အခန်း (၁၃-၁၄)

စာစဉ်(၂)

အခန်း(၁၃)

ရွှေဒင်္ဂါးတစ်ပြားဟာ ငွေဒင်္ဂါး ၁၀၀၀ နဲ့ ညီမျှပြီး ငွေဒင်္ဂါးတစ်ပြားကတော့ ကြေးဒင်္ဂါး ၁၀၀၀ နဲ့ တန်ဖိုးတူညီတယ်ဆိုတာကို မိုက်ကယ် သိရှိသွားပါတယ်။

အခြေအနေကို နှိုင်းယှဉ်ကြည့်ရရင် ကက်စတယ်လာနဲ့ ဘတ်တာတို့လို အစေခံမလေးတွေဟာ တစ်လကို ရွှေဒင်္ဂါးတစ်ပြားခန့် လစာရရှိကြပြီး ဒါဟာ ဒီကမ္ဘာမှာတော့ တော်တော်လေးကို များပြားတဲ့ လစာလို့ သတ်မှတ်နိုင်ပါတယ်။ သာမန်လူတွေကတော့ ငွေဒင်္ဂါးနဲ့ ကြေးဒင်္ဂါးတွေကိုပဲ အသုံးပြုပြီး ရှင်သန်ကြရတာဆိုတော့ ရွှေဒင်္ဂါးတစ်ပြား ပိုင်ဆိုင်ထားရင်တောင် တကယ့်သူဌေးလို့ ပြောလို့ရနေပါပြီ။

အကောင်းဆုံးအချက်ကတော့ ဆပ်ပြာလုပ်ဖို့ လိုအပ်တဲ့ ပါဝင်ပစ္စည်းတွေက ကြေးဒင်္ဂါး ရာဂဏန်းလောက်ပဲ ကျသင့်တာပါ။ ဒါကြောင့် အမြတ်ကတော့ တကယ့်ကို အဆမတန် ရရှိမှာ ဖြစ်ပါတယ်။

" နားလည်ပါပြီ၊ ပြောပြပေးလို့ ကျေးဇူးပဲ။ အကယ်၍ ဒါကို ဈေးကွက်ထဲမှာ ရောင်းမယ်ဆိုရင် မင်းကပဲ ပစ္စည်းတွေကို သွားပို့ပေးမှာလား "

မိုက်ကယ်ရဲ့ အမေးကြောင့် ကက်စတယ်လာက ချက်ချင်းပဲ တက်ကြွသွားပါတယ်။

" ဟုတ်ကဲ့ပါ သခင်လေး ကျွန်မအတွက် ဂုဏ်ယူစရာပါပဲ။ ဒီဆပ်ပြာတွေကို ဟိုသခင်မကြီးတွေဆီသာ ရောင်းနိုင်မယ်ဆိုရင်တော့ သူ့ရဲ့နာမည်ကျော်ကြားမှုက တောမီးလောင်သလို ချက်ချင်း ပြန့်နှံ့သွားမှာ သေချာပါတယ် "

မိုက်ကယ်က ခေါင်းညိတ်လိုက်ပါတယ်။ ကပ်စတယ်လ် ပြောပြပုံအရ အဲဒီအမျိုးသမီးတွေဟာ သူတို့ရဲ့ ဇိမ်ခံပစ္စည်းတွေကို ကြွားဝါရတာ ဝါသနာပါတဲ့သူတွေ ဖြစ်ပါတယ်။ သူတို့တွေက ဒီဆပ်ပြာကို သုံးနေတာကို တခြားသူတွေ မြင်သွားတာနဲ့ လူအများက ချက်ချင်းပဲ အားကျလာကြမှာပါ။

ဒီကမ္ဘာမှာတော့ အဲဒီသခင်မကြီးတွေဟာ သူ့ရဲ့အရင်ကမ္ဘာက Influencerတွေရဲ့ အစောပိုင်းပုံစံမျိုးတွေပါပဲ။

" တခြားအစေခံတွေကိုလည်း ခေါ်သွားပြီး ဆပ်ပြာအတွက် လိုအပ်တဲ့ပစ္စည်းတွေ ထပ်ဝယ်လိုက်ဦး။ ပြီးတော့ ထူးခြားတဲ့ ပန်းတွေနဲ့ ဆီတွေကိုလည်း ဝယ်ခဲ့ပါဦး "

အကယ်၍ ရောင်းတော့မယ်ဆိုရင် မိုက်ကယ်က ဆပ်ပြာနဲ့ ခေါင်းလျှော်ရည်ကို အမျိုးအစား အမျိုးမျိုး ဖန်တီးဖို့ ဆုံးဖြတ်ထားပါတယ်။ လူတိုင်းက ပန်းရနံ့ကိုပဲ ကြိုက်ကြတာ မဟုတ်ဘူးလေ။

