အစီအရင် မဟာသခင်
Vol. 29 Ch. 281
"လက်ခံတယ်ဆိုတဲ့ အဓိပ္ပာယ်က..."
ဝေထျန်းရှုံး၏ နှလုံးခုန်သံ မြန်လာပြီး လီချင်းချိုးကို စိုက်ကြည့်ကာ မေးလိုက်၏။
သူသည် ကျွန် သို့မဟုတ် အစေခံ တစ်ဦး ဖြစ်လာရန် ပြင်ဆင်ထားပြီး ဖြစ်ရာ လီချင်းချိုးက ချင်းရှောင်ဂိုဏ်းသို့ ဝင်ရောက်ရန် သူ့ကို ဖိတ်ခေါ်သည်ကို ကြားသောအခါ မှင်တက်သွား၏။ သူ နားကြားမှားသွားသည် သို့မဟုတ် အဓိပ္ပာယ်ကို လွဲမှားစွာ နားလည်မိသည်ဟု ထင်လိုက်သည်။
လီချင်းချိုးက လက်ကို မြှောက်ကာ အသက်ထိန်းချုပ်တဲ့ အဆောင်ကို လက်ဖဝါးထဲသို့ ဆွဲယူလိုက်ပြီး ပြန်ဖြေလိုက်သည်။
"မင်းရဲ့ အသက်ကို ငါ လက်ခံတယ်... အခုကစပြီး မင်းကို ငါ အရှက်ကွဲအောင် လုပ်မှာ မဟုတ်ဘူး... ဒါပေမဲ့ မင်းက ငါ့ရဲ့ ယုံကြည်မှုနဲ့ ထိုက်တန်လား မထိုက်တန်ဘူးလားဆိုတာကိုတော့ စောင့်ကြည့်ဖို့ အချိန်လိုသေးတယ်..."
ရှန်ယွဲ့က စိတ်ထဲမှ ထိုသို့ တွေးလိုက်သည်။
ငါ ထင်တဲ့အတိုင်းပဲ...
အကယ်၍ လီချင်းချိုးသာ ဝေထျန်းရှုံးကို သတ်ချင်ပါက ဤမျှ စကားများများစားစား ပြောနေမည် မဟုတ်ချေ။
ယခု အရင်တိုက်ပွဲကို ပြန်တွေးကြည့်လျှင် ဝေထျန်းရှုံးက သူ့ကို သတ်ချင်နေပုံရသော်လည်း အမှန်တကယ်တော့ သူ့ကို တစ်ချိန်လုံး အခွင့်အရေးများ ပေးနေခဲ့ခြင်း ဖြစ်၏။
သို့သော်လည်း သူသည် ဝေထျန်းရှုံး၏ စရိုက်ကို နားမလည်သေးသဖြင့် အလျင်စလို ဆုံးဖြတ်ချက်ချ၍ မရနိုင်သေးပေ။
လီချင်းချိုး၏ အဖြေကို ကြားသောအခါ ဝေထျန်းရှုံးက ထပ်မံ တိတ်ဆိတ်သွားသော်လည်း ယခုတစ်ကြိမ်တွင် အမူအရာ သိသိသာသာ ပြေလျော့သွားသည်။
ဘယ်လိုပဲဖြစ်ဖြစ် သူက အကျဉ်းသား တစ်ယောက်ပဲလေ… မျက်နှာ နည်းနည်းပျက်ရမယ်ဆိုရင် ဒါက သေချာပေါက် ကောင်းတဲ့ကိစ္စပါပဲ….
