အခန်း (၃၉၅-၃၉၆)
Vol. 40 Ch. 395-396
အခန်း (၃၉၅) မိုးကြိုးခန်းမကို သိမ်းပိုက်ခြင်း၊ မိုးကြိုး ဧကရာဇ် ရာဇလှံတံ(၁)
“ကမ္ဘာခြားနတ်ဆိုးတွေနဲ့ ထပ်ပြီးတိုက်မယ်တဲ့လား”
ငွေရောင် မိစ္ဆာအလောင်းကောင်၏ မျက်လုံးများတွင် အလင်းတန်းတစ်ခု ရုတ်တရက် တဖျပ်ဖျပ်လက်သွား၏။ ဝူယွမ်၏ စကားများက သူ့ကို လှုပ်ခတ်သွားစေခဲ့သည်မှာ သေချာလှသည်။
ကမ္ဘာခြားနတ်ဆိုးများသည် သူတို့၏ မိုးကြိုးအဆောက်အအုံကို ဖျက်ဆီးခဲ့ပြီး သူ့ကို သတ်ခဲ့သော နတ်ဆိုးဗိုလ်ချုပ်သည်လည်း သူ၏ ဝိညာဉ်အကြွင်းအကျန်လေးကို နှစ်တစ်ထောင်ကျော် ညှဉ်းပန်းနှိပ်စက်ခဲ့သည်။
သူက ဝူယွမ်ကို အံ့အားသင့်စွာဖြင့် သေချာ ကြည့်လိုက်သည်။ ဤလူငယ်လေးသည် တကယ်ကို ကွာခြားပုံရသည်။
ထိုကောင်လေး၏စွမ်းအားမှာ ဆန်းကြယ်ရှင်ခြင်းအဆင့် မဟာပြည့်စုံခြင်းအဆင့်မျှသာ ရှိသော်လည်း သူ့ကိုပင်ဖိနှိပ်နိုင်ပြီး သူတစ်ခါမှ မမြင်ဖူးသော နည်းလမ်းတစ်ခုကို အသုံးပြုကာ သူ့ခန္ဓာကိုယ်အတွင်းရှိ မိစ္ဆာပုံစံများအားလုံးကို သန့်စင်ပေးနိုင်ခဲ့သည်။
ထိုစိမ်းလန်းသော အကိုင်းအခက်များအတွင်း၌ ကြွယ်ဝသော အသက်စွမ်းအင်တစ်ခုကို သူ ခံစားလိုက်ရသည်။ ၎င်းမှာ ဆန်းကြယ်ရှင်ခြင်းစွမ်းအင်ကဲ့သို့ အသက်စွမ်းအင်မျိုး မဟုတ်ဘဲ သူ၏ ဝိညာဉ်အကြွင်းအကျန်လေးပင်လျှင် လိုချင်တပ်မက်မိသော စွမ်းအားမျိုး ဖြစ်သည်။
“ဟုတ်ပါတယ်စီနီယာ၊ ခင်ဗျားမှာ တိုက်ခိုက်ချင်တဲ့စိတ်ဆန္ဒ ရှိနေသေးသရွေ့ ခင်ဗျားရဲ့ အထွတ်အထိပ်အခြေအနေကို ပြန်ရောက်အောင်၊ ဒါမှမဟုတ် ပိုမြင့်တဲ့အဆင့်တစ်ခုကိုတောင် ရောက်အောင် ကူညီပေးနိုင်တဲ့နည်းလမ်း ကျွန်တော့်မှာရှိပါတယ်” ဝူယွမ်က ပြုံးကာ ပြောလိုက်သည်။
ဤစီနီယာ၏ စွမ်းအားမှာ အနည်းဆုံး ဆန်းကြယ်သေခြင်းအဆင့် အထွတ်အထိပ်တွင် ရှိပြီး ခြေလှမ်း၀က်ဝင်စားခြင်းအဆင့်သို့ပင် ရောက်ရှိနေလောက်ပေသည်။ ထို့အပြင် ကန်အောက်ခြေတွင် အနှစ်တစ်ထောင်ကြာ ဖြတ်သန်းခဲ့ရပြီးနောက် သူ၏ စိတ်ပိုင်းဆိုင်ရာ အခြေအနေမှာလည်း ယုံကြည်နိုင်စရာမရှိလောက်အောင် မြင့်မားသည့်အဆင့်တစ်ခုသို့ ရောက်ရှိနေမည်မှာ သေချာလှသည်။
ဤကဲ့သို့သော အခြေခံအုတ်မြစ်နှင့် စုဆောင်းမှုမျိုးဖြင့် ၀င်စားခြင်းအဆင့်ကို ကျော်လွှားရန်မှာ ပြဿနာ မဟုတ်ပေ။
ချီရှင်းသည် ထိုအချိန်က နိဗ္ဗာန်အဆင့် ၅ ၏ စွမ်းအားကိုသာ ပိုင်ဆိုင်သော စွဲလမ်းမှု အကြွင်းအကျန်လေးတစ်ခုသာ ဖြစ်သည်။ သို့သော်လည်း ကမ္ဘာသစ်ပင်၏ အကူအညီဖြင့် သူ၏ခန္ဓာကိုယ်ကို ပြန်လည်တည်ဆောက်ပြီးနောက် သူ၏ စွမ်းအားမှာ ခုန်ပျံကျော်လွှား တိုးတက်လာခဲ့ပြီး ယခုအခါ ဆန်းကြယ်သေခြင်းအဆင့် မဟာပြည့်စုံခြင်းအဆင့်သို့ ရောက်ရှိနေပြီဖြစ်သည်။
သူ၏ ချိုးဖောက်ဝင်ရောက်မှုများမှာ အတားအဆီး လုံးဝမရှိသလောက်ပင် ဖြစ်သည်။
ချီရှင်းသည် သုံးနှစ်အတွင်း ၀င်စားခြင်းအဆင့်သို့ ဝင်ရောက်နိုင်လိမ့်မည်ဟု ဟွမ်က ပြောခဲ့ဖူးသည်။
“မင်းမှာ ရှင်သန်ခြင်းနဲ့ သေဆုံးခြင်းစွမ်းအားရော ဝါးမျိုခြင်းစွမ်းအားပါ ရှိတယ်၊ ဒီဘိုးဘေးအဆောင်နှစ်ခုလုံး မင်းဆီမှာရှိတာလား” ငွေရောင်မိစ္ဆာအလောင်းကောင်က မေးလိုက်သည်။
“ဒီဘိုးဘေးအဆောင နှစ်ခုလုံး ကျွန်တော့်ဆီမှာရှိတာ အမှန်ပါပဲ၊ ပြီးတော့ သူတို့ရဲ့ စွမ်းအားတွေကိုလည်း ကျွန်တော် ပိုင်ဆိုင်ပါတယ်” ဝူယွမ်က ရိုးသားစွာ ခေါင်းညိတ်လိုက်သည်။
