အခန်း (၁-၂)

အခန်း(1)

ဗိုက်ဆာလိုက်တာ။

အေးလည်း အရမ်းအေးနေပြီ။

ထောင်ထောင်တစ်ယောက် ဝေဝါးစွာဖြင့် မျက်လုံးများကို ဖွင့်ကြည့်လိုက်လေ၏။

သူမ၏ အရှေ့မှ မြင်ကွင်းက တဖြည်းဖြည်း ကြည်လင်လာပြီးနောက် ထောင်ထောင်တစ်ယောက် လန့်ဖျပ်သွားရလေသည်။

“ဟင်”

သူမ၏ အရှေ့တွင် မြင်တွေ့နေရသည်မှာ စိမ်းသက်သောမြင်ကွင်းတစ်ခုသာ ဖြစ်လေ၏။

အေးစက်သော သံမဏိစက်ယန္တရားကြီးများက လေထဲတွင် လှုပ်ရှားနေကြပြီး နုဝါဖန်တီးထားသော လူသားများကလည်း ကျယ်ပြောသော ဟင်းလင်းပြင်ကြီးထဲတွင် သွားလာလှုပ်ရှားနေကြ၏။

ပတ်ဝန်းကျင်မှ ထွက်ပေါ်လာသော အသံများက ဆူညံပွက်လောရိုက်နေပြီး လေထုထဲတွင်လည်း အမျိုးမျိုးသော လူသားများ၏ အနံ့အသက်များဖြင့် ပြည့်နှက်နေသည်။

ဒါက ဘယ်လိုနေရာမျိုးလဲ။

ထောင်ထောင်မှာ မူလက ထောင်တီသားပေါက်လေးတစ်ကောင်သာ ဖြစ်လေသည်။

သူမ၏ နေ့ရက်များကို ဂူထဲတွင်အောင်းရင်း ကြက်ကြော်၊ အကင်များနှင့် မုန့်တောင်ပို့လေးပေါ်တွင် လှဲလျောင်း၍ စားလိုက်အိပ်လိုက်၊ အိပ်လိုက်စားလိုက်ဖြင့်သာ ကုန်ဆုံးစေခဲ့၏။

ထိုမဟာစစ်ပွဲကြီးကို ဖြစ်ပွားသည့်အချိန်အထိပင်။

ထိုအချိန်က ထောင်တီမျိုးနွယ်စု တစ်စုလုံးက ချိတ်ပိတ်ခြင်းကို ခံခဲ့ရပြီး ထောင်ထောင်ကလည်း ချွင်းချက်မရှိခဲ့ပေ။

ထိုအချိန်မှစ၍ သူမက မည်သည့်အရာကိုမျှ မစားခဲ့ရပါချေ။ အလွန်အမင်းပင် ကြာမြင့်နေပြီ ဖြစ်၏။

“ဂလူး.. ဂလူး..”

ထောင်ထောင်က သူမ၏အရှေ့မှ မြင်ကွင်းတိုင်းကို အံ့အားသင့်စွာဖြင့် ငေးကြည့်နေချိန်မှာပင် သူမ၏ ဝမ်းဗိုက်ထဲမှ အသံများက ရုတ်တရက် မြည်ဟီးလာခဲ့၏။

သူမက ဗီဇအရ ဗိုက်ကို အုပ်ကိုင်လိုက်မိပြီး အောက်သို့ ခေါင်းကိုငုံ့ကြည့်လိုက်သည့် ခဏ၌ပင် မျက်လုံးအစုံက တုန်လှုပ်မှုကြောင့် ပြူးကျယ်သွားရလေသည်။

သေးငယ်ပြီး ဖြူဖွေးနုနယ်သော၊ ကောက်ညှင်းဆန်လုံးလေးများကဲ့သို့သော လက်ကလေးများက ထောင်ထောင်၏ နူးညံ့သော ဝမ်းဗိုက်ပေါ်တွင် ကပ်ငြိနေလေ၏။

ထောင်ထောင်က သူမ၏ လက်ဖဝါးများကို စမ်းသပ်လှုပ်ရှားကြည့်သောအချိန်တွင် ထိုနူးညံ့တိုတောင်းသော လက်ကလေးများကလည်း တစ်ပြိုင်နက်တည်း လှုပ်ရှားသွားခဲ့သည်။

ထိုခဏ၌ပင် မယုံကြည်နိုင်စရာကောင်းသော အတွေးတစ်ခုက ထောင်ထောင်၏ ဦးနှောက်ထဲသို့ လှပ်ခဲသကဲ့သို့ ဖြတ်ပြေးသွားခဲ့၏။

ဤအရာက သူမ၏ လက်ဖဝါးလား။

ထောင်ထောင်က ထိုရုတ်တရက် ရောက်ရှိလာသော အံ့အားသင့်စရာကြောင့် ဆွံ့အလျက် ရှိနေချိန်မှာပင် ဘေးနားမှ အော်သံတစ်ခုက ထွက်ပေါ်လာခဲ့လေ၏။

“နံပါတ် (၅၉) ထောင်ထောင်”

ထောင်ထောင်က တုံ့ပြန်ခြင်း မပြုနိုင်မီမှာပင် အင်အားကြီးသော လက်တစ်ဖက်က သူမ၏ လက်မောင်းကို ရုတ်တရက် ဆွဲကိုင်လိုက်လေ၏။

သေးငယ်သော လူသားကိုယ်ထည်က ထိုကဲ့သို့သော အင်အားကို မခုခံနိုင်ပေ။

ထို့ကြောင့် အစားကြူးသူလေး ထောင်ထောင်အနေဖြင့် ပထမဆုံးအကြိမ်အဖြစ် နာကျင်မှုကို ခံစားလိုက်ရသည်။

သူမက မသိစိတ်ဖြင့် အော်ဟစ်လိုက်မိလေ၏။

“အား!”

