အခန်း (၇၁၉-၇၂၀)

အပိုင်း(၇၁၉) တိချွမ်ခူး

တစ်ရက်အကြာတွင် မြူခိုးမြို့တော်က ထိုက်ယန်တောင်၏ သိမ်းပိုက်ခြင်းကို ခံလိုက်ရသည်။

လင်းယွမ်က တွင်းနက်အရိပ်ကျွန်းမှ ဟန်ရှန်းမန်ကို မြူခိုးမြို့တော်သို့ ကြီးကြပ်ရန် ချက်ချင်း စေလွှတ်လိုက်သည်။

ဟန်ရှန်းမန်၏ လက်ရှိ မျိုးရိုးဗီဇ ပြန်လည်ဖွဲ့စည်းခြင်း အစွမ်းဖြင့် မြူခိုးမြို့တော်ကို ကြီးကြပ်ရန်မှာ ပိုလျှံနေလေပြီ။

လင်းယွမ်က လင်ယွီရုံကိုမူ ထိုက်ယန်တောင်၌ ယာယီ ခေါ်ထားလိုက်၏။ သူမထံမှ မေးမြန်းစရာ ကိစ္စရပ်များစွာ ရှိနေသေးသောကြောင့် ဖြစ်သည်။

အထူးသဖြင့် ရှေးခေတ်ကာလက ကောင်းကင်ယံရှိ လေပေါ်ကျွန်းများကို စူးစမ်းလေ့လာခဲ့မှုများအပြင် ထိုခေတ်က အစွမ်းပိုင်ရှင်များ၏ ဤရေဘေးကြီးအပေါ် နားလည်သဘောပေါက်ထားမှုများပင် ဖြစ်သည်။

အလုံပိတ်ထားသော သုမာရု ဟင်းလင်းပြင်အတွင်းဝယ် ငါးလူသား၏ အရိုးစုကြီးကို သူတို့ရှေ့၌ ချထားလေသည်။

လင်းယွမ်နှင့် လင်ယွီရုံတို့က တစ်ဖက်စီတွင် ဝင်ထိုင်လိုက်ကြသည်။

လင်းယွမ်က စိတ်စွမ်းအင်များကို လည်ပတ်စေကာ ထိုအရိုးစုကြီးထံသို့ စိမ့်ဝင်သွားစေလိုက်၏။

ယခင်က ဤအရိုးစုကို အကြိမ်ကြိမ် စစ်ဆေးကြည့်ခဲ့သော်လည်း ထူးခြားမှု တစ်စုံတစ်ရာကိုမျှ မတွေ့ရှိခဲ့ရပေ။

ဦးခေါင်းခွံအတွင်း၌ပင် စိတ်စွမ်းအင် အကြွင်းအကျန်များကို မတွေ့ခဲ့ရချေ။

သို့သော် ဤတစ်ကြိမ်တွင် ရှေးဟောင်းအစွမ်းပိုင်ရှင် လင်ယွီရုံ ရှိနေသည်မို့ သူမ၏ အသက်ရှည်နုပျိုခြင်း ကျင့်စဉ်အပေါ် ကျွမ်းကျင်မှုအရ ပုန်းကွယ်နေသော စိတ်ဝိညာဉ် အကြွင်းအကျန်များကို ရှာဖွေဖော်ထုတ်ရန်မှာ အသေးအဖွဲ ကိစ္စရပ်တစ်ခုသာ ဖြစ်လေသည်။

"ပုံမှန်ဆိုရင် ဒီလို စိတ်ဝိညာဉ် အကြွင်းအကျန်တွေက... အလောင်းနဲ့ ပေါင်းစပ်ပြီး မျိုးရိုးဗီဇရဲ့ အနက်ရှိုင်းဆုံး နေရာမှာ ပုန်းကွယ်နေတတ်တယ်"

"သွေးလောင်းပေးလိုက်ရင် သဘာဝအတိုင်း ပြန်လည်နိုးထလာနိုင်တယ်"

"အရိုးစုကို ဖျက်ဆီးပစ်ရင်လည်း သူက မဖြစ်မနေ နိုးထလာလိမ့်မယ်"

"တခြားနည်းလမ်းတွေနဲ့ ပတ်သက်လို့ကတော့ ကျွန်မလည်း စမ်းမကြည့်ဖူးသေးဘူး"

လင်းယွမ်ကလည်း မလောပေ။ သူက ဤကိစ္စအတွက် ကြိုတင်ပြင်ဆင်ထားပြီး ဖြစ်သည်။

ဘေးတစ်ဖက်တွင် အသင့်ပြင်ဆင်ထားသော ရေကန်ကြီးတစ်ခု ရှိနေပြီး ထိုအထဲတွင် သန္ဓေပြောင်းသားရဲ မျိုးစုံ၏ သွေးများဖြင့် ပြည့်နှက်နေသည်ကို တွေ့လိုက်ရ၏။

ရေကန်၏ ပတ်ပတ်လည်တွင် ထူးဆန်းသော သင်္ကေတများက တစ်ပတ်ပြီးတစ်ပတ် သေသပ်စွာ နေရာယူထားကြသည်။

ထိုသင်္ကေတ အစီအရင်ကို မြင်လိုက်ရချိန်တွင် လင်ယွီရုံ၏ မျက်နှာအမူအရာ အနည်းငယ် ပြောင်းလဲသွားသည်။

သူမက ဤအစီအရင်ကို မှတ်မိလိုက်သည်။ ၎င်းက စွမ်းအင်ချိတ်ပိတ် အစီအရင်ပင် ဖြစ်၏။

လင်းယွမ်က ဤငါးလူသားအရိုးစုကို အရင်သက်ဝင်လှုပ်ရှားစေပြီး ခန္ဓာကိုယ်တွင်းရှိ ဝိညာဉ်ကို ပြန်လည်နိုးထလာစေရန် လုပ်ဆောင်မည်ကို သူမ နားလည်လိုက်သည်။ ထို့နောက် စွမ်းအင်ချိတ်ပိတ် အစီအရင်ကို အားကိုးကာ ထိုအရာကို ပိတ်လှောင်ပြီး နောက်ဆုံးတွင် သူ့အား ကျွန်ပြုရန် ရည်ရွယ်ထားခြင်း ဖြစ်သည်။

အဆိုးရွားဆုံး အခြေအနေများကို ကာကွယ်ရန်အတွက်ပင် လင်းယွမ်က သုမာရု ဟင်းလင်းပြင်ကဲ့သို့ အလုံပိတ်နေရာကို ရွေးချယ်ပြီး လုပ်ဆောင်ခဲ့ခြင်း ဖြစ်သည်။

ဤသို့ဆိုလျှင် ထိုအရိုးစုအတွင်းရှိ ဝိညာဉ်၌ နည်းလမ်းပေါင်း ထောင်သောင်းချီ ရှိနေစေကာမူ လင်းယွမ်၏ လက်ဖဝါးပြင်ထဲမှ လွတ်မြောက်နိုင်မည် မဟုတ်ပေ။

လင်ယွီရုံက အသက်ကို ပြင်းပြင်းတစ်ချက် ရှူသွင်းလိုက်မိပြီး လင်းယွမ်အား တစ်ချက်ကြည့်ကာ ဤလူငယ်လေးသည် အလွန် သတိကြီးပြီး အလုပ်လုပ်ရာတွင် ဟာကွက် လုံးဝမရှိကြောင်း စိတ်ထဲမှ မှတ်ချက်ချလိုက်သည်။

သူမ ကိုယ်တိုင် သူ့လက်ထဲ ကျရောက်ခဲ့ရခြင်းမှာ မတန်မရာ ရှုံးနိမ့်ခဲ့ရခြင်း မဟုတ်ပေ။

ထို ချန်ယွင်တောက် ကို ပြန်တွေးကြည့်ပါက တကယ်ကို တုံးအလွန်းလှသည်။

ဤကဲ့သို့သော လူမျိုးက လင်း မျိုးရိုးကို ဘယ်လိုလုပ်ပြီး ရန်စရဲရတာပါလိမ့်။

လင်းယွမ်က ပြင်ဆင်မှုများကို အပြည့်အဝ လုပ်ဆောင်ပြီးနောက် လင်ယွီရုံအား ပြောလိုက်သည်။ "မင်း သွားပြီး ဒီငါးလူသား အရိုးစုကို သွေးကန်ထဲ ထည့်လိုက်"

လင်ယွီရုံလည်း မတတ်သာတော့ဘဲ နေရာမှထကာ ထိုအရိုးစုကြီးကို ပွေ့ချီပြီး သွေးကန်ထဲသို့ ပစ်ချလိုက်လေသည်။

"အရိုးစုထဲမှာ ပုန်းကွယ်နေတဲ့ စိတ်ဝိညာဉ် ပြန်နိုးထလာဖို့ အချိန်ဘယ်လောက်ကြာနိုင်လဲ" လင်းယွမ်က မေးလိုက်သည်။

လင်ယွီရုံက သွေးကန်အတွင်းမှ ပြောင်းလဲမှုများကို တစ်ချက် ကြည့်လိုက်၏။

သွေးကန်အတွင်းရှိ သွေးများက မျက်မြင်ကိုယ်တွေ့ အမြန်နှုန်းဖြင့် လျော့နည်းသွားသည်ကို တွေ့လိုက်ရသဖြင့် သူမက မနေနိုင်ဘဲ ပြောလိုက်သည်။ "ဒီသွေးကန်ထဲက သွေးတွေကို စုပ်ယူနေတဲ့ အမြန်နှုန်းအရဆို သူက နိုးထလာဖို့ နီးစပ်နေပြီ ထင်တယ်"

"ဒီ သွေးကန်တစ်ကန်လုံးစာဆိုရင်တော့ သေချာပေါက် လုံလောက်သွားလောက်တယ်"

လင်းယွမ်က ခေါင်းအသာညိတ်ပြပြီး ချက်ချင်း မေးလိုက်သည်။ "ဒီအရိုးစုထဲက စိတ်ဝိညာဉ်က မင်းနဲ့ ခေတ်ပြိုင်လူများ ဖြစ်နေမလား"

လင်ယွီရုံက ပြန်ဖြေသည်။ "မသိဘူး... ဟုတ်နေရင်တောင် ကျွန်မ သိချင်မှ သိမှာ"

"ဘာလို့လဲ... မင်းက မင်းတို့ခေတ်တုန်းက အပြင်မထွက်ဘူးလား"

