အခန်း (၃၉၇-၃၉၈)

အခန်း ၃၉၇ - လျှို့ဝှက်နယ်မြေအတွင်းသို့ ဝင်ရောက်ခြင်းနှင့် အရောင်ငါးမျိုး ရတနာကြာပန်း

"ငါးယောက်မြောက်နဲ့ ခြောက်ယောက်မြောက်ပဲ"

တောင်ကြား၏ အစွန်အဖျားတွင် လုချင်း၏ ပုံရိပ် ထွက်ပေါ်လာလေသည်။ သူ၏ရှေ့မှောက်တွင် ဓားတိုကိုင်ဆောင်ထားသော လူလတ်ပိုင်းအရွယ် အမျိုးသားတစ်ဦးနှင့် လှံတိုနှစ်လက်ကို လွယ်ထားသည့် တောင့်တင်းသော အမျိုးသားကြီးတို့မှာ ထိတ်လန့်တုန်လှုပ်နေသော မျက်နှာထားများဖြင့် သတိလစ်မေ့မြောနေကြ၏။

လုချင်းက ထိုအမျိုးသားနှစ်ဦးကို ဆွဲယူကာ ထွက်ခွာလာခဲ့လေသည်။ နောက်ဆုံးတွင် ဂူငယ်တစ်ခုဆီသို့ ရောက်ရှိသွားပြီး သူတို့ကို ထိုအထဲသို့ ပစ်သွင်းလိုက်၏။ ဤလုပ်ရပ်များ၏အစီအစဉ်မှာ အလွန်တရာကိုမှ ကျွမ်းကျင်ပိုင်နိုင်ပြီး ချောမွေ့နေခဲ့ရာ ဤသည်မှာ သူ၏ ပထမဆုံးအကြိမ် မဟုတ်ကြောင်း ရှင်းလင်းစွာ သိသာနေပါ၏။

ဤနှစ်ဦးအပြင် ဂူထဲတွင် သတိလစ်နေသော အခြားလူရိပ်များစွာလည်း ရှိနေနှင့်ပြီးသားပင်။ ထိုလူများကို နေရာချပြီးနောက်၌ လုချင်းက လက်သင်္ကေတတစ်ခုကို ဖန်တီးလိုက်ရာ ဂူတစ်ခုလုံးကို အလင်းရောင်တစ်ဝိုက် ရစ်ပတ်သွားပြီး အပြည့်အဝ ပိတ်လှောင်သွားစေခဲ့သည်။ ဝင်္ကပါအစီအရင်ကို နေရာချထားလိုက်ခြင်းဖြင့် အတွင်းတွင် ပိတ်မိနေသူများမှာ သူတို့၏ စိတ်ဆန္ဒစွမ်းအား မည်မျှပင် ပြင်းထန်ပါစေ အနည်းဆုံး ဆယ်ရက်မှ လဝက်ခန့်အထိ သတိလစ်မေ့မြောနေဦးမည်သာ။

ဤလုပ်ငန်းဆောင်တာကို အဆုံးသတ်ပြီးနောက်၌ လုချင်းက တောင်ကြားဆီသို့ လှည့်ကြည့်လိုက်လေသည်။

"သုံးရက်တောင် ရှိနေပြီကို လျှို့ဝှက်နယ်မြေ ဝင်ပေါက်က မတည်ငြိမ်သေးဘူးပဲ"

အမှန်တကယ်ပင် လျှို့ဝှက်နယ်မြေတံခါး စတင်ပေါ်ပေါက်လာချိန်မှစ၍ သုံးရက်တိတိ ကြာမြင့်ခဲ့ပြီ ဖြစ်၏။ သို့တိုင် လုချင်းက အနက်ရောင်ဝဲကတော့ကြီး တည်ငြိမ်သွားမည့် အရိပ်အယောင်ကို မမြင်ရသေးပေ။

ဤရက်များအတွင်း သူသည် လျှို့ဝှက်နယ်မြေတံခါး၏ လှိုင်းဂယက်များကို ခံစားမိပြီး စုံစမ်းစစ်ဆေးရန် ရောက်လာကြသည့် မွေးဖွားပြီးနယ်ပယ် ကျွမ်းကျင်သူ အတော်များများကို ဖမ်းဆီးခဲ့ပြီးပင်။ သူတို့၏ အသိစိတ်များကို ပိတ်လှောင်ကာ ယာယီအကျဉ်းချထားခြင်းဖြင့် သူတို့ ဝင်ရောက်စွက်ဖက်ခြင်း မပြုနိုင်ရန် သူ သေချာအောင် လုပ်ဆောင်ထားခဲ့၏။

ယခုလေးတင် ဖမ်းဆီးလာခဲ့သော နှစ်ဦးနှင့်ပါ ပေါင်းလိုက်လျှင် စုစုပေါင်း ခြောက်ဦးအထိ ရှိသွားခဲ့ပြီ ဖြစ်သည်။ ချန်ကျိုးသည် မွေးဖွားပြီးနယ်ပယ်နှင့် ၎င်းအထက် ကျွမ်းကျင်သူ အနည်းငယ်သာရှိသော ခေါင်ဖျားသည့် ဒေသတစ်ခု ဖြစ်မနေပါက ဤဂူငယ်လေးသည် ထိုလူအားလုံးကို ဆံ့နိုင်မည်ပင် မဟုတ်ချေ။

လျှို့ဝှက်နယ်မြေတံခါးမှာ မတည်ငြိမ်သေးသဖြင့် လုချင်းအတွက် စိတ်ရှည်လက်ရှည် စောင့်ဆိုင်းနေရုံမှတစ်ပါး အခြားရွေးချယ်စရာ မရှိခဲ့ပေ။

...

