ဒေါသထွက်ဖွယ်ရာ ဂိုဏ်းချုပ်…..

​လီချင်းချိုး၏ စိတ်ထဲတွင် အတွေးများစွာ ဖြတ်ပြေးသွားပြီးနောက် တိတ်ဆိတ်စွာပင် စုံစမ်းရန် ရွေးချယ်လိုက်သည်။

​[အမည် - စွန်းမော့ရှင်း]

[လိင် - ကျား]

[အသက် - ၆၂ နှစ်]

[သစ္စာစောင့်သိမှု (ဂိုဏ်းချုပ်/ဂိုဏ်း) - ၂/၃၆ (အများဆုံး ၁၀၀)]

[ကျင့်ကြံခြင်း ပါရမီ - သာမန်]

[နားလည်နိုင်စွမ်း - ကောင်းမွန်]

[ကံကြမ္မာ - စိတ်မတည်ငြိမ်သူ၊ လေ့လာစူးစမ်းသူ]

[စိတ်မတည်ငြိမ်သူ - မိမိ မြင်တွေ့ ကြားသိရသည့် အရာများအပေါ် လွယ်ကူစွာ စိတ်အနှောင့်အယှက် ဖြစ်တတ်ပြီး ခိုင်မာသော ယုံကြည်ချက် ကင်းမဲ့သည်]

[လေ့လာစူးစမ်းသူ - အမည်မသိ နယ်မြေများကို စူးစမ်းရှာဖွေရသည်ကို နှစ်သက်ပြီး ကျွမ်းကျင်သည်... နေရာသစ်တစ်ခုသို့ ပထမဆုံးအကြိမ် သွားရောက်သောအခါ ကံကောင်းခြင်းများ ရရှိတတ်သည်]

​ကိုယ်ရေးအချက်အလက်မှာ အလွန် သာမန်ဖြစ်ပြီး ပြိုင်ဘက်ကင်း ပါရမီရှင် တစ်ဦး မဟုတ်ကြောင်း ထင်ရှားနေသည်။

"စိတ်မတည်ငြိမ်သူ" ဟူသော ကံကြမ္မာက လှုံ့ဆော်မှု ပြုလုပ်ရန် အလားအလာ ရှိနေကြောင်း ပြသနေသည်။

​လီချင်းချိုး အလျင်စလို ဆုံးဖြတ်ချက် မချခဲ့ပေ။ သူ့အနေနှင့် ဤစွန်းမော့ရှင်း နှင့် ဦးစွာ အဆက်အသွယ် ပြုလုပ်ရန် လိုအပ်သည်။

​သူသည် စွန်းမော့ရှင်း၏ မျက်နှာကို မှတ်သားထားလိုက်သော်လည်း ချက်ချင်း အရေးမယူခဲ့ပေ။ တစ်ဖက်လူက သူလျှိုအဖြစ် ရောက်ရှိနေခြင်း ဖြစ်သဖြင့် အလျင်စလို လှုပ်ရှားမည် မဟုတ်ဘဲ ချင်းရှောင်ဂိုဏ်းတွင် အချိန်အတော်ကြာ အခြေချရန် ကြိုးစားမည်သာ ဖြစ်၏။

​သူသည် လီရှို့ကျန်းနှင့် လီရှို့မင်တို့၏ ကျင့်ကြံခြင်းကို ဆက်လက် စောင့်ကြည့်နေပြီး နောက်တစ်နေ့တွင် စွန်းမော့ရှင်းနှင့် ထပ်မံ အဆက်အသွယ် ပြုလုပ်ရန် ပြင်ဆင်လိုက်သည်။

​ဝိညာဉ်အသိအာရုံအဆင့် ကျင့်ကြံသူ ငါးဦးရှိနေပြီ ဖြစ်သော ချင်းရှောင်ဂိုဏ်းမှာ ယခုအခါ ယခင်ကနှင့် လုံးဝ ကွဲပြားခြားနားနေပြီ ဖြစ်ပြီး မည်သည့်အရာကိုမဆို ကိုင်တွယ်ဖြေရှင်းနိုင်သည့် ယုံကြည်မှု ရှိနေပြီ ဖြစ်၏။

​နေဝင်ပြီး လထွက်လာသည်နှင့်အမျှ နောက်ထပ် ညတစ်ည ကုန်လွန်သွားခဲ့ပြန်သည်။

​နောက်နေ့ အရုဏ်တက်ချိန်တွင် တောင်အောက်ရှိ နေရာမှာ တစ်ဖန် ပြန်လည် စည်ကားလာခဲ့သည်။

​ တပည့်များအတွက် ခြံဝင်းသစ်တစ်ခု အတွင်း၌ စွန်းမော့ရှင်းက သူ၏ အခန်းထဲမှ ထွက်လာပြီး အကြောဆန့်လိုက်သည်။

တပည့်ဝတ်စုံကို ဝတ်ဆင်ထားသော သူ့ ရုပ်ရည်မှာ အထူးတလည် ထင်ရှားခြင်း မရှိချေ။ သူ့မျက်နှာမှာ ဖြူဝင်းပြီး နူးညံ့သည်ဟုသာ ဖော်ပြနိုင်ပြီး အသက် နှစ်ဆယ်ကျော် အရွယ်ခန့်သာ ရှိသေးသကဲ့သို့ နုပျိုနေပုံရသည်။

​"ငါ ကောင်းကောင်း အိပ်ပျော်သွားတယ်..."

