ဂိုဏ်းချုပ်ကတော်
Vol. 28 Ch. 274
"ကောင်းတယ်... အဲဒီ တောင်ကြားကို လူလွှတ်လိုက်မယ်... မင်းခေါ်လာတဲ့ တပည့်တွေ လမ်းမှတ်မိတယ် မဟုတ်လား..."
လီချင်းချိုးက ဝိညာဉ်အသိအာရုံကို သိုလှောင်အိတ်ထဲမှ ပြန်ရုပ်သိမ်းလိုက်ပြီး ကျန်းကျောက်ရှားကို ကြည့်ကာ ညင်သာစွာ ရယ်မောလိုက်သည်။
ဂိုဏ်းအတွင်း တပည့် အရေအတွက် များပြားလာသည်နှင့်အမျှ ကောင်းချီးမြေများ၏ အရေအတွက်အပေါ် ဖိအားမှာလည်း တိုးလာပြီး ယခုအခါ ထျန်းရှန်းဝိညာဉ်ရေကန်သည် အဓိက ကျင့်ကြံရေး နယ်မြေတစ်ခု ဖြစ်လာခဲ့ပြီ ဖြစ်သည်။
"အင်း... သူတို့ မှတ်မိပါတယ်...ဒီကိစ္စကို ကျွန်တော်ပဲ ကိုင်တွယ်လိုက်ပါ့မယ်... ကျွန်မတော်လည်း တာဝန်ယူဖို့ အချိန်တန်ပါပြီ..." ဟု ဆိုကာ ကျန်းကျောက်ရှားက ခေါင်းညိတ်လိုက်သည်။
လီချင်းချိုးကလည်း ကျေနပ်စွာ ပြုံးလိုက်သည်။ ကျန်းကျောက်ရှားက တာဝန်အချို့ကို ရယူရန် ဆန္ဒရှိခြင်းမှာ ကောင်းသောအရာ ဖြစ်၏။
လီချင်းချိုးက အာဏာဖွဲ့စည်းပုံကို တည်ဆောက်ထားပြီး ဖြစ်သော်လည်း သူ့ခွင့်ပြုချက် လိုအပ်သည့် ကိစ္စရပ်များစွာ ရှိနေသေးပြီး သူအာရုံစိုက်ရန် လိုအပ်သည့် အသေးအဖွဲ ကိစ္စရပ်များစွာလည်း ရှိနေသေးသဖြင့် လုံးဝ အနားယူရန်မှာ ခက်ခဲလှသည်။
ထို့နောက် သူတို့ ညီအစ်ကို နှစ်ဦး ဓမ္မညီလာခံ အကြောင်း ပြောဆိုခဲ့ကြသည်။
ကျန်းကျောက်ရှားက အထီးကျန်ဓား အပေါ် အလွန် ယုံကြည်မှုရှိပြီး အထီးကျန်ဓားက ထိပ်ဆုံး သုံးယောက်စာရင်းဝင်ရန် သေချာသည်ဟု ယုံကြည်သော်လည်း ပထမနေရာအတွက် ယှဉ်ပြိုင်နိုင်မည်လား ဆိုသည်ကိုတော့ မသေချာချေ။
"စီနီယာအစ်ကို... ဒီတစ်ကြိမ် ဘယ်သူ ပထမရမယ်လို့ ထင်လဲ..."
လီချင်းချိုး၏ အကဲဖြတ်မှုကို ယုံကြည်သော ကျန်းကျောက်ရှားက မနေနိုင်တော့ဘဲ မေးလိုက်သည်။
"ယွင်ချိုင်လေ..."
လီချင်းချိုးက အနည်းငယ်မျှ တွန့်ဆုတ်ခြင်း မရှိဘဲ ပွင့်ပွင့်လင်းလင်း ပြန်ဖြေလိုက်သည်။
"ယွင်ချိုင်..."