နောက်ထပ် နှစ်ရက် ထပ်မံကုန်ဆုံးသွားလေသည်။ ဂူထဲသို့ နောက်ထပ် "နေထိုင်သူ" သုံးဦး ထပ်မံ တိုးလာခဲ့၏။ နောက်ဆုံးတွင် တောင်ကြားဆီမှ ထွက်ပေါ်လာသော ပြင်းထန်လှသည့် လှိုင်းဂယက်တစ်ခုကို လုချင်း ခံစားလိုက်ရလေသည်။ ဤလှိုင်းဂယက်သည် ယခင်ကထက် အနည်းဆုံး ဆယ်ဆခန့် ပိုမိုအားကောင်းနေခဲ့သည်။

သူ တောင်ကြားဆီသို့ ပျံသန်းသွားသောအခါ အနက်ရောင်ဝဲကတော့ကြီးသည် ယခင်ကလို လှိုင်းထန်မနေတော့သည်ကို မြင်လိုက်ရ၏။ ၎င်းသည် တည်ငြိမ်သွားပြီဖြစ်ကာ နက်နဲလှသော လျှို့ဝှက်ဆန်းကြယ်မှု အငွေ့အသက်များကို ထုတ်လွှတ်နေလေသည်။

"နောက်ဆုံးတော့ တည်ငြိမ်သွားပြီလား"

လုချင်း၏ မျက်ဝန်းများက စူးရှသွားပြီး သူ၏ နတ်မျက်စိစွမ်းရည်ကို အသက်သွင်းကာ အနက်ရောင်ဝဲကတော့ကြီးကို စိုက်ကြည့်လိုက်သည်။ မကြာမီပင် သူ၏ မျက်နှာပေါ်တွင် အပြုံးတစ်ခု ပေါ်ပေါက်လာခဲ့၏။

"အပြည့်အဝ ပုံပေါ်သွားပြီပဲ။ ဝင်ဖို့ အချိန်ရောက်ပြီပေါ့"

ထို့နောက်၌ တုံ့ဆိုင်းနေခြင်းအလျဉ်းမရှိဘဲ လုချင်းသည် အနက်ရောင်ဝဲကတော့ကြီးထဲသို့ ခုန်ဝင်သွားကာ ထိုအထဲတွင် ပျောက်ကွယ်သွားလေတော့သည်။

အပြည့်အဝ တည်ငြိမ်သွားသည့် နောက်ဆုံးအခိုက်အတန့်တွင် ထွက်ပေါ်လာသော ပြင်းထန်လွန်းလှသည့် လှိုင်းဂယက်များသည် ချန်ကျိုး၏ နယ်နိမိတ်များကိုပင် ကျော်လွန်သွားလောက်ပါ၏။ ဤသည်က အချိန်ကို အလွန်အရေးကြီးသွားစေခဲ့သည်။ အခြားမည်သူတစ်ဦးတစ်ယောက်မျှ ရတနာများကို လုယူရန် ရောက်မလာမီ ဤအခွင့်အရေးကို သူ အရယူရမည်သာ။

...

လုချင်းသည် အနက်ရောင်ဝဲကတော့ကြီးထဲသို့ ပျောက်ကွယ်သွားချိန်တွင် တောင်တန်းတစ်သိန်း၏ အလွန်အဝေးကြီးတစ်နေရာ၊ ချန်ကျိုးတစ်ခွင်လုံးနှင့် အိမ်နီးချင်းပြည်နယ်များအထိပင် စွမ်းအားကြီးမားသော ပုဂ္ဂိုလ်များစွာမှာ တုန်လှုပ်သွားခဲ့ကြသည်။ သူတို့အားလုံးမှာ အံ့အားသင့်ထိတ်လန့်နေသော မျက်နှာထားများဖြင့် တစ်ခုတည်းသော ဦးတည်ရာဆီသို့ လှည့်ကြည့်လိုက်ကြ၏။

"ဘာတွေ ဖြစ်နေတာလဲ"

"အဲဒီဘက်ကနေ အားကောင်းတဲ့ ဆွဲဆောင်မှုတစ်ခုကို ငါ ခံစားနေရတယ်။ အခွင့်အရေးကြီးကြီးမားမားတစ်ခု ပေါ်လာတာ သေချာတယ်"

"ဒီလှိုင်းဂယက်က အရင်တုန်းက လျှို့ဝှက်နယ်မြေတစ်ခု ပေါ်လာတုန်းက ငါ ခံစားခဲ့ရတာနဲ့ ဆင်တူနေတယ်။ အဲဒီနေရာမှာ လျှို့ဝှက်နယ်မြေသစ်တစ်ခု မွေးဖွားလာတာများလား"

"မြန်မြန်... ငါတို့ သွားကြည့်ကြရအောင်"

လျှို့ဝှက်နယ်မြေတံခါး တည်ငြိမ်သွားမှုကြောင့် ဖြစ်ပေါ်လာသော ရုတ်ရုတ်သဲသဲအခြေအနေသည် အိမ်နီးချင်းပြည်နယ်များမှ မွေးဖွားပြီးနယ်ပယ် ကျွမ်းကျင်သူအားလုံးကို သတိပေးလိုက်သလို ဖြစ်သွားခဲ့လေသည်။ မုန်တိုင်းတစ်ခုက အစပျိုးနေခဲ့ပြီ ဖြစ်၏။ ကျွမ်းကျင်သူများစွာသည် သူတို့၏ ခြေကုပ်စခန်းများကို ချက်ချင်းစွန့်ခွာကာ လှိုင်းဂယက်များ ထွက်ပေါ်လာရာ အရင်းအမြစ်ဆီသို့ အပြေးအလွှား သွားရောက်ခဲ့ကြလေသည်။

"ဒီလောက်ကြီးမားတဲ့ ဆူပူလှုပ်ရှားမှုကြီး... သခင်လေးလုများ တစ်ခုခု ဖြစ်သွားတာလား"

ကျိုးလီရွာတွင်လည်း ရုတ်တရက် ပေါက်ကွဲထွက်လာသော လှိုင်းဂယက်များကြောင့် လင်းကျိယွဲ့နှင့် အခြားသူများမှာ အံ့အားသင့်သွားခဲ့ကြသည်။ တောင်တန်းတစ်သိန်း၏ အနက်ရှိုင်းဆုံးနေရာတွင် တစ်ခုခုများ မှားယွင်းသွားခဲ့ပြီလားဟု သူတို့ မပူပန်ဘဲ မနေနိုင်အောင် ဖြစ်သွားကြရသည်။

"မတော်တဆမှုတော့ မဖြစ်နိုင်ပါဘူး။ အားချင်း မထွက်သွားခင်က လျှို့ဝှက်နယ်မြေတံခါးက တည်ငြိမ်အောင် အားယူနေရတုံးပဲလို့ ပြောသွားခဲ့တယ် မဟုတ်လား။ ဒီလှိုင်းဂယက်ကို ကြည့်ရတာ အခုတော့ လုံးဝတည်ငြိမ်သွားပြီထင်တယ်"

သမားတော်ကြီးချန်က ပို၍တည်ငြိမ်စွာဖြင့် အခြေအနေကို ကျိုးကြောင်းဆီလျော်စွာ အကဲခတ်လိုက်၏။

