အခန်း (၂၂၃-၂၂၄)

အခန်း ၂၂၃ - တစ်ကမ္ဘာလုံး တုန်လှုပ်သွားခြင်း

ဥရောပ။ ဥရောပသမဂ္ဂ။ ထိုအချိန်တွင် အဖွဲ့ဝင်နိုင်ငံများသည် ရှပြည်ကြီးအပေါ်

အမျိုးမျိုးသော ကန့်ကွက်ပိတ်ဆို့မှုများ ပြုလုပ်ရန် အစည်းအဝေး

ကျင်းပနေကြသည်။ ယခင်ကဆိုလျှင် ထိပ်တန်းစက်ကိရိယာများမှစ၍

အခြေခံပစ္စည်းများအထိ

အမြတ်အစွန်းအားလုံးကို သူတို့ကသာ

လက်ဝါးကြီးအုပ်ထားနိုင်ခဲ့သည်။ သို့သော် ရှပြည်ကြီး၏ နည်းပညာများ

တိုးတက်လာသည်နှင့်အမျှ အလယ်အလတ်နှင့် အောက်ခြေအဆင့် စက်ကိရိယာစျေးကွက်ကို

ရှပြည်ကြီးက စတင်လွှမ်းမိုးလာခဲ့သည်။

ထိုအထဲတွင် ဆေးဘက်ဆိုင်ရာ စက်ကိရိယာများမှ ရရှိသော အမြတ်အစွန်းမှာ များပြားလှသည်။

ဤအခြေအနေကို ပြောင်းလဲရန်အတွက် သူတို့သည် ထိပ်တန်း ဆေးဘက်ဆိုင်ရာ

နည်းပညာများကို ပြည်ပသို့ တင်ပို့ခြင်းအား

ကန့်သတ်လိုက်ကြသည်။ တစ်ချိန်တည်းမှာပင် ရှပြည်ကြီးမှလာသော

အခြေခံ ဆေးဘက်ဆိုင်ရာ ပစ္စည်းများကိုလည်း တင်သွင်းခြင်း မပြုရန်

ပိတ်ပင်လိုက်ကြသည်။ ယခု ဥရောပသမဂ္ဂ၏

အစည်းအဝေးမှာ အဖွဲ့ဝင်နိုင်ငံများကြားတွင် ထိုကိစ္စအတွက်

သဘောတူညီမှု ရယူရန် ကျင်းပခြင်း ဖြစ်သည်။

သူတို့သည် မဲပေးခြင်း လုပ်ငန်းစဉ်ကို မကြာမီကပင် အဆုံးသတ်ခဲ့ကြသည်။ ရှပြည်ကြီး၏

ဆေးဘက်ဆိုင်ရာ ပစ္စည်းများကို ပြင်းထန်စွာ ကန့်သတ်ရန် သူတို့

ပြင်ဆင်နေကြစဉ်မှာပင်...

“အခြေအနေကတော့ ဆိုးကုန်ပြီ”

“ရှပြည်ကြီးက စူးချီဟာ ကျင့်စဉ်အသစ်တစ်ခုကို ထပ်ပြီး ထုတ်ဖော်လိုက်ပြန်ပြီ”

“လူတစ်ယောက်ရဲ့ ကျင့်ကြံမှုဟာ အဆင့်တစ်ခုကို ရောက်သွားရုံနဲ့ သူ့ရဲ့ မူလဝိညာဉ်ကို

မြွေနက်စင်း ဆန္ဒပြည့်ပုလဲထဲမှာ ထည့်သွင်းထားနိုင်မယ်တဲ့။ ရုပ်ခန္ဓာကြီး

သေဆုံးသွားရင်တောင်မှ မူလဝိညာဉ်က ခန္ဓာကိုယ်အသစ်တစ်ခုကို ရှာပြီး

ပြန်လည်ရှင်သန်နိုင်မယ်လို့ ဆိုပါတယ်”

ထိုသို့ပြောရင်း သူ၏ လက်အောက်ငယ်သားက စူးချီ၏ တိုက်ရိုက်ထုတ်လွှင့်မှု ဗီဒီယိုကို

ပြလိုက်သည်။ ကျင့်စဉ်ကို မသင်ကြားမီ ဗီဒီယိုအတွင်း၌ သေဆုံးသွားသော လူတစ်ယောက်က

မည်သို့ ပြန်လည်ရှင်သန်လာပြီး သူ၏ ဝိညာဉ်ကို ပြန်လည်ရရှိသွားပုံကို ပြသထားသည်။

ထိုဗီဒီယိုကို ကြည့်ရင်း အဖွဲ့ဝင်နိုင်ငံများမှ ကိုယ်စားလှယ်အားလုံး

မှင်သက်သွားကြတော့သည်။ ခဏအကြာတွင် လူတိုင်းသည်

အချင်းချင်း ကြည့်လိုက်ကြပြီး တံတွေးများကို ခက်ခဲစွာ

မျိုချလိုက်ကြသည်။ အတော်ကြာမှ တစ်စုံတစ်ယောက်က

ရူးသွပ်သွားသူကဲ့သို့ အော်ဟစ်လိုက်တော့သည်။

“အမြန်... ကန့်သတ်ချက်တွေ အားလုံးကို ချက်ချင်း ရုပ်သိမ်းလိုက်ကြစို့။

ရှပြည်ကြီးရဲ့ ထိပ်တန်း ခေါင်းဆောင်တွေနဲ့ သွားရောက်

ညှိနှိုင်းရမယ်။ သူတို့ရဲ့ နောက်ဆုံးပေါ် စက်ကိရိယာတွေကို တင်သွင်းခွင့်

ပြုလိုက်ကြစို့”

