တဟုန်ထိုး တိုးတက်လာခြင်း

လက်ရှိအချိန်တွင် အခြားသော ကစားသမားများကို ချူကျန့် ဂရုစိုက်မနေနိုင်တော့ချေ။ သတ္တိရှိလျှင် ဤနှင်းတောင်ကြားထဲသို့ သူ့ကို လာရောက်ရှာဖွေကြည့်ကြပါစေ။ သူကတော့ မကြာမီ ဤနေရာမှ ထွက်ခွာတော့မည် ဖြစ်သည်။

ထို့အပြင် သူ၏ အခြေအနေမှာ အကြွေးဝိုင်းနေသူ တစ်ဦးပမာ ကစားသမားများ၏ မျက်စိစူးစရာ၊ အတိအကျ ဆိုရလျှင် အားလုံးက ဝိုင်းဝန်း လုယက်ချင်နေသည့် ပစ်မှတ် တစ်ခုအဖြစ် ပြောင်းလဲနေခဲ့ပြီ ဖြစ်သည်။ သိုင်းလောက တစ်ခွင်လုံးသို့ ထပ်မံ ကြေညာခံရမည် ဆိုလျှင်တောင်မှ မည်သို့မျှ ထူးခြားသွားတော့မည် မဟုတ်ပေ။

အခြေအနေ အားလုံးက ပုံပေါ်နေပြီဖြစ်ရာ ဤစိန်ခေါ်မှုများကို ရင်ဆိုင်ရန်သာ ရှိတော့၏။ အမှန်တကယ်တော့ မြောင်မိသားစုရွာမှ ထွက်ခွာလာကတည်းက မိမိကိုယ်ကို ကာကွယ်နိုင်ရန်နှင့် ခွန်အားများ လျင်မြန်စွာ တိုးတက်လာစေရန် အားလပ်ချိန် ရတိုင်း အတွင်းအား ကျင့်စဉ်များကို သူ လေ့ကျင့်နေခဲ့ခြင်း ဖြစ်သည်။ နေကြာ သိုင်းကျမ်းတွင် သင်းကွပ်ရမည်ဟူသော ကန့်သတ်ချက်သာ မရှိခဲ့လျှင် တုန်းဖန်းပုပိုက်၏ ကြောက်ခမန်းလိလိ စွမ်းအားများကို မြင်တွေ့ဖူးထားသော ချူကျန့်သည် ထိုသိုင်းကျမ်းကိုပင် အနည်းအကျဉ်း သင်ယူကြည့်ရန် တွေးတောမိမည်မှာ အသေအချာပင်။

ယခုအခါ နတ်ဘုရား အလင်းဖြာ ကျင့်စဉ်သည် နတ်အဆင့် အတွင်းအား ကျင့်စဉ်တစ်ခုမှန်း သူ သိရှိသွားပြီဖြစ်ရာ ပို၍ပင် အဆင်ပြေသွားချေပြီ။ ၎င်းက သူ၏ ခွန်အားများကို အဆမတန် မြင့်တက်လာစေမည်ဖြစ်ပြီး နောက်ကွယ်မှ လိုက်လံတိုက်ခိုက်မည့် ကစားသမားများစွာ၏ ရန်မှ အသက်ရှင် လွတ်မြောက်နိုင်ခြေကို များစွာ တိုးပွားလာစေလိမ့်မည်။ ထို့ထက်ပို၍ အရေးကြီးသည်မှာ နတ်ဘုရား အလင်းဖြာ ကျင့်စဉ်သည် ချန်လင်းစု၏ အသက်အန္တရာယ် ရှင်သန်ရေးနှင့် တိုက်ရိုက် သက်ဆိုင်နေသည့် တစ်ခုတည်းသော သိုင်းပညာ ဖြစ်နေခြင်းပင်။ သိုင်းလောက တစ်ခွင် ကြေညာခံရခြင်းကို ဘေးဖယ်ထားလိုက်စမ်းပါ။ လူသတ်၊ မီးရှို့ရမည် ဆိုလျှင်တောင် ဤသိုင်းကျမ်းကို သူ မဖြစ်မနေ သင်ယူရမည်သာ။

