တိုက်ပွဲအဆင့်သတ်မှတ်ချက်များ

ခန်းမတစ်ထောင် တိုက်ပွဲနန်းတော်သည် ဂိုဏ်းတစ်ခုဟု သတ်မှတ်နိုင်သလို ဂိုဏ်းတစ်ခုမဟုတ်ဟုလည်း ဆိုနိုင်ပေသည်။

သို့ရာတွင် လူအများစုအတွက်မူ ၎င်းအား အဖွဲ့အစည်း၏ အကယ်ဒမီကဲ့သို့ပင် ကျင့်ကြံခြင်းအကယ်ဒမီတစ်ခုအဖြစ် သတ်မှတ်ထားကြလေ၏။

တိုက်ပွဲနန်းတော်ကို တိုက်ခိုက်ရေးကျောင်းတော်မျိုးစုံ၊ ကျင့်ကြံခြင်းနည်းစနစ်နှင့် ၎င်းနှင့်ဆက်စပ်သမျှအားလုံးကို သင်ကြားပေးသော နည်းပြအမျိုးမျိုး စုပေါင်း၍ ဖွဲ့စည်းထားခြင်း ဖြစ်သည်။

ထိုနည်းပြများ သင်ကြားပေးသော သိုင်းပညာရပ်များစွာထဲတွင် လက်သီးသိုင်း၊ လှံသိုင်း၊ ဓားသိုင်း၊ လက်ဝါးသိုင်း၊ ခြေကန်သိုင်း၊ ဝိညာဉ်သိုင်းပညာ၊ ဓားမြှောင်သိုင်းနှင့် အခြားသောသိုင်းများ ပါဝင်ပြီး၊ ဝိညာဉ်သားရဲများ၏ တိုက်ခိုက်ပုံကို လေ့လာကာ လူသားကျင့်ကြံသူများ အသုံးပြုနိုင်ရန် ပေါင်းစပ်ထားသော သားရဲပေါင်းစပ် တိုက်ခိုက်ရေးနည်းစနစ်ကဲ့သို့သော ရှားပါးသိုင်းပညာရပ်များအထိပါ တိုးတက်ပြန့်နှံ့လာခဲ့လေသည်။

ဤမတူညီသော နည်းပြများအားလုံးသည် တစ်ဦးချင်းစီအနေဖြင့် အချို့သော တိုက်ခိုက်ရေးကျောင်းတော်များ၏ အခြေခံများကို ကျွမ်းကျင်မှုမှလွဲ၍ ထူးထူးခြားခြား ထင်ပေါ်နေခြင်းမျိုး မရှိကြပေ။

သို့သော် ထိုအစောပိုင်းနှစ်များတွင် အသက်မွေးဝမ်းကျောင်းပြုနိုင်ရန်အတွက် သူတို့တစ်ဦးချင်းစီ စုပေါင်းကာ အဖွဲ့အစည်းတစ်ခုတည်းအနေဖြင့် ပူးတွဲသင်တန်းများ ဖွင့်လှစ်ရန် ဆုံးဖြတ်ခဲ့ကြပြီး ၎င်းကပင် ယနေ့ခေတ် ခန်းမတစ်ထောင် တိုက်ပွဲနန်းတော်၏ အခြေခံမူဝါဒ ဖြစ်လာခဲ့ချေသည်။

ထိုနည်းပြများသည် သူတို့၏ ကျင့်ကြံခြင်းနည်းစနစ်များကို အချင်းချင်း ဖလှယ်ခဲ့ကြကာ၊ မိမိတို့၏ ကျင့်စဥ်များ တိုးတက်စေရန် အချင်းချင်း လမ်းညွှန်မှုများ ပေးခဲ့ကြပြီးနောက် တပည့်များကို စတင်လက်ခံခဲ့ကြသည်။

