အခန်း (၁၃၁-၁၃၂)

131

နေဝင်ဆည်းဆာ၏ အလင်းတန်းများမှာ မြို့ပြ၏ ထောင့်အသီးသီးသို့ ဖြာကျနေပြီး၊ ရွှေရောင်အလင်းတန်းများသည် တဖြည်းဖြည်း လိမ္မော်ရောင်သန်းလာသော ကောင်းကင်ယံနှင့် ရောယှက်ကာ နွေးထွေးသော ပန်းချီကားတစ်ချပ်ကို ဖန်တီးထားသည်။ ဟဲယဲ့တည်းခိုခန်းရှေ့ရှိ ကွန်ကရစ်လမ်းမကြီးသည်လည်း လိမ္မော်နီရောင် လွှမ်းမိုးထားသော သမုဒ္ဒရာတစ်ခုသဖွယ် ဖြစ်နေ၏။ လမ်းမပေါ်တွင် နုံးချိစွာ ထိုင်နေကြသော ပရိသတ်များသည် နေရောင်ခြည်ဒဏ်ကို ရှောင်ကွင်းရန် သူတို့၏ နေရာများကို တိတ်တဆိတ် ရွှေ့ပြောင်းနေကြပြီး၊ လက်ထဲမှ ဆိုင်းဘုတ်များကို ယပ်တောင်အဖြစ် အသုံးပြုကာ ယပ်ခပ်နေကြသည်။ သူတို့ ချစ်ရသော အိုင်ဒေါများကို တစ်ချက်လောက် မြင်တွေ့ခွင့်ရရန် အရပ်မျက်နှာအသီးသီးမှ လာကြသော ဤပရိသတ်များသည် တစ်နေ့ခင်းလုံး ဟဲယဲ့တည်းခိုခန်းရှေ့တွင် စောင့်ဆိုင်းနေခဲ့ကြခြင်းဖြစ်၏။

အချိန်ကုန်လွန်လာသည်နှင့်အမျှ ပရိသတ်များ၏ စိတ်ခံစားချက်သည် စိတ်လှုပ်ရှားမှုမှ ငြိမ်သက်ခြင်းဆီသို့ စတင်ကူးပြောင်းလာခဲ့သည်။ အစပိုင်းတွင်မူ သူတို့သည် အားပေးစကားများ ရေးသားထားသော ဆိုင်းဘုတ်များကို မြှောက်ကိုင်ထားကြပြီး၊ တစ်ဦးနှင့်တစ်ဦး သူတို့၏ အတွေ့အကြုံများကို ဝေမျှကြကာ၊ သူတို့အိုင်ဒေါများ၏ သေးငယ်သော အချက်အလက်လေးများကိုပင် မကျန် ပြောဆိုဆွေးနွေးနေခဲ့ကြ၏။ ထို့ပြင် ဟဲယဲ့တည်းခိုခန်းထဲသို့ ဝင်သွားသော ဧည့်သည်တိုင်းကိုလည်း မျှော်လင့်ချက်အပြည့်ဖြင့် ကြည့်ရှုနေခဲ့ကြသည်။ ယခုမူကား၊ အချိန်ကြာမြင့်စွာ စောင့်ဆိုင်းခဲ့ရသဖြင့် သူတို့၏ မျက်နှာများတွင် ပင်ပန်းနွမ်းနယ်မှုများ အရိပ်ထင်နေပြီး လမ်းဘေးပလက်ဖောင်းပေါ်တွင် မှီတွယ်ထိုင်နေကြတော့သည်။ မိမိတို့ မြတ်နိုးရသော ကြယ်ပွင့်များ တည်းခိုခန်းရှေ့တွင် ပေါ်လာနိုင်ခြေမှာ တဖြည်းဖြည်း နည်းပါးလာပြီဖြစ်ကြောင်း ပရိသတ်များ စတင်သဘောပေါက်လာကြ၏။

မျက်တောင်တစ်ခတ်အတွင်းမှာပင် နာရီလက်တံသည် ညနေ (၅) နာရီသို့ ညွှန်ပြနေပြီး၊ ကောင်းကင်ယံမှ တိမ်တိုက်များသည်လည်း ဝင်လုဆဲ နေမင်း၏ အရောင်တင်မှုကြောင့် တောက်ပသော အရောင်အသွေးများ ဆင်မြန်းနေကြပြီ ဖြစ်သည်။ ညစာစားချိန်သို့ ရောက်ရှိလာသည့်အခါတွင် ပရိသတ်များမှာ ပို၍ပင် နုံးချိလာကြ၏။ ရုပ်ရှင်အဖွဲ့သားများသည် ညဘက်ရိုက်ကွင်းများကို ရိုက်ကူးရမည်ဖြစ်ကြောင်း သူတို့ သိရှိထားကြရာ၊ ၎င်းမှာ သူတို့နှစ်သက်သော ကြယ်ပွင့်များသည် ယခုအချိန်တွင် ပေါ်လာလိမ့်မည်မဟုတ်ကြောင်းကို ဆိုလိုနေခြင်းပင်။ လေပြေညင်းလေးတစ်ချက် ဝှေ့ယမ်းတိုက်ခတ်သွားပြီး အေးမြသည့် အထိအတွေ့နှင့်အတူ မသိမသာ ခံစားလိုက်ရသော စိတ်ပျက်မှု အရိပ်အယောင်တို့ကိုပါ သယ်ဆောင်လာခဲ့သည်။

"ဗိုက်ဆာလှပြီ၊ အရင်ဆုံး စားစရာတစ်ခုခု သွားရှာရအောင်လား"

ပရိသတ်တစ်ဦးမှာ သူ၏ ဗိုက်ကို ပွတ်သပ်ရင်း သူငယ်ချင်းများကို ခေါ်ကာ ထွက်ခွာရန် ပြင်လိုက်သည်။

"သွားကြစို့၊ ဘေးနားက ဟော့ပေါ့ဆိုင်ကိုလည်း ထပ်မစားချင်တော့ဘူး၊ တခြားတစ်နေရာ သွားရအောင်၊ ငါ ကြက်ကြော် စားချင်တယ်"

