ဝိညာဉ်တစ်ခုကို ပျိုးထောင်ခြင်း

၂၇၀) - နောင်တရခြင်း

ယန်ချင်းသည် ဤကိစ္စနှင့်ပတ်သက်၍ သက်ပြင်းချမိလေသည်။

အကြောင်းမှာ သူသည် အဓိကတရားသူကြီးတစ်ဦးအနေဖြင့် ပေးအပ်ခံရသော ဝတ်ရုံများတွင် နိုးထခါစ ဝိညာဉ်တစ်ခု ပါဝင်နေသော်လည်း ဝတ်ရုံများကို ထုတ်ပေးတိုင်း ထိုဝိညာဉ်မှာ အိပ်မောကျနေစေရန် ချိပ်ပိတ်ခံထားရသောကြောင့် ဖြစ်ပေသည်။

၎င်းကို ချိပ်ပိတ်မှုမှ ပြန်လည်ဖြေလျှော့ရန် တစ်ခုတည်းသောနည်းလမ်းမှာ ဝတ်ရုံကို လက်ခံရရှိသော ဝန်ထမ်းအနေဖြင့် ထိုဝတ်ရုံကို သူတို့၏ဘဝတစ်လျှောက်လုံး အသုံးပြုပြီး ပြုစုပျိုးထောင်ပေးမည်ဟု သစ္စာဆိုရန်သာ ဖြစ်လေသည်။

ဤစည်းမျဉ်းကို ချမှတ်ထားခြင်းမှာ ပိုင်ရှင်များက ၎င်းတို့ဝတ်ရုံများ၏ ဝိညာဉ်အပေါ် ဂရုမစိုက်ဘဲ လစ်လျူရှုခြင်းမှ ရှောင်ရှားနိုင်ရန် ဖြစ်ပြီး၊ အထူးသဖြင့် အနာဂတ်တွင် ပိုမိုကောင်းမွန်သော ဝတ်ရုံတစ်ခုကို ရရှိမည့် ဆွဲဆောင်မှုမျိုး ရှိနေသည့်အခါမျိုးတွင် ဖြစ်ပေသည်။

ရမ်းကားသော ဝိညာဉ်များကဲ့သို့ တည်ငြိမ်မှုမရှိသော အရာများ ဖြစ်ပေါ်လာမည့် အန္တရာယ်မှ ကာကွယ်ရန်အလို့ငှာ၊ ပိုင်ရှင်ဖြစ်သူက သတ်မှတ်ချက်များကို သဘောမတူပါက ထိုဝိညာဉ်များကို ထာဝရအိပ်မောကျနေစေရန် ချိပ်ပိတ်ထားမည် ဖြစ်၏။

အစီအရင်ပစ္စည်းများ သို့မဟုတ် ရတနာများ၏ ဝိညာဉ်များသည် မွေးကင်းစကလေးငယ်များနှင့် တူညီပြီး ၎င်းတို့၏ တန်ဖိုးထားမှုများနှင့် အမြင်များကို ပုံဖော်ပေးရန် အမြဲတစေ လမ်းညွှန်မှု လိုအပ်ပေသည်။

အကယ်၍ လစ်လျူရှုထားခံရပါက ၎င်းတို့တွင်ရှိသော စွမ်းရည်များကြောင့် ကပ်ဘေးတစ်ခု အဖြစ်ပြောင်းလဲသွားသည်။

ထို့ကြောင့် ပိုင်ရှင်ဖြစ်သူမှ ၎င်းတို့ကို ပြုစုပျိုးထောင်ရန် သစ္စာမဆိုပါက ချိပ်ပိတ်ထားခြင်းသည်သာ ပို၍ လုံခြုံစိတ်ချရပေသည်။

အဖွဲ့အစည်းအတွင်းရှိ အများစုမှာ ၎င်းတို့၏ ဝတ်ရုံဝိညာဉ်များကို ချိပ်ပိတ်ထားရန်သာ ရွေးချယ်ကြလေသည်။