အစပိုင်းတွင် တိုးတက်မှုနှေးကွေးခဲ့သော်လည်း၊ လူအများအား မတူညီသော တိုက်ခိုက်ရေးကျောင်းတော်များမှ ကျင့်စဥ်မျိုးစုံကို သင်ကြားပေးမည့် ဆွဲဆောင်မှုကြောင့် သူတို့၏ အရေအတွက်မှာ တဖြည်းဖြည်း တိုးပွားလာခဲ့လေ၏။

သူတို့သည် သာမန်တပည့်များနှင့် အဓိကတပည့်များကို လက်ခံခဲ့ကြသည်။ သာမန်တပည့်များသည် သတ်မှတ်ထားသော ငွေကြေးပမာဏကို ပေးချေရပြီး၊ သူတို့ပေးချေသော ပမာဏနှင့်အညီ ကျင့်စဥ်များကို သင်ကြားခွင့် ရရှိမည်ဖြစ်သည်။

သင်တန်းကာလကိုလည်း ထည့်သွင်းစဉ်းစားထား၏။ သင်တန်းကာလ ပြီးဆုံးသွားပြီးနောက်တွင် သူတို့သည် လွတ်လပ်စွာ ထွက်ခွာခွင့်ရှိပြီး တိုက်ပွဲနန်းတော်အပေါ် အကြွေးတင်ခြင်း သို့မဟုတ် ချည်နှောင်ခံရခြင်းမျိုး မရှိပေ။

သင်ကြားပေးမှုအတွက် အပြန်အလှန်အနေဖြင့် အစပိုင်းတွင် တိုက်ပွဲနန်းတော်က ဝိညာဉ်ကျောက်တုံးများကို အခကြေးငွေအဖြစ် လက်ခံခဲ့သော်လည်း အချိန်ကြာလာသည်နှင့်အမျှ အဆင့်အပေါ် မူတည်၍ သူတို့၏ ငွေပေးချေမှုပုံစံကို ပြောင်းလဲခဲ့သည်။

အသေးအဖွဲ့ သင်တန်းများအတွက် ဝိညာဉ်ကျောက်တုံးများကို လက်ခံသော်လည်း၊ ပိုမိုပြင်းထန်ခက်ခဲသော သင်တန်းများအတွက်မူ သီးသန့်ဝိညာဉ်ဆေးပင်များ၊ သဘာဝရတနာများ၊ သို့မဟုတ် အဆင့်တစ်ခုရှိသော လက်နက်များနှင့် မှော်ပစ္စည်းများကဲ့သို့သော အခြားတန်ဖိုးရှိ အရင်းအမြစ်များကို ရွေးချယ်လက်ခံခဲ့ကြလေသည်။

အဓိကတပည့်များ၏ လည်ပတ်ပုံမှာမူ အနည်းငယ် ကွဲပြားပေသည်။ အကယ်၍ အဓိကတပည့်တစ်ဦး ဖြစ်လာခဲ့ပါက သူ၏ ကံကြမ္မာသည် ခန်းမတစ်ထောင် တိုက်ပွဲနန်းတော်နှင့် ဆက်နွှယ်သွားမည်ဖြစ်သည်။

သို့သော် အပြန်အလှန်အားဖြင့် မိမိတွင် ပါရမီသာရှိပါက တိုက်ပွဲနန်းတော်မှ ပံ့ပိုးပေးနိုင်သော ကျင့်စဥ်အားလုံးကို သင်ယူခွင့် ရရှိမည်ဖြစ်လေ၏။

အဓိကတပည့်များကို နှစ်မျိုးခွဲထားသည်။

တစ်ခုမှာ တိုက်ခိုက်ရေးကျောင်းတော်တစ်ခု၏ ကျင့်စဥ်များကို သင်ယူရမည့် အမွေခံတပည့် ဖြစ်ပြီး၊ အခြားတစ်ခုမှာမူ ကျောင်းတော်နှင့် ခန်းမတစ်ခုထက်မကသော ကျင့်စဥ်များကို ထိုခန်းမများရှိ ထိပ်တန်းပုဂ္ဂိုလ်များကိုပင် ကျော်လွန်သည့်အဆင့်အထိ သင်ယူနိုင်စွမ်းရှိသော ပါရမီရှင်များဖြစ်ကြသဖြင့် ပါရမီရှင်များထဲမှ ပြိုင်ဘက်ကင်းပါရမီရှင်ဟု သတ်မှတ်နိုင်သည့် အမွေခံနန်းတော်တပည့်ပင် ဖြစ်ပေသည်။

