အခန်း (၁၅၇-၁၅၈)

အခန်း ၁၅၇ - တွေ့ဆုံခြင်း

ဆိုင်းလပ်စ်က ခဏမျှ တိတ်ဆသွားပြီးနောက် "ကောင်းပြီလေ။ ဒါဆို စစ်ဘက်ရေးရာရုံးကို လာခဲ့လိုက်ပါ။ သူတို့ အဲဒီမှာ မင်းကို စောင့်နေကြလိမ့်မယ်" ဟု ပြောလိုက်သည်။

"ဟုတ်ကဲ့" အိုင်ဗီက အလျင်အမြန် ပြန်ဖြေလိုက်သည်။ သူမ ဖုန်းချလိုက်ပြီးနောက် ထွက်ပေါက်ဆီသို့ အပြေးအလွှား သွားတော့သည်။

သို့သော် လမ်းတစ်ဝက်မှာတင် သူမ ခြေလှမ်းများ တန့်သွားသည်။ ကြောက်စရာကောင်းသော အတွေးတစ်ခု ဝင်လာသဖြင့် သူမ၏ မျက်လုံးများ ဝိုင်းစက်သွားရ၏။

'နေပါဦး... စခန်းက ရှိသေးတာပဲ။ ငါ ဒီမှာ မရှိရင် ဒီနေရာက မလုံခြုံဘူး။ ငါ့ရဲ့ စွမ်းအားကမှ ဒီနေရာကို ကာကွယ်ပေးထားတာ။ ငါ ထွက်သွားရင် အထဲက လူတွေအတွက် အန္တရာယ်ရှိသွားနိုင်တယ်'

သူမ လက်သီးကို ကျစ်ကျစ်ပါအောင် ဆုပ်လိုက်မိသည်။

'သူတို့ကို အကာအကွယ်မရှိဘဲ ငါ ထားခဲ့လို့ မဖြစ်ဘူး။ ဘာလုပ်ရမလဲ။ ငါ မရှိတဲ့အချိန်မှာ ဇမ်ဘီတွေ လာတိုက်ရင် ဘယ်လိုလုပ်မလဲ'

သူမ၏ စိတ်တွေ လှုပ်ရှားနေမိသည်။ ရုတ်တရက် သူမ မစစ်ဆေးရသေးသော ဝှက်ဖုံးနေသည့် စွမ်းဆောင်ရည်အသစ်ကို သတိရသွားသည်။ သူမ အမြန်ပင် စွမ်းအင်သိုလှောင်ခန်းကို ဖွင့်လိုက်ပြီး စနစ်၏ မျက်နှာပြင်ထဲသို့ ဝင်လိုက်သည်။

စွမ်းဆောင်ရည်အသစ်ကို မြင်လိုက်ရသည့် ခဏမှာပင် သူမ ပါးစပ်အဟောင်းသား ဖြစ်သွားရကာ ရင်ထဲတွင်လည်း တက်ကြွမှုများဖြင့် ခုန်ပေါက်သွားတော့သည်။

"မယုံနိုင်စရာပဲ" သူမ အံ့သြတကြီး ရေရွတ်လိုက်သည်။ "ဒါ... ဒါက အခု ငါ့အတွက် အလိုအပ်ဆုံးအရာပဲ"

စွမ်းဆောင်ရည်၏ ဖော်ပြချက်မှာ ရှင်းလင်းလှသည်။ သူမ၏ ဘေးကင်းဇုန် စွမ်းအားကို အချိန်ပိုင်းသိုလှောင်ခန်းအတွင်းရှိ ပစ္စည်းများနှင့် အဆောက်အဦးများအထိ လွှမ်းခြုံနိုင်အောင် တိုးချဲ့နိုင်ခြင်းပင် ဖြစ်သည်။

'ဒါဆိုရင်... ငါ ဒီမှာ မရှိရင်တောင် တိုက်ခန်းတွေကို ငါ ကာကွယ်ထားလို့ ရပြီပေါ့'

သူမ လက်များ တုန်ယင်လျက် စမ်းသပ်ကြည့်လိုက်သည်။ မျက်လုံးများကို မှိတ်ကာ ပေါလ်နှင့် လင်ဒါတို့ နေထိုင်သည့် တိုက်ခန်းကို အာရုံပြုလိုက်သည်။

ချက်ချင်းဆိုသလိုပင် အဆောက်အဦးကို ဝန်းရံလျက် ပါးလွှာသော အလင်းတန်းလေးတစ်ခု ပေါ်လာသည်။ ၎င်းသည် နူးညံ့သော ပန်းရောင်ဖျော့ဖျော့လေး ဖြစ်သော်လည်း သာမန်မျက်စိဖြင့် မမြင်နိုင်ပေ။ အိုင်ဗီတစ်ယောက်သာ မြင်တွေ့နိုင်သည်။

သူမ၏ ရင်ထဲတွင် ပျော်ရွှင်မှုများ ပြည့်လျှံသွားသည်။ "အောင်မြင်ပြီ"

ထို့နောက် နောက်ထပ် စနစ်မျက်နှာပြင်တစ်ခု ပေါ်လာပြန်သည်။ ထိုအကာအကွယ်ကို ထိန်းသိမ်းထားရန် KB အသုံးပြုရမည်ဟု ရှင်းပြထား၏။