မည်သူမျှ ပြန်မဖြေကြပေ။ ဆေးဘက်ဆိုင်ရာ နည်းပညာဆိုသည်မှာ ယခုမှစ၍

ပျောက်ကွယ်သွားတော့မည်ကို လူတိုင်း

သိလိုက်ကြသည်။ ဝိညာဉ်ကို အတည်တကျ ပြုလုပ်နိုင်ပြီဆိုပါက

မူလဝိညာဉ်သည် အချိန်မရွေး ခန္ဓာကိုယ် လဲလှယ်နိုင်တော့မည်

ဖြစ်သည်။ ခန္ဓာကိုယ်ကြီးက ပျက်စီးသွားလျှင်လည်း နောက်တစ်ခု

လဲလိုက်ရုံသာ ရှိတော့သည်။ ကုလို့မရတော့ဘူးဆိုလျှင်လည်း

ဒီခန္ဓာကိုယ်ကို မလိုချင်တော့ဘဲ နောက်ထပ် အသစ်တစ်ခုကို

လဲလှယ်လိုက်ရုံပင်။

ထို့ပြင် ဗီဒီယိုထဲတွင် မြင်တွေ့ရသည်မှာ ရှပြည်ကြီးသည် မျိုးပွားနည်းပညာကို

ကျွမ်းကျင်နေရုံသာမက မျိုးပွားထားသော ခန္ဓာကိုယ်၏

အရည်အသွေးများကိုပါ ပြုပြင်နိုင်သေးသည်။

ဥပမာအားဖြင့် ပါရမီကို မြှင့်တင်ခြင်း၊ ရုပ်ရည်နှင့် ခန္ဓာကိုယ်

တည်ဆောက်ပုံကို ပြုပြင်ခြင်း စသည်တို့ ဖြစ်သည်။

ဤလုပ်ဆောင်မှုများကြောင့် ဆေးပညာတင် ပျောက်ကွယ်သွားမည် မဟုတ်ဘဲ အလှအပဆိုင်ရာ

ဆေးပညာများပါ လုံးဝ ပျောက်ကွယ်သွားတော့မည် ဖြစ်သည်။

သူတို့နိုင်ငံများက ဂုဏ်ယူနေခဲ့ကြသော

ဆေးဘက်ဆိုင်ရာ နည်းပညာများမှာ တစ်ခဏချင်းအတွင်းမှာပင်

ဟာသတစ်ခု ဖြစ်သွားရတော့သည်။

“ရှပြည်ကြီးနဲ့ ဆက်သွယ်လိုက်ကြ။ ငါတို့ဆီမှာရှိတဲ့ နည်းပညာအားလုံးနဲ့ လဲလှယ်ဖို့

အဆင်သင့်ရှိတယ်လို့ ပြောလိုက်ကြပါ”

“ဒါပေမဲ့ ရှပြည်ကြီးက ငါတို့နဲ့ အဆက်အသွယ် ဖြတ်ထားပြီးသားပဲ။ ငါတို့ရဲ့

နည်းပညာတွေကတော့ လုံးဝကို ခေတ်နောက်ကျသွားတော့မှာပဲ”

ဥရောပနိုင်ငံများမှာ စိတ်ပျက်အားငယ်နေကြစဉ်မှာပင် စူးချီ၏ သင်ကြားမှုက ဆက်လက်

ရှိနေဆဲပင် ဖြစ်သည်။

“ကျင့်စဉ်တစ်ခု သင်ပေးရုံနဲ့တင် လူတွေကို မြွေနက်စင်း ဆန္ဒပြည့်ပုလဲကို

အသုံးပြုပြီး ဝိညာဉ်ပြန်လည်ရှင်သန်စေနိုင်တာလား။ ဒီနေ့

ကျွန်တော် သင်ကြားပေးမယ့် ကျင့်စဉ်ကတော့ မြွေနက်စင်း ဆန္ဒပြည့်ပုလဲကို

အသုံးချတဲ့ ကျင့်စဉ်ပဲ ဖြစ်ပါတယ်။ ဒီကျင့်စဉ်ကိုတော့ ဖြစ်တည်မှု

မှော်လက်နက် သန့်စင်ခြင်းပညာလို့ ခေါ်ပါတယ်”

