အခန်း (၂၂၁-၂၂၂)
Vol. 21 Ch. 221-222
Chapter 221
~
အခန်း ၂၂၁ : နောက်တစ်ခါ ပုံပြင်ပြောရင် မြန်မြန်ပြော
~
[ လက်ရှိ စေတနာရမှတ် ၂၁၃,၀၅၀ ]
[ ကမ္မအဆင့် အလယ်အလတ်အဆင့် ]
[ကံတရားလက်ဆောင်ထုတ်ကို ချက်ချင်းဖွင့်မလား ]
" မဟုတ်ဘူး .."
နားထဲသို့ ဝင်ရောက်လာသော အစောင့်အရှောက်များ၏ အသံလွှင့်ချက်များကို နားထောင်ရင်း ဂူချန်က လက်ဆောင်ထုတ်ကို ဖွင့်ရန် မလောသေးပေ ။ ထို့နောက်တွင်တော့ သူသည် ကြယ်တာရာပြိုလဲခြင်းကြောင့် ဖြစ်ပေါ်လာသော အပျက်အစီးများထဲမှ ဝှူးခနဲ အသံနှင့်အတူ ကောင်းကင်ယံသို့ ပျံတက်လိုက်ပြီး ကန္တာရဆီသို့ ဦးတည်လိုက်သည် ။
ကြယ်တာရာပြိုလဲခြင်း၏ ဖျက်ဆီးနိုင်စွမ်းမှာ အမှန်တကယ်ပင် ကြီးမားလှပေသည် ။ အထူးကျောက်သလင်းများဖြင့် တည်ဆောက်ထားသော နတ်ဘုရားမီးတောက်ဂိုဏ်း နန်းတော်ကြီးမှာ တစ်စစီဖြစ်နေလေပြီ ။ အစီအရင်နှင့် ဟင်းလင်းပြင်များမှာလည်း ပျက်စီးသွားပြီး သဲများမှာ အတွင်းသို့ စီးဝင်လာတော့သည် ။ မကြာမီအချိန်အတွင်း ထိုနေရာတစ်ခုလုံးမှာ သဲများဖြင့် ဖုံးလွှမ်းသွားတော့မည် ဖြစ်သည် ။
သို့သော် ဂူချန်၏ အာရုံမှာ ထိုအပျက်အစီးများထံတွင် မရှိဘဲ မိုင်ပေါင်းများစွာ ဝေးကွာသော တိုက်ပွဲမြေပြင်ဆီသို့သာ ရောက်ရှိနေသည် ။ အရှင်သခင်အဆင့် အဆုံးစွန်သို့ ရောက်ရှိထားပြီး ဖုတ်ကောင်မျိုးနွယ်၏ သန်မာသော ခန္ဓာကိုယ်ကို ပိုင်ဆိုင်ထားသည့် အစောင့်အရှောက် ငါးဦးမှာ မြောက်ပိုင်းမဟာမိတ်အဖွဲ့၏ အဖွဲ့ဝင်ဖြစ်သူ ကျန့်ရှန်ရှုးနှင့် အကြိတ်အနယ် တိုက်ခိုက်နေကြသည် ။
ဤသည်မှာ သူ၏ ခန့်မှန်းချက်ကို အနည်းငယ် ကျော်လွန်နေခဲ့သည် ။ ယခင်က အစီအရင်အတွင်း ပိတ်မိနေစဉ်တွင်လည်း ကျန့်ရှန်ရှူးကသာ ဟင်းလင်းပြင်ကို ဆုတ်ဖြဲ၍ လျောင်ချင်းဖုန်းတို့ကို လွတ်မြောက်အောင် ကူညီပေးခဲ့ခြင်း ဖြစ်သည် ။ ယခုလည်း သူသည် ထိုပြင်းထန်သော တိုက်ကွက်ဒဏ်ကို ခံနိုင်ရည်ရှိရုံသာမကဘဲ အစောင့်အရှောက် ငါးဦးကို တစ်ယောက်တည်းနှင့် ရင်ဆိုင်နေနိုင်ဆဲ ဖြစ်သည် ။
ကျန့်ရှန်ရှူးသည် လက်များကို ဘောင်းဘီအိတ်ထဲ ထည့်ထားရင်းပင် သူ၏ ပတ်ဝန်းကျင်တွင် ဟင်းလင်းပြင် အက်ကွဲကြောင်းများစွာကို ဖန်တီးထားသည် ။ ထိုအက်ကွဲကြောင်းများမှတစ်ဆင့် ရွှေရောင်လက်နက်များကို ထုတ်သုံးကာ အစောင့်အရှောက်များ၏ မိစ္ဆာစွမ်းအင်များကို အလွယ်တကူ ချေမှုန်းနေသည် ။ ခဏတာမျှတော့ အစောင့်အရှောက် ငါးဦးစလုံးက သူ့ကို အသာစီး မရနိုင်ဘဲ ဖြစ်နေကြသည် ။
" ဒါပေမဲ့ ကစားပွဲက ဒီမှာတင် ပြီးပြီ.. "
ဂူချန်၏ မျက်နှာမှာ အေးစက်နေပြီး ခြေတစ်လှမ်းတည်းနှင့်ပင် တိုက်ပွဲမြေပြင်သို့ ရောက်ရှိသွားသည် ။ သူက လေထဲတွင် ဖမ်းဆုပ်လိုက်ရာ ဟင်းလင်းပြင်ကို ဆုတ်ဖြဲ၍ ကြီးမားလှသော လက်ဝါးပုံရိပ်ကြီးတစ်ခု ပေါ်ထွက်လာပြီး ကျန့်ရှန်ရှူးထံသို့ မယုံနိုင်ဖွယ် အရှိန်ဖြင့် ကျဆင်းလာတော့သည် ။
ဂူချန်၏ လက်ထဲတွင်မူ သာမန်တိုက်ကွက်ပင်လျှင် ကမ္ဘာပျက်မတတ် စွမ်းအားကို ထုတ်ဖော်နိုင်သည် ။ စနစ်က အကောင်းဆုံး နည်းစနစ် များကိုသာ ပေးအပ်ထားပေသည်။
"ဘုန်း... ဘုန်း... ဘုန်း..."