“စီနီယာရဲ့နာမည်ကို သိခွင့်ရှိမလား”
“ငါ့နာမည်က ကျိုဖေးပါ” သူက ပြောလိုက်သည်။
“ဒါဆို မင်း ဒီကို လာတာ မိုးကြိုးဘိုးဘေးအဆောင်အတွက် ဖြစ်ရမယ်၊ ဟုတ်တယ်မလား”
“ဟုတ်ပါတယ်” ဝူယွမ်က ခေါင်းညိတ်လိုက်သည်။
“မိုးကြိုးဘိုးဘေးအဆောင်၊ အာ” ထိုစကားကို ကြားသောအခါ ကျိုဖေး ခေတ္တရပ်တန့်သွားပြီး သူ၏မျက်လုံးများထဲတွင် လွမ်းဆွတ်မှု အရိပ်အယောင်တစ်ခု ပေါ်လာကာ ညင်သာစွာ ပြောလိုက်သည်။
“ဟိုတုန်းက မိုးကြိုးဧကရာဇ်ကြီးက မိုးကြိုးဘိုးဘေးအဆောင်ကို ရခဲ့လို့ မိုးကြိုးအဆောက်အအုံကို တည်ထောင်ခဲ့တာပဲ၊ ဒါပေမယ့် အဲဒါကြောင့်ပဲ ငါတို့ရဲ့ မိုးကြိုးအဆောက်အအုံကို အဲဒီ ကမ္ဘာခြားနတ်ဆိုးတွေက ပစ်မှတ်ထားပြီး အကြီးအကျယ် ကျူးကျော်လာခဲ့ကြတာ”
“မိုးကြိုးဘိုးဘေးအဆောင်ကြောင့်ပဲ ကြီးကျယ်ခမ်းနားလာခဲ့သလို မိုးကြိုးဘိုးဘေးအဆောင်ကြောင့်ပဲ ပျက်စီးသွားခဲ့ရတယ်”
သူက သက်ပြင်းချလိုက်သည်။
“ဘိုးဘေးအဆောင်တွေက ကြီးမားတဲ့ စွမ်းအားကို ပိုင်ဆိုင်ထားပြီး ကမ္ဘာခြားနတ်ဆိုးတွေကို ဟန့်တားဖို့ အစွမ်းအထက်ဆုံး နတ်ဘုရားလက်နက်တွေပဲ၊ ဒီကမ္ဘာခြားနတ်ဆိုးတွေက ဘိုးဘေးအဆောင် ရတဲ့သူတွေကို မလွဲမသွေ ပစ်မှတ်ထားကြလိမ့်မယ်၊ သူတို့က ဒီကမ္ဘာကြီးကို သဘာဝအရ ဆန့်ကျင်နေကြတာလေ၊ ပြီးတော့ မိုးကြိုးဧကရာဇ်လို စီနီယာတွေက ကမ္ဘာခြားနတ်ဆိုးတွေကို ဖိနှိပ်ခဲ့လို့သာ ကမ္ဘာကြီး ငြိမ်းချမ်းနေခဲ့တာပါ” ဝူယွမ်က ပြောလိုက်သည်။
ဘိုးဘေးအဆောင်ကို မည်သူရရှိသည်ဖြစ်စေ သူတို့သည် ကမ္ဘာခြားနတ်ဆိုးများ၏ ပစ်မှတ်ထားခြင်းကို ခံရမည်ဖြစ်သည်။ စွမ်းအားကို ရရှိရန်အတွက် အန္တရာယ်များကို မလွဲမသွေ ရင်ဆိုင်ရမည်ဖြစ်သည်။
“ဒီကမ္ဘာခြားနတ်ဆိုး သားရဲတွေကို အမြန်ဆုံး ရှင်းပစ်ချင်တယ်” ကျိုဖေးက ဒေါသတကြီး ပြောလိုက်သည်။
သူ ပိုင်ဆိုင်သမျှ အရာအားလုံးကို ကမ္ဘာခြားနတ်ဆိုးများက ဖျက်ဆီးခဲ့ခြင်းဖြစ်သည်။
“အဲဒီနေ့ ရောက်လာမှာပါ၊ ပြီးတော့ သိပ်မဝေးတော့ပါဘူး” ဝူယွမ်က လေးနက်စွာ ခေါင်းညိတ်လိုက်သည်။ “စီနီယာ ကျိုဖေး၊ မိုးကြိုးဘိုးဘေးအဆောင်ရဲ့ တည်နေရာကို သိလား”
ကျိုဖေးက ခေါင်းညိတ်ပြီး ပြောလိုက်သည်။ “ငါ မမှားဘူးဆိုရင် မိုးကြိုးဘိုးဘေးအဆောင်က မိုးကြိုး နယ်ပယ်ထဲမှာ ရှိရမယ်”
“အို”
“အဲဒါက မိုးကြိုးဧကရာဇ်ဖွင့်လှစ်ခဲ့တဲ့ လေဟာနယ်တစ်ခုပဲ၊ သူကလွဲရင် တခြား ဘယ်သူမှ ဝင်လို့ မရဘူး”
“ဘယ်သူမှ ဝင်လို့ မရဘူးလား”
“လုံးဝကြီးတော့ မဟုတ်ပါဘူး၊ မိုးကြိုးဧကရာဇ်က အဲဒါကို ဖွင့်လှစ်ပြီးတဲ့နောက်မှာ အဲဒါကို ဖွင့်ဖို့ နည်းလမ်းတစ်ခုကိုလည်း ချန်ထားခဲ့တယ်၊ အဲဒါက သန့်စင်ယွမ်ရတနာ သုံးခုလိုအပ်တယ်၊ မင်းဆီမှာ နှစ်ခု ရှိနေတာကို ငါ ခံစားမိတယ်၊ တတိယတစ်ခုကို ရှာတွေ့ရင် မင်း ဖွင့်နိုင်လိမ့်မယ်” ကျိုဖေးက ပြုံးကာ ပြောလိုက်သည်။
“ကျွန်တော် နားလည်ပါပြီ” ဝူယွမ်က ခေါင်းညိတ်လိုက်သည်။
“စီနီယာ ကျိုဖေး၊ အခု ခင်ဗျားရဲ့ ဝိညာဉ်က အားနည်းနေတယ်၊ ကျွန်တော့်ရဲ့ ရှေးဟောင်းကျောက်တိုင်ကမ္ဘာထဲမှာ အရင် အနားယူပါ၊ အဲဒီမှာဆိုရင် ခင်ဗျား အရမ်း မြန်မြန် ပြန်ကောင်းလာပါလိမ့်မယ်”
