အခန်း (၅၃၃-၅၃၄)

အပိုင်း(၅၃၃) ယာဉ်ပျံရပ်တန့်ရန်

"ဝုန်း"

စက္ကန့်တစ်စက္ကန့်၏ တစ်သောင်းပုံတစ်ပုံမျှပင် မကြာလိုက်သော်လည်း လော်ယွမ်၏ ကြမ်းတမ်းပြီး ကြောက်မက်ဖွယ်ကောင်းသော အရှိန်အဝါက လုံးဝ ရုပ်သိမ်းသွားခဲ့ပြီ ဖြစ်သည်။

သို့သော်လည်း အကျိုးဆက်အနေဖြင့် ယာဉ်ပျံအတွင်းပိုင်း၊ အထူးသဖြင့် ဓာတ်ခွဲခန်းတည်ရှိရာ စက်ရုံဇုန်တစ်ခုလုံး အကြီးအကျယ် ပျက်စီးသွားခဲ့ရ၏။

ရုတ်တရက် လေဆင်နှာမောင်း ဖြတ်တိုက်သွားသကဲ့သို့ မရေမတွက်နိုင်သော သတ္တုအပိုင်းအစများမှာ ဖရိုဖရဲ လွင့်ပျံသွားပြီး အရပ်မျက်နှာအနှံ့သို့ ပြန့်ကျဲကုန်သည်။

ကိုယ်ခန္ဓာအတွင်းရှိ စွမ်းအားများအားလုံးကို ရုပ်သိမ်းလိုက်ပြီးနောက် လော်ယွမ်က အမှောင်စွမ်းအင်များနှင့် လုံးဝအဆက်အသွယ် ပြတ်တောက်သွားခဲ့သည်။

စွမ်းအားအများစု လျင်မြန်စွာ ပျောက်ကွယ်သွားသည်နှင့်အမျှ သူသည် ခဏတာမျှ အင်အားကုန်ခမ်းသွားသကဲ့သို့ ခံစားလိုက်ရ၏။

နတ်ဘုရားတစ်ပါးအဖြစ်မှ သာမန်လူသားတစ်ဦးအဖြစ်သို့ ပြန်လည်ရောက်ရှိသွားသကဲ့သို့ ခံစားရမှုက သူ့ကို ဟာတာတာ ဖြစ်သွားစေသည်။

ယာဉ်ပျံ၏ အချက်ပေးသံများ ဆူညံစွာ မြည်ဟည်းနေသည်ကို ကြားလိုက်ရမှ လော်ယွမ်က သတိပြန်ဝင်လာသည်။

သူက ခေါင်းခါ၍ သက်ပြင်းတစ်ချက်ချလိုက်ပြီး လက်ကို ဖွဖွလေး ဝှေ့ယမ်းလိုက်ရာ သတ္တုအပိုင်းအစများအားလုံးသည် အချိန်နောက်ပြန်ဆုတ်သွားသကဲ့သို့ မူလပုံစံအတိုင်း လျင်မြန်စွာ ပြန်လည်စုစည်းသွားကြသည်။

တစ်ချိန်တည်းမှာပင် အချို့သော အရာဝတ္ထုများမှာ လျင်မြန်စွာ ပြိုကွဲသွားပြီး အက်တမ်များအဖြစ် ကွဲထွက်သွားလေ၏။

ဗလာကျင်းနေသော ကိုယ်ခန္ဓာပေါ်တွင် အဝတ်အစားများ ပြန်လည်ပေါ်လာသည်။

သူက လေထဲမှနေ၍ မြေပြင်ပေါ်သို့ ဖြည်းညင်းစွာ ဆင်းသက်လာခဲ့သည်။ သို့သော် ခြေထောက်နှစ်ဖက် မြေကြီးနှင့် မထိတထိမှာပင် ကြမ်းပြင်က ထပ်မံကွဲအက်သွားလေသည်။

သူ၏မျက်နှာထား အနည်းငယ် တင်းမာသွားပြီးနောက် ချက်ချင်းပင် သဘောပေါက်သွား၏။ ယခုလက်ရှိ သူသယ်ဆောင်ထားသော အလေးချိန်မှာ သာမန်ကြမ်းပြင်များ ခံနိုင်ရည်ရှိသည့် ပမာဏမျိုး မဟုတ်ပေ။

သူ၏ ကိုယ်အလေးချိန် သက်သက်ကိုသာ ဆိုရလျှင် ပေါင်နှစ်သောင်းကျော်ခန့်သာ ရှိသော်လည်း အဓိကပြဿနာမှာ သူ၏လက်ထဲတွင် ကိုင်ဆောင်ထားသော ဟင်းလင်းပြင်စက်လုံးကြီးပင် ဖြစ်သည်။

ပေါင်သန်းလေးရာကျော် အလေးချိန်ရှိသော ထိုဟင်းလင်းပြင်စက်လုံးကြီး၏ ဖိအားသည် ခြေဖဝါးနှစ်ဖက်ပေါ်တွင်သာ စုစည်းနေရာ ထိုသို့သော ကြောက်မက်ဖွယ် ဖိအားမျိုးကို အလွန်မာကျောသော သတ္တုကြမ်းပြင်များပင်လျှင် ခံနိုင်ရည်ရှိမည် မဟုတ်ချေ။

လော်ယွမ်က အနည်းငယ် စဉ်းစားလိုက်ပြီးနောက် ယာဉ်ပျံကို တစ်ခါတည်း အပြီးအစီး ကြံ့ခိုင်မှုရှိအောင် ပြုပြင်မွမ်းမံရန် ဆုံးဖြတ်လိုက်သည်။

လော်ယွမ်အတွက်တော့ ဤယာဉ်ပျံသည် အလွန်တရာမှ ပျက်စီးလွယ်လွန်းနေသည်။ အနည်းငယ် ပေါ့ဆမိသည်နှင့် ဖြစ်စေ၊ မတော်တဆ တစ်ခုခုဖြစ်သည်နှင့် ဖြစ်စေ ယာဉ်ပျံကြီးမှာ အလွယ်တကူ ဆိုးရွားစွာ ပျက်စီးသွားနိုင်သည်။

ထို့ပြင် အာကာသထဲသို့ သွားရောက်ပြီးတိုင်း ပြန်လာချိန်၌ ထပ်မံပြင်ဆင်နေရသည်ကလည်း အတော်လေး အလုပ်ရှုပ်လှပေသည်။

လော်ယွမ်အနေဖြင့် စွမ်းအားများကို ရုပ်သိမ်းပြီးနောက် ယာဉ်ပျံအတွင်းသို့ နေရာရွှေ့ပြောင်းခြင်းဖြင့် ပြန်မလာနိုင်ခြင်းတော့ မဟုတ်ပေ။

ရပ်တန့်နေသော သို့မဟုတ် အရှိန်နှေးနေသော ယာဉ်ပျံတစ်စီးအတွက် အကွာအဝေး နီးကပ်နေသရွေ့ အလွယ်တကူ ဝင်ရောက်နိုင်သည်။