ကောင်းကင်ယံရှိ လေထုလွှာများမှာ ဖန်သားပြင်များ ကွဲအက်သွားသလိုပင် တဖြည်းဖြည်း ချေမှုန်းခံလိုက်ရသည် ။ ကောင်းကင်ယံမှာ မှောင်မိုက်သွားပြီး မိုင်ပေါင်းသောင်းချီသော နယ်ပယ်အတွင်း ရင်တုန်ဖွယ် ဖိအားများ လွှမ်းမိုးသွားသည် ။ အစောင့်အရှောက် ငါးဦးနှင့် တိုက်ခိုက်နေသော ကျန့်ရှန်ရှူးသည်လည်း ထိုထူးဆန်းမှုကို ချက်ချင်း သတိပြုမိသွားသည် ။
" ဒါက ဘာလဲ .."
ကျန့်ရှန်ရှူး၏ မျက်တောင်များမှာ ပြင်းထန်စွာ တုန်ခါသွားပြီး ရွှေရောင်အလင်းတန်းအသွင် ပြောင်းလဲကာ အဝေးသို့ ထွက်ပြေးရန် ကြိုးစားသည် ။ သို့သော် သူ မည်သည့်ဘက်သို့ ပြေးသည်ဖြစ်စေ တစ်ဖက်လူ၏ အရှိန်အဝါက သူ့ကို ပစ်မှတ်ထားထားသဖြင့် လွတ်မြောက်ရန် လုံးဝ မဖြစ်နိုင်တော့ပေ ။
" ချီး... ပြေးလို့ မရဘူးပဲ.. "
" ဒါဆိုရင်လည်း တိုက်ရတာပေါ့.. "
ရှောင်တိမ်း၍ မရနိုင်ကြောင်း သိလိုက်ရသည့်အခါ သူသည် ခြေလှမ်းကို ရပ်တန့်လိုက်ပြီး လက်ဟန်များကို မြန်ဆန်စွာ ပြုလုပ်ကာ ရှေးဟောင်း ဂါထာများကို ရွတ်ဆိုတော့သည် ။ သူ၏ ပတ်ဝန်းကျင်တွင် ရွှေရောင် ဟင်းလင်းပြင် အက်ကွဲကြောင်းကြီးတစ်ခု ပေါ်လာပြီး ပေရာပေါင်းများစွာအထိ ကျယ်ပြန့်သွားသည် ။
" ဒါဆိုရင်လည်း... "
ကျန့်ရှန်ရှူး၏ အရှိန်အဝါမှာလည်း အဆင့်များစွာ မြင့်တက်လာပြီး သူ၏ နုပျိုသော မျက်နှာတွင် ပြတ်သားသော အမူအရာ ပေါ်လာသည် ။ သူက လက်ကို ဆန့်ထုတ်၍ တစ်စုံတစ်ခုကို လှမ်းဖမ်းလိုက်ရင်း အော်ဟစ်လိုက်သည် ။
" ဓား... လာစမ်း.. "
"ဘုန်း.."
ရွှေရောင် ဟင်းလင်းပြင်ထဲမှ ပြင်းထန်လှသော စွမ်းအင်များ ပေါက်ကွဲထွက်လာပြီး ဓားတစ်စင်း ထွက်ပေါ်လာသည် ။ ထိုဓား၏ ပုံစံမှာ အလွန်ထူးခြားပြီး ဆလင်ဒါပုံစံ အစိတ်အပိုင်း သုံးခုက အရှိန်အဟုန်ဖြင့် လည်ပတ်နေကာ အနီရောင် စွမ်းအင်လှိုင်းများကို ထုတ်လွှတ်နေသည် ။ ၎င်းမှာ ဧကရာဇ်လက်နက်ဖြစ်သော ပိုင်ရိဓား ပင် ဖြစ်သည် ။
" ငါ့ရဲ့ ဒီတိုက်ကွက်ကို မြင်တွေ့ရတာက မင်းတို့ဘဝအတွက် ဂုဏ်ယူစရာပဲ .."
ကျန့်ရှင်ရှုးက ယုံကြည်မှု အပြည့်ဖြင့် ပြောလိုက်သည် ။ သူက ဓားကို ဝှေ့ယမ်းလိုက်ရာ ပေရာပေါင်းများစွာ ရှည်လျားသော အနီရောင် စွမ်းအင်လှိုင်းကြီးမှာ ဂူချန်၏ လက်ဝါးပုံရိပ်ကြီးထံသို့ အရှိန်အဟုန်ဖြင့် ပြေးဝင်သွားတော့သည် ။ ဧကရာဇ်လက်နက်နှင့် သူ၏ ဓားလမ်းစဉ် အခြေခံတို့ ပေါင်းစပ်လိုက်သည့်အခါ မည်သည့်အရာကိုမဆို ဖျက်ဆီးနိုင်သည်ဟု သူ ယုံကြည်ထားသည် ။
ပေါက်ကွဲသံကြီးနှင့်အတူ စွမ်းအင်လှိုင်းနှစ်ခု ထိပ်တိုက်တွေ့ဆုံသွားပြီး ကောင်းကင်ယံမှာ လင်းထိန်သွားသည် ။ တိုက်ပွဲ၏ အရှိန်ကြောင့် ကန္တာရအတွင်းရှိ သဲများမှာ မုန်တိုင်းအသွင် လွင့်စင်လာပြီး ဟင်းလင်းပြင်အတွင်း လေဟာနယ်တစ်ခု ဖြစ်ပေါ်သွားခဲ့သည် ။
" စိတ်ဝင်စားစရာပဲ .."
