အခန်း (၁၅၉-၁၆၀)

159

ဝူကျန်းကျန်းသည် ဟဲယဲ့တည်းခိုခန်း၏ ကုတင်ကြီးပေါ်တွင် ပျော်ရွှင်စွာ လှဲလျောင်းရင်း ချိုမြိန်သောအိပ်မက်များအတွက် ပြင်ဆင်နေချိန်၌၊ သူမ ဝီချက် တင်လိုက်သည့် ထိုအခိုက်အတန့်ကို တစ်စုံတစ်ယောက် သတိပြုမိသွားသည်။

ကွားကော၏ ပေါက်ကြားမှုများ - ဒုတိယတန်းစား မင်းသမီးတစ်ဦးသည် ငွေရလျှင်ပြီးရော လုပ်နေပြီး၊ သူမ၏ Moments တွင် အာမခံချက်မရှိသော ပစ္စည်းသုံးမျိုး (ထုတ်လုပ်သူ၊ လိပ်စာနှင့် အရည်အသွေး ထောက်ခံချက်မပါသော ပစ္စည်းများ) ကို ညွှန်းဆိုနေသည်။ သူမသည် အွန်လိုင်းစျေးသည်တစ်ဦးအဖြစ် ပြောင်းလဲသွားပြီဟု သံသယရှိနေကြပြီး အားလုံးမှာ သူမကို ဟာသတစ်ခုလို စောင့်ကြည့်နေကြသည်။ မူလက အသားအရေထိန်းသိမ်းမှု အမှတ်တံဆိပ်တစ်ခုသည် ထိုမင်းသမီးနှင့် စာချုပ်ချုပ်ရန် စကားပြောဆိုနေသော်လည်း ယခုအခါ အဆက်အသွယ် ဖြတ်တောက်လိုက်ပြီဖြစ်သည်။

ကွားကော၏ ပေါက်ကြားမှုများ - ကွာဂေးအနေဖြင့် လူတိုင်းကို တစ်ဖန်ပြန်လည် သတိပေးလိုသည်မှာ ထိုမင်းသမီးသည် လက်ရှိတွင် (S+) အဆင့်ရှိသော ဇာတ်ကားကြီးတစ်ကားကို ရိုက်ကူးနေခြင်းဖြစ်သည်။ သူမသည် ဒုတိယမင်းသမီးနေရာမှ သရုပ်ဆောင်နေခြင်းဖြစ်ပြီး အရန်ဇာတ်ကောင်ဖြစ်သော်လည်း သူမ၏ အခန်းကဏ္ဍမှာ ထူးချွန်ပြောင်မြောက်လှသဖြင့် အောင်မြင်ကျော်ကြားရန် အလားအလာ အလွန်ရှိနေသူဖြစ်၏။ ယခုမူ သူမသည် သူမ၏ အနာဂတ်ကို ကိုယ်တိုင် ဖျက်ဆီးပစ်လိုက်ပြီပင်။

'ကွားကော၏ ပေါက်ကြားမှုများ' ဆိုသည်မှာ အတော်အတန် ရေပန်းစားသော ဖျော်ဖြေရေး အတင်းအဖျင်း အကောင့်တစ်ခုဖြစ်သည်။ သူ၏ အမြင့်မားဆုံးသော အောင်မြင်မှုမှာ ထိပ်တန်းအနုပညာရှင်တစ်ဦး နောက်သို့ ခြေရာခံလိုက်ပြီး သူဌေးတစ်ဦးမှာ သူ၏ရည်းစားကို ကိုယ်ဝန်ဖျက်ချရန် ဆေးရုံသို့ ခေါ်သွားသည့်သတင်းကို ဖော်ထုတ်ခဲ့ခြင်းဖြစ်၏။ ထို့ကြောင့် ကွာဂေး၏ အကောင့်တွင် ဖော်လိုဝါ များစွာ ရှိနေဆဲဖြစ်သည်။ ကွာဂေးမှာ ထိုသတင်းဦးကို တင်လိုက်သည်နှင့်တစ်ပြိုင်နက် အင်တာနက်အသုံးပြုသူတစ်စုမှာ မှတ်ချက်ပေးသည့်နေရာသို့ ရောက်လာပြီး အွန်လိုင်းပေါ်တွင် စတင်ဆွေးနွေးကြတော့သည်။

"ဒီသတင်းက နည်းနည်းတော့ ပျင်းစရာကောင်းတယ်၊ စိတ်ဝင်စားစရာ သိပ်မရှိဘူး၊ ဒီနောက်ပိုင်းမှာ အချစ်ရေးသတင်းတွေ မရှိတော့ဘူးလား၊ ဒါက ဘယ်သူလဲဆိုတာ ခန့်မှန်းပေးနိုင်မယ့်သူ ရှိလား

"လူတွေက ကွားကောကို ယုံနေကြတုန်းပဲလား၊ ပြီးခဲ့တဲ့တစ်ခေါက်ကလည်း ဖော်လိုဝါ သန်းချီရှိတဲ့ နာမည်ကြီးတစ်ယောက် အချစ်ရေးရှိနေတယ်ဆိုလို့ ကြည့်လိုက်တော့ သာမန်လူတစ်ယောက် ဖြစ်နေတာ၊ တကယ် ပျင်းဖို့ကောင်းတယ်၊ အခုလည်း နာမည်မရှိတဲ့ တစ်ယောက်ယောက် ဖြစ်မှာပါ"

