အခန်း (၅၃၅-၅၃၆)

အပိုင်း(၅၃၅) ကွမ်တမ် အာရုံကြောစနစ်

အဆင့်မြင့်မားသော အတိုင်းအတာ နယ်ပယ်မှ ကျဆင်းလာသော အက်တမ်များသည် ဆဲလ်များအဖြစ် ပေါင်းစပ်သွားပြီးနောက် ထပ်မံ၍ အတိုင်းအတာ အဆင့်မြင့်တက်သွားပြန်၏။

မှောင်မိုက်စွမ်းအင် ကြိုးမျှင်လေးများသည် သူ၏ ဦးနှောက်ထဲသို့ စိမ့်ဝင်သွားပြီး တောက်ပသော အလင်းရောင်ဝန်းတစ်ခုကို ဖြာထွက်စေသည်။

ထိုအချိန်မှာပင် အရာအားလုံးကို သိရှိစွမ်းဆောင်နိုင်သည့် အစွမ်းတစ်မျိုးက သူ၏ နှလုံးသားထဲသို့ ထပ်မံပြည့်လျှံလာခဲ့သည်။

သူ၏ တွေးခေါ်နိုင်စွမ်းသည် ချက်ချင်းပင် အဆပေါင်း ထောင်သောင်းချီ၍ မြန်ဆန်သွားပြီး မူလက အနည်းငယ် ခက်ခဲနေခဲ့သော ခန္ဓာကိုယ် ပြန်လည်တည်ဆောက်ခြင်း လုပ်ငန်းစဉ်သည် ထမင်းစားရေသောက်သကဲ့သို့ လွယ်ကူသွားတော့သည်။

သို့သော် လော်ယွမ်က သူ၏ လှုပ်ရှားမှုများကို ရပ်တန့်လိုက်သည်။

အကာအကွယ်မဲ့နေသော ဦးနှောက်သည် လေထဲတွင် ငြိမ်သက်စွာ လွင့်မျောနေ၏။ သုညဒသမတစ်စက္ကန့်တိတိ ကုန်လွန်သွားသော်လည်း လော်ယွမ်က ထပ်မံလှုပ်ရှားခြင်း မရှိသေးပေ။

ဤအကြိမ်သည် ခန္ဓာကိုယ်ကို အလုံးစုံ ပြုပြင်ပြောင်းလဲရန် အကောင်းဆုံး အချိန်အခါဖြစ်ကြောင်း သူ ရုတ်တရက် သဘောပေါက်သွားသည်။

ယခင်တစ်ကြိမ် အတိုင်းအတာ အဆင့်မြင့်တက်ပြီးကတည်းက သူ၏ ခန္ဓာကိုယ် အရည်အသွေးများမှာ အလွန်အမင်း မညီမမျှ ဖြစ်နေကြောင်းကို ခံစားခဲ့ရသည်။

အထူးသဖြင့် သူ၏ ခွန်အားနှင့် လျင်မြန်မှုကြားတွင် ကြီးမားသော ကွာဟချက် ရှိနေခဲ့သည်။

လက်ရှိတွင် သူ၏ ခွန်အားအရည်အသွေးမှာ (၅၂) မှတ်ရှိသော်လည်း လျင်မြန်မှုမှာ (၂၇) မှတ်သာ ရှိလေသည်။

ကိန်းဂဏန်း နှစ်ခုကို ကြည့်လျှင် သိပ်မကွာခြားလှသလို တစ်ဆမျှပင် မကွာခြားသကဲ့သို့ ထင်ရသော်လည်း လက်တွေ့တွင်မူ အဆပေါင်း နှစ်သောင်းသုံးထောင်ကျော်မျှ ကွာခြားနေပြီး အလွန်အံ့မခန်းဖြစ်စရာ ကောင်းလှသည်။

ယခုကဲ့သို့ ကွာဟချက်ကြီးမားနေရသည့် အကြောင်းရင်းကိုလည်း လော်ယွမ်က ရှင်းလင်းစွာ သိရှိထားပြီး ဖြစ်သည်။

ဤသည်မှာ လူ့ခန္ဓာကိုယ်၏ သဘာဝ အချက်ပြပို့လွှတ်မှုစနစ်က ယူဆောင်လာသော ကန့်သတ်ချက်ပင် ဖြစ်သည်။

သူ့အပါအဝင် ကျောရိုးရှိသတ္တဝါ အားလုံးသည် အာရုံကြောဆဲလ်များ၏ လျှပ်စစ်ဓာတု အချက်ပြမှုများမှတစ်ဆင့် သတင်းအချက်အလက်များကို ပို့လွှတ်သည့် ရှေးရိုးကျစနစ်ကိုသာ အသုံးပြုကြသည်။

သို့ရာတွင် လျှပ်စစ်အချက်ပြမှုများ၏ ရွေ့လျားနှုန်းသည် အတိုင်းအတာ တစ်ခုအထိသာ အကန့်အသတ်ရှိပြီး ၎င်း၏ အလျင်သည် အလင်းအလျင်၏ တစ်ထောင်ပုံ တစ်ပုံခန့်သာ ရှိလေသည်။

မည်မျှပင် အဆင့်မြှင့်တင်ပါစေ ၎င်း၏ မူလကန့်သတ်ချက်များက တိုးတက်မှုကို ဟန့်တားထားမည်သာ ဖြစ်သည်။

လော်ယွမ်၏ လက်ရှိအဆင့်တွင်မူ အာရုံကြောစနစ် အဆင့်မြှင့်တင်ခြင်းသည် ထိပ်ဆုံးအမှတ်သို့ ရောက်ရှိလုနီးပါး ဖြစ်နေပြီဖြစ်ရာ သာမန်အခြေအနေမျိုးတွင် ထပ်မံတိုးတက်ရန် ခက်ခဲလှပေသည်။

မိမိ၏ ခွန်အားနှင့် လိုက်ဖက်သော အာရုံကြော တုံ့ပြန်မှုနှုန်းကို ရရှိရန်နှင့် တစ်ကြိမ်တည်းဖြင့် အပြီးတိုင် ဖြေရှင်းနိုင်ရန်အတွက် ပိုမိုထိရောက်မြန်ဆန်သော အာရုံကြောစနစ်အသစ် တစ်ခုဖြင့် အစားထိုးလဲလှယ်ရန်သာ ရှိတော့သည်။

လော်ယွမ်က အာကာသသားရဲကြီး၏ ခန္ဓာကိုယ်အတွင်းမှ တွေ့ရှိခဲ့သော ကွမ်တမ်အာရုံကြောဆဲလ်များကို စံနမူနာယူရန် ပြင်ဆင်လိုက်သည်။

၎င်းသည် အာရုံကြောစနစ်၏ ဆင့်ကဲပြောင်းလဲမှု လမ်းကြောင်းတစ်ခုဖြစ်ပြီး အလင်းထက်မြန်သော အချက်ပြ ပို့လွှတ်မှုစနစ် တစ်မျိုးလည်း ဖြစ်သည်။

ကွမ်တမ် ရစ်ပတ်မှု သဘောတရားကို အသုံးပြု၍ အာရုံကြော၏ သတင်းအချက်အလက် ပို့လွှတ်မှုကို အချိန်ကြန့်ကြာမှု လုံးဝမရှိစေဘဲ သုညအဆင့်အထိ ရောက်ရှိစေမည် ဖြစ်သည်။

ထိုအချိန်သို့ ရောက်လာပါက သူ၏ တွေးခေါ်မှု မြန်ဆန်သလောက် တုံ့ပြန်မှုနှုန်းကလည်း ထပ်တူမြန်ဆန်လာပေလိမ့်မည်။

......

