အခန်း (၅၁-၅၂)

စာစဉ်(၅)

အခန်း(၅၁)

မိုက်ကယ်က အမှောင်ထုထဲမှာတောင် မြင်နိုင်စွမ်းရှိစေမယ့် ကြယ်နှစ်ပွင့်မန္တန်ဖြစ်တဲ့ ညကြည့်မျက်လုံး ကို အသုံးပြုလိုက်ပါတယ်။ ဒါပေမဲ့ အဲဒီမန္တန်ကို မသုံးရင်တောင်မှ အဝေးမှာ ပုန်းအောင်းနေတဲ့ သတ္တဝါကို သူကတော့ အထင်သား မြင်နေရပါတယ်။ အဲဒီသတ္တဝါက သူ့ကို အလစ်အငိုက် တိုက်ခိုက်ဖို့အတွက် ဖြည်းဖြည်းချင်း ကပ်လာနေတာပါ။

အဲဒီသတ္တဝါအတွက် ကံဆိုးသွားတာကတော့ မိုက်ကယ်ဟာ သူ့ရဲ့ မှော်စွမ်းအင် အမှုန်အမွှားတွေကို နေ့ခင်းကြောင်တောင်လိုပဲ ရှင်းရှင်းလင်းလင်း မြင်နေရတာပါပဲ။ မိုက်ကယ် တစ်ခုခု မလုပ်ရသေးခင်မှာပဲ အဲဒီသတ္တဝါက ခရမ်းရောင် အက်ဆစ်လုံးတစ်ခုနဲ့ သူ့ရဲ့ ခန္ဓာကိုယ်ဆီကို လှမ်းပစ်လိုက်ပါတယ်။

ဒါပေမဲ့ အဲဒီအက်ဆစ်လုံးဟာ 'အကြွင်းမဲ့ ဒြပ်စင်ဘက်စုံအကာအကွယ်' နဲ့ ထိတွေ့လိုက်တာနဲ့ ဘာမှမဟုတ်သလို ပျောက်ကွယ်သွားပါတော့တယ်။ သူ့ရဲ့ တိုက်ခိုက်မှုက အရာမထင်တာကို မြင်တော့ အဲဒီသတ္တဝါဟာ အမှောင်ထဲကနေ ဝုန်းခနဲ ခုန်ထွက်လာပြီး မိုက်ကယ်ကို သူ့ရဲ့ ခန္ဓာကိုယ်ကြီးနဲ့ ဖိသိပ်သတ်ဖို့ ကြိုးစားပါတယ်။

အရင်ကလိုပဲ မိုက်ကယ်ရဲ့ ပတ်လည်မှာရှိတဲ့ မမြင်ရတဲ့ အကာအကွယ် ဘောလုံးကြီးက အဲဒီသတ္တဝါကို လွင့်ထွက်သွားအောင် တွန်းထုတ်လိုက်တာကြောင့် နံရံကို ဝုန်းခနဲ သွားဆောင့်ပါတော့တယ်။

ခဏနေတော့ အဲဒီသတ္တဝါက သူ့ရဲ့ ပုံစံကို ပြန်ပြင်ပြီး မိုက်ကယ်ကို ဆက်တိုက် တိုက်ခိုက်နေပါသေးတယ်။ သူ့ရဲ့ တိုက်ခိုက်မှုတွေက မိုက်ကယ်ရဲ့ အကာအကွယ်ကို မဖောက်နိုင်တာတောင် သူကတော့ မရပ်မနား တိုက်ခိုက်နေတာပါ။

ဒါက မိုက်ကယ်အတွက် အဲဒီသတ္တဝါရဲ့ ရုပ်သွင်အစစ်အမှန်ကို အကဲခတ်ဖို့ အချိန်အလုံအလောက် ရသွားစေပါတယ်။ ပုံကြမ်းထဲကအတိုင်းပါပဲ... လက်နှစ်ဖက်က ရွှံ့စေးတုံးကြီးလို ဖြစ်နေပြီး အောက်ပိုင်းကတော့ ခရုတစ်ကောင်ရဲ့ ခြေထောက်လိုပါပဲ။ သူ့ရဲ့ ခန္ဓာကိုယ်တစ်ခုလုံးက ထူးဆန်းတဲ့ ခရမ်းရောင် အရည်တွေနဲ့ ဖွဲ့စည်းထားပြီး အန္တရာယ်ရှိတဲ့ အငွေ့အသက်တွေ အမြဲတမ်း ထွက်နေပါတယ်။

'နိုဗာ... ငါ ဘယ်လို သတ္တဝါမျိုးနဲ့ ရင်ဆိုင်နေရတာလဲဆိုတာကို ခွဲခြမ်းစိတ်ဖြာပေးစမ်း'

[ မှော်စာကြည့်တိုက်မှာရှိတဲ့ သတ္တဝါများအကြောင်း မှတ်တမ်းအရဆိုရင် ဒီသတ္တဝါဟာ မျိုးရိုးဗီဇပြောင်းလဲနေတဲ့ အဆိပ်စလိုင်းမ် ဖြစ်ဖို့ အလားအလာ အလွန်များပါတယ် ]