သို့သော် အလွန်လျင်မြန်သော အရှိန်ဖြင့် သွားနေသော ယာဉ်ပျံကိုမူ သူ၏စွမ်းရည်ဖြင့် အမီလိုက်ရန် ခက်ခဲလှသည်။

နေရာရွှေ့ပြောင်းခြင်း မပြုမီ အခြေအနေနှင့် ရွှေ့ပြောင်းပြီးနောက် အရှိန်အခြေအနေတို့မှာ အတူတူပင် ဖြစ်သည်။

ရွှေ့ပြောင်းခြင်းမပြုမီက ငြိမ်သက်နေပါက ရွှေ့ပြောင်းပြီးနောက်တွင်လည်း ငြိမ်သက်နေမည်သာ ဖြစ်သည်။

သို့သော် ယာဉ်ပျံမှာမူ အလွန်အမင်း မြန်ဆန်သော အရှိန်ဖြင့် ရွေ့လျားနေသည်။

ယာဉ်ပျံအတွင်းသို့ ဘေးကင်းစွာ ရွှေ့ပြောင်းနိုင်ရန်အတွက် မိမိ၏အရှိန်သည် ယာဉ်ပျံ၏အရှိန်နှင့် ထပ်တူညီနေရန် လိုအပ်သည်။

သို့မဟုတ်ပါက ယာဉ်ပျံနှင့် ဝင်တိုက်မိသကဲ့သို့ ဖြစ်သွားမည်ဖြစ်ပြီး အလင်းအမြန်နှုန်း၏ တစ်ဝက်ခန့်ရှိသော အရှိန်ဖြင့် ယာဉ်ပျံအတွင်းပိုင်းကို ဝင်တိုက်မိသလို ဖြစ်သွားပေလိမ့်မည်။

ထိုသို့သော အကျိုးဆက်မျိုးက ယာဉ်ပျံအတွင်း ဟိုက်ဒရိုဂျင်ဗုံး တစ်လုံး ပေါက်ကွဲသွားသည်နှင့် အတူတူပင် ဖြစ်သည်။

ယာဉ်ပျံကြီး တစ်စစီ ကွဲထွက်သွားခြင်း ရှိမရှိကို အသာထား၊ အနည်းဆုံးတော့ လူသားများအားလုံး ချက်ချင်း သေဆုံးသွားပေလိမ့်မည်။

သို့သော်လည်း စွမ်းအားများကို ရုပ်သိမ်းထားသည့် အခြေအနေမျိုးတွင် မိမိကိုယ်ကို အလင်းအမြန်နှုန်း၏ တစ်ဝက်ခန့်အထိ ရောက်အောင် တွန်းပို့ရန်မှာ သူ၏ စိတ်စွမ်းအား ၂၇ မှတ် အပြည့်အဝ အသုံးပြုလျှင်တောင်မှ လိုအပ်ချက်နှင့် အလွန်ကွာဟနေသေးသည်။

...

သူ၏ အာရုံခံနိုင်စွမ်းကို အပြည့်အဝ ဖြန့်ကျက်လိုက်သည်။ အရှိန်အဝါများကို ရုပ်သိမ်းလိုက်ပြီးနောက် သူ၏စွမ်းအားများ သိသိသာသာ လျော့ကျသွားသော်လည်း ယာဉ်ပျံတစ်စီးလုံးကို လွှမ်းခြုံနိုင်ရန်ကား အလွန်လွယ်ကူနေဆဲပင်။

နောက်တစ်စက္ကန့်တွင် ယာဉ်ပျံ၏ အတွင်းနံရံများ၊ ကြမ်းပြင်များနှင့် အပြင်ဘက် သံချပ်ကာအလွှာများအားလုံးသည် ရုတ်တရက် ဆွေးမြည့်သွားသကဲ့သို့ အကွက်များ ဖြစ်ပေါ်လာသည်။

ဤသည်မှာ များပြားလှသော အက်တမ်များက ဒြပ်စင်များမှ ခွာထွက်သွားပြီး လွတ်လပ်သော အခြေအနေသို့ ရောက်ရှိသွားခြင်း၏ ရလဒ်ပင် ဖြစ်သည်။

သို့သော်လည်း စတင်လုပ်ဆောင်လိုက်သည်နှင့် လော်ယွမ်က သူ အနည်းငယ် ပေါ့ဆသွားကြောင်း ခံစားလိုက်ရသည်။

အချိန်ကြာမြင့်စွာ လက်တွေ့လောကနှင့် ကင်းကွာနေသော အခြေအနေမျိုးတွင် နေခဲ့ရသဖြင့် သူ၏စွမ်းရည်များကို အတိအကျ ခန့်မှန်းရာတွင် အနည်းငယ် လွဲချော်သွားကာ သူ၏ လက်ရှိစွမ်းရည်ကို အနည်းငယ် အထင်ကြီးမိသွားခြင်း ဖြစ်သည်။

ယာဉ်ပျံအတွင်းပိုင်းက ပုံမှန်အတိုင်း ရှိနေသော်လည်း ယာဉ်ပျံအပြင်ဘက်ရှိ သံချပ်ကာအလွှာကတော့ သူ့ကို အနည်းငယ် အားစိုက်ရစေသည်။

ယခုအချိန်တွင် ယာဉ်ပျံသည် အလွန်မြန်ဆန်သော အရှိန်ဖြင့် ပျံသန်းနေကာ သံချပ်ကာ မျက်နှာပြင် အပူချိန်မှာ ဒီဂရီ ခြောက်ထောင်၊ ခုနစ်ထောင်ခန့်အထိ ရှိနေသည်။

ထို့အပြင် စွမ်းအင်မြင့် အာကာသဖုန်မှုန့်များ၏ တိုက်ခိုက်မှုကြောင့် အက်တမ်များသည် ပြင်းထန်စွာ တုန်ခါနေပြီး လော်ယွမ်၏ စိတ်စွမ်းအားဖြင့် ထိန်းချုပ်ရသည့် အခက်အခဲကို အဆပေါင်းများစွာ မြင့်တက်သွားစေသည်။

ထူးကဲစွမ်းအားများ ရှိနေသည့် အခြေအနေတွင် ဤအရာများက ပြဿနာမဟုတ်သော်လည်း ယခုလက်ရှိ အခြေအနေတွင်မူ လော်ယွမ်အတွက် ကြီးမားသော ဖိအားတစ်ခု ဖြစ်လာခဲ့သည်။

ကံကောင်းသည်မှာ ဤအမှားက သိပ်မကြီးမားဘဲ သူ၏ စွမ်းရည်အကန့်အသတ် အတွင်းတွင် ရှိနေဆဲ ဖြစ်သည်။ သူက မျက်မှောင်အနည်းငယ် ကြုတ်လိုက်ပြီး စိတ်စွမ်းအားကို အပြည့်အဝ ထုတ်လွှတ်လိုက်သည်။