ဝူယွမ်သည် လေဟာနယ်တံခါးကို ဖွင့်လိုက်ပြီး ဟွမ်ယွမ်ကို ကျိုဖေးအား အတွင်းသို့ ခေါ်ဆောင်သွားစေသည်။
“အင်း” ကျိုဖေးက ခေါင်းညိတ်လိုက်ပြီး ထပ်လောင်းပြောလိုက်သည်။
“လျှို့ဝှက်ဂူရဲ့ နက်ရှိုင်းတဲ့ အပိုင်း ဗဟိုချက်မှာ မိုးကြိုးခန်းမ ရှိတယ်၊ အဲဒါက ဒီလျှို့ဝှက်ဂူရဲ့ အဓိက အကျဆုံး အစိတ်အပိုင်းပဲ၊ ပြီးတော့ မိုးကြိုး နယ်ပယ်ရဲ့ အဝင်ဝကလည်း အဲဒီထဲမှာ ရှိတယ်၊ ဒါပေမယ့် မင်း သတိထားရမယ်၊ အဲဒီ လေဟာနယ်ထဲမှာ ကမ္ဘာခြားနတ်ဆိုး အကြွင်းအကျန်တွေ ရှိနေနိုင်သေးတယ်”
“ဒါ့အပြင် ငါ မမှားဘူးဆိုရင် မိုးကြိုးခန်းမကို စောင့်ကြပ်နေတဲ့ မဟာ မိုးကြိုးဘုရင် သုံးပါးလည်း ရှိသင့်တယ်”
“သူ့ရဲ့ ခေတ်ကောင်းတုန်းက မိုးကြိုးအဆောက်အအုံက အရမ်း အစွမ်းထက်ခဲ့တယ်၊ မိုးကြိုးဧကရာဇ်က အမြင့်မြတ်ဆုံးခေါင်းဆောင်ဖြစ်ပြီး သူ့လက်အောက်မှာ အရှေ့၊ တောင်၊ အနောက်နဲ့ မြောက် လို့ အမည်ပေးထားတဲ့ မဟာ မိုးကြိုးဘုရင်လေးပါး ရှိတယ်၊ ပြီးတော့ ငါက သူတို့ထဲမှာ အရှေ့ မိုးကြိုးဘုရင်ပေါ့”
“ကျန်တဲ့ သုံးယောက်ကတော့ အခု ငါ အရင်ကဖြစ်နေတဲ့ အခြေအနေမျိုး ဖြစ်နေလောက်ပြီ၊ ဒါမှမဟုတ် လုံးဝ ရူးသွပ်သွားလောက်ပြီ”
ကျိုဖေး စကားပြောနေစဉ် သူ၏မျက်နှာအမူအရာမှာ အနည်းငယ် ရှုပ်ထွေးနေသည်။
သူတို့သည် တစ်ချိန်က သူ၏ညီအစ်ကိုများ ဖြစ်ခဲ့ကြသည်။
သတိပေးပြီးနောက် ကျိုဖေးသည် အဖြူရောင် လေဟာနယ်တံခါးအတွင်းသို့ လျှောက်လှမ်းဝင်ရောက်သွားပြီး ရှေးဟောင်းကျောက်တိုင် ကမ္ဘာအတွင်းသို့ ဝင်ရောက်သွားလေသည်။ ဟွမ်ယွမ်၏ လမ်းညွှန်မှုဖြင့် သူသည် ကမ္ဘာသစ်ပင်၏ဗဟိုချက်သို့ တိုက်ရိုက် ရောက်ရှိသွားသည်။
မြစိမ်းရောင် အလင်းတန်းများက သူ့ကို လွှမ်းခြုံသွားပြီး အဆုံးအစမရှိသော အသက်စွမ်းအင်များက သူ၏ခန္ဓာကိုယ်အတွင်းသို့ ရူးသွပ်စွာ စီးဝင်လာသည်။
ဤနေရာတွင် ရှေးဟောင်းခေတ်ကတည်းက တည်ရှိခဲ့ကြသော ဟွမ်၊ ဟွမ်ယွမ်၊ ဖုန်းယွမ်၊ ယန်၊ အဘိုးအိုဖန်ထျန်း၊ မဟာရှေးဟောင်းနယ်မြေသခင်ကြီးနှင့် အခြားသူများ အားလုံး ရှိနေကြသည်။
ကျိုဖေးက သူတို့ တစ်ယောက်စီကို စူးစမ်းလိုစိတ်ဖြင့် အကဲခတ်ကြည့်လိုက်သည်။ ဟွမ်ယွမ်၏ မိတ်ဆက်ပေးမှုအောက်တွင် ဤလူများနှင့် နတ်ဘုရားရတနာများအကြောင်း သူ သိရှိသွားသောအခါ အလွန်တရာ အံ့အားသင့်သွားလေသည်။ ဤနေရာတွင် သူသည် အမှန်တကယ်ပင် အဆင့်အတန်းအနိမ့်ဆုံးသူ ဖြစ်နေသည်။
“ဝုန်း”
ဝူယွမ်သည် မိုးကြိုးကန်ကြီးထဲမှ ထွက်ပေါ်လာပြီး ကမ်းစပ်သို့ ဆင်းသက်လိုက်သည်။ ဤအချိန်တွင် ပိုင်ယွမ်နှင့် လျှိုရှန်ရွှမ်တို့သည် သူတို့၏ အဖွဲ့နှင့်အတူ ဤနေရာတွင် စောင့်ကြပ်နေဆဲဖြစ်ပြီး အမှောင်ထဲတွင် ပုန်းအောင်းကာ စောင့်ကြည့်နေသော အချို့လူများလည်း ရှိနေသေးသည်။
လူအများစုကမူ အခြားအခွင့်အရေးများကို ရှာဖွေရန် ဤနေရာမှ ထွက်ခွာသွားခဲ့ကြပြီဖြစ်သည်။
မည်သို့ပင်ဆိုစေ လျှို့ဝှက်ဂူ ကမ္ဘာမှာ ကျယ်ပြောလှပြီး ဝူယွမ်နှင့်ယှဉ်ပြိုင်ရန် ဤနေရာတွင် ဆက်နေခြင်းက ပညာမဲ့ရာကျပေသည်။
“အစ်ကိုကြီး ဝူယွမ်၊ အဆင်ပြေရဲ့လား” လျှိုရှန်ရွှမ်က စိုးရိမ်တကြီး မေးလိုက်သည်။
အစောပိုင်းက ကျိုဖေးနှင့် ဗိုလ်ချုပ်အဆင့် ကမ္ဘာခြားနတ်ဆိုးတို့ ထုတ်လွှတ်လိုက်သော စွမ်းအားက ကန်ရေပြင်ပေါ်ရှိ လူများအပေါ် ကြီးမားသော ဖိအားကို ဖြစ်ပေါ်စေခဲ့သည်။
