အခန်း (၄၇၉-၄၈၀)
Vol. 35 Ch. 479-480
အခန်း ( ၄၇၉ ) - ချန်ဝူး၏ ဦးနှောက်၊ အခွင့်အရေးကို စောင့်ဆိုင်းခြင်းနှင့် ဓားကို သွန်းလုပ်ရန် ပြင်ဆင်ခြင်း
နတ်ဆိုးနယ်မြေ၏ အနက်ရှိုင်းဆုံးနေရာမှ အငြိုးအတေး ကျဆင်းလာခဲ့၍ မျက်စိတစ်မှိတ်အတွင်းမှာပင် ရှာနာနတ်ဆိုးဧကရာဇ် ဆုတ်ခွာသွားခဲ့သည်။
၎င်းတို့နှစ်ခုကြားတွင် ဆက်စပ်မှုမရှိဟု ပြောရန် ခက်ခဲလှ၏။
အထူးသဖြင့် တိုက်ခိုက်သူများထဲမှ တစ်ဦးမှာ ကုချန်ဖြစ်နေခြင်းက ပို၍ပင် စိတ်ဝင်စားဖွယ် ကောင်းနေစေသည်။
နတ်ဆိုးဧကရာဇ်ကြီးသည် ကုချန်၌ နတ်ဆိုးဧကရာဇ်အဆင့်ကို ရင်ဆိုင်နိုင်စွမ်းရှိသော နောက်ဆုံးလက်နက်များ ရှိနေကြောင်းကို ဝိုးတဝါး ခန့်မှန်းမိခဲ့သည်။ ယခုအခါ ရှာနာနတ်ဆိုးဧကရာဇ်၏ သေချာစီစဉ်ထားသော အကြံအစည်ကြီး ရှိနေသော်ငြားလည်း သူသည် ကုချန်အား ဘာမျှမလုပ်နိုင်ခဲ့ပေ။ ဤသည်မှာ ရှာနာနတ်ဆိုးဧကရာဇ် သဘောကောင်းနေ၍လော။
နတ်ဆိုးဧကရာဇ်ကြီးကတော့ ဤသည်ကို မည်သည့်အခါမျှ ယုံကြည်မည် မဟုတ်ပေ။
တစ်ခုတည်းသော ဖြစ်နိုင်ခြေမှာ ကုချန်သည် ရှာနာနတ်ဆိုးဧကရာဇ်ကိုပင် ဟန့်တားနိုင်လောက်အောင် အစွမ်းထက်သော နောက်ဆုံးလက်နက်တစ်ခုကို ထုတ်ဖော်ပြသခဲ့ခြင်းပင် ဖြစ်၏။
ထိုသို့ဆိုလျှင် နတ်ဆိုးဧကရာဇ်တစ်ပါးကိုပင် ဟန့်တားနိုင်သည့် မည်ကဲ့သို့သော နောက်ဆုံးလက်နက်မျိုး ဖြစ်မည်နည်း။
ပုံရိပ်ယောင် မြင်ကွင်းမှတစ်ဆင့် သူ ယခုလေးတင် ခံစားသိရှိခဲ့ရသော အငြိုးအတေးစလေးကို တွေးမိသောအခါ နတ်ဆိုးဧကရာဇ်ကြီးသည် မတုန်လှုပ်ဘဲ မနေနိုင်ခဲ့ပေ။
ယခုအခါ အခြေအနေမှာ အလွန် ရှင်းလင်းသွားခဲ့ပြီ ဖြစ်၏။
ထိုအငြိုးအတေး၊ နတ်ဆိုးနယ်မြေ၏ အနက်ရှိုင်းဆုံးနေရာမှ ရှေးဟောင်းတည်ရှိမှုသည် ကုချန်၏ နောက်ဆုံးလက်နက်ပင် ဖြစ်သည်။
သို့မဟုတ်ပါက ရှာနာနတ်ဆိုးဧကရာဇ်မှ ကုချန်အား ပစ်မှတ်ထားချိန်တွင် ထိုအငြိုးအတေးသည် အဘယ်ကြောင့် ရုတ်တရက် ကျဆင်းလာရမည်နည်း။
ဖြစ်နိုင်ခြေ တစ်ခုတည်းသာ ရှိ၏။ ကုချန်သည် နတ်ဆိုးနယ်မြေ၏ အနက်ရှိုင်းဆုံးနေရာရှိ ထိုတားမြစ်နယ်မြေမှ တည်ရှိမှုနှင့် ရှုပ်ထွေးနက်နဲသော ဆက်နွယ်မှုများ ရှိနေခြင်းပင် ဖြစ်သည်။
" ကုချန်မှာ ဒီလိုနောက်ခံမျိုး ရှိနေလိမ့်မယ်လို့ ငါ မမျှော်လင့်ထားခဲ့မိဘူး "
နတ်ဆိုးဧကရာဇ်ကြီးသည် သူ၏ နဖူးမှ ချွေးအေးများကို သုတ်လိုက်ကာ ကံကောင်းသည်ဟု တိတ်တဆိတ် ခံစားလိုက်ရ၏။
ယခင်က ကုချန်နှင့် ရန်သူမဖြစ်ခဲ့သည်မှာ ကောင်းသောကိစ္စပင် ဖြစ်သည်။ ဤလူ၏ ဇာစ်မြစ်မှာ ဤမျှအထိ အံ့မခန်းဖြစ်နေလိမ့်မည်ဟု သူ မမျှော်လင့်ထားခဲ့ချေ!