သူ၏ သူငယ်ချင်းမှာ ပြန်လည်ဖြေကြားသည်။ ထိုအချိန်မှာပင် အမျိုးသား နှစ်ဦး၊ သုံးဦးခန့် လျှောက်လာကြ၏။ သူတို့သည် ရိုးရိုးရှင်းရှင်းပင် ဝတ်ဆင်ထားကြပြီး ဦးထုပ် သို့မဟုတ် မည်သည့် ရုပ်ဖျက်မှုမျိုးမျှ လုပ်ဆောင်ထားခြင်း မရှိပေ။ သူတို့၏ ခြေလှမ်းများမှာ အေးဆေးတည်ငြိမ်နေပြီး မျက်နှာပေါ်တွင်လည်း ပြုံးယောင်သန်းနေကြရာ သာမန်ခရီးသွားများကဲ့သို့ပင် ဖြစ်သည်။ အပြင်တွင် စောင့်နေကြသော ပရိသတ်များမှာ သူတို့၏ ဖုန်းမျက်နှာပြင်‌ပေါ်မှ ခေါင်းမော့ကာ ထုံထိုင်းစွာဖြင့် တစ်ချက် လှမ်းကြည့်လိုက်ကြပြီးနောက် သူတို့၏ ကမ္ဘာထဲသို့သာ ပြန်လည် နစ်မြောသွားကြ၏။ ဟဲယဲ့တည်းခိုခန်းထဲသို့ ဤမျှ ပွင့်လင်းမြင်သာစွာ ဝင်ရောက်လာသူ မည်သူမဆိုသည် အနုပညာရှင်တစ်ဦး မဖြစ်နိုင်ကြောင်း ပရိသတ်များ သတ်မှတ်လိုက်ကြကာ ခေါင်းကို ပြန်လည်ငုံ့လိုက်ကြတော့သည်။

"သွားကြစို့၊ သူတို့တွေ အားလုံး တည်းခိုခန်းထဲ ပြန်ဝင်ပြီး နားနေကြပြီပဲ၊ ငါတို့တွေလည်း သွားစားပြီး ခဏလောက် နားရအောင်"

နောက်ထပ် ပရိသတ်အချို့မှာလည်း စားသောက်ရန် ထလိုက်ကြပြန်သည်။ နာရီဝက်ခန့် ကြာပြီးနောက်တွင် တည်းခိုခန်းရှေ့၌ မသိမသာ ငြိမ်သက်ခြင်းတစ်ခု လွှမ်းမိုးသွားခဲ့၏။ လက်မလျှော့သေးဘဲ ကျန်ရစ်ခဲ့သော ပရိသတ်များမှာလည်း ထိုင်နေရလွန်းသဖြင့် တင်ပါးများပင် ထုံကျဉ်နေကြပြီ ဖြစ်သည်။ သူတို့သည် လမ်းပေါ်မှ ဖြတ်သွားဖြတ်လာသူများကို ငေးကြောင်သော အကြည့်များဖြင့် ဘာကိုမျှ မတွေးတောဘဲ ငေးကြည့်နေကြ၏။

ထိုအချိန်မှာပင် အမျိုးသမီး သုံးလေးဦးသည် သူတို့၏ အမြင်အာရုံထဲသို့ ဖြည်းညှင်းစွာ လျှောက်ဝင်လာကြသည်။ သူတို့သည် ဦးထုပ်များ ဆောင်းထားကြသော်လည်း ဦးထုပ်အနားသတ်များကို အောက်သို့ အတော်လေး ဆွဲနှိမ့်ထားသဖြင့် မျက်နှာအများစုကို ဖုံးကွယ်ထားကြ၏။ သို့သော်လည်း ဤအမျိုးသမီးများသည် အနည်းငယ် ဝသော ကိုယ်လုံးကိုယ်ပေါက်ရှိကြပြီး သူတို့၏ အရပ်အမောင်းမှာလည်း စိတ်ထဲရှိ ကြယ်ပွင့်များနှင့် ကိုက်ညီပုံမရပေ။ ပရိသတ်များသည် ထိုအမျိုးသမီးများ တည်းခိုခန်းထဲသို့ ဝင်သွားသည်ကို မည်သည့်စိတ်လှုပ်ရှားမှုမှ မရှိဘဲ တိတ်တဆိတ် ကြည့်နေခဲ့ကြသည်။

ဤမထူးခြားသလို ထင်ရသော ဝတုတ်တုတ် အမျိုးသမီးများနှင့် စောစောက သာမန်အမျိုးသား သုံးဦးတို့သည် သူတို့ နေ့ညမပြတ် တောင့်တနေရသော ကြယ်ပွင့်များ ဖြစ်နေသည်ကို ပရိသတ်များ လုံးဝ သတိမထားမိခဲ့ကြပေ။ ဤကြယ်ပွင့်များ ဤမျှ ထူးထူးခြားခြား ပြောင်းလဲသွားရခြင်းမှာ ရုပ်ရှင်အဖွဲ့၏ မိတ်ကပ်ဆရာများတွင် 'အညံ့စားမှ အကောင်းစားဖြစ်အောင်' ဖန်တီးနိုင်သည့် လက်စွမ်း ရှိနေသောကြောင့် ဖြစ်သည်။ မိတ်ကပ်ပညာရှင်များသည် အဆင့်မြင့် အထူးပြုလုပ်ချက် မိတ်ကပ်ပညာရပ်များကို အသုံးပြု၍ မင်းသမီးများကို ဝ‌သောပုံပေါက်အောင် ပြုလုပ်ခဲ့ကြပြီး၊ မူလကိုယ်လုံးကိုယ်ပေါက်များကို ပြောင်းလဲရန်အတွက် ပါးလွှာသော အဝတ်အစားများအောက်တွင် အမျိုးမျိုးသော အသားတုများကို ထည့်သွင်းထားခဲ့ကြ၏။ မင်းသားများကိုမူ မိတ်ကပ်မလိမ်းထားသကဲ့သို့ ထင်ရသော ထူထဲသည့် မိတ်ကပ်များကို လိမ်းခြယ်ပေးထားပြီး၊ အသားအရေ အရောင်အသွေးကိုလည်း စစ်မှန်သော အသားရောင်ကဲ့သို့ ပိုမိုသဘာဝကျအောင် သေချာစွာ ပြုပြင်ပေးထားကြရာ မင်းသားများမှာလည်း လုံးဝပုံစံပြောင်းသွားခဲ့သည်။