အကယ်၍ သူတို့၏ ရွှမ်ထျန်းနန်းတော်အဖွဲ့သာ ၎င်းကို ရင်ဆိုင်ခဲ့ရပါက သူတို့သည် ကြီးမားသော အသေအပျောက်များနှင့် ကြုံတွေ့ရပေလိမ့်မည်။
“ပြဿနာမရှိပါဘူး၊ ရလဒ်ကောင်းပါတယ်”
“ဒီမိုးကြိုးနှလုံးသားဆယ်ခုက မင်းအတွက် ဆုကြေးပဲ”
ဝူယွမ်က ပြောရင်း မိုးကြိုးနှလုံးသား ဆယ်ခုကို ထုတ်ယူကာ လျှိုရှန်ရွှမ်ထံသို့ ပေးလိုက်သည်။
သူသည် အစောပိုင်းက မိုးကြိုးကန်ကြီးအောက်တွင် မိုးကြိုးနှလုံးသား သုံးရာကျော် ရရှိခဲ့သည်။
“ကျေးဇူးတင်ပါတယ် အစ်ကိုကြီး ဝူယွမ်” လျှိုရှန်ရွှမ်က လေးနက်စွာ ဦးညွှတ်လိုက်သည်။
တစ်ခုရလျှင်ပင် ကောင်းမွန်နေပြီဖြစ်သော်လည်း ယခု ဝူယွမ်ကို ကန်ရေပြင်အား စောင့်ကြည့်ရန် ကူညီပေးရုံသက်သက်ဖြင့် သူမ ဆယ်ခု ရရှိခဲ့ခြင်းမှာ ကြီးမားသော အံ့အားသင့်စရာတစ်ခုပင် ဖြစ်သည်။
“အခု လျှို့ဝှက်ဂူရဲ့ အနက်ရှိုင်းဆုံး အပိုင်းကို တိုက်ရိုက်သွားကြတာပေါ့၊ လမ်းမှာ အန္တရာယ်တွေ အများကြီးရှိလိမ့်မယ်၊ ဒါကြောင့် အတူတူ သွားကြတာပေါ့” ဝူယွမ်က ဖိတ်ခေါ်လိုက်သည်။
မိုးကြိုး နယ်ပယ်ကို ဖွင့်ရန်အတွက် လျှိုရှန်ရွှမ်၏ကိုယ်ပေါ်ရှိ ငွေရောင် စေတီလေးကို သူ လိုအပ်နေသေးသည်။
မိုးကြိုးအဆောက်အအုံမှာ ကျယ်ပြောလှသော်လည်း မိုးကြိုးကန်ကြီးမှလွဲ၍ တန်ဖိုးရှိသော နေရာများ များများစားစားမရှိပေ။ ထို့ကြောင့် သူက ရှောင်တျောင်းနှင့် အခြားသူများကို ရှာဖွေရန် ချန်ထားခဲ့ပြီး လျှိုရှန်ရွှမ်နှင့် ပိုင်ယွမ်တို့ကို ဦးဆောင်ကာ အနက်ရှိုင်းဆုံး အပိုင်းသို့ တိုက်ရိုက် သွားခဲ့သည်။
သူတို့ ပိုမိုနက်ရှိုင်းစွာ ဝင်ရောက်သွားသည်နှင့်အမျှ ဤဒေသရှိ ကောင်းကင်ယံမှာ သိသိသာသာ မှောင်မိုက်လာခဲ့သည်။ ကောင်းကင်ယံတွင် အမည်းရောင် မိုးကြိုးတိမ်တိုက်အချို့ စုဝေးနေပြီး ဝေဝါး၀ါးဖြင့် မိုးခြိမ်းသံများ မြည်ဟည်းကာ ကျယ်ပြောလှသော ကုန်းမြေပေါ်တွင် ပဲ့တင်ထပ်နေသည်။
“မိုးကြိုးခန်းမက ဘယ်မှာလဲ”
လျှိုရှန်ရွှမ်မှာ တွေဝေသွားသည်။ လမ်းတစ်လျှောက် သူတို့ မြင်တွေ့ခဲ့ရသမျှမှာ ပြိုကျနေသော အပျက်အစီးများသာဖြစ်ပြီး မိုးကြိုးခန်းမကို မည်သည့်နေရာတွင်မျှ မတွေ့ရပေ။
“ဟိုမှာ”
ဝူယွမ်က ကောင်းကင်ယံသို့ ညွှန်ပြလိုက်သည်။
သူက ဤကုန်းမြေအထက် ကောင်းကင်ယံဆီသို့ ဖြည်းညင်းစွာ မော့ကြည့်လိုက်သည်။ ထိုနေရာတွင် သိပ်သည်းသော မိုးကြိုးတိမ်တိုက်များ တွဲလောင်းကျနေပြီး အတော်လေး ကျယ်ပြောလှသော စွမ်းအင်လှိုင်းတစ်ခုက ၎င်းတို့ထံမှ ပြန့်ကျဲထွက်ပေါ်နေသည်။
“မိုးကြိုးခန်းမက မိုးကြိုးတိမ်တိုက်တွေထဲမှာ ပုန်းနေတာပဲ၊”
ဝူယွမ်၏ ပုံရိပ်က ကောင်းကင်ယံသို့ ရုတ်တရက် ထိုးတက်သွားပြီး မိုးကြိုးတိမ်တိုက်များ၏ အပြင်ဘက်တွင် ပေါ်လာသည်။
ထို့နောက် သူ၏အကြည့်များက မိုးကြိုးတိမ်တိုက်များအထက်တွင် တိတ်ဆိတ်စွာ ရပ်တည်နေသော ဖော်ပြ၍မရနိုင်လောက်အောင် ခမ်းနားကြီးကျယ်သည့် မိုးကြိုးနန်းတော်ကြီးတစ်ခုအပေါ်သို့ ကျရောက်သွားသည်။ ၎င်း၏ ခမ်းနားမှုမှာ ကြောက်မက်ဖွယ်ကောင်းလှသည်။
“ဒါပဲ”
“ရွှီး၊ ရွှီး၊ ရွှီး”
အခန်း (၃၉၆) မိုးကြိုးခန်းမကို သိမ်းပိုက်ခြင်း၊ မိုးကြိုး ဧကရာဇ် ရာဇလှံတံ(၂)
