အခန်း (၂၀၉-၂၁၀)
Vol. 21 Ch. 209-210
Chapter 209
~
အခန်း ၂၀၉ : သမိုင်းတစ်လျှောက် အမြန်ဆုံး သူတော်စင်လောင်းလျာ ပြိုင်ပွဲ
~
၂၀၇၇ ခုနှစ် ဇွန်လ ၂၈ ရက်။
အမှတ်တရဖြစ်ထိုက်သော နေ့တစ်နေ့ပင် ဖြစ်သည်။
နတ်ဘုရားတမန်တော် ချီ၏ လမ်းညွှန်မှုနောက်သို့ လိုက်ပါရင်း ဂူချန်သည် တောင်ဘက်မဟာမိတ်အဖွဲ့၏ အစွန်အဖျားရှိ သတ်မှတ်ထားသော နေရာတစ်ခုသို့ မကြာမီ ရောက်ရှိသွားပြီး ထိုနေရာတွင် အနီရောင်ဝတ်ရုံကြီးကို ဝတ်ဆင်ထားသည့် လူတစ်ယောက်နှင့် တွေ့ဆုံခဲ့သည်။
တစ်ချက်ကြည့်လိုက်ရုံဖြင့် ထိုလူ၏ အချက်အလက်အားလုံးကို ဂူချန် သိရှိသွားသည်။ သူသည် အဆင့်ခုနစ် အစောပိုင်းအဆင့်ဖြစ်ပြီး အရှိန်အဝါမှာ တည်ငြိမ်မှုမရှိပေ။ ၎င်းမှာ အဆင့်တက်ရန် အတင်းအဓမ္မ လုပ်ဆောင်ထားခြင်း ဖြစ်ပုံရပြီး လမ်းပြအဖြစ်သာ အသုံးပြုခံရခြင်း ဖြစ်နိုင်သည်။
အနီရောင်ဝတ်ရုံဝတ်လူမှာ ဘာမှမပြောဘဲ ဂူချန်ကို လျှို့ဝှက်လမ်းတစ်ခုအတွင်းသို့ ခေါ်ဆောင်သွားပြီး အနီရောင် တယ်လီပို့အစီအရင် ရှေ့သို့ ရောက်ရှိသွားသည်။
သူတော်စင် ရွေးချယ်ပွဲသို့ မသွားရောက်မီ သူတော်စင်လောင်းလျာတိုင်းသည် ဗတ္တိဇံခံယူခြင်း အဆင့်ကို ဖြတ်ကျော်ရသည်။ ၎င်းမှာ အဓိကအားဖြင့် တားမြစ်ပစ္စည်းများ ပါမပါ စစ်ဆေးခြင်းနှင့် ဦးနှောက်ဆေးခြင်း လုပ်ငန်းစဉ်တစ်ခုသာ ဖြစ်သည်။
အနီရောင်ဝတ်ရုံဝတ်လူမှာ သူ၏ အရိုးနှင့်အရေသာကျန်တော့သည့် လက်ကို ပူးကပ်လိုက်ပြီး ဂူချန်ကို ဦးတည်၍ ဂါထာမန္တန်များကို တိုးတိုးလေး ရွတ်ဆိုတော့သည်။ ထိုဂါထာစာသားများသည် လေထဲတွင် သက်ရှိများကဲ့သို့ ကခုန်နေကြပြီးနောက် ဂူချန်၏ ခန္ဓာကိုယ်အတွင်းသို့ တိုးဝင်သွားကြသည်။
ဂူချန်၏ မျက်ဝန်းနက်ရှိုင်းသော နေရာတွင် အထင်အမြင်သေးသည့် အရိပ်အယောင်တစ်ခု ရှိနေသော်လည်း မည်သည့် တုံ့ပြန်မှုမျှ မလုပ်ဘဲ ငြိမ်ခံနေလိုက်သည်။
[ အိမ်ရှင်တွင် စိတ်ဝိညာဉ် အကာအကွယ် ပါရမီ ရှိနေသည်ကို တွေ့ရှိရပါသည်၊ ၎င်းသည် စိတ်ပိုင်းဆိုင်ရာ တိုက်ခိုက်မှုများကို ခုခံပေးနိုင်ပါသည် ]