တိုက်ပွဲနန်းတော်သည် အထူးသဖြင့် စတင်လက်ခံခဲ့သော တပည့်အရေအတွက်များမှတစ်ဆင့် တဖြည်းဖြည်း ကြီးထွားလာခဲ့သည်။

ထို့အတူ အဓိကတပည့် အရေအတွက်မှာလည်း တိုးများလာခဲ့ပြီး သူတို့ထဲတွင် ခန်းမတစ်ထောင် တိုက်ပွဲနန်းတော်၏ နောက်ထပ်မဏ္ဍိုင်များအဖြစ် တာဝန်ယူမည့် မိစ္ဆာဆန်သော ပါရမီရှင်အချို့ ပါဝင်လာခြင်းကြောင့် ဂုဏ်သတင်းမှာလည်း ကြီးမားလာခဲ့လေ၏။

မတူညီသော ကျင့်စဥ်များကို သင်ကြားပေးသည့် နည်းပြအယောက် ၅၀ ခန့်ဖြင့် စတင်ခဲ့ရာမှ ခန်းမတစ်ထောင်အထိ ဖြည်းဖြည်းချင်း ကြီးထွားလာခဲ့ခြင်း ဖြစ်သည်။

ခန်းမတစ်ခုစီသည် ကျင့်စဥ်တစ်ခုကို ကိုယ်စားပြုပြီး၊ ခန်းမတစ်ခုစီတွင် နယ်ပယ်အဆင့်၏ အထွတ်အထိပ်အဆင့်တွင်ရှိသော ခန်းမသခင်တစ်ဦးစီ ရှိကြရာ အခြေခံအားဖြင့် ခန်းမတစ်ထောင် တိုက်ပွဲနန်းတော်တွင် အထွတ်အထိပ် နယ်ပယ်အဆင့် ကျွမ်းကျင်သူ တစ်ထောင်တိတိ ရှိနေသည်ဟု ဆိုလိုပေသည်။

ထို့အပြင် သူတို့တွင် ကျင့်ကြံရေးနည်းစနစ် အမျိုးအစားပေါင်းစုံဖြင့် ပြည့်နှက်နေသော အကြီးမားဆုံး စာကြည့်တိုက်ကြီးတစ်ခုလည်း ရှိလေသည်။

သိမ်းဆည်းထားသော စုဆောင်းမှုအချို့သည် သူတို့၏ ကိုယ်ပိုင်နည်းပြများမှ ဖန်တီးထားခြင်းဖြစ်ပြီး၊ ကျန်အရာများမှာ သင်တန်းကြေးအဖြစ် ဝယ်ယူထားခြင်း သို့မဟုတ် လဲလှယ်ထားခြင်းများ ဖြစ်ကြ၏။

လက်ရှိဂုဏ်သတင်းအရ သူတို့သည် ယခင်ကကဲ့သို့ တပည့်များကို လက်ခံနေဆဲ ဖြစ်သော်လည်း၊ လက်ရှိလိုအပ်ချက်များနှင့် ထိုလိုအပ်ချက်များကို ဖြည့်ဆည်းပေးနိုင်မည့် နည်းပြအရေအတွက် ကွာဟမှုများကြောင့် ခန်းမတစ်ထောင် တိုက်ပွဲနန်းတော်သည် ကုန်ကျစရိတ်များကို တိုးမြှင့်ခြင်း သို့မဟုတ် တပည့်အဖြစ် အသိအမှတ်မပြုမီ တင်းကျပ်သော စမ်းသပ်မှုများကို ထည့်သွင်းခြင်းစသည်တို့ကို အသုံးပြုခဲ့ရလေသည်။

