အခန်း (၅၃၇-၅၃၈)

အပိုင်း(၅၃၇) ဆိုက်ရောက်ခြင်း

လော်ယွမ်က အာကာသယာဉ်ငယ်လေး လျင်မြန်စွာ သေးငယ်သွားပြီး သူဖွင့်လှစ်ပေးထားသော လေဟာနယ်လမ်းကြောင်းအတွင်းသို့ ဝင်ရောက်ကာ မျက်စိတစ်မှိတ်အတွင်း ပျောက်ကွယ်သွားသည်ကို ကြည့်နေလိုက်သည်။

ထို့နောက် လေဟာနယ်စက်လုံးကို သိမ်းဆည်းလိုက်ပြီး အင်္ကျီအိတ်ကပ်ထဲသို့ ပေါ့ပေါ့ပါးပါးပင် ထည့်လိုက်သည်။

ခန္ဓာကိုယ်အရွယ်အစား ပြောင်းလဲသွားမှုကြောင့် ထိုလေဟာနယ်စက်လုံးကို သူက နောက်တစ်ကြိမ် ထပ်မံချုံ့ပစ်ခဲ့သည်။

ထို့ကြောင့်သာမကဘဲ စက်လုံးထဲရှိ အရာဝတ္ထုအများစုကိုလည်း လော်ယွမ်က စွန့်ပစ်ခဲ့ပြီးဖြစ်ရာ ယခုအခါ တစ်ခုလုံးမှ လက်သီးဆုပ်ခန့်သာ အရွယ်ရှိတော့ပြီး အလေးချိန်အားဖြင့်လည်း တန်နှစ်ရာကျော်သာ ကျန်ရှိတော့သည်။

သို့သော်လည်း ချုံ့ပစ်မှုပြင်းအား ပိုမိုမြင့်မားသွားခြင်းကြောင့် အတွင်းပိုင်းရှိ အသေးစားစကြာဝဠာ၏ တည်ငြိမ်မှုကို လုံးဝထိခိုက်ခြင်းမရှိသည့်အပြင် ပို၍ပင် ခိုင်မာတည်ငြိမ်လာခဲ့သည်။

လော်ယွမ်က ရှေ့ဘက်သို့ လှမ်းကြည့်လိုက်သည်။ မူလကတည်းက နက်မှောင်နေသော သူ၏သူငယ်အိမ်တို့သည် ရုတ်တရက် တွင်းနက်ကြီးတစ်ခုပမာ နက်ရှိုင်းသွားသည်။

ဤသည်မှာ ချောက်နက်ကြီးတစ်ခုထက်ပင် ပိုမိုနက်ရှိုင်းလွန်းသော အဆုံးစွန် အမှောင်ထုဖြစ်ပြီး ဖိုတွန်အလင်းမှုန် တစ်မှုန်ကပင် သူ၏ မြင်လွှာထဲမှ လွတ်မြောက်နိုင်စွမ်း မရှိချေ။

ရှေ့ယံ အာကာသဟင်းလင်းပြင်ထဲမှ ကြယ်တစ်လုံးချင်းစီသည် လျင်မြန်စွာ ရှင်းလင်းထင်ရှားလာသည်။

အလင်းနှစ်ရာပေါင်းများစွာ ကွာဝေးသော ကြယ်များ၏ မျက်နှာပြင်ပေါ်မှ နေမီးလျှံများ၊ မှေးမှိန်နေသော နေအမည်းစက်များကို သူ မြင်တွေ့နိုင်သလို အနီးအနားရှိ ကျောက်သားဂြိုဟ်များ၏ မြေမျက်နှာပြင် ပြောင်းလဲမှုများနှင့် တောင်တန်းအနိမ့်အမြင့်များကိုလည်း ထင်ရှားစွာ မြင်တွေ့နေရသည်။

ပို၍နီးကပ်သော ဘားနတ် ကြယ်အဖွဲ့အစည်းဆိုလျှင် သူ၏မျက်လုံးထဲ၌ အသေးစိတ်ကအစ ရှင်းလင်းပြတ်သားနေတော့သည်။

ယခင် အာကာသယာဉ်၏ ထောက်လှမ်းမှုများအရ ထိုကြယ်အဖွဲ့အစည်းတွင် ဂြိုဟ်လေးလုံးသာ ရှိသည်ဟု သိခဲ့ရသော်လည်း တကယ်တမ်းတွင် လေးလုံးသာမကဘဲ ငါးလုံးရှိနေကြောင်းကို လော်ယွမ် တွေ့ရှိလိုက်ရသည်။

အာကာသယာဉ်၏ ထောက်လှမ်းရေးစနစ်က ၎င်းကို လျစ်လျူရှုမိခဲ့ခြင်းမှာ ထိုပဉ္စမမြောက်ဂြိုဟ်သည် ဘားနတ်ကြယ်နှင့် အလွန်အလှမ်းကွာဝေးလွန်းနေသောကြောင့် ဖြစ်သည်။

၎င်းတို့နှစ်ခုကြား အကွာအဝေးမှာ အလင်းနှစ်ဝက်ခန့်အထိ ရှိနေသည်။ ထိုမျှကွာဝေးသော အကွာအဝေးတွင် ကြယ်ပုနီ၏ မူလကတည်းက အားနည်းသော အလင်းရောင်နှင့် ဆွဲငင်အားသည် လုံးဝမရှိသလောက်ပင် ဖြစ်နေသည်။

ထိုဂြိုဟ်၏ လည်ပတ်မှုအမြန်နှုန်းအရဆိုလျှင် တစ်ပတ်ပြည့်ရန်အတွက် နှစ်ပေါင်း တစ်သိန်းနှစ်သောင်းရှစ်ထောင်ကျော် အချိန်ယူရမည် ဖြစ်သည်။

အကယ်၍ အင်အားအနည်းငယ်မျှ ပေါင်းထည့်ပေးလိုက်မည်ဆိုလျှင် ထိုဂြိုဟ်သည် ဘားနတ် ကြယ်အဖွဲ့အစည်းထဲမှ လွတ်ထွက်သွားပြီး လမ်းပျောက်နေသော ဂြိုဟ်တစ်လုံး ဖြစ်သွားနိုင်ချေရှိသည်။

ယခင်ကဆိုလျှင် ဤဂြိုဟ်သည် လူသားများအတွက် အကောင်းဆုံးသော ပုန်းအောင်းရာနေရာဖြစ်မည်မှာ အသေအချာပင်ဖြစ်ပြီး လူသားများကို စိတ်အားထက်သန်လာစေရန် လုံလောက်ပေလိမ့်မည်။ သို့သော်လည်း ယခုအချိန်တွင်တော့ လူသားများအနေဖြင့် ပုန်းအောင်းနေရန် မလိုအပ်တော့ချေ။

ယခုခေတ် လူသားတို့၏ နည်းပညာ အဆင့်အတန်းသည် ဗိုရှင်းဂြိုဟ်သားများထက် အနည်းငယ်မျှပင် နိမ့်ကျမနေတော့ကြောင်း ပြောစရာပင်မလိုတော့ပေ။