သို့သော်လည်း သတ်မှတ်ချက်များကို သဘောတူလက်ခံသူ အနည်းငယ်လည်း ရှိသော်လည်း အရေအတွက်အားဖြင့် နည်းပါးလှပြီး ထိုအနည်းစုထဲမှ အများစုမှာ နန်းတော်ဝတ်ရုံများကဲ့သို့ ပိုမိုမြင့်မားသော အဆင့်အတန်းရှိသည့် ဝတ်ရုံများကို ရရှိသည့်အခါမျိုးတွင်သာ ထိုသို့ ပြုလုပ်ကြခြင်း ဖြစ်ပေသည်။

စကြဝဠာပြာနှင့် ထိတွေ့ဆက်ဆံပြီးကတည်းက ယန်ချင်းသည်လည်း သူလက်ခံရရှိထားသော နန်းတော်တရားရုံးဝတ်ရုံများကို အဆုံးတိုင် ဆက်လက်အသုံးပြုသွားရန် စိတ်ကူးများ ဖြစ်ပေါ်လာခဲ့လေသည်။

သို့သော်လည်း သူသည် နယ်ပယ်အဆင့်သို့ ရောက်ရှိချိန်တွင် ပိုမိုစွမ်းအားကြီးမားသော ဝတ်ရုံကို ရရှိနိုင်မည့် ဆွဲဆောင်မှုမှာ ရေသူမတစ်ဦး၏ သီချင်းသံကဲ့သို့ သူ့ကို ထိုအတွေးများမှ အမြဲတစေ ဆွဲဆောင်နေခဲ့၏။

ရွေးချယ်ခွင့်ရှိလျှင် ပိုကောင်းသောအရာကို မည်သူက ငြင်းဆန်မည်နည်း။ ဝိညာဉ်တစ်ခုကို ပျိုးထောင်ခြင်းမှာလည်း သေးငယ်သောကိစ္စ မဟုတ်ပေ။

အကြောင်းမှာ သူသည် ၎င်းကို သူ၏ဝိညာဉ်အဆီအနှစ်များဖြင့် အမြဲတစေ အာဟာရဖြည့်တင်းပေးရမည့်အပြင် သူ၏ ထိုးထွင်းသိမြင်မှု တစ်စိတ်တစ်ပိုင်းကိုလည်း ဆက်တိုက် ကျွေးမွေးနေရမည် ဖြစ်သောကြောင့်တည်း။

ဤအရာက ဝိညာဉ်သည် ကိုယ်ပိုင်အသိဖြင့် လုပ်ဆောင်နိုင်ပြီး ယန်ချင်း၏ အခြေခံအုတ်မြစ်များပေါ်တွင် တည်ဆောက်ထားသော ၎င်း၏ ကိုယ်ပိုင်လမ်းကြောင်းကို ရှာဖွေနိုင်သည့် အဆင့်တစ်ခုသို့ မရောက်မချင်း သူ၏ ကျင့်ကြံခြင်းအချိန်များကို လျော့ပါးသွားစေမည် ဖြစ်၏။

‘ဒါလည်း အကြံဆိုးတော့ မဟုတ်လောက်ပါဘူး’

ယန်ချင်း၏ စိတ်ထဲမှ တွေးလိုက်သည်။ ဓားကျင့်ကြံသူ နှစ်ဦးဖြစ်သော ဖုန်းရှင်းနှင့် ယီကျဲတို့နှင့် မတူဘဲ သူသည် ဤကိစ္စနှင့်ပတ်သက်၍ ကိုင်တွယ်နိုင်စွမ်း ရှိပေသည်။

သူတို့နှစ်ဦးလုံးသည် ၎င်းတို့၏ လက်နက်ဝိညာဉ်များကို ထောက်ပံ့ပေးနေရသည့်အပြင် ဝတ်ရုံအတွင်းရှိ ဝိညာဉ်အသစ်တစ်ခုကိုပါ ထပ်မံပျိုးထောင်ရန် မတတ်နိုင်ပေ၊ ယင်းက သူတို့အတွက် ဝန်ပိစေလိမ့်မည် ဖြစ်သည်။