"ဒါတောင်မှ အခုဖြစ်သွားတဲ့ လှုပ်ခတ်မှုကြီးက သိပ်ကိုပြင်းထန်လွန်းတယ်။ ချန်ကျိုးတစ်ခုတည်းက လူတွေပဲ သတိထားမိလိုက်တာမဟုတ်ဘဲ တခြားပြည်နယ်တွေက ကျွမ်းကျင်သူတွေလည်း ဒီကိစ္စအတွက် လှုပ်ရှားလာကြမှာကို ငါ စိုးရိမ်မိတယ်"

လင်းကျိယွဲ့က မအေးချမ်းနိုင်သေးသော စိတ်ဖြင့် ပြောလိုက်၏။

"ဒီလိုအခြေအနေမျိုးမှာတော့ အားချင်းကို ယုံကြည်ဖို့ပဲ ကျွန်တော်တို့ တတ်နိုင်တော့တယ်"

သမားတော်ကြီးချန်သည်လည်း စိုးရိမ်ပူပန်နေမိသော်ငြား အခြေအနေအရပ်ရပ်ကို ကိုင်တွယ်ဖြေရှင်းနိုင်မည့် လုချင်း၏ စွမ်းရည်အပေါ် ပို၍ ယုံကြည်မှု ရှိနေခဲ့လေသည်။

...

အပြင်ဘက်ကမ္ဘာရှိ ရုတ်ရုတ်သဲသဲအခြေအနေများက လုချင်းအပေါ် မည်သို့မျှ အကျိုးသက်ရောက်မှု မရှိခဲ့ပေ။

ထိုအချိန်၌ သူသည် ထူးဆန်းလှသော နေရာလွတ်တစ်ခုအတွင်းသို့ ရောက်ရှိနေနှင့်ပြီး ဖြစ်၏။ ထိုနေရာလွတ်သည် ကုန်းမြေများ၊ သစ်ပင်ပန်းမန်များ၊ လေထုနှင့် အလင်းရောင်တို့ဖြင့် အပြင်ဘက်ကမ္ဘာနှင့် ဆင်တူလှသော်လည်း နေနှင့်လတို့တော့ မရှိခဲ့ချေ။

ထိုအစား ကောင်းကင်ယံရှိ အမြှေးပါးသဖွယ် အလွှာတစ်ခုဆီမှ အလင်းရောင်များ ဖြာကျနေပြီး အောက်ဘက်ရှိ အရာခပ်သိမ်းကို လင်းလက်တောက်ပစေလေသည်။ ဤသည်မှာ လူသားတို့ အသက်ရှင်နေထိုင်နိုင်စွမ်းရှိသော တကယ့်ကမ္ဘာတစ်ခုဖြစ်ကြောင်း ငြင်းဆိုဖွယ်ရာ မရှိပေ။

သို့သော်လည်း ထိုအရာများထဲမှ မည်သည့်အရာကမျှ လုချင်း၏ အာရုံကို ဖမ်းစားနိုင်ခြင်း မရှိခဲ့ချေ။ သူ၏ အာရုံစူးစိုက်မှု အလုံးစုံကို အခြားအရာတစ်ခုက ဖမ်းစားထားခဲ့လေသည်။

"ဓာတ်ကြီးငါးပါး ဝိညာဉ်စွမ်းအင်က ဒီလောက်တောင် သိပ်သည်းရလားးး"

ထိုနေရာလွတ်တစ်ခုလုံးကို ပြည့်နှက်လွှမ်းခြုံနေသော စွမ်းအင်များကို ခံစားမိလိုက်ချိန်တွင် လုချင်းမှာ အံ့အားသင့်သွားခဲ့ရသည်။

ဤနေရာရှိ ဝိညာဉ်စွမ်းအင်များတွင် သဘာဝဓာတ်ငါးပါးစလုံး ပါဝင်နေပြီး ပြည့်ဝစွာ ညီညွတ်မျှတနေကြောင်းကို သူ နားလည်လိုက်လေ၏။

ဤပတ်ဝန်းကျင်တွင် ရပ်နေရုံမျှဖြင့် သူ၏ခန္ဓာကိုယ်အတွင်းရှိ ဓာတ်ကြီးငါးပါး ဝိညာဉ်စွမ်းအားများမှာ အလိုအလျောက် လည်ပတ်လာခဲ့ပြီး အဆင့်တက်ရန် နီးစပ်နေသည့်အလားပင် ခံစားနေရ၏။ သူ၏ ကိုယ်ပိုင်အသက်သွေးကြောရတနာဖြစ်သော ဓာတ်ကြီးငါးပါး ဘူးသီးခြောက်လေးပင်လျှင် ဝိညာဉ်စွမ်းအင်များကို စုပ်ယူရန် ဆာလောင်မွတ်သိပ်စွာဖြင့် ဂနာမငြိမ်ဖြစ်နေခဲ့လေသည်။

မတည်ငြိမ်သေးသည့် အချိန်တွင်ပင် လျှို့ဝှက်နယ်မြေတံခါးက မည်သည့်အတွက်ကြောင့် ထိုမျှလောက် ဆွဲဆောင်နိုင်စွမ်း ပြင်းထန်နေရသနည်းဆိုသည်ကို လုချင်း ချက်ချင်းပင် သဘောပေါက်သွားခဲ့တော့၏။

အကြောင်းမူကား ဤလျှို့ဝှက်နယ်မြေ၏ ဝိညာဉ်စွမ်းအင်သည် ဓာတ်ငါးပါးစလုံး ပါဝင်နေရုံသာမက နက်နဲလှသော လျှို့ဝှက်ဆန်းကြယ်မှုများလည်း ကိန်းအောင်းနေသောကြောင့်ပင်။ ဤလျှို့ဝှက်ဆန်းကြယ်မှုများကို နားလည်သဘောပေါက်ခြင်းက သူ၏ နောင်အနာဂတ် ကျင့်ကြံမှုခရီးစဉ်အတွက် ကြီးမားသော အကျိုးကျေးဇူးများ ဖြစ်ထွန်းစေလိမ့်မည်ဟု ခိုင်မာသော ကြိုတင်ခံစားချက်တစ်ခုကို သူ ရရှိနေခဲ့လေသည်။

ထိုထက်ပို၍ အရေးကြီးသည်မှာ...