​စွန်းမော့ရှင်းက ရိုးသားစွာ သက်ပြင်းချလိုက်သည်။ သူသည် ပင်လယ်ရပ်ခြားမှ လာခဲ့ခြင်း ဖြစ်ပြီး လူသူကင်းမဲ့သော နေရာတွင် တစ်ယောက်တည်း ရှိနေချိန်တွင် အမြဲ သတိဝီရိယ ရှိခဲ့သော်လည်း၊ မနေ့ညကမူ သတိလွတ်သွားပြီး နှစ်နှစ်ခြိုက်ခြိုက် အိပ်ပျော်သွားခဲ့သည်။

သူ ဤသို့ သတိလွတ်ရဲခြင်းမှာ ချင်းရှောင်ဂိုဏ်းအပေါ် နားလည်မှုအပေါ်တွင် အခြေခံထားခြင်း ဖြစ်သည်။

​ဤကျင့်ကြံရေးဂိုဏ်း၏ ထွန်းကားလာမှုမှာ တားဆီး၍ မရနိုင်ချေ။

သူ ချင်းရှောင်ဂိုဏ်းသို့ ရောက်ရှိလာပြီး နှစ်ရက်အတွင်း ဂိုဏ်း၏ တက်ကြွမှုနှင့် ဖွံ့ဖြိုးတိုးတက်နေစဉ်အတွင်း တိုက်ခိုက်လိုစိတ်တို့ကို သူ ခံစားခဲ့ရပြီး ၎င်းမှာ သူနေထိုင်ရာ ဇီယန်ကျွန်းတွင် မရှိသော စိတ်ဓာတ်မျိုး ဖြစ်၏။

​ဇီယန်ကျွန်းကို တည်ထောင်ခဲ့သည်မှာ နှစ်တစ်ထောင် ကြာမြင့်နေပြီ ဖြစ်ပြီး ၎င်း၏ စည်းမျဉ်းစည်းကမ်းများမှာ ကောင်းစွာ အခြေချနေပြီ ဖြစ်သည်။ သို့သော်လည်း ကျွန်းမှာ မှုန်မှိုင်းသော လေထုဖြင့် ဖုံးလွှမ်းနေပြီး ဒါကြောင့်ပင် စွန်းမော့ရှင်းက အပြင်ထွက်ရသည်ကို သဘောကျခြင်း ဖြစ်၏။

မြောက်ပိုင်း ခရီးစဉ်တွင် ဤကဲ့သို့သော ကျင့်ကြံရေး ဂိုဏ်းမျိုးကို တွေ့ရှိရမည်ဟု သူ တစ်ခါမှ မမျှော်လင့်ထားခဲ့ချေ။

​သူသည် လွန်ခဲ့သော အနှစ်သုံးဆယ်က ကိုးပြည်ထောင်နယ်မြေသို့ လာရောက်လည်ပတ်ခဲ့ဖူးသော်လည်း မည်သည့် ကျင့်ကြံရေး ဂိုဏ်းကိုမျှ မတွေ့ခဲ့ရပေ။ သူ ထပ်မံ ပြန်လာသောအခါ အရာအားလုံး သိသိသာသာ ပြောင်းလဲသွားပြီ ဖြစ်ကြောင်း တွေ့ရှိလိုက်ရသည်။

​စွန်းမော့ရှင်းက ချင်းရှောင်ဂိုဏ်းတွင် အချိန်အတန်ကြာ နေထိုင်ရန် စီစဉ်ထားပြီး၊ ပထမအနေဖြင့် ဂိုဏ်း၏ အစစ်အမှန် စွမ်းအားကို လေ့လာရန်နှင့် ဒုတိယအနေဖြင့် ထိုနေရာတွင် အချိန်အတိုင်းအတာ တစ်ခုအထိ အနားယူရန် ဖြစ်သည်။

ထို့နောက် အစစ်အမှန် ရည်ရွယ်ချက်များကို အကောင်အထည်ဖော်ရန် မြောက်ဘက်သို့ ဆက်လက် ခရီးထွက်မည် ဖြစ်၏။

