အခန်း (၇၁၅-၇၁၆)

အပိုင်း (၇၁၅) ထိုက်ယန်တောင် ကောင်းကင်ချိတ်ပိတ်အမြောက်

"စိတ်စွမ်းအင် ခုတ်ပိုင်းလှိုင်း"

ရွှေလင်းယုန်ကြီး အေးခဲသွားတော့မည့်ဆဲဆဲတွင် ရုတ်တရက် ကျယ်လောင်သော အော်ဟစ်သံတစ်ခု ထွက်ပေါ်လာသည်။

တင်းယန် အသွင်ပြောင်းထားသော လီနီယာ စွမ်းအင်သားရဲကြီးက တောင်ပံနှစ်ဖက်ကို အားကုန် ခတ်လိုက်သည်ကို မြင်လိုက်ရ၏။

ပြင်းထန်လှသော သန္ဓေပြောင်းစွမ်းအင်များ ပေါက်ကွဲထွက်လာမှုအောက်တွင် သူမ၏ တောင်ပံအစွန်းများ၌ ကြောက်မက်ဖွယ် အလင်းဓားသွားများ ဖြစ်ပေါ်လာလေသည်။

"ရွှပ်" ဟူသော အသံနှင့်အတူ လေထုကို ဆုတ်ဖြဲကာ အရှိန်ပြင်းပြင်းဖြင့် ခုတ်ပိုင်းချလိုက်သည်။

လင်ယွီရုံက ထိုမြင်ကွင်းကို ကြည့်ကာ လှောင်ပြုံးပြုံးလိုက်ပြီး "ကလေးကလား အကွက်တွေ"

သူမက လက်တစ်ဖက်ဖြင့် ထိုအလင်းဓားသွားဆီသို့ အားကုန် ဖိချလိုက်သည်။

မျက်စိတစ်မှိတ်အတွင်းမှာပင် ဟင်းလင်းပြင်တစ်ခုလုံး အေးခဲသွားပြီး ကြောက်မက်ဖွယ် ရေခဲလှိုင်းလုံးကြီးက ဒီရေလှိုင်းများအလား တင်းယန်ဆီသို့ ရုတ်ခြည်း လွှမ်းခြုံသွားတော့၏။

ထိုခုတ်ပိုင်းလှိုင်းသည် ချက်ချင်းဆိုသလိုပင် ရေခဲအဖြစ် အေးခဲသွားလေသည်။

စွမ်းအင်ပုံစံဖြင့် ပေါက်ကွဲထွက်လာသော တိုက်ခိုက်မှုနည်းလမ်း အားလုံးနီးပါးသည် ပြင်းထန်သော အပူစွမ်းအင်မှတစ်ဆင့် ရွေ့လျားစွမ်းအင်အဖြစ် ပြောင်းလဲသွားခြင်းပင် ဖြစ်သည်။

ပေါက်ကွဲခြင်း၏ အခြေခံသဘောတရားမှာ ဤအတိုင်းပင် ဖြစ်၏။

လင်ယွီရုံ၏ ရေခဲစွမ်းအင်က ဤကဲ့သို့သော စွမ်းအင်ပေါက်ကွဲမှု တိုက်ခိုက်ခြင်းများ၏ အဓိက အားနည်းချက် ဖြစ်နေပုံရသည်။

သူမက လက်တစ်ချက် လှုပ်ရှားလိုက်သည်နှင့် အပူစွမ်းအင်များအားလုံးကို ချက်ချင်း အေးခဲသွားစေနိုင်ပြီး စက္ကန့်ပိုင်းအတွင်းမှာပင် ပျောက်ကွယ်သွားစေနိုင်လေသည်။

တင်းယန်၏ စိတ်စွမ်းအင် ခုတ်ပိုင်းလှိုင်းသည်လည်း တစ်ချက်မျှ ထိတွေ့လိုက်ရုံဖြင့် ချက်ချင်း ပျောက်ကွယ်သွားရ၏။

သူမက နောက်သို့ အလျင်အမြန် ဆုတ်ခွာရှောင်တိမ်းလိုက်သော်လည်း မျက်ဝန်းထဲတွင်မူ စိတ်သက်သာရာရသွားသည့် အရိပ်အယောင်များ ပေါ်လာသည်။

ထိုအချိန်တွင် အကြေးခွံစိမ်း စပါးအုံးမြွေကြီး တစ်ကောင်က လင်ယွီရုံ၏ အနောက်ဘက်သို့ အသံတိတ် တက်လှမ်းသွားသည်ကို မြင်လိုက်ရသည်။

လင်ယွီရုံက တင်းယန်ကို အာရုံစိုက်နေချိန်တွင် မြွေကြီးက အမြီးဖြင့် လင်ယွီရုံ၏ ရေခဲဓားကို အားကုန် ရိုက်ချလိုက်လေသည်။

လင်ယွီရုံက ထိုမြွေကြီးကို သတိထားမိသွားချိန်တွင် ရေခဲဓားကို ချက်ချင်း ပြန်ရုတ်လိုက်ပြီး တစ်ဖက်လူ၏ ရိုက်ချက်ကို ရှောင်တိမ်းလိုက်သည်။

ထိုအခွင့်အရေးကို အသုံးချကာ အခြားလူရိပ်တစ်ခုက ရွှေလင်းယုန်ကြီး၏ အနားသို့ ရောက်ရှိလာပြီး ရွှေလင်းယုန်ကြီးကို ဆွဲဖမ်းကာ နောက်သို့ လျှပ်တစ်ပြက် ဆုတ်ခွာသွားတော့၏။

လင်ယွီရုံက အေးစက်စွာ ရယ်မောလိုက်ပြီး "ပြေးချင်တာလား... အားလုံး ဒီမှာပဲ အသေခံလိုက်ကြစမ်း"

ထိုလူရိပ်မှာ တခြားသူမဟုတ်ဘဲ ထူလုံပင် ဖြစ်နေလေသည်။

ယခုအချိန်တွင် ထူလုံသည် ဝမ်းသာချိန်ပင် မရလိုက်ပေ။ လီရှန်ယန်၏ ရွှေလင်းယုန်ကြီး တောင်ပံများကို အေးခဲစေခဲ့သော ရေခဲစွမ်းအင်များက တဖြည်းဖြည်း ပြန့်နှံ့လာပြီး သူ၏ လက်နှစ်ဖက်ဆီသို့ပင် ကူးစက်လာကြောင်း ထိတ်လန့်ဖွယ် တွေ့လိုက်ရသည်။

ထူလုံက ထိုအခြေအနေကို မြင်လိုက်ရသဖြင့် မျက်နှာအမူအရာ အနည်းငယ် ပျက်သွားသည်။

"အရမ်း အားပြင်းတဲ့ ရေခဲစွမ်းအင်ပဲ"

"အရိပ်နဂါး"

ထူလုံက ဒေါသတကြီး အော်ဟစ်လိုက်ပြီး သူ၏ ကျောပြင်ပေါ်ရှိ တက်တူးတစ်ခုကို အားကုန် လှုံ့ဆော်လိုက်လေသည်။

မျက်စိတစ်မှိတ်အတွင်းမှာပင် သူသည် ပုံသဏ္ဌာန်မဲ့သော အရိပ်မည်းတစ်ခုအဖြစ် ချက်ချင်း ပြောင်းလဲသွားတော့၏။

တစ်ချိန်တည်းမှာပင် လီရှန်ယန်၏ ရွှေလင်းယုန်ကြီးသည်လည်း အရိပ်တစ်ခုအဖြစ် ပြောင်းလဲသွားကာ ရေခဲစွမ်းအင်၏ တိုက်ခိုက်မှုအောက်မှ ချက်ချင်း လွတ်မြောက်သွားလေသည်။

ထိုမြင်ကွင်းကို မြင်လိုက်ရသော လင်ယွီရုံ၏ မျက်လုံးအိမ်များ ကျဉ်းမြောင်းသွားသည်။

"အမှောင်ဓာတ်လား"

သူမက လင်းယွမ်ကို သတိရသွားသည်။ ယခင်က လင်းယွမ်သည်လည်း မြူခိုးမြို့တော်တွင် ဤအစွမ်းကို အသုံးပြုခဲ့ဖူးသည်။

ဤနေရာတွင် ဤအစွမ်းကို သုံးတတ်သူ နောက်တစ်ယောက် ရှိနေလိမ့်မည်ဟု သူမ ထင်မထားခဲ့ပေ။

သို့သော် ချက်ချင်းပင် သူမ၏ မျက်ဝန်းများက စူးရှသွားပြီး "မဟုတ်သေးဘူး... ဒီလူက အမှောင်ဓာတ် အစွမ်းပိုင်ရှင် မဟုတ်ဘူး... ခုနက ငါ့ကို ခိုးတိုက်ခိုက်တဲ့ အကြေးခွံစိမ်း စပါးအုံးမြွေကိုလည်း သူပဲ ထိန်းချုပ်ထားတာ"

သူမက ထူလုံကို ကြည့်လိုက်ရာ မျက်လုံးထဲတွင် သံသယအချို့ ဖြစ်ပေါ်လာသည်။

ဤလူ၏ အစွမ်းကို သူမလို ဗဟုသုတ ကြွယ်ဝသူပင်လျှင် တစ်ခါမျှ မမြင်ဖူးခဲ့ချေ။

သို့သော် ယခုအချိန်သည် သိချင်စိတ် ပြင်းပြနေရမည့် အချိန်မဟုတ်ပေ။

လင်ယွီရုံသည် သူမ၏ စိတ်ဝိညာဉ်အမှတ်အသားဘက်မှ ပို့လွှတ်လိုက်သော ကြောက်ရွံ့မှု ခံစားချက်ကို အာရုံခံမိလိုက်သည်။

သူမက ဘာကိုမှ ဂရုမစိုက်နိုင်တော့ဘဲ လက်ထဲရှိ ရေခဲဓားကို ချက်ချင်း မြှောက်လိုက်ကာ အေးစက်စက် အော်ဟစ်လိုက်သည်။ "ဟိုလင်းယွမ်ဆိုတဲ့ကောင် ထွက်မလာဘဲ... နင်တို့လို အသုံးမကျတဲ့ အကောင်တွေကို ထွက်လာခိုင်းတယ်ပေါ့လေ... နင်တို့အားလုံးကို သတ်မပစ်မချင်း သူက လိပ်လို ခေါင်းဝှက်ထားချင်သေးတဲ့ပုံပဲ"

"ဒီမိန်းမယုတ်... ပါးစပ်က တော်တော် အဆိပ်ပြင်းတာပဲ" ဟု ထူလုံက မနေနိုင်ဘဲ ဆဲဆိုလိုက်သည်။

လင်ယွီရုံ၏ အကြည့်များက သူ့ထံ ချက်ချင်း ရောက်ရှိလာပြီး "သေချင်နေတာပဲ"

သူမက ရေခဲဓားကို လေထဲတွင် ဝဲပျံစေလိုက်ပြီးနောက် နဖူးအလယ်တွင် အကြေးခွံတစ်ခု ထွက်ပေါ်လာကာ တစ်ချိန်တည်းမှာပင် သူမ၏ ခန္ဓာကိုယ်ကြီးသည်လည်း အဆက်မပြတ် ကြီးထွားလာလေတော့သည်။