"တိုက်ခန်းတစ်ခန်းအတွက်... တစ်ရက်စာကို... ၁၀ KB တဲ့"

သူမ၏ မျက်လုံးများ ထပ်မံ ဝိုင်းစက်သွားသည်။ "ဈေးကြီးလိုက်တာ။ ဒါပေမဲ့... ငါ့မှာ KB တွေ အများကြီး ရှိနေတာပဲ။ ဒါက အကောင်းဆုံးပဲ"

သူမ ခပ်တိုးတိုး ရယ်မောလိုက်မိသည်။

'အခုမှပဲ စိတ်အေးလက်အေး ထွက်သွားနိုင်တော့မယ်။ ဒါရှိရင် သူတို့ ဘေးကင်းမှာပါ။ ဇမ်ဘီတွေ လာရင်တောင် ဒီအကာအကွယ်ကို ဖောက်နိုင်မှာ မဟုတ်ဘူး'

အိုင်ဗီသည် လမ်းမများအတိုင်း အမြန်လျှောက်လာခဲ့ပြီး စစ်ဘက်ရေးရာရုံးရှိရာ အဆောက်အဦး မြင့်ကြီးဆီသို့ ရောက်ရှိလာသည်။ အပြင်ဘက်တွင် စစ်သားများက တည်ကြည်သော မျက်နှာထားများဖြင့် စောင့်ကြပ်နေကြသော်လည်း သူမကို မြင်သောအခါ ချက်ချင်းပင် အတွင်းသို့ ဝင်ခွင့်ပြုလိုက်ကြသည်။

ကျယ်ဝန်းသော ခန်းမထဲသို့ ခြေချလိုက်စဉ် သူမ၏ ရင်ခုန်သံများ ပိုမြန်လာသည်။

ထိုနေရာတွင် ဒန်နီယယ်နှင့် တာလီယာတို့က တစ်ဖက်တွင် ထိုင်နေကြသည်။

ဆိုင်းလပ်စ်ကတော့ ဒန်နီယယ်၏ အနားတွင် လက်မှတ်ထိုးလျက် တည်ငြိမ်သော မျက်နှာထားဖြင့် ရပ်နေသည်။ သို့သော် သူ၏ အကြည့်များက အိုင်ဗီထံသို့ ရောက်ရှိသွားသည့် ခဏမှာပင် သူ၏ မျက်နှာက အရည်ပျော်ကျသွားသော ရေခဲပြင်ကဲ့သို့ နူးညံ့သွားတော့သည်။

သူက သူမကို နွေးထွေးစွာ ပြုံးပြလိုက်ရာ အိုင်ဗီ၏ ရင်ထဲတွင် နွေး‌ထွေးသွားသလို ခံစားလိုက်ရသည်။

ဒန်နီယယ်နှင့် တာလီယာတို့ နှစ်ယောက်လုံးက ထိုရုတ်တရက် ပြောင်းလဲသွားမှုကို သတိထားမိလိုက်ကြပြီး အကြည့်ချင်း ဖလှယ်လိုက်ကြသည်။

'တကယ်ပဲကိုး' ဒန်နီယယ်က သက်ပြင်းချရင်း တွေးလိုက်မိသည်။ 'ဒီကောင်လေးက စောစောကမှ အိုင်ဗီ ဘယ်လောက် အလုပ်များတယ်၊ ဘယ်လောက် ပင်ပန်းတယ်ဆိုတာတွေကို ပြောပြီး ငါတို့ကို အပြစ်တင်နေတာ။ အခု သူမ ရောက်လာတော့လည်း ရုတ်တရက် ကြင်နာတတ်တဲ့ ခွေးပေါက်လေးလို ဖြစ်သွားတာပဲ။ အချစ်မှာ မျက်စိကန်းနေတဲ့ ငတုံးလေးပဲ'

တာလီယာ၏ နှုတ်ခမ်းများ တွန့်သွားသော်လည်း သူမ ဘာမှ ထုတ်မပြောခဲ့ပါ။

အိုင်ဗီက သူတို့ဆီသို့ လျှောက်သွားပြီး တာလီယာ၏ ဘေးရှိ လွတ်နေသော ထိုင်ခုံတွင် တွန့်ဆုတ်မနေဘဲ ထိုင်လိုက်သည်။

တာလီယာက သူမကို တည့်တည့်ကြည့်လိုက်ပြီး "အိုင်ဗီ၊ ငါ နင့်ကို တစ်ခုခု ပြောမလို့။ ငါ အပြင်ထွက်ပြီး ငါ့စေ့စပ်ထားတဲ့သူနဲ့ သွားတွေ့ချင်တယ်"

အိုင်ဗီ တစ်ကိုယ်လုံး တောင့်တင်းသွားရသည်။ သူမ၏ လက်များက ဒူးပေါ်တွင် တင်းတင်းဆုပ်ထားမိသည်။ သူမ စကားမပြောခင် နှုတ်ခမ်းကို ခေတ္တကိုက်လိုက်ပြီးမှ "နင် ပေးထားတဲ့ ကတိကို မေ့သွားပြီလား"