လင်ယွီရုံမှာ စကားဆွံ့အသွားပြီးနောက် ချက်ချင်းပင် မာနတခွဲသားဖြင့် ပြန်ပြောလိုက်သည်။ "သူတို့ကသာ ကျွန်မရဲ့ နာမည်ကို ကြားဖူးခဲ့ကြတာ... ကျွန်မက တခြားသူတွေရဲ့ နာမည်ကို ဘာကိစ္စ သိနေစရာ လိုလို့လဲ"

လင်းယွမ်က သူမကို တစ်ချက်ကြည့်လိုက်မိသည်။ ဤအမျိုးသမီးက ဟန်ဆောင်ကောင်းလွန်းလှသည်။

ရှေးခေတ်ကာလက တကယ်ပဲ ဒီလောက်အထိ အစွမ်းထက်ခဲ့ကြသလား ဆိုတာတော့ မသိပေ။

သူက လင်ယွီရုံနှင့် ဆက်ပြီး စကားများမနေချင်တော့ဘဲ စိတ်စွမ်းအင်ကို သွေးကန်အတွင်းရှိ အရိုးစု၏ ပြောင်းလဲမှုများအပေါ်၌သာ အာရုံစိုက်ထားလိုက်သည်။

သွေးများ အဆက်မပြတ် လျော့နည်းလာမှုနှင့်အတူ အချိန်မကြာမီမှာပင် သွေးကန်အတွင်းရှိ အရိုးစုကြီးက ရုတ်တရက် တုန်ခါသွားလေသည်။

ထိုနောက် ချက်ချင်းဆိုသလို လင်းယွမ်နှင့် လင်ယွီရုံတို့ နှစ်ဦးစလုံးက အရိုးစုထဲမှ ဖြည်းညှင်းစွာ နိုးထလာသော အလွန်အစွမ်းထက်သည့် စိတ်စွမ်းအင်တစ်ခုကို အာရုံခံမိလိုက်ကြ၏။

ထိုမျှမက ထိုစိတ်စွမ်းအင် နိုးထလာသည်နှင့်အမျှ ထိုငါးလူသား အရိုးစုပေါ်တွင် သွေးသားများက အံ့ဩဖွယ်ကောင်းလောက်အောင် လျင်မြန်စွာ စတင်ပေါက်ဖွားလာခဲ့သည်။

အရိုးများအထက်တွင် သွေးကြောများ ပေါ်ထွက်လာပြီး အသားစများက ကြီးထွားလာသည်။

ပတ်ဝန်းကျင်ရှိ သန္ဓေပြောင်းစွမ်းအင်များကလည်း ဤအရိုးစုကြီးဆီသို့ လျင်မြန်စွာ စုဝေးလာကြတော့သည်။

လင်ယွီရုံသည် ထိုမြင်ကွင်းကို မြင်လိုက်ရသောအခါ မျက်နှာအမူအရာ အနည်းငယ် ပြောင်းလဲသွားပြီး အံ့ဩတကြီး ရေရွတ်လိုက်သည်။ "သွေးသား ပြန်လည်မွေးဖွားခြင်းပဲ"

လင်းယွမ်လည်း ထိတ်လန့်သွားရသည်။ ဤမြင်ကွင်းက ထိုစဉ်က ဝူမုန့်၏ သန္ဓေပြောင်းအစွမ်းနှင့် အလွန် ဆင်တူနေသောကြောင့်ပင်။

ထိုစဉ်က ဝူမုန့်ကို သူက အရေခွံများ စုတ်ပြဲပြီး အရိုးများ ပေါ်လာသည်အထိ ထိုးကြိတ်ခဲ့သော်လည်း အသားစများက အမြန်ဆုံး ပြန်လည်ပေါက်ဖွားလာကာ လျင်မြန်စွာ ပြန်လည်ကောင်းမွန်လာခဲ့သည်ကို လင်းယွမ် ကောင်းကောင်း မှတ်မိနေဆဲ ဖြစ်သည်။

မျက်စိရှေ့မှ ဤငါးလူသား အရိုးစုကလည်း သွေးသားများ ပြန်လည်မွေးဖွားလာသဖြင့် လင်းယွမ်က မနေနိုင်ဘဲ မေးလိုက်သည်။ "မင်းက ဒီအစွမ်းကို သိလို့လား"

လင်ယွီရုံ၏ မျက်နှာအမူအရာက တည်ငြိမ်မှုမရှိတော့ဘဲ ပြန်ဖြေသည်။ "ရှေးခေတ်ကာလက ခန္ဓာကိုယ်အမျိုးအစား အစွမ်းပိုင်ရှင် တချို့မှာ ဒီလိုအစွမ်းမျိုး ရှိကြတယ် ဆိုတာကို ကျွန်မ သိတယ်"

"ဒါပေမဲ့ အဲဒီအချိန်တုန်းကတော့ သူတို့က ဒီအစွမ်းကို နတ်အစွမ်းလို့ ခေါ်ကြပြီး သွေးတစ်စက်မှ ပြန်လည်မွေးဖွားခြင်း လို့ သတ်မှတ်ကြတယ်"

"သွေးအဆီအနှစ် တစ်စက်လောက် ကျန်နေသေးပြီး မူလဝိညာဉ် မပျက်စီးသေးသရွေ့ ပြန်လည် မွေးဖွားနိုင်ကြတယ်"

"ဒါပေမဲ့ ဒါက မျိုးရိုးဗီဇ ပြန်လည်ဖွဲ့စည်းခြင်း အဆင့်မှာရှိတဲ့ ထိပ်တန်းပညာရှင်တွေမှသာ ပိုင်ဆိုင်တဲ့ အစွမ်းပဲ"

"ရှင်တို့ရဲ့ လက်ရှိ နားလည်ထားမှုနဲ့ ပြောရရင် စိတ်စွမ်းအင်ကို ကိုယ့်ရဲ့ သွေးသားထဲ ပေါင်းစပ်လိုက်တာပဲ... ဘယ်သွေးတစ်စက်ကမဆို ကိုယ့်ခန္ဓာကိုယ်ကို ပြန်လည်ကောင်းမွန်စေနိုင်တယ်"

"ပိုပြီး အစွမ်းထက်တဲ့သူတွေ ဆိုရင်... သွေးတစ်စက်ကနေ ကိုယ်ပွားတစ်ခုကို ပြန်လည်ဖွဲ့စည်းနိုင်ပြီး စိတ်ဝိညာဉ် အသိစိတ်ကိုပါ မျှဝေနိုင်စွမ်း ရှိကြသေးတယ်"

လင်းယွမ် အံ့ဩမှင်သက်သွားသည်။ ရှေးဟောင်း ဒဏ္ဍာရီများထဲတွင် ဤကဲ့သို့သော သွေးတစ်စက်မှ ပြန်လည်မွေးဖွားသည့် နတ်အစွမ်းမျိုး အမှန်တကယ် ရှိခဲ့လေသည်။

မျောက်မင်း ဆွန်ဝူခုန်း ပင်လျှင် အမွေးကိုနှုတ်ကာ ကိုယ်ပွား ဖန်တီးနိုင်စွမ်း ရှိခဲ့သည် မဟုတ်ပါလော။

ဒါတွေကလည်း သန္ဓေပြောင်းအစွမ်းတွေများ ဖြစ်နေမလား။

လင်းယွမ်က ဆက်မေးလိုက်သည်။ "မင်းဆိုလိုတာက ဒီလူက ထိပ်တန်း ပညာရှင်တစ်ယောက် ဖြစ်နိုင်တယ်ပေါ့"

"တကယ်လို့ သွေးတစ်စက်မှ ပြန်လည်မွေးဖွားခြင်းသာ ဆိုရင်တော့... သေချာပေါက် ထိပ်တန်း ပညာရှင်ပဲ... ဒါပေမဲ့ သူ ဘယ်လောက်အထိ အစွမ်းတွေ ပြန်ရလာမလဲ ဆိုတာကိုတော့ မသိရသေးဘူး" ဟု လင်ယွီရုံက ပြောလိုက်သည်။

လင်းယွမ်၏ မျက်လုံးများ အရောင်လက်သွားသည်။ သူ ထောက်ပံ့ပေးထားသော သွေးကန်အတွင်းရှိ အဆီအနှစ်သွေးများက မျိုးရိုးဗီဇမျိုးစေ့ အဆင့်သာရှိသော သန္ဓေပြောင်းသားရဲများ၏ သွေးများဖြစ်ရာ ပါဝင်သော စွမ်းအင်က များပြားလှသည်တော့ မဟုတ်ပေ။

ဤအရိုးစုကြီး ပြန်လည်ကောင်းမွန်လာခဲ့လျှင်တောင် သူ၏ အစွမ်းက အများကြီး မြင့်မားနေမည် မဟုတ်ချေ။

ထင်ထားသည့်အတိုင်းပင် အရိုးစုကြီးက အဆက်မပြတ် ပြန်လည်ကောင်းမွန်လာမှုနှင့်အတူ ပါးလွှာသော အသားစတစ်လွှာခန့် ကြီးထွားလာပြီးနောက် သွေးကန်အတွင်းရှိ သွေးများမှာ အကုန်အစင် ခမ်းခြောက်သွားတော့သည်။

စွမ်းအင် ထောက်ပံ့မှု မရှိတော့သဖြင့် ထိုအရိုးစုကြီးမှာ ချက်ချင်းပင် ပြင်းထန်စွာ တုန်ယင်လာလေသည်။

ထို့နောက် ၎င်းက သုမာရု ဟင်းလင်းပြင်အတွင်း လွင့်မျောနေသော သန္ဓေပြောင်းစွမ်းအင်များကို ရုတ်တရက် စတင် စုပ်ယူလေတော့သည်။

သို့သော် ဤနေရာက သီးခြား အလုံပိတ်ထားသော ဟင်းလင်းပြင်တစ်ခု ဖြစ်ရာ လေထုထဲတွင် သူစုပ်ယူရန်အတွက် သန္ဓေပြောင်းစွမ်းအင်များ မည်မျှများများ ရှိနေမည်နည်း။

ခဏအကြာမှာပင် ၎င်းက စိတ်လောလာပြီး စိတ်ဝိညာဉ် အသိတစ်ခု ပြန်လည်နိုးထလာကာ ဒေါသတကြီး အော်ဟစ်လိုက်သည်။ "သွေး... ငါ သွေးတွေ လိုချင်တယ်"

လင်းယွမ်က ထိုစိတ်ဝိညာဉ် အသိကို ချက်ချင်း သတိထားမိလိုက်ပြီး ရင်ထဲ၌ လှုပ်ရှားသွားကာ မေးလိုက်သည်။ "ယောင်္ကျားလား"

