ဝိညာဉ်တစ်ခုကို ပျိုးထောင်ခြင်း

ဤသို့ဖြစ်ပျက်နေစဉ် စင်မြင့်ထက်၌ တစ်မူထူးခြားသော အသွင်ပြောင်းလဲမှုတစ်ခု ဖြစ်ပေါ်နေလေသည်။

သန္ဓေပြောင်းဘိုးဘေးနဂါးကြောဝိညာဉ်မှ ဖြစ်ပေါ်လာသော ပုလဲလုံးသည် တရားသူကြီးချုပ်လိုင်နင်၏ လက်ထဲတွင် ရှိနေ၏။

သူသည် သူ၏ လက်သေးသေးလေးများဖြင့် ဆုပ်ကိုင်လိုက်ရာ ပုလဲလုံးမှာ အမှုန့်အဖြစ် ကြေမွသွားပြီး ယင်း၏နေရာတွင် ပစ္စည်းနှစ်ခု ပေါ်လာလေသည်။

ယင်းတို့အနက် တစ်ခုမှာ ရွှေရောင်ရင့်ရင့် ဝတ်ရုံတစ်ထည်ဖြစ်ပြီး အခြားတစ်ခုမှာ ပုံသဏ္ဌာန်အမျိုးမျိုး ပြောင်းလဲနေသော ရွှေရောင်အရည်တစ်မျိုးဖြစ်ကာ နောက်ဆုံးတွင် လင်းယုန်ငှက်တစ်ကောင်အဖြစ် ပြောင်းလဲသွားသည်။

ထိုလင်းယုန်သည် သူ၏ အမွေးအတောင်များကို သပ်ရပ်စွာ ပြင်ဆင်ရင်း ပတ်ဝန်းကျင်ကို စိတ်ဝင်တစား လိုက်လံကြည့်ရှုနေသဖြင့် အသက်ဝင်လှပေသည်။

၎င်းကို ဖန်တီးခဲ့သည့် လုပ်ငန်းစဉ်ကိုသာ မမြင်ခဲ့ရပါက အသက်ရှင်နေသော ရွှေလင်းယုန်တစ်ကောင်ဟုပင် ထင်မှတ်သွားပေလိမ့်မည်။

“တချို့အကြောင်းပြချက်တွေအရ မင်းရဲ့ ဝတ်ရုံသစ်ကို အခုချက်ချင်း ဝတ်လို့မရသေးဘူး။ ဒါကြောင့် မနက်ဖြန်အထိ သိမ်းထားလိုက်ဦး”

တရားသူကြီးချုပ်လိုင်နင်က ယန်ချင်းထံသို့ ရွှေရင့်ရောင်ဝတ်ရုံကို ကမ်းပေးရင်း ပြောလိုက်သည်။

တရားသူကြီးများသည် မည်သည့်တရားရုံးများတွင် တာဝန်ထမ်းဆောင်နေကြောင်း ပြသရန် အရောင်အမျိုးမျိုးရှိသော ဝတ်ရုံများကို ဝတ်ဆင်ကြ၏။

ရွှေအမြုတေအဆင့် တရားရုံးများမှ တရားသူကြီးများသည် အပြာနုရောင်ဝတ်ရုံများကို ဝတ်ဆင်ကြပြီး နန်းတော်တရားရုံးများမှ တရားသူကြီးများသည် ရွှေရင့်ရောင်ကို ဝတ်ဆင်ကြသည်။

နယ်ပယ်တရားရုံးများမှ တရားသူကြီးများသည် အနက်ရောင်ကို ဝတ်ဆင်ကြပြီး နောက်ဆုံးအနေဖြင့် ဝိညာဉ်တရားရုံးများမှ တရားသူကြီးများသည် အဖြူရောင်ဝတ်ရုံများကို ဝတ်ဆင်ကြလေသည်။

သို့သော်လည်း အစကတည်းက ဝိညာဉ်တရားရုံးဟူ၍ ရှိမရှိဆိုသည်ကိုမူ သံသယဖြစ်ဖွယ် ကောင်းနေဆဲပင်။

ဝိညာဉ်ဖွဲ့စည်းခြင်းအဆင့် ကျွမ်းကျင်သူများသည် မြင့်မြတ်နယ်မြေများအတွင်း၌ပင် လေးစားခံရသော ပုဂ္ဂိုလ်များဖြစ်ကြသည်။