သူမ၏ ခန္ဓာကိုယ် အရွယ်အစား လျင်မြန်စွာ ကြီးထွားလာသည်နှင့်အမျှ သူမ၏ စွမ်းအားများသည်လည်း ယခုအခိုက်အတန့်တွင် အဆမတန် မြင့်တက်လာလေသည်။

စောစောကထက် အဆပေါင်းများစွာ ပိုမိုပြင်းထန်သော ကြောက်မက်ဖွယ် ဖိအားကြီးတစ်ခုက သူမ၏ ခန္ဓာကိုယ်ထဲမှ ပျံ့နှံ့ထွက်ပေါ်လာ၏။

တင်းယန်၊ ထူလုံနှင့် လီရှန်ယန်တို့ သုံးဦးစလုံး၏ မျက်နှာများမှာ အကြီးအကျယ် ပျက်ယွင်းသွားကြသည်။

"ဘာ"

"သူက အစွမ်းကုန် မထုတ်ရသေးဘူးလား"

"ခုနက သူ့ရဲ့ မျိုးရိုးဗီဇ ပြန်လည်ဖွဲ့စည်းခြင်း အဆင့် မဟုတ်သေးဘူးပေါ့"

သူတို့သုံးဦးစလုံး လုံးဝ မယုံကြည်နိုင်အောင် ဖြစ်သွားရသည်။ သူတို့ ရှိသမျှ အစွမ်းကုန် ထုတ်သုံးခဲ့သော်လည်း တစ်ဖက်လူ၏ သာမန် လူသားပုံစံကိုပင် မယှဉ်နိုင်ခဲ့ဘူးတဲ့လား။

ဒါက ဘယ်လိုလုပ် ဖြစ်နိုင်မှာလဲ။

သူတို့ မျိုးရိုးဗီဇ ပြန်လည်ဖွဲ့စည်းခြင်း အဆင့်ကို ကျော်ဖြတ်ပြီးနောက်ပိုင်းတွင် သဘောတရားတစ်ခုကို နားလည်ခဲ့ကြသည်။

ထိုအရာမှာ လူသားပုံစံတွင် အဓိက အရည်အသွေး လေးခုစလုံး၌ အကန့်အသတ် ရှိနေခြင်းပင် ဖြစ်သည်။

အမှတ် ၁၀၀ ဆိုသည်မှာ အထွတ်အထိပ်သို့ ရောက်ရှိနေပြီဖြစ်ပြီး မည်မျှပင် အစွမ်းထက်စေကာမူ ၁၀ မှတ် ၂၀ မှတ်ခန့်သာ ထပ်တိုးနိုင်တော့သည်။

မျိုးရိုးဗီဇ ပြန်လည်ဖွဲ့စည်းခြင်း အဆင့်ရောက်မှသာ ရုပ်ပိုင်းဆိုင်ရာ ကန့်သတ်ချက်များကို ချိုးဖျက်နိုင်ပြီး ဗီဇအတွင်းရှိ ငုပ်လျှိုးနေသော စွမ်းရည်များကို ထုတ်လွှတ်နိုင်ကာ စွမ်းအားများလည်း ကောင်းကင်နှင့်မြေကြီးပမာ ကြီးမားသော ပြောင်းလဲမှုများ ဖြစ်ပေါ်လာနိုင်ခြင်း ဖြစ်သည်။

ထို့ကြောင့်ပင် သူတို့က စတင်တိုက်ခိုက်သည်နှင့် မျိုးရိုးဗီဇ ပြန်လည်ဖွဲ့စည်းခြင်း ပုံစံကို တိုက်ရိုက် အသုံးပြုခဲ့ကြခြင်း ဖြစ်သည်။

သို့သော် တစ်ဖက်လူကမူ အစမှအဆုံးတိုင်အောင် လူသားပုံစံဖြင့်သာ တိုက်ခိုက်နေခဲ့သည်။

ထို့အပြင် လူသားပုံစံဖြင့်ပင် သူတို့ကို အလွယ်တကူ ဆုတ်ခွာသွားအောင် ဖိအားပေးနိုင်ခဲ့သေးသည်။

ဤအရာက လုံးဝ ယုတ္တိမတန်လှပေ... သူတို့၏ ခန့်မှန်းချက်များကို လုံးဝ ကျော်လွန်နေခဲ့ပြီ ဖြစ်သည်။

ယခုအခါ တစ်ဖက်လူ၏ ခန္ဓာကိုယ် ကြီးထွားလာမှုက သူမ၏ မျိုးရိုးဗီဇ ပြန်လည်ဖွဲ့စည်းခြင်း ပုံစံကို စတင်ထုတ်ဖော်နေပြီဖြစ်ကြောင်း ပြသနေပုံရသည်။

စွမ်းအားများ ရူးသွပ်စွာ နှစ်ဆတိုးလာသော ဤအခြေအနေမျိုးတွင် သူတို့သုံးဦးမှာ အလွန်အမင်း အားနည်းသွားသကဲ့သို့ ခံစားနေရသည်။

"ဘယ်လိုလုပ်ပြီး ဒီလိုဖြစ်ရတာလဲ... သူက ပိုပိုပြီး အစွမ်းထက်လာနေတယ်"

"ဒါက တကယ် ဘာတွေဖြစ်နေတာလဲ"

"ခေါင်းဆောင်တင်း... ဆရာလင်းကော ဘယ်မှာလဲ" ဟု ထူလုံက အလျင်အမြန် မေးလိုက်သည်။

တင်းယန်က အံကြိတ်လိုက်ပြီး အရပ် ပေ ၁၀၀ နီးပါးခန့် ကြီးထွားလာသော လင်ယွီရုံကို စူးစိုက်ကြည့်နေလိုက်သည်။

"သူ တံခါးပိတ် လေ့ကျင့်နေတယ်"

"ဘာပဲဖြစ်ဖြစ်... ငါတို့ တောင့်ခံထားရမယ်... အနည်းဆုံးတော့ သူထွက်လာတဲ့အထိ တောင့်ခံထားမှဖြစ်မယ်"

ထူလုံက ထိုစကားကို ကြားသောအခါ မျက်လုံးထဲတွင် လေးနက်သော အရိပ်အယောင်များ ပေါ်လာပြီး အံကြိတ်ကာ ပြန်ပြောလိုက်သည်။ "သိပြီ"

လီရှန်ယန်က တောင်ပံများကို ခါရမ်းကာ သန္ဓေပြောင်းစွမ်းအင်များကို လည်ပတ်စေလိုက်ပြီး အေးခဲတောင့်တင်းနေသော အခြေအနေမှ မနည်းရုန်းထွက်ကာ ပြန်လည် နလန်ထူလာနိုင်ခဲ့သည်။

သူက အသက်ပြင်းပြင်း တစ်ချက်ရှူလိုက်ပြီး... "ဒါဆိုလည်း ဒီမိစ္ဆာမနဲ့ အသေအကြေ ချကြတာပေါ့"

"အရမ်းကြီး စိတ်ဓာတ်မကျပါနဲ့... ကျွန်မတို့ချည်းပဲ တိုက်ခိုက်နေတာ မဟုတ်ဘူးလေ"

တင်းယန်က ရုတ်တရက် အေးစက်စက် ပြုံးလိုက်ပြီး ခြေအောက်ရှိ ထိုက်ယန်တောင်ကို ငုံ့ကြည့်လိုက်သည်။

ထိုက်ယန်တောင်၏ စွမ်းအင် အကာအကွယ်မှာ ပုံစံ လုံးဝ ပြောင်းလဲသွားသည်ကို မြင်လိုက်ရ၏။

မူလက လိပ်ခွံပုံသဏ္ဌာန် ရှိနေခဲ့ရာမှ ယခုအခါ စက်ဝိုင်းခြမ်းပုံသဏ္ဌာန် လှိုင်းဂယက်လေးများ တစ်ခုပြီးတစ်ခု ထွက်ပေါ်လာသည်။

ဤစက်ဝိုင်းခြမ်းပုံသဏ္ဌာန် လှိုင်းဂယက်ပေါင်း စုစုပေါင်း (၄၉) ခု ရှိလေသည်။

ထိုက်ယန်တောင်၏ မတူညီသော အရပ်မျက်နှာများကို ကိုယ်စားပြုနေခြင်းပင်။

ထူလုံက အံ့သြသွားပြီး အလျင်အမြန် မေးလိုက်သည်။ "အဲဒါ ဘာကြီးလဲ"

"သုတေသနနဲ့ ဖွံ့ဖြိုးရေး ဌာနက နောက်ဆုံး တီထွင်ထားတဲ့ အစီအရင်... ကောင်းကင်ချိတ်ပိတ်အမြောက် ပဲ" ဟု တင်းယန်က အေးစက်စက် ပြုံးကာ ပြောလိုက်သည်။

လီရှန်ယန်နှင့် ထူလုံတို့က တစ်ယောက်မျက်နှာ တစ်ယောက် ကြည့်လိုက်ကြပြီး နှစ်ဦးစလုံး အံ့အားသင့်သွားကြသည်။

ကောင်းကင်ချိတ်ပိတ်အမြောက် ဟုတ်လား။

သူတို့က သုတေသနနဲ့ ဖွံ့ဖြိုးရေး ဌာနမှ ဝန်ထမ်းများ မဟုတ်ကြသဖြင့် ထိုဌာန၏ နည်းပညာများကို သေချာ မသိကြသည်မှာ သဘာဝပင်။

"သွားမယ်... မြန်မြန် ဆုတ်ကြ"

တင်းယန်က စကားအပို မပြောတော့ဘဲ ထိုနှစ်ဦးကို ဆွဲကာ ချက်ချင်း နောက်ဆုတ်လိုက်ပြီး အကာအရံထဲသို့ လျင်မြန်စွာ ဝင်ရောက် ပုန်းခိုသွားတော့သည်။

ယခုအချိန်တွင် ကောင်းကင်ယံထက်မှ လင်ယွီရုံသည် ပေ ၁၁၀ ခန့်ရှိသော ဧရာမ ပုံသဏ္ဌာန်ကြီးအဖြစ် လုံးဝ ပြောင်းလဲသွားခဲ့ပြီ ဖြစ်သည်။

ယခု သူမ၏ မျက်နှာသွင်ပြင်မှာ မူလမျက်နှာအတိုင်း ရှိနေသေးသော်လည်း နဖူးပေါ်တွင် အနီရောင် အကြေးခွံတစ်ခုက ကျောက်မျက်ရတနာ တစ်ပါးအလား တောက်ပနေလေသည်။

သူမ၏ ဆံပင်များမှာမူ ရေခဲပြာရောင်အဖြစ် ပြောင်းလဲသွား၏။

သူမ၏ ခန္ဓာကိုယ် အောက်ပိုင်းသည် ငါးအမြီးတစ်ခုအဖြစ် ပြောင်းလဲသွားသည်ကို မြင်လိုက်ရသည်။