လီချင်းချိုးက မူလချီကို အသက်ထိန်းချုပ်တဲ့ အဆောင်ထဲသို့ ထည့်သွင်းလိုက်ပြီး ၎င်း၏ ကန့်သတ်ချက် လုပ်ဆောင်ပုံကို လျင်မြန်စွာ နားလည်သွားသည်။
ရှင်ယွမ်ဂိုဏ်းမှာ စွမ်းရည်အချို့ ရှိကြောင်း ဝန်ခံရမည် ဖြစ်သည်။
ဤအသက်ထိန်းချုပ်တဲ့ အဆောင်မှာ အလွန် အသုံးဝင်ပြီး သေသပ်လှပစွာ ဖန်တီးထားကာ၊ ၎င်းမှာ လက်ရှိတွင် ချင်းရှောင်ဂိုဏ်း လက်လှမ်းမမီနိုင်သေးသော အောင်မြင်မှု အဆင့်တစ်ခု ဖြစ်နေသည်။
အသက်ထိန်းချုပ်တဲ့ အဆောင်မှ တောက်ပသော အလင်းရောင် တစ်ခု ထွက်ပေါ်လာပြီးနောက် ဝေထျန်းရှုံးအပေါ်သို့ ကျရောက်သွားသည့် ရွှေရောင် အလင်းတန်း တစ်ခု ပစ်လွှတ်လိုက်သည်။
ဝေထျန်းရှုံးက မျက်လုံးများကို မှိတ်လိုက်ပြီး ဝိညာဉ် ထိန်းချုပ်မှုကို လက်ခံရန် ပြင်ဆင်လိုက်၏။
ရှန်ယွဲ့က ဤမြင်ကွင်းကို စပ်စုချင်စိတ်ဖြင့် ကြည့်နေသည်။ သူသည် ဝိညာဉ်လမ်းစဉ်ကိုလည်း အတော်လေး စိတ်ဝင်စားနေပြီဖြစ်သည်။
ရွှေရောင် အလင်းတန်း သူ့အပေါ် ကျရောက်လာသည်နှင့်အမျှ မြေပြင်ပေါ်တွင် လဲလျောင်းနေသော ဝေထျန်းရှုံးမှာ သာမန်လူ တစ်ယောက် စိတ်ကူးမယဉ်နိုင်သော နာကျင်မှုကို ခံစားနေရကြောင်း ထင်ရှားနေသည်။
ဝိညာဉ် ခွဲထွက်ခြင်း ခံနေရပြီ။ ပြင်းထန်သော ဒဏ်ရာများနှင့် ပေါင်းစပ်လိုက်သောအခါ ဤအခိုက်အတန့်တွင် သူသည် အသက်ရှင်ရခြင်းထက် သေရခြင်းကို ပို၍ လိုလားနေ၏။
စိတ်ဆန္ဒကို ခိုင်မာအောင် ထိန်းထားနိုင်ရန် ရှင်ယွမ်ဂိုဏ်းနှင့် ကြီးမားသော ရန်ငြိုးကိုသာ သူ တွေးနိုင်သည်။
အချိန်အတော်ကြာ ကုန်လွန်သွားပြီးနောက်….
ရွှေရောင် အလင်းတန်း ပျောက်ကွယ်သွားပြီးနောက် ဝေထျန်းရှုံးမှာ မြေပြင်ပေါ်တွင် လဲလျောင်းနေပြီး တစ်ကိုယ်လုံးမှာ ပို၍ပင် အားနည်းသွားကာ မျက်လုံးများကိုပင် မဖွင့်နိုင်တော့ချေ။
လီချင်းချိုးက အသက်ထိန်းချုပ်တဲ့ အဆောင်ကို ကစားနေ၏။ သူသည် ၎င်းမှတစ်ဆင့် ဝေထျန်းရှုံးနှင့် ချိတ်ဆက်မှု တစ်ခုကို တည်ဆောက်ပြီး ဖြစ်သည်။ ဝေထျန်းရှုံးကို ရုတ်တရက် သေဆုံးသွားစေရန် အဆောင်ကို ချေမွပစ်လိုက်ရုံသာ လိုအပ်သည်။ထို့အပြင် ၎င်းကို အသုံးပြု၍ ဝေထျန်းရှုံးကို နှိပ်စက်နိုင်သေးသည်။
ဤအရာမှာ အမှန်တကယ်ပင် ယုတ်မာပြီး ရက်စက်သော်လည်း အမှန်တကယ် အသုံးဝင်လှသည်။
လီချင်းချိုးက ပြန်ရောက်ပါက အသက်ထိန်းချုပ်တဲ့ အဆောင်ကို လေ့လာရန် လူတစ်ယောက်ကို ခိုင်းစေရန် စီစဉ်လိုက်မည်ဖြစ်သည်။
ဝေထျန်းရှုံးဘက်က ကူညီနိုင်မည်ဆိုလျှင် ပို၍ပင် ကောင်းသေးသည်။
ဤသို့ တွေးပြီးနောက် လီချင်းချိုးက အသက်ထိန်းချုပ်တဲ့ အဆောင်ကို သိုလှောင်အိတ် ထဲတွင် သိမ်းဆည်းလိုက်ပြီးနောက်၊ ဝေထျန်းရှုံးကို ကုသရန် စိတ်ဝိညာဉ်ပြန်လည်နုပျိုခြင်း တစ္ဆေအပ်စိုက်ပညာကို အသုံးပြုလိုက်သည်။
ဤအခိုက်အတန့်တွင် ပိုင်နင်းအာက ယန်တောက်ကျုံးကို တွဲ၍ ပျံသန်းလာပြီး လီချင်းချိုး၏ နောက်တွင် ဆင်းသက်လိုက်သည်။
လီချင်းချိုးက ယန်တောက်ကျုံးကို လှည့်ကြည့်လိုက်ပြီး မျက်မှောင်ကြုတ်ကာ မေးလိုက်သည်။
"မင်း ဘယ်လိုလုပ် ဒီလောက် ပြင်းပြင်းထန်ထန် ဒဏ်ရာရသွားတာလဲ..."