သို့သော် ထိုအားနည်းသော နာကျင်သံကို ပတ်ဝန်းကျင်ရှိ လူများက သတိမထားမိကြပေ။

လက်ကြီး၏ပိုင်ရှင်က ထောင်ထောင်ကို တစ်ချက်ကလေးမျှပင် လှည့်မကြည့်ဘဲ နံပါတ်ခေါ်နေသော ဝန်ထမ်းကိုသာ မျက်နှာချိုသွေးချင်သော အပြုံးဖြင့် အလျင်အမြန် ပြောဆိုလိုက်လေ၏။

“လာပါပြီ၊ လာပါပြီ”

ထိုသိုး စကားပြောနေချိန်မှာပင် ထောင်ထောင်က ကုန်ပစ္စည်းတစ်ခုကဲ့သို့ ဝန်ထမ်း၏ အရှေ့သို့ တွန်းပို့ခြင်းကို ခံလိုက်ရလေသည်။

ထောင်ထောင်က သဘောကောင်းသော အစားကြူးသူလေးဖြစ်သော်လည်း အနိုင်ကျင့်ခံမည့်သူမျိုးတော့ မဟုတ်ပေ။

သို့သော် ယခုအချိန်တွင် သူမအနေဖြင့် ထိုလက်ကြီးပိုင်ရှင်၏ အပြုအမူကို အရေးစိုက်ရန်အချိန်မရှိပေ။

သူမ၏ စိတ်ထဲတွင် ရုတ်တရက် ထွက်ပေါ်လာခဲ့သော အသံကို နားထောင်ရင်းဖြင့် မျက်လုံးအစုံကို အနည်းငယ် ပြူးကျယ်လိုက်မိရုံသာ တတ်နိုင်ခဲ့၏။

[ တင်း! ကမ္ဘာထဲသို့ ဝင်ရောက်လာတဲ့ Host ကို ရှာဖွေတွေ့ရှိပါတယ်၊

မင်္ဂလာနေ့လယ်ခင်းလေးပါ၊ ငါက မင်းရဲ့လက်တွဲဖော် စနစ်ဖြစ်တဲ့ အမြှောက်စာခံ အမျိုးသမီးအရန်ဇာတ်ကောင် ဖွံ့ဖြိုးတိုးတက်ရေးစနစ်ပဲ ဖြစ်ပါတယ် ]

‘မင်းဘယ်ကိုသွားမလို့လဲ ဘေဘီ’အစီအစဉ်၏ လူရွေးပွဲက တတိယမြောက်နေ့သို့ ရောက်ရှိနေပြီ ဖြစ်သည်။

နံပါတ် (၅၈)မြောက် ကိုယ်စားလှယ်လောင်းလေးကို ပြန်လွှတ်လိုက်ပြီးနောက်တွင် ဒါရိုက်တာကျိုးထင်းတစ်ယောင် သူမ၏ နက်မှောင်သော မျက်မှန်ကို ချွတ်လိုက်ကာ နှာတံကို အသာအယာ ညှစ်ရင်း သက်ပြင်းချလိုက်မိ၏။

‘မင်း ဘယ်ကိုသွားမလို့လဲ ဘေဘီ’ က သာမန် ချစ်စဖွယ်ကောင်းသော ကလေးငယ်များ နှင့် အနုပညာရှင် မိဘများက ပါဝင်သည့် Reality Show တစ်ခုဖြစ်ပေသည်။

ဤသည်က သူမ၏ ပထမဆုံး Reality Show ရိုက်ကူးမှုဖြစ်သောကြောင့် ကျိုးထင်က အလွန် အလေးအနက် ထားနေခဲ့သည်။

သို့သော် လူရွေးပွဲသို့ လာရောက်ကြသော ကလေးများထဲတွင် လှပ၍ ချစ်စဖွယ်ကောင်းသော ကလေးအများအပြားက ရှိနေသော်လည်း Reality Show တွင် ပါဝင်မည်ဆိုပါက ကလေးများ၏ တခြားသော အရည်အချင်းများ၏ အပေါ်တွင်လည်း မူတည်နေပေ၏။

ထို့အပြင် အလုပ်သင်မိဘများနှင့် သင့်တော်မှု ရှိ၊ မရှိကိုလည်း ထည့်သွင်းစဉ်းစားရပေမည်။

မည်သို့ပင်ဖြစ်စေ ချစ်စဖွယ်ကောင်းသော ကလေးငယ်များနှင့် အနုပညာရှင်မိဘများ၏ ကြားရှိ ဆက်ဆံရေးက ‘မင်းဘယ်ကိုသွားမလဲ ဘေဘီ’ အစီအစဉ်၏ စိတ်လှုပ်ရှားစရာ အကောင်းဆုံး အပိုင်းပင် မဟုတ်ပါလား။

အစီအစဉ်ကို ရိုက်ကူးရာတွင်ပါဝင်မည့် အနုပညာရှင် ဧည့်သည်များ၏ အကြောင်းကို တွေးမိချိန်တွင် ကျိုးထင်၏ ခေါင်းကိုက်မှုက ချက်ချင်းပင် ပိုမို၍ ဆိုးရွားလာခဲ့၏။

ဆယ်စက္ကန့်ကျော်အတွင်းမှာပင် ကျိုးထင်းတစ်ယောက် သူမ၏ အတွေးများကို အလျင်အမြန်ပင် စုစည်းလိုက်ကာ မျက်နှာအမူအရာကို ပြန်လည်၍ ထိန်းချုပ်လိုက်လေသည်။

သူမက နက်မှောင်သော မျက်မှန်ကို ပြန်လည်၍ တပ်ဆင်လိုက်ပြီးနောက်တွင် တည်ငြိမ်အေးဆေးစွာ အမိန့်ပေးနိုင်သော ဒါရိုက်တာအဖြစ်သို့ ပြန်လည်၍ ပြောင်းလဲသွားခဲ့၏။

ကျိုးထင်က တံခါးဝရှိ ဝန်ထမ်းကို ခေါင်းကို ညိတ်ပြလိုက်ပြီးနောက်တွင် တည်ငြိမ်စွာညွှန်ကြားလိုက်၏။

“နောက်ထပ် ကလေးတစ်ယောက် ဝင်လာလို့ရပြီ”