စူးချီ၏ ထိုစကားက တစ်ကမ္ဘာလုံးကို နောက်တစ်ကြိမ် အကြီးအကျယ်

တုန်လှုပ်သွားစေပြန်သည်။

အိမ်နီးချင်း တုတ်ကြီးနိုင်ငံတွင်မူ မကြာသေးမီကမှ ရှပြည်ကြီး၏ ပစ္စည်းမှန်သမျှကို

ဝိုင်းဝန်း သပိတ်မှောက်နေကြသူများ ဖြစ်သည်။ ရှပြည်ကြီးမှ တင်သွင်းသော

ကုန်စည်မှန်သမျှကို ငြင်းပယ်နေကြခြင်း ဖြစ်သည်။ အစပိုင်းတွင်

ထိုနိုင်ငံမှ စီးပွားရေးလုပ်ငန်းစုကြီးများနှင့် မိသားစုကြီးများသည်

ဤအခြေအနေကို ခွင့်ပြုခဲ့ကြသည်။ ရှပြည်ကြီးကို

သပိတ်မှောက်ခြင်းက သူတို့အတွက် အခွင့်အရေး

ဖြစ်လာမည်ဟု ယူဆခဲ့ကြသောကြောင့် ဖြစ်သည်။

သို့သော် စူးချီက “မြွေနက်စင်း ဆန္ဒပြည့်ပုလဲကို အသုံးပြုပြီး ဝိညာဉ်ကို

ပြန်လည်ရှင်သန်စေနိုင်သည်” ဟု ပြောလိုက်သောအခါတွင်မူ

တုတ်ကြီးနိုင်ငံမှ စီးပွားရေးလုပ်ငန်းစုကြီးများနှင့်

မိသားစုကြီးများသည် အစည်းအဝေးပင် ကျင်းပရန် မလိုတော့ဘဲ

တစ်ညီတစ်ညွတ်တည်း ဆုံးဖြတ်ချက် ချလိုက်ကြသည်။ သူတို့သည် မည်သည့်နည်းနှင့်မဆို

ရှပြည်ကြီးနှင့် မိတ်ဆွေ ဖြစ်အောင် လုပ်ဆောင်ရမည် ဖြစ်သည်။

သူတို့တွင် ငွေကြေးများစွာ ရှိသော်လည်း အသက်ကတော့ တစ်ချောင်းတည်းသာ ရှိသည်

မဟုတ်ပါလား။ ထို့ကြောင့် စူးချီက ကျင့်စဉ်ကို တရားဝင်

မသင်ကြားမီမှာပင် တုတ်ကြီးနိုင်ငံ၏ အာဏာပိုင်များသည်

ရှပြည်ကြီးထံသို့ ဘက်စုံ ပူးပေါင်းဆောင်ရွက်ရန် လျှောက်လွှာများကို

အမြန်ဆုံး ပေးပို့လိုက်ကြတော့သည်။

ဆာကူရာနိုင်ငံသည်လည်း အလားတူပင် အလျင်အမြန် ဒူးထောက်လာခဲ့သည်။ အစပိုင်းတွင်

ထိုနိုင်ငံမှ လုပ်ငန်းရှင်ကြီးများနှင့် မိသားစုကြီးများသည်

ဤပုလဲကို အေးအေးဆေးဆေး သုတေသနလုပ်ရန် စီစဉ်ခဲ့ကြသည်။ သို့သော်

စူးချီ၏ အရှိန်အဟုန်အရဆိုလျှင် အေးဆေးနေရန် အချိန်မရှိတော့ပေ။

ဤပစ္စည်း၏ ပြန့်ပွားမှုကို တားဆီးရန် မဖြစ်နိုင်တော့သည်မှာ

ထင်ရှားလှသည်။

ထို့ကြောင့် သူတို့သည်လည်း သူတို့၏ နည်းပညာ အများစုကို ရှပြည်ကြီးသို့ ပေးအပ်ရန်

သဘောတူလိုက်ကြသည်။ မြွေနက်စင်း ဆန္ဒပြည့်ပုလဲနှင့် ပတ်သက်၍

ပူးပေါင်းဆောင်ရွက်ခွင့် ရရှိရန်အတွက်

လဲလှယ်လိုက်ကြခြင်း ဖြစ်သည်။

ထိုအချိန်တွင် ရှပြည်ကြီး၏ အာဏာပိုင်များမှာ အလွန် စိတ်လှုပ်ရှားနေကြသည်။ စူးချီ

စာသင်ပြနေသည်မှာ ဘယ်လောက်မှ မကြာသေးသော်လည်း ကမ္ဘာအနှံ့ရှိ နိုင်ငံများစွာမှာ

ဒူးထောက်လာခဲ့ကြသည်။ တစ်ချိန်က တင်းကျပ်စွာ ထိန်းချုပ်ထားခဲ့သော နည်းပညာများကိုလည်း

ယခု ပိတ်ပင်ထားခြင်း မရှိတော့ပေ။ တစ်ချိန်က အလွန် အင်အားကြီးခဲ့သော

ပြိုင်ဘက်များမှာလည်း ယခု အလျှော့ပေးလာခဲ့ကြသည်။

လှပသောနိုင်ငံမှလွဲ၍ ကမ္ဘာပေါ်ရှိ နိုင်ငံအားလုံးနီးပါးသည် ရှပြည်ကြီးထံသို့

ပူးပေါင်းဆောင်ရွက်ရန် ကမ်းလှမ်းလာကြတော့သည်။

စူးချီ၏ သင်ကြားမှုမှာ ဆက်လက် ရှိနေဆဲပင် ဖြစ်သည်။ သူသည် မြွေနက်စင်း

ဆန္ဒပြည့်ပုလဲတစ်လုံးကို ကောက်ယူလိုက်ပြီး

ပေါ့ပေါ့ပါးပါးပင် မိတ်ဆက်ပေးလိုက်သည်။

“တကယ်တော့ ကျွန်တော့်ရဲ့ ကျင့်စဉ်ဟာ မူလဝိညာဉ်ကို အပ်နှံဖို့အတွက် ဘယ်လို

မှော်လက်နက်ကိုမဆို အသုံးပြုလို့ ရပါတယ်။ ဒါပေမဲ့ လက်ရှိ

ကမ္ဘာပေါ်မှာ မှော်လက်နက်လို့ ခေါ်ဆိုနိုင်တဲ့အရာဟာ ဒီမြွေနက်စင်း

ဆန္ဒပြည့်ပုလဲ တစ်မျိုးတည်းပဲ ရှိပါသေးတယ်။ ဒီပုလဲကို ထုတ်လုပ်ရတာ အလွန်

ခက်ခဲပြီး အရေအတွက် ကန့်သတ်ချက် ရှိနေတာကြောင့် ကျွန်တော်တို့ဟာ အသုတ်လိုက်ပဲ

ပို့ဆောင်ပေးနိုင်မှာ ဖြစ်သလို ဝယ်ယူတဲ့အခါမှာလည်း မှတ်ပုံတင် စနစ်နဲ့ပဲ

ဝယ်ယူရမှာ ဖြစ်ပါတယ်”

“ဒါကြောင့် ကျင့်စဉ်ကို မသင်ကြားခင်မှာ ခင်ဗျားတို့ရဲ့ မြွေနက်စင်း ဆန္ဒပြည့်ပုလဲဟာ

မိမိတို့ရဲ့ လက်ထဲမှာ ရှိနေဖို့ကို ကျွန်တော် လေးလေးနက်နက် မျှော်လင့်ပါတယ်”