အစွန်းရောက် သိပ္ပံပညာရှင်အချို့၏ ခန့်မှန်းချက်အရဆိုလျှင် ပို၍ပင် သာလွန်ကောင်း သာလွန်နေနိုင်သေးသည်။

လူသားများအား ဖွံ့ဖြိုးတိုးတက်ရန် နှစ်အနည်းငယ်မျှ အချိန်ပေးလိုက်ရုံဖြင့် ဗိုရှင်းဂြိုဟ်သားတို့၏ အဝေးရောက်တပ်မတော်ကို ရင်ဆိုင်ချေမှုန်းရန် လုံလောက်နေပြီဖြစ်သည်။

လော်ယွမ်၏ လက်ရှိ အစွမ်းအစကို ပြောရမည်ဆိုလျှင်လည်း မည်သည့် ဗိုရှင်းဂြိုဟ်သားကိုမှ ကြောက်ရွံ့နေရန် မလိုအပ်တော့ပေ။ တစ်နည်းအားဖြင့် သူသည် အသေခံနိုင်လောက်အောင်ပင် ဖြစ်နေပြီဖြစ်သည်။

သူ၏ခန္ဓာကိုယ်သည် အက်တမ်များအဖြစ် ပြိုကွဲသွားခဲ့လျှင်တောင်မှ အဆင့်မြင့်အက်တမ်များ အပါအဝင် အက်တမ်အားလုံး အလုံးစုံ ပျက်စီးသွားပြီး သူ၏ ရုပ်ပိုင်းဆိုင်ရာ တည်ရှိမှု အခြေခံအုတ်မြစ် လုံးဝပျောက်ကွယ်သွားခြင်း မဟုတ်သရွေ့ ကျန်ရှိနေသော အက်တမ်များနှင့် ရှုထောင့်လျော့ကျမှုမှ ထွက်ပေါ်လာသော စွမ်းအင်များကို အသုံးပြု၍ သူ၏ခန္ဓာကိုယ်ကို ပြန်လည်တည်ဆောက်နိုင်စွမ်း ရှိနေသည်။

အဝေးရောက်တပ်မတော် တစ်ခုကို မဆိုထားဘိ၊ အချိန်အနည်းငယ်သာ ရမည်ဆိုလျှင် ဗိုရှင်းဂြိုဟ်သားတို့၏ အသိုက်အမြုံရှိ ယဉ်ကျေးမှုတစ်ရပ်လုံးကိုပင် သူ မျိုးတုံးသတ်ဖြတ်ပစ်နိုင်စွမ်း ရှိသည်။

သို့သော် ထိုသို့လုပ်ဆောင်ခြင်းက အဓိပ္ပာယ်မရှိပေ။ လူသားမျိုးနွယ်ကို မျိုးတုံးပျောက်ကွယ်လုနီးပါး ဖြစ်စေခဲ့သော ဤယဉ်ကျေးမှုအဖွဲ့အစည်းကို လူသားတို့ကိုယ်တိုင် ဝင်ရောက်သိမ်းပိုက်ကာ ဖျက်ဆီးပစ်ရမည် ဖြစ်သည်။

သို့မှသာလျှင် လူသားယဉ်ကျေးမှုအဖွဲ့အစည်းအနေဖြင့် ရင်တွင်းမှ အရှက်တကွဲအကျိုးနည်းဖြစ်မှုနှင့် အမုန်းတရားများကို ဆေးကြောသန့်စင်နိုင်ပြီး ပြာပုံထဲမှ ပြန်လည်ရှင်သန် နိုးထလာနိုင်မည် ဖြစ်သည်။

…

လော်ယွမ်သည် လေဟာနယ်ထဲတွင် ရပ်တန့်နေပြီး သူ၏ခန္ဓာကိုယ်မှ လျှို့ဝှက်ဆန်းကြယ်သော အလင်းရောင်များ ဖြာထွက်နေသည်။

အတန်ကြာမှ သူသည် အကြည့်လွှဲလိုက်ပြီး ဘားနတ် ကြယ်အဖွဲ့အစည်းဆီသို့ ကွေးညွှတ်ပျံသန်းမှုစနစ်ဖြင့် စတင်ပျံသန်းသွားလေသည်။

ခန္ဓာကိုယ်ကို ချုံ့ပစ်လိုက်ပြီးနောက် သူ၏ ကွေးညွှတ်ပျံသန်းမှု အရှိန်ယူချိန်မှာ ပိုမိုမြန်ဆန်လာခဲ့သည်။

ကွေးညွှတ်ပျံသန်းခြင်းသည် အာကာသ၏ ခုခံမှုအပေါ်တွင်သာ မူတည်ပြီး ထိုအာကာသခုခံမှုမှာလည်း ကွေးညွှတ်ပူဖောင်း၏ အရွယ်အစားပေါ်တွင်သာ မူတည်သောကြောင့် ဖြစ်သည်။

ကွေးညွှတ်ပူဖောင်း၏ ထုထည်မှာ အဆတစ်ထောင်ခန့် သေးငယ်သွားသောကြောင့် သူ၏ အမြန်နှုန်းမှာ ပြီးခဲ့သည့်အကြိမ်နှင့် နှိုင်းယှဉ်လျှင် အဆပေါင်းများစွာ တိုးတက်လာခဲ့သည်။

ဆယ်မိနစ်ကျော်ကြာပြီးနောက် သူ၏ အမြန်နှုန်းမှာ အလင်းအလျင်၏ အဆငါးဆယ်အထိ ရောက်ရှိသွားသော်လည်း အမြင့်ဆုံးကန့်သတ်ချက်သို့ မရောက်သေးပေ။

အလင်းအလျင်၏ အဆတစ်ရာခန့် ရောက်ရှိသွားမှသာလျှင် အမြန်နှုန်းက တည်ငြိမ်သွားတော့သည်။

…

အမှောင်ထု လွှမ်းမိုးနေသော လေဟာနယ်ထဲတွင် တောက်ပသော အလင်းတန်းတစ်ခုသည် တစ်စက္ကန့်လျှင် မိုင်သန်းနှစ်ဆယ်ခန့် အမြန်နှုန်းဖြင့် လျှပ်စီးလက်သကဲ့သို့ ပျံသန်းသွားလေသည်။

စွမ်းအင်မြင့် ဖိုတွန်အလင်းမှုန်များသည် လော်ယွမ်၏ ခန္ဓာကိုယ် မျက်နှာပြင်ကို ပြင်းထန်စွာ ရိုက်ခတ်နေပြီး စူးရှတောက်ပသော အလင်းရောင်များကို ထွက်ပေါ်စေသည်။

မျက်နှာပြင် အပူချိန်မှာလည်း ဖာရင်ဟိုက် ဒီဂရီ နှစ်သန်းနီးပါးအထိ ရောက်ရှိနေပြီဖြစ်သည်။ အကယ်၍ သူ၏ခန္ဓာကိုယ်ကို ချုံ့မပစ်ရသေးခင်ကသာ ဤကဲ့သို့သော အပူချိန်နှင့် ကြုံတွေ့ရပါက ထိုကြောက်မက်ဖွယ်ကောင်းသော အပူချိန်ကြောင့် ချက်ချင်းပင် အငွေ့ပျံသွားမည်မှာ သေချာလှသည်။