ဤပါရမီမှာ မျက်ဆန်နှစ်ထပ်မျက်ဝန်းကို ပထမဆုံး ရရှိစဉ်ကတည်းက ပါလာခဲ့ခြင်း ဖြစ်သည်။ မဟာမိတ်အဖွဲ့က သူ့ကို ရှာတွေ့နိုင်မလားဆိုသည်ကို ဂူချန် သိပ်ပြီး စိတ်မပူပေ။ အဘယ်ကြောင့်ဆိုသော် ကောင်းကင်တာအို မျက်ဆန်နှစ်ထပ်မျက်ဝန်းဖြင့် ကြိုတင်မြင်ခဲ့သည့်အတိုင်း သူတို့သည် နတ်ဘုရားမီးတောက်ဂိုဏ်း၏ ဌာနချုပ်တွင်သာ သူ့ကို ဝိုင်းတိုက်ကြမည် ဖြစ်သောကြောင့် ဖြစ်သည်။
ထိုတင်ဆက်မှုကို ကြည့်ရှုပြီးနောက် အနီရောင်ဝတ်ရုံဝတ်လူမှာ ဂူချန်ကို တယ်လီပို့အစီအရင်ပေါ်သို့ ခေါ်ဆောင်သွားပြီး ထစ်ထစ်ငေါ့ငေါ့ဖြင့် ပြောလိုက်သည်။
" မင်း ..ဗိ..မာန်..တော်..ထဲကို ရောက်တာနဲ့ ..သူတော်စင် ..ရွေးချယ်ပွဲက စတင်..ပြီ .. "
" ဒီ..နှစ်ရဲ့ ..သူတော်စင်.. ရွေးချယ်ပွဲက အရင်အတိုင်းပဲ..နောက်ဆုံး တစ်ယောက်တည်း ..ကျန်တဲ့အထိ သတ်ရမှာ.. "
ပြောပြီးသည်နှင့် အနီရောင်ဝတ်ရုံဝတ်လူမှာ ချက်ချင်းပင် အရည်ပျော်သွားပြီး သွေးအိုင်တစ်ခုအဖြစ် ပြောင်းလဲကာ တယ်လီပို့အစီအရင်အတွင်းသို့ စီးဝင်သွားသည်။ ၎င်းမှာ အသိစိတ်ရှိသော မြစ်တစ်စင်းအလား အစီအရင်၏ အပေါက်အားလုံးကို ဖြည့်ဆည်းပေးလိုက်သည်။
ဝုန်း...
မြေအောက်ခန်းမှာ ပြင်းထန်စွာ တုန်ခါသွားပြီး တယ်လီပို့အစီအရင်မှ အနီရောင်အလင်းတန်းများ ပွင့်ထွက်လာကာ မြေပြင်မှ သွေးနီရောင် စာသားများစွာ လေထဲသို့ ပျံတက်သွားသည်။
ဂူချန်၏ ပုံရိပ်မှာ ချက်ချင်းပင် ပျောက်ကွယ်သွားပြီး နောက်တစ်စက္ကန့်တွင် အစီအရင် ပြိုကွဲသွားတော့သည်။
မျက်စိတစ်မှိတ်အတွင်းမှာပင် သူသည် မှောင်မည်းနေသော မြေအောက်ထောင်ကြီးတစ်ခုအတွင်းသို့ ရောက်ရှိသွားသည်။ ထိုနေရာကို စာသားများ ထွင်းထုထားသည့် ကျောက်တိုင်ကြီးများဖြင့် ဝန်းရံထားသည်။ ကျောက်တိုင်များ၏ အကွာအဝေး ကျော်လွန်သည့်နေရာတွင် အဆုံးမဲ့ မှောင်မိုက်နေပြီး ဟင်းလင်းပြင်ထဲမှ သွေးနီရောင် မျက်လုံး ငါးစုံကသာ ထိုနေရာကို စိုက်ကြည့်နေကြသည်။
၎င်းတို့မှာ နတ်ဘုရားမီးတောက်ဂိုဏ်း၏ အစောင့်အရှောက်ကြီး ငါးဦး ဖြစ်ပေလိမ့်မည်။ သူတို့သည် ကိုယ်တိုင် ရှိနေခြင်းလား သို့မဟုတ် ကိုယ်ပွားများလား ဆိုသည်ကို ဂူချန် မသိသေးပေ။ ရန်သူကို မလန့်စေရန်အတွက် သူ၏ ကောင်းကင်မျက်လုံးကို ဖွင့်ကြည့်လိုသည့် စိတ်ကို ထိန်းချုပ်ထားလိုက်သည်။ ငါးကြီးက နောက်မှ လာမည်ဖြစ်ရာ သူ စိတ်မလောသင့်ပေ။
ဝုန်း...