သို့သော်လည်း ယန်ချင်းတွင် ထိုသို့သော စိုးရိမ်ပူပန်မှုမျိုး မရှိချေ။

သူသည် လက်နက်အထူးကျွမ်းကျင်သူ မဟုတ်သည့်အပြင် သူ၏ ယင်ယန်ကျောက်စိမ်းခန္ဓာကိုယ်၏ သဘာဝကြောင့် ခန္ဓာကိုယ်နှင့် ဝိညာဉ်နှစ်ခုစလုံးမှာ စွမ်းအားကြီးမားလေသည်။

သူ၌ ပိုလျှံနေသော သိပ်သည်းသည့် ချီစွမ်းအင်နှင့် ဝိညာဉ်အဆီအနှစ်များ ရှိနေပေသည်။

ယန်ချင်းသည် ဤအကြောင်းကို တွေးမိလေလေ ပို၍ သဘောကျလာလေလေ ဖြစ်ချေသည်။

“မင်း ဒါကို လုပ်သင့်တယ်လို့ ငါထင်တယ်”

စကြဝဠာပြာက ပြောလိုက်၏။

“ငါလည်း အဲ့လိုပဲ ထင်တယ်”

အချိန်တန်ကြာ ထူးဆန်းစွာ တိတ်ဆိတ်နေခဲ့သော ကံကြမ္မာဖုံးကွယ်ကလည်း ဝင်ပြောလာလေသည်။

“ငါရောပဲ”

အုပ်စု၏ နောက်ဆုံးအဖွဲ့ဝင်ဖြစ်သော ပိုးအိမ်စိမ်းကလည်း ဝင်ပြောလေသည်။

“စီနီယာတို့အားလုံးက ကျုပ်စိတ်ထဲကဟာတွေကို ခိုးနားထောင်နေကြတာလား”

ယန်ချင်းက မေးလိုက်၏။

“အင်းလေ”

သူတို့အားလုံးက သာမန်ကာလျှံကာ လေသံဖြင့် ပြန်ဖြေကြလေသည်။

သူတို့၏ အဖြေကို ကြားလိုက်ရသောအခါ ယန်ချင်းသည် သူ၏ လက်ထဲတွင် ကိုင်ထားသော ရွှေလင်းယုန်ဆွဲကြိုးပြားကို ပြုတ်ကျလုမတတ် ဖြစ်သွားလေသည်။

စကြဝဠာပြာ၏ ရှင်းပြချက်နှင့် ယခုအခါ လျှို့ဝှက်ချက်တစ်ခု မဟုတ်တော့ကြောင်း သိလိုက်ရသည့် သူ၏ အတွေးအားလုံးမှာ တစ်မိနစ်ပင် မကြာလိုက်ချေ။

ထိုအချိန်အတွင်း သူသည် ထုတ်ပေးထားသော နန်းတော်တရားရုံးဝတ်ရုံများကို သိမ်းဆည်းလိုက်ပြီး ယန်ချင်းပိုင်ဆိုင်သည့်အထဲတွင် အရေးအကြီးဆုံးသော တစ်ခုတည်းသောအရာဟု သတ်မှတ်နိုင်သည့် သူ၏ ရွှေလင်းယုန်ဆွဲကြိုးပြားကို ထုတ်ယူလိုက်လေသည်။

တရားသူကြီးတိုင်းသည် ၎င်းတို့၏ ဝိညာဉ်နှင့် သွေးအဆီအနှစ် တစ်စိတ်တစ်ပိုင်းကို ဆွဲကြိုးပြားအတွင်းသို့ ပေါင်းစပ်ထည့်သွင်းထားသောကြောင့် ထိုဆွဲကြိုးပြားမှာ သူတို့အတွက် သီးသန့်ဖြစ်ပေသည်။

ယင်းက သူတို့၏ တရားခွင်အတွင်းရှိ အစီအရင်များကို ထိန်းချုပ်ရန် ကူညီပေးပြီး ဝိညာဉ်ကောင်စီ အပါအဝင် အဖွဲ့အစည်းအတွင်းရှိ အရေးကြီးသော ရုံးခန်းများအားလုံးနှင့် တိုက်ရိုက်ဆက်သွယ်နိုင်သော ဆက်သွယ်ရေးအဆောင်လက်ဖွဲ့အဖြစ်လည်း အသုံးဝင်လေသည်။