"လက်ရှိ ရိုက်ကူးနေတဲ့ (S+) ဇာတ်ကားကြီး (၃) ကားပဲ ရှိတာ မဟုတ်ဘူးလား၊ ‘ကြင်ယာတော်နှစ်ပါး ဒဏ္ဍာရီ’ က ရိုက်ကူးရေး ပြီးသွားပြီဆိုတော့ (၂) ကားပဲ ကျန်တော့တာပေါ့ ဒါက ခန့်မှန်းရတာ လွယ်ပါတယ် "

"တိုးတိုးလေးပြောရရင် အဲဒီမင်းသမီးက လူသိရှင်ကြား ပလက်ဖောင်းပေါ်မှာ ညွှန်းတာမဟုတ်ဘူးမလား၊ သူမရဲ့ ကိုယ်ပိုင် Moments မှာ တင်တာကိုရော ခွင့်မပြုရဘူးလား၊ ဒါက ဖော်ထုတ်ဖို့ လိုအပ်လို့လား "

" (+1) တကယ်ကို စိတ်ဝင်စားဖို့မကောင်းဘူး၊ လူတွေက သူတို့ Moments မှာ သူတို့ ကြိုက်တာ တင်လို့ရတာပဲ၊ တခြားသူရဲ့ Moments ကို ဒီလိုမျိုး ဖော်ထုတ်တာက ပုဂ္ဂိုလ်ရေးဆိုင်ရာ ကျူးကျော်မှု မဟုတ်ဘူးလား "

"သူတို့ WZZ (ဝူကျန်းကျန်း) ကို ပြောနေတာလား၊ သူမက သူမရဲ့ ဇာတ်ကားအသစ်မှာ ဒုတိယမင်းသမီးနေရာက သရုပ်ဆောင်နေတာလေ "

"ပျင်းစရာကောင်းတဲ့ အတင်းအဖျင်းတွေပဲ၊ အရင်က LWN တောင်မှ သူငယ်ချင်းဖြစ်သူရဲ့ ဆိုင်သေးလေးကို Weibo ပေါ်မှာ လူသိရှင်ကြား ညွှန်းပေးခဲ့တာပဲ၊ PZG လည်း သူကြိုက်တဲ့ ပစ္စည်းတွေကို လူသိရှင်ကြား ညွှန်းခဲ့ဖူးတာပဲ၊ WZZ က သူမရဲ့ Moments မှာ တင်တာပဲလေ ဘာမှားနေလို့လဲ "

ကွားကောသည် ထိုသတင်းကို တင်ပြီးနောက်တွင် အတော်အတန် ပေါက်သွားလိမ့်မည်ဟု မူလက ထင်မှတ်ထားခဲ့သည်။ ဖျော်ဖြေရေးလောကမှာ ဒီနောက်ပိုင်းတွင် အတော်လေး ပျင်းစရာကောင်းနေပြီး သူ၏ Weibo ကြည့်ရှုနှုန်းမှာလည်း အလွန်လျော့နည်းသွားသဖြင့် လူအများ စိတ်ဝင်စားလာစေရန် အတင်းအဖျင်းအချို့ကို လုပ်ကြံဖန်တီးရန် စဉ်းစားခဲ့ခြင်းဖြစ်၏။ ကွားကော၏ လက်ချောင်းများမှာ ကီးဘုတ်ပေါ်တွင် ပျံလွှားနေပြီး သူ၏မျက်လုံးများမှာ ကွန်ပျူတာစခရင်ပေါ်မှ ဒေတာများကို စူးစိုက်ကြည့်နေသည်။ ဤအချက်အလက်မှာ သူဦးနှောက်ခြောက်အောင် စဉ်းစားပြီး အဆက်အသွယ်များကို အသုံးချကာ ထုတ်ပြန်ခဲ့သည့်သတင်းတစ်ခုဖြစ်သော်လည်း ကြည့်ရှုနှုန်းမှာ အဘယ်ကြောင့်ဒီလောက်နည်းပါးနေရသနည်း။

ဒီနောက်ပိုင်း ဖျော်ဖြေရေးလောကမှာ ကြီးကြီးမားမား ဘာမှမဖြစ်ခဲ့သဖြင့် သူတင်လိုက်သည့် ဤအတင်းအဖျင်းသတင်းမှာ အတော်လေး စိတ်ဝင်စားစရာ ကောင်းလိမ့်မည်ဟု ကွာဂေး ထင်ခဲ့သည်။ သို့သော်လည်း အချိန်များ ကုန်ဆုံးသွားသည်နှင့်အမျှ ကွားကော၏ စိတ်အခြေအနေမှာ ပူပန်ပြီး မငြိမ်မသက် ဖြစ်လာ၏။ သတင်း၏ ဝင်ရောက်ကြည့်ရှုမှုနှုန်းမှာ မြင့်တက်နေသော်လည်း ထိုအရှိန်မှာ အလွန်ပင် နှေးကွေးနေသည်ကို သူ တွေ့ရှိလိုက်ရ၏။ ထို့ပြင် မှတ်ချက်ပေးသည့်နေရာမှ တုံ့ပြန်မှုမှာလည်း သူ မျှော်လင့်ထားသည်ထက် များစွာ အားနည်းနေသည်။ ယင်းအစား သံသယဖြစ်မှုနှင့်

ဝေဖန်သံများကိုသာ များစွာ တွေ့နေရပြီး၊ အချို့သော မှတ်ချက်များမှာဆိုလျှင် သူသည် သူတစ်ပါး၏ ပုဂ္ဂိုလ်ရေးဆိုင်ရာကို ကျူးကျော်နေသည်ဟု တိုက်ရိုက်ပင် ဖော်ပြနေကြ၏။