ထောင်ထောင်မှာ ဝန်ထမ်းနှင့်အတူ လူတွေ့စစ်ဆေးခန်းသို့ သွားရာလမ်းတွင် သူမ၏ စိတ်ထဲ၌ ရုတ်တရက် ပေါ်လာခဲ့သော အသံနှင့် စကားပြောရန်အတွက်ကို ကြိုးစားနေခဲ့ရ၏။

အစပိုင်းတွင် အံ့အားသင့်သွားခဲ့ရသော်လည်း ထောင်ထောင်က သူမ၏ စိတ်ထဲမှ အသံနှင့် ပတ်သက်ပြီး လျင်မြန်စွာ အသားကျသွားကာ သိချင်စိတ်ကသာ ပြင်းပြလာခဲ့သည်။

ဂူထဲတွင် နှစ်ပေါင်းသောင်းနှင့်ချီ၍ နေထိုင်ခဲ့သော အစားကြူးသူလေးအနေဖြင့် စနစ်ဆိုသည့် အရာမျိုးကို တစ်ခါမျှ မမြင်ဖူးခဲ့ပေ။

“နင်က ဘယ်သူလဲ”

“ဘာလို့ ငါ့ကို Host လို့ ခေါ်တာလဲ၊ ငါက ထောင်ထောင်လေ”

“အမြှောက်စာခံ အမျိုးသမီးအရန်ဇာတ်ကောင် ဖွံ့ဖြိုးတိုးတက်ရေး စနစ်လား.. အမြှောက်စာခံ အမျိုးသမီးအရန်ဇာတ်ကောင်ဆိုတာက ဘာလဲ”

ထောင်ထောင်က ဝန်ထမ်း၏ အနောက်သို့ လိမ္မာယဉ်ကျေးစွာဖြင့် လိုက်ပါနေပုံရသော်လည်း လက်တွေ့တွင် သူမ၏ စိတ်ထဲမှ စနစ်ဟု ခေါ်သော အသံကို အပြင်းအထန် မေးမြန်းစူးစမ်းနေခဲ့သည်။

ထိုအသံကလည်း အလွန်ပင် စိတ်ရှည်ပုံရ၏။

အကယ်၍ ဤသို့သော အဖြစ်အပျက်မျိုးကို ထောင်တီမျိုးနွယ်စုထဲတွင် ဖြစ်ပွားခဲ့ပါက တခြားသော ထောင်တီကြီးများက စားသောက်နေရင်းဖြင့် သူမကို မကြားချင်ယောင် ဆောင်နေကြပေလိမ့်မည်။

မည်သို့ပင်ဖြစ်စေ ထောင်တီများအတွက် ထောင်တီအချင်းချင်း၏ မေးခွန်းကို ဖြေခြင်းထက် စားသောက်ခြင်းက ပို၍ပင် အရေးကြီးသည် မဟုတ်ပါလား။

သို့သော် ထိုအသံက ထောင်ထောင်၏ မေးခွန်းတိုင်းကို စိတ်ရှည်စွာ ဖြေပေးနေခဲ့သည်။

[ ငါက စနစ်ပါ ]

[ Host ဆိုတာက မင်းနဲ့ ငါ့ကြားက ဆက်ဆံရေးကို ရည်ညွှန်းတာပါ၊

မင်းက ထောင်တီမျိုးနွယ်စုထဲက ထောင်တီလေး ဖြစ်သလိုပဲ၊ အခု ငါ့ရဲ့ Host လည်း ဟုတ်တယ် ]

[ အမြှောက်စာခံ အမျိုးသမီးအရန်ဇာတ်ကောင် ဆိုတာကတော့ ဝတ္ထုတစ်ပုဒ်ထဲက အမျိုးသမီးအရန်ဇာတ်ကောင်တစ်ယောက်ကိုပြောချင်တာပါ

သူမက လှည့်ဖြားတတ်တဲ့ နည်းလမ်းတွေရှိပြီးတော့ လူပေါင်းများစွာကို ဒုက္ခပေးတဲ့အပြင် အလွန်ပဲ ရက်စက်တတ်သူပါ၊

သူမက ဇာတ်လိုက်နဲ့ ဇာတ်လိုက်မ တို့ရဲ့ ပေါင်းဖက်မှုကို အဟန့်အတားအဖြစ်ဆုံး လူဖြစ်ပြီးတော့ သူတို့ရဲ့ ဆက်ဆံရေးကို ဖျက်ဆီးဖို့ကို အစွမ်းကုန် ကြိုးစားတဲ့သူ ဖြစ်ပါတယ် ]

စနစ်၏ ရှင်းပြချက်ကို နားထောင်ပြီးနောက်တွင် ထောင်ထောင်၏ မျက်လုံးတို့က ပို၍ ရှုပ်ထွေးသွားခဲ့၏။

“ဒါပေမဲ့.. ထောင်ထောင်က ဇာတ်လိုက်နဲ့ ဇာတ်လိုက်မဆိုတဲ့သူတွေကိုတောင် မသိဘူးလေ၊ ဘာလို့ သူတို့ရဲ့ ဆက်ဆံရေးကို ဖျက်ဆီးချင်ရမှာလဲ”

ထောင်ထောင်၏ မေးခွန်းကို ကြားသောအချိန်တွင် စနစ်က ခေတ္တမျှ တိတ်ဆိတ်သွားခဲ့ရသည်။

ထောင်ထောင်၏ မေးခွန်းကို မည်သို့ ဖြေရမည်ကို အလျင်အမြန် တွက်ချက်နေပုံရ၏။

ခေတ္တကြာပြီးနောက်တွင် စနစ်က အဖြေမဟုတ်သော အဖြေတစ်ခုကို ပေးလိုက်လေ၏။

[ အကျဉ်းချုပ်ပြီးတော့ ပြောရရင် မူလ အမျိုးသမီးအရန်ဇာတ်ကောင်ရဲ့ ဝိညာဉ်က ပျောက်ဆုံးသွားတဲ့အတွက် ဇာတ်လမ်းကို ဆက်သွားဖို့အတွက် တခြားဝိညာဉ်တစ်ခု လိုအပ်နေလို့ပါ၊