စူးချီ၏ ထိုစကားက လှပသောနိုင်ငံသို့ ထွက်ပြေးသွားကြသော မိသားစုကြီးများ၏ ခံစစ်ကို

တိုက်ရိုက် ဖျက်ဆီးပစ်လိုက်သကဲ့သို့ပင် ဖြစ်သည်။ ရှန်ကျစ်ရှားက

နည်းလမ်းမျိုးစုံဖြင့် ဤပုလဲသည် လူကို

ပြန်လည်ရှင်သန်စေနိုင်သည်ဟု ကြော်ငြာခဲ့စဉ်က

ထိုမိသားစုကြီးများမှာ လှောင်ပြောင်ခဲ့ကြသည်။ ရှန်ကျစ်ရှားသည်

ငယ်စဉ်ကတည်းက အူကြောင်ကြောင် နိုင်သူဖြစ်ရာ သူမ ပြောသမျှမှာ အမှန်မဖြစ်နိုင်ဟု

ယူဆခဲ့ကြသည်။

သို့သော် ယနေ့တွင်မူ ဤစကားများကို စူးချီကိုယ်တိုင် ပြောကြားလိုက်ခြင်း ဖြစ်သည်။

ထို့ပြင် လက်တွေ့ပြသသည့် ဗီဒီယိုလည်း ပါဝင်နေသေးသည်။ ထိုမိသားစုကြီးများသည်

အသက် ၃၀ ကျော် အငြိမ်းစား စစ်သည်တစ်ဦး ချက်ချင်း ပြန်လည်ရှင်သန်လာသည်ကို

သူတို့မျက်စိဖြင့် မြင်တွေ့ခဲ့ကြရသည်။ သူသည် ပြန်လည်ရှင်သန်လာရုံသာမက

ကျင့်ကြံမှုအဆင့်ပါ တိုးတက်လာခဲ့သေးသည်။

၎င်းမှာ အလွန် တုန်လှုပ်ဖွယ်ရာပင် ဖြစ်သည်။ ထိုအခါ သူတို့သည် ဤပုလဲကို ဝယ်ရန်အတွက်

ရှပြည်ကြီးသို့ ပြန်သွားနိုင်မလားဟု အလိုအလျောက် တွေးမိလိုက်ကြသည်။ သို့သော်

စူးချီ၏ သတိပေးချက်ကို ကြားလိုက်ရသောအခါ သူတို့အားလုံး

မှင်သက်သွားကြတော့သည်။

မြွေနက်စင်း ဆန္ဒပြည့်ပုလဲကို စတင်ရောင်းချစဉ်က သူတို့သည် ရှပြည်ကြီးတွင်

ကျန်ရှိနေသော သူတို့၏ လူယုံများမှတစ်ဆင့် ဤပုလဲများကို

ဝယ်ယူခဲ့ကြသည်။ ပိုပြီး ဝယ်နိုင်ရန်အတွက် သူတို့၏ မိသားစုဝင်

အားလုံး၏ အချက်အလက်များကို အသုံးပြုခဲ့ကြသည်။ လက်ရှိ မှတ်ပုံတင်

စနစ်အရဆိုလျှင် သူတို့ မိသားစုများသည် နောက်ထပ် ဝယ်ယူ၍ ရတော့မည်

မဟုတ်ပေ။

ထိုမိသားစုကြီးများထဲမှ မိသားစုတစ်ခုတွင် ဤသို့သော စကားသံများ ထွက်ပေါ်လာသည်။

“အခု လှပသောနိုင်ငံမှာ မြွေနက်စင်း ဆန္ဒပြည့်ပုလဲက ဘယ်လောက် ဈေးပေါက်နေလဲ”

“ကျွန်တော် စစ်ဆေးကြည့်လိုက်ပါဦးမယ်။ အခု ယွမ် တစ်သောင်းလေးထောင်လောက် ဖြစ်နေပါပြီ”

“ဘာ... ဈေးမတက်ဘူးလား။ ဒါက ငါတို့ အမြတ်တင်ပြီး ပြန်ရောင်းခဲ့တဲ့ ဈေးပဲလေ”

“အဲဒီတုန်းက လှပသောနိုင်ငံမှာ အမေရိကန်ဒေါ်လာနဲ့ ရှင်းခဲ့တာလေ။ အခုတော့ ဈေးက

ဆက်ပြီး တက်နေတုန်းပဲ”

“ဘုရားရေ”