ကျန်းကျောက်ရှား မှင်တက်သွားသည်။ သူသည် ယွင်ချိုင်၏ ပါရမီနှင့် နားလည်နိုင်စွမ်း အကြောင်းကို ဟိုးအရင်ကတည်းက ကြားဖူးခဲ့သော်လည်း ယွင်ချိုင်နှင့် မကြာခဏ အဆက်အသွယ် မရှိခဲ့ပေ။ ယွင်ချိုင်က လီချင်းချိုး၏ တပည့်များထက် ပိုအစွမ်းထက်လိမ့်မည်ဟု မမျှော်လင့်ထားခဲ့ချေ။
"ကျိယာ၊ အထီးကျန်ဓား နဲ့ ရွှယ်ကျင်း တို့ အားလုံးက ယွင်ချိုင်လောက် မတော်ဘူးလား..."
"အင်း..."
"စိတ်ဝင်စားစရာပဲ..."
ကျန်းကျောက်ရှားက ဂိုဏ်းနှင့် ပတ်သက်၍ သူ့နားလည်မှုများ အနည်းငယ် ခေတ်နောက်ကျနေပြီ ဖြစ်ကြောင်း ရုတ်တရက် သဘောပေါက်သွားလေသည်။ သူသည် တာဝန်များ ထမ်းဆောင်ရန် တောင်အောက်ဆင်းနေခြင်း သို့မဟုတ် တံခါးပိတ် ကျင့်ကြံနေခြင်းများ ပြုလုပ်နေခဲ့သဖြင့် ဂိုဏ်း၏ တပည့်များအကြောင်း လေ့လာရန် ပျက်ကွက်ခဲ့သည်မှာ အမှန်ပင် ဖြစ်သည်။
လီချင်းချိုးက ပြုံး၍…..
"နောက်နှစ်အနည်းငယ် ကြာရင် မင်းရယ်၊ နင်းအာရယ်၊ ရှန်ယွဲ့ရယ် သုံးယောက်တည်း ယှဉ်ပြိုင်နေရတာမျိုး မဟုတ်တော့ဘဲ လူငယ်မျိုးဆက်တွေဆီက စွမ်းအားကိုလည်း လျှော့တွက်လို့ ရမှာ မဟုတ်တော့ဘူး..."
ထိုအခါ ကျန်းကျောက်ရှားက မျက်မှောင်ကြုတ်ကာ မေးလိုက်ပြန်သည်။
"ကျွန်တော် ကျော်တက်ခံရနိုင်တယ်လို့ ဆိုလိုတာလား..."
"မဟုတ်ပါဘူး... လူငယ် မျိုးဆက်တွေကို အထင်မသေးဖို့ မင်းကို ငါ သတိပေးနေတာပါ... နောင်ကျရင် သူတို့ကိုလည်း တာဝန်အချို့ ပေးပြီး လေ့ကျင့်ပေးလို့ ရတယ်လေ... မင်းက ဓားဂိုဏ်းရဲ့ အကြီးအကဲ တစ်ယောက်သာမက ဂိုဏ်းရဲ့ မဏ္ဍိုင်ကြီး တစ်ခုလည်း ဖြစ်တယ်... မင်းက ဒုဂိုဏ်းချုပ်လို့ မင်းပဲ ပြောခဲ့တာ မဟုတ်ဘူးလား..."
ဝိညာဉ်အသိအာရုံအဆင့်သို့ ရောက်ရှိသွားသည်နှင့် ပိုမို မြင့်မားသော အဆင့်သို့ ချိုးဖျက်ရန် အလွန် အချိန်ကြာမြင့်သည်။ ထို့ကြောင့် လီချင်းချိုးက ကျန်းကျောက်ရှားကို ကွဲပြားခြားနားသော အခန်းကဏ္ဍတစ်ခုမှ ပါဝင်လာစေရန် မျှော်လင့်နေခြင်းပင်။
ကျန်းကျောက်ရှား အတွေးနက်သွားတော့ လီချင်းချိုးက ဆက်ပြောပြန်သည်။
"ဂိုဏ်းတစ်ခုအတွက် ဝိညာဉ်အသိအာရုံအဆင့်ကို ကျော်လွန်တဲ့ အစွမ်းထက်တဲ့ ကျွမ်းကျင်သူ တစ်ယောက် ထွက်ပေါ်လာဖို့ အချိန်ယူရတယ်... ဒါကြောင့် လာမယ့် ဆယ်နှစ်အတွင်း ဂိုဏ်းက ဝိညာဉ်အသိအာရုံအဆင့် ကျင့်ကြံသူတွေ ပိုမို ထွက်ပေါ်လာနိုင်ဖို့ ငါ မျှော်လင့်တယ်..."
