အခန်း (၆၆၅-၆၆၆)
Vol. 34 Ch. 665-666
အပိုင်း (၆၆၅) လင်းဝမ်၏ အသွင်ပြောင်းအစွမ်း
မကြာမီ လီယွဲ့ကျင်းက အလျင်စလို ရောက်လာသည်။
လင်းယွမ်က ချက်ချင်း လျှောက်သွားကာ မေးလိုက်သည် "ဆရာလီ... ဘယ်လိုနေလဲ"
လီယွဲ့ကျင်းက အမြန်ပြန်ဖြေသည် "ဆရာလင်း... ကျွန်တော် လာရာလမ်းတစ်လျှောက် အာရုံခံကြည့်ပြီးပါပြီ... မရန်မေက ထိုက်ယန်တောင်မှာ ရှိနေတုန်းပါပဲ... ထွက်မသွားသေးပါဘူး"
လင်းယွမ်၏ မျက်နှာက ချက်ချင်း တည်တင်းသွားပြီး "တော်တော် သတ္တိကောင်းတာပဲ... ထိုက်ယန်တောင်မှာ ဆက်နေရဲသေးတယ်ပေါ့လေ"
တင်းယန်က အေးစက်စက် ပြုံးလိုက်ရင်း "ဒီမိန်းမက အန္တရာယ်အများဆုံးနေရာက အလုံခြုံဆုံးနေရာ ဆိုတဲ့ သဘောတရားကို သေချာနားလည်ထားပုံရတယ်... သူ ထိုက်ယန်တောင်မှာ ဆက်နေရဲတာက ကျွန်မတို့ တွေးမိမှာမဟုတ်ဘူးလို့ ယုံကြည်နေလို့ပဲ"
လင်းယွမ်က "ဆရာလီ... သူတို့ ဘယ်မှာလဲ" ဟု မေးလိုက်သည်။
လီယွဲ့ကျင်းက ချက်ချင်းပင် "တောင်ထဲမှာပါ... ကျွန်တော် လမ်းပြပါ့မယ်"
လင်းယွမ်က ချက်ချင်း ဆုံးဖြတ်လိုက်သည် "လူများလို့ မကောင်းဘူး... တင်းယန်... နင် ငါနဲ့လိုက်ခဲ့... ကျန်တဲ့သူတွေ နေခဲ့ကြ"
"ဆရာလင်း... ကျွန်တော်လည်း လိုက်ခဲ့ပါ့မယ်" ထိုစဉ် ကုဖုန်းက ပြေးလာပြီး အလျင်အမြန် ပြောလိုက်သည်။
ထိုအခိုက် အဖွဲ့ထဲမှ မိန်းကလေးတစ်ဦး ထွက်လာပြီး "ဆရာလင်း... ကျွန်မလည်း လိုက်ခဲ့ပါရစေ... ကျွန်မရဲ့ အစွမ်းက အကူအညီဖြစ်နိုင်တယ်" ဟု ပြောလာသည်။
လင်းယွမ်က ထိုမိန်းကလေးကို ကြည့်လိုက်ရာ ချက်ချင်း မျက်လုံးများ အရောင်လက်သွားသည် "လင်းဝမ်"
ဤလင်းဝမ်သည် လီချင်းဟွာအဖွဲ့ထဲမှ အမဝမ်ဖြစ်ပြီး သူမ၏ အစွမ်းမှာ အသွင်ပြောင်းခြင်း ဖြစ်သည်။
သူမက မည်သူ့ပုံစံကိုမဆို အသွင်ပြောင်းနိုင်စွမ်းရှိသော်လည်း အချိန်အတော်ကြာ သူမ၏ တည်ရှိမှုကို သိပ်သတိမထားမိခဲ့ကြချေ။
သို့သော် ဤအစွမ်းက လင်းယွမ်ကိုတော့ အလွန် နက်ရှိုင်းသော မှတ်မှတ်ရရ ဖြစ်စေခဲ့သည်။
လင်းယွမ်၏ ခေါင်းထဲတွင် အစီအစဉ်တစ်ခု ချက်ချင်း ပေါ်လာသဖြင့် "ဟုတ်ပြီ... လင်းဝမ်... မင်းလည်း ငါတို့နဲ့ လိုက်ခဲ့" ဟု ချက်ချင်း ပြောလိုက်သည်။
"တကယ်လို့ အမမေကို ကယ်တင်တဲ့နေရာမှာ အခက်အခဲရှိလာရင် မင်းရဲ့ အကူအညီ လိုကောင်း လိုလာနိုင်တယ်"
လင်းဝမ်က ပြုံးလိုက်ပြီး "ဟုတ်ကဲ့ပါရှင်" ဟု ဖြေလိုက်သည်။
ထို့နောက် လင်းယွမ်က တင်းယန်၊ ကုဖုန်း၊ လင်းဝမ်တို့ကို ခေါ်ကာ လီယွဲ့ကျင်းနောက်မှ တောင်ထဲသို့ အလျင်အမြန် ပျံသန်းသွားလေတော့သည်။
လမ်းတစ်လျှောက် အမြန်သွားပြီးနောက် မကြာမီ လီယွဲ့ကျင်းက ရပ်တန့်လိုက်ပြီး ပတ်ဝန်းကျင်ရှိ သစ်တောကို ကြည့်လိုက်သည်။
သူက မျက်မှောင်ကြုတ်လိုက်ပြီး "ဒီနေရာမှာပဲ... ထူးဆန်းတယ်... ဘာလို့ လူသူအရိပ်အယောင် မတွေ့ရတာလဲ"
လီယွဲ့ကျင်းက ရန်မေ၏ ကိုယ်ပေါ်ရှိ စိတ်ဝိညာဉ်အမှတ်အသားသည် သူတို့ရှေ့တည့်တည့်၌ ရှိနေကြောင်း အာရုံခံမိနေသည်။
သို့သော် သူတို့ရှေ့ရှိ မြင်ကွင်းကတော့ သာမန် ဆီးနှင်းများဖုံးလွှမ်းနေသော တောင်ပေါ်သစ်တောတစ်ခုသာ ဖြစ်ပြီး လူသူအရိပ်အယောင် လုံးဝ မရှိပေ။
လင်းယွမ်၏ မျက်လုံးများက အနည်းငယ် အရောင်လက်သွားပြီး ချက်ချင်းပင် စိတ်စွမ်းအင်များကို ဖြန့်ကြက်ကာ အရပ်မျက်နှာ အနှံ့အပြားကို စစ်ဆေးကြည့်လိုက်သည်။
သို့သော် ပတ်ဝန်းကျင် ရှုခင်းများက မည်သို့မျှ ပြောင်းလဲသွားခြင်း မရှိဘဲ ဆီးနှင်းများနှင့် သစ်ပင်များကိုသာ တွေ့နေရဆဲဖြစ်သည်။
လင်းယွမ်က အနည်းငယ် စဉ်းစားလိုက်ပြီး "စိတ်ဝိညာဉ်အမှတ်အသားက ဒီနေရာမှာဆိုတာ သေချာရဲ့လား" ဟု မေးလိုက်သည်။
လီယွဲ့ကျင်းက ခေါင်းညိတ်လိုက်ပြီး "ကျွန်တော် သေချာတယ်... ပြီးတော့ ကျွန်တော်နဲ့ အကွာအဝေးက ပေ ၃၃၀ ထက် မပိုနိုင်ဘူး"
"ထူးဆန်းတယ်... ဒီပတ်ဝန်းကျင် ပေ ၃၃၀ အတွင်းမှာ ဘာခြေရာလက်ရာမှ မရှိပါဘူး" ကုဖုန်းက ကြိုတင်၍ မီးခိုးငွေ့များ ထုတ်လွှတ်ထားပြီး ဖြစ်သည်။
လန်ယွဲ့ဟွာ၏ လူများက သူတို့ရှိနေသည်ကို သတိမထားမိစေရန် ပေ ၃၃၀ ပတ်လည်အတွင်း မြူခိုးများဖြင့် ဖုံးလွှမ်းထားလိုက်သည်။
တင်းယန်ကလည်း မျက်မှောင်ကြုတ်ကာ "ဒီလန်ယွဲ့ဟွာ လက်အောက်မှာ ကိုယ်ပျောက်အစွမ်းပိုင်ရှင် တစ်ယောက်ရှိတယ်... ဧရိယာအလိုက် ကိုယ်ဖျောက်ပေးနိုင်တာများလား"
"ဧရိယာအလိုက် ကိုယ်ဖျောက်တာ" ကုဖုန်းက သံသယဖြစ်သွားသည်။