ထိုစဉ် ဂူချန်၏ နားထဲတွင် ပေါက်ကွဲသံကြီးတစ်ခု ကြားလိုက်ရသည်။ ပုံရိပ်တစ်ခုမှာ သူ၏ အမြင်အာရုံကို ဖြတ်သန်းသွားပြီး မြေပြင်ပေါ်သို့ ပြင်းထန်စွာ ပြုတ်ကျသွားကာ ခဏတာ ရုန်းကန်ပြီးနောက် ငြိမ်သက်သွားတော့သည်။
နောက်တစ်စက္ကန့်တွင် အဖြူရောင် ဝတ်စုံဝတ် လူတစ်ယောက်သည် ဂူချန်၏ ခေါင်းပေါ်သို့ ရောက်ရှိလာပြီး ရူးသွပ်စွာ ရယ်မောလိုက်သည်။
"ဟားဟားဟားဟား.. သေစမ်း.. "
သူက အပေါ်မှ ခုန်ချလာပြီး သူ၏ လက်ဝါးနှစ်ဖက်မှ စစ်မှန်သောချီစွမ်းအင် များကို ထုတ်လွှတ်ကာ ဂူချန်၏ ဦးခေါင်းကို ရိုက်ချလိုက်သည်။
သို့သော်လည်း ဂူချန်က မျက်တောင်တစ်ချက်ပင် မခတ်။
သူ၏ ခေါင်းပေါ်ရှိ လေထုမှာ ရုတ်တရက် လိမ်ရှုံ့သွားပြီး မမြင်ရသော စွမ်းအားလှိုင်းတစ်ခု ထွက်ပေါ်လာသည်။ ထိုခဏ၌ပင် ရောက်ရှိလာသော အဖြူရောင်စွမ်းအင်များမှာ လွင့်စင်သွားပြီး ပြိုင်ဘက်၏ စက္ကူကဲ့သို့ ပါးလွှာလှသော ရွှေရောင်ခန္ဓာကိုယ်ကို ဖောက်ထွင်းကာ ခန္ဓာကိုယ်ကို အပိုင်းပိုင်း ဆွဲဖြတ်ပစ်လိုက်သည်။
ဝုန်း...
အဖြူရောင်ဝတ်စုံဝတ်လူမှာ သွေးမြူများအဖြစ် ပေါက်ကွဲသွားပြီး လေထဲတွင် လှပသော ပန်းတစ်ပွင့်အလား ပွင့်ထွက်သွားတော့သည်။
[အိမ်ရှင်သည် စိတ်ဝေဒနာရှင်တစ်ဦးကို ကုသပေးလိုက်ပြီး သူ၏ ဂနာမငြိမ်သော နှလုံးသားကို ငြိမ်သက်သွားစေသည်၊ စေတနာရမှတ် ၂၆၀ ရရှိပါသည် ]
အဆင့်လေး ရွှေရောင်ခန္ဓာအဆင့်ရှိသော ပုရွက်ဆိတ်တစ်ကောင်မျှသာ ဖြစ်သဖြင့် မဟာလမ်းစဉ်စွမ်းအားကို မဆိုထားနှင့် ကမ္ဘာမြေစွမ်းအားကိုပင် အသုံးမပြုဘဲ စိတ်ကူးလိုက်ရုံဖြင့် သတ်ဖြတ်နိုင်ပေသည်။ ထိုလူသည် ကံကောင်းသည်ဟု ဆိုရမည်။အနည်းဆုံးတော့ သူ သေဆုံးချိန်တွင် နာကျင်မှု သိပ်မရှိလိုက်ပေ။
သွေးမိုးများ ရွာသွန်းလာသော်လည်း ဂူချန်၏ အကာအကွယ် စွမ်းအင်များနှင့် ထိတွေ့ပြီးနောက် အငွေ့ပျံသွားကြသည်။ ဂူချန်၏ စိတ်ထဲတွင် မည်သည့် ခံစားချက်မျှ မရှိပေ။ သူ ဤနေရာသို့ ဝင်ရောက်လာသည့် အချိန်မှစ၍ သူမှအပ ကျန်သည့်သူအားလုံး သေဆုံးရမည်မှာ သေချာနေပြီးသား ဖြစ်သည်။
