ဖုန်းလဲ့၊ အံ့အားသင့်ဖွယ်

"စီနီယာစကြဝဠာပြာ ကျုပ် မေးတာကို စိတ်မရှိဘူးဆိုရင် လက်ထောက်ညွှန်ကြားရေးမှူး ကျွင်းဖေးက အခုရောက်နေတဲ့ တခြားဝိညာဉ်ဖွဲ့စည်းခြင်းအဆင့် ကျွမ်းကျင်သူတွေနဲ့ ယှဉ်ရင် ဘယ်လိုနေလဲ။"

ယန်ချင်းက တုံ့ဆိုင်းဆိုင်းဖြင့် မေးလိုက်၏။

သူသည် ဤမေးခွန်း၏ အဖြေကို သိရလျှင်ဖြစ်စေ၊ မသိရလျှင်ဖြစ်စေ စိတ်မအေးနိုင်လောက်သည့် ထူးဆန်းသော အခြေအနေတစ်ခုသို့ ရောက်ရှိနေပေသည်။

အထူးသဖြင့် လက်ထောက်ညွှန်ကြားရေးမှူး ကျွင်းဖေးသည် လက်ရှိရောက်နေသော ဝိညာဉ်ဖွဲ့စည်းခြင်းအဆင့်ကျွမ်းကျင်သူ ကိုးဦးထဲတွင် အသန်မာဆုံးထဲမှ တစ်ဦးဖြစ်သည်ဟု အဖြေရလာမည်ကို ပို၍ပင် စိုးရိမ်နေမိချေသည်။

"အင်း... ဒါက ပြောဖို့တော့ သိပ်မလွယ်လှဘူး။ ဘာလို့လဲဆိုတော့ ဝိညာဉ်ဖွဲ့စည်းခြင်းအဆင့် ကျွမ်းကျင်သူတွေဆိုတာ နည်းလမ်းပေါင်းစုံ ရှိကြတာကိုး။”

“သူတို့အချင်းချင်း တကယ်မရင်ဆိုင်ရမချင်း တစ်ယောက်ရဲ့ စစ်မှန်တဲ့စွမ်းအားကို ဘယ်တော့မှ သိနိုင်မှာမဟုတ်ဘူးလေ။"

"ဒါပေမဲ့ အပြင်ပန်းကြည့်ရသလောက် အခြေခံစွမ်းရည်ကို ပြောရမယ်ဆိုရင်တော့ သူမက အားအနည်းဆုံးတော့ မဟုတ်ပါဘူး။ မင်းက အဲဒါကို စိုးရိမ်နေတာလား။"

စကြဝဠာပြာက ရယ်သွမ်းသွေးချင်သည့် လေသံလေးစွက်ကာ ပြောလာလေသည်။

"ဒီလောက်လေးပဲ မဟုတ်ပါစေနဲ့လို့ မျှော်လင့်ပါတယ်။ ကျေးဇူးပြုပြီး စီနီယာစကြဝဠာပြာ အသေးစိတ်လေးတွေကို ကပ်စေးမနှဲပါနဲ့ဗျာ။"

အဖွဲ့အစည်းမှ စီနီယာများ လျှို့ဝှက်သတင်းအချက်အလက်များနှင့် ပတ်သက်လာလျှင် အမြဲသုံးလေ့ရှိသော နည်းလမ်းမျိုးကို စကြဝဠာပြာ အသုံးမချစေရန် ယန်ချင်း လက်ချောင်းလေးများ ယှက်ကာ ဆုတောင်းနေမိတော့သည်။

ထိုစီနီယာများသည် စပ်စုချင်စိတ်ကို အနည်းငယ်မျှ ပြေပျောက်စေရုံလောက်သာ သတင်းအစအနလေးများ ပေးတတ်ပြီး အများစုကိုမူ အဖြေမပေးဘဲ ချန်ထားခဲ့တတ်ပေသည်။

ထို့ကြောင့် သူတို့ပေးသော အဖြေများက လူတစ်ယောက်ကို အဖြေထက် မေးခွန်းများသာ ပို၍ တိုးလာစေတတ်ချေသည်။