ယခုအချိန်တွင်တော့ သူ၏ အရေပြားက ပူလောင်နာကျင်မှုကိုသာ ခံစားနေရသည်။ ထိုသို့ ပူလောင်နာကျင်နေခြင်းမှာလည်း အရေပြား အာရုံကြောများက အလွန်အမင်း တုံ့ပြန်လွယ်အောင် ချိန်ညှိထားခြင်းကြောင့်သာ ဖြစ်သည်။ သူ၏ တစ်ကိုယ်လုံးတွင် ထိခိုက်ဒဏ်ရာ တစ်စုံတစ်ရာမျှ မရှိသည့်အပြင် ဆံပင်တစ်မျှင်ပင် ကောက်ကွေးသွားခြင်း မရှိချေ။

အချိန်များ တဖြည်းဖြည်း ကုန်ဆုံးသွားပြီး နာရီအနည်းငယ်ကြာ ပျံသန်းပြီးနောက်တွင် လော်ယွမ်က ကွေးညွှတ်ပူဖောင်းကို ရပ်တန့်ကာ နားလိုက်သည်။

သူ၏ စိတ်စွမ်းအားသည် ဤကဲ့သို့သော စွမ်းအင်ကုန်ဆုံးမှုကို အချိန်ကြာမြင့်စွာ မခံနိုင်သေးချေ။

ခုနစ်နာရီ သို့မဟုတ် ရှစ်နာရီတိုင်း နီးပါးတွင် သူသည် အချိန်ခဏတာမျှ အနားယူရန် လိုအပ်လှသည်။

သူက လေဟာနယ်စက်လုံးထဲမှ နဂါးမျက်လုံးသီး အရွယ်အစားခန့်ရှိသော ဖောက်ထွင်းမြင်ရသည့် ရေစက်လုံးလေးများကို တစ်လုံးပြီးတစ်လုံး ထုတ်ယူကာ ပါးစပ်ထဲသို့ ထည့်လိုက်ပြီး အကြိမ်အနည်းငယ် ဝါးကာ မျိုချလိုက်သည်။

ထိုရေစက်လုံးလေးများသည် အခြားအရာများမဟုတ်ဘဲ အဆတစ်ထောင် ချုံ့ထားသော ရေစက်လုံးများပင်ဖြစ်သည်။

ယခုအချိန်တွင် လော်ယွမ်အတွက် တစ်ခုတည်းသော လိုအပ်သည့် အစားအစာလည်း ဖြစ်သည်။

ခန္ဓာကိုယ် ချုံ့ပစ်ပြီးကတည်းက မိုက်တိုကွန်ဒရီးယားအတွင်းရှိ အဏုမြူ ပေါင်းစပ်ဓာတ်ပြုမှု အမြန်နှုန်းနှင့် ပြင်းအားတို့မှာ အလွန်ပြင်းထန်လာခဲ့ရာ ရေလိုအပ်ချက်မှာလည်း သိသိသာသာ မြင့်တက်လာခဲ့သည်။

ယခင်က တစ်ကျိုက်သောက်လိုက်ရုံဖြင့် ဆယ်ရက်ခန့် လိုအပ်ချက်ကို ဖြည့်ဆည်းပေးနိုင်ခဲ့သော်လည်း ယခုအခါတွင်တော့ နေ့စဉ် တန်ချိန်များစွာ သောက်သုံးနေရသည်။

ထို့အပြင် သာမန်ရေများကိုလည်း သူ စုပ်ယူနိုင်စွမ်း မရှိတော့ပေ။ ခန္ဓာကိုယ်ကို ချုံ့ပစ်ပြီးနောက် သူ၏ ဆဲလ်နံရံများရှိ အပေါက်ငယ်လေးများသည် သာမန် ရေမော်လီကျူးများထက်ပင် သေးငယ်သွားခဲ့သည်။

ရေများသည် ဆဲလ်နံရံကို ဖောက်ထွင်းဝင်ရောက်နိုင်ခြင်း မရှိတော့သောကြောင့် မည်မျှပင် သောက်သုံးစေကာမူ အကျိုးမရှိတော့ချေ။

သူ၏ခန္ဓာကိုယ်နှင့် အချိုးအစားတူညီစွာ ချုံ့ပစ်ထားသော ဤရေမျိုးသာလျှင် သူ၏ ခန္ဓာကိုယ်အတွက် စုပ်ယူနိုင်စွမ်း ရှိပေသည်။

ဤမျှ ချုံ့ပစ်ထားသော အခြေအနေတွင် ရေ၏ ရူပဗေဒသတ္တိများမှာလည်း သိသိသာသာ ပြောင်းလဲသွားခဲ့ပြီး စိန်ထက် အဆပေါင်းများစွာ ပိုမိုမာကျောလာကာ ပျော့ပြောင်းမှုလည်း ရှိနေသည်။

တစ်ချိန်တည်းမှာပင် ရေ၏ သဘာဝအချိုဓာတ်လည်း လုံးဝပျောက်ကွယ်သွားခဲ့ရာ ပါးစပ်ထဲတွင် ဝါးနေရသည်မှာ ဖယောင်းတုံးကို ဝါးနေရသကဲ့သို့ပင်။

ကံကောင်းသည်မှာ သူသည် စားသောက်မှုအပေါ်တွင် မည်သည့် လိုလားတောင့်တမှုမျှ မရှိတော့သဖြင့် နာကျင်ခံခက်ဖြစ်မှုမျိုး မခံစားရချေ။

ရေစက်လုံး တစ်လုံးစီတိုင်းမှာ ပေါင်နှစ်ဆယ်ကျော် အလေးချိန်ရှိပြီး လော်ယွမ်က ရာနှင့်ချီသော ရေစက်လုံးများကို တစ်ဆက်တည်း စားသုံးပြီးမှသာ ရပ်တန့်လိုက်ပြီး ခရီးဆက်ခဲ့သည်။

…

ကြယ်တာရာများကြား ပျံသန်းရခြင်းက ငြီးငွေ့စရာကောင်းလှသည်။ လှပဆန်းကြယ်သော မြင်ကွင်းများကို အကြိမ်ကြိမ် မြင်တွေ့ဖူးပါကလည်း ရိုးအီသွားတတ်သည်။

ခရီးစဉ်တစ်လျှောက်တွင် လော်ယွမ်အတွက် အထူးအဆန်း ရှာဖွေတွေ့ရှိမှု မရှိခဲ့ပေ။

ထူးထူးခြားခြား ပြောစရာဆို၍ ဖုန်မှုန့်များနှင့် ဓာတ်ငွေ့များ အမြောက်အမြားဖြင့် ဖွဲ့စည်းထားသော မိုင်သန်းခြောက်ရာကျော် ရှည်လျားသည့် ဂလက်ဆီတိမ်တိုက် တစ်ခုကို တွေ့ရှိခဲ့ရခြင်းပင် ဖြစ်သည်။

ဒြပ်စင်များ ရှားပါးလှသော ဤအမှောင်ဇုန်နယ်မြေတွင် ဤကဲ့သို့ တွေ့ရှိရခြင်းမှာ အံ့ဖွယ်တစ်ပါးဟု ဆိုရပေမည်။