လင်ယွီရုံ၏ မျက်နှာအမူအရာကမူ ပိုမို ထူးဆန်းလာပြီး သူမက လျင်မြန်စွာ ဖွင့်ဟလိုက်သည်။ "တိချွမ်ခူး"

လင်းယွမ်က မျက်ခုံးတစ်ချက် ပင့်လိုက်ပြီး လင်ယွီရုံအား ကြည့်ကာ မေးလိုက်သည်။ "ဘာပြောလိုက်တာလဲ"

လင်ယွီရုံ၏ မျက်နှာပေါ်တွင် မမျှော်လင့်ထားမှုများနှင့် အံ့ဩထိတ်လန့်မှုများ ပြည့်နှက်နေပြီး ပြန်ဖြေသည်။ "ဒါ တိချွမ်ခူးရဲ့ အရိုးစုပဲ... သူ့ရဲ့ စိတ်ဝိညာဉ်ကို ကျွန်မ အရမ်းရင်းနှီးတယ်"

လင်းယွမ်လည်း အတော်လေး အံ့ဩသွားပြီး မေးလိုက်သည်။ "တကယ်ကြီး မင်းရဲ့ အသိလား"

လင်ယွီရုံက လျင်မြန်စွာ ပြန်ပြောသည်။ "သူ့ရဲ့ နတ်သားရဲမြေပုံက ကျွန်မနဲ့ ဆင်တူတယ်... ငါးလူသားပဲ"

"အရင်တုန်းက ကျွန်မတို့နှစ်ယောက်က... ကောင်းကင်အပြင်ဘက်က အလောင်းကောင်ကြီးတစ်ခုကို လုဖို့နဲ့ အဲဒီအလောင်းကို သန့်စင်ဖို့အတွက်... အကြီးအကျယ် တိုက်ခိုက်ခဲ့ဖူးတယ်"

"ဒီအရိုးစုက... သူအရင်တုန်းက သန့်စင်ထားခဲ့တဲ့ ကောင်းကင်အပြင်ဘက်က အလောင်းကောင်ကြီး ဖြစ်နေတာကိုး"

"ဒီအထဲက စိတ်ဝိညာဉ်က... ဒီတိချွမ်ခူးဆိုတဲ့ သူရဲ့ဟာလား" လင်းယွမ်က ချက်ချင်း မေးလိုက်သည်။

လင်ယွီရုံက ခေါင်းညိတ်ပြသည်။ "ဟုတ်တယ်... သူ့အသံကို ကျွန်မ အမှတ် မမှားနိုင်ဘူး"

လင်းယွမ်က ရုတ်တရက် သတိရသွားပြီး မေးလိုက်သည်။ "အရင်က ရေအောက်မှာ လူဟောင်းတစ်ယောက်ကို သွားရှာဖို့ မင်း ငါ့ကို ဖိတ်ခေါ်ခဲ့တာ သူ့ကို ရှာဖို့လား"

"ဟုတ်တယ်... အဲဒီတုန်းက ကျွန်မ တွေးထားတာက သူ မနိုးလာခင် သူ့ကို အရင်ရှင်းပစ်ဖို့ပဲ... နောက်ပိုင်း သူ့ခြေရာကို ကျွန်မ တစ်ချိန်လုံး လိုက်ရှာနေခဲ့တာ... သူ့ရဲ့ အရင် ဌာနေဟောင်းကိုလည်း သွားခဲ့သေးတယ်... ဒါပေမဲ့ အစအနကို လုံးဝ မတွေ့ခဲ့ရဘူး"

"သူက ရှင့်ဆီမှာ ရောက်နေလိမ့်မယ်လို့ ထင်တောင် မထင်ထားဘူး"

လင်းယွမ်လည်း အလွန်အမင်း အံ့ဩသွားမိသည်။ ဤအရိုးစုက လင်ယွီရုံနှင့် ဤမျှလောက်အထိ ပတ်သက်မှု နက်ရှိုင်းနေလိမ့်မည်ဟု မထင်ထားခဲ့ပေ။

"သူ နိုးလာပြီ... ရှင် သူ့ကို ကျွန်ပြုချင်တယ် ဆိုရင် သူ အားအနည်းဆုံးဖြစ်တဲ့ အခုအချိန်က အကောင်းဆုံးပဲ" လင်ယွီရုံက စိတ်လှုပ်ရှားစွာဖြင့် ချက်ချင်း သတိပေးလိုက်သည်။

လင်းယွမ်က သူမ မျက်နှာပေါ်ရှိ စိတ်လှုပ်ရှားနေသော အမူအရာကို ကြည့်ကာ မေးလိုက်သည်။ "မင်းက ဘာလို့ ဒီလောက် ပျော်နေတာလဲ"

"ဟီးဟီး... ကျွန်မ ဒုက္ခရောက်နေမှတော့ တခြားသူတွေလည်း ချမ်းသာခွင့် မရစေရဘူးလေ" လင်ယွီရုံက ပွင့်ပွင့်လင်းလင်းပင် ပြောလိုက်သည်။

လင်းယွမ်မှာ ချက်ချင်းပင် စကားဆွံ့အသွားရသည်။

သူက လက်ရှိအချိန်တွင် စိတ်စွမ်းအင်ကို ချက်ချင်း အသက်သွင်းကာ ရွှေရောင် သင်္ကေတတစ်ခုအဖြစ် ပြောင်းလဲလိုက်ပြီး ရှေ့ရှိ အရိုးစုကြီးထံသို့ လျင်မြန်စွာ ရိုက်သွင်းလိုက်တော့သည်။

ထိုအရိုးစုအတွင်းရှိ စိတ်ဝိညာဉ်က အပြင်ဘက်မှ အန္တရာယ်ကို ချက်ချင်း သတိထားမိသွားပြီး ချက်ချင်းပင် ဒေါသတကြီး လန့်ဖြန့်သွားလေသည်။

"ရိုင်းစိုင်းလှချည်လား... နတ်ဘုရားကိုများ စော်ကားရဲတယ်ပေါ့"

ထိုနောက် ချက်ချင်းဆိုသလို အရိုးစုကြီးက ဝုန်းခနဲ ထိုင်လျက်သား ဖြစ်သွားပြီး ရေစီးကြောင်းတစ်ခုကို စုစည်းကာ လင်းယွမ်ထံသို့ အရှိန်ပြင်းပြင်းဖြင့် တိုက်ခိုက်လာသည်ကို တွေ့လိုက်ရ၏။

လင်းယွမ်မှာ ချက်ချင်း အံ့ဩသွားပြီး "ခန္ဓာကိုယ်အမျိုးအစား အစွမ်းပိုင်ရှင် မဟုတ်ဘူးလား... ဘယ်လိုလုပ်ပြီး ရေစီးကြောင်းကို ဖန်တီးနိုင်ရတာလဲ"

သူ လက်မရွှေ့ရသေးခင်မှာပင် ဘေးနားရှိ လင်ယွီရုံက ချက်ချင်း ဟားတိုက်ရယ်မောလိုက်သည်။ "ကျွန်မ လုပ်မယ်"

သူမက လက်နှစ်ဖက်ကို ပွတ်သပ်လိုက်ရာ ရေခဲဓားတစ်လက် ပေါ်ထွက်လာတော့သည်။

"သွားစမ်း"

"ဝှီး"

ရေခဲဓားက မျက်စိတစ်မှိတ်အတွင်း ပစ်လွှတ်သွားပြီး ရေစီးကြောင်းကို တိုက်ရိုက် ဖောက်ထွက်သွားကာ ခဏချင်းမှာပင် ရေစီးကြောင်းကြီး အေးခဲသွားပြီး ရေခဲဓားက အရိုးစု၏ ရင်ဘတ်ပေါ်သို့ ချက်ချင်း စိုက်ဝင်သွားလေသည်။

"ဒုန်း" ဟူသော အသံတစ်ချက် ထွက်ပေါ်လာပြီး ထိုအရိုးစုကြီးမှာ သွေးကန်ထဲ၌ အရှင်လတ်လတ် ရိုက်မှိုနှက်ခံလိုက်ရတော့သည်။

သွေးကန်အတွင်းရှိ အရိုးစုကြီးက ထိတ်လန့်ဒေါသထွက်စွာဖြင့် ချက်ချင်း ဟိန်းဟောက်လိုက်သည်။ "လင်ယွီရုံ... မင်းဖြစ်နေတာကိုး... ဘယ်လိုလုပ်ပြီး မင်း ဖြစ်နေရတာလဲ"

လင်ယွီရုံက ဟားတိုက်ရယ်မောလိုက်သည်။ "တိချွမ်ခူး... နှစ်ထောင်ပေါင်းများစွာ မတွေ့ရတာ ကြာပြီ... နင် ငါ့လက်ထဲကို ရောက်လာလိမ့်မယ်လို့ ထင်မထားဘူး မလား"

တိချွမ်ခူးမှာ အံ့ဩထိတ်လန့်မှုတို့ ရောပြွမ်းသွားပြီး ချက်ချင်း အော်ဟစ်လိုက်သည်။ "လင်ယွီရုံ... ငါတို့နှစ်ယောက်လုံးက ငါးလူသားမျိုးနွယ်တွေချည်းပဲလေ... ဘာကိစ္စ ဒီလောက်အထိ အသည်းအသန် ဖိအားပေးနေရတာလဲ"

လင်ယွီရုံက အေးစက်စက် ရယ်မောလိုက်သည်။ "အရင်တုန်းက ငါ့ရဲ့ ကောင်းကင်အပြင်ဘက်က အလောင်းကောင်ကြီးကို နင်လုတုန်းကတော့ ဒီလို မပြောခဲ့ပါဘူး"

စကားပြောနေစဉ်မှာပင် သူမက ရေခဲဓားကို ပြင်းထန်စွာ အသက်သွင်းလိုက်ရာ မျက်စိတစ်မှိတ်အတွင်းမှာပင် အေးစက်သော လေထုကြီးက ရူးသွပ်စွာ ပျံ့နှံ့လာတော့သည်။

ဤအရိုးစုကြီးမှာ အလွန် လျင်မြန်သော အမြန်နှုန်းဖြင့် အေးစက်သောလေထု၏ ရေခဲရိုက်ခြင်းကို ခံလိုက်ရသည်။

ခန္ဓာကိုယ်ပေါ်ရှိ သွေးများက ဆက်လက် မစီးဆင်းနိုင်တော့ဘဲ ကြွက်သားများအားလုံး တောင့်တင်းသွားကြသည်။