ဂူချန်က ရယ်မောလိုက်သည် ။ သူ၏ နဖူးအလယ်ရှိ ကောင်းကင်မျက်လုံး ပွင့်လာပြီး ရွှေရောင်နှင့် ခရမ်းရောင် လျှပ်စီးများ ရောယှက်နေသော အလင်းတန်းတစ်ခု ပစ်လွှတ်လိုက်သည် ။ ထိုအလင်းတန်းမှာ ကျန့်ရှင်ရှုး၏ တိုက်ကွက်ကို အလွယ်တကူ ဖောက်ထွက်သွားပြီး သူ၏ ရှေ့သို့ ရောက်ရှိလာသည် ။ ကျန့်ရှန်ရှုးမှာ မည်သည့်အရာမှ မတုံ့ပြန်နိုင်မီမှာပင် ထိုအလင်းတန်းက သူ့ရှေ့သို့ ရောက်ရှိနေပြီ ဖြစ်သည် ။
" ဒါက ဘယ်လိုလုပ် ဖြစ်နိုင်မှာလဲ.. "
ကျန့်ရှန်ရှူး၏ မျက်ဝန်းများမှာ မယုံနိုင်သဖြင့် ပြူးကျယ် သွားသည် ။
'ဘယ်လိုနည်းစနစ်က ဒီလောက်အထိ မြန်ရတာလဲ ။ ဒီလူရဲ့ တိုက်ကွက်တွေက ဘာလို့ ဒီလောက်အထိ ထူးဆန်းနေရတာလဲ ..'
သူသည် ပိုင်ရိဓားကို ရှေ့တွင် ကာထားရင်း ရွှေရောင် ချပ်ဝတ်တန်ဆာကို ဖန်တီးရန် ကြိုးစားသော်လည်း ဂူချန်၏ အလင်းတန်းမှာ ဓားကို အလွယ်တကူ ဖောက်ထွက်သွားပြီး သူ၏ ရင်ဘတ်ကို တည့်တည့် မှန်သွားတော့သည် ။
သွေးများမှာ ကောင်းကင်သို့ ပန်းထွက်သွားပြီး သူ၏ ခန္ဓာကိုယ်မှာလည်း လွင့်ထွက်သွားကာ မြေပြင်ပေါ်သို့ ပြင်းထန်စွာ ကျရောက်သွားသည် ။ သူ၏ ရင်ဘတ် တစ်ဝက်ခန့်မှာ ပျောက်ကွယ်သွားပြီး သွေးများနှင့် ကလီစာ အစအနများမှာလည်း ဒဏ်ရာမှတစ်ဆင့် စီးကျလာသည် ။
ကျန့်ရှန်ရှူးမှာ မြေပြင်ပေါ်တွင် လဲလျောင်းနေရင်း နာကျင်မှုကြောင့် အသက်ရှူရန်ပင် ခက်ခဲနေသည် ။ လျောင်ချင်းဖုန်းတို့ကဲ့သို့ပင် သူသည်လည်း မိမိကိုယ်ကိုယ် ယုံကြည်မှု အပြည့်ရှိခဲ့သော်လည်း ဂူချန်၏ တိုက်ကွက်ရှေ့တွင်မူ ကလေးကစားစရာကဲ့သို့ ဖြစ်သွားခဲ့သည် ။ ဧကရာဇ်လက်နက်ပင်လျှင် အရုပ်တစ်ခုလို ဖျက်ဆီးခံလိုက်ရသည် ။
" အဟွတ်... အဟွတ်... "
ကျန့်ရှန်ရှူး၏ မျက်နှာမှာ စက္ကူကဲ့သို့ ဖြူလျော့နေသည် ။ သူသည် သွေးများကို အန်ထုတ်ရင်း ကောင်းကင်မှ ဆင်းသက်လာသော ပုံရိပ်ခြောက်ခုကို ကြည့်ကာ တွေးတောနေသည် ။ သူသည် လျောင်ချင်းဖုန်းတို့ကို အခွင့်အရေးပေးရန်အတွက် အစောင့်အရှောက်များကို တစ်ယောက်တည်းနှင့် တားဆီးခဲ့ခြင်း ဖြစ်သည် ။ ထိုသူများက ဂူချန်ကို အသေသတ်နိုင်လိမ့်မည်ဟု သူ မျှော်လင့်ခဲ့သော်လည်း ယခုတော့ သူ၏ မျှော်လင့်ချက်များ အားလုံး ပျက်စီးသွားခဲ့လေပြီ ။
" ငါ... ငါ သေတော့မှာလား .."
သူသည် မိမိကိုယ်ကိုယ် ပြန်မေးလိုက်သည် ။
" မဟုတ်ဘူး... ငါ အခုထိ သေလို့ မဖြစ်သေးဘူး .."
