့ ကျော်လွန်သွားသည်၊၊ လဲကျနေသော အတားအဆီးများ နောက်ကွယ်တွင် ပုံနေသော အလောင်းတောင်ကြီးတစ်ခု ရှိနေပြီး အားလုံးမှာ ခြောက်ကပ် ဆွေးမြည့်နေကာ ဦးတည်ချက်တစ်ခုတည်းသို့ ဦးတည်နေကြပုံရသည်...
ကျွန်းပေါ်မှ ထွက်ပြေးလွတ်မြောက်ရန်…