​ခြံဝင်းတူ တပည့်သစ်များလည်း သူတို့၏ အခန်းထဲမှ တစ်ယောက်ပြီး တစ်ယောက် ထွက်လာကြပြီး စွန်းမော့ရှင်းကို မြင်သောအခါ သူတို့အားလုံးက သူ့ကို နှုတ်ဆက်ကြသည်။ စွန်းမော့ရှင်းက မနေ့က စမ်းသပ်မှုအတွင်း သူတို့ကို လမ်းညွှန်မှုများ ပေးခဲ့သဖြင့် သူတို့အပေါ် ကောင်းသော အထင်အမြင်တစ်ခု ချန်ထားနိုင်ခဲ့သည်။ သူတို့အားလုံးက ဤစီနီယာအစ်ကိုကြီးမှာ လူကောင်း တစ်ယောက် ဖြစ်ပြီး အလွန် အရည်အချင်းရှိသည်ဟု ခံစားနေကြရသည်။

​စွန်းမော့ရှင်းကလည်း ဤတပည့်သစ်များကို အတော်လေး သဘောကျပြီး အဓိကအားဖြင့် သူတို့မှာ ငယ်ရွယ်ပြီး ရိုးရှင်းသော စိတ်ထား ရှိကြသောကြောင့် ဖြစ်သည်။

​"အစ်ကိုစွန်း... ဒီနေ့ မှော်ပညာပြိုင်မှုကို အတူတူ သွားကြည့်ကြမလား..."

လမ်းတစ်ဖက်ရှိ တံခါးရှေ့တွင် ရပ်ကာ အဝတ်အစားများကို သပ်ရပ်အောင် လုပ်နေသော ခန္ဓာကိုယ် တောင့်တင်းသည့် လူငယ်တစ်ဦးက အသံကျယ်ကျယ်ဖြင့် မေးလိုက်တော့ ​စွန်းမော့ရှင်းက ရယ်မောကာဖြင့် "ကောင်းပြီလေ..."ဟု ပြန်ဖြေလိုက်သည်။

​အခြား တပည့်သစ်များကလည်း ဤသဘောထားကို ထောက်ခံကာ အတူတကွ သွားလိုကြသဖြင့် စွန်းမော့ရှင်းက မငြင်းဆန်ခဲ့ဘဲ နောက်ဆုံးတွင် သူတို့ ခြံဝင်းတစ်ခုလုံး အတူတကွ ခရီးသွားရန် ဆုံးဖြတ်လိုက်ကြသည်။

​သူတို့တွေ အရင်ဆုံး စားသောက်ကြပြီးနောက် တောင်အောက်သို့ ဆင်းလာခဲ့ကြသည်။

မူလအားဖြည့်နယ်ပယ် နဝမအဆင့်တွင် ရှိနေသော စွန်းမော့ရှင်းသည် အစားစားရန် မလိုအပ်တော့သော်လည်း၊ ရုပ်ဖျက်ထားမှုတွင် အားနည်းချက် တစ်စုံတစ်ရာကို မမြင်နိုင်အောင် သေချာစွာ ရုပ်ဖျက်ထားခဲ့သည်။

​ချင်းရှောင်ဂိုဏ်းတွင် ဝိညာဉ်အသိအာရုံအဆင့် ကျင့်ကြံသူများ ရှိနေသဖြင့် စွန်းမော့ရှင်းမှာ အစစ်အမှန် သရုပ်ကို ဖော်ပြရန် မရဲချေ။

​တစ်နေ့တာ၏ တစ်ဝက်ခန့် လျင်မြန်စွာ ကုန်လွန်သွားခဲ့ပြီး ​မွန်းလွဲပိုင်းတွင်…..

စွန်းမော့ရှင်းနှင့် တပည့်တစ်စုတို့ ပြိုင်ပွဲဝင် စင်မြင့် အောက်တွင် ရပ်ကာ တိုက်ပွဲကို ကြည့်ရှုနေကြသည်။ သူတို့က ပတ်ဝန်းကျင်ရှိ တပည့်များနှင့်အတူ အခါအားလျော်စွာ အံ့သြတကြီး အော်ဟစ်ကြပြီး စည်ကားသိုက်မြိုက်သော လေထုကို ဖန်တီးပေးနေကြ၏။

​"ဒီဂိုဏ်းငယ်လေးက တကယ်ကို ထူးခြားတာပဲ... သူတို့ဆီမှာ မန္တန်တွေ အများကြီး ရှိတယ်..." ဟု စွန်းမော့ရှင်းက စိတ်ထဲမှ တွေးလိုက်သည်။

​သူ ချင်းရှောင်ဂိုဏ်းထဲသို့ အမှန်တကယ် ဝင်ရောက်သွားသောအခါမှသာ သူ့အနေဖြင့် လျှော့တွက်ထားမိကြောင်း သဘောပေါက်သွားခဲ့သည်။