စကြဝဠာပြာ၏ ရှင်းပြချက်သည် ဤမျှဖြင့် မပြီးဆုံးသေးဘဲ ထပ်ရှိနေရန် ယန်ချင်းမျှော်လင့်နေမိ၏။ သို့မဟုတ်ပါက ဤအခမ်းအနားတစ်လျှောက်လုံး သူ စိတ်မသက်မသာ ဖြစ်နေရမည်သာ။

ကံကောင်းထောက်မစွာဖြင့် စကြဝဠာပြာသည် သူ့ကို စိတ်ပျက်အောင်မလုပ်ဘဲ အသေးစိတ် ထပ်မံရှင်းပြလာလေသည်။

"ယန်ချင်း ငါ ထပ်ပြောမှာက အကြမ်းဖျင်းရလဒ်သက်သက်ပဲ အမှန်တကယ်ရလဒ်တော့ မဟုတ်ဘူး။ တကယ့်တိုက်ပွဲသာ ဖြစ်လာခဲ့ရင် ရလဒ်တွေက ကွဲပြားသွားနိုင်တယ်။"

"ယွမ်ဟွေ့လင်က ကိုးယောက်ထဲမှာ အားအနည်းဆုံးပဲ။"

စကြဝဠာပြာက ဆိုလိုက်သည်။

"သူမက ဘယ်သူလဲ.."

စကြဝဠာပြာအနေဖြင့် ရှင်းပြရာတွင် အနည်းငယ် ပိုကြိုးစားသင့်သည်ဟု တွေးလိုက်ရင်း ယန်ချင်းက မျက်လုံးလှန်ကာ မေးလိုက်၏။

"စောစောက မင်း စိုက်ကြည့်နေတဲ့ မိန်းကလေးလေ"

စကြဝဠာပြာက အဓိပ္ပာယ်ပါပါ ပြောလိုက်လေသည်။

ယန်ချင်းသည် ရှက်ရမ်းရမ်းကာ ရယ်မောလိုက်ရင်း ပူနွေးနေသော သူ၏နှာခေါင်းကို ပွတ်သပ်လိုက်၏။

"နည်းစနစ်ပိုင်းအရ သူမက အားအနည်းဆုံးဖြစ်ပေမဲ့ သူမက ဝိညာဉ်ကျင့်ကြံသူတစ်ယောက် ဖြစ်နေလို့ပဲ”

“သူမ ဒီမှာရှိနေတာကိုပဲ မင်း ကျေးဇူးတင်သင့်တယ်။ တစ်ခုခု မှားယွင်းလာရင်တောင် ကြိုတင်သိနိုင်မယ့် ပထမဆုံးလူတွေထဲမှာ သူမ ပါလိမ့်မယ်။ သူမဆီမှာ ရှားပါးတဲ့ ခန္ဓာကိုယ်ဖွဲ့စည်းပုံရှိတယ်။”

“ငါထင်တာတော့ သက်တံ့ပုလဲခန္ဓာကိုယ်ပဲ။ အဲဒါက သူမကို ဒြပ်စင်စွမ်းအင်ငါးမျိုးပေါ်မှာ အခြေခံတဲ့ ကျင့်စဉ်တွေအပေါ် အာရုံခံနိုင်စွမ်း မြင့်မားစေတယ်။"

"နောက်တစ်ယောက်ကတော့ အထူးစုံစမ်းစစ်ဆေးရေးက လက်ထောက်ညွှန်ကြားရေးမှူး ဖုန်းလဲ့ပဲ။ ဒါပေမဲ့ ငါက ဒီရလဒ်တွေကို အကြွင်းမဲ့မယုံဖို့ ပြောရတဲ့ အကြောင်းရင်းက သူပဲ။"

"အပြင်ပန်းမှာ သူက အားနည်းသယောင် ရှိပေမဲ့ အတွင်းကျကျ ကြည့်မယ်ဆိုရင်တော့ သူက အဘွားအိုကျိုးဟွမ်လိုပဲ အန္တရာယ်များတဲ့ ခံစားချက်မျိုး ပေးစွမ်းနိုင်တယ်..."

