အခန်း (၄၀-၄၂)

အခန်း (၄၀)

အပြိုင်အဆိုင် ပြင်းထန်လှသော အကျဉ်းထောင်

အမိန့်တော်စာ လာပို့သည့် မိန်းမစိုးအိုကြီးကတော့ ပြုံးပျော်လို့နေပါသည်။ အကျဉ်းထောင်စောင့် တစ်စုကလည်း မနာလိုသည့် အကြည့်များဖြင့် ကြည့်နေကြသည်။

အကျဉ်းထောင်မှူး...

ကောင်းကင်ဘုံအကျဉ်းထောင်အတွင်းမှာဖြစ်စေ၊ အပြင်မှာဖြစ်စေ ၎င်းမှာ ကွပ်မျက်သူ တစ်ဦးအတွက် ဂုဏ်ပြုခေါ်ဝေါ်သည့် အမည်နာမတစ်ခုသာ ဖြစ်သည်။ အကယ်၍ တစ်စုံတစ်ယောက်က သင့်အပေါ် ဖော်ရွေပြီး ယဉ်ကျေးပျူငှာလျှင် သင့်ကို အကျဉ်းထောင်မှူးဟု ခေါ်ပေလိမ့်မည်။ အကယ်၍ သူတို့က သင့်ကို သဘောမကျဘဲ မဖော်ရွေပါက သင်သည် ကွပ်မျက်သူတစ်ဦးသာ ဖြစ်သည်။ လူသတ်သမားတစ်ဦး၊ ခေါင်းဖြတ်ခံရရန် ထိုက်တန်သူတစ်ဦးသာ ဖြစ်ပေသည်။

ထို့ပြင် မိစ္ဆာများကို ကွပ်မျက်ရသည့် အလုပ်၏ ထူးခြားသော သဘောသဘာဝကြောင့် ကွပ်မျက်သူ၏ အဆင့်အတန်းမှာ မဟာချင်မင်းဆက် မှာဖြစ်စေ၊ မြို့စောင့်အကျဉ်းဌာန မှာဖြစ်စေ အနိမ့်ဆုံးဖြစ်ပြီး သာမန် အကျဉ်းထောင်စောင့်များအောက်ပင် နိမ့်ကျပါသည်။

သို့သော် နန်းတော်မှ ချီးမြှင့်လိုက်သည့် အဆင့် ၉ စစ်ဘက်ဆိုင်ရာ အရာရှိ ရာထူးမှာမူ မတူညီပေ။ ၎င်းသည် တာချင်မင်းဆက်မှ တရားဝင် အသိအမှတ်ပြုထားသည့် အရာရှိ ရာထူးတစ်ခု ဖြစ်သည်။ ဥပမာအားဖြင့် ချူရွှမ်၏ ယခင်ရာထူးဖြစ်သော မိစ္ဆာနှိမ်နင်းရေးဌာန မှ အဆင့် ၉ မိစ္ဆာနှိမ်နင်းရေး အရာရှိဆိုသည်မှာ နန်းတော်က တရားဝင် အသိအမှတ်ပြုထားသည့် အရာရှိဖြစ်သော်လည်း... ကွပ်မျက်သူတစ်ဦးက ထိုကဲ့သို့ အသိအမှတ်ပြုခံရခြင်းမှာ နှစ်ပေါင်း တစ်ရာအတွင်း ဤသည်မှာ ပထမဆုံးအကြိမ် ဖြစ်သည်။

ထို့ကြောင့် အမိန့်တော်စာ လာပို့သည့် မိန်းမစိုးအိုကြီးသည် ချူရွှမ် အလွန်အမင်း အံ့ဩသွားကာ ဒူးမထောက်ဘဲ ရပ်နေသည်ကို မြင်သော်လည်း စိတ်ဆိုးခြင်း မရှိပေ။ နောက်ဆုံးတွင် သူသည် ပြုံးလျက် အမိန့်တော်စာလွှာကို ချူရွှမ်၏ လက်ထဲသို့ တိုက်ရိုက် ထည့်ပေးလိုက်ပြီး စူးရှရှ ရယ်သံဖြင့် ပြောလိုက်သည်။ "အရာရှိချူ... အခုကစပြီး မင်းက ငါတို့ မဟာချင်မင်းဆက်ရဲ့ တကယ့် အကျဉ်းထောင်မှူးတစ်ယောက် ဖြစ်သွားပြီ။ ဧကရာဇ်မင်းမြတ်အပေါ် သစ္စာရှိပြီး နန်းတော်အတွက် ကောင်းကောင်း အမှုထမ်းရမယ်နော်"

