ထိုက်ကျွယ်ဂိုဏ်း၏ လမ်းစဉ်
Vol. 28 Ch. 276
"အနှစ်ငါးဆယ်တောင် ကျင့်ကြံလာခဲ့တာကို... ငါ့ထက် ကျင့်ကြံမှုအဆင့် နိမ့်တဲ့ မိန်းကလေး တစ်ယောက် အနိုင်ယူတာကို ခံလိုက်ရတယ်... ပြီးတော့ ငါက လုံးဝ ပြန်မခုခံနိုင်ခဲ့ဘူး..."
စွန်းမော့ရှင်းက ညနေခင်းက စမ်းသပ် တိုက်ခိုက်ခဲ့သည်ကို ပြန်တွေးမိသောအခါ နှလုံးသားတခုလုံး နာကျင်သွားသည်။
ထိုအချိန်သည် သူ့ဘဝတွင် အရှက်ရဆုံး အခိုက်အတန့် ဖြစ်သည်။
သူ သုံးလိုက်သောမန္တန်တစ်ခုမှ ယွင်ချိုင်၏ မျက်လုံးမှ မလွတ်ကင်းနိုင်ဘဲ သူမက သူ့ရဲ့ အားနည်းချက်များကို အမြဲတမ်း ရှာတွေ့နိုင်သဖြင့် တိုက်ပွဲတွင် သူ့ကို အလွန် စိတ်ပျက်အားငယ်စေခဲ့သည်ဟု ခံစားရသည်။
အရေးအကြီးဆုံးမှာ သူ လဲကျသွားချိန်တွင် ယွင်ချိုင် ပြောခဲ့သော စကားက သူ့ကို အပြင်းအထန် နာကျင်စေခဲ့သည်။
"မင်းရဲ့ ကျင့်ကြံခြင်း နည်းလမ်းတွေနဲ့ မန္တန်တွေက အရမ်း အောက်တန်းကျတယ်... ပြီးတော့ မင်းရဲ့ မှော်ပစ္စည်းတွေကလည်း မလုံလောက်ဘူး... ဒါပေမဲ့ ဒါက မင်းရဲ့ အပြစ်တော့ မဟုတ်ပါဘူး... ဘာပဲဖြစ်ဖြစ် မင်းက တကိုယ်တော် ကျင့်ကြံသူ တစ်ယောက်ပဲလေ... နောင်ကျရင် ချင်းရှောင်ဂိုဏ်းအတွက် သစ္စာရှိရှိ အလုပ်လုပ်ပေးမယ်ဆိုရင် မင်း ပိုပြီး အစွမ်းထက်လာမှာပါ..."
ဒါက ဘယ်လို တကိုယ်တော်ကျင့်ကြံသူလဲ….
သူက ဇီယန်ကျွန်းက တပည့် တစ်ယောက်လေ….
သူ့ရဲ့ အောက်တန်းကျသော ပညာများနှင့် မှော်ပညာများအတွက် မိန်းကလေး တစ်ယောက်၏ လှောင်ပြောင်ခြင်းကို သူ ခံလိုက်ရသည်။
ယွင်ချိုင်၏ မူလချီကို စွန်းမော့ရှင်း တွေးမိသောအခါ တစ်ဖက်လူမှာ ဤစကားများကို ပြောရန် အရည်အချင်း ပြည့်မီကြောင်း သူ ဝန်ခံရပေမည်။
ကျင့်ကြံခြင်း နည်းလမ်းပဲဖြစ်ဖြစ်၊ မန္တန်ပဲဖြစ်ဖြစ် ယွင်ချိုင်က သူ့ထက် သိသိသာသာ သာလွန်နေသည်။ထူးခြားသည်က ယွင်ချိုင်တွင် အစွမ်းထက်သော မှော်ပစ္စည်းများ မရှိခြင်းသာ။
အစွမ်းထက်သော မှော်ပစ္စည်းများ မရှိသော်လည်း ယွင်ချိုင်က သူ့ကို ပြန်လည် တိုက်ခိုက်ရန် အခွင့်အရေး မပေးဘဲ အနိုင်ယူနိုင်ခဲ့သည်။
"ဇီယန်ကျွန်းရဲ့ သိုင်းပညာတွေက ချင်းရှောင်ဂိုဏ်းထက် တကယ်ပဲ နိမ့်ကျနေတာလား..."