ဟဲယဲ့တည်းခိုခန်းတွင် တည်းခိုခွင့်ရရန်အတွက် ရုပ်ရှင်အဖွဲ့သားများသည် နည်းလမ်းပေါင်းစုံကို အသုံးပြုခဲ့ကြခြင်း ဖြစ်သည်။ ခိုးကြောင်ခိုးဝှက် ဝင်ရောက်ခြင်း အပြင်၊ 'ကြင်ယာတော်နှစ်ပါး ဒဏ္ဍာရီ' ရုပ်ရှင်အဖွဲ့သားများသည် တစ်ဖက်လှည့်ဖြင့် လှည့်ဖြားခြင်း ကိုလည်း စီစဉ်ထားခဲ့ကြ၏။ ညအ‌မှောင်တွင် ဗန်ကားတစ်စီးသည် ဖြည်းညှင်းစွာ မောင်းနှင်လာခဲ့သည်။ ပရိသတ်အချို့မှာ ခုနကမြင်လိုက်ရသော ဝတုတ်တုတ် အမျိုးသမီးများသည် သူတို့၏ ကြယ်ပွင့်များ ဖြစ်နိုင်မလားဟု သံသယဝင်နေဆဲမှာပင် ဗန်ကားတစ်စီးသည် သူတို့၏ အမြင်အာရုံထဲသို့ ဖြည်းညှင်းစွာ ဝင်ရောက်လာပြန်၏။

ပရိသတ်များ၏ အကြည့်များသည် ချက်ချင်းပင် ဆွဲဆောင်ခံလိုက်ရပြီး၊ သံသယဖြစ်နေသော ပရိသတ်များသည်လည်း သူတို့၏ သံသယများကို ဘေးဖယ်လိုက်ကြတော့သည်။ သူတို့ထဲမှ အချို့မှာ မရည်ရွယ်ဘဲ မတ်တပ်ရပ်မိကြ၏။ ဤဗန်ကား၏ ပုံပန်းသဏ္ဍာန်မှာ နံနက်ပိုင်းမှ အွန်လိုင်းတွင် ပျံ့နှံ့နေသော ဗီဒီယိုထဲမှ ကားနှင့် အတိအကျ တူညီနေပြီး ၎င်းမှာ ကြယ်ပွင့်များ ရိုက်ကွင်းသို့ သွားရာတွင် အသုံးပြုသော သီးသန့်ယာဉ် ဖြစ်သည်။ ဤတွေ့ရှိချက်သည် ငြိမ်သက်နေသော ပရိသတ်များကို ချက်ချင်းပင် မီးညှိပေးလိုက်သကဲ့သို့ ဖြစ်သွားပြီး၊ သူတို့၏ စိတ်ခံစားချက်များ ပြန်လည်နိုးကြားလာကာ အားလုံးပင် အဝင်ဝသို့ အလုအယက် တိုးဝှေ့လာကြတော့၏။ သူတို့၏ မျက်နှာများပေါ်တွင်လည်း ထိန်းမနိုင်သိမ်းမရသော စိတ်လှုပ်ရှားမှုနှင့် မျှော်လင့်ချက်များ ဝင်းပနေသည်။

ဗန်ကားသည် တည်းခိုခန်းရှေ့တွင် တည်ငြိမ်စွာ ရပ်တန့်သွားသည်။ ကားတံခါးမှာ ဖြည်းညှင်းစွာ ပွင့်လာပြီး အမျိုးသားနှင့် အမျိုးသမီး တစ်စုသည် တစ်ဦးပြီးတစ်ဦး ကားပေါ်မှ ဆင်းလာကြသည်။ ပရိသတ်များ၏ စိတ်ခံစားချက်မှာ ရိုလာကိုစတာ စီးနေရသကဲ့သို့ပင်။ စိတ်ပျက်မှု အနိမ့်ဆုံးအဆင့်မှ မျှော်လင့်ချက် အမြင့်ဆုံးအဆင့်သို့ ရောက်ရှိသွားကြသည်။ သူတို့သည် ကားပေါ်မှ ဆင်းလာသူများထဲတွင် သူတို့ မြတ်နိုးရသော ကြယ်ပွင့်များ ပါ၊ မပါ အတည်ပြုရန် စိတ်အားထက်သန်နေကြ၏။ ကံမကောင်းစွာဖြင့်ပင် တစ်ဦးမျှ မပါရှိခဲ့ပေ။ ပရိသတ်များသည် တစ်ဦးကိုတစ်ဦး ကြည့်ကာ အတန်ကြာ မှင်တက်နေကြစဉ်မှာပင် သစ္စာရှိလှသော ပရိသတ်တစ်ဦးမှာ တိုးတိုးလေး ရေရွတ်လိုက်၏။

"ဒါ ကြင်ယာတော်နှစ်ပါး ဒဏ္ဍာရီ ရဲ့ ဇာတ်ညွှန်းဆရာ မဟုတ်လား"

ဇာတ်ညွှန်းဆရာ စာရေးဆရာပျန်းမှာ ပြုံး၍ ပြန်လည်ဖြေကြားသည်။

"ကျွန်တော်တို့က ရုပ်ရှင်အဖွဲ့က ဇာတ်ညွှန်းဆရာတွေပါ၊ အခုရက်ပိုင်း ရုပ်ရှင်မြို့တော်မှာ ရိုက်ကူးနေတဲ့ အဖွဲ့တွေ အများကြီးရှိနေလို့ ရုပ်ရှင်မြို့တော်ထဲမှာ အခန်းတွေက အကန့်အသတ်ရှိနေပါတယ်၊ နောက်ပြီး အခုရက်ပိုင်း ရုပ်ရှင်အဖွဲ့က ဇာတ်ဝင်ခန်းကြီးတွေ အများကြီး ရိုက်ကူးနေရတာကြောင့် ဒါရိုက်တာကုန်းက သရုပ်ဆောင်တွေကို မြို့ထဲမှာ ထွက်ပြီး နားခွင့်ပေးဖို့ မနေ့က သဘောတူခဲ့တာပါ၊ ဒီနေ့တော့ သရုပ်ဆောင်တွေလာမှာ မဟုတ်ပါဘူး၊ အားလုံးပဲ အမြန်ပြန်ကြပါတော့"