နတ်ဆိုးနယ်မြေ၏ အနက်ရှိုင်းဆုံးနေရာရှိ ထိုကျယ်ပြောလှသော နတ်ဆိုးနယ်မြေကြီးသည် အသီးသီးသော နတ်ဆိုးဧကရာဇ်အဆင့် တည်ရှိမှုများအတွက်ပင် လုံးဝ တားမြစ်ထားသော နယ်မြေတစ်ခုပင် ဖြစ်၏။
အဘယ်ကြောင့်ဆိုသော် အတိတ်က ထိုနတ်ဆိုးနယ်မြေကြီးအတွင်းသို့ ဝင်ရောက်စုံစမ်းရန် ကြိုးစားခဲ့သော နတ်ဆိုးဧကရာဇ်အဆင့် တည်ရှိမှုများ ရှိခဲ့ဖူးသောကြောင့်ပင်။
သို့သော် ရလဒ်အနေဖြင့် ထိုကျယ်ပြောလှသော နတ်ဆိုးနယ်မြေကြီးထဲသို့ ဝင်ရောက်ပြီး မကြာမီမှာပင် ၎င်းတို့သည် တိတ်ဆိတ်စွာ သေဆုံးသွားခဲ့ကြ၏။
၎င်းတို့သည် မသေဆုံးမီ သတင်းစကား တစ်စုံတစ်ရာ ပေးပို့ရန်ပင် အချိန်မရခဲ့ကြပေ။
နတ်ဆိုးနယ်မြေ တစ်ခုလုံးတွင် ယခင် မာရ်နတ်ဧကရာဇ် တစ်ပါးတည်းသာ ထိုကျယ်ပြောလှသော နတ်ဆိုးနယ်မြေကြီးထဲသို့ ဝင်ရောက်နိုင်ကာ အသက်ရှင်ကျန်ရစ်နိုင်ပေသည်။ အခြားသော နတ်ဆိုးဧကရာဇ်များမှာမူ ထိုအရည်အချင်းမျိုးပင် မရှိကြပေ။
အင်မော်တယ်-နတ်ဆိုး စစ်ပွဲအပြီးတွင် မာရ်နတ်ဧကရာဇ်သည် အရိပ်အယောင်မျှမကျန်ဘဲ ပျောက်ကွယ်သွားခဲ့၏။ မာရ်နတ်ဧကရာဇ်သည် နတ်ဆိုးနယ်မြေ အနက်ပိုင်းရှိ ထိုတားမြစ်နတ်ဆိုးနယ်မြေအတွင်းသို့ ဝင်ရောက်သွားခဲ့သလားဟု နတ်ဆိုးဧကရာဇ်ကြီးနှင့် အခြားသူများက ခန့်မှန်းခဲ့ကြသည်။
သို့သော် မည်သည့်နတ်ဆိုးဧကရာဇ်ကမျှ ထိုနေရာသို့ မဝင်ရောက်ရဲကြသောကြောင့် အရာအားလုံးသည် ခန့်မှန်းချက်များအဖြစ်သာ ကျန်ရစ်ခဲ့၏။
ယခုအခါတွင် ထိုကျယ်ပြောလှသော နတ်ဆိုးနယ်မြေကြီးနှင့် ဆက်စပ်နေပုံရသည့် ဒုတိယမြောက် တည်ရှိမှုတစ်ခု နတ်ဆိုးနယ်မြေတွင် ပေါ်ထွက်လာခဲ့ပြီဖြစ်သည်။ နတ်ဆိုးဧကရာဇ်ကြီး အနေဖြင့် မည်သို့ မအံ့ဩဘဲ နေနိုင်မည်နည်း။
" တကယ်လို့ ဒီကလေးက အဲဒီနတ်ဆိုးနယ်မြေနဲ့ ဆက်စပ်နေတယ်ဆိုရင် ငါ့ရဲ့ ကြီးမားတဲ့ အခွင့်အရေးက သူ့အပေါ်မှာ ရှိနေဖို့ ပြဿနာမရှိတော့ဘူး! "
စိတ်သက်သာရာ ရသွားပြီးနောက် နတ်ဆိုးဧကရာဇ်ကြီးသည် အနည်းငယ် စိတ်လှုပ်ရှားလာခဲ့၏။
သူ၏ ကြီးမားသော အခွင့်အရေးသည် ကုချန်အပေါ်တွင် ကျရောက်မည်ဖြစ်ကြောင်း ကျောက်စိမ်းဖြူလိပ်ခွံမှ ညွှန်ပြနေခဲ့သည်။
သို့သော် ကုချန်၏ လက်ရှိအဆင့်နှင့် စွမ်းအားအရ သူသည် ထိုသို့သော ကြီးမားသည့် အခွင့်အရေးမျိုးကို ပံ့ပိုးပေးနိုင်မည် မဟုတ်ကြောင်းမှာ ထင်ရှားပေသည်။
သို့ရာတွင် ကုချန်သည် ထိုတားမြစ်နတ်ဆိုးနယ်မြေနှင့် ဆက်စပ်နေမည်ဆိုပါက အရာအားလုံးသည် အဓိပ္ပာယ်ရှိသွားပေလိမ့်မည်။
အတိတ်က နတ်ဆိုးဧကရာဇ်အဆင့် တည်ရှိမှုများသည် အဘယ်ကြောင့် အသက်ကိုပဓာနမထားဘဲ ထိုနတ်ဆိုးနယ်မြေကို စုံစမ်းရန် ကြိုးစားခဲ့ကြသနည်း။
၎င်းမှာ ရှေးဟောင်းဒဏ္ဍာရီများအရ ထိုနေရာတွင် နတ်ဆိုးဧကရာဇ်အဆင့် တည်ရှိမှုများကို အဆင့်တက်ရန် ကူညီပေးနိုင်သည့် ကြီးမားသော အခွင့်အရေးတစ်ခု ရှိနေသည်ဟု ဆိုထားသောကြောင့်ပင်!
ယခု ကုချန်သည် ထိုနတ်ဆိုးနယ်မြေနှင့် ဆက်စပ်နေပြီဖြစ်ရာ အနာဂတ်တွင် ထိုအခွင့်အရေးကို နတ်ဆိုးနယ်မြေထဲမှ ယူဆောင်လာ၍ သူ့အား ပေးနိုင်မည်ဆိုပါက ကျောက်စိမ်းဖြူလိပ်ခွံပေါ်ရှိ ဟောကိန်းသည် အမှန်တကယ် ဖြစ်လာမည်မဟုတ်လော!