လုချင်းက သူ၏အကြည့်တို့ကို လျှို့ဝှက်နယ်မြေ၏ အနက်ရှိုင်းဆုံးနေရာဆီသို့ ပို့လွှတ်လိုက်သည်။

ထိုနေရာတွင် တစ်စုံတစ်ရာ ရှိနေကြောင်း သူ အာရုံခံနိုင်ခဲ့၏။ ထိုအရာ၏ တည်ရှိမှုက အလွန်တရာ အားကောင်းလွန်းလှသဖြင့် သူ၏ ဝိညာဉ်ကိုပင် အလိုအလျောက် တုန်ခိုက်သွားစေခဲ့လေသည်။

"တကယ့်ကို ဩချစရာကောင်းလိုက်တဲ့ လျှို့ဝှက်နယ်မြေပါလား"

မီးတောက်မီးလျှံများဖြင့် ဖွဲ့စည်းထားသော ယန်၏ ပုံရိပ်က လုချင်း၏ဘေးတွင် ပေါ်လာပြီး သူ၏ လေသံတွင်လည်း အံ့အားသင့်မှုများ ရောယှက်နေခဲ့လေသည်။

ယန်က ပတ်ဝန်းကျင်ကို အကဲခတ်ကြည့်လိုက်သောအခါ၌ မည်သည့်အတွက်ကြောင့် လုချင်းက ဤနေရာသို့ ဝင်ရောက်ရန် ဤမျှလောက် အတင်းအကြပ် ဆန္ဒပြင်းပြနေခဲ့ရသနည်းဆိုသည်ကို ကောင်းစွာ နားလည်သွားခဲ့သည်။

ပေါများကြွယ်ဝလှသော ဝိညာဉ်စွမ်းအင်များနှင့် ဓာတ်ကြီးငါးပါး၏ ပြီးပြည့်စုံသော ညီညွတ်မျှတမှုတို့က ဤလျှို့ဝှက်နယ်မြေကို ဓာတ်ကြီးငါးပါး ခန္ဓာကိုယ်သန့်စင်ခြင်း ကျင့်စဉ်အား လေ့ကျင့်နေသူတစ်ဦးအတွက် ပြိုင်ဘက်ကင်းလှသော ကျင့်ကြံခြင်း နိဗ္ဗာန်ဘုံတစ်ခုအဖြစ်သို့ ဖန်တီးပေးထားလေသည်။ ဤနေရာ၌ တစ်ရက်မျှ ကျင့်ကြံခြင်းက အပြင်ဘက်ကမ္ဘာ၌ ဆယ်ရက်တာ ကျင့်ကြံခြင်းကိုပင် အလွယ်တကူ ကျော်လွန်နိုင်စွမ်း ရှိပေ၏။

"သခင်လေး..."

ယန်က စကားဆက်ပြောရန် ဟန်ပြင်လိုက်သော်လည်း ထိုအခိုက်အတန့်တွင် လုချင်းက လေထဲသို့ ရုတ်တရက် ပျံတက်သွားကာ ရွှေရောင်လှေပျံကို ဆင့်ခေါ်လိုက်ပြီး လျှို့ဝှက်နယ်မြေ၏ အနက်ရှိုင်းဆုံးနေရာဆီသို့ ဦးတည်သွားလေတော့သည်။

လျှို့ဝှက်နယ်မြေမှာ အလွန်ပင်ကျယ်ဝန်းလှပြီး ရွှေရောင်လှေပျံ၏ အမြန်နှုန်းဖြင့်ပင်လျှင် အနက်ရှိုင်းဆုံးနေရာသို့ ရောက်ရှိရန် ၁၅မိနစ်ခန့်လောက် အချိန်ယူလိုက်ရ၏။

ထိုနေရာသို့ ရောက်သောအခါ သူ့ကို ညှို့ငင်ဖမ်းစားထားခဲ့သော အရင်းအမြစ်ကို နောက်ဆုံးတွင် သူ မြင်တွေ့လိုက်ရချေပြီပင်။

၎င်းမှာ ရေကန်ငယ်လေးတစ်ခုဖြစ်ပြီး ကန်၏အလယ်တွင် ကြာပန်းတစ်ပွင့် ပွင့်လန်းနေခဲ့၏။ ထိုကြာပန်းတွင် ပွင့်ဖတ်ငါးခုရှိပြီး ပွင့်ဖတ်တစ်ခုစီတိုင်းက ကိုယ်ပိုင်အရောင်အသွေးအသီးသီးဖြင့် တောက်ပနေကြလေသည်။

အရောင်ငါးမျိုး ရတနာကြာပန်း။

၎င်းကို မြင်လိုက်ရသည့်အခိုက်အတန့်တွင် လုချင်း၏ မျက်ဝန်းများမှာ အံ့သြမှင်သက်မှုကြောင့် ပြူးကျယ်သွားခဲ့ရသည်။

ရှေ့သို့ ပြေးထွက်သွားချင်စိတ်ကို ဖြစ်ပေါ်စေလောက်အောင် အလွန်တရာ ပြင်းပြလှသော လိုအင်ဆန္ဒတစ်ခုက သူ၏ ဝိညာဉ်အနက်ရှိုင်းဆုံးနေရာဆီမှ ရုတ်တရက် ထိုးဖောက်ထွက်ပေါ်လာခဲ့၏။ သို့သော် သူ၏ စိတ်စွမ်းအားမှာ ကြံ့ခိုင်လွန်းလှသဖြင့် ထိုဆန္ဒကို ချက်ချင်းပင် ဖိနှိပ်ထိန်းချုပ်လိုက်နိုင်သည်။ ထို့နောက် သူ၏ နတ်မျက်စိစွမ်းရည်ကို အသက်သွင်းကာ ထိုကြာပန်းကို သေချာစွာ စစ်ဆေးစူးစမ်းကြည့်လိုက်တော့၏။

...

