အခန်း (၅၄၇၁-၅၄၇၅)

Chapter 5471

"ယင်လော့ဧကရာဇ် ထွက်ပေါ်လာပြီ..."

"ချင်ဧကရာဇ်က ယန်မိသားစုက ကျွမ်းကျင်သူ တွေကို ဆက်တိုက်သတ်ပစ်ခဲ့တာ... ယင်လော့ဧကရာဇ်က နောက်ဆုံးတော့ ငြိမ်ငြိမ်မထိုင်နိုင်တော့ဘူး..."

သရဲဘုရင် အများအပြား ထိတ်လန့်သွားကြပြီး လူအမြောက်အများသည် ဤတိုက်ပွဲ၏ အခြေအနေကို မျက်မြင်တွေ့ရှိရန် ရည်ရွယ်ကာ သူတို့၏နတ်ဘုရားစိတ်အာရုံများကို ထုတ်လွှတ်လိုက်ကြသည်။

ငရဲနယ်မြေဆယ့်ရှစ်ခုရှိ သရဲဘုရင်များ၏ ယခင်ခေါင်းဆောင်ဖြစ်သော ယင်လော့ ဧကရာဇ်သည် မြေအောက်လောက နတ်ဘုရား ကျဆုံးပြီးနောက် ငရဲနယ်မြေကို လွှမ်းမိုးချုပ်ကိုင်ခဲ့သည်။ သူသည် မြေအောက်လောက နတ်ဘုရား ယခင်က တည်ထောင်ခဲ့သော အင်အားစုများကို သူတစ်ယောက်တည်းဖြင့် ဖျက်ဆီးကာ အာဏာကို သိမ်းပိုက်ပြီး ငရဲနယ်မြေ၏ အရှင်သခင်အသစ် ဖြစ်လာခဲ့ပေ၏။

သူသည် များသောအားဖြင့် တော်ဝင်နန်းတော် ၏ အနက်ရှိုင်းဆုံးအပိုင်းတွင် နေထိုင်ပြီး လူအနည်းငယ်သာ သူ၏ စစ်မှန်သော အသွင်အပြင်ကို မြင်တွေ့ရသည်။ ယင်လော့ဧကရာဇ်၏ ရံဖန်ရံခါ ကိုယ်ထင်ပြမှုသည် သူ၏စစ်မှန်သော ကျင့်ကြံခြင်းကို ဖော်ပြနေပြီး ထိုအရာမှာ ခန့်မှန်း၍မရနိုင်လောက်အောင် ဖြစ်နေလေပြီ။

"ယမမင်း..."

လုယွီက သူ၏မျက်လုံးများကို မှေးစင်းကာ ဖြည်းညှင်းစွာ ပြောဆိုလိုက်သည်။

ရင်းနှီးသော သိဟောင်းကျွမ်းဟောင်းတစ်ဦးနှင့် ပြန်လည်ဆုံတွေ့ရချိန်တွင် ထိုခံစားချက်ကို သူ မဖော်ပြနိုင်ခဲ့ချေ။

သူ၏ရှေ့တွင် ယခင်က ဒူးထောက်ခဲ့ပြီး သစ္စာရှိခဲ့သော သရဲဘုရင်သည် ယခုအချိန်၌ လုံးဝ ပြောင်းလဲသွားပြီး သူ ယခင်က ပြုလုပ်ခဲ့သမျှ အရာအားလုံးကို ဖျက်ဆီးခဲ့လေ၏။

"ရိုင်းစိုင်းလိုက်တာ... သခင်ကို အဲ့ဒီလို ခေါ်ရဲတာလား..."

တစ်စုံတစ်ယောက်က ဒေါသတကြီး အော်ဟစ်လိုက်သည်။

သို့သော် သူ ထိုစကားကို ပြောဆိုပြီးသည်နှင့်တပြိုင်နက် လုယွီ၏အကြည့်က သူ့ကို လွှမ်းခြုံသွားသည်အား သူ မြင်လိုက်ရသည်။ ထိုလူ၏ စိတ်နှလုံးသားသည် တုန်ရီသွားပြီးနောက် သူ၏ဒွာရခုနစ်ပေါက်မှ သွေးများယိုစီးကျလာကာ မြေပြင်ပေါ်တွင် သတိလစ်သွားတော့သည်။

တခြားသူများသည် ထိတ်လန့်မသွားဘဲ မနေနိုင်ကြချေ။ လုယွီ၏ အကြည့်သက်သက်ကပင် ထိုကဲ့သို့ စွမ်းအားကို အမှန်တကယ် ပိုင်ဆိုင်ထားပေ၏။

ယင်လော့ဧကရာဇ်သည် ဆံဖြူအဘိုးအိုတစ်ဦးဖြစ်ပြီး သူ၏မျက်လုံးများသည် မင်ကဲ့သို့ မည်းနက်နေကာ အဖြူရောင် လုံးဝမရှိဘဲ အလွန်ကြောက်မက်ဖွယ်ကောင်းပုံရသည်။

သို့သော် သူ၏ခန္ဓာကိုယ်တစ်ခုလုံး၌ အရေးအကြောင်းများဖြင့် ဖုံးလွှမ်းနေသော်လည်း ယင်လော့ဧကရာဇ်သည် ကြီးကျယ်ခမ်းနားသော ကိုယ်ဟန်အမူအရာ ရှိနေဆဲဖြစ်ပြီး လေဟာနယ်ကိုနင်းလျှောက်ကာ ကောင်းကင်နှင့် မြေကြီးသည် သူ၏ပခုံးပေါ်တွင် အနားယူနေသည့်အလားပင်။ ဤနေရာတွင် ရပ်နေရုံဖြင့် သူသည် လူအများအား ထိတ်လန့်တုန်လှုပ်စေသော ခံစားချက်ကို ပေးစွမ်းနိုင်သည်။

"ချင်ဧကရာဇ်... လူငယ်တွေနဲ့ ထပ်ပြီး အချိန်မဖြုန်းပါနဲ့... မင်းနဲ့ငါ ထိုင်ပြီး စကားပြောလို့ ရပါတယ်..."

ယင်လော့ ဧကရာဇ်က ပေါ့ပေါ့ပါးပါး ပြောဆိုလိုက်၏။

"ပြောစရာ ဘာမှ မရှိဘူး... ဒီနေ့ ယန်မိသားစု သေချာပေါက် ပျက်စီးရမယ်..."

လုယွီက အေးစက်စွာ တုံ့ပြန်လိုက်သည်။

ဤစကားများ ထွက်ပေါ်လာသည်နှင့်တစ်ပြိုင်နက် ဆူပူအုံကြွမှုတစ်ခု ဖြစ်ပေါ်လာပြီး ယန်မိသားစုကျင့်ကြံသူ အများအပြား၏ ခန္ဓာကိုယ်များ တုန်ရီသွားသည်။

"အရာအားလုံးကို အမြဲတမ်း ဆွေးနွေးလို့ ရပါတယ်... သေတဲ့အထိ တိုက်ခိုက်ပြီး ဒီလို ပျက်စီးဆုံးရှုံးမှုတွေ ရနေဖို့ မလိုအပ်ပါဘူး... ဒီတိုက်ပွဲမှာ မင်းရဲ့မဟာချင်ကလည်း မရေမတွက်နိုင်တဲ့ သေဆုံးမှုတွေ ခံစားခဲ့ရတယ်... ပြီးတော့ ငါ့ရဲ့ယန်မိသားစုက ပိုပြီးကြီးမားတဲ့ ဆုံးရှုံးမှုတွေ ခံစားခဲ့ရပြီးတော့ မဟာအကြီးအကဲ တစ်ဝက်ကျော် သေဆုံးခဲ့ပြီး ငါ့ရဲ့ ဆက်ခံသူတောင် မင်းရဲ့လက်ချက်နဲ့ သေဆုံးသွားခဲ့ပြီ... မင်းရဲ့ဒေါသက ဘယ်လောက်ပဲ ကြီးမားပါစေ အခု အဲ့ဒါကို ငြိမ်းသတ်သင့်ပြီ..."

ယင်လော့ဧကရာဇ်၏ စကားများကို ကြားချိန်၌ လုယွီက ပြုံးလိုက်သည်။

"ငါ့ရဲ့ ရှန်းယန် တော်ဝင်နန်းတော်ကို အရင်လာပြီးတော့ မသေမျိုးအဆင့် မှော်လက်နက်ကို လွှဲပေးဖို့ ငါ့ကို ခြိမ်းခြောက်ခဲ့တာက မင်းရဲ့လူတွေ မဟုတ်ဘူးလား..."

"ငါ့ရဲ့ မဟာချင်ကို နယ်မြေခွဲဝေပေးဖို့ တောင်းဆိုခဲ့တာကလည်း မင်းရဲ့လူတွေ မဟုတ်ဘူးလား... မင်းက ဘာလို့ အခုမှ သားကောင်အဖြစ် ဟန်ဆောင်နေရတာလဲ..."

လုယွီ၏မေးခွန်းများသည် လေထဲတွင် ပဲ့တင်ထပ်သွားပေ၏။

ယန်မိသားစု၏ အစွမ်းထက်ကျင့်ကြံသူများအားလုံး တိတ်ဆိတ်သွားကြသည်။ သူတို့သည် ကောင်းကင်ဘုံနယ်မြေအတွက် ယှဉ်ပြိုင်ရန် ရည်မှန်းချက် အမှန်တကယ် ရှိခဲ့ကြသော်လည်း ဤမျှ ကြီးမားသောတန်ကြေးကို ပေးဆပ်ရလိမ့်မည်ဟု သူတို့ ဘယ်သောအခါမျှ မျှော်လင့်မထားခဲ့ကြချေ။

အကယ်၍ အချိန်ကို နောက်ပြန်လှည့်နိုင်ပါက အလောတကြီး မလုပ်ဆောင်ရန် ယင်လော့ ဧကရာဇ်အား သူတို့ သေချာပေါက် အကြံပေးမိပေလိမ့်မည်။

"ဒီလိုဖြစ်မှတော့ ချင်ဧကရာဇ်က ဆွေးနွေးဖို့ နေရာချန်မထားဘူးဆိုတော့ ငါတို့ယန်မိသားစုက ချင်ဧကရာဇ်ကို ဒီနေရာမှာပဲ ထားခဲ့ရလိမ့်မယ်..."