ကက်စတယ်လာက ခေါင်းညိတ်ပြီး မျက်လုံးထဲမှာ စိတ်အားထက်သန်မှုတွေ ပြည့်နှက်နေရင်း မိုက်ကယ်ရဲ့ အခန်းထဲကနေ ထွက်သွားပါတယ်။

* * * * * * * * *

အခု အခန်းထဲမှာ တစ်ယောက်တည်း ရှိနေတဲ့အချိန်မှာတော့ မိုက်ကယ်က သူ့လက်ထဲက ဂီယာဘီးလေး တစ်ခုကို ကြည့်လိုက်ပါတယ်။

သူ့ရဲ့ ကြယ်နှစ်လုံးအဆင့် မန္တန် ဖြစ်တဲ့ သတ္တုပုံသွင်းခြင်းကို သုံးပြီး သူပြုလုပ်နိုင်တဲ့ အသေးဆုံး ဂီယာကတောင် လူကြီးလက်ဝါးလောက် ရှိနေပါတယ်။ ဒါက သူစိတ်ကူးထားတဲ့ လက်ပတ်နာရီ ဒါမှမဟုတ် အိတ်ဆောင်နာရီတွေ လုပ်ဖို့အတွက်ဆိုရင်တော့ တော်တော်လေးကို ကြီးလွန်းနေပါတယ်။

' လောလောဆယ်တော့ နာရီအကြီးကြီး တစ်လုံးနဲ့ပဲ ကျေနပ်ရတော့မယ် ထင်တယ် ... နိုဗာ၊ စက်မှုနာရီတွေရဲ့ အစောပိုင်းပုံစံက ဘယ်လို အလုပ်လုပ်သလဲဆိုတာကို ငါ့ကို အသေးစိတ် ရှင်းပြပေးနိုင်မလား '

[ သေချာတာပေါ့။ စက်မှုနာရီတွေဟာ အချိန်ကို တိတိကျကျ တိုင်းတာနိုင်ဖို့အတွက် ဂီယာတွေနဲ့ အလေးမတုံးတွေကို ပေါင်းစပ်ပြီး ပုံမှန်လှုပ်ရှားမှုတစ်ခု ဖြစ်ပေါ်အောင် အသုံးပြုထားတာ ဖြစ်ပါတယ် ... ]

သတင်းအချက်အလက်တွေက သူ့ရဲ့ ဦးနှောက်ထဲကို စီးဝင်လာတာနဲ့အမျှ မိုက်ကယ်က ကုတင်ပေါ်မှာ လဲလျောင်းနေပါတယ်။ နာရီတစ်လုံး ဖန်တီးဖို့ လိုအပ်တဲ့ စက်မှုပိုင်းဆိုင်ရာ ဗဟုသုတတွေက တစ်စက္ကန့်အတွင်းမှာ သင်ယူဖို့အတွက် သူ့အတွက်တော့ အလွန်ကို ရှုပ်ထွေးလွန်းလှပါတယ်။

သူဟာ တစ်ညလုံး အချိန်ပေးပြီး အချက်အလက်တွေကို ချေဖျက်ခဲ့ရပြီး နောက်ဆုံးမှာတော့ အင်ဂျင်နီယာတစ်ယောက်လို ကျွမ်းကျင်တဲ့ နားလည်မှုကို ရရှိသွားပါတယ်။

သူက ဒီစီမံကိန်းအတွက် အရမ်းကို စိတ်လှုပ်ရှားနေတာကြောင့် အိပ်လို့တောင် မရသလောက်ပါပဲ။ ကိုယ့်ကိုယ်ကိုယ် ပင်ပန်းသွားအောင် မိုက်ကယ်က တရားမှတ်ပြီး မှော်စွမ်းအင် စုဆောင်းခြင်းကို ပုံမှန်ထက် ပိုမြန်အောင် လုပ်ဆောင်လိုက်ပြီး သူ့ခန္ဓာကိုယ်ကို ပင်ပန်းနွမ်းနယ်သွားစေပါတယ်။

ဒီအချိန်တစ်လျှောက်လုံးမှာ သူက သူ့ခန္ဓာကိုယ်ထဲက ဒြပ်စင် အမြုတေ တွေကို ကြီးထွားလာအောင် လုပ်ဖို့ ပျက်ကွက်ခဲ့တာ မရှိပါဘူး။