ထိုအခါမှ ချူရွှမ် သတိပြန်ဝင်လာတော့သည်။ ၎င်းမှာ သူ ရာထူးရလိုက်သောကြောင့် မဟုတ်ပေ။ အမိန့်တော်စာကို လွှဲပြောင်းပေးစဉ်တွင် ဤဆံပင်ဖြူဖြူ၊ မျက်နှာကလက်လက်နှင့် မိန်းမစိုးအိုကြီးကြီးက သူ၏လက်ကို ပွတ်သပ်သွားသည်ကို ချူရွှမ် ခံစားလိုက်ရသောကြောင့် ဖြစ်သည်။

ချူရွှမ် ဘာမှ ပြန်မလုပ်နိုင်သေးခင်မှာပင် ထိုသူက ဒုတိယအကြိမ် ထပ်မံ ပွတ်သပ်လိုက်ပြန်ရာ ချူရွှမ်မှာ သွေးသောက် အရူးဓားမ ကို ဆွဲထုတ်ပြီး သူ့ကို ခုတ်ပစ်ချင်သည့် စိတ်ပင် ပေါက်သွားသည်။ တစ်ချိန်တည်းမှာပင် ထူးဆန်းသော အနံ့တစ်ခုက သူ၏ နှာခေါင်းထဲသို့ တိုးဝင်လာသည်။

၎င်းက ချူရွှမ်ကို ထပ်မံ ထိတ်လန့်သွားစေပြန်သဖြင့် သူသည် လက်အုပ်ချီကာ အမြန် ပြန်ပြောလိုက်သည်။ "စိတ်ချပါ ကုန်းကုန်း... ကျနော်မျိုး မိစ္ဆာတွေကို ပိုပြီး သတ်ဖြတ်ပြီး ကောင်းကင်ဘုံကိုယ်စား တရားမျှတမှုကို ဖော်ဆောင်ပါ့မယ်"

"ကြီးမြတ်တဲ့ ရည်မှန်းချက်၊ ကြီးမြတ်တဲ့ စိတ်ဓာတ်ပဲ ဒါဆို မင်းရဲ့ စွမ်းဆောင်ရည်ကို ငါ စောင့်ကြည့်နေပါ့မယ်၊ ဟီးဟီးဟီးဟီး..." မိန်းမစိုးအိုကြီးကြီးက တခိခိ ရယ်မောရင်း ချူရွှမ်၏ လက်ကို နောက်ဆုံးတစ်ကြိမ် ပွတ်သပ်သွားလိုက်သေးသည်။

ထို့နောက်မှသာ သူသည် ကျေနပ်သည့် အမူအရာဖြင့် လက်ကို နောက်ပစ်ကာ ထွက်သွားတော့သည်။ ထိုအခိုက်တွင် သွေးသောက် အရူးဓားမမှာလည်း ဂနာမငြိမ် ဖြစ်နေတော့သည်။ သို့သော် ချူရွှမ်က ၎င်းကို အမြန် ဖိနှိပ်လိုက်သည်။

အကြောင်းမှာ ခုနက အရှိန်အဝါ အာရုံခံစားမှုအရ ဤမိန်းမစိုးအိုကြီးသည် သာမန်လူ မဟုတ်ဘဲ သူ၏ အရှိန်အဝါကို ဖုံးကွယ်ထားရာတွင် အလွန် ကျွမ်းကျင်သော နတ်အဆင့်ပညာရှင် တစ်ဦး ဖြစ်နေသည်ကို သူ တွေ့ရှိလိုက်ရသောကြောင့် ဖြစ်သည်။ ချူရွှမ်သည် ထိုသူ သူ၏အနားသို့ ကပ်လာသောအခါမှသာ အရှိန်အဝါကို အာရုံခံမိခြင်း ဖြစ်သည်။

ပို၍ ကြောက်စရာကောင်းသည်မှာ...