မဟုတ်ရင်တော့ ဒီကမ္ဘာကြီး တစ်ခုလုံးက ပျက်စီးသွားပါလိမ့်မယ်၊

တကယ်လို့ မင်းသာ ဇာတ်လမ်းကို ပြီးမြောက်အောင် ကူညီပေးမယ်ဆိုရင်တော့ ငါ မင်းရဲ့ ဆန္ဒတစ်ခုကို ဖြည့်ဆည်းပေးနိုင်ပါတယ် ]

[ ဒီအထဲမှာ ချိတ်ပိတ်တာကို ဖယ်ရှားပေးတာနဲ့ မင်းစားချင်တာမှန်သမျှကို အကုန်စားနိုင်တယ် ဆိုတာကလည်း ပါဝင်တယ် ]

စနစ်က ထောင်ထောင်နှင့် မချိတ်ဆက်မီကတည်းက ဤအချက်ကို ထည့်သွင်း၍ စဉ်းစားထားပုံရပြီး အစကတည်းကပင် လိုရင်းကို ထိမိစွာ ပြောဆိုနိုင်ခဲ့သည်။

ထောင်ထောင်၏ မျက်လုံးများက ချက်ချင်း အရောင်တောက်သွားခဲ့၏။

“တကယ်လား”

စနစ် : [ အမှန်ပါပဲ]

“စနစ်ကျဲကျဲ၊ ထောင်ထောင် ဘာလုပ်ဖို့ လိုလဲ”

စနစ်၏ နူးညံ့သော အမျိုးသမီးအသံကို ကြားရသည့်အချိန်တွင် ထောင်ထောင်က စနစ်ကို ထောင်တီမျိုးနွယ်ထဲမှ အသက်ကြီးသော ထောင်တီမကြီးတစ်ကောင်ဟု မှတ်ယူလိုက်မိလေသည်။

စနစ်က ခေတ္တတန့်သွားခဲ့ရ၏။

သို့သော်လည်း တွက်ချက်ကြည့်ပြီးနောက် Host က သူမကို အစ်မဟု သတ်မှတ်လိုက်ခြင်းက နောက်ဆက်တွဲ တာဝန်များကို ဆောင်ရွက်ရာတွင် အထောက်အကူ ဖြစ်စေမည်ဟု တွေးတောမိသောကြောင့် ထိုအချက်ကို ပြုပြင်ခြင်း မပြုခဲ့ပေ။

ကလေးဆန်သည့် စနစ်ကျဲကျဲ ဟူသော ခေါ်သံကို ကြားလိုက်ရသည့် ခဏ၌ ဖြစ်ပေါ်လာခဲ့သော ပုံမှန်မဟုတ်သည့် ဒေတာအတက်အကျကိုလည်း စနစ်က ချို့ယွင်းချက်တစ်ခုအဖြစ်သာ သဘောထားပြီး မှတ်တမ်းတင်ထားလိုက်လေ၏။

စနစ် : [ ငါ မင်းကို လိုအပ်တဲ့အချိန် တာဝန်တွေကို ပေးမယ်၊

မင်းက ငါပြောတဲ့အတိုင်းပဲ တာဝန်တွေကို အောင်မြင်အောင် လုပ်ဆောင်သရွေ့ ဒီကမ္ဘာရဲ့ ဇာတ်လမ်းကို အဆုံးသတ်နိုင်လိမ့်မယ်၊ မင်းရဲ့ ဆန္ဒကိုလည်း ဖြည့်ဆည်းနိုင်ပါလိမ့်မယ် ]

ထောင်ထောင်က လိမ္မာစွာဖြင့် ခေါင်းညိတ်ပြလိုက်လေ၏။

[ တာဝန်: မင်းက ဘယ်ကိုသွားမလဲ ဘေဘီ ရဲ့ လူရွေးပွဲမှာ အောင်မြင်အောင်လုပ်ပါ၊ ပြီးရင် Reality Show ရိုက်ကူးမှုမှာ ပါဝင်ပါ ]

စနစ်၏ အသံ ထွက်လာချိန်တွင်ပင ထောင်ထောင်က လူတွေ့စစ်ဆေးခန်း တံခါးဝသို့ ရောက်ရှိလာခဲ့လေသည်။

အခန်း2)

တံခါး ပွင့်လာချိန်တွင် လူတိုင်း၏ အာရုံက ဝင်ပေါက်ဆီသို့ ရောက်ရှိသွားကြ၏။

ထောင်ထောင်ကို ရှင်းလင်းစွာမြင်လိုက်ရချိန်တွင် လူတွေ့စစ်ဆေးခန်းထဲရှိ လူအများအပြားက ချက်ချင်းပင် စိတ်ဝင်စားသွားကြလေသည်။

ကလေးငယ်လေးတွင် နက်မှောင်သော ဆံပင်များနှင့် သန့်စင်သော မျက်လုံးနက်လေးများ ရှိနေပြီး သူမ၏ နူးညံ့သော ဆံနွယ်များကိုလည်း ဘေးတစ်ဖက်တစ်ချက်စီတွင် ကျစ်ဆံမြီးလေးနှစ်ခု ကျစ်ထား၏။

သူမ လမ်းလျှောက်သည့်အချိန်တွင် ထိုကျစ်ဆံမြီးလေးများက လှုပ်ခါနေပြီး တစ်ခါတစ်ရံတွင် နှင်းကဲ့သို့ ဖြူဖွေးနူးညံ့သော ပါးပြင်လေးများကို ထိတွေ့နေခဲ့လေသည်။

သူမက အဝါရောင်တောက်တောက် ဂါဝန်လေးကို ဝတ်ဆင်ထားခဲ့ကာ ပါးချိုင့်လေးနှစ်ဖက်ပေါ်အောင် ပြုံးပြလာခဲ့သည်။

“ကောကောတို့ ကျဲကျဲတို့ ..ထမင်းစားပြီးကြပြီလား”