အခုဆိုရင် သူ့ရဲ့ စွမ်းအင်ပင်လယ် နားမှာရှိတဲ့ အဓိက ဒြပ်စင်အမြုတေ ၄ ခုဟာ ဝက်သစ်ချစေ့ အသေးစားလေးတွေလောက် အရွယ်ရှိနေပါပြီ။ အဲဒီ အမြုတေတွေထဲမှာ ပါဝင်တဲ့ မှော်စွမ်းအင် ပမာဏဟာ ကြယ်တစ်လုံးအဆင့် မန္တန် တွေကို မပင်မပန်းဘဲ ၁၀ မိနစ်ဆက်တိုက် အသုံးပြုနိုင်ဖို့အတွက် လုံလောက်တယ်ဆိုတာကို သူတွေ့ရှိခဲ့ပါတယ်။

' နိုဗာ၊ ငါ့ရဲ့ မှော်စွမ်းအင် က တခြား မှော်ဆရာ တွေနဲ့ ယှဉ်ရင် ဘယ်လို အခြေအနေ ရှိလဲဆိုတာ ပြောပြနိုင်မလား '

[ တောင်းပန်ပါတယ်။ တိကျတဲ့ နှိုင်းယှဉ်ချက်တစ်ခု ရရှိဖို့အတွက် ကျွန်ုပ် ထံမှာ အချက်အလက်တွေ လုံလောက်အောင် မရှိသေးပါဘူး။ ]

ဒါကတော့ သူ့ရဲ့ မှော်ပညာ ကို လျှို့ဝှက်ထားရခြင်းရဲ့ အားနည်းချက်တစ်ခုပါပဲ။ သူ့ကို မှော်ပညာ ရဲ့ အခြေခံတွေအကြောင်း ပြောပြပေးမယ့် ဆရာလည်း မရှိပါဘူး။

သူက မှော်ပညာ ကို မတတ်မြောက်ထားဘူးလို့ ဟန်ဆောင်ထားရတာကြောင့် အဲဒါတွေနဲ့ ပတ်သက်ပြီး မေးခွန်းလည်း သွားမေးလို့ မရပါဘူး။

ဒါကြောင့် မှော်ပညာ နဲ့ အဲဒါ ဘယ်လိုအလုပ်လုပ်လဲဆိုတဲ့အပေါ်မှာ သူ့ရဲ့ နားလည်မှုက အလွန်ကို အပေါ်ယံပဲ ရှိပါသေးတယ်။

သူက ဒီထက်မက ပိုပြီး သိချင်နေပါတယ်။ တခြား မန္တန် တွေကိုလည်း သင်ယူချင်သလို၊ အဓိက ဒြပ်စင် ၄ မျိုးအပြင် တခြား ဒြပ်စင် တွေရှိသေးလားဆိုတာနဲ့ မန္တန် တွေရဲ့ ကြယ်အဆင့် သတ်မှတ်ချက်တွေကြားက ခြားနားချက်တွေကိုလည်း သိချင်နေမိပါတယ်။

' တစ်ချိန်ချိန်မှာတော့ ငါ့မိဘတွေကို ငါ့ရဲ့ မှော်ပညာ အကြောင်း ထုတ်ပြောရလိမ့်မယ်။ သူတို့ ပြန်လာရင် အမှန်တရားကို ပြောပြပြီးတော့ ရေပိုက်စနစ်ကို ငါ့ရဲ့ မှော်ပညာ နဲ့ လုပ်ခဲ့တာလို့ ပြောလိုက်မယ် '

ဒါကို လုပ်ရတဲ့ သူ့ရဲ့ ရည်မှန်းချက်ကတော့ မှော်ပညာ အကြောင်း ပိုပြီး သင်ယူခွင့်ရဖို့ အကြောင်းပြချက် တစ်ခု ရရှိဖို့ပါပဲ။ သူ့အဖေရဲ့ အကျင့်အတိုင်းဆိုရင် သူ့ကို သိသင့်သမျှ အကုန်သင်ပေးဖို့ ဆရာတစ်ယောက်ကို ချက်ချင်း ငှားပေးမှာ သေချာပါတယ်။

* * * * * * * * *

နောက်တစ်နေ့မှာတော့ မိုက်ကယ်က သူ့ရဲ့ နာရီစီမံကိန်းအတွက် ပထမဆုံး အစိတ်အပိုင်းတွေကို စတင်ပြုလုပ်ပါတော့တယ်။

ဂီယာတွေက တိကျမှု အများကြီး လိုအပ်တာကြောင့် သူက အလောတကြီး မလုပ်ပါဘူး။ အဲလိုမဟုတ်ရင် နာရီက အလုပ်လုပ်မှာ မဟုတ်လို့ပါ။

အဲဒီအတောအတွင်းမှာပဲ သူဟာ အစေခံမလေးအချို့ကို ဈေးကွက်ထဲမှာ ရောင်းမယ့် ဆပ်ပြာနဲ့ ခေါင်းလျှော်ရည်တွေ ဖန်တီးရာမှာ ကူညီဖို့ တာဝန်ပေးထားပါတယ်။