သူသည် ယန်တောက်ကျုံး၏ ဒဏ်ရာများကို အစောကတည်းက မြင်ခဲ့ပြီး ဖြစ်သည်။ အကြောင်းရင်းကို မေးနေခြင်း ဖြစ်၏။
ရှန်ယွဲ့ပင်လျှင် ဤမျှ ပြင်းထန်သော ဒဏ်ရာများ မရရှိခဲ့ချေ။
ယန်တောက်ကျုံး သတိပြန်လည်လာပြီ ဖြစ်သောကြောင့် လီချင်းချိုး၏ မေးခွန်းကို ရင်ဆိုင်ရချိန်တွင် ခါးသီးသော အပြုံးတစ်ခုကို ပြုံးလိုက်ပြီး မည်သို့ ဖြေရမည်ကို မသိတော့ချေ။
"သူလည်း ကျုပ်ကို ကူညီနေခဲ့တာပါ... ဂိုဏ်းချုပ် အရင်က မမြင်ခဲ့ပေမဲ့ သူ့ရဲ့ အရှိန်အဝါက မယုံနိုင်လောက်အောင် အစွမ်းထက်ပြီး ဝိညာဉ်အသိအာရုံအဆင့် ကျင့်ကြံသူ တစ်ယောက်နဲ့တောင် ယှဉ်နိုင်လုနီးပါးပဲ..." ဟု ရှန်ယွဲ့က ဝင်ပြောလိုက်သည်။
"ဟုတ်တယ်... အဲဒါ တကယ်ကို အံ့ဩစရာကောင်းတယ်... စီနီယာ ယန်တောက်ကျုံးက မကျင့်ကြံခင်မှာတောင် အရမ်း အစွမ်းထက်နေတာ... အကယ်၍ သူသာ ကျင့်ကြံမယ်ဆိုရင် သေချာပေါက် နောက်ထပ် စီနီယာ ရှန်ယွဲ့ ဖြစ်လာမှာပဲ..."
ပိုင်နင်းအာက စိတ်လှုပ်ရှားစွာ ပြောလိုက်ရာ သူ့လေသံတွင် လေးစားမှုများ ပြည့်နှက်နေသည်။
လီချင်းချိုးက ယန်တောက်ကျုံးကို ကြည့်လိုက်ပြီး ၎င်းမှာ အရေးကြီးသော အခိုက်အတန့်တွင် ပေါက်ကွဲထွက်လာသော လောကီ လူသားဘိုးဘေးကံကြမ္မာ ဖြစ်လောက်သည်ဟု စိတ်ထဲမှ ခန့်မှန်းလိုက်သည်။
ယန်တောက်ကျုံးသည် သိုင်းနတ်ဘုရား၏ ကြီးစိုးသော ကိုယ်ဟန်ကို ပိုင်ဆိုင်ထားသည်။ ခွန်အားများ ကြီးထွားလာသည်နှင့်အမျှ ဤသိုင်းနတ်ဘုရား၏ ကြီးစိုးသော ကိုယ်ဟန်မှာ ပိုမို အစွမ်းထက်လာမည် ဖြစ်ပြီး၊ လူအနည်းငယ်ဖြင့် လူအများအပြားကို တိုက်ခိုက်ရာတွင် အထူး ကျွမ်းကျင်လိမ့်မည် ဖြစ်သည်။
သို့သော်လည်း ယန်တောက်ကျုံး၏ လောကီ လူသားဘိုးဘေးကံကြမ္မာထက် ပိုင်နင်းအာ၏ ကံကောင်းသူ ကံကြမ္မာကို လီချင်းချိုးက ပို၍ စပ်စုချင်နေမိသည်။
ဤအဖြစ်အပျက်က ချင်းရှောင်ဂိုဏ်းကို ဝိညာဉ်အသိအာရုံအဆင့်ထက် ကျော်လွန်သော ကျွမ်းကျင်သူ တစ်ဦး ယူဆောင်လာပေးခဲ့သဖြင့် အကျိုးအမြတ် အလွန် ကြီးမားသည်ဟု ယူဆနိုင်သည်။
သေချာ စဉ်းစားကြည့်လျှင် ရက်စက်ကြမ်းကြုတ်သော မိစ္ဆာ ကျင့်ကြံသူ တစ်ဦး မဟုတ်ဘဲ ဝေထျန်းရှုံးကို သူတို့ တွေ့ဆုံခဲ့ရခြင်းမှာ ကံကောင်းသူ ကံကြမ္မာကြောင့် ဖြစ်ကောင်း ဖြစ်နိုင်ပေသည်။
ဝေထျန်းရှုံးသည် အပေါ်ယံတွင် လူကောင်း တစ်ယောက်နှင့် မတူသော်လည်း အစစ်အမှန် စရိုက်လက္ခဏာကိုတော့ ပြောရန် ခက်ခဲလှသည်။
လီချင်းချိုး၏ အကြည့်များ သူ့ထံသို့ ရောက်လာသည်ကို မြင်သောအခါ ပိုင်နင်းအာ၏ အပြုံး ပျောက်ကွယ်သွားသည်။ သူက အသက်ပြင်းပြင်း ရှူလိုက်ပြီး….
