အခန်း (၄၈၅-၄၈၆)
Vol. 35 Ch. 485-486
အခန်း ( ၄၈၅ ) - အင်မော်တယ်ကမ္ဘာမှလား။ ပျက်စီးနေသောနယ်မြေနှင့် အဓိကပစ္စည်း
ဟွမ်ကျိုအာ၏ ဇာစ်မြစ်မှာ အမြဲတမ်း ပဟေဠိတစ်ခု ဖြစ်နေခဲ့၏။
အတိတ်က ကုချန်သည် ကောင်းကင်ဘုံတားမြစ်နယ်မြေ၏ အနက်ရှိုင်းဆုံးနေရာမှ လျှို့ဝှက်ဆန်းကြယ်သော ခေါင်းတလားကို တူးဖော်တွေ့ရှိခဲ့စဉ်က ဟွမ်ကျိုအာသည် မြင့်မြတ်သော မူလအဆီအနှစ်တစ်ခုအတွင်း ချိပ်ပိတ်ခံထားရကာ ထိုခေါင်းတလားနှင့်အတူ ထွက်ပေါ်လာခဲ့ခြင်း ဖြစ်သည်။
အစပိုင်းတွင် ဟွမ်ကျိုအာကိုယ်တိုင်အပြင် ကုချင်းရွဲ့နှင့် အခြားသူများသည်လည်း ထိုခေါင်းတလားနှင့် ဟွမ်ကျိုအာတို့ နှစ်ခုစလုံးကို ကောင်းကင်ဘုံတားမြစ်နယ်မြေအတွင်း၌ ရှာဖွေတွေ့ရှိခဲ့ခြင်းကြောင့် ဟွမ်ကျိုအာသည် အဆုံးမဲ့ကမ္ဘာ၏ ရှေးဟောင်းခေတ်ကာလမှ တည်ရှိမှုတစ်ခု ဖြစ်ရမည်ဟု ယုံကြည်ခဲ့ကြသည်။
ထို့ပြင် ကောင်းကင်ဘုံတားမြစ်နယ်မြေသည် အဆုံးမဲ့ကမ္ဘာအတွင်း၌ မရေမတွက်နိုင်သော နှစ်ပေါင်းများစွာကတည်းက တည်ရှိနေခဲ့ခြင်း ဖြစ်သည်။
သို့သော် နောက်ပိုင်းတွင် ကျယ်ကျယ်ပြန့်ပြန့် ရှာဖွေပြီးနောက်၌ပင် ဟွမ်ကျိုအာသည် သူ၏ဇာစ်မြစ်နှင့် ပတ်သက်သော မည်သည့် သဲလွန်စကိုမျှ ရှာမတွေ့ခဲ့ပေ။ ဤသည်က သူ၏ စစ်မှန်သော ဇာစ်မြစ်သည် အဆုံးမဲ့ကမ္ဘာနှင့် ဆက်စပ်မှု မရှိလေသလားဟု သူ့အား တွေးတောသွားစေခဲ့သည်။
ထို့နောက် ကောင်းကင်ဘုံတားမြစ်နယ်မြေသည် အတိတ်က ဟွမ်သွမ့်ပင်လယ်မှတစ်ဆင့် အဆုံးမဲ့ကမ္ဘာအတွင်းသို့ စီးဆင်းဝင်ရောက်လာခဲ့ခြင်း ဖြစ်နိုင်ကြောင်း ဟွမ်ကျိုအာ သိရှိခဲ့ရသည်။
၎င်းသည် သူ၏ဇာစ်မြစ်မှာ လျှို့ဝှက်ဆန်းကြယ်၍ နားလည်ရခက်သော ဟွမ်သွမ့်ပင်လယ်နှင့် ဆက်စပ်နေကြောင်း ဆိုလိုခြင်း ဖြစ်နိုင်ပေသည်။
သို့သော် ဟွမ်သွမ့်ပင်လယ်ထဲတွင် သူနှင့် ပတ်သက်သော သဲလွန်စများကို ရှာဖွေရန်ဆိုသည်မှာ အလွန်အမင်း ခက်ခဲလှသည်မှလွဲ၍ အခြား ဘာဖြစ်နိုင်မည်နည်း။
ဟွမ်သွမ့်ပင်လယ်သည် အဆုံးအစမရှိ ကျယ်ပြောလှကာ အဆုံးမဲ့ကမ္ဘာ၏ အရွယ်အစားသည် ဟွမ်သွမ့်ပင်လယ်တစ်ခုလုံးနှင့် ယှဉ်လျှင် ဖုန်မှုန့်တစ်မှုန့်မျှပင် မရှိချေ။
ဤကျယ်ပြောလှ၍ အဆုံးအစမရှိသော ဟွမ်သွမ့်ပင်လယ်ထဲတွင် သူ၏ ဇာစ်မြစ်နှင့် ပတ်သက်သော သဲလွန်စများကို ရှာဖွေရန်မှာ ပင်လယ်ထဲ အပ်ကျ ရှာရသည်ထက်ပင် ပို၍ ခက်ခဲလှပေသည်။
ထို့အပြင် ဟွမ်သွမ့်ပင်လယ်ထဲတွင် လွန်စွာ အန္တရာယ်များသော တားမြစ်နယ်မြေများစွာလည်း ရှိနေသေးသည်။
အချို့သောနေရာများသည် ကုချန်ပင်လျှင် အလွယ်တကူ ဝင်ရောက်ရန် မရဲဝံ့ပေ။ ဟွမ်ကျိုအာဆိုလျှင် ဆိုဖွယ်ရာပင် မရှိတော့ချေ။