တစ်ကိုယ်လုံးမှ ကြောက်မက်ဖွယ် ရေခဲအအေးဓာတ်များ ပျံ့နှံ့ထွက်ပေါ်နေသည်။

မူလက ရေခဲမိုးအဖြစ် ပြောင်းလဲနေပြီဖြစ်သော ကောင်းကင်ယံသည် သူမ၏ ခန္ဓာကိုယ်မှ ထွက်ပေါ်လာသော အအေးဓာတ်ကြောင့် နှင်းပွင့်များအဖြစ် ထပ်မံ ပြောင်းလဲကာ ကျဆင်းလာတော့သည်။

၁ မိုင် ၂ မိုင် အတွင်းရှိ ပတ်ဝန်းကျင် တစ်ခုလုံး၏ အပူချိန်မှာ ဖာရင်ဟိုက် အနှုတ် ၅၀ ခန့်အထိ ချက်ချင်း ကျဆင်းသွားလေသည်။

သူမ၏ ခန္ဓာကိုယ် အရွယ်အစား ပြောင်းလဲသွားသည်နှင့်အမျှ သူမလက်ထဲရှိ ရေခဲဓားရှည်ကြီးသည်လည်း ရေခဲများဖြင့် တစ်ဖန် ပြန်လည် စုစည်းသွားကာ အလွန် ဧရာမကြီးမားသော ရေခဲဓားကြီးအဖြစ် ပြောင်းလဲသွားသည်ကို မြင်လိုက်ရ၏။

"ထိုက်ယန်တောင်လို ပမွှားလေးကများ နတ်ဘုရားကို ပြန်ဆန့်ကျင်ရဲတယ်ပေါ့"

"လင်းယွမ်... နတ်ဘုရားရဲ့ ဒေါသကို ခံစားလိုက်စမ်း"

လင်ယွီရုံ၏ မျက်နှာထားက အေးစက်နေပြီး အတိုင်းအဆမရှိသော အာဏာစက်ဖြင့် အော်ဟစ် ကြိမ်းမောင်းလိုက်သည်။

လက်ထဲရှိ ရေခဲဓားကို ထိုက်ယန်တောင် အကာအရံဆီသို့ အရှိန်ပြင်းပြင်းဖြင့် စိုက်ချလိုက်လေသည်။

တစ်ချိန်တည်းမှာပင် ထိုက်ယန်တောင် အကာအရံအထက်ရှိ လှိုင်းဂယက်ပုံသဏ္ဌာန် စက်ဝိုင်းများမှ အလင်းတန်းများ ရုတ်တရက် လင်းလက်လာသည်။

"ဘုန်း... ဘုန်း... ဘုန်း"

နောက်တစ်ခဏတွင် ထိုစက်ဝိုင်းများထဲမှ အလင်းတိုင်များ ချက်ချင်း လင်းထိန်လာပြီး အရှိန်ပြင်းစွာ ပေါက်ကွဲထွက်ပေါ်လာကာ ကောင်းကင်ယံရှိ လင်ယွီရုံဆီသို့ တိုက်ရိုက် ပစ်ခတ်သွားတော့၏။

လင်ယွီရုံက အထင်သေးစွာဖြင့် ပြုံးလိုက်ပြီး လက်ထဲရှိ ရေခဲဓားကို အနည်းငယ်မျှပင် တုံ့ဆိုင်းခြင်းမရှိဘဲ ဆက်လက် စိုက်ချလိုက်သည်။

"ဒုန်း... ဒုန်း... ဒုန်း"

ရေခဲဓားနှင့် မရေမတွက်နိုင်သော အလင်းတိုင်များ ဝင်တိုက်မိသွားရာ မျက်စိတစ်မှိတ်အတွင်းမှာပင် ကြောက်မက်ဖွယ် ပေါက်ကွဲသံကြီး ချက်ချင်း ထွက်ပေါ်လာလေသည်။

နောက်တစ်ခဏတွင် အလင်းတိုင်များမှ သင်္ကေတပေါင်း မြောက်မြားစွာ ပေါက်ကွဲထွက်လာပြီး ကောင်းကင်ယံတွင် ဧရာမ သင်္ကေတပိုက်ကွန်ကြီး တစ်ခုအဖြစ် အံ့ဩဖွယ် စုစည်းသွားတော့၏။

ထို ဧရာမ သင်္ကေတပိုက်ကွန်ကြီးမှာ အနီရင့်ရောင် အလင်းတန်းများ တောက်ပနေသည်။

ပိုက်ကွန်ကြီး ထွက်ပေါ်လာသည်နှင့်အမျှ ကောင်းကင်ယံရှိ သန္ဓေပြောင်းစွမ်းအင်များ အားလုံး လျင်မြန်စွာ လျော့ကျပျောက်ကွယ်သွားသည်ကို မြင်လိုက်ရသည်။

ပိုက်ကွန်ကြီးထဲတွင် ရှိနေသော ရေခဲဓားကြီးသည်လည်း မျက်စိဖြင့် မြင်နိုင်သော အမြန်နှုန်းဖြင့် လျင်မြန်စွာ ပျောက်ကွယ်သွားလေတော့သည်။

ရေခဲဓားကို ကိုင်ဆောင်ထားသော လင်ယွီရုံပင်လျှင် ပုံမှန်မဟုတ်သော အခြေအနေကို ခံစားလိုက်ရပြီး သူမ၏ ခန္ဓာကိုယ်တွင်းရှိ ရေခဲဓာတ် စွမ်းအင်များ အလျင်အမြန် ပျောက်ကွယ်နေလေပြီ။

"ချိတ်ပိတ် သင်္ကေတအစီအရင်"

လင်ယွီရုံ၏ မျက်နှာ အကြီးအကျယ် ပျက်ယွင်းသွားပြီး မယုံကြည်နိုင်သော အရိပ်အယောင်များ ပေါ်လာသည်။

သူမက ဤမျှလောက် ဟန်မဆောင်နိုင်သော အမူအရာမျိုးကို ပထမဆုံးအကြိမ် ပြသလိုက်ခြင်းဖြစ်ပြီး စောစောက ရှိနေခဲ့သော မောက်မာရိုင်းစိုင်းသည့် အရှိန်အဝါမျိုး မရှိတော့ပေ။

"ဝှစ်"

လင်ယွီရုံက အပေါ်သို့ အားကုန် ခုန်တက်လိုက်ပြီး စွမ်းအင်ချိတ်ပိတ် အစီအရင် လုံးဝ အသက်မဝင်လာခင်လေးမှာပင် အစီအရင် အပြင်ဘက်သို့ လျင်မြန်စွာ ခုန်ထွက်သွားလေသည်။

သို့သော် သူမ၏ လှုပ်ရှားမှုက မြန်ဆန်လှသော်လည်း လက်ထဲရှိ ရေခဲဓားကြီးမှာမူ အစီအရင်၏ လုံးဝ ချိတ်ပိတ်အရည်ပျော်ခြင်းကို ခံလိုက်ရကာ သာမန် ဓားရှည်တစ်လက်အဖြစ် ပြောင်းလဲသွားပြီး ထိုက်ယန်တောင်ထဲသို့ ပြုတ်ကျသွားတော့၏။

ကောင်းကင်ယံတွင် ရှိနေသော လင်ယွီရုံသည် သူမ၏ မူလပုံစံသို့ ပြန်လည်ရောက်ရှိသွားပြီး မျက်နှာထားမှာ အလွန် အရုပ်ဆိုး အကျည်းတန်နေလေသည်။

"သခင်မ"

ဘေးနားရှိ ရေခဲပြာရောင် ချပ်ဝတ်တန်ဆာနှင့် အမျိုးသားသည်လည်း မျက်နှာတစ်ခုလုံး မယုံကြည်နိုင်သော အရိပ်အယောင်များဖြင့် ပြည့်နှက်နေပြီး "ရှေးခေတ်က ချိတ်ပိတ် သင်္ကေတကို သူတို့တွေ တီထွင်နိုင်ခဲ့ပြီလား"

လင်ယွီရုံက အသက်ပြင်းပြင်း တစ်ချက်ရှူလိုက်ပြီး ရင်ထဲမှ ဒေါသများကို ဖိနှိပ်ကာ "ချိတ်ပိတ် သင်္ကေတဆိုတာ ချိတ်ပိတ်ရေညှိပင်တွေဆီကနေ လာတာ... ဝိညာဉ်စွမ်းအင် အားလုံးကို ချိတ်ပိတ်နိုင်စွမ်း ရှိတယ်"

"သူတို့တွေ ချိတ်ပိတ် သင်္ကေတတွေကို ရနေလိမ့်မယ်လို့ မထင်ထားဘူး... ကြည့်ရတာ အထဲကို ဝင်သတ်ချင်ရင် ဒီ ချိတ်ပိတ် သင်္ကေတအစီအရင်ကို အရင် ဖျက်ဆီးမှ ရတော့မယ်"

ရှေးဟောင်း အစွမ်းပိုင်ရှင်များထဲတွင် ထိပ်တန်းအဆင့်ဖြစ်သော လင်ယွီရုံအနေဖြင့် စွမ်းအင်ချိတ်ပိတ် သင်္ကေတကို သဘာဝကျစွာပင် သိရှိနေခြင်း ဖြစ်သည်။

သို့သော် သူတို့ခေတ်အခါက စွမ်းအင်ချိတ်ပိတ် သင်္ကေတကို ချိတ်ပိတ် သင်္ကေတဟုသာ ခေါ်ဆိုကြပြီး ဝိညာဉ်စွမ်းအင်များ (ဝါ) သန္ဓေပြောင်းစွမ်းအင်များကို အထူး ချိတ်ပိတ်ရန် အသုံးပြုကြခြင်း ဖြစ်သည်။

စွမ်းအင်ချိတ်ပိတ် သင်္ကေတကို အစောဆုံး မည်သို့ ရှာဖွေတွေ့ရှိခဲ့ကြောင်းကို လင်းယွမ်တို့ လုံးဝ မသိကြပေ။

သို့သော် ဤအရာသည် ချိတ်ပိတ်ရေညှိ ဟုခေါ်သော သန္ဓေပြောင်း အပင်တစ်မျိုး၏ ခန္ဓာကိုယ်အတွင်း၌ ပေါက်ဖွားလာခြင်းဖြစ်ကြောင်းကိုမူ လင်ယွီရုံ ကောင်းကောင်း သိထားသည်။

ချိတ်ပိတ်ရေညှိကို သေမင်းရေညှိ ဟုလည်း ခေါ်ကြပြီး ရေအောက် နက်ရှိုင်းသော နေရာများတွင် ပေါက်ရောက်ကာ ချောက်နက်ကျွန်း အနီးတဝိုက်တွင် တွေ့ရလေ့ရှိပြီး ချောက်နက်ကျွန်းမှ ထွက်ပေါ်လာသော စွမ်းအင်များကို စုပ်ယူကာ ရှင်သန်ကြခြင်း ဖြစ်သည်။