သူတို့ မိုးကြိုးခန်းမသို့ ရောက်ရှိချိန်တွင် သူတို့နောက်မှ လိုက်ပါလာခဲ့သော လူရိပ် အများအပြားလည်း ထွက်ပေါ်လာခဲ့ပြီး ဤနယ်မြေအတွင်းသို့ နက်ရှိုင်းစွာ ဝင်ရောက်လာခဲ့ပြီးဖြစ်သော အခြားသူ အများအပြားလည်း ပါဝင်သည်။
သူတို့အားလုံးက မိုးကြိုးတိမ်တိုက်များအထက်သို့ ပျံသန်းလာကြပြီး ခမ်းနားကြီးကျယ်သော မိုးကြိုးခန်းမကို ကြည့်ကာ အံ့ဩတကြီး ရေရွတ်လိုက်ကြသည်။
“လူတွေ တော်တော်များတာပဲ၊ အားလုံးက ဆန်းကြယ်ရှင်ခြင်းအဆင့် မဟာပြည့်စုံခြင်းအဆင့်တွေချည်းပဲ” ဝူယွမ်က စိတ်ထဲမှ တိတ်တဆိတ် တွေးလိုက်သည်။ အများအပြားက အစောပိုင်းက လူအုပ်ထဲ ရောနှောရန်အတွက် သူတို့၏စွမ်းအားများကို ဖုံးကွယ်ထားခဲ့ကြခြင်းဖြစ်နိုင်သည်။
“မိုးကြိုးခန်းမကို ကာကွယ်ထားတဲ့ မိုးကြိုးအငွေ့အသက်အလွှာတစ်ခု ရှိတယ်၊ ဖြတ်သွားဖို့ ခက်တယ်”
“ငါတို့ ဘာလုပ်ကြမလဲ”
“မိုးကြိုးအငွေ့အသက်တွေက ပြန့်ကျဲနေပြီ၊ ငါတို့ စောင့်ဖို့ပဲလိုတယ်”
... လူတိုင်းက မိုးကြိုးခန်းမကို ပြင်းပြသော မျက်လုံးများဖြင့် ကြည့်နေကြသော်လည်း ၎င်းကို မိုးကြိုးအငွေ့အသက် တစ်ခုက ကာကွယ်ထားသဖြင့် ဆန်းကြယ်သေခြင်းအဆင့် အစွမ်းထက်ပုဂ္ဂိုလ်များပင်လျှင် ဖြတ်ကျော်ရန် ခက်ခဲလှသည်။
သို့သော်လည်း မိုးကြိုးအငွေ့အသက်များက လျင်မြန်စွာ ပြန့်ကျဲနေသည်။ ဤလျှို့ဝှက်ဂူပွင့်လာခြင်းက ၎င်းကို ပြင်ပကမ္ဘာနှင့် ဆက်သွယ်သွားစေပြီး ၎င်း၏ စွမ်းအင်အများစုမှာ လျင်မြန်စွာ ပြန့်ကျဲသွားလေ၏။
မကြာမီ မိုးကြိုးအငွေ့အသက်များ ပျောက်ကွယ်သွားလေသည်။
လှုပ်ရှားရန် အသင့်ပြင်ထားပြီးဖြစ်သော ထိုလူများက ကောင်းကင်ယံကိုဆုတ်ဖြဲကာ အံ့မခန်းအရှိန်အဟုန်ဖြင့် မိုးကြိုးခန်းမဆီသို့ ပြေးဝင်သွားကြသည်။
အသက်ရှူချိန်အနည်းငယ်အတွင်းမှာပင် သူတို့သည် မိုးကြိုးခန်းမ၏ ဧရာမတံခါးကြီးသို့ ရောက်ရှိသွားကြသည်။
အထူးသဖြင့် နဝမမြောက် မြေအောက်ကမ္ဘာဂိုဏ်းမှ လူများဖြစ်သည်။ သူတို့သည် အခြားလမ်းကြောင်းတစ်ခုမှနေ၍ ပထမဆုံး ပြေးဝင်လာခဲ့ကြခြင်းပင်။
ယွမ်စွမ်းအင် လှိုင်းလုံး ရာပေါင်းများစွာက လေဟာနယ်ကို ဆုတ်ဖြဲကာ ငွေရောင် မိုးကြိုးခန်းမ၏ ဧရာမ တံခါးကြီးအပေါ်သို့ အရှိန်အဟုန်ဖြင့် ကျဆင်းလာကြသည်။ ကျယ်လောင်သော ပေါက်ကွဲသံကြီးတစ်ခုက ကောင်းကင်ယံတွင် ချက်ချင်း ပဲ့တင်ထပ်သွားလေသည်။
အစွမ်းထက်ပုဂ္ဂိုလ် အများအပြား၏ အစွမ်းကုန်တိုက်ခိုက်မှုကို ရင်ဆိုင်ရချိန်တွင် ငွေရောင် ဧရာမတံခါးကြီးမှာ ချက်ချင်း ပေါက်ကွဲပွင့်ထွက်သွားလေသည်။ ရှေးဟောင်းအနံ့တစ်ခုကလည်း ပျက်စီးသွားသော မိုးကြိုးခန်းမအတွင်းမှ ပြန့်ကျဲလာသည်။
အနှစ်တစ်ထောင်ကြာ ပိတ်လှောင်ခံထားရသော ဤနန်းတော်ကြီးသည် နောက်ဆုံးတွင် နေရောင်ကို တစ်ဖန် ပြန်လည် မြင်တွေ့ရလေပြီ။
“ဝင်ကြ”
ရတနာရှာဖွေခြက လူများ၏ နှလုံးသားများကို အမြဲတမ်း ဖမ်းစားထားနိုင်သည်။
ဟော်မုန်းများ ဆူပွက်လာပြီး မျက်လုံးများ တောက်လောင်လာကာ လူများက အဝင်ဝဆီသို့ ပြေးဝင်သွားကြပြီး ရှေ့ရောက်ရန် အလုအယက် ယှဉ်ပြိုင်နေကြသည်။
ဂျိန်း၊ ဂျုန်း။
ရုတ်တရက် မိုးခြိမ်းသံတစ်ခု ပေါက်ကွဲထွက်ပေါ်လာပြီး အဖျက်စွမ်းအားကောင်းသော လျှပ်စီးတန်းသုံးခုက မိုးကြိုးခန်းမအတွင်းမှ ပစ်လွှတ်ထွက်ပေါ်လာသည်။