လော်ယွမ်၏ အတွေးများက လျှပ်စီးလက်သကဲ့သို့ မြန်ဆန်နေပြီး ပြင်းထန်လှသော စိတ်စွမ်းအားသည် အသေးစားစကြဝဠာကို ဖြတ်ကျော်ကာ ပုံရိပ်ယောင်ကမ္ဘာ၏ ဆာဗာဆီသို့ ချက်ချင်းဆိုသလို ရောက်ရှိသွားတော့သည်။

ထိုအာကာသယာဉ်အတွင်းရှိ အစွမ်းအထက်ဆုံး စူပါကွမ်တမ်ကွန်ပျူတာ အစုအဝေးကြီးသည် ပုံရိပ်ယောင်ကမ္ဘာကို ထောက်ပံ့ပေးထားရုံသာမက လူသားတို့၏ အရေးအကြီးဆုံးသော နည်းပညာဆိုင်ရာ အချက်အလက် သိုလှောင်ရုံကြီးလည်း ဖြစ်ပေသည်။

ပုံရိပ်ယောင်ကမ္ဘာတွင် ရှာဖွေတွေ့ရှိခဲ့သော အရေးကြီး နည်းပညာသစ် အားလုံးကို ဤနေရာတွင် ပထမဆုံးအနေဖြင့် သိမ်းဆည်းထားလေ့ရှိသည်။

လော်ယွမ်က ကွမ်တမ်အာရုံကြောစနစ်နှင့် လူ့ခန္ဓာကိုယ် ဇီဝဗေဒဆိုင်ရာ နည်းပညာမှတ်တမ်းများ အားလုံးကို အလျင်အမြန် ရှာဖွေလိုက်သည်။

နောက်တစ်ခဏတွင်တော့ မရေမတွက်နိုင်သော ဒေတာအချက်အလက် ရေစီးကြောင်းကြီးသည် သူ၏ ဦးနှောက်ထဲသို့ ရေလှိုင်းကြီးများအလား အရှိန်အဟုန်ဖြင့် ဝင်ရောက်လာတော့သည်။

တစ်စက္ကန့်အကြာတွင် သူက ဆာဗာအတွင်းမှ ပြန်ထွက်လာခဲ့ပြီး သူ၏ စိတ်စွမ်းအား အစိတ်အပိုင်း အနည်းငယ်သည် လေဟာနယ်ဘောလုံးအတွင်းရှိ အသေးစားစကြဝဠာထဲသို့ ပြန်လည်ရောက်ရှိသွား၏။

သူ၏ ဦးနှောက်သည် အလွန်လျင်မြန်သော နှုန်းဖြင့် စတင်တွက်ချက်လာသည်။ အလွန်ရှုပ်ထွေးလှသော လူ့ခန္ဓာကိုယ် ဒေတာပုံစံငယ် တစ်ခုပြီးတစ်ခု သူ၏ ဦးနှောက်ထဲတွင် ဖြစ်တည်လာခဲ့ပြီးနောက် တစ်ဖန် ပြန်လည်ဖျက်ဆီးကာ အသစ်ပြန်လည် တည်ဆောက်နေခဲ့သည်။

ကွမ်တမ်အာရုံကြောစနစ်ကို လူ့ခန္ဓာကိုယ်အတွင်းသို့ ပေါင်းစပ်ထည့်သွင်းခြင်းမှာ ရိုးရှင်းစွာ အနည်းငယ် ပြုပြင်လိုက်ရုံဖြင့် ရနိုင်သည့်အရာ မဟုတ်ပေ။

အာရုံကြောစနစ်သည် လူ့ခန္ဓာကိုယ်၏ အရေးအကြီးဆုံး စနစ်များထဲမှ တစ်ခုဖြစ်ပြီး အရာရာတိုင်းနှင့် နီးပါး ဆက်စပ်နေကာ ၎င်း၏ အတွင်း၌ ရှုပ်ထွေးလှသော တွက်ချက်မှုစနစ် တစ်ခုလည်း ပါဝင်နေသည်။

လူ့ခန္ဓာကိုယ်ကို ကွန်ပျူတာတစ်လုံးနှင့် နှိုင်းယှဉ်မည်ဆိုလျှင် အာရုံကြောစနစ်သည် လည်ပတ်မှုစနစ်ပင် ဖြစ်သည်။

အချို့သော ပရိုဂရမ်များကို အလုပ်လုပ်စေရန် ကလစ်နှိပ်ပေးရန် လိုအပ်သော်လည်း များစွာသော ပရိုဂရမ်များမှာမူ နောက်ကွယ်တွင် အလိုအလျောက် လည်ပတ်နေကြသည်။

၎င်းတို့တွင် ကိုယ်ပိုင် ဦးစားပေးအဆင့်များနှင့် လည်ပတ်မှုပုံစံ အသီးသီး ရှိကြသည်။

ယခုအချိန်တွင် လော်ယွမ် ပြုလုပ်ရမည့်အရာမှာ လည်ပတ်မှုစနစ် အသစ်တစ်ခုကို လဲလှယ်တပ်ဆင်ခြင်းပင် ဖြစ်သည်။

ဤစနစ်သစ်၏ ပရိုဂရမ်ဘာသာစကားသည် မူလအရာနှင့် လုံးဝကွဲပြားနေသော်လည်း ၎င်း၏ လည်ပတ်မှုပုံစံနှင့် လုပ်ဆောင်ချက်များမှာမူ မူလအတိုင်း ဆင်တူနေရန် လိုအပ်သည်။

ဤသည်မှာ အလွန်ရှုပ်ထွေးလှသော စနစ်ပိုင်းဆိုင်ရာ တည်ဆောက်မှုတစ်ခု ဖြစ်ကြောင်း သံသယဖြစ်ဖွယ် မရှိချေ။

နာရီဝက်တိတိ အချိန်ယူပြီးနောက်မှသာ သင့်လျော်ဆီလျော်သော ကွမ်တမ်အာရုံကြောစနစ် ပုံစံတစ်ခုကို သူ ရွေးချယ်နိုင်ခဲ့သည်။

သူက ချက်ချင်းပင် စမ်းသပ်မှု စတင်လိုက်တော့သည်။

အထီးကျန်စွာ ရှိနေသော ဦးနှောက်ဆီမှ ကျောရိုးဆီသို့ အလျင်အမြန် ဆန့်ထွက်သွားသည်။

မကြာမီမှာပင် သလင်းကျောက်သဏ္ဍာန် ဦးခေါင်းခွံနှင့် ကျောရိုးတို့သည် ဟာလာဟင်းလင်းပြင်ထဲမှ ထွက်ပေါ်လာကာ ဦးနှောက်နှင့် ကျောရိုးမကြီးကို ကာကွယ်ပေးလိုက်ကြသည်။

သရီးဒီ ပရင်တာဖြင့် ပုံနှိပ်နေသည့်အလား ပြီးပြည့်စုံသော လူ့ခန္ဓာကိုယ် တစ်ခုသည် ဘာမျှမရှိရာမှ လျင်မြန်စွာ ဖြစ်တည်လာတော့သည်။

သူ၏ ဆံပင်များသည် စစ်မှန်သော အနက်ရောင်ဖြစ်ပြီး သံမဏိဆူးများအလား မတ်မတ်ထောင်နေသည်။ အရေပြားမှာမူ ကျောက်စိမ်းရောင် အဖြူဆင်းရှိပြီး ထူးဆန်းသော စဉ့်ရောင်တောက်တောက် အလင်းတစ်မျိုး ပါဝင်နေသဖြင့် လူသားတစ်ဦးနှင့်ပင် မတူတော့ချေ။

ထိုအခါ လော်ယွမ်က မျက်လုံးများကို ဖြည်းညင်းစွာ ဖွင့်လိုက်ပြီး သူ၏ တစ်ကိုယ်လုံး အသစ်တစ်ဖန် ပြန်လည်မွေးဖွားလာသကဲ့သို့ ခံစားလိုက်ရသည်။ ခန္ဓာကိုယ်သည် ပေါ့ပါးလွန်းသဖြင့် လွင့်ပျံသွားတော့မည့်အလား ထင်မှတ်ရ၏။

ဤလေဟာနယ် ဓာတ်ခွဲခန်းအတွင်းတွင် အချိန်သဘောတရားများ ကမောက်ကမ ဖြစ်နေသောကြောင့် ကွမ်တမ်အာရုံကြောစနစ်ကို ပြောင်းလဲလိုက်သော်လည်း ထူးခြားမှုကို သိပ်မခံစားရပေ။