ထို့ကြောင့် နောက်ပိုင်းတွင် ဟွမ်ကျိုအာသည် သူ၏ ဇာစ်မြစ်နှင့် ပတ်သက်သော သဲလွန်စများကို ရှာဖွေရန် သိပ်ပြီး စိတ်အားမထက်သန်တော့ဘဲ သူ၏စွမ်းအားများကို အဓိက မြှင့်တင်ရန်သာ အာရုံစိုက်ခဲ့လေသည်။
စွမ်းအားများကို မြှင့်တင်ခြင်းဖြင့်သာ အနာဂတ်တွင် သူ၏ဇာစ်မြစ်ကို ပိုမိုကောင်းမွန်စွာ စူးစမ်းနိုင်မည်ဖြစ်ကြောင်း ဟွမ်ကျိုအာ ကောင်းစွာ သိထားပေသည်။
အခြားအရာများကို မဆိုထားနှင့် အကယ်၍ သူ၏စွမ်းအားသာ မလုံလောက်ပါက ဟွမ်သွမ့်ပင်လယ်၏ အနက်ရှိုင်းဆုံးနေရာများသို့ပင် သူ ဝင်ရောက်နိုင်မည်မဟုတ်ရာ သူ၏ဇာစ်မြစ်ကို စုံစမ်းရန်ဆိုသည်မှာ မဖြစ်နိုင်ပေ။
သို့သော် ယခု ဤအင်မော်တယ်ကမ္ဘာတွင် သူသည် ထူးဆန်းသော လှုပ်ရှားမှုတစ်ခုကို ခံစားလိုက်ရ၏။ ၎င်းမှာ သူ၏ ဇာစ်မြစ်နှင့် ဆက်စပ်နေသည်လော။
" အစ်မ ကျိုအာရဲ့ ဇာစ်မြစ်က ဟွမ်သွမ့်ပင်လယ်က မဟုတ်ဘဲ အင်မော်တယ်ကမ္ဘာကများ ဖြစ်နေမလား "
ဖူဝမ်သည် မနေနိုင်စွာ ဝင်ရောက် ပြောဆိုလိုက်၏။
အင်မော်တယ်ကမ္ဘာတွင် သူ၏ ဇာစ်မြစ်နှင့် ပတ်သက်သော သဲလွန်စများကို ခံစားသိရှိရခြင်းက သူ၏ စစ်မှန်သော ဇာစ်မြစ်မှာ အင်မော်တယ်ကမ္ဘာမှဖြစ်ကြောင်း ဆိုလိုခြင်း မဟုတ်လော။
" အဲဒီလို ဖြစ်နိုင်ခြေ အရမ်းများတယ် "
ကုချင်းရွဲ့သည်လည်း ရုတ်တရက် သဘောပေါက်သွားသည့် အမူအရာမျိုး ပြသလိုက်၏။ အကြောင်းမှာ သူ၏ဆရာဖြစ်သူ ကောင်းကင်နတ်သမီး ရှောင်းယွဲ့ကို ရုတ်တရက် သတိရသွားသောကြောင့်ပင်။
ကောင်းကင်နတ်သမီး ရှောင်းယွဲ့၏ ကျန်ရစ်သော ဝိညာဉ်အပိုင်းအစတစ်ခု ပါဝင်သည့် လျှို့ဝှက်ဆန်းကြယ်သော သိုလှောင်လက်စွပ်ကို အဆုံးမဲ့ကမ္ဘာတွင် သူ ရှာဖွေတွေ့ရှိခဲ့ခြင်း ဖြစ်သည်။
သို့သော်လည်း ကောင်းကင်နတ်သမီး ရှောင်းယွဲ့သည် အင်မော်တယ်ကမ္ဘာမှ လာခဲ့ခြင်း ဖြစ်၏။
သူ၏ ဆရာကိုယ်တိုင် ပြောပြချက်အရ ဤသိုလှောင်လက်စွပ်သည် အဆုံးမဲ့ကမ္ဘာသို့ မရောက်ရှိမီ ဟွမ်သွမ့်ပင်လယ်ထဲတွင် မရေမတွက်နိုင်သော နှစ်ပေါင်းများစွာ မျောပါနေခဲ့ပုံပင်။
ဤသည်မှာ ဟွမ်ကျိုအာ၏ အခြေအနေနှင့် တစ်ထပ်တည်းနီးပါး တူညီနေသည် မဟုတ်လော။
သူ၏ခန္ဓာကိုယ် အစစ်အမှန်သည် အင်မော်တယ်ကမ္ဘာတွင် ရှိနေခဲ့၍ နောက်ပိုင်းတွင် မျှော်လင့်မထားသော အခြေအနေအချို့ကြောင့် ဟွမ်သွမ့်ပင်လယ်ထဲသို့ မျောပါသွားခဲ့ကာ နှစ်ပေါင်းများစွာ လေလွင့်ပြီးနောက် နောက်ဆုံးတွင် အဆုံးမဲ့ကမ္ဘာသို့ ရောက်ရှိလာခဲ့ခြင်း ဖြစ်သည်။
" ငါ့ရဲ့ဇာစ်မြစ် အစစ်အမှန်က အင်မော်တယ်ကမ္ဘာကများလား "