ကျန်းကျောက်ရှားက ခေါင်းညိတ်လိုက်ပြီး….
"ကျွန်တော် နားလည်ပါပြီ... ဘာလုပ်ရမလဲဆိုတာလည်း သိပါတယ်... ဒီတခေါက်ဓမ္မညီလာခံကို ကျွန်တော် စောင့်ကြည့်နေပါ့မယ်..."
လီချင်းချိုးက ပြုံးလိုက်ပြီးနောက် လင်းရွှမ်ဖုန်းအကြောင်း ပြောလိုက်လေသည်။
"ဆရာသာ မသေမျိုးလမ်းစဉ်ရှာဖို့ တောင်အောက်ဆင်းပြီး ချင်းရှောင်ဂိုဏ်းရဲ့ လက်ရှိ အခြေအနေကို ပြန်လာတွေ့ရင် သူ ဘာများ တွေးမလဲ မသိဘူး..."
ဤအကြောင်းအရာက ကျန်းကျောက်ရှား၏ စိတ်ဝင်စားမှုကို ဖြစ်ပေါ်စေခဲ့သည်။
"သူ နောင်တရနေမှာ သေချာတယ်... နှစ်တွေ ဒီလောက် ကြာသွားတာတောင် သူ့သတင်း ဘာမှ မကြားရသေးဘူး... သူ တကယ်ပဲ မသေမျိုးဂိုဏ်းကို ရှာတွေ့သွားတာ ဖြစ်နိုင်မလား..."
" ဖြစ်နိုင်ပါတယ်..."ဟုသာ လီချင်းချိုးက အဓိပ္ပာယ်ပါပါ ပြန်ဖြေလိုက်လေသည်။
...
ဇွန်လသို့ နီးကပ်လာသည်နှင့်အမျှ ဇွန်လတွင် နောက်ဆုံး ၆၄ ဦးကို ဆုံးဖြတ်ရန် ရည်ရွယ်ထားသဖြင့် ပြိုင်ပွဲမှာ ပိုမို ပြင်းထန်လာသည်။ ဤသည်မှာ ပါရမီရှင် များစွာ ပြုတ်ထွက်သွားမည်ကို ဆိုလိုသည်။
မေလလယ်တွင်….
ဓားဂိုဏ်း၏ အကြီးဆုံး တပည့်ဖြစ်ပြီး ယခင် ဓမ္မညီလာခံတွင် ထိပ်ဆုံး ဆယ်ယောက်စာရင်း ဝင်ခဲ့သော ဟန်လန်သည် ယွင်ချိုင်၏ အနိုင်ယူခြင်းကို ခံလိုက်ရရာ၊ ပြိုင်ပွဲ စတင်ကတည်းက အကြီးမားဆုံး အံ့သြဖွယ်ရာ ဖြစ်လာခဲ့ပြီး ဂိုဏ်းတစ်ခုလုံးကို တုန်လှုပ်သွားစေခဲ့သည်။
ဟန်လန်သည် ကျန်းကျောက်ရှား၏ တပည့် ဖြစ်ပြီး ကျင့်ကြံမှုမှာ မူလအားဖြည့်နယ်ပယ် အဋ္ဌမအဆင့်သို့ ရောက်ရှိနေပြီ ဖြစ်သည်။ ယွင်ချိုင်နှင့် မတွေ့ဆုံမီက သူသည် ပထမနေရာအတွက် အားကောင်းသော ယှဉ်ပြိုင်သူ တစ်ဦးပင် ဖြစ်ခဲ့သည်။
အရေးအကြီးဆုံးမှာ ဤတိုက်ပွဲတွင် ယွင်ချိုင်က သူ့ကို လုံးဝ အနိုင်ယူ ကြီးစိုးသွားခဲ့ခြင်း ဖြစ်သည်။