ချူကျန့်သည် သိုင်းပညာ မှတ်တမ်းကို ဖွင့်ကြည့်လိုက်ရာ နတ်ဘုရား အလင်းဖြာ ဟူသော စာတန်းပါသည့် သင်္ကေတလေးတစ်ခု ထွက်ပေါ်လာ၏။

[နတ်ဘုရား အလင်းဖြာ ကျင့်စဉ်] (အတွင်းအား ကျင့်စဉ်)

အဆင့် - နတ်အဆင့်

ကျင့်ကြံမှုအဆင့် - (၁) အနက် (၉)

အကျိုးသက်ရောက်မှု - ခွန်အား (၇)၊ ကိုယ်ခံအား (၅)၊ လျင်မြန်မှု (၅)၊ ချီစွမ်းအင် ပြန်လည်ပြည့်ဖြိုးမှု (၆)၊ မီးတောက် (၇)၊ ကုသခြင်း (၉)

ထူးခြားချက် - ကျန်းမာရေး အမြန်ပြန်လည်ပြည့်ဖြိုးခြင်း၊ အဆုံးမဲ့ ရှင်သန်ခြင်း

ထပ်ဆောင်းပါဝင်မှု - အရိပ်မဲ့ နတ်လက်သီး

ဖော်ပြချက် - နတ်ဘုရား အလင်းဖြာ ကျင့်စဉ်ကို တတ်မြောက်လျှင် ပြိုင်ဘက်ကင်းပြီ ဟု သိုင်းလောကတွင် ကျော်ကြားလှသော နတ်အဆင့် အတွင်းအား ကျင့်စဉ်များအနက်မှ တစ်ခု ဖြစ်သည်။ ဤကျင့်စဉ်သည် ယန်မီးတောက် အမျိုးအစားဖြစ်ပြီး ကျင့်ကြံသူ၏ ခွန်အားကို ကြီးမားစွာ မြင့်တက်စေကာ ချီစွမ်းအင် ပြန်လည်ပြည့်ဖြိုးမှုနှင့် မိမိကိုယ်ကို ကုသနိုင်စွမ်းကိုလည်း အရှိန်အဟုန် မြှင့်တင်ပေးပါသည်။

၎င်း၏ ချီစွမ်းအင်မှာ အလွန် အစွမ်းထက်သော ကုသနိုင်စွမ်းများ ပါဝင်ပြီး ပြင်ပဒဏ်ရာနှင့် အတွင်းဒဏ်ရာများကို အချိန်တိုအတွင်း သက်သာပျောက်ကင်းစေပါသည်။ အထွတ်အထိပ် ပြီးပြည့်စုံသည့် အဆင့်သို့ ရောက်ရှိပါက သေလုမြောပါး ဖြစ်နေသူကိုပင် အသက်ပြန်ရှင်လာစေနိုင်လောက်အောင် အံ့မခန်း အာနိသင် ရှိသည်။

ထို့အပြင် အရိပ်မဲ့ နတ်လက်သီး သိုင်းကွက်လည်း ပါဝင်ရာ လက်သီးထိုးနှက်မှုများမှာ အသံမထွက်ဘဲ အရိပ်အယောင် ကင်းမဲ့နေမည်။ ပြိုင်ဘက်၏ ကာကွယ်ရေး ချီစွမ်းအင်များကို အတင်းအကြပ် ထိုးဖောက်၍ ကိုယ်တွင်းကလီစာများကို တိုက်ရိုက် ထိခိုက်ဒဏ်ရာ ရစေနိုင်သည်။

ချူကျန့် တစ်ယောက် အံ့အားသင့် မှင်တက်သွားတော့၏။ နတ်အဆင့် အတွင်းအား ကျင့်စဉ်တစ်ခု ဖြစ်သည့်အတိုင်း ယခုမှ စတင်သင်ယူရုံမျှသာ ရှိသေးသော်လည်း ၎င်း၏ အကျိုးသက်ရောက်မှုများက ချွမ်ကျန်း အတွင်းအား ကျင့်စဉ်၏ အဆင့် (၃) နှင့်ပင် ညီမျှနေချေပြီ။ ထို့အပြင် ထူးခြားလှသော ချီစွမ်းအင် ပြန်လည်ပြည့်ဖြိုးမှု၊ မီးတောက်နှင့် ကုသခြင်း စသည့် ထပ်ဆောင်း အကျိုးကျေးဇူးများစွာလည်း ပါဝင်နေသေးသည်။