"ဂိုဏ်းချုပ်... ကျွန်တော် မှားမှန်း သိပါပြီ... နောက်ဘယ်တော့မှ အခုလို သတိလက်လွတ် မလုပ်တော့ပါဘူး..."
ဤတစ်ကြိမ်တွင် သူ အမှန်တကယ် ကြောက်ရွံ့သွားခဲ့ပြီ ဖြစ်သည်။
လီချင်းချိုးသာ အချိန်မီ မရောက်လာခဲ့ပါက သူတို့ သုံးဦး မည်သို့ ဖြစ်သွားမည်ကို စိတ်ကူးတောင် မယဉ်ရဲချေ။
လီချင်းချိုးက ပိုင်နင်းအာကို အမှန်တကယ် အပြစ်မတင်ခဲ့သော်လည်း သူ ဤမျှ လေးနက်နေသည်ကို မြင်သောအခါ ဖြစ်ပျက်ခဲ့သည့် ကိစ္စများတွင် အချိုးအကွေ့များ ရှိခဲ့နိုင်သည်ဟု ခန့်မှန်းလိုက်မိသည်။
"မင်း ငယ်ပါသေးတယ်... ဒီသင်ခန်းစာကနေ မင်း တကယ်ကို သင်ယူနိုင်လိမ့်မယ်လို့ ငါ မျှော်လင့်တယ်..." ဟု လီချင်းချိုးက လေးနက်စွာ ပြောလိုက်တော့ ပိုင်နင်းအာက အလျင်အမြန် ကတိပေးလိုက်သည်။
ရှန်ယွဲ့က …. "သူ တကယ်တမ်း မှားယွင်းတဲ့ အလုပ် ဘာမှ မလုပ်ခဲ့ပါဘူး... သတ္တိ နည်းနည်း ပိုနေရုံလေးပါ... နောက်ဆုံးတော့ ကျုပ်တို့ နှစ်ယောက်ကသာ အရည်အချင်း မရှိခဲ့တာပါ..."
ယန်တောက်ကျုံးကလည်း ခေါင်းညိတ်၍ …."အမှန်ပါပဲ... အဲဒါ ကျွန်တော်တို့ရဲ့ အပြစ်ပါ..."
ဝေထျန်းရှုံးက ယန်တောက်ကျုံးကို ကြီးမားသော ထိုးနှက်ချက် တစ်ခု ပေးခဲ့ချေပြီ။ သူ့ရဲ့မျက်လုံးများမှာ မှေးမှိန်နေပြီး သူ၏ အတွင်းစိတ် လှုပ်ရှားမှုများကို ရှင်းလင်းစွာ မြင်တွေ့နိုင်သည်။
"ငါတို့ ပြန်ရောက်မှ အကျဉ်းချုပ် ကြည့်ကြတာပေါ့... လောလောဆယ် ဒီခရီးစဉ်ကနေ မင်းတို့ ရှာတွေ့ခဲ့တာတွေကို ပြောပြပါဦး..."