​ဂိုဏ်း၏ အခြေခံအုတ်မြစ်မှာ သူ ထင်ထားသည်ထက် များစွာ ပိုမို နက်ရှိုင်းလှသည်။

​မန္တန်များ၊ မှော်ပစ္စည်းများ၊ အဆောင်များ၊ ဝိညာဉ်အပင်များ၊ ဆေးလုံးများ အစရှိသည်တို့ အဘက်ဘက်မှ ပြိုင်တူ ဖွံ့ဖြိုးတိုးတက်နေပြီး ဂိုဏ်းအတွင်းရှိ ပါရမီရှင်များ၏ အရေအတွက်မှာလည်း အနည်းငယ် ပိုမို များပြားနေပုံရသည်။

​ယခု စင်မြင့်ပေါ်တွင် ရှိနေသော လီရန် ကဲ့သို့ပင်၊ ဤကောင်လေးကို ဇီယန်ကျွန်း တွင် ထားပါက သူသည်လည်း နာမည်တစ်ခု ရနိုင်လိမ့်မည်ဟု သူ ခံစားလိုက်ရသည်။

​အကယ်၍ ချင်းရှောင်ဂိုဏ်းကို အတားအဆီးမရှိ ကြီးထွားခွင့် ပြုမည်ဆိုပါက ဇီယန်ကျွန်းကို သေချာပေါက် ခြိမ်းခြောက်လာမည်သာ။

​ချင်းရှောင်ဂိုဏ်းက ဇီယန်ကျွန်းနှင့် အလွန် ဝေးကွာသော်လည်း ကျင့်ကြံရေး ဂိုဏ်းများ၏ မြေပုံအရ ၎င်းတို့ နှစ်ခုမှာ အလွန် နီးကပ်နေပြီး ကြားတွင် အခြား မည်သည့် ဂိုဏ်းမျှ မရှိချေ။

​ဤအချက်ကို တွေးမိသောအခါ စွန်းမော့ရှင်း မျက်မှောင်ကြုတ်သွားပြီး သူ့မျက်လုံးများတွင် စိုးရိမ်ပူပန်မှုများ ပြည့်နှက်သွားလေသည်။

​ထိုစဉ်မှာပင် ဘေးဘက်မှ ဆူညံသံတစ်ခု ထွက်ပေါ်လာသဖြင့် စွန်းမော့ရှင်း ခေါင်းလှည့်ကြည့်လိုက်တော့ လူအုပ်စုတစ်စု ပြိုင်ပွဲဝင် စင်မြင့် ဆီသို့ လျှောက်လာသည်ကို တွေ့လိုက်ရသည်။

​ဂိုဏ်းချုပ် ရောက်လာပြီဟု တပည့်များ အံ့သြတကြီး အော်ဟစ်နေကြသည်ကိုလည်း သူ ကြားလိုက်ရသည်။

​ချင်းရှောင်ဂိုဏ်းချုပ်…

​စွန်းမော့ရှင်းက ဤဂိုဏ်းချုပ်နှင့် ပတ်သက်၍ အလွန် စပ်စုချင်စိတ် ဖြစ်ပေါ်နေပြီး လီချင်းချိုးက ချင်းရှောင်ဂိုဏ်းအတွင်း၌ သူ စုံစမ်းစစ်ဆေးရမည့်သူ တစ်ယောက်လည်း ဖြစ်ပေသည်။

​ချင်းရှောင်ဂိုဏ်း၏ စွမ်းအားမှာ လီချင်းချိုးနှင့် ခွဲခြား၍ မရနိုင်ကြောင်း လူတိုင်းနီးပါး ယုံကြည်ထားကြသည်။

​လီချင်းချိုးက ချင်းရှောင်ဂိုဏ်းကို တည်ထောင်သူ မဟုတ်သော်လည်း၊ သူ တာဝန်မယူမီက ချင်းရှောင်ဂိုဏ်းမှာ သိုင်းဂိုဏ်းတစ်ခုအဖြစ်ပင် မသတ်မှတ်ခံခဲ့ရချေ။

​စွန်းမော့ရှင်းအနေနှင့် လီချင်းချိုးအပေါ် အခြားသူများ၏ သုံးသပ်ချက်များကိုသာ ကြားဖူးပြီး ဤသူသည် အလွန်မြင့်မားသော ဩဇာတိက္ကမရှိကာ အဓိပ္ပာယ်မဲ့သည့် အတိုင်းအတာအထိပင် ဖြစ်နေကြောင်း ခံစားခဲ့ရဖူးသည်။

လီချင်းချိုးကလည်း ကောလာဟလများက ဖော်ပြနေသကဲ့သို့ လျှို့ဝှက်ဆန်းကြယ်သည်ဟု သူ မယုံကြည်ပေ။