'အဟက် တရားမျှတချင်ယောင် ဆောင်နေလိုက်ကြတာ၊ သူတစ်ပါး ကိုယ်ရေးကိုယ်တာ ကျူးကျော်တာ မကြိုက်ရင် ဘာလို့ အတင်းအဖျင်းတွေ လာဖတ်နေကြလဲ၊ ဘယ်အတင်းအဖျင်းက သူတစ်ပါး ကိုယ်ရေးကိုယ်တာကို မထိခိုက်ဘဲ ရှိလို့လဲ၊ တကယ့် အရေခြုံတွေ'

ကွားကော အလွန်ပင် မကျေမနပ်ဖြစ်ကာ တွေးလိုက်သည်။ ထို့ပြင် ဤအတင်းအဖျင်းအတွက် ရေးသားချက်များမှာ သူအကြာကြီး စဉ်းစားထားခဲ့ရသောအရာဖြစ်၏။ အကယ်၍ အင်တာနက်အသုံးပြုသူများ လက်မခံပါက သူ၏ ကြိုးစားမှုများမှာ အလကား ဖြစ်သွားမည် မဟုတ်ပါလော။ သူသည် ဝူကျန်းကျန်း၏ Moments ကို မြင်နိုင်သူမဟုတ်ပေ။ ထို Moments အကြောင်းအရာကို စျေးကြီးပေး၍ ဝယ်ယူခဲ့ရခြင်းဖြစ်ပြီး သူ ယွမ် (၂၀,၀၀၀) ခန့် အသုံးပြုခဲ့ရသည်။

ကွားကောသည် သူ၏လက်ရှိ Weibo ကြော်ငြာဝင်ငွေကို လှမ်းကြည့်လိုက်ပြီး ဒေါသထွက်ကာ ရယ်မိတော့မတတ် ဖြစ်သွားရသည်။ ၎င်းမှာ ပြား (၃၀) သာ ရှိသေး၏။ ထိုနှုန်းအတိုင်းဆိုလျှင် မနက်ဖြန်အထိတောင် သူ၏ ဝင်ငွေမှာ (၁) ယွမ် ပြည့်လိမ့်မည်မဟုတ်ပေ။ ထိုသို့ဆိုလျှင် သူသည် ယွမ် (၂၀,၀၀၀) ခန့် အရှုံးပေါ်တော့မည် ဖြစ်သည်။ ထို့ပြင် ဒီနောက်ပိုင်း စျေးကွက် အေးက်နေသဖြင့် ပိုင်ရှင်များဆီမှ ကြော်ငြာများကို မရရှိခဲ့သည်မှာ ကြာပြီဖြစ်ပြီး သူ၏ နောက်ကွယ်တွင် ထောက်ပံ့ပေးရမည့် အဖွဲ့အစည်း တစ်ခု ရှိနေသေးသည်။ ထိုအခြေအနေမှာ သူ၏ တစ်လစာဝင်ငွေတစ်ခုလုံးကို ထိခိုက်စေနိုင်၏။ ကြော်ငြာရှင်များသည် သူ၏ Weibo ဖတ်ရှုနှုန်းနှင့် Likes ပေးမှုအပေါ် မူတည်၍ ကြော်ငြာထည့်သွင်းလေ့ရှိသည်။ ယခုကဲ့သို့ အချက်အလက်များ ဆိုးရွားနေလျှင် ကြော်ငြာရှင်များမှာ ပို၍ပင် အပ်လိုကြတော့မည်မဟုတ်ပေ။

ကွားကောသည် သူ၏ ကြိုးစားအားထုတ်မှုများမှာ အချည်းနှီး ဖြစ်သွားတော့မည်ဟု ခံစားလိုက်ရပြီး မျှော်လင့်ထားသည့် ရလဒ်များ ထွက်ပေါ်လာမည် မဟုတ်တော့ချေ။ သူ၏စိတ်မှာ ပို၍ဒေါသထွက်လာပြီး သူ၏လက်မှာ မောက်စ်ကို မသိစိတ်ဖြင့် တင်းတင်းကြပ်ကြပ် ဆုပ်ကိုင်ထားမိသည်။ ရုတ်တရက် ကွားကော၏ လက်မောင်းမှာ ပြင်းထန်စွာ လှုပ်ရှားသွားပြီး မောက်စ်ကို ကြမ်းပြင်ပေါ်သို့ ရိုက်ချလိုက်၏။ သူ၏မျက်လုံးများတွင် ကြောက်မက်ဖွယ်ကောင်းသော အရောင်များ ပေါ်လာပြီး၊ အသက်ရှူသံများ မြန်လာကာ နှလုံးခုန်နှုန်းများ မြန်လာသည်။ သူသည် အပြင်သို့ ပြေးထွက်သွားပြီး တစ်စုံတစ်ယောက်ကို ဒေါသပုံချပစ်ချင်သည့် ပြင်းပြသောဆန္ဒကို ခံစားလိုက်ရ၏။ သို့သော်လည်း ကွားကောသည် ထိုသို့ မလုပ်နိုင်မှန်း သူကိုယ်တိုင် သိသည်။ သူသည် အသက်ပြင်းပြင်း ရှူလိုက်ပြီး စိတ်ကို ပြန်လည်တည်ငြိမ်အောင် ကြိုးစားလိုက်သည်။ အဖွဲ့အစည်းတစ်ခုကို ဦးဆောင်နေသူတစ်ဦးအနေဖြင့် သူသည် စိတ်ခံစားချက်ကို ထိန်းချုပ်တတ်ရန် သင်ယူရမည်ဖြစ်ပြီး၊ ထိုစိတ်ခံစားချက်များမှာ သူ၏ ဆုံးဖြတ်ချက်ကို မထိခိုက်စေရန် ဂရုစိုက်ရမည်ဖြစ်၏။ သူသည် မျက်လုံးကိုမှိတ်ကာ အသက်ကို ပြင်းပြင်းရှူရင်း စိတ်ကို ပြန်အေးအောင် ကြိုးစားလိုက်သည်။