မှတ်တမ်းထဲတွင် ထူးခြားချက်များ နှင့် ထပ်ဆောင်းပါဝင်မှု များလည်း တိုးလာခဲ့လေပြီ။

ဤသိုင်းကျမ်းကို တတ်မြောက်ပါက ပြိုင်ဘက်ကင်းမည် ဆိုသည့် အချက်ကိုမူ ချူကျန့်က အပြည့်အဝ ယုံကြည်မနေချေ။ ဤသို့သော ဒဏ္ဍာရီလာ သိုင်းပညာများမှာ ရေတွက်၍ပင် မရနိုင်အောင် များပြားလှသည် မဟုတ်လော။ လျှို့ဝှက် သိုင်းလောကတွင် သူ ကျင်လည်ခဲ့စဉ်က အံ့မခန်း အစွမ်းထက်လှသည်ဟု ဆိုသော သိုင်းပညာပေါင်း ရာချီ၍ သူ လေ့ကျင့်ခဲ့ဖူးသော်လည်း လက်တွေ့တွင်မူ သာမန်မျှသာ ဖြစ်နေတတ်သည်။ မည်သူကမျှ အခြားတစ်ယောက်ကို အလွယ်တကူ ကျော်လွန်မသွားနိုင်ခဲ့ပေ။

ချူကျန့်သည် စိတ်ကို စုစည်းလိုက်ပြီး တင်ပျဉ်ခွေ ထိုင်ကာ အလိုအလျောက် လေ့ကျင့်မှု စနစ်ကို နှိပ်လိုက်၏။ ဂိမ်းစနစ်မှ အသိပေးချက် ချက်ချင်း ပေါ်ထွက်လာ၏။

[သင်၏ လက်ရှိ အရည်အချင်းမှာ (၂၆) မှတ် ဖြစ်ပါတယ်။ နတ်ဘုရား အလင်းဖြာ ကျင့်စဉ်အား အဆင့် (၂) သို့ ရောက်ရှိရန် နာရီ (၃၀၀) အချိန်ယူရပါမယ်၊ လက်ရှိတွင် အလိုအလျောက် လေ့ကျင့်မှု အမြင့်ဆုံး အချိန်မှာ (၄) နာရီသာ ဖြစ်ပါတယ်။ အလိုအလျောက် လေ့ကျင့်မှု စတင်လိုပါသလား]

ချူကျန့် အသက် ပြင်းပြင်းတစ်ချက် ရှူသွင်းလိုက်မိသည်။ နတ်အဆင့် အတွင်းအား ကျင့်စဉ် ဖြစ်သည့်အလျောက် လေ့ကျင့်ရသည်မှာ ခက်ခဲကြမ်းတမ်းလွန်းလှသည်။ သူ၏ အရည်အချင်းမှာ (၂၆) မှတ်သို့ ရောက်ရှိနေပြီဖြစ်ရာ အတော်လေး ကောင်းမွန်သည့် အဆင့်ဟု ဆိုနိုင်သော်ငြား အဆင့် (၁) မှ အဆင့် (၂) သို့ တက်ရန်အတွက်ပင် နာရီ (၃၀၀) တိတိ အချိန်ယူရမည်တဲ့လော။

ဒါက သူ၏ ချွမ်ကျန်း အတွင်းအား ကျင့်စဉ်ကို အထွတ်အထိပ် ပြီးပြည့်စုံသည့် အဆင့်အထိ ကျင့်ကြံထားပြီး၊ ခန္ဓာကိုယ်တွင်းရှိ သွေးကြောများနှင့် သွေးကြောဆုံ အများအပြားကို ဖွင့်လှစ်ထားပြီးဖြစ်သော အခြေအနေမျိုးတွင်ပင် သည်လောက် ကြာမြင့်နေခြင်းကြီးလေ။

သည်နှုန်းအတိုင်းဆိုလျှင် သူ အစားမစား ရေမသောက်ဘဲ (၁၀) ရက် ဆက်တိုက် လေ့ကျင့်နေမည် ဆိုလျှင်တောင် အများဆုံး နာရီ (၁၂၀) သာ ရရှိမည်ဖြစ်ရာ အဆင့် (၂) ၏ တစ်ဝက်သို့ပင် ရောက်ရှိနိုင်မည် မဟုတ်ချေ။

