အခန်း (၁၄၁-၁၄၂)

141

“၁၀ နာရီထိုးတော့မယ်၊ ၁၀ နာရီထိုးတော့မယ်၊ အထူးလျှော့‌ဈေးအတွက် အသင့်ပြင်ထားကြတော့”

လီနီယာ၏ Fan Group တစ်ခုအတွင်း တစ်ဦးမှာသတိပေးလိုက်သောအခါ တစ်အုပ်စုလုံး တိတ်ဆိတ်သွားသည်။ တစ်မိနစ်ခန့် ကြာပြီးနောက်တွင်မူ လူများ စုပြုံ၍ ပြန်လည်ဖြေကြားလာကြတော့၏။

“အား ကျန်ခဲ့ပြီ၊ ငါဝယ်လို့မမီလိုက်ဘူး၊ အရမ်းဒေါသထွက်တာပဲ၊ ဒီအပတ်ထဲမှာ ငါ့အတွက် အရေးကြီးတဲ့ ချိန်းတွေ့စရာ ရှိနေတာ၊ ဝယ်မိတဲ့ ညီမလေးတွေထဲက တစ်ယောက်လောက် ငါ့ကို ပြန်ရောင်းပေးလို့ ရမလားဟင်”

“ဟားဟား ငါတော့ ရသွားပြီ၊ ပျော်လိုက်တာ”

“ဘာလို့ ဒီမှာ ပို့ဆောင်ခ အခမဲ့မဟုတ်တာလဲ၊ အဲဒါကြောင့် ခဏလေး တွန့်ဆုတ်သွားလို့ မဝယ်လိုက်ရဘူး”

“ဝေးလံတဲ့ဒေသတွေကိုတော့ ပို့ခအခမဲ့မပေးဘူး ထင်တယ်၊ ဒါပေမဲ့ အိပ်စက်နေသောမင်းသမီးလေးရဲ့ကုတင်နဲ့ တွဲဝယ်ရင်တော့ ပို့ခအခမဲ့ရမယ်တဲ့ ဟဲဟဲ”

“နင် ရူးနေလား အဲဒီကုတင်က ယွမ် (၆၀,၀၀၀) တောင် ပေးရတာလေ ငါက ပို့ခပေးရမှာတောင် နှမြောနေတာကို၊ ယွမ် (၆၀,၀၀၀) တန် ကုတင်ကြီးကို ဘယ်လိုလုပ် ဝယ်နိုင်မှာလဲ”

လီနီယာ၏ Fan Group အတွင်း မက်ဆေ့ခ်ျများမှာ အဆက်မပြန် ဝင်ရောက်နေသည်။ သူတို့ အလုအယက် ဝယ်ယူနေကြသည့် ပစ္စည်းမှာ ဟဲယဲ့တည်းခိုခန်းမှ ထုတ်လုပ်သော မက်မွန်သကြားလုံးပင် ဖြစ်သည်။

လီနီယာသည် ဟဲယဲ့တည်းခိုခန်းအကြောင်း ဗီဒီယိုကို တင်ပြီးနောက် သူမ၏ လူကြိုက်များမှုမှာ အလွန်မြင့်တက်လာခဲ့ပြီး မက်မွန်သကြားလုံး သုံးသပ်ချက် မှာလည်း အချိန်တိုအတွင်း နာမည်ကြီးသွားကာ အင်တာနက်အသုံးပြုသူ သောင်းနှင့်ချီ၍ ဝင်ရောက်ကြည့်ရှုခဲ့ကြသည်။ ဗီဒီယိုထဲတွင် လီနီယာသည် သကြားလုံး၏ ပုံပန်းသဏ္ဌာန်၊ အရသာနှင့် ကြာရှည်ခံသော ခံတွင်းနံ့သန့်စင်မှု အာနိသင်တို့ကို အသေးစိတ် မိတ်ဆက်ပေးခဲ့ရုံသာမက ပိုမိုပီပြင်စေရန်အတွက် ဒူးရင်းသီးနှင့် ကြက်သွန်ဖြူတို့ကို စားပြကာ မက်မွန်သကြားလုံး၏ အစွမ်းကို လက်တွေ့စမ်းသပ်ပြခဲ့၏။ အလှကုန်ပွဲတုန်းတွင် မက်မွန်သကြားလုံးကို ကိုယ်တိုင်မြည်းစမ်းခဲ့ရသည့် ဖန်များမှာလည်း ဗီဒီယိုအောက်တွင် လီနီယာ၏သုံးသပ်ချက်မှာ မှန်ကန်ကြောင်း ဝိုင်းဝန်းထောက်ခံခဲ့ကြသည်။ သူတို့သည် ပါတီပွဲအတွင်း လီနီယာထံမှ ရရှိခဲ့သည့် မက်မွန်သကြားလုံးကို စားကြည့်ပြီးနောက် ခံစားချက်များကို ပြန်လည်ဖော်ပြကြ၏။ ဤမက်မွန်သကြားလုံး၏ လန်းဆန်းသောအရသာနှင့် ကြာရှည်ခံသော ခံတွင်းနံ့သန့်စင်မှု အာနိသင်မှာ လုံးဝအစစ်အမှန်ဖြစ်ကြောင်း သူတို့အားလုံး တစ်ခဲနက် သဘောတူခဲ့ကြသည်။