ယင်လော့ဧကရာဇ်၏အသံသည် အစွမ်းထက်ပြီး ပဲ့တင်ထပ်နေကာ သူ၏စကားများတွင် သတ်ဖြတ်လိုခြင်း စိတ်ဆန္ဒကို ဖော်ပြနေသည်။

"မင်း မလုပ်နိုင်ဘူး..."

လုယွီက အေးစက်တင်းမာစွာ ပြောဆိုသည်။

"မင်း တစ်ယောက်တည်းနဲ့... မင်း မလုပ်နိုင်ဘူး..."

ဤစကားလုံးများက လုယွီ၏လွှမ်းမိုးချုပ်ကိုင်နိုင်မှုနှင့် ယုံကြည်မှုကို ဖော်ပြနေပေ၏။

ဂုဏ်သရေရှိ ယင်လော့ဧကရာဇ်ဖြစ်ကာ ငရဲနယ်မြေ၏ ကောင်းကင်ပြသမှု အဆင့်သတ်မှတ်ချက်တွင် နံပါတ်တစ်နေရာ၌ရှိသော ပြိုင်ဘက်ကင်း ကျွမ်းကျင်သူသည် လုယွီ၏ရှေ့တွင် "မင်း မလုပ်နိုင်ဘူး" ဟူသော စကားလုံးများကိုသာ ခံယူခဲ့ရသည်။

ယင်လော့ဧကရာဇ်၏ မျက်နှာပေါ်တွင် ဒေါသထွက်သည့် အရိပ်အယောင် မရှိချေ။ သူသည် မျက်မှောင်အနည်းငယ်ကြုတ်ကာ ညင်သာစွာ ချောင်းဆိုးလိုက်၏။

သူ၏နောက်ကွယ်တွင် မှိုင်းညို့နေသော တိမ်တိုက်များသည် အကြီးအကျယ် စုရုံးလာပြီး ထူထပ်သိပ်သည်းသော တိမ်မည်းများအောက်တွင် ပုံရိပ်ဆယ်ခုက ဖြည်းညှင်းစွာ လျှောက်လှမ်းထွက်လာသည်။ သူတို့၏အဝတ်အစားများ လူးလွန့်နေပြီး သူတို့၏မှော်စွမ်းအားမှာ မိုးထိလုမတက် မြင့်မားသည်။

အသက်ရှူမွန်းကြပ်စေသော ဖိအားတစ်ခုက လူတိုင်း၏ခေါင်းပေါ်သို့ ကျဆင်းလာပြီး ယန်မိသားစုကျင့်ကြံသူ အမြောက်အများပင်လျှင် ဤအချိန်တွင် အသက်ရှူမဝတော့သကဲ့သို့ ခံစားလိုက်ရသည်။

Chapter 5472

"ဒါဆို ငါတို့ကရော ဘယ်လိုလဲ..."

အိုမင်းပြီး အက်ရှနေသော အသံတစ်သံက ကောင်းကင်ယံတွင် ပဲ့တင်ထပ်သွားပေ၏။

ကောင်းကင်နှင့်မြေပြင်ကြားရှိ ဥပဒေသ များသည် ဤလူများ ထွက်ပေါ်လာခြင်းကြောင့် အပြောင်းအလဲများစွာကို ပြသနေသည်။ ထူးဆန်းသော အဖြစ်အပျက်များ မကြာခဏ ဖြစ်ပေါ်လာပြီး မိုးကြိုးများ မြည်ဟီးနေသည်။

ကွဲပြားသော ပုံစံများရှိသည့် ဓမ္မပုံရိပ်ယောင်တချို့သည် ကောင်းကင်နှင့်မြေပြင်ကြားတွင် ထွက်ပေါ်လာသည်။ လူတချို့၏ ဓမ္မပုံရိပ်ယောင်များသည် တိမ်များဆီသို့ ပျံတက်သွားသော နတ်ဆိုးကြီးများကဲ့သို့ဖြစ်ပြီး တချို့မှာ သူတို့၏ အစွယ်များနှင့်လက်သည်းများကို ဖော်ပြနေသော နတ်ဆိုးသားရဲများအလားပင်။ ထိုဓမ္မပုံရိပ်ယောင်များသည် ကြီးကျယ်ခမ်းနားပြီး လူအများအား ကြောက်ရွံ့ရိုသေမှုကို ဖြစ်ပေါ်စေသည်။

"ဒါ... ဒါ... ဒါက အရင်မျိုးဆက်ရဲ့ ယန်မိသားစု မိသားစုခေါင်းဆောင် မဟုတ်လား..."

"ပြီးတော့ ယန်မိသားစုရဲ့ နတ်ဘုရား ပကတိဘိုးဘေး... သူက သက်တမ်း ကုန်သွားပြီးတော့ ပြန်လည်ဝင်စားခြင်းကို ဖြတ်သန်းသွားပြီ မဟုတ်လား..."

"အဲ့ဒါက ယန်မိသားစုရဲ့ သတ္တမဘိုးဘေးပဲ... ဒီ စီနီယာကျွမ်းကျင်သူက သရဲဘုရင် ရဲ့ အထွတ်အထိပ်အဆင့်အထိ ကျင့်ကြံထားပြီးသားဖြစ်ပြီးတော့ သူလည်း ဒီအချိန်မှာ ထွက်ပေါ်လာတာပဲ..."

လူအမြောက်အများသည် မိုးကောင်းကင်ယံ အထက်တွင် ထွက်ပေါ်လာသော အနက်ရောင် ပုံရိပ်များကို ကြည့်ကာ အလွန်အမင်း အံ့အားသင့်သွားကြသည်။ သူတို့သည် ပါးစပ်အဟောင်းသား ဖြစ်နေပြီး သူတို့ စကားပြောဆိုနေစဉ် တုန်ရီနေကြ၏။

ထိုအိုမင်းသော ပုံရိပ်များအားလုံးသည် ယန်မိသားစု၏ သက်ရှိကျောက်ဖြစ်ရုပ်ကြွင်းများ ဖြစ်ကြပြီး သူတို့ တစ်ဦးစီတိုင်းသည် ငရဲနယ်မြေတွင် ကြောက်မက်ဖွယ်ကောင်းသော ဂုဏ်သတင်းတစ်ခုကို ချန်ထားခဲ့ကြသည်။

သူတို့သည် ယန်မိသားစု၏ အရေးကြီးဆုံး အချိန်တွင် ရောက်ရှိလာပြီး ပြိုကျနေသော စံအိမ်ကြီးကို အချိန်မရွေး ပံ့ပိုးပေးရန်နှင့် လုယွီကို ဤနေရာတွင် ချန်ထားခဲ့ရန် အသင့်ဖြစ်နေသည်။

"ချင်ဧကရာဇ်... မင်းက အရမ်းမာနထောင်လွှားလွန်းတယ်..."

"လူငယ်တွေက ကောင်းကင်နဲ့မြေပြင်ရဲ့ ကြီးမားကျယ်ပြန့်မှုကို သိသင့်တယ်... မင်းရဲ့ စွမ်းရည်က အားမနည်းပေမဲ့ မင်းက အရမ်း မာနထောင်လွှားပြီး မောက်မာလွန်းတယ်..."

အဖိုးအိုတချို့သည် သင်္ချိုင်းဂူများထဲမှ တွားသွားထွက်လာသည့်အလား အိုမင်းသော အသံများကို ထုတ်လွှတ်လိုက်ကြ၏။ ဆွေးမြည့်နေသော အရှိန်အဝါသည် အစွမ်းထက်သော မှော်စွမ်းအား အတက်အကျများနှင့်အတူ ရှင်းလင်းစွာ ပျံ့နှံ့သွားပြီး လူအများ၏စိတ်နှလုံးသားကို တုန်ခါသွားစေသည်။

လုယွီက ဤလူဆယ်ဦးကို တစ်ချက်ကြည့်လိုက်ပြီး လှောင်ပြောင်လိုက်သည်။

"ဒါက မလုံလောက်သေးဘူး..."

ယန်မိသားစုဝင်များ ဒေါသထွက်သွားကြ၏။ လုယွီသည် အလွန်အမင်း မာနထောင်လွှားလွန်းပြီး သူတို့၏ယန်မိသားစုကို လုံးလုံးလျားလျား အလေးအနက်မထားချေ။

"ဒါဆိုရင် ငါတို့ကရော ဘယ်လိုလဲ..."

မဟာအကြီးအကဲ ရာပေါင်းများစွာသည် တပြိုင်နက်တည်း ရှေ့သို့ထွက်လာပြီး ကျယ်လောင်သောအသံဖြင့် ပြောဆိုလိုက်ကြသည်။

လုယွီသည် ထိုလူများကို သူ၏မျက်လုံးထဲသို့ပင် မထည့်ခဲ့ချေ။

သူသည် ပတ်ဝန်းကျင်ကို အကဲခတ်ကြည့်လိုက်ပြီးနောက် သက်ပြင်းချလိုက်သည်။

"ယန်မိသားစုက ပြစရာ ဘာမှ မကျန်တော့ဘူးလို့ ထင်တယ်... ဒါဆို စကားအပိုတွေ ထပ်ပြောနေစရာ မလိုတော့ဘူး...မင်းတို့ ဒီနေရာမှာပဲ သေလိုက်ကြတော့..."