ခုနက မိန်းမစိုးအိုကြီးကြီးက သူ၏လက်ကို အဆက်မပြတ် ပွတ်သပ်နေစဉ်အတွင်း အလွန် သိမ်မွေ့သည့် စစ်မှန်သော ချီတစ်ခုသည် သူ၏ ခန္ဓာကိုယ်အတွင်းသို့ ကျူးကျော်ဝင်ရောက်ကာ သူ၏ ကျင့်ကြံမှုကို စမ်းသပ်ရန် ကြိုးစားနေသကဲ့သို့ ခံစားလိုက်ရခြင်းဖြစ်သည်။

ကံကောင်းသည်မှာ ရေစွမ်းအင်ပုလဲ ကြောင့် အချိန်မီ ဖုံးကွယ်နိုင်ခဲ့သည်။ မဟုတ်လျှင် ထိုခဏအတွင်းမှာပင် သူ၏ ဝှက်ဖဲမှာ ပေါက်ကြားသွားပေလိမ့်မည်။

"တကယ့်ကို ကြောက်စရာကောင်းတဲ့ မိန်းမစိုးအိုကြီးပဲ၊ မျှော်လင့်ထားသလိုပါပဲ... အရာရှိ ရာထူးဆိုတာ အပေါ်ယံ သကာရည်တွေပဲ၊ တကယ့် ခွန်အားကသာ ငါ့အတွက် အစစ်အမှန်ဖြစ်ပြီး ဘယ်သူမှ လုယူလို့ မရတာ ပြီးတော့ မိန်းမစိုးအိုကြီး တစ်ယောက်တည်းတောင် ဒီလောက် နက်နက်ရှိုင်းရှိုင်း ပုန်းကွယ်နေတယ်ဆိုရင်... မြို့စောင့်အကျဉ်းဌာနက တခြားလူတွေကရော..."

ချူရွှမ်၏ အကြည့်မှာ လေးနက်သွားသည်။ သူ၏ အထူးစွမ်းရည်ကို ရရှိပြီးနောက် ကောင်းကင်ဘုံအကျဉ်းထောင်အတွင်း၌ အသုံးပြုရန် သူ မစဉ်းစားခဲ့မိပေ။ သို့သော် ဤမိန်းမစိုးအိုကြီးနှင့် ဖြစ်ရပ်ပြီးနောက် ချူရွှမ် ရုတ်တရက် စူးစမ်းချင်စိတ် ပေါ်လာသည်။ ကောင်းကင်ဘုံအကျဉ်းထောင်ထဲမှာ ပုန်းကွယ်နေတဲ့ ပညာရှင်တွေ ဘယ်လောက်တောင် ရှိနေမလဲ။

အကျဉ်းထောင်စောင့်များက သူ့ကို ဝိုင်းဝန်း ဂုဏ်ပြုနေကြစဉ်အတွင်း ချူရွှမ်သည် အရှိန်အဝါ အာရုံခံခြင်းစွမ်းရည်ကို ချက်ချင်း အသုံးပြုလိုက်သည်။ နှာခေါင်းကို တစ်ချက် ရှုံ့လိုက်ရုံဖြင့် ချူရွှမ် တုန်လှုပ်သွားရသည်။

ပုံမှန်ဆိုလျှင် ဤအကျဉ်းထောင်စောင့်များသည် အလွန်ပင် နှိမ့်ချစွာ ကြွားဝါတတ်ကြသည်။ တစ်ယောက်က သူသည် အမှိုက်ဖြစ်သည်ဟု ပြောလျှင် နောက်တစ်ယောက်က သူသည် အသုံးမကျသူဟု ပြောတတ်ကြသည်။ သို့သော် အမှန်တကယ်တွင်မူ... ၎င်းတို့အနက် အများစုမှာ နွားကိုးကောင်အား ပိုင်ဆိုင်ထားသည့် လူသားအဆင့် နဝမအလွှာပညာရှင်များ ဖြစ်ကြသည်။ ကျန်းလုံနှင့် ကျောက်ဟူကဲ့သို့ မျိုးရိုးလိုက် အကျဉ်းထောင်စောင့် အဆင့်အတန်းကို အသုံးချကာ ပျင်းရိနေကြသူများမှာ အလွန်ပင် နည်းပါးလှသည်။

ပို၍ တုန်လှုပ်စရာကောင်းသည်မှာ...