အခန်း ၃၉၈ - အမြင့်မြတ်ဆုံး ဝိညာဉ်ဆေးမြစ်၊ အစောင့်အရှောက် နတ်သားရဲ။

လုချင်းက သူ၏ နတ်မျက်စိစွမ်းရည်ကို အသက်သွင်းကာ အရောင်ငါးမျိုး ရတနာကြာပန်းကို စူးစူးစိုက်စိုက် ကြည့်လိုက်လေသည်။

မကြာမီမှာပင် ကြာပန်းဆီမှ သိပ်သည်းလှသော ခရမ်းရောင်အလင်းတန်းတစ်ခု ဖြာထွက်လာပြီး လေထဲတွင် လွင့်မျောနေသော စာတန်းအချို့ ပေါ်ထွက်လာခဲ့၏။

"ခရမ်းရောင် အလင်းတန်းပါလား"

လုချင်းမှာ အံ့အားသင့်သွားပြီး လွင့်မျောနေသော စာတန်းများကို အမြန်ဖတ်ကြည့်လိုက်လေသည်။

[ဓာတ်ကြီးငါးပါး ကြာပန်း - အသန့်စင်ဆုံးသော ဓာတ်ကြီးငါးပါး ဝိညာဉ်အရည်မှ မွေးဖွားလာသည့် အမြင့်မြတ်ဆုံးသော ဝိညာဉ်ဆေးမြစ်။]

[ဤဝိညာဉ်ဆေးမြစ်တွင် ဓာတ်ကြီးငါးပါး၏ အနှစ်သာရများ ပါဝင်သည်။ ၎င်းကို အပြည့်အဝ သန့်စင်နိုင်ပါက ဓာတ်ကြီးငါးပါး တာအိုခန္ဓာကို ရရှိနိုင်ရန် အလွန် မြင့်မားသော ဖြစ်တန်စွမ်းရှိသည်။]

[ဆေးမြစ်မှာ အပြည့်အဝ ရင့်ကျက်နေပြီဖြစ်ကာ ဆွတ်ခူးရန် အသင့်ဖြစ်နေပြီ ဖြစ်သည်။]

[သန့်စင်လှသော ဓာတ်ကြီးငါးပါး၏ အနှစ်သာရများဖြင့် ပြည့်နှက်နေသည့် ဤသို့သော ဝိညာဉ်ဆေးမြစ်မျိုးကို ဆေးဖက်ဝင်စွမ်းရည်များ ဆုံးရှုံးမသွားစေရန် ကျောက်စိမ်းအနှစ်သာရဖြင့် ပြုလုပ်ထားသော သို့မဟုတ် ၎င်းထက် ပိုမိုအရည်အသွေးမြင့်မားသော ခွက်များဖြင့်သာ သိမ်းဆည်းရမည်။]

[အမြင့်မြတ်ဆုံး ဝိညာဉ်ဆေးမြစ်တစ်ခု၏ ကြီးမားလှသော စွမ်းအင်တွင် မွေးရာပါ တာအိုစည်းချက်များ ကိန်းအောင်းနေသည်။ ရွှေအမြုတေအဆင့်နှင့် ၎င်းအထက်ရှိသူများသာ ၎င်းကို စားသုံး၍ သန့်စင်နိုင်သည်။ သို့မဟုတ်ပါက ခန္ဓာကိုယ် ပေါက်ကွဲထွက်နိုင်ခြေ အလွန် မြင့်မားသည်။]

[ရှားပါးသော ဝိညာဉ်ဆေးမြစ်များကို နတ်သားရဲများက အမြဲလိုလို စောင့်ကြပ်လေ့ရှိသည်။ ဆွတ်ခူးချိန်တွင် သတိထားပါ။]

...

"ဓာတ်ကြီးငါးပါး ကြာပန်း... အမြင့်မြတ်ဆုံး ဝိညာဉ်ဆေးမြစ်ပါလား"

စာတန်းများကို ဖတ်ရှုပြီးဆုံးသွားချိန်တွင် လုချင်း၏ မျက်နှာပေါ်၌ ဝမ်းမြောက်ဝမ်းသာဖြစ်မှုတို့က လင်းလက်သွားခဲ့လေသည်။

ဤလျှို့ဝှက်နယ်မြေက ဤမျှလောက် ထူးကဲလှသော ရတနာတစ်ပါးကို ပျိုးထောင်ပေးနိုင်လိမ့်မည်ဟု သူ လုံးဝ ထင်မှတ်မထားခဲ့ပေ။

ဝိညာဉ်ဆေးမြစ်များသည် ဝိညာဉ်လက်နက်များကဲ့သို့ပင် အဆင့်နိမ့်၊ အလယ်အလတ်အဆင့်၊ အဆင့်မြင့်နှင့် အမြင့်မြတ်ဆုံးအဆင့်ဟူ၍ ခွဲခြားထားကြောင်းကို လူတိုင်း သိရှိထားကြလေသည်။ ၎င်းတို့အထဲတွင် အမြင့်မြတ်ဆုံး ဝိညာဉ်ဆေးမြစ်များမှာ အဖိုးတန်ဆုံးဖြစ်ပြီး သန္ဓေသားဝိညာဉ်အဆင့် ကျင့်ကြံသူများပင်လျှင် အလိုချင်ဆုံး တပ်မက်ကြသည့် အရာများ ဖြစ်ပေ၏။

ဤလျှို့ဝှက်နယ်မြေအတွင်း၌ ဤသို့သော ပြိုင်ဘက်ကင်း ဝိညာဉ်ဆေးမြစ်ကို တွေ့ကြုံရခြင်းက သူ၏ မှန်းဆချက်များထက် များစွာ ကျော်လွန်နေခဲ့လေပြီပင်။

"ဒီကြာပန်းက ဓာတ်ကြီးငါးပါးရဲ့ ညီညွတ်မျှတမှုကို ကိုယ်စားပြုပြီး တာအိုစည်းချက်တွေလည်း ကိန်းအောင်းနေတယ်။ ဒါက အမြင့်မြတ်ဆုံးအဆင့် ဝိညာဉ်ဆေးမြစ်တစ်ခုပဲ"

ယန်၏ ပုံရိပ်က လုချင်း၏ဘေးတွင် ထွက်ပေါ်လာပြီး သူ၏ မျက်နှာပေါ်တွင် အံ့အားသင့်မှုများက အထင်းသား ပေါ်လွင်နေခဲ့လေသည်။

လီဟော်ဂိုဏ်း၏ တစ်ခုတည်းသော အမြင့်မြတ်ဆုံးလက်နက်ဖြစ်သည့် လီဟော်ဒယ်အိုး၏ ဝိညာဉ်ဖြစ်သူ ယန်သည် အလွန်ပင် ဗဟုသုတကြွယ်ဝသူ ဖြစ်၏။ ဆေးလုံးဖော်စပ်ခြင်းနှင့် လက်နက်ဖန်တီးခြင်းတွင် သူ၏ ကျွမ်းကျင်မှုမှာ ပြိုင်ဘက်ကင်းလှပြီး စစ်မှန်သော သခင်တစ်ဦးပင်။