ထိုလွတ်လပ်နေသော အက်တမ်များကို စိတ်စွမ်းအားဖြင့် ခိုင်မြဲစွာ ဖမ်းဆုပ်ထားလိုက်ပြီးနောက် စိတ်စွမ်းအား၏ ထိန်းညှိမှုအောက်တွင် ပြင်းထန်စွာ ပြိုကျပျက်စီးလာစေသည်။

နောက်တစ်စက္ကန့်တွင် ပုံမှန်မဟုတ်သော အဏုမြူအက်တမ်များသည် မူလအရာဝတ္ထု မျက်နှာပြင်ပေါ်သို့ ချက်ချင်း အတင်းအကျပ် ဖိသိပ်ခံလိုက်ရသည်။

တဖြည်းဖြည်းနှင့် သံချပ်ကာအလွှာသည် ပိုမိုမည်းနက်လာကာ တောက်ပလာပြီး အနက်ရောင်အလင်း ဖလင်ပြားတစ်ချပ် ဖုံးအုပ်ထားသကဲ့သို့ ဖြစ်သွားသည်။

ထိုအလွှာလေးမှာ လက်မ၏ အလွန့်အလွန် သေးငယ်သော အစိတ်အပိုင်းမျှသာ အထူရှိပြီး ဆံပင်တစ်မျှင်၏ အချင်းထက်ပင် အဆပေါင်းများစွာ သေးငယ်လှသဖြင့် အထူကို လုံးဝ မခံစားရပေ။

စွမ်းအားများ လျော့ကျသွားမှုကြောင့် ဖိသိပ်နိုင်စွမ်း အချိုးမှာ ၄,၀၀၀ ခန့်သာ ရှိသော်လည်း ၎င်း၏ မာကျောမှုနှင့် ကြံ့ခိုင်မှုကမူ စိတ်ကူးမယဉ်နိုင်လောက်အောင်ပင်။

မူလက ဖုန်မှုန့်များ၏ တိုက်ခိုက်မှုကြောင့် ချိုင့်ခွက်များ ဖြစ်ပေါ်နေသော ယာဉ်ပျံ၏ အပြင်ဘက် သံချပ်ကာ မျက်နှာပြင်သည် ယခုအခါတွင် မှန်တစ်ချပ်ကဲ့သို့ ချောမွေ့နေပြီး အသစ်စက်စက်ကဲ့သို့ တောက်ပနေသည်။

ဖုန်မှုန့်အမြောက်အမြားက အလင်းအမြန်နှုန်း၏ တစ်ဝက်ခန့်ရှိသော အရှိန်ဖြင့် ဝင်တိုက်နေသော်လည်း အနည်းငယ်မျှ ပြောင်းလဲသွားခြင်း မရှိဘဲ ခြစ်ရာတစ်ခုပင် မပေါ်လာချေ။

လော်ယွမ်က မြေပြင်ပေါ်သို့ ပြန်လည်ဆင်းသက်လိုက်ရာ ယခုတစ်ကြိမ်တွင် ကြမ်းပြင်မှာ အနည်းငယ် တုန်ခါသွားရုံမှလွဲ၍ အခြားမည်သည့် အပြောင်းအလဲမှ မဖြစ်ပေါ်တော့ပေ။

...

ဤအဖြစ်အပျက်များအားလုံးကို ပြောပြနေရသည်မှာ ကြာသော်လည်း အမှန်တကယ်တွင် လော်ယွမ် ယာဉ်ပျံအတွင်းသို့ ဝင်ရောက်လာချိန်မှစ၍ ယခုအချိန်အထိ စက္ကန့်ဆယ်ဂဏန်းပင် မကြာသေးချေ။

ဗဟိုထိန်းချုပ်ရေးခန်းမအတွင်းရှိ အဆင့်မြင့် အရာရှိများအားလုံး မယုံကြည်နိုင်ဖြစ်နေကြစဉ်မှာပင် ဉာဏ်ရည်တု၏ ဗဟိုစခရင်ပေါ်ရှိ ပုံရိပ်သည် ပြင်းထန်စွာ တုန်ခါလာပြီး ကြီးမားသော နှောင့်ယှက်မှု တစ်ခုခု ဝင်ရောက်လာသကဲ့သို့ ဖြစ်သွားသည်။

စက္ကန့်ဝက်ခန့်အကြာတွင် လော်ယွမ်၏ ပုံရိပ်က စခရင်ပေါ်တွင် ရုတ်တရက် ပေါ်လာသည်။ သူက လူအားလုံးကို အေးစက်စက် အကြည့်ဖြင့် ဝေ့ကြည့်လိုက်ပြီးနောက် စကားစပြောလေ၏။

"မင်္ဂလာပါ"

"ကျွန်တော့်အခြေအနေက နည်းနည်းတော့ အပြောင်းအလဲဖြစ်သွားတယ်... ကျွန်တော် ကိုယ့်စွမ်းရည်တွေကို နည်းနည်းလေး လျှော့တွက်မိသွားတာ... ဒါပေမဲ့ ဒါက ကောင်းတဲ့ကိစ္စပါပဲ... မကြာခင်... အများဆုံး နှစ်နှစ်အတွင်း ကျွန်တော်တို့ ဘားနတ် ကြယ်အဖွဲ့အစည်းဆီကို ရောက်နိုင်ပြီ... ဒါပေမဲ့ အဲ့ဒီမတိုင်ခင် ယာဉ်ပျံကို ရပ်တန့်ဖို့ လုပ်ငန်းစဉ် စတင်ဖို့ လိုတယ်"

ပင်မစခရင်က အနည်းငယ် တုန်ခါသွားပြီးနောက် မူလပုံရိပ်အတိုင်း အမြန်ပြန်ဖြစ်သွားသည်။

လော်ယွမ်က သူ၏ အသိစိတ် မထွက်ခွာမီ ထိုဗိုရှင်းဂြိုဟ်သား ဉာဏ်ရည်တု၏ အဓိက ပရိုဂရမ်ကို အနည်းငယ် ပြင်ဆင်သွားခဲ့သေးသည်။

ဗိုရှင်းဂြိုဟ်သားများ ချန်ထားခဲ့သော လျှို့ဝှက်လမ်းကြောင်းများကို တစ်ခုချင်းစီ ရှင်းလင်းလိုက်ပြီး အန္တရာယ်ရှိနိုင်သည့် အရာအားလုံးကို ဖယ်ရှားလိုက်ခြင်း ဖြစ်သည်။

ဗဟိုထိန်းချုပ်ရေးခန်းမအတွင်း ပိကျန့်ဖိန်က သူ၏ တောင့်တင်းနေသော မျက်နှာကို ပွတ်သပ်လိုက်ပြီး ရုတ်တရက် အလွန်အမင်း မယုံနိုင်စရာကောင်းလှသော ခံစားချက်ကို ရရှိလိုက်သည်။

နှစ်နှစ်အတွင်း ဘားနတ် ကြယ်အဖွဲ့အစည်းဆီသို့ ရောက်ရှိမည်ဆိုသည်မှာ မြို့တော်ဝန်လော် ပြောနေသည့် ဟာသတစ်ပုဒ်များလား။

သူက ဘေးနားရှိ လုပ်ဖော်ကိုင်ဖက်များကို လှည့်ကြည့်လိုက်ရာ အားလုံး၏ မျက်နှာထားသည်လည်း သူနှင့်ထပ်တူ အံ့အားသင့်နေပြီး တစ်ယောက်ကိုတစ်ယောက် ကြောင်တောင်တောင်ဖြင့် ကြည့်နေကြသည်ကို တွေ့လိုက်ရသည်။

...