လုယွီ၏နတ်ဘုရားစိတ်အာရုံသည် ပျံ့နှံ့သွားပြီး ယန်မိသားစု တော်ဝင်နန်းတော်တစ်ခုလုံးကို လွှမ်းခြုံသွားပေ၏။

သို့သော် ဤအချိန်၌ တော်ဝင်နန်းတော်၏ ထောင့်တစ်နေရာတွင် အနက်ရောင် မြူခိုးများ ထွက်ပေါ်လာသည်ကို လုယွီက မသဲမကွဲ တွေ့ရှိလိုက်ရသည်။

ဤအနက်ရောင် မြူခိုးများကို သာမန်မျက်စိဖြင့် မမြင်နိုင်ချေ။ လုယွီ၏ ကောင်းကင်အရှင်သခင် ၏ မျက်လုံးများသာလျှင် သဲလွန်စကို ရှာဖွေတွေ့ရှိနိုင်သည်။

ထိkအနက်ရောင် မြူခိုးများသည် လူငယ်လေး တစ်ဦးထံမှ ထွက်ပေါ်လာခြင်းပင်။ ဤအချိန်၌ သူသည် ယန်မိသားစု အစေခံတစ်ဦးအဖြစ် ရုပ်ဖျက်ထားပြီး အစေခံအုပ်စုတစ်စုနှင့်အတူ တော်ဝင်နန်းတော်မှ ထွက်ခွာနေသည်။

"ယန်ထုံ..."

လုယွီ၏မျက်လုံးများ အေးစက်တင်းမာသွားသည်။ သူသည် အကြောင်းအရင်းနှစ်ခုကြောင့် ဤနေရာသို့ လာခဲ့ခြင်းဖြစ်သည်။ ပထမတစ်ခုမှာ ယန်မိသားစုကို ဖျက်ဆီးရန်ဖြစ်ပြီး ဒုတိယတစ်ခုမှာ နင်းချူ၏တည်နေရာကို ရှာဖွေရန်ပင်။

ကောင်းကင်ကွန်ယက်၏ စုံစမ်းစစ်ဆေးမှုအရ နင်းချူ ပြန်ပေးဆွဲခံရခြင်းမှာ ဤယန်ထုံနှင့် ခွဲခြား၍မရနိုင်လောက်အောင် ဆက်စပ်နေပေ၏။

လုယွီသည် လျှပ်စီးကဲ့သို့ မြန်ဆန်သော နည်းလမ်းများဖြင့် ယန်မိသားစုကို အလျင်အမြန် ဖျက်ဆီးရန် ရည်ရွယ်ထားသော်လည်း ဤယန်ထုံက ခိုးထွက်ရန် ပြင်ဆင်နေလိမ့်မည်ဟု သူ မျှော်လင့်မထားခဲ့ချေ။

"သတ်..."

လုယွီ အချိန်တခဏကြာ အံ့အားသင့်နေစဉ်မှာပင် ယင်လော့ဧကရာဇ်သည် မရေမတွက်နိုင်သော ကျွမ်းကျင်သူများကို ဦးဆောင်ကာ လုယွီကို တိုက်ခိုက်နေလေပြီ။

ကျွမ်းကျင်သူများကြား တိုက်ပွဲများသည် မျက်တောင်တစ်ခတ်အတွင်း မကြာခဏ ပြောင်းလဲတတ်သည်။ သူတို့သည် လုယွီ၏ အာရုံလွင့်ပါးမှု အရိပ်အယောင်ကို ဖမ်းမိလိုက်ပြီး ထိုအရာမှာ အားနည်းချက်တစ်ခုဖြစ်ကြောင်း ချက်ချင်းသဘောပေါက်သွားကာ တိုက်ခိုက်မှုတစ်ခုကို အလျှင်အမြန် စတင်လိုက်ကြ၏။

"ဘုန်း..."

လုယွီက အေးစက်စက် နှာမှုတ်လိုက်ပြီး သူ၏လက်ကိုမြှောက်ကာ လက်ဝါးဖြင့် ရိုက်ထုတ်လိုက်ရာ တိုးဝင်လာသော တိုက်ခိုက်မှုကို ပိတ်ဆို့ဟန့်တားလိုက်သည်။

"လူသားဧကရာဇ်ဓား... ခုတ်ပိုင်းစမ်း..."

ရုတ်ချည်းဆိုသလိုပင် လုယွီက လူသားဧကရာဇ်ဓားကို ဆင့်ခေါ်လိုက်သည်။ အမြင့်မြတ်ဆုံး ဆေဘာဓားစိတ်ဆန္ဒသည် လေဟာနယ်ကို ဖြတ်တောက်သွားပြီး ရှေ့သို့ တိုက်ရိုက်ထိုးဖောက်သွားပေ၏။

ဝှစ်...

ကျယ်လောင်သော အသံတစ်သံ ထွက်ပေါ်လာပြီး လုယွီကို ပိတ်ဆို့တားဆီးနေသော ယန်မိသားစု အကြီးအကဲဆယ်ယောက်ကျော် ချက်ချင်းသေဆုံးသွားကြသည်။

ထက်ရှသော လူသားဧကရာဇ်ဓားသည် တားဆီး၍မရနိုင်ဘဲ ဓားပူတစ်လက်က ထောပတ်ကို ဖြတ်သန်းသွားသည့်အလား လူအုပ်ကြီးကို ဖောက်ထွင်းသွားကာ ယန်ထုံရှိသော ဦးတည်ချက်သို့ ပြေးဝင်သွားသည်။

ယန်ထုံသည် မူလက လူအုပ်ထဲတွင် ပုန်းအောင်းနေပြီး ထွက်ခွာတော့မည့် အချိန်တွင် နောက်မှ လေတိုးသံကို ရုတ်တရက် ကြားလိုက်ရသည်။ ဤဓားသည် သူ့ဆီသို့ လာနေကြောင်းကို သူ မည်သည်ကြောင့် မသိဘဲ နေမည်နည်း။

Chapter 5473

"သေစမ်း..."

ယန်ထုံသည် မျက်မှောင်အတင်းအကြပ်ကြုတ်လိုက်ပြီး သူ၏ခန္ဓာကိုယ်ပေါ်ရှိ အနက်ရောင် မြူခိုးများ ပို၍ပင် ထူထပ်သိပ်သည်းလာသည်။

ထိုအနက်ရောင်မြူခိုးများသည် သူ့ကို ဖုံးလွှမ်းသွားပြီး တခြားနေရာတစ်ခုသို့ ချက်ချင်းပြောင်းရွှေ့သွားနိုင်ရန် အမှန်တကယ် ခွင့်ပြုပေးခဲ့သည်။

သို့ရာတွင် တခြားယန်မိသားစု အစေခံများသည် ထိုမျှထိ ကံမကောင်းခဲ့ကြချေ။ လူသားဧကရာဇ် ဓား၏ ခွဲခြားမှုမရှိသော တိုက်ခိုက်မှုသည် ဖျက်ဆီးနိုင်စွမ်းရှိပေ၏။ ဓားချီ တိုက်ခတ်သွားသည့် နေရာတိုင်းတွင် နက်ရှိုင်းသော တွင်းနက်ကြီးတစ်ခု ချက်ချင်းထွက်ပေါ်လာသည်။

ဘုန်း...

မြေပြင်သည် ဧရာမတွင်းနက်ကြီးဖြစ်အောင် ဆုတ်ဖြဲခံလိုက်ရပြီး ထိုအရာအတွင်းတွင် ပြတ်တောက်နေသော ခြေလက်များ အသွေးအသားစများ ပြန့်ကျဲနေသည်။

"ဟမ့်..."

လုယွီက အေးစက်စွာ နှာမှုတ်လိုက်ပြီး ယန်ထုံ ရှိနေသောနေရာသို့ ချက်ချင်းအပြေးသွားသည်။

ယန်ထုံ၏ခန္ဓာကိုယ်ပေါ်တွင် သူ့ကို လုယွီ၏ လှုပ်ရှားမှုများမှ လွတ်မြောက်စေနိုင်သည့် အရာတစ်ခုခုအား ဖုံးကွယ်ထားပေမည်။

ထိုအရာနှင့်အတူ တခြားအစွမ်းထက်ကျင့်ကြံသူများအပေါ် လုယွီ၏အာရုံစိုက်မှု လျော့နည်းသွားပေ၏။

ယင်လော့ဧကရာဇ်က ပထမဆုံး လှုပ်ရှားလိုက်သည်။ သူသည် မိုးကြိုးများ ထူထပ်သိပ်သည်းသော မှော်သင်္ကေတများဖြင့် ဖုံးလွှမ်းနေသော ဧရာမတူကြီးတစ်လက်ကို ဆင့်ခေါ်လိုက်သည်။ သူ ထိုအရာကို လွှဲယမ်းလိုက်သည်နှင့် လေပြင်းများသည် ပတ်ဝန်းကျင်တွင် ပြည့်နှက်သွားပေ၏။

ဘုန်း...

နောက်တခဏတွင် တူကြီးသည် လွှဲယမ်းကျဆင်းလာပြီး လုယွီကို ပြင်းထန်စွာ ရိုက်ခတ်လိုက်သည်။

လုယွီသည် သူ၏လက်ထဲတွင် ထုံကျင်သော တုန်ခါမှုတစ်ခုကို ချက်ချင်းခံစားလိုက်ရသည်။ သူသည် ကြီးမားသောစွမ်းအားကြောင့် မီတာထောင်ပေါင်းများစွာ လွင့်စင်သွားပြီး တော်ဝင်နန်းတော်၏ မြောက်ဘက်တံခါးနံဘေးရှိ မြေပြင်ပေါ်သို့ တိုက်ရိုက်ကျဆင်းသွားသည်။

ဘုန်း... ဘုန်း...

လုယွီ၏ခြေထောက်များသည် လမ်းမရှည်ကြီး၏မြေပြင်ပေါ်သို့ ပြင်းထန်စွာ နင်းချလိုက်ရာ ပြန့်ကျဲနေသော အုတ်ကျောက်တုံးများကို နက်ရှိုင်းသော တွင်းကြီးနှစ်ခုအဖြစ်သို့ ခြေမွှဖျက်ဆီးလိုက်သည်။

"ချင်ဧကရာဇ်က သာမန်လောက်ပဲ ထင်တယ်... အစစ်အမှန် ကျွမ်းကျင်သူတွေနဲ့ တွေ့တဲ့အချိန်မှာ သူ့ရဲ့စွမ်းအားက မလုံလောက်တော့ဘူး..."