အဝင်ဝဆီသို့ ပြေးဝင်သွားသော အစွမ်းထက်ပုဂ္ဂိုလ်များမှာ ပေါက်ကွဲနေသော လျှပ်စီးများကြားတွင် ဗလာနတ္တိအဖြစ်သို့ တိုက်ရိုက် သုတ်သင်ခံလိုက်ရလေသည်။
ငွေရောင်အလင်းတန်း သုံးခုက ပေါက်ကွဲထွက်ပေါ်လာပြီး လူအုပ်ကြီးထဲသို့ ထိုးဆင်းသွားကာ ဆန်းကြယ်ရှင်ခြင်းအဆင့် အစွမ်းထက်ပုဂ္ဂိုလ် ရာပေါင်းများစွာကို ချက်ချင်း သတ်ဖြတ်လိုက်လေသည်။
ဝူယွမ်က သူတို့မှာ ငွေရောင်လူရိပ် သုံးခုဖြစ်ကြောင်း ရှင်းလင်းစွာ မြင်တွေ့လိုက်ရသည်။ သူတို့၏ ခန္ဓာကိုယ်များတွင် ကျိုဖေး၏ ခန္ဓာကိုယ်ကဲ့သို့ပင် မိစ္ဆာပုံစံများဖြင့် ဖုံးလွှမ်းနေသည်။
က်စက်ပြီး အစွမ်းထက်သော အမည်းရောင် စွမ်းအင်လှိုင်းများက သူတို့ထံမှ အဆက်မပြတ် ပြန့်ကျဲထွက်ပေါ်နေပြီး ပတ်ဝန်းကျင်ရှိ အပူချိန်ကို သိသိသာသာ ကျဆင်းသွားစေသည်။
ဤသုံးဦးမှာ အစောပိုင်းက ကျိုဖေး ပြောခဲ့သော အခြား မဟာ မိုးကြိုးဘုရင် သုံးပါးဖြစ်ကြောင်း ထင်ရှားလှသည်။
သူတို့၏ စွမ်းအားမှာလည်း ကျိုဖေးနှင့် ဆင်တူသည်။
အားလုံးက ဆန်းကြယ်သေခြင်းအဆင့် မဟာပြည့်စုံခြင်းအဆင့်နှင့် နှိုင်းယှဉ်နိုင်သော စွမ်းအားကို ပိုင်ဆိုင်ထားကြသည်။
ဤနေရာရှိ လူများက သူတို့ကို လုံးဝ မခုခံနိုင်ကြပေ။
မဟာ မိုးကြိုးဘုရင် မိစ္ဆာအလောင်းကောင် သုံးလောင်းက လူအုပ်ကြီးအား သတ်ဖြတ်နေသည်ကို မြင်သောအခါ လူတိုင်းက ရူးသွပ်စွာ နောက်ဆုတ်သွားကြသည်။
ဝူယွမ်က ချက်ချင်း မလှုပ်ရှားပေ။ ဤလူများအား ခါးသီးမှုအချို့ကို အရင် မြည်းစမ်းခိုင်းရန် လိုအပ်သည်။
“အစ်ကိုကြီး”
ရှောင်တျောင်း၊ လင်းတုန်နှင့် ရှောင်ယန်တို့လည်း ဤနေရာသို့ ရောက်ရှိလာကြသည်။ ဝူယွမ်ကို မြင်သည်နှင့် သူတို့က ချက်ချင်း အနားသို့ ရောက်လာကြသည်။
“ငါတို့ ဘာလုပ်ကြမလဲ”
လင်းတုန်က အစွမ်းထက်သော မိုးကြိုးဘုရင် မိစ္ဆာအလောင်းကောင် သုံးလောင်းကို ကြည့်ကာ မေးလိုက်သည်။
“ခဏနေရင် ဒီမိစ္ဆာအလောင်းကောင် သုံးလောင်းကို ငါတို့ အတူတူ ဖိနှိပ်ကြမယ်၊ ပြီးရင် မင်းတို့က မိုးကြိုးခန်းမအဝင်ဝကို စောင့်ကြပ်ပြီး ဒီလူတွေကို အထဲဝင်ခွင့်မပြုနဲ့” ဝူယွမ်က ခဏစဉ်းစားပြီးနောက် ပြောလိုက်သည်။
ဤနေရာသည် မိုးကြိုးအဆောက်အအုံ၏ အဓိက အချက်အချာနေရာဖြစ်သည်။ စစ်မှန်သော အမွေများနှင့် ရတနာများ အားလုံးက ဤနေရာတွင် ရှိသည်။ ဤလမ်းသွားလမ်းလာများကို မျှဝေပေးရန် ဝူယွမ် သေချာပေါက်ဆန္ဒမရှိပေ။
“လှုပ်ရှားကြစို့” ဝူယွမ်က ပြောလိုက်သည်။
ရှောင်တျောင်းနှင့် အခြား နှစ်ဦးက ချက်ချင်းပြေးထွက်သွားကြပြီး တစ်ယောက်လျှင် မိစ္ဆာအလောင်းကောင် တစ်လောင်းစီကို ရင်ဆိုင်လိုက်ကြသည်။
“အားလုံး နောက်ဆုတ်ကြ၊ ဒီမိစ္ဆာအလောင်းကောင်တွေက မင်းတို့ ကိုင်တွယ်နိုင်တဲ့ အရာတွေ မဟုတ်ဘူး” ဝူယွမ်က ကျယ်လောင်စွာ အော်ဟစ်လိုက်သည်။
တစ်ချိန်တည်းမှာပင် သူက ရှောင်တျောင်းနှင့် အခြားသူများ၏ တိုက်ပွဲတွင် ဝင်ရောက် ကူညီပေးလိုက်သည်။
မည်သို့ပင်ဆိုစေ သူတို့သည် ဆန်းကြယ်သေခြင်းအဆင့် မဟာပြည့်စုံခြင်းအဆင့် မိစ္ဆာအလောင်းကောင်များ ဖြစ်ကြရာ သူတို့သုံးဦးအတွက် သူတို့ကို ဖိနှိပ်ရန်မှာ လွယ်ကူမည်မဟုတ်ပေ။
“ဧရာမငရဲမီးတောင်”
“ကောင်းကင်ပိတ်လှောင် အစီအရင်မြေပုံ”