သေချာသည်မှာ... ၎င်းတို့ထဲသို့ မှားယွင်း ဝင်ရောက်လာသော သန္ဓေပြောင်း သတ္တဝါအချို့ကိုလည်း သွေးဆောင် ဖမ်းယူတတ်ကြသည်။

ထို့ကြောင့် ချိတ်ပိတ်ရေညှိများ ပေါက်ရောက်ရာ ဒေသများကို အစွမ်းပိုင်ရှင်များက သေမင်းတမန် နယ်မြေများအဖြစ် သတ်မှတ်လေ့ ရှိကြသည်။

သေချာသည်မှာ... ချိတ်ပိတ်ရေညှိများတွင်လည်း ဖြေရှင်း၍မရသော အရာများ မဟုတ်ပေ။

လင်ယွီရုံ၏ မျက်ဝန်းများတွင် အေးစက်သော အရိပ်အယောင်များ ပေါ်လာပြီး "သူတို့က ဒီလို ချိတ်ပိတ် သင်္ကေတအစီအရင်ကို သုံးပြီး သန္ဓေပြောင်းစွမ်းအင် အားလုံးကို ကန့်သတ်နိုင်ပေမယ့်... ကိုယ်ရဲ့ ရုပ်ပိုင်းဆိုင်ရာ ခွန်အားကိုတော့ မကန့်သတ်နိုင်ဘူး"

"အထူးသဖြင့် မျိုးရိုးဗီဇ ပြန်လည်ဖွဲ့စည်းခြင်း အဆင့်ရောက်ပြီးရင်... သန္ဓေပြောင်းစွမ်းအင် မလည်ပတ်နိုင်တော့ရင်တောင် မျိုးရိုးဗီဇ ပြန်လည်ဖွဲ့စည်းပြီးတဲ့ ရုပ်ပိုင်းဆိုင်ရာ ခွန်အား သက်သက်နဲ့တင်... ဒီ ပုရွက်ဆိတ် အကောင်မွှားလေးတွေကို ငါ အပြတ်ရှင်းပစ်နိုင်သေးတယ်"

"သခင်မ... လုံးဝ မဖြစ်ပါဘူး... သခင်မက အဖိုးတန်လှတဲ့ ခန္ဓာကိုယ် ပိုင်ရှင်ပါ... ဒီလို အန္တရာယ်မျိုးကို ဘယ်လိုလုပ် စွန့်စားနိုင်မှာလဲ... ကျွန်တော်မျိုးကပဲ ကိုယ်စား ဝင်ရောက်ပြီး ဒီအစီအရင်ကို ဖျက်ဆီးပေးပါ့မယ်"

ချပ်ဝတ်တန်ဆာနှင့် အမျိုးသားက လင်ယွီရုံကို အလျင်အမြန် တားဆီးလိုက်သည်။

လင်ယွီရုံက သူ့ကို ကြည့်လိုက်ပြီး ခေတ္တ စဉ်းစားကာ "ဒါလည်း ကောင်းတာပဲ... နင်လည်း အခု စွမ်းအားတွေ တော်တော်များများ ပြန်လည် ပြည့်ဝလာပြီဆိုတော့... မျိုးရိုးဗီဇ ပြန်လည်ဖွဲ့စည်းခြင်း အဆင့်က ဘယ်လောက်အထိ ရောက်နေပြီလဲ"

"၂၃ ရာခိုင်နှုန်းကို ရောက်နေပါပြီ"

"ကောင်းပြီ... ဒါဆိုရင် နင်ဝင်သွားပြီး ငါ့ရဲ့ စိတ်ဝိညာဉ်အမှတ်အသား ဝင်ပူးထားတဲ့ ခန္ဓာကိုယ်ကို ဖမ်းခေါ်လာခဲ့"

"စောစောက သုံးယောက်လုံးက ကျွန်တော့်ရဲ့ ပြိုင်ဘက်တွေ မဟုတ်ပါဘူး... သူတို့ရဲ့ မျိုးရိုးဗီဇ ပြန်လည်ဖွဲ့စည်းခြင်း အဆင့်တွေက ၂၀ ရာခိုင်နှုန်းကိုတောင် ကျော်တဲ့သူ တစ်ယောက်မှ မရှိပါဘူး... သခင်မ စိတ်ချလက်ချသာ နေပါ" ဟု ချပ်ဝတ်တန်ဆာနှင့် အမျိုးသားက လေးနက်သော အသံဖြင့် ပြောလိုက်သည်။

လင်ယွီရုံက ခေါင်းညိတ်လိုက်ပြီး "နင့်ဆီက သတင်းကောင်းကို ငါစောင့်နေမယ်"

ချပ်ဝတ်တန်ဆာနှင့် အမျိုးသားက ကိုယ်ကို တစ်ချက် လှုပ်ယမ်းလိုက်ရာ မျက်စိတစ်မှိတ်အတွင်းမှာပင် ဧရာမ ခြင်္သေ့ဖြူကြီး တစ်ကောင်အဖြစ် ပြောင်းလဲသွားတော့၏။

၎င်းမှာ သူ၏ မျိုးရိုးဗီဇမြေပုံဖြစ်သော နှင်းရေခဲ ခြင်္သေ့ရိုင်း ပင် ဖြစ်သည်။

ရေခဲဓာတ် အမျိုးအစား ဖြစ်သော်လည်း တကယ်တမ်းတွင်မူ ခွန်အားပိုင်းကို ပိုမို အားသန်လေသည်။

လင်းယွမ်၏ ရေခဲမြေရိုင်းဝက်ဝံ မျိုးရိုးဗီဇပုံစံနှင့် အနည်းငယ် ဆင်တူလှသည်။

အဓိက အရည်အသွေးမှာ စိတ်စွမ်းအင် ဖြစ်သော်လည်း ဒုတိယ အရည်အသွေးမှာမူ တကယ်တမ်းတွင် ခွန်အားပင် ဖြစ်၏။

လင်းယွမ်အနေဖြင့် ကြယ်ရေခဲဘောလုံး အစွမ်းကို အသုံးမပြုလျှင်ပင် ရေခဲမြေရိုင်းဝက်ဝံ၏ ရုပ်ပိုင်းဆိုင်ရာ ခွန်အားသက်သက်ကို အားကိုးရုံဖြင့် ကြီးမားသော ဖျက်ဆီးမှုစွမ်းအားကို ဖြစ်ပေါ်စေနိုင်ပေသည်။

ယခု ချပ်ဝတ်တန်ဆာနှင့် အမျိုးသား၏ နှင်းရေခဲ ခြင်္သေ့ရိုင်း မျိုးရိုးဗီဇမြေပုံသည်လည်း အလားတူ အာနိသင်မျိုး ရှိလေသည်။

ထို့ကြောင့်ပင် သူက ကိုယ်တိုင် တာဝန်ယူကာ အစီအရင်ထဲသို့ တစ်ကိုယ်တော် ဝင်ရောက်ရန် တောင်းဆိုခဲ့ခြင်း ဖြစ်သည်။

အဘယ်ကြောင့်ဆိုသော် သူ၏ သန္ဓေပြောင်းစွမ်းအင်များကို ချိတ်ပိတ်ခံထားရလျှင်ပင် နှင်းရေခဲ ခြင်္သေ့ရိုင်း၏ ရုပ်ပိုင်းဆိုင်ရာ ကြံ့ခိုင်မှုက အလွန်တရာ ကြောက်မက်ဖွယ် ကောင်းနေသောကြောင့် ဖြစ်၏။

အရပ် ပေ ၇၀ ကျော်ခန့်ရှိသော ထို ဧရာမ ခြင်္သေ့ဖြူကြီးက အပေါ်သို့ တစ်ချက် ခုန်တက်လိုက်ပြီး ထိုက်ယန်တောင်၏ ကောင်းကင်ချိတ်ပိတ်အမြောက် အစီအရင်ဆီသို့ တိုက်ရိုက် ဝင်တိုက်လိုက်သည်ကို မြင်လိုက်ရသည်။

"ဝုန်း"

ဧရာမ ခန္ဓာကိုယ်ကြီးက ထိုက်ယန်တောင်၏ သစ်တောအုပ်ထဲသို့ ဝင်တိုက်မိသွားရာ ချက်ချင်းပင် ကျောက်ဆောင်များ ကွဲအက်သွားပြီး သစ်ပင်များ ပြိုလဲကုန်တော့သည်။

နှင်းရေခဲ ခြင်္သေ့ရိုင်းက ခေါင်းမော့ကာ ကျယ်လောင်စွာ ဟိန်းဟောက်လိုက်လေသည်။

"ဝေါင်း"

နောက်တစ်ခဏတွင် ၎င်းက အားကုန် ခုန်ပျံလိုက်ပြီး ထိုက်ယန်တောင် ဈေးဝယ်စင်တာ အဆောက်အအုံဘက်သို့ ချက်ချင်း ပြေးဝင်သွားတော့၏။

ကောင်းကင်ချိတ်ပိတ်အမြောက် အစီအရင် အပြင်ဘက်ရှိ ထိုက်ယန်တောင် ကောင်းကင်ယံတွင် ရပ်နေသော လင်ယွီရုံသည် နတ်ဘုရားတစ်ပါးအလား အောက်ဘက်သို့ စူးစိုက်ကြည့်နေပြီး သူမ၏ မျက်ဝန်းအိမ်များထဲတွင်မူ အေးစက်သော သတ်ဖြတ်လိုစိတ်များသာ ပြည့်နှက်နေလေသည်။

"လင်းယွမ်... နင်က ငါ့ရဲ့ စိတ်ဝိညာဉ်အမှတ်အသားကို ထိခိုက်အောင် လုပ်ရဲတယ်ပေါ့လေ... နင့်ရဲ့ ခြေကုပ်စခန်းကို ငါ အပြတ်ရှင်းပစ်မယ်"

သူမ၏ မျက်နှာပေါ်တွင် ရက်စက်ကြမ်းကြုတ်သော အရိပ်အယောင်များ ပေါ်လာပြီး ထိုက်ယန်တောင် အစီအရင်ကို ဝေ့ကြည့်လိုက်သည်။

တစ်စုံတစ်ယောက် အပြင်သို့ ထွက်ပြေးလွတ်မြောက်လာခဲ့သည် ရှိသော်... သူမက ဤပုရွက်ဆိတ် အကောင်မွှားလေးများကို အပြစ်ပေးရန်အတွက် နတ်ဘုရား၏ ပြစ်ဒဏ်ကို မလွဲမသွေ ကျရောက်စေမည်သာ ဖြစ်လေသည်။

ဆက်ရန်...