" ဒီအခွင့်အရေး ငါ့လက်ထဲ ဘယ်တော့ ရောက်လာမလဲဆိုတာပဲ ငါ မသိတာ "
နတ်ဆိုးဧကရာဇ်ကြီးသည် အတော်လေး စိတ်အားထက်သန်နေခဲ့၏။
ဤနတ်ဆိုးနယ်မြေရှိ နတ်ဆိုးဧကရာဇ်များထဲတွင် သူသည် မကြာသေးမီကမှ တာအိုကို ရရှိခဲ့သူ အနည်းငယ်ထဲမှ တစ်ဦးဖြစ်သော်လည်း သူသည် နတ်ဆိုးဧကရာဇ်အဆင့်တွင် အတိုင်းအတာတစ်ခုအထိ အချိန်ကြာမြင့်စွာ နေထိုင်ခဲ့ရပြီး ဖြစ်သည်။
ဤနတ်ဆိုးနယ်မြေရှိ နတ်ဆိုးဧကရာဇ်များထဲတွင် မည်သူက နတ်ဆိုးဧကရာဇ်အဆင့်ကို ကျော်လွန်၍ အဆင့်တက်ရန် အိပ်မက်မမက်ဘဲ နေမည်နည်း။
သို့သော် သမိုင်းတစ်လျှောက်လုံးတွင် နတ်ဆိုးဧကရာဇ်အဆင့်သည် နတ်ဆိုးနယ်မြေ၏ အကန့်အသတ်ဖြစ်ပုံပင်။ နတ်ဆိုးဧကရာဇ်အဆင့်မှ အောင်မြင်စွာ အဆင့်တက်နိုင်ခဲ့သူ တစ်ဦးတစ်ယောက်မျှပင် မရှိခဲ့ချေ။
လျှို့ဝှက်ဆန်းကြယ်သော မာရ်နတ်ဧကရာဇ် တစ်ပါးတည်းသာလျှင် တစ်ခုတည်းသော ချွင်းချက် ဖြစ်၏။
မာရ်နတ်ဧကရာဇ် တည်ရှိနေခြင်းကလည်း နတ်ဆိုးနယ်မြေရှိ အသီးသီးသော နတ်ဆိုးဧကရာဇ်များ၏ စိတ်နှလုံးထဲမှ တစ်ခုတည်းသော မျှော်လင့်ချက် ဖြစ်နေခဲ့သည်။
နတ်ဆိုးဧကရာဇ်အဆင့်မှ ဖောက်ထွက်ခြင်းသည် လမ်းဆုံးမဟုတ်ကြောင်းနှင့် ရှေ့ဆက်ရန် ဖြစ်နိုင်သေးကြောင်းကို မာရ်နတ်ဧကရာဇ် တည်ရှိနေခြင်းက အနည်းဆုံးတော့ သက်သေပြနေသည်ဟု သူတို့ ခံစားရရာ ဤမျှဆိုလျှင်ပင် လုံလောက်နေပြီပင်။
" ထားလိုက်ပါတော့... ဒီလောက်တောင် စောင့်ခဲ့ပြီးပြီပဲ... နောက်ထပ် နည်းနည်းလောက် ထပ်စောင့်ရတာ ဘာမှမဖြစ်ပါဘူး... ငါ့မှာ အချိန်တွေ အများကြီးရှိတယ်... စိတ်ရှည်လက်ရှည် စောင့်နိုင်ပါတယ် "
နတ်ဆိုးဧကရာဇ်ကြီးသည် ကိုယ်တိုင်လည်း နတ်ဆိုးဧကရာဇ်အဆင့်မှ ဖောက်ထွက်နိုင်မည့် အခွင့်အရေးကို လိုလားတောင့်တနေသော်ငြားလည်း သူ၏စိတ်နှလုံးထဲရှိ ဂနာမငြိမ်ဖြစ်မှုများကို အတင်းအကျပ် ဖိနှိပ်ရင်း တစ်ကိုယ်တည်း တီးတိုး ရေရွတ်လိုက်၏။
သို့သော် ဤအခွင့်အရေးသည် အတင်းအကျပ် ရယူနိုင်သော အရာမျိုး မဟုတ်ကြောင်းကို နတ်ဆိုးဧကရာဇ်ကြီး သိထားလေသည်။
အချိန်ကျလာသောအခါ ကောင်းချီးမင်္ဂလာများမှာ သဘာဝအတိုင်း ရောက်ရှိလာမည်သာ ဖြစ်သည်။
အချိန်တန်သောအခါမှသာ ဤအံ့မခန်း အခွင့်အရေးကို သူ ရိတ်သိမ်းရမည့် အချိန်ရောက်လာပေလိမ့်မည်။
.........
အဆုံးမဲ့ကောင်းကင်ဘုံ... ကုချန်၏ နန်းတော်အတွင်း၌.....
ကျယ်ပြောလှသော နန်းတော်ကြီးမှာ ဟာလာဟင်းလင်းဖြစ်နေကာ ကုချန် တစ်ယောက်သာ ရှိနေလေသည်။
ပြန်ရောက်ပြီးနောက် ကုချန်သည် ချီလျိုအား သူ အချိန်အတိုင်းအတာတစ်ခုအထိ တံခါးပိတ်ကျင့်ကြံတော့မည်ဖြစ်ကြောင်းနှင့် ထိုအချိန်အတွင်း ကိစ္စကြီးကြီးမားမား မရှိပါက သူ့အား မနှောင့်ယှက်ရန် ညွှန်ကြားထားခဲ့သည်။
ကုချန်၏အမိန့်ကို ရရှိပြီးနောက် ချီလျိုသည် ချက်ချင်း လှုပ်ရှားလိုက်ကာ ကုချန်၏ နန်းတော်ပတ်လည်ရှိ သက်ရှိသတ္တဝါအားလုံးကို ရှင်းလင်းလိုက်၍ မိုက်မဲသူတစ်စုံတစ်ယောက်မှ လာရောက်နှောင့်ယှက်ခြင်း မပြုနိုင်စေရန် ကုချန်၏ နန်းတော်အပြင်ဘက်ကို စောင့်ကြပ်ရန် ချီလျန်မျိုးနွယ်မှ သစ္စာရှိသော အကြီးအကဲအချို့ကို စေလွှတ်လိုက်၏။
သူ၏ တံခါးပိတ်ကျင့်ကြံရာ နေရာသို့ ပြန်ရောက်ပြီးနောက် ကုချန်သည် တရားထိုင်ရန် အလျင်စလို မပြုလုပ်ခဲ့ဘဲ ရှေးဦးစွာ သူ၏ လက်ကိုဝှေ့ယမ်းကာ ယခုတစ်ကြိမ် အင်မော်တယ်ကမ္ဘာမှ သူ ယူဆောင်လာခဲ့သော မြောက်မြားစွာသော ကောင်းကင်သတ္တုများကို ထုတ်ယူလိုက်သည်။