သူက ခေတ်သစ်နည်းလမ်းကို ချက်ချင်း အသုံးချပြီး ရှေးဦးစက်ရုံပုံစံ အသေးစားလေးတစ်ခုကို ဖန်တီးလိုက်ပါတယ်။

အစေခံအချို့က အဓိက ပါဝင်ပစ္စည်းတွေကို ရောစပ်ပြီး အမှုန့်လေးတွေ ဖြစ်အောင် လုပ်ရတယ်၊ နောက်ထပ် အစေခံတွေကတော့ အဲဒါတွေကို ရေနဲ့ ရောရပါတယ်။ အဲဒီနောက်မှာတော့ သူက ဆပ်ပြာပုံစံခွက်တွေ ထပ်လုပ်ပေးပြီး နောက်ထပ် အစေခံတစ်စုကတော့ လှပတဲ့ လေးထောင့်ပုံစံလေးတွေ ရဖို့အတွက် အရောအနှောတွေကို လောင်းထည့်ပေးရပါတယ်။

မိုက်ကယ်က အလုပ်ပိတ်ချိန်မှာ သူတို့အတွက် ဆပ်ပြာနဲ့ ခေါင်းလျှော်ရည်တွေကို ကိုယ်ပိုင် သုံးစွဲဖို့အတွက် ပေးမယ်လို့ ကတိပေးထားတာကြောင့် အစေခံမလေးတွေက ဒီအလုပ်အပေါ်မှာ အလွန်ကို စိတ်အားထက်သန်နေကြပါတယ်။

ဒါ့အပြင် မိုက်ကယ်က သူတို့ရဲ့ လုပ်အားအတွက် အခကြေးငွေအဖြစ် ဒင်္ဂါးအချို့ ပေးမယ်လို့ ပြောခဲ့ပေမဲ့ အစေခံတွေက ချက်ချင်းပဲ ငြင်းဆိုခဲ့ကြပါတယ်။

" မလိုပါဘူး သခင်လေး ပထမဆုံးအနေနဲ့ ကျွန်မတို့က သခင်လေးရဲ့ ဘဝမှာ လိုအပ်တာမှန်သမျှကို ကူညီဖို့ ငှားရမ်းခံထားရသူတွေပါ။ ပြီးတော့ သခင်လေး လုပ်ပေးထားတဲ့ ရေပိုက်စနစ်အတွက်လည်း ကျွန်မတို့က အလွန်ကို ကျေးဇူးတင်နေကြတာပါ။ အဲဒါက ကျွန်မတို့ရဲ့ ဘဝတွေကို ပြောင်းလဲပေးခဲ့ပါတယ်။ ဒီအလုပ်ကို လုပ်ရတာ ကျွန်မတို့အတွက် ဂုဏ်ယူစရာပါပဲ "

" သူတို့ကို လုပ်ခွင့်ပေးလိုက်ပါ သခင်လေး " လို့ ဘတ်တာက မိုက်ကယ်ကို ပြောပါတယ်။

" သခင်လေးရဲ့ တီထွင်မှုတွေအတွက် အစေခံတွေက ဘယ်လောက်တောင် ကျေးဇူးတင်နေကြလဲဆိုတာ သခင်လေး မသိလို့ပါ။ အကယ်၍ သခင်လေးက သူတို့ကို ပိုက်ဆံပေးမယ်ဆိုရင် သူတို့ရဲ့ ကျေးဇူးတင်မှုကို ပြသဖို့ အခွင့်အရေး မရှိသလို ဖြစ်သွားပါလိမ့်မယ် "

သူတို့ရဲ့ စွန့်လွှတ်မှုအတွက် မိုက်ကယ်က အရမ်းကို စိတ်လှုပ်ရှားသွားပေမဲ့ ဒါကို သူ သိပ်သဘောမကျပါဘူး။

သူဟာ သင့်တင့်တဲ့ အလုပ်အတွက် သင့်တင့်တဲ့ လုပ်ခပေးရတဲ့ ကမ္ဘာမှာ ရှင်သန်ခဲ့တာလေ။ ဒါကြောင့် သူတို့က ဒင်္ဂါးတွေကို လက်မခံဘူးဆိုရင်တော့ နောက်ပိုင်းမှာ ပိုပြီး ခေတ်မီတဲ့ တီထွင်မှုတွေနဲ့ပဲ မိုက်ကယ်က သူတို့ကို တုံ့ပြန်ပေးသွားပါတော့မယ်။

* * * * * * * * *

စာစဉ်(၂)

အခန်း(၁၄)