အပိုင်း (၇၁၆) ဒုံးကျည်ဖြင့် ခြင်္သေ့ရိုင်းကို သတ်ဖြတ်ခြင်း

"ဝင်လာပြီ"

"တကယ်ကြီး ဝင်လာရဲသေးတယ်ပေါ့"

တောအုပ်ထဲတွင် တင်းယန်... ထူလုံနှင့် လီရှန်ယန်တို့ သုံးဦး၏ မျက်နှာအမူအရာ အနည်းငယ် ပြောင်းလဲသွားသည်။

သူတို့သုံးဦးစလုံး နှင်းရေခဲ ခြင်္သေ့ရိုင်းကြီး အစီအရင်ထဲသို့ တဟုန်ထိုး ဝင်ရောက်လာသည်ကို ခံစားလိုက်ရ၏။

ထူလုံက မနေနိုင်ဘဲ ပြောလိုက်သည်။ "ဒီကောင်က ချိတ်ပိတ်အစီအရင်ရဲ့ အားနည်းချက်ကို သိနေတဲ့ပုံပဲ... မျိုးရိုးဗီဇ ပြန်လည်ဖွဲ့စည်းခြင်း အသွင်နဲ့ အစီအရင်ထဲကို တိုက်ရိုက် ဝင်လာတာ"

လီရှန်ယန်က ထိုအကြောင်းရင်းကို နားမလည်သဖြင့် ဝင်မေးလိုက်သည်။ "ဘာလို့ ချိတ်ပိတ်အစီအရင်က မျိုးရိုးဗီဇ ပြန်လည်ဖွဲ့စည်းခြင်းကို မတားဆီးနိုင်တာလဲ"

"မျိုးရိုးဗီဇ ပြန်လည်ဖွဲ့စည်းခြင်းက သန္ဓေပြောင်းအစွမ်း တစ်မျိုး မဟုတ်လို့လား"

တင်းယန်က ရှင်းပြလိုက်သည်။ "မျိုးရိုးဗီဇ ပြန်လည်ဖွဲ့စည်းခြင်းဆိုတာ ခန္ဓာကိုယ်ပိုင်းဆိုင်ရာ ပြောင်းလဲမှု သက်သက်ပဲ... တကယ်တမ်းမှာ သန္ဓေပြောင်းစွမ်းအင်ကို အသုံးပြုထားတာ မဟုတ်ဘူး"

"ချိတ်ပိတ် သင်္ကေတရဲ့ အာနိသင်က သန္ဓေပြောင်းစွမ်းအင် စီးဆင်းလည်ပတ်မှုကို တားဆီးပိတ်လှောင်ဖို့ပဲ... သူက အထဲမဝင်လာခင် ကတည်းက မျိုးရိုးဗီဇ ပြန်လည်ဖွဲ့စည်းခြင်း အသွင်ကို ပြောင်းထားမယ်ဆိုရင်... အထဲရောက်သွားရင်တောင် အဲဒီအသွင်ကို ဆက်ထိန်းထားနိုင်ပြီး သူ့ရဲ့ ရုပ်ပိုင်းဆိုင်ရာ ခန္ဓာကိုယ်ကို ဘာမှထိခိုက်စေမှာ မဟုတ်ဘူး"

"ဒါပေမဲ့ ဒီအသွင်နဲ့ဆိုရင်လည်း သူ့ခန္ဓာကိုယ်ထဲက သန္ဓေပြောင်းစွမ်းအင်တွေကိုတော့ ထုတ်သုံးလို့ ရမှာ မဟုတ်သေးဘူး"

"အခု သူက မျိုးရိုးဗီဇ ပြန်လည်ဖွဲ့စည်းခြင်း အသွင်ကရတဲ့ ရုပ်ပိုင်းဆိုင်ရာ အားသာချက်ကို သုံးပြီး ငါတို့ရဲ့ ထိုက်ယန်တောင်ကို အတင်း ဝင်တိုက်ဖို့ ကြံနေတာ"

ထူလုံက ချက်ချင်းပင် လှောင်ပြုံး ပြုံးလိုက်သည်။ "တော်တော် စိတ်ကူးယဉ်နိုင်တဲ့ ကောင်ပဲ... ငါတို့ ပိုင်နက်ထဲ ရောက်နေတာတောင် ရုပ်ပိုင်းဆိုင်ရာ ခွန်အားသက်သက်နဲ့ ငါတို့ကို အနိုင်ယူချင်နေသေးတာလား"

"သုတေသနနဲ့ ဖွံ့ဖြိုးတိုးတက်ရေး ဌာနမှာ သန္ဓေပြောင်းအစွမ်းသုံး လက်နက်တွေပဲ ရှိတာ မဟုတ်ဘူးကွ"

တင်းယန်က ပြောလိုက်သည်။ "ကျွန်မနဲ့ ထူလုံရဲ့ အဓိက အရည်အသွေးက ခန္ဓာကိုယ်ကြံ့ခိုင်မှု အမျိုးအစားတွေဆိုတော့ ကျွန်မတို့ သွားပြီး သူ့ကို ဟန့်တားထားမယ်... ရှန်ယန်... လက်နက်စက်ရုံက အမြောက်တွေနဲ့ သေချာ ချိန်ထားခိုင်းလိုက်"

လီရှန်ယန်က ချက်ချင်း ခေါင်းညိတ်လိုက်သည်။ "ကောင်းပြီ"

ထို့နောက် တင်းယန်နှင့် ထူလုံတို့၏ သွေးသားခွန်အားများ တုန်ခါသွားပြီး မျိုးရိုးဗီဇ ပြန်လည်ဖွဲ့စည်းခြင်းကို စတင်လိုက်ကြသည်။

မျက်စိတစ်မှိတ်အတွင်းမှာပင် သူတို့နှစ်ဦးသည် မျိုးရိုးဗီဇမြေပုံ အသွင်သို့ တိုက်ရိုက် ပြောင်းလဲသွားကြတော့၏။

ကျောဘက်တွင် အတောင်ပံတစ်စုံ ပါရှိပြီး လူနှင့်ဆင်တူသော လီနီယာ စွမ်းအင်သားရဲ တစ်ကောင်က တောအုပ်ထဲတွင် အရှိန်အဟုန်ဖြင့် ပြေးလွှားသွားသည်။

ထို့အတူ လူနှင့်ဆင်တူသော အသွင်ရှိပြီး ကြွက်သားများ ဖောင်းကားကာ တစ်ကိုယ်လုံး တက်တူးများဖြင့် ပြည့်နှက်နေသည့် တက်တူးဝိညာဉ်နတ်ဆရာ တစ်ပါးကလည်း အနောက်မှ ထပ်ကြပ်မကွာ လိုက်ပါသွားသည်။

တစ်ခုတည်းသော ကွာခြားချက်မှာ သူတို့၏ ခန္ဓာကိုယ်ပေါ်တွင် မည်သည့် ဝိညာဉ်အလင်းရောင်နှင့် မြူခိုးမည်းများမျှ ထွက်ပေါ်နေခြင်း မရှိခြင်းပင်။

သန္ဓေပြောင်းစွမ်းအင်ကို အသုံးပြု၍ မရသဖြင့် အကြမ်းတမ်းဆုံးသော ရုပ်ပိုင်းဆိုင်ရာ ခန္ဓာကိုယ် သက်သက်ဖြင့်သာ တိုက်ခိုက်ရမည် ဖြစ်သည်။

"ဝုန်း"

မကြာမီမှာပင် တောအုပ်ထဲမှ ပြင်းထန်သော ပေါက်ကွဲသံကြီးများ ထွက်ပေါ်လာတော့သည်။

တောင်ပေါ်မှ ကျောက်တုံးများ ပြိုကျလာပြီး သစ်ပင်ကြီးများ ယိမ်းယိုင်လဲကျကုန်၏။

ဧရာမ သားရဲကြီး သုံးကောင်သည် တောအုပ်ထဲတွင် ရူးသွပ်စွာ ဝင်တိုက်မိကြလေသည်။

နှင်းရေခဲ ခြင်္သေ့ရိုင်းက ကျယ်လောင်စွာ ဟိန်းဟောက်လိုက်ပြီး လီနီယာ စွမ်းအင်သားရဲဆီသို့ ပြေးဝင်ကိုက်ခဲလိုက်သည်။

သို့သော် လီနီယာ စွမ်းအင်သားရဲက ခြင်္သေ့ရိုင်း၏ ခေါင်းကို လက်နှစ်ဖက်ဖြင့် အားကုန် ဖိနှိပ်ထားလိုက်၏။

နှစ်ဖက် အားပြိုင်ကြရာတွင် နှင်းရေခဲ ခြင်္သေ့ရိုင်း၏ ခွန်အားက လီနီယာ စွမ်းအင်သားရဲထက် သိသိသာသာ ပိုမိုကြီးမားနေသည်။

ခြင်္သေ့ရိုင်းက ၎င်း၏ ခေါင်းကို ရုတ်တရက် ရမ်းခါလိုက်ပြီး တစ်ချိန်တည်းမှာပင် ထက်ရှသော ခြေသည်းကြီးဖြင့် လီနီယာ စွမ်းအင်သားရဲ၏ ဦးခေါင်းကို အားကုန် ရိုက်ချလိုက်သည်။

လီနီယာ စွမ်းအင်သားရဲမှာ ခြေမခိုင်တော့ဘဲ ညာဘက်သို့ ယိမ်းယိုင်လဲကျသွားတော့၏။

ထိုအချိန်မှာပင် တက်တူးဝိညာဉ်နတ်ဆရာ ရောက်ရှိလာပြီး ပခုံးစောင်းကာ အရှိန်ပြင်းပြင်းဖြင့် ဝင်တိုက်လိုက်လေသည်။

"ဘုန်း"

ပြင်းထန်လှသော ဝင်တိုက်မှု အရှိန်ကြောင့် နှင်းရေခဲ ခြင်္သေ့ရိုင်းမှာ ချက်ချင်း လွင့်စဉ်လူးလှိမ့်သွားပြီး ဧရာမ သစ်ပင်ကြီး ဆယ်ပင်ကျော်ခန့်ကို ရိုက်ချိုးမိသွားတော့သည်။

နှင်းရေခဲ ခြင်္သေ့ရိုင်းက မြေပြင်ပေါ်တွင် တစ်ပတ်လိမ့်လိုက်ပြီးနောက် ချက်ချင်း ပြန်ထလာရာ ကြီးကြီးမားမား ထိခိုက်ဒဏ်ရာရသွားပုံ မပေါ်ပေ။

ထို့နောက် ၎င်းက လူစကားပြောလာသည်။ "နတ်သားရဲမြေပုံ အဆင့်ကို အခုမှ ရောက်ခါစ အမှိုက်ကောင်တွေကများ ငါ့သခင်မကို မလေးမစား လုပ်ရဲတယ်ပေါ့လေ"

"ငါ့သခင်မ ကိုယ်တိုင် ပါစရာတောင် မလိုဘူး... ဒီနေ့ ငါ ခြင်္သေ့ရိုင်းက မင်းတို့ကို တစ်စစီ ဆွဲဖြဲပစ်မယ်"

လီနီယာ စွမ်းအင်သားရဲက လှောင်ပြုံး ပြုံးလိုက်သည်။ "မင်းရဲ့ ခေါင်းပေါ်ကို အရင်ကြည့်လိုက်ပါဦး"

နှင်းရေခဲ ခြင်္သေ့ရိုင်း အံ့ဩသွားပြီး မသိစိတ်အရ ခေါင်းမော့ကြည့်လိုက်မိ၏။

ထိုအခါ မီးတောက်များ ပန်းထွက်နေသော အမြီးတန်းတစ်ခုက တဟုန်ထိုး ပြေးဝင်လာသည်ကို တွေ့လိုက်ရသည်။