"သူက စတုတ္ထမြောက် အစွမ်းအထက်ဆုံးပဲ။"

စကြဝဠာပြာ ရှင်းပြနေဆဲမှာပင် ပိုးအိမ်စိမ်းက ရုတ်တရက် ဝင်ပြောလိုက်လေသည်။

"ဒါကြောင့်ကိုး..."

စကြဝဠာပြာက ခပ်တိုးတိုးရေရွတ်လိုက်ပြီးနောက် ဆက်လက်ပြောပြလာ၏။

"အခု အဆင့်တက်သွားတဲ့ လက်ထောက်ညွှန်ကြားရေးမှူး ဖုန်းလဲ့ပြီးရင်တော့ လက်ထောက်ညွှန်ကြားရေးမှူးကျွင်းဖေး လာလိမ့်မယ်။ ဆိုလိုတာက သူမက နောက်ဆုံးပိတ်ရဲ့ အရှေ့တစ်နေရာမှာ ရှိနေတယ်ပေါ့။"

"သူမရဲ့နောက်မှာတော့ ဒုတိယအဓိပတိ ဝူလင်ရှိမယ်။ အလားအလာပိုင်းကို ကြည့်ရင်တော့ သူက အားလုံးထဲမှာ အသက်အငယ်ဆုံးဖြစ်တဲ့အတွက် ဖြစ်နိုင်ခြေ အလားအလာတွေ အများကြီး ပေးစွမ်းနိုင်တယ်။"

ဒုတိယအဓိပတိဝူလင်၏ စွမ်းဆောင်ရည်များကြောင့် ယန်ချင်း ထပ်မံအံ့အားသင့်သွားရပြန်သည်။ သို့သော် သေချာစဉ်းစားကြည့်လိုက်သောအခါ အတိုင်းအတာတစ်ခုအထိတော့ ယုတ္တိတန်နေပေသည်။

ဒုတိယအဓိပတိ ဝူလင်သည် အဖွဲ့အစည်း၏ ကျောရိုးများထဲမှ တစ်ခု၏ အကြီးအကဲဖြစ်သည်။ ထိုသို့သော ရာထူးနေရာတွင်ရှိသူသည် အစွမ်းအစ အတန်အသင့်တော့ ရှိရမည်သာ။

"သူ့ပြီးရင်တော့ ကျိုးဟွမ်ပဲ။ သူမက အိုမင်းမစွမ်းပုံပေါက်ပေမဲ့ သူမရဲ့ နှာခေါင်းမှုတ်သံတစ်ချက်နဲ့တင် အထွတ်အထိပ်အဆင့် ခုခံကာကွယ်ရေးရတနာ အခုနှစ်ဆယ်ကို အပေါက်ဖောက်ပစ်နိုင်စွမ်းရှိတယ်။”

“သူမက ရုပ်ပိုင်းဆိုင်ရာနဲ့ မျက်နှာချင်းဆိုင် တိုက်ပွဲတွေမှာ ရက်စက်ကြမ်းကြုတ်တဲ့ တိုက်ခိုက်ရေးသမားတစ်ယောက်ပဲ။ ခန်းမတစ်ထောင်တိုက်ပွဲနန်းတော်က အကြီးအကဲတချို့ဆို သူမကို သေမတတ် ကြောက်ရတယ်လေ။"

စကြဝဠာပြာက ခပ်ဖွဖွရယ်မောလျက် ဆိုလေသည်။

ယန်ချင်းသည် ပို၍ကြားရလေလေ သက်သာရာရသွားသော အမူအရာက သူ၏မျက်နှာပေါ်တွင် ပိုမိုထင်ဟပ်လာလေလေဖြစ်၏။

ခန်းမတစ်ထောင်တိုက်ပွဲနန်းတော်မှ အကြီးအကဲများ၏ နှလုံးသားထဲအထိ ကြောက်ရွံ့မှုများ ထိုးသွင်းပေးနိုင်သူတစ်ဦးသည် အားထားရလောက်သူပင်။

တိုက်ပွဲနန်းတော်၏ အကြီးအကဲတိုင်းသည် တစ်ချိန်က ခန်းမသခင်များ ဖြစ်ခဲ့ကြပြီး ဝိညာဉ်ဖွဲ့စည်းခြင်းအဆင့်သို့ရောက်သည်နှင့် ထိုရာထူးကို စွန့်လွှတ်ခဲ့ကြသူများ ဖြစ်ပေသည်။