ထို့ကြောင့် ဝိညာဉ်ဖွဲ့စည်းခြင်းအဆင့် ကျွမ်းကျင်သူတစ်ဦး ပါဝင်ပတ်သက်နေသော ရန်ငြိုး သို့မဟုတ် အမှုအခင်းဆိုသည်မှာ မဖြစ်နိုင်သလောက်ပင်။

မည်သူက ဝိညာဉ်ဖွဲ့စည်းခြင်းအဆင့် ကျွမ်းကျင်သူတစ်ဦးသည် ထိုသို့သောကိစ္စများကို ပြုလုပ်ခဲ့ကြောင်း အဖွဲ့အစည်းသို့ သွားရောက်တိုင်ကြားရဲမည်နည်း။

ထိုသို့လုပ်ရန် သတ္တိရှိသည့် တစ်ခုတည်းသော အဖွဲ့အစည်းမှာ အခြားသော ဝိညာဉ်ဖွဲ့စည်းခြင်းအဆင့် ကျွမ်းကျင်သူများသာ ဖြစ်ပြီး ၎င်းတို့သည်လည်း ထိုသို့လုပ်မည်မဟုတ်ဘဲ အချင်းချင်းသာ ဖြေရှင်းရန် ပို၍နှစ်သက်ကြပေမည်။

ထို့အပြင် ဝိညာဉ်ဖွဲ့စည်းခြင်းအဆင့် ကျွမ်းကျင်သူတစ်ဦးကို ဖမ်းဆီးရမည့်ကိစ္စလည်း ရှိသေး၏။

ဝိညာဉ်စဦးအဆင့် သို့မဟုတ် ဝိညာဉ်အထွတ်အထိပ်အဆင့်တွင် ရှိနေပါစေ၊ မည်သည့် ဝိညာဉ်ဖွဲ့စည်းခြင်းအဆင့် ကျွမ်းကျင်သူမဆို ဖမ်းဆီးခံရမှုမှ လွတ်မြောက်ရန်နှင့် မမျှော်လင့်ထားသော အခြေအနေများတွင် သူတို့၏ အသက်ရှင်သန်မှုကို အာမခံနိုင်ရန် ရေတွက်၍မရနိုင်သော နည်းလမ်းများစွာ ရှိကြလေသည်။

ထို့ကြောင့် ၎င်းတို့ထဲမှ တစ်ဦးကို ဖမ်းဆီးရန် တစ်ခုတည်းသော နည်းလမ်းမှာ ကြီးမားလှသော အင်အားကို အသုံးပြု၍ ထွက်ပြေးရာလမ်းကြောင်းအားလုံးနှင့် တိုက်ပွဲဧရိယာကို ပိတ်ဆို့ထားရန်ပင် ဖြစ်သည်။

သို့မဟုတ်ပါက အခြားတစ်ဖက်လူ မသေမချင်း ထွက်သွား၍မရသော သေရေးရှင်ရေးတိုက်ပွဲဖြစ်မှသာ ရနိုင်ပေမည်။

ထိုသို့သော အခြေအနေမျိုးတွင်ပင် ဝိညာဉ်ဖွဲ့စည်းခြင်းအဆင့် ကျွမ်းကျင်သူတစ်ဦးကို အရှင်ဖမ်းဆီးနိုင်ရန် ခက်ခဲစေသည်။

ထို့ကြောင့် ဝိညာဉ်တရားရုံးများ တည်ရှိမှုသည် အဖွဲ့အစည်းအတွင်း၌ အဖြေမရသော လျှို့ဝှက်ချက်များထဲမှ တစ်ခုအဖြစ် အစဉ်အမြဲ ရှိနေခဲ့၏။

ဝိညာဉ်ဖွဲ့စည်းခြင်းအဆင့် ကျွမ်းကျင်သူတစ်ဦးကို ဖမ်းဆီးရာတွင်ရှိသော လေးစားမှုနှင့် ခက်ခဲမှုတို့က ၎င်းတို့ တည်ရှိမှုအပေါ် သံသယများကို ပိုတိုးလာစေသည်။

ဝိညာဉ်ဖွဲ့စည်းခြင်းအဆင့် ကျွမ်းကျင်သူများ ပါဝင်ပတ်သက်နေသော အမှုအခင်းမည်မျှ ရှိသနည်း။

ယန်ချင်းသည် အဖွဲ့အစည်းတွင် ရှိနေခဲ့သော နှစ်များတစ်လျှောက်လုံး ထိုကဲ့သို့သော သူများ စီရင်ခံရသည့်ဖြစ်စဉ်ကို သူ တစ်ကြိမ်တစ်ခါမျှ မကြားဖူးခဲ့ချေ။