သေချာသည်မှာ ကျယ်ပြောလှသော စကြာဝဠာကြီးအတွက်တော့ ဤအဆင့်ရှိ တိမ်တိုက်ဂလက်ဆီမှာ အလွန်သေးငယ်သော အရာတစ်ခုသာ ဖြစ်သည်။

၎င်း၏ ဒြပ်စင်သိပ်သည်းဆမှာလည်း ထင်ထားသလောက် မမြင့်မားပေ။ အလယ်ဗဟိုချက်တွင်ပင် ဓာတ်ငွေ့သိပ်သည်းဆမှာ ကမ္ဘာ့အနီးရှိ အာကာသထက် ပိုမိုပါးလွှာနေသေးသည်။

သူက ရပ်တန့်ခြင်းပင် မရှိဘဲ စက္ကန့်အနည်းငယ်အတွင်းမှာပင် ဖြတ်သန်းသွားခဲ့သည်။

အချိန်များ ကုန်လွန်လာသည်နှင့်အမျှ သူ၏ စိတ်နေသဘောထားမှာလည်း ပိုမို တည်ငြိမ်အေးချမ်းလာခဲ့သည်။

အချိန်အများစုတွင် သူ၏စိတ်သည် တည်ငြိမ်နေသော ရေကန်တစ်ခုပမာ တုန်လှုပ်ခြင်း မရှိတော့ချေ။

စိတ်စွမ်းအားမှာ စဉ်ဆက်မပြတ် သုံးစွဲလိုက်၊ ပြန်လည်ဖြည့်တင်းလိုက် လုပ်ဆောင်နေမှု လုပ်ငန်းစဉ်တစ်လျှောက်တွင် တစ်နေ့ထက်တစ်နေ့ တိုးတက်လာခဲ့သည်။

ယင်းနှင့်အတူ သူ၏ ကွေးညွှတ်ပျံသန်းမှု အမြန်နှုန်းမှာလည်း အလင်းအလျင် အဆတစ်ရာမှ နှစ်ရာ၊ ထို့နောက် သုံးရာအထိ မြင့်တက်လာခဲ့သည်။

အကယ်၍ စနစ်၏ တွက်ချက်မှုအရဆိုလျှင် သူ၏ စိတ်စွမ်းအားမှာ တစ်မှတ်ကျော်မျှ တိုးလာခဲ့ပြီး ၂၈ မှတ်အထိ ရောက်ရှိလာပြီဖြစ်သည်။ သို့သော် ဤကဲ့သို့သော အမြန်နှုန်းမျိုးတွင် အာကာသ၏ ခုခံမှုက အဆမတန် မြင့်တက်လာသောကြောင့် ယခင်ကဲ့သို့ စွမ်းရည်တစ်မှတ် တိုးလာတိုင်း အမြန်နှုန်း အဆပေါင်း ဆယ်ဂဏန်းမျှ တိုးလာခြင်းမျိုးမှာ လုံးဝမဖြစ်နိုင်တော့ပေ။

အမှန်တကယ်တော့ ယခုအချိန်တွင်ပင် ဤအမြန်နှုန်းမှ ထွက်ပေါ်လာသော အပူချိန်မှာ သူ၏ ခန္ဓာကိုယ် ခံနိုင်ရည် အကန့်အသတ်သို့ ရောက်လုနီးပါး ဖြစ်နေပြီဖြစ်သည်။

စိတ်ကူးဖြင့်ပင် မှန်းဆ၍မရနိုင်သော အပူချိန်အောက်တွင် သူ၏ တစ်ကိုယ်လုံးမှ စူးရှတောက်ပသော အလင်းရောင်များ ထွက်ပေါ်နေပြီး အဆုံးအစမရှိသော အပူရှိန်များဖြင့် ပြည့်နှက်နေသည်။

ကံကောင်းထောက်မစွာဖြင့် သူ၏ ခန္ဓာကိုယ်ကို ဖွဲ့စည်းထားသော ဒြပ်စင်များမှာ သာမန်လူများနှင့် လုံးဝမတူညီပေ။

အက်တမ်များကို သိပ်သည်းအောင် ချုံ့ထားသောကြောင့် မော်လီကျူးများမှာလည်း အချိုးအစားကျကျ သေးငယ်သွားကာ မော်လီကျူးများ၏ ဓာတုဗေဒနှောင်ကြိုးများမှာ သာမန်မော်လီကျူးများထက် အဆပေါင်း သန်းရာချီ၍ ပိုမိုခိုင်မာနေခြင်းကြောင့် ဖြစ်သည်။

သို့မဟုတ်ပါက သူ၏ ခန္ဓာကိုယ်ကို ဖွဲ့စည်းထားသော အော်ဂဲနစ်ဒြပ်စင်များမှာ ကြာမြင့်စွာကတည်းက ပြိုကွဲသွားပြီး အသက်ဝင်မှု ပျောက်ဆုံးသွားမည် ဖြစ်သည်။

သို့သော်လည်း ဤအမြန်နှုန်းဖြင့် လော်ယွမ်သည် အချိန်အကြာကြီး ဆက်လက်ပျံသန်းရန် မဖြစ်နိုင်သေးပေ။

ဘားနတ် ကြယ်အဖွဲ့အစည်းသို့ တဖြည်းဖြည်း နီးကပ်လာသည်နှင့်အမျှ အမှောင်ဇုန်အတွင်းရှိ အလင်းရောင် သိပ်သည်းဆမှာလည်း တဖြည်းဖြည်း မြင့်တက်လာသည်။

မည်သို့ပင်ဆိုစေ ကြယ်ပုနီဖြစ်စေကာမူ ၎င်း၏ အလင်းရောင်မှာ အမှောင်ဇုန်နှင့် နှိုင်းယှဉ်လျှင် နေ့နှင့်ည ကွာခြားသကဲ့သို့ ရှိနေသေးသည်။

လော်ယွမ်က တဖြည်းဖြည်း အရှိန်လျှော့လိုက်ရသည်။

အလင်းနှစ် လေးနှစ်အကွာတွင် သူ၏ အမြန်နှုန်းမှာ အလင်းအလျင်၏ အဆသုံးရာကိုသာ သီသီလေး ထိန်းထားနိုင်တော့သည်။

အလင်းနှစ် သုံးနှစ်အကွာသို့ ရောက်သောအခါ အလင်းအလျင်၏ အဆနှစ်ရာအထိ လျှော့ချလိုက်ရသည်။

အလင်းနှစ် တစ်နှစ်အကွာသို့ ရောက်ချိန်တွင်မူ အများဆုံး အလင်းအလျင်၏ အဆတစ်ရာကိုသာ ထိန်းထားနိုင်တော့သည်။ ဤသည်မှာ သက်တမ်းရင့် ကြယ်ပုနီတစ်လုံးဖြစ်၍သာ တော်သေးသည်။