မိန်းကလေးများ၏ ဆွေးနွေးပြောဆိုမှုများကို နားထောင်ရင်း ဟွမ်ကျိုအာကိုယ်တိုင်လည်း တိုးညင်းစွာ ရေရွတ်လိုက်မိကာ သူ၏စိတ်နှလုံးထဲတွင် ထိန်းချုပ်၍မရနိုင်သော စိတ်လှုပ်ရှားမှုတစ်ခု ဖြစ်ပေါ်လာခဲ့၏။
သူ၏ဇာစ်မြစ်ကို နားလည်နိုင်မည့် မျှော်လင့်ချက်သည် မျက်စိရှေ့မှောက်တွင် ရှိနေပြီဖြစ်ရာ ဟွမ်ကျိုအာအနေဖြင့် မည်သို့ စိတ်မလှုပ်ရှားဘဲ နေနိုင်မည်နည်း။
" အစ်မတို့... ညီမ သွားပြီး စုံစမ်းကြည့်ဖို့ လိုတယ်... အစ်မတို့ အရင် တခြားနေရာတွေကို သွားစူးစမ်းနှင့်လို့ ရပါတယ်... အဲဒီနောက်မှ ညီမ ပြန်ဆက်သွယ်လိုက်ပါ့မယ် "
ဟွမ်ကျိုအာသည် အလျင်စလို ပြောဆိုလိုက်၏။ သူသည် သူ၏စိတ်နှလုံးကို လှုပ်ရှားစေခဲ့သော နေရာသို့ သွားရောက်ကြည့်ရှုရန် အနည်းငယ် စိတ်မရှည် ဖြစ်နေခဲ့ပြီ ဖြစ်သည်။
" ညီမနဲ့ပဲ အတူတူ သွားကြတာပေါ့ "
ယဲ့ယင်းယင်းမှ တုံ့ဆိုင်းမနေဘဲ ပြောဆိုလိုက်၏။
" လူတစ်ယောက် ပိုပါလာရင် ကာကွယ်မှုနဲ့ ဘေးကင်းမှု ပိုတိုးလာတာပေါ့... ညီမ တစ်ယောက်တည်း သွားရမယ်ဆိုရင် အစ်မတို့ စိတ်ချမှာ မဟုတ်ဘူး "
နှစ်ပေါင်းရာချီ အတူတကွ ဖြတ်သန်းလာခဲ့ကြပြီးနောက် မိန်းကလေးများသည် ညီအစ်မအရင်းများကဲ့သို့ ဖြစ်နေကြပြီဖြစ်သည်။ ယခု ဟွမ်ကျိုအာ၏ ဘဝအတွက် အရေးကြီးသော အခိုက်အတန့်နှင့် ရင်ဆိုင်နေရချိန်တွင် ယဲ့ယင်းယင်းနှင့် အခြားသူများက မည်သို့ ဘေးမှရပ်ကြည့်နေနိုင်မည်နည်း။
" ဟုတ်တယ်... တကယ်လို့ အန္တရာယ်တစ်ခုခုနဲ့ တကယ်ကြုံတွေ့ရရင် ညီမ တစ်ယောက်တည်း ရင်ဆိုင်ရတာထက် အားလုံး အတူတူ ရင်ဆိုင်တာက ပိုကောင်းပါတယ် "
ဖူဝမ်သည်လည်း ခေါင်းကို အဆက်မပြတ် ညိတ်လျက် ထောက်ခံလိုက်၏။
" ကောင်းပါပြီ "
ဟွမ်ကျိုအာသည် တစ်ခဏမျှ စဉ်းစားပြီးနောက် သဘောတူလိုက်လေသည်။
ယခုအခါ အခြေအနေများ ကွာခြားသွားပြီ ဖြစ်၏။ မူလက သူ၏ ကျင့်ကြံခြင်းအဆင့်နှင့် စွမ်းအားသည် လွန်စွာမြင့်မားနေခဲ့၍ ကုချင်းရွဲ့၊ ယဲ့ယင်းယင်းနှင့် အခြားသူများထက် များစွာ သာလွန်နေခဲ့သည်။
သို့သော် ယခုအခါ မိန်းကလေးအားလုံး၏ အဆင့်များသည် အမီလိုက်လာနိုင်ခဲ့ပြီဖြစ်ရာ အကယ်၍ ဟွမ်ကျိုအာ အန္တရာယ်တစ်ခုခုနှင့် ကြုံတွေ့ရပါက သူတို့သည် အမှန်တကယ်ပင် အတော်လေး အကူအညီ ပေးနိုင်ပေလိမ့်မည်။
" ဒီလိုဆိုမှတော့ ထွက်သွားကြစို့ "
ဟွမ်ကျိုအာသည် မျက်လုံးများကိုမှိတ်၍ တစ်ခဏမျှ အာရုံခံလိုက်၍ သူ၏စိတ်နှလုံးကို လှုပ်ရှားစေခဲ့သော တည်နေရာအတိအကျကို အတည်ပြုပြီးနောက် သူသည် မိန်းကလေးများကို ခေါ်ဆောင်ကာ ထိုနေရာသို့ မရပ်မနား အပြေးအလွှား သွားရောက်ခဲ့လေသည်။
.........