တာလီယာ တုံ့ခနဲ ဖြစ်သွားသည်။ "အဲဒီလို မဟုတ်ပါဘူး။ ဒီတစ်ကြိမ်က... သိပ်ကို အရေးကြီးလို့ပါ။ ငါသာ မသွားရင် သူက စေ့စပ်ထားတာကို ဖျက်ပစ်တော့မှာ"

အိုင်ဗီ၏ မျက်နှာက ညိုမှောင်သွားကာ အသံကလည်း ထက်မြက်လာသည်။ "အဲဒါဆိုရင် ပိုတောင် ကောင်းသေးတာပေါ့။ နင် အဲဒီလို လူယုတ်မာမျိုးနဲ့ လမ်းခွဲလိုက်သင့်တာ"

သူမ၏ လေသံကြောင့် ဒန်နီယယ်ပင် အံ့သြသွားကာ မျက်ခုံးပင့်လိုက်မိသည်။

တာလီယာက အိုင်ဗီကို မှင်သက်စွာ စိုက်ကြည့်နေမိသည်။ သူမက တိုးတိုးလေး မေးလာသည်။ "နင်... နင်က သူ့ကို အရမ်းမုန်းနေသလိုပဲ။ ဘာလို့လဲ။ သူ... သူ နင့်အပေါ် တစ်ခုခု လုပ်ခဲ့လို့လား"

သူမ၏ မျက်လုံးများက သံသယများဖြင့် မှေးစပြုလာသည်။ ခဏမျှ သူမ၏ ခန္ဓာကိုယ်က တိုက်ခိုက်ရန် အသင့်ဖြစ်နေသလို တင်းမာသွားသည်။ "သူသာ နင့်ကို အန္တရာယ်ပြုဖို့ ကြိုးစားခဲ့မယ်ဆိုရင် အိုင်ဗီ... ငါကိုယ်တိုင် သူ့ကို သတ်ပစ်မယ်လို့ ကျိန်ရဲတယ်သိလား"

သူမ၏ စေ့စပ်ထားသူက သူမကို သစ္စာဖောက်ရုံတင်ဆိုလျှင် သူမ လျစ်လျူရှုထားနိုင်သေးသော်လည်း အကယ်၍ အိုင်ဗီအပေါ် တစ်ခုခု ကြံစည်ခဲ့သည်ဆိုလျှင်တော့... သူမ သူ့ကို အရှင်ထားမှာ မဟုတ်ပေ။

'အိုင်ဗီက ငါ့မောင်လေးရဲ့ ချစ်သူဖြစ်သလို မိန်းကလေးတစ်ယောက်လည်း ဖြစ်တယ်။ ငါ့ရဲ့ မသိနားမလည်မှုကြောင့် မိန်းကလေးတစ်ယောက်ကို ဒုက္ခမရောက်စေရဘူး'

အိုင်ဗီက သူမကို တိတ်ဆိတ်စွာ ကြည့်နေမိသည်။ တာလီယာ၏ စိတ်ခံစားချက်များကို သူမ ရှင်းရှင်းလင်းလင်း မြင်နေရသည်။ တာလီယာက သူမကို မနှစ်သက်သော်လည်း ဒုက္ခရောက်နိုင်သည့် မိန်းကလေးများအပေါ်တွင်မူ နူးညံ့သော နှလုံးသား ရှိနေဆဲပင်။

'သူ့ကို သနားလိုက်တာ' အိုင်ဗီက ဝမ်းနည်းစွာ တွေးလိုက်မိသည်။ 'သူက တခြားမိန်းကလေးတွေကို ကာကွယ်ပေးချင်ပေမဲ့ သူကိုယ်တိုင်ကတော့ သားကောင် ဖြစ်သွားရရှာတယ်။ မုဆိုးရဲ့ ပစ်မှတ် ဖြစ်နေတာကို သူ ကိုယ်တိုင်တောင် မသိသေးဘူး'

အိုင်ဗီ၏ မျက်လုံးများက တည်ကြည်လေးနက်သွားကာ ခိုင်ခိုင်မာမာ ပြောလိုက်သည်။

"တာလီယာ၊ ငါပြောတာကို နားထောင်ပါ။ နင် စခန်းကနေ ထွက်ပြီး ချိန်းထားတဲ့ နေရာကို သွားတဲ့အခါ နင့်စေ့စပ်ထားတဲ့သူက ဖုန်းဆက်လိမ့်မယ်။ သူ ဆယ်မိနစ်လောက် နောက်ကျမယ်လို့ ပြောလိမ့်မယ်။ နင်ကလည်း စောင့်နေမှာပဲ။ ဒါပေမဲ့ အဲဒီ ဆယ်မိနစ်အတွင်းမှာ တစ်ခုခု ဖြစ်လာလိမ့်မယ်။ နင် ရုတ်တရက် အားအင်ကုန်ခမ်းသွားပြီး မူးလဲတော့မလို ခံစားရလိမ့်မယ်။ နင် ပြန်နိုးလာတဲ့အချိန်မှာတော့ နင့်ကို ဘလက်ခ် ဗာချာအဖွဲ့တွေ ဝိုင်းထားကြလိမ့်မယ်။ သူတို့က နင့်ကို ဖမ်းခေါ်သွားပြီး... ပြောပြဖို့တောင် ခက်ခဲတဲ့ ရက်စက်မှုတွေ လုပ်ကြလိမ့်မယ်"