'မျိုးရိုးဗီဇပြောင်း အဆိပ်စလိုင်းမ် ' တဲ့လား။ အဆင့်သတ်မှတ်ချက် ကြယ်သုံးပွင့် ရှိတာကြောင့် ကြယ်သုံးပွင့် မှော်ဆရာတစ်ယောက်မှသာ နှိမ်နင်းနိုင်မှာပါ။ ငါက ကြယ်လေးပွင့် မှော်ဆရာ ဖြစ်နေတာ တော်သေးတာပေါ့လို့ မိုက်ကယ်က သူ့ဘာသာ တွေးလိုက်ပါတယ်။

သူ့ရဲ့ 'အဆင့်မြင့် ရွှေရောင်နှာခေါင်း' ကနေ ဒီစလိုက်မ်မှာ ပါရမီနိုးထလာဖို့ အလားအလာကောင်းတွေ ရှိနေတယ်လို့ ပြောထားတာကြောင့် မိုက်ကယ်က ဒီသတ္တဝါနဲ့ ရန်ဘက် မဖြစ်ချင်ပါဘူး။ ဒီစလိုက်မ်နဲ့ စကားပြောလို့ရရင် အကောင်းဆုံးပါပဲ။

ဒါကြောင့် သူက သတ္တဝါကို နာကျင်စေမယ့် ရည်ရွယ်ချက် မရှိဘူးဆိုတာ သိသာအောင် လက်နှစ်ဖက်ကို မြှောက်ပြီး အနားကို ချဉ်းကပ်သွားပါတယ်။

"ငါ မင်းနဲ့ စကားပြောချင်ရုံတင်ပါ"လို့ မိုက်ကယ်က အသံကျယ်ကျယ်နဲ့ ပြောလိုက်ပါတယ်။

ဒီသတ္တဝါက သူ့စကားကို နားမလည်နိုင်မှန်း သိပေမဲ့ သူ့ရဲ့ အသံနေအသံထားကို ကြည့်ပြီး သူ့ရဲ့ ရည်ရွယ်ချက်ကို သိနိုင်လောက်အောင် စလိုက်မ်က ဉာဏ်ကောင်းလိမ့်မယ်လို့ သူ မျှော်လင့်နေတာပါ။

[ ကျွန်ုပ် ဘာသာပြန်ပေးရမလား ] လို့ နိုဗာက အကြံပြုပါတယ်။

[ စလိုင်းမ် ရဲ့ ခန္ဓာကိုယ်နဲ့ အသိစိတ်ဟာ မှော်စွမ်းအင်တွေနဲ့ပဲ ဖွဲ့စည်းထားတာပါ။ ဆိုလိုတာက 'အဆင့်မြင့်စွမ်းရည် - မှော်စွမ်းအင် စုစည်းခြင်း' ကို သုံးရင် သူ့ရဲ့ ခန္ဓာကိုယ်ထဲက အဆိပ်မှော်စွမ်းအင် တုန်ခါမှုတွေကို ကြည့်ပြီး စလိုင်းမ် ဘာတွေးနေလဲဆိုတာကို သိနိုင်ပါတယ် ]

ဒါက မိုက်ကယ် လိုချင်တဲ့အရာပါပဲ။ အဲဒီသတ္တဝါမှာ ကိုယ်ပိုင်အသိစိတ် ရှိလောက်အောင် ဉာဏ်ကောင်းတယ်ဆိုရင် စကားပြောလို့ ရနိုင်တာပဲလေ။

'သူ့ရဲ့ စကားတွေကို ဘာသာပြန်ပေးပါ'

စလိုင်းမ်က နားမလည်နိုင်တဲ့ အသံတွေနဲ့ ဗလုံဗလုံ ရွတ်နေချိန်မှာ မိုက်ကယ်ရဲ့ နားထဲမှာတော့ စလိုင်းမ်ရဲ့ အသံကို ထပ်ဆင့်ပြီး ကြားလိုက်ရပါတယ်။

[ လူသားတွေ... သတ်မယ်... ငါ့ကို... ထပ်ပြီး... အနာကျင်မခံနိုင်တော့ဘူး... ] လို့ စလိုင်းမ်က ပြောနေတာပါ။

မိုက်ကယ်က အဲဒီသတ္တဝါလေးကို သနားသွားပါတယ်။ လူတွေ သတင်းပို့သလို အန္တရာယ်ရှိတဲ့ သတ္တဝါဆိုးမျိုး လုံးဝ မဟုတ်ပါဘူး။

'နိုဗာ... ငါ့စကားတွေကို စလိုင်းမ်နားလည်အောင် ပြန်ပြောပေးလို့ ရမလား'

[ နားလည်ပါပြီ။ သင့်ခန္ဓာကိုယ်ထဲမှာရှိတဲ့ အဆိပ်မှော်စွမ်းအင်တွေကို တုန်ခါအောင် လုပ်ပါမယ်... ]

မိုက်ကယ်ရဲ့ ဒြပ်စင်အမြုတေထဲက အဆိပ်မှော်စွမ်းအင်တွေဟာ လည်ချောင်းနားက အသံအိုးဆီကို တိုးဝင်လာတာကို ခံစားလိုက်ရပါတယ်။ သူ စကားပြောဖို့ ပါးစပ်ဟလိုက်တဲ့အခါ အဆိပ်မှော်စွမ်းအင်တွေက မြင်သာတဲ့ အသံလှိုင်းတွေအဖြစ် ပါးစပ်ထဲကနေ ထွက်သွားပါတယ်။