ခန္ဓာကိုယ် အချက်ပြ ပို့လွှတ်မှုများ ပိုမိုချောမွေ့လာခြင်း၊ အထိအတွေ့ ပိုမိုခံစားလွယ်လာခြင်းနှင့် အမြင်အာရုံ အနည်းငယ် တိုးတက်လာခြင်းတို့ကိုသာ ခံစားရသည်။

လေဟာနယ်ထဲတွင် ဖြစ်သဖြင့် အကြားအာရုံနှင့် အနံ့အာရုံတို့ကိုမူ လုံးဝ ခံစား၍မရနိုင်ချေ။

သူက ခန္ဓာကိုယ်ကို စတင်လှုပ်ရှားကြည့်လိုက်သည်။ ရှေးဦးစွာ လက်သီးကို ဆုပ်ကြည့်လိုက်ရာ အဆစ်အမြစ်များမှာ တားဆီးမှု မရှိဘဲ အတော်လေး ကွေးဆန့်လွယ်ကြောင်း တွေ့ရသည်။

ကြွက်သားများပင် တောင့်တင်းနေခြင်း မရှိဘဲ အတော်လေး ပျော့ပျောင်းနေပုံရသည်။

ဤကြွက်သားများသည် တစ်ထောင်ဆ ကျုံ့ဝင်မှုအချိုးရှိသော အသွင်ပြောင်း ဒြပ်ပစ္စည်းများ ဖြစ်သည်ကို လော်ယွမ် အနေဖြင့် ယုံကြည်ရန်ပင် ခက်ခဲနေသည်။

တိုက်တေနီယမ် သတ္တုစပ်ကို ဤဒြပ်ပစ္စည်းများနှင့် နှိုင်းယှဉ်လိုက်ပါက ရွှံ့ပျော့များထက် ပို၍ မကောင်းနိုင်ချေ။

သို့သော်လည်း သူ၏ အမြင်တွင်မူ ထူးခြားမှုကို မခံစားရပေ။

အရေပြားပင်လျှင် ပျော့ပျောင်းမှု ရှိနေပြီး အရာအားလုံးသည် သဘာဝကျကျ ဖြစ်တည်နေသကဲ့သို့ ရှိသည်။

သို့သော် ဤသည်မှာပင် အကြီးမားဆုံးသော ထူးခြားမှုဖြစ်ပြီး သူ၏ မူလခန့်မှန်းချက်များနှင့် များစွာ ကွာခြားနေခဲ့သည်။ သူ၏ အတွေးထဲတွင် ဒြပ်ထုများ ကျုံ့ဝင်သွားပြီးနောက် ခန္ဓာကိုယ်သည် ပိုမိုလေးလံထိုင်းမှိုင်းလာမည်ဖြစ်ပြီး ခွန်အားများ တိုးလာရန်မဆိုထားနှင့် အနည်းငယ်ပင် လျော့ကျသွားမည်ဟု ထင်မှတ်ထားခဲ့သည်။

သို့သော် ယခုအချိန်တွင်မူ ပြောင်းပြန်ဖြစ်နေပုံရသည်။

သူ၏ ခွန်အားများ ပိုမိုကြီးမားလာသည်ကို သူ ခံစားသိရှိနေ၏။

လော်ယွမ်က ရုတ်တရက် တစ်စုံတစ်ခုကို သတိရသွားကာ သူ၏ စိတ်အာရုံကို ခန္ဓာကိုယ်တွင်းသို့ အလျင်အမြန် စေလွှတ်လိုက်ပြီး ဆဲလ်များအတွင်းရှိ မိုင်တိုကွန်ဒရီးယားများကို သေချာစွာ စစ်ဆေးကြည့်လိုက်သည်။

ထိုအခါ မိုင်တိုကွန်ဒရီးယားများ၏ အအေးခံ အဏုမြူ ပေါင်းစပ်မှုနှုန်းမှာ သိသာစွာ ပြောင်းလဲသွားကြောင်းကို ချက်ချင်း တွေ့ရှိလိုက်ရသည်။

"မဟုတ်သေးဘူး... ဒါက လုံးဝကို အအေးခံ ပေါင်းစပ်မှု မဟုတ်တော့ဘူး" လော်ယွမ်က မိုင်တိုကွန်ဒရီးယား အတွင်းရှိ ပူပြင်းလှသော အဖြူရောင် မီးတောက်ငယ်လေးကို ကြည့်ရင်း သူ၏ စိတ်ထဲတွင် တည်ငြိမ်အောင် မထိန်းထားနိုင်တော့ပေ။

"ဒါက အသေးစား အဏုမြူ ပေါင်းစပ်ဓာတ်ပေါင်းဖိုလေး တစ်ခုနဲ့ အတူတူပဲ"

ကျုံ့ဝင်သွားပြီးနောက် မိုင်တိုကွန်ဒရီးယား၏ ခိုင်ခံ့မှုမှာ သန်းထောင်ချီ၍ မြင့်တက်လာပြီး ပိုမိုပြင်းထန်သော ပေါင်းစပ်မှု တုံ့ပြန်မှုများကို ခံနိုင်ရည်ရှိလာသောကြောင့် မိုင်တိုကွန်ဒရီးယား၏ ပေါင်းစပ်မှု စွမ်းဆောင်ရည်သည် ထပ်ညွှန်းကိန်းအလိုက် တိုးတက်လာခြင်းလည်း ဖြစ်ကောင်းဖြစ်နိုင်သည်။

ယခင်ကဆိုလျှင် မိုင်တိုကွန်ဒရီးယား တစ်ခုသည် တစ်စက္ကန့်လျှင် စွမ်းအင်တစ်ယူနစ်သာ ထုတ်လုပ်နိုင်သော်လည်း ယခုအခါတွင်မူ အနည်းဆုံး အဆပေါင်း သောင်းချီ၍ ထုတ်လုပ်နိုင်နေပြီ ဖြစ်သည်။

လော်ယွမ်က သူ၏ လက်သီးကို အားကုန်ဆုပ်လိုက်ရာ ကြွက်သားများ စတင်လှုပ်ရှားလာပြီး ကြောက်မက်ဖွယ်ကောင်းသော ခွန်အားတစ်ရပ်သည် ခန္ဓာကိုယ်ထဲမှ ပန်းထွက်လာသည်။

သူ၏ တစ်ကိုယ်လုံးမှ တောက်ပပြင်းရှသော အလင်းရောင်များ ဖြာထွက်လာပြီး ဤသည်မှာ သန့်စင်သော အပူချိန်မြင့် ပလာစမာ မီးတောက်ပင် ဖြစ်သည်။

သူ မသိလိုက်ဘာသာဖြင့်ပင် သူ၏ စိတ်ထဲတွင် အရာအားလုံးကို ဖျက်ဆီးပစ်လိုသော ပြင်းထန်သည့် စိတ်ဆန္ဒတစ်ခု ဖြစ်ပေါ်လာခဲ့သည်။

လော်ယွမ်က ဓာတ်ခွဲခန်း၏ နံရံကို လှမ်းကြည့်လိုက်သည်။ ထိုနံရံသည် ကျုံ့ဝင်မှုအချိုး ငါးသောင်းအထိ ရှိသော ဒြပ်ပစ္စည်းများဖြင့် ပြုလုပ်ထားခြင်း ဖြစ်သည်။

အထူအားဖြင့် တစ်လက်မ၏ သောင်းဂဏန်းပုံ တစ်ပုံခန့်သာ ရှိပြီး စက္ကူထက်ပင် အဆပေါင်းများစွာ ပိုမိုပါးလွှာကာ လက်ချောင်းဖြင့် ထိုးဖောက်လိုက်လျှင်ပင် ပေါက်ပြဲသွားမည့်အလား ထင်ရသည်။