သို့သော်လည်း မည်မျှပင် မယုံကြည်နိုင်စရာ ဖြစ်နေပါစေ၊ လော်ယွမ်၏ အမိန့်ကို အပြည့်အဝ အကောင်အထည်ဖော်ခဲ့ကြသည်။ ယာဉ်ပျံသည် ရပ်တန့်ခြင်း လုပ်ငန်းစဉ်ကို တရားဝင် စတင်လိုက်သည်။

အမှန်တကယ်တော့ ထိုလုပ်ငန်းစဉ်သည် ယခင်ကတည်းက စတင်နေခဲ့ပြီး ယခုအခါ ဆက်လက် အကောင်အထည်ဖော်နေခြင်းသာ ဖြစ်သည်။

...

ယာဉ်ပျံ အရှိန်လျှော့ချနေသည့် ကာလတစ်လျှောက်လုံးတွင် လော်ယွမ်သည် ယာဉ်ပျံပေါ်မှ မကြာခဏ ထွက်ခွာလေ့ရှိပြီး တစ်ကြိမ်သွားလျှင် ဆယ်ရက်ဝန်းကျင်၊ တစ်ခါတစ်ရံ တစ်လခန့်အထိ ကြာမြင့်တတ်သည်။

ဟင်းလင်းပြင်စက်လုံးအတွင်းရှိ အသေးစားစကြဝဠာလေးမှာ အကြိမ်ကြိမ် ဖြည့်တင်းမှုများကြောင့် အဆက်မပြတ် ကြီးထွားလာနေသည်။

မူလက အချင်း မိုင် ၁၈၀ ကျော်ခန့်သာ ရှိရာမှ တဖြည်းဖြည်း ကျယ်ပြန့်လာခဲ့ပြီး ယာဉ်ပျံ အရှိန်လျှော့ချခြင်း မပြီးဆုံးမီမှာပင် ထိုအသေးစားစကြဝဠာလေးသည် အချင်း မိုင် ၉၀၀ ကျော်အထိ ကြီးမားလာခဲ့သည်။ ထိုပမာဏမှာ လကမ္ဘာ အချင်း၏ ထက်ဝက်နီးပါးခန့် ရှိနေပြီ ဖြစ်သည်။

ယခုအချိန်အတွင်း လော်ယွမ်က အချိန်ပြည့် ဟင်းလင်းပြင် ဖြတ်တောက်ခြင်းကိုသာ လုပ်ဆောင်နေခြင်းတော့ မဟုတ်ပေ။ အချိန်အများစုကို အသေးစားစကြဝဠာအတွင်း တည်ဆောက်ထားသော ဓာတ်ခွဲခန်းအသစ်တွင်သာ ကုန်ဆုံးစေခဲ့သည်။

ထူးကဲစွမ်းအားများ ရှိနေသည့် အခြေအနေတွင် ယခင်က မဖြေရှင်းနိုင်ခဲ့သော အခက်အခဲများအားလုံးကို အလွယ်တကူ ဖြေရှင်းနိုင်ခဲ့သည်။

ဓာတ်ခွဲခန်း၏ တိုးတက်မှု အရှိန်အဟုန်မှာ တစ်နေ့တခြား မြန်ဆန်လာပြီး ခန္ဓာကိုယ် ဖိသိပ်ခြင်းနှင့် ပတ်သက်သည့် စမ်းသပ်မှုများမှာလည်း တဖြည်းဖြည်း အောင်မြင်လုနီးပါး ဖြစ်နေပြီ ဖြစ်လေသည်။

ဆက်ရန်...

အပိုင်း(၅၃၄) အတိုင်းအတာ လျှော့ချခြင်း

အသေးစား စကြဝဠာလေးအတွင်းရှိ ယခင်က ဟာလာဟင်းလင်း ဖြစ်နေသော ဟင်းလင်းပြင်ထဲတွင် ယခုအခါ အာကာသစခန်းတစ်ခုနှင့် ဆင်တူသော ဧရာမ ဓာတ်ခွဲခန်းကြီးတစ်ခု ရှိနေပြီဖြစ်သည်။

၎င်းမှာ အလျား၊ အနံ၊ အမြင့် ပေ ၃၀၀ ကျော်စီရှိသော ဧရာမ အတုံးကြီးတစ်ခု ဖြစ်၏။ သို့သော် အရပ်အမြင့် ပေ ၇၀ နီးပါးရှိသော ဧရာမလူသားကြီး လော်ယွမ်အတွက်တော့ ဤမျှကြီးမားသော စမ်းသပ်ကွင်းကြီးက ကျပ်သိပ်မနေရုံမျှသာ ရှိပေသည်။

ဤအတုံးပုံသဏ္ဍာန် နေရာလွတ်ကြီးက လုံးဝ အလုံပိတ်ထားပြီး အဝင်အထွက် ပြုလုပ်ရန် တံခါးများ မရှိချေ။

အသုံးပြုထားသော ပစ္စည်းများအားလုံးက အလွန်သိပ်သည်းစွာ ကျုံ့ဝင်နေသော သတ္တုများဖြစ်ကြပြီး သိပ်သည်းဆမှာ တစ်ကုဗပေလျှင် တန်ချိန် ၈၅၀၀ အထိ ရှိသည်။

၎င်းက လော်ယွမ်၏ လက်ရှိစွမ်းအင် အကန့်အသတ်လည်း ဖြစ်၏။ နျူထရွန်များပင်လျှင် ဤမျှ သိပ်သည်းဆမြင့်မားသော သတ္တုများကို ထိုးဖောက်ရန် ခက်ခဲပေလိမ့်မည်။

ကျန်ရစ်နေသော ဓာတ်ငွေ့များနှင့် ဖုန်မှုန့်များကို အကြိမ်ကြိမ် ရှင်းလင်းပြီးနောက်တွင် ဤနေရာက လုံးဝနီးပါး ဟင်းလင်းပြင်တစ်ခု ဖြစ်သွားခဲ့ပြီဖြစ်သည်။

ဓာတ်ခွဲခန်းဟု ခေါ်ဆိုသော်လည်း ၎င်း၏အတွင်းပိုင်းတွင် မည်သည့် ကိရိယာ သို့မဟုတ် စက်ပစ္စည်းမှ မရှိချေ။