"ငါ မင်းကို ရန်ပြုဖို့ လာတာ မဟုတ်ပါဘူး"လို့ မိုက်ကယ်က စလိုင်းမ်ကို ပြောလိုက်ပါတယ်။

သူ့ရဲ့ အသံကို နားလည်သွားတဲ့အခါ အဲဒီသတ္တဝါဟာ လန့်ပြီး နောက်ကို ဆုတ်သွားပါတယ်။

[ မှော်အတတ်... လူသားတွေ... ထူးဆန်းတယ်... အန္တရာယ်ရှိတယ် ]

ဒီလူသားက သူ့ရဲ့ ဘာသာစကားကို ဘယ်လိုပြောနိုင်တာလဲဆိုတာ စလိုင်းမ် နားမလည်နိုင်ပါဘူး။ အဲဒီကြောက်စိတ်ကြောင့်ပဲ သူဟာ အသိစိတ်ကင်းမဲ့စွာနဲ့ မိုက်ကယ်က ငြိမ်းချမ်းရေးအတွက် ဘယ်လောက်ပဲ တောင်းဆိုနေပါစေ အရင်ကထက် ပိုပြီး ပြင်းပြင်းထန်ထန် တိုက်ခိုက်ပါတော့တယ်။

စလိုင်းမ်ဟာ လိုဏ်ခေါင်းထဲက ရေထဲကို ငုပ်လျှိုးသွားပြီး ညစ်ပတ်နေတဲ့ မြစ်ရေတွေကို သူ့ခန္ဓာကိုယ်ထဲ စုပ်ယူလိုက်ပါတယ်။ အဲဒီနောက်မှာတော့ သူ့ရဲ့ ပါးစပ်ကနေ အမြောက်ပြောင်းလို ပုံစံမျိုး လုပ်လိုက်ပြီး မိုက်ကယ်ဆီကို တည့်တည့်ချိန်လိုက်ပါတယ်။

ညစ်ပတ်တဲ့ ရေတွေ၊ ဗိုင်းရပ်စ်တွေနဲ့ ဗက်တီးရီးယားတွေ ပါတဲ့ ရေအရှိန်အဟုန်ကြီးက မိုက်ကယ်ဆီကို ပန်းထွက်လာပါတယ်။ ဒါပေမဲ့ ပုံမှန်အတိုင်းပါပဲ... ကြီးမားတဲ့ ရေစီးကြောင်းကြီးဟာ မိုက်ကယ်ရဲ့ အကာအကွယ်နဲ့ ထိတွေ့လိုက်တာနဲ့ ဘေးကို လွင့်စင်သွားပါတော့တယ်။

[ လူသား... သန်မာတယ် ] လို့ သူက အကြောက်တရားတွေနဲ့ ရေရွတ်လိုက်ပါတယ်။

"ငါ မင်းကို မထိခိုက်စေချင်ဘူး"လို့ မိုက်ကယ်က ပြောရင်း စလိုင်းမ်ဆီကို ဖြည်းဖြည်းချင်း လမ်းလျှောက်သွားပါတယ်။

ဒါပေမဲ့ သူ သတိမထားမိလိုက်တာက ဒါဟာ ပြောင်းပြန်အကျိုးသက်ရောက်မှု ဖြစ်သွားစေတာပါ။ စလိုင်းမ်ရဲ့ အမြင်မှာတော့ မိုက်ကယ်ဟာ သူ့ရဲ့ အပြင်းထန်ဆုံး တိုက်ခိုက်မှုကို ဘာမှမဟုတ်သလို လျစ်လျူရှုပြီး အေးအေးဆေးဆေး လမ်းလျှောက်လာနေတာပါ။ လူသားတွေနဲ့ မှော်ဆရာတွေတောင် ဒီရေအရှိန်ကို ရှောင်ကြရတာလေ။ မိုက်ကယ်ကတော့ မရှောင်ပါဘူး။

[ ဟင့်အင်း... ဝေးဝေးသွား... ငါ... မသေချင်သေးဘူး ] လို့ စလိုင်းမ်က လိုဏ်ဂူအနက်ရှိုင်းဆုံးနေရာမှာ မိုက်ကယ်ရဲ့ ပိတ်ဆို့ခြင်းကို ခံလိုက်ရတဲ့အခါ အော်ဟစ်လိုက်ပါတယ်။

သေဘေးနီးပြီလို့ ထင်လိုက်တဲ့အခါမှာတော့ စလိုင်းမ်ဟာ သူ့ရဲ့ အသက်အန္တရာယ်အပေးနိုင်ဆုံး တိုက်ခိုက်မှုကို သုံးဖို့ တွန့်ဆုတ်မနေတော့ပါဘူး။