တာလီယာ၏ မျက်နှာက ဖြူလျော်သွားကာ တုန်တုန်ယင်ယင်ဖြင့် "ဘာ... ဘာတွေ ပြောနေတာလဲ"

အိုင်ဗီ သွားကို တင်းတင်းကြိတ်လိုက်သည်။

"အဲဒီနောက်မှာမှ နင့်စေ့စပ်ထားတဲ့သူက နင့်ကို လာကယ်သလိုမျိုး လုပ်လိမ့်မယ်။ ဒါပေမဲ့ အချိန်နှောင်းသွားပြီလေ။ အဲဒီ စိတ်ဒဏ်ရာက နင့်ဆီကနေ ဘယ်တော့မှ ပျောက်သွားမှာ မဟုတ်ဘူး။ အဲဒီအတွက်ကြောင့်ပဲ နင် လေ့ကျင့်တာတွေကို ဆက်ပြီး မလေ့ကျင့်နိုင်တော့ဘူး။ တစ်နေ့ကျရင် အဲဒီအတိတ်ဆိုးတွေကြောင့်ပဲ နင် အသက်တိုသွားလိမ့်မယ်"

အခန်းထဲတွင် တိတ်ဆိတ်သွားသည်။ ဒန်နီယယ်က လက်သီးကို ကျစ်ကျစ်ပါအောင် ဆုပ်ထား၏။ ဆိုင်းလပ်စ်၏ မေးရိုးများလည်း တင်းနေသည်။

တာလီယာက မျက်လုံးအဝိုင်းသားဖြင့် အိုင်ဗီကို စိုက်ကြည့်နေမိသည်။ ထို့နောက် သူမ၏ အသံက တုန်ယင်လာသည်။ "အဲဒီနောက်ရော... ငါ့စေ့စပ်ထားတဲ့သူက ဘာလုပ်ခဲ့သေးလဲ"

အိုင်ဗီ၏ လက်များက တင်းတင်းဆုပ်ထားမိကာ နာကျင်စွာ ပြောလိုက်သည်။

"အစပိုင်းမှာတော့ သူက နင့်ဘေးမှာ ရှိနေပေးခဲ့ပါသေးတယ် နင့်အတွက် ဘလက်ခ် ဗာချာအဖွဲ့က လူအချို့ကိုလည်း သတ်ပေးခဲ့တယ်။ နင့်မိသားစုတွေ စွပ်စွဲခံရတဲ့အချိန်မှာတောင် သူက ကာကွယ်ပေးခဲ့သေးတာ ဒါပေမဲ့ နောက်ပိုင်းမှာတော့ သူ တခြားမိန်းကလေးတစ်ယောက်နဲ့ တွေ့သွားတယ် သူ့အဖွဲ့ထဲက အပြစ်ကင်းစင်တဲ့ မိန်းကလေးတစ်ယောက်ပေါ့ သူက နင့်ကို တဖြည်းဖြည်း လက်လျှော့လာခဲ့တယ်။ နင့်အတွက် တရားမျှတမှု ရအောင် သူ အစွမ်းကုန် လုပ်ပေးခဲ့ပြီးပြီလို့ သူက ပြောခဲ့တယ် အဲဒီနောက်မှာတော့... သူ နင့်ကို စွန့်ပစ်ပြီး အဲဒီမိန်းကလေးနောက် လိုက်သွားခဲ့တယ်"

တာလီယာ၏ နှုတ်ခမ်းများ တုန်ယင်နေသည်။ သူမ ဘာမှ ပြန်မပြောနိုင်ဘဲ မိမိ၏ လက်ကိုသာ ငုံ့ကြည့်နေမိတော့သည်။

'အိုင်ဗီ... ဒါတွေကို နင် ဘယ်လို သိနေတာလဲ' သူမ ထိတ်လန့်စွာ တွေးနေမိသည်။ 'ဒါတွေက ဘာလို့... တကယ့်အစစ်အမှန်တွေလို ခံစားနေရတာလဲ'

သူမ အသက်ကို ခက်ခဲစွာ ရှူလိုက်ရသည်။

"အိုင်ဗီ... ငါ... ငါ ဘာလို့လဲတော့ မသိဘူး၊ နင်ပြောတဲ့ စကားတွေက ငါနဲ့ သိပ်နီးစပ်နေသလိုပဲ။ သိလား... ငါက အညစ်အကြေးတွေကို အရမ်းမုန်းတာ။ ငါ မခံစားနိုင်ဘူး။ အကယ်၍ ငါ့ခန္ဓာကိုယ်ကို တစ်ယောက်ယောက်က မဖွယ်မရာ ထိကိုင်ခဲ့မယ်ဆိုရင် ငါ ပြိုလဲသွားလိမ့်မယ်။ ငါ့မှာ ဒီလို သန့်ရှင်းမှုကို အစွဲအလမ်းကြီးတဲ့ ပြဿနာ ရှိတယ်။ ဒါကို ကုသရမယ်လို့ အမြဲတွေးခဲ့ပေမဲ့ ဘယ်လိုလုပ်ရမလဲ မသိခဲ့ဘူး။ အကယ်၍ နင်ပြောတာတွေသာ တကယ် ဖြစ်လာခဲ့မယ်ဆိုရင်တော့ ငါ... ငါ အသက်ရှင်နိုင်မှာ မဟုတ်ဘူး"