အကြောင်းမူကား ဇီဝဗေဒဆိုင်ရာ စမ်းသပ်မှုများအားလုံး အောင်မြင်စွာ ပြီးဆုံးသွားပြီဖြစ်ပြီး စမ်းသပ်ရမည့်အရာမှာ သူ့ကိုယ်သူသာ ကျန်ရှိတော့သောကြောင့် ဖြစ်၏။

ဤသည်က စမ်းသပ်မှုတစ်ခုလုံး၏ အခက်ခဲဆုံး အဆင့်လည်း ဖြစ်ပေသည်။

လော်ယွမ်က လေးဘက်မြင်တစ်ပိုင်း သက်ရှိတစ်ဦး ဖြစ်သည်။ တစ်နည်းအားဖြင့် ဆိုရလျှင် သူက သုံးဘက်မြင် သက်ရှိများ၏ နယ်ပယ်မှ တဖြည်းဖြည်း သွေဖည်လာခဲ့ပြီ ဖြစ်၏။

တစ်သျှူးများ၊ ဆဲလ်များ၊ ခရိုမိုဆုန်းများသာမက အဏုမြူအမှုန်များ အပါအဝင် အချို့သော အစိတ်အပိုင်းများတွင်ပါ နက်ရှိုင်းသော အပြောင်းအလဲများ သိမ်မွေ့စွာ ဖြစ်ပေါ်နေခဲ့သည်။

သူ၏ ခန္ဓာကိုယ်ရှိ အက်တမ် ခုနစ်ရာခိုင်နှုန်းမှ ရှစ်ရာခိုင်နှုန်းခန့်က ဤကမ္ဘာတွင် ရှိမနေဘဲ အခြားသော မတူညီသည့် အတိုင်းအတာများရှိ ဟင်းလင်းပြင်များထဲတွင် ပြန့်ကျဲနေကြသည်။

ထိုအက်တမ် အစိတ်အပိုင်းများက အသေအချာ ရပ်တန့်နေခြင်းမျိုး မဟုတ်ဘဲ အချိန်နှင့်အမျှ အပြန်အလှန် ပြောင်းလဲနေကြ၏။

တစ်ခါတစ်ရံတွင် မြင့်မားသော အတိုင်းအတာများမှ အက်တမ်များ ပြုတ်ကျလာတတ်ပြီး အက်တမ်အချို့မှာလည်း ကြီးမားသော စွမ်းအင်များကို ရုတ်တရက် ရရှိကာ အထက်သို့ ခုန်တက်သွားတတ်ကြသည်။ သို့သော် ထိုနှစ်ခု၏ အရေအတွက်က ယေဘုယျအားဖြင့် မျှတမှုကို ထိန်းသိမ်းထားသည်။

ဤပြောင်းလဲမှု အရှိန်အဟုန်က သာမန်လူများ၏ စိတ်ကူးထက် ကျော်လွန်နေ၏။ ပုံမှန်အခြေအနေမျိုးတွင် စက္ကန့်အနည်းငယ်အတွင်း ခုန်တက်သွားသော သို့မဟုတ် ပြုတ်ကျလာသော အက်တမ်အရေအတွက်က ခန္ဓာကိုယ်ရှိ အက်တမ်စုစုပေါင်း အရေအတွက်နှင့် ညီမျှသွားတတ်သည်။

အကယ်၍ ထူးကဲသော အခြေအနေမျိုးတွင် ဆိုပါက ဤကဲ့သို့ တစ်ကြိမ်လည်ပတ်မှု အချိန်မှာ စက္ကန့်၏ တစ်သောင်းပုံ တစ်ပုံအထိ လျော့ကျသွားမည် ဖြစ်သည်။

၎င်းက သူ၏ ခန္ဓာကိုယ်သည် ဤနေရာတွင်သာမက အခြားသော အဆုံးအစမဲ့ ဟင်းလင်းပြင်များထဲတွင်ပါ တစ်ပြိုင်နက်တည်း တည်ရှိနေကြောင်း အဓိပ္ပာယ်သက်ရောက်ပေသည်။

သူ၏ ခန္ဓာကိုယ်၌ စတုတ္ထမြောက် အတိုင်းအတာတစ်ခု ရှိလာခဲ့ပြီ ဖြစ်၏။ ထို့အပြင် အက်တမ်များ၏ ပြင်းထန်ပြီး အကြိမ်ရေများပြားသော ပြောင်းလဲမှုများက သူ၏ အက်တမ်များကို ဖိသိပ်ရန်အတွက် သာမန်သက်ရှိများထက် အဆပေါင်းများစွာ ပို၍ ခက်ခဲစေခဲ့သည်။

ဤတစ်နှစ်ကျော် ကာလအတွင်း သူက မရေမတွက်နိုင်သော ကြိုးစားမှုများကို ပြုလုပ်ခဲ့သော်လည်း အားလုံးက ကျရှုံးသွားခဲ့ရသည်။ အဆုံးအစမဲ့ ဟင်းလင်းပြင်များထဲတွင် ရှိနေသော ထိုအက်တမ်များကို ထိန်းချုပ်ရန်ဆိုသည်မှာ လုံးဝ မဖြစ်နိုင်သလောက်ပင်။

သို့သော် ထိုကျရှုံးမှုများက အချည်းနှီးတော့ မဟုတ်ခဲ့ပေ။ ဤကာလများအတွင်း သူက သဲလွန်စအချို့ကို တဖြည်းဖြည်း နားလည်သဘောပေါက်လာခဲ့ပြီ ဖြစ်၏။ အန္တရာယ်များသော စွန့်စားမှုတစ်ခုကိုတော့ မဖြစ်မနေ လုပ်ဆောင်ရပေလိမ့်မည်။

...

ထိုအချိန်တွင် လော်ယွမ်က ဓာတ်ခွဲခန်းထဲ၌ တင်ပျဉ်ခွေထိုင်နေပြီး သူ၏ ခန္ဓာကိုယ်မှ မှိုင်းညို့သော အလင်းရောင်များ ဖြာထွက်နေ၏။

သူရှိနေသော ဟင်းလင်းပြင် တစ်ခုလုံး၌ သိမ်မွေ့သော လှိုင်းဂယက်များ ဖြစ်ပေါ်နေပြီး ဓာတ်ခွဲခန်း တစ်ခုလုံး၏ နံရံများပင်လျှင် ယင်းနှင့်အတူ တသိမ့်သိမ့် တုန်ခါနေကြသည်။

ဤအချိန်၌ သူက လက်တစ်ဖက်ကို ဆန့်ထုတ်လိုက်သည်။ နောက်တစ်ခဏတွင် သူ၏ လက်ဝါးပြင်မှ အရေပြားများ တဖြည်းဖြည်း ပျောက်ကွယ်သွားပြီး နီရဲနေသော သွေးသားများကို ထင်ရှားစွာ မြင်တွေ့လိုက်ရ၏။

ပုတီးစေ့ကဲ့သို့ ခဲပျစ်နေသော သွေးတစ်စက် မြေကြီးပေါ်သို့ မကျလာမီမှာပင် ဟင်းလင်းပြင်ထဲ၌ ပျောက်ကွယ်သွားခဲ့သည်။