​ဤသည်မှာ လီချင်းချိုးကို သူ ပထမဆုံးအကြိမ် မြင်တွေ့ရခြင်း ဖြစ်ပြီး ပထမဆုံး အတွေးမှာ "နုပျိုမှုကို ထိန်းသိမ်းတဲ့ အလွန် ပြောင်မြောက်တဲ့ ပညာပဲ..." ဟူ၍ပင်။

​သူသည်လည်း သူ့ကိုယ်သူ နုပျိုနေအောင်သာ ထိန်းထားနိုင်ပြီး လီချင်းချိုးကဲ့သို့ ကောင်းမွန်သော ရုပ်ရည် မရှိချေ။

​သို့သော်လည်း သူ့အတွက် လက်ရှိဘရုပ်ရည်သွင်ပြင်မှာ အလွန်အမင်း ထင်ရှားနေ၍ မရချေ။ သို့မဟုတ်ပါကသူလျှိုအလုပ်ကို လုပ်ဆောင်ရန် ခက်ခဲလိမ့်မည်။

​လီချင်းချိုးက အတွင်းစည်းတပည့် တစ်စုနှင့်အတူ လျှောက်လာခဲ့ပြီး စွန်းမော့ရှင်းကို ရှာဖွေရန် ပြိုင်ပွဲဝင် စင်မြင့် ပတ်လည်ကို ပေါ့ပေါ့ပါးပါး ဝေ့ကြည့်လိုက်သည်။

​သူသည် ပြိုင်ပွဲဝင် စင်မြင့် သုံးခုကို သွားရောက်ခဲ့ပြီး ဖြစ်သော်လည်း စွန်းမော့ရှင်းကို မတွေ့ရသေးပေ။ သို့သော်လည်း ပထမနေ့သာ ရှိသေးသဖြင့် အလျင်မလိုပေ။

​မကြာမီ လီချင်းချိုး၏ အကြည့်များက စွန်းမော့ရှင်းကို ဖမ်းမိသွားသော်လည်း သူ မရပ်တန့်ခဲ့ဘဲ စွန်းမော့ရှင်းကို တစ်ခုခု မှားယွင်းနေကြောင်း မရိပ်မိစေရန် တစ်ချက်သာ ကြည့်လိုက်သည်။

​"သူက တကယ်ကို ပျော်ပွဲရွှင်ပွဲတွေကို သဘောကျတာပဲ..." ဟု လီချင်းချိုးက စိတ်ထဲမှ တွေးလိုက်ပြီး စွန်းမော့ရှင်း ရှိရာဘက်သို့ လျှောက်သွားလိုက်သည်။

​ယင်းကို မြင်သောအခါ စွန်းမော့ရှင်းမှာ ချက်ချင်းပင် စိုးရိမ်ပူပန်သွားတော့သည်။ ရုပ်ဖျက်ထားမှု ပေါ်လွင်သွားမည်ကို သူ မစိုးရိမ်သော်လည်း လီချင်းချိုးနှင့် အစောကြီး မတွေ့ချင်သေးပေ။

​ကံကောင်းစွာဖြင့် လီချင်းချိုးက သူ့ထံသို့ လျှောက်မလာဘဲ လူအုပ်၏ အစွန်းတွင်သာ ရပ်လိုက်ပြီး ပြိုင်ပွဲဝင် စင်မြင့် ဘက်သို့ ကြည့်ကာ လီရန်၏ တိုက်ပွဲကို ကြည့်ရှုနေသည်။

​လီရန်၏ ပြိုင်ဘက်မှာ မူလအားဖြည့်နယ်ပယ် ပဉ္စမအဆင့်တွင် ရှိပြီး အားနည်းခြင်း မရှိသော်လည်း၊ လီရန်နှင့် လာတွေ့သဖြင့် ကံဆိုးသွားခြင်း ဖြစ်သည်။ လီရန်က ပြိုင်ဘက်ကို အမြန် အနိုင်မယူရခြင်း၏ အကြောင်းရင်းမှာ စွမ်းရည်များကို ပြသရန် အခွင့်အရေး ပေးလိုသောကြောင့် ဖြစ်သည်။

​ထိုတပည့်က လီရန်၏ စေတနာကို သဘောပေါက်ပြီး စွမ်းရည်များကို အစွမ်းကုန် ပြသနေသဖြင့် စင်မြင့်အောက်ရှိ ပွဲကြည့်ပရိသတ်များနှင့် တပည့်များကို အလွန် နှစ်သက်စေခဲ့သည်။