ခဏအကြာတွင် ကွားကော၏စိတ်မှာ နောက်ဆုံးတွင် တဖြည်းဖြည်း တည်ငြိမ်သွားသည်။ သူသည် ကွန်ပျူတာကို ပြန်ဖွင့်ကာ မှတ်ချက်တစ်ခုချင်းစီကို ဂရုတစိုက် ဖတ်ရှုပြီး တန်ဖိုးရှိသော တုံ့ပြန်မှုများကို ရှာဖွေရန် ကြိုးစားလိုက်၏။ ယခုအခြေအနေမှာ ဆိုးရွားနေသော်လည်း အရှုံးပေးပြီး လှဲလျောင်းကာ အလှောင်ပြောင်ခံခြင်းမှာ ပို၍ပင် ဆိုးရွားပေလိမ့်မည်။ ထိုစဉ်မှာပင် ကွားကော၏ ဦးနှောက်ထဲတွင် အတွေးသစ်တစ်ခု ရုတ်တရက် ပေါ်လာပြီး နည်းလမ်းသစ်တစ်ခုကို သူ စဉ်းစားမိသွားသည်။ သူသည် ပို၍ပေါက်ကွဲအားကောင်းပြီး ဆွဲဆောင်မှုရှိသော နောက်ထပ် အတင်းအဖျင်းသတင်းတစ်ခုကို လုပ်ကြံဖန်တီးရန် ဆုံးဖြတ်လိုက်၏။ ဤအတင်းအဖျင်းသစ်သည် လူထု၏ အာရုံစိုက်မှုကို သေချာပေါက် ရရှိလိမ့်မည်ဖြစ်ပြီး သူ၏ ကြည့်ရှုနှုန်းကိုလည်း အမြင့်ဆုံးသို့ ရောက်ရှိစေမည်ဟု သူယုံကြည်လိုက်သည်။ ကွားကော၏ မျက်လုံးများထဲတွင် မျှော်လင့်ချက်အရောင်များ ပြန်လည် တောက်ပလာ၏။ သူသည် သက်ဆိုင်ရာ အချက်အလက်များနှင့် သက်သေများကို စုဆောင်းရန် သူ၏ အဆက်အသွယ်များကို စတင်အသုံးချလိုက်သည်။ ထိုအတင်းအဖျင်းအသစ်မှာ လူထု၏ စိတ်ဝင်စားမှုကို နှိုးဆွနိုင်ရန် လုံလောက်သော ဆွဲဆောင်မှုနှင့် တုန်လှုပ်စရာများ ပါဝင်ရမည်ဖြစ်ပြီး ယင်း၏ နယ်ပယ်မှာ ဖျော်ဖြေရေးလောကထဲမှာတင် မကန့်သတ်ထားသင့်ပေ။ လူများသည် အနုပညာရှင်များအပေါ် အတော်လေး ငြီးငွေ့နေကြပြီ မဟုတ်ပါလော။

ကွားကော၏ လက်ချောင်းများမှာ ကီးဘုတ်ပေါ်တွင် တစ်ဖန် ပြန်လည်ပြေးလွှားနေသည်။ ကြည့်ရှုနှုန်းရရှိရန်အတွက်ဆိုလျှင် ကိုယ်ကျင့်တရားမရှိသည့် အလုပ်များကို သူလုပ်စမြဲဖြစ်သည်။ ဤကဲ့သို့သော အလုပ်မျိုးကိုလည်း တစ်ကြိမ်၊ နှစ်ကြိမ်မက သူလုပ်ခဲ့ဖူး၏။ အလွန်ဆုံးရှိလျှင် Weibo ပို့စ်ကို ဖျက်လိုက်ပြီး တောင်းပန်လိုက်ရုံသာ ရှိသည်။ ဘာဖြစ်နိုင်ဦးမည်နည်း။ သူဖော်ထုတ်ခဲ့သည့် ကိုယ်ဝန်ဖျက်ချရန် ရည်းစားကို ဆေးရုံခေါ်သွားသော ထိပ်တန်းအနုပညာရှင်မှာလည်း သူ့ကို တရားစွဲမည်ဟု ပြောခဲ့သည်မဟုတ်ပါလော။ သို့သော် သူသည် ယခုအချိန်အထိ အေးအေးဆေးဆေး ရှိနေဆဲပင်။

တရားစွဲဆိုမှု ဖြစ်စဉ်မှာ အလွန်ကြာရှည်လှသည်။ ထိုအနုပညာရှင်၏ သတင်းဦးကို ဖော်ထုတ်ခြင်းဖြင့် သူသည် တစ်လတည်းတွင် ကြော်ငြာ (၁၀) ခု ရရှိခဲ့ပြီး ယွမ် သန်းချီကာ အောင်မြင်စွာ ရှာဖွေနိုင်ခဲ့၏။ တရားစွဲဆိုမှု ရှိလာခဲ့လျှင်ပင် ထိုအနုပညာရှင်သည် သူ့ကို အသရေဖျက်မှုဖြင့်သာ တရားစွဲနိုင်မည်ဖြစ်ရာ ငွေအနည်းငယ်သာ ဒဏ်ကြေးအဖြစ်ပေးဆောင်ရပေလိမ့်မည်။