မကြာမီမှာပင် သွေးနှင့် အသားများလည်း ပျောက်ကွယ်သွားပြီးနောက် ကျောက်စိမ်းဖြူကဲ့သို့ ဖြူဖွေးနေသော အရိုးများကို မြင်လိုက်ရပြန်သည်။

ဗိုင်းရပ်စ်တစ်ခုပမာ ဤအပြောင်းအလဲက လျင်မြန်စွာ ပျံ့နှံ့သွားလေ၏။ စက္ကန့်အနည်းငယ် အကြာတွင် သူ၏ လက်မောင်းတစ်ခုလုံးက အငွေ့ပျံသွားသကဲ့သို့ ပျောက်ကွယ်သွားပြီးနောက် ရင်ဘတ်နှင့် ခြေထောက်များဆီသို့ တဖြည်းဖြည်း ကူးစက်သွားလေသည်။

စက္ကန့်အနည်းငယ် အကြာတွင် သူ၏ ခန္ဓာကိုယ် တစ်ခုလုံးက လုံးဝ ပျောက်ကွယ်သွားပြီ ဖြစ်သည်။

စွမ်းအင်သလင်းကျောက်ပင်လျှင် ပြိုကွဲသွားခဲ့ပြီး လေထဲတွင် ထူးဆန်းစွာ ပေါလောပေါ်နေသော ဦးခေါင်းတစ်ခုသာ ကျန်ရှိတော့သည်။

လော်ယွမ်က မျက်လုံးများကို ဖွင့်ထားပြီး မျက်နှာပေါ်တွင် မည်သည့် အမူအရာမှ မရှိချေ။ ခန္ဓာကိုယ်ကို ဆုံးရှုံးလိုက်ရခြင်းက သူ၏အဖို့ မည်သည့် ထူးခြားမှုကိုမျှ မခံစားရသကဲ့သို့ပင်။

တစ်နည်းအားဖြင့် ဆိုရလျှင် သူ၏ ခန္ဓာကိုယ်က တကယ်တမ်း ပျောက်ကွယ်သွားခဲ့ခြင်း မဟုတ်ဘဲ အမြဲတမ်း တည်ရှိနေခဲ့ခြင်း ဖြစ်ပြီး အခြားသော တည်ရှိမှု ပုံစံတစ်မျိုးသို့ ပြောင်းလဲသွားခဲ့ခြင်းသာ ဖြစ်၏။

ခန္ဓာကိုယ်မှ ခွာထွက်သွားသော အက်တမ်တိုင်းနှင့် သူ၏ကြားရှိ နီးကပ်သော ဆက်သွယ်မှုကို လော်ယွမ်က ရှင်းလင်းစွာ ခံစားသိရှိနေနိုင်သည်။ ထိုအရာက ဤသုံးဘက်မြင် ကမ္ဘာရှိ အက်တမ်များသာမက အခြားသော အတိုင်းအတာများရှိ ဟင်းလင်းပြင်များမှ အက်တမ်များလည်း ပါဝင်ပေသည်။

ဤဆက်သွယ်မှုက အလွန်ပင် နီးကပ်လွန်းလှသဖြင့် သူက ပို၍ ရဲတင်းသော စမ်းသပ်မှုများကို စတင်လုပ်ဆောင်လာတော့သည်။

မကြာမီမှာပင် သူ၏ ဦးခေါင်းကလည်း တဖြည်းဖြည်း ပျောက်ကွယ်သွားပြီး ခန္ဓာကိုယ် တစ်ခုလုံးက လွင့်မျောနေသော အက်တမ်များအဖြစ်သို့ လုံးဝ ပြောင်းလဲသွားလေ၏။

ဤအချိန်တွင် အချိန်ကာလက ရပ်တန့်သွားသကဲ့သို့ပင်။

ဦးနှောက် ပျောက်ကွယ်သွားသည့် ခဏမှာပင် လော်ယွမ်၏ တွေးခေါ်မှုများက ဟာလာဟင်းလင်း ဖြစ်သွားလေသည်။

သူက မည်သည့် အတွေးအမြင်မှ မရှိတော့သည့် လွတ်ကင်းသော အခြေအနေတစ်ခုထဲသို့ နစ်မြုပ်သွားသကဲ့သို့ပင်။

ကံကောင်းထောက်မစွာဖြင့် ဤအခြေအနေက စက္ကန့်၏ တစ်ထောင်ပုံ တစ်ပုံခန့်သာ ကြာမြင့်ခဲ့ပြီး ဓာတ်ခွဲခန်းထဲတွင် အလင်းရောင်များ တဖြည်းဖြည်း တောက်ပလာခဲ့သည်။

ဤသည်မှာ မြင့်မားသော အတိုင်းအတာမှ အက်တမ်အမြောက်အမြား ပြုတ်ကျလာစဉ် ထွက်ပေါ်လာသော စွမ်းအင်များပင် ဖြစ်၏။

ထိုအချိန်မှာပင် အလွန် သိမ်မွေ့သော အသိစိတ် လှိုင်းဂယက်လေး တစ်ခုကလည်း ဤဟင်းလင်းပြင်ထဲတွင် ထွက်ပေါ်လာခဲ့သည်။

အစပိုင်းတွင် အသိစိတ် လှိုင်းဂယက်က အလွန် အားနည်းနေသေးပြီး အချိန်မရွေး ငြိမ်းသတ်သွားနိုင်သော မီးပွားလေး တစ်ခုကဲ့သို့ပင်။

သို့သော် ခဏအကြာမှာပင် လျင်မြန်စွာ ရှင်းလင်းလာပြီး ပြင်းထန်လာခဲ့လေသည်။

လော်ယွမ်အဖို့တော့ သူက ခဏတာမျှ မိန်းမူးသွားခဲ့ပြီးနောက် အသိစိတ်များ ပြန်လည် ရရှိလာခဲ့ခြင်းသာ ဖြစ်၏။

အားနည်းသွားခြင်း... သူက ယခင်က တစ်ခါမျှ မခံစားဖူးသော အားနည်းမှုကို ခံစားလိုက်ရသည်။

ဤအခြေအနေတွင် ခန္ဓာကိုယ်၏ အေးခဲပေါင်းစပ်မှု လုပ်ငန်းစဉ်များက လုံးဝ ရပ်တန့်သွားခဲ့ပြီး စွမ်းအင်သလင်းကျောက်ပင်လျှင် အဏုမြူအမှုန်များအဖြစ် ပြိုကွဲသွားခဲ့ပြီ ဖြစ်သည်။

အကယ်၍ မြင့်မားသော အတိုင်းအတာများမှ ပြုတ်ကျလာသည့် အက်တမ်များက သူ၏ တွေးခေါ်မှုအတွက် လိုအပ်သော စွမ်းအင်များကို ထောက်ပံ့ပေးမထားပါက သူက ထာဝရ ငြိမ်သက်ခြင်းထဲသို့ ကျဆင်းသွားလောက်ပြီ ဖြစ်၏။