"စိတ်စွမ်းအင် လွှမ်းခြုံထားနိုင်တဲ့ အတိုင်းအတာအတွင်းမှာ သတ်မှတ်ဧရိယာထဲက အရာဝတ္ထုတွေကို ကိုယ်ဖျောက်ပေးနိုင်တာမျိုးလေ" ဟု တင်းယန်က ပြောသည်။
"အဲ့ဒီလို အစွမ်းမျိုး ရှိနိုင်ပါ့မလား" လင်းဝမ်က အံ့ဩစွာ မေးလိုက်သည်။
တင်းယန်က ခေါင်းခါလိုက်ပြီး "ငါလည်း မသေချာဘူး... ဒါပေမဲ့ အစွမ်းပိုင်ရှင်တွေရဲ့ စွမ်းရည်တွေက ထူးဆန်းအံ့ဩဖွယ်ကောင်းလွန်းတော့ ဘာမဆို ဖြစ်နိုင်တယ်"
လင်းယွမ်က အသံကိုနှိမ့်ကာ "မဖြစ်နိုင်လောက်ဘူး... ပေ ၃၃၀ အတွင်းမှာ ကိုယ်ဖျောက်ထားရင်တောင် တစ်ဖက်လူရဲ့ နှလုံးခုန်သံနဲ့ အသက်ရှူသံကို ငါ သေချာပေါက် အာရုံခံနိုင်တယ်"
"ဒါပေမဲ့ ဒီအနီးအနား ပေ ၃၃၀ ပတ်လည်မှာ ဘာသက်ရှိမှ မရှိဘူး"
"ဘယ်လိုဖြစ်ရတာလဲ... ဒီလူတွေက မိုးပေါ်ပျံပြီး မြေကြီးထဲများ ဝင်သွားကြတာလား" လီယွဲ့ကျင်းက မနေနိုင်ဘဲ ပြောလိုက်သည်။
လီယွဲ့ကျင်း၏ စကားကြောင့် လင်းယွမ်၏ ရင်ထဲတွင် ချက်ချင်း ဒိတ်ခနဲ ဖြစ်သွားသည်။
"မင်း ဘာပြောလိုက်တယ်"
"ဗျာ... သူတို့တွေ မိုးပေါ်ပျံပြီး မြေကြီးထဲများ ဝင်သွားကြတာလားလို့ ပြောလိုက်တာပါ" လီယွဲ့ကျင်းက ခါးသီးစွာ ပြုံးရင်း ဖြေသည်။
လင်းယွမ်က ကောင်းကင်သို့ ချက်ချင်း ကြည့်လိုက်သည်။
ကောင်းကင်ယံတွင် ဖြူလွှလွှ ဆီးနှင်းများ ဖုံးလွှမ်းနေပြီး ငန်းမွေးကဲ့သို့ ကြီးမားသော နှင်းပွင့်ကြီးများက ဆက်တိုက် ကျဆင်းနေသည်။
မည်းမှောင်အုပ်ဆိုင်းနေသော ထိုကောင်းကင်ယံ၌ မိုးကြိုးထစ်ချုန်းသံများကို သဲ့သဲ့ ကြားနေရသည်။
ကောင်းကင်ပေါ်တွင် လူပုန်းအောင်းနေရန် လုံးဝ မဖြစ်နိုင်ပေ။
ဒါဆိုရင်တော့...
လင်းယွမ်က ခြေအောက်ရှိ ဆီးနှင်းပုံများကို ကြည့်လိုက်သည်။
"မြေအောက်ထဲမှာလား"
လင်းယွမ် ခေါင်းငုံ့သွားသည်ကို မြင်သောအခါ တင်းယန်ကလည်း လင်းယွမ်၏ ဆိုလိုရင်းကို ချက်ချင်း သဘောပေါက်သွားပြီး မျက်လုံးများ အရောင်လက်သွားကာ အလျင်အမြန် မေးလိုက်သည်။
လင်းယွမ်၏ မျက်လုံးများက အရောင်လက်သွားပြီး "အောက်ဆင်းကြည့်လိုက်ရင် သိရမှာပေါ့" ဟု ပြောလိုက်သည်။
ပြောပြီးသည်နှင့် လင်းယွမ်က လက်တစ်ချက် ဝှေ့ယမ်းလိုက်ရာ "ဝှစ်" ဟူသော အသံနှင့်အတူ လူအားလုံးသည် သူ၏ သုမာရု ဟင်းလင်းပြင် လက်စွပ်ထဲသို့ တိုက်ရိုက် ဆွဲသွင်းခံလိုက်ရသည်။
ထို့နောက် သူက မြေလျှိုးအစွမ်းကို အသုံးပြုကာ မြေအောက်သို့ ချက်ချင်း တိုးဝင်သွားတော့သည်။
သူ အောက်ဘက်သို့ ဆက်တိုက် ဆင်းသက်သွားရာ ပေ ၁၀၀ ခန့် အရောက်တွင် အောက်ဘက်၌ မကြီးမငယ် ဟင်းလင်းပြင် နေရာတစ်ခု ရှိနေကြောင်း ရုတ်တရက် ခံစားလိုက်ရသည်။
လင်းယွမ်က စိတ်လှုပ်ရှားသွားပြီး ထိုမြေအောက်နေရာဆီသို့ အသံတိတ် ချဉ်းကပ်သွားလိုက်သည်။
"ဝှစ်"
သူ့ခန္ဓာကိုယ်က စိုစွတ်နေသော ရွှံ့နွံများထဲမှနေ၍ တိုးထွက်လာသည်။
လင်းယွမ်က ပတ်ဝန်းကျင်ရှိ မြေကြီးများကို ကြည့်လိုက်ပြီး "မြေသားတွေက လတ်ဆတ်နေတယ်... မကြာသေးခင်ကမှ တူးထားပုံရတယ်" ဟု ပြောလိုက်သည်။
သူက ဘယ်ညာ ဝဲယာသို့ ကြည့်လိုက်ရာ ဤနေရာမှာ ဝင်ပေါက်ထွက်ပေါက် မရှိသော ရှည်လျားကျဉ်းမြောင်းသည့် လိုဏ်ဂူတစ်ခု ဖြစ်ပြီး ရိုးရှင်းသည့် မြေအောက်ဂူတစ်ခုသာ ဖြစ်ကြောင်း တွေ့ရသည်။
မြေဓာတ်အစွမ်းပိုင်ရှင် တစ်ဦးဦးက မြေလျှိုးအစွမ်းဖြင့် ဤနေရာသို့ ဝင်ရောက်လာပြီးနောက် ဖန်တီးထားသည့် ဟင်းလင်းပြင် နေရာတစ်ခုနှင့် တူနေသည်။
လင်းယွမ်က အတွင်းသို့ အလျင်အမြန် လျှောက်သွားလိုက်ရာ ခြေလှမ်းအနည်းငယ်မျှ လျှောက်ရုံဖြင့် အတွင်းမှ အသံနှစ်သံ ထွက်ပေါ်လာသည်ကို ကြားလိုက်ရသည်။
"အမကျန်း... ကျွန်မတို့ ဒီမှာ ဘယ်လောက်ကြာကြာ ဆက်စောင့်နေရဦးမှာလဲ... ခေါင်းဆောင်က ဆုတ်ခွာသွားလောက်ပြီ မဟုတ်လား" ဟု ငယ်ရွယ်သော မိန်းကလေးတစ်ဦး၏ အသံ ထွက်ပေါ်လာသည်။
ထိုစဉ် အခြားအသံတစ်သံ ထွက်ပေါ်လာပြီး "ကောင်မလေးချန်... နင်က ခေါင်းဆောင်ကိုတောင် သံသယဝင်ရဲနေပြီလား... မမေ့နဲ့နော်... ခေါင်းဆောင်သာ မရှိရင် နင် အခုချိန်ထိ လှောင်ချိုင့်ထဲမှာပဲ ရှိနေဦးမှာ... ဟိုခွေးယောက်ျားတွေ လာဝယ်မယ့်အချိန်ကို စောင့်နေရမှာ"
"ခေါင်းဆောင် ပြောခဲ့တဲ့စကားတွေကို နင် မေ့သွားပြီလား... ငါတို့ မိန်းမတွေက ကိုယ့်ကိုယ်ကိုယ် ကူညီမှသာ ထွက်ပေါက်ရှိမှာ"
"အဲ့ဒီ ယောက်ျားတွေက တစ်ယောက်မှ အားကိုးလို့ မရဘူး"