160

တစ်နာရီအကြာတွင် ကွားကောသည် နောက်ထပ်သတင်းတစ်ခုကို တင်လိုက်ပြန်သည်။

ကွားကော၏ ပေါက်ကြားမှုများ - အရင်တင်ခဲ့တဲ့ သတင်းဦး သာမန်ပဲလို့ ထင်နေကြတာလား၊ ဟဲဟဲ မင်းတို့တွေ အခြေအနေကို သိပ်နားမလည်သေးပုံပဲ"

ကွားကောသည် စခရင်နောက်ကွယ်တွင် ထိုင်ရင်း လှောင်ပြုံးပြုံးကာ ရေရွတ်လိုက်သည်။

"အဲဒီမင်းသမီး ညွှန်းခဲ့တဲ့ ပစ္စည်းက သာမန်ပစ္စည်းမဟုတ်ဘူး၊ အခုတလော အရမ်းနာမည်ကြီးနေတဲ့ အင်တာနက်ဆယ်လီ တည်းခိုခန်းတစ်ခုက လာတာ၊ လူအများစုက တွေးမိလိမ့်မယ်၊ အင်တာနက်ဆယ်လီ တည်းခိုခန်းက ဘာဖြစ်လို့လဲဆိုပြီးတော့၊ မင်းတို့ တွေ့ကြည့်၊ ဒီတည်းခိုခန်းက လွန်ခဲ့တဲ့ တစ်နှစ်ခွဲလောက်က ဒီလိုပုံစံမျိုးပ်【တည်းခိုခန်း၏ ယိုယွင်းပျက်စီးနေသော အတွင်းပိုင်းပုံများ】 【အခန်းခဈေးနှုန်းပုံ】၊ တစ်ညကို ယွမ် (၈၀) ပေးရုံနဲ့တည်းလို့ရတဲ့ နေရာလေးပါ၊ ကဲ အခု အဲဒီတည်းခိုခန်းရဲ့ အတွင်းပိုင်းပုံစံကို ကြည့်လိုက်ကြပါဦး၊ ဘာအဆက်အသွယ်မှမရှိတဲ့ ဒီတည်းခိုခန်းလေးက ဘယ်လိုလုပ်ပြီး ဒီလောက်အထိ အကြီးအကျယ် ပြောင်းလဲသွားရတာလဲ၊ ပိုက်ဆံရှိရုံတင်လား၊ အဓိကအချက်က ဒီတည်းခိုခန်းဟာ အနုပညာရှင်တွေ အများကြီး လာတည်းလို့ နာမည်ကြီးလာတာ၊ အနုပညာရှင်တွေက ဘယ်လိုဟိုတယ်မျိုးကို မတည်းဖူးလို့လဲ၊ ဘာလို့ ဒီလောက် ဝေးလံခေါင်ဖျားတဲ့ တည်းခိုခန်းကိုမှ ရွေးပြီး သွားကြတာလဲ၊ ရုပ်ရှင်ရိုက်ကူးရေးအဖွဲ့ တစ်ဖွဲ့လုံးက အဲဒီမှာ တည်းတယ်၊ အနုပညာရှင်တွေကလည်း အဲဒီနေရာကို ကြော်ငြာပေးတယ်၊ လမုန့်တွေအထိတောင် ကြော်ငြာပေးကြသေးတယ်၊ ဪ ပြီးတော့ တည်းခိုခန်းရဲ့ ဝန်ထမ်းတွေကလည်း စျေးကွက်ရှာဖွေရေးကို အရမ်းကျွမ်းကျင်တယ်၊ ဖျော်ဖြေရေးလောကက လူတွေကို သူတို့အတွက် မဲပေးခိုင်းတယ်၊ တကယ့်ကိုပဲ၊ ငါအထပ်ထပ်အခါခါ ကြည့်ကြည့်တယ်၊ ဒီတည်းခိုခန်းမှာ ဘာထူးခြားချက်မှ မတွေ့မိဘူး၊ ဖြစ်နိုင်တာတစ်ခုကတော့ ရုပ်ရှင်မြို့တော်နဲ့ နီးနေလို့ အနုပညာရှင်တွေ သွားလာရတာ ပိုအဆင်ပြေတာပဲ ရှိမှာပါ၊ ဒါပေမဲ့ အခုတော့ ငါထူးဆန်းတဲ့ ကောလာဟလတစ်ခုကို ကြားလာရတယ်၊ အဲဒီတည်းခိုခန်းမှာ တည်းရင် အိပ်မက်တွေမက်တယ်၊ အိပ်မက်ကောင်းတွေမက်တာတဲ့၊ အဲဒါက အိပ်စက်ခြင်းကို အထောက်အကူပြုတဲ့ အမွေးနံ့သာတွေရဲ့ အာနိသင်ကြောင့်လို့ ဆိုကြတယ်၊ ငါကတော့ အမွေးနံ့သာအကြောင်း နားမလည်ပါဘူး၊ ဒါက အမှန်လို့ မင်းတို့ ထင်ကြလား၊ အမွေးနံ့သာတွေက တကယ်ပဲ အဲဒီလောက် အစွမ်းထက်သလား၊ ဒါပေမဲ့ တစ်ဖက်ကကြည့်ရင်လည်း ရုပ်ရှင်မြို့တော်ထဲမှာ နေ့တိုင်းနေရတဲ့ အနုပညာရှင်တွေကတော့ စိတ်မွန်းကျပ်ပြီး အပန်းဖြေဖို့ လိုအပ်မှာပါပဲ၊ ဒါတင်မကသေးဘူး ငါဒီတည်းခိုခန်းရဲ့ အွန်လိုင်းဘွတ်ကင် ပလက်ဖောင်းမှာ တစ်ခုကို ခဲခဲယဉ်းယဉ်း ရှာတွေ့ခဲ့တယ်၊ ဒီမှတ်ချက်က တည်းခိုပြီးမှ ပေးတဲ့မှတ်ချက် ဖြစ်လို့ သူ့ရဲ့ မှန်ကန်မှုကို ငါရှင်းပြနေစရာ မလိုပါဘူး၊ လူကိုယ်တိုင် ပိုက်ဆံပေးတည်းပြီးမှ ရေးခဲ့တာမို့လို့ပါ၊ ဒီမှတ်ချက်ကို သာမန်လူတစ်ယောက်က တင်ခဲ့တာဖြစ်ပြီး၊ သူမ တည်းခိုတုန်းက အရေပြားရောဂါသည် တစ်ယောက်နဲ့ ကြုံခဲ့ရတယ်လို့ ဆိုထားပါတယ်ဗျ၊ 【မှတ်ချက်၏ Screenshot】၊ လူတွေကို အိပ်မက်ကောင်းတွေ မက်စေနိုင်တယ်၊ အရေပြားရောဂါသည်တွေ ဝင်ထွက်သွားလာနေတယ်၊ ပြီးတော့ ဧည့်သည်အများစုက ဖျော်ဖြေရေးလောကက လူတွေ ဖြစ်နေတယ်ဆိုတော့ကွာ၊ဘာများ ထပ်ပြောဖို့ လိုသေးလဲ"