ထို့အပြင် အရေးပေါ်အချက်ပြစနစ်အဖြစ်လည်းကောင်း သူတို့၏ မည်သူမည်ဝါဖြစ်ကြောင်း သက်သေအထောက်အထားအဖြစ်လည်းကောင်း အသုံးဝင်ပေသည်။

ထိုအရာသာ မရှိပါက သူတို့သည် အဖွဲ့အစည်းအတွင်းရှိ ငြိမ်းချမ်းရာမဲ့အကျဉ်းထောင် ပြည်တွင်းထောက်ပံ့ပို့ဆောင်ရေးအထပ်နှင့် ပင်မစာကြည့်တိုက်၏ အထက်ထပ်များကဲ့သို့သော နေရာများသို့ ဝင်ရောက်ခွင့် ပိတ်ပင်ခံရမည် ဖြစ်သည်။

ဤအရာမှာ သူတို့၏ ဘဝတစ်သက်တာလုံး အမြဲတစေ သိမ်းဆည်းထားရမည့် တစ်ခုတည်းသော အရာဖြစ်ပေသည်။

ယန်ချင်း အနေဖြင့် မည်သည့်အတွက်ကြောင့်ဟု သေချာမသိသော်လည်း ဆွဲကြိုးပြားသည် အစီအရင်ပစ္စည်းတစ်ခုထက် သက်ရှိအရာတစ်ခုလို အမြဲတမ်း ခံစားရလေသည်။

ယန်ချင်းသည် သူ၏ ဆွဲကြိုးပြားကို တရားသူကြီးချုပ်လိုင်နင်ထံသို့ ကမ်းပေးလိုက်လေသည်။

သူက ၎င်းအပေါ်တွင် ရှုပ်ထွေးသော တံဆိပ်အချို့ကို ဖန်တီးလိုက်ပြီး ရွှေရောင်ရေစက်လေးမှ ပြောင်းလဲသွားသော လင်းယုန်ငှက်ကို ဆွဲကြိုးပြားအတွင်းသို့ ပြောင်းရွှေ့ထည့်သွင်းလိုက်၏။

ရှုပ်ထွေးပြီး အချင်းချင်းချိတ်ဆက်နေသည့် စာလုံးများနှင့် မှော်စာလုံးများသည် စက္ကန့်အနည်းငယ်မျှ ပေါ်လာပြီး လျင်မြန်စွာ ပျောက်ကွယ်သွားသည်နှင့်အမျှ ဆွဲကြိုးပြားမှာ ခေတ္တမျှ တောက်ပသွားလေသည်။

အလင်းဖြာဓားဂိုဏ်းနှင့် မြစ်ဝှမ်းစီးဝင်ဂိုဏ်းတို့မှ အကြီးအကဲနှစ်ဦးလုံး၏ အကြည့်များက ဆွဲကြိုးပြားပေါ်သို့ ကျရောက်သွားချိန်တွင် သူတို့၏ မျက်လုံးများ၌ ရှုပ်ထွေးသော ခံစားချက်များ လင်းလက်သွားကြ၏။

“ဒီဟာနဲ့ဆိုရင် မင်းရဲ့ လက်ရှိအဆင့်အတန်းနဲ့ ကိုက်ညီဖို့အတွက် ဝင်ရောက်ခွင့်အဆင့်နဲ့ တခြားတိုင်းတာမှုတွေကို မင်းရဲ့ဆွဲကြိုးပြားမှာ ချိန်ညှိလိုက်ပြီ။ သတ်မှတ်ထားတဲ့ နည်းလမ်းကို အသုံးပြုပြီး နောက်မှ မင်းရဲ့ အားလပ်ချိန်မှာ သူတို့ကို ပိုပြီး လေ့လာနိုင်ပါတယ်”

“လောလောဆယ်တော့ အခမ်းအနားရဲ့ နောက်ဆုံးအပိုင်းကို မရောက်ခင်မှာ မင်းဆီကနေ စကားအနည်းငယ်ကို လူတွေ ကြားချင်ကြလိမ့်မယ်လို့ ထင်တယ်။ အဲ့ဒီအပိုင်းကို မင်း သေချာပေါက် မျှော်လင့်နေမယ်ဆိုတာ ငါသိတာပေါ့”