စွန်းမော့ရှင်း၏ နှလုံးသား တုန်လှုပ်သွားသည်။သူ့ရဲ့ကျင့်ကြံခြင်း နည်းလမ်းမှာ ဇီယန်ကျွန်းတွင် အကောင်းဆုံး မဟုတ်သော်လည်း ပျမ်းမျှအထက်တွင် သေချာပေါက် ရှိသည်။
ချင်းရှောင်ဂိုဏ်း၏ ဟွမ်ယွမ်ကျမ်းစာမှာ တပည့် အများစု သင်ယူနိုင်သည့် အရာဖြစ်သည်။
သူ ရုတ်တရက် ဟွမ်ယွမ်ကျမ်းစာကို စိတ်ဝင်စားသွားသည်။
ယွင်ချိုင်၏ စွမ်းအင်များမှာ အခြား ကျင့်ကြံသူများ၏ ရှုပ်ထွေးသော စွမ်းအင်များနှင့် မတူဘဲ အလွန် သန့်စင်သည်ဟု သူ ခံစားရသည်။
"ဒီကို ရောက်နေပြီဆိုတော့ ချင်းရှောင်ဂိုဏ်းရဲ့ နည်းလမ်းတွေကို စမ်းကြည့်ရအောင်..."
စွန်းမော့ရှင်း၏ အကြည့်များ တဖြည်းဖြည်း မာကျောလာ၏။ မျက်ရည်များကို သုတ်လိုက်ပြီး ဤသည်မှာ အခက်အခဲ တစ်ခု မဟုတ်နိုင်ကြောင်း သဘောပေါက်သွားသည်။
အနည်းဆုံးတော့ သူသည် ချင်းရှောင်ဂိုဏ်းထဲသို့ အောင်မြင်စွာ ထိုးဖောက်ဝင်ရောက်နိုင်ခဲ့ပြီ ဖြစ်ပြီး ယခု သူ လုပ်ရမည်မှာ တကိုယ်တော် ကျင့်ကြံသူ တစ်ဦးအဖြစ် သူ့ရဲ့ သရုပ်သဏ္ဍာန်ကို ဆက်လက် ထိန်းသိမ်းထားရန်သာ ဖြစ်၏။
ထို့နောက် ဇီယန်ကျွန်းရှိ ပါရမီရှင်များကို သူ တွေးမိသွားသည်။ အကယ်၍ ယွင်ချိုင်၏ ကျင့်ကြံမှုအဆင့်သာ သူတို့ကို မီသွားပါက မည်သို့ ဖြစ်လာမည်နည်း။
ဤသို့ တွေးကြည့်လိုက်သောအခါ သူ အနည်းငယ် မျှော်လင့်ချက် ရှိလာသလို ခံစားရပြန်သည်။
သူ့လို တပည့်များက ဇီယန်ကျွန်းတွင် လေးစားမှု မခံရပေ။ အနည်းဆုံးတော့ ချင်းရှောင်ဂိုဏ်းမှာလောက် သက်တောင့်သက်သာ မရှိချေ။
အတွေးနက်နေစဉ် စွန်းမော့ရှင်းမှာ စွမ်းအင် ကုန်ခမ်းပြီး အတွင်းဒဏ်ရာများ ရရှိထားသဖြင့် တဖြည်းဖြည်း အိပ်ချင်လာပြီး နောက်ဆုံးတွင် သူ သတိမထားမိဘဲ အိပ်ပျော်သွားတော့သည်။
………
ယွင်ချိုင်က မူလအားဖြည့်နယ်ပယ် နဝမအဆင့်ရှိ တကိုယ်တော် ကျင့်ကြံသူ တစ်ဦးကို အနိုင်ယူလိုက်သည်။
ဤသတင်းက ဂိုဏ်းအတွင်း လျင်မြန်စွာ ပျံ့နှံ့သွားခဲ့သည်။ စွန်းမော့ရှင်း၏ အမည်ကို မသိကြသော်လည်း အခြား တပည့်များက ထိုအကြောင်း ဆွေးနွေးနေကြသည်ကို ကြားရတိုင်း သူ အနေရခက်နေမိသည်။