ပြီးခဲ့သည့်အကြိမ်က သူနှင့်အတူ မိစ္ဆာတည်းခိုခန်းသို့ လိုက်သွားခဲ့သော နတ်အဆင့် အကျဉ်းထောင်စောင့်မှာ သူကိုယ်သူ နတ်အဆင့် ပထမအဆင့်သာ ရှိပြီး အလွန် အားနည်းသည်ဟု ပြောခဲ့သော်လည်း၊ အရှိန်အဝါ အာရုံခံခြင်းအရ ထိုသူသည် နတ်အဆင့် ဒုတိယအလွှာသို့ပင် ရောက်ရှိရန် နီးကပ်နေပြီ ဖြစ်သည်။

သူတစ်ယောက်တည်း မဟုတ်ပေ။ အရှိန်အဝါ အာရုံခံခြင်းကို အသုံးပြု၍ ကောင်းကင်ဘုံအကျဉ်းထောင် တစ်ပတ် ပတ်ကြည့်လိုက်သောအခါ သူနှင့်တွေ့သမျှ နတ်အဆင့် အကျဉ်းထောင်စောင့် ဆယ်ယောက်တွင် ကိုးယောက်မှာ သူတို့၏ ကျင့်ကြံမှုကို ဖုံးကွယ်ထားကြသည်။ နောက်ဆုံးတစ်ယောက်မှာမူ သူ၏ ကျင့်ကြံမှုမှာ အသစ်စက်စက် အဆင့်တက်ထားခြင်း ဖြစ်သောကြောင့် ဖုံးကွယ်ရန် အချိန်မရသေးခြင်းသာ ဖြစ်သည်။

အကျဉ်းထောင်စောင့်များပင် ဤကဲ့သို့ ဖြစ်နေလျှင်...

ချူရွှမ် ရုတ်တရက် ကြောက်စရာကောင်းသော အချက်တစ်ခုကို တွေးမိသွားသည်။ သူသည် စစ်ဆေးရေးခန်းဆီသို့ တိတ်တဆိတ် သွားကာ ဝမ်ရှန့်ကို အာရုံခံကြည့်လိုက်သည်။ သို့သော် အာရုံခံလိုက်သည့် ခဏမှာပင် ချူရွှမ်၏ နှလုံးသားကို တုန်လှုပ်သွားစေသည့် အရှိန်အဝါတစ်ခုက သူ၏ဆီသို့ ဝုန်းခနဲ ပြေးဝင်လာတော့သည်။

သူသည် ယခုအခါ နတ်အဆင့် တတိယအလွှာသို့ ရောက်ရှိနေပြီး ကျားလေးကောင်အား ပိုင်ဆိုင်ထားသည်ကို သတိပြုသင့်သည်။ သို့သော် ထိုအရှိန်အဝါကို အာရုံခံမိရုံမျှဖြင့် ချူရွှမ်သည် ကြီးမားသော အန္တရာယ်တစ်ခုနှင့် ရင်ဆိုင်နေရသကဲ့သို့ ခံစားလိုက်ရသည်။

အကယ်၍ သူတို့ တကယ် တိုက်ခိုက်ကြမည်ဆိုလျှင်... ဝမ်ရှန့်၏ တကယ့် တိုက်ခိုက်ရေးစွမ်းအားမှာ မည်မျှ ရှိမည်နည်း ကျားခြောက်ကောင်အားလား၊ သို့မဟုတ် ထို့ထက် ပို၍ ကြောက်စရာကောင်းနေမည်လား။

ဤအချက်ကို သိရှိသွားပြီးနောက် ချူရွှမ်မှာ သွေးအန်ချင်သည့် စိတ်ပင် ပေါက်သွားသည်။ "ငါက တကယ်ကို နုနယ်ပြီး အပြစ်ကင်းလွန်းနေသေးတာပဲ။ မဆန်းပါဘူး... ကောင်းကင်ဘုံအကျဉ်းထောင်လို ခြောက်ခြားစရာကောင်းတဲ့ နေရာမျိုးမှာ စောင့်ကြပ်နေတဲ့ အကျဉ်းထောင်စောင့်တွေကသာ အပျော့အညံ့တွေ ဖြစ်နေမယ်ဆိုရင် ဒီနေရာမှာ အရိုးမှုန့်တောင် ကျန်မှာ မဟုတ်ဘူး”

ကောင်းကင်ဘုံအကျဉ်းထောင်၏ တကယ့် အခြေအနေမှာ အချင်းချင်း အပြိုင်အဆိုင် အလွန် ပြင်းထန်လွန်းလှသည်ဟု ဆိုရပေမည်။ အားလုံးမှာလည်း သူတို့၏ စွမ်းအားကို တိတ်တဆိတ် ဖုံးကွယ်ကာ ပြိုင်ဆိုင်နေကြခြင်း ဖြစ်သည်။