ဤမြင်ကွင်းကို မြင်တွေ့ချိန်၌ ကြည့်ရှုနေသူ အမြောက်အများသည်လည်း စိတ်သက်သာရာရသွားကာ သက်ပြင်းချလိုက်ကြ၏။

အကယ်၍ လုယွီသာ ထိုကဲ့သို့ ငယ်ရွယ်သော အသက်အရွယ်တွင် ယန်မိသားစုကို သူတစ်ယောက်တည်းဖြင့် ဖျက်ဆီးနိုင်ပါက ထိုအရာမှာ အမှန်တကယ်ကို ကြောက်စရာကောင်းပေလိမ့်မည်။

ယန်မိသားစုသည် ရှေးဟောင်းခေတ်မှ ထိပ်သီးမိသားစုတစ်စုဖြစ်ပြီး တော်ဝင်မြို့တော်၏ ထိပ်သီးမိသားစုရှစ်စုထက်ပင် ရှေးကျသော အမွေအနှစ်တစ်ခုရှိကြောင်း သိထားရပေမည်။ ထိုကဲ့သို့ ထိပ်သီးမိသားစုကြီးတွင် နက်ရှိုင်းသော အခြေခံအုတ်မြစ်များရှိပြီး လုယွီတစ်ယောက်တည်းဖြင့် ကိုင်တွယ်ဖြေရှင်းနိုင်သည့်အရာမျိုး မဟုတ်ချေ။

"ဒါပေမဲ့ ယန်မိသားစုကလည်း ဒီတိုက်ပွဲမှာ အကြီးအကျယ် ဆုံးရှုံးမှုတွေ ခံစားခဲ့ရတယ်... ယန်ဟွမ်းလို ပါရမီရှင်တောင် သေသွားတယ်... အပြန်အလှန် ပျက်စီးစေတဲ့ ရလဒ်လို့ ပြောလို့ရတယ်..."

တစ်စုံတစ်ယောက်က မှတ်ချက်ပေးလိုက်၏။

သို့သော် ဤစကားများ ထွက်ပေါ်လာသည်နှင့်တပြိုင်နက် ကောင်းကင်ပြသမှု လျှို့ဝှက်မျှော်စင်သခင်ထံမှ ဆန့်ကျင်မှုတစ်ခုကို ချက်ချင်းရရှိခဲ့ပေသည်။

"ဟမ့်... မင်း ဘာသိလို့လဲ... ငါမြင်တာကတော့ယန်မိသားစု ပိုပြီးထွန်းကားလာတော့မှာကိုပဲ..."

ကောင်းကင်ပြသမှု လျှို့ဝှက်မျှော်စင်သခင်က ယုံကြည်ချက်ရှိရှိပြုံးပြီး ပြောဆိုလိုက်သည်။

"ယန်မိသားစုက ဒီတစ်ကြိမ်မှာ လူအတော်များများ ဆုံးရှုံးခဲ့ရပေမဲ့ သူတို့က ချင်ဧကရာဇ်ကို ဖိနှိပ်ထားသရွေ့ ... မဟာချင်ရဲ့ အရင်းအမြစ်တွေကို ယန်မိသားစုက ချက်ချင်းသိမ်းပိုက်နိုင်လိမ့်မယ်... ယန်မိသားစုက မဟာချင်ကို ဝါးမျိုပြီးတာနဲ့ သူတို့က နယ်မြေကြီးနှစ်ခုကို လွှမ်းခြုံထားတဲ့ ဧရာမ ထိပ်သီးမိသားစု ဖြစ်လာပြီးတော့ လောကကြီးမှာ ပြိုင်ဘက်ကင်း ဖြစ်လာလိမ့်မယ်... ယန်မိသားစုရဲ့ပြိုင်ဘက်ဆိုလို့ ဘယ်သူမှ ရှိလာမှာ မဟုတ်ဘူး..."

ဤသည်ကိုကြားချိန်၌ လူများအားလုံး အံ့အားသင့်သွားကြသည်။ အကယ်၍ ထိုအရာသာ အမှန်တကယ် ဖြစ်ခဲ့ပါက ယန်မိသားစုသည် ဒဏ္ဍာရီလာ ထိပ်သီးမိသားစုတစ်ခုကို အမှန်တကယ် ဖန်တီးနိုင်ပေလိမ့်မည်။

တိုက်ပွဲမြေပြင်တွင် အရာအားလုံးမှာ မျက်တောင်တစ်ခတ်စာ အချိန်အတွင်း၌ ပြောင်းလဲနေလေပြီ။

လုယွီ ကျဆင်းလာသည်ကို မြင်တွေ့ချိန်၌ လူအိုကြီးများသည် ရူးသွပ်စွာ ရယ်မောလိုက်ကြပြီး သူတို့၏ ဆိုးညစ်သော ရယ်မောသံများက အရပ်မျက်နှာအဘက်ဘက်တွင် ပဲ့တင်ထပ်သွားပေ၏။

"ဟား ဟား ဟား... ချင်ဧကရာဇ်... မင်းမှာလည်း ဒီလိုနေ့မျိုး ရှိတာပဲ..."

"ပြိုင်ဘက်ကင်း ပါရမီရှင်ဆိုတာက ဟာသပြက်လုံးတစ်ခု သက်သက်ပဲ... ငါတို့ယန်မိသားစုရဲ့ အခွင့်အာဏာက သံသယဖြစ်စရာ မလိုဘူး..."

ထိုလူအိုကြီးများသည် သူတို့၏အစွမ်းထက်ဆုံး နည်းစနစ်များကို တစ်ခုပြီးတစ်ခု ထုတ်ဖော်ကာ လုယွီကို ဝိုင်းရံတိုက်ခိုက်ကြသည်။

လုယွီသည် ခြေတစ်လှမ်းချင်း နောက်ဆုတ်ကာ မတူညီသော မှော်နည်းစနစ်များကို ကာကွယ်ရန် သူ၏လက်ကို မြှောက်လိုက်သော်လည်း သူ၏ မျက်နှာပေါ်တွင် ထိတ်လန့်မှု အရိပ်အယောင် အနည်းငယ်မျှ မရှိချေ။

သူ၏ပစ်မှတ်မှာ ယန်ထုံပင်။

လုယွီသည် လေးကြိုးမှ လွှတ်လိုက်သော မြှားတစ်စင်းကဲ့သို့ဖြစ်နေပြီး သူ၏ခန္ဓာကိုယ်တစ်ခုလုံး အနက်ရောင်အရိပ်တစ်ခုအဖြစ် ပြောင်းလဲသွားကာ ယန်ထုံ၏အနီးသို့ ရောက်ရှိလာပေ၏။

"သူ့ရဲ့ ပစ်မှတ်က ငါပဲ..."

လုယွီ ပြေးဝင်လာသည်ကို မြင်တွေ့ချိန်၌ ယန်ထုံ၏စိတ်နှလုံးသား ရပ်တန့်လုနီးပါး ဖြစ်သွားသည်။

သူ၏မျက်နှာအမူအရာမှာ အလွန်အမင်း တင်းမာခက်ထန်နေသည်။ အနက်ရောင်မြူခိုးများသည် သူ၏ခန္ဓာကိုယ်ကို ဖုံးလွှမ်းသွားပြီး သူသည် နောက်တစ်ကြိမ် ပြောင်းရွှေ့ရန် ဟန်ပြင်လိုက်၏။

"မင်း... မသွားနဲ့..."

လုယွီ၏အေးစက်စက်အသံ ထွက်ပေါ်လာသည်။ လုယွီက ရုတ်တရက် လက်ကို ဆန့်တန်းကာ ရှေ့သို့ဖိနှိပ်လိုက်သည်အား သူ မြင်လိုက်ရသည်။

ပိတ်ဆို့ထားသော လေဟာနယ်တစ်ခုက ယန်ထုံကို ထိုနေရာအတွင်းတွင် ချက်ချင်းချိတ်ပိတ်လိုက်သည်။ သူ အံ့အားသင့်သွားချိန်တွင် သူသည် သန့်စင်ယန်မျှော်စင်ထဲသို့ ယူဆောင်ခြင်းခံလိုက်ရပေ၏။

နောက်တခဏတွင် ယင်လော့ဧကရာဇ်သည် အစွမ်းထက်သူဆယ်ဦးနှင့်အတူ ရောက်ရှိလာသည်။ လွှမ်းမိုးချုပ်ကိုင်နိုင်သော စွမ်းအားများသည် ရုတ်တရက်​ ပြင်းထန်စွာ တိုက်ခိုက်လာပြီး ထိုစွမ်းအားသည် အံ့အားသင့်ဖွယ်ကောင်းကာ လုယွီ မတ်တတ်ရပ်နေသည့် နေရာကို နောက်တစ်ကြိမ် ဖုံးလွှမ်းသွားသည်။

ဆယ်လီပတ်လည်အတွင်း ပြင်းထန်သော ပေါက်ကွဲမှုတစ်ခု ဖြစ်ပေါ်လာပေ၏။ ဧရာမ မှိုပွင့်ပုံ တိမ်တိုက်ကြီးတစ်ခုသည် ကောင်းကင်ယံသို့ လွင့်မျောသွားပြီး ဖြည်းညှင်းစွာ မြင့်တက်လာသည်။

"ချင်ဧကရာဇ်က သေချာပေါက် သေရမယ်..."

ယင်လော့ ဧကရာဇ်သည် ပုရွက်ဆိတ်တစ်ကောင်ကို သတ်လိုက်ရသကဲ့သို့ တည်ငြိမ်ပြီး သဘာဝကျသော အကြည့်ဖြင့် ဖြည်းညှင်းစွာ ပြုံးလိုက်သည်။

Chapter 5474

ဘုန်း...