လီချင်းချိုးက ညွှန်ကြားလိုက်၏။ ဝေထျန်းရှုံး နိုးမလာသေးသည်ကို မြင်သောအခါ သူက ရှန်ယွဲ့နှင့် အခြား နှစ်ဦးကို သူတို့၏ အတွေ့အကြုံများကို ပြန်ပြောပြရန် ခိုင်းလိုက်သည်။
ရှန်ယွဲ့က ပိုင်နင်းအာကို အချက်ပြလိုက်ရာ ပိုင်နင်းအာက ဇာတ်လမ်းကို ပြောပြနေစဉ်၊ သူနှင့် ယန်တောက်ကျုံးတို့မှာ ထိုနေရာတွင် တင်ပျဉ်ခွေ ထိုင်ကာ အတွင်းအားများကို စတင် ထိန်းညှိနေကြသည်။
ဤမြေအောက်တွင် ထိုက်ကျွယ်ဂိုဏ်း၏ နန်းတော် အပျက်အစီးများ ရှိနေပြီး တစ်ခုတည်း မဟုတ်ကြောင်း ကြားရသောအခါ လီချင်းချိုးလည်း စိတ်ဝင်စားသွားသည်။
ရှန်ယွဲ့နှင့် အခြား နှစ်ဦးမှာ အပြည့်အဝ စုံစမ်းစစ်ဆေးခြင်း မပြုရသေးပေ။ ဝေထျန်းရှုံးက သူတို့၏ လုပ်ငန်းစဉ်ကို နှောင့်ယှက်ခဲ့ခြင်း ဖြစ်သည်။
ဝေထျန်းရှုံးကတော့ ထိုက်ကျွယ်ဂိုဏ်းအကြောင်း ပိုသိရမည်ဟု လီချင်းချိုး ခံစားရသဖြင့် စုံစမ်းစစ်ဆေးမှုကို မဆက်လက်မီ ဝေထျန်းရှုံး နိုးလာမည့်အချိန်ကို စောင့်ရန် စီစဉ်လိုက်သည်။
ပိုင်နင်းအာ၏ ပြောပြချက်များမှတစ်ဆင့် ရှေးဟောင်း ထိုက်ကျွယ်ဂိုဏ်း မည်မျှ အစွမ်းထက်ခဲ့မည်ကို လီချင်းချိုး အကြမ်းဖျင်း ခံစားမိနေပြီ ဖြစ်သည်။
သို့တိုင်အောင် ထိုမျှ ကြောက်မက်ဖွယ်ကောင်းသော ထိုက်ကျွယ်ဂိုဏ်းမှာ ဖျက်ဆီးခံခဲ့ရသည်။
၎င်းသည် မိစ္ဆာနယ်မြေများကြောင့် ဖျက်ဆီးခံခဲ့ရခြင်းလား သို့မဟုတ် အခြား အကြောင်းရင်းများကြောင့်လား ဆိုသည်ကို လီချင်းချိုး စိတ်ဝင်စားလာသည်။
ထို့အပြင် အနာဂတ်အတွက် အစီအစဉ်များ ချမှတ်ရန် ဝေထျန်းရှုံးထံမှ ကောင်းကင်ငရဲပင်လယ် နှင့် အခြား ကျင့်ကြံရေး ဂိုဏ်းများအကြောင်းကိုလည်း လေ့လာလိုသေးသည်။
ချင်းရှောင်ဂိုဏ်းသည် အစောပိုင်း သို့မဟုတ် နောက်ပိုင်းတွင် အခြား ကျင့်ကြံရေး ဂိုဏ်းများနှင့် တွေ့ဆုံရမည်သာ ဖြစ်သည်။ အကယ်၍ သူတို့အကြောင်း ဘာမှ မသိပါက ချင်းရှောင်ဂိုဏ်းဘက်က သေချာပေါက် ဆုံးရှုံးမှုများ ကြုံတွေ့ရလိမ့်မည်။
အချိန်များ လျင်မြန်စွာ ကုန်လွန်သွားသည်…..
ဝေထျန်းရှုံး သတိပြန်မလည်မီ တစ်နာရီ အပြည့် ကြာမြင့်ခဲ့သည်။
သူ မျက်လုံး ဖွင့်လိုက်တော့ လီချင်းချိုးတို့၏ပုံရိပ်များကို တွေ့လိုက်ရသည်။ ၎င်းမှာ ပြန်လည်မွေးဖွားလာသလိုပင်။
သူသည် အသက်ထိန်းချုပ်တဲ့ အဆောင်၏ စွမ်းအားကို အမြဲ သိထားခဲ့သော်လည်း ၎င်း၏ အကျိုးသက်ရောက်မှုများကို ခံစားရခြင်းမှာ ဤအကြိမ်သည် ပထမဆုံး ဖြစ်သည်။
လီချင်းချိုးက…..
"မင်း နောက်ဆုံးတော့ နိုးလာပြီပဲ... အခု ငါ့ကို တစ်ခုလောက် ဖြေပေးပါ... ငါတို့က ထိုက်ကျွယ်ဂိုဏ်းရဲ့ အမွေအနှစ်ကို တူးဖော်ချင်တယ်... ငါတို့ လူနည်းနည်းလေးနဲ့ အန္တရာယ်ကင်းနိုင်ပါ့မလား..."
ထိုအခါ ဝေထျန်းရှုံးက ပါးစပ်ကို ဖွင့်ကာ အက်ကွဲကွဲ အသံဖြင့် ပြန်ဖြေလိုက်သည်။
"အန္တရာယ်... မကင်းဘူး..."
"ကောင်းပြီ... ငါတို့ အရင် ချင်းရှောင်ဂိုဏ်းကို ပြန်ကြမယ်... ဒီကိစ္စကို နောက်မှ ဆွေးနွေးကြတာပေါ့!"