သူမက ချိုသာစွာ နှုတ်ဆက်လိုက်သည့် အချိန်တွင် နေရောင်အောက်တွင် ပွင့်လန်းနေသော နေကြာပန်းလေးတစ်ပွင့်ကဲ့သို့ လန်းဆန်းနေခဲ့လေ၏။

လူရွေးပွဲအတွင်း ဒိုင်များက ကလေးငယ် အများအပြားကို မြင်တွေ့ခဲ့ရသည်။

သို့သော် ဤအပြုံးလေးက ဒိုင်လူကြီးများစွာကို ချစ်ခင်နှစ်သက်သော အပြုံးများကို ပြုံးမိစေခဲ့ကာ သူတို့၏ အသံများကလည်း မသိစိတ်ဖြင့် နူးညံ့သွားခဲ့ကြလေလေသည်။

“နံပါတ် (၅၉) ထောင်ထောင်.. ဟုတ်တယ်မလား”

ကျိုးထင်က သူမ၏အရှေ့မှ မိန်းကလေးငယ်ကို ကြည့်ကာ နူးညံ့သောလေသံဖြင့် မေးလိုက်လေ၏။

ထောင်ထောင်က ခေါင်းလေးကို အားပါးတရ ငြိမ့်ပြလိုက်ပြီး ကျိုးထင်ကို အရောင်တောက်နေသော မျက်လုံးလေးများဖြင့် ကြည့်၍ ပြောလိုက်လေသည်။

“ကျဲကျဲက အရမ်း တော်တာပဲ၊ ထောင်ထောင်ရဲ့ နာမည်ကို ဘယ်လိုလုပ်ပြီးတော့ သိနေကြတာလဲ!”

ကလေးငယ်၏လေသံက ရိုးသားပြီး စိတ်ရှုပ်ထွေးနေပုံရသောကြောင့် ပရိသတ်ထဲရှိ လူကြီးအများအပြားမှာ ရယ်ချင်စိတ်ကို အောင့်အည်းထားကြရသည်။

“သမီးက ဘာကို အကြိုက်ဆုံးလဲ”

“ထောင်ထောင်က စားရတာကို အကြိုက်ဆုံးပဲ!”

ထောင်ထောင်၏ မျက်လုံးလေးများက ဝင်းလက်သွားပြီး တစ်စက္ကန့်ပင် မပြည့်မီမှာပင် အဖြေပေးလိုက်လေတော့၏။

“ကြက်ပေါင်ကြော်၊ ကိတ်မုန့်၊ ဝက်သားနီချက်၊ ဂဏန်းဥစွပ်ပြုတ်ပေါင်း၊ ပုစွန်နဲ့ ပြောင်းဖူးဖက်ထုပ်၊ တရုတ်နံနံနဲ့ ဝက်သားထုပ်”

ကလေးငယ်လေးက ဟင်းလျာစာရင်းကို အလေးအနက် ရွတ်ဆိုနေခဲ့လေ၏။ လူကြီးများမှာ ကလေးငယ်၏ အရှေ့တွင် အသံထွက် မရယ်မိစေရန်အတွက် ခေါင်းကိုငုံ့ထားရသည့်အထိ ဖြစ်စေခဲ့၏။

သူမလေးက အလွန်ပင် ချစ်စဖွယ် ကောင်းလွန်းသည်။

စနစ်က သူမကို တာဝန်၏ အကြောင်းကို သတိပေးထားသော်လည်း ဂူထဲတွင် စားလိုက်သောက်လိုက်ဖြင့်သာ နေထိုင်ခဲ့သော အစားကြူးသူလေးက လူရွေးပွဲ ဆိုသည်ကို မည်သို့အောင်မြင်အောင် လုပ်ရမည်ကို လုံးဝကို နားမလည်ခဲ့ပေ။

သူမက ထုတ်လုပ်ရေးအဖွဲ့မှ မေးသမျှ မေးခွန်းများကို အသေးစိတ် ဖြေပေးခဲ့သည်။

လူကြီးများနှင့် ကင်မရာများ၏ အရှေ့တွင် ကြောက်ရွံ့ခြင်း လုံးဝမရှိသကဲ့သို့၊ တကူးတက လေ့ကျင့်ထားသော ရင့်ကျက်မှုမျိုးလည်း မဟုတ်ဘဲ ကလေးငယ်တစ်ဦး၏ အပြစ်ကင်းစင်ကာ သဘာဝကျသော ဖော်ပြချက်များသာ ဖြစ်နေခဲ့၏။

နောက်ဆုံးတွင် ကလေးများကို ညဘက်တွင် ငိုအောင်လုပ်နိုင်သူဟု ရိုက်ကူးရေးကွင်းတွင် ကျော်ကြားသော ထုတ်လုပ်သူကိုယ်တိုင်ကပင် ထောင်ထောင်ကို မစနောက်ဘဲ မနေနိုင်တော့ပေ။

“မင်း အချစ်ဆုံးလူက ဘယ်သူလဲ”

ထောင်ထောင်က ထိုမေးခွန်းကြောင့် သူမ၏ ခေါင်းလေးကို စောင်းလိုက်ပြီး သူမ၏ မျက်ခုံးတိုလေးများကို တွန့်လိုက်မိ၏။

သူမ အချစ်ဆုံးစနစ်က ထောင်ထောင်၏ ကိုယ်ပိုင်စနစ်ဖြစ်သည်။

သူမ အချစ်ဆုံး ထောင်တီက သူမကို ကြက်ပေါင်ကို အမြဲပေးလေ့ရှိသော သူမ၏ မျိုးနွယ်စုထဲမှ ထောင်တီကျဲကျဲ ဖြစ်၏။

သို့သော် သူမက အချစ်ဆုံး လူသားက..