နတ်ဘုရား အလင်းဖြာ ကျင့်စဉ်အပေါ် ချူကျန့်၏ နားလည်ထားမှုအရ အနည်းဆုံး အဆင့် (၃) သို့ ရောက်ရှိမှသာ သူ၏ အတွင်းအားမှာ အခြားသူများကို ကုသပေးနိုင်လောက်သည့် အနေအထားသို့ ရောက်ရှိမည် ဖြစ်သည်။ သို့မဟုတ်ပါက မိမိကိုယ်ကို ကုသရန်သာ အသုံးဝင်ပေလိမ့်မည်။

ချူကျန့် ခေတ္တမျှ စဉ်းစားခန်း ဝင်နေပြီးနောက် ရုတ်တရက် အကြောင်းအရာ တစ်ခုကို သတိရသွားတော့သည်။ သူသည် ချန်လင်းစု၏ အထုပ်ထဲမှ ဆေးပုလင်း အားလုံးကို ကပျာကယာ ထုတ်ယူလိုက်ပြီး၊ ဆေးဖြစ်စေ၊ အဆိပ်ဖြစ်စေ ဂရုမစိုက်တော့ဘဲ ပါးစပ်ထဲသို့ အကုန်အစင် သွန်ချကာ နတ်ဘုရား အလင်းဖြာ ကျင့်စဉ်ကို ပြန်လည် လေ့ကျင့်လိုက်၏။

အချိန်ခဏအကြာတွင် သူ မျှော်လင့်ထားသည့်အတိုင်း ဂိမ်းစနစ်၏ အသိပေးသံ ထွက်ပေါ်လာတော့၏။

[ဒင်... သင်၏ ခန္ဓာကိုယ်တွင်းရှိ ဖားပြုတ်နီ သွေးကြောသည် အဆိပ်တောက်များ အားလုံးကို အောင်မြင်စွာ စုပ်ယူဝါးမြိုလိုက်ပြီး အတွင်းအားများအဖြစ် ပြောင်းလဲပေးလိုက်ပါပြီ။ သင်၏ အတွင်းအား ကျင့်ကြံမှုမှာ တဟုန်ထိုး တိုးတက်လာပါပြီ]

ချူကျန့် တစ်ယောက် ဝမ်းသာလုံးဆို့သွားတော့သည်။ လေ့ကျင့်ရန် လိုအပ်သည့် အချိန်ကို သူ လှမ်းကြည့်လိုက်ရာ နာရီ (၃၀၀) မှ (၂၅၀) သို့ ချက်ချင်း လျော့ကျသွားသည်ကို တွေ့လိုက်ရ၏။

‘ဒီနည်းလမ်းက အလုပ်ဖြစ်တာပဲ’

ထိုအချိန်မှစ၍ ချန်လင်းစု၏ အထုပ်ထဲရှိ ဆေးလုံးမျိုးစုံကို တံမြက်စည်းလှည်းသကဲ့သို့ သိမ်းကြုံးစားသောက်ကာ လေ့ကျင့်သည့် ချူကျန့်၏ ပုံမှန်မဟုတ်သော သိုင်းလေ့ကျင့်မှု ခရီးစဉ်ကြီး စတင်တော့သည်။ လေဝင်လေထွက် မကောင်းသော ထောင့်တစ်နေရာကို ရွေးချယ်ကာ၊ နာမည်ကျော် အဆိပ်ဖြစ်သည့် နှလုံးသားခုနစ်ခု ပန်း အဆိပ်ရည် ပါဝင်သော ဖယောင်းတိုင်ကို ထွန်းညှိလျက်၊ ထိုအဆိပ်ငွေ့များကို ရှူရှိုက်ရင်း နတ်ဘုရား အလင်းဖြာ ကျင့်စဉ်ကို လေ့ကျင့်တော့သည်။