ဤသည်မှာ စွန့်စားမှုတစ်ခုဟု ထင်ရသော်လည်း ကြိုတင်သိမြင်နိုင်စွမ်း ရှိသော လော်ယွမ်အတွက်တော့ ၎င်းက မဖြစ်မနေ လုပ်ဆောင်ရမည့် အရာတစ်ခုမျှသာ ဖြစ်၏။

စမ်းသပ်မှု မတိုင်မီကပင် သူက "ပုံစံတူ စမ်းသပ်မှု" များကို မရေမတွက်နိုင်အောင် ပြုလုပ်ခဲ့ပြီး ဖြစ်သည်။

အဆိုးမြင် စိတ်ခံစားချက်အချို့ ဖြတ်ပြေးသွားပြီးနောက် လော်ယွမ်က လျင်မြန်စွာပင် စိတ်ကို ပြန်လည် တည်ငြိမ်သွားစေခဲ့သည်။

ခန္ဓာကိုယ် မရှိတော့သည့်အတွက် အာရုံငါးပါးလည်း မရှိတော့ချေ။ သို့သော် ပြင်ပလောကနှင့် အာရုံခံနိုင်စွမ်းကိုမူ သူက လုံးဝ ဆုံးရှုံးသွားခြင်း မဟုတ်သေးပေ။

သူ၏ လေးဘက်မြင် အမြင်အာရုံက အနည်းငယ်မျှ ကျန်ရှိနေသေး၏။ သို့သော် ထိုအာရုံခံစားမှုကလည်း နှေးကွေးသော အရှိန်နှုန်းဖြင့် တဖြည်းဖြည်း မှုန်ဝါးလာနေသည်။

မြင့်မားသော အတိုင်းအတာများမှ အက်တမ်များ အဆက်မပြတ် ပြုတ်ကျလာသည်နှင့်အမျှ သူ၏ ခန္ဓာကိုယ်က လေးဘက်မြင် အခြေအနေမှ တဖြည်းဖြည်း ကင်းကွာလာခဲ့သည်။

သို့သော် ၎င်းက ယခုအကြိမ် စမ်းသပ်မှု၏ ရည်ရွယ်ချက်လည်း ဖြစ်ပေသည်။

မှန်ပေသည်။ လေးဘက်မြင်တစ်ပိုင်း အခြေအနေတွင် ခန္ဓာကိုယ်ကို ဖိသိပ်၍ မရနိုင်တော့သဖြင့် ခန္ဓာကိုယ် တစ်ခုလုံးကို သုံးဘက်မြင် အခြေအနေသို့ လုံးဝ ပြုတ်ကျသွားစေရန် ပြုလုပ်ရပေမည်။

ပုံမှန် အခြေအနေမျိုးတွင် ဤကဲ့သို့သော ကိစ္စရပ်က လုံးဝ ဖြစ်ပေါ်လာနိုင်စရာ အကြောင်းမရှိပေ။ ထူးကဲသော အခြေအနေတွင်ဖြစ်စေ၊ သာမန် အခြေအနေတွင်ဖြစ်စေ၊ သူ၏ ခန္ဓာကိုယ်ရှိ ပုံသေ အက်တမ်အရေအတွက် တစ်စိတ်တစ်ပိုင်းက အချိန်တစ်ပြိုင်နက်တည်းမှာပင် အခြားသော အတိုင်းအတာများ၌ အမြဲတမ်း တည်ရှိနေတတ်သည်။ တစ်ခုတည်းသော ကွာခြားချက်မှာ အက်တမ်များ ပြောင်းလဲသည့် အကြိမ်ရေပင် ဖြစ်၏။

သို့သော် ခန္ဓာကိုယ် တစ်ခုလုံးက လွင့်မျောနေသော အက်တမ်များအဖြစ် ပြောင်းလဲသွားချိန်တွင် အတိုင်းအတာ မြင့်တက်စေသည့် စွမ်းအင်အရင်းအမြစ်များ ဆုံးရှုံးသွားပြီး အက်တမ်များ ပြုတ်ကျလာကာ အတိုင်းအတာ မြင့်တက်နေသည့် အခြေအနေကို ထိန်းသိမ်းထားရန် သဘာဝအလျောက် ခက်ခဲသွားတော့သည်။

သူက တိတ်ဆိတ်စွာ စောင့်ဆိုင်းနေလိုက်သည်။ အက်တမ်များ အဆက်မပြတ် ပြုတ်ကျလာခြင်းမှ ထွက်ပေါ်လာသော စွမ်းအင်များက သူ၏ တွေးခေါ်မှုများ ရှင်သန်နေစေရန် လုံလောက်စွာ ထောက်ပံ့ပေးနိုင်ရုံသာမက အချင်း မိုင် ၆၀၀ ကျော်ရှိသော အသေးစား စကြဝဠာ တစ်ခုလုံးကိုပင် လွှမ်းခြုံထားနိုင်စွမ်း ရှိပေသည်။

ဤစွမ်းအားက သူ၏ အကောင်းဆုံး အခြေအနေနှင့် နှိုင်းယှဉ်လျှင် များစွာ ကွာခြားနေသော်လည်း နောက်ဆက်တွဲ စမ်းသပ်မှုများကို ရင်ဆိုင်ရန်အတွက်မူ လုံလောက်ပေသည်။

အချိန်များ တစ်မိနစ်ပြီးတစ်မိနစ်၊ တစ်စက္ကန့်ပြီးတစ်စက္ကန့် ကုန်ဆုံးသွားလေ၏။

ဓာတ်ခွဲခန်းထဲတွင် တိတ်ဆိတ်ငြိမ်သက်နေပြီး အက်တမ်များ ပြုတ်ကျလာစဉ် ထွက်ပေါ်လာသော မှိုင်းညို့ညို့ အလင်းရောင်များသာ ဟင်းလင်းပြင် တစ်ခုလုံးကို လွှမ်းခြုံထားသည်။

အချိန်များ တဖြည်းဖြည်း ကုန်ဆုံးသွားပြီးနောက် ဆယ်နာရီကျော် ကြာမြင့်သွားခဲ့သည်။

အတိုင်းအတာ မြင့်တက်နေသော အက်တမ် စုစုပေါင်း အရေအတွက်က မူလ ၇.၆၅ ရာခိုင်နှုန်းမှ ဝ.၀၁ ရာခိုင်နှုန်းအထိ ဖြည်းညင်းစွာ ကျဆင်းသွားပြီး ဆက်လက်၍လည်း ကျဆင်းနေဆဲ ဖြစ်၏။

အချိန်အခါကောင်းက တဖြည်းဖြည်း နီးကပ်လာသည်ကို မြင်တွေ့ရသည်နှင့်အမျှ သူ၏ စိတ်ကလည်း တဖြည်းဖြည်း လှုပ်ရှားလာခဲ့ပြီး ပြေလျော့နေသော စိတ်စွမ်းအားများကို စတင် စုစည်းလိုက်လေသည်...