အခန်း ၁၅၈ - ကွတ်ကီးများ

ခဏအကြာတွင် သူမသည် ခေါင်းမော့လိုက်ပြီး "ဒါတောင်မှ ငါ သူ့ကို သွားတွေ့ချင်သေးတယ်။ ငါ အမှန်တရားကို သိဖို့ လိုအပ်တယ်" ဟု ပြောလိုက်သည်။

အိုင်ဗီက ပြန်လည်ငြင်းခုံရန် ပါးစပ်ဟလိုက်သော်လည်း တာလီယာက လက်ကာ၍ တားလိုက်သည်။ "နေဦး။

ငါထင်တာတော့... နင့်မှာ ယူဆချက်တစ်ခု ရှိနှင့်ပြီးသား မဟုတ်လား"

အိုင်ဗီက ဖြည်းဖြည်းချင်း ခေါင်းညိတ်ပြလိုက်သည်။ "ဟုတ်တယ် ငါ မမှားဘူးဆိုရင် နင့်စေ့စပ်ထားတဲ့သူက ဘလက်ခ် ဗာချာအဖွဲ့နဲ့ ပူးပေါင်းနေပြီးသားပဲ သူတို့တင်မကဘူး၊ သူတို့ကို နောက်ကွယ်က ထောက်ပံ့ပေးနေတဲ့ စစ်တပ်ထဲက အထက်လူကြီး တစ်ယောက်ယောက်နဲ့လည်း သူ ချိတ်ဆက်ထားသေးတယ်"

တာလီယာ အသက်ရှူပင် မှားသွားရသည်။ ဒန်နီယယ်၏ မျက်နှာ ညိုမှောင်သွားကာ ဆိုင်းလပ်စ်၏ မျက်လုံးများမှာလည်း ဓားကဲ့သို့ ထက်မြက်သွားတော့သည်။

တာလီယာက ခါးသီးစွာ ရယ်မောလိုက်သည်။ "ငါလည်း အဲဒီလိုပဲ ထင်နေခဲ့တာ။ ငါ့ကိုယ်ငါ ဝန်မခံချင်ခဲ့ရုံတင်ပါ။ ဒါပေမဲ့ နင်က အခုလို ပြောလိုက်ပြီဆိုတော့ ငါ့ကိုယ်ငါ ဆက်ပြီး လိမ်ညာနေလို့ မဖြစ်တော့ဘူး"

ဒန်နီယယ်က ခိုင်ခိုင်မာမာ ခေါင်းညိတ်သည်။ "ဒါက ဖြစ်နိုင်ခြေ ရှိတယ်။ အချိန်ကိုက်ပုံက သိပ်ကို သံသယဖြစ်စရာ ကောင်းနေတာ။ ငါတို့ ဒီတာဝန်ကို ရရုံရှိသေးတယ်၊ သူက ရုတ်တရက် စခန်းအပြင်ဘက်မှာ နင့်ကို လာတွေ့ခိုင်းတယ်ပေါ့။ နင့်ကို အကာအကွယ်မဲ့သွားအောင် သူ လုပ်နေတာပဲ"

ဆိုင်းလပ်စ်က အေးစက်စွာ ဝင်ပြောသည်။ "သူက နင့်ကို ဒီလို သစ္စာဖောက်ရဲတယ်ပေါ့လေ။ ဒါဆိုရင်တော့ သူ ကိုယ့်သင်္ချိုင်းကိုယ် တူးနေတာပဲ"

တာလီယာက သူမ၏ မျက်ရည်များကို သုတ်လိုက်သည်။ သူမက အိုင်ဗီကို ကြည့်ကာ ပြတ်သားသော ဆုံးဖြတ်ချက်ဖြင့် ဆိုလိုက်သည်။ "ကောင်းပြီလေ။ ငါ သူ့ကို သွားတွေ့မယ်။ ဒါပေမဲ့ အလိမ်ခံဖို့ မဟုတ်ဘူး။ ဒီတစ်ကြိမ်မှာတော့ ငါ သူ့အကြံကို ဖော်ထုတ်ပစ်မယ်။ ပြီးတော့ ငါ့အပေါ် အကွက်ချ ကြံစည်ခဲ့တဲ့ သူတိုင်းကို ငါ ကလဲ့စားချေပြမယ်"

အိုင်ဗီ လက်သီးကို ကျစ်ကျစ်ပါအောင် ဆုပ်လိုက်သည်။ သူမ၏ အသံမှာ ထက်မြက်လှသည်။ "အဲဒီလိုဆိုရင်တော့ ငါလည်း နင်နဲ့အတူ လိုက်ရမယ်"

ဒန်နီယယ်က ချက်ချင်းပင် ခေါင်းခါလိုက်သည်။ "မဖြစ်ဘူး။ နင် မလိုက်ရဘူး"

ဆိုင်းလပ်စ်ကလည်း မျက်မှောင်ကြုတ်ကာ "အိုင်ဗီ၊ ဒါက အရမ်း အန္တရာယ်များတယ်" ဟု တားသည်။