ဂူချန်က အချိန်ဖြုန်းမနေချင်တော့သဖြင့် ရှေ့သို့ ခြေတစ်လှမ်း တိုးလိုက်ရာ တယ်လီပို့လုပ်လိုက်သကဲ့သို့ ထောင်ကြီး၏ အလယ်ဗဟိုသို့ ရောက်ရှိသွားပြီး တည်ငြိမ်စွာ ပြောလိုက်သည်။
" အားလုံး ငါ့စကားကို နားထောင်ကြစမ်း "
သူ၏ အသံမှာ မကျယ်သော်လည်း ထောင်အတွင်းရှိ သူတော်စင်လောင်းလျာတိုင်း၏ နားထဲသို့ ထိုးဖောက်ဝင်ရောက်သွားသည်။
ဘွဲ့တံဆိပ်အကျိုးသက်ရောက်မှု လူသားမျိုးနွယ်၏ သူရဲကောင်း ကို အသုံးပြုလိုက်ပြီ ဖြစ်သည်။
[ လူသားမျိုးနွယ်၏ သူရဲကောင်း- သင်၏ စကားနှင့် လုပ်ရပ်တိုင်းမှာ ဩဇာအာဏာ အလွန်ကြီးမားသည်။ ထို့ကြောင့် အားလုံး ငါ့စကားကို နားထောင်ကြစမ်းဟု ပြောလိုက်သည့်အခါ ကြားရသူတိုင်းသည် အဆင့်ကွာခြားမှုကို လျစ်လျူရှု၍ သင့်ထံသို့ မဖြစ်မနေ အာရုံစိုက်လာရမည် ဖြစ်သည် ]
ထိုခဏ၌...
ထောင်အတွင်းရှိ သူတော်စင်လောင်းလျာတိုင်းမှာ ချောင်းမြောင်းနေသူဖြစ်စေ၊ တိုက်ခိုက်နေသူဖြစ်စေ ထိုစကားကို ကြားလိုက်ရသည်နှင့် အလိုအလျောက် ခေါင်းလှည့်လာကြပြီး အလယ်တွင်ရှိသော လူငယ်ကို စိုက်ကြည့်လိုက်ကြရသည်။ မှောင်မိုက်သော နေရာမှ မျက်လုံး ငါးစုံမှာလည်း သူ့ကို တိုက်ရိုက် ကြည့်လာကြသည်။
" သေကြစမ်း... "
ဂူချန်သည် လူအုပ်ကြီးကို ကြည့်ကာ နွေဦးကာလကဲ့သို့ နူးညံ့စွာ ပြုံးလျက် ပြောလိုက်သည်။ စကားအဆုံးတွင် ထောင်တစ်ခုလုံးရှိ လေထုမှာ မီးလောင်နေသကဲ့သို့ လိမ်ရှုံ့သွားပြီး လူတိုင်းမှာ ဖော်ပြ၍မရသော တင်းကျပ်မှုကို ခံစားလိုက်ရသည်။
ကြောက်မက်ဖွယ်ကောင်းသော တစ်စုံတစ်ခု ဖြစ်တော့မည်ကို လူတိုင်း ခံစားမိလိုက်ကြပြီး ကျောရိုးထဲအထိ စိမ့်တက်သွားကာ ချွေးစေးများ ထွက်လာကြသည်။
ဘုန်း...
အနက်ရောင် ဝတ်စုံဝတ် အမျိုးသမီးတစ်ဦး၏ ဦးခေါင်းမှာ ရုတ်တရက် ပေါက်ကွဲသွားပြီး သူမ၏ ခန္ဓာကိုယ်မှာ ကြမ်းပြင်ပေါ်သို့ ပျော့ခွေကျသွားသည်။ အခြားသူများမှာ ထိတ်လန့်သွားပြီး တံတွေးများကို မျိချမိလိုက်ကြသည်။
'ဒါက ဘာလဲ..'
'သူ ဘာမှမလုပ်ဘဲ ရပ်နေတာတောင် အဲ့ဒီလူရဲ့ ခေါင်းက ဘာလို့ ပေါက်ကွဲသွားတာလဲ..'
"ဘုန်း ..ဘုန်း ..ဘုန်း.."