ရှေးကျင့်ကြံခြင်းခေတ်ကာလများက လီဟော်ဂိုဏ်းသည် လီဟော်ဒယ်အိုးကို အသုံးပြု၍ ဝိညာဉ်လက်နက်များနှင့် ဆေးလုံးပေါင်းများစွာကို ဖန်တီးခဲ့ကြသည်။ ယန်အနေဖြင့် ဓာတ်ကြီးငါးပါး ကြာပန်းကို တစ်ခါမျှ မမြင်ဖူးခဲ့သော်လည်း ၎င်း၏ အဆင့်အတန်းနှင့် တန်ဖိုးကိုတော့ ချက်ချင်းပင် ခွဲခြားသိမြင်နိုင်စွမ်း ရှိလေသည်။

"သခင်လေး... မြန်မြန်လုပ်ပါ။ ဒီအခွင့်အရေးကို လက်လွတ်ခံလို့မဖြစ်ဘူး။ အခုချက်ချင်း ခူးလိုက်ပါတော့"

ယန်က စိတ်လှုပ်ရှားစွာဖြင့် တိုက်တွန်းလေသည်။

လီဟော်ဂိုဏ်း၏ အထွတ်အထိပ်ကာလများတွင်ပင်လျှင် အမြင့်မြတ်ဆုံး ဝိညာဉ်ဆေးမြစ်ကို တစ်ကြိမ်သာ ကြုံတွေ့ခဲ့ဖူးပါ၏။ ထိုအချိန်က ၎င်းကို ဆေးလုံးအဖြစ် ဖော်စပ်ပြီးနောက် တည်ရှိမှု၏ မြင့်မားသော စည်းမျဉ်းများကို သူ နားလည်သဘောပေါက်ခဲ့ပြီး အလယ်အလတ်အဆင့် ဝိညာဉ်လက်နက်တစ်ခုအဖြစ်သို့ အဆင့်တက်ရောက်နိုင်ခဲ့လေ၏။

ယန်က တိုက်တွန်းနေသော်ငြားလည်း လုချင်းသည် အလျင်စလို မလှုပ်ရှားခဲ့ပေ။ ထိုအစား သူ့ပတ်ဝန်းကျင်ကိုသာ သေချာစွာ စူးစမ်းကြည့်လိုက်သည်။

လွင့်မျောနေသော စာတန်းများထဲမှ သတိပေးချက်ကို သူ မေ့လျော့မထားခဲ့ချေ။ ရှားပါးသော ဝိညာဉ်ဆေးမြစ်များကို နတ်သားရဲများက အမြဲလိုလို စောင့်ကြပ်လေ့ရှိသည် မဟုတ်ပါလော။

ဓာတ်ကြီးငါးပါး ကြာပန်းသည် အလွန်တရာ အဖိုးတန်လှသောကြောင့် ၎င်းကို စောင့်ကြပ်နေသည့် မည်သည့် နတ်သားရဲမဆို သေချာပေါက် ကြောက်မက်ဖွယ်ကောင်းလောက်အောင် အစွမ်းထက်နေမည်သာပင်။

အချိန်အနည်းငယ်ကြာအောင် စောင့်ကြည့်လေ့လာပြီးနောက်၌ ထူးခြားမှု တစ်စုံတစ်ရာကိုမျှ မတွေ့ရသောအခါ လုချင်းက ကျောက်ခဲငယ်လေးတစ်လုံးကို ကောက်ယူလိုက်သည်။ ထို့နောက် လက်ချောင်းဖြင့် တစ်ချက်ခေါက်လိုက်ရာ ကျောက်ခဲလေးမှာ ထက်မြက်လှသော အတွင်းအားများနှင့်အတူ အရောင်ငါးမျိုး ရတနာကြာပန်းဆီသို့ လျင်မြန်စွာ ပြေးထွက်သွားလေတော့၏။

"သခင်လေး... ဘာလုပ်..."

ယန်မှာ အံ့အားသင့်သွားပြီး စကားစပြောရန် ဟန်ပြင်လိုက်သော်လည်း ရုတ်တရက် အနီးအနားရှိ ရေကန်ထဲမှ အလင်းတန်းတစ်ခု ပစ်ထွက်လာပြီး လေထဲတွင် ကျောက်ခဲကို ကြားဖြတ်ဟန့်တားလိုက်တော့သည်။

ဖြန်း...

ကျောက်ခဲလေးမှာ ရိုက်ခတ်မှုကြောင့် ချက်ချင်းပင် တစ်စစီ ကွဲကြေသွားပြီး အလင်းတန်းမှာ ကန်ဘောင်ပေါ်သို့ ကျဆင်းလာကာ ၎င်း၏ အစစ်အမှန်ပုံစံကို ဖော်ပြလိုက်၏။

ထိုသည်ကတော့ လူတစ်ယောက်၏ လက်မောင်းခန့် တုတ်ခိုင်သော မြွေတစ်ကောင်ဖြစ်၏။ ၎င်း၏ ကျောပြင်တွင် တောင်ပံတစ်စုံ ပါရှိပြီး ခေါင်းပေါ်တွင် ချွန်ထက်သော ဦးချိုငယ်နှစ်ချောင်းလည်း ရှိနေပါသည်။ ၎င်း၏ အကြေးခွံများမှာတော့ မျက်စိကျိန်းမတတ် တောက်ပသော အရောင်အသွေးများဖြင့် လင်းလက်နေပြီး လုချင်းနှင့် ယန်တို့ကို ရန်လိုသောအကြည့်များဖြင့် စိုက်ကြည့်နေလေသည်။

"အစောင့်အရှောက် နတ်သားရဲလား"

ယန်မှာ ထပ်မံ၍ အံ့အားသင့်စွာ ရေရွတ်လိုက်မိပြန်၏။ ရေအောက်တွင် ပုန်းအောင်းနေခဲ့သော ဤတောင်ပံပါမြွေကို သူ မသိရှိခဲ့ခြင်းအတွက်လည်း ကိုယ့်ကိုကိုယ် အံ့သြနေမိသည်။

ထိုစဉ် လုချင်းကတော့ သူ၏ နတ်မျက်စိစွမ်းရည်ကို ချက်ချင်း အသက်သွင်းကာ မြွေကို စူးစိုက်ကြည့်လိုက်တော့၏။