တရားသူကြီးချုပ်လိုင်နင်က နောက်ပြောင်ချင်သော အပြုံးဖြင့် ပြောလိုက်၏။

သူ၏ စိတ်ဖတ်ခံလိုက်ရသဖြင့် ယန်ချင်းမှာ ရှက်ရမ်းရမ်းကာ ရယ်မောလိုက်ပြီး သူ ကြိုတင်ပြင်ဆင်မထားခဲ့သော မိန့်ခွန်းကို ပြောရန် ရှေ့သို့ ထွက်လာခဲ့လေသည်။

သူသည် ယမန်နေ့က သူ၏ ရူးကြောင်ကြောင် အဖိုးဖြစ်သူအတွက် စိတ်ပူပန်နေရသဖြင့် မည်သည့်အရာကိုမျှ မတွေးတောနိုင်ခဲ့ချေ။

သို့သော် ကံကောင်းထောက်မစွာဖြင့် လက်ထဲတွင် မည်သည့်အရာမျှ မရှိသော်လည်း သူ စိတ်မပူခဲ့ပေ။

သူ၏ ဂုဏ်သတင်းမှာ အဖွဲ့အစည်းတစ်ဝိုက်တွင် ပျံ့နှံ့နေပြီးဖြစ်ရာ ယခုထက် ပိုဆိုးစရာ အကြောင်းမရှိတော့ပေ။

သို့သော် သူ၏ မိန့်ခွန်းကို မစတင်မီတွင်၊ ယန်ချင်းသည် အဖွဲ့အစည်းအား တိတ်ဆိတ်စွာ တောင်းပန်မှုတစ်ခု ပြုလုပ်ရန်အတွက် အချိန်ခဏမျှ ငြိမ်သက်သွားခဲ့၏။

“တခြားအရာတွေထဲမှာ မင်းတို့ကို ကပ်စေးနဲတဲ့ကောင်တွေလို့ ခေါ်ခဲ့မိတဲ့အတွက် တောင်းပန်ပါတယ် အဖွဲ့အစည်းကြီးရေ။ ကဲ မင်းတို့က ကပ်စေးနဲတုန်းဆိုပေမယ့် အနည်းဆုံးတော့ နှလုံးသားတစ်ခု ရှိပါသေးတယ်”

“အဖိုးတန်တဲ့ ဝတ်ရုံအတွက် ကျေးဇူးတင်ပါတယ်၊ ပြီးတော့ လစာကလည်း အဲ့ဒီလိုပဲ အဖိုးတန်လိမ့်မယ်လို့ မျှော်လင့်ပါတယ်”

ယန်ချင်းသည် မျက်လုံးများကို မှိတ်ထားရင်း တီးတိုးရေရွတ်လိုက်လေသည်။

‘သူ့ဆီမှာရှိတဲ့ နှိမ့်ချမှုနဲ့ လေးစားစရာကောင်းတဲ့ သဘောထားကို ကြည့်စမ်းပါဦး’

ယန်ချင်း၏ နှိမ့်ချသောပုံစံကို မြင်လိုက်ရသောအခါ လူအများစုက ထိုသို့ တွေးလိုက်ကြလေသည်။

အချို့သော အကြီးအကဲများဆိုလျှင် ယန်ချင်းကဲ့သို့ နှိမ့်ချမှုမရှိ၊ လေးစားမှုမရှိသောကြောင့် ၎င်းတို့၏ ကိုယ်ပိုင်မျိုးနွယ်စုဝင်များနှင့် တပည့်များကိုပင် အပြစ်တင်ကြသေး၏။

အဖွဲ့အစည်းမှ သူများမှာမူ ယန်ချင်း၏ လုပ်ရပ်ကြောင့် အံ့အားသင့်နေသော အမူအရာများဖြင့် ပြည့်နှက်နေကြလေသည်။

‘ယန်ချင်းဆီက ငါမြင်နေရတာ နှိမ့်ချမှုလား။ ဒါက သူကစားဖို့ ပြင်ဆင်နေတဲ့ ရေရှည်အကြံအစည်တစ်ခုခုများလား’

သူတို့အားလုံး တွေးတောနေမိကြ၏။