“ဒါက နည်းနည်းတော့ ခက်တယ်၊ ထောင်ထောင်က အခုထိ မစဉ်းစားရသေးဘူး၊ ဒါပေမဲ့ ထောင်ထောင် စဉ်းစားလို့ရပြီဆိုရင် ဦးဦးတို့ ကို ပြောပြမယ်နော်”

ကလေးငယ်လေးက အချိန်ကြာမြင့်စွာ အလေးအနက် စဉ်းစားနေပြီးမှ ထိုကဲ့သို့ လေးနက်စွာ ကတိပေးလာသောကြောင့် မြင်ရသူတိုင်းက ခက်ခဲသော မေးခွန်းကို ဆက်မမေးရက်ကြတော့ပေ။

အရပ် (၁.၉) မီတာရှိပြီး ကြွက်သားအဖုအထစ်များနှင့် ရွှေဆွဲကြိုးကြီးကို ဝတ်ဆင်ထားသော ထုတ်လုပ်သူကြီးကလည်း နောက်ဆုံးတွင် ရယ်ချင်စိတ်ကို အောင့်အည်း၍ ပြောလိုက်လေတော့၏။

“ကောင်းပြီလေ၊ ဒါဆိုရင် မင်း ပြောပြမှာကို ဦးဦးက စောင့်နေမယ်”

ထောင်ထောင် ထွက်သွားပြီးနောက်တွင် အစည်းအဝေးခန်းထဲတွင် ဆွေးနွေးမှုများက ချက်ချင်း စတင်လာခဲ့သည်။

“သူက ကင်မရာကို လုံးဝကို မကြောက်ဘူးပဲ”

“ကျွန်တော် ထင်တာကတော့ သူ အရင်က ကလေးမော်ဒယ်လ် လုပ်ဖူးမယ် ထင်တယ်၊

အဝတ်အထည် အမှတ်တံဆိပ်တွေရဲ့အတွက်ကို ကြော်ငြာဓာတ်ပုံတွေ ရိုက်ဖူးတာလေ”

“ကြော်ငြာဓာတ်ပုံတွေက လှည့်စားတာပါ! ခုနက ရိုက်ကူးရေးကွင်းထဲက သူ့ရဲ့ စွမ်းဆောင်ရည်က ကြော်ငြာဓာတ်ပုံတွေထက်တောင် အများကြီး ပိုပြီးတော့ ဆွဲဆောင်မှုရှိနေတယ်”

ပတ်ဝန်းကျင်မှ ဆွေးနွေးသံများ၏ ကြားတွင် ကျိုးထင်က စာမျက်နှာတစ်ခုပေါ်တွင် ထောင်ထောင် ဟူသော နာမည်ကို ရေးမှတ်လိုက်လေ၏။

မတိုင်ခင်က ကလေးမလေး၏ စွမ်းဆောင်ရည်ကို တွေးတောရင်း သူမက အကြံတစ်ခုကိုရရှိသွားခဲ့ကာ ထောင်ထောင်၏ နာမည်ကို တခြားနာမည်တစ်ခုနှင့် တွဲစပ်လိုက်လေသည်။

ဤကဲ့သို့သော တွဲဖက်ခြင်းမျိုးက အလွန်ပင် စိတ်ဝင်စားစရာ ကောင်းပေလိမ့်မည်။

*

တိုက်ခန်းတစ်ခုထဲ၌ ပြင်းထန်သောတိုက်ပွဲတစ့ခုဖြစ်နေသည့် ဂိမ်းထဲမှ အသံများက ဖန်သားပြင်မှ ကျယ်လောင်စွာထွက်ပေါ်နေးသည်။

စုကျင်း၏ မျက်လုံးများက ဖန်သားပြင်ပေါ်တွင်သာ စွဲမြဲနေပြီး သူ၏ လက်များကလည်း အရပ်အနားမရှိ လှုပ်ရှားနေလေ၏။

သူ၏ မန်နေဂျာဖြစ်သူကျိုးယန်ရှားက ဝင်လာသည့်အချိန်တွင် ထိုမြင်ကွင်းကို မြင်တွေ့လိုက်ရလေသည်။

ကျိုးယန်ရှားက စုကျင်းအတွက်ကို ဝယ်လာခဲ့သည့် မနက်စာကို စားပွဲပေါ်တွင် တင်ပြီးပြောလိုက်လေသည်။

“ သခင်လေး .. ဘယ်လောက်တောင် အိမ်မှာပဲ အနားယူပြီး အချိန်ဖြုန်းနေဦးမှာလဲ၊

ပြီးခဲ့တဲ့တစ်ခေါက်က ပေးထားခဲ့တဲ့ ဇာတ်ညွှန်းကိုရော ဖတ်ကြည့်ပြီးပြီလား .. နောက်ပြီးတော့ မင်းကို ကမ်းလှမ်းထားတဲ့ ကုန်ပစ္စည်းကြော်ငြာကိစ္စတွေကိုရော၊

မင်းရဲ့အရှေ့မှာ ရွှေတောင်ကြီးတွေက ပုံနေတာဆောင် မင်းက လုံးဝကို ဂရုမစိုက်ဘူး!”

“အခုတလော ကုမ္ပဏီထဲမှာက အတင်းအဖျင်းတွေက အများကြီး ထွက်နေတယ်၊

အထက်လူကြီးတချို့ကတောင် မင်းနဲ့ ပတ်သက်ပြီးတော့ ပြောစရာတွေ ရှိနေကြပြီ၊

နောက်ပြီးတော့ သူတို့က မင်းလိုမျိုး တခြားလူသစ်တစ်ယောက်ကို မြှင့်တင်ဖို့အတွက် စီစဉ်နေတယ်လို့လည်း ကြားတယ်၊ သူတို့တွေက ဘယ်လိုမျိုးလုပ်တတ်လဲဆိုတာကို မင်း သိတယ်မလား”

ကျိုးယန်ရှားက အဆက်မပြတ် ပြောနေသော်လည်း စုကျင်းက မလှုပ်မယှက်ဖြစ်နေဆဲပင်။

သူ အနည်းငယ် စိတ်ပျက်လာရ၏။

သူ စုကျင်းကို လူသစ်အဖြစ် စာချုပ် ချုပ်ခဲ့ချိန်က စုကျင်း၏ ထူးခြားသော ရုပ်ရည်နှင့် တခြားသူများနှင့်မတူဘဲ တည်ငြိမ်နေသောအမူအရာတို့ကို တန်ဖိုးထားခဲ့သည်။