​ထိုချိန်အတွင်း လီချင်းချိုးက စွန်းမော့ရှင်းကိုလည်း စောင့်ကြည့်နေခဲ့သည်။

​စွန်းမော့ရှင်းက ပတ်ဝန်းကျင်ရှိ တပည့်သစ်များနှင့် အလွန် အဆင်ပြေနေကြောင်း သူ သတိပြုမိခဲ့ပြီး ၎င်းက သူ့ကို အမှန်တကယ်ပင် စိတ်အေးသွားစေခဲ့သည်။

​အကယ်၍ စွန်းမော့ရှင်းတွင် ရေရှည် အစီအစဉ် မရှိပါက တပည့်များနှင့် ရောနှောနေရန် မလိုအပ်ပေ။

​တစ်ပြိုင်နက်တည်းမှာပင် စွန်းမော့ရှင်း၏ ကျင့်ကြံမှုအဆင့်ကို အကြမ်းဖျင်း ခန့်မှန်းနိုင်ခဲ့သည်။

​စွန်းမော့ရှင်းက အလွန် ကောင်းမွန်သော ရုပ်ဖျက်နည်းကို တတ်ကျွမ်းထားသော်လည်း လီချင်းချိုး၏ အာရုံခံနိုင်စွမ်းမှ မလွတ်ကင်းနိုင်ချေ။

​သူနှင့် ဝိညာဉ်အသိအာရုံအဆင့် ကြားတွင် ကွာဟချက် ရှိနေသေးသော်လည်း အလှမ်းမဝေးတော့ချေ။

​ဤသို့သော ကျင့်ကြံမှုကို လျစ်လျူရှုထား၍ မရပေ။

​လီချင်းချိုးက စွန်းမော့ရှင်းကို မည်သို့ ဆွဲဆောင်ရမည်ကို စတင် တွေးတောနေချေပြီ။

​အကယ်၍ အလုပ်မဖြစ်ပါက အင်အားသုံးရလိမ့်မည် ဖြစ်သည်။ သူ ပထမဆုံး လုပ်ရမည့်အရာမှာ စွန်းမော့ရှင်း၏ လှုပ်ရှားမှုများကို ပိတ်ဆို့ရန် ဖြစ်ပြီး ဒါမှသာ တောင်အောက်ဆင်းရန် အခွင့်အရေး မရှိတော့မည် ဖြစ်၏။

​လီရန်က ပွဲစဉ် ပြီးဆုံးသွားပြီးနောက် ပြိုင်ပွဲဝင် စင်မြင့် ပေါ်မှ ခုန်ဆင်းကာ လီချင်းချိုးထံသို့ ရောက်လာခဲ့သည်။

​သူတို့ နှစ်ဦး စကားပြော ရယ်မောနေကြသည်ကို မြင်သောအခါ စွန်းမော့ရှင်း လုံးဝ စိတ်သက်သာရာ ရသွားတော့သည်။

​သူတို့က ဂိုဏ်းအတွင်းက ပါရမီရှင်တွေအတွက် လာခဲ့ကြတာပဲ...

​သူ ချင်းရှောင်ဂိုဏ်း၏ တပည့်တစ်ယောက် ဖြစ်လာသည်မှာ နှစ်ရက်သာ ရှိသေးချိန်တွင် ဂိုဏ်းချုပ်နှင့် ဆုံတွေ့ခဲ့ရသည်။ သူ ဤမျှလောက် ကံဆိုးနိုင်မည်ဟု မယုံကြည်နိုင်ပေ။

​အတန်ကြာသော် လီချင်းချိုးက လီရန်နှင့်အတူ ထွက်ခွာသွားခဲ့ပြီး နောက်ထပ် ပြိုင်ပွဲတစ်ခုမှာ စတင်နေပြီ ဖြစ်သည်။

​စွန်းမော့ရှင်းက လီချင်းချိုး၏ ထွက်ခွာသွားသော ကျောပြင်ကို ကြည့်ကာ နောင်တရစွာဖြင့်….

"မင်းမှာ ထူးကဲတဲ့ စွမ်းရည်တွေ ရှိရင်တောင် အဲဒါတွေ အားလုံးက အချည်းနှီးပါပဲ... မင်းရဲ့ ဂိုဏ်းကို ဒီနေရာမှာ မတည်ထောင်သင့်ဘူး... ဇီယန်ကျွန်းက မင်းကို ဆက်ပြီး ဖွံ့ဖြိုးတိုးတက်ခွင့် ပေးမှာ မဟုတ်ဘူး..."

​ချင်းရှောင်ဂိုဏ်းက သူ့ကို ကြီးမားသော တုန်လှုပ်မှု တစ်ခု ပေးခဲ့သည်မှာ အမှန်ပင် ဖြစ်သော်လည်း၊ ချင်းရှောင်ဂိုဏ်းက ဇီယန်ကျွန်းကို ကျော်တက်နိုင်မည်ဟု သူ မထင်ခဲ့ပေ။

​ဆယ်စုနှစ် အနည်းငယ်အတွင်း ချင်းရှောင်ဂိုဏ်း၏ ဖွံ့ဖြိုးတိုးတက်မှုက နှစ်တစ်ထောင် ကြာမြင့်သော အမွေအနှစ်ကို မတုန်လှုပ်စေနိုင်ပေ။

​...