နိုင်ငံစွန့်ခွာသွားသော ထိုမိသားစုဝင်များသည် စူးချီအပေါ် အငြိုးထားခဲ့သဖြင့် ယွမ်

၆၉၉၉ ဖြင့် ဝယ်ထားသော ပုလဲများကို နှစ်ဆတင်၍ ပြန်လည် ရောင်းချခဲ့ကြသည်။ ယခုမူ

ဈေးနှုန်းမှာ ၁၄ ဆခန့်အထိ တက်သွားရုံသာမက ဆက်လက်၍လည်း မြင့်တက်နေဆဲပင်

ဖြစ်သည်။

နောင်တ... နောင်တဆိုတာ ဒါမျိုးကို ခေါ်တာပဲ ဖြစ်ရမယ်။

တစ်ချိန်က တန်ဖိုးမဖြတ်နိုင်သော ရတနာတစ်ခု သူတို့၏ လက်ထဲတွင် ရှိခဲ့ဖူးသည်။ ၎င်းကို

ပိုင်ဆိုင်ထားခြင်းက အပိုအသက်တစ်ချောင်း သို့မဟုတ် ထို့ထက်မကသော အသက်များကို

ရရှိခြင်းနှင့် အတူတူပင် ဖြစ်သည်။ သို့သော် သူတို့ မိသားစုမှာမူ

၎င်းကို နှစ်ဆသော အမြတ်ကလေးအတွက်နှင့် ရောင်းချခဲ့ကြသည်။

နောင်တများစွာဖြင့် သူတို့၏ ရင်ထဲတွင် နာကျင်နေရတော့သည်။ သူတို့သည်

ခေါင်းမာခဲ့မိသည်ကိုလည်းကောင်း၊ လှပသောနိုင်ငံသို့

လာခဲ့မိသည်ကိုလည်းကောင်း နောင်တရနေကြသည်။ အကယ်၍ ထိုစဉ်က အာဏာပိုင်များကို

အလျှော့ပေးခဲ့မည်ဆိုပါက ယခုအခါ သူတို့သည်လည်း အဆုံးမဲ့သော

အသက်ကို ရရှိနိုင်မည် မဟုတ်ပါလား။

နောင်တ... နိုင်ငံစွန့်ခွာသွားသူများအနေဖြင့် ဤသည်မှာ ပထမဆုံးအကြိမ် အကြီးအကျယ်

နောင်တရမိခြင်းပင် ဖြစ်သည်။ သို့သော် ထိုနောင်တမှာ သူတို့ မှားသွားသည်ကို

သိသောကြောင့် မဟုတ်ဘဲ အခွင့်အရေးကို လက်လွှတ်လိုက်ရသောကြောင့်သာ ဖြစ်သည်။

အခန်း ၂၂၄ - တစ်သက်စာ မှော်လက်နက်များကို ဖုံးကွယ်ထားကြခြင်း

လမ်းစဉ်သစ် အွန်လိုင်းအက်ပလီကေးရှင်းတွင် စူးချီ၏ သင်ကြားမှုမှာ ဆက်လက် ရှိနေဆဲပင်

ဖြစ်သည်။ သူသည် လက်ကို မြှောက်လိုက်ရာ လက်ထဲရှိ မြွေနက်စင်း ဆန္ဒပြည့်ပုလဲမှာ

ပုံသဏ္ဌာန် အမျိုးမျိုး စတင် ပြောင်းလဲလာတော့သည်။

“ဒီဖြစ်တည်မှု မှော်လက်နက်ကို ဘာကြောင့် ဒီလိုမျိုး ပုံစံပြောင်းလဲနိုင်အောင်

ဒီဇိုင်းဆွဲထားရသလဲဆိုတာ ခင်ဗျားတို့ သိချင်နေကြမှာပါ။ အခုကစပြီး

ဒီမှော်လက်နက်ဟာ ခင်ဗျားတို့ရဲ့ ဒုတိယအသက် ဖြစ်လာတော့မှာမို့ ဒါကို

လူမသိအောင် တတ်နိုင်သမျှ ဖုံးကွယ်ထားကြဖို့ ကျွန်တော် တိုက်တွန်းချင်ပါတယ်”

စူးချီက ပြောရင်းနှင့် မြွေနက်စင်း ဆန္ဒပြည့်ပုလဲကို အုတ်ခဲတစ်ခဲ၊

ကျောက်ခဲတစ်လုံးနှင့် ရေခွက်တစ်ခုအဖြစ်

ပြောင်းလဲပြလိုက်သည်။ ထိုအချိန်တွင် ကမ္ဘာတစ်ဝန်းရှိ

ကျောင်းသားများကြားတွင် ဆူညံသွားတော့သည်။ ယခင်က သူတို့သည်

မြွေနက်စင်း ဆန္ဒပြည့်ပုလဲ၏ အသုံးဝင်ပုံကို သေချာစွာ နားမလည်ခဲ့ကြပေ။ အထူးသဖြင့်

ကျောင်းအုပ်ရှန်က ၎င်းကို ခြေအိတ်များအဖြစ် ပြောင်းလဲဝတ်ဆင်သည်ကို

မြင်တွေ့ရသောအခါ ဤသည်မှာ ရှန်ကျစ်ရှားကို

စိတ်ကျေနပ်အောင် စူးချီက တီထွင်ပေးထားသော လူကြီးသုံး

ပစ္စည်းတစ်ခုဟုသာ ထင်မှတ်ခဲ့ကြသည်။

အချို့ကလည်း ဤပုလဲ၏ ပုံစံပြောင်းလဲနိုင်စွမ်းကို ရယ်စရာတစ်ခုအဖြစ်သာ

သဘောထားခဲ့ကြသော်လည်း ယခုအခါတွင်မူ ဤဒီဇိုင်းမှာ

ပါရမီရှင်တစ်ဦး၏ လက်ရာဖြစ်ကြောင်း သူတို့ သဘောပေါက်သွားကြပြီ ဖြစ်သည်။

တိုက်ရိုက်ထုတ်လွှင့်မှု၏ မှတ်ချက်ကဏ္ဍတွင်လည်း မှတ်ချက်များမှာ ရေလိုလား

အဆက်မပြတ် တက်လာတော့သည်။

“ကျွန်တော်တော့ စဉ်းစားပြီးပြီ။ ဒီပစ္စည်းကို ကုတင်အောက်မှာပဲ ဝှက်ထားတော့မယ်”

“အန္တရာယ်အရှိဆုံးနေရာက အလုံခြုံဆုံးပဲလေ။ ကျွန်တော်ကတော့ ဒါကို

အလှဆင်ပစ္စည်းလုပ်ပြီး အိမ်မှာပဲ တင်ထားမှာ”

“ကျွန်တော်ကတော့ ရေခဲသေတ္တာထဲ ထည့်ပြီး အနံ့ပျောက်ဆေးလို ဟန်ဆောင်ထားမယ်”

အင်တာနက် အသုံးပြုသူ အများစုမှာ ဤပစ္စည်းကို အိမ်မှာပဲ ဖုံးကွယ်ထားရန်

စဉ်းစားကြသည်။ သာမန်ပြည်သူများအတွက်မူ ၎င်းမှာ

ပြဿနာမရှိပေ။ သူတို့တွင် သွေးမြေကျ ရန်သူများ မရှိသလို မတော်တဆ

သေဆုံးသွားလျှင်ပင် သူတို့အိမ်ကို လာရောက် မွှေနှောက်မည့်သူ မရှိသောကြောင့်

ဖြစ်သည်။

“သဲပွင့်လေးတွေအဖြစ် ပြောင်းပြီး သဲကန္တာရထဲ ပစ်ထားရင်ကော မရဘူးလား”

“ခရုခွံလေးအဖြစ် ပြောင်းပြီး ပင်လယ်အောက်ခြေမှာ နစ်မြုပ်ထားတာကလည်း

နည်းလမ်းကောင်းတစ်ခုပဲ”