အကယ်၍ နေသာဖြစ်မည်ဆိုလျှင် အလင်းအလျင်၏ အဆတစ်ဆယ်ပင်လျှင် ခက်ခဲပေလိမ့်မည်။

မည်သို့ပင် အရှိန်လျှော့ရစေကာမူ ဘားနတ် ကြယ်အဖွဲ့အစည်းသည် သိပ်မဝေးတော့ခြင်းက ကံကောင်းခြင်းပင်။

အချိန်များ ကုန်လွန်လာသည်နှင့်အမျှ ထိုကြယ်ပုနီသည် လော်ယွမ်၏ မျက်စိရှေ့တွင် တဖြည်းဖြည်း ကြီးမားလာသည်။

၎င်း၏ မျက်နှာပြင်တစ်ခုလုံးမှ ခပ်မှိန်မှိန် အနီရောင်အလင်းများ ဖြာထွက်နေပြီး အလင်းရောင်မှာ နူးညံ့ကာ နေကဲ့သို့ ပြင်းထန်မှု မရှိချေ။

၎င်း၏ မျက်နှာပြင်ပေါ်တွင် နေမီးလျှံ ပေါက်ကွဲမှု ကဲ့သို့သော ဖြစ်စဉ်များကို မြင်တွေ့ရခဲသည်။

၎င်းသည် နေဝင်ချိန်သို့ ရောက်ရှိနေပြီဖြစ်သော သက်ကြီးရွယ်အိုတစ်ဦးနှင့် တူပြီး စိတ်သဘောထား နူးညံ့ကာ လှုပ်ရှားမှုများ နှေးကွေးနေသည်။

သို့သော် ဤကဲ့သို့ နှိုင်းယှဉ်ချက်မှာလည်း တိကျမှုတော့ မရှိပေ။

အမှန်တကယ်တော့ ဤကြယ်ပုနီအတွက် ၎င်း၏ နောက်ဆုံးသက်တမ်းမှာ နေကဲ့သို့သော သန်စွမ်းသည့် ကြယ်များထက်ပင် ပိုမိုရှည်လျားနိုင်ခြေ ရှိသည်။

၎င်း၏ အရွယ်အစားမှာ အတော်လေး သေးငယ်ပြီး နေ၏ သုံးပုံတစ်ပုံပင် မရှိပေ။

အတွင်းပိုင်း ဖိအားမှာလည်း နည်းပါးပြီး အဏုမြူ ပေါင်းစပ်ဓာတ်ပြုမှု အမြန်နှုန်းက နှေးကွေးသောကြောင့် ၎င်းတွင် အလွန်ရှည်လျားသော သက်တမ်းရှိနေခြင်း ဖြစ်သည်။

လော်ယွမ်သည် နောက်ထပ် ဆယ်ရက်ခန့် ဆက်လက်ပျံသန်းခဲ့ပြီးနောက် ဘားနတ် ကြယ်အဖွဲ့အစည်းသို့ နောက်ဆုံးတွင် ရောက်ရှိသွားလေတော့သည်။

ဆက်ရန်...

အပိုင်း(၅၃၈) အိမ်ဂေဟာသစ်

လော်ယွမ်သည် ကွေးညွတ်အာကာသပူဖောင်းကို ဖြည်ချလိုက်ပြီးနောက် ကြယ်အဖွဲ့အစည်းအတွင်း၌ ဖြည်းညှင်းစွာ ပျံသန်းနေ၏။

အပြင်ဘက်ဆုံးရှိ လေလွင့်ဂြိုဟ်ကို ထည့်မတွက်လျှင် ဤကြယ်စင်စုနယ်မြေမှာ နေအဖွဲ့အစည်းထက် သိသိသာသာ သေးငယ်လှသည်။

အရွယ်အစားအမျိုးမျိုးရှိသော ဂြိုဟ်လေးစင်းသည် မိမိတို့၏ ပတ်လမ်းကြောင်းအတိုင်း ဗဟိုချက်ရှိ ကြယ်ကို ဝန်းရံကာ ဖြည်းညှင်းစွာ လည်ပတ်နေကြသည်။

ကြယ်နှင့် အကွာအဝေးကို အခြေခံ၍ လော်ယွမ်က ထိုဂြိုဟ်လေးစင်းကို အမှတ်(၁)၊ (၂)၊ (၃) နှင့် (၄) ဟူ၍ အစဉ်လိုက် အမည်ပေးလိုက်သည်။

၎င်းတို့အနက် အမှတ်(၁) နှင့် (၄) မှာ ကျောက်သားဂြိုဟ်များ ဖြစ်ကြပြီး အမှတ်(၂) နှင့် (၃) မှာ ဓာတ်ငွေ့ဂြိုဟ်များ ဖြစ်ကြသည်။

အကြီးဆုံးမှာ အမှတ်(၃) ဓာတ်ငွေ့ဂြိုဟ်ဖြစ်ပြီး အချင်းမှာ စနေဂြိုဟ်နှင့် မခြားနားပေ။ ၎င်းတွင် ဂြိုဟ်ရံလငါးစင်းဖြင့် ဖွဲ့စည်းထားသော ဂြိုဟ်ရံစနစ်တစ်ခုလည်း ရှိသည်။

လော်ယွမ်၏ အမြင်အာရုံဖြင့် ကြည့်လျှင် ထိုဂြိုဟ်၏ လေထုအတွင်း၌ အဆုံးမရှိသော လေပြင်းများ တိုက်ခတ်နေပြီး တစ်ကမ္ဘာလုံးတွင် မိုးကြိုးမုန်တိုင်းများ ထူထပ်နေသည်ကို ရှင်းလင်းစွာ မြင်တွေ့နေရသည်။

အသေးဆုံးမှာ အမှတ်(၁) ဂြိုဟ်ဖြစ်ပြီး အချင်း မိုင် ၂၅၀၀ ခန့်သာ ရှိရာ လထက် အနည်းငယ်မျှသာ ပိုကြီးပြီး ကမ္ဘာ့အရွယ်အစား၏ သုံးပုံတစ်ပုံခန့်သာ ရှိသည်။

အလင်းရောင် အားနည်းပြီး အာကာသ အပူချိန်မှာ အလွန်အမင်း နိမ့်ကျလွန်းလှသဖြင့် ထိုဂြိုဟ်သည် ကြယ်နှင့် နီးကပ်သော ပတ်လမ်းကြောင်းတွင် ရှိနေသော်လည်း မျက်နှာပြင်တစ်ခုလုံးမှာ ထူထပ်သော ရေခဲပြင်များ ဖုံးလွှမ်းနေသည်။ မျက်နှာပြင်မှာ ချောမွတ်နေပြီး မြေမျက်နှာသွင်ပြင် အနိမ့်အမြင့်ကို ခဲယဉ်းစွာ မြင်တွေ့ရသည်။

လော်ယွမ်၏ ပန်းတိုင်မှာမူ အပြင်ဘက်ဆုံးရှိ အမှတ်(၄) ဂြိုဟ်ဖြစ်သည်။ ကမ္ဘာသည် နေအဖွဲ့အစည်းတွင် အကြီးဆုံး ကျောက်သားဂြိုဟ် ဖြစ်သော်လည်း ဤဂြိုဟ်၏ အချင်းမှာ ကမ္ဘာထက် ၁.၅ ဆခန့် ပိုကြီးနေသည်ကို လော်ယွမ် တွေ့ရှိလိုက်ရသည်။ ၎င်းသည် နာမည်ကျော် ဧရာမ ကျောက်သားဂြိုဟ်ကြီးပင် ဖြစ်သည်။