ဖျော်ဖြေရေးလောကတွင် ခြေစုံပစ်ဝင်ရန်အတွက် မခက်ခဲသော်လည်း နာမည်ကျော်ကြားရန်အတွက်တော့ မြှင့်တင်မှုအပေါ်တွင် မူတည်၏။

အောင်မြင်ကျော်ကြားမှုကို ရရှိရန်အတွက် မြှင့်တင်မှုအပြင် ကံတရားပါ လိုအပ်သည်။

သို့သော် ရေရှည်သွားချင်ပါက သူ့၏ အသက်မွေးဝမ်းကျောင်းအတွက် တိကျပြတ်သားပြီး တည်ငြိမ်သော အစီအစဉ် ရှိရလိမ့်မည်။

ထို့အပြင် ပတ်ဝန်းကျင်ရှိ မက်လုံးများကြောင့် စိတ်မလေလွင့်ရန်လည်း လိုအပ်သည်။

မည်သို့ပင်ဖြစ်စေ သူ နှစ်ပေါင်းများစွာအတွင်း မြှင့်တင်ပေးခဲ့ရသော ကြယ်ပွင့်များစွာ အမှားလေးတစ်ခုကြောင့် လောကထဲမှ ပျောက်ကွယ်သွားခဲ့ကြရသည် မဟုတ်ပါလား။

စုကျင်းက အမှန်တကယ်ပင် အလားအလာရှိသူဖြစ်ခဲ့သည်။

လောကထဲသို့ ခြေချပြီးနောက် သုံးနှစ်အတွင်းမှာပင် သူက အလွန် အောင်မြင်ကျော်ကြားသော ထိပ်တန်းမင်းသားတစ်ဦးဖြစ်လာခဲ့၏။

သူအပေါ်တွင် ရှိနေသော မှတ်ချက်များက အမြဲတစေ အပြုသဘော မဆောင်နေခဲ့သော်လည်း အသိုင်းအဝိုင်းထဲနှင့် အပြင်မှ လူတိုင်းက အချက်နှစ်ချက်ကိုတော့ ဝန်ခံကြရသည်။

စုကျင်း၏ မျက်နှာ

နှင့် သူ၏ အောင်မြင်ကျော်ကြားမှုက မြင့်မားလွန်းသည်ပင်။

သို့သော် အချိန်ကြာလာသည်နှင့်အမျှ စုကျင်း၏ အေးစက်သော ကိုယ်ရည်ကိုယ်သွေး၏ ဆိုးကျိုးများကလည်း ပေါ်ထွက်လာခဲ့၏။

အကျဉ်းချုပ်၍ ပြောရလျှင် သူ့တွင် ရည်မှန်းချက် ကင်းမဲ့နေသည်။

အသက်မွေးဝမ်းကျောင်း၏ အထွတ်အထိပ်သို့ ရောက်နေချိန်တွင်ပင် စုကျင်းက ကမ်းလှမ်းချက်များစွာကို ငြင်းပယ်ခဲ့၏။

ထို့နောက် သူ၏ တိုက်ခန်းထဲတွင်သာ နှစ်လတိုင်တိုင် အောင်းနေခဲ့ကာမည်သည့်အလုပ်ကိုမျှ လက်မခံခဲ့ပေ။

လက်ရှိ၌ သူ့တွင်ပြသနေဆဲဖြစ်သော ဇာတ်လမ်းတွဲများမှ ကျန်ရှိနေသော နာမည်နှင့် အောင်မြင်မှုအရှိန်အဝါ အနည်းငယ်သာ ရှိနေတော့၏။

သို့သော် စုကျင်းအနေဖြင့် ဤအတိုင်းသာ ဆက်လက်ပျင်းရိနေမည်ဆိုပါက ကုမ္ပဏီမှ ဖိအားများနှင့် အောင်မြင်မှုကျဆင်းလာခြင်းတို့ကို သူ့အနေဖြင့် ကိုင်တွယ်နိုင်လိမ့်မည်ဟု ကျိုးယန်ရှား လုံးဝကို ယုံကြည်မှု မရှိတော့ပေ။

ကျိုးယန်ရှားက ခေါင်းမော့လိုက်ချိန်တွင် စုကျင်းက ဖန်သားပြင်၏ အရှေ့တွင် တင်ပျဉ်ခွေထိုင်၍ ဂိမ်းကစားရာတွင်သာ အာရုံစိုက်နေသည်ကို မြင်လိုက်ရ၏။

သူ အသက်ကို ပြင်းပြင်းရှူလိုက်ကာ လာရသည့်အကြောင်းကို ပြောလိုက်လေသည်။

“ငါ မင်းကို ပြောစရာ ရှိတယ်၊ ငါ မင်းအတွက် မိဘနဲ့ကလေး Reality Show တစ်ခုကို စီစဉ်ထားတယ်၊ ဒီလကုန်မှာ ရိုက်ကူးရေး စတင်လိမ့်မယ်၊ ပြင်ဆင်ထားလိုက်တော့”

ထိုစကားကို ကြားလိုက်ရချိန်တွင်တော့ မတိုင်မီက မလှုပ်မယှက် ရှိနေခဲ့သည့် စုကျင်းမှာ ရုတ်တရက် တောင့်ခဲသွားခဲ့လေသည်။

ဂိမ်းခလုတ်များကို ဖိနှိပ်နေသော သူ၏ လက်များကလည်း ရပ်တန့်သွားခဲ့၏။

သူ ထိန်းချုပ်နေသော ဂိမ်းဇာတ်ကောင်ကလည်း ငြိမ်သက်သွားလေသည်။

နောက်တစ်စက္ကန့်တွင် GAME OVER ဟူသော စာတန်းကြီးက ဖန်သားပြင်ပေါ်တွင် ပေါ်လာခဲ့တော့၏။

သူက အသင်းဖော်များ၏ ဆဲဆိုသံများကို လစ်လျူရှု၍ ကျိုးယန်ရှား၏ ဘက်သို့ တောင့်တင်းစွာ လှည့်ပြီး မေးလိုက်လေသည်။

“မန်နေဂျာကျိုး၊ ခင်ဗျား ကျွန်တော့်ကို နောက်နေတာလား”

သူ, စုကျင်း.. ဖျော်ဖြေရေးလောကထဲက အသက်နှစ်ဆယ်ကျော် အရည်အသွေးမြင့် ဆင်ဂယ်လ် လူငယ်တစ်ဦးက မိဘနဲ့ကလေး Reality Show တွင် ပါဝင်ရမယ် ဟုတ်လား။

သူ ရူးသွားပြီလား!