"နင်က ကံကောင်းလို့ ခေါင်းဆောင် ကယ်လာတဲ့အချိန်မှာ ဘာအနှောင့်အယှက်မှ မခံရတာ... ဒါပေမဲ့ အဲ့ဒီခွေးကောင် ယောက်ျားတွေကိုတော့ လုံးဝ သွားမယုံနဲ့"
"မှတ်ထား... ယောက်ျားမှန်ရင် ဘယ်ကောင်မှ မကောင်းဘူး"
ချန်ကောင်မလေးက မနေနိုင်ဘဲ "ဒါပေမဲ့ ကျွန်မအဖေနဲ့ ကျွန်မအစ်ကိုတို့လည်း ယောက်ျားတွေပဲလေ... သူတို့က ကျွန်မအပေါ် အရမ်းကောင်းကြတာ" ဟု ပြောလိုက်သည်။
အမကျန်းမှာ စကားစပျောက်သွားပြီးနောက် ချက်ချင်း ဒေါသတကြီးဖြင့် "နင့်ကို အဲ့ဒီမိန်းမကို စောင့်ကြည့်ခိုင်းထားတာ... ဘာလို့ ဒီမှာ လာပြီး ငါနဲ့ စကားလာများနေရတာလဲ"
"အဲ့ဒီမိန်းမ အခု ဘယ်လိုနေလဲ"
"အိပ်နေပါတယ် အမကျန်း... သူက ကိုယ်ဝန်ဆောင်ကြီး မဟုတ်လား... သူ ကိုယ်ဝန်ရှိနေပြီထင်တယ်... ကျွန်မတို့ မိန်းမအချင်းချင်း ကူညီရမယ်လို့ ပြောထားတာ မဟုတ်ဘူးလား... ဘာလို့ သူ့ကို ဖမ်းထားရတာလဲ... သူ့ဗိုက်ထဲမှာ ကလေးလေး ရှိနေသေးတယ်လေ"
အမကျန်းက အေးစက်စက် ပြုံးလိုက်ပြီး "သူ့ဗိုက်ထဲမှာ လွယ်ထားတာက ခေါင်းဆောင်ကို ထိခိုက်အောင်လုပ်ခဲ့တဲ့ လူရဲ့ မျိုးမစစ်လေးပဲ"
ချန်ကောင်မလေးက အနည်းငယ် တုံ့ဆိုင်းသွားပြီး "ဒါဆို ကျွန်မတို့က ခေါင်းဆောင်ကို ထိခိုက်အောင်လုပ်ခဲ့တဲ့ အဲ့ဒီလူဆိုးကိုပဲ သွားရှာရင် မရဘူးလား" ဟု မေးလိုက်သည်။
အမကျန်းမှာ ဆွံ့အသွားပြီး "ခေါင်းဆောင်က သွားရှာနေပြီလေ... ဒီမိန်းမ ငါတို့လက်ထဲမှာ ရှိနေတာက ငါတို့ရဲ့ လျှို့ဝှက်ဖဲချပ်ပဲ... သေချာပေါက် သုံးဖို့တော့ မလိုဘူး... ဒါပေမဲ့ အရေးကြီးတဲ့အချိန်ကျရင် အံ့ဩစရာကောင်းတဲ့ အာနိသင် ရှိလာနိုင်တယ်"
သူတို့နှစ်ယောက် ပြောသမျှ စကားအားလုံးကို အပြင်ဘက်ရှိ လင်းယွမ်က ရှင်းရှင်းလင်းလင်း ကြားနေရသည်။
ဤနေရာသို့ ရောက်သောအခါ သူ သက်ပြင်းတစ်ချက် ချလိုက်မိသည်။ ရန်မေမှာ ဘာထိခိုက်ဒဏ်ရာမှ မရထားပုံပေါ်သည်။
သူကိုယ်တိုင် တိုက်ရိုက် ဝင်ရောက် တိုက်ခိုက်လိုက်ပါက ထိုလူများကို ရန်စလိုက်သလို ဖြစ်သွားမည်ကို လင်းယွမ် စိုးရိမ်မိကာ စဉ်းစားလိုက်သည်။
ထို့နောက် မျက်လုံးများ အနည်းငယ် အရောင်လက်သွားကာ ဘေးနားရှိ လင်းဝမ်ကို ကြည့်ပြီး တိုးတိုးလေး မေးလိုက်သည် "မင်း လန်ယွဲ့ဟွာရဲ့ ပုံစံကို ပြောင်းနိုင်မလား"
"ကျွန်မ အဲ့ဒီမိန်းမကို မမြင်ဖူးဘူးရှင်" လင်းဝမ်က အနည်းငယ် အခက်တွေ့သွားသည်။
တစ်ဖက်လူကို မြင်ဖူးမှသာ သူမက အသွင်ပြောင်းနိုင်မည် ဖြစ်သည်။
လင်းယွမ်က စဉ်းစားလိုက်ပြီး တိုးတိုးလေး ပြောသည် "မင်းရဲ့ စိတ်ကို လျှော့ထားလိုက်... ငါ စိတ်စွမ်းအင်သုံးပြီး စိတ်ကူးယဉ်ကမ္ဘာတစ်ခု ဖန်တီးမယ်... အဲ့ဒီထဲမှာ လန်ယွဲ့ဟွာရဲ့ ပုံစံကို ပုံဖော်ပေးမယ်... မင်း သေချာလေ့လာပြီး တုပကြည့်လိုက်"
လင်းဝမ်က ထိုစကားကို ကြားသောအခါ ခေါင်းညိတ်လိုက်ပြီး "ဟုတ်ကဲ့ပါရှင်" ဟု ပြောလိုက်သည်။
ထို့နောက် လင်းယွမ်က လိပ်ဝိညာဉ် ပုံရိပ်ယောင်မြွေ မျိုးရိုးဗီဇမျိုးစေ့၏ ပင်ကိုယ်အစွမ်းကို အသုံးပြုကာ စိတ်ဝိညာဉ် လှိုင်းများ ထုတ်လွှတ်ပြီး စိတ်ကူးယဉ်ကမ္ဘာတစ်ခုကို ချက်ချင်း ဖန်တီးလိုက်သည်။
လင်းဝမ်၏ စိတ်ဝိညာဉ်ကို ထိုစိတ်ကူးယဉ်ကမ္ဘာထဲသို့ ခေါ်ဆောင်သွားပြီးနောက် မကြာမီ လင်းဝမ်၏ မျက်နှာက စတင် ဝေဝါးလာပြီး စိတ်ကူးယဉ်ကမ္ဘာထဲရှိ လန်ယွဲ့ဟွာကို အလျင်အမြန် လိုက်လံတုပကာ ပြောင်းလဲလာတော့သည်။
မကြာမီ လူအားလုံး၏ မျက်စိရှေ့တွင် သူစိမ်းမိန်းမတစ်ဦး၏ မျက်နှာတစ်ခု ပေါ်လာသည်။
ထိုမိန်းမက မလှပဘဲ ယောက်ျားဆန်ဆန် ရှိကာ မျက်ခုံးများကြားတွင် အနည်းငယ် ရက်စက်ကြမ်းကြုတ်သည့် အသွင်အပြင် ရှိနေသည်။
ဤသည်မှာ လင်းယွမ်၏ မှတ်ဉာဏ်ထဲရှိ လန်ယွဲ့ဟွာ၏ ပုံစံပင် ဖြစ်သည်။
မကြာမီ လင်းဝမ်က မျက်လုံးဖွင့်လာပြီး လင်းယွမ်ကို ကြည့်ကာ မေးလိုက်သည် "သူ့အသံက ဘယ်လိုမျိုးလဲရှင်"
လင်းယွမ်က ပြန်ဖြေသည် "အနည်းငယ် အက်ရှရှနဲ့ ယောက်ျားသံနည်းနည်း ပါတယ်"
စကားပြောနေစဉ်မှာပင် လင်းဝမ်က အသံကြိုးများကို ပြောင်းလဲလိုက်ရာ သူမ၏ အသံက တဖြည်းဖြည်း ယောက်ျားသံ ပိုပေါက်လာသည်။
"ကြည့်ပါဦး... သိပ်မတူတဲ့ နေရာများ ရှိသေးလားရှင်" ဟု လင်းဝမ်က မေးလိုက်သည်။
လင်းယွမ်က ကြည့်ရင်း ခေါင်းကို ဆက်တိုက် ညိတ်ကာ ပြောလိုက်သည် "အရမ်းကောင်းတယ်... တော်တော်တူတယ်... မျက်လုံးအကြည့်ကို နည်းနည်း ပိုကြမ်းကြုတ်အောင် လုပ်လိုက်"
"နောက်ပြီး ဆံပင်... သူက ဆံပင်အတိုနဲ့"