၎င်းမှ ထုတ်လွှတ်နေသော ဆွဲငင်အားစက်ကွင်းကို ကြည့်ခြင်းအားဖြင့် ထိုဂြိုဟ်၏ ဒြပ်ထုမှာ အလွန်ကြီးမားကြောင်း သိနိုင်သည်။

ဤသည်မှာ လော်ယွမ်အတွက် အလွန်ကောင်းမွန်သော အချက်ပြမှုတစ်ခုပင်။ ထိုဂြိုဟ်သည် အခြေခံအားဖြင့် ကျောက်သားများဖြင့် ဖွဲ့စည်းထားပြီး အတွင်းပိုင်းတွင် လေးလံသော ဒြပ်စင်များစွာ ပါဝင်နေကြောင်း ဖော်ပြနေခြင်းဖြစ်သည်။ လူသားများအတွက်မူ ဤသည်မှာ ပြီးပြည့်စုံသော သယံဇာတဂြိုဟ်တစ်စင်းပင် ဖြစ်ပေလိမ့်မည်။

အမှန်စင်စစ် စကြဝဠာ၏ အတိုင်းအတာအရ လေးလံသော ဒြပ်စင်များ တည်ရှိမှုမှာ အကန့်အသတ်ရှိပြီး ရှားပါးလှသည်။

အကြောင်းမှာ ကြယ်များ၏ အဏုမြူပေါင်းစပ်မှုသည် ယေဘုယျအားဖြင့် ဟိုက်ဒရိုဂျင် သို့မဟုတ် ဟီလီယံမှ စတင်ပြီး သံတွင် အဆုံးသတ်သောကြောင့် ဖြစ်သည်။

အကယ်၍ ကြယ်၏ အတွင်းပိုင်း ဖိအားမှာ လုံလောက်စွာ မကြီးမားပါက ကာဗွန် သို့မဟုတ် အောက်ဆီဂျင် အဆင့်တွင်ပင် ရပ်တန့်သွားတတ်သည်။

သံအဖြစ်သို့ ပြောင်းလဲရန်အတွက် ကြယ်၏ ဒြပ်ထုမှာ အနည်းဆုံး နေ၏ ဒြပ်ထုထက် ရှစ်ဆခန့် ရှိရန် လိုအပ်ပြီး ဇင့်ဒြပ်စင်မှာ အဏုမြူပေါင်းစပ်မှုမှတစ်ဆင့် ဖြစ်ပေါ်နိုင်သော အမြင့်ဆုံး အစဉ်လိုက် ဖြစ်သည်။

စကြဝဠာရှိ လေးလံသော ဒြပ်စင်အများစုမှာ စူပါနိုဗာပေါက်ကွဲမှုများမှ လာခြင်းဖြစ်သည်။ ဧရာမကြယ်ကြီးများ ပြင်းထန်စွာ ပျက်စီးသွားသောအခါ ၎င်းတို့၏ နောက်ဆုံး သေဆုံးချိန် "ပြင်းထန်သော ဝေဒနာ" ကြားတွင် ဒီဂရီစဲလ်စီးယပ်စ် သန်းပေါင်း ရာနှင့်ချီသော ကြောက်မက်ဖွယ် အပူချိန်များ ထွက်ပေါ်လာတတ်သည်။

ဤသေခါနီး ပေါက်ကွဲမှုမှ ရရှိသော စွမ်းအင်ဖြင့် "အကင်" ခံလိုက်သောအခါ သံနှင့် ဇင့်ထက် ကျော်လွန်သော ဒြပ်စင်များ ဖြစ်ပေါ်လာသည်။

ရွှေ၊ ပလက်တီနမ်နှင့် ရေဒီယိုသတ္တိကြွ ဒြပ်စင်များကဲ့သို့ အလွန်လေးလံသော ဒြပ်စင်များမှာမူ နယူထရွန်ကြယ် အချင်းချင်း တိုက်မိခြင်း သို့မဟုတ် တွင်းနက် များမှ ပစ္စည်းများ ပြန်လည် ထွေးထုတ်ခြင်းတို့မှ ထွက်ပေါ်လာခြင်း ဖြစ်သည်။

နေအဖွဲ့အစည်း အပါအဝင် ပတ်ဝန်းကျင်ရှိ ကြယ်စုနယ်မြေများတွင် တစ်ချိန်က နယူထရွန်ကြယ်ကဲ့သို့သော အစွန်းရောက် ကောင်းကင်ဝတ္ထုများ ရှိခဲ့ဖူးမည်ဟု လော်ယွမ် ခန့်မှန်းလိုက်သည်။

ထိုဝတ္ထုများ သေဆုံး ပျက်စီးသွားခြင်းကြောင့်သာ ဤကြယ်စုနယ်မြေ တစ်ခုလုံးတွင် လေးလံသော ဒြပ်စင်များ ပြန့်နှံ့နေခြင်း ဖြစ်ပေလိမ့်မည်။

...

မကြာမီမှာပင် သူသည် ထိုဂြိုဟ်အနီးသို့ ပျံသန်းရောက်ရှိသွားပြီး ကြယ်တံခွန်တစ်ခုကဲ့သို့ ဂြိုဟ်မျက်နှာပြင်ဆီသို့ လျင်မြန်စွာ ငုပ်လျှိုးဆင်းသက်လိုက်သည်။

ဤဧရာမဂြိုဟ်၏ ဆွဲငင်အားမှာ ကြီးမားသော်လည်း လေထုဟူ၍ သိသိသာသာ မရှိချေ။ မည်သည့် ဓာတ်ငွေ့မဆို လုံးဝသုညဒီဂရီ နှင့် နီးကပ်သော ဤအေးခဲလွန်းသည့် အပူချိန်အောက်တွင် ခဲသွားမည်သာ ဖြစ်သည်။

သို့သော် လေဟာနယ်ဖြစ်သော အာကာသနှင့် နှိုင်းယှဉ်ပါက ဤနေရာတွင် အနည်းငယ်မျှသော လေထုသိပ်သည်းဆ ရှိနေပါသေးသည်။

ဂြိုဟ်၏ ဆွဲငင်အားကြောင့် လော်ယွမ်၏ အရှိန်မှာ ပို၍ပို၍ မြန်လာသည်။ ပါးလွှာသော လေထုနှင့် ပွတ်တိုက်မှုကြောင့် သူ၏ ခန္ဓာကိုယ်မှာ စတင် ပူလောင်လာပြီး အစပိုင်းတွင် မသိမသာ နီရဲရာမှ ခဏချင်းအတွင်းမှာပင် တောက်လောင်နေသော မီးလုံးကြီးတစ်ခု ဖြစ်သွားကာ နောက်ဆုံးတွင် စူးရှတောက်ပသော အလင်းတန်းကြီးအဖြစ် ပြောင်းလဲသွား၏။