ထိုအခိုက်အတန့်အတွင်းမှာပင် လွင့်မျောနေသော စာတန်းများက သူ၏ မျက်လုံးရှေ့တွင် ပေါ်ထွက်လာခဲ့သည်။

[ဓာတ်ကြီးငါးပါး တောင်ပံပါမြွေ - လျှို့ဝှက်နယ်မြေမှ မွေးဖွားပျိုးထောင်ပေးထားသော ပြိုင်ဘက်ကင်း နတ်သားရဲ။]

[ကျင့်ကြံမှုအဆင့် - အခြေတည်အဆင့်၏ အထွတ်အထိပ်။ ရေနဂါးအဖြစ် အသွင်ပြောင်းရန် ခြေတစ်လှမ်းသာ လိုတော့သည်။]

[ဓာတ်ကြီးငါးပါး၏ စွမ်းအားများဖြင့် သန့်စင်ခံထားရသဖြင့် ၎င်း၏ ခန္ဓာကိုယ်မှာ အလွန်ကိုမှ ကြံ့ခိုင်ပြီး ရွှေအမြုတေအဆင့် စဦးပိုင်း ကျင့်ကြံသူတစ်ဦးနှင့်ပင် ယှဉ်နိုင်စွမ်းရှိသည်။]

[ဤနတ်သားရဲသည် နှစ်တစ်ထောင်ကျော် သက်တမ်းရှိပြီဖြစ်ကာ ဓာတ်ကြီးငါးပါး ကြာပန်းကို စောင့်ကြပ်နေရင်း ကြာစေ့များ ရင့်ကျက်လာချိန်ကို စောင့်ဆိုင်းနေခြင်း ဖြစ်သည်။ ထိုကြာစေ့များကို စားသုံးပြီး ရေနဂါးအဖြစ်သို့ ပြောင်းလဲရန် ရည်ရွယ်ထားသည်။]

...

"ရွှေအမြုတေအဆင့်နဲ့ ယှဉ်နိုင်တဲ့ ခန္ဓာကိုယ်ကြံ့ခိုင်မှုရှိပြီးတော့ အခြေတည်အဆင့်ရဲ့ အထွတ်အထိပ်မှာရှိတဲ့ အစောင့်အရှောက် နတ်သားရဲပဲ"

အချက်အလက်များကို ဖတ်ရှုပြီးနောက် လုချင်းမှာ အနည်းငယ်မျှပင် တုံ့ဆိုင်းမနေခဲ့ပေ။ သူသည် ကောင်းကင်နှင့်မြေကြီး ချီအိတ်ကို ချက်ချင်းပင် ထုတ်ယူလိုက်၏။

နဂိုက သေးငယ်လှသော အိတ်လေးမှာ လျင်မြန်စွာဖြင့် ကြီးထွားလာပြီး လူတစ်ဝက်စာခန့် အရွယ်အစားအထိ ပြောင်းလဲသွားခဲ့ပါ၏။ ထို့နောက် အဝါရောင် အလင်းတန်းတစ်ခုက မြွေဆီသို့ ပစ်လွှတ်လိုက်လေသည်။

အန္တရာယ်ကို အာရုံခံစားလိုက်မိသော တောင်ပံပါမြွေမှာ အလိုအလျောက် တုန်ယင်သွားခဲ့လေ၏။ ၎င်း၏ မျက်လုံးများထဲတွင် ကြောက်လန့်မှုများ ယှက်သန်းသွားပြီး ရေကန်ထဲသို့ ပြန်ပြီးဆုတ်ခွာရန် ကြိုးစားလိုက်သည်။

သို့သော်လည်း ဝိညာဉ်လက်နက်တစ်ခု၏ အမြန်နှုန်းမှာ ၎င်း ရှောင်တိမ်းနိုင်စွမ်းထက် များစွာ သာလွန်နေခဲ့သည်။ အထူးသဖြင့် လုချင်း၏ တိုက်ခိုက်မှုမှာ ရုတ်တရက် ခြုံခိုတိုက်ခိုက်လိုက်ခြင်းဖြစ်ရာ အဝါရောင်အလင်းတန်းက မြွေ မတုံ့ပြန်နိုင်မီမှာပင် ၎င်းကို ရိုက်ခတ်သွားပြီး နေရာတွင်ပင် တန့်သွားစေခဲ့၏။

"ယန်ချန်ပေ့... မြန်မြန်"

လုချင်း၏ အမိန့်ပေးသံအဆုံးတွင် ယန်က ချက်ချင်း နားလည်သွားခဲ့၏။ ထို့နောက်တွင်တော့ လုချင်း၏ လည်ပင်းမှ လီဟော်ဒယ်အိုးလေးသည် လေထဲသို့ ပျံတက်သွားပြီး ရေအိုးတစ်လုံးစာခန့် အရွယ်အစားအထိ ကြီးထွားလာကာ မြွေဆီသို့ ဆင်းသက်သွားလေတော့သည်။

မြွေ၏မျက်ဆန်များထဲတွင် ထိတ်လန့်တုန်လှုပ်မှုများ ပြည့်နှက်သွားသော်လည်း ၎င်း၏ ဝိညာဉ်မှာ လက်နက်၏ အလင်းတန်းဖြင့် ချုပ်နှောင်ခံထားရသဖြင့် မည်သည့်အရာကိုမျှ မတတ်နိုင်ခဲ့ပေ။ ဒယ်အိုးကြီးက ၎င်းကို လွှမ်းခြုံသွားပြီး အမှောင်ထုထဲသို့ ဆွဲသွင်းသွားသည်ကိုသာ ကြည့်နေနိုင်ခဲ့တော့၏။

ယန်က တောင်ပံပါမြွေကို လီဟော်ဒယ်အိုးထဲတွင် အောင်မြင်စွာ ပိတ်လှောင်နိုင်သွားပြီးနောက်၌ လုချင်းက သက်ပြင်းတစ်ချက်ချကာ ကောင်းကင်နှင့်မြေကြီး ချီအိတ်ကို ပြန်ပြီးသိမ်းဆည်းလိုက်လေသည်။

သူ ကိုယ့်ကိုကိုယ် ကံကောင်းသည်ဟု မခံစားဘဲ မနေနိုင်ခဲ့ချေ။ သူ၏ မကြာသေးမီက အဆင့်တက်ရောက်မှုသည် ချီအိတ်အပေါ် ထိန်းချုပ်နိုင်စွမ်းကို များစွာ မြှင့်တင်ပေးခဲ့သည်။ သို့မဟုတ်ပါက တောင်ပံပါမြွေကို ဖိနှိပ်ရန်မှာ ယခုထက် များစွာ ပိုမိုခက်ခဲပေလိမ့်မည်။