ဤကဲ့သို့သော မေးခွန်းများကို မေးမြန်းသူများမှာ ကျင့်ကြံမှုအဆင့် နိမ့်ပါးသူများသာ

ဖြစ်ကြသည်။ အမှန်စင်စစ် အဆင့်ခုနစ်၊ ရှစ် သို့မဟုတ် ကိုးသို့ ရောက်ရှိသွားသော

ကျွမ်းကျင်သူများသည် ဝိညာဉ်အာရုံကို အပြင်သို့ ထုတ်လွှတ်နိုင်စွမ်း

ရှိကြသည်။ ဝိညာဉ်လှိုင်းများ မရှိသော်လည်း အဖိုးတန်လှသော

ဖြစ်တည်မှု မှော်လက်နက်တစ်ခုကို ပစ္စည်းပုံများကြားမှ

ရှာဖွေရန်မှာ သူတို့အတွက် မခက်ခဲပေ။

“ဒီပစ္စည်းမှာ ဝိညာဉ်လှိုင်းတွေ ရှိနေတာပဲ။ ခင်ဗျားတို့ ပြောတဲ့ နည်းလမ်းတွေက

အလုပ်ဖြစ်မှာ မဟုတ်ဘူး”

“ကျွမ်းကျင်သူတစ်ယောက်ရဲ့ အာရုံဟာ မိုင်ပေါင်းထောင်ချီအထိ ရောက်နိုင်တယ်။

ခင်ဗျားတို့က မျက်စိနဲ့ မမြင်ရရင် ရပြီလို့ ထင်နေပေမဲ့

ကျွမ်းကျင်သူတွေရဲ့ မျက်စိထဲမှာတော့ ဒီပုလဲဟာ အမှောင်ထဲက

မီးသီးတစ်လုံးလို လင်းထိန်နေမှာပဲ”

ထိုအခါ ထက်မြက်သော အင်တာနက် အသုံးပြုသူအချို့က ပိုမို ထူးခြားသော နည်းလမ်းများကို

စဉ်းစားလာကြသည်။

“ကျွန်တော်ကတော့ ရှပြည်ကြီးရဲ့ ဆည်ကြီးတစ်ခုမှာ အုတ်မြစ်ကျောက်အဖြစ် ပြောင်းလဲပြီး

နိုင်ငံတော်ကို စောင့်ရှောက်မယ်”

“ကျွန်တော်ကတော့ ကောင်းကင်နန်းဆောင်ရဲ့ အစိတ်အပိုင်းတစ်ခုအဖြစ် ပြောင်းလဲပြီး

ရှပြည်ကြီးရဲ့ ကောင်းကင်ယံကို စောင့်ရှောက်မယ်”

“ကျွန်တော်ကတော့ နန်းတော်ကြီးရဲ့ အုတ်ကြွပ်ပြားလေးတွေအဖြစ် ပြောင်းလဲပြီး

ရှပြည်ကြီးရဲ့ ယဉ်ကျေးမှုကို အတူတူ စောင့်ရှောက်သွားမယ်”

ခဏအတွင်းမှာပင် အင်တာနက်ပေါ်တွင် ဖြစ်တည်မှု မှော်လက်နက်ကို ဖုံးကွယ်မည့်

နည်းလမ်းများအကြောင်း အပြင်းအထန် ဆွေးနွေးလာကြသည်။ ဤမြင်ကွင်းက

နိုင်ငံခြားသားများကို အလွန်ပင် မနာလို ဖြစ်စေသည်။ မြွေနက်စင်း ဆန္ဒပြည့်ပုလဲမှာ

ပြည်ပတွင် အလွန် ရှားပါးလှသော်လည်း ရှပြည်ကြီးတွင်မူ လူတိုင်းနီးပါး

ပိုင်ဆိုင်ထားသကဲ့သို့ ဖြစ်နေသည်။

“ဒီပစ္စည်းက ငါတို့နိုင်ငံထဲကို ဘယ်တော့မှ ရောက်လာမှာလဲ”

“ငါတို့နိုင်ငံမှာလည်း ဒါမျိုးလေး တစ်ခုလောက် ရှိစေချင်လိုက်တာ”