လင်းဝမ်က ခေါင်းညိတ်လိုက်ရာ သူမ၏ အကြည့်များက တဖြည်းဖြည်း ရက်စက်ကြမ်းကြုတ်လာပြီး တစ်ချိန်တည်းမှာပင် ဆံပင်များကလည်း အလိုအလျောက် တိုဝင်သွားသည်။
ဤအသွင်ပြောင်းအစွမ်းက တကယ်ကို ထူးဆန်းလှပေသည်။ ဆံပင်အရှည်အတိုကိုပင် ပြောင်းလဲနိုင်စွမ်း ရှိနေသည်။
"အခုရော"
"မဆိုးဘူး... တော်တော်တူသွားပြီ... အတုမှန်း မသိနိုင်လောက်အောင်ကို တူသွားပြီ"
လင်းယွမ်က ဆက်တိုက် ခေါင်းညိတ်နေပြီး တော်တော်လေး သဘောကျသွားသည်။
လင်းဝမ်က ချက်ချင်း ပြောလိုက်သည် "ဒါဆို ကျွန်မ သွားလိုက်မယ်... သူတို့ကို လှည့်စားပြီး ရန်မေကို ခေါ်ထုတ်လာလို့ရမရ စမ်းကြည့်လိုက်မယ်"
လင်းယွမ်က စဉ်းစားလိုက်ပြီး သူ၏ လက်ပေါ်ရှိ လက်စွပ်ကို ချွတ်ကာ လင်းဝမ်ကို ကမ်းပေးလိုက်သည်။
"ဒါက သုမာရု ဟင်းလင်းပြင် လက်စွပ်ပဲ... မင်း ရန်မေကို ထိလိုက်တာနဲ့ ချက်ချင်း သူ့ကိုခေါ်ပြီး သုမာရု ဟင်းလင်းပြင်ထဲ ဝင်ပုန်းလိုက်... ကျန်တာတွေ ဘာမှ ဂရုစိုက်နေစရာ မလိုဘူး"
လင်းဝမ်က ခေါင်းညိတ်ပြုံးလိုက်ပြီး "မလိုပါဘူး... ကျွန်မဆီမှာ ရှိပါတယ်"
သူမက ညာလက်ကို မြှောက်ပြလိုက်ရာ သူမ၏ လက်သူကြွယ်တွင် သုမာရု ဟင်းလင်းပြင် လက်စွပ်တစ်ကွင်းကို ဝတ်ဆင်ထားသည်ကို တွေ့လိုက်ရသည်။
လီချင်းဟွာက လင်းယွမ်၏ ဟင်းလင်းပြင်အစွမ်း ကျွမ်းကျင်မှု မည်မျှအထိ အစွမ်းထက်ကြောင်း သူမအား တစ်ကြိမ်မက ပြောပြဖူးသည်။
သုမာရု ဟင်းလင်းပြင် လက်စွပ်များကို လင်းယွမ်က အများအပြား ဖန်တီးထားခဲ့ပြီး ယုံကြည်ရသော လက်အောက်ငယ်သားများ၏ လက်ထဲတွင်လည်း တစ်ကွင်းစီ ရှိကြသည်။
လီချင်းဟွာက သူ၏ ကိုယ်ပိုင်လက်စွပ်ကို လင်းဝမ်အား လက်ဆောင်အဖြစ် ပေးထားပြီး ဖြစ်သည်။
လင်းယွမ်က ထိုလက်စွပ်ကို မြင်သောအခါ မနေနိုင်ဘဲ ပြုံးလိုက်မိသည်။
ကြည့်ရသည်မှာ လီချင်းဟွာ၏ ရင်ထဲတွင် ဤအမဝမ်၏ နေရာက တော်တော်ကြီးမားပုံရသည်။ ဤမျှ အရေးကြီးသော ပစ္စည်းကိုပင် သူမအား ပေးထားခဲ့သည်။
ဤလက်စွပ်နှင့် လင်းဝမ်၏ အသွင်ပြောင်းအစွမ်းတို့ ပေါင်းစပ်လိုက်လျှင် သူမ၏ ရှင်သန်နိုင်စွမ်းက အများကြီး မြင့်တက်သွားပြီဟု ပြောနိုင်ပေသည်။
"မင်းမှာ ဘာအစီအစဉ် ရှိလဲ" ဟု လင်းယွမ်က မေးလိုက်သည်။
လင်းဝမ်က ပြုံးလိုက်ပြီး သုမာရု ဟင်းလင်းပြင် လက်စွပ်ထဲမှ သွေးများ ပေကျံနေသော အဝတ်အစားတစ်စုံကို ထုတ်ယူကာ ခန္ဓာကိုယ်တွင် ဝတ်ဆင်လိုက်သည်။
တစ်ချိန်တည်းမှာပင် ဆံပင်များကို အနည်းငယ် ရှုပ်ပွသွားအောင် လုပ်လိုက်ပြီး အကြည့်များကိုလည်း ကြမ်းကြုတ်သွားစေသည်။
ထို့နောက် သူမက "ထိုက်ယန်တောင်က အသုံးမကျတဲ့ကောင်တွေကို အခုလေးတင် သတ်လာခဲ့တယ်... ငါ အခုသွားပြီး အရေးပေါ် နေရာပြောင်းမယ်... ဘယ်လိုထင်လဲ" ဟု ပြောလိုက်သည်။
လင်းယွမ်က ချက်ချင်း ရယ်မောလိုက်ပြီး လက်မထောင်ပြကာ "အကြောင်းပြချက်ကောင်းပဲ" ဟု ပြောလိုက်သည်။
လင်းဝမ်၏ သရုပ်ဆောင်စွမ်းရည်က တကယ်ကို အံ့မခန်းပင်။ ဤအသွင်ပြောင်းအစွမ်းနှင့် ပေါင်းစပ်လိုက်လျှင် ပြီးပြည့်စုံသွားပေသည်။
ထို့နောက် လူအားလုံး အသင့်ပြင်လိုက်ကြပြီး လင်းယွမ်က မြေအောက်မှနေ၍ မြေလျှိုးအစွမ်းဖြင့် လင်းဝမ်နောက်သို့ လိုက်သွားကာ တင်းယန်တို့ လူစုက အပြင်ဘက်မှ ပိတ်ဆို့ထားလိုက်သည်။
လူအားလုံး ချက်ချင်း စတင် လှုပ်ရှားလိုက်ကြပြီး လင်းဝမ်က အေးစက်တည်တင်းသော မျက်နှာထားဖြင့် ဂူပေါက်ဝဆီသို့ ခပ်မြန်မြန် လျှောက်သွားလိုက်သည်။
"ဘယ်သူလဲ"
တံခါးဝသို့ ရောက်သည်နှင့် ထိုနေရာ၌ အလင်းတန်းတစ်ခု ချက်ချင်း လက်ခနဲဖြစ်သွားပြီး စွမ်းအင် အကာအရံတစ်ခုက လင်းဝမ် ရှေ့ဆက်သွားမည့် ခြေလှမ်းကို တားဆီးလိုက်သည်။
လင်းဝမ်က မျက်နှာထား မပြောင်းလဲဘဲ "ငါပါ" ဟု ပြန်ဖြေလိုက်သည်။
ထိုအခါ ချိုးကွေ့နေသော နေရာမှ လူလတ်ပိုင်းအရွယ် အမျိုးသမီးတစ်ဦးနှင့် မိန်းကလေးတစ်ဦး ထွက်လာသည်ကို တွေ့လိုက်ရသည်။
ထိုမိန်းကလေးက လင်းဝမ်ကို မြင်သည်နှင့် ချက်ချင်းပင် အလျင်အမြန် ပြောလိုက်သည် "ခေါင်းဆောင် ပြန်လာပြီ"
လူလတ်ပိုင်းအရွယ် အမျိုးသမီးကလည်း ချက်ချင်းပင် "ခေါင်းဆောင်" ဟု နှုတ်ဆက်လိုက်သည်။
သူမက လက်နှစ်ဖက်ကို အလျင်အမြန် ဝှေ့ယမ်းလိုက်ရာ ရှေ့ရှိ စွမ်းအင်အကာအရံက ချက်ချင်း ပျောက်ကွယ်သွားသည်။
လင်းဝမ်က ခြေလှမ်းကျဲကြီးများဖြင့် အတွင်းသို့ ဝင်သွားပြီး "အမကျန်း... အဲ့ဒီမိန်းမ အဆင်ပြေရဲ့လား" ဟု မေးလိုက်သည်။
ဆက်ရန်...