သူ့ရဲ့ ခန္ဓာကိုယ်ကြီးက ခရမ်းရောင်အလင်းတွေ ထွက်ပေါ်လာပြီး ခန္ဓာကိုယ်ထဲမှာရှိတဲ့ တန်ဖိုးရှိတဲ့ အဆိပ်မှော်စွမ်းအင် အားလုံးကို ဒီနောက်ဆုံးတိုက်ကွက်အတွက် သုံးလိုက်ပါတယ်။ ဖြည်းဖြည်းချင်းပဲ... အဆိပ်မှော်စွမ်းအင်တွေနဲ့ ပြုလုပ်ထားတဲ့ ပါးလွှာတဲ့ အပ်စိုက်တိုင်လေးတွေဟာ လေထဲမှာ ပေါ်လာပါတယ်။ အစပိုင်းမှာတော့ ဆယ်ဂဏန်းလောက်ပဲ ရှိတာပါ။

ဒါပေမဲ့ သူ့ခန္ဓာကိုယ်ထဲက အဆိပ်မှော်စွမ်းအင် အားလုံးကို ထုတ်သုံးလိုက်တဲ့အခါမှာတော့ အပ်စိုက်တိုင်တွေဟာ လေထဲမှာ တစ်စထက်တစ်စ များပြားလာပြီး လိုဏ်ဂူတစ်ခုလုံးကို အဆိပ်အပ်တွေနဲ့ ဖုံးလွှမ်းသွားစေပါတယ်။

အဝတ်လျှော်စက်လောက် ကြီးမားခဲ့တဲ့ စလိုင်းမ်ရဲ့ ခန္ဓာကိုယ်ဟာ အဆိပ်မှော်စင်တွေကို အကုန်ထုတ်သုံးလိုက်တာကြောင့် အခုတော့ ဘတ်စကတ်ဘောလုံးလောက်ပဲ သေးသွားပါတော့တယ်။

[ လူသား... မလှုပ်နဲ့... မဟုတ်ရင်... ငါ သတ်မယ်... ]

စလိုင်းမ်ရဲ့ သတိပေးချက်ရှိပေမဲ့ မိုက်ကယ်ကတော့ ရှေ့ကို တစ်လှမ်း တိုးလိုက်ပါတယ်။

သူ့ခြေထောက် မြေကြီးပေါ် ချလိုက်တာနဲ့ တစ်ပြိုင်နက် ထောင်ပေါင်းများစွာသော အဆိပ်အပ်တွေကို မိုက်ကယ်ရဲ့ ခန္ဓာကိုယ်ဆီ စုပြုံတိုက်ခိုက်ဖို့ အမိန့်ပေးလိုက်ပါတယ်။ ဒါက လူသားတစ်ယောက်ရဲ့ ခန္ဓာကိုယ်ကို အပ်နဲ့ထိုးသလို ဖြစ်သွားစေပြီး တစ်ချိန်တည်းမှာပဲ အဆိပ်မိစေမှာပါ။

ဒါပေမဲ့ မိုက်ကယ်က သာမန်လူ မဟုတ်ပါဘူး။

သူက လက်ကို မြှောက်လိုက်ပြီး အပ်တွေကို ရပ်တန့်ဖို့ အချက်ပြလိုက်ပါတယ်။ ကြောက်စရာကောင်းတာကတော့ အဲဒီအပ်တွေဟာ မိုက်ကယ်ရဲ့ အကာအကွယ် အပြင်ဘက် လက်မအနည်းငယ်အကွာမှာတင် ရပ်တန့်သွားတာပါပဲ။

စလိုင်းမ်ဟာ အဆိပ်အပ်တွေအပေါ် သူ့ရဲ့ ထိန်းချုပ်မှု လွတ်ထွက်သွားတာကို ခံစားလိုက်ရတာကြောင့် အပ်တွေဟာ တုန်ခါလာပါတော့တယ်။

မိုက်ကယ်က သူ့ရဲ့ လက်ညှိုးကို ဝှေ့ယမ်းလိုက်တဲ့အခါ အဆိပ်အပ်တွေဟာ သူ့ရဲ့ အမိန့်ကို နာခံပြီး စလိုင်းမ်ဘက်ကို ပြန်လှည့်သွားပါတော့တယ်။

ဒါကတော့ သူ့ရဲ့ 'အဆင့်မြင့်စွမ်းရည် - မှော်စွမ်းအင် စုစည်းခြင်း' ရဲ့ စစ်မှန်တဲ့ စွမ်းအားပါပဲ။

ဒီစွမ်းရည်က သူ့ရဲ့ မှော်စွမ်းအင်ဖြစ်ဖြစ်၊ တခြားသူရဲ့ မှော်စွမ်းအင်ဖြစ်ဖြစ် ဘယ်မှော်စွမ်းအင်ကိုမဆို ထိန်းချုပ်နိုင်စွမ်း ပေးထားတာပဲ ဖြစ်ပါတယ်။

* * * * * * * * *

စာစဉ်(၅)

အခန်း(၅၂)

မျက်နှာကို ချိန်ရွယ်ထားတဲ့ အဆိပ်အပ်ပေါင်း ထောင်သောင်းချီကို ကြည့်ပြီး စလိုင်းမ်လေးဟာ သူ့ရဲ့အဆုံးသတ်ကို လက်ခံတဲ့အနေနဲ့ မျက်လုံးလေးမှိတ်လိုက်ပါတော့တယ်။ သူဟာ ဒိမ်းစ်မြစ်ရဲ့ အလယ်ဗဟိုမှာရှိတဲ့ ရေထဲက အညစ်အကြေးတွေနဲ့ အမှိုက်သရိုက်တွေ ပေါင်းစပ်ရာကနေ မွေးဖွားလာခဲ့တာပါ။