ဤအကြောင်းပြချက်မှာ အလွန်ပင် ခိုင်လုံလှသဖြင့်ရှိနေသော ပရိသတ်အားလုံး ယုံကြည်သွားကြသည်။ ဒါရိုက်တာကုန်းသည် တကယ်ပင် စည်းကမ်းကြီးသော ဒါရိုက်တာတစ်ဦး ဖြစ်သည်မဟုတ်ပါလား။ သူမသည် သရုပ်ဆောင်တွေကို ရုပ်ရှင်အဖွဲ့ထဲမှ ဘယ်လိုလုပ် အလွယ်တကူ ထွက်ခွင့်ပေးပါ့မလဲ။ ထိုသတင်းသည် မိုးကြိုးပစ်လိုက်သကဲ့သို့ ဖြစ်သွားပြီး မျှော်လင့်ချက်ကြီးစွာ စောင့်နေသော ပရိသတ်များကို အကြီးအကျယ် စိတ်ပျက်သွားစေခဲ့သည်။ သူတို့၏ စိတ်ခံစားချက်မှာ ကောင်းကင်ယံမှသည် ချောက်ထဲသို့ ထိုးဆင်းသွားသကဲ့သို့ ဖြစ်သွားပြီး၊ အစပိုင်းက စိတ်လှုပ်ရှားမှုများသည် စိတ်ပျက်မှုနှင့် စိတ်ဓာတ်ကျမှုများအဖြစ် အစားထိုးဝင်ရောက်လာခဲ့၏။ ပရိသတ်အချို့မှာ မနေနိုင်ဘဲ ခေါင်းငုံ့ကာ သူတို့၏ အားပေးပစ္စည်းများကို တိတ်တဆိတ် သိမ်းဆည်းပြီး ထွက်ခွာရန် ပြင်ကြတော့သည်။ အချို့သော လက်မလျှော့ချင်သည့် ပရိသတ်များမှာမူ မတ်တပ်ရပ်ကာ ဇာတ်ညွှန်းဆရာများထံသို့ လျှောက်သွားပြီး သူတို့၏ အိုင်ဒေါများ ရုပ်ရှင်အဖွဲ့တွင် မည်သို့ရှိနေကြောင်း စုံစမ်းမေးမြန်းကြ၏။ အချို့မှာမူ ဇာတ်ညွှန်းဆရာများထံမှ လက်မှတ်ရယူရန် သူတို့၏ မှတ်စုစာအုပ်များကို ကမ်းပေးကြသည်။

သူတို့အိုင်ဒေါများကို မတွေ့ရသော်လည်း ရုပ်ရှင်အဖွဲ့မှ ဇာတ်ညွှန်းဆရာများ၏ လက်မှတ်ကို ရရှိခြင်းမှာလည်း အဖိုးတန်သော အမှတ်တရတစ်ခုပင် ဖြစ်၏။

ဇာတ်ညွှန်းဆရာများသည် ဤကဲ့သို့ စိတ်အားထက်သန်ပြီး ရိုးသားလှသော ပရိသတ်များကို ကြည့်ကာ ငြင်းဆန်ခြင်း မပြုဘဲ ပရိသတ်များ ကမ်းပေးသော စက္ကူနှင့် ဘောပင်များကို တစ်ဦးပြီးတစ်ဦး ယူကာ သေချာစွာ လက်မှတ်ရေးထိုးပေးခဲ့ကြသည်။ ဇာတ်ညွှန်းဆရာများ လက်မှတ်ထိုးပေးသည်ကို စောင့်နေကြစဉ်မှာပင် ဆရာတစ်ဦး၏ ကိုယ်ပေါ်တွင် ကျီးကန်းတစ်ကောင် ရှိနေသည်ကို ပရိသတ်များ မြင်တွေ့လိုက်ရ၏။ ဇာတ်ညွှန်းဆရာပျန်းမှာ စိတ်အားထက်သန်စွာဖြင့် ရှင်းပြသည်။

"ဒါက ကျွန်တော်တို့ ရုပ်ရှင်အဖွဲ့ရဲ့ တကယ့် ကြယ်ပွင့်ကြီးပဲ၊ ကျွန်တော်တို့ရဲ့ တိရစ္ဆာန်သရုပ်ဆောင်ပေါ့၊ အားလုံးပဲ ရုပ်သံဇာတ်လမ်းတွဲကို မျှော်လင့်စောင့်စားပေးကြပါဦး"

ပရိသတ်များကို အောင်မြင်စွာ ချော့မော့နားချပြီးနောက် ဇာတ်ညွှန်းဆရာများသည် ဆရာကြီးဝေနှင့် ရှောင်ရှီးတို့ကို ခေါ်ကာ တည်းခိုခန်းထဲသို့ ဝင်လာခဲ့ကြသည်။ သို့သော်လည်း စောစောက ရုပ်ဖျက်ပြီး ခိုးဝင်သွားသော ကြယ်ပွင့်များသည် သူတို့၏ အခန်းထဲသို့ မသွားကြဘဲ ဧည့်ကြိုကောင်တာတွင် စုဝေးနေကြသည်ကို ဇာတ်ညွှန်းဆရာများမှာ အံ့ဩစွာတွေ့ရှိလိုက်ရ၏။

"ဘာဖြစ်လို့လဲ မင်းတို့တွေ အားလုံးက အရမ်းသတ္တိကောင်းနေကြတာလား၊ ပရိသတ်တွေဝင်လာမှာကို မကြောက်ကြဘူးလား"

ဇာတ်ညွှန်းဆရာပျန်း နားမလည်နိုင်စွာ မေးလိုက်သည်။ လီထျန်းယီမှာ ဇာတ်ညွှန်းဆရာပျန်း ကို လက်ယမ်းပြလိုက်၏။

"မြန်မြန်လာ၊ မြန်မြန်လာ၊ ဆရာကြီးဝေအတွက် မြန်မြန် မဲပေးကြစို့"

"မဲပေးမယ်"

ဇာတ်ညွှန်းဆရာပျန်းမှာ အနည်းငယ် ကြောင်သွားသည်။ လီထျန်းယီ၏ရှင်းပြချက်ကို နားထောင်ပြီးနောက်တွင်မူ ဇာတ်ညွှန်းဆရာပျန်း သည်လည်း ကြယ်ပွင့်များကို အခန်းထဲ ပြန်ခိုင်းရန် မေ့သွားပြီး၊ သူကိုယ်တိုင်လည်း ဧည့်ကြိုကောင်တာတွင် မခွာတမ်းနေကာ ဆရာကြီးဝေအတွက် မဲပေးနေတော့၏။ ဒါဟာ သူဌေးမလေး၊ ဆရာကြီးဝေတို့နှင့် ဆက်ဆံရေးကောင်းတည်ဆောက်ဖို့ အကောင်းဆုံး အချိန်ပဲလေ။