ကောင်းကင်သတ္တု အပိုင်းအစများ တစ်ခုပြီးတစ်ခု ပေါ်လာသည်နှင့်အမျှ ကမ္ဘာလောကသည် ရောင်စုံ အံ့ဖွယ်အရောင်အသွေးများဖြင့် ချက်ချင်း ပြည့်နှက်သွားခဲ့၏။
၎င်းတို့မှာ မတူညီသော ကောင်းကင်သတ္တုများမှ ထုတ်လွှတ်လိုက်သည့် အလင်းရောင်များပင် ဖြစ်သည်။
၎င်းတို့ထဲတွင် ဓာတ်ကြီးငါးပါး၏ စွမ်းအားများ ပါဝင်သော ကောင်းကင်ပစ္စည်းများအပြင် လေနှင့် လျှပ်စီးစွမ်းအားများ ပါဝင်သော ကောင်းကင်သတ္တုများလည်း ပါဝင်၏။ အချိန်နှင့် လေဟာနယ် စွမ်းအားများ ပါဝင်သော ကောင်းကင်သတ္တုများပင် ထိုအထဲတွင် ခိုအောင်းနေသေးသည်။
ဤကောင်းကင်သတ္တုများသည် ကုချန်၏ နှစ်ပေါင်းများစွာ ခက်ခက်ခဲခဲ စုဆောင်းထားခဲ့မှု၏ ရလဒ်ဟု ဆိုနိုင်ပေသည်။
အချို့ကို ဟွမ်သွမ့်ပင်လယ်၏ အနက်ရှိုင်းဆုံးနေရာများတွင် သူကိုယ်တိုင် ရှာဖွေတွေ့ရှိခဲ့ခြင်း ဖြစ်သည်။
အချို့မှာ အင်မော်တယ်တစ်သောင်းမျှော်စင်ကို ဖျက်ဆီးပြီးနောက် ထိုနေရာမှ သူ လုယူခဲ့ခြင်းဖြစ်ပြီး နောက်ပိုင်းတွင် လဝိညာဉ် ကောင်းကင်ဘုံ၌ အခြေချပြီးနောက် သူ့အတွက် ရှာဖွေပေးရန် ယွဲ့လင်အင်မော်တယ်ဘုရင်ကို ညွှန်ကြားခဲ့ခြင်း ဖြစ်သည်။
ဤအထဲတွင် အင်မော်တယ်ကမ္ဘာ၌ ချန်းရှီအင်မော်တယ်ဘုရင်နှင့် ဝမ်ထျန်းအင်မော်တယ်ဘုရင်တို့ကို သတ်ဖြတ်ပြီးနောက် သူ ရရှိခဲ့သော ပစ္စည်းများလည်း ပါဝင်သည်။
သေချာပေါက်ပင် ရှေးဟောင်းမကောင်းဆိုးဝါးအင်မော်တယ်ဘုရင်ကို သတ်ဖြတ်ပြီးနောက် သူရရှိခဲ့သော အင်မော်တယ်ဘုရင် တိုက်ပွဲဝင်ရတနာဖြစ်သည့် ထိုကျိုးပဲ့နေသော အင်မော်တယ်ဘုရင် တိုက်ပွဲဝင်အလံလည်း ပါဝင်ပေသည်။
ဤနှစ်များအတွင်း သူ၏ ရရှိမှုအားလုံးကို ကုချန် ထုတ်ယူလိုက်သောအခါ လေဟာနယ်ထဲတွင် အသံတစ်သံ ချက်ချင်း ပဲ့တင်ထပ်သွားခဲ့၏။
နောက်အခိုက်အတန့်တွင် တောက်ပသော အလင်းတန်းတစ်ခု လင်းလက်သွားကာ လေဟာနယ် ပြိုကွဲသွား၍ အဆုံးမဲ့ဓားသည် ကုချန်၏ရှေ့တွင် ချက်ချင်း ထွက်ပေါ်လာခဲ့၏။ ၎င်းသည် အိမ်မွေးတိရစ္ဆာန်လေးတစ်ကောင်ကဲ့သို့ သူ၏ပတ်လည်တွင် လှည့်ပတ်နေကာ ၎င်း၏ဓားဖျားမှာလည်း အဆက်မပြတ် တောက်ခေါက်နေရာ အဆုံးမဲ့ဓား၏ စိတ်လှုပ်ရှား၍ ဂနာမငြိမ်ဖြစ်နေသော စိတ်အခြေအနေကို ဖော်ပြနေပုံရ၏။
" ကောင်းပါပြီ... ကောင်းပါပြီ... အရမ်းကြီး လောမနေပါနဲ့... ဒါတွေ အားလုံးက မင်းအတွက်ချည်းပါပဲ "
အဆုံးမဲ့ဓား၏ စိတ်လှုပ်ရှားနေသော ပုံစံကို ကြည့်ရင်း ကုချန်သည် ရယ်မောကာ ခေါင်းခါလိုက်၏။ ဤကောင်းကင်သတ္တု မြင့်မြတ်သော ပစ္စည်းများကို အစကတည်းက အဆုံးမဲ့ဓားအတွက် သူ ပြင်ဆင်ထားခဲ့ခြင်း ဖြစ်သည်။ ယခုအခါ သူ၏စွမ်းအားများ တိုးတက်လာသည်ဖြစ်ရာ သာမန် အင်မော်တယ်ဘုရင် မြင့်မြတ်သော လက်နက်တစ်ခုသာ ဖြစ်သည့် အဆုံးမဲ့ဓားသည် အနည်းငယ် မလုံလောက်တော့ပေ။
ပုံမှန်အားဖြင့် ကုချန်သည် တိုက်ပွဲအတွက် အဆုံးမဲ့ဓားကို ထုတ်သုံးလေ့ သိပ်မရှိချေ။
အကယ်၍ အဆုံးမဲ့ဓားကို နောက်ကောက်မကျစေလိုပါက ၎င်းကို ပို၍ အစွမ်းထက်သော မြင့်မြတ်သည့် လက်နက်တစ်ခုဖြစ်လာအောင် သူ သွန်းလုပ်ရန် လိုအပ်ပေသည်။
ယခု သူသည် ကောင်းကင်ပစ္စည်းများကို အချိန်ကြာမြင့်စွာ စုဆောင်းထားခဲ့ပြီးပြီဖြစ်ရာ ၎င်းတို့ကို အသုံးပြု၍ အဆုံးမဲ့ဓားကို အဆင့်မြှင့်တင်ပေးရန် အချိန်ရောက်လာပြီ ဖြစ်သည်။
အခန်း ( ၄၈၀ ) - တိုက်ပွဲဝင်အလံကို ပေါင်းစည်းခြင်း၊ အင်မော်တယ်နှင့် နတ်ဆိုး စစ်မြေပြင်၊ ရှေးဟောင်းမကောင်းဆိုးဝါး
ချွင်...! ချွင်...!