ကြမ်းတမ်းသော ပေါက်ကွဲမှု အရှိန်အဝါသည် လေထဲတွင် လွင့်မျောနေပေ၏။

အစွမ်းထက်ကျင့်ကြံသူ ဆယ်ယောက်ကျော်သည် တပြိုင်နက်တည်း တိုက်ခိုက်ခဲ့ကြပြီး လုယွီကို နေရာတွင် သတ်ပစ်ရန် ရည်ရွယ်ကာ သူတို့၏စွမ်းအားများကို နေရာတစ်ခုတည်း၌ စုစည်းလိုက်ကြသည်။

လေပေါ်ကျွန်းသည် ပြင်းထန်စွာ စတင်၍တုန်ခါလာပြီး ပြုတ်ကျမည့် အန္တရာယ်၌ ရှိနေသည်။ ဤလေပေါ်ကျွန်းပေါ်တွင် တည်ဆောက်ထားသော တော်ဝင်နန်းတော်သည်လည်း အချိန်မရွေး ပြိုကျနိုင်သည့် အလားအလာနှင့် ရင်ဆိုင်နေရပြီး အန္တရာယ် ရှိနေပေ၏။

သို့သော် ယန်မိသားစုဝင်များသည် ထိုအရာများကို ဂရုမစိုက်တော့ချေ။ အကယ်၍ သူတို့သာ လုယွီကို သတ်နိုင်ပါက သူတို့ရရှိမည့် ဆုကြေးများမှာ အတိုင်းအဆမသိ ကြီးမားပေလိမ့်မည်။

သာမန်တော်ဝင်နန်းတော်တစ်ခုက မည်သို့ အရေးပါမည်နည်း....

မီးခိုးများနှင့်ဖုန်မှုန့်များ ပြယ်လွင့်သွားသည်နှင့်အမျှ ပိုးသားဝတ်ရုံ ဝတ်ဆင်ထားသော ပုံရိပ်တစ်ခုသည် ရှေ့သို့ ခြေလှမ်းကျဲကြီးများဖြင့် လျှောက်လှမ်းလာပေ၏။

လူများအားလုံး မျက်မှောင်ကြုတ်လိုက်ကြသည်။ ရုတ်ချည်းဆိုသလိုပင် သူတို့သည် ဤဘဝတွင် ဘယ်သောအခါမျှ မေ့ပျောက်နိုင်မည် မဟုတ်သော မြင်ကွင်းတစ်ခုကို မြင်တွေ့လိုက်ရသည်။

လုယွီ၏ခန္ဓာကိုယ်ပေါ်တွင် ကြယ်မြေပုံ အလွှာတစ်ခုဖြင့် ရစ်ပတ်ထားသကဲ့သို့ ကြယ်များ တောက်ပနေပြီး သူ၏ပတ်ဝန်းကျင်ကို အလင်းလွှာတစ်ခုဖြင့် ဖုံးလွှမ်းထားသည်။ ယခင် တိုက်ခိုက်မှုများသည် သူ့ကို အနည်းငယ်မျှပင် ထိခိုက်မှု မရှိခဲ့ချေ။

အကယ်၍ တစ်ယောက်ယောက်က သေချာ ကြည့်မည်ဆိုပါက ဤအရာမတိုင်မီ လုယွီ၏ခန္ဓာကိုယ်သည် မြူခိုးလွှာတစ်ခုဖြင့် ဖုံးလွှမ်းနေပုံရသည်။ သို့ရာတွင် ယခုအချိန်၌ ထိုမြူခိုးလွှာသည် တဖြည်းဖြည်း ပျောက်ကွယ်သွားပြီး သူ၏ပုံရိပ်မှာလည်း ပို၍ပီပြင်ရှင်းလင်းလာသည်။

"ငါ့ဆီမှာ မြေအောက်လောက အသူရာနန်းတော် ရှိတယ်... သူတို့ ငါ့ကို မထိခိုက်စေနိုင်သေးဘူး..."

တိုက်ခိုက်မှုများအားလုံး သူ့ဆီသို့ ရောက်ရှိလာတော့မည့် အချိန်တွင် လုယွီသည် သူ၏ရုပ်ခန္ဓာကိုယ်ကို မြေအောက်လောက အသူရာနန်းတော်အတွင်းသို့ ဝင်ရောက်စေပြီး သေစေလောက်သော ထိုးနှက်ချက်ကို ချက်ချင်းရှောင်တိမ်းလိုက်၏။

သဲတစ်ပွင့်...ကမ္ဘာတစ်ခု...

စိတ်ကြိုက်ပြောင်းလဲခြင်း....လေဟာနယ် လှည့်ပတ်ခြင်း...

ဤနည်းလမ်းသည် မိုးကောင်းကင်ကို အန်တုနိုင်လုနီးပါး ဖြစ်သော်လည်း ကန့်သတ်ချက်များ ရှိပြီး မှော်စွမ်းအားအမြောက်အများ လိုအပ်သည်။ လုယွီ၏ ကောင်းကင်အရှင်သခင် မှော်စွမ်းအားပင်လျှင် တစ်ဝက်ခန့် လျော့ကျသွားမည်ဖြစ်ရာ ထိုနည်းလမ်းကို အချိန်ကြာမြင့်စွာ အသုံးပြုရန် မဖြစ်နိုင်ချေ။

သို့ရာတွင် ယခုအချိန်၌ သူသည် ယန်ထုံကို ဖမ်းဆီးထားပြီးဖြစ်သဖြင့် သူ၏ရှေ့ရှိ ဤလူများကို ကောင်းမွန်စွာ ကိုင်တွယ်ဖြေရှင်းနိုင်လေပြီ။

လုယွီ၏အရှိန်အဝါသည်လည်း တဖြည်းဖြည်း မြင့်တက်လာပြီး အထွတ်အထိပ်သို့ ရောက်ရှိသွားပေ၏။

ကောင်းကင်အရှင်သခင်၏ အရှိန်အဝါ ထွက်ပေါ်လာပြီး အတုအယောင်အင်မော်တယ်များအားလုံးကို ချက်ချင်းလွှမ်းမိုးသွားသည်။ အဆင့်မြင့် တာအိုသခင်များဖြစ်ကြသော လူအိုကြီးတချို့ပင်လျှင် ချွင်းချက်မဟုတ်ချေ။

လုယွီ ထိုအချိန်က ယန်ကျန်းချင်းကို ရင်ဆိုင်ခဲ့စဉ်က သူသည် ခြေတစ်လှမ်းချင်း ရှုံးနိမ့်လုနီးပါး ဖြစ်ခဲ့သည်။ အကြောင်းအရင်းမှာ ထိုအချိန်က သူသည် မြေကမ္ဘာအင်မော်တယ်တစ်ဦးသာ ဖြစ်သောကြောင့်ပင်။

သို့သော် ကောင်းကင်အရှင်သခင်အဆင့်သို့ ရောက်ရှိခြင်းမှာ လောကကြီးတစ်ခုအလား ကွာခြားချက်ပင်။ ဤအဆင့်မြင့် တာအိုသခင်များအပေါ် ဖိနှိပ်ရာ၌ အကျိုးသက်ရောက်မှုကို အမှန်တကယ် ဖြစ်ပေါ်စေခဲ့သည်။

"ဒီလိုနည်းနဲ့ မင်းတို့ ငါ့ကို သတ်နိုင်မယ်လို့ ထင်နေတာလား..."

လုယွီ၏မျက်လုံးများမှ အန္တရာယ်ရှိသော အလင်းတန်းတစ်ခု ထွက်ပေါ်လာပြီး သူ၏ အကြည့်ကို လူအနည်းငယ်အပေါ် ထိန်းချုပ်မှုမရှိဘဲ လွှမ်းခြုံသွားစေ၏။

ယင်လော့ဧကရာဇ်က မျက်မှောင်ကြုတ်လိုက်သည်။ သူသည် စကားအပိုမပြောဘဲ သူ၏လက်ထဲရှိ ဧရာမတူကြီးသည် မှော်စွမ်းအားဖြင့် ထိန်းချုပ်ထားကာ လုယွီဆီသို့ ချက်ချင်း ပြင်းထန်စွာ ရိုက်ချလိုက်သည်။ တစ်ချိန်တည်းမှာပင် ယင်လော့ဧကရာဇ်၏နောက်ရှိ ယန်မိသားစုမှ ထိပ်တန်းကျွမ်းကျင်သူဆယ်ဦးသည်လည်း လုယွီကို ခြေမွှဖျက်ဆီးရန်အတွက် သူတို့၏ နည်းလမ်းများကို အသုံးပြုရန် ပြင်ဆင်နေကြသည်။

"သူ သေချာပေါက် သေပြီ..."

လူအိုကြီးတစ်ဦးက ကျယ်လောင်စွာ အော်ဟစ်ရယ်မောလိုက်၏။

သို့သော် နောက်တခဏတွင် သူ၏ နောက်ကွယ်တွင် အနက်ရောင် မြူခိုးများ ထွက်ပေါ်လာပြီး ထိုလူ၏လည်ပင်းကို ရက်စက်ကြမ်းကြုတ်စွာ ဖမ်းဆုပ်လိုက်သည်။

"မင်းက အတွေးလွန်နေတာပဲ..."

လုယွီက အေးစက်တင်းမာစွာ ပြောလိုက်သည်။ သူ၏လက်ကို မြှောက်ကာ ဖမ်းဆုပ်လိုက်ခြင်းဖြင့် ထိုလူ၏လည်ပင်း ကျိုးသွားပြီး စိတ်ဝိညာဉ်ကိုပင် သန့်စင်ယန်မျှော်စင်က ယူဆောင်သွားသည်။

ယန်မိသားစု၏ လူအိုကြီးတစ်ဦးသည် ဤသို့ဖြင့် ကျဆုံးသွားခဲ့လေပြီ။

"ဒါက ဘယ်လို အမြန်နှုန်းမျိုးလဲ... အံ့အားသင့်စရာကောင်းလောက်အောင် မြန်တယ်..."

ကျန်ရှိနေသော လူအိုကြီးများသည် ချက်ချင်း တုံ့ပြန်ခဲ့ကြပြီး လုယွီကို တားဆီးရန်အတွက် ရည်ရွယ်ကာ သူတို့၏သက်ဆိုင်ရာ နယ်မြေများကို ထုတ်လွှတ်လိုက်ကြသည်။

သူတို့အားလုံးသည် အတွေ့အကြုံရှိသူများပင်။ လုယွီ လှုပ်ရှားသည်ကို မြင်တွေ့ချိန်၌ သူ တန်ပြန်တိုက်ခိုက်ရန် ဟန်ပြင်နေကြောင်း ချက်ချင်းသိလိုက်သည်။

"အရမ်း နှေးတယ်... အရမ်း နှေးတယ်..."