နေ့ရက်တွေဟာ တစ်ရက်ပြီးတစ်ရက် ကုန်ဆုံးသွားခဲ့ပြီး အစေခံမလေးတွေနဲ့ အိမ်စေတွေဟာလည်း နေ့တိုင်း အလုပ်တွေကို ကြိုးကြိုးစားစား လုပ်ကိုင်နေကြပါတယ်။ သူတို့ဟာ အိမ်တော်အတွက် လုပ်ဆောင်ရမယ့် ဝေယျာဝစ္စနဲ့ တာဝန်တွေကို နေ့တစ်ဝက်မကျိုးခင်မှာတင် စောစောစီးစီး အပြီးသတ်လိုက်ကြပြီးတာနဲ့ အိမ်နောက်ဖေးကို ချက်ချင်းသွားပြီး ဆပ်ပြာနဲ့ ခေါင်းလျှော်ရည်တွေကို အစီအရီ ထွက်ပေါ်လာအောင် ဆက်တိုက် ထုတ်လုပ်နေကြတာပါ။

တစ်ဖက်မှာလည်း မိုက်ကယ်ကတော့ သူ့ရဲ့ နာရီစီမံကိန်းကို တည်ဆောက်ဖို့အတွက် အလုပ်ရှုပ်နေခဲ့ပါတယ်။

* * * * * * * * *

အခက်ခဲဆုံးအပိုင်းကတော့ ပြီးဆုံးသွားခဲ့ပါပြီ။ ဂီယာတွေနဲ့ စက်ယန္တရား အစိတ်အပိုင်း အတော်များများကို သူ့ရဲ့ စီမံကိန်းအခန်းထဲမှာ ထုတ်လုပ်ပြီးသား ဖြစ်နေပါပြီ။ သူ နောက်ထပ် အနည်းငယ်လောက်ပဲ ပြန်လည်ချိန်ညှိဖို့ လိုအပ်ပြီး အဲဒါပြီးရင်တော့ အားလုံးကို အချိတ်အဆက်မိမိ တပ်ဆင်လိုက်ရုံပါပဲ။

နောက်ထပ် နှစ်ရက်လောက် ကြာပြီးတဲ့နောက်မှာတော့ သူဟာ လန်ဒန်က ‘Big Ben’ နာရီရဲ့ ပုံစံတူအသေးစားတစ်ခုကို နောက်ဆုံးမှာ ဖန်တီးနိုင်ခဲ့ပါတယ်။

အဲဒါက သစ်သားနဲ့ ပြုလုပ်ထားတဲ့ ဗီရိုတစ်လုံးလောက် ကြီးမားပြီး အလယ်တည့်တည့်မှာ ရိုးရှင်းတဲ့ အဝိုင်းမျက်နှာပြင်တစ်ခု ပါရှိပါတယ်။ နာရီရဲ့ နာရီလက်တံနဲ့ မိနစ်လက်တံတွေက သတ္တုချောင်း အပါးလေးတွေသာ ဖြစ်ပေမဲ့လည်း သူ့ရဲ့ တာဝန်ကိုတော့ ကောင်းကောင်း ထမ်းဆောင်နိုင်မှာပါ။

‘အတွင်းထဲကို ဘယ်သူမှ လာမကြည့်သရွေ့တော့ ကြည့်ပျော်ရှုပျော် ရှိပါတယ်လေ’ လို့ မိုက်ကယ်က ကိုယ့်ကိုယ်ကိုယ် နှစ်သိမ့်လိုက်ပါတယ်။

* * * * * * * * *

သူက ကျွမ်းကျင်တဲ့ လက်မှုပညာရှင် တစ်ယောက် မဟုတ်သေးတာကြောင့် ဒီစီမံကိန်း ပြီးမြောက်ဖို့အတွက် အလုပ်ဖြစ်တဲ့နည်းလမ်းနဲ့ပဲ လုပ်ဆောင်ခဲ့ရတာပါ။ အကယ်၍ တစ်စုံတစ်ယောက်က အတွင်းပိုင်းကို ကြည့်လိုက်မယ်ဆိုရင် ဂီယာတွေနဲ့ ဆွဲကြိုးတွေဟာ ဘယ်လိုမှ အနုပညာမဆန်ဘဲ ရှုပ်ရှုပ်ယှက်ယှက် ဖြစ်နေတာကို တွေ့ရမှာပါ။ ဒါပေမဲ့ သူကတော့ စက်ယန္တရား အားလုံးကို သူဖြစ်စေချင်တဲ့အတိုင်း အလုပ်လုပ်အောင် သေချာပြင်ဆင်ထားပါတယ်။ အလုပ်လုပ်ဖို့ပဲ မျှော်လင့်ရတာပေါ့။