" အခု မဟာမိတ်အဖွဲ့က လူတွေ အကုန်လုံး အသတ်ခံရပြီဆိုရင် အမ်မာတားရက်စ် တစ်ယောက်တည်းနဲ့ ဒီလူကို ဘယ်လိုမှ တားနိုင်မှာ မဟုတ်ဘူး "
" ဒါဆိုရင် လူသားမျိုးနွယ် တစ်ခုလုံးက ဒီမိစ္ဆာကောင်ရဲ့ လက်အောက်မှာ ဒုက္ခရောက်ကုန်ကြလိမ့်မယ် "
" ငါ အခုထိ လဲကျလို့ မဖြစ်သေးဘူး... ငါ့မှာ နောက်ဆုံး ဝှက်ဖဲ ရှိသေးတယ်.. "
ကျန့်ရှင်ရှုး၏ မှေးမှိန်နေသော မျက်ဝန်းများမှာ ပြန်လည် တောက်ပလာပြီး ထူးခြားသော အရှိန်အဝါတစ်ခု ပေါ်ထွက်လာသည် ။ ဤသည်မှာ ဧကရာဇ်အဆင့်၏ အရှိန်အဝါ ဖြစ်သည် ။
" ဒါက... ဧကရာဇ်အဆင့်ရဲ့ အရှိန်အဝါပဲ... ဒါ ဘယ်လိုလုပ် ဖြစ်နိုင်မှာလဲ.. "
အစောင့်အရှောက် နံပါတ် ၁ က ထိတ်လန့်တကြား အော်ဟစ်လိုက်သည် ။ အစောင့်အရှောက် နံပါတ် ၂ ကလည်း ကျန့်ရှန်ရှူးထံသို့ မိစ္ဆာစွမ်းအင်များကို ပစ်လွှတ်သော်လည်း ရွှေရောင် အလင်းတန်းများက အကုန်လုံးကို ကာကွယ်ထားသည် ။
" မင်းတို့ ဘာကို ကြောက်နေကြတာလဲ... ငါတို့ ဂိုဏ်းချုပ်က မိစ္ဆာဧကရာဇ်ပဲ... သူက ဒီလူကို ကြောက်နေစရာ မလိုဘူး "
အစောင့်အရှောက် နံပါတ် ၃ က ပြောလိုက်သော်လည်း သူမ၏ မျက်မှောင်ကြုတ်ထားမှုက စိုးရိမ်စိတ်ကို ဖော်ပြနေသည် ။ ဂူချန်မှာမူ ထိုအခြင်းအရာကို ကြိုတင် သိမြင်ထားသည့်အလား တည်ငြိမ်နေဆဲ ဖြစ်သည် ။ သူက နဖူးမှ ကောင်းကင်မျက်လုံးကို တစ်ကြိမ် ထပ်မံ အသက်သွင်းလိုက်ရာ ရွှေရောင်အလင်းတန်းမှာ ကျန့်ရှန်ရှူး၏ ခန္ဓာကိုယ်ပေါ်တွင် ပေါက်ကွဲသွားတော့သည် ။ ပေါက်ကွဲမှုကြောင့် ကျန့်ရှင်ရှု၏ ခန္ဓာကိုယ်မှာ အပိုင်းပိုင်း ပြတ်သွားပြီး မြေပြင်ပေါ်တွင် ခေါင်းတစ်ခုသာ ကျန်ရှိတော့သည် ။
" ဟားဟားဟား... ဟားဟားဟားဟား "
သွေးများမှာ ပါးစပ်မှ စီးကျနေသော်လည်း ကျန့်ရှန်ရှူးက ရုတ်တရက် ရယ်မောလိုက်သည် ။ သူ၏ မျက်ဝန်းများတွင်လည်း မျှော်လင့်ချက် အလင်းတန်းများ ရှိနေဆဲ ဖြစ်သည် ။
" ဘာလို့ ရယ်နေတာလဲ... မင်းက ဘာလို့ ရယ်နေတာလဲ.. "
အစောင့်အရှောက် နံပါတ် ၄ က ဆဲဆိုလိုက်သော်လည်း ကျန့်ရှန်ရှူးက အက်ကွဲသော အသံဖြင့် ပြန်ပြောလိုက်သည် ။
" ကောင်းကင်ဘုံက ဘယ်တော့မှ လမ်းစအကုန် ပိတ်မထားဘူးဆိုတာ မင်းတို့ မကြားဖူးဘူးလား .."
" ငါ သွားချင်တဲ့ လမ်းက ငါ့ရဲ့ ခြေဖဝါးအောက်မှာ အမြဲတမ်း ရှိနေတယ်.. "
တစ်ချိန်တည်းမှာပင် သူ၏ စိတ်ထဲတွင် ရဲရင့်သော အသံတစ်ခု ပေါ်လာသည် ။
" ကျန့်ရှန်ရှူး... မင်း နောက်ဆုံးတော့ ဒဏ္ဍာရီ ဖြစ်လာဖို့ လျှို့ဝှက်ချက်ကို နားလည်သွားပြီပေါ့.. "
ထိုအသံမှာ တစ်ခါက နာမည်ကျော်ခဲ့သော ဓားဧကရာဇ် ဂျင်ဖလက်ရှ်ရှီ ၏ အသံ ဖြစ်သည် ။ ကျန့်ရှန်ရှူးသည် သူ ငယ်စဉ်က တောထဲတွင် ကောက်ရခဲ့သော ဓားသေတ္တာမှာ ဓားဧကရာဇ်၏ အမွေအနှစ် ဖြစ်သည်ကို ယခုမှ နားလည်သွားသည် ။ ကျန့်ရှန်ရှူး၏ ခန္ဓာကိုယ်မှာလည်း ရွှေရောင် အလင်းတန်းများအောက်တွင် အံ့ဖွယ်နည်းဖြင့် ပြန်လည် တည်ဆောက်လာသည် ။
ပျက်စီးသွားသော ပိုင်ရိဓားမှာလည်း ပြန်လည် စုစည်းသွားပြီး ကျန့်ရှန်ရှူး၏ အရှိန်အဝါမှာ ဧကရာဇ်တစ်ပိုင်း အဆင့်သို့ ရောက်ရှိသွားသည် ။ သူသည် ရှေ့မှ လူများကို သတ်ဖြတ်ရန် လက်ကို မြှောက်လိုက်သော်လည်း သူ၏ ရှေ့တွင် ဂူချန်က ရုတ်တရက် ပေါ်လာသည် ။
ဂူချန်သည် သူ၏ အစွမ်းကုန် အခြေအနေကို အသက်သွင်းလိုက်ပြီး ကျန့်ရှန်ရှူး၏ ပတ်ဝန်းကျင်ရှိ ဓားအရှိန်အဝါများကို အလွယ်တကူ ဖျက်ဆီးကာ သူ၏ ခေါင်းကို ဖမ်းဆုပ်လိုက်သည် ။ အစောင့်အရှောက် ငါးဦးမှာ အံ့ဩခြင်းပေါင်း များစွာဖြင့် ကြည့်နေစဉ်မှာပင် ဂူချန်က ကျန့်ရှန်ရှူးး၏ ခေါင်းကို ချေမွပစ်လိုက်တော့သည် ။
" နောက်တစ်ခါဆိုရင် ပုံပြင်ပြောတာ ကိုမြန်မြန်ပြောပါ.. "
ဂူချန်က အေးစက်စွာ ပြောလိုက်ပြီး သူ၏ လက်ပေါ်မှ သွေးစများကို ခါထုတ်ကာ ထိုနေရာမှ ထွက်ခွာသွားတော့သည် ။
Chapter 222
~
အခန်း ၂၂၂ : ဧကရာဇ်တစ်ပိုင်းအဆင့်သို့ ရောက်ရှိခြင်းနှင့် လမ်းစဉ်နှစ်ရပ်၏ မဟာသခင်
~
နတ်ဘုရားမီးတောက်ဂိုဏ်း ဌာနချုပ်ရှိ အနက်ရောင်နန်းတော်အတွင်း...