ဤရှည်လျားသော သတင်းနှင့်အတူ ပုံများစွာကို ပူးတွဲဖော်ပြထားပြီး၊ ၎င်းတင်မကဘဲ ကွားကောသည် ဗီဒီယိုတစ်ခုကိုပါ တင်လိုက်သေးသည်။ ဗီဒီယိုမှာ တစ်ခုလုံး မှောင်မည်းနေပြီး လူနှစ်ဦး၏ အသံသာ ကြားရ၏။

ကွားကော - "တည်းခိုခန်းမှာ တည်းပြီးနောက် အရေပြားရောဂါသည်တစ်ယောက်ကို တွေ့ခဲ့တယ်လို့ ကြားမိတယ်"

နျူန်း (လျှို့ဝှက်သောအမျိုးသမီးအသံ) - "ဟုတ်တယ်၊ အဲဒါက တကယ်ကို ရွံစရာကောင်းတာ၊ အဲဒီလူက တည်းခိုခန်းထဲမှာ ဘယ်သူ့ကိုမှ မရှောင်ဘဲ ပေါ်ပေါ်ထင်ထင် သွားလာ‌နေတာ"

ကွားကော - "ဪ ဒီလောက်အထိ ပေါ်ပေါ်ထင်ထင်လား"

အမျိုးသမီးအသံ - "ဟုတ်တယ်၊ ပြီးတော့ သူဌေးကလည်း အဲဒီလူကို ကာကွယ်ပေးထားတာ၊ ကျွန်မထင်တာတော့ သူတို့နှစ်ယောက်က သိနေကြတာ ဖြစ်ရမယ်"

ကွားကော - "မဖြစ်နိုင်တာ"

အမျိုးသမီးအသံ - "ဘာလို့ မဖြစ်နိုင်ရမှာလဲ ကျွန်မ ပြောပြမယ်၊ အဲဒီတုန်းက ကျွန်မ တကယ် ကြောက်သွားတာ၊ ဘာလို့လဲဆိုတော့ ကျွန်မကလေးကိုပါ တည်းခိုဖို့ ခေါ်လာခဲ့တာမို့လို့၊ ကူးစက်ခံရမှာကို ကြောက်တာ"

ကွားကော - "ဒီအရေပြားရောဂါက ကူးစက်တတ်တယ်လို့ ပြောချင်တာလား"

အမျိုးသမီးအသံ - "ရှင် အဲဒီမှာ မရှိလို့ပါ တကယ်ကို ရွံစရာကောင်းတာ၊ ကြည့်လိုက်တာနဲ့ ကူးစက်တတ်မှန်း သိသာတယ် ပြီးတော့ ကျွန်မ တိုင်တန်းဖို့ ဖုန်းဆက်ခဲ့ပေမဲ့ လုံးဝ အသုံးမဝင်ဘူး၊ တကယ့်ကို ဥပဒေမဲ့နေတာ "

ကွားကော - "တကယ်လား အဲဒီလောက်တောင် သြဇာကြီးတာလား "

အမျိုးသမီးအသံ - "ဟဲဟဲ အစိုးရက ကျွန်မကို ပြန်ပြောတာက ဒီလိုအခြေအနေမျိုး မရှိပါဘူးတဲ့၊ ဒါပေမဲ့ တစ်ဖက်လူက ချက်ချင်းပဲ ဒါ ကျွန်မတိုင်တာမှန်း ရိပ်မိပြီး ခြိမ်းခြောက်ဖို့ ဖုန်းဆက်လာတယ်လေ"