‘အလုပ်လုပ်တယ်ဆိုရင်ပဲ ဘယ်လိုပုံစံပဲဖြစ်ဖြစ် အရေးမကြီးပါဘူး’

ဒီနာရီရဲ့ အားသာချက်ကတော့ ဘာစွမ်းအင်မှ မလိုအပ်တာပဲ ဖြစ်ပါတယ်။ အားနည်းချက်ကတော့ တစ်နေ့တစ်ကြိမ် သံပတ်ကို လှည့်ပြီး အားပေးရမှာပါ။ အဲဒီလို လှည့်လိုက်ရင် အတွင်းထဲက အလေးတုံးက ဖြည်းဖြည်းချင်း နိမ့်ဆင်းသွားပြီး နာရီလက်တံတွေကို ပုံမှန်နာရီတစ်လုံးလို ရွေ့လျားစေမှာ ဖြစ်ပါတယ်။

မိုက်ကယ်က နာရီရဲ့ ဘေးဘက်ကို လျှောက်သွားပြီး သူတပ်ဆင်ထားတဲ့ သံပတ်ပေးတဲ့တံကို စတင်လှည့်လိုက်ပါတယ်။

လည်ပတ်တံရဲ့ တင်းအားက သူ့ရဲ့ အကန့်အသတ်ကို ရောက်သွားတဲ့အခါမှာတော့ ကျေနပ်စရာကောင်းတဲ့ အသံတစ်ခု ထွက်ပေါ်လာခဲ့ပါတယ်။

* * * * * * * * *

ဒါကတော့ တကယ့် အဆုံးအဖြတ်ပေးမယ့် အချိန်ပါပဲ။

မိုက်ကယ်က သံပတ်တံကို လွှတ်လိုက်တဲ့အခါမှာတော့၊

နာရီလက်တံတွေက စက္ကန့်အလိုက် ရွေ့လျားသွားပြီး နာရီထဲကနေ စည်းချက်ကျကျ အသံတွေ ထွက်ပေါ်လာပါတော့တယ်။

မိုက်ကယ်ရဲ့ မျက်နှာပေါ်မှာ ကျေနပ်ပီတိတွေ လွှမ်းမိုးသွားပါတယ်။ ဖန်တီးရတာ ခက်ခဲခဲ့ပေမဲ့လည်း အခုလို အောင်မြင်သွားတာက တကယ်ကို တန်ဖိုးရှိပါတယ်။

“သခင်လေး၊ အဲဒါက ဘာကြီးလဲဟင် ”

မိုက်ကယ် မသိလိုက်ဘဲ သူ့ရဲ့ နောက်မှာ အစေခံမလေးတွေနဲ့ အိမ်စေတွေ အများကြီး စုရုံးရောက်ရှိနေကြပါပြီ။ သူတို့ဟာ စည်းချက်ကျကျ ‘တောက်တောက်’ အသံတွေ မြည်နေတဲ့ ဗီရိုကြီးကို ကြည့်ပြီး ပြင်းပြတဲ့ စူးစမ်းလိုစိတ်တွေနဲ့ မျက်လုံးတွေ တောက်ပနေကြပါတယ်။

* * * * * * * * *

“အားလုံး နားထောင်ကြ။ ဒါကို နာရီလို့ ခေါ်တယ်။ အဲဒါကို အပိုင်း ၁၂ ပိုင်း ခွဲထားပြီး အပိုင်းတိုင်းက တစ်နာရီစီကို ကိုယ်စားပြုတယ်...”

မိုက်ကယ်က နာရီတွေ ဘယ်လို အလုပ်လုပ်သလဲဆိုတာကို အရှည်ကြီး ရှင်းပြနေပေမဲ့ မျှော်လင့်ထားသလိုပါပဲ၊ နာရီဆိုတာကို တစ်ခါမှ မမြင်ဖူးတဲ့ လူတွေအတွက်တော့ နားလည်ဖို့ တော်တော်လေး ခက်ခဲနေပါတယ်။ တကယ်တော့ သူ့ရဲ့ အရင်ကမ္ဘာက လူတွေတောင် နာရီကို တစ်သက်လုံး မြင်ဖူးနေကြပေမဲ့ နာရီကြည့်ဖို့ ခက်ခဲနေတတ်ကြတာပဲလေ။

“ဒီလက်တံက နောက်မျဉ်းတစ်ကြောင်းကို ရွေ့သွားမယ်ဆိုရင် ဖယောင်းတိုင်တစ်တိုင် ကုန်ဆုံးသွားတဲ့ အချိန်နဲ့ အတူတူပဲ”