ခန္ဓာကိုယ် တစ်ခုလုံး လှုပ်ရှား၍ မရနိုင်တော့ပေ။

ဤသည်ကို မြင်လိုက်ရသောအခါ စိတ်ဝိညာဉ်တစ်ခုက အရိုးစုထဲမှ အတင်းရုန်းထွက်လာပြီး မည်သည့်အရာကိုမျှ ဂရုမစိုက်နိုင်တော့ဘဲ အလုအယက် ထွက်ပြေးလေတော့သည်။

တိချွမ်ခူးက လင်ယွီရုံ၏ အစွမ်းကို အလွန် ရှင်းလင်းစွာ သိထားသည်။

တစ်ဖက်လူ၏ ရေခဲ သန္ဓေပြောင်းအစွမ်းသည် ရုပ်ပိုင်းဆိုင်ရာအရ အရာအားလုံးကို အေးခဲစေနိုင်ရုံသာမကဘဲ စိတ်ဝိညာဉ်ကိုပါ အေးခဲစေနိုင်စွမ်း ရှိပေသည်။

ထို့ကြောင့် သူက ထိုအရိုးစုထဲတွင် လုံးဝ ပိတ်မိခံ၍ မဖြစ်ပေ။

တိချွမ်ခူး၏ ဝိညာဉ်က အလျင်အမြန် ထွက်ပြေးလွတ်မြောက်လာခဲ့သော်လည်း ဤအချိန်၌ပင် လင်ယွီရုံက လက်ကို ဝုန်းခနဲ ဝှေ့ယမ်းလိုက်သည်။

ကောင်းကင်ယံတွင် ထူထဲလေးလံသော ရေခဲတုံးကြီးများ ပေါ်ထွက်လာတော့သည်။

"ဒုန်း... ဒုန်း... ဒုန်း... ဒုန်း"

အရပ်လေးမျက်နှာရှိ ရေခဲတုံးကြီးများက ရူးသွပ်စွာ ပေါင်းစပ်သွားကြပြီး ကျယ်လောင်သော အသံကြီး ထွက်ပေါ်လာသည်။

ဖောက်ထွင်းမြင်နိုင်သော ဧရာမ မှန်ချပ်ကြီး လေးချပ်ကဲ့သို့ ဤစိတ်ဝိညာဉ်ကို အထဲတွင် တိုက်ရိုက် လွှမ်းခြုံပိတ်လှောင်လိုက်တော့သည်။

ထိုစိတ်ဝိညာဉ်က ရေခဲပြင်ပေါ်သို့ ဝုန်းခနဲ ဝင်တိုက်မိသွားရာ ချက်ချင်းပင် ဝိညာဉ်ခန္ဓာကိုယ်မှာ အေးခဲသွားပြီး နှင်းခဲတစ်လွှာ ဖုံးအုပ်သွားကာ ဝိညာဉ်တစ်ခုလုံး တုန်ယင်သွားလေတော့သည်။

လင်းယွမ် လှမ်းကြည့်လိုက်ရာ ၎င်းက အသက် သုံးဆယ်ကျော်အရွယ် ရှေးခေတ် လူငယ်တစ်ယောက် ဖြစ်နေသည်ကို တွေ့လိုက်ရ၏။

ဤလူသည် ကျစ်လစ်သန်မာသော ခန္ဓာကိုယ် ရှိပြီး ဝိညာဉ်အခြေအနေတွင် သူ၏ မျက်နှာပေါ်၌ အံ့ဩဒေါသထွက်မှုများဖြင့် ပြည့်နှက်နေသည်။

သူက လက်တစ်ချက် ဆန့်ထုတ်လိုက်ရာ အပြာရောင် ကျောက်စိမ်း နှစ်တုံးက သူ၏ လက်ထဲတွင် ပေါ်လာတော့သည်။

ထို့နောက် သူ၏ ကိုယ်ရိပ်က လျှပ်ခနဲ ဖြစ်သွားပြီး ဝိညာဉ်သည် ထိုကျောက်စိမ်းများအနက်မှ တစ်တုံးထဲသို့ တိုးဝင်သွားသည်ကို တွေ့လိုက်ရသည်။

နောက်တစ်ခဏတွင် အခြားကျောက်စိမ်းတစ်တုံးက အရှိန်ပြင်းပြင်းဖြင့် ဝုန်းခနဲ ပစ်လွှတ်ထွက်သွားတော့သည်။

"ဝုန်း"

ချက်ချင်းပင် ရေခဲတုံး ပေါက်ကွဲထွက်သွားပြီး ကျောက်စိမ်းက အပေါက်တစ်ခုကို ဖောက်ထွက်ကာ ဤရေခဲလှောင်အိမ်ထဲမှ အတင်းအဓမ္မ ထွက်ပြေးလွတ်မြောက်သွားတော့သည်။

မျက်စိရှေ့တွင်ပင် ထွက်ခွာသွားတော့မည့် အချိန်၌ နောက်တစ်ခဏတွင် ဟင်းလင်းပြင်က တွန့်လိမ်သွားပြီး ကျောက်စိမ်းက မျှော်လင့်မထားဘဲ တွန့်လိမ်နေသော ဟင်းလင်းပြင်ကို တိုက်ရိုက် ဖြတ်သန်းသွားလေသည်။

နောက်တစ်ကြိမ် ပြန်ပေါ်လာချိန်တွင် လက်တစ်ဖက်က ဤကျောက်စိမ်းကို ဝုန်းခနဲ ဖမ်းဆုပ်လိုက်လေပြီ။

ကျောက်စိမ်းက ပြန်လည်ခုခံချိန်ပင် မရလိုက်ဘဲ လက်ဖဝါးပိုင်ရှင်၏ လက်ထဲတွင် စိတ်စွမ်းအင်ဖြင့် စုစည်းထားသော လိပ်ခွံလှောင်အိမ်တစ်ခု ချက်ချင်း ပေါ်ထွက်လာသည်ကို တွေ့လိုက်ရ၏။

ကျောက်စိမ်းက ဘယ်ညာ အတင်းတိုးထွက်ရန် ကြိုးစားနေသော်လည်း ဤစိတ်စွမ်းအင် လှောင်အိမ်ကိုတော့ ဖောက်မထွက်နိုင်ခဲ့ပေ။

"မင်းက ဘယ်သူလဲ"

တိချွမ်ခူးက စိတ်စွမ်းအင်ဖြင့် ဒေါသတကြီး ဟိန်းဟောက်လိုက်ပြီး တစ်ဆက်တည်း ပြောလိုက်သည်။ "ငါ့ကို လာရင်ဆိုင်ခိုင်းရအောင်... လင်ယွီရုံက မင်းကို ဘာအကျိုးအမြတ်တွေ ပေးထားလို့လဲ"

"မင်းကို ဆယ်ဆ... အဆတစ်ရာလောက် ပြန်ပေးနိုင်တယ်"

"ငါက ဘယ်သူလဲဆိုတာ မင်း သိလား... ငါက ရေစမ်းလျှို့ဝှက် သဲဝိညာဉ်... သဲစီးကြောင်း ယဇ်ပုရောဟိတ်... ယွီဘုရင်တောင်မှ ငါ့ကိုတွေ့ရင် ရိုရိုသေသေ ဖိတ်ခေါ်ရတယ်"

"ငါ့ကို အခုချက်ချင်း လွှတ်ပေးစမ်း"

လင်းယွမ်၏ မျက်နှာအမူအရာမှာ ထူးဆန်းသွားပြီး ဤအချိန်၌ လင်ယွီရုံလည်း ပျံသန်းရောက်ရှိလာသည်။

သူမက ဤစကားများကို ကြားလိုက်ရသော် မနေနိုင်ဘဲ ဟားတိုက် ရယ်မောလိုက်ပြီး သူတစ်ပါး ဒုက္ခရောက်သည်ကို ဝမ်းသာအားရဖြင့် ပြောလိုက်သည်။ "တိချွမ်ခူး... နင်က ဒါကို လွန်ခဲ့တဲ့ နှစ်ထောင်ပေါင်းများစွာတုန်းကလို့ ထင်နေတုန်းပဲလား"

"ခေတ်ကြီးက ပြောင်းလဲသွားတာ ကြာလှပြီ... ရေဘေးကမ္ဘာပျက်ကပ်ကြီးက စတင်နေပြီ... အခုက ယွီဘုရင်ရဲ့ ခေတ် မဟုတ်တော့တာ ကြာပြီ"

"လင်း... သခင်... သူ့ကို ကျွန် သင်္ကေတ အမြန်ဆုံး ခတ်နှိပ်လိုက်ပါတော့"

လင်ယွီရုံက စိတ်လှုပ်ရှားစွာဖြင့် အော်ပြောလိုက်သည်။

ဤကမ္ဘာလောကကြီးတွင် မိမိ၏ ယခင်က ရန်သူဟောင်း ဒုက္ခရောက်သည်ကို မြင်ရခြင်းထက် ပို၍ လူကို ပျော်ရွှင်စေသော ကိစ္စရပ်က ဘာများ ရှိဦးမည်နည်း။

လင်ယွီရုံက သူမ၏ လက်ရှိ အခြေအနေအတွက် အလွန် စိတ်ပျက်အားငယ်နေသော်လည်း အကယ်၍ ယခင်က သေမလောက် မုန်းခဲ့ရသော ရန်သူကလည်း သူမနှင့် ဘဝတူ ကျဆင်းသွားမည် ဆိုပါက သူမ၏ စိတ်ထဲတွင် များစွာ ဖြေသာသွားပေလိမ့်မည်။

ထို့ကြောင့်သာ ဤမျှလောက် အားတက်သရော ဖြစ်နေပြီး လင်းယွမ်အား ဤမျှ စိတ်လောကြီးစွာ တိုက်တွန်းနေခြင်း ဖြစ်သည်။

ဆက်ရန်...