ဦးခေါင်း သုံးလုံးမှာ ထပ်မံ၍ ပေါက်ကွဲသွားပြန်ပြီး သွေးများနှင့် ဦးနှောက်အပိုင်းအစများမှာ ကြမ်းပြင်ပေါ်တွင် ပြန့်ကျဲသွားရာ ထောင်တစ်ခုလုံးမှာ အေးခဲသွားတော့သည်။
အကယ်၍ အစွမ်းချင်း မယှဉ်နိုင်၍ သေဆုံးရခြင်းဆိုလျှင် သူတို့ ဤမျှအထိ ကြောက်လန့်ကြမည် မဟုတ်ပေ။ သို့သော် မည်သည့်အကြောင်းကြောင့် သေဆုံးရသည်ကိုပင် မသိရဘဲ ထူးဆန်းစွာ သေဆုံးနေရခြင်းမှာ တစ်ခါမျှ မကြားဖူးသော ကိစ္စဖြစ်သည်။
မကြာမီ ဦးခေါင်းများမှာ တစ်လုံးပြီးတစ်လုံး ထပ်မံ ပေါက်ကွဲလာပြန်သည်။ ဂူချန်၏ အမြင်အာရုံထဲတွင် စေတနာရမှတ်များ တိုးလာကြောင်း အချက်အလက်များ အဆက်မပြတ် ပေါ်ထွက်နေသည်။ ဂူချန်၏ အပြုံးမှာ ပို၍ နူးညံ့လာသည်။
ဤအတိုင်းဆိုလျှင် စစ်ပွဲကြီး မတိုင်မီ သူ၏ အစွမ်းကို ထပ်မံ မြှင့်တင်နိုင်ပေလိမ့်မည်။
" ယီး.. ဒီကောင်က အပျော်လာနှိပ်စက်နေ... "
တစ်ယောက်က တုန်ရီစွာ ပြောလိုက်သော်လည်း စကားပင် မဆုံးသေးခင် သူ၏ ဦးနှောက်မှာ ပေါက်ကွဲသွားတော့သည်။ ဘေးနားရှိ လူများမှာ သွေးများ စင်သွားသော်လည်း မလှုပ်ရဲဘဲ တုန်တုန်ယင်ယင်နှင့် ရပ်နေကြရသည်။ မလှုပ်ရှားရဲကြခြင်းမှာ လှုပ်ရှားသူတိုင်း အရင်သေနေသောကြောင့် ဖြစ်သည်။ သို့သော်လည်း ငြိမ်နေရုံနှင့် သူတို့ လွတ်မြောက်နိုင်မည် မဟုတ်ပေ။
"ဘုန်း.. ဘုန်း.. ဘုန်း.."
မကြာမီမှာပင် နတ်ဘုရားမီးတောက်ဂိုဏ်း၏ သူတော်စင်လောင်းလျာ ရာနှင့်ချီ၍ သေဆုံးသွားကြပြီး သွေးအိုင်များနှင့် ခန္ဓာကိုယ် အစိတ်အပိုင်းများမှာ ထောင်ကြမ်းပြင်ကို ဖုံးလွှမ်းသွားတော့သည်။
ချွင်းချက်မရှိ အားလုံး သေဆုံးသွားကြသည်။ ဤသည်မှာ သမိုင်းတစ်လျှောက် အမြန်ဆုံး သူတော်စင်လောင်းလျာ ပြိုင်ပွဲ ဖြစ်ပြီး သုံးမိနစ်ပင် မကြာလိုက်ပေ။
ဂူချန်သည် အလောင်းပုံကြီးကို ကျော်ဖြတ်ကာ ထောင်၏ အစွန်းရှိ ပေါ်ထွက်လာသော လမ်းကြောင်းမှတစ်ဆင့် မှောင်မိုက်သော နေရာအတွင်းသို့ တုံ့ဆိုင်းခြင်းမရှိဘဲ ဝင်ရောက်သွားသည်။
အလင်းတန်းများ လှုပ်ခတ်သွားသည်။