အသက် ၂၅ နှစ်အရွယ် ယွင်ချိုင်သည်လည်း မူလအားဖြည့်နယ်ပယ် အဋ္ဌမအဆင့်တွင် ရှိနေ၏။ သူမ၏ နာမည်ကျော်ကြားမှု ကြီးမားလာသည်နှင့်အမျှ အချို့သော အလုပ်မရှိ အကိုင်မရှိသူများက သူမ၏ အတိတ်အကြောင်းကို စတင် စုစည်းလာကြသည်။
ထို့ကြောင့် ယွင်ချိုင်၏ ကျင့်ကြံမှု အရှိန်မှာ ဂိုဏ်းအတွင်း ပြိုင်ဘက်ကင်းလောက်အောင် အလွန် အံ့မခန်း ဖြစ်ကြောင်း လူအများ ပိုမို သဘောပေါက်လာကြသည်။ သူမ၏ တိုက်ခိုက်ရေး ပါရမီနှင့် ပေါင်းစပ်လိုက်သောအခါ သူမသည် ရွှီနင်းကဲ့သို့ ဆွဲဆောင်မှု ရှိပြီး သို့မဟုတ် ပို၍ပင် ဆွဲဆောင်မှု ရှိနေနိုင်သည်။
ယွင်ချိုင်၏ နောက်ခံကလည်း တပည့်များစွာကြား ဆွေးနွေးစရာ ဖြစ်လာခဲ့သည်။
သူမသည် ဂိုဏ်းချုပ် အုပ်စု၏ နောက်ထပ် စံပြ ပါရမီရှင် တစ်ဦး ဖြစ်သည်။
သူမ ဂိုဏ်းသို့ မဝင်မီက ဂိုဏ်းချုပ်၏ ကယ်တင်ခြင်းကို ခံခဲ့ရပြီး ကျေးဇူးဆပ်သည့်အနေဖြင့် တပည့်တစ်ဦး ဖြစ်လာခဲ့ခြင်းဖြစ်သည်။ ထို့နောက် ဂိုဏ်းချုပ်က သူမ၏ ပါရမီကို တွေ့ရှိခဲ့ပြီး သူမကို စတင် ပြုစုပျိုးထောင်ပေးခဲ့ခြင်း ဖြစ်သည်။
ယွင်ချိုင်၏ နာမည်ကျော်ကြားမှု အဝေးသို့ ပျံ့နှံ့သွားခဲ့ရာ လီချင်းချိုး၏ လူစွမ်းကောင်းဆန်မှုနှင့် ထိုးထွင်းသိမြင်နိုင်သော အကဲဖြတ်မှုမှာ တပည့်များကြား ထပ်မံ၍ ပြောဆိုစရာ ဖြစ်လာခဲ့ပြန်သည်။
ခြံဝင်းတစ်ခု အတွင်း၌…..
ကျိယာက ရင်းနှီးသော သူငယ်ချင်း ငါးဦးနှင့်အတူ အရက်သောက်နေပြီး ဟန်လန် ရှုံးနိမ့်သွားသည့် ကိစ္စကို သူတို့ ပြောဆိုနေကြသည်။
ဤအဖြစ်အပျက်က ဟန်လန်ကို အပြင်းအထန် ထိခိုက်သွားစေခဲ့သည်။ သူသည် ဓားဂိုဏ်း တပည့်များကို ဓားရေး လေ့ကျင့်ရာတွင် ဦးဆောင်ခြင်း မပြုတော့ဘဲ ချောက်ကမ်းပါးပေါ်တွင် တစ်နေ့လုံး တရားထိုင်နေကာ မည်သူ့ကိုမျှ တွေ့ဆုံရန် ငြင်းဆန်နေခဲ့သည်။
ယန်လင်းက ကျိယာကို ကြည့်၍…..
"ကျိယာ... မင်း ယွင်ချိုင်နဲ့ အဆက်အဆံ အများကြီး ရှိခဲ့မှာပဲ... သူက သီးသန့် အချိန်တွေမှာ ဘယ်လို လူမျိုးလဲ..."