သူ့ရဲ့နေ့ရက်တွေကို ရေနားမှာ ဆော့ကစားနေကြတဲ့ လူသားတွေရဲ့ ပျော်ရွှင်နေတဲ့ အပြုံးတွေကို ငေးကြည့်ရင်း ဖြတ်သန်းခဲ့ရတယ်။ စလိုင်းမ်လေးဟာ လူသားတွေလို ပျော်ရွှင်မှုကို ခံစားချင်ပေမဲ့ သူဟာ လူသားတွေနဲ့ မတူဘဲ ဘီလူးသတ္တဝါတစ်ကောင် ဖြစ်နေတာကြောင့် သူတို့နဲ့ သွားရောက်ပူးပေါင်းလို့ မရမှန်း သိနေခဲ့ပါတယ်။

ဒိမ်းစ်မြစ်အောက်ခြေကနေ လူသားတွေကို ငေးကြည့်နေရရုံနဲ့တင် သူ ကျေနပ်နေခဲ့တာပါ။ လူသားတွေအတွက် ရေက ဘေးကင်းလုံခြုံနေအောင် မြစ်ထဲက အညစ်အကြေးတွေ၊ အမှိုက်တွေနဲ့ အနည်အနှစ်တွေကို သူကပဲ စားသုံးပြီး သန့်စင်ပေးခဲ့ပါတယ်။

စလိုင်းမ်လေးက လူသားတွေကို အဲ့ဒီလောက်အထိ ချစ်မြတ်နိုးခဲ့တာပါ။ ဒါပေမဲ့ သူ ဘာပြန်ရခဲ့သလဲ။ အသက်အန္တရာယ်ပေးနိုင်တဲ့ ဘီလူးသတ္တဝါတစ်ကောင်လိုပဲ ဆက်ဆံခံခဲ့ရတယ်။ အမဲလိုက်ခံရတယ်၊ ရိုက်နှက်ခံရပြီး ဒဏ်ရာဗရပွ ဖြစ်ခဲ့ရတယ်။

အဲ့ဒီလို အခြေအနေမှာတောင် စလိုင်းမ်လေးက လူသားတွေကို မမုန်းတီးခဲ့ပါဘူး။ ဒါဟာ လောကနိယာမပဲလေ။ သူက ဘီလူးသတ္တဝါ၊ သူတို့က လူသားတွေ ဖြစ်နေတာကိုး။

သူ့ရဲ့ စေးကပ်နေတဲ့ ခန္ဓာကိုယ်လေးက တုန်ယင်နေပြီး ဘဝနိဂုံးကို လက်ခံလိုက်ပါတယ်။ နောက်ဘဝမှာတော့ လူသားတစ်ယောက်အဖြစ် မွေးဖွားလာပါစေလို့ပဲ သူ ဆုတောင်းနေမိတော့တယ်။

စလိုင်းမ်လေးက စောင့်ဆိုင်းနေခဲ့ပေမဲ့ နာကျင်မှုက ရောက်မလာခဲ့ပါဘူး။ သူ မျက်လုံးကို ဖြည်းဖြည်းချင်း ဖွင့်ကြည့်လိုက်တဲ့အခါ သူ့ကို နွေးထွေးတဲ့ အကြည့်တွေနဲ့ ကြည့်နေတဲ့ မိုက်ကယ်ကို တွေ့လိုက်ရပါတယ်။

မိုက်ကယ်က လက်ဖျောက်တစ်ချက် တီးလိုက်ရုံနဲ့ အဆိပ်အပ်တွေအားလုံးက အဆိပ်မှော်စွမ်းအင်တွေအဖြစ် ပြောင်းလဲသွားပြီး မူလနေရာတွေဆီ ပြန်သွားပါတော့တယ်။

စလိုင်းမ်လေးဟာ ခန္ဓာကိုယ်ထဲမှာ အင်အားတွေ ပြန်ပြည့်လာသလို ခံစားလိုက်ရပြီး သူ့ရဲ့ မူလအရွယ်အစားအတိုင်း ပြန်ကြီးလာပါတယ်။

"မင်း တော်တော်လေး ခံစားခဲ့ရမှာပဲ မဟုတ်လား ဘော်ဒါလေး"

မိုက်ကယ်က စလိုင်းမ်လေးရဲ့ ရှေ့မှာ ဒူးထောက်ထိုင်ရင်း ပြောလိုက်ပါတယ်။

သူက လက်ကို မြှောက်ပြီး စလိုင်းမ်လေးရဲ့ ခေါင်းကို ပွတ်သပ်ပေးလိုက်တယ်။ တခြားလူသားတွေလိုပဲ သူ့ကို နာကျင်အောင် လုပ်တော့မယ်အထင်နဲ့ သတ္တဝါလေးက တွန့်သွားခဲ့ပေမဲ့ မိုက်ကယ်ရဲ့ လက်ဆီက နွေးထွေးမှုကို ခံစားလိုက်ရတဲ့အခါမှာတော့ စလိုင်းမ်လေးဟာ သူ့လက်ထဲကို တိုးဝင်ပြီး ကပ်ချွဲနေပါတော့တယ်။