ဗီဒီယိုမှာ ပျံ့နှံ့သွားသည်နှင့်အမျှ မက်မွန်သကြားလုံးနှင့် လီနီယာ၏ နာမည်ကျော်ကြားမှုမှာလည်း အရှိန်အဟုန်ဖြင့် မြင့်တက်လာသည်။ စမ်းသုံးချင်ကြတော့ အင်တာနက်အသုံးပြုသူများသည် လီနီယာ၏ မှတ်ချက်ကဏ္ဍတွင် ဝယ်ယူရန် လင့်ခ်များကို ရှာဖွေကြသော်လည်း ထိုသကြားလုံးမှာ ရောင်းရန်မဟုတ်ကြောင်း သိလိုက်ရသည့်အခါ အံ့အားသင့်သွားကြ၏။ စျေးဝယ်ချင်စိတ် အထွတ်အထိပ်ရောက်နေသော သူတို့မှာ ကြောင်တောင်တောင် ဖြစ်သွားကြသည်။ ဤသုံးသပ်ချက်ဗီဒီယိုမှာ ကြော်ငြာမဟုတ်တာ တကယ်ပဲလား အစကတော့ ဒါဟာ ကြော်ငြာပုံစံအသစ်တစ်ခုလို့ သူတို့ ထင်ခဲ့ကြခြင်းဖြစ်သည်။ သို့သော်လည်း ထိုအချက်မှာ ဉာဏ်ကောင်းသော အင်တာနက်အသုံးပြုသူများကို မတားဆီးနိုင်ခဲ့ပေ။ သူတို့သည် ဟဲယဲ့တည်းခိုခန်း၏ ဖုန်းနံပါတ်ကို ရှာဖွေပြီး ဖုန်းဆက်စုံစမ်းကြတော့သည်။

အင်တာနက်အသုံးပြုသူများထံမှ ဖုန်းခေါ်ဆိုမှုများစွာကို လက်ခံရရှိပြီးနောက်တွင်မူ စုဟယ်သည် ဘာဖြစ်နေသည်ကို နားလည်သွားခဲ့သည်။ လွန်ခဲ့သောရက်အနည်းငယ်အတွင်း ရုပ်ရှင်ရိုက်ကူးရေးအဖွဲ့၏ ကြော်ငြာမှုနှင့် လီနီယာ၏ ဗီဒီယိုတို့ကြောင့် ဟဲယဲ့တည်းခိုခန်း၏ လူကြိုက်များမှုနှုန်းမှာ (၁) သန်းတွင် (၉၃၀,၀၀၀) အထိ ရောက်ရှိလာပြီး (၁) သန်းပြည့်ရန် လက်တစ်ကမ်းအလိုသို့ ရောက်နေပြီဖြစ်သည်။ ထို့ကြောင့် စုဟယ်သည် မက်မွန်သကြားလုံးကို အွန်လိုင်းမှ ရောင်းချရန် ဆုံးဖြတ်လိုက်၏။ သူမသည် ဦးစွာ လျူရှန်းနှင့် တိုင်ပင်ကာ မက်မွန်သကြားလုံး ထုတ်လုပ်မှုလုပ်ငန်းစဉ်ကို မွမ်းမံခဲ့သည်။ ဤသကြားလုံး၏ အဓိကရောင်းချက်မှာ ခံတွင်းနံ့သန့်စင်ပေးခြင်း ဖြစ်သောကြောင့် လူများအနေဖြင့် အရသာအပေါ် အလွန်အမင်း တောင်းဆိုမှု မြင့်မားမည်မဟုတ်ပေ။ ထုတ်လုပ်မှု ပိုမိုလွယ်ကူစေရန်အတွက် လျူရှန်းသည် မက်မွန်ဖျော်ရည် "သကြားလုံး" အစား "ဂျယ်လီသကြားလုံး" အဖြစ် ပြောင်းလဲလိုက်သည်။ ယင်းက သကြားကျိုသည့် အဆင့်ကို ဖယ်ရှားပေးလိုက်ခြင်းပင်။ အသင့်ပြင်ထားသော နတ်မက်မွန်ဖျော်ရည်ကို Gelatin ပါဝင်သော သကြားရည်ထဲသို့ ထည့်ကာ အအေးခံလိုက်သည့်အချိန်တွင် နူးညံ့ပြီး ရုန်းကန်အားရှိသော မက်မွန်ဂျယ်လီလေးများ ဖြစ်လာသည်။ စုဟယ်သည် မက်မွန်သီးပုံစံ ပုံစံခွက်လေးများကိုလည်း အွန်လိုင်းမှ ဝယ်ယူလိုက်ရာ ဂျယ်လီလေးများမှာ ချစ်စရာကောင်းသော ပန်းရောင်မက်မွန်သီး ပုံသဏ္ဌာန်လေးများ ဖြစ်လာ၏။