အပိုင်း(၆၆၆) မီးဓာတ် မျိုးရိုးဗီဇမျိုးစေ့ကို စုစည်းခြင်း
အမကျန်း ကြောင်သွားပြီး လန်ယွဲ့ဟွာက သူ့ကို ဤကဲ့သို့ ခေါ်လိုက်သည်မှာ ပထမဆုံးအကြိမ်ဖြစ်ပုံရသည်။
သူမက သံသယဝင်သွားကာ "အားလုံး ပုံမှန်ပါပဲ" ဟု ပြန်ဖြေလိုက်သည်။
ကောင်မလေးချန်က "ကျွန်မ ရှင်တို့ကို ခေါ်သွားပေးပါ့မယ်" ဟု အလျင်အမြန် ပြောလိုက်သည်။
ပြောရင်းဆိုရင်း သူမက ရှေ့မှနေ၍ လျင်မြန်စွာ လမ်းပြခေါ်ဆောင်သွားတော့သည်။
လင်းဝမ်က အမူအရာမပျက်ဘဲ နောက်မှ တိတ်တဆိတ် လိုက်ပါသွားရင်း ပတ်ဝန်းကျင် အခြေအနေကို အကဲခတ်နေသည်။
ထိုစဉ် အမကျန်းက "အဖွဲ့ခေါင်းဆောင်... ရှင့်ဆံပင်တွေ ဘယ်လိုဖြစ်လို့ တိုသွားတာလဲ" ဟု ရုတ်တရက် မေးလိုက်သည်။
လင်းဝမ် ရင်ထိတ်သွားသော်လည်း မျက်နှာအမူအရာက တည်ငြိမ်နေဆဲဖြစ်ကာ "ထိုက်ယန်တောင်က အစွမ်းပိုင်ရှင် တချို့နဲ့ တိုက်ခိုက်ရင်း မတော်တဆ ဆံပင်ကို မီးဟပ်သွားတာပါ... ဘာမှမဖြစ်ပါဘူး" ဟု ပြန်ဖြေလိုက်သည်။
မြေအောက်မှ လင်းယွမ်က လင်းဝမ်၏ ကျွမ်းကျင်ပိုင်နိုင်သော အဖြေစကားကို ကြားလိုက်ရသဖြင့် သက်ပြင်းတစ်ချက် ချလိုက်မိသည်။
အမကျန်းက အံ့သြသွားကာ "ထိုက်ယန်တောင်မှာ ရှင့်ကို ထိခိုက်အောင် လုပ်နိုင်တဲ့သူ ရှိသေးလို့လား"
လင်းဝမ်က "ရန်သူကို အထင်မသေးနဲ့... အဲ့ဒါက ကိုယ့်ကိုယ်ကိုယ် တာဝန်အကင်းမဲ့ဆုံး လုပ်ရပ်ပဲ" ဟု ပြောလိုက်သည်။
အမကျန်းက အလျင်အမြန် ခေါင်းညိတ်ကာ "ဟုတ်ကဲ့ပါ" ဟု ပြောလိုက်သည်။
မကြာမီမှာပင် သူတို့တစ်တွေ ဘေးဘက်ရှိ လိုဏ်ဂူခန်းမထဲသို့ ရောက်ရှိသွားကြသည်။
မြေလိုဏ်ဂူထဲတွင် ရန်မေက နံရံကိုမှီရင်း မျက်စိမှိတ် အနားယူနေသည်။
လှုပ်ရှားသံများကို ကြားလိုက်ရသောအခါ သူမက ခေါင်းမော့ကာ မျက်လုံးများကို ဖွင့်လိုက်ပြီး လန်ယွဲ့ဟွာအား လှမ်းကြည့်လိုက်သည်။
သူမက ဖောင်းမို့နေပြီဖြစ်သော ဗိုက်ကလေးကို အလိုအလျောက် ပွတ်သပ်လိုက်ရင်း "မလန်... ကျွန်မတို့အားလုံးက အိမ်နီးချင်းတွေပါ... အရင်တုန်းက ရပ်ကွက်တစ်ခုတည်းမှာ အတူနေခဲ့ကြတဲ့သူတွေချည်းပဲကို အခုလိုမျိုး ဖြစ်အောင်လုပ်ဖို့ တကယ်ပဲ လိုအပ်လို့လား" ဟု မေးလိုက်သည်။
လန်ယွဲ့ဟွာ ၏ မျက်ဝန်းများက တစ်ချက်မျှ တောက်ပသွားပြီးနောက် ချက်ချင်းပင် လှောင်ပြုံးပြုံးလိုက်ကာ "အိမ်နီးချင်း ဟုတ်လား... အရင်တုန်းက လင်းဆိုတဲ့ကောင် ငါ့ကို သတ်ဖို့ ကြိုးစားတုန်းကရော ငါတို့က အိမ်နီးချင်းတွေဆိုတာကို သူ တွေးမိခဲ့လို့လား" ဟု ပြန်ပြောလိုက်သည်။
ရန်မေက မနေနိုင်ဘဲ "မောင်လေးက အပြစ်ကင်းတဲ့သူတွေကို အကြောင်းမဲ့ သတ်မယ့်သူမျိုး လုံးဝ မဟုတ်ဘူး... ရှင်ကပဲ သူ့ကို အရင်သွားစပြီး ပြဿနာရှာလို့ ဖြစ်မှာပါ" ဟု ကာကွယ်ပြောဆိုလိုက်သည်။
"ဟက်"
လန်ယွဲ့ဟွာ က အေးစက်စက် ပြုံးလိုက်ပြီး ဘေးနားရှိ အမကျန်းအား "နေရာပြောင်းကြစို့... ထိုက်ယန်တောင်က လူတွေ ငါ့ခြေရာကို တွေ့သွားကြပြီဆိုတော့ ဒီမှာ ဆက်နေလို့ မဖြစ်တော့ဘူး" ဟု ပြောလိုက်သည်။
အမကျန်းက အလျင်အမြန် ခေါင်းညိတ်လိုက်ပြီး ရှေ့သို့ တိုးလာကာ ရန်မေကို ဖမ်းဆွဲရန် လက်လှမ်းလိုက်သည်။
လင်းဝမ်၏ အကြည့်က ရန်မေ၏ လည်ပင်းဆီသို့ ရောက်သွားသောအခါ သူမ၏ မျက်နှာအမူအရာက ချက်ချင်းဆိုသလို အနည်းငယ် ပြောင်းလဲသွားသည်။
အကြောင်းမှာ ရန်မေ၏ လည်ပင်းတွင် ထူးခြားသော လည်ပတ်တစ်ခုကို စွပ်ထားသောကြောင့် ဖြစ်သည်။
ထိုလည်ပတ်ပေါ်တွင် သင်္ကေတများ တလက်လက် တောက်ပနေသည်မှာ သိသာထင်ရှားလှသည်။
လင်းဝမ်အနေဖြင့် ဤလည်ပတ်က မည်သို့သော အသုံးဝင်မှုမျိုး ရှိသည်ကို မသိသော်လည်း ယခုအချိန်တွင် နှုတ်ဖွင့်မေးမြန်းရန် အဆင်မပြေပေ။
သူမက အမူအရာမပျက်ဘဲ "ကောင်မလေးချန်... နင် သွားကူလိုက်ဦး" ဟု အမိန့်ပေးလိုက်သည်။
ကောင်မလေးချန်က အနည်းငယ် ကြောင်သွားသော်လည်း အမကျန်းအနားသို့ အလျင်အမြန် သွားရောက်ကာ ရန်မေကို လွှဲပြောင်းထိန်းကိုင်လိုက်သည်။
ရန်မေ၏ ခြေလှမ်းများက ယိုင်နဲ့နေပြီး သူမ၏ သန္ဓေပြောင်းစွမ်းအင်များ အားလုံးကို ဆုံးရှုံးသွားသည့်အလား ဖြစ်နေသည်။
လင်းဝမ်က ဤလည်ပတ်သည် စွမ်းအင်များကို ချိတ်ပိတ်ထားနိုင်သော သင်္ကေတလည်ပတ်များ ဖြစ်နိုင်လောက်သည်ဟု သံသယဝင်မိသည်။
သူမက ရှေ့သို့တိုးသွားကာ အေးစက်စက် လှောင်ပြုံး ပြုံးဟန်ဆောင်ရင်း ရန်မေ၏ မေးစေ့ကို လှမ်းကိုင်လိုက်သည်။
ရန်မေက အလိုအလျောက် ရှောင်တိမ်းရန် ကြိုးစားလိုက်သော်လည်း နောက်တစ်စက္ကန့်တွင်တော့ လင်းဝမ်၏ လက်ထဲသို့ သူမ၏ မေးစေ့ ရောက်သွားခဲ့သည်။
လင်းဝမ်က လှောင်ပြုံးပြုံးကာ "လင်းဆိုတဲ့ကောင်က နင့်အပေါ် အတော်လေး ကောင်းတယ်လို့ ငါ ကြားထားတယ်... ဒါပေမဲ့ သူက နင့်ကို ကယ်ဖို့အတွက် သူ့အသက်ကို စတေးရဲပါ့မလားဆိုတာတော့ မသိသေးဘူးလေ" ဟု ပြောလိုက်သည်။
သူမက စကားပြောနေရင်း တစ်ဖက်မှလည်း သုမာရု လက်စွပ်ကို အသက်သွင်းရန် ကြိုးစားနေသည်။