ဇာတ်ညွှန်းဆရာပျန်းသည် သူတို့၏ ရုပ်ရှင်အဖွဲ့ထဲတွင် သစ္စာဖောက်တစ်ဦး ရှိနေသည်ဟု အမြဲခံစားနေရသည်။ အချိန်ဇယားမီရန်နှင့် ရိုက်ကူးရေးကို စောစောစီးစီး အပြီးသတ်နိုင်ရန်အတွက် ရုပ်ရှင်အဖွဲ့သည် သရုပ်ဆောင်များကို ဟဲယဲ့တည်းခိုခန်းတွင် တည်းခိုခွင့်မပြုတော့ပေ။ သို့သော်လည်း ဤဇာတ်ညွှန်းဆရာများသည်ပင် မနက်ဖြန် သို့မဟုတ် သဘက်ခါအတွက် အခန်းများကို ဘိုကင်လုပ်၍ မရကြသေးပေ။ တစ်ယောက်ယောက်မှာ ဟဲယဲ့တည်းခိုခန်း၏ အံ့ဖွယ်အရည်အသွေးများအကြောင်းကို တခြားသော ရုပ်ရှင်အဖွဲ့များထံသို့ တိတ်တဆိတ် သတင်းပေါက်ကြားစေခဲ့ခြင်းဖြစ်ရမည်။ ဇာတ်ညွှန်းဆရာပျန်း ကိုယ်တိုင်မှာလည်း သူ့ဇာတ်ညွှန်းဆရာသူငယ်ချင်းများကို စိတ်ကူးစိတ်သန်းများရရှိရန်အတွက် ဟဲယဲ့တည်းခိုခန်းသို့ အမြန်လာရန် တိတ်တဆိတ် ပြောထားခဲ့သော်လည်း၊ ယခု အခြေအနေမှာ အလွန်အကျွံဖြစ်နေသည်ဟု သူခံစားရသည်။

သူ့အခန်းကို သူတို့ ဘယ်လိုလုပ် လုယူနိုင်ကြတာလဲ။ ထို့ကြောင့် သူသည် သူဌေးမလေးနှင့် ဆက်ဆံရေးကောင်း တည်ဆောက်ထားရမည်ဖြစ်ပြီး၊ သူ့အတွက် အခန်းတစ်ခန်း ချန်ထားပေးရန် သူဌေးမလေးကို တောင်းဆိုရမည် ဖြစ်သည်။ ဆရာကြီးဝေအတွက် မဲပေးခြင်းမှာမူ လုံးဝ ရှောင်လွှဲ၍မရသော တာဝန်တစ်ခုပင် ဖြစ်ပေတော့၏။

132

ညမှောင်လာသည်နှင့်အမျှ မြို့ပြ၏မီးရောင်စုံတို့သည် မှိတ်တုတ်မှိတ်တုတ်ဖြင့် သက်ဝင်လှုပ်ရှားလာကြသည်။ ဒါရိုက်တာကုန်း၏ Weibo ပို့စ်တစ်ခုသည် အင်တာနက်အသုံးပြုသူများအကြားတွင် ဆွေးနွေးငြင်းခုံစရာတစ်ခု ဖြစ်လာခဲ့၏။ ဒါရိုက်တာကုန်း၏ Weibo ပို့စ်တွင် ဤသို့ရေးသားထားပြီး မဲပေးရမည့် လင့်ခ်တစ်ခုကိုပါ ပူးတွဲဖော်ပြထားခဲ့သည်။

"ဟွာကော် ပန်းချီနဲ့ လက်ရေးလှပြိုင်ပွဲမှာ ဝင်ရောက်ယှဉ်ပြိုင်နေတဲ့ ဆရာကြီးဝေဖုန်းယီရဲ့ လက်ရေးလှလက်ရာတွေအတွက် ကျေးဇူးပြုပြီး မဲပေးကူညီကြပါဦး၊ မဲပေးရမယ့် လင့်ခ်ကတော့ ဒီမှာပါ၊ အားလုံးရဲ့ ထောက်ခံအားပေးမှုအတွက် ကျေးဇူးတင်ပါတယ် "

ဒါရိုက်တာကုန်းမှာ Weibo တွင် တင်လိုက်ပြီးနောက် 'ကြင်ယာတော်နှစ်ပါး ဒဏ္ဍာရီ' ရုပ်ရှင်အဖွဲ့သား အများအပြားသည်လည်း သူမ၏ပို့စ်ကို ပြန်လည်မျှဝေခဲ့ကြသည်။

ဝေအိုက်ယီ - "မဲပေးပြီးပါပြီ၊ မဲပေးပြီးပါပြီ၊ ကျွန်မတော့ ဝေကောကော ကို မဲပေးလိုက်ပြီနော် "

ထာဝရနှင်းပန်း - "မဲပေးလိုက်ပါပြီ 'ကြင်ယာတော်နှစ်ပါး ဒဏ္ဍာရီ' ဆိုတဲ့ အမျိုးသမီးဇာတ်ဆောင်အဓိကပါဝင်တဲ့ ဇာတ်လမ်းတွဲကြီးကိုလည်း အားလုံးပဲ စောင့်မျှော်အားပေးကြပါဦးရှင်"

ယွီလန်ရဲ့တစ်ခုတည်းသော - "ဒါရိုက်တာကုန်းကို ထောက်ခံတဲ့အနေနဲ့ မဲပေးပြီးပါပြီ၊ ကျွန်တော်တို့ရဲ့ ယွီလန်ကျဲကျဲ ကိုလည်း သေချာလေး ဂရုစိုက်ပေးပါဦး ဒါရိုက်တာကုန်းခင်ဗျာ"