မူလက သေဆုံးနေသကဲ့သို့ ငြိမ်သက်နေသော ဤဂြိုဟ်ပေါ်တွင် လေပြင်းများ စတင် တိုက်ခတ်လာသည်။

ရေခဲပြင် မျက်နှာပြင်ပေါ်ရှိ မြောက်မြားစွာသော အငွေ့အသက်များသည် အငွေ့ပျံသွားပြီး မြူခိုးမြူငွေ့များကဲ့သို့ အရပ်မျက်နှာ အနှံ့အပြားသို့ လွင့်စင်သွားကြသည်။

မြေပြင်နှင့် နီးကပ်လာသောအခါ လော်ယွမ်၏ အရှိန်မှာ အလင်းအလျင်၏ လေးပုံတစ်ပုံခန့်အထိ ရှိနေပြီ ဖြစ်သည်။

သူ သယ်ဆောင်လာသော ဧရာမ အရွေ့စွမ်းအင်မှာ မြေပြင်နှင့် မထိတွေ့ရသေးမီမှာပင် မိုင်ရာနှင့်ချီသော ရေခဲပြင်ကြီးမှာ အတွင်းဘက်သို့ နိမ့်ဝင်သွားပြီး ဧရာမ ပန်းကန်လုံးပုံသဏ္ဍာန် ချိုင့်ဝှမ်းကြီးတစ်ခု ဖြစ်ပေါ်လာသည်။

"ဝုန်း"

အဏုမြူဗုံး ပေါက်ကွဲသကဲ့သို့ စူးရှသော အလင်းတန်းကြီးတစ်ခု မြေပြင်မှ ထွက်ပေါ်လာသည်။

ပေါက်ကွဲမှု ဗဟိုချက်ရှိ မိုင်ပေါင်းများစွာ ထူထပ်သော ရေခဲပြင်ကြီးမှာ တခဏအတွင်းမှာပင် အဏုမြူအမှုန်အမွှားများအဖြစ် ပျက်စီးသွားသည်။

ပေါက်ကွဲမှု အပြင်ဘက် မိုင် ၇၀၊ ၈၀ ခန့် အကွာအဝေးတွင်ပင် နေ၏ မျက်နှာပြင်ထက် အဆပေါင်း ရာနှင့်ချီ၍ ပိုမိုတောက်ပသော အလင်းတန်း၏ ထိတွေ့မှုကြောင့် ရေခဲပြင်မှာ လျင်မြန်စွာ အငွေ့ပျံသွားပြီး နောက်ဆက်တွဲ လိုက်ပါလာသော ရိုက်ခတ်မှုလှိုင်းများကြောင့် အရပ်မျက်နှာ အနှံ့အပြားသို့ လွင့်စင်သွားတော့သည်။

အကယ်၍ အမြင့်မှ ကြည့်မည်ဆိုပါက ဤနေရာတွင် မိုင်ရာနှင့်ချီ ကျယ်ဝန်းသော ဧရာမ ချိုင့်ဝှမ်းကြီးတစ်ခု ဖြစ်ပေါ်သွားသည်ကို ရှင်းလင်းစွာ မြင်တွေ့ရမည် ဖြစ်သည်။

ဤဧရိယာမှာ ကမ္ဘာပေါ်ရှိ ပြည်နယ်တစ်ခု၏ ထက်ဝက်ခန့်နှင့် ညီမျှသည်။

ဤတိုက်ခိုက်မှုမှ ထွက်ပေါ်လာသော စွမ်းအင်မှာ ယခင်က သူ၏ ခွန်အားကို စမ်းသပ်စဉ်က မတော်တဆ ထိုးနှက်ချက်နှင့် နှိုင်းယှဉ်၍ မရနိုင်ပေ။

လော်ယွမ်၏ ကိုယ်ပိုင်အလေးချိန်မှာ ပေါင် ၂ သိန်း ၂ သောင်းကျော် (တန် ၁၀၀ ကျော်) ရှိပြီး အာကာသစက်လုံး၏ အလေးချိန် ပေါင် ၄ သိန်း ၄ သောင်းကျော် (တန် ၂၀၀ ကျော်) နှင့် ပေါင်းလိုက်ပါက စုစုပေါင်း အလေးချိန်မှာ ပေါင် ၆ သိန်း ၆ သောင်း (တန် ၄၀၀ နီးပါး) ရှိသည်။

အလင်းအလျင်၏ လေးပုံတစ်ပုံဖြင့် ဝင်တိုက်လိုက်သော အရွေ့စွမ်းအင်မှာ ပြန်လည်ထူထောင်ရေးဇုန်တွင် ကျရောက်ခဲ့သော ဆန့်ကျင်ဘက်ဒြပ်သားဗုံး ၏ အစွမ်းထက်မှုထက် မလျော့နည်းပေ။

လော်ယွမ်သည် ချိုင့်ခွက်ကြီး၏ အောက်ခြေတွင် တည်ငြိမ်စွာ မျောလွင့်နေ၏။ သူ၏ မျက်နှာမှာ မည်သည့် ခံစားချက်မျှ မရှိပေ။

ဤမျှ ပြင်းထန်သော တိုက်ခိုက်မှုအောက်တွင် သူ၏ ခန္ဓာကိုယ်မှာ ထိခိုက်ဒဏ်ရာ တစ်စုံတစ်ရာ မရရှိခဲ့ပေ။

ရေခဲပြင်မှာ ငါးသောင်းဆ ဆွဲသိပ်ထားသော ဒြပ်သားများ မဟုတ်သဖြင့် သူ၏အဖို့ လေထုကို ဖြတ်သန်းသွားရသကဲ့သို့သာ ဖြစ်သည်။

ယခုအခါ သူသည် ရေခဲပြင်ကို ဖောက်ထွက်ကာ ကျောက်လွှာအထိ ရောက်ရှိသွားပြီ ဖြစ်သည်။

သူ၏ ပတ်ဝန်းကျင်တွင် စူးရှသော အလင်းတန်းများ ဖုံးလွှမ်းနေဆဲပင်။

မည်သည့် ဒြပ်ဝတ္ထုမျှ ဤကဲ့သို့သော အပူချိန်အောက်တွင် တည်ရှိမနေနိုင်ဘဲ အခြေခံ အက်တမ်များအဖြစ် ပြိုကွဲသွားကြသည်။

"ဆွဲငင်အား ၃.၅ ဂျီ... သံလိုက်စက်ကွင်း ပြင်းအား ဝ.၀၀၁ တက်စလာ... ကမ္ဘာထက် အဆ ၂၀ ပိုများတယ်... သံဓာတ် ၅၁.၅ ရာခိုင်နှုန်း... ကာဗွန် ၁၃ ရာခိုင်နှုန်း... ဟိုက်ဒရိုဂျင် ၈ ရာခိုင်နှုန်း... အောက်ဆီဂျင် ၃ ရာခိုင်နှုန်း"

သူသည် ပတ်ဝန်းကျင် အခြေအနေကို လျင်မြန်စွာ ခွဲခြမ်းစိတ်ဖြာလိုက်သည်။ ဤဂြိုဟ်တွင် သံဓာတ် အလွန်ကြွယ်ဝလှသည်။ အနည်းဆုံး ဤဧရိယာတွင် သံဓာတ်မှာ ၅၀ ရာခိုင်နှုန်းကျော် ပါဝင်နေသည်။