နောက်ရက်များတွင် သူ့ဘဝမှာ ပြောင်းလဲခြင်း မရှိခဲ့ပေ။ သူ အနားယူချိန်များတွင်သာ အတွေ့အကြုံရှာဖွေရေးခန်းမ၏ ခန်းမသခင်က သူ့ထံ လာရောက် စကားပြောပြီး ချင်းရှောင်ဂိုဏ်း၏ သမိုင်းကြောင်းနှင့် လက်ရှိ အခြေအနေများကို မိတ်ဆက်ပေးလေ့ရှိသည်။
ချင်းရှောင်ဂိုဏ်းကို အမှန်တကယ် နားလည်ပြီးနောက် စွန်းမော့ရှင်း၏စိတ်ထဲတွင် လီချင်းချိုးအပေါ် နက်ရှိုင်းသော လေးစားမှု တစ်ခု ဖြစ်ပေါ်လာခဲ့သည်။
ချင်းရှောင်ဂိုဏ်း၏ ထွန်းကားလာမှုမှာ အမှန်တကယ်ပင် မလွယ်ကူခဲ့ချေ။
ကံမကောင်းစွာဖြင့် သူသည် ဂိုဏ်းတစ်ခုတွင် ပါဝင်ပြီး ဖြစ်သဖြင့် ဟန်ဆောင် သဘောတူရုံသာ တတ်နိုင်တော့သည်။
သူ့အပေါ်နှင့် ချင်းရှောင်ဂိုဏ်းအပေါ် စွန်းမော့ရှင်း၏ သစ္စာစောင့်သိမှုမှာ မြန်မြန်ဆန်ဆန် မဟုတ်သော်လည်း မှန်မှန် တိုးလာနေသည်ကို လီချင်းချိုး မြင်တွေ့နိုင်ပြီး ၎င်းမှာ ကောင်းသော လက္ခဏာ တစ်ခု ဖြစ်သည်။ ထို့ကြောင့် ကျန်းယွီချွန်းကို စွန်းမော့ရှင်းအား ဆွဲဆောင်ခွင့် ပြုလိုက်သည်။
ဇွန်လသို့ ရောက်ရှိလာပြီး ဓမ္မညီလာခံ၏ နောက်ဆုံး ၆၄ ဦးကို နောက်ဆုံးတွင် ဆုံးဖြတ်လိုက်ပြီ ဖြစ်သည်။
ဓမ္မညီလာခံ၏ ထိပ်ဆုံး ဆယ်ယောက်ကို လာမည့်လအတွင်း ဆုံးဖြတ်မည် ဖြစ်သည်။
ထိပ်ဆုံး ၆၄ ဦးထဲတွင် ကျင့်ကြံမှုအဆင့် အနိမ့်ဆုံးသူပင်လျှင် မူလအားဖြည့်နယ်ပယ် ဆဋ္ဌမအဆင့်သို့ ရောက်ရှိနေပြီ ဖြစ်ရာ၊ ၎င်းက ချင်းရှောင်ဂိုဏ်း၏ စွမ်းအားကို သက်သေပြရန် လုံလောက်ပေသည်။
လွန်ခဲ့သော အနှစ်နှစ်ဆယ်က မူလအားဖြည့်နယ်ပယ် ဆဋ္ဌမအဆင့် ကျင့်ကြံသူ တစ်ဦးသည် လောကကြီးကို တုန်လှုပ်စေရန် လုံလောက်ခဲ့သည်။ ယခုအခါ ချင်းရှောင်ဂိုဏ်းတွင် ပြိုင်ပွဲ၌ မပါဝင်သူများကို မထည့်သွင်းဘဲ ထိုသို့သော ပြိုင်ဘက်ကင်း သိုင်းဆရာ ၆၄ ဦးအထိ ရှိနေပြီ ဖြစ်သည်။
ချင်းရှောင်ဂိုဏ်း၏ စွမ်းအားမှာ တစ်ကမ္ဘာလုံးသို့ ပျံ့နှံ့သွားခဲ့ပြီး သိုင်းပညာ လေ့ကျင့်သူများ ပိုမိုများပြားလာကာ သူတို့၏ လေးစားမှုကို ရရှိခဲ့သည်။
မသေမျိုးဖြစ်အောင် လိုက်စားမှုများ ရွှမ်မင်းဆက်တွင် စတင် ပေါ်ထွက်ခဲ့ချေပြီ။
...
လင်းထိန်နေသော ခန်းမကြီးအတွင်း၌….