သို့သော်လည်း ယခင်က လော်ယွမ်သည် သူ၏ စူပါစွမ်းအားရှင် အခြေအနေတွင် ရှိနေစဉ်ကပင် အကြမ်းဖက်၍ ဖျက်ဆီးရန် မဆိုထားနှင့်၊ အစင်းရာလေး တစ်ခုမျှပင် ချန်ထားရစ်နိုင်ခဲ့ခြင်း မရှိပေ။

သို့သော် ယခုအချိန်တွင်မူ ဤနံရံသည် သူ၏ ခွန်အားအောက်တွင် ပကတိအတိုင်း ကျန်ရှိနေနိုင်သေးသလား ဆိုသည်ကို သူ စမ်းသပ်ကြည့်ချင်လာသည်။

(အခုသူက ယာဉ်ပျံပေါ်မှာမဟုတ်ပဲ စကြဝဠာအသေးစားလေးထဲမှာပါ)

သူက ကိုယ်နေဟန်ထားကို အနည်းငယ် လှုပ်ရှားလိုက်သည်။ ခွန်အားများသည် သူ၏ အတွေးများနှင့်အတူ စီးဆင်းသွားပြီး သူ၏ တွေးခေါ်မှုနှင့် လှုပ်ရှားမှုသည် တစ်ထပ်တည်း ကျနေလေသည်။

သူ၏ ပုံရိပ်သည် နံရံရှေ့သို့ ချက်ချင်းဆိုသလို ပြောင်းရွှေ့ရောက်ရှိသွား၏။

ထို့နောက် လော်ယွမ်က လက်သီးဖြင့် ပြင်းထန်စွာ ထိုးချလိုက်သည်။ သူ၏ လက်သီးထိုးလိုက်သော အလျင်ကို လူသားတို့၏ နည်းပညာဖြင့်ပင် ဖမ်းယူသိရှိနိုင်ရန် ခက်ခဲလှပေသည်။

လျှပ်စစ်သံလိုက် အမြောက်ဆံ ထွက်ပေါ်လာသကဲ့သို့ မျက်စိတစ်မှိတ်အတွင်းမှာပင် လက်သီး၏ အလျင်သည် အလင်းအလျင်၏ သုံးပုံတစ်ပုံအထိ ရောက်ရှိသွားခဲ့သည်။

နာနိုစက္ကန့် အနည်းငယ် အကြာတွင် ဓာတ်ခွဲခန်းအတွင်း၌ အဆုံးအစမဲ့သော အလင်းနှင့် အပူများ ချက်ချင်း ထွက်ပေါ်လာပြီး တစ်ကမ္ဘာလုံး နေမင်းကြီး၏ အလယ်ဗဟိုသို့ ရောက်ရှိသွားသကဲ့သို့ ဖြစ်သွားတော့သည်။

ဤလက်သီးချက်၏ စွမ်းအင်သည် တန်ချိန် သန်းပေါင်းများစွာ ရှိသော ဟိုက်ဒရိုဂျင်ဗုံး ပေါက်ကွဲမှုထက် မလျော့ကျပေ။

ဒီဂရီ သန်းချီ၍ မြင့်မားသော အပူချိန်သည် ပိတ်လှောင်နေသော အာကာသနယ်မြေ တစ်ခုလုံးကို ပြည့်နှက်သွားစေသည်။

စက္ကန့် သုံးဆယ်ခန့် ကြာမြင့်ပြီးနောက်မှသာ မျက်စိကျိန်းစရာ ကောင်းလှသော ထိုအလင်းရောင်သည် တဖြည်းဖြည်း မှေးမှိန်သွားတော့သည်။

လော်ယွမ်က လေထဲတွင် ငြိမ်သက်စွာ လွင့်မျောနေ၏။ သူ၏ တစ်ကိုယ်လုံးတွင် ထူးခြားမှု တစ်စုံတစ်ရာမှ မရှိဘဲ အရေပြားပင်လျှင် အနည်းငယ်မျှ နီမြန်းသွားခြင်း မရှိချေ။

သူက နံရံကို လှမ်းကြည့်လိုက်ရာ ပါးလွှာသော ထိုသတ္တုနံရံ မျက်နှာပြင်ပေါ်တွင် မှိန်ပျပျ လက်သီးရာ တစ်ခုသာ ထွက်ပေါ်နေသည်ကို တွေ့လိုက်ရသည်။

ဤဒြပ်ပစ္စည်းသည် ယုံကြည်နိုင်စရာ မရှိလောက်အောင် မာကျောလှသည်ဟု ဝန်ခံရမည်သာ ဖြစ်သည်။

ယခုအချိန်၌ လော်ယွမ် ပိုင်ဆိုင်ထားသော ကြောက်မက်ဖွယ် ခွန်အားဖြင့်ပင် ဤဒြပ်ပစ္စည်းကို ရင်ဆိုင်ရာတွင် အင်အားမလုံလောက်သေးပေ။

သို့သော်လည်း ယခင်ကထက်စာလျှင် များစွာ ပိုမိုကောင်းမွန်လာခဲ့ပြီး အနည်းဆုံးတော့ အစင်းရာလေးတစ်ခု ချန်ထားနိုင်ခဲ့ပြီ ဖြစ်သည်။

သူ၏ ခွန်အားကို နောက်ထပ် ဆယ်ဆခန့် ထပ်မံမြှင့်တင်နိုင်မည်ဆိုလျှင် ဤနံရံကို ဖြိုခွဲနိုင်လိမ့်မည်ဟု လော်ယွမ်က ခန့်မှန်းလိုက်သည်။

ထိုစဉ် သူ၏ လက်မောင်းတွင် တစ်စုံတစ်ခု ထူးခြားနေသည်ကို သူ ရုတ်တရက် ခံစားလိုက်ရသည်။ ငုံ့ကြည့်လိုက်သောအခါ သူ၏ လက်မောင်းမှာ လေးငါးပိုင်းမျှ ကျိုးပဲ့နေပြီး လက်သီးမှာလည်း ပုံစံပျက်ယွင်းကာ အရိုးများ အစအနမကျန် ကြေမွနေသည်ကို အံ့သြစွာ တွေ့လိုက်ရသည်။

သို့သော် ထူးဆန်းသည်မှာ သူကိုယ်တိုင် နာကျင်မှုကို အနည်းငယ်မျှပင် မခံစားရခြင်း ဖြစ်သည်။

သူ အနည်းငယ် မှင်သက်သွားပြီးနောက် သူ မသိလိုက်ဘဲ နာကျင်စိတ် အာရုံခံစားမှုကို လျစ်လျူရှုလိုက်မိကြောင်းကို မတတ်သာစွာဖြင့် သဘောပေါက်သွားတော့သည်။

နာကျင်မှု အာရုံသည် အသုံးမဝင်သည့် ဆိုးရွားသော ခံစားမှုတစ်ခုဟု ထင်ရသော်လည်း သက်ရှိများအတွက်မူ ကြီးမားသော အဓိပ္ပာယ်ရှိပေသည်။

နာကျင်မှုသာ မရှိပါက လူသားတို့သည် အချိန်ကြာမြင့်စွာကပင် မျိုးသုဉ်းပျောက်ကွယ်သွားခဲ့လောက်ပြီ ဖြစ်သည်။

၎င်းသည် အန္တရာယ်ကို ရှောင်ရှားရန်၊ ခန္ဓာကိုယ်ကို ကာကွယ်ရန်နှင့် ဒဏ်ရာရရှိခြင်းမှ ကာကွယ်ပေးရန်အတွက် ခန္ဓာကိုယ်၏ အကာအကွယ် ယန္တရားတစ်ရပ် ဖြစ်ပေသည်။

သေချာသည်မှာ ယခုလက်ရှိ လော်ယွမ်အတွက် ဤကဲ့သို့သော ဒဏ်ရာမျိုးသည် အသေးအမွှားမျှသာ ဖြစ်ပြီး အချိန်မရွေး ပြန်လည်ကုသနိုင်ပေသည်။

သို့သော် နာကျင်မှု အာရုံမရှိခြင်းက သူ့ကို သတိမမူဘဲ လျစ်လျူရှုမိစေရန် အမြဲတစေ တွန်းအားပေးနေလိမ့်မည် ဖြစ်သည်။

ကံကောင်းသည်မှာ ပြဿနာက သိပ်မကြီးမားလှပေ။ လော်ယွမ်က သူ၏ လက်မောင်းကို ပြန်လည်ကုသရင်း ယခုလေးတင် ပြုပြင်ပြောင်းလဲထားသော ကွမ်တမ် အာရုံကြောစနစ်ကို စတင်ချိန်ညှိလိုက်တော့သည်။

ဆက်ရန်...