ယခုအခါ ထိုနေရာမှာ အပျက်အစီးများဖြင့် ပြည့်နှက်နေသော မြေပြင်တစ်ခု ဖြစ်သွားခဲ့ပြီး ဝါကျင့်ကျင့်သဲများက မြင်ကွင်းအတွင်းရှိ အရာအားလုံးကို ဖုံးလွှမ်းထားလေသည်။ သို့သော်လည်း မြေအောက် မီတာတစ်သောင်းအကွာတွင်ရှိသော နတ်ဘုရားမီးတောက်ဂိုဏ်း၏ ဘဏ္ဍာတိုက်မှာမူ မပျက်မစီးဘဲ နဂိုအတိုင်း ရှိနေဆဲပင် ။
" တစ်.. နှစ်..သုံး.. လေး.. ငါး... မင်းတို့အားလုံး နတ်ဘုရားမီးတောက်ဂိုဏ်းရဲ့ အဖွဲ့ဝင်တွေအားလုံးကို ဆက်သွယ်လိုက်ကြ .. ငါ ဒီထဲက ပြန်ထွက်လာတဲ့အခါ ဂိုဏ်းတစ်ခုလုံး မဟာမိတ်အဖွဲ့ချုပ် ကို စစ်ချီမယ်.. "
ဝူကျီမိစ္ဆာဧကရာဇ်၏ မှတ်ဉာဏ်များကို အသုံးချကာ ဂူချန်သည် ဘဏ္ဍာတိုက်တံခါးများကို အလွယ်တကူပင် ဖွင့်လိုက်လေသည်။ ထို့နောက် အစောင့်အရှောက်ငါးဦးကို ညွှန်ကြားချက်များ ပေးပြီးသည်နှင့် သူသည် အတွင်းသို့ တည့်တည့်မတ်မတ် လျှောက်လှမ်းဝင်သွားတော့သည်။
ဤတိုက်ပွဲသည် သူ့အတွက် စေတနာရမှတ် အမြောက်အမြားကို ဆောင်ကြဉ်းပေးခဲ့သည်။ ထိုရမှတ်များသည် သူ၏ ကျင့်စဉ်အဆင့်ကို ဧကရာဇ်အဆင့် သို့ ရောက်သည်အထိ မမြှင့်တင်ပေးနိုင်သော်လည်း သူ၏ ခွန်အားကို နောက်ထပ်အဆင့်တစ်ခုသို့ မြှင့်တင်ရန်အတွက်မူ လုံလောက်ပေသည်။
အနည်းဆုံးတော့ သူ၏ သန့်စင်ခြင်းလမ်းစဉ် နှင့် လှည့်စားမှုလမ်းစဉ် အဆင့်များကို အတိတ်တွင်လည်း မရှိခဲ့ဖူးသလို နောင်တွင်လည်း ရှိလာရန် ခဲယဉ်းသော အဆင့်တစ်ခုဖြစ်သည့်မဟာသခင် အဆင့်အထိ တွန်းတင်နိုင်မည် ဖြစ်သည်။
သမိုင်းတစ်လျှောက်တွင် ဒဏ္ဍာရီလာ မဟာဧကရာဇ် ဆယ်ပါးသာလျှင် သူတို့၏ လမ်းစဉ်အဆင့်ကို မဟာသခင် အဆင့်အထိ မြှင့်တင်နိုင်ခဲ့ကြခြင်း ဖြစ်သည်။ သူတို့မှလွဲ၍ အခြားမည်သူမျှ မရှိခဲ့ချေ။ သို့သော် ယနေ့ပြီးနောက်တွင်မူ လူသားမျိုးနွယ်၏ သမိုင်းတွင် နောက်ထပ်တစ်ဦး ထပ်တိုးလာတော့မည် ဖြစ်သည်။
ဘဏ္ဍာတိုက်အတွင်းသို့ ဝင်ရောက်ပြီးနောက် ဂူချန်သည် သူ၏ စိတ်အာရုံဖြင့် ဝေ့ဝဲကြည့်ရှုလိုက်ရာ သူအလိုရှိသော ကောင်းကင်နှင့်မြေကြီး ရတနာ ကို လျင်မြန်စွာ ရှာတွေ့သွားသည်။ ၎င်းမှာ အရှင်သခင် အဆင့်များ သို့မဟုတ် မဟာဧကရာဇ်များပင်လျှင် လိုချင်တပ်မက်ကြသည့် ထိပ်တန်းရတနာတစ်ပါး ဖြစ်သည်။
၎င်းမှာ အရောင်အဆင်းမရှိဘဲ ကြည်လင်တောက်ပသည့် စင်ကြယ်သော အရည်တစ်စက် ဖြစ်သော်လည်း မျက်နှာပြင်မှ ကြယ်တာရာများ၏ စွမ်းအားကို ဆောင်ကြဉ်းထားသည့်အလား မှိန်ဖျော့သော အလင်းတန်းများ ထွက်ပေါ်နေသည်။ အဝေးမှ လှမ်းကြည့်ရုံမျှနှင့်ပင် လူကို လန်းဆန်းတက်ကြွစေပြီး ကျင့်ကြံသူ၏ စိတ်ဓာတ်ကို ကြည်လင်သွားစေနိုင်သည်။
၎င်းမှာ ရှေးဦးနတ်ရေစင် ပင် ဖြစ်သည်။