အပိုင်း(၇၂၀) ရှေးဟောင်းဒဏ္ဍာရီများနှင့် လက်တွေ့ဘဝ

လင်းယွမ်က လင်ယွီရုံကို တစ်ချက်ကြည့်လိုက်ပြီး သူမ လက်ရှိ ဘာတွေတွေးနေမလဲဆိုတာကို အကြမ်းဖျင်း နားလည်လိုက်သည်။

သူမကိုယ်တိုင် ဒီလောက် အဖြစ်ဆိုးနေရပြီမို့ တစ်ချိန်က သေခန်းပြတ် ရန်သူကလည်း ဒီလိုအဖြစ်ဆိုးမျိုး ကြုံရမှ ကျေနပ်မည်ဟု သူမ ခံစားနေရပုံပေါ်သည်။

ဒါကြောင့်လည်း သူမက ဒီလောက် အားတက်သရော လုပ်ဆောင်နေခြင်းဖြစ်သည်။ သေချာသည်မှာ သူမ အားမထုတ်ဘဲ နေ၍လည်း မရပေ... ချုပ်နှောင်ခြင်း သင်္ကေတ၏ ထိန်းချုပ်မှုအောက်တွင် သူမက သူ၏အမိန့်များကို လွန်ဆန်နိုင်စွမ်း မရှိချေ။

လင်းယွမ်က စိတ်စွမ်းအင်များကို စုစည်းလိုက်ရာ ဝိညာဉ်ချုပ်နှောင်ခြင်း သင်္ကေတတစ်ခု ထွက်ပေါ်လာပြီး စိတ်စွမ်းအင်လှောင်အိမ်အတွင်းရှိ တိချွမ်ခူးထံသို့ အရှိန်အဟုန်ဖြင့် ရိုက်သွင်းလိုက်သည်။

"ဘုန်း"

တိချွမ်ခူးသည် လင်းယွမ်၏ စိတ်စွမ်းအင်ကို လုံးဝ ခုခံနိုင်စွမ်း မရှိခဲ့ပေ... သူက ယခုမှ နိုးထလာခါစဖြစ်၍ အားအနည်းဆုံး အချိန်ဖြစ်နေသည်။

မျက်တောင်တစ်ခတ်အတွင်းမှာပင် ဝိညာဉ်ချုပ်နှောင်ခြင်း သင်္ကေတ၏ ကျွန်ပြုခြင်းကို ခံလိုက်ရလေသည်။

နောက်တစ်ခဏတွင် တိချွမ်ခူး၏ ဝိညာဉ်အပေါ် အကြွင်းမဲ့ ထိန်းချုပ်နိုင်စွမ်းရှိသွားပြီဖြစ်ကြောင်း လင်းယွမ် ချက်ချင်း ခံစားလိုက်ရသည်။

စိတ်ကူးတစ်ချက်လေးဖြင့်ပင် တစ်ဖက်လူကို ချက်ချင်း ပြာကျသွားစေနိုင်စွမ်း ရှိနေပြီဖြစ်သည်။

လင်းယွမ်က စိတ်စွမ်းအင်လှောင်အိမ်ကို ဖြေလျှော့လိုက်ရာ အတွင်းရှိ တိချွမ်ခူး၏ စိတ်ဝိညာဉ်ခန္ဓာကိုယ်မှာ တဆတ်ဆတ် တုန်ယင်နေပြီး ဝိညာဉ်ချုပ်နှောင်ခြင်း သင်္ကေတ အထိခံထားရသဖြင့် ပြင်းထန်သော နာကျင်မှုကို ခံစားနေရဆဲဖြစ်သည်။

"အောင်မြင်သွားပြီ"

လင်းယွမ်က ပြုံးရွှင်စွာ ပြောလိုက်သည်။

ဘေးနားရှိ လင်ယွီရုံကလည်း ချက်ချင်း ဟားတိုက်ရယ်မောလိုက်ပြီး "တိချွမ်ခူး... နှစ်ပေါင်းများစွာ ကြာပြီးနောက် ငါတို့ ပြန်ဆုံတဲ့အချိန် ဒီလိုပုံစံမျိုး ဖြစ်နေလိမ့်မယ်လို့ မထင်ထားဘူး"

တိချွမ်ခူးသည် နောက်ဆုံးတွင် သတိပြန်လည်လာပြီး လင်ယွီရုံကို ဒေါသတကြီး စိုက်ကြည့်ကာ ကျိန်ဆဲလိုက်သည်။ "ခွေးမ... ငါ မင်းကို သတ်မယ်"

သူက ဒေါသတကြီးဖြင့် လက်ပါရန် ပြင်လိုက်သော်လည်း အေးစက်သော နှာခေါင်းရှုံ့သံတစ်သံကို ကြားလိုက်ရသည်။

"ဟမ့်"

ချက်ချင်းပင် တိချွမ်ခူး တစ်ကိုယ်လုံး တုန်ရီသွားပြီး သူ၏ စိတ်ဝိညာဉ်ခန္ဓာကိုယ်မှာ ရုတ်တရက် လှုပ်ရှား၍ မရတော့ချေ။

လင်းယွမ်က အေးစက်စွာ ပြုံးလိုက်ပြီး "ဘယ်လိုလဲ... မင်း မကျေနပ်သေးဘူးလား"

တိချွမ်ခူး ခေါင်းငုံ့သွားသည်။ လင်းယွမ်ကို ရင်ဆိုင်နေရချိန်တွင် သူ့ထံ၌ ပြန်လည်ခုခံလိုစိတ် လုံးဝ မရှိတော့ပေ။

"သခင့်ကို... ကျွန်တော်မျိုး မလွန်ဆန်ရဲပါဘူး"

လင်းယွမ်က တည်ငြိမ်စွာဖြင့် "မင်းတို့နှစ်ယောက်လုံးက အခု ငါ့ရဲ့ကျေးကျွန်တွေ ဖြစ်သွားပြီ... အခုကစပြီး ဘယ်သူမှ အချင်းချင်း ရန်မဖြစ်ရဘူး" ဟု ပြောလိုက်သည်။

ထိုနှစ်ယောက်သည် မလွန်ဆန်ရဲကြသဖြင့် ခေါင်းငုံ့ကာ အမိန့်ကို နာခံမည့် ပုံစံမျိုး ဖမ်းထားလိုက်ကြသည်။

လင်းယွမ်က "တိချွမ်ခူး... ပြောစမ်းပါဦး... မင်းက ဘယ်လိုဖြစ်တာလဲ... ဘာလို့ ဒီအရိုးစုက မြေအောက် သင်္ချိုင်းဂူထဲမှာ ရှိနေရတာလဲ" ဟု မေးလိုက်သည်။

တိချွမ်ခူးက အသံနိမ့်နိမ့်ဖြင့် သွေးအိုင်ဘက်ရှိ အသားစအနည်းငယ်သာ ဖုံးလွှမ်းနေသေးသော အရိုးစုကို တစ်ချက်ကြည့်လိုက်ပြီး သက်ပြင်းချကာ ဖြေလိုက်သည်။ "သခင်... ကျွန်တော်က ရှေးခေတ်ကနေ တာ့ယွီခေတ်အထိ ရေလွှမ်းမိုးနေတဲ့ ကမ္ဘာကြီးမှာ ကျင်လည်ခဲ့တာပါ"

"အဲ့ဒီအချိန်တုန်းက တာ့ယွီက... ရေလွှမ်းမိုးနေတဲ့ ကမ္ဘာကြီးကို ပြုပြင်ပြီး ကျိုးကျိုး ပြည်နယ်ကို ဖန်တီးဖို့နဲ့ ကမ္ဘာလောကကြီးကို အခြေချဖို့ သန္နိဋ္ဌာန်ချခဲ့တာပါ"

"အခု ပထမဆုံး ရေလွှမ်းမိုးကပ်ဘေး ဆိုက်လာတာက... ကျွန်တော့်အမှတ်ရနေသလောက်ဆိုရင် ဒါ ဒုတိယအကြိမ်မြောက်ပါ"

"တတိယအကြိမ်ပါ" ဘေးနားရှိ လင်ယွီရုံက အေးစက်စက် ပြုံးလျက် ဝင်ထောက်လိုက်သည်။

"တတိယအကြိမ် ဟုတ်လား"

"ဟုတ်တယ်... တတိယအကြိမ်ပဲ... ပထမအကြိမ်တုန်းက ကောင်းကင်ကြီး ပေါက်ပြဲသွားပြီး အဆုံးအစမဲ့ ရေတွေက လူ့လောကထဲကို ဒလဟော စီးဝင်လာခဲ့တာ... ရှေးခေတ်က အစွမ်းပိုင်ရှင်တွေ အကုန်လုံးက ဒီအပေါက်ကြီးကို ပိတ်ဖို့ နည်းလမ်းပေါင်းစုံနဲ့ ကြိုးစားခဲ့ကြတယ်"

"နောက်ပိုင်းမှာ ထိပ်တန်း မြေဓာတ် အစွမ်းပိုင်ရှင် နွီဝါးက ရေဓာတ် အစွမ်းပိုင်ရှင် ကုန်းကုန်း... မီးဓာတ် အစွမ်းပိုင်ရှင် ကျူးရုံ... ရေခဲဓာတ် အစွမ်းပိုင်ရှင် အရှေ့ပင်လယ်လိပ်ဘုရင် တို့နဲ့ ပူးပေါင်းပြီး ကောင်းကင်ပေါ်က ရေလွှမ်းမိုးတဲ့ အပေါက်ကြီးကို ပိတ်ပစ်ခဲ့ကြတယ်"

"အဲဒါကြောင့်မှ ဒီသဘာဝဘေးအန္တရာယ်ကြီး ရပ်တန့်သွားခဲ့တာ"

"ဒုတိယအကြိမ်ကတော့ အဝါရောင်ဧကရာဇ်နဲ့ ချီရုံတို့ စစ်ပွဲကာလမှာ ရေလွှမ်းမိုးကပ်ဘေး ထပ်ဖြစ်ခဲ့တာ... အဲ့ဒါကြောင့်ပဲ လူသားမျိုးနွယ်ရဲ့ ဧကရာဇ် သုံးဆက်တိုင်တိုင် ရေဘေးကို ဖြေရှင်းခဲ့ရတာ"

"ဒါပေမဲ့ အဲဒီရေဘေး ဖြေရှင်းမှုက အောင်မြင်ခဲ့တာ မဟုတ်ဘူး... အစက ကုန်းမြေ တစ်ဆက်တည်း ရှိနေတဲ့ တိုက်ကြီးက ရေလွှမ်းမိုးမှုကြောင့် ကုန်းမြေအပိုင်းအစ အများကြီး အဖြစ် ကွဲထွက်သွားခဲ့ရတယ်"

တိချွမ်ခူးက ထိုစကားကို သဘောမတူဘဲ ပြန်လည် ချေပလိုက်သည်။ "ဒါက ဒဏ္ဍာရီတွေ သက်သက်ပါ... နွီဝါးနဲ့ အရှေ့ပင်လယ်လိပ်ဘုရင်... ကုန်းကုန်းနဲ့ ကျူးရုံဆိုတဲ့ ပုဂ္ဂိုလ်တွေက အရင်ခေတ် ရေလွှမ်းမိုးကမ္ဘာရဲ့ ဒဏ္ဍာရီတွေပါ... ယုံကြည်ရလောက်တဲ့ အရာတွေ မဟုတ်ပါဘူး"