ထိုကာလများအတွင်း ချန်လင်းစု၏ အခြေအနေကို စစ်ဆေးခြင်း၊ တိယွင်နှင့် အတွင်းအား အကြောင်း ဖလှယ်ခြင်းနှင့် အမြန် အစားစားခြင်းတို့မှလွဲ၍ ကျန်ရှိသော အချိန်အားလုံးကို နတ်ဘုရား အလင်းဖြာ ကျင့်စဉ် လေ့ကျင့်ရန်အတွက်သာ သူ မြှုပ်နှံထားလိုက်၏။

သူ၏ တိုးတက်မှုမှာ မျက်စိတစ်မှိတ်အတွင်း ခရီးမိုင်တစ်ထောင် ပေါက်သကဲ့သို့ အလွန် မြန်ဆန်လှသည်။ အထူးသဖြင့် နတ်ဘုရား အလင်းဖြာ အတွင်းအားသည် သူ၏ မူလ ချွမ်ကျန်း အတွင်းအားများနှင့် တဖြည်းဖြည်း ပေါင်းစပ် ဝါးမြိုသွားခြင်းပင် ဖြစ်၏။

၎င်းက ကျင့်စဉ်၏ ထူးခြားချက်လော၊ သို့တည်းမဟုတ် နတ်အဆင့် သိုင်းပညာများက အဆင့်နိမ့် သိုင်းပညာများကို ပေါင်းစပ်ခွင့်ပြုထားသော ဂိမ်းစနစ်၏ သတ်မှတ်ချက်လော မသိရသော်လည်း ချူကျန့်အတွက်မူ ကောင်းကျိုးသာ ဖြစ်စေပြီး သူ၏ နတ်ဘုရား အလင်းဖြာ ကျင့်စဉ်ကို အရှိန်အဟုန်ဖြင့် တိုးတက်သွားစေတော့သည်။ ပဉ္စမမြောက်နေ့တွင် အဆင့် (၃) သို့ပင် အောင်မြင်စွာ ရောက်ရှိသွားချေပြီ။

ပုံမှန် အခြေအနေမျိုးတွင် ဆိုပါက ဤအဆင့်သို့ ရောက်ရန် ချူကျန့်အနေဖြင့် အနည်းဆုံး နာရီ (၁၀၀၀) သို့မဟုတ် သုံးလခန့် အချိန်ယူရမည်သာ။

ယခုအခါ အဆင့် (၃) သို့ အောင်မြင်စွာ ရောက်ရှိသွားပြီ ဖြစ်ရုံသာမက၊ သူ၏ ခန္ဓာကိုယ် အခြေခံမှာလည်း အလွန် ခိုင်မာတောင့်တင်းလာရာ အဆင့် (၄) သို့ ဆက်လက် တက်လှမ်းနိုင်ရန် လမ်းစ ပွင့်သွားခဲ့လေပြီ။

ထိုအချိန်တွင် အဝေးမှ စကားများ ရန်ဖြစ်နေသံကို သူ ကြားလိုက်ရသည်။ လေ့ကျင့်နေမှုကို ရပ်တန့်ကာ အကဲခတ်ရန် ထွက်လာခဲ့ပြီး၊ ချူကျန့်၏ မျက်ဝန်းများအတွင်း၌ အေးစက်စက် အလင်းရောင် တစ်ချက် ဝင်းလက်သွားတော့၏။

နတ်ဘုရား အလင်းဖြာ ကျင့်စဉ်ကိုသာ အသည်းအသန် လေ့ကျင့်နေခဲ့သဖြင့် ဟွာထျဲကန် ဆိုသည့် လူကြီးကို သူ မေ့သွားခဲ့သည်။ နေ့ ညဉ့်ပါ နှစ်ရက်တိတိ အစာငတ်နေခဲ့သော ဟွာထျဲကန်မှာ နောက်ဆုံးတွင် အကြောပိတ်ခံထားရမှုမှ အလိုအလျောက် ပွင့်သွားသည့် အချိန်သို့ ရောက်ရှိလာခဲ့ခြင်းပင်။

ဟွာထျဲကန်သည် ချက်ချင်း ထခုန်ကာ အစားအသောက်များရှိရာသို့ ပြေးလွှားသွားပြီး လုယက် စားသောက်တော့သည်။ ရွှေရှန်းက ချန်လင်းစုအတွက် ပြင်ဆင်ထားသော အသားဆန်ပြုတ် ပန်းကန်ကိုပါ ထိုလူကြီးက လုယူသွားခဲ့၏။