​ရက်အနည်းငယ် အကြာတွင်….

​စွန်းမော့ရှင်း နေထိုင်ရာ ခြံဝင်းထဲမှ တပည့်အချို့သည် မှော်ကျမ်းစာတိုက် ကို စောင့်ကြပ်ရန် ခေါ်ယူခြင်း ခံရသည်ဟု အတွေ့အကြုံရှာဖွေရေးခန်းမနှ တပည့်များက လာရောက်သတင်းပို့ခဲ့သည်။

​ဤသည်မှာ စွန်းမော့ရှင်းကို အံ့အားသင့်စေခဲ့ပြီး သူ ရောက်ရှိလာပြီး မကြာမီ ဤသို့သော အခွင့်အရေးမျိုး ရရှိလိမ့်မည်ဟု မမျှော်လင့်ထားခဲ့ပေ။

​ထို့နောက် သူတို့၏ ခြံဝင်းမှ တပည့်များမှာ ချင်းရှောင်တောင်၌ တာဝန်ချထားခံရသည်။သူတို့သည် မှော်ကျမ်းစာတိုက်၏ အပြင်ဘက်ကို စောင့်ကြပ်ရန် တာဝန်ရှိကြသဖြင့် အဆောက်အအုံအတွင်းသို့ ဝင်ရောက်ခွင့် မရှိသော်လည်း စွန်းမော့ရှင်းမှာမူ အလွန် ကျေနပ်နေပြီ ဖြစ်၏။

​"ဓမ္မညီလာခံက နှစ်ဝက် ကြာလိမ့်မယ်... ဒီအချိန်အတွင်း ဂိုဏ်းထဲမှာ လူအမျိုးမျိုး ရှိနေလိမ့်မယ်... ဒါကြောင့် မင်းတို့ကို လိုအပ်တာ... ဂိုဏ်းအတွက်ကတော့ ဒါက ပြဿနာရှိတဲ့ ကိစ္စတစ်ခု ဖြစ်ပေမဲ့ မင်းတို့အတွက်ကတော့ ရှားပါးတဲ့ အခွင့်အရေး တစ်ခုပဲ... သာမန် တပည့်တွေက ဂိုဏ်းထဲ ဝင်လာပြီးရင် ဒီလို အခွင့်အရေးမျိုး ရခဲတယ်..."

​အတွေ့အကြုံရှာဖွေရေးခန်းမမှ တပည့်တစ်ဦးက စွန်းမော့ရှင်းနှင့် အခြားသူများ ရှေ့တွင် ရပ်ကာ လေးနက်သော အမူအရာဖြင့် ရှင်းပြနေသည်။

​သူတို့၏ နောက်ကွယ်တွင် မှော်ကျမ်းစာတိုက် ရှိပြီး နှစ်ပေါင်းများစွာ ပြုပြင်မွမ်းမံပြီးနောက် ကြီးမားကျယ်ပြန့်သော အဆောက်အအုံ တစ်ခု ဖြစ်လာခဲ့သည်။ သူတို့အပြင် ထိုနေရာကို စောင့်ကြပ် ကင်းလှည့်နေသော အခြား တပည့်များလည်း ရှိနေသဖြင့် လုံခြုံရေး အလွန် တင်းကျပ်ထားသည်ဟုဆိုနိုင်သည်။

​စွန်းမော့ရှင်းနှင့် အခြားသူများက သူတို့၏ သတိကို လျှော့ချမည် မဟုတ်ကြောင်း ချက်ချင်း အာမခံလိုက်ကြသည်။

​အတွေ့အကြုံရှာဖွေရေးခန်းမမှ တပည့်များက မထွက်ခွာမီ ညွှန်ကြားချက် အနည်းငယ် ထပ်ပေးခဲ့သေးသည်။

​သူတို့ ထွက်သွားပြီးနောက် တပည့်သစ်များက စိတ်လှုပ်ရှားစွာ ဆွေးနွေးကြတော့သည်။ သူတို့အားလုံး ဂိုဏ်းထဲ ဝင်လာပြီး မကြာမီ ဤမျှ အရေးကြီးသော တာဝန်တစ်ခု ပေးအပ်ခံရမည်ဟု မမျှော်လင့်ထားခဲ့သဖြင့် အလွန် ဝမ်းသာ အံ့သြနေကြသည်။

​စွန်းမော့ရှင်းမှာမူ ၎င်းနှင့် ပတ်သက်၍ အများကြီး မတွေးခဲ့ပေ။ နောက်ဆုံးတွင် ရုပ်ဖျက်ထားမှု ပေါ်လွင်သွားလျှင်ပင် သူ့ကို ဤကဲ့သို့ နေရာမျိုးတွင် ထားမည် မဟုတ်ချေ။

​နောက်တစ်ဆင့် အနေဖြင့် ချင်းရှောင်ဂိုဏ်း၏ မျိုးဆက် အကြောင်းကို လေ့လာရန် အခွင့်အရေး တစ်ခု ရှာနိုင်သည်။

​...