"လူအချို့က ပြောကြတယ်... လူ့ဧကရာဇ် ဖြေရှင်းခဲ့တဲ့ ရေဘေးဆိုတာက အဲဒီတုန်းက နွီဝါးတို့ အပြည့်အဝ မတားဆီးနိုင်ခဲ့တဲ့ ရေလွှမ်းမိုးမှုကြီးကို ပြောတာတဲ့"

လင်ယွီရုံက အေးစက်စက် ပြုံးလိုက်သည်။ "ဟာသပဲ... တာ့ယွီ ရေဘေးဖြေရှင်းတာကရော တကယ် အောင်မြင်ခဲ့လို့လား"

"ကမ္ဘာကြီးက ရေလွှမ်းမိုးခံရပြီး ကုန်းမြေကြီးနဲ့ တိုက်ကြီး အတော်များများ ကွဲထွက်သွားတာပဲ မဟုတ်လား"

"အနည်းဆုံးတော့ လူသားတွေ မျိုးတုံးမသွားဘဲ အသက်ရှင်ကျန်ရစ်ခဲ့တာပဲ" တိချွမ်ခူးက နှာခေါင်းရှုံ့ကာ ပြောလိုက်သည်။

လင်ယွီရုံက "အဲဒါကော ဘာဖြစ်လဲ... တာ့ယွီလည်း ရေလွှမ်းမိုးမှုရဲ့ ဇစ်မြစ်ကို မဖြေရှင်းနိုင်ခဲ့ပါဘူး... နှစ်ပေါင်းထောင်ချီ ကြာပြီးတဲ့နောက်မှာ အခု ရေလွှမ်းမိုးမှုကြီး ထပ်ပေါ်လာတာပဲ မဟုတ်လား" ဟု ပြန်ပြောသည်။

"ဇစ်မြစ်ကို သေချာမရှာဖွေနိုင်သရွေ့... ကောင်းကင်ပေါ်က ရေလွှမ်းမိုးမှုရဲ့ မြစ်ဖျားခံရာကို မရှာတွေ့သရွေ့... အရာအားလုံးက ရေငတ်ပြေဖို့ အဆိပ်သောက်သလိုပဲ... အသက်ငင်နေတာကို အချိန်ဆွဲနေရုံ သက်သက်ပဲ"

သူတို့နှစ်ဦး အပြင်းအထန် ငြင်းခုံလာကြရာ လင်းယွမ်မှာ ပါးစပ်အဟောင်းသားဖြင့် ကြောင်ငေးနားထောင်နေမိသည်။

ရှေးခေတ်က ဒဏ္ဍာရီတွေက တကယ်ပဲ ဒီလိုဖြစ်ခဲ့တာလား...

နွီဝါး ကောင်းကင်ကို ဖာထေးခဲ့တာ... တာ့ယွီ ရေဘေးကို ဖြေရှင်းခဲ့တာတွေကိုတော့ သူ ကြားဖူးထားပြီးသားဖြစ်သည်။

ဒါပေမဲ့ ဒီလူနှစ်ယောက်ရဲ့ ပါးစပ်ဖျားမှာတော့ ဘာလို့ ရေဘေးဖြေရှင်းတာ ကျရှုံးခဲ့တယ်လို့ ဖြစ်သွားရတာလဲ...

သူက နှစ်ယောက်သား ငြင်းခုံနေခြင်းကို ချက်ချင်း တားဆီးလိုက်ပြီး မေးလိုက်သည်။ "နေကြဦး... မငြင်းကြနဲ့တော့"

"ဒီရေလွှမ်းမိုးမှုကြီးက အမြဲတမ်း ကောင်းကင်ယံပေါ်ကနေ ဒီလိုပဲ ရုတ်တရက် ပေါ်လာတတ်တာလား"

လင်ယွီရုံနှင့် တိချွမ်ခူးတို့သည် ဆက်မငြင်းရဲကြတော့ဘဲ ထိုစကားကို ကြားသောအခါ အသီးသီး ခေါင်းညိတ်ပြကြသည်။

"ဟုတ်ပါတယ်... ရေလွှမ်းမိုးကပ်ဘေး အကြိမ်ကြိမ် ဖြစ်ခဲ့သမျှ အားလုံးက ကောင်းကင်ယံပေါ်ကနေ ရုတ်တရက် ပေါ်လာခဲ့တာချည်းပါပဲ"

"အဲဒီ ရေလွှမ်းမိုးတဲ့ မြစ်ကြီးက ကောင်းကင်ယံမှာ သက်တံကြီးတစ်ခုလို ချိတ်ဆွဲနေပြီး ရေစီးကြောင်း အမြောက်အမြားကို ဆက်တိုက် ပန်းထွက်နေတာပါ... တကယ်လို့ မြစ်ဖျားခံရာကို မရှာနိုင်ဘဲ အစွမ်းတွေ သုံးပြီး ရေထွက်ပေါက်ကိုပဲ ပိတ်ထားမယ်ဆိုရင်... အနှေးနဲ့အမြန် တစ်နေ့ကျရင် လူ့လောကထဲကို ထပ်ပြီး ဒလဟော စီးဝင်လာဦးမှာပါ"

တိချွမ်ခူးက အသံနိမ့်နိမ့်ဖြင့် "မြစ်ဖျားခံရာကို ရှာမယ် ဟုတ်လား... ဘယ်လွယ်ပါ့မလဲ... ရှေးခေတ်က အဲဒီလောက် အစွမ်းထက်တဲ့ ပညာရှင်တွေ အများကြီးတောင်မှ... ဘယ်သူကများ အဲဒီရေစီးကြောင်းရဲ့ အဆုံးကို တကယ် ရှာတွေ့ခဲ့လို့လဲ"

"အသက်ငင်နေတဲ့ကြားကနေ ဒီအချိန်အထိ အသက်ရှင်နိုင်ခဲ့တာကိုက ငါတို့ ကံကောင်းလွန်းလို့ပဲ"

"အသက်ရှည်နည်း အားကိုးနဲ့တောင် ဒုတိယကပ်ဘေးထိ အသက်ရှင်နိုင်ခဲ့ကြတာ လူဘယ်နှစ်ယောက်ရှိလို့လဲ"

"ဒီလို ကမ္ဘာပျက်မယ့် သဘာဝဘေးအန္တရာယ်ကြီး ရှေ့မှာ... ငါတို့တွေကလည်း ပုရွက်ဆိတ်လေးတွေလောက်ပဲ ရှိတာပါ"

လင်ယွီရုံက အေးစက်စက် ပြုံးလိုက်သည်။ "နင်ကသာ ပုရွက်ဆိတ်ဖြစ်မှာပေါ့... ငါကတော့ မဟုတ်ဘူး... ငါက ရှေးခေတ် အစွမ်းပိုင်ရှင်တွေရဲ့ ခြေရာကို လိုက်ပြီး အဲဒီရေစီးကြောင်းရဲ့ အဆုံးထိ မရောက်ရောက်အောင်သွားပြီး အတိအကျ စုံစမ်းမယ်လို့ သန္နိဋ္ဌာန်ချထားပြီးသား"

နှစ်ယောက်သား စကားပြောရင်းနှင့် ထပ်မံ ငြင်းခုံလာကြပြန်သည်။

လင်းယွမ်က မျက်မှောင်ကြုတ်လိုက်ပြီး သူတို့နှစ်ဦးကို ထပ်မံ ကြိမ်းမောင်းလိုက်သည်။

"မငြင်းကြနဲ့တော့"

"မင်းတို့ပြောတဲ့ သဘောက... ရှေးခေတ်က နွီဝါးတို့... ကျူးရုံတို့ဆိုတဲ့ ဒဏ္ဍာရီလာ ပုဂ္ဂိုလ်တွေကလည်း အစွမ်းပိုင်ရှင်တွေ သက်သက်ပဲ ဆိုလိုတာလား"

လင်ယွီရုံက ခေါင်းညိတ်လိုက်ပြီး "ဒါပေါ့... သာမန်လူတွေ ထင်ထားသလို တကယ့် နတ်ဘုရားတွေ ဖြစ်နေဖို့မှ မဖြစ်နိုင်တာ" ဟု ပြောလိုက်သည်။

"ငါက ကိုယ့်ကိုယ်ကိုယ် ရေခဲနတ်ဘုရားမလို့ သမုတ်ထားပေမဲ့ ငါက ရေခဲဓာတ် အစွမ်းပိုင်ရှင် သက်သက်ဆိုတာ ငါ့ကိုယ်ငါ သိပါတယ်"

သူမက မိမိသည် နတ်ဘုရားတစ်ပါး မဟုတ်ကြောင်း အလွန် ပွင့်လင်းစွာ ဝန်ခံလိုက်သည်။

လက်ရှိ လင်းယွမ်ကို ရင်ဆိုင်နေရချိန်တွင် သူမအနေဖြင့် နတ်ဘုရား ဟန်ပန်မျိုး လုံးဝ မပြရဲတော့သည်မှာ သဘာဝပင်။

တိချွမ်ခူးကလည်း "သခင်... ကောင်းကင်တခွင်လုံး ပြည့်နေတဲ့ နတ်ဘုရားတွေ... တန်ခိုးရှင်တွေဆိုတာက သာမန်လူတွေက ကျွန်တော်တို့ရဲ့ အစွမ်းတွေကို မြင်ပြီးနောက်မှာ စိတ်ကူးယဉ် ဖန်တီးထားကြတာပါ" ဟု ပြောသည်။

"လူသားတွေက သူတို့ နားမလည်နိုင်တဲ့ အရာတွေဆိုရင် အမြဲတမ်း ပုံကြီးချဲ့ပြီး အလှဆင်တတ်ကြတယ်လေ"

"တကယ်တမ်းကျတော့ နောက်ပိုင်းမှာ ကောင်းကင်ပေါ်က ရေစီးကြောင်းကြီး ပျောက်ကွယ်သွားပြီးတဲ့နောက်... ကမ္ဘာလောကကြီးထဲက သန္ဓေပြောင်းစွမ်းအင်တွေလည်း လျင်လျင်မြန်မြန် ပျောက်ကွယ်သွားခဲ့တာ"

"လူ့လောကကြီးက တဖြည်းဖြည်းနဲ့ အစွမ်းတွေ ခေါင်းပါးတဲ့ ခေတ်ကို ရောက်သွားပြီး အစွမ်းပိုင်ရှင်တွေ ထပ်မပေါ်လာတော့ဘူး"