သို့သော် အိုင်ဗီက သူတို့ကို လျစ်လျူရှုထားလိုက်သည်။ သူမက တာလီယာကိုသာ စိုက်ကြည့်ရင်း "ဒါက အရေးကြီးတယ်။ ငါကိုယ်တိုင် မြင်တွေ့ရဖို့ လိုတယ်။ နင် ဘာလို့ ပြန်မခုခံနိုင်ခဲ့တာလဲ။ ဘာကြောင့် နင် မူးလဲသွားတာလဲ၊ ပြီးတော့ ဘလက်ခ် ဗာချာအဖွဲ့က နင့်ကို ဘာလို့ သတ်မပစ်ဘဲ နင့်စေ့စပ်ထားတဲ့သူကို လာကယ်ခွင့် ပေးခဲ့တာလဲ"

တာလီယာ တစ်ကိုယ်လုံး တောင့်တင်းသွားရသည်။ သူမ၏ မျက်လုံးများ ဝိုင်းစက်သွား၏။ အိုင်ဗီ ပြောတာ မှန်နေကြောင်း သူမ သိလိုက်သည်။

'ဟုတ်တယ်... အဲဒီအပိုင်းက ဘယ်လိုမှ အဓိပ္ပာယ်မရှိဘူး' သူမ တွေးနေမိသည်။ 'သူတို့ ငါ့ကို ဖမ်းမိရင် ဘာလို့ ဒီလောက် အလွယ်တကူ ပြန်လွှတ်ပေးရမှာလဲ။ တစ်ခုခုတော့ အကြောင်းရင်း ရှိရမယ်'

သူမ ခိုင်မာစွာ ခေါင်းညိတ်လိုက်သည်။ "နင်ပြောတာ မှန်တယ်။ နင် တကယ် လိုက်ချင်တယ်ဆိုရင်တော့ ငါ ခွင့်ပြုပါတယ်"

ဒန်နီယယ်က စားပွဲကို ရိုက်လိုက်သည်။ "တာလီယာ… ဆုံးဖြတ်ချက်တွေကို ဒီလောက် မြန်မြန် မချပါနဲ့!"

သို့သော် တာလီယာ၏ မျက်လုံးများက တည်ငြိမ်နေဆဲပင်။ "အဖေ၊ သမီးကို ယုံပါ။ အိုင်ဗီက အရေးကြီးတယ်လို့ ပြောရင် ဒါက တကယ် အရေးကြီးလို့ပဲ နေမှာပါ"

ဆိုင်းလပ်စ်က သက်ပြင်းပြင်းချလိုက်ရင်း သူ၏ နဖူးကို ပွတ်လိုက်သည်။ အိုင်ဗီသည် တစ်ခုခုကို ဆုံးဖြတ်ပြီးလျှင် ဘယ်တော့မှ နောက်မဆုတ်တတ်ကြောင်း သူ သိသည်။

'သူက သိပ်ကို ဇွတ်တရွတ်နိုင်တာပဲ' ဟု သူ တွေးလိုက်မိသည်။

ထိုစဉ် ဒန်နီယယ်က လည်ချောင်းကို ကျယ်ကျယ်ဟန့်လိုက်သည်။ သူ အတော်ကြာအောင် တိတ်ဆိတ်နေခဲ့သော်လည်း အခုတော့ သူ၏ ဩဇာရှိသောအသံဖြင့် ထိုတိတ်ဆိတ်မှုကို ဖြိုခွင်းလိုက်သည်။

"ငါလည်း တစ်ခုလောက် မေးချင်တယ်" ဟု သူက ဖြည်းဖြည်းချင်း ဆိုလာသည်။

ချက်ချင်းပင် မျက်လုံး သုံးစုံစလုံးက သူ့ထံသို့ ရောက်ရှိသွားသည်။ အိုင်ဗီ၊ ဆိုင်းလပ်စ်နှင့် တာလီယာတို့ အားလုံးက သူ့ကို စိုက်ကြည့်နေကြသဖြင့် ဒန်နီယယ်မှာ ပါးပြင်များ ရုတ်တရက် ပူထူးသွားရသည်။ သူ၏ နားရွက်များပင် အနည်းငယ် နီမြန်းလာ၏။ သူက ချောင်းတစ်ချက် ထပ်ဟန့်ရင်း အကြည့်ကို လွှဲလိုက်သည်။

'ဒါက တကယ့်ကို ရှက်ဖို့ကောင်းတာပဲ' သူ တွေးနေမိသည်။ 'ငါ အိုင်ဗီကို သူ့အကူအညီ မလိုဘူးလို့ အရင်က ပြောခဲ့ဖူးတာ။ ငါ အရမ်း မာန်တက်ခဲ့တာပေါ့။ အခုတော့ ကြည့်ဦး... သူ့ကို ဒီလို လာမေးနေရပြီ'

သို့သော်လည်း သူသည် ထိုအရှက်ကို ဖိသိပ်ထားလိုက်ပြီး အိုင်ဗီ၏ မျက်လုံးများကို အတင်းအကျပ် စိုက်ကြည့်လိုက်သည်။

"ငါ့အပေါ်မှာရော ဘာတွေ ဖြစ်လာမှာလဲ" ဒန်နီယယ်က တည်ငြိမ်သောလေသံဖြင့် မေးလိုက်သော်လည်း အသံက အနည်းငယ် တုန်ယင်နေသည်။ "ပြီးတော့... ငါ ဘာကြောင့် စွပ်စွဲခံရမှာလဲ"