အွန်လိုင်းမှ ရောင်းချရန်အတွက် ပမာဏအနည်းငယ်နှင့် မလုံလောက်ပေ။ စုဟယ်သည် သူမ၏ ရန်ပုံငွေကို တွက်ချက်ကာ တတိယမြောက် နတ်မက်မွန်ပင်ကို ထပ်မံဝယ်ယူလိုက်ရာ တစ်နေ့လျှင် မက်မွန်သီး (၃၀) လုံး ရရှိလာသည်။ ထိုအထဲမှ (၁၅) လုံးကို ဖျော်ရည်လုပ်ကာ သကြားရည်နှင့်ရော၍ ဂျယ်လီသကြားလုံး အလုံး (၃,၀၀၀) ခန့် ထုတ်လုပ်လိုက်သည်။ စုဟယ်သည် တစ်အိတ်လျှင် (၁၀) လုံးနှုန်းဖြင့် တစ်နေ့လျှင် အိတ်ပေါင်း (၂၀၀) ကို အွန်လိုင်းမှ ရောင်းချပြီး ကျန်သောအိတ် (၁၀၀) ကိုမူ တည်းခိုခန်းအတွင်းရှိ ဧည့်သည်များကို အခမဲ့ ဝေငှပေးရန် ထားရှိလိုက်၏။ ကျန်ရှိသော မက်မွန်သီး (၁၅) လုံးကိုမူ ယခင်အတိုင်း ယိုချက်၍ မနက်စာတွင် ကျွေးမွေးသည်။ စုဟယ်သည် ဂျယ်လီသကြားလုံးအတွက် ထုပ်ပိုးမှုဗူးကိုလည်း စက်ရုံတစ်ခုတွင် သီးသန့်မှာယူခဲ့သည်။ ထုပ်ပိုးမှုမှာလည်း မက်မွန်သီးပုံစံဖြစ်ပြီး နတ်မက်မွန်သီး၏ ပုံသဏ္ဌာန်ကို အတုယူထားသဖြင့် အလွန်ဆွဲဆောင်မှုရှိ၏။ ထုပ်ပိုးမှုပေါ်တွင် “ဟဲယဲ့တည်းခိုခန်း၊ မက်မွန်ဂျယ်လီသကြားလုံး” ဟု အစိမ်းရောင်စာလုံးများဖြင့် ရေးထွင်းထားသည်။ အစိမ်းရောင်နှင့် ပန်းရောင်တို့ ပေါင်းစပ်ထားမှုမှာ “ဟဲယဲ့တည်းခိုခန်း” ဆိုသည့် စာလုံးကို ပို၍ပင် ထင်ပေါ်စေသည်။

အစိုးရ၏ လုပ်ငန်းစဉ်များကို တစ်ကြိမ်တည်းဖြင့် အပြီးဆောင်ရွက်ပေးခြင်း မူဝါဒကြောင့် စုဟယ်သည် (၅) ရက်အတွင်း အစားအသောက် အသေးစား ထုတ်လုပ်မှုခွင့်ပြုမိန့် ကို အလွယ်တကူ လျှောက်ထားနိုင်ခဲ့သည်။ ဟဲယဲ့တည်းခိုခန်းတွင် စီးပွားရေးလုပ်ငန်းလိုင်စင်နှင့် အစားအသောက်လုပ်ငန်းခွင့်ပြုမိန့် ရှိနှင့်ပြီးဖြစ်သော်လည်း ယင်းမှာ ဆိုင်အတွင်း၌သာ ကိုယ်တိုင်လုပ် အစားအစာများကို ရောင်းချရန် ဖြစ်သည်။ အွန်လိုင်းမှတစ်ဆင့် ရောင်းချလိုပါက အသေးစားထုတ်လုပ်မှု ခွင့်ပြုမိန့် ထပ်မံလိုအပ်ခြင်းဖြစ်၏။ စာရွက်စာတမ်းများ ပြည့်စုံသွားသည့်အခါ စုဟယ်သည် မက်မွန်ဂျယ်လီများကို ဟဲယဲ့တည်းခိုခန်း၏ တရားဝင် မီနီပရိုဂရမ် ပေါ်တွင် တင်၍ ရောင်းချတော့သည်။ ဤပရိုဂရမ်မှာ စနစ် မှ အိပ်စက်နေသောမင်းသမီးလေးရဲ့ ကုတင် ကို ရောင်းချရန်အတွက် ဖန်တီးပေးထားခြင်း ဖြစ်၏။

တကယ်လို့ စုဟယ်အနေနဲ့ ဂိမ်း‌ဈေးတန်းထဲမှ ပစ္စည်းများကို တစ်ချက်နှိပ်ရုံနဲ့ ပြန်လည်ရောင်းချမယ်ဆိုရင် စနစ်မှာ ကော်မရှင်ခ (၈၀) ရာခိုင်နှုန်း ယူမည်ဖြစ်သည်။ လက်ရှိတွင် အိပ်စက်နေသောမင်းသမီးလေးရဲ့ ကုတင် ကို ယွမ် (၆၀,၀၀၀) ဖြင့် ရောင်းချရာ စနစ်မှ ယွမ် (၄၈,၀၀၀) (၈၀ ရာခိုင်နှုန်း) ဖြတ်ယူသည်။ ယခုတစ်ကြိမ်တွင်မူ စုဟယ်သည် မက်မွန်ဂျယ်လီကို သူမဘာသာ ထုတ်လုပ်ပြီး တရားဝင်မီနီပရိုဂရမ်ပေါ် တင်ခြင်းဖြစ်သော်လည်း စနစ်မှာ ကော်မရှင်ခ ယူမြဲဖြစ်၏။ သို့သော် ဤဂျယ်လီမှာ စုဟယ်ကိုယ်တိုင် ထုတ်လုပ်ခြင်းဖြစ်ပြီး ဂိမ်း‌ဈေးတန်း၏ ဝန်ဆောင်မှုများကို မသုံးစွဲသောကြောင့် စနစ်မှာကရုဏာသက်စွာဖြင့် ကော်မရှင်ခ (၂၀) ရာခိုင်နှုန်းသာ ဖြတ်ယူရန် သဘောတူခဲ့သည်။ မက်မွန်ဂျယ်လီတစ်အိတ်ကို (၁၅) ယွမ် သတ်မှတ်ထားပြီး ပို့ဆောင်ခအခမဲ့ဖြစ်၏။ ဆိုလိုသည်မှာ တစ်အိတ်ရောင်းရတိုင်း စနစ်မှာ (၃) ယွမ် ဖြတ်ယူမည်ဖြစ်သည်။ စုဟယ်သည် ပို့ဆောင်ရေးကုမ္ပဏီနှင့် ညှိနှိုင်းရာ ဝေးလံသောဒေသများမပါဘဲ တစ်အိတ်လျှင် ပို့ခ (၃) ယွမ် ကျသင့်မည်ဖြစ်၏။ ပို့ခနှင့် စနစ်ကော်မရှင်ခတို့ကို နှုတ်လိုက်ပါက စုဟယ်အနေဖြင့် တစ်အိတ်လျှင် (၉) ယွမ်သာ ရရှိမည်ဖြစ်ပြီး ယင်းမှာ ထုပ်ပိုးမှုစရိတ်နှင့် အခြားကုန်ကျစရိတ်များကို မထည့်ရသေးပေ။ တကယ်လို့ နတ်မက်မွန်ပင်၏ ကုန်ကျစရိတ်ကိုပါ ထည့်တွက်မည်ဆိုလျှင် အရင်းကျေရန်မှာ လွန်စွာဝေးကွာနေပါသေးသည်။ သို့သော်လည်း စုဟယ်သည် ဤတစ်ကြိမ်တွင် အမြင်ကျယ်ကျယ် ထားလိုက်၏။ နာမည်ကျော်ကြားမှု ရရှိလာခြင်းမှာပင် ကောင်းမွန်သောအချက် ဖြစ်သည်။