လုယွီသည် ဤအရာအားလုံးကို မြင်တွေ့ခဲ့ပြီး သူ၏မျက်လုံးများတွင် အေးစက်မှု အရိပ်အယောင်တစ်ခု ဖြတ်ပြေးသွားပေ၏။

သူ၏ခန္ဓာကိုယ်သည် ထိတ်လန့်ဖွယ်ကောင်းသော မိုးကြိုးအလား မြန်ဆန်သည်။ မှိတ်တုတ်မှိတ်တုတ်ဖြစ်နေသော ပုံရိပ်ယောင်များကြားတွင် သူသည် ရှင်သန်နေသော အသက်များကို အဆက်မပြတ် ရိတ်သိမ်းနေသည်။

အနှစ်နှစ်ဆယ်ကျော် ကုန်ဆုံးသွားသော်လည်း ယန်မိသားစု၏အစွမ်းထက်သူ အမြောက်အများသည် အနည်းငယ်မျှပင် တိုးတက်လာခြင်း မရှိချေ။

ဘုန်း...

နောက်ထပ် ကျယ်လောင်သော ပေါက်ကွဲသံတစ်သံ ပဲ့တင်ထပ်သွားသည်။ လူအိုကြီးတစ်ဦးသည် မိုးကြိုးကဲ့သို့ လျှင်မြန်ပြင်းထန်သော ထိုးနှက်ချက်တစ်ခုကို ခံစားလိုက်ရပြီး အမြင့်မှ ကျဆင်းလာပေ၏။

"အဲ့ဒါက သရဲဘုရင်တစ်ပါးပဲ... သူက လွန်ခဲ့တဲ့ နှစ်တစ်ရာလောက်က ပြိုင်ဘက်ကင်း အစွမ်းထက်သူ တစ်ယောက် ဖြစ်ခဲ့တယ်.... နောက်ပိုင်းမှာ သူက ယန်မိသားစုရဲ့ မွန်းစတားအိုတစ်ယောက် ဖြစ်လာခဲ့တယ်...အခု သူက တကယ်ကြီး သေသွားပြီ..."

လူတိုင်း ထိတ်လန့်သွားကြသည်။ လုယွီသည် ရုတ်တရက် တန်ပြန်တိုက်ခိုက်မှုတစ်ခု စတင်ခဲ့ပြီး တိုက်ပွဲ၏အခြေအနေကို ချက်ချင်း ပြောင်းလဲလိုက်သည်။

သို့သော် အံ့အားသင့်ဖွယ် အသံများ မပျံ့နှံ့မီ နောက်ထပ် လူအိုကြီးတစ်ဦး သေဆုံးသွားကာ သူ၏ရင်ဘတ်ကို လူသားဧကရာဇ်ဓားဖြင့် ထိုးဖောက်ခံရပြီး သွေးများဖြာကျလာသည်။

"တောက်... ချင်ဧကရာဇ်... မင်း ငါ့ကို မျက်နှာချင်းဆိုင် တိုက်ခိုက်ရဲလား..."

လူအိုကြီးများအနက် အသန်မာဆုံးဖြစ်သော ယန်မိသားစု၏ သတ္တမဘိုးဘေးသည် သူ၏ စွမ်းအားများကို ထုတ်လွှတ်လိုက်ရာ သူ၏ အသံက အရပ်မျက်နှာအဘက်ဘက်သို့ ပျံ့နှံ့သွားပေ၏။

နောက်တခဏတွင် တည်ငြိမ်သော အသံတစ်သံက သူ၏နားအနီးတွင် ထွက်ပေါ်လာသည်။

"မင်းရဲ့ဆန္ဒ အတိုင်းပဲ..."

အနက်ရောင် မြူခိုးများ တဖြည်းဖြည်းပြယ်လွင့်သွားသည်။ လုယွီသည် လေဟာနယ်ကို ဖြတ်သန်းလာပြီး သူ၏မျက်လုံးများ အေးစက်တင်းမာနေပေ၏။

သူသည် လက်ကိုမြှောက်ကာ လက်ဝါးတစ်ချက် ရိုက်ထုတ်လိုက်သည်။ သူ၏လက်သီးသည် ရွှေရောင်အလင်းလွှာတစ်ခုဖြင့် ဖုံးအုပ်ထားသည့်အလား တောက်ပလင်းလက်နေသည်။

"အသူရာ ငရဲနယ်မြေ..."

ယန်မိသားစု၏ သတ္တမဘိုးဘေးသည် လုယွီ ထွက်ပေါ်လာသည်ကို မြင်တွေ့ချိန်၌ အလွန်ဝမ်းသာသွားသည်။ ကြီးမားကျယ်ပြန့်သော မှော်စွမ်းအားများသည် သူ၏နောက်တွင် အလင်းစက်ဝန်းများအဖြစ် စုစည်းသွားပြီး ရာနှင့်ချီကာ သိပ်သည်းစွာ စုပုံနေသည်။

သူသည် ပြင်းထန်စွာ တိုက်ခိုက်လိုက်၏။ သူ၏ လက်ဝါးမှ သရဲများ ငိုကြွေးကာ ဝံပုလွေများ ဟိန်းဟောက်နေသည့် ကြီးမားကျယ်ပြန့်သော အသံများ ထွက်ပေါ်လာပြီး ထောင်နှင့်ချီသော မကောင်းဆိုးဝါး စိတ်ဝိညာဉ်များသည် သူ၏ လက်ဝါးအတွင်း၌ ဖုံးကွယ်နေကာ နာကျင်စွာ အော်ဟစ်နေသည့်အလားပင်။

ဤသည်မှာ ဥပဒေသ နှစ်ဆယ်ကျော်ကို နားလည်သဘောပေါက်ထားသော အဆင့်မြင့် တာအိုသခင် တစ်ဦးပင်။ သူ၏ကျင့်ကြံဆင့်စွမ်းအား မိုးထိမြင့်မားပြီး သူ၏အစွမ်းထက်ဆုံး နည်းလမ်းကို ချက်ချင်းထုတ်ဖော်လိုက်သည်။

ဘုန်း...

သူတို့၏လက်သီးများနှင့်လက်ဝါးများ တွေ့ဆုံကာ ပြင်းထန်စွာ ရိုက်ခတ်သွားကြ၏။

အလွန်ကျယ်လောင်အသံကြီးသည် နားကွဲလောက်အောင်ဖြစ်ပြီး အချိန်အတော်ကြာ ပဲ့တင်ထပ်နေသည်။ နံဘေးမှ ကြည့်နေသူ အမြောက်အများ၏နားစည်များ စုတ်ပြဲလုနီးပါး ဖြစ်သွားပြီး ခဲယဉ်းစွာ ခုခံရန် သူတို့၏မှော်စွမ်းအားများကို အလျှင်အမြန် လှည့်ပတ်လိုက်ကြသည်။

သူတို့နှစ်ဦးကြားရှိ ထိပ်တိုက်ရင်ဆိုင်မှုက ပတ်ဝန်းကျင်ရှိ လေဟာနယ်ကို တွန့်လိမ်သွားစေသည်။ ကြမ်းတမ်းသော အရှိန်အဝါများသည် အရပ်မျက်နှာအဘက်ဘက်သို့ ပျံ့နှံ့သွားပြီး လူအများ၏ကျောရိုးတလျှောက် ချမ်းစိမ့်သွားစေပေ၏။

လက်ဖက်ရည်တစ်ခွက် ဖျော်စပ်သည့် အချိန်ခန့်ကြာအောင် တိုက်ခိုက်ပြီးနောက် ပြတ်တောက်နေသော လက်တစ်ဖက် ပျံ့လွင့်လာသည်။ သူတို့၏တိုက်ပွဲသည် ထိုကဲ့သို့ ပြင်းထန်သော အခြေအနေသို့ ရောက်ရှိနေပြီဖြစ်ကြောင်း သိလိုက်ရသဖြင့် လူများအားလုံး အလွန်အမင်း ထိတ်လန့်သွားကြသည်။

ဖုန်မှုန့်များ ငြိမ်သက်သွားချိန်၌ လူအမြောက်အများသည် သူတို့၏နတ်ဘုရားစိတ်အာရုံကို အလျှင်အမြန် ထုတ်လွှတ်လိုက်ကြရာ သတ္တမဘိုးဘေး၏ခေါင်းကို လုယွီက ယူဆောင်သွားကြောင်း တွေ့ရှိလိုက်ရသည်။

ဂုဏ်သရေရှိ ယန်မိသားစု၏ အစွမ်းထက်ဆုံးသူသည် မျက်လုံးများ ပြူးကျယ်နေပြီး သေဆုံးပြီးနောက်တွင်ပင် ငြိမ်းချမ်းစွာ အနားမယူနိုင်ခဲ့ချေ။

"သတ္တမဘိုးဘေး တကယ်ကြီး သေသွားပြီ..."

"သူက သရဲဘုရင်ရဲ့ ကန့်သတ်ချက်ကို ချိုးဖျက်နိုင်ခဲ့တာလေ... ငရဲနယ်မြေမှာ သူ့ထက် သာလွန်တဲ့သူ အရမ်းနည်းတယ်... ကောင်းကင်ဘုံနယ်မြေမှာတောင် သူက ထိပ်တန်းတည်ရှိမှု တစ်ခု ဖြစ်လာလိမ့်မယ်... ဒါပေမဲ့ သူက တကယ်ကြီး အသတ်ခံလိုက်ရတာပဲ..."

လူအမြောက်အများသည် မယုံနိုင်သော အော်ဟစ်သံများကို ထုတ်လွှတ်လိုက်ကြ၏။

ကောင်းကင်ပြသမှု လျှို့ဝှက်မျှော်စင်သခင်သည် မတ်တတ်ထရပ်ကာ စူးရှကျယ်လောင်စွာ အော်ဟစ်လိုက်သည်။

"တစ်ယောက်ယောက်က ချင်ဧကရာဇ်ကို ကူညီခဲ့တာပဲ ဖြစ်ရမယ်... ဧကရာဇ် သတိထားပါ..."