ခရီးတစ်ခုကို ဖြတ်သန်းပြီးနောက် ဟွမ်ကျိုအာ၏ ဦးဆောင်မှုဖြင့် မိန်းကလေးများသည် အနည်းငယ် ယိုယွင်းပျက်စီး၍ လူသူကင်းမဲ့နေသော ကမ္ဘာတစ်ခုသို့ ရောက်ရှိလာခဲ့ကြ၏။
" ဒီနေရာက ဘယ်ကောင်းကင်ဘုံကလဲ... ဘာလို့ ဒီလောက်တောင် ယိုယွင်းပျက်စီးပြီး ဟောင်းနွမ်းနေရတာလဲ "
ထိုကမ္ဘာ၏ ယိုယွင်းပျက်စီးလျက် လူသူကင်းမဲ့နေသော မြင်ကွင်းကို ကြည့်ကာ ဖူဝမ်မှ မနေနိုင်စွာ ပြောဆိုလိုက်၏။
" တကယ်ပဲ နည်းနည်းတော့ ထူးဆန်းနေတယ် "
ကုချင်းရွဲ့သည် အသံကိုနှိမ့်၍ ပြောဆိုလိုက်ကာ သူ၏စိတ်နှလုံးထဲတွင်လည်း တိတ်တဆိတ် သတိဝင်နေခဲ့ပြီ ဖြစ်သည်။
သူတို့၏ လက်ရှိ စွန့်စားခရီးစဉ်အတွင်း အင်မော်တယ်ကမ္ဘာရှိ နေရာအများအပြားကို ဖြတ်သန်းသွားလာခဲ့ကြသော်လည်း မည်သည့်နေရာကမျှ ဤနေရာကဲ့သို့ ယိုယွင်းပျက်စီးနေခြင်း မရှိခဲ့ချေ။
အခြားနေရာများသည် အင်မော်တယ်ချီများဖြင့် မပြည့်နှက်နေလျှင်တောင်မှ အနည်းဆုံးတော့ စည်ကားသိုက်မြိုက်နေတတ်သည်။
ဤနေရာတစ်ခုတည်းသာ ထိုယိုယွင်းပျက်စီးမှုနှင့် လူသူကင်းမဲ့နေမှု အငွေ့အသက်များ ထွက်ပေါ်နေကာ အင်မော်တယ်ကမ္ဘာ၏ ထူထပ်သော အင်မော်တယ်ချီများပင်လျှင် ဤခံစားချက်ကို ဖိနှိပ်ထားနိုင်ခြင်း မရှိခဲ့ပေ။
ဤကမ္ဘာတွင် 'ပြဿနာများ' ရှိနေသည်မှာ ထင်ရှားလှပေသည်။
ဤသည်ကို သဘောပေါက်သွားသောအခါ မိန်းကလေးအားလုံးသည် နိုးနိုးကြားကြား ဖြစ်သွားကြကာ ပေါ့ပေါ့ဆဆ မနေရဲကြတော့ဘဲ သတိကြီးစွာဖြင့် စောင့်ကြည့်နေခဲ့ကြသည်။
ဤကမ္ဘာသို့ ရောက်ရှိပြီးနောက် ဟွမ်ကျိုအာ၏ မျက်လုံးများသည် ပို၍ပင် စိတ်လှုပ်ရှားလာခဲ့၏။
အကြောင်းမှာ သူ၏ စိတ်နှလုံးလှုပ်ရှားမှုနှင့် ခေါ်ဆောင်နေသည့် ခံစားချက်တို့သည် အထွတ်အထိပ်သို့ ရောက်ရှိလုနီးပါး ဖြစ်နေသောကြောင့်ပင်။
" ဒီနေရာပဲ! "
သူ၏စိတ်နှလုံးထဲမှ လမ်းညွှန်မှုအတိုင်း ဟွမ်ကျိုအာသည် နေရာတစ်ခုဆီသို့ ရုတ်တရက် ပျံသန်းသွားခဲ့၏။ ၎င်းမှာ ကောင်းကင်ဘုံ၏ အပြစ်ပေးမှုကို ခံထားရသည့်အလား ပြိုကျပျက်စီး၍ ဆွေးမြည့်နေသော ရှေးဟောင်း အဆောက်အအုံများ၏ အပျက်အစီးတစ်ခုဖြစ်ကာ ကျိုးပဲ့နေသော နံရံများနှင့် ပြိုကျနေသော အပျက်အစီးများ ပြည့်နှက်နေသော နေရာတစ်ခုသာ ကျန်ရစ်တော့သည်။
ဟွမ်ကျိုအာသည် ကျိုးပဲ့နေသော နံရံများအတွင်းရှိ တည်နေရာတစ်ခုကို ပစ်မှတ်ထားလိုက်ကာ အောက်သို့ စတင်တူးဖော်လေသည်။
ဤသည်ကို မြင်သောအခါ ကုချင်းရွဲ့နှင့် အခြားသူများသည်လည်း အရပ်မျက်နှာ အသီးသီးတွင် ရပ်လိုက်ကြ၍ ဟွမ်ကျိုအာအား သတိကြီးစွာဖြင့် စောင့်ကြပ်ပေးထားကြ၏။
ဟွမ်ကျိုအာသည် ရှေးဦးစွာ အားကြိုးမာန်တက် တူးဖော်လိုက်ပြီးနောက် တစ်စုံတစ်ခုကို ခံစားသိရှိသွားသည့်အလား သူ၏ရှေ့ရှိ လေဟာနယ်နယ်ပယ်ကို မသိစိတ်အလျောက် ဖောက်ထွင်းလိုက်လေသည်။
နောက်အခိုက်အတန့်တွင် လေဟာနယ်နယ်ပယ် ပြိုကွဲသွားကာ ကမ္ဘာသစ်တစ်ခုဆီသို့ ဦးတည်နေသော တံခါးပေါက်တစ်ခု ဟွမ်ကျိုအာ၏ရှေ့တွင် ရုတ်တရက် ထွက်ပေါ်လာခဲ့၏။
၎င်းမှာ ပို၍ ယိုယွင်းပျက်စီးကာ သေဆုံးနေသော ကမ္ဘာငယ်တစ်ခုပင်။