မှတ်ချက်ကဏ္ဍ၏ ရှေ့ဆုံးတန်းများကို သရုပ်ဆောင်အသီးသီး၏ ပရိသတ်များမှာ နေရာယူထားကြပြီး အခြေအနေကို ထိန်းချုပ်ထားကြသည်။ မှတ်ချက်ကဏ္ဍ၏ နောက်တန်းများတွင်မူ ဒါရိုက်တာကုန်း၏ ဇာတ်လမ်းတွဲများကို ကြည့်ရှုသူအချို့ ပေါ်လာပြီး ဒါရိုက်တာကုန်း၏ Weibo ပို့စ်အပေါ် ပို၍ အာရုံစိုက်လာကြ၏။

"ဒါက ဘယ်သူလဲ ဒါရိုက်တာကုန်းရဲ့ ဆွေမျိုးလား ဒါရိုက်တာကုန်းက အဆက်အသွယ်တွေ သုံးပြီး အလုပ်လုပ်တာကို အမုန်းဆုံး မဟုတ်ဘူးလား"

"ဒါရိုက်တာကုန်း ရိုက်ကူးရေးလုပ်နေတုန်း Weibo မှာ ပို့စ်တင်တာ တွေ့ရခဲတယ်၊ ဒီလူက အနုပညာလောကထဲက ဒါရိုက်တာရဲ့ ရင်းနှီးတဲ့ မိတ်ဆွေတစ်ယောက် ဖြစ်ရမယ်"

" 'ကြင်ယာတော်နှစ်ပါး ဒဏ္ဍာရီ' ရဲ့ ဇာတ်ညွှန်းဆရာတွေပါ ပြန်တင်ထားတာ တွေ့တယ်၊ ဒီဝေဖုန်းယီဆိုတဲ့လူက အရေးကြီးတဲ့ ပုဂ္ဂိုလ်တစ်ယောက် ဖြစ်ရမယ်"

"သူတို့တင်မကဘူး၊ ဘေးနားက ရုပ်ရှင်အဖွဲ့ရဲ့ ဒါရိုက်တာတောင် ပြန်တင်ထားသေးတယ်၊ သူက ဒီလောကထဲက အကောင်ကြီးတစ်ယောက် ဖြစ်လောက်တယ်"

အလုပ်မရှိသည့် ပရိသတ်အချို့မှာ ဝေဖုန်းယီအကြောင်းကို စတင်ရှာဖွေကြရာ မကြာမီမှာပင် မှတ်ချက်ကဏ္ဍတွင် လင့်ခ်တစ်ခု ပေါ်လာခဲ့သည်။

"ဒီလူလား ဒီဆရာကြီးဝေက၊ အခု အွန်လိုင်းမှာ တိုက်ရိုက်ထုတ်လွှင့် နေတာပဲ၊ သူက ဘယ်လိုလုပ် လက်ရေးလှဆရာ ဖြစ်နေတာလဲ၊ ဒါပေမဲ့ ခဏလောက် နားထောင်ကြည့်တော့လည်း ဆရာကြီးဝေက ရှင်းပြတာ တကယ်တော်တာပဲ"

ဝေဖုန်းယီအပေါ် ထားရှိသည့် 'ဒီလောကထဲက အကောင်ကြီး' ဆိုသော အမြင် မှာ ချက်ချင်းပင် ကွဲအက်သွားခဲ့သည်။ အကြောင်းမှာ လူအများစုသည် အွန်လိုင်းတွင် တိုက်ရိုက်ထုတ်လွှင့်သူများအပေါ် အမြင်စောင်းနေကြဆဲဖြစ်သောကြောင့်ပင်။ မကြာမီ မှတ်ချက်ကဏ္ဍတွင် တစ်စုံတစ်ယောက်မှ သံသယဖြင့် မေးခွန်းထုတ်လာသည်။

"အွန်လိုင်းတင်ဆက်သူလား၊ ဒါရိုက်တာကုန်းက ပိုက်ဆံယူပြီး ကြော်ငြာပေးနေတာတော့ မဟုတ်ပါဘူးနော်၊ ဒါရိုက်တာကုန်းတောင် ပိုက်ဆံအလွယ်ရဖို့အတွက် ဒီလောက်အထိ အောက်ကျနောက်ကျ လုပ်နေပြီလား"

ဒါရိုက်တာကုန်း၏ Weibo ကို ပြန်တင်ပေးရန် သူငယ်ချင်းများကို လိုက်လံစည်းရုံးနေသည့် ရုပ်ရှင်အဖွဲ့ဝင်တစ်ဦးမှာ ချက်ချင်းပင် ဝင်ရောက်ရှင်းပြလိုက်သည်။

"ဒီလူက ကျွန်တော်တို့ ရုပ်ရှင်အဖွဲ့ရဲ့ လက်ရေးလှနည်းပြနဲ့ ပညာရပ်ဆိုင်ရာ အကြံပေးပုဂ္ဂိုလ်ပါ၊ နောက်ပြီး ဇာတ်လမ်းထဲက တိရစ္ဆာန်သရုပ်ဆောင်တွေကို တာဝန်ယူထားတဲ့သူလည်းဖြစ်ပါတယ် "

ဘေးမှ ကြည့်နေသူများသည် ရုပ်ရှင်အဖွဲ့ထံမှ သတင်းအစအနလေးကိုပင် ရလိုက်သဖြင့် ပို၍ စိတ်လှုပ်ရှားသွားကြသည်။

"ဟုတ်တာပေါ့၊ ဒါရိုက်တာကုန်းရဲ့ ဇာတ်လမ်းက သမိုင်းနောက်ခံ ဇာတ်လမ်းပဲလေ၊ ကျွန်မတို့ ကောကောက လက်ရေးလှကို သေချာလေ့ကျင့်ခဲ့တာ၊ ဒါရိုက်တာအနေနဲ့ ကျွန်မတို့ ကောကောကို ထည့်သွင်းစဉ်းစားပေးဖို့ မျှော်လင့်ပါတယ် "

"ကျွန်မတို့ ကျဲကျဲက ပြောဖူးတယ်၊ ဒါရိုက်တာကုန်းရဲ့ ဇာတ်လမ်းကို ရိုက်ရတာ အရမ်းပင်ပန်းတယ်၊ ဗဟုသုတအသစ်တွေကို အမြဲလေ့လာနေရတယ်တဲ့၊ ဆရာကြီးဝေရဲ့ လမ်းညွှန်မှုတွေအတွက် ကျေးဇူးတင်ပါတယ် "