ရှန်ယွဲ့နှင့် ယန်တောက်ကျုံးတို့က ပုံများနှင့် စာလုံးများ ရေးထိုးထားသော နံရံတစ်ခုရှေ့တွင် ရပ်နေကြပြီး၊ ပိုင်နင်းအာကမူ မလှမ်းမကမ်းတွင် လမ်းလျှောက်နေသည်။
နန်းတော်၏ မျက်နှာကျက်မှာ ပြောင်းပြန်လှန်ထားသော ပင်လယ်တစ်ခုနှင့် တူပြီး ၎င်းအတွင်းတွင် ဧရာမ သလင်းကျောက်များ ရှိနေသဖြင့် အလင်းရောင်များ ဖြာထွက်နေပြီး ခန်းမကြီး တစ်ခုလုံးကို စူးရှတောက်ပနေစေသည်။
ပိုင်နင်းအာ လှည့်ကြည့်လိုက်တော့ ရှန်ယွဲ့နှင့် အခြား တစ်ယောက်တို့မှာ နံရံကို စိုက်ကြည့်နေဆဲ ဖြစ်သည်ကို တွေ့လိုက်ရသဖြင့် ခေါင်းယမ်းလိုက်မိသည်။
"ငါ ဒီဟာကို ကြည့်နေတာ ဘယ်လောက်တောင် ကြာပြီလဲ... ဒီလို သမိုင်းမျိုးက ဘာတွေများ စိတ်ဝင်စားစရာ ကောင်းနေလို့လဲ..." ဟု ပိုင်နင်းအာက သူ့ဘာသာ တီးတိုးရေရွတ်လိုက်ပြီး ဤအမည်မသိ နယ်မြေကို အမြန်ဆုံး စူးစမ်းချင်စိတ်သာ ရှိနေတော့သည်။
ဤလျှို့ဝှက်ဆန်းကြယ်သော နယ်မြေတွင် အခွင့်အရေးများစွာ ရှိနေကြောင်း သူ့ရဲ့ အလိုအလျောက် သိစိတ်က ပြောနေပြီး၊ ရှာတွေ့သွားပါက ဂိုဏ်းအတွက် သေချာပေါက် အကျိုးရှိမည် ဖြစ်ကာ သူလည်း ကြီးမားသော ပံ့ပိုးမှု တစ်ခုကို ပြုလုပ်နိုင်မည် ဖြစ်သည်။
ပိုင်နင်းအာ၏ အတွေးများကို ကြားလိုက်ရသည့်နှယ် ရှန်ယွဲ့က အကြည့်ကို ရုပ်သိမ်းလိုက်ပြီး ယန်တောက်ကျုံးဘက်သို့ လှည့်ကြည့်ကာ မေးလိုက်သည်။
"ထိုက်ကျွယ်ဂိုဏ်းကို ဘယ်လို ထင်လဲ..."
ယန်တောက်ကျုံးက သတိဝင်လာသောအခါ သက်ပြင်းချလိုက်ပြီး…
"ထိုက်ကျွယ်ဂိုဏ်း လျှောက်ခဲ့တဲ့ လမ်းစဉ်က ငါတို့ ချင်းရှောင်ဂိုဏ်းနဲ့ အတူတူပဲ... သူတို့က သိုင်းပညာကနေတစ်ဆင့် တာအိုလမ်းစဉ်ထဲကို ဝင်ရောက်ခဲ့ပြီး ထိုက်ကျွယ်မဟာမိတ်အဖွဲ့ ကနေ ထိုက်ကျွယ်ဂိုဏ်း အဖြစ်ကို ပြောင်းလဲခဲ့တယ်... သူတို့က ကိုးပြည်ထောင်နယ်မြေကို ကာကွယ်ပေးခဲ့ပြီး လွန်ခဲ့တဲ့ နှစ်တစ်ထောင်ကျော်အတွင်း မရေမတွက်နိုင်တဲ့ တိုင်းတပါး ရန်သူတွေကို တွန်းလှန်ခဲ့ကြတယ်... သူတို့တွေ မြောက်ဘက်ကနေ ဘေးဒုက္ခတစ်ခုနဲ့ ကြုံရလိမ့်မယ်လို့ ဘယ်သူက ထင်မှာလဲ..."