“ဖန်ထျန်းမီးဖို”
ဝူယွမ်က သန့်စင်ယွမ်ရတနာ သုံးခုကို ဆင့်ခေါ်လိုက်ရာ မိစ္ဆာအလောင်းကောင်ကြီး သုံးလောင်းကို ချက်ချင်း လွှမ်းခြုံသွားလေသည်။
အစွမ်းထက်သော ဝိညာဉ်ရတနာ စွမ်းအင်လှိုင်းများက ကောင်းကင်ယံရှိ ကျင့်ကြံသူများကို လွင့်စင်သွားစေပြီး ကောင်းကင်ပိတ်လှောင် အစီအရင်မြေပုံက မိုးကြိုးခန်းမပတ်လည်ရှိ လေဟာနယ်ကို တိုက်ရိုက် ချိတ်ပိတ်လိုက်ကာ ဝူယွမ်၊ သူ၏အဖော်များနှင့် မသက်ဆိုင်သူများ အားလုံးကို အပြင်ဘက်သို့ ဖယ်ထုတ်လိုက်သည်။
ယခုအခါ ဝူယွမ်တို့ ငါးဦးနှင့် လျှိုရှန်ရွှမ်တို့မှလွဲ၍ မိုးကြိုးခန်းမရှေ့တွင် မည်သူမျှ မရှိတော့ပေ။
တိတ်ဆိတ်သွားလေပြီ။
“မိန်းမလှလေး လျှို၊ အဲဒီ ငွေရောင် စေတီလေးကို ပေးပါ” ဝူယွမ်က လျှိုရှန်ရွှမ်ထံသို့ သူ၏ လက်ကို တိုက်ရိုက်ကမ်းပေးရင်း ပြောလိုက်သည်။
လျှိုရှန်ရွှမ် တံတွေးတစ်ချက် မျိုချလိုက်ပြီး ခဏတာ တွန့်ဆုတ်သွားသော်လည်း သူမ၏ သိုလှောင်အိတ်ထဲမှ ငွေရောင်စေတီလေးကို နာခံမှုရှိစွာ ထုတ်ယူကာ ဝူယွမ်ထံသို့ ပေးလိုက်သည်။
ရွှမ်ထျန်းနန်းတော် အဖွဲ့မှာ ဝူယွမ်၏ ဖယ်ထုတ်ခြင်းကို ခံထားရပြီဖြစ်သည်။ သူမတွင် သန့်စင်ယွမ်ရတနာတစ်ခု ရှိနေသေးသော်လည်း ဝူယွမ်နှင့် သူ၏အဖော်များကို သူမ ယှဉ်ပြိုင်နိုင်စွမ်း မရှိပေ။
ဝူယွမ်က ယခုလေးတင် သန့်စင်ယွမ်ရတနာ သုံးခုကို ဆင့်ခေါ်လိုက်ပြီး ၎င်းတို့အားလုံးမှာ အလွန်တရာ အစွမ်းထက်လှသဖြင့် သူတို့၏ ဆန်းကြယ်သေခြင်းအဆင့် အကြီးအကဲများကိုပင် ခုခံနိုင်စွမ်းမရှိအောင် ဖြစ်သွားခဲ့သည်။
ဤလူငါးယောက်က ရတနာရှာဖွေရန် လာခဲ့ကြခြင်း မဟုတ်ဘဲ ၎င်းတို့ကို လာရောက်စုဆောင်းရန် လာခဲ့ကြသကဲ့သို့ပင်။
လျှို့ဝှက်ဂူအတွင်းရှိ အန္တရာယ်များက သူတို့ကို လုံးဝ ဟန့်တားနိုင်စွမ်း မရှိပေ။
“ရှောင်တျောင်း၊ ရှောင်ယန်၊ ဒီနေရာကို မင်းတို့ဆီလွှဲထားခဲ့မယ်”
“တကယ်လို့ အစွမ်းထက်တဲ့ အနီရောင်ဝတ်လူတစ်ယောက် ရောက်လာရင် မတားနဲ့၊ သူ့ကို အထဲဝင်ခွင့်ပြုလိုက်” ဝူယွမ်က ရှောင်တျောင်းကို ညွှန်ကြားလိုက်သည်။
“အို၊ အနီရောင်ဝတ် လူတစ်ယောက်လား” ရှောင်တျောင်း အနည်းငယ် တွေဝေသွားသည်။
“ငါ ပြောတဲ့အတိုင်းသာ လုပ်ပါ၊ မင်း သူ့ကို နိုင်မှာမဟုတ်ဘူး” ဝူယွမ်က ပြောလိုက်သည်။
သူက သန့်စင်ယွမ်ရတနာ သုံးခုကို ရှောင်တျောင်းနှင့် အခြားသူများထံ ယာယီ အပ်နှင်းခဲ့ပြီးနောက် ပိုင်ယွမ်နှင့် လင်းတုန်တို့ကို ခေါ်ကာ မိုးကြိုးခန်းမအတွင်းသို့ ဝင်ရောက်သွားလေသည်။
ရွှီး... ခန်းမအတွင်းသို့ ဝင်ရောက်လာသည်နှင့်! အလွန်တရာ ရှေးဟောင်းဆန်သော အနံ့တစ်ခုက သူတို့ကို ရိုက်ခတ်လာပြီး လွန်ခဲ့သော နှစ်တစ်ထောင်ခန့်က အချိန်သို့ ပြန်လည်ရောက်ရှိသွားသကဲ့သို့ ခံစားရစေသည်။
မိုးကြိုးခန်းမမှာ ကျယ်ပြောလှသည်။ တစ်ချက်ကြည့်လိုက်ရုံဖြင့် လမ်းကြောင်းတွေ ယှက်နွှယ်နေတဲ့ ဧရာမ ဝင်္ကပါ လမ်းကြောင်းများ ရှိနေသည်။ ဤလမ်းကြောင်းများ၏ တစ်ဖက်တစ်ချက်စီတွင် တင်းကျပ်စွာ ပိတ်ထားသော ကျောက်ခန်း အများအပြား ရှိနေပြီး ၎င်းတို့အတွင်း၌ မည်သည့်အရာများ ရှိနေသည်ကို မည်သူမျှ မသိကြပေ။
ရှေးဟောင်း အဆောက်အအုံ အများစုမှာ အတော်လေး ဆင်တူကြသည်။ ဤနေရာရှိ ဖွဲ့စည်းပုံမှာ သူနှင့် လင်းချင်းကျူတို့ ပထမဆုံး ဆုံတွေ့ခဲ့ကြသော ရှေးဟောင်းသင်္ချိုင်းဂူနှင့် များစွာ ဆင်တူလှသည်။