သူ အသက်ရှင်နိုင်မည့် အခွင့်အရေးများ မဆိုးလှကြောင်း သိလိုက်ရသဖြင့် ယန်ချင်း၏ ပခုံးများ အနည်းငယ်ပြေလျော့သွားကာ အင်အားသစ်များ ပြန်လည်ပြည့်ဖြိုးလာတော့သည်။

အဘွားအိုသည်ပင် ဤမျှစွမ်းအားကြီးနေပါလျှင် ကျန်ရှိနေသော လေးဦးက မည်သို့ရှိနိုင်မည်နည်း။

ဤသည်မှာ ပိုးအိမ်စိမ်း၏ ခန့်မှန်းချက်အရ စတုတ္ထမြောက် အသန်မာဆုံးဖြစ်သော လက်ထောက်ညွှန်ကြားရေးမှူး ဖုန်းလဲ့ကို ထည့်မတွက်ထားသေးချေ။

ယန်ချင်း၏အမြင်တွင် ပိုးအိမ်စိမ်းသည် စကြဝဠာပြာထက် ပို၍ယုံကြည်စိတ်ချရကြောင်း ထင်ရှားပေသည်။

'သူတို့ရဲ့ ကြောက်စရာကောင်းတဲ့ အလုပ်ပတ်ဝန်းကျင် ရှိနေပေမဲ့ ဒီအဖွဲ့အစည်းကို ငါသဘောကျတဲ့ အကြောင်းရင်းတစ်ခုတော့ ရှိမယ်ဆိုတာ သိသားပဲ။'

ယန်ချင်းက နားရွက်များကို သပ်လိုက်ရင်း ရွှင်မြူးစွာ တွေးလိုက်မိသည်။

"ကျိုးဟွမ်ရဲ့နောက်မှာတော့ စုပိုင်ပဲ။ မင်း မနာလိုတက်မက်စွာနဲ့ ကြည့်နေခဲ့တဲ့ အဲဒီလူလတ်ပိုင်းပေါ့... သူက ဓားတာအိုမှာ ကျွမ်းကျင်တယ်။"

"သူ့ပြီးရင်တော့ ခန္ဓာကိုယ်တောင့်တောင့်တင်းတင်းနဲ့ အကြီးအကဲ ချီချန်လာလိမ့်မယ်။ သူ့ကိစ္စမှာတော့ အကဲဖြတ်မှုက အခြေခံအဆင့်မှာပဲ ရှိသေးတယ်။”

“ဒါပေမဲ့ ပန်းပဲဆရာတစ်ယောက်အနေနဲ့ သူ့ရဲ့လက်နက်တွေကိုပါ ထည့်တွက်မယ်ဆိုရင်တော့ သူက နောက်နှစ်ယောက်ကို ရှုံးမှာမဟုတ်ဘူး..."

စကြဝဠာပြာက ပြောလိုက်ပြီးနောက် ရုတ်တရက် ရပ်တန့်သွားလေသည်။

"နောက်နှစ်ယောက်အတွက်တော့ ငါ သူတို့ရဲ့စွမ်းအားကို တိတိကျကျ မခန့်မှန်းနိုင်ဘူး။ ဘာလို့လဲဆိုတော့ သူတို့က ငါ့ထက် မစွမ်းရင်တောင် ငါနဲ့ အဆင့်တူလောက် ဖြစ်နေလို့ပဲ။ ဒါကြောင့် ဘယ်သူက ပိုသန်မာလဲဆိုတာကို ငါ မပြောနိုင်ဘူး။"

"ယန်ချင်း မင်း စိတ်ပူစရာမလိုပါဘူး..”