အဆုံးမဲ့ မှောင်မိုက်နေသော နေရာတွင် အဖြူရောင် လမ်းငယ်လေးတစ်ခု ပေါ်လာသည်။ လမ်း၏ အဆုံးတွင် အနက်ရောင် ဝတ်စုံကို ခြုံထားပြီး သွေးနီရောင် မျက်လုံးများသာ မြင်ရသည့် ခါးကုန်းကုန်း လူတစ်ယောက် ရပ်နေသည်။ သူသည် အရပ် ရှစ်ပေခွဲခန့် မြင့်မားလှသည်။
အလင်းတောင်အောက်တွင် ရပ်နေသော ထိုလူ၏ နှုတ်ခမ်းများမှာ အနည်းငယ် လှုပ်ခတ်သွားပြီး ပြောလိုက်သည်။
" ကလေး..ဒီဘက်ကို လာခဲ့.. "
Chapter 210
~
အခန်း ၂၁၀ : ပြန်လည်မွေးဖွားလာသော မိစ္ဆာဧကရာဇ်
~
' ဒီအဘိုးကြီးက ကလေးသူခိုးနဲ့တောင် တူနေသေးတယ်.. '
ဂူချန်သည် ကြောက်ရွံ့ခြင်းမရှိဘဲ အရပ် ရှစ်ပေခွဲခန့်ရှိသော ခါးကုန်းကုန်း အဘိုးကြီးထံသို့ တည့်တည့်မတ်မတ် လျှောက်သွားလိုက်သည်။ ယခုအချိန်တွင် သူ၏ အစွမ်းမှာ အထွတ်အထိပ်သို့ ရောက်ရှိနေပြီ ဖြစ်သဖြင့် ဤကမ္ဘာပေါ်တွင် သူ့ကို သတ်နိုင်သည့်သူ မရှိတော့ပေ။
သူသည် အဘိုးကြီး၏ ရှေ့သို့ ရောက်ရှိသွားသည်။ အဘိုးကြီးမှာ ခါးကုန်းနေသဖြင့် အရပ်ရှည်သော်လည်း ဂူချန်နှင့် မျက်လုံးချင်း ဆုံနေရသည်။
ဂူချန်၏ အမြင်တွင် ထိုအဘိုးကြီးမှာ တုန်ရီနေသော လက်များဖြင့် ပတ်တီးများ ပတ်ထားသည့် လက်ကို ဂူချန်၏ ပခုံးပေါ်သို့ ဖြည်းညှင်းစွာ တင်လိုက်သည်။ တစ်ချိန်တည်းမှာပင် မှောင်မည်းသော မိစ္ဆာချီစွမ်းအင် များမှာ ဂူချန်၏ ခန္ဓာကိုယ်အတွင်းသို့ စီးဝင်လာတော့သည်။
ဂူချန်သည် ထိုမိစ္ဆာချီစွမ်းအင်များမှာ သူ့ကို အန္တရာယ်ပေးရန် မဟုတ်ဘဲ သူ၏ သွေးကြောများကို စစ်ဆေးနေခြင်းသာ ဖြစ်ကြောင်း ခံစားမိလိုက်သည်။
" ကောင်းတယ်... တကယ့်ကို ကောင်းတယ်... မင်းက တကယ့်ကို ရွေးချယ်ခံရသူပဲ .."
အဘိုးကြီး၏ သွေးနီရောင် မျက်လုံးများမှာ ပိုမိုတောက်ပလာပြီး အိုမင်းလှသော အသံမှာလည်း စိတ်လှုပ်ရှားမှုကြောင့် တုန်ယင်နေသည်။ ရုတ်တရက် ဂူချန်၏ ပခုံးပေါ်ရှိ လက်မှာ တောင့်တင်းသွားပြီး အဘိုးကြီး၏ လေသံမှာ မယုံကြည်နိုင်လောက်အောင် အံ့အားသင့်သွားပုံရသည်။
" ကလေးလေး... မင်းက... မြင့်မြတ်မီးလျှံ နှလုံးသားကျမ်း ကို ပြီးပြည့်စုံခြင်းအဆင့်အထိ ကျင့်ကြံပြီးသွားတာလား .."
ဂူချန်သည် ဘာမှမပြောဘဲ တည်ငြိမ်စွာ ခေါင်းညိတ်ပြလိုက်သည်။
ဂလု...