၎င်း ပြန်လည်တုံ့ပြန်ချိန်ပင် မရလိုက်မီ ထိုအရာက ၎င်း၏ ခေါင်းပေါ်သို့ တည့်တည့်မတ်မတ် ကျရောက်လာလေပြီ။

"ဝုန်း"

ကြောက်မက်ဖွယ် ပေါက်ကွဲသံကြီး ချက်ချင်း ထွက်ပေါ်လာပြီး ဧရာမ မီးလှိုင်းကြီးများ ပေါက်ကွဲထွက်လာကာ ပေါက်ကွဲမှုလှိုင်းဂယက်က အရပ်လေးမျက်နှာသို့ ပြန့်ကျဲသွားတော့သည်။

လီနီယာ စွမ်းအင်သားရဲက အတောင်ပံများကို ဖြန့်ကာ မိမိကိုယ်ကိုယ် ကာကွယ်လိုက်သည်။

တက်တူးဝိညာဉ်နတ်ဆရာကလည်း ထိုနည်းတူပင် လက်နှစ်ဖက်ကို ရင်ဘတ်ရှေ့တွင် ကာထားလိုက်၏။

ပြင်းထန်လှသော ပေါက်ကွဲမှုကြီးကြောင့် သူတို့ကဲ့သို့ ဧရာမ သားရဲကြီးများပင် နောက်သို့ ခြေလှမ်းအနည်းငယ် ဆုတ်သွားရသည်။

မီးတောက်များ ငြိမ်းသွားသောအခါ နှင်းရေခဲ ခြင်္သေ့ရိုင်း ရှိနေခဲ့သော နေရာတွင် ဧရာမ မြေကျင်းနက်ကြီးတစ်ခု ဖြစ်ပေါ်နေသည်ကို တွေ့လိုက်ရလေသည်။

မည်းနက်နေသော ရွှံ့နွံများကြားတွင် ထိုနှင်းရေခဲ ခြင်္သေ့ရိုင်းကြီးက ကျင်းထဲ၌ ပုံရက်သား လဲကျနေပြီး တစ်ကိုယ်လုံး မီးလောင်ကျွမ်းကာ မည်းတူးနေတော့၏။

မူလက နှင်းရေခဲကဲ့သို့ ဖြူဖွေးနေခဲ့သော အမွေးအမှင်များမှာလည်း မီးလောင်၍ မည်းတူးနေလေပြီ။

ယခုအခါ ၎င်းမှာ အရေပြားများ ပေါက်ပြဲကာ အသားစများ လန်ထွက်နေပြီး မိမိကိုယ်ပေါ်မှ ဒဏ်ရာများကိုပင် မယုံနိုင်အောင် ဖြစ်နေရှာသည်။

"ဘယ်လိုလုပ် ဖြစ်နိုင်မှာလဲ... ချိတ်ပိတ် သင်္ကေတ အစီအရင်ထဲမှာ ဝိညာဉ်စွမ်းအင် သုံးလို့မှ မရတာ... မင်း... မင်းတို့ဆီမှာ ဘယ်လိုလုပ်ပြီး ဒီလောက် အစွမ်းထက်တဲ့ လက်နက်တွေ ရှိနေရတာလဲ"

တက်တူးဝိညာဉ်နတ်ဆရာက အနားသို့ လျှောက်လာပြီး လှောင်ပြုံးတစ်ခုဖြင့် ပြောလိုက်သည်။ "ဒီက ရှေးဟောင်းပစ္စည်းကြီး... မင်းက ရှေးခေတ်ကြီးထဲမှာပဲ နေနေတုန်းလား... ဒုံးကျည် ဆိုတာကိုတောင် မသိဘူးလား"

ပြောပြီးသည်နှင့် ၎င်းက ခြေထောက်ကို မြှောက်ကာ တစ်ဖက်လူ၏ မည်းတူးနေသော ခန္ဓာကိုယ်ပေါ်သို့ အားကုန် နင်းချလိုက်တော့သည်။

"ဘုန်း"

"ဘုန်း"

"ဘုန်း"

ပြင်းထန်သော ခြေဖြင့်နင်းချမှု သုံးချက် ဆက်တိုက်ကြောင့် သွေးများ ချက်ချင်း ပန်းထွက်လာပြီး အသားစများမှာ ရွှံ့ဗွက်များကဲ့သို့ ကြေမွသွားတော့၏။

ရှေးခေတ်မှ ရောက်ရှိလာသော ဤအစွမ်းပိုင်ရှင်၊ လင်ယွီရုံ၏ လူယုံလက်ပါးစေကြီးသည် ထိုက်ယန်တောင်ထဲတွင် ဤသို့ပင် သေဆုံးသွားခဲ့ရလေပြီ။

တကယ်တမ်းတွင် သူ၏ သန္ဓေပြောင်းအစွမ်းမှာ မညံ့ဖျင်းလှပေ။ မျိုးရိုးဗီဇ ပြန်လည်ဖွဲ့စည်းခြင်း ၂၀ ရာခိုင်နှုန်း အထက်အထိပင် စွမ်းရည်များ ပြန်လည်ကောင်းမွန်နေခဲ့ပြီ ဖြစ်သည်။

ကောင်းကင်ချိတ်ပိတ် အမြောက်အစီအရင်ထဲတွင် ချိတ်ပိတ် သင်္ကေတ အစီအရင်၏ အထောက်အပံ့များ ပါဝင်နေပြီး သူ၏ အစွမ်းထက်သော သန္ဓေပြောင်းအစွမ်းများကို အသုံးမပြုနိုင်အောင် တားဆီးထားခြင်းသာ မရှိခဲ့ပါက ဤမျှမြန်မြန် ရှုံးနိမ့်သွားမည် မဟုတ်ပေ။

ထို့ပြင် ထိုက်ယန်တောင်ထဲတွင်သာ လင်းယွမ် ကြိုတင်ပြင်ဆင်ထားခဲ့သော ဒုံးကျည်ကဲ့သို့သော ယမ်းမှုန့်သုံး လက်နက်များ မရှိခဲ့ပါက နှင်းရေခဲ ခြင်္သေ့ရိုင်း၏ အစွမ်းထက်လှသော ခွန်အား အရည်အသွေးဖြင့် ချိတ်ပိတ် သင်္ကေတ အစီအရင်ထဲတွင် အလွယ်တကူ ထိုးဖောက် ဝင်ရောက်သွားနိုင်မည် ဖြစ်သည်။

နှမြောစရာ ကောင်းသည်မှာ လင်းယွမ်နှင့် သုတေသနဌာနတို့ ပူးပေါင်းဒီဇိုင်းဆွဲထားသော ဤ ကောင်းကင်ချိတ်ပိတ် အမြောက်အစီအရင်သည် သာမန် ချိတ်ပိတ်ထားရုံ သက်သက်သာဖြစ်ပြီး ပြန်လည်တိုက်ခိုက်မည့် နည်းလမ်းများ မရှိဘဲ ဘယ်လိုလုပ် နေပါမည်နည်း။

ယမ်းမှုန့်သုံး လက်နက်များကို လင်းယွမ်၏ စနစ်ထဲမှနေ၍ အများအပြား လဲလှယ်ဝယ်ယူနိုင်ပေသည်။

ထို့အပြင် အလွန်လည်း ဈေးပေါသေး၏။

ယမ်းမှုန့်သုံး လက်နက်များသည် သန္ဓေပြောင်းအစွမ်းသုံး လက်နက်များလောက် စွမ်းအားမကြီးမားသော်ငြားလည်း။

၎င်းတို့၏ အားသာချက်မှာ သန္ဓေပြောင်းစွမ်းအင်များကို အသုံးပြုရန် မလိုဘဲ ပြင်းထန်သော ဖျက်ဆီးမှုစွမ်းအားကို ဖြစ်ပေါ်စေနိုင်ခြင်းပင် ဖြစ်သည်။

ချိတ်ပိတ် သင်္ကေတ အစီအရင်၏ ဝန်းကျင်အခြေအနေတွင် ဤကဲ့သို့သော ယမ်းမှုန့်သုံး လက်နက်များသည် အလွန် ကြီးမားသော အစုလိုက်အပြုံလိုက် ဖျက်ဆီးရေးလက်နက်များဟုပင် ခေါ်ဆိုနိုင်ပေသည်။

မျိုးရိုးဗီဇ ပြန်လည်ဖွဲ့စည်းပြီးနောက် ဧရာမ သားရဲအသွင်သို့ ပြောင်းလဲသွားလျှင်ပင် သန့်စင်သော ရုပ်ပိုင်းဆိုင်ရာ ခွန်အားသက်သက်ဖြင့် ကာကွယ်ရန် ခက်ခဲလှပေသည်။

နှင်းရေခဲ ခြင်္သေ့ရိုင်းကို သတ်ဖြတ်ပြီးနောက် တင်းယန်တို့ သုံးဦးစလုံးသည်လည်း မျိုးရိုးဗီဇ ပြန်လည်ဖွဲ့စည်းခြင်း အသွင်ကို ရုပ်သိမ်းလိုက်ကြပြီး လူသားခန္ဓာကိုယ် အသွင်သို့ ပြန်လည် ပြောင်းလဲလိုက်ကြသည်။

သူတို့သည် တောင်ပေါ်သို့ လျင်မြန်စွာ ပြန်တက်သွားကြပြီး စွမ်းအင်စုဝေးအဆောက်အအုံ ဘက်သို့ စုဝေးရောက်ရှိလာကြ၏။

စွမ်းအင်စုဝေးအဆောက်အအုံ အနီးတွင် ရပ်လျက် သုံးဦးသားသည် အစီအရင် အပြင်ဘက်သို့ ခေါင်းမော့ကြည့်လိုက်ကြသည်။

နှင်းရေခဲ နတ်ဘုရားမ လင်ယွီရုံသည် ကောင်းကင်ယံတွင် မြင့်မားစွာ ထိုင်လျက် အောက်ဘက်သို့ စိုက်ကြည့်နေဆဲ ဖြစ်သည်ကို တွေ့လိုက်ရသည်။

သို့သော် ခဏအကြာတွင် သူမက မျက်မှောင်ကြုတ်လာတော့၏။

ခြင်္သေ့ရိုင်း၏ အသက်ဓာတ်ကို သူမ လုံးဝ မခံစားရတော့ပေ။

"ဘာဖြစ်သွားတာလဲ"

လင်ယွီရုံ၏ မျက်နှာအမူအရာ ပြောင်းလဲသွားပြီး အနည်းငယ် ပျက်ယွင်းသွားသည်။

ခြင်္သေ့ရိုင်းသည် သူမ၏ လက်အောက်ငယ်သားများထဲတွင် အစောဆုံး နိုးထလာသူဖြစ်ပြီး စွမ်းရည်များ အမြန်ဆုံး ပြန်လည်ကောင်းမွန်လာသူလည်း ဖြစ်သည်။