မနက် (၁၀) နာရီတွင် စုဟယ်သည် ဂျယ်လီအိတ်ပေါင်း (၂၀၀) ကို ဝက်စ်ဆိုက်ပေါ်တွင် တင်လိုက်သည်။ သူမသည် မီနီပရိုဂရမ်တွင် ကြိုတင်အသိပေးချက် တင်ထားခဲ့သော်လည်း လူမည်မျှ မြင်တွေ့မည်။ ဤအိတ် (၂၀၀) လုံး ကုန်မည်လားဆိုသည်ကို စိုးရိမ်နေမိသည်။ စုဟယ်၏ အထင်အရ အိတ် (၂၀၀) သည် (၂) ရက် (၃) ရက်ခန့် ရောင်းရလိမ့်မည်ဟု ထင်ထားသည်။ အနည်းဆုံးတော့ သူမသာဆိုလျှင် ဤဂျယ်လီကို ဝယ်ရန် မလိုအပ်ဟု ခံစားရ၏။ ဗိုက်ဆာလျှင် (၁၅) ယွမ်ဖြင့် အသားချောင်း (၃) ချောင်း ဝယ်စားခြင်းမှာ ပို၍ ကျေနပ်စရာကောင်းမည်ဟု သူမ တွေးမိသည်။ သို့သော် ဂျယ်လီသကြားလုံး၏ လူကြိုက်များမှုမှာ စုဟယ်၏ မျှော်လင့်ချက်ကို ကျော်လွန်သွားခဲ့သည်။ ထိုသကြားလုံးသည် လူတို့၏ နေ့စဉ်ဘဝတွင် ရှိနေသော လိုအပ်ချက်အသေးလေးတစ်ခုကို ဖြည့်ဆည်းပေးနိုင်ခဲ့ခြင်းမှာ ထင်ရှားလှ၏။ ယင်းမှာ အရေးကြီးသော အချိန်များတွင် ခံတွင်းကို လန်းဆန်းနေအောင် ထိန်းသိမ်းခြင်းပင်။ ချိန်းတွေ့ခြင်း၊ အရေးကြီးသော စီးပွားရေးဆွေးနွေးပွဲ သို့မဟုတ် သူငယ်ချင်းများနှင့် ရိုးရိုးရှင်းရှင်း တွေ့ဆုံခြင်းမျိုးတွင်ပင် ခံတွင်းနံ့ လန်းဆန်းနေခြင်းမှာ ပထမဆုံးထင်မြင်ချက်ကိုကောင်းမွန်စေသည်။

အထူးသဖြင့် ဆေးလိပ်သောက်တတ်သူများအတွက် ဤသကြားလုံးမှာ ပို၍ပင် လိုအပ်လှသည်။ ဆေးလိပ်နံ့မှာ ခံတွင်းထဲတွင် ကြာရှည်စွာ ကျန်ရစ်တတ်ပြီး မက်မွန်ဂျယ်လီ၏ လန်းဆန်းသောရနံ့မှာ ထိုအနံ့ဆိုးများကို ထိရောက်စွာ ဖယ်ရှားပေးနိုင်သောကြောင့် ဆေးလိပ်သောက်သူများအတွက် အဆင်ပြေစေသော ဖြေရှင်းချက်တစ်ခု ဖြစ်လာ၏။ ထို့အပြင် မက်မွန်ဂျယ်လီ၏ ဈေးနှုန်းမှာလည်း အလွန်ပင် သင့်တင့်လှသည်။ လူအများအတွက် ဝန်ထုတ်ဝန်ပိုး မဖြစ်စေဘဲ သကြားလုံးတစ်လုံးချင်းစီမှာ ခံတွင်းကို (၃) နာရီခန့်အထိ မွှေးပျံ့စေနိုင်သဖြင့် တွက်ချေကိုက်မှုမှာလည်း အလွန်မြင့်မားသည်။ စျေးကွက်အတွင်းရှိ အလားတူထုတ်ကုန်များနှင့် နှိုင်းယှဉ်ပြီးနောက် စားသုံးသူများသည် မက်မွန်ဂျယ်လီမှာ ထိရောက်မှုရှိရုံသာမက စျေးနှုန်းလည်း သက်သာကြောင်း တွေ့ရှိသွားကြသဖြင့် ၎င်းကို နေ့စဉ်စားသုံးမည့် သရေစာအဖြစ် ရွေးချယ်ရန် ပိုမိုလိုလားလာကြ၏။ (၁၀) နာရီ ထိုးပြီး (၁) မိနစ် အကြာတွင်ပင် မက်မွန်ဂျယ်လီများ အားလုံး ကုန်သွားတော့သည်။