မိုက်ကယ်က တဟားဟား ရယ်မောလိုက်တယ်။ ရေစိုနေပေမဲ့ သစ္စာရှိတဲ့ ခွေးလေးတစ်ကောင်ကို ပွတ်သပ်ပေးနေရသလို သူ ခံစားလိုက်ရလို့ပါ။ သူ အဲ့ဒီသတ္တဝါလေးကို ထိတွေ့နေတုန်းမှာပဲ စိတ်ထဲမှာ ပုံရိပ်အချို့က ရုတ်တရက်ဆိုသလို ဖြတ်ပြေးသွားပါတယ်။

ဒါဟာ ဒိမ်းစ်မြစ်ထဲက အဆုံးမရှိတဲ့ အမှိုက်သရိုက်တွေကြားမှာ ကူးခတ်နေရတဲ့ စလိုင်းမ်လေးရဲ့ မှတ်ဉာဏ်တွေပဲ ဖြစ်ပါတယ်။ အဲ့ဒီမှတ်ဉာဏ်တွေကို ကြည့်ရင်း မိုက်ကယ်ဟာ အထီးကျန်မှုနဲ့ အဖော်အပေါင်း လိုလားတောင့်တနေတဲ့ စိတ်ကို ခံစားလိုက်ရတယ်။

လူသားတွေကို အဝေးကနေ ငေးကြည့်နေတဲ့ စလိုင်းမ်လေးရဲ့ ပုံရိပ်၊ ညစ်ညမ်းနေတဲ့ မြစ်ထဲက အန္တရာယ်ရှိတဲ့ ဘက်တီးရီးယားတွေနဲ့ ဗိုင်းရပ်စ်တွေရန်ကနေ လူသားတွေကို ကာကွယ်ပေးနေတဲ့ ပုံတွေကို သူ မြင်လိုက်ရပါတယ်။

ဒါပေမဲ့ လူသားတွေကတော့ သူ့ကို ကြောက်ရွံ့တုန်လှုပ်စွာနဲ့ပဲ ဆက်ဆံခဲ့ကြတယ်။ သူတို့က စလိုင်းမ်လေးကို မြစ်အဆုံးအထိ လိုက်လံဖမ်းဆီးခဲ့ကြတာပါ။ စလိုင်းမ်လေးအနေနဲ့ ပြန်တိုက်ခိုက်လို့ ရပေမဲ့လည်း သူက ထွက်ပြေးဖို့ကိုပဲ ရွေးချယ်ခဲ့ပါတယ်။

သူ့မှာ ပြေးစရာလမ်းမရှိတော့ဘဲ ထောင့်ပိတ်မိသွားတဲ့ အခါကျမှသာ သူက ပြန်လည်တိုက်ခိုက်ခဲ့တာပါ။ စလိုင်းမ်လေးရဲ့ နောက်ခံဇာတ်လမ်းကို သိလိုက်ရတဲ့အခါမှာတော့ မိုက်ကယ် တစ်ခုခုကို နားလည်သွားပါတော့တယ်။

'ဒါကြောင့်ကိုး... ဒါကြောင့် နတ်ဘုရားမက ဒီမြို့မှာ ကပ်ရောဂါ ကျရောက်လိမ့်မယ်လို့ ပြောခဲ့တာပဲ။ ဒီစလိုင်းမ်က တစ်ချိန်လုံး မြစ်ထဲက ရောဂါပိုးမွှားတွေကို သန့်စင်ပေးနေခဲ့တာကိုး။ အကယ်၍ သူတို့သာ စလိုင်းမ်ကို အမိအရ ဖမ်းဆီးသတ်ဖြတ်နိုင်ခဲ့ရင် မြစ်ရေထဲမှာ ဘက်တီးရီးယားတွေ ပေါက်ပွားလာပြီး ကပ်ရောဂါဆိုက်တော့မှာပဲ'

[အဆင့်မြင့်စွမ်းအင် - ဆုလာဘ် အပ်နှင်းခြင်း စတင်အသက်ဝင်ပါပြီ]

[မျိုးဗီဇပြောင်း အဆိပ်စလိုင်းမ်]

- - SSS အဆင့် ကပ်ပါးဆိုး ဧည့်သည်

- - အသုံးပြုသူသည် သတ္တဝါ သို့မဟုတ် အရာဝတ္ထုတစ်ခု၏ ခန္ဓာကိုယ်ထဲတွင် အရိပ်တစ်ခုအဖြစ် ဝင်ရောက်နေထိုင်နိုင်မည်။

- - အသုံးပြုသူသည် မိမိကိုယ်တိုင်၏ ကိုယ်ပွားများကို ဖန်တီးနိုင်သည်။

[သင်သည် စလိုင်းမ်၏ ဝှက်ဖဲစွမ်းရည်ကို ရှာဖွေတွေ့ရှိခဲ့ပြီ။ ၎င်းကို နိုးထစေလိုပါသလား]