ကမ္ဘာပေါ်တွင်ဆိုလျှင် ဤသည်မှာ သံရိုင်း အမြောက်အမြား ထွက်ရှိသော နေရာတစ်ခု ဖြစ်ပေလိမ့်မည်။

ထို့အပြင် ရေအရင်းအမြစ်နှင့် ပေါ့ပါးသော ဒြပ်စင်များလည်း ကြွယ်ဝသဖြင့် အဏုမြူပေါင်းစပ်မှုအတွက် လောင်စာအဖြစ် အသုံးပြုရန် လုံလောက်လှသည်။

သူက လက်ကို ဝှေ့ယမ်းလိုက်ရာ တောင်ကုန်းများကဲ့သို့ စုပုံနေသော ရေငွေ့များသည် ဘေးဘက်သို့ ဖယ်ရှားပေးလိုက်သကဲ့သို့ ဖြစ်သွားပြီး နောက်တစ်စက္ကန့်တွင် သူ၏ ခန္ဓာကိုယ်မှာ ကောင်းကင်ယံသို့ တဟုန်ထိုး ပျံတက်သွားတော့သည်။

စက္ကန့် ရာဂဏန်းမျှအကြာတွင် သူသည် အာကာသထဲသို့ ပြန်လည် ရောက်ရှိသွားပြီ ဖြစ်သည်။

သူသည် အာကာသစက်လုံးကို ထုတ်ယူကာ အာကာသလမ်းကြောင်းကို ဖွင့်လှစ်လိုက်သည်။

မကြာမီမှာပင် မုန်ညင်းစေ့ အရွယ်အစားမျှသာ ရှိသော သေးငယ်လှသည့် ယာဉ်ပျံလေးတစ်စင်းမှာ အာကာသလမ်းကြောင်းမှတစ်ဆင့် ဖြည်းညှင်းစွာ ထွက်လာ၏။

ပျံသန်းနေစဉ်မှာပင် ၎င်းသည် သာမန်မျက်စိဖြင့် မြင်နိုင်သော အရှိန်ဖြင့် လျင်မြန်စွာ ကြီးထွားလာသည်။

ယခင်စက္ကန့်က မုန်ညင်းစေ့ခန့်သာ ရှိသော်လည်း နောက်တစ်စက္ကန့်တွင် စားပွဲဝိုင်းခန့် ဖြစ်လာပြီး စက္ကန့်အနည်းငယ်အကြာတွင်မူ ဧရာမ ယာဉ်ပျံကြီးတစ်စင်း ဖြစ်သွားတော့သည်။

...

တစ်နှစ်ခွဲခန့် ကြာပြီးနောက်...

ခြောက်ကပ်ပြီး ဆိတ်ငြိမ်လှသော ဘားနတ်ကြယ်စု နယ်မြေသည် တဖြည်းဖြည်းနှင့် ဆူညံစည်ကားလာခဲ့သည်။

အမှတ်(၄) ဂြိုဟ်၏ မျက်နှာပြင်ပေါ်ရှိ လော်ယွမ် ဝင်တိုက်ရာမှ ဖြစ်ပေါ်လာသော ချိုင့်ဝှမ်းကြီးကို ဗဟိုပြု၍ ဧရာမ သတ္တုတွင်းနှင့် သံမဏိစက်ရုံကြီးမှာ သံမဏိသစ်တောကြီးတစ်ခုအလား တစ်ချိုင့်ဝှမ်းလုံးတွင် ပြည့်နှက်နေသည်။

၎င်းသည် အပြင်ဘက် မိုင် ၆၀ ကျော်အထိပင် ပျံ့နှံ့နေပြီ ဖြစ်သည်။ မရေမတွက်နိုင်သော ဧရာမ စက်မှုလက်တံများသည် အဆုံးမရှိသော ခွန်အားများဖြင့် မြေအောက်ထဲသို့ အဆက်မပြတ် ထိုးဖောက်ဝင်ရောက်ကာ ကြွယ်ဝသော ဓာတ်သတ္တုများကို ထုတ်ယူနေကြသည်။

ဂြိုဟ်၏ ပတ်လမ်းကြောင်းပေါ်တွင်လည်း စတုရန်းမိုင် သောင်းနှင့်ချီ ကျယ်ဝန်းသော ဧရာမ သတ္တုအာကာသမြို့တော်ကြီးမှာ အလားတူပင် အားတက်သရော အလုပ်လုပ်နေကြပြီး အလွန်အမင်း အလုပ်ရှုပ်နေကြသည်။

များပြားလှသော သတ္တုတွင်းယာဉ်ပျံများသည် အလုပ်များနေသော ပုရွက်ဆိတ်များကဲ့သို့ အာကာသမြို့တော်နှင့် ဂြိုဟ်မျက်နှာပြင်ကြားတွင် အပြန်အလှန် ပျံသန်းကာ သန့်စင်ပြီးသား ဒြပ်စင်များကို သယ်ယူပို့ဆောင်နေကြသည်။ ထို့နောက် ထိုနေရာတွင် ထပ်မံ၍ အဆင့်ဆင့် သန့်စင်ကာ စက်ပစ္စည်း ကိရိယာ အမျိုးမျိုးကို ထုတ်လုပ်ကြသည်။

သယံဇာတ အကန့်အသတ်ကြောင့် ကြာရှည်စွာ ဖိနှိပ်ထားရသော ကုန်ထုတ်စွမ်းအားမှာ တစ်ခါ ပေါက်ကွဲထွက်လာသောအခါ အလွန်ပင် ကြောက်မက်ဖွယ် ကောင်းလှသည်။

အတုအယောင်ကမ္ဘာ (Virtual World) အတွင်းရှိ သိုလှောင်ထားသော နည်းပညာများစွာကို လက်တွေ့ရလဒ်များအဖြစ် လျင်မြန်စွာ ပြောင်းလဲလိုက်ခြင်းဖြင့် ဤတစ်နှစ်ခွဲအတွင်း စက်ရုံပေါင်း သောင်းနှင့်ချီ၍ တည်ဆောက်ပြီးစီးခဲ့ပြီး ဆက်လက်၍လည်း တိုးချဲ့တည်ဆောက်နေဆဲ ဖြစ်သည်။

စတုရန်းမိုင် ရာနှင့်ချီ ကျယ်ဝန်းသော ဧရာမ စက်ရုံကြီးတစ်ခုအတွင်း၌ မိုင်ပေါင်းများစွာ မြင့်မားသော ဂန်းထရီကရိန်းကြီး နှစ်ခုမှာ ပတ်လမ်းကြောင်းပေါ်တွင် တောင်တန်းကြီးများကဲ့သို့ မြင့်မားစွာ တည်ရှိနေသည်။ စကြာဝဠာယာဉ်ပျံ အမျိုးအစားသစ် တစ်စင်း၏ တည်ဆောက်ရေး လုပ်ငန်းစဉ်မှာလည်း တရားဝင် စတင်နေပြီ ဖြစ်သည်။

ဆက်ရန်...