142

အားလပ်ရက် ခရီးထွက်ရာမှ ပြန်လာသော လီရှီသည် တစ်ခါနှင့်မျှမတူဘဲ အလုပ်နှင့် အသားမကျသေးသဖြင့် သမ်းဝေနေမိသည်။ အားလပ်ရက်နှင့် နှိုင်းယှဉ်လျှင် မည်သည့်အလုပ်မဆို ပင်ပန်းသည်မှာ အမှန်ပင်။ သူသည် မနက်စောစောစီးစီးမှာပင် ပင်ပန်းနွမ်းနယ်မှုကို ခံစားနေရပြီဖြစ်သည်။ လီရှီသည် ရေတစ်ငုံ သောက်လိုက်၏။ သို့သော် ယနေ့မနက်ခင်းမှာ အမှန်တကယ်ပင် အလုပ်ရှုပ်လှသည်။ သူသည် အခန်းဘိုကင်တင်ရန်အတွက် ဆယ်ကြိမ်မြောက် ဖုန်းခေါ်ဆိုမှုကို ဖြေကြားပြီးခဲ့ပြီဖြစ်၏။ လီရှီအနေဖြင့် နားမလည်နိုင်အောင် ဖြစ်နေရသည်။ သူအပန်းဖြေခရီးထွက်သွားသည်မှာ ရက်အနည်းငယ်သာ ရှိသေးသည်။ သူပြန်ရောက်လာသည့်အခါ တည်းခိုခန်း၏ တိုးတက်မှုနှုန်းမှာ အဘယ့်ကြောင့် ဤမျှ မြန်ဆန်သွားရသနည်း။

တစ်မနက်လုံး ဖုန်းများမှာ မနားတမ်း မြည်နေပြီး အားလုံးမှာ အခန်းဘိုကင်တင်ရန်အတွက်သာ ဖြစ်သည်။ လူအများအပြားမှာ သူတို့ကိုယ်သူတို့ ရုပ်ရှင်ရိုက်ကူးရေးအဖွဲ့များမှဖြစ်ကြောင်းနှင့် အလွန်ကြီးကျယ်သော နောက်ခံအသိုင်းအဝိုင်းများရှိကြောင်း ချက်ချင်းပင် ထုတ်ဖော်ပြောဆိုကြ၏။ အစပိုင်းတွင် လီရှီမှာ ဒါဟာ လိမ်လည်လှည့်ဖြားမှုတစ်ခုဟု ထင်ခဲ့သော်လည်း သူဌေးမ စုဟယ်နှင့် ဆက်သွယ်ကြည့်ပြီးနောက်တွင်မူ ဖျော်ဖြေရေးလောကမှ လူအများအပြားမှာ တည်းခိုခန်းသို့ အမှန်တကယ် ရောက်ရှိနေကြပြီဖြစ်ကြောင်း သိလိုက်ရသည်။ ၎င်း၏ ထူးခြားလှသော အိပ်မက်ကမ္ဘာသို့ ဝင်ရောက်ခြင်း ဝန်ဆောင်မှုကြောင့် ဟဲယဲ့တည်းခိုခန်းသည် ဖျော်ဖြေရေးလောကအတွင်း တဖြည်းဖြည်း ကျော်ကြားလာခဲ့ပြီး အနုပညာရှင်များစွာအတွက် အနှစ်သက်ဆုံး တည်းခိုရာနေရာတစ်ခု ဖြစ်လာခဲ့၏။ ထိုဖျော်ဖြေရေးလောကမှ လူပုဂ္ဂိုလ်များသည် တည်းခိုခန်းသို့ လာသည့်အခါ ဦးထုပ်များ၊ နေကာမျက်မှန်များဖြင့် သူတို့ကိုယ်သူတို့ လုံခြုံအောင် ဖုံးအုပ်ထားကြသည်။ မျက်နှာဖြင့် အတည်ပြုချက် ရယူရမည့်အချိန်ကျမှသာ သူတို့၏ ရုပ်ဖျက်ထားမှုများကို ဂရုတစိုက် ဖယ်ရှားကြ၏။ တည်းခိုခန်း၏ စင်္ကြံလမ်းများတွင် တစ်ခါတစ်ရံ ရင်းနှီးပြီးသား မျက်နှာအချို့ကို ရုတ်တရက် တွေ့လိုက်ရတတ်သည်။ ဖျော်ဖြေရေးလောကမှ လူအချင်းချင်း တစ်ယောက်ကိုတစ်ယောက် မှတ်မိကြလျှင်ပင် မဆင်မခြင် သွားရောက်နှုတ်ဆက်ခြင်းမျိုး မပြုကြဘဲ အနည်းငယ် စိုးရိမ်တကြီးနှင့် ဂရုတစိုက် ရှိနေပုံရ၏။