အပိုင်း(၅၃၆) အရာရာတိုင်းက ပြောင်းလဲသွားခဲ့ပြီ

နာကျင်မှုဆိုသည့် အာရုံခံစားမှု သက်သက်သာမက ပတ်ဝန်းကျင်ကို အာရုံခံနိုင်စွမ်းသည်လည်း ယခင်ကထက် ပိုမိုအားကောင်းလာရန် လိုအပ်နေပေသည်။

ယခုအချိန်တွင် လော်ယွမ်၏ ဦးနှောက်တွေးခေါ်မှု အမြန်နှုန်းက ပိုမိုမြင့်မားသည့် သတင်းအချက်အလက်များကို လွယ်ကူစွာ ကိုင်တွယ်ဖြေရှင်းနိုင်နေပြီ ဖြစ်သည်။

အရင်ကမူ အာရုံကြောစနစ်၏ ကန့်သတ်ချက်များကြောင့် ဤစွမ်းရည်ပိုင်းသည် များစွာ နောက်ကျကျန်ရစ်ခဲ့ရသည်။

သို့သော်လည်း ယခုအခါတွင်တော့ ထိုသို့သော ကန့်သတ်ချက်မျိုး မရှိတော့ချေ။

အမြင်၊ အတွေ့၊ အရသာ၊ အနံ့နှင့် အကြားအာရုံ စသည့် အာရုံခံစားမှုများသည် လက်ရှိဦးနှောက်နှင့် လိုက်ဖက်ညီစေရန်အတွက် ပိုမိုကျယ်ပြန့်လာရန် လိုအပ်နေသည်။

ဤသို့ ပြုပြင်ပြောင်းလဲမှုများကို ရက်အတန်ကြာ ပြုလုပ်ခဲ့ပြီးနောက် ငါးရက်အကြာတွင်မှ လော်ယွမ်က အာကာသယာဉ်ပေါ်သို့ ပြန်လည်ရောက်ရှိလာခဲ့သည်။

အာကာသယာဉ်တွင်းသို့ ဝင်ရောက်လိုက်သည်နှင့် တစ်ပြိုင်နက် လော်ယွမ်က ပြင်းထန်သော သဟဇာတမဖြစ်မှုကို ခံစားလိုက်ရသည်။

လော်ယွမ်ရှိနေသည့် နေရာတစ်ဝိုက်သည် ကန့်သတ်ဇုန်တစ်ခုအဖြစ် သတ်မှတ်ခံထားရသည်မှာ ကြာပြီဖြစ်ပြီး အမြဲတစေ တိတ်ဆိတ်ငြိမ်သက်နေလေ့ရှိသည်။

သို့သော်လည်း ယခုအချိန်၌ သူ၏ခံစားမှုတွင်မူ အလွန်တရာ ဆူညံနေသကဲ့သို့ ဖြစ်နေပြီး မရေမတွက်နိုင်သော သတင်းအချက်အလက်များသည် အာရုံငါးပါးမှတစ်ဆင့် သူ၏ဦးနှောက်ထဲသို့ ဒီရေလှိုင်းများအလား အရှိန်အဟုန်ဖြင့် ဝင်ရောက်လာနေသည်။

ကမ္ဘာကြီးတစ်ခုလုံးက ကြီးမားသော ပြောင်းလဲမှုကြီးတစ်ခု ဖြစ်ပေါ်သွားသကဲ့သို့ပင်။

သူက လေထုထဲရှိ အက်တမ်တိုင်း၏ ပြောင်းလဲမှုများကို မြင်တွေ့နိုင်ပြီး နောက်တစ်ဆင့် သွားမည့်လမ်းကြောင်းကိုလည်း အလိုအလျောက် တွက်ချက်နိုင်စွမ်း ရှိနေသည်။

ထိုမော်လီကျူးလေးများ သူ၏အသားအရေပေါ်သို့ လာရောက်ရိုက်ခတ်သည့် ခံစားမှုကို အာရုံခံနိုင်ရုံသာမက ၎င်းတို့တွင် ပါဝင်သော ရွေ့လျားစွမ်းအင်ကိုပါ ချက်ချင်းခန့်မှန်းနိုင်စွမ်း ရှိနေပေသည်။

မော်လီကျူးတိုင်း၏ သိမ်မွေ့ကွဲပြားသော အနံ့များကို ရှူရှိုက်မိပြီး ၎င်းတို့၏ ဖွဲ့စည်းပုံကိုပင် ခွဲခြားသိမြင်နိုင်သည်။

အရင်က လေဟာနယ်အပြည့်ရှိသော ပတ်ဝန်းကျင်တွင် ရှိနေခဲ့စဉ်က သူက ကြီးမားသည့် ပြောင်းလဲမှုများကို မခံစားခဲ့ရသော်လည်း ဤနေရာသို့ ရောက်လာချိန်တွင်မူ အာရုံခံစားမှုများကို ပြုပြင်ပြောင်းလဲလိုက်ခြင်း၏ ဘေးထွက်ဆိုးကျိုးများက ရုတ်တရက်ဆိုသလို ပြင်းထန်စွာ ပေါက်ကွဲထွက်လာခဲ့သည်။

ကံကောင်းထောက်မစွာဖြင့် စက္ကန့်အနည်းငယ်အတွင်းမှာပင် လော်ယွမ်က ထိုအခြေအနေကို လျင်မြန်စွာ အသားကျသွားခဲ့သည်။

ယခုလက်ရှိ လော်ယွမ်သည် လျင်မြန်မှုတစ်မှတ် တိုးလာတိုင်း ဆယ်ရက် သို့မဟုတ် လဝက်ခန့် အချိန်ယူ၍ အသားကျအောင် နေရသည့် အရင်ကလို လူမျိုး မဟုတ်တော့ပေ။

အလွန်မြန်ဆန်သော တွေးခေါ်မှုစွမ်းရည်ရှိသည့် ကွမ်တမ်ဦးနှောက်က သူ၏ ခန္ဓာကိုယ်ပိုင်းဆိုင်ရာ ဖြစ်စေ၊ ပြင်ပမှ သတင်းအချက်အလက်များကို ဖြစ်စေ လုံးဝ ထိန်းချုပ်နိုင်စွမ်း ရှိစေခဲ့သည်။

ထို့အပြင် ယခုတစ်ကြိမ် ပြုပြင်ပြောင်းလဲမှုတွင် အာရုံခံစားမှု ထက်မြက်လာခြင်းက ဒုတိယအချက်သာ ဖြစ်ပြီး အသေးအမွှား အစိတ်အပိုင်းလေးတစ်ခုမျှသာ ဖြစ်သည်။

အကြီးမားဆုံးသော အောင်မြင်မှုမှာ ကွမ်တမ်အာရုံကြောစနစ်ကို အစားထိုးလိုက်ခြင်းဖြစ်ပြီး ခန္ဓာကိုယ်နှင့် တွေးခေါ်မှုကို တစ်ပြေးညီဖြစ်စေကာ တွေးခေါ်မှု မြန်ဆန်သလောက် တုံ့ပြန်မှုအမြန်နှုန်းကလည်း တူညီစွာ မြန်ဆန်လာခြင်းပင် ဖြစ်သည်။

သူ၏ တွေးခေါ်မှုအမြန်နှုန်းက သာမန်လူသားများထက် အဆပေါင်း သန်းထောင်ချီ၍ မြန်ဆန်နေပြီး သူ မြင့်မားသောအမြန်နှုန်းဖြင့် တွက်ချက်နေချိန်တွင် ကမ္ဘာကြီးတစ်ခုလုံးမှာ ရပ်တန့်နေသကဲ့သို့ပင် ဖြစ်နေတော့သည်။