စကြဝဠာပြာက ဆိုလိုက်သည်။

အသန်မာဆုံး နှစ်ဦးမှာ ဒုတိယဥက္ကဋ္ဌမိုယဲ့နှင့် တရားသူကြီးချုပ် လိုင်နင်တို့ ဖြစ်နေခြင်းက ယန်ချင်းအား သိပ်ပြီးအံ့အားသင့်မသွားစေခဲ့ချေ။

တစ်ဦးက ရာထူးအရဆိုလျှင် တစ်ဖွဲ့အစည်းလုံး၏ ဥက္ကဋ္ဌအောက် တစ်ဆင့်သာနိမ့်ပြီး အခြားတစ်ဦးမှာ အဖွဲ့အစည်းအတွင်းရှိ တရားသူကြီးများအားလုံး၏ အကြီးအကဲဖြစ်ပေသည်။ ထိုရာထူးနေရာများကို ကိုင်စွဲထားသူများအနေဖြင့် ထိုမျှလောက် စွမ်းအားကြီးမားနေခြင်းမှာ အထူးအဆန်း မဟုတ်တော့ပေ။

...

စကြဝဠာပြာနှင့် အခြားသူများ ပြောဆိုနေကြသော လူခြောက်ဦးကို နောက်ဆုံးတွင် အာရုံခံမိသွားသောကြောင့် ယန်ချင်းအနေဖြင့် သူ၏ တွေ့ရှိခါစ လုံခြုံမှုခံစားချက်တွင် ကြာကြာသာယာနေရန် အချိန်များများ မရလိုက်ချေ။

ကံကြမ္မာဖုံးကွယ်၏ အကျိုးသက်ရောက်မှုများကြောင့် သူ၏ မြင့်မားလာသော အာရုံခံစားမှုများကျေးဇူးကြောင့် သူသည် အရာဝတ္ထုများကို ပိုမိုဝေးကွာသော အကွာအဝေးမှ ပိုမိုရှင်းလင်းပြတ်သားစွာ အာရုံခံနိုင်လာလေသည်။

ထိုလူခြောက်ဦးထဲမှ သူတို့၏ စွမ်းအားအဆင့်များကို အကြမ်းဖျင်း ခန့်မှန်းနိုင်သော်လည်း ကျန်နှစ်ဦးမှာမူ ကျင့်ကြံသူများ မဟုတ်သည့်အလား သာမန်အတိုင်းပင် ဖြစ်နေပုံပေါ်ပေသည်။

ဤသည်မှာ ယန်ချင်းနှင့်အတူ အထက်တွင်ရှိနေသော ဝိညာဉ်ဖွဲ့စည်းခြင်းအဆင့် ကျွမ်းကျင်သူ ကိုးဦးထံမှ သူရရှိခဲ့သော ခံစားချက်မျိုးပင် ဖြစ်သည်။

သူတို့အားလုံးသည် ကျင့်ကြံခြင်းစွမ်းရည် တစ်စက်လေးမျှမရှိသည့်အလား အလွန်သာမန်ဆန်လွန်းနေသည်ဟု ခံစားရလေသည်။

ထိုသို့သော ခံစားမှုမျိုးသည် သူတို့ကြားရှိ ကြီးမားလှသော ကွာဟချက်ကြောင့်ဖြစ်ကြောင်း ယန်ချင်းသိထားပေသည်။ သူသည် ချီစုစည်းခြင်းအဆင့်ကျင့်ကြံသူတစ်ဦးအတွက် သာမန်ဟု ထင်ရမည့်နည်းတူပင် ဖြစ်ချေသည်။

စွမ်းအားကြီးမားသော ကျင့်ကြံသူများသည် အထူးသဖြင့် လူမြင်ကွင်းတွင် သူတို့ထက် အားနည်းသူများကို ထိခိုက်စေမည်ကို စိုးရိမ်သောကြောင့် သူတို့၏ ဖိအားများကို အမြဲတမ်း ထိန်းချုပ်ထားလေ့ရှိကြသည်။

ထိုသို့မဟုတ်ဘဲ သူတို့၏ ကျင့်ကြံမှုအပြည့်အဝကိုသာ ထုတ်ဖော်လိုက်မည်ဆိုပါက အများစုမှာ အသက်ရှူရန်ပင် ခက်ခဲသွားမည်ဖြစ်ပြီး အဆိုးဆုံးအခြေအနေများတွင် အသက်ရှင်ကျန်ရစ်ရန်ပင် မဖြစ်နိုင်တော့ချေ။