ဤသို့ စိတ်လှုပ်ရှားနေကြခြင်းမှာလည်း အကြောင်းမဲ့တော့မဟုတ်ပေ။ ဖျော်ဖြေရေးလောကအတွင်း ပြိုင်ဆိုင်မှုမှာ ပြင်းထန်လှပြီး ဟဲယဲ့တည်းခိုခန်း၏ အိပ်မက်ဝန်ဆောင်မှုအကြောင်း သိရှိထားသော အနုပညာရှင်များသည် ထိုသတင်းပျံ့နှံ့မှုကို ဂရုတစိုက် ထိန်းချုပ်ထားကြကာ သူတို့နှင့် အလွန်ရင်းနှီးသော မိတ်ဆွေများကိုသာ ဤတည်းခိုခန်း၏ မှော်ဆန်မှုအကြောင်း ပြောပြကြသည်။ သို့သော်ငြားလည်း လူသိများလာခြင်းကိုမူ တားဆီး၍ မရခဲ့ပေ။ ထိုအနုပညာရှင်များ၏ စကားပြောဆိုမှုများမှာလည်း တစ်ဖက်လူ၏ ရုပ်ရှင်ရိုက်ကူးရေး သတင်းအစအနများကို စုံစမ်းခြင်း သို့မဟုတ် အချင်းချင်း၏ သရုပ်ဆောင်မှု အခြေအနေများကို အကဲခတ်ခြင်းတို့ဖြင့် ပြည့်နှက်နေတတ်သည်။ အနုပညာရှင် အများအပြားသည် လီရှီ၏ ဆက်သွယ်ရန် လိပ်စာကို ရယူလိုကြောင်း ပြောဆိုကြရာ လီရှီမှာ အနည်းငယ်ပင် မြှောက်ပင့်ခံရသလို ခံစားလိုက်ရ၏။ ဤအနုပညာရှင်များသည် ပုဂ္ဂိုလ်ရေးအရ ခင်မင်မှုကို အသုံးပြုကာ တည်းခိုခန်းတွင် အခန်းများကို ကြိုတင်ဘိုကင်ယူထားချင်ကြခြင်း ဖြစ်သည်။ လီရှီကမူ ဧည့်သည်အားလုံးကို တန်းတူညီမျှ ဆက်ဆံသည်။ သူသည် ထိုအနုပညာရှင်များ၏ တောင်းဆိုချက်များကို ငြင်းပယ်ခဲ့ပြီး သတ်မှတ်ထားသော ဘိုကင်စည်းမျဉ်းများနှင့် လုပ်ထုံးလုပ်နည်းများအတိုင်းသာ လိုက်နာရန်အကြံပေး၏။ သူသည် ဝန်ထမ်းတစ်ဦးသာဖြစ်ပြီး ဆုံးဖြတ်ချက်များ မချနိုင်သဖြင့် ထိုနာမည်ကြီးကြယ်ပွင့်များကို စုဟယ်ထံသို့သာ လွှဲပြောင်းပေးလိုက်သည်။

စုဟယ်မှာမူ အထူးအခွင့်အရေးများပေးကာ ကြိုတင်ဘိုကင်များ လက်ခံလိုက်ပါက နောက်ပိုင်းတွင် သူမ စိတ်ရှုပ်ရမည်ဖြစ်သလို တည်းခိုခန်း၏ လုပ်ငန်းအပေါ်တွင်လည်း ထိခိုက်နိုင်ကြောင်း သိထားသည်။ ထို့ကြောင့် လက်ရှိတွင် ဒါရိုက်တာကုန်းတစ်ဦးတည်းကိုသာ အခန်းကြိုတင်ဘိုကင်ယူရန် အခွင့်အရေးပေးထားခြင်းဖြစ်၏။ ရှောင်ရှီးမှာ သူ၏ ဇာတ်ဝင်ခန်းများအားလုံး ရိုက်ကူးပြီးစီးသဖြင့် တည်းခိုခန်းသို့ ပြန်ရောက်နေပြီဖြစ်သော်လည်း ဆရာဝေမှာမူ ရုပ်ရှင်အဖွဲ့တွင် အကြံပေးအဖြစ် ဆောင်ရွက်နေဆဲဖြစ်သည်။ တည်းခိုခန်းနှင့် ရုပ်ရှင်အဖွဲ့ကြား ဆက်ဆံရေးမှာ အလွန်ပြေလည်လှသဖြင့် စုဟယ်အနေဖြင့် ဒါရိုက်တာကုန်းကို ကူညီပေးရသည်မှာ ဝမ်းမြောက်စရာပင်။

စုဟယ်သည် ဟဲယဲ့တည်းခိုခန်း၏ မီနီပရိုဂရမ်ပေါ်တွင် သကြားလုံးရောင်းအားကို ကြည့်ရှုနေစဉ် ဘေးနားရှိ ဖုန်းမှာ မြည်လာသည်။ ၎င်းမှာ ရော့စ် ဖြစ်သည်။ လာခဲလှသော ဧည့်သည်ပင်။ ရော့စ်သည် မိဘများ၏ ဖိအားပေးမှုကြောင့် မိသားစုစားသောက်ဆိုင်တွင် အလုပ်ဝင်လုပ်ပြီးနောက်ပိုင်း သူ၏ အပြုအမူများမှာ များစွာ ထိန်းသိမ်းလာခဲ့၏။ သူသည် စားသောက်ဆိုင်တွင် နေ့စဉ် ကြိုးစားပမ်းစား အလုပ်လုပ်နေပြီး သူ၏လူမှုကွန်ရက်ပေါ်တွင်လည်း ဇိမ်ခံကားများနှင့် ပါတီပွဲပုံများ တင်ခြင်းမျိုး မရှိတော့ဘဲ မိသားစုစားသောက်ဆိုင်၏ ပွဲလမ်းသဘင် လင့်ခ်များကိုသာ မျှဝေနေတတ်သည်။ စုဟယ်သည် တစ်ခါတစ်ရံ သူ၏ ပို့စ်များကို Like ပေးလေ့ရှိ၏။

"သူဌေးမစု သန်ဘက်ခါကျရင် ကုတင်နှစ်လုံးပါအခန်းကို အထူးဧည့်သည်တော်တစ်ယောက် လာဖို့ရှိတယ်၊ ကျွန်တော့်အတွက် ကြိုပြီး စီစဉ်ပေးလို့ ရမလား"