ဤကမ္ဘာငယ်၏ အလယ်ဗဟိုတွင် ပို၍ ကြီးကျယ်ခမ်းနားသော ကောင်းကင်နန်းတော်ကြီးတစ်ခု ရပ်တည်နေသည်ကို ဝိုးတဝါး မြင်တွေ့နိုင်ပေသည်။
ထိုကောင်းကင်နန်းတော်သည်လည်း ကောင်းကင်ဘုံ၏ အပြစ်ပေးမှု တစ်ခုခုကို ခံထားရပုံပေါ်ကာ ကျိုးပဲ့နေသော နံရံများနှင့် ပြိုကျနေသော အပျက်အစီးများသာ ကျန်ရစ်တော့သည်။
သေချာပေါက်ပင် ဟွမ်ကျိုအာ၏ အကြည့်ကို အမှန်တကယ် ဆွဲဆောင်သွားခဲ့သည့် အရာမှာ ထိုကောင်းကင်နန်းတော်၏ အနက်ရှိုင်းဆုံးနေရာ၌ တည်ရှိနေသော အရာတစ်ခုပင် ဖြစ်သည်။
အဆုံးမဲ့ ဆွေးမြည့်ပျက်စီးခြင်းနှင့် ဆုတ်ယုတ်ခြင်း အငွေ့အသက်များသည် ထိုကောင်းကင်နန်းတော်၏ အနက်ရှိုင်းဆုံးနေရာမှ ထွက်ပေါ်လာနေရာ အနက်ရှိုင်းဆုံးနေရာရှိ ထိုအရာသည် ဤကမ္ဘာပေါ်ရှိ ဆွေးမြည့်ပျက်စီးခြင်းနှင့် ဆုတ်ယုတ်ခြင်း အားလုံး၏ အဓိက အကြောင်းရင်း ဖြစ်နေသည့်အလားပင်။
ထို့အပြင် ဤအရာသည် ဟွမ်ကျိုအာအား ဤနေရာသို့ ဆွဲဆောင်ခဲ့သည့် အဓိကအရာလည်း ဖြစ်ပေသည်။
အခန်း ( ၄၈၆ ) - အင်မော်တယ်ဘုရင်၏ အလောင်းကောင်၊ ရှေးဟောင်းကျောက်တိုင် ပေါ်ထွက်လာခြင်းနှင့် လေဟာနယ်ထဲသို့ ကျဆင်းသွားသော ခေါင်းတလား
" ညီမကို ဆွဲဆောင်နေတဲ့အရာက အဲဒီမှာရှိတယ် "
ဟွမ်ကျိုအာသည် ပျက်စီးနေသော ကောင်းကင်နန်းတော်၏ အလယ်ဗဟိုသို့ စိုက်ကြည့်နေကာ သူ၏မျက်လုံးများတွင်လည ဖုံးကွယ်၍မရနိုင်သော စိတ်လှုပ်ရှားမှုများ ရှိနေလေ၏။
" ငါတို့ အန္တရာယ်တစ်ခုခုကနေ ရှောင်ရှားနိုင်ဖို့ဆိုရင် ပိုနီးကပ်သွားလေလေ ပိုပြီး သတိထားရလေလေပဲ... "
ကုချင်းရွဲ့မှ အသံကို နှိမ့်၍ သတိပေးလိုက်၏။
" အွန်း... ညီမ သိပါတယ် "
ဟွမ်ကျိုအာမှ လေးနက်စွာ ခေါင်းညိတ်လိုက်၏။ သူသည် ဤအချက်ကို သိထားသောကြောင့် မျက်လုံးများကိုမှိတ်ကာ လျှို့ဝှက်ဆန်းကြယ်သော ကံကြမ္မာမဟာတာအိုနှင့် ဆက်သွယ်၍ အာရုံခံလိုက်ကာ တစ်စုံတစ်ရာ သိမြင်နိုင်မလားဟု ကြိုးစားကြည့်လေသည်။
ခဏအကြာတွင် ဟွမ်ကျိုအာသည် သူ၏ လှပသော မျက်လုံးများကို ဖွင့်လိုက်ကာ သေချာလွန်းသော လေသံဖြင့် ပြောဆိုလိုက်၏။
" ကျွန်မ အာရုံခံမိပြီ... အဲဒီမှာ ဘာအန္တရာယ်မှ မရှိဘူး "
" ကောင်းပြီ... ဒါဆို သွားကြည့်ကြစို့ "
ဟွမ်ကျိုအာမှ အန္တရာယ်မရှိဟု ပြောသည်ကို ကြားသောအခါ မိန်းကလေးများသည် တုံ့ဆိုင်းမနေတော့ပေ။ ဟွမ်ကျိုအာနှင့်အတူ ပျက်စီးနေသော ကောင်းကင်နန်းတော်ဆီသို့ သတိကြီးစွာဖြင့် ချဉ်းကပ်သွားကြသည်။
ကောင်းကင်နန်းတော်သည် ပျက်စီးယိုယွင်းနေကာ နှစ်သန်းပေါင်းများစွာ တည်ရှိနေခဲ့သည့်အလား ဆွေးမြည့်ပျက်စီးခြင်း အငွေ့အသက်များဖြင့် ပြည့်နှက်နေ၏။ နန်းတော်၏ ဗဟိုချက်တွင် ထိုဆွေးမြည့်ပျက်စီးခြင်း အငွေ့အသက်မှာ ပို၍ပင် ပြင်းထန်နေကာ ဝိုးတဝါး မြူမည်းအလွှာတစ်ခုဖြင့် ဖုံးလွှမ်းထားသောကြောင့် သေချာစွာ မမြင်နိုင်ပေ။
မကြာမီမှာပင် မိန်းကလေးများသည် ကောင်းကင်နန်းတော်ရှေ့သို့ ရောက်ရှိလာကြကာ မြူမည်းများ ဖုံးလွှမ်းနေသော နေရာဆီသို့ စတင်ဦးတည်သွားကြလေသည်။