သေချာပေါက် စိတ်ဆန္ဒဖြင့် ခန္ဓာကိုယ်ကို လှုပ်ရှားစေသည့်အခါတွင် မလွဲမသွေ နှောင့်နှေးမှုအနည်းငယ်တော့ ရှိနိုင်ပြီး တွေးခေါ်မှုကဲ့သို့တော့ လုံးဝ အတိအကျ မြန်ဆန်နေမည် မဟုတ်ပေ။

သို့သော် တုံ့ပြန်မှု အမြန်နှုန်းမှာ အနည်းဆုံး ယခင်ကထက် အဆပေါင်း ထောင်သောင်းချီ၍ မြန်ဆန်နေပြီ ဖြစ်သည်။

၎င်းအပြင် တစ်ထောင်ပုံတစ်ပုံ အချိုးအစားဖြင့် ကျုံ့ဝင်သွားသော သန်မာသည့် ခန္ဓာကိုယ်ကြောင့် လွန်ခဲ့သည့် ရက်အနည်းငယ်ကနှင့် နှိုင်းယှဉ်လျှင် သူ၏ ရုပ်ပိုင်းဆိုင်ရာ စွမ်းအားသည် မိုးနှင့်မြေလို ပြောင်းလဲသွားခဲ့လေပြီ။

……

၂၀၃၂ ခုနှစ်၊ မတ်လ။

ကြယ်တာရာ အာကာသဟင်းလင်းပြင်ထဲတွင် ဆယ့်တစ်နှစ်တိုင်တိုင် ပျံသန်းနေခဲ့သော ဤအာကာသယာဉ်အိုကြီးသည် နောက်ဆုံးတွင်တော့ တစ်ဖန် ရပ်တန့်သွားခဲ့လေပြီ။

အာကာသယာဉ်က အင်ဂျင်များကို လုံးဝ ပိတ်ချလိုက်ပြီး အရှိန်ဖြင့်သာ အာကာသထဲတွင် ဖြည်းညင်းစွာ ရွေ့လျားနေသည်။

တစ်ချိန်တည်းမှာပင် ဆယ့်တစ်နှစ်ကြာ အိပ်မောကျနေခဲ့သော ပြည်သူများသည် တစ်ဖန် ပြန်လည်နိုးထလာကြပြီး အိပ်စက်ခြင်းအခန်းတွင်းမှ ထွက်လာခဲ့ကြသည်။

သူတို့အတွက်မူ ဆယ့်တစ်နှစ်ဟူသော အချိန်ကာလသည် တစ်ရေးအိပ်လိုက်ရသကဲ့သို့ ကုန်လွန်သွားခဲ့ခြင်း ဖြစ်သော်လည်း နိုးကြားနေခဲ့သူများအတွက်မူ အရာရာတိုင်းက ပြောင်းလဲသွားခဲ့လေပြီ။

ဟွမ်ကျားဟွေ၊ ကျိုးယလီနှင့် ဝမ်ရှီရှီ အစရှိသည့် အမျိုးသမီးအချို့သည် ဓာတ်ခွဲခန်းထဲတွင် လော်ယွမ်ကို တွေ့လိုက်ရသည်။ သို့သော်လည်း သူတို့မြင်တွေ့လိုက်ရသည်မှာ သူ၏ ကျောပြင်ကိုသာ ဖြစ်သည်။

အဆုံးအစမရှိသော လေလှိုင်းများက သူ၏ဘေးပတ်ဝန်းကျင်တွင် ဖြစ်ပေါ်လာလိုက်၊ ပျောက်ကွယ်သွားလိုက်နှင့် အချင်းချင်း ရိုက်ခတ်ရစ်ပတ်နေကြရာ သူ၏ကိုယ်တစ်ဝိုက်တွင် ပြင်းထန်သော လေပြင်းများက အဆုံးအစမရှိ တိုက်ခတ်နေသကဲ့သို့ ဖြစ်နေသည်။ တံခါးပေါက်တွင် ရပ်နေသည့်တိုင်အောင် ထိုအရာက သူတို့ကို အသက်ရှူရခက်ခဲသွားစေသည်။

"လော်ယွမ်... ရှင်... "

လူတိုင်းက တွေဝေစွာ ကြည့်နေကြပြီး ယုံကြည်နိုင်ရန် ခဲယဉ်းနေခဲ့သည်။

လေပြင်းများထဲတွင် မထင်မရှား ဖြစ်နေသော ထိုလူရိပ်က သူတို့ကို သူစိမ်းဆန်ပြီး စိုးရိမ်ပူပန်မှု တစ်မျိုးကို ခံစားရစေသည်။

လော်ယွမ်က နှုတ်ဆိတ်နေခဲ့သည်။ သူ၏ မြင့်မားလှသော တွေးခေါ်နိုင်စွမ်းက သူ၏ခံစားချက်များကို ပို၍ပင် လျော့နည်းသွားစေပြီး သူ၏စရိုက်သည်လည်း တစ်နေ့တခြား အကြွင်းမဲ့ အကျိုးအကြောင်းဆင်ခြင်နိုင်မှုဆီသို့ ဦးတည်သွားနေလေပြီ။

"ကိုကြီးယွမ်... ကိုကြီး ဘာဖြစ်သွားတာလဲ... သမီး ရှီရှီလေ... ကိုကြီးက သမီးတို့ကို မလိုချင်တော့ဘူးလား... " ဝမ်ရှီရှီက အနည်းငယ် ထိတ်လန့်တကြား ပြောလိုက်ပြီး သူမ၏ မျက်ဝန်းများတွင်လည်း မျက်ရည်များ ရစ်သိုင်းနေခဲ့သည်။

လော်ယွမ်ကတော့ မလှုပ်မယှက် ရပ်နေဆဲပင် ဖြစ်သည်။ လူတိုင်း၏ စိတ်နှလုံးသည်လည်း ပို၍ ပို၍ လေးလံလာခဲ့သည်။ ဤသည်မှာ ဝေးကွာသွားသော အေးစက်မှုတစ်မျိုးဖြစ်ပြီး လူကို အရိုးထဲထိတိုင်အောင် ချမ်းစိမ့်သွားစေသည်။

ဘေးနားရှိ ဗီဇပြောင်းလူသားမလေးက စိုးရိမ်တကြီးဖြင့် အသံများပြုနေပြီး အနားသို့ချဉ်းကပ်ချင်သော်လည်း မချဉ်းကပ်ရဲပေ။ သူမက ထိုလူရိပ်ထံမှ ကြီးမားလှသော နေလုံးကြီးတစ်လုံးကဲ့သို့ ထိတ်လန့်ဖွယ်ရာ ဖျက်ဆီးနိုင်စွမ်းရှိသော စွမ်းအားကို ခံစားနေရသည်။

သို့သော်လည်း ဝမ်ရှီရှီကတော့ ဂရုမစိုက်ပေ။ သူမက မျက်ရည်များဝဲကာ လော်ယွမ်ဆီသို့ လျင်မြန်စွာ လျှောက်သွားလိုက်သည်။

ပြင်းထန်သော လေပြင်းများက တဝူးဝူး တိုက်ခတ်နေပြီး အနားသို့မရောက်သေးခင်မှာပင် သူမ၏အသားအရေကို နာကျင်စေသည်အထိ ရိုက်ခတ်နေခဲ့သည်။

လော်ယွမ်က သက်ပြင်းမသိမသာချလိုက်ပြီး နောက်ဆုံးတွင်တော့ လှည့်ကြည့်လာခဲ့သည်။ တစ်ချိန်တည်းမှာပင် သူ၏ စိတ်ဆန္ဒကို ဖြန့်ကြက်လိုက်ရာ ချက်ချင်းဆိုသလို လေလှိုင်းများအားလုံးက လျင်မြန်စွာ ငြိမ်သက်သွားပြီး အရာအားလုံးက လေငြိမ်လှိုင်းဆိတ်သွားခဲ့သည်။