ရော့စ် တိုက်ရိုက်ပင် ပြောချလိုက်သည်။ သူသည် ယခင်က ဟဲယဲ့တည်းခိုခန်းကို သူ၏ ချမ်းသာသော သူဌေးသူငယ်ချင်းများအား မိတ်ဆက်ပေးခဲ့ဖူး၏။ ထိုသူဌေးသူငယ်ချင်းများသည် မှော်မှန် ၏ ဝန်ဆောင်မှုကို အလွန်သဘောကျကြပြီး ငွေကြေးအနည်းငယ်အပေါ် ဂရုမစိုက်ကြသဖြင့် ကုတင်နှစ်လုံးပါအခန်းအချို့ကို ရေရှည်ငှားရမ်းထားပြီး သူငယ်ချင်းများ၏ သူငယ်ချင်းများကိုပါ အုပ်စုလိုက် ခေါ်ဆောင်လာကာ ကစားလေ့ရှိကြသည်။ ယခုအခါတွင်မူ အခြေအနေမှာ ကံကောင်းထောက်မစွာဖြင့် ပြောင်းပြန်ဖြစ်သွားခဲ့ပြီ။ စုဟယ်မှာ လူများလာတည်းရန် လိုက်လံရှာဖွေစရာမလိုတော့ဘဲ ဧည့်သည်များမှာသာ စုဟယ်ကို အခန်းကြိုတင်ရရန် တောင်းဆိုနေကြရခြင်း ဖြစ်သည်။ သူဌေးသား အများအပြားသည် ဟဲယဲ့တည်းခိုခန်းသို့ လာကစားလေ့ရှိသော်လည်း ရော့စ်အနေဖြင့် စုဟယ်ကို အထူးဂရုစိုက်ပေးရန် ဖုန်းဆက်တောင်းဆိုလာခြင်းသည် ဤသည်မှာ ပထမဆုံးအကြိမ်ပင်ဖြစ်၏။

ဟဲယဲ့တည်းခိုခန်းသည် ဘိုကင်တင်ထားသော ဧည့်သည်တိုင်း၏ လိုအပ်ချက်ကို ဖြည့်ဆည်းပေးရန် အမြဲကြိုးစားလေ့ရှိပြီး ရော့စ်နှင့် သူမ၏ ဆက်ဆံရေးမှာလည်း ကောင်းမွန်လှသည်။ ရော့စ်သည် စုဟယ်အား ကျင်းရှန်း စားသောက်ဆိုင်၏ အသင်းဝင်ကတ်ကိုလည်း ပေးအပ်ထားသဖြင့် စုဟယ်မှာ ရော့စ်ကို ကူညီရန် ဝမ်းမြောက်ဝမ်းသာ သဘောတူလိုက်၏။

"ဘယ်လိုမျိုး စီစဉ်ပေးရမလဲ သူတို့ရဲ့ လိုအပ်ချက်က ဘာတွေလဲ"

ဖုန်းတစ်ဖက်မှ ရော့စ်မှာ ခေတ္တမျှ တိတ်ဆိတ်သွားပြီး မည်သို့စီစဉ်ပေးရမည်ကို အတိအကျ မပြောနိုင်ဖြစ်နေသည်။ ထို့ကြောင့် ရော့စ်သည် အစမှအဆုံး ပြန်လည်ရှင်းပြရန် ဆုံးဖြတ်လိုက်၏။

"ဒီလိုပါ သူဌေးမစု၊ ကျွန်တော့်သူငယ်ချင်းတွေက အပျော်အပါးပဲ မက်ကြပြီး အလုပ်အကိုင် အတည်တကျမရှိတာ ခင်ဗျား သိပါတယ်၊ လျှောက်ကစားနေကြတာလေ၊ ဒါပေမဲ့ ကျွန်တော်ရဲ့အားမကိုးရတဲ့ အပေါင်းအသင်းတွေထဲမှာ မျက်နှာချိုသွေးတတ်တဲ့တစ်ယောက် ပါတယ်ဗျ၊ သူက မြို့တော်က ဥက္ကဋ္ဌချီ နဲ့ ရင်းနှီးသွားတယ်၊ ဥက္ကဋ္ဌချီက ယုံမြစ် ကို မြေကွက်လေလံဆွဲဖို့ လာမယ်ဆိုတာ သူကြားလိုက်တာ၊ ယုံမြစ်က အခု မြို့သစ်စီမံကိန်း ကို အကြီးအကျယ် ပြုလုပ်နေတာလေ၊ ဥက္ကဋ္ဌချီက ဒီစီမံကိန်းကို အရမ်းစိတ်ဝင်စားနေလို့ ယုံမြစ်ကို အထူးတလည် လာခဲ့တာပါ"

ရော့စ် ဥက္ကဋ္ဌချီ၏ ခရီးစဉ်ရည်ရွယ်ချက်ကို မိတ်ဆက်ပေးသည်။

"ကျွန်တော့်သူငယ်ချင်းက ဥက္ကဋ္ဌချီ လာမယ်ဆိုတာ ကြားတော့ သူ့ကို ဧည့်ခံကျွေးမွေးဖို့ တာဝန်အပြည့်ယူမယ်ဆိုပြီး ဇွတ်လုပ်တာပေါ့၊ အစကတော့ ကြယ်ငါးပွင်ဟိုတယ်တစ်ခုမှာ ဘိုကင်တင်မယ်လို့ ပြောသေးတယ်၊ ဒါပေမဲ့ နောက်တော့ ဒါက ရိုးလွန်းတယ်လို့ သူတွေးမိသွားတယ်၊ ဘာလို့လဲဆိုတော့ ကြယ်ငါးပွင့်ဟိုတယ်ဆိုတာ နေရာတိုင်းမှာ ရှိနေတာပဲလေ၊ ဒီတော့ ဒီလူတွေက ထူးထူးဆန်းဆန်းတွေ တွေးပြီး ဥက္ကဋ္ဌချီကို ဟဲယဲ့တည်းခိုခန်းဆီ ခေါ်လာပြီး အသစ်အဆန်းတွေ ပြမယ်ဆိုပြီး ဖြစ်လာတာပေါ့ "