အချိန်အနည်းငယ် ကုန်လွန်သွား၏။ ဟွမ်ကျိုအာ၏ ဦးဆောင်မှုဖြင့် သူတို့အဖွဲ့သည် မြူမည်းများ ဖုံးလွှမ်းနေသော နေရာအတွင်းသို့ နောက်ဆုံးတွင် ဝင်ရောက်သွားကြသည်။ ဟွမ်ကျိုအာ ပြောခဲ့သည့်အတိုင်းပင် လမ်းတစ်လျှောက် မည်သည့်အန္တရာယ်မျှ မကြုံတွေ့ခဲ့ရသဖြင့် မိန်းကလေးများသည် တိတ်တဆိတ် သက်ပြင်းချလိုက်မိကြ၏။
ဤကဲ့သို့ ထူးဆန်းသောနေရာတွင် အကယ်၍ အန္တရာယ်သာ အမှန်တကယ် ရှိနေမည်ဆိုပါက သူတို့အနေဖြင့် ခုခံနိုင်မည်လားဆိုသည်မှာ ပြောရန် ခက်ခဲလှပေသည်။
" ဒါက..... "
မိန်းကလေးများ တဖြည်းဖြည်း ချဉ်းကပ်သွားပြီးနောက် နောက်ဆုံး၌ ထိုနေရာ၏ လျှို့ဝှက်ချက်ကို ဖော်ထုတ်နိုင်ခဲ့၏။ ဟွမ်ကျိုအာနှင့် အခြားသူများသည် မြူမည်းများထဲရှိ အရာကို မြင်လိုက်ရသောအခါ မိန်းကလေးအားလုံး၏ မျက်လုံးများတွင် ထိတ်လန့်အံ့ဩမှုများ ပေါ်လွင်သွားလေသည်။
သူတို့ ဘာကို မြင်လိုက်ရသနည်း။
ထိုနေရာတွင် ရှေးဟောင်း အလောင်းကောင်ကြီးတစ်ခု လွင့်မျောနေသည်ပင်။
၎င်းမှာ လွန်စွာ ကြောက်မက်ဖွယ်ကောင်းသော အလောင်းကောင်ဖြစ်ပြီး ရှေးဟောင်း ဘုရင်ဝတ်ရုံကို ဝတ်ဆင်ထားကာ ရွှေရောင်ဆံပင်များမှာ ခြောက်သွေ့ကာ အရောင်လွင့်နေ၏။ ခန္ဓာကိုယ်သည် အဆုံးမဲ့ ဆွေးမြည့်ခြင်း အငွေ့အသက်များဖြင့် လွှမ်းခြုံထားကာ မျက်လုံးများကို တင်းကျပ်စွာ မှိတ်ထားလျက် မြူမည်းများထဲတွင် လွင့်မျောနေ၏။
ဤအလောင်းကောင်၏ ရင်ဘတ်တွင် အမည်မသိ အရာတစ်ခုခုဖြင့် ထိုးဖောက်ခံထားရသည့်အလား ထိုးချင်းပေါက်ဖြစ်နေသည့် ကြီးမားသည့် အပေါက်ကြီးတစ်ခု ရှိနေသည်။
" အလောင်းကောင်..... "
ဟွမ်ကျိုအာသည် သူ၏ရှေ့ရှိ အလောင်းကောင်ကို ကြည့်လိုက်၏။ သူ၏အကြည့်များတွင် သံသယနှင့် အံ့အားသင့်မှုများ ပြည့်နှက်နေလေသည်။ သူ့အား ဤနေရာသို့ ဆွဲဆောင်ခဲ့သည့်အရာမှာ ဤကဲ့သို့သော အလောင်းကောင်ဖြစ်လိမ့်မည်ဟု သူ မမျှော်လင့်ထားခဲ့ချေ။ သို့သော် ဤအလောင်းကောင်သည် သူ၏ နောက်ခံ၊ ဇာစ်မြစ်တို့နှင့် ဘာများ သက်ဆိုင်နေသနည်း။
" ဒါက အင်မော်တယ်ဘုရင်အဆင့် တည်ရှိမှုတစ်ခုရဲ့ အလောင်းဖြစ်မယ်ထင်တယ် "
ကုချင်းရွဲ့မှ လေးနက်သော အသံဖြင့် ပြောဆိုလိုက်၏။
ဤအလောင်းကောင်ထံမှ ပြန့်ကျဲနေသော အင်မော်တယ်ဘုရင်အဆင့် တုန်ခါမှုအချို့ကို သူ ခံစားမိလိုက်သည်။ ယွဲ့လင်အင်မော်တယ်ဘုရင်နှင့် ဆင်တူစွာပင် ဤသူသည်လည်း သက်ရှိထင်ရှားရှိစဉ်က အင်မော်တယ်ဘုရင်အဆင့် တည်ရှိမှုတစ်ခု ဖြစ်ခဲ့ပုံပင်။
အင်မော်တယ်ဘုရင်တစ်ပါး၏ အလောင်းဖြစ်ကာ ရင်ဘတ်တွင် ကြောက်မက်ဖွယ် ဒဏ်ရာတစ်ခု ရှိနေ၏။ သူ သက်ရှိထင်ရှားရှိစဉ်က ဘာတွေများ ကြုံတွေ့ခဲ့ရသနည်း။ ပုံပန်းသဏ္ဍာန်အရ သေစေလောက်သော ဒဏ်ရာမှာ ရင်ဘတ်မှ ဒဏ်ရာဖြစ်ပုံရသည်။ ခန္ဓာကိုယ်ပေါ်တွင် အခြားမည်သည့် ဒဏ်ရာမျှ မရှိဘဲ ချက်ချင်း အသတ်ခံလိုက်ရသည့်အလားပင်။ မျက်နှာပေါ်တွင်ပင် ကြောက်ရွံ့မှုနှင့် မယုံကြည်နိုင်မှု အရိပ်အယောင်များ ကျန်ရှိနေသေး၏။
အင်မော်တယ်ဘုရင်အဆင့် တည်ရှိမှုတစ်ခုကို ဤကဲ့သို့ မျက်နှာအမူအရာမျိုး ဖြစ်သွားစေရန် ဘာတွေများ ဖြစ်ပျက်ခဲ့သနည်း။