လီချင်းချိုးက ပြတ်သားစွာ အမိန့်ပေးလိုက်ပြီးနောက် လေချွန်လိုက်လေသည်။
လေချွန်သံကို ကြားသောအခါ ရှန်ယွဲ့နှင့် ပိုင်နင်းအာတို့မှာ တစ်ခဏမျှ မှင်တက်သွားကြပြီး အလိုအလျောက် မော့ကြည့်လိုက်ကြသည်။
ဂိုဏ်းချုပ်ရဲ့ နတ်ငှက်လည်း ရောက်လာတာလား…
ထိုစဉ် ကြမ်းတမ်းသော လေပြင်း တစ်ချက် တိုက်ခိုက်လာပြီး ဖုန်မှုန့်များ ထောင်းထောင်းထကုန်သည်။
ပိုင်နင်းအာက အဝေးရှိ တောင်ထွတ်တစ်ခု၏ နောက်ကွယ်မှ ထွက်ပေါ်လာသော ဧရာမ ပုံရိပ်ကြီး တစ်ခုကို မြင်လိုက်ရသဖြင့် မျက်လုံးများ အလိုအလျောက် ပြူးကျယ်သွားတော့သည်။
"ဘာလို့ အဲဒီလောက် ကြီးရတာလဲ..."
...
ချင်းရှောင်တောင်မှ လီချင်းချိုး ထွက်ခွာသွားသည်ကို မည်သူမျှ သတိမပြုမိကြချေ။ သူ ပြန်ရောက်လာသောအခါတွင်လည်း သူ ထွက်သွားဖူးကြောင်း မည်သူမျှ သတိမထားမိကြပေ။
ရှောင်ပါးက သူတို့ကို သယ်ဆောင်လာပြီး ထိုက်ခွန်းတောင်တန်း အနီးတွင် ဆင်းသက်ခဲ့သည်။ ထို့နောက် လီချင်းချိုးက ဝေထျန်းရှုံးနှင့် ရှန်ယွဲ့တို့ကို ချင်းရှောင်တောင်ရှိ လင်းရှောင်ခြံဝင်းသို့ ပြန်လည် ခေါ်ဆောင်သွားပြီး ပိုင်နင်းအာနှင့် ယန်တောက်ကျုံးတို့မှာမူ အနားယူရန် အသီးသီး ပြန်သွားကြသည်။
ညနေစောင်းသို့ ရောက်ရှိလာပြီ ဖြစ်၏။
လီချင်းချိုး၊ ရှန်ယွဲ့နှင့် ဝေထျန်းရှုံးတို့ စားပွဲရှည် တစ်လုံးတွင် ထိုင်နေကြသည်။ ဝေထျန်းရှုံးက ခုံရှည် တစ်ခုပေါ်တွင် တင်ပျဉ်ခွေ ထိုင်ကာ ဒဏ်ရာများကို ကုသနေသည်။
အသက်ထိန်းချုပ်အဆောင်က သူ့ကို ကြီးမားသော ထိခိုက်မှု ဖြစ်စေခဲ့သဖြင့် ပြန်အလာလမ်းတွင် မူးဝေပြီး ယိုင်နဲ့နေခဲ့သည်။
လီချင်းချိုး အလျင်မလိုချေ။ စောင့်ဆိုင်းနေစဉ်အတွင်း ရှန်ယွဲ့နှင့် ဓားလမ်းစဉ် အကြောင်းကို ဆွေးနွေးနေခဲ့သည်။
ရှန်ယွဲ့က ဝေထျန်းရှုံးကို အနိုင်ယူရန် လီချင်းချိုး အသုံးပြုခဲ့သော ဓားချက်ကို အလွန် စိတ်ဝင်စားနေပြီး လီချင်းချိုးကလည်း မည်သည့်အရာကိုမျှ ဖုံးကွယ်မထားဘဲ အသေးစိတ် ရှင်းပြပေးခဲ့သည်။
"ဟင်... အကြီးအကဲရှန်ယွဲ့... ပြန်ရောက်နေပြီလား..."
အမျိုးသမီး အသံတစ်ခု ထွက်ပေါ်လာပြီး ကျူးယန် ခြံဝင်းအတွင်းသို့ ဝင်လာလေသည်။
ရှန်ယွဲ့က ခေါင်းလှည့်ကာ သူမကို ခေါင်းညိတ်ပြ၍ နှုတ်ဆက်လိုက်သော်လည်း စကားမပြောခဲ့ပေ။
ကျူးယန်က ဝေထျန်းရှုံးကို သတိပြုမိသွားခဲ့သည်။ စုတ်ပြတ်နေသော အနက်ရောင် အဝတ်အစားများ ဝတ်ဆင်ထားပြီး ဆံပင်ဖြူများ ရှိနေသည့် ထိုသူကို တစ်ချက်ကြည့်ရုံဖြင့် သာမန် မဟုတ်ကြောင်း သိနိုင်ပြီး ရက်စက်ကြမ်းကြုတ်သော မိစ္ဆာ တစ်ကောင်နှင့် အလွန် တူနေသည်။
သူမက သူ့ကို တစ်ချက်သာ ကြည့်လိုက်ပြီးနောက် လီချင်းချိုးအနားသို့ လျှောက်သွားကာ ဦးညွှတ်ပြီး တီးတိုး ပြောလိုက်သည်။
"ဂိုဏ်းချုပ်... ကျွန်မ ဆွေးနွေးစရာ ကိစ္စလေး တစ်ခု ရှိလို့ပါ..."