ကွားကော - "ဆိုတော့ တစ်ဖက်လူက မင်းတိုင်တာကို သိနေတာပေါ့ အဆက်အသွယ်တွေကတော့ တကယ်ကို မသေးဘူးပဲ"

ဗီဒီယိုမှာ ထိုနေရာတွင်ပင် ရုတ်တရက် ရပ်တန့်သွားသည်။ ကွားကော၏ သတင်းတစ်ခုလ

ုံးတွင် ထိုတည်းခိုခန်းမှာ မည်သူဖြစ်သည်၊ မည်သည့်အနုပညာရှင် ဖြစ်သည် သို့မဟုတ် တည်းခိုခန်းမှာ ဘာတွေတကယ်မှားယွင်းနေသည်ကို တိတိပပ ဖော်ပြထားခြင်း မရှိပေ။ သတင်းတစ်ခုလုံးမှာ ဥပဒေ၏ လစ်ဟာချက်များကို အသုံးချရန် ဝေဝါးစွာသာ ရေးသားထားခြင်း ဖြစ်သည်။ လူထုအမြင်ကို လမ်းကြောင်းလွှဲရန် ကွားကောသည် ပိုက်ဆံအမြောက်အမြားပေး၍ ဝယ်ယူထားသော အကောင့်များကို အသုံးပြုကာ မှတ်ချက်များ တင်ခိုင်းလိုက်၏။ ထိုအကောင့်၏ IP လိပ်စာမှာ ပြည်ပနိုင်ငံတစ်ခုတွင် ရှိနေပြီး မည်သူမည်ဝါဖြစ်ကြောင်း အချက်အလက်များမှာလည်း နိုင်ငံခြားသားတစ်ဦး၏ အချက်အလက်များ ဖြစ်သည်။

"ဘုရားရေ၊ ဒီသတင်းက တကယ့်ကို တုန်လှုပ်စရာဘဲ၊ ဆိုတော့ နာမည်ကြီးတွေ ဒီတည်းခိုခန်းမှာ သွားတည်းနေကြတာက မူးယစ်ဆေးဝါးနဲ့ ပတ်သက်နေလို့ပေါ့ ဟုတ်လား၊ မဟုတ်ရင်တော့ လူအများကြီးကို အိပ်မက်တွေ မက်စေတယ်ဆိုတာ မဖြစ်နိုင်ဘူး၊ သူတို့တွေ ဆေးတက်နေကြတာ ဖြစ်ရမယ် ပြီးတော့ ကူးစက်တတ်တဲ့ အရေပြားရောဂါဆိုတာ လိင်ကနေ ကူးစက်တဲ့ရောဂါ ဖြစ်ရမယ် ဟုတ်တယ်မလား၊ ဆိုတော့ လူတစ်စုက ဆေးသုံးပြီး တည်းခိုခန်းထဲမှာ အုပ်စုလိုက် ပျော်ပါးနေကြတာပေါ့၊ ဖျော်ဖြေရေးလောကက လူတွေဆိုတာလည်း စိတ်ကူးထားတာထက်ကို အောက်တန်းကျလွန်းတယ်"

ကွားကောသည် သူဝယ်ထားသော အကောင့်ဖြင့် ဦးတည်ချက် ရှင်းလင်းသည့် အနှစ်ချုပ်မှတ်ချက်ကို တင်လိုက်သည်။ ဤနည်းဖြင့် စုံစမ်းစစ်ဆေးခံရလျှင်ပင် သူနှင့် မည်သို့မျှ မသက်ဆိုင်တော့ပေ။ ထိုမျှမက သူသည် အင်တာနက် လူမိုက်များကို ငွေပေးကာ ဤမှတ်ချက်ကို Like ပေးခိုင်းလိုက်သည်။ ကွား‌ကော၏ သတင်းတင်ပြီး (၅) မိနစ်အကြာမှာပင် ထိုအနှစ်ချုပ်မှတ်ချက်မှာ Like ပေါင်း (၁၀,၀၀၀) ရရှိသွားပြီး ကွားကော၏ ဘလော့ဂ်တွင် ထိပ်ဆုံးမှတ်ချက် ဖြစ်လာ၏။ ကွားကောသည် ကွန်ပျူတာရှေ့တွင် ထိုင်ရင်း အောင်နိုင်သူတစ်ဦးကဲ့သို့ ပြုံးပျော်နေသည်။ ဤအတင်းအဖျင်းသတင်းမှာ သူ စေ့စေ့စပ်စပ် စီစဉ်ထားခြင်းဖြစ်ပြီး အချက်အလက်တိုင်းကို သေချာစဉ်းစားကာ လူထု၏ စူးစမ်းစိတ်ကို နှိုးဆွရန် ရည်ရွယ်ထားခြင်းဖြစ်၏။ ဤပို့စ်မှာ သေချာပေါက် ပေါက်သွားပြီး လူပြောအများဆုံး အကြောင်းအရာ ဖြစ်လာလိမ့်မည်ဟု ကွားကော ယုံကြည်သည်။