ရော့စ်၏ လေသံထဲတွင် ယခုထက်ထိ မယုံကြည်နိုင်မှုများ ပါဝင်နေဆဲဖြစ်သည်။

"မထင်မှတ်ဘဲ ဥက္ကဋ္ဌချီက တကယ်ပဲ သဘောတူလိုက်တယ်ဗျာ၊ အဲဒါက ကျွန်တော်တို့ကိုတောင် လန့်သွားစေတယ် "

"ကျွန်တော်တို့ ဥက္ကဋ္ဌချီရဲ့ အတွင်းရေးမှူးကို တိုးတိုးလေး မေးကြည့်တော့ ဒါက တိုက်ဆိုင်မှုတစ်ခုလည်း ဖြစ်နေတယ်တဲ့၊ ဥက္ကဋ္ဌချီက အစိုးရနဲ့ စီးပွားရေးလုပ်ငန်းရှင်တွေရဲ့ ညှိနှိုင်းအစည်းအဝေးကို တက်ရမှာ၊ ကျွန်တော်တို့ရဲ့ အစိုးရရုံးက ဒီရပ်ကွက်ဟောင်းထဲမှာ ရှိတာလေ၊ ဥက္ကဋ္ဌချီက ဒီမှာနေတာက ပိုနီးတယ်လို့ ထင်လို့ သဘောတူလိုက်တာပါ"

ရော့စ်မှာ အခြေအနေကို ရှင်းပြလိုက်သည်။ သူသည် စုဟယ်ကို အလေးအနက် ပြောလိုက်၏။

"သူဌေးမ၊ ဥက္ကဋ္ဌချီက ကျွန်တော်တို့အတွက်တော့ တကယ့်ကို အရေးကြီးတဲ့ ဧည့်သည်တော်ပါ၊ ကျေးဇူးပြုပြီး အကောင်းဆုံးဖြစ်အောင် လုပ်ပေးပါဗျာ၊ ကုန်ကျစရိတ်အားလုံးကို ကျွန်တော့်စာရင်းထဲမှာပဲ ထည့်ထားလိုက်ပါ "

စုဟယ်သည် သေချာနားထောင်ရင်း သူမ၏ ဖုန်းကိုဖွင့်ကာ ဘိုကင်အချက်အလက်များကို စစ်ဆေးလိုက်သည်။ ထို့နောက်သူမ ပြန်လည်ဖြေကြား၏။

"မစိုးရိမ်ပါနဲ့၊ ဝန်ဆောင်မှုရဲ့အပိုင်းတိုင်းကို ကျွန်မကိုယ်တိုင် ကြီးကြပ်ပေးပါ့မယ်၊ အခန်းပြင်ဆင်မှုကနေ သန့်ရှင်းရေးအထိ အရာအားလုံး ပြီးပြည့်စုံနေစေရပါမယ်၊ ဥက္ကဋ္ဌချီက တစ်ယောက်တည်း တည်းမှာဆိုတော့ အဲ့ဒီနေ့ကျရင် ခုတင်နှစ်လုံးပါတဲ့ အခန်းထဲက ခုတင်တစ်လုံးကို ဖယ်ပြီး နေရာပိုကျယ်အောင် လုပ်ပေးထားပေးမယ်၊ တခြား ဘာတွေ သတိထားရဦးမလဲ?"

စုဟယ် မေးမြန်းလိုက်သည်။ ရော့စ်မှာ သဘောတူပြီး‌‌နောက် ပြောသည်၏။

"သူဌေးမ အမှန်အတိုင်း ပြောရရင် ဥက္ကဋ္ဌချီလို လူမျိုးကတော့ အဆင့်မြင့်ဟိုတယ်ကြီးတွေကို ရိုးအီနေပြီဗျ၊ ကျွန်တော်တို့ တည်းခိုခန်းရဲ့ ထူးခြားချက်ကိုပဲ ပြသသင့်တယ်လို့ ထင်တယ်"

စုဟယ်သည် သူမ၏ မှတ်စုစာအုပ်ကို ဖွင့်ကာ "ထူးခြားချက်များ" ဆိုသည့် စကားလုံးကို ရေးချလိုက်သည်။ ဟဲယဲ့တည်းခိုခန်းတွင် ထူးခြားချက်များစွာ ရှိနေပြီး ဤဥက္ကဋ္ဌချီအပေါ် ကောင်းမွန်သော အထင်အမြင် ကျန်ရစ်စေမည်ဟု စုဟယ်ယုံကြည်၏။

"ဪ နောက်ပြီးတော့ သူဌေးမ၊ တည်းခိုခန်းက တိတ်ဆိတ်နေဖို့ လိုမယ်နော်၊ ဥက္ကဋ္ဌချီက အိပ်ရာနိုးလွယ်ပြီး ဆူညံသံကို အမုန်းဆုံးလို့ ကျွန်တော် ကြားထားတယ်"

ရော့စ် သတိပေးလိုက်သည်။ ဪ ဒါဆိုရင်တော့ ဒီလူက တစ်ကိုယ်တည်းနေရတာ ကြိုက်ပြီး အာရုံခံစားမှုလွယ်တဲ့ ဥက္ကဋ္ဌတစ်ယောက်ပေါ့။