အဘိုးကြီးမှာ တံတွေးကို ခက်ခဲစွာ မျိုချလိုက်မိပြီး သူ၏ ခန္ဓာကိုယ်မှာ အနည်းငယ် ယိုင်သွားသည်။ ဤ မြင့်မြတ်မီးလျှံ နှလုံးသားကျမ်း ဆိုသည်မှာ S အဆင့်ထက် မြင့်မားသော ထိပ်တန်း စိတ်ဝိညာဥ် ကျင့်စဉ်တစ်ခု ဖြစ်သည်။
လက်ရှိ နတ်ဘုရားမီးတောက်ဂိုဏ်းအတွင်း၌ပင် အစောင့်အရှောက်ကြီး ငါးဦးမှလွဲ၍ မည်သည့် တပည့်မျှ ဤကျမ်းကို ပြီးပြည့်စုံခြင်းအဆင့်အထိ မကျင့်ကြံနိုင်ကြပေ။ ထိုအဆင့်သို့ ရောက်ရန် အစောင့်အရှောက်ကြီး ငါးဦးမှာ နှစ်ပေါင်း ငါးရာခန့် အချိန်ယူခဲ့ရသည်။
သို့သော် ဤလူငယ်မှာ ဤကျမ်းကို ရရှိသည်မှာ တစ်လပင် မပြည့်သေးဘဲ ပြည့်စုံခြင်းအဆင့်သို့ ရောက်ရှိသွားသည်မှာ မယုံနိုင်စရာပင်။
ဂိုဏ်းချုပ်ပြောခဲ့သည့်အတိုင်း ရွေးချယ်ခံရသူဆိုသည်မှာ မမှားပေ။ သူ၏ နားလည်သဘောပေါက်မှု စွမ်းရည်မှာ ကြောက်မက်ဖွယ် ကောင်းလှပေသည်။ ဤမျိုးဆက်၏ သူတော်စင်မှာ ယခင်မျိုးဆက်များထက် များစွာ သာလွန်ပေလိမ့်မည်။
ထိုအဘိုးကြီးမှာ ခဏတာ မှင်သက်သွားပြီးနောက် ပြန်လည်တည်ငြိမ်သွားကာ ဂူချန်ကို ရှေ့မှ လမ်းပြခေါ်ဆောင်သွားတော့သည်။
သူတို့နှစ်ဦးသည် တယ်လီပို့အစီအရင်ပေါင်းများစွာကို ဖြတ်ကျော်ခဲ့ကြသည်။ ဂူချန်သည် သူတို့၏ အလွန်အမင်း သတိထားပုံကို စိတ်ထဲမှ ချီးကျူးမိသည်။ မဟာမိတ်အဖွဲ့၏ ဖိနှိပ်မှုအောက်တွင် နှစ်ပေါင်းများစွာ ရပ်တည်နိုင်ခြင်းမှာ ဤကဲ့သို့ သတိကြီးစွာ ထားခြင်းကြောင့်ပင် ဖြစ်ပေလိမ့်မည်။
မှောင်မည်းနေသော နန်းတော်ကြီးတစ်ခုအတွင်းသို့ သူတို့ ရောက်ရှိလာကြသည်။
" ကလေးလေး... ငါ့နာမည်က ယီလို့ ခေါ်တယ်၊ နတ်ဘုရားမီးတောက်ဂိုဏ်းရဲ့ အစောင့်အရှောက်ကြီး ငါးဦးထဲက တစ်ဦးပေါ့၊ မကြာခင်မှာ ကျန်တဲ့ အစောင့်အရှောက်တွေကိုလည်း မင်း တွေ့ရလိမ့်မယ်.. "
အဘိုးကြီး၏ အသံမှာ ပွတ်တိုက်သံကြီးကဲ့သို့ ထွက်ပေါ်လာသည်။
" မကြာခင်မှာ ငါတို့ ငါးယောက်က မင်းကို နတ်ဘုရားရဲ့ ကောင်းချီးနဲ့ ဗတ္တိဇံခံယူခြင်းကို ကူညီပေးကြမယ်၊ ဒါက မင်းအတွက် အကျိုးအမြတ် အများကြီးရှိပြီး အဆင့်တွေကို ကျော်ဖြတ်ပြီး တိုးတက်စေနိုင်လိမ့်မယ်၊ ဒါက သူတော်စင်အဖြစ် နန်းတင်တဲ့ အခမ်းအနားပဲ၊ မင်း အနေနဲ့ ဘာမှ ခုခံမနေနဲ့.... "