အဆုံးမဲ့ဓားသည် အဆက်မပြတ် တုန်ခါမြည်ဟည်းနေ၍ လေဟာနယ်ထဲတွင် စီတန်းထားသော များပြားလှသည့် အင်မော်တယ်ပစ္စည်းများသည် ၎င်း၏မျက်စိထဲ၌ အရသာရှိသော ဟင်းလျာများကဲ့သို့ ဖြစ်နေကာ မျှော်လင့်တကြီး ဖြစ်နေစေ၏။
ကုချန်ကသာ အမိန့်မပေးရသေးလျှင် အဆုံးမဲ့ဓားသည် စိတ်မရှည်စွာဖြင့် ရှေ့သို့ပြေးထွက်သွားကာ ဤအင်မော်တယ်ပစ္စည်းများ အားလုံးကို ၎င်း၏ကိုယ်ထည်ထဲသို့ ပေါင်းစည်းပစ်ခဲ့သည်မှာ ကြာလှပြီဖြစ်သည်။
အဆုံးမဲ့ဓားသည် အင်မော်တယ်ဘုရင်အဆင့်ရှိ မြင့်မြတ်သောလက်နက်တစ်ခု ဖြစ်နေခဲ့ပြီဖြစ်ရာ ဤအင်မော်တယ်ပစ္စည်းများကို ပေါင်းစည်းရာတွင် ကုချန်၏ ထိန်းချုပ်မှု မလိုအပ်တော့ဘဲ သူ့အလိုလို ပြုလုပ်နိုင်နေပြီဖြစ်သည်။
" ဒီအင်မော်တယ်ပစ္စည်းတွေကို ပေါင်းစည်းဖို့ မလောပါနဲ့ဦး... ပထမဆုံး ဒီအင်မော်တယ်ဘုရင် တိုက်ပွဲဝင်အလံကို မင်းရဲ့ခန္ဓာကိုယ်ထဲကို ပေါင်းစည်းဖို့ အရင်ကြိုးစားကြည့်လိုက် "
ကုချန်သည် သူ၏လက်ကို မြှောက်လိုက်ကာ ရှေးဟောင်းမကောင်းဆိုးဝါးအင်မော်တယ်ဘုရင်ကို သတ်ဖြတ်ပြီးနောက် သူရရှိခဲ့သော အင်မော်တယ်ဘုရင် တိုက်ပွဲဝင်အလံကို ခေါ်ယူလိုက်၍ အဆုံးမဲ့ဓား၏ ရှေ့သို့ ပစ်ချပေးလိုက်၏။
ထိုအင်မော်တယ်ဘုရင် တိုက်ပွဲဝင်အလံသည် ရှေးဟောင်းမကောင်းဆိုးဝါးအင်မော်တယ်ဘုရင် ဂုဏ်ယူဝင့်ကြွားခဲ့ရသော တန်ဖိုးကြီးရတနာတစ်ခုဖြစ်ကာ ၎င်း၏ အစွမ်းအာနိသင်သည် သာမန် အင်မော်တယ်ဘုရင် လက်နက်များထက် များစွာ သာလွန်ပေသည်။
အကယ်၍ ကုချန်၏စွမ်းအားသာ ရှေးဟောင်းမကောင်းဆိုးဝါးအင်မော်တယ်ဘုရင်ထက် များစွာ သာလွန်မနေခဲ့ပါက ဤတိုက်ပွဲဝင်အလံ တစ်ခုတည်းနှင့်ပင် ရှေးဟောင်းမကောင်းဆိုးဝါးအင်မော်တယ်ဘုရင်သည် တိုက်ပွဲ၏ ရလဒ်ကို အဆုံးအဖြတ်ပေးကာ ကုချန်ကို အနိုင်ယူနိုင်မည် ဖြစ်သည်။
သို့သော် ထိုအင်မော်တယ်ဘုရင် တိုက်ပွဲဝင်အလံ၏ အလုပ်လုပ်ပုံမှာ အလံထဲတွင် ပါဝင်နေသော အဆုံးမဲ့ သတ်ဖြတ်လိုစိတ်များကို နယ်ပယ်တစ်ခုအဖြစ် ပြောင်းလဲကာ ရန်သူကို ပိပိတ်လှောင်၍ မလှုပ်ရှားနိုင်အောင် ပြုလုပ်ခြင်းဖြစ်သည်။
ဤသည်မှာ ကုချန်၏ 'အချိန်နှင့်လေဟာနယ် ပျက်သုဉ်းခြင်း ကျင့်စဉ်' နှင့်လည်း အနည်းငယ် ဆင်တူနေပေသည်။
ထို့ကြောင့် ဤအင်မော်တယ်ဘုရင် တိုက်ပွဲဝင်အလံသည် ကုချန်အတွက် သိပ်ပြီး အသုံးမဝင်လှပေ။
ယခုအခါ သူသည် အင်မော်တယ်ဧကရာဇ်အဆင့် တည်ရှိမှုတစ်ခုကိုပင် ရင်ဆိုင်နိုင်နေပြီဖြစ်ရာ ဤအင်မော်တယ်ဘုရင်အဆင့် တိုက်ပွဲဝင်ရတနာသည် သူ့အတွက် ဝန်ထုပ်ဝန်ပိုးတစ်ခုပင် ဖြစ်နေတော့သည်။
မည်သို့ပင်ဖြစ်စေ ဤစုတ်ပြဲနေသော တိုက်ပွဲဝင်အလံ၏ တန်ဖိုးသည် အခြားသော အင်မော်တယ်ပစ္စည်းများထက် များစွာ သာလွန်နေဆဲ ဖြစ်သည်။
အကယ်၍ အဆုံးမဲ့ဓားသည် ၎င်းကို အောင်မြင်စွာ ပေါင်းစည်းနိုင်ပါက မျှော်လင့်မထားသော ရလဒ်များကို ရရှိမည်မှာ သေချာလှသည်။
" ဝုန်း...! "