ဓမ္မညီလာခံ ပြိုင်ပွဲမှာ ဆက်လက် ကျင်းပနေဆဲ ဖြစ်သော်လည်း ဆုလာဘ်များအတွက် ပြင်ဆင်မှုများကို စတင်နေပြီ ဖြစ်သည်။ထို့ကြောင့် မှော်ပစ္စည်းများ မရှိမဖြစ် လိုအပ်နေသည်။
တပည့်များမှာ ပိုမို အစွမ်းထက်လာနေပြီး အဆင့်နိမ့် မှော်ပစ္စည်းများမှာ မသင့်လျော်တော့ချေ။ ထို့ကြောင့် ကျူးယန်က ပိုမို အစွမ်းထက်သော မှော်ပစ္စည်းများကို ဖန်တီးလိုခဲ့သည်။
မှော်ပစ္စည်းများဖန်တီးခြင်း ဆိုသည်မှာ တွေးကြည့်ရုံဖြင့် ပြီးသွားမည့် ကိစ္စ မဟုတ်ဘဲ ပိုမို ကောင်းမွန်သော အရင်းအမြစ်များ လိုအပ်ပေသည်။
"အလျင်မလိုပါဘူး... အရင် ထိုင်ပြီး ငါတို့ တခြား ကိစ္စတစ်ခု ဆွေးနွေးနေတာကို နားထောင်ပါဦး..."
လီချင်းချိုးက ပြုံးလိုက်ပြီး ကျူးယန်ကို ထိုင်ရန် လက်ဟန်ပြလိုက်သည်။
၎င်းကို မြင်သောအခါ ကျူးယန်မှာ အရင် ထိုင်နေရုံသာ တတ်နိုင်တော့၏။ သို့သော်လည်း လီချင်းချိုးနှင့် ရှန်ယွဲ့တို့က ဓားလမ်းစဉ်အကြောင်း ဆက်လက် ဆွေးနွေးနေကြသည်ကို ကြားသောအခါ၊ လီချင်းချိုး ပြောသော ကိစ္စမှာ ဤလျှို့ဝှက်ဆန်းကြယ်သော အနက်ရောင် ဝတ်စုံနှင့် အမျိုးသားနှင့် ဆက်စပ်နေကြောင်း သူမ သဘောပေါက်သွားသည်။
ကောင်းကင်လက်မှုပညာခန်းမ၏ ခန်းမသခင်ဖြစ်သော သူမနှင့် မည်သည့် ကိစ္စက သက်ဆိုင်နိုင်မည်နည်း။
ကျူးယန်မှာ ပဟေဠိဖြစ်မှုများဖြင့် ပြည့်နှက်နေသော်လည်း သူမ၏ စရိုက်မှာ တည်ငြိမ်ပြီး ခံစားချက်များကို မျက်နှာပေါ်တွင် အသိမခံခဲ့ပေ။
အချိန်အတော်ကြာပြီးနောက်….
ဝေထျန်းရှုံးက နောက်ဆုံးတွင် မျက်လုံးများကို ဖွင့်လိုက်၏။ သူက ညစ်ညမ်းသော လေကို မှုတ်ထုတ်လိုက်ပြီး သူ့အကြည့်များတွင် တက်ကြွမှု အနည်းငယ် ပြန်လည် ရောက်ရှိလာသည်။
လီချင်းချိုးနှင့်အကြည့်ချင်းဆုံသွားတော့ အမူအရာ ရှုပ်ထွေးနေပြန်သည်။
ယခုမှစ၍ သူ့အသက်သည် ဤလူ၏ လက်ထဲတွင် ရှိနေတော့မည် ဖြစ်သည်။
"နိုးပြီလား..."ဟု လီချင်းချိုးက ဝေထျန်းရှုံးကို ကြည့်ကာ မေးလိုက်သည်။
ဝေထျန်းရှုံးက ခေါင်းညိတ်လိုက်ပြီး….
"မင်းက ထိုက်ကျွယ်ဂိုဏ်းရဲ့ အမွေအနှစ်ကို လိုချင်တာလား..."
ထိုက်ကျွယ်ဂိုဏ်း….