ထိုနေရာတွင် တပည့်အဖြစ် လက်ခံခံရခြင်းသည် ယခုအခါ ဂုဏ်ပြုတံဆိပ်တစ်ခုအဖြစ်ပင် သတ်မှတ်နိုင်နေပြီ ဖြစ်သည်။

ဝင်ရောက်ရန် မည်မျှခက်ခဲသည်ကို ကြည့်လျှင် သတ်မှတ်ချက်များသည် အဆင့် ၂ မှ အဆင့် ၁ အဖွဲ့အစည်းများ၏ လက်ခံမှုစံနှုန်းများနှင့် တစ်ထပ်တည်းကျနေသည်ဟု ဆိုနိုင်ပေသည်။

ဝင်ရောက်ခွင့်ရရှိသူများသည် ဝင်ရောက်နိုင်ရန် လုံလောက်သော အရင်းအနှီး ရှိကြသူများ သို့မဟုတ် ဝင်ရောက်ရန် ထိုက်တန်သော ပါရမီရှိသူများသာ ဖြစ်ကြ၏။

ယန်ချင်းသည် ၎င်း၏ ရာထူးတိုးအခမ်းအနားတွင် ခန်းမတစ်ထောင် တိုက်ပွဲနန်းတော်ကို တွေ့လိုက်ရသည့်တိုင် အလွန်အမင်း အံ့ဩသွားခြင်း မရှိခဲ့ပေ။

အဖွဲ့အစည်းနှင့် တိုက်ပွဲနန်းတော်တို့သည် အလွန်ရင်းနှီးသော ဆက်ဆံရေးရှိကြပြီး အကယ်ဒမီမှ အဖွဲ့ဝင်များပင်လျှင် ပို၍ရင်းနှီးကြလေသည်။

အကယ်ဒမီသည် တိုက်ခိုက်ရေးအပြင် အခြားသော နယ်ပယ်များကိုပါ ထည့်သွင်းထားသည်မှလွဲ၍ တိုက်ပွဲနန်းတော်၏ စိတ်ကူးအယူအဆများကို အခြေခံကာ တည်ထောင်ထားခြင်း ဖြစ်သည်ဟု မှတ်ယူနိုင်ပေသည်။

တိုက်ပွဲနန်းတော်နှင့် အကယ်ဒမီတို့ကြားတွင် အပြန်အလှန် ဖလှယ်မှုများစွာ ရှိတတ်ကြသည်။ အကယ်ဒမီမှ နည်းပြအချို့သည် တစ်ချိန်က တိုက်ပွဲနန်းတော်၏ တပည့်များ ဖြစ်ခဲ့ကြဖူးသည်။

တိုက်ခိုက်ရေးသက်သက်ဟု ဆိုလာလျှင် ခန်းမတစ်ထောင် တိုက်ပွဲနန်းတော်၏ အဓိကတပည့်များသည် အခြားသူများထက် တစ်ပန်းသာနေကြောင်း ယန်ချင်း ဝန်ခံရမည် ဖြစ်သည်။ အဖွဲ့အစည်းမှသူများပင်လျှင် သူတို့ကို ရင်ဆိုင်ရာတွင် ရုန်းကန်ရမည် ဖြစ်သည်။

အကယ်ဒမီမှ ဘွဲ့ရရန် သူတို့၏ ကြိုတင်လိုအပ်ချက်များထဲမှ တစ်ခုမှာ ခန်းမတစ်ထောင် တိုက်ပွဲနန်းတော်မှ ရွှေတံဆိပ်တစ်ခု ရရှိရန်ပင် ဖြစ်လေ၏။

တိုက်ပွဲနန်းတော်သည် ခန်းမတစ်ခုလျှင် လူ ၄,၀၀၀ ကို လက်ခံခဲ့သဖြင့် သူတို့၏ စုစုပေါင်း လက်ခံထားသော တပည့်အရေအတွက်မှာ ၄၀၀,၀၀၀ ရှိလေသည်။