အိုင်ဗီ ချက်ချင်း အဖြေမပေးသေးပါ။ သူမ မျက်လွှာချလိုက်ရာ မျက်တောင်ရှည်များက ပါးပြင်ပေါ်တွင် အရိပ်ကျနေသည်။ သူမက မြူနှင်းတွေကြားထဲက တစ်ခုခုကို ဆွဲထုတ်ဖို့ ကြိုးစားနေသလိုမျိုး အတွေးနက်နေဟန် ရှိသည်။ ခန်းမထဲတွင် တိတ်ဆိတ်သွားပြန်သည်။

နောက်ဆုံးတွင် သူမ ခေါင်းမော့လိုက်ပြီး ဖြည်းဖြည်းချင်း ပြောလာသည်။ "အခုကစလို့ သုံးနှစ်အကြာမှာ ဗိုလ်ချုပ်ကြီးဒန်နီယယ်... ဦးလေးဟာ ပြစ်မှုပေါင်းများစွာနဲ့ စွပ်စွဲခံရလိမ့်မယ်။ လူကုန်ကူးမှု၊ မိန်းကလေးငယ်လေးတွေအပေါ် မဖွယ်မရာ ပြုမူမှု၊ စစ်ဘက်ဆိုင်ရာ အရင်းအမြစ်တွေကို အလွဲသုံးစားလုပ်မှု၊ ပြီးတော့... ဦးလေးရဲ့ သားနဲ့သမီးကို စစ်တပ်ထဲမှာ သူလျှိုတွေအဖြစ် ထည့်ထားမှု စတာတွေပေါ့"

ထိုစကားလုံးများက လေးလံသော ကျောက်တုံးကြီးများကဲ့သို့ လာရောက်ထိမှန်နေသည်။

ဒန်နီယယ် တစ်ကိုယ်လုံး တောင့်တင်းသွားရသည်။ သူ၏ မျက်လုံးများ ဝိုင်းစက်သွားကာ ရင်ဘတ်ထဲတွင် တင်းကျပ်သွားသလို ခံစားလိုက်ရသည်။ "ဘာ... ဘာပြောတယ်" ဟု သူ တိုးတိုးလေး ရေရွတ်မိသည်။

ဆိုင်းလပ်စ်က လက်သီးကို ကျစ်ကျစ်ပါအောင် ဆုပ်ထားရင်း သူ၏ဖခင်ကို ကြည့်လိုက်သည်။ တာလီယာကလည်း အံ့သြလွန်းသဖြင့် ပါးစပ်လေး ဟသွားတော့သည်။

အိုင်ဗီက အသံကို နိမ့်ကာ ဆက်ပြောသည်။ "နောက်ထပ် စွပ်စွဲချက်တွေလည်း အများကြီး ရှိပါသေးတယ်... ဒါပေမဲ့ အကုန်လုံးကို သေသေချာချာ မမှတ်မိတော့ဘူး။ ကျွန်မ သိထားတာကတော့ ဒီစွပ်စွဲချက် အများစုက ရှင့်ရဲ့ ယုံကြည်ရဆုံး လက်အောက်ငယ်သား တစ်ယောက်ဆီကနေ လာတာပဲ။ အဲဒီ့ သစ္စာဖောက်မှုက သိပ်ကို နက်ရှိုင်းခဲ့တယ်"

ဒန်နီယယ် ထိုင်ခုံပေါ်တွင် နောက်ကို မှီချလိုက်သည်။ ခဏမျှ သူ ဘာမှ ပြန်မပြောနိုင်ဘဲ စိတ်တွေ လည်ထွက်နေတော့သည်။

'ငါ့ရဲ့ ယုံကြည်ရဆုံးလူလား ငါ ကိုယ်တိုင် ပြုစုပျိုးထောင်ခဲ့တဲ့သူလား ငါ ကိုယ်တိုင် တာဝန်တွေ ပေးခဲ့တဲ့သူလား မဖြစ်နိုင်တာ ဒါက တကယ် ဖြစ်လာနိုင်လို့လား'

သူ၏ ရင်ဘတ်ထဲတွင် လေးလံနေသည်။ သူ၏ နဖူးကို ပွတ်လိုက်ရင်း "ကိုယ့်လူတွေရဲ့ စွပ်စွဲတာကို ခံရမယ်ပေါ့လေ..." ဟု ရေရွတ်မိသည်။

အိုင်ဗီ နှုတ်ခမ်းကို တင်းတင်းစေ့ထားမိသည်။ သူမ၏ ရင်ထဲတွင် အတိတ်ဘဝက အမှတ်တရတစ်ခု ပြန်ဝင်လာသည်။ လူငယ်စစ်သား ဟင်နရီက စင်္ကြံလမ်းတွင် ဒေါသတကြီး အော်ဟစ်နေသည်ကို သူမ မှတ်မိလိုက်သည်။

ဗိုလ်ချုပ်ကြီးဒန်နီယယ်မှာ အပြစ်မရှိကြောင်းနှင့် ဒါတွေအားလုံးက အဲဒီ ယုံကြည်ရတဲ့ လက်အောက်ငယ်သားရဲ့ လက်ချက်ဖြစ်ကြောင်း သူ အော်ပြောခဲ့တာကို သူမ ရှင်းရှင်းလင်းလင်း ကြားခဲ့ဖူးသည်။ ဒါပေမဲ့ အဲဒီတုန်းက သူမဟာ ကိုယ့်နာကျင်မှုနဲ့ကိုယ် နစ်မွန်းနေခဲ့ရတာမို့ ဒါတွေကို လျစ်လျူရှုခဲ့မိသည်။