သို့သော် စွမ်းအင်ချိတ်ပိတ်လည်ပတ်၏ အာနိသင်က အလုပ်လုပ်နေသဖြင့် သုမာရု လက်စွပ်က သူမအား ဟင်းလင်းပြင်ထဲသို့ ဆွဲသွင်းနိုင်ခြင်း မရှိပေ။
လင်းဝမ်၏ စိတ်ထဲတွင် ချက်ချင်းဆိုသလို စိုးရိမ်ပူပန်လာခဲ့သည်။ အစီအစဉ်တွေ ပြောင်းလဲသွားပြီ။
သူမက မျက်လုံးထောင့်မှနေ၍ ထိုစွမ်းအင်ချိတ်ပိတ်လည်ပတ်ကို အကဲခတ်ရင်း ဤလည်ပတ်ကို မည်သို့ ဖြုတ်ချရမည်ကို တွေးတောနေမိသည်။
ထိုစဉ် အမကျန်းက "အဖွဲ့ခေါင်းဆောင်... ကျွန်မတို့ရဲ့ တောင်ကို ဖောက်ခွဲမယ့် အစီအစဉ်က ပြီးသွားပြီလား" ဟု ရုတ်တရက် မေးလိုက်သည်။
လင်းဝမ်၏ ခြေလှမ်းများ ရပ်တန့်သွားပြီး သူမ၏ ရင်ထဲတွင် အနည်းငယ် ထိတ်လန့်သွားသည်။
တောင်ကို ဖောက်ခွဲမယ်။
လန်ယွဲ့ဟွာတို့အဖွဲ့က ထိုက်ယန်တောင်ကို ဖောက်ခွဲပစ်ချင်နေတာလား။
တစ်ခဏမျှ သူမ ကိုယ့်နားကိုယ်ပင် မယုံနိုင်အောင် ဖြစ်သွားရသည်။
ဒီလူတွေမှာ အဲ့ဒီလောက်အထိ လုပ်နိုင်စွမ်း ရှိလို့လား။
ဒီလောက် ကြီးမားကျယ်ပြန့်လှတဲ့ ထိုက်ယန်တောင်ကြီးကို သူတို့က ဘာနဲ့ ဖောက်ခွဲမှာလဲ။
လင်းဝမ်က လန်ယွဲ့ဟွာ၏ မျက်နှာသွင်ပြင်ဖြင့် အမူအရာမပျက်ဘဲ "နည်းနည်း လိုသေးတယ်" ဟု ပြန်ဖြေလိုက်သည်။
"ဒီတောင်ကြီးကို မဖောက်ခွဲခင် လင်းဆိုတဲ့ကောင် ပိုင်ဆိုင်သမျှ အရာအားလုံး တစ်ခဏအတွင်းမှာ ပျက်စီးသွားတာကို သူ့မျက်စိနဲ့တပ်အပ် မြင်တွေ့သွားအောင် ငါ လုပ်ပြဦးမှာ"
"ဘုရင်မင်းမြတ်ဆီက သတင်းကို ငါ စောင့်ရဦးမယ်"
သူမ၏ အတုခိုး ဟန်ဆောင်မှုက အလွန် ပီပြင်လှသဖြင့် သူမက ဟန်ဆောင်ထားသူဖြစ်ကြောင်း အနည်းငယ်မျှပင် ရိပ်မိနိုင်စရာ မရှိပေ။
အမကျန်းက ထိုစကားကို ကြားသောအခါ ပြုံးလိုက်ပြီး စိတ်လှုပ်ရှားနေသည့် အမူအရာဖြင့် "တစ်ညတောင် ကုန်သွားပြီဆိုတော့ ဘုရင်မင်းမြတ်က လင်းဆိုတဲ့ကောင်ရဲ့ အဖွဲ့ကို ရှင်းလင်းပြီးလောက်ပြီထင်တယ်" ဟု ပြောလိုက်သည်။
သူတို့သုံးယောက် စကားပြောနေစဉ်အတွင်း လင်းဝမ်က တမင်တကာ ခြေလှမ်းများကို နှေးလိုက်ပြီး ရန်မေအား အရှေ့ဆုံးမှ သွားစေခဲ့သည်ကို မည်သူကမျှ သတိမထားမိခဲ့ကြပေ။
သူတို့အကြား အကွာအဝေးမှာ ဆယ်ပေခန့်ပင် မပြည့်လောက်ပေ။
ထိုအချိန်မှာပင် မြေအောက်မှ လက်တစ်ဖက် ရုတ်တရက် ထွက်ပေါ်လာပြီး အမကျန်းနှင့် ကောင်မလေးချန်တို့၏ ခြေကျင်းဝတ်များကို အကြမ်းပတမ်း ဖမ်းဆွဲလိုက်သည်။
နောက်တစ်စက္ကန့်တွင် ထိုသူနှစ်ယောက် တုံ့ပြန်ရန် အချိန်ပင်မရလိုက်ဘဲ ပတ်ဝန်းကျင်ရှိ ဟင်းလင်းပြင်က တွန့်လိမ်ကောက်ကွေးသွားတော့သည်။
"ဝှစ်" ဟူသော အသံနှင့်အတူ ထိုသူနှစ်ယောက်လုံး လေထဲတွင် ချက်ချင်း ပျောက်ကွယ်သွားကြသည်။
လင်းယွမ်၏ ခန္ဓာကိုယ်က မြေအောက်မှ ထွက်ပေါ်လာရာ လင်းဝမ်က မြင်မြင်ချင်း "ရှင် သူတို့ကို ဟင်းလင်းပြင် လက်စွပ်ထဲ ပစ်ထည့်လိုက်တာလား" ဟု အလျင်အမြန် မေးလိုက်သည်။
လင်းယွမ်က ခေါင်းအနည်းငယ် ညိတ်ပြလိုက်ပြီး "အမမေ... အဆင်ပြေရဲ့လား" ဟု မေးလိုက်သည်။
သူက ရန်မေကို လှမ်းကြည့်လိုက်ရာ ရန်မေက အံ့သြဝမ်းသာနေသည့် မျက်နှာဖြင့် သူ့ဆီသို့ ပြေးဝင်လာသည်ကို တွေ့လိုက်ရသည်။
"မောင်လေး"
"အမသိတယ်... မောင်လေး လာကယ်မယ်ဆိုတာ အမသိတယ်"
လင်းယွမ်က သူမကို ဖက်ထားလိုက်ပြီး သူမ၏ ကျောပြင်လေးကို ညင်သာစွာ ပွတ်သပ်ကာ နှစ်သိမ့်ပေးလိုက်ရင်း "သူတို့က အမမေကို ထိခိုက်အောင် လုပ်သေးလား" ဟု မေးလိုက်သည်။
"ဟင့်အင်း... သူတို့ ဘာမှမလုပ်ပါဘူး... အဲ့ဒီ လန်ယွဲ့ဟွာက မောင်လေးကို ခြိမ်းခြောက်ဖို့ အမကို အသုံးချချင်နေတာမို့လို့ အခုထက်ထိ အသက်ရှင်ခွင့် ပေးထားတာပါ"
"ဒါပေမဲ့..."
"ဒါပေမဲ့ ဘာဖြစ်လဲ" လင်းယွမ်က ချက်ချင်း မေးလိုက်သည်။
"သူ အမရဲ့ ကိုယ်ပေါ်မှာတော့ ပုံတစ်ခု ရေးဆွဲလိုက်သေးတယ်... အဲ့ဒီတုန်းက ပူစပ်ပူလောင်နဲ့ နည်းနည်း နာသွားတယ်... ဘာမှန်းတော့ အမလည်း မသိဘူး"
"ဘယ်နားမှာလဲ" လင်းယွမ် ရင်ထဲ ထိတ်သွားပြီး ချက်ချင်း မေးလိုက်သည်။
"အမရဲ့ ကျောကုန်းမှာ"
ရန်မေက လှည့်လိုက်ပြီး အပေါ်အင်္ကျီကို ချွတ်လိုက်ရာ သူမ၏ ဖြူဖွေးနေသော ကျောပြင်ပေါ်တွင် မီးတောက်ရောင် သင်္ကေတတစ်ခု တကယ်ပင် ရှိနေသည်ကို တွေ့လိုက်ရသည်။
ထိုသင်္ကေတက ချိုးရင်ယွဲ့၏ ကိုယ်ပေါ်ရှိ သင်္ကေတနှင့် တစ်ထပ်တည်း တူညီနေသည်။
ကွာခြားချက်မှာ ချိုးရင်ယွဲ့၏ ကိုယ်ပေါ်ရှိ သင်္ကေတမှာ အချိန်အတိုင်းအတာ တစ်ခုအထိ ကြာမြင့်နေပြီဖြစ်ကာ သွေးကြောများထဲအထိ နက်ရှိုင်းစွာ စိမ့်ဝင်နေခြင်းပင် ဖြစ်သည်။
ရန်မေ၏ ကိုယ်ပေါ်ရှိ သင်္ကေတကမူ အသစ်ရေးဆွဲထားခြင်းဖြစ်ကြောင်း သိသာထင်ရှားလှသည်။
"မီးသင်္ကေတ အဆိပ်ပဲ"
လင်းယွမ်၏ မျက်နှာက မှုန်ကုပ်သွားတော့သည်။
သူက ဘာစကားမှ ဆက်မပြောတော့ဘဲ သင်္ကေတရှိရာ နေရာကို လက်ဖြင့် ဖိနှိပ်လိုက်ပြီး ရေခဲဓာတ် စွမ်းအင်များကို လည်ပတ်စေကာ အဆိပ်များကို ချက်ချင်း စတင် ထုတ်ယူတော့သည်။
သို့သော် ဤမီးသင်္ကေတ အဆိပ်ကို ထည့်သွင်းထားသည်မှာ မကြာသေးသော်လည်း ၎င်း၏ မီးအဆိပ်များက သွေးကြောများမှတစ်ဆင့် တစ်ကိုယ်လုံးသို့ ပျံ့နှံ့နေပြီ ဖြစ်သည်။