ကုချန်၏အမိန့်ကို ကြားသောအခါ အဆုံးမဲ့ဓားသည် သဘာဝအတိုင်းပင် သံသယဝင်မနေခဲ့ချေ။ ၎င်း၏ဓားသွားပေါ်တွင် ပါးစပ်တစ်ခုကဲ့သို့ ရှည်လျားကျဉ်းမြောင်းသော အဟိုက်တစ်ခု ပထမဆုံး ပွင့်ဟလာခဲ့၏။ နောက်အခိုက်အတန့်တွင် အင်မော်တယ်ဘုရင် တိုက်ပွဲဝင်အလံသည် အထဲသို့ ဆွဲသွင်းခံလိုက်ရကာ ထိုအဟိုက်ထဲသို့ ကျဆင်းသွားတော့သည်။
" ဝုန်း...! "
အင်မော်တယ်ဘုရင် တိတိုက်ပွဲဝင်အလံ အဆုံးမဲ့ဓားထဲသို့ ဝင်ရောက်သွားသည်နှင့်တပြိုင်နက် အဆုံးမဲ့ဓား၏ ဓားကိုယ်ထည်သည် ချက်ချင်း ပြင်းထန်စွာ တုန်ခါလာတော့၏။
အဆုံးမဲ့ဓားသည် မီးရဲရဲတောက်နေသော သံပူပြားတစ်ခုကို မြိုချလိုက်ရသကဲ့သို့ ခံစားလိုက်ရကာ ၎င်း၏ဓားတစ်လက်လုံးမှာ အဆက်မပြတ် တုန်ခါနေခဲ့သည်။
" မင်းရဲ့ အစွမ်းကုန်သုံးပြီး သန့်စင်လိုက်ပါ... ငါ မင်းကို ကူညီပေးမယ် "
ကုချန်မှ လက်တစ်ဖက်ကို ဆန့်ထုတ်ကာ အဆုံးမဲ့ဓား၏ လက်ကိုင်ကို ဆုပ်ကိုင်လိုက်၏။ သူ၏ တည်ငြိမ်သော အသံကြောင့် အဆုံးမဲ့ဓား၏ တုန်ခါမှုများသည် ချက်ချင်းပင် အနည်းငယ် လျော့ကျသွားခဲ့လေသည်။
ဤအင်မော်တယ်ဘုရင် တိုက်ပွဲဝင်အလံကို ပေါင်းစည်းခြင်းသည် အခြားသော အင်မော်တယ်ပစ္စည်းများကို ပေါင်းစည်းသကဲ့သို့ ရိုးရှင်းမည်မဟုတ်ကြောင်းကို ကုချန် ကြိုတင်မျှော်လင့်ထားပြီး ဖြစ်သည်။
သို့သော် အစကတည်းက အဆုံးမဲ့ဓား၏ တုံ့ပြန်မှုက ဤမျှအထိ ပြင်းထန်လိမ့်မည်ဟု သူ မထင်မှတ်ထားခဲ့ချေ။
" သတ်! သတ်! သတ်! "
နားကွဲမတတ် သတ်ဖြတ်ဟစ်အော်သံများသည် အဆုံးမဲ့ဓားထဲမှ အဆက်မပြတ် ပဲ့တင်ထပ် ထွက်ပေါ်လာခဲ့၏။
၎င်းမှာ အင်မော်တယ်ဘုရင် တိုက်ပွဲဝင်အလံထဲတွင် ပါဝင်နေသော အဆုံးမဲ့ သတ်ဖြတ်လိုစိတ်များ ဖြစ်ပြီး ယခုအခါ အဆုံးမဲ့ဓား၏ စုပ်ယူမှုနှင့် ပြန်လည်ဖွဲ့စည်းမှုကြောင့် တဖြည်းဖြည်း ယိုစိမ့်ထွက်ပေါ်လာကာ ရှေးဟောင်းဓားတစ်လက်လုံးထဲသို့ စိမ့်ဝင်သွား၍ အဆုံးမဲ့ဓားကို 'ပေါက်ကွဲ' သွားစေရန် ကြိုးစားနေသည့်အလားပင်။
အကယ်၍ သာမန် အင်မော်တယ်ဘုရင် လက်နက်တစ်ခုသာဆိုလျှင် အင်မော်တယ်ဘုရင် တိုက်ပွဲဝင်အလံမှ ဤမျှကြမ်းတမ်းသော သတ်ဖြတ်လိုစိတ်များ၏ တိုက်စားခံရမှုကြောင့် လုံးဝ ပေါက်ကွဲပျက်စီးသွားခဲ့သည်မှာ ကြာလှပြီဖြစ်သည်။
သို့သော် အဆုံးမဲ့ဓားသည် မည်သို့ပင်ဆိုစေ ကုချန်၏ ကိုယ်ပိုင်လက်နက် ဖြစ်၏။ ၎င်းတွင် ကုချန် ပေါင်းထည့်ပေးထားသော တာအိုအသိအမြင်အချို့ ပါဝင်ကာ အဆုံးမဲ့တာအိုမီးဖိုထဲတွင် သန့်စင်ခံထားရပြီး ဖြစ်သည်။
ထို့အပြင် ဤနှစ်များအတွင်း နတ်ဆိုးနယ်မြေ၌ ကုချန် ရရှိခဲ့သမျှသော အင်မော်တယ်ပစ္စည်းများ အားလုံးကို အဆုံးမဲ့ဓားထဲသို့ ပေါင်းစည်းထားခဲ့ပြီး ဖြစ်၏။
ထို့ကြောင့် ယခုအခါ အဆုံးမဲ့ဓား၏ အနှစ်သာရသည် သာမန် အင်မော်တယ်ဘုရင် လက်နက်များထက် များစွာ သာလွန်နေပြီဖြစ်ရာ အင်မော်တယ်ဘုရင် တိုက်ပွဲဝင်အလံပင်လျှင် ၎င်းကို မထိခိုက်စေနိုင်တော့ပေ။