မိုက်ကယ်ဟာ စလိုင်းမ်လေးရဲ့ အိပ်မက်ကို ဖြည့်ဆည်းပေးချင်ခဲ့ပါတယ်။ သူ့ကို ဘဝသစ်တစ်ခု ပေးချင်နေတာပါ။

"နိုဗာ... စလိုင်းမ်ရဲ့ စွမ်းရည်ကို နိုးထပေးလိုက်ပါ"

[နားလည်ပါပြီ။ ဤသတ္တဝါကို အမည်ပေးလိုပါသလား]

မိုက်ကယ်က အမြဲတမ်း ခွေးလေးတစ်ကောင် မွေးချင်ခဲ့တာပါ။ အဲ့ဒီခွေးလေးကို သူပေးချင်တဲ့ နာမည်က... ဖတ်ချ်။

"စလိုင်းမ်ရဲ့ နာမည်အသစ်က ဖတ်ချ် ပဲ"

သူ့ရဲ့လက်ထဲကနေ ရွှေရောင်အလင်းတန်းတစ်ခု ထွက်ပေါ်လာပါတယ်။ ဒြပ်စင်မှော်စွမ်းအင်တွေနဲ့ မတူတဲ့ ဆန်းကြယ်တဲ့ စွမ်းအားတစ်ခုက သူ့ရဲ့လက်ချောင်းထိပ်တွေကနေတစ်ဆင့် စလိုင်းမ်လေးဆီကို စီးဝင်သွားပြီး နွေးထွေးတဲ့ ခံစားမှုကို ပေးစွမ်းလိုက်ပါတယ်။

သတ္တဝါလေးက မိုက်ကယ်ရဲ့လက်ကို ငြင်းဆန်မဖယ်ရှားခဲ့ပါဘူး။ ဒါဟာ ကောင်းမွန်တဲ့အရာတစ်ခုဆိုတာကို သူ ဗီဇအရ သိနေခဲ့ပါတယ်။ စလိုင်းမ်လေးရဲ့ ခရမ်းရောင်ခန္ဓာကိုယ်က စတင်တောက်ပလာပြီး လှိုဏ်ဂူတစ်ခုလုံးကို လင်းထိန်သွားစေတဲ့အထိ အဖြူရောင်အလင်းတန်းတွေ ထွက်ပေါ်လာပါတော့တယ်။

[နိုးထမှု ပြီးဆုံးပါပြီ]

စက္ကန့်အနည်းငယ်အကြာမှာတော့ အလင်းရောင်တွေ မှိန်ပျော့သွားပါတယ်။ မိုက်ကယ် မျက်လုံးဖွင့်ကြည့်လိုက်တဲ့အခါမှာတော့ ထူးဆန်းတဲ့ မြင်ကွင်းတစ်ခုကို တွေ့လိုက်ရတယ်။

စလိုင်းမ်လေးရဲ့ ကိုယ်ထည်ကတော့ အရင်အတိုင်း ခရမ်းရောင် စေးကပ်ကပ်ပုံစံနဲ့ လက်နှစ်ဖက် ပါနေတုန်းပါပဲ။ ဒါပေမဲ့ ထူးဆန်းတာက သူဟာ အနက်ရောင် ဝတ်စုံအပြည့်၊ ခေါင်းစွပ်ပါတဲ့ ဝတ်ရုံ၊ အနက်ရောင် လက်အိတ်တွေကို ဝတ်ဆင်ထားပြီး ပါးစပ်မရှိပေမဲ့လည်း သူ့ရဲ့မျက်နှာအောက်ပိုင်းကို ပုဝါတစ်ခုနဲ့ စည်းထားတာပဲ ဖြစ်ပါတယ်။

စလိုင်းမ်လေးက ဗီဒီယိုဂိမ်းထဲက ဇာတ်ကောင်တွေ ဝတ်ဆင်ထားတဲ့ ပုံစံမျိုးကို ဝတ်ထားတာပါ။ မိုက်ကယ်က စလိုင်းမ်လေးရဲ့ စနစ်အသစ်ကို ချက်ချင်း စစ်ဆေးလိုက်ပါတယ်။

[ဒြပ်စင်ကျွမ်းကျင်မှု - သဟဇာတ ဒြပ်စင်]

[မျိုးစိတ် - ဉာဏ်ရည်မြင့်သင်းကွဲစလိုင်းမ်]

[စွမ်းရည် - SSS အဆင့် ဆိုးယုတ်ကပ်ပါးကောင်]

[အဆင့် - ကြယ်တစ်ပွင့် သင်းကွဲ]

- - အခြေခံ သဟဇာတ ပေါင်းစည်းခြင်း

- - အခြေခံ သဟဇာတ အကာအကွယ်

"နိုဗာ... ငါ့မှာ မေးစရာတွေ ရှိတယ်... စလိုင်းမ်က ဘာဖြစ်သွားတာလဲ။ သူက အဆိပ်စလိုင်းမ် မဟုတ်ဘူးလား။ ပြီးတော့ ဘာလို့ ဒီလို ထူးဆန်းတဲ့ ဝတ်စုံကြီး ဝတ်ထားရတာလဲ"