သူ့ အကြည့်များက နံရံ၏ အပေါ်ပိုင်းသို့ ရောက်သွားရာ ထိုနေရာတွင် တောင်ဘက်သို့ ဦးတည်နေပုံရသော မိစ္ဆာများကို ပုံဖော်ထားသည်။
မိစ္ဆာစစ်တပ်ကြားတွင် ခွေနေသော နဂါးတစ်ကောင်နှင့် တူသည့် ပုံရိပ်တစ်ခုကို သူ မြင်လိုက်ရသည်။ ၎င်းမှာ အလွန် ကြီးမားပုံရပြီး နဂါး တစ်ကောင်လုံးမှာ ကြက်သွေးရောင်တောက်ပနေကာ ကြောက်မက်ဖွယ်ကောင်းပြီး ထိတ်လန့်ဖွယ် ကောင်းလှသည်။
ကြက်သွေးရောင် နဂါးကြီးကို ကြည့်ရင်း ယန်တောက်ကျုံးမှာ ရှင်းပြမရနိုင်အောင် အနေရခက်သွားပြီး နဂါးကြီး အသက်ဝင်နေကာ သူ့ကို လောဘတကြီး စိုက်ကြည့်နေသလိုပင် ခံစားလိုက်ရသည်။
"မြောက်ဘက်က မိစ္ဆာနယ်မြေတွေက ချင်းရှောင်ဂိုဏ်းအတွက် ရှောင်လွှဲလို့ မရနိုင်တဲ့ ဘေးဒုက္ခတစ်ခု ဖြစ်ပုံရတယ်... မဟုတ်ရင် ငါတို့လည်း ထိုက်ကျွယ်ဂိုဏ်းလိုမျိုး အမြစ်ပြတ် ချေမှုန်းခံရမှာပဲ..." ဟု ရှန်ယွဲ့က ဖြည့်စွက် ပြောလိုက်သည်။
ယန်တောက်ကျုံးက အောက်သို့ ငုံ့ကြည့်ရင်း…..
"ထိုက်ကျွယ်ဂိုဏ်းက အဖွဲ့ဝင် အချို့က တောင်ဘက် ပင်လယ်ဆီကို သွားခဲ့ကြပုံရတယ်... သူတို့ လုံးဝ အမြစ်ပြတ် မချေမှုန်းခံရတာလည်း ဖြစ်နိုင်တယ်..."
ရှန်ယွဲ့က… ..
"သူတို့ ရှိနေသေးသည်ဖြစ်စေ၊ မရှိတော့သည်ဖြစ်စေ... ကိုးပြည်ထောင်နယ်မြေက ငါတို့ ချင်းရှောင်ဂိုဏ်းရဲ့ လက်အောက်ကို ရောက်ရှိသွားခဲ့ပြီ..."
ယန်တောက်ကျူံး ခေါင်းညိတ်လိုက်သည်။ တပည့်တစ်ယောက်အဖြစ် အချိန်အတော်ကြာ နေလာခဲ့ပြီးနောက် သူသည်လည်း ကျင့်ကြံခြင်း နည်းလမ်းများကို ပိုပို၍ တန်ဖိုးထားလာခဲ့၏။ သိုင်းပညာကို စွန့်လွှတ်ပြီး မသေမျိုးလမ်းစဉ်ကို လိုက်စားသင့်သလား ဟူသော မေးခွန်းဖြင့် မကြာခဏ ရုန်းကန်နေရသည်။
ကျောက်ကျိန်းလို မသေမျိုးလမ်းစဉ်နှင့် သိုင်းပညာ လမ်းစဉ်ကို လိုက်လျှင်ပင်၊ အဓိကအားဖြင့် မသေမျိုးဖြစ်အောင် ကျင့်ကြံသည့် နည်းလမ်းများကိုသာ အားကိုးရပြီး သိုင်းပညာတွင် လှုပ်ရှားမှုများကိုသာ ထိန်းသိမ်းထားခြင်း ဖြစ်သည်။
"ဟေး... စီနီယာ နှစ်ယောက်... ဒီဘက်ကို လာကြည့်ကြပါဦး..."
ပိုင်နင်းအာ၏ အသံ အနောက်မှ ရုတ်တရက် ထွက်ပေါ်လာသဖြင့် ရှန်ယွဲ့နှင့် အခြား တစ်ယောက်တို့ လှည့်ကြည့်လိုက်သောအခါ ပိုင်နင်းအာမှာ သူတို့နှင့် ပေတစ်ရာကျော် ကွာဝေးနေပြီ ဖြစ်ကြောင်း တွေ့လိုက်ရသည်။
"ငါတို့နဲ့ အရမ်း မဝေးအောင်နေလို့ ငါ ပြောထားတယ် မဟုတ်လား..."