" ဒီအင်မော်တယ်ဘုရင် အလောင်းထဲက အင်မော်တယ်ဘုရင်ချီတွေ အများစုက ပျောက်ကွယ်သွားပြီထင်တယ်... မဟုတ်ရင် ငါတို့ ဒီနေရာကို လုံးဝ ရောက်လာနိုင်မှာ မဟုတ်ဘူး "
ယဲ့ယင်းယင်းမှ အသံကိုနှိမ့်၍ ပြောဆိုလိုက်လေ၏။
အင်မော်တယ်ဘုရင်အဆင့် တည်ရှိမှုတစ်ခုတွင် သူ အလိုအလျောက် ထုတ်လွှတ်လိုက်သော ချီစွမ်းအင်ပင်လျှင် သာမန်သတ္တဝါများ ခံနိုင်ရည်ရှိသည့် အရာမျိုးမဟုတ်ဘဲ စစ်မှန်သော အင်မော်တယ်များပင် မခံနိုင်ပေ။ ထျန်းကျွင်းအဆင့် ကျင့်ကြံခြင်းသာရှိသော မိန်းကလေးများကို ဆိုဖွယ်ရာပင် မရှိတော့ချေ။
ကံကောင်းစွာဖြင့် ဤအင်မော်တယ်ဘုရင်၏ အလောင်းကောင်အတွင်းရှိ အင်မော်တယ်ဘုရင်ချီများ အများစုမှာ ပျောက်ကွယ်သွားခဲ့ပြီးဖြစ်ရာ မိန်းကလေးများကို ဤနေရာသို့ ချဉ်းကပ်ခွင့် ရစေခဲ့ခြင်း ဖြစ်သည်။
" ဟိုမှာကြည့်! ဒီအလောင်းကောင်အောက်မှာ တစ်ခုခု ရှိနေသလိုပဲ! "
ထိုအခိုက်အတန့်တွင် မျက်စိလျင်သော ဖူဝမ်မှ အင်မော်တယ်ဘုရင် အလောင်းကောင်၏ အောက်ဘက်သို့ လက်ညှိုးထိုးပြရင်း ရုတ်တရက် ပြောဆိုလိုက်၏။
မိန်းကလေးများသည် အလျင်အမြန် သေချာကြည့်လိုက်ကြရာ အင်မော်တယ်ဘုရင်၏ ရင်ဘတ်ပေါ်ရှိ ဒဏ်ရာကြီးမှတစ်ဆင့် အောက်တွင် ဖိမိနေပုံရသော အရာတစ်ခုကို ဝိုးတဝါး မြင်လိုက်ရသည်။
၎င်းမှာ အင်မော်တယ်ဘုရင်၏ အလောင်းကောင်အောက်တွင် ဖိမိနေသော ရှေးဟောင်းကျောက်တိုင်တစ်ခု ဖြစ်ပုံရပြီး ထောင့်တစ်နေရာကိုသာ မြင်နေရကာ ဤကျောက်တိုင်ပေါ်တွင် ဘာတွေ မှတ်တမ်းတင်ထားသည်ကို သူတို့ ရှင်းလင်းစွာ မမြင်နိုင်ပေ။
" ရှေးဟောင်းကျောက်တိုင်..... "
ဟွမ်ကျိုအာသည် အံ့အားသင့်သွားကာ တစ်ချိန်တည်းမှာပင် အနည်းငယ် စိတ်ရှုပ်ထွေးသွား၏။
သူ့ကို ဤနေရာသို့ ဆွဲဆောင်ခဲ့သည့်အရာမှာ ဤအင်မော်တယ်ဘုရင်၏ အလောင်းကောင်မဟုတ်ဘဲ အလောင်းကောင်အောက်တွင် ဖိမိနေသော ရှေးဟောင်းကျောက်တိုင်များ ဖြစ်နေလေမလော။ အရာနှစ်ခု ထပ်တူကျနေခြင်းကြောင့် ဤအင်မော်တယ်ဘုရင်၏ အလောင်းကောင်မှ သူ့ကို ဆွဲဆောင်နေသည်ဟု သူ အထင်မှားခဲ့ခြင်းများလော။
" ငါ ကြည့်ကြည့်ရအောင် "
ဟွမ်ကျိုအာသည် သူ၏ သွယ်လျသော လက်လေးကို ညင်သာစွာ မြှောက်လိုက်ပြီး ကောင်းကင်နှင့် မြေကြီး၏ စွမ်းအားကို ထိန်းချုပ်ကာ အင်မော်တယ်ဘုရင်၏ အလောင်းကောင်ကို ရွှေ့ရန် ကြိုးစားလိုက်၏။ ဤလုပ်ငန်းစဉ်အတွင်း မျှော်လင့်မထားသော အပြောင်းအလဲများ ဖြစ်ပေါ်လာမည်ကို စိုးရိမ်သဖြင့် သူသည် သတိကြီးစွာဖြင့် စောင့်ကြပ်နေခဲ့သည်။
သို့သော် မျှော်လင့်ထားသော အပြောင်းအလဲများ ဖြစ်မလာခဲ့ပေ။ အင်မော်တယ်ဘုရင်၏ အလောင်းကောင်ကို သူ အလွယ်တကူ ရွှေ့လိုက်နိုင်ပြီး ၎င်းအောက်ရှိ ရှေးဟောင်းကျောက်တိုင် ပေါ်ထွက်လာ၏။
ရှေးဟောင်းကျောက်တိုင် ပေါ်လာသောအခါ ဟွမ်ကျိုအာ၏ စိတ်နှလုံးထဲရှိ လှုပ်ရှားနေမှုသည် မျက်စိတစ်မှိတ်အတွင်း အထွတ်အထိပ်သို့ ရောက်ရှိသွားရကာ နောက်ဆုံးတွင် သူ့အား အတည်ပြုနိုင်စေခဲ့၏။ သူ့အား ဤနေရာသို့ ဆွဲဆောင်ခဲ့သည့်အရာမှာ အင်မော်တယ်ဘုရင်၏ အလောင်းကောင်မဟုတ်ဘဲ ၎င်း၏အောက်တွင် ဖိမိနေသော ရှေးဟောင်းကျောက်တိုင်သာ ဖြစ်သည်။