ကျိယာ၏ အဆက်အသွယ်များကြောင့် သူတို့ ငါးဦးကို လီချင်းချိုးက ဓားဂိုဏ်းသို့ ဝင်ရောက်ရန် စီစဉ်ပေးခဲ့ခြင်း ဖြစ်သည်။ သူတို့သည် နှစ်ပေါင်းများစွာ ကြိုးစား ကျင့်ကြံလာခဲ့ကြပြီး သူတို့၏ ကျင့်ကြံမှုများ ကျဆင်းမသွားခဲ့ပေ။ သူတို့၏ မျက်လုံးထဲတွင် ယွင်ချိုင်သည် ဂျူနီယာ တစ်ယောက်သာ ဖြစ်သည်။ နောက်ဆုံးတွင် ယွင်ချိုင်က ဂိုဏ်းသို့ သူတို့ထက် နောက်ကျမှ ဝင်လာခဲ့ခြင်း ဖြစ်ပေသည်။
ဟန်လန်ကို ယွင်ချိုင် အနိုင်ယူလိုက်ခြင်းက သူတို့အပေါ် ကြီးမားသော သက်ရောက်မှု ဖြစ်စေခဲ့သည်။
သူတို့ထက် လေ့ကျင့်ချိန် နည်းပါးသော သူတစ်ယောက်က ဟန်လန်ကို အနိုင်ယူနိုင်လိမ့်မည်ဟု သူတို့ စိတ်ကူးတောင် မယဉ်နိုင်ခဲ့ချေ။
ဤဓားဂိုဏ်း တပည့်များမှာ ဟန်လန်၏ စွမ်းအားကို အသိဆုံး ဖြစ်ကြသည်။
ကျိယာက တွေးတောလိုက်ပြီး… .
"သီးသန့် အချိန်တွေမှာ သူက ပြိုင်ပွဲဝင် စင်မြင့် ပေါ်မှာလိုပဲ အေးစက်စက်နိုင်တယ်...သူက အစစ်အမှန် ကျင့်ကြံခြင်း ရူးသွပ်သူ တစ်ယောက်ဖြစ်ပြီး အချိန်အားလုံးနီးပါးကို ကျင့်ကြံရာမှာ ကုန်ဆုံးစေတာပဲ..."
ဟန်လန်ကို ယွင်ချိုင် အနိုင်ယူလိုက်ခြင်းက သူ့ကိုလည်း အကြီးအကျယ် လှုံ့ဆော်မှု ဖြစ်စေခဲ့သည်။
သူသည်လည်း ယွင်ချိုင်ကို အမှန်တကယ်ပင် ယှဉ်နိုင်မည် မဟုတ်ကြောင်း သဘောပေါက်သွားသည်။
"သူက ဂိုဏ်းချုပ် ကိုယ်တိုင် သင်ကြားပေးတဲ့ တပည့် ဖြစ်နေလျက်နဲ့ ဘာလို့ ဂိုဏ်းချုပ်ရဲ့ တပည့် မဖြစ်တာလဲ..."
အမျိုးသား တပည့်တစ်ဦးက မေးလိုက်ရာ ခိာမေးခွန်းက အခြား လေးဦး၏ စပ်စုချင်စိတ်ကို နှိုးဆွလိုက်သလိုပင်။
ဤသည်မှာလည်း ဂိုဏ်းမှ တပည့်များစွာ သိချင်နေကြသော မေးခွန်းတစ်ခု ဖြစ်သည်။
ကျိယာက ထူးဆန်းသော အပြုံးတစ်ခု ပြုံးလိုက်ပြီး အသံတိုးတိုးဖြင့်….
"ငါ မင်းတို့ကို ပြောပြနိုင်တယ်... ဒါပေမဲ့ မင်းတို့ အဲဒါကို ဟိုဒီ မပြောရဘူးနော်..."
" ပြောသာပြောပါ... မင်း ငါတို့ကို မယုံသေးဘူးလား..."
"ဟုတ်တယ်... မြန်မြန်ပြောပါ..."
ယန်လင်းနှင့် အခြားသူများ၏ တိုက်တွန်းမှုကြောင့် ကျိယာက လျှို့ဝှက်ဆန်းကြယ်သောလေသံဖြင့် …..
"အကြောင်းရင်းက သူက ဂိုဏ်းချုပ်ရဲ့ တပည့် မဖြစ်ချင်ဘဲ တခြား တစ်ယောက် ဖြစ်ချင်လို့လေ..."
တခြား တစ်ယောက် ဟုတ်လား….