ဂူချန်သည် အပြင်ပန်းတွင် ခေါင်းညိတ်ပြလိုက်သော်လည်း စိတ်ထဲတွင်မူ ရယ်ချင်စိတ်ကို အောင့်ထားရသည်။ ဘာမှ ခုခံမနေနဲ့ ဆိုသည့် စကားကို သာမန်လူကြားလျှင် မည်သူမျှ ယုံကြည်မည် မဟုတ်ပေ။ သို့သော် သူတော်စင်လောင်းလျာများမှာ ဦးနှောက်ဆေးခံထားရသဖြင့် ဤစကားကို ကြားလျှင် ရူးသွပ်စွာ ပျော်ရွှင်နေကြမည်မှာ အမှန်ပင် ဖြစ်သည်။
မကြာမီ အဘိုးကြီးသည် ဂူချန်ကို ရုပ်တုကြီးတစ်ခုရှေ့သို့ ခေါ်ဆောင်သွားသည်။ ရုပ်တုမှာ အလွန်ပင် မြင့်မားလှပြီး ရုပ်ထွက်မှာ ရှင်းလင်းမှု မရှိသော်လည်း ကြောက်မက်ဖွယ် မိစ္ဆာအရှိန်အဝါများ ထွက်ပေါ်နေသည်။ ရုပ်တု၏ ပတ်လည်တွင် အနီရောင် ထိုင်ခုံ ငါးခု ရှိနေပြီး ထိုအထဲမှ လေးခုတွင် လူရိပ်များ ရှိနေသည်။
သာမန်ရုပ်ရည်နှင့် လူလတ်ပိုင်းတစ်ဦး၊ သေဆုံးနေသည်မှာ နှစ်ကြာပြီဖြစ်သည့်အလား ဖြူဖတ်ဖြူရော် ဖြစ်နေသည့် လူငယ်တစ်ဦး၊ အရပ် ဆယ်ပေကျော် မြင့်မားသည့် ဆံပင်နီနှင့် လူသန်ကြီးတစ်ဦး။ နောက်ဆုံးတစ်ဦးမှာ အမျိုးသမီးဖြစ်ပြီး သူမ၏ နာမည်မှာ ဆန်းဟု ခေါ်သည်။ သူမသည် လှပသော်လည်း ပါးပြင်ပေါ်တွင် အပြာရောင် အကြေးခွံအချို့ ရှိနေသည်။
" စလိုက်ကြစို့၊ အချိန်ကောင်းကို မလွတ်စေနဲ့ .."
ဆန်းက အေးစက်စွာ ပြောလိုက်သည်။ အဘိုးကြီး ယီ သည်လည်း သူ၏ ထိုင်ခုံသို့ ပျံသန်းသွားတော့သည်။
ဂူချန်သည် ရုပ်တုရှေ့သို့ လျှောက်သွားသည်နှင့် တစ်ပြိုင်နက် ငြိမ်သက်နေသော ရုပ်တုကြီးမှာ တုန်ခါလာပြီး ရုပ်တု၏ မျက်လုံးပေါက်များမှ မှောင်မည်းသော မီးခိုးများ ထွက်ပေါ်လာကာ နန်းတော်တစ်ခုလုံးကို ဖုံးလွှမ်းသွားသည်။
" ဟားဟားဟား ..."
ရုပ်တုအတွင်းမှ ကျယ်လောင်သော ရယ်မောသံကြီး ထွက်ပေါ်လာသည်။ အစောင့်အရှောက်ကြီး ငါးဦးစလုံး၏ မျက်နှာများမှာ တင်းမာသွားကြသည်။ အနက်ရောင် အလင်းတန်းတစ်ခုမှာ ရုပ်တုမှ ထွက်ပေါ်လာပြီး ဂူချန်၏ စိတ်ဝိညာဥ်ပင်လယ်အတွင်းသို့ တစ်ဟုန်ထိုး တိုးဝင်သွားတော့သည်။
တစ်ချိန်တည်းမှာပင် ဂူချန်၏ စိတ်ထဲတွင် ရူးသွပ်စွာ ပျော်ရွှင်နေသော အသံကြီးတစ်သံကို ကြားလိုက်ရသည်။
" မိစ္ဆာလမ်းစဉ်ကို ရူးသွပ်ခဲ့တဲ့ ငါ၊ ကောင်းကင်နဲ့ မြေကြီး၊ ယင်နဲ့ ယန် ကို မေးခွန်းထုတ်ခဲ့တယ်.. "
" နှစ်ပေါင်း သန်းချီတဲ့ စီစဉ်မှုတွေနဲ့ စုဆောင်းမှုတွေဟာ၊ ဒီကနေ့ ငါ အကန့်အသတ်မရှိ ပြန်လည်မွေးဖွားဖို့အတွက်ပဲ.. "
[ ကျူးကျော်သူကို တွေ့ရှိရပါသည်။ကြားဖြတ်တားဆီးခြင်း လုပ်ဆောင်ချက်ကို စတင်နေပါသည်... ]