သို့သော်လည်း မဟူရာတစ္ဆေဂိုဏ်း၏ ပျက်စီးခြင်းနှင့် အဆင့် ၁ ဂိုဏ်းဖြစ်သော ကြယ်ပြိုကွဲဓားဂိုဏ်းတို့သည် အဖွဲ့အစည်း၏ လက်ချက်ဖြင့် ရာထူးချခံရခြင်းက ဝိညာဉ်ဖွဲ့စည်းခြင်းအဆင့် ကျွမ်းကျင်သူများ ပါဝင်ပတ်သက်နေသော အမှုအခင်းများကို ကိုင်တွယ်ဖြေရှင်းပေးသည့် အဖွဲ့အစည်း၏ အစိတ်အပိုင်းတစ်ခု ရှိနေကြောင်းကို ဆိုလိုနေပေသည်။

….

ယန်ချင်း၏ လက်များ ဝတ်ရုံပေါ်သို့ ကျရောက်သွားသည့် အခိုက်အတန့်တွင် ယင်း၏ နူးညံ့မှုနှင့် ခမ်းနားကြီးကျယ်မှုကို တစ်ပြိုင်နက်တည်း ခံစားလိုက်ရ၏။

သူသာ စကြဝဠာပြာဝတ်ရုံနှင့် ပတ်သက်သည့် အတွေ့အကြုံမရှိခဲ့ပါက ဤဝတ်ရုံသည် သူ၏ တစ်သက်တာလုံးတွင် အကောင်းဆုံးဝတ်ရုံ ဖြစ်လာပေလိမ့်မည်။

အထိအတွေ့သည် ကြယ်များပြည့်နှက်နေသော နူးညံ့သည့် ကြယ်တာရာတစ်ခုကို သူ၏ လက်များဖြင့် ဖြတ်သန်းသွားရသကဲ့သို့ ခံစားရလေသည်။

၎င်းသည် နူးညံ့သိမ်မွေ့ကာ နှစ်သိမ့်မှုနှင့် သက်သာရာရမှုကို ပေးစွမ်း၏။

သူသည် ဝတ်ရုံကို ကိုင်ထားလေလေ၊ သူ၏ စိတ်မှာ လန်းဆန်းလာကာ ချီစွမ်းအင်မှစ၍ နန်းတော်နယ်ပယ်အထိ၊ သူ၏ အတွင်းကလီစာများအပါအဝင် ခန္ဓာကိုယ်တွင်းရှိ အရာအားလုံးသည် သိမ်မွေ့စွာ အားဖြည့်ပေးသည်ကိုပင် ခံစားလိုက်ရလေသည်။

ဤဝတ်ရုံကို မည်သည့်အရာဖြင့် ပြုလုပ်ထားသနည်းဟု တွေးမိကာ ယန်ချင်း၏ မျက်ခုံးများ ပင့်တက်သွားသည်။

ကနဦးအကျိုးသက်ရောက်မှုလေးကတင် သူ အလွန်ဂုဏ်ယူခဲ့ရသော ကောင်းကင်ဘုံရက်ကန်းငှက်၏ အသိုက်ကို နောက်ချေးထိုးပိုးတစ်ကောင်၏ အိမ်အဖြစ် ယှဉ်ကာ မြင်ယောင်သွားစေသည်။

“ကောင်လေး မင်းရဲ့ ကံက တော်တော်ကောင်းတာပဲ”

စကြဝဠာပြာသည် ထုံးစံအတိုင်း သူ၏ တာဝန်ကို ကျေပွန်စွာဖြင့် ဝင်ရောက်ပြောဆိုလာလေသည်။

ယန်ချင်းအတွက် ကံကောင်းသည်မှာ စကြဝဠာပြာသည် သူ၏ အတွေးများကို ချောင်းကြည့်နေခြင်း သို့မဟုတ် လူကဲခတ်ရာတွင် အလွန်တော်နေခြင်း ဖြစ်သည်။ ယန်ချင်းကမူ ဒုတိယအချက်ဖြစ်ရန်သာ မျှော်လင့်မိ၏။

“သူတို့က မင်းကို မိုးကုတ်စက်ဝိုင်းရွှေ၊ အဝါနုရောင်ကောင်းကင် သလင်းကျောက်၊ ကြက်သွေးရောင်ပိုးကောင်ဆီက ပိုးချည်၊ ရွှေဝါရောင်မျက်ရည် ကြေးဝါကျားမဆီက သားမွေး၊ ဆည်းဆာ အဖိုးတန်ကျောက်တွေနဲ့ လုပ်ထားတဲ့ ဝတ်ရုံကို ပေးလိမ့်မယ်လို့ ထင်တောင်မထားဘူး”

“ပြီးတော့ ကျိန်စာရှောင်ကွင်းတဲ့ အညိုရောင်တိမ်ရေထဲမှာတောင် စိမ်ထားပုံရတယ်.. နေဦး ကိုယ်ပျောက် ပိုးချည်သဲတွေတောင် ပါသေးတယ်….”