ရေခဲဓာတ် စွမ်းအင်အပေါ် မှီခိုပြီး အဆိပ်ဖယ်ရှားရန် ဆိုသည်မှာ သိပ်တော့ မဖြစ်နိုင်တော့ပေ။
လင်းယွမ်က အသက်ကို ပြင်းပြင်းတစ်ချက် ရှူသွင်းလိုက်ပြီး ဤမီးသင်္ကေတ အဆိပ်ကို ယာယီ ဖိနှိပ်ထိန်းချုပ်ထားလိုက်သည်။
ရန်မေက သူ၏ မျက်နှာအမူအရာ မကောင်းသည်ကို မြင်သောအခါ အလျင်အမြန် မေးလိုက်သည်။ "မောင်လေး... ဒါက ဘာကြီးလဲ... စိုးရိမ်ရလားဟင်... ကလေးကိုရော ထိခိုက်နိုင်လား"
သူမက အရည်အချင်းပြည့်ဝသော မိခင်ကောင်း တစ်ယောက်ဖြစ်သည့်အားလျော်စွာ ပထမဆုံးအကြိမ် မေးမြန်းလိုက်သည်မှာ သူမ၏ ကလေးအတွက် ထိခိုက်မှု ရှိနိုင်မရှိနိုင် ဆိုသည်ကိုသာ ဖြစ်ပြီး သူမ၏ ကိုယ်ပိုင် ခန္ဓာကိုယ်အတွက်ကိုမူ အနည်းငယ်မျှ ဂရုမစိုက်ခဲ့ပေ။
လင်းယွမ်က နှစ်သိမ့်လိုက်သည်။ "ဘာမှမဖြစ်ပါဘူး... အချိန်အတိုင်းအတာ တစ်ခုရောက်ရင် အမမေအတွက် ဒီသင်္ကေတကို အားတဲ့အချိန် ဖြေရှင်းပေးလိုက်မယ်ဆိုရင် အဆင်ပြေသွားမှာပါ"
ထိုအချိန်တွင် တင်းယန်နှင့် ကုဖုန်းတို့ နှစ်ယောက်လည်း အပြေးအလွှား ရောက်ရှိလာကြသည်။
"ရန်မေ"
"တင်းယန်"
မိန်းကလေး နှစ်ယောက် တွေ့ဆုံသွားကြရာ တင်းယန်က သက်ပြင်းချနိုင်သွားပြီး ရန်မေလည်း စိတ်လှုပ်ရှားစွာဖြင့် ရင်ထဲ လှိုက်ဖိုသွားရသည်။
တင်းယန်က "ရန်သူတွေရော" ဟု မေးလိုက်သည်။
လင်းယွမ်က "သုမာရု ဟင်းလင်းပြင်ထဲမှာ ငါ ပိတ်လှောင်ထားလိုက်ပြီ" ဟု ဖြေလိုက်သည်။
လင်းဝမ်က ထိုအချိန်တွင် သူမ၏ မူလရုပ်သွင်သို့ ပြန်လည်ပြောင်းလဲသွားပြီဖြစ်ကာ "ကိုလင်းယွမ်... ခုနက အဲ့ဒီမိန်းမ ပြောတာကို ကျွန်မ ကြားလိုက်ရတယ်... သူတို့ဆီမှာ ဖောက်ခွဲရေး အစီအစဉ်တွေ ရှိနေတယ်တဲ့... ထိုက်ယန်တောင်ကို ဖောက်ခွဲပစ်ချင်နေကြတာ" ဟု ပြောလိုက်သည်။
"ရှင် သူတို့ရဲ့ အစီအစဉ်ကို အမြန် စစ်မေးကြည့်ပါဦး... သူတို့ ဘယ်အဆင့်ထိ ရောက်နေပြီလဲဆိုတာ မသိရသေးဘူးလေ"
လင်းယွမ်က ခေါင်းညိတ်လိုက်ပြီး "ငါလည်း ကြားလိုက်တယ်... ဒီလန်ယွဲ့ဟွာမှာ ဒီလိုမျိုး နည်းလမ်းတွေ ရှိနေလိမ့်မယ်လို့ ထင်မထားမိဘူး"
"ထိုက်ယန်တောင်ကို ဖောက်ခွဲပစ်မယ် ဟုတ်လား... သူက တွေးတောင် တွေးရဲသေးတယ်ပေါ့လေ... တောင်တစ်တောင်လုံးကို ပြိုကျပျက်စီးသွားအောင် လုပ်ဖို့ဆိုတာ ယမ်းဘယ်လောက်များများတောင် လိုအပ်မှာလဲ" တင်းယန်က လှောင်ပြုံးပြုံးရင်း ပြောလိုက်သည်။
လင်းယွမ်က "သူတို့က ဒီလို ပြောရဲမှတော့ အဲ့ဒီလို လုပ်နိုင်စွမ်း တကယ်ရှိနေမှာကို စိုးရိမ်ရတယ်... အရေးတကြီး လုပ်ရမှာက သူတို့ရဲ့ အစီအစဉ်ကို မြန်မြန် စုံစမ်းဖို့ပဲ" ဟု ပြောလိုက်သည်။
သူက စကားပြောနေရင်း တစ်ဖက်မှလည်း ရန်မေ၏ လည်ပင်းရှိ စွမ်းအင်ချိတ်ပိတ်လည်ပတ်ကို တိုက်ရိုက် ဆုပ်ချေ ဖျက်ဆီးပစ်လိုက်သည်။
သူ၏ ခွန်အားဖြင့်ဆိုလျှင် သန္ဓေပြောင်းစွမ်းအင်ကို အသုံးမပြုဘဲနှင့်ပင် ဤလည်ပတ်ကို အလွယ်တကူ ဆုပ်ချေဖျက်ဆီးပစ်နိုင်ပေသည်။
"တင်းယန်... မင်းနဲ့ ကုဖုန်း ချက်ချင်း ပြန်သွားပြီး လူတိုင်းကို စစ်ဆေးရှာဖွေမှုတွေ ပိုလုပ်ခိုင်းလိုက်... တောင်တစ်ခုလုံးဖွဲ့စည်းပုံ အားနည်းတဲ့နေရာတွေကို အဓိကထားပြီး ရှာဖွေခိုင်းရမယ်... ဖောက်ခွဲရေး ပညာရပ်ကို နားလည်တဲ့သူ ရှိမရှိ သွားမေးကြည့်ရင် အကောင်းဆုံးပဲ"
"ပြီးတော့ ဒီသုံ့ပန်းနှစ်ယောက်ကို စုံစမ်းစစ်ဆေးရေး ဌာနဆီ ခေါ်သွားပြီး ကျွမ်းရှုယွမ်ဆီ လွှဲပေးလိုက်... ဒီလူနှစ်ယောက်ကို သူမ အမြန်ဆုံး စစ်ဆေးမေးမြန်းနိုင်အောင် လုပ်ခိုင်းလိုက်"
"ဒါဆို ရှင်ကရော"
လင်းယွမ်က အေးစက်စက် ပြုံးလိုက်ပြီး "လန်ယွဲ့ဟွာကို ရှာမတွေ့သေးခင် ငါနဲ့ လင်းဝမ် ဒီမြေအောက် လိုဏ်ဂူခန်းမထဲမှာပဲ ဆက်နေပြီး စောင့်နေမယ်"
"သူက အနှေးနဲ့အမြန် ဒီနေရာကို လာပြီး ရန်မေကို လာခေါ်မှာပဲ... ပြီးရင် ငါ့ကို ခြိမ်းခြောက်ဖို့ သူမကို အသုံးချမှာပဲ... ဒါကြောင့် သူ သေချာပေါက် ပြန်လာလိမ့်မယ်"
ချက်ချင်းပင် လူသုံးယောက်သည် လင်းယွမ်၏ ညွှန်ကြားချက်အတိုင်း အလျင်အမြန် ခွဲ၍ လှုပ်ရှားကြတော့သည်။
လင်းယွမ်ဘက်တွင်မူ လင်းဝမ်အား အမကျန်း၏ ရုပ်သွင်သို့ တိုက်ရိုက် ပြောင်းလဲခိုင်းလိုက်သည်။
သူတို့နှစ်ယောက်နှင့် ရန်မေတို့သည် ဤမြေအောက်လိုဏ်ဂူထဲတွင်ပင် ဆက်လက် စောင့်ဆိုင်းနေကြသည်။
သေချာသည်မှာ လင်းယွမ်က အချိန်ဖြုန်းကာ သက်သက် စောင့်ဆိုင်းနေခြင်းမျိုး မဟုတ်ပေ။ သူက ဤအချိန်ကို အခွင့်ကောင်းယူကာ မီးဓာတ် မျိုးရိုးဗီဇမျိုးစေ့ တစ်ခုကို တိုက်ရိုက် စုစည်းရန် လိုအပ်နေသည်။
ယခုအခါ သူသည် မျိုးရိုးဗီဇ အသွင်တစ်ရာ ပင်ကိုယ်အစွမ်းကို အားကိုး၍ ရှေ့နောက်ဆိုသလို ရေခဲဓာတ်၊ အမှောင်ဓာတ်၊ ဟင်းလင်းပြင်နှင့် စိတ်စွမ်းအင် ဟူသော မျိုးရိုးဗီဇမျိုးစေ့ လေးမျိုးကို စုစည်းနိုင်ခဲ့ပြီ ဖြစ်ရာ အတွေ့အကြုံ ကြွယ်ဝနေပြီဟု ဆိုနိုင်သည်။