ဤစကားကို ကြားသောအခါ ကျူးယန် စိတ်ဝင်စားသွားတော့သည်။
"အမွေအနှစ်တစ်ခုတည်းတင် မဟုတ်ဘူး... အရာအားလုံးကိုပဲ... အဲဒီ မြေအောက် နန်းတော်တွေရဲ့ ဖွဲ့စည်းပုံနဲ့ ယန္တရားတွေက လေ့လာဖို့ တန်ဖိုးရှိတယ်... နန်းတော်တွေကိုယ်တိုင်ကတောင် အရင်းအမြစ်တွေ အဖြစ် ပြောင်းလဲပစ်လို့ ရတယ် မဟုတ်ဘူးလား..."
ဝေထျန်းရှုံး မှင်တက်သွားလေပြီ။ လီချင်းချိုး၏ စဉ်းစားတွေးခေါ်မှုများက ဤမျှအထိ... အမြော်အမြင် ကြီးမားလိမ့်မည်ဟု သူ မမျှော်လင့်ထားခဲ့ချေ။
"ကောင်းပြီ... အဲဒါမတိုင်ခင် မင်းက ချင်းရှောင်ဂိုဏ်းကို တရားဝင် ဝင်ရမယ်... မင်း သဘောတူလား..." ဟု လီချင်းချိုးက ထပ်မေးလိုက်သည်။
မေးရသည့် အကြောင်းရင်းမှာ ဝေထျန်းရှုံး၏ပုံရိပ် တာအိုမျိုးဆက် စနစ် တွင် မပေါ်လာသေးသောကြောင့်ပင်။
ထိုအခါ ဝေထျန်းရှုံးက အသက်ပြင်းပြင်း ရှူလိုက်ပြီး မတ်တတ်ရပ်ကာ လီချင်းချိုးကို ဦးညွှတ်၍ ….
"တပည့် ဝေထျန်းရှုံး... ဂိုဏ်းချုပ်ကို အရိုအသေပေးပါတယ်..."
စကားသံ အဆုံးတွင် ဝေထျန်းရှုံး၏ ပုံရိပ် တာအိုမျိုးဆက်စနစ်၏ အောက်ခြေဆုံးတွင် ပေါ်လာတော့သည်။
ထိုအခါ လီချင်းချိုး၏ မျက်နှာတွင် အပြုံးတစ်ခု ပေါ်လာသည်။
"အခု... ထိုက်ကျွယ်ဂိုဏ်းရဲ့ နန်းတော် အပျက်အစီးတွေနဲ့ ပတ်သက်ပြီး မင်းသိသမျှကို ငါတို့ကို ပြောပြပါ..."
သူသည် ဝေထျန်းရှုံး၏ ကိုယ်ရေးအချက်အလက်ကို စစ်ဆေးရန် ချက်ချင်း ဆုံးဖြတ်လိုက်သည်။
[အမည် - ဝေထျန်းရှုံး]
[လိင် - ကျား]
[အသက် - ၇၂၃ နှစ် (၄၂၇ နှစ် ကုန်ဆုံးသွားပြီ ဖြစ်သည်)] >
[သစ္စာစောင့်သိမှု (ဂိုဏ်းချုပ်/ဂိုဏ်း) - ၃၁/၃၅ (အများဆုံး ၁၀၀)]
[ကျင့်ကြံခြင်း ပါရမီ - အတော်လေး ကောင်းမွန်]
[နားလည်နိုင်စွမ်း - ထူးချွန်]
[ကံကြမ္မာ - ကြီးမားသော ဘေးဒုက္ခမှ အသက်ရှင် လွတ်မြောက်သူ၊ အစီအရင် မဟာသခင်၊ ပါရမီရှင်များကို တန်ဖိုးထားသော နှလုံးသား]
[ကြီးမားသော ဘေးဒုက္ခမှ အသက်ရှင် လွတ်မြောက်သူ - ကြီးမားသော ဘေးဒုက္ခမှ အသက်ရှင် လွတ်မြောက်လာတိုင်း ကျင့်ကြံခြင်းအပေါ် နားလည်နိုင်စွမ်းများ တိုးလာမည်]
[အစီအရင် မဟာသခင် - အစီအရင် လမ်းစဉ်အပေါ် ထူးခြားသော ထိုးထွင်းသိမြင်မှုနှင့် စိတ်ဝင်စားမှု ရှိပြီး ဤလမ်းစဉ်တွင် မဟာသခင် တစ်ဦး ဖြစ်လာရန် ကံကြမ္မာ ပါလာသူ ဖြစ်သည်]
[ပါရမီရှင်များကို တန်ဖိုးထားသော နှလုံးသား - ပါရမီရှင် တစ်ဦးနှင့် ရင်ဆိုင်ရချိန်တွင် လမ်းညွှန်မှုများ ပေးရန် မနေနိုင်ဘဲ သူတို့ကို တပည့်အဖြစ်ပင် လက်ခံလိုစိတ် ရှိသည်]