ဤသည်မှာ အပြင်ဘက်သို့ ယိုစိမ့်ထွက်နေသော စွမ်းအားများအားလုံးကို သူ၏စိတ်ဆန္ဒဖြင့် ဖယ်ရှားချေဖျက်လိုက်ခြင်းပင် ဖြစ်သည်။

ထိုအချိန်ကျမှသာ လူတိုင်းက လော်ယွမ်၏ မျက်နှာကို ရှင်းလင်းစွာ မြင်တွေ့လိုက်ရပြီး သူတို့၏ နှလုံးခုန်သံများပင် ခေတ္တမျှ ရပ်တန့်သွားခဲ့ရသည်။

ကြွေသားကဲ့သို့ ဖြူဆွတ်နေသော သူ၏ အသားအရေက အလင်းရောင်အောက်တွင် မသိမသာ တောက်ပနေပြီး မာကျောချောမွေ့သော သွင်ပြင်လက္ခဏာကို ဆောင်နေသည်။

သူ၏ ခန္ဓာကိုယ်ထံမှ လူသားတစ်ယောက်၏ အငွေ့အသက်ကို အနည်းငယ်မျှပင် မတွေ့ရတော့ဘဲ ပြင်းထန်သော ထိတ်လန့်ကြောက်ရွံ့မှုကိုသာ ခံစားရစေသည်။

အကယ်၍သာ သူက မလှုပ်မယှက်နေမည်ဆိုပါက မည်သူမဆို သူ့ကို အလွန်လှပပြီး အသက်ဝင်လှသော အဖြူရောင် ကြွေရုပ်တုကြီးတစ်ခုဟု ထင်မှတ်သွားကြပေလိမ့်မည်။

လော်ယွမ်က လူတိုင်းကို ခံစားချက်ကင်းမဲ့သော မျက်နှာဖြင့် ကြည့်လိုက်သည်။ ဆယ့်တစ်နှစ်တာ အိပ်မောကျနေခဲ့မှုကြောင့် အချိန်ကာလသည် သူတို့၏ မျက်နှာပေါ်တွင် မည်သည့် အပြောင်းအလဲမျှ ချန်ထားရစ်ခဲ့ခြင်း မရှိပေ။

သူတို့က ပွင့်အာနေသော ပန်းပွင့်လေးများအလား လှပချစ်စရာကောင်းနေဆဲ ဖြစ်သည်။ သို့သော် ဤကဲ့သို့သော အလှတရားများက သူ၏ စိတ်နှလုံးတွင် မည်သည့် လှုပ်ခတ်မှုကိုမျှ မဖြစ်ပေါ်စေနိုင်တော့ချေ။

"မင်းတို့ ပြန်သွားကြတော့... " လော်ယွမ်က တိုးညင်းစွာ ပြောလိုက်သည်။ အသံက တိုးသော်လည်း သတ္တုသံတစ်မျိုး စွက်နေပြီး စိတ်နှလုံးကို တုန်လှုပ်သွားစေလောက်အောင် အစွမ်းထက်သော ဖောက်ထွင်းနိုင်စွမ်းလည်း ပါဝင်နေသည်။

……

နောက်ဆုံးတွင်တော့ အမျိုးသမီးများအားလုံး ထွက်ခွာသွားကြသည်။ လော်ယွမ်က တံခါးအပြင်ဘက်သို့ မျှော်ကြည့်ရင်း ထိုနေရာတွင်ပင် အချိန်အတော်ကြာအောင် မလှုပ်မယှက် ရပ်နေခဲ့သည်။

မှတ်ဉာဏ်မြင်ကွင်း အခန်းဆက်များသည် သူ၏ ဦးနှောက်ထဲတွင် မြင်းစီးရင်း ပန်းခူးနေရသကဲ့သို့ လျင်မြန်စွာ ဖြတ်သန်းသွားခဲ့သည်။

အန္တရာယ်များလှသော တောရိုင်းဒေသတွင် အချင်းချင်း ဖေးမကူညီခဲ့ကြပုံများ၊ ပြန်လည်ထူထောင်ရေးဇုန်ကာလအတွင်း သူ့ကို နှစ်သိမ့်မှုပေးခဲ့သည့် နွေးထွေးသော ဆိပ်ကမ်းငယ်လေး စသည်ဖြင့် အလွန်လှပသင့်သော ဤမှတ်ဉာဏ်များသည် ယခုအခါတွင်မူ မူလအရောင်အသွေးများ မှေးမှိန်သွားပြီး အရသာကင်းမဲ့သွားသကဲ့သို့ ခံစားလာရသည်။

မှတ်ဉာဏ်များက ပြောင်းလဲသွားခြင်း မရှိဘဲ ဦးနှောက်ထဲတွင် ပို၍ပင် ရှင်းလင်းစွာ ရှိနေသေးသော်လည်း ပြောင်းလဲသွားသည်မှာ သူ၏ စိတ်ထားသာ ဖြစ်သည်။

ကလေးဘဝတုန်းက မိမိနှစ်သက်မြတ်နိုးရသည့် ကစားစရာတစ်ခုအတွက် ငိုယိုကာ မြေပေါ်တွင် လူးလှိမ့်နေခဲ့သော်လည်း အရွယ်ရောက်လာချိန်တွင် နောက်ပြန်လှည့်ကြည့်လိုက်သောအခါ အစကနဦးကတည်းက ထိုအရာအပေါ် နှစ်သက်ခဲ့မှုမျိုးကို ရှာမတွေ့နိုင်တော့သကဲ့သို့ပင်...

ရုပ်ပိုင်းဆိုင်ရာ တပ်မက်မှုများနှင့် လူသားအချင်းချင်းကြားရှိ သံယောဇဉ် တယောဇဉ်တို့သည် လေးဘက်မြင်စနစ် တစ်ဝက်ဖြစ်နေသော သတ္တဝါတစ်ကောင်အတွက် ပိုလျှံနေသည့်အရာများ ဖြစ်ပြီး မည်သည့် အဓိပ္ပာယ်မျှ မရှိတော့ချေ။

အရင်က လော်ယွမ်သည် မိမိ၏ စွမ်းအား ကြီးမားလာမှုကို ငြင်းပယ်ခဲ့ပြီး လေးဘက်မြင်စနစ် အသွင်ပြောင်းလဲခြင်းကို ဆန့်ကျင်ခဲ့သော်လည်း ယခုအခါတွင်မူ ဘဝအဆင့်အတန်း မြင့်မားလာစေရန်အတွက် ကိုယ်တိုင်ကိုယ်ကျ ကြိုးပမ်းလာခဲ့သည်။ ကွမ်တမ်ဦးနှောက်ကို ပိုင်ဆိုင်ပြီးကတည်းက ဤအရာသည် မလွဲမသွေ ဖြစ်ပေါ်လာမည့် ပြောင်းလဲမှုတစ်ခုပင် ဖြစ်သည်။

ဤဖြစ်စဉ်တစ်လျှောက်တွင် သူက အထီးကျန်နေရမည်မှာ အသေအချာပင် ဖြစ်သော်လည်း ထိုအထီးကျန်မှုကို သူက သဘောကျ နှစ်ခြိုက်နေခဲ့သည်။

သူက အရင်အခြေအနေသို့ ပြန်သွား၍ မရနိုင်တော့ချေ။

……

၂၀၃၂ ခုနှစ်၊ မတ်လလယ်ခန့်။

အဆင့်မြင့်ခေါင်းဆောင်များအားလုံးနှင့် အာကာသယာဉ်သားများသည် ဗဟိုထိန်းချုပ်ရေးအခန်းထဲတွင် အသင့်အနေအထားဖြင့် ရှိနေကြသည်။

မရေမတွက်နိုင်သော ထောက်လှမ်းရေးကိရိယာများသည် အာကာသ၏ ထောင့်ပေါင်းစုံကို အစွမ်းကုန် စကင်ဖတ်နေကြသည်။

သတ်မှတ်ထားသော အချိန်သို့ တဖြည်းဖြည်း နီးကပ်လာသည်နှင့်အမျှ လေထုက ပို၍ပို၍ လေးလံလာခဲ့သည်။