အခြေအနေများမှာ ကွားကော မျှော်လင့်ထားသည့်အတိုင်း ဖြစ်လာခဲ့သည်။ စခရင်ပေါ်မှ ဂဏန်းများ တက်လာသည်နှင့်အမျှ သူ၏ နှလုံးခုန်သံမှာ မြန်လာ၏။ Refresh တစ်ခါလုပ်တိုင်း အသစ်အသစ်သော အံ့ဩစရာများ ပါလာသည်။ ပြန်လည်မျှဝေမှုနှင့် Likes များမှာ ဆီးနှင်းလုံးများကဲ့သို့ တလိမ့်လိမ့် တက်လာပြီး မှတ်ချက်ပေးသည့် နေရာမှာလည်း သက်ဝင်လှုပ်ရှားလာ၏။ ကွားကော၏ ရင်ထဲတွင် အောင်မြင်သောခံစားချက်များ ပြည့်နှက်နေသည်။ လူထု၏ အာရုံစိုက်မှုကို ရယူပြီး လူများကို အရူးလုပ်ရသည့် ခံစားချက်မှာ တကယ်ကို ကောင်းလှသည်။ သူ၏ လက်ချောင်းများမှာ ကီးဘုတ်ပေါ်တွင် ညင်သာစွာ တောက်နေပြီး မျက်လုံးများက စခရင်ပေါ်ရှိ ပြောင်းလဲမှုများကို စောင့်ကြည့်နေ၏။ ထိုထိပ်ဆုံးမှတ်ချက်၏ လမ်းညွှန်မှုအောက်တွင် အင်တာနက်အသုံးပြုသူ အများအပြားမှာ လမ်းမှားသို့ ရောက်ကုန်ကြသည်။ 'ကာမ' နှင့် 'မူးယစ်ဆေး' ဟူသော စကားလုံးများမှာအင်တာနက်အသုံးပြုသူ အမြောက်အမြား၏ မျက်စိကို ဖမ်းစားစေပြီး ထိုကဲ့သို့သော အခြေအနေများကို သူတို့ အလွန်အမင်း ရွံရှာကြသည် ဟွားနိုင်ငံတွင် ထိုကဲ့သို့သော တရားမဝင် ရာဇဝတ်မှုများကို လုံးဝသည်းမခံကြချေ။

နောက်ထပ် နာရီဝက်ခန့် ကုန်ဆုံးသွားသောအခါ ဤသတင်းမှာ လူပြောအများဆုံးသတင်းအောက်ခြေသို့ ရောက်ရှိလာသည်။ အင်တာနက်အသုံးပြုသူများ ပိုမိုပါဝင်လာကြ၏။ လူများလေ အင်အားရှိလေ ဖြစ်ရာ သူတို့သည် အွန်လိုင်းပေါ်တွင် အခြားသော သက်သေများကိုလည်း ရှာဖွေတွေ့ရှိလာကြပြီး ကွား‌ကော တိတိပပ မပြောခဲ့သော အချက်အလက်များကို ဖော်ထုတ်ရန် ကူညီပေးကြသည်။

"ဒီတည်းခိုခန်းက ဟဲယဲ့တည်းခိုခန်း မဟုတ်လား အဲဒီတုန်းက ဒါရိုက်တာကုန်းနဲ့ ကြင်ယာတော်နှစ်ပါး ဒဏ္ဍာရီ က သရုပ်ဆောင်တွေ ဘာလို့ ဒီလို စုတ်ပြတ်သတ်နေတဲ့ တည်းခိုခန်းမှာ တည်းတာလဲလို့ ငါ စဉ်းစားနေတာ အခုမှ အကြောင်းရင်းကို သိတော့တယ်"

"ဟုတ်တယ် အဲဒီတုန်းက လီထျန်းယီ ရိုက်ခဲ့တဲ့ လမုန့်တွေကလည်း ဒီနေရာကပဲ "

"ဒါရိုက်တာကုန်းက ဟဲယဲ့တည်းခိုခန်းက ဝေဖုန်းယီ ဆိုတဲ့သူအတွက် လက်ရေးလှပြိုင်ပွဲ မဲပေးဖို့ လင့်ခ်ကို ပြန်မျှဝေခဲ့သေးတယ်၊ ဒီလိုလူမျိုးက လက်ရေးလှပညာကို လာပြီး ညစ်နွမ်းစေချင်သေးတာလား၊ တကယ်ကို ရွံစရာပဲ သွားသေလိုက်စမ်း "

"ဝူကျန်းကျန်းက ဒီတည်းခိုခန်းရဲ့ ပစ္စည်းကို ညွှန်းတယ်ဆိုတာက သစ္စာရှိ‌ကြောင်းပြတာလား "

"အလိုလေး ကျွန်မ ဒီတည်းခိုခန်းက ပစ္စည်းတွေကို ကြည့်လိုက်တာ ကုတင်တစ်လုံးကို (၆၀,၀၀၀) တဲ့ငွေညှစ်နေတာပဲ ဗြောင်ကျကျ ငွေညှစ်နေတာ "

ကွားကောသည် ကွန်ပျူတာရှေ့တွင် ပျော်ရွှင်စွာ ထိုင်ရင်း လူထုအမြင်များ ဝေဖန်မှု မြင့်တက်လာသည်ကို စောင့်ကြည့်နေသည်။ အရှိန်အဟုန်မှာ အမြင့်ဆုံးသို့ ရောက်လာသောအခါ ကွားကော၏ အဖွဲ့အစည်းမှာ အချက်ပြလိုက်၏။ ထို့နောက်တွင် ကွားကောသည် မောက်စ်ကို ညင်သာစွာ ရွှေ့ကာ ဤသတင်းကို ပြန်လည် ဖျက်ချလိုက်တော့သည်။ လောင်းကစား၊ မူးယစ်ဆေးဝါးနှင့် ပြည့်တန်ဆာလုပ်ငန်းများကို ဆန့်ကျင်ကြပါနိုင်ငံတော် ဥပဒေများကို လိုက်နာကြပါ။