အင်မော်တယ်ဘုရင် တိုက်ပွဲဝင်အလံ၏ ပြင်းထန်သော တုံ့ပြန်မှုသည် အဆုံးမဲ့ဓား၏ မာနကိုလည်း ဆွပေးလိုက်ရာ ၎င်းကို ပို၍ပင် မကျေမနပ် ဖြစ်သွားစေ၏။ ၎င်း၏ ကိုယ်တွင်းမှ အဆုံးမဲ့ ဓားချီများ ရုန်းကြွလာကာ ထိုစုတ်ပြဲနေသော အင်မော်တယ်ဘုရင် တိုက်ပွဲဝင်အလံကို အရိပ်အယောင်ပင် မကျန်အောင် လုံးဝ ဆုတ်ဖြဲပစ်လိုက်လေသည်။
ဤလုပ်ငန်းစဉ်အတွင်း ကုချန်သည် အေးစက်သော အကြည့်များဖြင့်သာ စောင့်ကြည့်နေခဲ့၍ ဝင်မပါခဲ့ပေ။
အဆုံးမဲ့ဓားအတွက် ဤသည်မှာ စမ်းသပ်မှုတစ်ခု ဖြစ်၏။ အကယ်၍ ၎င်းသာ အောင်မြင်စွာ ကျော်လွှားနိုင်ပါက နဂါးတံခါးကို ခုန်ကျော်သွားသော ငါးတစ်ကောင်ကဲ့သို့ ကြီးမားလှသော အသွင်ပြောင်းလဲမှု အကျိုးကျေးဇူးကို ဆောင်ကြဉ်းပေးနိုင်မည် ဖြစ်သည်။
အကယ်၍ သူသာ မဆင်မခြင် ဝင်ရောက်စွက်ဖက်လိုက်ပါက အဆုံးမဲ့ဓားကို ဤအခွင့်အရေးနှင့် လွဲချော်သွားစေမည် ဖြစ်၏။
ထို့အပြင် လက်ရှိအခြေအနေကို ကြည့်ရလျှင် အဆုံးမဲ့ဓားသည် 'မိမိကိုယ်ကို ရပ်တည်နိုင်စွမ်း' ရှိနေသည်မှာ ထင်ရှားပေသည်။
သူသည် ဘေးမှရပ်ကြည့်နေ၍ မျှော်လင့်မထားသော မတော်တဆမှုများ မဖြစ်ပေါ်လာစေရန် ကာကွယ်ပေးရန်သာ လိုအပ်သည်။
အချိန်များသည် တစ်စက္ကန့်ပြီးတစ်စက္ကန့် ကုန်လွန်သွားခဲ့၏။
အဆုံးမဲ့ဓား၏ မျက်နှာပြင်တွင် ရစ်ဝဲနေသော သတ်ဖြတ်လိုစိတ်များသည် ပို၍ ပို၍ ထူထပ်လာခဲ့လေသည်။
အင်မော်တယ်ဘုရင် တိုက်ပွဲဝင်အလံသည် ဆက်လက်၍ တောင့်ခံထားနိုင်ခြင်း မရှိတော့ဘဲ အဆုံးမဲ့ဓားထဲရှိ ဓားချီများ၏ ဆုတ်ဖြဲမှုကြောင့် မကြာမီတွင် အပိုင်းပိုင်း ပြတ်တောက်သွားကာ လုံးဝ ပြိုကွဲသွားတော့မည်ဖြစ်ကြောင်းကို ကုချန် ခံစားမိလိုက်၏။ ၎င်းမှာ အချိန်ယူရမည့် ကိစ္စတစ်ခုသာ ဖြစ်သည်။
သို့သော် အဆုံးမဲ့ဓားသည် အောင်မြင်စွာ ပေါင်းစည်းနိုင်တော့မည်ဟု ထင်မှတ်ကာ ကုချန် စိတ်လျှော့လိုက်ချိန်မှာပင် မျှော်လင့်မထားသော အပြောင်းအလဲတစ်ခု ရုတ်တရက် ဖြစ်ပေါ်လာခဲ့၏။
စုတ်ပြဲနေသော တိုက်ပွဲဝင်အလံသည် အဆုံးမဲ့ဓား၏ ဓားချီများကြောင့် ဆုတ်ဖြဲခံလိုက်ရချိန်တွင် ဖောက်ထွင်း၍မရနိုင်လောက်အောင် နက်မှောင်နေသော အမှောင်ထုတစ်စသည် အင်မော်တယ်ဘုရင် တိုက်ပွဲဝင်အလံ၏ ပေါက်ပြဲနေသော နေရာမှ ရုတ်တရက် ထွက်ပေါ်လာကာ အဆုံးမဲ့ဓားရော ကုချန်ကိုပါ မျက်စိတစ်မှိတ်အတွင်း လွှမ်းခြုံသွားခဲ့လေသည်။
ဒါ ဘာလဲ?
သူ၏ပတ်လည်ရှိ အင်မော်တယ်ဘုရင် တိုက်ပွဲဝင်အလံမှ ထွက်ပေါ်လာသော မြူမည်းများကို ခံစားရသောအခါ ကုချန်သည် အနည်းငယ် စိတ်ရှုပ်ထွေးသွားခဲ့၏။
ဤအင်မော်တယ်ဘုရင် တိုက်ပွဲဝင်အလံကို ရရှိပြီးနောက်ပိုင်းတွင် သူသည် တစ်ကြိမ် စူးစမ်းရှာဖွေခဲ့ဖူးသော်လည်း ဘာကိုမျှ မတွေ့ရှိခဲ့ရပေ။
သို့ဆိုလျှင် ဤထူထပ်သော မြူမည်းများက ဘယ်ကနေ ရောက်လာသနည်း။
ကုချန် အံ့ဩနေစဉ်မှာပင်.....