၎င်းသည် ကျင့်ကြံသူများ၏ ရုပ်ပိုင်းဆိုင်ရာ ခန္ဓာကိုယ်ကို ဆေးကြောပေးနိုင်ခြင်း၊ ဝိညာဉ်ကို သန့်စင်ပေးခြင်း၊ နားလည်သဘောပေါက်နိုင်စွမ်းကို မြှင့်တင်ပေးခြင်း၊ လမ်းစဉ်၏ မူလစွမ်းအားကို တိုးမြှင့်ပေးခြင်းနှင့် ကျင့်စဉ်အဆင့်ကို ကျော်ဖြတ်စေနိုင်ရုံသာမက သက်တမ်းကိုပင် တိုးစေနိုင်သည့် အစွမ်းရှိသည်။ အရေးကြီးဆုံးအချက်မှာ ၎င်းသည် ဧကရာဇ်နယ်ပယ်သို့ တက်လှမ်းရာတွင် အဟန့်အတားဖြစ်စေသည့် စိတ်မိစ္ဆာများကို ကြိုတင်ဖယ်ရှားပေးနိုင်သော အကောင်းဆုံး ဝိညာဉ်ဆေးတစ်မျိုး ဖြစ်ခြင်းပင် ဖြစ်သည်။
ဤရေစင်သည် ကမ္ဘာဦးအစကပင် ကောင်းကင်နှင့်မြေကြီး၏ အစင်ကြယ်ဆုံး စွမ်းအင်များမှ ဖြစ်တည်လာခြင်း ဖြစ်ပြီး မှန်းဆ၍မရနိုင်သော လမ်းစဉ်မူလစွမ်းအားများ ပါဝင်နေသည်။ ၎င်းကို ဒဏ္ဍာရီလာ လျှို့ဝှက်နယ်မြေများတွင်သာ တွေ့ရှိနိုင်လေ့ရှိသည်။ နတ်ဘုရားမီးတောက်ဂိုဏ်း၏ ဘဏ္ဍာတိုက်ထဲရှိ ဤရေစင်တစ်စက်မှာ ဤကမ္ဘာပေါ်ရှိ နောက်ဆုံးကျန်ရစ်သော ရေစင်တစ်စက်လည်း ဖြစ်နိုင်ပေသည်။
ထိုစဉ်က ဝူကျီမိစ္ဆာဧကရာဇ်သည် ဤရေစင်တစ်စက်ကို ရရှိရန်အတွက် အသက်အန္တရာယ်ကို ရင်းနှီးခဲ့ရခြင်း ဖြစ်သည်။
" ဝူကျီ... အို ဝူကျီ... မင်းကတော့ ငါ့ကို တကယ်ပဲ ပျော်ရွှင်အောင် လုပ်ပေးနိုင်တာပဲ.. "
ဂူချန်သည် မူလအစနတ်ရေစင်ကို တွန့်ဆုတ်ခြင်းမရှိဘဲ ဖမ်းဆုပ်လိုက်ကာ သူ၏ ခန္ဓာကိုယ်အတွင်းသို့ ချက်ချင်းပင် သန့်စင်ထည့်သွင်းလိုက်လေသည်။
နောက်တစ်ခဏတွင်...
အေးမြသော စွမ်းအင်တစ်ခုသည် သူ၏ ခန္ဓာကိုယ်တစ်ခုလုံးသို့ စီးဝင်သွားပြီးနောက် တဖြည်းဖြည်းနှင့် နွေးထွေးသော စွမ်းအားတစ်ခုအဖြစ် ပြောင်းလဲသွားသည်။ သူသည် ကမ္ဘာဦးအစ ဖန်ဆင်းရှင်၏ ရင်ခွင်ထဲတွင် ရောက်ရှိနေသည့်အလား ခံစားလိုက်ရသည်။ သူ၏ စိတ်ထဲတွင်လည်း မကြုံစဖူးသော ကြည်လင်မှုမျိုး ပေါ်ပေါက်လာပြီး မည်သည့်အရာကမျှ သူ့ကို တုန်လှုပ်အောင် မလုပ်နိုင်တော့သည့် တည်ငြိမ်အေးချမ်းသော အခြေအနေသို့ ရောက်ရှိသွားသည်။
ဂူချန်သည် စနစ်ကို ခေါ်ယူလိုက်ပြီး ရမှတ်များကို စတင်အသုံးချလိုက်တော့သည်။
[ ဒင် ]
[ ကျင့်စဉ်ပိုင်းဆိုင်ရာ ပြင်ဆင်မှုများ ပြုလုပ်နေပါသည်... ]
[ သင်သည် အဆင့်မြင့် ကောင်းကင်နှင့်မြေကြီး ရတနာ ဖြစ်သော ရှေးဦးနတ်ရေစင်ကို သုံးစွဲထားသည်ဟု စနစ်က တွေ့ရှိရပါသည် ။ သင့်ခန္ဓာကိုယ်အတွင်းရှိ လမ်းစဉ်မူလစွမ်းအားများမှာ လှိုင်းတံပိုးများကဲ့သို့ မြင့်တက်နေပြီး လမ်းစဉ်ကြီးကို နားလည်နိုင်စွမ်းမှာလည်း သိသိသာသာ တိုးတက်လာပါသည် ။ ]
[ သင့်စိတ်မိစ္ဆာများ ကွယ်ပျောက်သွားပြီ ဖြစ်ပြီး ၊ နားလည်နိုင်စွမ်း မြင့်တက်လာကာ လမ်းစဉ်ပိုင်းဆိုင်ရာ သိမြင်မှုများ နက်ရှိုင်းလာပါသည် ။ ကျင့်စဉ်တိုးတက်မှု အရှိန်မှာ ၅၀၀ ရာခိုင်နှုန်းအထိ မြင့်တက်သွားပါသည် ]
" အဆင့် ၉ ရတနာဆေးရဲ့ အာနိသင်ကတော့ တကယ့်ကို ကြောက်စရာကောင်းတာပဲ.. "