နောက်တစ်ခဏတွင် အက်တမ်များ အားလုံး အောက်သို့ လုံးလုံးလျားလျား ပြုတ်ကျသွားသည့် ခဏမှာပင် သေမင်း၏ သတိပေးချက် အရိပ်အယောင်တစ်ခုက ထွက်ပေါ်လာလုနီးပါး ဖြစ်သွား၏။

လျှပ်စီးလက်သကဲ့သို့ မြန်ဆန်သော အချိန်အတွင်းမှာပင် လော်ယွမ်၏ အသိစိတ်က ရုတ်တရက် ပြင်းထန်စွာ လှုပ်ရှားသွားပြီး အလွန် အစွမ်းထက်သော စိတ်စွမ်းအားများဖြင့် အက်တမ်များ အားလုံးကို ချက်ချင်း လွှမ်းခြုံလိုက်လေသည်။

ဤအချိန်၌ သေမင်းနှင့် အပြေးပြိုင်နေရသကဲ့သို့ပင်။ အက်တမ်များ အားလုံး ပြုတ်ကျသွားပြီးနောက် သူ၏ တွေးခေါ်မှုများက စွမ်းအင် အထောက်အပံ့များကို လုံးဝ ဆုံးရှုံးသွားခဲ့သည်။

ကြွင်းကျန်ရစ်သော စွမ်းအင်များက ၅ မိနစ်မှ ၇ မိနစ်ခန့်အထိသာ ထိန်းထားနိုင်ပြီး ထိုထက်ပင် ပို၍ တိုတောင်းကောင်း တိုတောင်းနိုင်ပေသည်။

ဤအခြေအနေမျိုးတွင် သူ၏ ကြိုတင်သိမြင်နိုင်စွမ်းများကလည်း ပျောက်ကွယ်သွားခဲ့ပြီ ဖြစ်၏။ အကယ်၍ ကြိုတင်သိမြင်နိုင်ခဲ့လျှင်ပင် ဤမျှ ကြာမြင့်သော အချိန်နောက်ပိုင်းမှ ရလဒ်များကို မြင်တွေ့နိုင်မည် မဟုတ်ချေ။

တစ်ခုတည်းသော အားကိုးရာမှာ ယေဘုယျ တွက်ချက်မှုများနှင့် ခန့်မှန်းချက်များသာ ဖြစ်ပြီး အမှားအယွင်း ဖြစ်နိုင်ခြေ အလွန်ကြီးမားလှသည်။

ထို ၅ မိနစ်မှ ၇ မိနစ်ဆိုသော အချိန်က မတိုတောင်းလှဟု ထင်ရသော်လည်း ၎င်းက အခြေခံ အသိစိတ်ကို ထိန်းသိမ်းထားနိုင်သော အချိန်မျှသာ ဖြစ်၏။

အကယ်၍ အမြောက်အမြား အသုံးပြုလိုက်မည် ဆိုပါက ထိုအချိန်က အဆပေါင်း ထောင်နှင့်ချီ၍ တိုတောင်းသွားမည် ဖြစ်ပြီး အသက်ရှင်ခြင်းနှင့် သေဆုံးခြင်းကြားက အချိန်မှာ တစ်ခဏမျှသာ ဖြစ်သွားပေလိမ့်မည်။

ကံကောင်းသည်မှာ လော်ယွမ်၏ တွက်ချက်မှုများအရ တစ်စက္ကန့်မျှသာ ဆိုလျှင်ပင် သူ၏အဖို့ လုံလောက်နေပြီ ဖြစ်သည်။

အစမှအဆုံးတိုင် သူက စွန့်စားတတ်သော စရိုက်ရှိသူ မဟုတ်ချေ။ အထူးသဖြင့် ယခုကဲ့သို့ အကြောင်းအကျိုး ဆင်ခြင်တွေးခေါ်မှု လွှမ်းမိုးနေချိန်တွင် သူက စွန့်စားလိုစိတ် လုံးဝ ရှိမည်မဟုတ်ပေ။

အကယ်၍ ရာနှုန်းပြည့် သေချာမှု မရှိခဲ့ပါက ဤကဲ့သို့ အလွန် အန္တရာယ်များလှသော အစီအစဉ်ကို သူ လုံးဝ စမ်းသပ်မည် မဟုတ်ချေ။

ထိုအချိန်တွင် ခန္ဓာကိုယ်မှ လွင့်စင်ထွက်သွားသော ဤဟင်းလင်းပြင်ရှိ အက်တမ်များ အားလုံးက အလွန် အစွမ်းထက်သော စိတ်စွမ်းအားအောက်၌ တစ်ပြိုင်နက်တည်း ကျုံ့ဝင်ပြိုကျသွားကြပြီး မျက်စိကျိန်းမတတ် တောက်ပသော စွမ်းအင် အလင်းတန်းများ ပေါက်ကွဲထွက်လာလေ၏။

ထို့နောက် ထိုပြိုကျသွားသော အက်တမ်များက ဗဟိုချက်ဆီသို့ လေဆင်နှာမောင်း တစ်ခုကဲ့သို့ အရှိန်အဟုန်ဖြင့် စုရုံးသွားကြသည်။

မူလက ဟင်းလင်းပြင် ဖြစ်နေသော ဤနေရာတွင် ရုတ်တရက် လေပြင်းများ တိုက်ခတ်လာသကဲ့သို့ ဖြစ်သွားလေသည်။

ဟာလာဟင်းလင်း ဟင်းလင်းပြင်ထဲမှ ရုပ်ဝတ္ထုတစ်ခု လျင်မြန်စွာ ထွက်ပေါ်လာပြီးနောက် လေပူဖောင်းကို မှုတ်လိုက်သကဲ့သို့ ချက်ချင်း ဖောင်းပွလာခဲ့သည်။

စက္ကန့်၏ ဆယ်ပုံတစ်ပုံမျှ အကြာမှာပင် ဦးနှောက်တစ်ခုက လေထဲတွင် ပေါလောပေါ်လာခဲ့ပြီ ဖြစ်သည်။

၎င်းမှာ ပန်းကန်လုံးကြီး တစ်လုံးခန့် အရွယ်အစားရှိသော ကြွေရောင် ဦးနှောက်တစ်ခု ဖြစ်၏။ ချောမွေ့နေသော မျက်နှာပြင်က သတ္တုအလင်းရောင်များ တောက်ပနေသကဲ့သို့ပင်။

၎င်းက ပုံပေါ်လာရုံသာ ရှိသေးသော်လည်း မူလက လျင်မြန်စွာ အားနည်းသွားခဲ့သော စိတ်စွမ်းအားများက ခိုင်မာသော အထောက်အပံ့တစ်ခု ရရှိသွားသကဲ့သို့ ရုတ်တရက် ကြီးမားအားကောင်းလာခဲ့သည်။

ဤဟင်းလင်းပြင်လေးထဲတွင် သိမ်မွေ့သော လှိုင်းဂယက်များ ထပ်မံ၍ ထွက်ပေါ်လာပြန်လေသည်။

ဆက်ရန်...