ဒီကမ္ဘာက လူတွေ အချိန်တိုင်းတာလေ့ရှိတဲ့ ဖယောင်းတိုင်နဲ့ နှိုင်းယှဉ်ပြီး ပြောပြလိုက်တဲ့အခါမှာတော့ သူတို့တွေ ချက်ချင်းပဲ နားလည်သွားကြပါတယ်။

“ကျွန်တော်တို့ နားလည်ပါပြီ သခင်လေး ”

“အိုး... သခင်လေးဆီက နောက်ထပ် တီထွင်မှုတစ်ခုပေါ့... သူက တကယ်ကို ဉာဏ်ကောင်းလွန်းတယ်”

စိတ်မကောင်းစရာကတော့ နာရီက ဘယ်လောက်အထိ အသုံးဝင်သလဲဆိုတာကို သူတို့ အခုထိ မသိကြသေးတာပါပဲ။ ဘာပဲဖြစ်ဖြစ် သူတို့ရဲ့ နေ့စဉ်ဘဝမှာ အချိန်ကို သေချာစောင့်ကြည့်နေစရာမှ မလိုတာ။

ဒါပေမဲ့ အဲဒါက ပြောင်းလဲတော့မှာပါ။

* * * * * * * * *

“ဒါကြောင့် အခုကစပြီး မင်းတို့အားလုံးကို တစ်နေ့ကို ရှစ်နာရီပဲ အလုပ်လုပ်ဖို့ ငါ သတ်မှတ်လိုက်မယ်။ တစ်စက္ကန့်တောင် ပိုပြီး အလုပ်မလုပ်ရဘူး”

သူ့ရဲ့ စကားကြောင့် သူတို့အားလုံး ချက်ချင်းပဲ ဇဝေဇဝါ ဖြစ်သွားကြပါတယ်။ အလုပ်ကို ပိုလုပ်လေ ဆပ်ပြာတွေ ပိုထွက်လာလေ၊ အဲဒါဆိုရင် အကျိုးအမြတ် ပိုရလေ ဖြစ်မှာကို ဘာလို့ ဒီလို တင်းကျပ်တဲ့ စည်းကမ်းတွေ ထုတ်ရတာလဲဆိုတာ သူတို့ နားမလည်နိုင်ကြပါဘူး။

မိုက်ကယ်ကသာ သူတို့ကို ဆပ်ပြာတွေ ထုတ်ဖို့ တစ်ညလုံး အလုပ်လုပ်ခိုင်းရင်တောင် သူတို့က ဘာမှမမေးဘဲ လုပ်ကြမှာပါ။ ဘာပဲဖြစ်ဖြစ် သူတို့က သူ့မိသားစုရဲ့ အစေခံတွေ ဖြစ်နေတာကိုး။

ဒါပေမဲ့ အခုတော့ မိုက်ကယ်က သူတို့ကို တစ်နေ့ရဲ့ တစ်ဝက်တောင် မပြည့်တဲ့ အချိန်လောက်ပဲ အလုပ်လုပ်စေချင်နေတာပါ

“သခင်လေး၊ ဘာလို့လဲဟင် ” အစေခံမလေးတွေက မေးလိုက်ကြပါတယ်။

“ကျွန်မတို့ကို အလုပ်ထုတ်ဖို့ စီစဉ်နေတာလား ”

သူတို့ဟာ တစ်နေ့ကို အချိန်အကြာကြီး အလုပ်လုပ်ရတာနဲ့ နေ့တိုင်းရဲ့ စက္ကန့်တိုင်းမှာ အလုပ်လုပ်နေရတာကို ကျင့်သားရနေကြပြီဖြစ်လို့ ဒါဟာ ပုံမှန်ပဲလို့ ထင်နေကြတာပါ။

* * * * * * * * *

ဒါပေမဲ့ မိုက်ကယ်ရဲ့ ကမ္ဘာမှာတော့ အလုပ်တွေ အလွန်အကျွံ လုပ်တာက ဆိုးရွားတဲ့ အကျိုးဆက်တွေကို ဖြစ်စေတယ်ဆိုတာ လူတိုင်း သိထားကြပါတယ်။ လူသားတစ်ယောက်လို တကယ်နေထိုင်နိုင်ဖို့အတွက် အလုပ်နဲ့ ဘဝကို မျှတအောင် နေထိုင်ရမှာပါ။ သူတို့က ကျွန်တွေ မဟုတ်ကြဘူးလေ။

မိုက်ကယ်က သူတို့ကို ကျွန်လို ဆက်ဆံပြီး ပိုက်ဆံတွေ အများကြီး ရှာလို့ရပေမဲ့လည်း သူက အဲဒီလိုလူမျိုး ဖြစ်လာမှာ မဟုတ်ပါဘူး။