​ဧပြီလ အစောပိုင်းတွင်…..

​ကျန်းကျောက်ရှား နောက်ဆုံးတွင် ပြန်လည် ရောက်ရှိလာခဲ့ပြီ ဖြစ်သည်။ သူသည် ယခင်က ဓားဂိုဏ်းမှ တပည့် ငါးဦးကို လေ့ကျင့်ရေးဆင်းရန် တောင်အောက်သို့ ဦးဆောင် ခေါ်သွားခဲ့ပြီး၊ သူတို့၏ လှုပ်ရှားမှုများမှာ အဓိကအားဖြင့် နန်ချူစီရင်စုတွင် ဖြစ်ကာ ရှာဖွေမတွေ့ရှိသေးသော ကောင်းချီးမြေ များကို ရှာဖွေခြင်း ဖြစ်သည်။

​လီချင်းချိုးကလည်း "လောကီရေးရာ စစ်မှန်သောနဂါး" ကံကြမ္မာကို ပိုင်ဆိုင်ထားသော သူ့အပေါ် ကြီးမားသော မျှော်လင့်ချက်များ ထားရှိခဲ့သည်။

​ကျန်းကျောက်ရှားက သူ့ကို စိတ်ပျက်မစေခဲ့ဘဲ အမှန်တကယ်ပင် ကောင်းချီးမြေ တစ်ခုကို ရှာဖွေတွေ့ရှိခဲ့သည်။

​"အဲဒီ တောင်ကြားမှာ ဝိညာဉ်အပင်တွေ အပြည့်ပဲ... ဒါပေမဲ့ အဆိပ်ငွေ့တွေလည်း ထူထပ်တော့ ပုံရိပ်ယောင်တွေကို အလွယ်တကူ ဖြစ်စေနိုင်တယ်... တောင်ကြားကို စောင့်ကြပ်နေတဲ့ ဖားပြုတ်ကြီး တစ်ကောင် ရှိတယ်... မူလအားဖြည့်နယ်ပယ် သတ္တမအဆင့် မဟုတ်ရင် သူ့ရဲ့ လျှာနဲ့ အလွယ်တကူ ရစ်ပတ်ခံရပြီး သူ့ဗိုက်ထဲကို ရောက်သွားနိုင်တယ်..."

​ကျန်းကျောက်ရှားက စားပွဲရှည်တွင် ထိုင်ကာ လက်ဖက်ရည်ခွက်ကို လှုပ်ယမ်းရင်း တွေ့ကြုံခဲ့ရသည်များကို ပြန်ပြောပြနေသည်။

​လီချင်းချိုးက … "ငါတို့ အဲဒီ ဖားပြုတ်နဲ့ ဆက်သွယ်လို့ ရနိုင်မလား..."

​" ကြိုးစားကြည့်ခဲ့ပေမဲ့ မအောင်မြင်ဘူး... ဒါကြောင့် သူ့ကို သတ်ပစ်လိုက်တယ်..."

​ကျန်းကျောက်ရှားက ပြန်ဖြေလိုက်ပြီးနောက် ခါးမှ သိုလှောင်အိတ် တစ်လုံးကို အခြား လက်တစ်ဖက်ဖြင့် ယူကာ စားပွဲပေါ်တွင် တင်လိုက်ပြီး… …

​"အထဲမှာ သူ့ရဲ့ အကြွင်းအကျန်တွေ ရှိတယ်... သူ့ရဲ့ မူလချီကို ဖယ်ရှားဖို့ အဆောင်တွေနဲ့ ပိတ်လှောင်ထားတယ်..." ဟု ပြောလိုက်ပြီးနောက် ပန်းကန်လုံးထဲရှိ လက်ဖက်ရည်ပူပူကို သောက်လိုက်သည်။

​လီချင်းချိုးက စစ်ဆေးရန် သိုလှောင်အိတ်ကို ထုတ်ယူလိုက်ရာ ဖားပြုတ်၏ အလောင်းမှာ အလွန် ကြီးမားပြီး တောင်ဝက်ဝံ တစ်ကောင်ခန့် ကြီးမားကြောင်း တွေ့လိုက်ရတော့သည်။