"နောက်မျိုးဆက်တွေထဲမှာ အစွမ်းနိုးထလာနိုင်တဲ့သူတွေ တဖြည်းဖြည်း နည်းပါးလာခဲ့တယ်"

"ကျွန်တော်တို့လို လူအိုကြီးတွေကလည်း အသက်ရှည်နည်းကို အားကိုးပြီး အိပ်စက်နေရင်းနဲ့... နောက်တစ်ကြိမ် ရေလွှမ်းမိုးကပ်ဘေး ဆိုက်လာပြီး စွမ်းအင်တွေ ပြန်ပေါ်လာမယ့် အချိန်ကို စောင့်နေရုံပဲ တတ်နိုင်တော့တယ်"

"ဒါပေမဲ့ အသက်ရှည်နည်းဆိုတာ လူတိုင်းသုံးလို့ရတဲ့ အရာမဟုတ်ဘူး... အောင်မြင်နိုင်ချေကလည်း ရာခိုင်နှုန်းပြည့် မဟုတ်ဘူး"

"ဘာလို့လဲဆိုတော့ စိတ်ဝိညာဉ်အပိုင်းအစကို မျိုးရိုးဗီဇထဲ ပေါင်းစပ်ပြီး နောက်မျိုးဆက်ဆီ လက်ဆင့်ကမ်းလိုက်တဲ့အခါ... မရေမတွက်နိုင်တဲ့ မျိုးဆက်တွေအထိ ဆင်းသက်သွားတဲ့အထဲမှာ ကိုယ့်ရဲ့ မျိုးဆက်ထဲက တစ်ယောက်ယောက်က သေချာပေါက် အစွမ်းနိုးထလာမယ်လို့ ဘယ်သူမှ အာမမခံနိုင်ဘူးလေ"

"တကယ်လို့ အစွမ်းမနိုးထလာနိုင်ဘူးဆိုရင်... စိတ်ဝိညာဉ်အပိုင်းအစကလည်း နိုးထလာဖို့ မဖြစ်နိုင်သလောက်ပဲ"

"ဒါကြောင့်မို့လို့ လူအတော်များများက ဒီအချိန်အထိ သိမ်းဆည်းထားနိုင်မယ့် ခန္ဓာကိုယ်တစ်ခုကို ကြိုတင် ပြင်ဆင်ထားကြပြီး... ကိုယ့်ရဲ့ စိတ်ဝိညာဉ်အပိုင်းအစကို အဲ့ဒီအထဲမှာ ဖွက်ထားကြတယ်... ဒီလိုဆိုရင် အခွင့်အခါသင့်တဲ့အချိန်ကို ရောက်တဲ့အခါ သတ်မှတ်ထားတဲ့ နည်းလမ်းတွေကတစ်ဆင့်... အလောင်းထဲက စိတ်ဝိညာဉ်အပိုင်းအစကို နိုးထစေပြီး ဒုတိယဘဝ ပြန်ရှင်သန်နိုင်ပြီလေ"

"မင်းက ဒီနည်းလမ်းနဲ့ ပြန်နိုးထလာဖို့ စောင့်နေခဲ့တာပေါ့" လင်းယွမ်က ချက်ချင်း မေးလိုက်သည်။

တိချွမ်ခူးက ခေါင်းညိတ်ပြလိုက်သည်။ "ဟုတ်ပါတယ်... ဒါပေမဲ့ ကျွန်တော်က နည်းနည်း လည်ဝယ်အောင် လုပ်ထားတယ်... လူသားတွေကို မျိုးရိုးဗီဇ လက်ဆင့်ကမ်းဖို့ မရွေးချယ်ဘဲ ငါးလူသားတွေနဲ့ ရေသူမတွေကို ရွေးချယ်ခဲ့တာပါ"

"ကျွန်တော်က ဒီငါးလူသားတွေနဲ့ ရေသူမတွေရဲ့ မျိုးရိုးဗီဇထဲမှာ... ကျွန်တော့်ရဲ့ အလောင်းဆီလာပြီး သူတို့ရဲ့ သွေးနဲ့ ပူဇော်ပသရမယ်ဆိုတဲ့ အသိစိတ်ကို ရိုက်သွင်းထားခဲ့တယ်"

"ကျွန်တော့်ရဲ့ စိတ်ဝိညာဉ်အပိုင်းအစကိုတော့... ဒီအရိုးစုထဲမှာ ပုန်းအောင်းနေစေခဲ့တယ်"

"အင်းပေါ့... အမှားအယွင်း တစ်ခုခု ဖြစ်မှာစိုးလို့ ကျွန်တော့်ရဲ့ စိတ်ဝိညာဉ်အပိုင်းအစ အားလုံးကို ဒီအရိုးစုတစ်ခုတည်းအပေါ် ပုံမအောထားခဲ့ပါဘူး... စိတ်ဝိညာဉ်အပိုင်းအစ တစ်စိတ်တစ်ပိုင်းကို ငါးလူသားမျိုးနွယ် အစွမ်းပိုင်ရှင် နောက်မျိုးဆက်တွေရဲ့ ခန္ဓာကိုယ်ထဲကိုပါ မျိုးရိုးဗီဇ လက်ဆင့်ကမ်းထားခဲ့တယ်"

"နောက်မျိုးဆက်တွေထဲမှာ တစ်ယောက်ယောက်က ငါးလူသားအစွမ်း နိုးထလာတာနဲ့... ကျွန်တော့်ရဲ့ စိတ်ဝိညာဉ်အပိုင်းအစ ပြန်နိုးထလာနိုင်ဖို့ အခွင့်အရေး ရှိနေသေးတယ်လေ"

လင်းယွမ် နားလည်သွားသည်။ ဤရှေးဟောင်း အစွမ်းပိုင်ရှင်များသည် ဤမျှများပြားသော နောက်ခံအစီအစဉ်များ ပြင်ဆင်ထားကြသည်ကိုး။

သူ ရုတ်တရက် သတိရသွားသည်။ ရှင်းမြွေမိစ္ဆာဟင်းလင်းပြင် ဘက်ရှိ ကွမ်ယွဲ့တို့အဖွဲ့ တည်ဆောက်ထားသော ရေအောက်ခိုလှုံရေးစခန်းထဲတွင် ငါးလူသားနှင့် ရေသူမ အသွင်ပြောင်း အစွမ်းပိုင်ရှင်များချည်း ရှိနေသည် မဟုတ်ပါလော။

ထိုအချက်ကို တွေးမိလိုက်သည်နှင့် သူ့ရင်ထဲ ဒိန်းခနဲ ဖြစ်သွားပြီး သူ ရှင်းမြွေမိစ္ဆာဟင်းလင်းပြင် သို့ မသွားဖြစ်သည်မှာ အချိန်အတန်ကြာနေပြီ ဖြစ်ကြောင်း သတိပြုမိလိုက်သည်။

ဤတိချွမ်ခူး၏ စိတ်ဝိညာဉ်အပိုင်းအစ တစ်စိတ်တစ်ပိုင်းက ကွမ်ယွဲ့... ဂျိရှောင်ယွီတို့၏ ခန္ဓာကိုယ်ထဲတွင်များ ရှိနေမလား...

ထိုသို့ တွေးမိသည်နှင့် လင်းယွမ်၏ မျက်နှာထား တင်းမာသွားပြီး ချက်ချင်း ပြောလိုက်သည်။ "မင်း ငါနဲ့ အခုချက်ချင်း အပြင်ကို လိုက်ခဲ့"

တိချွမ်ခူး ကြောင်သွားပြီးနောက် ချက်ချင်း ပြန်မေးလိုက်သည်။ "ဒီအတိုင်းပဲ ထွက်သွားရမှာလား... ကျွန်တော့် ခန္ဓာကိုယ်ထဲ ဝင်ပြီးမှ ထွက်သွားလို့ မရဘူးလား"

လင်းယွမ်က "ငါမေးမယ်... မင်း အခု မင်းရဲ့ စိတ်ဝိညာဉ်အပိုင်းအစ ပုန်းအောင်းနေတဲ့လူကို ပြန်တွေ့ရင် ချက်ချင်း ခွဲခြားသိနိုင်မလား" ဟု မေးလိုက်သည်။

"သေချာပေါက် ရပါတယ်"

"ဒါဆို မင်းရဲ့ စိတ်ဝိညာဉ်အပိုင်းအစကို ပြန်စုပ်ယူလို့ရမယ့် နည်းလမ်းရော ရှိလား"

"အမ်... ဒါက ကျွန်တော့် စိတ်ဝိညာဉ်အပိုင်းအစရဲ့ လက်ရှိ အစွမ်းအပေါ် မူတည်တယ်... တကယ်လို့ အပိုင်းအစက အခုလက်ရှိ ကျွန်တော့်ထက် ပိုအစွမ်းထက်နေရင် ကျွန်တော်က သူ့ရဲ့ စုပ်ယူတာကို ခံရလိမ့်မယ်"

"ဒါပေမဲ့ ဘယ်လိုနည်းလမ်းနဲ့ပဲဖြစ်ဖြစ်... နောက်ဆုံးမှာ ကျွန်တော့်ရဲ့ မှတ်ဉာဏ်တွေ ပေါင်းစပ်သွားမှာမို့ ကျွန်တော်က ကျွန်တော်ပဲ ဆက်ဖြစ်နေမှာပါ"

ထိုစကားကို ကြားသောအခါ လင်းယွမ်သည် လင်ယွီရုံ၏ စိတ်ဝိညာဉ်အပိုင်းအစနှင့် သူမ၏ မူလခန္ဓာကိုယ် ပေါင်းစပ်သွားသည့် လုပ်ငန်းစဉ်ကို ပြန်တွေးမိသွားသည်။

ပေါင်းစပ်သွားသရွေ့ သူ၏ ဝိညာဉ်ချုပ်နှောင်ခြင်း သင်္ကေတ၏ ထိန်းချုပ်မှုကို ခံရမည်သာ ဖြစ်သည်။

သူက ချက်ချင်းပင် ပြောလိုက်သည်။ "ဟုတ်ပြီ... မင်း အခုချက်ချင်း ငါနဲ့ အပြင်ကို လိုက်ခဲ့... မင်းရဲ့ ခန္ဓာကိုယ်နဲ့ ပေါင်းစပ်ဖို့ လောမနေနဲ့"