"အဲဒါကြောင့်ကိုး၊ နေဦး ကြင်ယာတော်နှစ်ပါး ဒဏ္ဍာရီ မှာ တိရစ္ဆာန်တွေပါတဲ့ အခန်းတွေတောင် ရှိတယ်လား"

သတင်းအချက်အလက် ပိုမိုရရှိထားသည့် ပရိသတ်အချို့သည် ဆရာကြီးဝေ၏ လုပ်ငန်းခွင်နေရာမှာ ဟဲယဲ့တည်းခိုခန်း ဖြစ်သည်ကို သတိပြုမိသွားကြပြီး၊ နံနက်ပိုင်းမှ မြင်တွေ့ခဲ့ရသော ဗီဒီယိုနှင့် ချက်ချင်းပင် ဆက်စပ်လိုက်ကြသည်။ ထိုအခါမှ သူတို့ သဘောပေါက်သွားကြ၏။

"ရုပ်ရှင်အဖွဲ့သားတွေအားလုံး မနေ့က ဒီတည်းခိုခန်းကို ဘာလို့ သွားနေကြလဲဆိုတာ အံ့ဩစရာမရှိတော့ဘူး၊ ဆရာကြီးဝေက ဟဲယဲ့တည်းခိုခန်းရဲ့ တာဝန်ရှိသူ ဖြစ်နေတာကိုး၊ ဆရာကြီးဝေက တကယ်ကို အစွမ်းထက်ပုံပဲ၊ ဒါရိုက်တာကုန်းက မင်းသား၊ မင်းသမီးတွေကို ခေါ်ပြီး ဆရာကြီး‌ဝေကို ထောက်ခံပေးတဲ့အထိတောင် လုပ်ပေးတယ်ဆိုတော့"

ဒါရိုက်တာကုန်း၏ Weibo Follower အရေအတွက်မှာ နှစ်သိန်း၊ သုံးသိန်းခန့်သာရှိသဖြင့် သိပ်မများလှပေ။ ထို့ကြောင့် ဤ Weibo ပို့စ်မှာ ထိပ်တန်းသတင်း အဖြစ် မရောက်ရှိသော်လည်း အနုပညာလောကအတွင်း၌မူ တောမီးသဖွယ် ပြန့်နှံ့သွားခဲ့သည်။ ဒါရိုက်တာများ၊ ဇာတ်ညွှန်းဆရာများနှင့် သရုပ်ဆောင်အများအပြားသည် ဟဲယဲ့တည်းခိုခန်းကို သတိပြုမိသွားကြ၏။ သူတို့ထဲမှ အများအပြားသည် ဟဲယဲ့တည်းခိုခန်းအကြောင်း ကောလာဟလများကို ကြားဖူးထားကြသည်။ အချို့မှာ သူငယ်ချင်းများထံမှ ဟဲယဲ့တည်းခိုခန်းသို့ အမြန်သွားရောက်တည်းခိုရန် တိုက်တွန်းသည့် မက်ဆေ့ချ်များကို တိုက်ရိုက်ရရှိခဲ့ကြပြီး၊ အချို့မှာမူ လူသုံးလေးဦးဆင့်ကာ ပြောကြားမှုများမှတစ်ဆင့် သိရှိခဲ့ကြခြင်းဖြစ်၏။

ဟဲယဲ့တည်းခိုခန်း၏ အိပ်ပျော်စေသော အမွေးနံ့သာသည် လူများကို အိပ်မက်မက်စေနိုင်ပြီး၊ အိပ်မက်ထဲတွင် သူတို့၏ သရုပ်ဆောင်စွမ်းရည်များကို မြှင့်တင်နိုင်ကာ စိတ်ကူးသစ်များ ရရှိနိုင်သည်ဟု ပြောဆိုကြသည်။ သတင်းများ ပြန့်နှံ့သွားသည်နှင့်အမျှ ၎င်းမှာ ပုံစံပြောင်းသွားပြီး၊ ယခုအခါ ဟဲယဲ့တည်းခိုခန်းမှာ ( စိတ်ညှို့ခြင်း) တည်းခိုခန်းတစ်ခုဖြစ်ကာ၊ သူဌေးမလေး စုဟယ်မှာ စိတ်ညှို့ပညာရှင်တစ်ဦးဖြစ်ပြီး သရုပ်ဆောင်များကို စိတ်ညှို့ပညာဖြင့် သူတို့၏ စွမ်းရည်များ တိုးတက်အောင် ကူညီပေးနိုင်သည်ဟု ဖြစ်သွားတော့၏။

အခြားသော ဗားရှင်းများတွင်မူ ဟဲယဲ့တည်းခိုခန်းကို သဘာဝလွန်အယူအဆများနှင့်ပါပေါင်းထည့်ထားကြသည်။ အနုပညာလောကမှာ အစွဲအလမ်းကြီးပြီးသားဖြစ်ရာ လူအများအပြားမှာ ၎င်းကို တကယ်ပင် အတည်ယူခဲ့ကြသည်။ ဤသတင်းမှားများကို လှောင်ပြောင်ရှုံ့ချသူများလည်း ရှိသော်လည်း၊ ယခင်က မယုံကြည်ခဲ့သူများသည်ပင် ဒါရိုက်တာကုန်းကိုယ်တိုင် Weibo တွင် မဲပေးရန် လင့်ခ်တင်ပေးထားသည်ကို မြင်လိုက်ရသည့်အခါ တစ်ဝက် ယုံကြည်သွားကြတော့၏။ သူတို့သည် အွန်လိုင်း ပလက်ဖောင်းသို့ ဝင်ရောက်ကြည့်ရှုလိုက်သည့်အခါတွင်မူ၊ ဟဲယဲ့တည်းခိုခန်း၏ နောက်လအတွက် အခန်းများအားလုံးမှာ အပြည့်ဖြစ်နေသည်ကို အံ့ဩစွာ တွေ့ရှိလိုက်ရသည်။ ဤအချိန်တွင် သူတို့၏ မူလယုံကြည်မှု (၅၀) ရာခိုင်နှုန်းမှာ (၇၀) ရာခိုင်နှုန်းအထိ တိုးသွားခဲ့၏။