စူးချီ၏ ကျင့်စဉ်အသေးစိတ်ကို မသင်ကြားရသေးမီမှာပင် မိုင်ပေါင်းထောင်ချီ ဝေးကွာသော

လှပသောနိုင်ငံမှာတော့ ဆူညံသွားပြီ ဖြစ်သည်။ ထိုနိုင်ငံမှ

စီးပွားရေးလုပ်ငန်းစုကြီးများသည်

အခြေအနေကို ပထမဆုံး ရိပ်မိသွားကြသည်။ အစပိုင်းတွင် သူတို့သည် မြွေနက်စင်း

ဆန္ဒပြည့်ပုလဲကို အလှဆင်ပစ္စည်းတစ်ခုဟုသာ ထင်ခဲ့ကြသော်လည်း ယခုမူ ၎င်းသည်

အပိုအသက်တစ်ချောင်းကို ပေးစွမ်းနိုင်သော အရေးကြီးသည့်

ပစ္စည်းဖြစ်ကြောင်း သိသွားကြပြီ ဖြစ်သည်။ ထို့ကြောင့်

ထိုလုပ်ငန်းစုကြီးများသည် မြွေနက်စင်း ဆန္ဒပြည့်ပုလဲကို

၎င်းတို့၏ နိုင်ငံဈေးကွက်အတွင်းသို့ မရမက သွင်းယူရန် သဘောတူညီမှု

ရရှိခဲ့ကြသည်။

အလားတူပင် လှပသောနိုင်ငံ၏ စစ်တပ်မှာလည်း အကြီးအကျယ် တုန်လှုပ်သွားရသည်။ သူတို့

ဝန်ခံချင်သည်ဖြစ်စေ၊ မရှိသည်ဖြစ်စေ လှပသောနိုင်ငံနှင့်

ရှပြည်ကြီးကြားတွင် စစ်ရေးအရ

ပြိုင်ဆိုင်မှုများ ရှိနေသည်။ တာ့ချန်းမှတ်တမ်း

ပေါ်ထွက်လာခြင်းကပင် ထိုပြိုင်ဆိုင်မှုကို ဟန်ချက်ပျက်စေခဲ့ပြီး ဖြစ်သည်။

သို့သော် တာ့ချန်းမှတ်တမ်းဖြင့် အဆင့်မြင့် ကျွမ်းကျင်သူများကို

သတ်ရန်အတွက် ရှပြည်ကြီးဘက်ကလည်း လူတစ်ယောက် အနစ်နာခံရမည် ဖြစ်သဖြင့်

လှပသောနိုင်ငံဘက်မှ မျှော်လင့်ချက် ရှိနေသေးသည်။

ယခုမူ မြွေနက်စင်း ဆန္ဒပြည့်ပုလဲအတွင်း ဝိညာဉ်ကို အပ်နှံထားခြင်းဖြင့်

ပြန်လည်ရှင်သန်နိုင်သည်ဆိုသော အချက်က သူတို့ကို

အားလျော့သွားစေသည်။ အကယ်၍ ရှပြည်ကြီးမှ ကျင့်စဉ်နိမ့်ပါးသူတစ်ဦးက

သူတို့၏ အဆင့်ကိုး ကျွမ်းကျင်သူတစ်ဦးနှင့် အတူတူ အသေခံလိုက်မည်ဆိုပါက သူတို့ဘက်မှ

လူမှာ အမှန်တကယ် သေဆုံးသွားမည် ဖြစ်သော်လည်း ရှပြည်ကြီးဘက်မှ လူမှာမူ

ပြန်လည်ရှင်သန်လာမည် မဟုတ်ပါလား။ ဤကဲ့သို့သော စစ်ပွဲမျိုးကို

မည်သို့ တိုက်ခိုက်နိုင်ပါမည်နည်း။

စစ်ဘက်ဆိုင်ရာ ထိပ်တန်း အရာရှိကြီးများ၏ အမြင်အရဆိုလျှင် လှပသောနိုင်ငံသည် စစ်ရေးအရ

အရှုံးကြီး ရှုံးနိမ့်သွားပြီ ဖြစ်သည်။ ရှပြည်ကြီးအနေဖြင့် အင်အားပင် ထပ်မံ

ပြသနေစရာ မလိုတော့ပေ။ စူးချီ၏ သင်ကြားမှု စတင်ကာစမှာပင်

လှပသောနိုင်ငံ၏ စစ်တပ်အတွင်း စိတ်ပျက်အားငယ်မှုများ စတင်

ဖုံးလွှမ်းသွားတော့သည်။

စူးချီသည် မြွေနက်စင်း ဆန္ဒပြည့်ပုလဲကို ဖုံးကွယ်ထားရန် အရေးကြီးပုံကို

ရှင်းပြပြီးနောက် သတိပေးချက်တစ်ခု ထပ်မံ

ထည့်သွင်းလိုက်သည်။

“ဒီကျင့်စဉ်ကို မကျင့်ကြံခင်မှာ ခင်ဗျားတို့ရဲ့ မူလဝိညာဉ် ကျင့်ကြံမှုဟာ

အဆင့်တစ်ခုကို ရောက်ရှိနေဖို့ လိုအပ်ပါတယ်။

အလွယ်ပြောရရင်တော့ ဝိညာဉ်လွင့်

အသက်ရှူအောင်းဓာတ်ပညာရဲ့ အခြေခံအဆင့်ကို

တတ်မြောက်ထားရမှာ ဖြစ်ပါတယ်”

စူးချီက ပေါ့ပေါ့ပါးပါး ပြောလိုက်သော်လည်း ကမ္ဘာတစ်ဝန်းရှိ နိုင်ငံခြားသားများမှာမူ

တုန်လှုပ်သွားကြသည်။ ယခင်က ရှပြည်ကြီးသားများ ဘာကြောင့် မြန်မြန်ဆန်ဆန်

ကျင့်ကြံနိုင်သလဲဆိုသည့် လျှို့ဝှက်ချက်ကို သူတို့

မသိခဲ့ကြပေ။ လမ်းစဉ်သစ်ကျောင်း၏ ထိပ်တန်း ကျောင်းသား ၃၀

ရာခိုင်နှုန်းသာ ကျင့်စဉ်အရှိန်မြှင့်တင်မှုကို ရရှိခဲ့ခြင်း

ဖြစ်သည်။

ထိုစဉ်က ရှပြည်ကြီးသားများသည် နိုင်ငံခြားသားများကို စိတ်ကြိုက် ကစားခဲ့ကြသည်။

နိုင်ငံခြားသားများ မည်မျှပင် ကြိုးစားပါစေ၊ သူတို့သည် ကျန်ရှိသော ၇၀

ရာခိုင်နှုန်း အတန်းများထဲသို့သာ အမြဲတမ်း ရောက်ရှိနေခဲ့သည်။ ယခုမူ

စူးချီနှင့် ရှပြည်ကြီး အာဏာပိုင်များ၏ အစီအစဉ်အရ နိုင်ငံခြားသား

အားလုံးအတွက် သီးသန့် အွန်လိုင်း အတန်းတစ်ခု ဖွင့်ပေးလိုက်ပြီ ဖြစ်သည်။ မည်သူက

ထိပ်တန်း ၃၀ ရာခိုင်နှုန်းအတွင်း ဝင်ရောက်ပြီး အရှိန်မြှင့်တင်မှု

ရရှိမလဲဆိုသည်မှာ သူတို့၏

ကိုယ်ပိုင်အရည်အချင်းပေါ်တွင်သာ

မူတည်တော့သည်။

ဤအတန်း တစ်ခုတည်းကပင် ကမ္ဘာတစ်ဝန်းရှိ သိုင်းပညာရှင်များကို တစ်ဦးနှင့်တစ်ဦး

ရန်သူများ ဖြစ်သွားစေခဲ့သည်။ လူတိုင်းက သူတို့ရှေ့ကလူတွေ မြန်မြန်

သေသွားစေရန်သာ ဆုတောင်းနေကြတော့သည်။

သတိပေးချက်များ ပြီးဆုံးသွားသောအခါ စူးချီသည် ကျင့်စဉ်ကို အသေးစိတ် စတင်

ရှင်းပြလိုက်သည်။

“အခု ကျွန်တော် ကျင့်စဉ်ကို တရားဝင် ရှင်းပြပါ့မယ်။ ဖြစ်တည်မှု မှော်လက်နက်

သန့်စင်ခြင်းပညာရဲ့ ဂါထာကို အားလုံး မှတ်ထားကြပါ”