မည်သို့ပင်ဆိုစေ သူ၏ နတ်မျက်စိစွမ်းရည်မှ ရရှိသော အချက်အလက်များအရ မြွေ၏ ခန္ဓာကိုယ်ကြံ့ခိုင်မှုသည် ရွှေအမြုတေအဆင့် ကျင့်ကြံသူတစ်ဦးနှင့် တကယ်ပင် ယှဉ်နိုင်စွမ်း ရှိလေသည်။ အကယ်၍ ၎င်းကသာ အစွမ်းကုန် တိုက်ခိုက်လာခဲ့ပါက လုချင်းအနေဖြင့် ၎င်းကို ဖိနှိပ်နိုင်မည်ဟု ယုံကြည်ချက် အပြည့်အဝ မရှိခဲ့ပေ။

ကံကောင်းထောက်မစွာဖြင့် နတ်သားရဲများသည် ဉာဏ်ရည်ဉာဏ်သွေး ရှိကြသော်ငြားလည်း အထီးကျန်ဆန်သော လျှို့ဝှက်နယ်မြေများတွင် ကြီးပြင်းလာရသည့် သတ္တဝါများဖြစ်သဖြင့် မူလသဘာဝအရ ရိုးစင်းလွန်းလှပေသည်။ ထိုရိုးစင်းမှုကပင် သူ၏ ခြုံခိုတိုက်ခိုက်မှုကို လွယ်ကူစွာ ခံလိုက်ရခြင်းပင်။

"အံ့ဩစရာကောင်းတဲ့ သတ္တဝါကြီးပဲ။ သူ့ရဲ့ ခန္ဓာကိုယ်ကြံ့ခိုင်မှုက တကယ်ကို အံ့သြစရာကောင်းလွန်းတယ်"

ယန်၏ အာမေဍိတ်သံက လုချင်း၏ အတွေးများကို ဖြတ်တောက်သွားခဲ့၏။

"ယန်ချန်ပေ့... ဘာဖြစ်လို့လဲဗျ" လုချင်းက မေးလိုက်သည်။

"သခင်လေး ခုနက ဖမ်းလိုက်တဲ့မြွေက အရမ်းကို အစွမ်းထက်တဲ့ ခန္ဓာကိုယ်ကို ပိုင်ဆိုင်ထားတယ်။ သူက အခြေတည်အဆင့်မှာပဲ ရှိနေသေးပေမဲ့ သူ့ရဲ့ ခန္ဓာကိုယ်ကြံ့ခိုင်မှုက ရွှေအမြုတေအဆင့် နတ်သားရဲတစ်ကောင်နဲ့တောင် ယှဉ်နိုင်တယ်လေ"

ယန်၏ လေသံမှာ တကယ့်ကို အံ့အားသင့်နေပုံရလေ၏။

"ယန်ချန်ပေ့...သူ့ကို ဖိနှိပ်ထားနိုင်ပါ့မလား" လုချင်းက မေးလိုက်၏။

"စိတ်ချပါ သခင်လေး။ ဒီကောင်ရဲ့ ခွန်အားက သူ့ခန္ဓာကိုယ်မှာပဲ ရှိတာပါ။ ရွှေအမြုတေအဆင့်ကို တကယ်ရောက်နေတာမှ မဟုတ်တာ။ လီဟော်ဒယ်အိုးထဲ ဝင်သွားပြီဆိုကတည်းက သူ့အတွက် လွတ်လမ်းမရှိတော့ပါဘူး"

ယန်၏ လေသံမှာ ယုံကြည်မှုအပြည့်ဖြင့် ပြည့်နှက်နေခဲ့လေသည်။

အကယ်၍ မြွေကသာ ရွှေအမြုတေအဆင့်သို့ အမှန်တကယ် ရောက်ရှိနေခဲ့ပါက ယန်အနေဖြင့် ဤမျှလောက် ရဲရဲဝံ့ဝံ့ အာမခံရဲမည် မဟုတ်ပေ။ အကြောင်းမူကား လီဟော်ဒယ်အိုးသည် ၎င်း၏ အထွတ်အထိပ် အခြေအနေသို့ ပြန်ပြီးမရောက်ရှိသေးသောကြောင့်ပင်။

ရွှေအမြုတေအဆင့် ကျင့်ကြံသူများသည် မှော်စွမ်းအားများ၏ လျှို့ဝှက်ဆန်းကြယ်မှုများကို အသုံးပြုနိုင်ကြပြီး သူတို့၏ ခွန်အား၊ အာရုံခံနိုင်စွမ်းနှင့် နည်းစနစ်များမှာ အရည်အသွေးပိုင်းဆိုင်ရာ အပြောင်းအလဲများကို ခံစားရရှိပြီး ဖြစ်လေသည်။ သူ့လက်ရှိအခြေအနေဖြင့်တော့ ယန်မှာ ထိုကဲ့သို့သော သတ္တဝါကို ထိန်းချုပ်ရန် ရုန်းကန်ရနိုင်ပေသည်။

သို့သော်လည်း တောင်ပံပါမြွေမှာ ရွှေအမြုတေအဆင့် နည်းစနစ်များကို နားလည်သဘောပေါက်ခြင်း မရှိဘဲ ရိုင်းစိုင်းသော ခွန်အားသက်သက်သာ ရှိသူဖြစ်ရာ ၎င်းကို ပိတ်လှောင်ရန်မှာ နှိုင်းယှဉ်ချက်အားဖြင့် လွယ်ကူလှပါ၏။

"ဒါဆိုရင်လည်း တော်ပါသေးရဲ့"

လုချင်းက ခေါင်းညိတ်လိုက်ပြီး သူ၏ အာရုံကို ရေကန်ဆီသို့ ပြန်ပြီးလှည့်လိုက်တော့၏။

သို့သော် ဤတစ်ကြိမ်တွင်တော့ သူ၏ အကြည့်သည် အရောင်ငါးမျိုး ရတနာကြာပန်းပေါ်တွင်သာ မဟုတ်ဘဲ ၎င်း၏ ပတ်လည်ရှိ ရေကန်ထဲမှ တောက်ပနေသော ဝိညာဉ်အရည်များကိုပါ သေချာစွာ စူးစမ်းကြည့်ရှုလိုက်လေတော့သည်။