သူ၏စကားများကို ယန်မိသားစု၏အစွမ်းထက်ကျင့်ကြံသူ အမြောက်အများက ကြားလိုက်ကြသည်။ သူတို့၏အမူအရာများ အလွန်တည်ကြည်လေးနက်နေပြီး ဤရလဒ်ကို သူတို့လည်း မမျှော်လင့်ထားခဲ့ပုံရသည်။

"သူက အရမ်းသန်မာအားကောင်းတယ်... ငါတို့ သတိထားရမယ်..."

ယင်လော့ဧကရာဇ်က အသံနက်ကြီးဖြင့် ပြောဆိုလိုက်၏။ နောက်ဆုံးတွင် သူသည် အခြေအနေကို စတင်၍ အလေးအနက်ထားလေပြီ။

တခြားလူအိုကြီးများသည်လည်း သူတို့၏ လှောင်ပြောင်မှုများကို ဖယ်ရှားလိုက်ပြီး သူတို့၏အမူအရာများ အလွန်အမင်း တည်ကြည်လေးနက်လာသည်။

"ငါ့ကို ကူညီကြ..."

ယင်လော့ ဧကရာဇ်၏အမိန့်အရ လူများအားလုံးသည် သူတို့၏စွမ်းအားများကို ယင်လော့ ဧကရာဇ်အပေါ်သို့ စုစည်းလိုက်ကြပြီး သူ၏ မှော်စွမ်းအားကို မကြုံစဖူး မြင့်မားသွားစေခဲ့သည်။

"ငရဲနယ်မြေက သက်ရှိတွေ... ငါ့ကို မင်းတို့ရဲ့ နတ်ဘုရားအဖြစ် ကိုးကွယ်ကြစမ်း..."

ယင်လော့ဧကရာဇ်သည် တဖြည်းဖြည်း ရှေ့သို့တက်လှမ်းလာပေ၏။ သူ၏အသံသည် ပို၍ပို၍ ပဲ့တင်ထပ်လာပြီး စစ်မှန်သော နတ်ဘုရား တစ်ပါး သေမျိုးလောကသို့ ဆင်းသက်လာကာ သက်ရှိအားလုံးအား သူ၏ အလိုဆန္ဒကို ကြေညာနေသည့်အလားပင်။

ငရဲနယ်မြေဆယ့်ရှစ်ခုတလျှောက် ပြန့်ကျဲနေသော ယင်လော့နတ်ဘုရားကျောင်း တစ်သန်းသည် တပြိုင်နက်တည်း တုန်ခါသွားကြ၏။ နတ်ဘုရားအသံသည် ကျယ်လောင်ပြီး အတိတ်နှင့် ပစ္စုပ္ပန်ကို တုန်ခါသွားစေသည်။

ယင်လော့ဧကရာဇ်က လက်ချောင်းတစ်ချောင်းကို ဆန့်ထုတ်ကာ လုယွီ၏ရှေ့တွင် ဖြည်းညှင်းစွာ လက်ညှိုးညွှန်လိုက်သည်။ ကြီးမားကျယ်ပြန့်သော နတ်ဘုရား စွမ်းအားများ ကျရောက်လာပြီး သူတို့နှစ်ဦးကြားရှိ လေဟာနယ်ကို လွှမ်းခြုံသွားသည်။

"နတ်ဘုရားနယ်မြေ..."

ဧရာမ ယင်လော့ဓမ္မပုံရိပ်ယောင်ကြီးသည် ကျန်းတစ်သောင်း မြင့်မားပြီး အမွှေးနံ့သာစွမ်းအားများဖြင့် ပြည့်နှက်နေသည်။

ယင်လော့ ဧကရာဇ်၏ နတ်ဘုရား အသွင်အပြင်မှာ တည်ကြည်လေးနက်ပြီး သူ၏အမူအရာမှာ ရိုသေလေးစားဖွယ်ကောင်းသည်။ သူသည် နတ်ဘုရားနယ်မြေသို့ ဆင်းသက်လာပြီး ဤနေရာ၏ တစ်ဦးတည်းသော အုပ်ချုပ်သူ အဖြစ်သို့ ပြောင်းလဲသွားပေ၏။

"ချင်ဧကရာဇ်... ငါ့ရဲ့ နတ်ဘုရားနယ်မြေထဲကို မင်း ဝင်လာတာနဲ့ မင်းက ယုံကြည်သူ တစ်ယောက်ဖြစ်ပြီး ငါ့ကို မင်းရဲ့ သခင်အဖြစ် ကိုးကွယ်ရလိမ့်မယ်..."

ကြီးကျယ်ခမ်းနားသော အသံတစ်သံ ထွက်ပေါ်လာပြီး ယင်လော့ဧကရာဇ်က ပေါ့ပေါ့ပါးပါး ပြောဆိုလိုက်သည်။

"နတ်ဘုရား လမ်းစဉ်က သေးငယ်တဲ့ ကိစ္စ မဟုတ်ဘူး... အဲ့ဒါက ကောင်းကင်နဲ့ မြေကြီးကြားမှာ အနက်ရှိုင်းဆုံး ကျင့်ကြံခြင်းနည်းလမ်း ပဲ... ဒီနေ့ မင်းကို ဖိနှိပ်ဖို့အတွက် ငရဲနယ်မြေက သက်ရှိတွေရဲ့ နတ်ဘုရားစွမ်းအားကို ငါ အသုံးပြုမယ်..."

လုယွီ၏အကြည့် တည်ငြိမ်နေသည်။ သူက အေးစက်တင်းမာစွာ ပြောလိုက်သည်။

"ငရဲနယ်မြေက သက်ရှိတွေရဲ့ယုံကြည်မှုကို ထိန်းချုပ်ဖို့ မင်းမှာ ဘာအရည်အချင်း ရှိလို့လဲ..."

လုယွီက မေးမြန်းသည်။

"ငါက ငရဲနယ်မြေရဲ့ တရားဝင်အုပ်ချုပ်သူ ဖြစ်နေလို့ပဲ..."

ယင်လော့ ဧကရာဇ်က တည်ကြည်လေးနက်စွာ ပြောဆိုလိုက်၏။

"​ဒီနယ်မြေကို အုပ်ချုပ်ဖို့ မြေအောက်လောက နတ်ဘုရားက ငါ့ကို ခန့်အပ်ခဲ့တာ... ဒါက တရားဝင်တယ်... မင်းက တာယွီအင်ပါယာ ကျိုးမိသားစုရဲ့ အခြေခံအုတ်မြစ်ကို လုယူခဲ့တာဖြစ်ပြီးတော့ ငါနဲ့ နှိုင်းယှဉ်လို့ မရဘူး..."

"မြေအောက်လောက နတ်ဘုရားရဲ့ ခန့်အပ်မှုလား..."

လုယွီသည် ရုတ်တရက် ရယ်စရာကောင်းသည်ဟု ထင်လိုက်၏။ ယမမင်းကို ဤကဲ့သို့ ခန့်အပ်မှုမျိုး သူ ပေးခဲ့ဖူးကြောင်းကို မမှတ်မိချေ။

Chapter 5475 ယုံကြည်မှု၏ တန်ပြန်သက်ရောက်ခြင်း

"ကျိုးမိသားစုရဲ့ထီးနန်းကို ငါ လွှဲပြောင်းယူခဲ့တာက အစကတည်းက ကျိုးမိသားစုက ချမှတ်ထားတဲ့ အစီအစဉ်ရဲ့ တစ်စိတ်တစ်ပိုင်းပဲ... မင်း လုံးဝနားမလည်နိုင်ဘူး..."

လုယွီက သူ၏မျက်လုံးများကို မှေးစင်းကာ တည်ငြိမ်သော အသံဖြင့် ပြောဆိုလိုက်၏။

သူ၏ယခင်ဘဝသည် ဧကရာဇ်ကျိုးထျန်းယင်ပင်။ လူအနည်းငယ်သာ ဤအချက်ကို သိထားကြပြီး တခြားသူများကမူ အနည်းငယ်မျှ နားလည်လိမ့်မည် မဟုတ်ချေ။

"ဒီငရဲနယ်မြေမှာ မရေမတွက်နိုင်တဲ့ မကောင်းဆိုးဝါး စိတ်ဝိညာဉ်တွေနဲ့ သက်ရှိတွေ ရှိနေတာ... တရားဝင်မှုဆိုတာက မင်းပြောတဲ့အတိုင်းပဲလို့ မင်း ထင်နေတာလား..."

လုယွီက ပြောဆိုသည်။

ဤစကားကိုကြားချိန်တွင် ယင်လော့ ဧကရာဇ်၏အရှိန်အဝါ ရုတ်တရက် ပြောင်းလဲသွားပြီး သူက သုန်မှုန်နေသော မျက်နှာဖြင့် ပြောဆိုလိုက်၏။

"မင်း ဘာကို ဆိုလိုတာလဲ..."

"ပဉ္စမနယ်မြေမှာ ငါ့ရဲ့ ဓမ္မပုံရိပ်ယောင် ထုတ်ဖော်ခဲ့တာကို မင်းရဲ့လက်အောက်ငယ်သားတွေက မင်းကို ပြောမပြဘူးလား..."

လုယွီ၏အသံ တည်ငြိမ်နေပြီး သူ၏ခန္ဓာကိုယ် တစ်ခုလုံး ရွှေရောင်အလင်းတန်းများဖြင့် တောက်ပနေသည်။

ကြီးကျယ်ခမ်းနားပြီး တည်ကြည်လေးနက်သော မျက်နှာရှိသည့် နတ်ဘုရား ဓမ္မပုံရိပ်ယောင်ကြီးသည် လုယွီ၏နောက်တွင် ရုတ်တရက် ထွက်ပေါ်လာပေ၏။ ထိုဓမ္မပုံရိပ်ယောင်တစ်ခုလုံးသည် အရည်ပျော်နေသော ရွှေဖြင့် သွန်းလုပ်ထားသည့်အလား တောက်ပသော ရွှေရောင်အလင်းတန်းများဖြင့် မျက်စိကျိန်းစရာ ကောင်းနေသည်။ ဧရာမအလင်းစက်ဝန်းကြီးတစ်ခုက ဖြည်းညှင်းစွာ လည်ပတ်နေပြီး ထိုအရာအပေါ်တွင် သရဲတစ္ဆေစာလုံးတချို့ကို ရေးထွင်းထားကာ နက်နဲသိမ်မွေ့ပြီး ခန့်မှန်း၍မရနိုင်ပေ။

"မင်းလည်း နတ်ဘုရားတစ်ပါးပဲ..."