[စွမ်းရည် နိုးထလာတဲ့ လုပ်ငန်းစဉ်မှာ ဖတ်ချ်ဟာ သူ့ရဲ့ ဆင့်ကဲပြောင်းလဲမှု လမ်းကြောင်းရဲ့ နောက်တစ်ဆင့်ကို တက်လှမ်းသွားခဲ့တာဖြစ်ပါတယ်။]

[အဆင့်မြင့်စွမ်းရည်ရဲ့ ကြားဝင်ဆောင်ရွက်မှုကြောင့် စလိုင်းမ်ဟာ မူလဆင့်ကဲပြောင်းလဲမှု လမ်းကြောင်းကနေ သွေဖည်သွားခဲ့ပြီး လုံးဝထူးခြားတဲ့ အသွင်သဏ္ဌာန်တစ်ခုအဖြစ် ပြောင်းလဲသွားခဲ့တာပါ]

အဲ့ဒီအချိန်မှာပဲ ဖတ်ချ်က အိပ်ပျော်နေရာကနေ ရုတ်တရက် နိုးလာပြီး မိုက်ကယ်ရဲ့ ရင်ခွင်ထဲကို ခုန်တက်လာပါတယ်။ အနက်ရောင်ဝတ်စုံအပြည့်နဲ့ စလိုင်းမ်လေးက မိုက်ကယ်ကို ကျေးဇူးတင်တဲ့ အကြည့်တွေနဲ့ မော့ကြည့်လိုက်တယ်။

"သခင် ကျွန်တော့်ကို ဒီဘဝသစ် လက်ဆောင်ပေးတဲ့အတွက် ကျေးဇူးတင်ပါတယ်"

ဖတ်ချ်က လူသားစကားကို ပီပီသသ ပြောလိုက်တာပါ။

စလိုင်းမ်လေးက ခေါင်းစွပ်ကြီး နိမ့်ချည်မြင့်ချည်နဲ့ ခေါင်းငြိမ့်ပြလိုက်တယ်။

"ဟုတ်ကဲ့ပါ သခင်။ ကျွန်တော် ဆင့်ကဲပြောင်းလဲသွားတဲ့အခါမှာ ကျွန်တော့်ရဲ့ ဘဝအမြင်တွေကို လုံးဝပြောင်းလဲစေတဲ့ ဗဟုသုတအသစ်တွေ အများကြီး ရရှိခဲ့ပါတယ်"

'ဖတ်ချ်က ဘာတွေပြောနေတာလဲ'

မိုက်ကယ်က သူ့ရဲ့ AI လက်ထောက်ရဲ့ လုပ်ရပ်ကို သံသယဝင်ပြီး နိုဗာကို လှမ်းမေးလိုက်ပါတယ်။

[သူ့ရဲ့ စွမ်းရည်အသစ်ကို ပိုမိုကောင်းမွန်အောင် အထောက်အကူပြုဖို့အတွက် အသုံးဝင်တဲ့ အချက်အလက်တွေကို ဖတ်ချ်ရဲ့ စိတ်ထဲကို ကျွန်ုပ် တိုက်ရိုက် ထည့်သွင်းပေးလိုက်ပါတယ်]

မိုက်ကယ်အနေနဲ့ နိုဗာကို အသေးစိတ် ထပ်မမေးနိုင်ခင်မှာပဲ ဖတ်ချ်က သူ့ရင်ခွင်ထဲကနေ ရုတ်တရက် ခုန်ဆင်းသွားပြီး စူပါဟီးရိုးတွေ မြေပြင်ပေါ် ဆင်းသက်တဲ့ ပုံစံအတိုင်း ဆင်းသက်လိုက်ပါတယ်။

"ဒီဘဝမှာ ကျွန်တော့်ရဲ့ အလုပ်က သခင်ရဲ့ စွမ်းအားကြီးမြတ်မှုကို ပြန့်နှံ့အောင် လုပ်ဖို့ပါပဲ မကြာခင်မှာ တစ်ကမ္ဘာလုံးက မိုက်ကယ် ဗန်ဒါဘစ် ဆိုတဲ့ နာမည်ကို သိစေရမယ် ကျွန်တော်က သခင်ရဲ့ အရိပ်၊ သခင်ရဲ့ သစ္စာရှိတဲ့ အစေခံ... ကျွန်တော်က... အဆုံးစွန်သောအင်အား ဖြစ်လာစေရမယ်"

မိုက်ကယ် ဆွံ့အသွားပါတော့တယ်။ ဖတ်ချ် ပြောသွားတဲ့ စကားတွေက သူ့ရဲ့ အရင်ဘဝက နာမည်ကြီး ဇာတ်ကောင်တစ်ယောက်ရဲ့ စကားတွေပဲလေ။

"နိုဗာ... မင်း... မင်း ဖတ်ချ်ကို အန်နီမေး ထဲက အချက်အလက်တွေ ပေးလိုက်တာလား"

(TR Note: နိုဗာက ဖတ်ချ်ရဲ့ပုံစံကို ‘The Eminence in Shadow’ ထဲက Cid Kagenou ပုံစံကို အခြေခံပြီး ဖန်တီးပေးလိုက်တာ ဖြစ်ပါတယ်)

* * * * * * * * *