ဝူယွမ်က ၎င်းတို့ကို တစ်ခုချင်းစီ စူးစမ်းရှာဖွေမနေဘဲ အတွင်းသို့ တိုက်ရိုက် ဝင်ရောက်သွားလေသည်။
ဤမိုးကြိုးခန်းမကို သူ၏ ရှေးဟောင်းကျောက်တိုင် ကမ္ဘာအတွင်းသို့ ထည့်သွင်းရန် သေချာပေါက် ရည်ရွယ်ထားသည်။ ‘အဲဒီအခါကျမှ ဖြည်းဖြည်းချင်း စူးစမ်းရှာဖွေလို့ ရပါတယ်လေ’
လောလောဆယ်တွင် သူက အရင်ဆုံး မိုးကြိုးဘိုးဘေးအဆောင်ကို ရယူပြီး ဤမိုးကြိုးခန်းမကို ထိန်းချုပ်နိုင်ရန် လိုအပ်သည်။
မကြာမီ ခြေလှမ်း တစ်သောင်းခန့်ရှိသော ကျောက်လှေကားတစ်ခု သူတို့၏ ရှေ့တွင် ပေါ်လာပြီး ထိုလှေကား၏ အဆုံးတွင် ငွေရောင် ခန်းမကြီးတစ်ခုက တိတ်ဆိတ်စွာ ရပ်တည်နေကာ ခမ်းနားကြီးကျယ်လှသည်။
“ဒါက ပင်မခန်းမ ဖြစ်ရမယ်”
ဝူယွမ်နှင့် အခြား နှစ်ဦးက ခန်းမကြီးအတွင်းရှိ ပရိဘောဂများကို အကဲခတ်ကြည့်ရှုလိုက်ကြသည်။
ခန်းမကြီးအတွင်း၌ ဧရာမ ကျောက်တိုင်ကြီးများ ရှိနေပြီး ဤကျောက်တိုင်များ၏ထိပ်တွင် လျှပ်စီးများ တဖျပ်ဖျပ်လက်နေသော တောက်ပသည့် အလုံးအချို့ လွင့်မျောနေသည်။ အလုံးများအတွင်း၌ စာလိပ်များ၊ လက်နက်များနှင့် အခြား ပစ္စည်းများကို ဝေဝါးဝါး မြင်တွေ့ရပြီး သူတို့၏ စွမ်းအင်လှိုင်းများမှာ အားလုံး အတော်လေး အစွမ်းထက်ကြသည်။
“ဒီရတနာတွေက အရမ်း အစွမ်းထက်တဲ့ အရှိန်အဝါတွေ ရှိတယ်၊ သိုင်းပညာတွေ၊ ဝိညာဉ်ရတနာတွေ၊ ပြီးတော့ သန့်စင်ယွမ်ရတနာတွေတောင် ရှိသေးတယ်” လင်းတုန်က ဝမ်းသာအားရ ပြောလိုက်သည်။
“အဲဒါက မိုးကြိုးဧကရာဇ်ဖြစ်ရမယ် မဟုတ်လား”
သို့သော်လည်း ဝူယွမ်၏ အကြည့်များက ခန်းမကြီး၏ အနက်ရှိုင်းဆုံးအပိုင်းသို့ ရောက်ရှိသွားရာ ထိုနေရာတွင် ကျန်းတစ်ရာခန့် မြင့်မားသော ကျောက်ဆင်းရုပ်တုတော်တစ်ခု ရပ်တည်နေသည်ကို တွေ့လိုက်ရသည်။
ကျောက်ဆင်းရုပ်တုတော်သည် ပလ္လင်တစ်ခုပေါ်တွင် ထိုင်နေပြီး တိုက်ပွဲဝင် ဝတ်ရုံကို ဝတ်ဆင်ကာ ခံ့ညားထည်ဝါသော မျက်နှာအမူအရာ ရှိသည်။ ဝေဝါးစွာဖြင့် အလွန်တရာ အံ့မခန်း အရှိန်အဝါတစ်ခုက ဆင်းတုတော်ထံမှ ပြန့်ကျဲထွက်ပေါ်နေသည်။
ဤအရှိန်အဝါမှာ အမှန်တကယ် တည်ရှိနေခြင်း မဟုတ်ဘဲ ဆင်းတုတော် ကိုယ်တိုင်က သယ်ဆောင်ထားခြင်း ဖြစ်သည်။
ထို့အပြင် ဆင်းတုတော်၏ မျက်လုံးများမှာ ငွေရောင်ပမာ တောက်ပနေပြီး မိုးကြိုးကမ္ဘာတစ်ခု ၎င်းတို့အတွင်း၌ ပုန်းအောင်းနေသကဲ့သို့ ဖြစ်နေကာ ဝေဝါးစွာဖြင့် မိုးခြိမ်းသံကို ကြားနိုင်ပေသည်။
ထိုကဲ့သို့သော အရှိန်အဝါကို ပိုင်ဆိုင်ထားသည့် ဆင်းတုတော်တစ်ခုမျှသာ ဖြစ်ခြင်းက ၎င်းသည် ထိုအချိန်က မိုးကြိုးဧကရာဇ်၏ အရှိန်အဝါဖြင့် ပြည့်နှက်နေကြောင်း ရှင်းလင်းစွာ ညွှန်ပြနေသည်။
ဝူယွမ်၏ အကြည့်များက ဆင်းတုတော်၏ ညာဘက်လက်သို့ ရုတ်တရက် ရွှေ့သွားလေသည်။ ထိုနေရာတွင် ၎င်းသည် ငွေရောင် မိုးကြိုးလှံတံတစ်ခုကို ကိုင်ဆောင်ထားပြီး ၎င်းထံမှ လျှပ်စီးများ အဆက်မပြတ် စီးဆင်းနေကာ အထူးသဖြင့် မျက်စိကျိန်းမတတ် ဖြစ်နေသည်။
သို့သော်လည်း ဤငွေရောင်လှံတံထံမှ သူ့ကို အနည်းငယ် စိတ်လှုပ်ရှားသွားစေသော အစွမ်းထက်သည့် စွမ်းအင်လှိုင်းတစ်ခုကို ဝူယွမ် အာရုံခံမိလိုက်သည်။
“မိုးကြိုးဧကရာဇ် ရာဇလှံတံ”