မြူမည်းများသည် ရုတ်တရက် စုစည်းသွားကာ ဝိုးတဝါးအခြေအနေတွင် နားကွဲမတတ် သတ်ဖြတ်ဟစ်အော်သံများ ကုချန်၏နားထဲ၌ ရုတ်တရက် ပဲ့တင်ထပ်သွားခဲ့လေသည်။
သူ၏ပတ်လည်တွင် အဆုံးမရှိ ကြီးကျယ်ခမ်းနားသော တိုက်ပွဲမြင်ကွင်းတစ်ခု အမှန်တကယ် ပေါ်ထွက်လာခဲ့၏။
၎င်းမှာ အဆုံးမဲ့ကမ္ဘာများကို စစ်မြေပြင်အဖြစ်ထားကာ နယ်ပယ်ပေါင်းစုံကို အလှဆင်မှုအဖြစ် ပြုလုပ်ထားသော အင်မော်တယ်ဘုရင်များ အချင်းချင်း စစ်ခင်းနေသည့် ကြမ်းတမ်းသော စစ်မြေပြင်တစ်ခု ဖြစ်သည်။ အင်မော်တယ်ဘုရင်များ အချင်းချင်း ပြင်းထန်စွာ တိုက်ခိုက်နေကြသည်မှာ သူတို့၏ သတ်ဖြတ်ဟစ်အော်သံများသည် နှစ်သန်းပေါင်းများစွာကို ဖြတ်ကျော်၍ အဆုံးမဲ့ အချိန်နှင့် လေဟာနယ်ကို ဖြတ်သန်း ပဲ့တင်ထပ်နေသည့်အလားပင်။
သူ၏ပတ်လည်ရှိ စစ်မြေပြင်မြင်ကွင်းကို မြင်လိုက်ရသောအခါ ကုချန်၏စိတ်ထဲတွင် အတွေးတစ်ခု ချက်ချင်း ပေါ်လာခဲ့၏။ ဤသည်မှာ ရှေးဟောင်းစစ်ပွဲ၊ အင်မော်တယ်-နတ်ဆိုး စစ်မြေပြင် ဖြစ်ပုံရ၏။
စစ်မြေပြင်ပေါ်တွင် ရှေးဟောင်းမကောင်းဆိုးဝါးအင်မော်တယ်ဘုရင်သည် လွင့်ပျံနေသော အင်မော်တယ်ဘုရင် တိုက်ပွဲဝင်အလံကို ကိုင်ဆောင်ကာ အင်မော်တယ်ဘုရင်တစ်ပါးနှင့် ပြင်းထန်စွာ တိုက်ခိုက်နေသည်ကို မြင်တွေ့လိုက်ရ၏။
အင်မော်တယ်ဘုရင် တိုက်ပွဲဝင်အလံ၏ မျက်နှာပြင်တွင် မည်သည့် ပျက်စီးမှုမျှ မရှိဘဲ သွေးစွန်းရာ အနည်းငယ်သာ ရှိလေသည်။
သို့သော် ပုံရိပ်ယောင်ထဲတွင် ရှေးဟောင်းမကောင်းဆိုးဝါးအင်မော်တယ်ဘုရင် ကိုင်ဆောင်ထားသော တိုက်ပွဲဝင်အလံသည် ယခု ကုချန် ပိုင်ဆိုင်ထားသော အလံနှင့် တစ်ထပ်တည်းဖြစ်ကြောင်း မြင်တွေ့နိုင်သော်လည်း ယခုလက်ရှိ အင်မော်တယ်ဘုရင် တိုက်ပွဲဝင်အလံမှာမူ လွန်စွာ စုတ်ပြဲနေခဲ့ပြီ ဖြစ်သည်။
" သတ်! "
ပုံရိပ်ယောင်ထဲတွင် ရှေးဟောင်းမကောင်းဆိုးဝါးအင်မော်တယ်ဘုရင်သည် ဒေါသအမျက်များ ထွက်နေ၍ သူ၏သတ်ဖြတ်လိုစိတ်များသည်လည်း ကောင်းကင်အထိပင် ထိုးတက်နေလေသည်။
သူသည် လက်ထဲရှိ အင်မော်တယ်ဘုရင် တိုက်ပွဲဝင်အလံကို ဝှေ့ယမ်းကာ ရှေ့သို့ ဆက်တိုက် တိုက်ခိုက်သွား၍ တစ်ဖက် အင်မော်တယ်ဘုရင်အား အဆက်မပြတ် ဆုတ်ခွာသွားစေရန် ဖိအားပေးနေခဲ့သည်။
ရှေးဟောင်းမကောင်းဆိုးဝါးအင်မော်တယ်ဘုရင်၏ အနီးတွင်လည်း အင်မော်တယ်ဘုရင် အများအပြားသည် တစ်ယောက်ချင်း ယှဉ်ပြိုင်တိုက်ခိုက်နေကြ၏။
လေဟာနယ်နယ်ပယ် ပြိုကွဲသွား၍ ကောင်းကင်ဘုံများအားလုံး ကျဆင်းသွားခဲ့လေသည်။
ဤသည်မှာ အလွန် ကြေကွဲဖွယ်ကောင်းသော စစ်ပွဲတစ်ခု ဖြစ်လာရန် ဖန်တီးထားခြင်းပင် ဖြစ်သည်။ အတိတ်က သမိုင်းဝင် မြင်ကွင်းကို တွေ့မြင်ရရုံမျှဖြင့် ကုချန်၏ စိတ်နှလုံးထဲတွင် အဆုံးမဲ့ ကြီးကျယ်ခမ်းနားမှု ခံစားချက်တို့ ပြည့်နှက်သွားခဲ့၏။
ဤအင်မော်တယ်ဘုရင် တိုက်ပွဲဝင်အလံထဲတွင် အဘယ်ကြောင့် ဤကဲ့သို့သော စွမ်းအားများ ပါဝင်နေရသနည်းဟု ကုချန် တွေးတောနေစဉ်မှာပင် မျှော်လင့်မထားသည်များ ဖြစ်ပေါ်လာခဲ့၏။
ထူထပ်သော မြူမည်းများဖြင့် ဖွဲ့စည်းထားသည့် ပုံရိပ်ယောင်ထဲတွင် ကြီးမားလှသော အငြိုးအတေးတစ်ခုသည် စစ်မြေပြင်ကို ဖြတ်သန်းတိုက်ခတ်သွားခဲ့၏။ ၎င်း ဖြတ်သန်းသွားရာ နေရာတိုင်းရှိ ဒြပ်ရှိ၊ ဒြပ်မဲ့ အရာအားလုံးသည် ပြာအဖြစ်သို့ ပြောင်းလဲသွားခဲ့လေသည်။
ထိုအငြိုးအတေး ဖြတ်သန်းတိုက်ခတ်သွားသောအခါ ဘုရင်အဆင့် တည်ရှိမှု အားလုံးသည်ပင် ရူးသွပ်စွာ ထွက်ပြေးကုန်ကြတော့သည်။