ထိုအရေအတွက်အတွင်းတွင် ပုံမှန်ပြိုင်ပွဲများကို ကျင်းပလေ့ရှိပြီး ထိုပြိုင်ပွဲများ၏ ရလဒ်များအပေါ် မူတည်၍ အဆင့်သတ်မှတ်ချက်တစ်ခု ပေါ်ထွက်လာမည် ဖြစ်သည်။

အမြင့်ဆုံးအဆင့်ရှိသူ ၂၀၀,၀၀၀ သည် သူတို့၏ အောင်မြင်မှုများကို အသိအမှတ်ပြုသောအားဖြင့် တံဆိပ်တစ်ခုကို ရရှိကြမည် ဖြစ်သည်။

အဆင့် ၂၀၀,၀၀၀ မှ ၁၀၀,၀၀၀ အတွင်းရှိသူများသည် သံတံဆိပ်ကို ရရှိမည်ဖြစ်သည်။

အဆင့် ၉၉,၉၉၉ မှ ၅၀,၀၀၀ အတွင်းရှိသူများသည် ကြေးတံဆိပ်ကို ရရှိမည်ဖြစ်သည်။

အဆင့် ၄၉,၉၉၉ မှ ၂၀,၀၀၀ အတွင်းရှိသူများသည် ငွေတံဆိပ်ကို ရရှိမည်ဖြစ်သည်။

အဆင့် ၁၉,၉၉၉ မှ ၁၀၁ အတွင်းရှိသူများသည် ရွှေတံဆိပ်ကို ရရှိမည်ဖြစ်ပြီး ခရမ်းရောင်တံဆိပ်ကိုမူ ထိပ်ဆုံးအဆင့် ၁၀၀ ကိုသာ ပေးအပ်လေသည်။

ယန်ချင်းသည် ရွှေတံဆိပ်နှင့် နောက်ဆုံးတွင် ခရမ်းရောင်တံဆိပ်ကို မရရှိမီ တိုက်ပွဲနန်းတော်အတွင်း၌ သူ၏ ဘဝတစ်လျှောက် အကြီးမားဆုံး ရှုံးနိမ့်မှုအချို့ကို ကြုံတွေ့ခဲ့ရသည်။

ဤသို့ဖြစ်ရခြင်း၏ အကြောင်းရင်းမှာ သူတို့သည် အခြားတပည့်များကိုသာမက အမွေခံတပည့်များကိုပါ ရင်ဆိုင်တိုက်ခိုက်ခဲ့ရသောကြောင့် ဖြစ်သည်။

သူ၏ နှစ်အတွင်း၌ လွယ်လွယ်ကူကူ ဖြတ်ကျော်နိုင်ခဲ့သည့် တစ်ဦးတည်းသောသူမှာ ခန်းဟွေ့လန်ပင် ဖြစ်လေ၏။

....

သူတို့၏ ခုံနေရာများသို့ သွားရောက်စဉ် အဖွဲ့ဝင်များကို ယန်ချင်က နှုတ်ဆက်သည့်အနေဖြင့် ခေါင်းညိတ်ပြလိုက်သည်။ ထိုအဖွဲ့တွင် လူခုနစ်ဦး ပါဝင်သည်။

ခေါင်းဆောင်မှာ အသက် လေးဆယ်ကျော်အရွယ်ခန့်ရှိသော အမျိုးသားတစ်ဦး ဖြစ်သည်။

သူသည် အနက်တစ်ဝက်၊ အဖြူတစ်ဝက်ရှိသော သာမန်တိုက်ပွဲနန်းတော် ဝတ်ရုံကို ဝတ်ဆင်ထားသော်လည်း၊ သူ၏ ဝတ်ရုံပေါ်တွင် လေပြင်းများရစ်ပတ်နေသော လှံတစ်လက်၏ အမှတ်အသားတစ်ခု ပါရှိလေသည်။

သူ့အား ပေးထားသော သတင်းအချက်အလက်များအရ ထိုသူမှာ လက်ရှိ လှံခန်းမ၏ ခန်းမသခင်ဖြစ်ကြောင်း ယန်ချင်း သိထားပေသည်။