နောက်ထပ် ဘာတွေဖြစ်လာမည်ကို မည်သူမျှ မသိကြပေ။

လော်ယွမ်၏ အမိန့်ကို ကြိုတင် အသိပေးထားပြီး ဖြစ်သော်လည်း ထိုအမိန့်မှာ အလွန်တရာ မထင်မရှား ဖြစ်နေပြီး တိကျရှင်းလင်းမှု မရှိပေ။

သို့သော်လည်း မည်သူကမျှ အသေးစိတ် မေးမြန်းရဲခြင်း မရှိကြချေ။

လော်ယွမ် တစ်ယောက် လေးဘက်မြင်စနစ်သို့ ပြောင်းလဲသွားပြီးကတည်းက သူ၏ စရိုက်က အေးစက်သွားကာ အပြီးတိုင် တံခါးပိတ် ကျင့်ကြံနေခဲ့သည်။

သူ၏ အရှိန်အဝါသည် လျော့ကျသွားခြင်း မရှိသည့်အပြင် ပို၍ပင် ကြီးမားလာခဲ့ကာ လူတိုင်းက သူ့ကို နတ်ဘုရားတစ်ပါးလို တိတ်တဆိတ် ကြောက်ရွံ့နေကြလေပြီ။

နက်နဲဆန်းကြယ်ခြင်း၊ အရှိန်အဝါကြီးမားခြင်း၊ စိတ်နှလုံးကို ထိတ်လန့်စေခြင်း။

အရင်က ခေါင်းဆောင်အတော်များများသည် လော်ယွမ်နှင့် စကားအနည်းငယ် ပြောဆိုနိုင်ကြသေးသော်လည်း ယခုအခါတွင်မူ ထိုအရာက လုံးဝ ပျောက်ကွယ်သွားခဲ့လေပြီ။

ဗီဒီယိုဖန်သားပြင်မှတစ်ဆင့် ထိုကြွေရုပ်ကဲ့သို့သော အဖြူရောင် လူရိပ်ကို မြင်လိုက်ရုံဖြင့်ပင် လူများကို ထိတ်လန့်တုန်လှုပ်သွားစေပြီး တစ်ကိုယ်လုံး ချမ်းစိမ့်သွားစေသည်။

"စက္ကန့် ၃၀ ပဲ လိုတော့တယ်... " ပိကျန့်ဖိန်က နေရာတွင် ထိုင်ရင်း ခန္ဓာကိုယ်၌ လုံခြုံရေး ကြိုးများကို ချည်နှောင်ကာ အချိန်ကိုကြည့်ပြီး တိုးညင်းစွာ ပြောလိုက်သည်။

ထျန်ကျင်းဖိန်က ခေါင်းညိတ်ပြလိုက်ပြီး စကားမပြောခဲ့ပေ။ သူက လေကို ပြင်းပြင်းရှူသွင်းလိုက်ပြီး အနည်းငယ် စိုးရိမ်တကြီး ဖြစ်လာခဲ့သည်။

လော်ယွမ် အမိန့်ပေးထားသည့် ဆိုလိုရင်းမှာ အာကာသယာဉ်သည် အသေးစားစကြဝဠာတစ်ခုဆီသို့ ဝင်ရောက်သွားမည် ဟူ၍ ဖြစ်သည်။

သို့သော်လည်း အသေးစားစကြဝဠာဆိုသည်မှာ အဘယ်အရာဖြစ်မှန်း မည်သူမျှ မသိကြပေ။

အပြိုင်တိုင်တည်ရှိနေသော နေရာတစ်ခုလား။ သို့မဟုတ် လေးဘက်မြင်လေဟာနယ် နေရာတစ်ခုလား။

ထိုနေရာရှိ ပတ်ဝန်းကျင်က မည်သို့ ရှိမည်နည်း။ အန္တရာယ် ရှိနိုင်မည်လား။ အာကာသယာဉ်အပေါ် သက်ရောက်မှု ရှိနိုင်မည်လား။

အရာအားလုံးသည် မသိနိုင်သေးသည့် အရာများသာ ဖြစ်သည်။

ထို့အပြင် အင်ဂျင်များကို စောစောစီးစီးကတည်းက ပိတ်ထားခဲ့သော်လည်း အာကာသယာဉ်သည် တစ်စက္ကန့်လျှင် မိုင်ရာချီသည့် အရှိန်အဟုန်ဖြင့် မြန်ဆန်စွာ ရွေ့လျားနေဆဲ ဖြစ်သည်။

ဤတစ်ကြိမ်တွင် မမျှော်လင့်ထားသည့် အန္တရာယ်များ ဖြစ်ပေါ်လာမည်လားဆိုသည်ကို မည်သူမျှ မသိနိုင်ပေ။

သို့သော်လည်း မည်သို့ပင်ဖြစ်စေကာမူ မည်မျှပင် စိုးရိမ်နေပါစေ မျက်စိစုံမှိတ်ပြီး အတင်းဝင်ရောက်ရုံမှတစ်ပါး အခြားရွေးချယ်စရာ မရှိတော့ချေ။

ဉာဏ်ရည်တုက နောက်ပြန်ရေတွက်ရန် စတင်လာခဲ့သည်။

"တစ်ဆယ်... ကိုး... ရှစ်... သုံး... နှစ်... "

"သတိပေးချက်... သတိပေးချက်... "

"ရှေ့ မိုင် ၆၂၀ အကွာအဝေးမှာ အားကောင်းတဲ့ လေဟာနယ်လှိုင်းကို ထောက်လှမ်းတွေ့ရှိရပါတယ်... အလင်းတန်းတွေ ကွေးညွှတ်နေပါတယ်... "

"တည့်တည့်ဆက်သွား... " ပိကျန့်ဖိန်က အသံဩဩဖြင့် အမိန့်ပေးလိုက်သည်။ သူ၏ နဖူးပေါ်တွင် ချွေးစေးများ တဖြည်းဖြည်း ထွက်ပေါ်လာပြီး ဟင်းလင်းပြင်ထဲ၌ ရပ်နေသည့် မထင်မရှား အလင်းရောင် လူရိပ်တစ်ခုကို ပင်မဖန်သားပြင်ပေါ်တွင် ကြည့်လိုက်သည်။

ထို့နောက် သူ၏ မျက်လုံးသူငယ်အိမ်များက ရုတ်တရက် ကျုံ့ဝင်သွားပြီး ထိုလူရိပ်က အလျင်အမြန် ကြီးမားလာနေကြောင်းကို အံ့သြတုန်လှုပ်စွာ တွေ့လိုက်ရသည်။

အရင်က ထိုလူရိပ်၏ အရပ်အမြင့်ကို ထောက်လှမ်းထားသည့် အချက်အလက်များအရ ၇ ပေသာ ရှိခဲ့သော်လည်း ယခုမြင်တွေ့ရချိန်တွင်မူ ပေ ၃၃၀ ကျော်အထိ မြင့်မားနေလေပြီ။

ထို့အပြင် ဆက်လက်၍ ကြီးမားလာနေဆဲပင်။

ပေ ၁၆၀၀...

ပေ ၃၃၀၀...

၂ မိုင်...

ယခုအချိန်တွင် အာကာသယာဉ်၏ အရှေ့ဘက်၌ ကြယ်တာရာ ကောင်းကင်ယံကို မမြင်တွေ့နိုင်တော့ဘဲ အာကာသယာဉ်သည် ကမ္ဘာသစ်တစ်ခုဆီသို့ ဝင်ရောက်တော့မည့်အလား ဖြစ်နေသည်။

နောက်ဆုံးတွင် ထိုအလင်းရောင် လူရိပ် ပျောက်ကွယ်သွားသောအခါ ဖန်သားပြင်ပေါ်တွင် ကျန်ရှိနေခဲ့သည့် နောက်ဆုံးအချက်အလက်မှာ ၃ မိုင်ခန့် မြင့်မားလှသော ကြီးမားခမ်းနားသည့် လူထွားကြီးတစ်ယောက်ပင် ဖြစ်တော့သည်။

ဆက်ရန်...