ဂူချန်သည် စိတ်ထဲမှ ချီးကျူးမိသွားသည်။ ကျင့်စဉ်အရှိန် ငါးဆ တိုးတက်သွားသည်ကို သူ ယခုမှပင် မြင်ဖူးခြင်း ဖြစ်သည်။ သူ၏ ပုံရိပ်ယောင်နယ်မြေမှ ရရှိထားသော အရှိန်နှင့် ပေါင်းစပ်လိုက်လျှင် သူ၏ စေတနာရမှတ် အသုံးစရိတ်ကို သိသိသာသာ လျှော့ချနိုင်မည် ဖြစ်သည်။
ဂူချန်သည် ကျေနပ်စွာ ခေါင်းညိတ်လိုက်ပြီး စနစ်၏ ဖော်ပြချက်ကို ဆက်ကြည့်လိုက်သည်။
[ကျင့်စဉ် စတင်ပါပြီ ]
[ သင်၏ ကြောက်မက်ဖွယ်ကောင်းသော နားလည်နိုင်စွမ်းနှင့် လှည့်စားမှုလမ်းစဉ်တွင် ရှိသော ပါရမီတို့၏ အထောက်အပံ့ဖြင့် သင်သည် ကောင်းကင်နှင့်မြေကြီး၏ ပုံရိပ်ယောင်များကို လျင်မြန်စွာ နားလည်သွားပါသည် ။ သင်သည် အတုနှင့်အစစ်ကြားတွင် အုပ်စိုးသူ ဖြစ်လာပါပြီ ]
[ ဂုဏ်ယူပါသည် သင်၏ လှည့်စားမှုလမ်းစဉ် အဆင့်မှာ မဟာသခင် အဆင့်သို့ ရောက်ရှိသွားပါပြီ ]
[ပါရမီအဆင့်မြှင့်တင်ခြင်း - အတုအစစ်ပြောင်းလဲခြင်း မှ အတုအစစ်နေရာရွှေ့ပြောင်းခြင်း သို့ ပြောင်းလဲသွားပါသည် ။ ]
[အတုအစစ်နေရာရွှေ့ပြောင်းခြင်း - အစစ်အမှန်အရာဝတ္ထုများကို ရိပ်ယောင်အဖြစ် ပြောင်းလဲနိုင်သလို ၊ ရိပ်ယောင်များကိုလည်း အစစ်အမှန်အဖြစ် ပြောင်းလဲနိုင်ပါသည် ။ တိုက်ပွဲအတွင်း ရန်သူ၏ တိုက်ခိုက်မှုကို ရိပ်ယောင်အဖြစ် ပြောင်းလဲပစ်နိုင်သလို ၊ သင်၏ ရိပ်ယောင်တိုက်ကွက်များကိုလည်း အစစ်အမှန်အဖြစ် ပြောင်းလဲနိုင်ပါသည် ။ ]
[ဘေးထွက်ဆိုးကျိုး - ရုပ်ပိုင်းဆိုင်ရာ ခွန်အား အမြောက်အမြား ကုန်ဆုံးစေပါသည် ။ ]
[ နတ်ဘုရားစွမ်းရည်အသစ် - နှုတ်ထွက်အမိန့်တော် ]
[နှုတ်ထွက်အမိန့်တော် - သင်ပြောလိုက်သော စကားလုံးတိုင်းသည် ပုံရိပ်ယောင်မှ အစစ်အမှန်အဖြစ် ပြောင်းလဲသွားစေမည် ဖြစ်သော်လည်း ၎င်းအတွက် လမ်းစဉ်မူလစွမ်းအားများကို ကုန်ဆုံးစေမည် ဖြစ်သည် ။ ]
စနစ်၏ ဖော်ပြချက်များ ပျောက်ကွယ်သွားသည်နှင့်အမျှ ဂူချန်၏ ခန္ဓာကိုယ်မှာ ထူးဆန်းစွာ တွန့်လိမ်သွားပြီး အစစ်နှင့်အတုကြားတွင် တည်ရှိနေသည့်အလား ဖြစ်သွားသည်။ သူက လက်ကို လှမ်းဆန့်လိုက်ရုံမျှနှင့်ပင် ပတ်ဝန်းကျင်ရှိ ဟင်းလင်းပြင်နှင့် အရာဝတ္ထုများမှာ ပုံပျက်သွားပြီး ဘာမှမရှိသော အခြေအနေသို့ ရောက်ရှိသွားတော့သည်။
" ငါ့ကိုယ်ငါ ရိပ်ယောင်အဖြစ် ပြောင်းလဲနိုင်ရုံတင်မကဘဲ တခြားသူတွေကိုပါ ပြောင်းလဲပစ်နိုင်တာပဲ "
ဂူချန်သည် ခဏမျှ အံ့ဩသွားပြီးနောက် သူ၏ အသက်ရှူသံများ မြန်လာကာ နတ်ဘုရားစွမ်းရည်အသစ်ကို ကြည့်လိုက်သည်။
" နှုတ်ထွက်အမိန့်တော် .."
ဒဏ္ဍာရီထဲတွင်သာ ရှိသော ထိုစွမ်းရည်ကို သူ ပိုင်ဆိုင်လာလိမ့်မည်ဟု မထင်ထားခဲ့ပေ။ ဂူချန်သည် စမ်းသပ်လိုစိတ်ဖြင့် ရေရွတ်လိုက်သည်။
" ငါ အခု ဧကရာဇ် ဖြစ်လာပြီ .. "
ဘုန်း..