ချိတ်ပိတ် သင်္ကေတ အစီအရင်ထဲသို့ ဝင်သွားလျှင်ပင် ဤမျှမြန်မြန် ရှုံးနိမ့်မသွားသင့်ပေ။

"အထဲမှာ ဘာတွေ ဖြစ်သွားတာလဲ"

"ဒီ ပုရွက်ဆိတ်လို ကောင်တွေဆီမှာ တခြား လျှို့ဝှက်ထားတဲ့ နည်းလမ်းတွေ ရှိနေသေးတာများလား"

ရှေးခေတ်မှ ရောက်ရှိလာသော သူမသည် ကမ္ဘာပျက် ရေလွှမ်းမိုးသည့် ခေတ်တွင်မှ နိုးထလာခဲ့ခြင်းဖြစ်ရာ နည်းပညာ အထွန်းကားဆုံးသော ခေတ်ကာလနှင့် လုံးဝ ထိတွေ့ခဲ့ဖူးခြင်း မရှိပေ။

ထို့ကြောင့် ကမ္ဘာမပျက်မီက လူသားတို့၏ ယမ်းမှုန့်သုံး လက်နက်များ၏ စွမ်းအားကို သူမ လုံးဝ သိရှိမထားခြင်းမှာ သဘာဝကျလှသည်။

ယခုအချိန်တွင် တစ်စုံတစ်ရာ မှားယွင်းနေကြောင်း ရိပ်မိသွားသဖြင့် သူမသည် မိမိ၏ သန္ဓေပြောင်းအစွမ်းကို ချက်ချင်း ထုတ်ဖော်လိုက်ပြီး လက်ဝါးတစ်ချက်ကို အားကုန် လွှဲရိုက်လိုက်တော့သည်။

"ဝုန်း"

ကြောက်မက်ဖွယ်ကောင်းသော ရေခဲဓားပေါင်းများစွာ စုဝေးရောက်ရှိလာပြီး ထိုက်ယန်တောင်၏ ကာကွယ်ရေး အစီအရင်ဖြစ်သော ကောင်းကင်ချိတ်ပိတ် အမြောက်အစီအရင်ထဲသို့ ရူးသွပ်စွာ ပစ်ပေါက်လိုက်လေသည်။

ရေခဲဓားများသည် ရေခဲချွန်ပေါင်းများစွာ အလား ကောင်းကင်ချိတ်ပိတ် အမြောက်အစီအရင်ထဲသို့ ရူးသွပ်စွာ ထိုးစိုက်ဝင်ရောက်သွားကြသည်။

သို့သော် မျက်စိတစ်မှိတ်အတွင်းမှာပင် ကောင်းကင်ချိတ်ပိတ် အမြောက်အစီအရင်မှ အမြောက်ဆန်ပေါင်းများစွာ၏ ပစ်ခတ်မှုကြောင့် ပေါက်ကွဲထွက်သွားကြတော့၏။

လွတ်ထွက်သွားသော ရေခဲဓားများ ကောင်းကင်ချိတ်ပိတ် အမြောက်အစီအရင် အတွင်းပိုင်းသို့ ဝင်ရောက်သွားလျှင်ပင် ချိတ်ပိတ် သင်္ကေတ၏ အာနိသင်ကြောင့် ထိုရေခဲဓားများမှာ အလျင်အမြန် အရည်ပျော်သွားပြီး မူလအခြေခံ အကျဆုံး သာမန် ရေခဲဒြပ်စင် နှင်းပွင့်များအဖြစ်သို့ ပြောင်းလဲကာ ကျဆင်းသွားလေသည်။

လိပ်ခွံကဲ့သို့ မာကျောသော ထိုက်ယန်တောင်၏ ကောင်းကင်ချိတ်ပိတ် အမြောက်အစီအရင်ကို ရင်ဆိုင်ရချိန်တွင် လင်ယွီရုံမှာ အလွန်အမင်း ဒေါသထွက်နေတော့သည်။

သို့သော် သူမသည် ဤ ကောင်းကင်ချိတ်ပိတ် အမြောက်အစီအရင်ကို မည်သို့မျှ မတတ်နိုင်ဘဲ ဖြစ်နေရှာ၏။

"ကောင်းတယ်... ကောင်းတယ်... အရမ်းကောင်းတယ်"

"လင်း ဆိုတဲ့ကောင်... နင်က လိပ်ခွံထဲမှာ ပုန်းနေပြီး အပြင်မထွက်ဘူးပေါ့ ဟုတ်လား"

"ဒီနေရာကလွဲရင် တခြားနေရာတွေမှာရော နင့်အတွက် လိပ်ခွံတွေ ရှိနေဦးမလားဆိုတာ ငါ ကြည့်ရသေးတာပေါ့"

"တွင်းနက်အရိပ်ရေပေါ်ကျွန်း က နင့်ရဲ့ ရေပေါ်ကျွန်း မဟုတ်လား... ငါ အခုချက်ချင်း သွားပြီး အဲဒီကျွန်းကို ဖျက်ဆီးပစ်မယ်"

"နင် တစ်ရက် အပြင်မထွက်လာရင် ငါ ကျွန်းတစ်ကျွန်းကို ဖျက်ဆီးပစ်မယ်... အဲဒီကျွန်းကို ချောက်နက်ကျွန်း ဖြစ်သွားအောင် လုပ်ပြီး ရေအောက်ထဲ ထာဝရ နစ်မြုပ်သွားအောင်ကို လုပ်ပစ်မယ်"

"ပြီးတော့ နင်ပိုင်တဲ့ တခြား ရေပေါ်ကျွန်း အကုန်လုံးကိုလည်း ငါကိုယ်တိုင် တစ်ကျွန်းချင်းစီ လိုက်ရှင်းပစ်မယ်"

လင်ယွီရုံက အသံကုန် ဟစ်အော်လိုက်ပြီး ထိုက်ယန်တောင်ပေါ်ရှိ လူအားလုံးကို ခြိမ်းခြောက်လိုက်လေသည်။

ထိုဟိန်းဟောက်သံကို ကြားလိုက်ရသောအခါ ထိုက်ယန်တောင်ပေါ်ရှိ လူတိုင်း၏ မျက်နှာများ ပျက်ယွင်းသွားကြတော့၏။

"ဒီ အရူးမ"

"ဒီမိန်းမ ဘာဖြစ်နေတာလဲ... ငါတို့ ထိုက်ယန်တောင်က သူ့ကို ဘယ်နေရာများ သွားစော်ကားမိလို့လဲ"

"သူက ဆရာလင်းကို ဘာကိစ္စနဲ့ လိုက်ရှာနေတာလဲ"

"ဒီမိန်းမက အတင်းအကျပ် လိုက်ဖိအားပေးနေတဲ့ ပုံစံကို ကြည့်ရတာ... ဆရာလင်းများ သူ့ကို ပစ်သွားလို့များလား"

"ဟေ့ကောင်... ပေါက်ကရတွေ လျှောက်မပြောနဲ့နော်"

လူတိုင်းက တစ်ယောက်တစ်ပေါက်ဖြင့် ဟိုတွေးဒီတွေး လျှောက်ပြောနေကြသည်။

အချို့က အခြား ရေပေါ်ကျွန်းများ၏ လုံခြုံရေးအတွက် စိုးရိမ်နေကြပြီး အချို့ကမူ ထိုအမျိုးသမီး၏ စွမ်းဆောင်ရည် ညံ့ဖျင်းမှုကို လှောင်ပြောင်နေကြသည်။

အချို့ကလည်း အတင်းအဖျင်းများ စုံစမ်းကာ သူမက ဆရာလင်းကို အဘယ်ကြောင့် အသေအလဲ လိုက်ရှာနေရသနည်းဟု ခန့်မှန်းနေကြသည်။

လင်ယွီရုံက ဒေါသတကြီးဖြင့် ထိုက်ယန်တောင်မှ ထွက်ခွာကာ တွင်းနက်အရိပ်ရေပေါ်ကျွန်း သို့ သွားရောက်၍ ဒေါသပြေသည်အထိ သွေးထွက်သံယို သတ်ဖြတ်ရန် ရည်ရွယ်လိုက်ချိန်မှာပင်။

ရုတ်တရက် ထိုက်ယန်တောင်၏ ကောင်းကင်ချိတ်ပိတ် အမြောက်အစီအရင်ကြီး ပွင့်ထွက်သွားပြီး ကာကွယ်ရေး အတားအဆီးများ ပျောက်ကွယ်သွားတော့သည်။

လင်ယွီရုံက တစ်ချက် လှမ်းကြည့်လိုက်ပြီးနောက် ချက်ချင်း ဝမ်းသာသွားကာ တိုက်ခိုက်ရန် ပြင်လိုက်သည်။

သို့သော် ထိုက်ယန်တောင်၏ စွမ်းအင်စုဝေးအဆောက်အအုံ ဘက်ဆီမှ လူရိပ်တစ်ခု ပျံသန်းထွက်ပေါ်လာသည်ကို တွေ့လိုက်ရ၏။

လင်ယွီရုံက ထိုပျံသန်းလာသော လူရိပ်ကို မြင်လိုက်ရသောအခါ အလွန် ဝမ်းသာသွားတော့သည်။

"ငါ့ရဲ့ စိတ်ဝိညာဉ် အစိတ်အပိုင်းလေးပဲ"

သို့သော် ပျံသန်းသွားသူမှာ အခြားသူမဟုတ်ဘဲ ရန်မေ ဖြစ်နေလေသည်။

ယခုအချိန်တွင် ရန်မေ၏ မျက်နှာပေါ်၌ အေးစက်တည်ငြိမ်သော အမူအရာတစ်ခု ရှိနေပြီး လင်ယွီရုံနှင့် ကိုးဆယ်ရာခိုင်နှုန်းခန့် ဆင်တူနေသည်။

တွေ့သည်နှင့် တစ်ပြိုင်နက် ရန်မေက "မြန်မြန် သွား... လင်း ဆိုတဲ့ကောင် လိုက်လာတော့မယ်" ဟု အလျင်အမြန် ပြောလိုက်သည်။

ချက်ချင်းဆိုသလိုပင် စွမ်းအင်စုဝေးအဆောက်အအုံ ထဲမှ မိုးခြိမ်းသံအလား ကျယ်လောင်သော ဟိန်းဟောက်သံကြီး ထွက်ပေါ်လာသည်။

"လင်ယွီရုံ... အမမေ ကို လွှတ်ပေးစမ်း"

"ဝှစ်"

လင်းယွမ်၏ ခန္ဓာကိုယ်သည် မီးတောက် သက်တံကြီးတစ်ခုအလား လေထုကို ခွင်းလျက် ချက်ချင်း ရောက်ရှိလာတော့သည်။