ရွှေရှန်းမှာ ဒေါသအမျက် ခြောင်းခြောင်းထွက်ကာ သူ့အား အော်ဟစ် ဆဲဆိုသော်လည်း ဟွာထျဲကန်မှာမူ ဤနှင်းတောင်ကြားထဲတွင် မိမိကိုယ်မိမိ ပြိုင်ဘက်ကင်းပြီဟု မှတ်ယူကာ အလွန်အမင်း မာနထောင်လွှားနေချေပြီ။ သူက ရွှေရှန်းကို မြေပြင်ပေါ်သို့ လဲကျသွားသည်အထိ ရိုက်ချလိုက်၏။ အသံများ ကြား၍ တိယွင် ပြေးရောက်လာသော်လည်း သူ၏ သိုင်းပညာများမှာ အားနည်းလှသဖြင့် ဟွာထျဲကန်၏ အကြောပိတ် တိုက်ခိုက်မှုအောက်တွင် လျင်မြန်စွာပင် အညံ့ခံလိုက်ရတော့သည်။

ဗိုက်ဝသွားပြီးနောက် ဟွာထျဲကန်သည် ရွှေရှန်းအပေါ် ယုတ်မာသော အကြံအစည်များ ပေါ်ပေါက်လာတော့သည်။ သူက နှုတ်ခမ်းကို သပ်ရင်း ရွှေရှန်း၏ လှပသော မျက်နှာလေးကို ငေးကြည့်ကာ ပြောလိုက်၏။

“ချူ ဆိုတဲ့ ကောင်လေး လာကယ်မယ်လို့ မင်း မျှော်လင့်မနေနဲ့ အခုပဲ အဲ့ဒီကောင်ကို သွားသတ်ပစ်လိုက်မယ် ပြီးမှ မင်းကို ဖြည်းဖြည်းချင်း ရှင်းမယ်”

သူ၏ အဓိပ္ပာယ်ကို ရွှေရှန်း ချက်ချင်း နားလည်သွားပြီး ရင်ထဲတွင် ကြောက်ရွံ့ ချောက်ခြားမှုများ အေးစက်စွာ စီးဆင်းသွားတော့သည်။ သူမက ဒေါသတကြီးဖြင့် အော်ဟစ်လိုက်၏။

“အရှက်မရှိတဲ့ သူ..ရှင် လူရော ဟုတ်သေးရဲ့လား”

“လူဟုတ်မဟုတ်... ခဏနေရင် မင်း သိရမှာပေါ့”

ဟွာထျဲကန်က ရွံရှာဖွယ်ကောင်းအောင် တဟီးဟီး ရယ်လိုက်သည်။ ရုတ်တရက် သူ၏ ကျောဘက်မှ လေခွင်းသံတစ်ခု ထွက်ပေါ်လာ၏။ လန့်ဖျတ်သွားသော ဟွာထျဲကန်မှာ စဉ်းစားမနေတော့ဘဲ ကိုယ်ခန္ဓာအား ဘေးသို့ ရှောင်တိမ်းလိုက်၏။

“ဝှစ်”

အမည်းရောင် ဝတ်ရုံကြီးတစ်ခုက သူ့အနားမှ ဖြတ်သန်းသွားပြီး မျက်စိဖြင့် မမြင်နိုင်သော အမှုန့်များကို လွင့်စင်သွားစေသည်။

ဟွာထျဲကန်သည် ချူကျန့်ကို လက်ပြန် ရိုက်ချလိုက်ပြီး လှည့်ကာ မထီမဲ့မြင် ပြုံးလိုက်၏။

“ဟေ့ကောင်... မင်းဘာသာ သေချင်လို့ လာတာ ပိုကောင်းတယ် မင်းကို ငါ ဘယ်လိုသတ်မလဲ ကြည့်ထား ဟင်းဟင်း... မဟုတ်သေးပါဘူး မင်းကို အလွယ်တကူ သတ်ပစ်လိုက်ရင် အရမ်း သက်သာသွားမှာပေါ့ ငါ့တူမလေးကို မင်း မျက်စိကျနေတာ ငါသိတယ် မင်း မျက်စိရှေ့မှာတင် သူ့ကို ငါ အရသာခံပြမယ် အရှက်ကွဲတာနဲ့ မျှော်လင့်ချက်မဲ့တာ ဘယ်လိုလဲဆိုတာ မင်းကို ကောင်းကောင်းကြီး သိစေရမယ်”