ဒါရိုက်တာကုန်းမှာမူ ကျေနပ်အားရစွာဖြင့် သူမ၏ဖုန်းကို ပြန်သိမ်းလိုက်သည်။ သူမနှင့် လူရွေးချယ်ရေး ဒါရိုက်တာလက်ထောက် ဖုယန် တို့သည် ညဉ့်နက်မှ တည်းခိုခန်းသို့ ရောက်ရှိလာခြင်းဖြစ်၏။ ပထမအချက်မှာ ရုပ်ရှင်အဖွဲ့တွင် သူမ ကိုင်တွယ်ဖြေရှင်းရမည့် ကိစ္စအချို့ ရှိနေသေးသောကြောင့်ဖြစ်ပြီး၊ ဒုတိယအချက်မှာ ဟဲယဲ့တည်းခိုခန်းရှေ့တွင် စောင့်ဆိုင်းနေသော ပရိသတ်များကို ရှောင်လွှဲရန်လိုသောကြောင့်ဖြစ်သည်။ 'ကြင်ယာတော်နှစ်ပါး ဒဏ္ဍာရီ' ရုပ်ရှင်အဖွဲ့သားများသည် အလွန်ပင် စိတ်အားထက်သန်ကြ၏။ အဝင်ဝတွင် ပရိသတ်များ ပြည့်နှက်နေစေကာမူ ဟဲယဲ့တည်းခိုခန်းတွင် တည်းခိုလိုသော သူတို့၏ဆန္ဒကို မတားဆီးနိုင်ခဲ့ပေ။

ဒါရိုက်တာကုန်း တည်းခိုခန်းသို့ ရောက်ရှိပြီး ဖုန်းကို ဖွင့်လိုက်သည်နှင့် ဇာတ်ညွှန်းဆရာများနှင့် သရုပ်ဆောင်များသည် သူမ၏နောက်ကွယ်တွင် သူဌေးမလေး စုဟယ်နှင့် တိတ်တဆိတ် ဆက်သွယ်ထားကြပြီး၊ တစ်ဦးချင်းစီမှ ဆရာကြီးဝေ၏ မဲပေးရန်လင့်ခ်ကို သူတို့၏ ဝီချက်တွင် ဝေမျှထားကြသည်ကို တွေ့လိုက်ရသည်။ ဒါရိုက်တာကုန်းသည် ဤအချက်ကို လုံးဝ လက်မခံနိုင်ပေ။ သူမသည် ချက်ချင်းပင် ဂရုထဲသို့ မက်ဆေ့ချ်ပို့လိုက်ကာ သရုပ်ဆောင်များအနေဖြင့် ဆရာကြီးဝေအတွက် မဲပေးရန် လူသိရှင်ကြား စည်းရုံးခြင်းမပြုရန် တားမြစ်လိုက်ပြီးနောက်၊ သူမ၏ အခွင့်အာဏာကို အသုံးပြုကာ Weibi တွင် ကိုယ်တိုင် ပို့စ်တင်လိုက်ခြင်းဖြစ်သည်။ ဒါရိုက်တာကုန်းသည် သရုပ်ဆောင်များနှင့် ဇာတ်ညွှန်းဆရာများ၏ မကျေနပ်သော အကြည့်များကို လုံးဝ လျစ်လျူရှုလိုက်ပြီး၊ ဟဲယဲ့တည်းခိုခန်း၏ အခန်းကို သုံးလ ဘိုကင်လုပ်ပိုင်ခွင့်ကို ပျော်ရွှင်စွာဖြင့် ရယူလိုက်၏။

ဟဲယဲ့တည်းခိုခန်းသည် အွန်လိုင်း ဘိုကင်ပလက်ဖောင်းတွင် တစ်လစာသာ ဘိုကင်လက်ခံသော်လည်း၊ ဒါရိုက်တာကုန်းမှာမူ တစ်လလုံး ရုပ်ရှင်အဖွဲ့နှင့်အတူ နေထိုင်မည်ဖြစ်သည်။ သုံးလအကြာဆိုလျှင် အဆင်ပြေလှ၏။ ထိုအချိန်တွင် သူမ ရိုက်ကူးရေး ပြီးစီးလောက်ပြီဖြစ်ရာ အယ်ဒီတာများနှင့်အတူ ဟဲယဲ့တည်းခိုခန်းသို့လာပြီး စိတ်ကူးသစ်များ ရှာဖွေနိုင်မည်ဖြစ်သည်။ Weibo ပို့စ်တစ်ခုနှင့် အခန်းကြိုတင်ဘိုကင်ခွင့်ကို လဲလှယ်လိုက်ခြင်းမှာ အလွန်တန်သော အပေးအယူတစ်ခုဖြစ်သည်ဟု ဒါရိုက်တာကုန်း ခံစားလိုက်ရ၏။ ဇာတ်ညွှန်းဆရာပျန်းသည် ဖုန်းမျက်နှာပြင်ကို ကြည့်ရင်း ဒေါသတကြီး ရေရွတ်လိုက်သည်။

"ငါ အရင်ဆုံး Weibo မှာ တင်လိုက်ရမှာ၊ ဝီချက်မှာ မတင်လိုက်သင့်ဘူး၊ အဲဒါဆိုရင် ဒီအခွင့်အရေးက ငါ့အပိုင် ဖြစ်မှာ"

ဖုယန်မှာမူ စိတ်ကူးများ မလိုအပ်သော်လည်း တည်းခိုခန်းတွင် ဆက်လက်တည်းခိုလိုနေဆဲဖြစ်သည်။ လှပသောအိပ်မက်တစ်ခုကို မည်သူများငြင်းဆန်နိုင်ပါ့မလဲ။

"တော်စမ်းပါ၊ မင်းက အခန်းဘိုကင်ရထားပြီးသားပဲဟာ၊ ငါ ဒီည ပြန်လာတဲ့အချိန်မှာ အခန်းတစ်ခန်းတောင် မကျန်တော့ဘူး"

ဖုယန် နောင်တအပြည့်ဖြင့် ပြောလိုက်သည်။ ဆရာကြီးဝေအတွက် မဲပေးရန် စည်းရုံးနေသည့် စိတ်လှုပ်ရှားဖွယ် အခြေအနေတွင်နစ်မြောနေကြသော ရုပ်ရှင်အဖွဲ့သားများသည် ဟဲယဲ့တည်းခိုခန်းတွင် ဓာတ်လှေကားအသစ်တစ်ခု တပ်ဆင်ထားသည်ကို လုံးဝ သတိမထားမိခဲ့ကြပေ။