ဘာလို့လဲဆိုတော့ မိုက်ကယ်မှာ ရိုးရှင်းတဲ့ အကြောင်းပြချက် တစ်ခုပဲ ရှိပါတယ်။

“ငါသာ မင်းတို့နေရာမှာ ဆိုရင် တစ်နေ့လုံး အလုပ်မလုပ်ချင်ဘူး။ ဒါပါပဲ”

မိုက်ကယ်က အဲဒီစကားတွေကို ကလေးတစ်ယောက်ရဲ့ ရိုးသားမှုမျိုးနဲ့ ပြောလိုက်တာပါ။ အဲဒါက သူတို့ရဲ့ နှလုံးသားကို ပိုပြီး ကြည်နူးသွားစေပါတယ်။

ဗန်ဒါဘစ် အိမ်တော်က အလုပ်သမားတွေဟာ သူတို့ရဲ့ ရင်ထဲမှာ နွေးထွေးတဲ့ ခံစားချက်တစ်ခုကို ခံစားလိုက်ရပါတယ်။ သူတို့ကို အစေခံတွေလို မဟုတ်ဘဲ လူသားတွေလို ဆက်ဆံပေးတဲ့ တစ်ဦးတည်းသော သခင်လေးကို လုပ်ကျွေးခွင့်ရတာ သူတို့ ဘယ်လောက်တောင် ကံကောင်းလိုက်သလဲ။

* * * * * * * * *

သူတို့ထဲက တချို့ကတော့ မျက်ရည်တွေကို သုတ်ပြီး ရယ်မောလိုက်ကြပါတယ်။

“ခစ် ခစ်၊ သခင်လေး။ နောင်အနာဂတ်မှာလည်း ဒီလို စိတ်ဓာတ်မျိုးပဲ ဆက်ရှိနေပါစေလို့ ကျွန်မတို့ မျှော်လင့်ပါတယ်”

“ဒါက ကျွန်တော့်ကို အလုပ်တွေ ပိုလုပ်ချင်လာအောင် လုပ်လိုက်တာပဲ ”

“ဟုတ်တယ် ဆပ်ပြာတွေ အများကြီး ထုတ်ပြီး သခင်လေးကို အချမ်းသာဆုံး ဖြစ်အောင် လုပ်ပေးကြစို့ လိုအပ်ရင် တစ်ညလုံးတောင် လုပ်ပေးမယ် ”

အစေခံမလေးတွေနဲ့ အိမ်စေတွေက ပျော်ရွှင်စွာ အော်ဟစ်လိုက်ကြပြီး ဆပ်ပြာတွေ ပိုထုတ်ဖို့အတွက် သူတို့ရဲ့ နေရာတွေကို ချက်ချင်း ပြန်သွားကြပါတော့တယ်။

မိုက်ကယ်ကတော့ စိတ်ပျက်လက်ပျက်နဲ့ ခေါင်းခါလိုက်မိပါတယ်။ သူတို့က သူ့ရဲ့ ဆိုလိုရင်းကို လုံးဝ လွဲသွားကြပြီ။

‘ဟင်း.. သူတို့တွေ ဆက်ပြီး အလုပ်လုပ်ချင်နေတဲ့ အကြောင်းရင်းက တခြား လုပ်စရာ မရှိလို့ ဖြစ်ရမယ်... သူတို့တွေ ပင်ပင်ပန်းပန်း အလုပ်လုပ်ပြီးတဲ့နောက်မှာ မျှော်လင့်စရာ တစ်ခုခု ငါ ပေးသင့်တယ် ထင်တယ်...’

သူက ကုတင်ပေါ်မှာ ထိုင်နေရင်း သူ့ရဲ့ အတွေးတွေကို ပြန်လှည့်ကြည့်လိုက်ပါတယ်။ သူ့ရဲ့ အရင်ဘဝတုန်းက အချိန်ဖြုန်းစရာတွေ အများကြီး ရှိခဲ့ပေမဲ့ တချို့ကတော့ မြင့်မားတဲ့ နည်းပညာတွေ လိုအပ်ပါတယ်။

* * * * * * * * *

‘ငါသာ သူတို့ဆိုရင် ဘာလုပ်ချင်မလဲ ’

အဲဒီနောက်မှာတော့ အတွေးတစ်ခုက သူ့ခေါင်းထဲကို ဝင်လာပါတယ်။ အခုထိ အဲဒါကို မစဉ်းစားမိခဲ့တာကိုတောင် သူ မယုံနိုင်လောက်အောင်ပါပဲ။

အန်နီမေးတွေနဲ့ တီဗွီတွေထဲမှာ သူ အမြဲတမ်း မြင်တွေ့နေရတဲ့ အချိန်ဖြုန်းစရာနဲ့ အပန်းဖြေစရာ နေရာတွေက ဘာတွေလဲ

* * * * * * * * *