ရှေးဟောင်းကျောက်တိုင် ပေါ်ထွက်လာသည်နှင့် မိန်းကလေးများသည် အလျင်အမြန် ကြည့်လိုက်ကြ၏။ ဤကျောက်တိုင်သည် လွန်စွာ ရှေးကျလှ၏။ ၎င်း၏ မျက်နှာပြင်ပေါ်ရှိ ထွင်းထုချက်များသည် ပျက်လုနီးပါး မှေးမှိန်နေ၏။ သို့သော်ငြားလည်း ဝိုးတဝါး ကောက်ကြောင်းတစ်ခုကို မြင်နိုင်သေးသည်။
ထိုကောက်ကြောင်းပေါ်တွင် အင်မော်တယ်ဘုရင်၏ သွေးများစွာ စွန်းထင်းနေပြီး ကြောက်မက်ဖွယ်ကောင်းကာ ဆွဲဆောင်မှုရှိနေ၏။
မိန်းကလေးများအားလုံး၏ အကြည့်များ ရှေးဟောင်းကျောက်တိုင်ပေါ်သို့ စုဆုံသွားသောအခါ ၎င်းမှာ ရုတ်တရက် အသက်ဝင်လာခဲ့ကာ မျက်နှာပြင်ပေါ်တွင် ခြောက်သွေ့လုနီးပါး ဖြစ်နေသော အင်မော်တယ်ဘုရင်၏ သွေးများသည် ရှေးဟောင်းကျောက်တိုင်ပေါ်မှ စီးကျလာ၍ မယုံနိုင်လောက်အောင် ထူးဆန်းသောအရာတစ်ခု ဖြစ်ပျက်လာခဲ့၏။
" ဝုန်း! "
အဆုံးမဲ့တာအိုများ ဆူပွက်လာကာ ဤရှေးဟောင်းကျောက်တိုင်နှင့် ချိတ်ဆက်သွားကြ၏။ နောက်အခိုက်အတန့်တွင် မိန်းကလေးများသည် သူတို့၏နားထဲ၌ ဟိန်းဟောက်သံတစ်ခုကိုသာ ကြားလိုက်ရသည်။ ချက်ချင်းဆိုသလိုပင် ပုံရိပ်ယောင် ရှေးဟောင်းမြင်ကွင်းတစ်ခု သူတို့၏မျက်စိရှေ့တွင် ပေါ်ထွက်လာခဲ့၏။
" ဒါက ကောင်းကင်ကျောက်တိုင်ပေါ်မှာ ထွင်းထု ဖုံးကွယ်ထားတဲ့ အဆုံးမဲ့တာအို စွမ်းအားတွေကို ဒီအင်မော်တယ်ဘုရင်ရဲ့ သွေးက အသက်သွင်းလိုက်လို့ အတိတ်က မြင်ကွင်းတစ်ခု ပြန်ပေါ်လာတာလား "
ယဲ့ယင်းယင်းမှ တွေးတော ခန့်မှန်းလိုက်ကာ ပြောဆိုလိုက်၏။
အချိန်များ ကုန်လွန်လာသည်နှင့်အမျှ ပုံရိပ်ယောင် မြင်ကွင်းသည် ပိုမို ရှင်းလင်းလာပြီး နောက်ဆုံးတွင် လူတိုင်းရှေ့၌ အပြည့်အဝ ပေါ်ထွက်လာခဲ့၏။
မြင်ကွင်းသည် ဤကမ္ဘာ၏ ရှုခင်းများကို ဖော်ပြနေဆဲပင်။ သို့သော် မြင်ကွင်းထဲရှိ ကောင်းကင်နန်းတော်သည် စည်ကားသိုက်မြိုက်နေပြီး အင်မော်တယ် အလင်းတန်းများ ဖြတ်သန်းသွားလာနေကာ ကောင်းကင်ရုံးတော်တစ်ခုကဲ့သို့ အမြင့်တစ်နေရာတွင် တည်ရှိနေ၍ အရပ်မျက်နှာ အားလုံးကို ဖိနှိပ်ထားသည့် ကြီးမားကျယ်ပြန့်သော အငွေ့အသက်များကို ပိုင်ဆိုင်ထားလေသည်။
ထိုကောင်းကင်နန်းတော်အတွင်း၌ စစ်မှန်သော အင်မော်တယ် အများအပြား ဝင်ထွက်သွားလာနေကြကာ အင်မော်တယ်အရှင်များက တာအိုကို ဆွေးနွေးနေကြသည်ကိုပင် ဝိုးတဝါး မြင်တွေ့ရကာ တည်ငြိမ်အေးချမ်း၍ သဟဇာတဖြစ်နေလေ၏။
ဤမြင်ကွင်းက မရေမတွက်နိုင်သော နှစ်ပေါင်းများစွာက ဤကမ္ဘာ၏ အခြေအနေကို ဖော်ပြနေခြင်းလော။ ဟွမ်ကျိုအာနှင့် အခြားသူများ စိတ်ထဲတွင် ခန့်မှန်းနေစဉ်မှာပင် မြင်ကွင်း၌ ရုတ်တရက် အပြောင်းအလဲတစ်ခု ဖြစ်ပေါ်လာခဲ့၏။
" ဘုန်း! "
ကောင်းကင်ဘုံကိုးခု အထက်တွင် ကြီးမားသော အက်ကွဲကြောင်းကြီးတစ်ခု ရုတ်တရက် ပွင့်ဟလာခဲ့ကာ လေဟာနယ်နယ်ပယ်သည်ပင် မှန်တစ်ချပ်ကဲ့သို့ ပြိုကွဲသွား၏။
နောက်အခိုက်အတန့်တွင် ရှေးဟောင်းခေါင်းတလားတစ်ခုသည် ထိုလေဟာနယ် အက်ကွဲကြောင်းမှ ပြုတ်ကျလာကာ ကမ္ဘာအတွင်းသို့ ကျဆင်းလာခဲ့လေသည်။