သူ၏ ခန္ဓာကိုယ်အတွင်းရှိ လှည့်စားမှုလမ်းစဉ် မူလစွမ်းအားများမှာ ရူးသွပ်မတတ် ကုန်ဆုံးသွားပြီး အဆင့် ၈ နှင့် အဆင့် ၉ ကြားရှိ အတားအဆီးမှာ ပြင်းထန်စွာ တုန်ခါသွားသည်။ သို့သော်လည်း လမ်းစဉ်မူလစွမ်းအားများ ကုန်ဆုံးသွားသည့်တိုင်အောင် ထိုမမြင်ရသော အတားအဆီးမှာမူ ကျိုးပျက်မသွားခဲ့ပေ။
သို့သော်လည်း ဤသည်က ဂူချန်အား မဟာဧကရာဇ်တစ်ပါး၏ စွမ်းအားကို အနည်းငယ် သိမြင်သွားစေခဲ့ပြီး ကျန့်ရှန်ရှူး ရောက်ရှိခဲ့သော ဧကရာဇ်တစ်ပိုင်း အဆင့်သို့ ရောက်ရှိသွားစေခဲ့သည်။
ဂူချန်သည် သက်ပြင်းတစ်ချက်ကို မှုတ်ထုတ်လိုက်သည်။ သူ၏ အရှိန်အဝါမှာ အမြင့်ဆုံးသို့ ရောက်ရှိနေပြီး ဒဏ္ဍာရီလာ ဧကရာဇ်နယ်ပယ်သို့ ရောက်ရန် ခြေတစ်လှမ်းသာ လိုတော့သည်။ သူ ရပ်နေပုံမှာပင် နတ်ဘုရားတစ်ပါးကဲ့သို့ ခန့်ညားထည်ဝါနေလေသည်။
သူသည် ခေါင်းကို ခါယမ်းကာ ရယ်မောလိုက်သည်။ သူ၏ လက်ရှိခွန်အားမှာ မည်သည့်အဆင့်သို့ ရောက်နေသည်ကို မသိနိုင်တော့ချေ။ မဟာဧကရာဇ်စစ်စစ်တစ်ပါး ပေါ်လာလျှင်ပင် သူက ရိုက်သတ်နိုင်လောက်သည့် အခြေအနေတွင် ရှိနေသည်။
ဤကမ္ဘာသို့ ရောက်ရှိလာပြီးနောက် သူသည် နောက်ဆုံးတွင် ဘာကိုမျှ စိုးရိမ်စရာမလိုဘဲ သူလုပ်ချင်ရာကို လုပ်နိုင်သည့် အဆင့်သို့ ရောက်ရှိလာခဲ့လေပြီ ။ သို့သော်လည်း ဤသည်မှာ မလုံလောက်သေး။ သူ၏ ပန်းတိုင်မှာ လူသားများကြားတွင် ပြိုင်ဘက်ကင်းရန် မဟုတ်ခဲ့ဖူးပေ။
တစ်ခါက သူ၏ မိဘများနှင့် ချစ်ခင်ရသူများသည် အုပ်စိုးသူလူတန်းစားများ၏ ရက်စက်စွာ အနိုင်ကျင့်ခြင်းကို ခံခဲ့ရဖူးသည်။ အရာရှိများက စစ်ပွဲကို စတင်ပြီး ၊ သူဌေးများက လက်နက်များ ထောက်ပံ့ပေးကာ ၊ သာမန်လူတန်းစားများကမူ သူတို့၏ သားသမီးများကို စစ်မြေပြင်သို့ ပို့ဆောင်ပေးခဲ့ကြရသည်။
ထိုအုပ်စိုးသူလူတန်းစားများတင်မကဘဲ အမှားအမှန်ကို မခွဲခြားနိုင်သော လူပြိန်းများမှာလည်း ခွင့်မလွှတ်နိုင်စရာပင် ဖြစ်သည်။ စစ်မှန်သော သင်ခန်းစာများကို သွေးနှင့် မီးတောက်များကြားတွင်သာ နက်နက်ရှိုင်းရှိုင်း မှတ်သားနိုင်ကြမည် ဖြစ်သည်။
အခွင့်အရေးရလျှင် သူသည် အဆုံးမရှိသော စကြာဝဠာကို ဖြတ်ကျော်ကာ သူ၏ မူလကမ္ဘာသို့ ပြန်သွားပြီး ကမ္ဘာသစ်တစ်ခုကို ဖန်တီးလိုသေးသည်။ လက်ရှိကမ္ဘာအတွက်မူ...
သူ့မျက်လုံးထဲတွင် ဤကမ္ဘာမှာ ဂိမ်းလောကတစ်ခုနှင့် မခြားနားပေ။ သူသ စိတ်ကို တည်ငြိမ်အောင် ထားလိုက်ပြီး စနစ်ကို ဆက်ကြည့်လိုက်သည်။
[စေတနာရမှတ် ၁၃,၆၅၈ ကို သုံးစွဲပြီး သင်သည် သန့်စင်ခြင်းလမ်းစဉ် ဖြင့် ကြယ်တာရာများကို သွန်းလုပ်ကာ ကမ္ဘာကြီးကို ပုံဖော်နိုင်စွမ်း ရှိလာပါပြီ ။ သင်သည် ကောင်းကင်နှင့်မြေကြီး ဖိုကြီး ကို ဖန်တီးနိုင်ပြီ ဖြစ်ပြီး မည်သည့်အရာဝတ္ထုကိုမဆို မူလစွမ်းအင်အဖြစ် ပြောင်းလဲနိုင်ကာ ရန်သူ၏ နတ်ဘုရားစွမ်းရည်များကိုပင် သင်၏ ကျင့်စဉ်အဖြစ် ပြောင်းလဲပစ်နိုင်ပါသည် ။ ]
[ ဂုဏ်ယူပါသည် သင်၏ သန့်စင်ခြင်းလမ်းစဉ်မှာ မဟာသခင် အဆင့်သို့ ရောက်ရှိသွားပါပြီ ]
[နတ်ဘုရားစွမ်းရည်အသစ် - ကောင်းကင်နှင့်မြေကြီး ဖိုကြီး ]
[ ကောင်းကင်နှင့်မြေကြီး ဖိုကြီး - ဤနယ်မြေကို အသက်သွင်းလိုက်လျှင် ရန်သူ၏ ခွန်အားမှာ ၃၀ ရာခိုင်နှုန်းထက်မက လျော့ကျသွားမည် ဖြစ်ပြီး ထိုနယ်မြေအတွင်းမှ လွတ်မြောက်နိုင်မည် မဟုတ်ချေ ။ ထိုဖိုအတွင်းရှိ နိယာမများကို သင်ကသာ ထိန်းချုပ်ထားမည် ဖြစ်သည် ။ ]
[လက်ကျန် စေတနာရမှတ် ၂၃၇,၇၄၇ ]
[သင်၌ မဖွင့်ရသေးသော ကံတရားလက်ဆောင်ထုတ် တစ်ခု ရှိနေပါသည် ။ ၎င်းကို ဖွင့်လိုပါသလား ။ ]