လင်ယွီရုံက ထိုမြင်ကွင်းကို မြင်လိုက်ရသောအခါ သူမ၏ မျက်နှာပေါ်တွင် ရူးသွပ်သော အပြုံးတစ်ခု ပေါ်လာသည်။ "လာတာ အတော်ပဲ... လင်း ဆိုတဲ့ကောင်... နင်က ထွက်လာရဲသေးတယ်ပေါ့လေ... ကောင်းပြီ... ဒီလိပ်ခွံကြီး မရှိတော့တဲ့အချိန်မှာ နင်က ငါ့ရဲ့ တိုက်ကွက် ဘယ်နှစ်ကွက်ကိုများ ခံနိုင်မလဲဆိုတာ ကြည့်ရသေးတာပေါ့"

"ဝှစ်"

လင်ယွီရုံ၏ ခန္ဓာကိုယ်မှ အရှိန်အဝါများ ချက်ချင်း မြင့်တက်လာပြီး ခန္ဓာကိုယ်ကြီးက အဆက်မပြတ် ကြီးထွားလာကာ မျက်စိတစ်မှိတ်အတွင်းမှာပင် ၉၈ ပေခန့် မြင့်မားသော ဧရာမ ရေသူမကြီး အသွင်သို့ ပြောင်းလဲသွားတော့သည်။

သာမန် ရေသူမ အများစုမှာ ရေဓာတ် အရည်အသွေးရှိသော အစွမ်းပိုင်ရှင်များသာ ဖြစ်ကြသည်။

သို့သော် သူမကတော့ မတူပေ။ သူမ ထိန်းချုပ်နိုင်စွမ်း ရှိသည်မှာ နှင်းရေခဲ စွမ်းအားများ ဖြစ်နေလေသည်။

လူကိုယ်နှင့် ငါးအမြီး အသွင်ပြောင်းသွားသော လင်ယွီရုံက လေဟာနယ်ထဲသို့ လှမ်းဆွဲလိုက်ရာ ဧရာမ ရေခဲလှံကြီး တစ်ချောင်းကို စုစည်း ဖန်တီးလိုက်သည်ကို တွေ့လိုက်ရ၏။

ထို့နောက် လင်းယွမ် ရှိရာသို့ အားကုန် ထိုးစိုက်လိုက်တော့သည်။

လေထဲတွင် ရှိနေသော လင်းယွမ်၏ တစ်ကိုယ်လုံးမှ သွေးမြူခိုးများ ချက်ချင်း ဖောင်းကားလာပြီး ၎င်း၏ နောက်တွင် သွေးမြူခိုးများကြားမှ ဧရာမ သတ္တဝါကြီး တစ်ကောင်၏ ပုံရိပ် ထွက်ပေါ်လာလေသည်။

ဤသတ္တဝါကြီး၏ အရွယ်အစားမှာလည်း ၉၈ ပေ အမြင့်ကိုပင် ကျော်လွန်နေလေသည်။

၎င်း၏ အတောင်ပံ နှစ်ဖက်ကို ဖြန့်လိုက်သောအခါ အတောင်ပံ အကျယ်မှာ ၁၃၁ ပေ ကိုပင် ကျော်လွန်သွားတော့၏။

တစ်ကိုယ်လုံးတွင် မီးတောက်မီးလျှံများ ရစ်ပတ်နေပြီး ကြောက်မက်ဖွယ်ကောင်းသော အပူလှိုင်းများက ၎င်း၏ ခန္ဓာကိုယ်ထဲမှ လှိမ့်ဝင် ထွက်ပေါ်လာသည်။

မီးဓာတ် အမျိုးအစား မျိုးရိုးဗီဇမြေပုံ... ရဲရဲတောက် မီးလင်းယုန်။

လင်းယွမ် ဝင်ရောက် တိုက်ခိုက်လိုက်သည်နှင့် တစ်ဖက်လူကို တိုက်ရိုက် ရင်ဆိုင်ရန်အတွက် မီးဓာတ် အမျိုးအစား မျိုးရိုးဗီဇမြေပုံ စွမ်းအားကို ချက်ချင်း ထုတ်ဖော်လိုက်ခြင်းပင်။

ရဲရဲတောက် မီးလင်းယုန်က အတောင်ပံ နှစ်ဖက်ကို ရုတ်တရက် ခါရမ်းလိုက်ပြီး ချက်ချင်းပင် ၎င်း၏ တစ်ကိုယ်လုံးမှ ကောင်းကင်သို့ ထိုးတက်သွားလောက်သော မီးတောက်ကြီးများ ပေါက်ကွဲ ထွက်ပေါ်လာသည်။

နောက်တစ်စက္ကန့်တွင်မူ ၎င်းက မူလနေရာမှ ပျောက်ကွယ်သွားသကဲ့သို့ ဖြစ်သွားတော့၏။

ပြန်လည် ထွက်ပေါ်လာချိန်တွင် ရေသူမအသွင်ဖြင့် ရှိနေသော လင်ယွီရုံ၏ ခေါင်းပေါ်သို့ တိုက်ရိုက် ရောက်ရှိသွားသကဲ့သို့ပင်။

ကြောက်မက်ဖွယ်ကောင်းသော မီးတောက်များ လောင်ကျွမ်းနေသည့် ခြေသည်းတစ်စုံက လင်ယွီရုံ၏ ခေါင်းဆီသို့ အရှိန်ပြင်းပြင်းဖြင့် လှမ်းဆွဲလိုက်လေသည်။

လင်ယွီရုံ အလွန်အမင်း အံ့ဩသွားသည်။ "ဒီကောင် ထပ်ပြီး အစွမ်းထက်လာပြန်ပြီပဲ"

ပြီးခဲ့သည့်အကြိမ်က သူမ လင်းယွမ်ကို တွေ့ခဲ့စဉ်က တစ်ဖက်လူ၏ မျိုးရိုးဗီဇ ပြန်လည်ဖွဲ့စည်းခြင်း အဆင့်မှာ ၂၀ ရာခိုင်နှုန်း ဝန်းကျင်ခန့်သာ ရှိသေးပြီး ခန္ဓာကိုယ် အရွယ်အစားမှာလည်း ၆၅ ပေ ကျော်ခန့်သာ ရှိသေးသည်။

သို့သော် ဤတစ်ကြိမ်တွင်မူ ၉၈ ပေ ကျော်အထိ ကြီးထွားလာခဲ့ရာ တစ်ဖက်လူ၏ မျိုးရိုးဗီဇ ပြန်လည်ဖွဲ့စည်းခြင်း အဆင့်သည် ၃၀ ရာခိုင်နှုန်း သို့ ရောက်ရှိနေပြီ ဖြစ်ကြောင်း ပြသနေလေသည်။

လင်ယွီရုံက လက်မောင်းကို မြှောက်လိုက်ပြီး ဧရာမ ရေခဲဒိုင်းလွှားကြီး တစ်ခုကို ဖန်တီးကာ ခေါင်းပေါ်တွင် ကာကွယ်ထားလိုက်သည်။

"ဝုန်း"

ရေခဲဒိုင်းလွှားနှင့် ရဲရဲတောက် မီးလင်းယုန်၏ ခြေသည်းတို့ ရိုက်ခတ်သွားပြီး ချက်ချင်းပင် ဆူညံသော ဟိန်းဟောက်သံကြီးများ ထွက်ပေါ်လာသည်။

ထိုရေခဲဒိုင်းလွှားမှာ ကြောက်မက်ဖွယ် မီးတောက်များ၏ လောင်ကျွမ်းမှုကြောင့် တိုက်ရိုက် ပေါက်ကွဲထွက်သွားတော့၏။

ထို့နောက် ရဲရဲတောက် မီးလင်းယုန်၏ ခြေသည်းနှစ်ဖက်က ကြောက်မက်ဖွယ် သံကြိုးခလောက်ကြီးများအလား သူမ၏ လက်မောင်းနှစ်ဖက်ကို အသေအလဲ ဆွဲဖမ်းထားလိုက်သည်။

အားကုန် ဆွဲယူလိုက်ပြီး တစ်ချိန်တည်းမှာပင် အတောင်ပံနှစ်ဖက်ကို ချက်ချင်း ခါရမ်းလိုက်ရာ လင်ယွီရုံ တစ်ကိုယ်လုံးကို မ,တင်လိုက်ပြီး ကောင်းကင်ယံသို့ အရှိန်ပြင်းပြင်းဖြင့် လွှင့်ပစ်လိုက်လေတော့သည်။

လင်ယွီရုံမှာ အံ့ဩခြင်းနှင့် ဒေါသထွက်ခြင်းများ ရောယှက်သွားပြီး လေထဲတွင် ရှိနေစဉ်မှာပင် ရုတ်တရက် လက်ဝါးနှစ်ဖက်ဖြင့် မန္တန်များ ရွတ်ဆိုလိုက်ရာ ရှုပ်ထွေးလှသော သင်္ကေတများ တစ်ခုပြီးတစ်ခု ထွက်ပေါ်လာသည်။

သူမက ရဲရဲတောက် မီးလင်းယုန် ရှိရာသို့ တိုက်ရိုက် အားကုန် ရိုက်ချလိုက်ပြီး ပါးစပ်မှလည်း "ရေခဲလှောင်အိမ်" ဟု အသံကုန် အော်ဟစ်လိုက်သည်။

"ဝုန်း"

"ဝုန်း"

"ဝုန်း"

မျက်စိတစ်မှိတ်အတွင်းမှာပင် မြောက်မြားစွာသော ရေခဲဒြပ်စင်များက ရဲရဲတောက် မီးလင်းယုန်ကို တိုက်ရိုက် လွှမ်းခြုံသွားပြီး ချက်ချင်းဆိုသလို ဧရာမ ရေခဲတုံးကြီးတစ်ခု ဖြစ်ပေါ်လာကာ ရဲရဲတောက် မီးလင်းယုန်ကို ထိုအထဲတွင် ရေခဲရိုက် ပိတ်လှောင်ပစ်လိုက်သည်။

ရဲရဲတောက် မီးလင်းယုန်၏ အတောင်ပံနှစ်ဖက်ပေါ်တွင် လေဟာနယ် လျှပ်စီးမီးတောက်များက အလျင်အမြန် ပေါက်ကွဲ လောင်ကျွမ်းလာပြီး ရေခဲတုံးများကို လျင်မြန်စွာ အရည်ပျော်သွားစေတော့သည်။

သို့သော် လင်ယွီရုံက ဟက်ဟက်ပက်ပက် ရယ်မောလိုက်ပြီး ရန်မေကို လှမ်းဆွဲကာ စကားအပို ပြောမနေတော့ဘဲ "နင်နဲ့ငါ ပေါင်းစပ်လိုက်မယ်... သူ အချိန်မီတားနိုင်မှာ မဟုတ်ဘူး" ဟု တိုက်ရိုက် ပြောလိုက်သည်။

ရန်မေက ချက်ချင်း ခေါင်းညိတ်လိုက်သည်။ "ကောင်းပြီ"

နောက်တစ်စက္ကန့်တွင် သူမ၏ စိတ်ဝိညာဉ် အစိတ်အပိုင်းတစ်ခုနှင့် တူသော ခန္ဓာကိုယ်တစ်ခုက အလိုအလျောက် ခွဲထွက်လာပြီး လင်ယွီရုံဆီသို့ အလွန် လျင်မြန်စွာ ပျံသန်းသွားတော့၏။

ဆက်ရန်...