“မင်း စကား အရမ်းများတယ်”

ချူကျန့်က အေးစက်စက် တုံ့ပြန်လိုက်သည်။ သူက ရှေ့သို့ ဖြည်းညင်းစွာ လျှောက်သွားရာ ဟွာထျဲကန်က သူ့အား ဒေါသတကြီးဖြင့် လက်သီးတစ်လုံး တအားထိုးသွင်းလိုက်၏။ သို့သော် သူ၏ လက်သီးမှာ လမ်းတစ်ဝက်တွင်ပင် အားပျော့သွားပြီး မြေပြင်ပေါ်သို့ ဝုန်းခနဲ ပစ်ကျကာ သတိလစ်သွားတော့သည်။

ချူကျန့်သည် တစ်ချက်လေးမျှပင် မရှောင်တိမ်းခဲ့ချေ။ သူ ဝတ်ရုံကို ဖြန့်ချလိုက်ကတည်းက တိုက်ပွဲ ရလဒ်မှာ ဆုံးဖြတ်ပြီးသား ဖြစ်နေခဲ့ပြီ။ သို့သော် ချန်လင်းစု အထူးဖော်စပ်ထားသော မေ့ဆေးမှုန့်ကို ရှူမိပြီးနောက် မိနစ်ဝက်ခန့်အထိ တောင့်ခံထားနိုင်ခြင်းမှာ အမှန်တကယ်ပင် အထင်ကြီးလောက်သည်။

ချူကျန့်သည် ရှေ့သို့ ခြေနှစ်လှမ်း ထပ်တိုးလိုက်ပြီး လက်သီးထဲသို့ အတွင်းအားများကို စုစည်းကာ နတ်ဘုရား အလင်းဖြာ ကျင့်စဉ်၏ အရိပ်မဲ့ နတ်လက်သီး သိုင်းကွက်ဖြင့် ဟွာထျဲကန်၏ ချီဟိုင် သွေးကြောဆုံကို အားပါးတရ ထိုးချလိုက်တော့၏။

လက်ရှိအချိန်တွင် သူ၏ ခွန်အားမှာ ဟွာထျဲကန်၏ (၄၅၀) မှတ်နှင့် နှိုင်းယှဉ်လျှင် များစွာ အားနည်းနေသေးသော်ငြား အရိပ်မဲ့ နတ်လက်သီးနှင့် နတ်ဘုရား အလင်းဖြာ အတွင်းအားတို့ ပေါင်းစပ်သွားမှုက ကြောက်ခမန်းလိလိ ဖျက်ဆီးနိုင်စွမ်းကို ဖြစ်ပေါ်စေသည်။ ထို့အပြင် ဟွာထျဲကန်မှာ နှစ်ရက်တိတိ အစာငတ်နေခဲ့သဖြင့် သူ၏ ကာယခွန်အားနှင့် အတွင်းအား ထက်ဝက်ခန့်မှာ ကုန်ခမ်းနေပြီး၊ ကာကွယ်ရေး စွမ်းအားများလည်း အလွန်အမင်း ကျဆင်းနေခဲ့ပြီပင်။

ဤမျှ ကွာဟနေသော အခြေအနေအောက်တွင် ချူကျန့်၏ လက်သီးတစ်ချက်က ဟွာထျဲကန်၏ ဒန်တျန်ကို တစ်စစီ ကြေမွသွားစေပြီး စွမ်းအားအားလုံးကို ဖျက်ဆီးပစ်လိုက်၏။

ထို့နောက် ချူကျန့်သည် သွေးဓားကို ဆွဲထုတ်ကာ ဟွာထျဲကန်၏ ခြေလက် အကြောများကို ဖြတ်တောက်ပြီး အရိုးများကိုပါ ချိုးဖျက်ပစ်လိုက်ရာ ထိုလူကြီးမှာ တစ်သက်လုံး အိပ်ရာပေါ်တွင်သာ လှဲနေရတော့မည့် ဒုက္ခသည်ဘဝသို့ ရောက်ရှိသွားလေတော့သည်။