ရှန်ယွဲ့က မျက်မှောင်ကြုတ်ကာ ပြောဆိုရင်း ပိုင်နင်းအာထံသို့ လျှောက်သွားလိုက်သည်။
ပိုင်နင်းအာသည် မူလအားဖြည့်နယ်ပယ် သတ္တမအဆင့်သို့ ရောက်ရှိနေပြီ ဖြစ်သော်လည်း တိုက်ခိုက်ရေး စွမ်းရည်များ အားနည်းနေသဖြင့် ရှန်ယွဲ့ကို အလွန် စိုးရိမ်စေသည်။
ရှန်ယွဲ့၏ အသံကို အဝေးမှ ကြားနေရသော်လည်း ပိုင်နင်းအာက ဂရုမစိုက်ပေ။ သူ့အကြည့်များက သူ့ရှေ့ရှိ ကျောက်တိုင် တစ်တိုင်ပေါ်တွင်သာ စူးစိုက်နေ၏။
ဤကျောက်တိုင်မှာ ရေအိုးတစ်လုံးခန့် တုတ်ပြီး အဖြူရောင် ကျောက်တစ်မျိုးဖြင့် ပြုလုပ်ထားပုံရသည်။ ဤအခိုက်အတန့်တွင် ဤကျောက်တိုင်ပေါ်တွင် သတိမထားမိရန် လွယ်ကူသော မျဉ်းကြောင်းများ ရှိနေကြောင်း ပိုင်နင်းအာ သတိပြုမိလိုက်သည်။
ဤမျဉ်းကြောင်းများက စုစည်းသွားပြီး လူတစ်ယောက်နှင့် တူနေသည်။
မကြာမီ ရှန်ယွဲ့နှင့် ယန်တောက်ကျုံးတို့ သူ့အနောက်သို့ ရောက်ရှိလာပြီး သူတို့ နှစ်ဦးကလည်း ကျောက်တိုင်ပေါ်ရှိ မျဉ်းကြောင်းများကို ချက်ချင်း သတိပြုမိသွားကြသည်။
"လူတစ်ယောက်ကို ဘာလို့ တိုင်ပေါ်မှာ ထွင်းထုထားရတာလဲ... ပြီးတော့ သူနေတဲ့ ပုံစံအရဆိုရင် လုံးဝ ခမ်းနားထည်ဝါပုံ မပေါ်ဘူး... တကယ်တော့ သူက အနည်းငယ် ကြောက်လန့်နေတဲ့ ပုံပေါက်နေတယ်..."ဟု ယန်တောက်ကျုံးက မျက်မှောင်ကြုတ်ကာ မေးလိုက်သည်။
ရှန်ယွဲ့ မော့ကြည့်လိုက်တော့ ကျောက်တိုင်ပေါ်တွင် အခြား မျဉ်းကြောင်းများလည်း ရှိနေကြောင်း တွေ့လိုက်ရ၏။ ၎င်းတို့ အားလုံးမှာ ကိုယ်ဟန်အနေအထား အမျိုးမျိုးနှင့် အဝတ်အစား အမျိုးမျိုး ဝတ်ဆင်ထားသော တာအိုဘုန်းကြီး များ၏ ပုံရိပ်များ ဖြစ်ကြသည်။ သူတို့ အများစုမှာ ကြောက်လန့်ပြီး ထိတ်လန့်နေပုံရသည်။
သူတို့ ပိုကြည့်လေလေ ပို၍ ထူးဆန်းလေလေ ဖြစ်လာသည်။
"သတိထားပါ... နောက်ဆုံးတော့ ထိုက်ကျွယ်ဂိုဏ်းက နှစ်တစ်ထောင်ကျော် တည်ထောင်ခဲ့တဲ့ ကျင့်ကြံရေး ဂိုဏ်းတစ်ခုပဲ... သူတို့ရဲ့ နည်းလမ်းတွေက ငါတို့ ခန့်မှန်းလို့ မရနိုင်တဲ့အရာတွေပဲ..." ဟု ရှန်ယွဲ့က သတိပေးလိုက်သည်။
ယန်တောက်ကျုံးက ခေါင်းညိတ်လိုက်ပြီးနောက် အခြား ကျောက်တိုင်များကို လှည့်ကြည့်လိုက်ရာ ၎င်းတို့တွင်လည်း ဆင်တူသော မျဉ်းကြောင်းများ ရှိနေကြောင်း တွေ့လိုက်ရပြီး အဝေးမှ ကြည့်လျှင် သတိပြုမိရန် ခက်ခဲလိမ့်မည် ဖြစ်သည်။