“သူတို့က ပစ္စည်းတွေကို အမြဲတမ်း ပြောင်းလဲနေပေမယ့် ပစ္စည်းတွေရဲ့ အဆင့်အတန်းကတော့ အမြဲတမ်း စံချိန်တစ်ခုတည်းမှာပဲ ရှိနေတယ်…”

စကြဝဠာပြာက မနာလိုဖြစ်ဟန်ဖြင့် သက်ပြင်းချကာ ပြောလိုက်သည်။

“စီနီယာ အခုက သက်ပြင်းချနေရမယ့် အချိန်လား။ ခင်ဗျားက သူတော်စင်အဆင့် ဝတ်ရုံပဲဟာ၊ အသက်ရှူဖို့မှ မလိုတာ… မြန်မြန် ခင်ဗျား ပြောနေတာကို အဆုံးသတ်လိုက်စမ်းပါ…...”

‘အဲဒါတွေရဲ့ အဆင့်က ဘာလဲ’

ယန်ချင်းသည် စကြဝဠာပြာမှ သူ၏ အတွေးများကို ထပ်မံချောင်းကြည့်ကာ ထိုနေရာတွင် စောင့်ဆိုင်းနေသော ကျယ်လောင်သည့် အရိပ်အမြွက်ကို ရနိုင်မည်ဟု မျှော်လင့်ရင်း စိတ်ထဲတွင် ရူးသွပ်စွာ အော်ဟစ်လိုက်လေသည်။

ယနေ့မတိုင်မီအထိ စကြဝဠာပြာ ပြောပြသွားသော ပစ္စည်းများအကြောင်းကို သူ တစ်ခါမျှ မကြားဖူးခဲ့ချေ။

သူသည် ရိုးရှင်းသော ပျော်ရွှင်မှုများနှင့် ရတနာလုံးဝမရှိသော လူတစ်ယောက် ဖြစ်၏။

နှစ်များတစ်လျှောက် သူ၏ လက်ရှိဘဏ္ဍာရေးအခြေအနေအရ ယန်ချင်းသည် သူ၏ ဘဏ္ဍာရေးအင်အားဖြင့် တတ်နိုင်သော အရာများကိုသာ သဘောကျရန် ရွေးချယ်ခဲ့သည်။

ဆိုလိုသည်မှာ ရတနာများဖြစ်မည်ဟူသော မျှော်လင့်ချက်ဖြင့် ဈေးကွက်မှ အပိုင်းအစများကို ဝယ်ယူခြင်းဖြစ်ပြီး၊ သူ ဝယ်ယူခဲ့သော ပစ္စည်းအများစုမှာ များသောအားဖြင့် ကျိုးပဲ့ပျက်စီးနေသော ပစ္စည်းများ သို့မဟုတ် ကျင့်စဉ်ပညာရပ်များဖြစ်ကာ သူ အလွယ်တကူ ခန့်မှန်းနိုင်သော အရာများဖြစ်ကြသည်။

သို့သော် သဘာဝရတနာများဟု ဆိုလာလျှင်မူ ကွဲပြားသော အခြေအနေတစ်ခု ဖြစ်သွားလေပြီ။

သဘာဝရတနာများနှင့် ပတ်သက်၍ သတင်းအချက်အလက် အမြောက်အမြားရှိသူများသည် များသောအားဖြင့် ထိုရတနာများကို ဝယ်ယူနိုင်စွမ်းရှိသူများ၊ ထိုရတနာများကို ဝယ်ယူပေးနိုင်သူများထံ ချဉ်းကပ်နိုင်သော ကပ်ပါးကောင်များ၊ သို့မဟုတ် ထိုရတနာများကို တတ်နိုင်သူများထံ ရောင်းချပေးသူများသာ ဖြစ်တတ်ကြသည်။