တောက်ပသော နေရောင်ခြည်က အခန်းထဲသို့ စီးဝင်နေပြီး အခန်းကို နွေးထွေးစေသော ရွှေရောင်အလင်းတန်းများဖြင့် လွှမ်းခြုံထားသည်။

သို့သော် စုကျင်း၏ စိတ်အခြေအနေက လုံးဝကို ကြည်လင်ခြင်း မရှိပေ။

ကျိုးယန်ရှား စကားပြောပြီးနောက်တွင် စုကျင်းက မျက်မှောင်ကြုတ်လိုက်လေ၏။

“မဖြစ်နိုင်တာ၊ ခင်ဗျား တကယ်ပြောနေတာလား၊ ကျွန်တော့်ကို နောက်နေတာလား”

“ငါက နောက်နေတဲ့ပုံမျိုးကို ဖြစ်နေလို့လား”

ကျိုးယန်ရှားက သူ ပြင်ဆင်ထားသော အစီအစဉ်က အချက်အလက်များကို ထမင်းစားပွဲပေါ်သို့ တင်လိုက်လေ၏။

“ငါ မင်းကို ပို့ထားတဲ့ ဖိုင်ကို မင်း မဖတ်ဘူးဆိုတာကို သိလို့ စာရွက်မူရင်းကို ယူလာတာ”

“ဘလာဘာ TV ရဲ့ နောက်ဆုံးထွက် Reality Show ဖြစ်တဲ့ ‘မင်ကဘယ်ကိုသွားမလဲ ဘေဘီ’က မင်းကို အလုပ်သင်အဖေအဖြစ်နဲ့ ပါဝင်ဖို့ကို ဖိတ်ခေါ်ထားတယ်၊

သာမန်ကလေးတွေနဲ့ အသင်းဖွဲ့ပြီးတော့ ခရီးသွားရင်းနဲ့ တာဝန်တွေကို အတူ ပြီးမြောက်အောင် လုပ်ရမှာ”

စုကျင်း၏ အကြည့်က ကျိုးယန်ရှား၏ မျက်နှာပေါ်တွင်သာ ဝဲပျံနေပြီး လိမ်ညာနေသည့် အရိပ်အယောင်ကို ရှာဖွေနေပုံရ၏။

သို့သော် သူလိုချင်သည့် အရိပ်အယောင်ကိုမတွေ့ခဲ့ပေ။

စုကျင်းက သူ၏ ဆံပင်များကို ရုတ်တရက် ထိုးဖွလိုက်ကာ ထရပ်ပြီးနောက် ထမင်းစားပွဲဆီသို့ လျှောက်သွားရင့း ရေတစ်ဖန်ခွက်ကို ငှဲ့လိုက်လေ၏။

ရေတစ်ငုံကို သောက်ပြီးနောက်တွင် စားပွဲ၏ တစ်ဖက်ရှိ ကျိုးယန်ရှား၏ ဘက်သို့ လှည့်လိုက်သည်။

“ကျွန်တော် ကလေးတွေကို အမုန်းဆုံးပဲဆိုတာကို မန်နေဂျာ သိတယ်မလား”

ဤသို့ပြောနေချိန်မှာပင် စုကျင်းက မသိစိတ်ဖြင့် ရေဖန်ခွက်ကို တင်းကြပ်စွာ ဆုပ်ကိုင်လိုက်မိ၏။

“ကလေးတွေက ဆူညံပြီးတော့ အနှောင့်အယှက်ကို ပေးတတ်ကြတာ၊ ဒေးဗစ်တောင်မှ ကလေးတွေနဲ့ အတူမနေနိုင်တာ၊ ကျွန်တော်ဆိုရင် ပိုဆိုးမှာပေါ့”

စုကျင်းက ဒေးဗစ်ဟု ခေါ်လိုက်သည့်အချိန်တွင် အခန်းထဲတွင် ပျော်ရွှင်စွာ ပြေးလွှားနေသော Golden Retriever ခွေးကြီးက ချက်ချင်းပင်ပြေးလာပြီး စုကျင်း၏ ခြေထောက်နားတွင် လာအီနေခဲ့၏။

“တွေ့လား! ဒေးဗစ်လည်း သူက ကလေးတွေကို မခံနိုင်ဘူးလို့ ပြောနေတယ်”

စုကျင်းက ခေါင်းကိုငုံ့ကြည့်လိုက်ပြီး သူ့၏ ခွေးကြီးကို စနောက်လိုက်လသည်။

“မင်းလည်း ဒီလိုပဲ ထင်တယ်မလား ဒေးဗစ်”

စုကျင်းက အကြောင်းအရာကို ပြောင်းရန်အတွက် ကြိုးစားနေသည်ကို မြင်လျှင် ကျိုးယန်ရှားက သူ၏ မျက်မှန်ကို အသာပင့်တင်လိုက်ပြီး ပြောလိုက်လေ၏။

“အဲဒီအတွက်တော့ မစိုးရိမ်ပါနဲ့၊ ငါ ထုတ်လုပ်ရေးအဖွဲ့နဲ့ ဆက်သွယ်ပြီးပြီ၊

သူတို့က မင်းရဲ့ စရိုက်ကို ထည့်သွင်းစဉ်းစားပြီးတော့ မင်းနဲ့ အတူတွဲဖို့အတွက် အသင့်တော်ဆုံး ကလေးကို ရွေးချယ်ပေးပါလိမ့်မယ်”

*