အခြားသော အဖွဲ့ဝင်ခြောက်ဦးသည်လည်း တူညီသော အဖြူအနက်ဝတ်ရုံများကို ဝတ်ဆင်ထားကြသော်လည်း သူတို့တွင် မတူညီသော အမှတ်အသားများ ရှိကြသဖြင့် လူနှစ်ဦးမှလွဲ၍ ကျန်သူများသည် မတူညီသော ခန်းမများမှဖြစ်ကြောင်း သိနိုင်ပေသည်။

ထိုနှစ်ဦးအနက် တစ်ဦးမှာ အသက် နှစ်ဆယ်ကျော်အရွယ်ခန့် ဆံပင်အနီရောင်နှင့် မိန်းမငယ်လေးတစ်ဦးဖြစ်ပြီး၊ အခြားတစ်ဦးမှာလည်း အသက် နှစ်ဆယ်ကျော်အရွယ်ခန့်ဖြစ်ကာ ငွေရောင်ဆံပင်နှင့် လူငယ်လေးတစ်ဦး ဖြစ်သည်။

သူတို့၏ ဝတ်ရုံများပေါ်တွင် နန်းတော်တစ်ခု ပါရှိသဖြင့် သူတို့သည် အမွေခံနန်းတော်တပည့်များ ဖြစ်ကြောင်း ဆိုလိုလေသည်။

ရွှေတံဆိပ်ကို အရယူသည့်အချိန်ကာလအတွင်းတွင် ယန်ချင်က ထိုနှစ်ဦးထဲမှ တစ်ဦးနှင့် သရေကျခဲ့ပြီး၊ နောက်တစ်ဦးကိုမူ ရှုံးနိမ့်ခဲ့ဖူးသဖြင့် ထိုသူနှစ်ဦးလုံးကို မှတ်မိနေခဲ့၏။

သူက ဆံပင်အနီရောင်နှင့် မိန်းကလေးကို သရေကျခဲ့ပြီး၊ ငွေရောင်ဆံပင်နှင့် လူငယ်ကိုမူ ရှုံးနိမ့်ခဲ့ရခြင်း ဖြစ်သည်။

ထိုအချိန်ကာလအတွင်း ရှုံးနိမ့်မှုအနည်းငယ် ကြုံတွေ့ခဲ့ရပြီး ထိုငွေရောင်ဆံပင်နှင့် လူငယ်လေးသည်လည်း ထိုကာလအတွင်း အဆင့် ၄ နေရာတွင် ရပ်တည်နိုင်ခဲ့သဖြင့် ထိုရှုံးနိမ့်မှုက သူ့အတွက် သိပ်ပြီး ဝန်ပိစေခြင်းမျိုး မရှိခဲ့ပေ။

ယန်ချင်းကိုယ်တိုင်လည်း အဆင့် ၁၃ နေရာတွင် ရပ်တည်နိုင်ခဲ့သဖြင့် အခြေအနေ သိပ်မဆိုးလှချေ။

ဤရလဒ်သည် အလင်းဖြာဓားဂိုဏ်းမှ ဓားနှလုံးသားတပည့်တစ်ဦးက အဆင့် ၁ နေရာကို ရယူသွားခဲ့ပြီး၊ ခန်းဟွေ့လန်ကသာ အဆင့် ၂ နေရာကို မယူခဲ့လျှင် သူ့အတွက် ကျေနပ်လက်ခံနိုင်စရာ ဖြစ်ပေလိမ့်မည်။

သူ့ကို အဒေါသထွက်ဆုံးဖြစ်စေသည့်ကိစ္စကား ခန်းဟွေ့လန်၏ အကျင့်ဆိုးများသာ မပါဝင်ခဲ့ပါက ပထမနေရာသည် သူ၏နေရာ သေချာပေါက် ဖြစ်ခဲ့မည်ဆိုသည့် အချက်ပင် ဖြစ်လေ၏။