လူတိုင်း ပဟေဠိဖြစ်သွားသော်လည်း ယန်လင်းမှာ တစ်ခုခုကို တွေးမိသွားပုံရပြီး သူမ၏ အမူအရာ အနည်းငယ် ပြောင်းလဲသွားသည်။
ကျိယာက မျက်ခုံးပင့်လိုက်ပြီး ….
"မင်းတို့ အဲဒါကိုတောင် မတွေးမိဘူးလား... သူက တခြား ဘယ်လို လူမျိုး ဖြစ်နိုင်မှာလဲ... ဂိုဏ်းချုပ်ကတော် ဖြစ်ချင်နေတာလေ... ဟူယန်က သူမကို 'စီနီယာအစ်မ' လို့ ခေါ်တိုင်း စိတ်ဆိုးနေတာပဲ..."
ပြိုင်ပွဲဝင် စင်မြင့် ပေါ်တွင် နတ်သမီးတစ်ပါးကဲ့သို့ အေးစက်ပြီး ခပ်တန်းတန်း နေတတ်သော ယွင်ချိုင်၌ ဤကဲ့သို့သော တဖက်ခြမ်းမျိုး ရှိလိမ့်မည်ဟု မည်သူမျှ မမျှော်လင့်ထားခဲ့သဖြင့် လူတိုင်း အလွန် အံ့အားသင့်သွားကြသည်။
သူတို့မှာ ချက်ချင်းပင် စိတ်လှုပ်ရှားလာပြီး လီချင်းချိုး၏ သဘောထားကို သိလိုသဖြင့် အသေးစိတ် မေးမြန်းကြတော့သည်။
"ငါ့ဆရာက သူ့ရဲ့ အတွေးတွေကို မြင်နိုင်တာ သေချာတယ်... ပြီးတော့ သူ့ကို လုံးဝ သဘောတူမှာ မဟုတ်ဘူး..."
ကျိယာက ပခုံးတွန့်လိုက်သော်လည်း ဤစကားများက ယန်လင်း၏ မျက်လုံးများကို အရောင်လက်သွားစေသည်။
လူတစ်ယောက် နာမည်ကြီးလာသည်နှင့်အမျှ ကောလာဟလများနှင့် အတင်းအဖျင်းများ သေချာပေါက် ထွက်ပေါ်လာမည်သာ ဖြစ်သည်။
ယွင်ချိုင်ကလည်း ထိုအတိုင်းပင် ဖြစ်၏။ လူအများအပြားက သူမအကြောင်း ပြောနေကြချေပြီ။
သူမက ဟန်လန်ကို အနိုင်ယူပြီး ငါးရက် မပြည့်မီမှာပင် သူမက ဂိုဏ်းချုပ်ကတော် ဖြစ်ချင်နေသည်ဟူသော သတင်းမှာ ဂိုဏ်းအတွင်း တောမီးကဲ့သို့ ပျံ့နှံ့သွားခဲ့ရာ တပည့်များကို ပို၍ပင် စိတ်လှုပ်ရှားသွားစေခဲ့သည်။
ဤသည်က လီချင်းချိုးကိုလည်း တပည့်များကြားတွင် ပြောဆိုစရာ ဖြစ်လာစေခဲ့သည်။
ဂိုဏ်းချုပ်တွင် မည်သည့် အပြစ်အနာအဆာမျှ မရှိဘဲ အမျိုးသမီး တပည့်များ၏ လေးစားအားကျမှု စံနှုန်းများ အားလုံးနှင့် ကိုက်ညီနေသော်လည်း၊ သူသည် မည်သူနှင့်မျှ မည်သည့် အချစ်ရေးဆန်သော ဆက်ဆံရေးမျိုးတွင်မျှ ပါဝင်ပတ်သက်ခြင်း မရှိကြောင်း တပည့်များက တွေ့ရှိခဲ့ကြသည်။
တဖြည်းဖြည်းနှင့် တပည့်များ၏ ဆွေးနွေးမှုများမှာ သူတို့၏ ဂိုဏ်းချုပ်က မည်သို့သော အမျိုးသမီးမျိုးကို သဘောကျသနည်းဟူသော စပ်စုချင်စိတ်ဆီသို့ ပြောင်းလဲသွားတော့သည်။