ယင်လော့ဧကရာဇ်၏မျက်နှာပေါ်တွင် အံ့အားသင့်မှု အရိပ်အယောင်တစ်ရပ် ထင်ဟပ်လာသည်။ သူသည် ခြေတစ်လှမ်းချင်း နောက်ဆုတ်သွားပြီး သူ၏မျက်လုံးများတွင် မယုံကြည်နိုင်သော အလင်းတန်းတစ်ခု ထင်ဟပ်လာသည်။

သူ ထုတ်ဖော်ခဲ့သော နတ်ဘုရားနယ်မြေသည် ပြင်းထန်စွာ စတင်၍ လှုပ်ရှားလာပေ၏။ နတ်ဘုရားနယ်မြေအတွင်း နောက်ထပ်နတ်ဘုရား တစ်ပါး ပေါ်လာသည်။ နယ်မြေ နှစ်ခု တိုက်မိပြီး အချင်းချင်း လွှမ်းမိုးကာ လေဟာနယ်သည် တွန့်လိမ်ပြီး ပုံပျက်လာပေ၏။

"မဟုတ်ဘူး... ဒီနတ်ဘုရားက ဘာလို့ နည်းနည်း ရင်းနှီးနေရတာလဲ... ပဉ္စမနယ်မြေမှာ ကိုယ်ထင်ပြခဲ့တာ... မင်းက..."

ယင်လော့ ဧကရာဇ်၏ အသက်ရှူသံများ မြန်ဆန်လာပြီး ကြောက်မက်ဖွယ်ကောင်းသော အတွေးတစ်ခုက သူ၏စိတ်ထဲသို့ ဝင်ရောက်လာသည်။

လုယွီ၏နောက်တွင် ထင်ဟပ်နေသော နတ်ဘုရားပုံရိပ်ယောင်ကို သူ ထပ်မံ၍ ကြည့်ရှုလိုက်သည်။ ဤဘဝ၏ အသွင်ပြောင်းမှုပြီးနောက် သူ၏ဓမ္မပုံရိပ်ယောင်တွင် ငရဲနယ်မြေ၏ မကောင်းဆိုးဝါးစွမ်းအားများ လုံးဝမရှိဘဲ မြင့်မြတ်ပြီး တောက်ပလာခဲ့သည်။ ထိုဓမ္မပုံရိပ်ယောင်သည် တောက်ပမှုများဖြင့် လင်းလက်နေပြီး အလွန်အမင်း ဖိနှိပ်ချုပ်ကိုင်နိုင်ပေ၏။

"မင်းက မြေအောက်လောက နတ်ဘုရားပဲ..."

ယင်လော့ဧကရာဇ်က ဤစကားလုံးများကို ဖြည်းညှင်းစွာ ပြောဆိုလိုက်သည်။

သူ၏စိတ်နှလုံးသား အလွန်အမင်း ထိတ်လန့်တုန်လှုပ်သွားသည်။ ချင်ဧကရာဇ်သည် မည်သည်ကြောင့် ငရဲနယ်မြေကို ဤမျှထိ ပြတ်သားစွာ တိုက်ခိုက်ရကြောင်းကို သူ ရုတ်တရက် နားလည်သဘောပေါက်သွားသည်။

အတိတ်က မြေအောက်လောက တာအိုသခင်သည် သေဆုံးသွားခြင်း မရှိချေ။ လက်ရှိ ချင်ဧကရာဇ်သည် တစ်ချိန်က သူ့ကို မရေမတွက်နိုင်သော အိပ်မက်ဆိုးများ ပေးခဲ့သည့် တည်ရှိမှုကြီးပင်။

"ရွှမ်မင်က မသေသေးဘူး... ကောင်းကင်ဘုံနယ်မြေမှာ မြင့်တက်လာတဲ့ တည်ရှိမှုအသစ်ဖြစ်တဲ့ ချင်ဧကရာဇ်က ရွှမ်မင်ပဲ..."

ယင်လော့ ဧကရာဇ်သည် မရေမတွက်နိုင်သော ဖြစ်နိုင်ခြေများကို တွေးတောလိုက်ပြီး သူ၏စိတ်အတွင်းရှိ မာန်မာနများ ချက်ချင်းဆိုသလိုပင် ခြေမွှဖျက်ဆီးခြင်း ခံလိုက်ရပေ၏။ သူ ဆုတ်ခွာချင်စိတ်များ ပေါက်ဖွားလာကာ ချက်ချင်းထွက်ပြေးရန် ဟန်ပြင်လိုက်သည်။

သို့သော် ဤအချိန်၌ သူ၏နတ်ဘုရားနယ်မြေကို ရုပ်သိမ်းရန် ကြိုးစားခြင်းမှာ မဖြစ်နိုင်တော့ချေ။ နတ်ဘုရားနယ်မြေ၏ အရပ်မျက်နှာအဘက်ဘက်ရှိ လေဟာနယ်သည် ချိတ်ပိတ်ခြင်းခံထားရပြီး တောင့်တင်းအေးခဲသွားသည့်အလားပင်။

မြေအောက်လောက နတ်ဘုရား ဓမ္မပုံရိပ်ယောင်သည် သူ၏လက်ချောင်းကို ဖြည်းညှင်းစွာ မြှောက်ကာ ယင်လော့ဧကရာဇ်အပေါ်သို့ ဖြည်းညှင်းစွာ လက်ညှိုးညွှန်လိုက်၏။

လုယွီသည် မြေအောက်လောက နတ်ဘုရား ဓမ္မပုံရိပ်ယောင်၏အောက်တွင် ထိုင်နေပြီး သူ၏ အသွင်အပြင်မှာ တည်ကြည်လေးနက်ကာ သူ၏ အမူအရာ တည်ငြိမ်အေးဆေးနေသည်။

မြေအောက်လောက နတ်ဘုရား၏မျက်နှာသည် လွယ်ကူသော အသေးအဖွဲ ကိစ္စတစ်ခုကို လုပ်ဆောင်နေသကဲ့သို့ တည်ငြိမ်နေသော်လည်း ထိုမျက်နှာအတွင်းတွင် အမျက်ဒေါသများ ပါဝင်နေပြီး ရှေ့ရှိအရာအားလုံးကို လုံးလုံးလျားလျား ဖျက်ဆီးပစ်ရန် ရည်ရွယ်ထားပေ၏။

"ရွှမ်မင်... မင်းက ဘာလို့ မသေသေးတာလဲ..."

ယင်လော့ဧကရာဇ်သည် ကြေကွဲဖွယ် ညည်းတွားသံတစ်သံကို ထုတ်လွှတ်လိုက်ပြီး သူ၏မျက်နှာပေါ်တွင် အရှုံးမပေးသော အရိပ်အယောင်များဖြင့် ပြည့်နှက်နေပေ၏။

ဤသည်မှာ သူ၏နတ်ဘုရားနယ်မြေ ဖြစ်သည်မှာ ထင်ရှားသော်လည်း လုယွီကို ရင်ဆိုင်ရချိန်တွင် သူသည် ပြန်လည်ခုခံနိုင်စွမ်း အနည်းငယ်မျှပင် မရှိခဲ့ချေ။

ခြေလှမ်းတစ်ဝက် နတ်ဘုရားဘုရင် တစ်ပါးသည် နတ်ဘုရားစွမ်းအားနှင့် ကြီးကျယ်ခမ်းနားမှု အရိပ်အယောင်တစ်ခုကို ပိုင်ဆိုင်ထားသည်။ သူတို့သည် နတ်ဘုရားများ၏ ဘုရင်တစ်ပိုင်းများဖြစ်ပြီး သူတို့၏ဖိအားမှာ လွှမ်းမိုးချုပ်ကိုင်နိုင်ကာ သာမန်နတ်ဘုရားများကို လက်ချောင်းတစ်ချက် တောက်ရုံဖြင့် ဖိနှိပ်နိုင်စွမ်း ရှိပေ၏။

"ဒီအရာကို ငါ လက်မခံနိုင်ဘူး... ငါတို့ ယန်မိသားစုက ငရဲနယ်မြေကို နှစ်တစ်သောင်းကြာ အုပ်ချုပ်ခဲ့တာ... ဘာလို့ အခုအချိန်အထိ မင်းက ငရဲနယ်မြေနဲ့ ကမ္ဘာတစ်သောင်းက သက်ရှိတွေကို ထိန်းချုပ်နိုင်သေးတာလဲ..."

ယင်လော့ ဧကရာဇ်က မလိုလားသော အော်ငေါက်သံကို ထုတ်လွှတ်လိုက်၏။ သူသည် သူ၏နတ်ဘုရား စွမ်းအားကို အသက်သွင်းကာ လုယွီကို တန်ပြန်တိုက်ခိုက်ရန် ဟန်ပြင်လိုက်သည်။

သို့သော် ဤအချိန်၌ ပြင်းထန်သော မီးတောက်တစ်ခုသည် သူ၏ခန္ဓာကိုယ် နံဘေးပတ်လည်တွင် ရုတ်တရက် လောင်ကျွမ်းလာပြီး သူ့ကို ချက်ချင်းဝါးမျိုသွားသည်။

သူသည် သူ၏စွမ်းအားကို မြှင့်တင်ရန်အတွက် သူ၏အခြေခံအုတ်မြစ်အဖြစ် ငရဲနယ်မြေရှိ သက်ရှိများ၏ ယုံကြည်ကိုးကွယ်မှုစွမ်းအားကို အသုံးပြုခဲ့သည်။

သို့ရာတွင် ဤယုံကြည်ကိုးကွယ်မှုစွမ်းအားသည် တန်ပြန်သက်ရောက်နိုင်ပေ၏။

မီး...

သူ မြင်တွေ့ရသမျှ အရာအားလုံးမှာ ပြင်းထန်သော မီးတောက်များပင်။