စူးချီ ရှင်းပြနေစဉ်မှာပင် မျက်နှာပြင်ပေါ်၌ ဂါထာစာသားများ ပေါ်လာသည်။

“လောကီစိတ်ကို ငြိမ်သက်စေ၊ ဝိညာဉ်အာရုံကို ကြည်လင်စေ၊ မှန်ကန်တဲ့

ဝိညာဉ်အလင်းတစ်စက်ဟာ မိမိရဲ့ မူလသဏ္ဌာန်ကို

ဖော်ထုတ်လိမ့်မယ်”

“ဂါထာကို ရွတ်ဆိုတဲ့အခါမှာ မိမိရဲ့ မူလဝိညာဉ်ကို အာရုံစူးစိုက်ပြီး မြင်အောင်

ကြည့်ရပါမယ်။ မူလဝိညာဉ်ကို ဝိညာဉ်အာရုံရဲ့ ကြယ်စင်ပင်လယ်ထဲမှာ

တွေ့လိုက်ရပြီဆိုရင်တော့ စိတ်အာရုံကို အသုံးပြုပြီး

ဝိညာဉ်အလင်းတစ်စက်ကို ထုတ်ယူရမှာ ဖြစ်ပါတယ်”

“ဒီလုပ်ငန်းစဉ်အတွင်းမှာ စိတ်ပျံ့လွင့်လို့ လုံးဝ မရပါဘူး။ အကယ်၍

အာရုံများသွားမယ်ဆိုရင် ထုတ်ယူလိုက်တဲ့

မူလဝိညာဉ်ဟာ မကောင်းတဲ့ စွမ်းအင်တွေ ပါသွားနိုင်ပြီး နောက်ပိုင်းမှာ

မှော်လက်နက်နဲ့ ပေါင်းစပ်တဲ့အခါ အခက်အခဲတွေ ရှိလာနိုင်ပါတယ်”

“အောင်မြင်စွာ ထုတ်ယူပြီးပြီဆိုရင်တော့ မူလဝိညာဉ်ကို ဖြစ်တည်မှု မှော်လက်နက်ထဲသို့

ထည့်သွင်းရမှာ ဖြစ်ပါတယ်။ မူလဝိညာဉ်က မှော်လက်နက်ရဲ့ မျက်နှာပြင်နဲ့

ထိတွေ့မိတဲ့အခါမှာ စူးရှတဲ့ နာကျင်မှုကို ခံစားရမှာ

ဖြစ်ပြီး အဲဒီအချိန်မှာ သတိမလွတ်သွားအောင် မိမိရဲ့ လျှာကို

ကိုက်ထားရပါမယ်။ မူလဝိညာဉ် တစ်ခုလုံး

စိမ့်ဝင်သွားပြီဆိုရင်တော့ မှော်လက်နက်ဆီကနေ

တုန်ခါသံတစ်ခု ထွက်ပေါ်လာပါလိမ့်မယ်”

အခြေခံများကို ရှင်းပြပြီးနောက် စူးချီက အခြား သတိထားရမည့် အချက်များကို ဆက်လက်

ပြောကြားသည်။

“အကယ်၍ ခင်ဗျားတို့ရဲ့ ကျင့်ကြံမှုဟာ အဆင့်ခုနစ်ကို မရောက်သေးဘူးဆိုရင် ဒါမှမဟုတ်

ဝိညာဉ်လွင့် ကျင့်စဉ်မှာ အခြေခံအဆင့်မှာပဲ ရှိနေသေးတယ်ဆိုရင်တော့

မှော်လက်နက်ကို ပြုစုပျိုးထောင်ဖို့ လိုအပ်ပါဦးမယ်”

လူတစ်ဦးချင်းစီ၏ အဆင့်အတန်း မတူညီကြသဖြင့် လက်တွေ့ အသုံးပြုရာတွင်လည်း

ကွာခြားမှုများ ရှိနိုင်သည်။ ပုံမှန်အားဖြင့်

ဝိညာဉ်စွမ်းအား ကောင်းမွန်သော သိုင်းပညာရှင်များသည်

မူလဝိညာဉ်ကို တိုက်ရိုက် အပ်နှံနိုင်သော်လည်း

အဆင့်နိမ့်သူများအတွက်မူ အပ်နှံလိုက်သော

ဝိညာဉ်စွမ်းအားမှာ အလွန် အားနည်းနေပေလိမ့်မည်။ ထိုပြဿနာများအတွက် စူးချီက

အဖြေထုတ်ပေးလိုက်သည်။

“ဝိညာဉ်စွမ်းအား အားနည်းနေတယ်ဆိုရင်တော့ တစ်နေ့ကို နှစ်ကြိမ် ပြုစုပျိုးထောင်မှု

လုပ်ပေးရပါမယ်။ မနက်ခင်းမှာ မှော်လက်နက်ကို လက်ဖဝါးထဲ ထည့်ပြီး

သွေးဓာတ်ပုံစံအတိုင်း စွမ်းအင်တွေကို လှည့်ပတ်ပေးရမှာ

ဖြစ်ပါတယ်။ ဒါက အဓိက အာရုံကြော ၆၆ ခုကို လှုံ့ဆော်ပေးပါလိမ့်မယ်”

“ညဘက်မှာတော့ မှော်လက်နက်ကို ကုတင်ခေါင်းရင်းမှာ ထားပြီး အိပ်မက်ထဲကနေ

မူလဝိညာဉ်ချင်း ဆက်သွယ်ပေးရပါမယ်။ ဒါဟာ

မှော်လက်နက်အတွင်းမှာရှိတဲ့ မူလဝိညာဉ်ကို

ပုံစံကျလာအောင်နဲ့ တည်ငြိမ်လာအောင် ကူညီပေးပါလိမ့်မယ်”