ထို့ကြောင့် သူမက သူ့ကို တည်ငြိမ်စွာ ကြည့်ရင်း "ဒါက ကျွန်မ မြင်ခဲ့သမျှ အကုန်ပါပဲ။ ကျန်တာတော့ မသိတော့ဘူး။ စိတ်မကောင်းပါဘူး" ဟု ပြောလိုက်သည်။

ဒန်နီယယ်က အသက်ကို ပြင်းပြင်းရှူထုတ်လိုက်သည်။ သူ၏ ပခုံးများ အနည်းငယ် တွန့်ကျသွားသော်လည်း ပြန်လည် တည့်မတ်လိုက်သည်။ သူက အိုင်ဗီကို တည်ငြိမ်လေးနက်သော မျက်လုံးများဖြင့် စိုက်ကြည့်လိုက်သည်။ "အဲဒီလိုဆိုရင်တော့ တာလီယာနဲ့အတူ လိုက်သွားဖို့ ငါ မတားတော့ဘူး။ နင် လုပ်သင့်တာကို လုပ်ပါ"

အိုင်ဗီ မျက်တောင်ခတ်လိုက်မိသည်။ ထို့နောက် လေးလံမှုတွေ အနည်းငယ် လျော့ပါးသွားသလို ခံစားလိုက်ရကာ ခပ်ဖွဖွ ရယ်မောလိုက်သည်။ "ကျေးဇူးတင်ပါတယ်"

သူမ ထိုင်ရာမှ ထလိုက်သည်။ "ဒါဆို ခရီးအတွက် ပြင်ဆင်ရတော့မယ်"

သူမ ထွက်သွားရန် ပြင်လိုက်စဉ်မှာပင် တာလီယာကလည်း လိုက်၍ ထလာသည်။ "နေဦး။ ငါ့မှာ နင့်အတွက် တစ်ခုခု ရှိတယ်"

တာလီယာသည် သူမ၏ အိတ်ထဲမှ စက္ကူအိတ်အသေးလေးတစ်လုံးကို ထုတ်ယူလိုက်သည်။ ထို့နောက် လက်နှစ်ဖက်ဖြင့် ကမ်းပေးလိုက်သည်။

"ကွတ်ကီးတွေပါ။ စတန်း အတွက် လုပ်ထားတာ ဆိုပေမဲ့ အခုတော့ နင့်ကိုပဲ ပေးလိုက်ချင်တယ်။ ကျေးဇူးတင်တဲ့ အနေနဲ့ပေါ့။ နင် ကြိုက်ချင်မှ ကြိုက်မှာပါ၊ ဒါပေမဲ့... ဒါကို ငါ့ရဲ့ စိတ်ရင်းအမှန်နဲ့ လုပ်ထားတာပါ"

အိုင်ဗီ မှင်သက်သွားရသည်။ သူမ၏ မျက်လုံးများမှာ အံ့သြလွန်းသဖြင့် ဝိုင်းစက်သွားတော့၏။ ခဏမျှ သူမ မလှုပ်မယှက် ရပ်နေမိသည်။

'တာလီယာရဲ့ ကွတ်ကီးတွေလား' သူမ တွေးနေမိသည်။ 'ဒါတွေက စစ်တပ်ထဲမှာ သိပ်ကို နာမည်ကြီးတာ။ သူက တိုက်ခိုက်ရေး ကောင်းရုံတင်မကဘူး၊ ဟင်းချက်တာကလည်း ဘယ်သူထက်မဆို ပိုတော်တယ်ဆိုတာ လူတိုင်းသိကြတယ်။ ငါ တစ်ခါပဲ... တစ်ခါပဲ စားဖူးခဲ့တယ်။ အဲဒီတုန်းက ဆိုင်းလပ်စ်က ငါ့အတွက် သိမ်းထားပေးပြီး တိတ်တဆိတ် ပေးခဲ့တာ။ ငါ စားဖူးသမျှထဲမှာ အကောင်းဆုံး ကွတ်ကီးပဲ။ နောက်ပိုင်းမှာတော့ ငါ့မိသားစုက အချိုတွေ စားတာကို ပိတ်ပင်ခဲ့ကြတယ်။ အချိုက မိသားစုအတွက် အန္တရာယ်ရှိတယ်လို့ လိမ်ညာပြောခဲ့ကြတာပေါ့။ ဒါပေမဲ့ အဲဒါက အိုင်စလာ ရဲ့ ဆင်ခြေဆိုတာ ငါ သိခဲ့တယ်။ သူက ကွတ်ကီးတွေ အကုန်လုံးကို တစ်ယောက်တည်း စားချင်လို့လေ။ အဲဒီတုန်းက ငါက ဘာမှ မတတ်နိုင်ခဲ့ဘူး။ ဒါပေမဲ့ အခုတော့... အခုတော့ တာလီယာကိုယ်တိုင်က ငါ့ကို ကမ်းပေးနေပြီ'