ယန်ချင်းမှာမူ ထိုအမျိုးအစား တစ်ခုနှင့်မျှ ကိုက်ညီမှုမရှိချေ။ သူသည် အဖွဲ့အစည်းအပေါ်တွင် ကပ်ပါးကောင်တစ်ကောင်အဖြစ် နေထိုင်ရန် ကြိုးစားခဲ့သော်လည်း အဖွဲ့အစည်းသည် ကပ်စေးနှဲပြီး အင်အားကြီးမားသော ရန်သူတစ်ဦးဖြစ်ကြောင်း သက်သေပြခဲ့သည်။

ထို့အပြင် ကောင်းကင်ဘုံရက်ကန်းငှက်ဟူသော သူတို့၏ကိုယ်ပိုင် ကပ်ပါးကောင်တစ်ကောင်ကိုပင် သူ၏အပေါ်သို့ တင်ပေးနိုင်ခဲ့သဖြင့်၊ ငွေစုခြင်းဟူသော အယူအဆမှာ သူ၏အတွက် ပျောက်ကွယ်သွားခဲ့ရပေသည်။

သူ၏ အခြေအနေများကို တွေးမိသည်နှင့် သွေးဆူလာခဲ့သော်လည်း၊ သူ့အား ယခုလေးတင် ပေးထားသော ဝတ်ရုံ၏ သွယ်ဝိုက်သော အကျိုးသက်ရောက်မှုများကြောင့် မကြာမီပင် ငြိမ်သက်သွားလေသည်။

ယင်းသည် သူ့အား စိတ်တည်ငြိမ်စေသည့် အာနိသင်ရှိပုံရ၏။ ယန်ချင်းသည် ဝတ်ရုံ၏ အံ့ဖွယ်ကောင်းမှုကို တွေးကာ မချီးကျူးဘဲ မနေနိုင်တော့ချေ။

“စီနီယာ ကျေးဇူးပြုပြီး ဆက်ပြောပါ”

ယန်ချင်းက သူ၏ စိတ်ထဲတွင် တိုးတိုးလေး ပြောလိုက်ရာ စကြဝဠာပြာမှ သူ၏ စကားကို အဆုံးသတ်လိုက်သဖြင့် အကျိုးသက်ရောက်မှု ရှိသွားပုံရလေသည်။

“အဲဒါတွေအားလုံးက အနည်းဆုံးတော့ အလယ်အလတ် ဒါမှမဟုတ် အမြင့်ဆုံးအရည်အသွေးရှိတဲ့ အထွတ်အမြတ်အဆင့် ပစ္စည်းတွေနဲ့ လုပ်ထားတာပဲ”

“ပြီးတော့ လက်ရာပိုင်းအနေနဲ့ ပြောရရင် အဲဒီပစ္စည်းတွေကို အရည်အသွေးမကျစေဘဲ သူတို့ရဲ့ စွမ်းအားတွေကို ဖော်ထုတ်ပြီး အပြစ်အနာအဆာကင်းကင်းနဲ့ ပေါင်းစပ်ထားတဲ့ ပုံစံကို အခြေခံကြည့်ရင် အနည်းဆုံးတော့ သူတို့ဟာ ကျွမ်းကျင်မှုပိုင်းမှာ ရွှေအဆင့်မှာ ရှိနေတယ်”

“သူတို့ရဲ့ စံနှုန်းတွေအရဆိုရင် သူတို့က နှစ် ၁၀၀ ဒါမှမဟုတ် အဲဒီထက်နည်းတဲ့ အချိန်အတွင်းမှာ ခရမ်းရောင်အဆင့် လက်မှုပညာရှင် ဖြစ်ဖို့ လိုအပ်ချက်တွေကို ပြည့်မီသွားရင်တောင် ငါ အံ့ဩမှာ မဟုတ်ဘူး”

“တကယ်ကို မှတ်သားလောက်စရာပဲ၊ ဒါပေမဲ့ မင်းက နယ်ပယ်တရားရုံးတွေကို ရာထူးတိုးတဲ့အခါ နောက်ထပ်ဝတ်ရုံတစ်ထည် ရနိုင်ဖို့ များတာကြောင့် ဒါက နှမြောစရာကောင်းတယ်။ မင်းရဲ့ ပါရမီအရဆိုရင် အဲဒီအချိန်က သိပ်ကြာမှာ မဟုတ်ဘူး”

“ဒီဝတ်ရုံထဲမှာ နိုးထကာစဝိညာဉ်ကို မင်းရဲ့အဆင့်အထိ မြှင့်တင်ဖို့ ကူညီပေးဖို့ မင်းအတွက် အချိန်လုံလောက်မှာ မဟုတ်ဘူး...”

စကြဝဠာပြာက သနားစရာကောင်းသော လေသံဖြင့် ပြောလိုက်သည်။