ထိုသို့ပြောပြီးနောက် လင်းယွမ်သည် တိချွမ်ခူးနှင့် လင်ယွီရုံတို့ကို ခေါ်ဆောင်ကာ သုမာရု ဟင်းလင်းပြင်ထဲမှ လျင်မြန်စွာ ထွက်ခွာလာခဲ့သည်။

လင်ယွီရုံက "သခင်... ဘာကိစ္စရှိလို့ ဒီလောက် လောနေတာလဲ" ဟု မေးလိုက်သည်။

လင်းယွမ်က "ငါ့လက်အောက်မှာ ငါးလူသားနဲ့ ရေသူမ အစွမ်းပိုင်ရှင် အဖွဲ့တစ်ဖွဲ့ ရှိတယ်... ငါ နည်းနည်း စိတ်မချလို့ မင်းတို့နှစ်ယောက် သွားကြည့်ပေးဖို့ လိုတယ်" ဟု ပြန်ဖြေသည်။

သူတို့နှစ်ဦး ရင်ထဲ ဒိန်းခနဲ ဖြစ်သွားပြီး တိချွမ်ခူးက "အဲဒီလူတွေရဲ့ ခန္ဓာကိုယ်ထဲမှာ ကျွန်တော်တို့ နှစ်ယောက်ရဲ့ စိတ်ဝိညာဉ်အပိုင်းအစတွေ ရှိနေနိုင်တယ်လို့ သခင် သံသယဝင်နေတာလား" ဟု မေးလိုက်သည်။

လင်းယွမ်က သူတို့နှစ်ဦးကို တည်ငြိမ်စွာ တစ်ချက်ကြည့်လိုက်ပြီး "တကယ်လို့များ ရှိနေခဲ့ရင်... မင်းတို့ ဘာလုပ်ရမလဲ ဆိုတာ သိတယ်မလား"

နှစ်ယောက်သား မတတ်သာဘဲ ခေါင်းညိတ်လိုက်ကြသည်။ လင်းယွမ် ဘာလုပ်ချင်သလဲဆိုတာကို သဘာဝကျစွာပင် သိရှိနေကြသည်။

လူသုံးယောက်သည် ထိုက်ယန်တောင်မှ လျင်မြန်စွာ ထွက်ခွာလာကြပြီး ရှင်းမြွေမိစ္ဆာဟင်းလင်းပြင် အတွင်းသို့ အရှိန်အဟုန်ဖြင့် ပျံသန်းဝင်ရောက်သွားကြသည်။

ယခုအချိန်တွင် ရှင်းမြွေမိစ္ဆာဟင်းလင်းပြင်သည် အချိန်ကြာမြင့်စွာ တိုးတက်ပြောင်းလဲလာခဲ့ပြီးနောက် လုံးဝ အသစ်တစ်ဖန် ဖြစ်သွားကာ ကြီးမားသော အပြောင်းအလဲများ ဖြစ်ပေါ်နေပြီဖြစ်သည်။

ရှင်းမြွေမိစ္ဆာဟင်းလင်းပြင် အတွင်းရှိ ရေလွှမ်းမိုးမှုသည် လီချင်းဟွာက ဟင်းလင်းပြင် အက်ကွဲကြောင်းကို အသုံးပြု၍ ရေဖောက်ထုတ်လိုက်ပြီးနောက် များစွာ ကျဆင်းသွားခဲ့ပြီဖြစ်သည်။

သေချာသည်မှာ လုံးဝတော့ ခန်းခြောက်သွားခြင်း မရှိသေးပေ။

ရှင်းမြွေမိစ္ဆာဟင်းလင်းပြင်သည် ရေပြင်ပေါ်တွင် ပေါလောပေါ်နေသော ဟင်းလင်းပြင် သေတ္တာကြီးတစ်ခုနှင့် တူပြီး သေတ္တာ၏ တစ်စိတ်တစ်ပိုင်းမှာ ရေအောက်တွင် ရှိနေသည်။

လီချင်းဟွာသည် ကျွန်းသခင်တစ်ယောက် အနေဖြင့် ဟင်းလင်းပြင် အက်ကွဲကြောင်းများကို ဖွင့်လှစ်နိုင်သော်လည်း ရေအောက်ပိုင်းရှိ ဟင်းလင်းပြင် အက်ကွဲကြောင်းများကိုမူ ဖွင့်လှစ်၍ မရနိုင်ပေ... ထိုသို့လုပ်ပါက ရေစီးကြောင်းများ ဒလဟော ပြန်လည်စီးဝင်လာစေမည်သာ ဖြစ်သည်။

ထို့ကြောင့် ရေမျက်နှာပြင်နှင့် တစ်ပြေးတည်းဖြစ်နေသော ရေလွှမ်းမိုးမှုကိုသာ ဖောက်ထုတ်နိုင်ခဲ့သည်။

သို့သော်လည်း ထိုသို့လုပ်ဆောင်နိုင်ခဲ့ခြင်းကြောင့်ပင် ရှင်းမြွေမိစ္ဆာဟင်းလင်းပြင် အတွင်းရှိ ရေအမှတ်မှာ များစွာ ကျဆင်းသွားခဲ့ပြီဖြစ်သည်။

ယခုအခါ ရေအမှတ်သည် ပေ ၃၀ အောက်သာ ကျန်ရှိတော့သည်။

အထပ်အများစုမှာ ရေပေါ်သို့ ပေါ်ထွက်နေပြီဖြစ်ပြီး အထပ် (၃) အောက်ပိုင်းသာ ရေမြုပ်နေဆဲဖြစ်သည်။

လူအများအပြားသည် လှေငယ်များကဲ့သို့သော သယ်ယူပို့ဆောင်ရေး ယာဉ်များကို အသုံးပြု၍ သွားလာနိုင်ကြပြီဖြစ်သည်။

မြေပြင်အမြင့်ပိုင်းနေရာများမှာမူ ရေပေါ်သို့ လုံးဝ ပေါ်ထွက်နေပြီဖြစ်ရာ စိုက်ပျိုးရေး လုပ်ငန်းများကို အပြည့်အဝ လုပ်ကိုင်နိုင်နေပြီဖြစ်သည်။

ထိုမျှမက ရှင်းမြွေမိစ္ဆာဟင်းလင်းပြင် အတွင်း၌ အလင်းရောင် မရှိသောကြောင့် ဤနေရာအနှံ့အပြားတွင် သန္ဓေပြောင်း နေကြာပန်းများကို စိုက်ပျိုးထားရာ ကြယ်ပွင့်လေးများအလား ရှင်းမြွေမိစ္ဆာဟင်းလင်းပြင် ကို လင်းထိန်စေသည်။

ဤအချိန်တွင် လင်းယွမ်တို့ သုံးယောက်သည် ရှင်းမြွေမိစ္ဆာဟင်းလင်းပြင် အတွင်းသို့ ရောက်ရှိနေကြပြီဖြစ်သည်။

ယခုအခါ ဤနေရာတွင် တာဝန်ခံများမှာ ဟွမ်ဟန်... ခုံရှန်း... ဝမ်ရှောင်ယာ... ကျိုးချင်းမင်နှင့် အခြားသူများ ဖြစ်ကြသည်။

၎င်းတို့ထဲတွင် ဟွမ်ဟန်သည် လင်းယွမ်နောက်သို့ အစောဆုံး လိုက်ပါခဲ့သူဖြစ်ပြီး ဝမ်ရှောင်ယာနှင့် ခုံရှန်းတို့မှာမူ နောက်ပိုင်းမှ ထိုက်ယန်တောင် သို့ ဝင်ရောက်လာသူများ ဖြစ်ကြသည်။

ကျိုးချင်းမင်သည်ကား လီချင်းဟွာ၏ ညာလက်ရုံးတစ်ဆူဖြစ်ပြီး လီချင်းဟွာကို လင်းယွမ်က မြေဝါနတ်ဘုရားကျွန်း သို့ သွားရောက်စောင့်ကြပ်ရန် စေလွှတ်လိုက်သောအခါ ကျိုးချင်းမင်ကိုမူ ရှင်းမြွေမိစ္ဆာဟင်းလင်းပြင် ကို ထိန်းသိမ်းစောင့်ရှောက်ရန်အတွက် လီချင်းဟွာက ချန်ရစ်ထားခဲ့ခြင်းဖြစ်သည်။

လင်းယွမ်သည် ဤနေရာရှိ လူများကို သွားရောက်အကြောင်းကြားခြင်း မပြုဘဲ ရှောင်မောင်းတောင် သို့ တိုက်ရိုက် သွားရောက်ခဲ့သည်။

ယခုအခါ ရှောင်မောင်းတောင် သည် ရှင်းမြွေမိစ္ဆာဟင်းလင်းပြင် ၏ အဓိက အချက်အချာကျသော နေရာတစ်ခုအဖြစ် တည်ဆောက်ထားပြီး ဖြစ်သည်။

အရေးကြီးသော ဌာနများ၊ ပစ္စည်းသိုလှောင်ရုံများ အားလုံးသည် ဤနေရာတွင် ရှိနေပြီး ဤနေရာသည် ရှင်းမြွေမိစ္ဆာဟင်းလင်းပြင် ၏ ဗဟိုဌာနချုပ်သဖွယ် ဖြစ်နေလေပြီ။

ဆက်ရန်...

နောက်တစ်အုပ်မှာဆိုရင်... ကွမ်ဖူစစ်တပ်မှာ ဘာအပြောင်းအလဲတွေဖြစ်နေလဲ၊ သူတို့ရှာတွေ့ထားတဲ့ ရှေးဟောင်းဂူဆိုတာကရော၊ ကွမ်ဖူစစ်တပ်နောက်မှာ တစ်ကယ်ပဲ ရှေးခေတ်လူသားရှိနေလား၊ မုံယာကုမ္ပဏီရဲ့ဥက္ကဌဆိုတာကရော အစောဆုံးနိုးထလာတဲ့ ရှေးခေတ်လူသားများလား၊ လင်းယွမ်တို့အသစ်တီထွင်ထားတဲ့ ယာဉ်ပျံနဲ့ တိမ်တွေပေါ် သွားဦးမှာလား၊ လင်းယွမ်ကိုယ်တိုင်လိုက်သွားမလား၊ ဘယ်လိုတိုက်ပွဲတွေ ကြုံရဦးမလဲ၊ မုံယာကုမ္ပဏီနဲ့ရော ဘယ်လိုပဠိပက္ခတွေဖြစ်ကြဦးမလဲ၊ လေပေါ်ကျွန်းကို သိမ်းယူဖို့အစီအစဉ်ကရော... စတာတွေကို ဆက်ပြီးစောင့်မျှော်အားပေးကြပါဦးနော်။