သူ့ကိုယ်တိုင်က မီးဓာတ် အစွမ်းများကို စောစောစီးစီးကတည်းက ကျွမ်းကျင်ပိုင်နိုင်ထားပြီးဖြစ်ရာ မီးဓာတ် သွေးအဆီအနှစ် ရှိရန်သာ လိုအပ်ပြီး မီးဓာတ် မျိုးရိုးဗီဇမျိုးစေ့ကို စုစည်းနိုင်မည် ဖြစ်သည်။
ထိုမီးဓာတ် သွေးအဆီအနှစ်ကိုလည်း သူက စောစောစီးစီးကတည်းက ကြိုတင် စုဆောင်းထားပြီး ဖြစ်သည်။
ဤမီးဓာတ် သွေးအဆီအနှစ်များမှာ စစ်တပ်ဘက်မှ ဝယ်ယူထားခြင်း ဖြစ်သည်။
နှစ်ဖက်စလုံး ပူးပေါင်းဆောင်ရွက်မှု အခြေခံကို တည်ဆောက်ပြီးနောက်ပိုင်း သုတေသနနှင့် ဖွံ့ဖြိုးတိုးတက်ရေး ဌာန၏ နည်းပညာပိုင်းဆိုင်ရာ အဆင့်တွင် အပြန်အလှန် ဆက်သွယ်ကူညီမှုများ ရှိရုံသာမက သယံဇာတ အရင်းအမြ ပိုင်းဆိုင်ရာများတွင်လည်း အကျိုးအမြတ်များကို မကြာခဏ ဖလှယ်လေ့ရှိကြသည်။
ထိုအထဲတွင် စစ်တပ်၏ တိမ်မြူကျွန်းပေါ်၌ ခန္ဓာကိုယ်ကြံ့ခိုင်မှု အမျိုးအစား သွေးသလင်းကျောက်များ ပေါများစွာ ထွက်ရှိပြီး ထိုက်ယန်တောင်ဘက်တွင်မူ ဟင်းလင်းပြင် အမျိုးအစား သွေးသလင်းကျောက်များနှင့် အမှောင်ဓာတ် သွေးသလင်းကျောက်များမှာ အဖိုးတန် သယံဇာတ အရင်းအမြများ ဖြစ်ကြသည်။
နှစ်ဖက်စလုံးက သဘာဝကျကျပင် လိုအပ်ချက်များကို အပြန်အလှန် ဖြည့်ဆည်းပေးရန် လိုအပ်ပြီး လက်အောက်ရှိ အစွမ်းပိုင်ရှင်များ ပိုမို အင်အားကြီးမားလာစေမည့် လမ်းကြောင်းများကို တိုးချဲ့ပေးရမည် ဖြစ်သည်။
မီးဓာတ် သန္ဓေပြောင်း သားရဲ၏ သွေးအဆီအနှစ်ဖြင့် စုစည်းထားသော မျိုးရိုးဗီဇမျိုးစေ့ တစ်ခုကို ထုတ်ယူလိုက်ပြီးနောက် လင်းယွမ်က ဘာစကားမှ ဆက်မပြောတော့ဘဲ တိုက်ရိုက် မျိုချလိုက်တော့သည်။
မျိုးရိုးဗီဇမျိုးစေ့က ပါးစပ်ထဲသို့ ရောက်သွားသည်နှင့် တစ်ပြိုင်နက် သန္ဓေပြောင်းစွမ်းအင်များ၏ ရစ်ပတ်လွှမ်းခြုံမှုကို ခံလိုက်ရပြီး ချက်ချင်း စတင် သန့်စင်တော့သည်။
ပူလောင်ပြင်းပြသော နွေးထွေးသည့် စီးကြောင်းတစ်ခုက လင်းယွမ်၏ ခန္ဓာကိုယ်တွင်းရှိ အရပ်မျက်နှာ အနှံ့အပြားသို့ စီးဆင်းသွားတော့သည်။
လင်းယွမ်၏ အသွင်တစ်ရာ မျိုးရိုးဗီဇက ထိုအပူစီးကြောင်းများ၏ မျိုးရိုးဗီဇ လျှို့ဝှက်ကုဒ်များကို ချက်ချင်း စတင် ချိုးဖျက် စုပ်ယူတော့သည်။
ထို့နောက် ထိုမီးဓာတ် မျိုးရိုးဗီဇများသည် ကြည်လင်နေသော ရေထဲသို့ ကျဆင်းသွားသည့် မှင်တစ်စက်အလား ချက်ချင်းပင် လှိုင်းဂယက်ထကာ ပျံ့နှံ့သွားတော့သည်။
လင်းယွမ်၏ အသွင်တစ်ရာ မျိုးရိုးဗီဇသည် မီးဓာတ် မျိုးရိုးဗီဇအဖြစ်သို့ လျင်မြန်စွာ အတုခိုး ပြောင်းလဲနေသည်။
သူ၏ မျက်နှာပေါ်တွင်လည်း နီရဲသော အရောင်အဆင်းက တရိပ်ရိပ် ပေါ်လာခဲ့သည်။
သူ၏ ဆံပင်များကလည်း သာမန်မျက်စိဖြင့် မြင်တွေ့နိုင်သော အမြန်နှုန်းဖြင့် အနီရောင်အဖြစ်သို့ စတင် ပြောင်းလဲလာသည်။
ခန္ဓာကိုယ်တွင်းရှိ သွေးလေများကလည်း လိုက်ပါ ဆူပွက်လာပြီး ကြွက်သားများ ဖောင်းကြွလာကာ ပေါက်ကွဲတော့မည့် မီးတောင်တစ်လုံးနှင့် အလားသဏ္ဌာန် တူနေတော့သည်။
တစ်ချိန်တည်းမှာပင် သူ၏ တစ်ကိုယ်လုံးမှ အပူငွေ့များ တထောင်းထောင်း ထွက်ပေါ်လာပြီး မီးတောက်များက သူ၏ မွေးညင်းပေါက်များထဲမှပင် ထိုးထွက်လာခဲ့သည်။
အစပိုင်းတွင် မီးတောက်ငယ်လေးများသာ ဖြစ်သော်လည်း သူက အဆက်မပြတ် တွန်းအားပေး စုစည်းလာသည်နှင့်အမျှ မီးတောက်များက "ဝုန်း" ဟူသော အသံနှင့်အတူ ဆက်တိုက် မြင့်တက်လာတော့သည်။
မျက်စိတစ်မှိတ်အတွင်းမှာပင် သူ၏ တစ်ကိုယ်လုံးက မီးလူသား တစ်ယောက်အလား ဖြစ်သွားတော့သည်။
တစ်ကိုယ်လုံး အထက်အောက် နေရာအနှံ့တွင် ပြင်းထန်သော မီးတောက်ကြီးများ လောင်ကျွမ်းနေတော့သည်။
ထိုအချိန်မှာပင် သူ၏ သန္ဓေပြောင်းစွမ်းအင် အရည်အသွေးက စတင် ပြောင်းလဲလာခဲ့ပြီး ဓာတ်မဲ့ အခြေအနေမှ မီးဓာတ် အသွင်သဏ္ဌာန်သို့ တဖြည်းဖြည်း ပြောင်းလဲသွားတော့သည်။
အားကောင်းလှသော နှလုံးသားက "ဒုတ်ဒုတ်" ဟု ခုန်လှုပ်နေပြီး မီးတောင်တစ်လုံးအလား ပြင်းထန်သော ချော်ရည်ပူများကို အဆက်မပြတ် ပန်းထုတ်ပေးနေသည်။
လင်းယွမ်က မျက်လုံးများကို ဖြည်းညင်းစွာ ဖွင့်လိုက်ရာ သူ၏ မျက်ဝန်းအစုံမှ မီးတောက်များ ဖြာထွက်နေပြီး အပူချိန်မြင့်မားစွာ စုစည်းထားသည့် ရောင်ခြည်တန်းများ တလက်လက် တောက်ပနေသည့်အလား စက်ရုပ်မျက်လုံးများကဲ့သို့ စူးရှနေတော့သည်။
"အောင်မြင်ပြီ"
လင်းယွမ်က မတ်တတ်ရပ်လိုက်ရာ ခန္ဓာကိုယ်တွင်းရှိ စွမ်းအင်အရှိန်အဝါများက အဆက်မပြတ် မြင့်တက်လာတော့သည်။
မီးဓာတ် မျိုးရိုးဗီဇမျိုးစေ့မှာ မျက်စိတစ်မှိတ်အတွင်းမှာပင် စုစည်းပြီးစီးသွားခဲ့ပြီ ဖြစ်သည်။
သူ စုစည်းခဲ့ဖူးသော မျိုးရိုးဗီဇမျိုးစေ့များမှာ များပြားလွန်းလှသဖြင့် လုပ်ငန်းစဉ် တစ်ခုလုံးက အလွန် ချောမွေ့နေခဲ့ပြီး မည်သည့် အတားအဆီးမျှ မရှိသလောက်ပင် ဖြစ်သည်။
လုပ်ငန်းစဉ် တစ်ခုလုံးမှာ ငါးမိနစ်ပင် မကြာလိုက်ဘဲ ဤမီးဓာတ် မျိုးရိုးဗီဇမျိုးစေ့ကို စုစည်းနိုင်ခဲ့ခြင်း ဖြစ်သည်။
"ဘယ်လို မျိုးရိုးဗီဇမျိုးစေ့မျိုး နိုးလာလဲ... ပင်ကိုယ်အစွမ်းရော ပါလာလား ဆိုတာ ကြည့်ရအောင်"
ဆက်ရန်...