ရုတ်တရက် ကြီးမားသော ဖိအားတစ်ခုက သူ့ဆီသို့ စီးဝင်လာသဖြင့် ချူရွှမ်မှာ ဆက်၍ အောင့်မထားနိုင်တော့ပေ။ သူသည် အနည်းငယ် လျှောက်သွားကာ တရားရုံးခန်းထဲသို့ ပြေးဝင်လိုက်ပြီး ဝမ်ရှန့်ကို လက်အုပ်ချီကာ ပြောလိုက်သည်။ "အကျဉ်းထောင်မှူးကြီး... ကျနော်မျိုး လက်ယားနေလို့ပါ၊ မိစ္ဆာတွေကို သတ်ချင်ပါတယ်"

ဝမ်ရှန့်မှာ ရုတ်တရက် လန့်သွားရသည်။ ချူရွှမ်သည် မကြာသေးမီကမှ မိစ္ဆာကိုးကောင်ကို တစ်ပြိုင်နက် သတ်ဖြတ်ထားခြင်း ဖြစ်သည်ကို သတိပြုသင့်သည်။ သာမန် ကွပ်မျက်သူ တစ်ဦးအတွက်ဆိုလျှင် သူတို့သည် သေဆုံးသွားပြီ ဖြစ်စေ၊ သို့မဟုတ် လုံးဝ ရူးသွပ်သွားပြီ ဖြစ်စေ ဖြစ်နေရမည်ဖြစ်သည်။

ဤကောင်လေးက ၎င်းကို ဤမျှတိုတောင်းသော အချိန်အတွင်း သန့်စင်ပြီးသွားပြီလား။

ငါက အဲဒီ ပြိုင်ဘက်ကင်းတဲ့ ကျိန်စာလက်နက်ကို အထင်သေးမိနေသေးတာပဲ... ဝမ်ရှန့်သည် မသိစိတ်ဖြင့် ဤအချက်ကို သွေးသောက် အရူးဓားမ ကြောင့်ဟုသာ တွေးလိုက်မိပြီး ၎င်းမှာလည်း အကျိုးအကြောင်း အသင့်ရှိဆုံး ရှင်းပြချက် ဖြစ်နေသည်။

ထို့ကြောင့် သုံးရက်အကြာတွင်...

မိစ္ဆာနှိမ်နင်းရေးဌာနမှ မိစ္ဆာနှိမ်နင်းရေးအရာရှိများသည် ထိုလမ်းကြုံ မိစ္ဆာလမ်းစဉ်ကျင့်ကြံသူကို မြေလှန်ရှာနေကြစဉ်၊ လက်ဝဲအမတ်ချုပ်နှင့် လက်ယာအမတ်ချုပ်တို့သည် နန်းတွင်း၌ အချင်းချင်း အချေအတင် ငြင်းခုံ ဆဲဆိုနေကြသဖြင့် အရာရှိများအကြား စကားစစ်ထိုးပွဲများ ဖြစ်ပေါ်နေစဉ်...

သုံးရက်အကြာ ကောင်းကင်ဘုံအကျဉ်းထောင်အတွင်း

ပြင်းထန်စွာ ဒဏ်ရာရထားသော မိစ္ဆာသုံးကောင် နောက်ထပ် ရောက်ရှိလာပြန်သည်။ ၎င်းတို့မှာ မိစ္ဆာတည်းခိုခန်းတွင် ဖမ်းဆီးခံခဲ့ရပြီး ဒဏ်ရာအပြင်းအထန် ရထားသူ သုံးဦး ဖြစ်သည်။ မူလက မိစ္ဆာနှိမ်နင်းရေးဌာန၏ တောင်းဆိုချက်အရ လက်ယာအမတ်ချုပ်က လွှဲပြောင်းပေးရန် သဘောတူခဲ့သည်။ သို့သော် နောက်ပိုင်းတွင် မည်သည့် အကြောင်းကြောင့်မှန်းမသိဘဲ လက်ယာအမတ်ချုပ်၏ သဘောထားမှာ ရုတ်တရက် ပြောင်းလဲသွားခဲ့သည်။

သူသည် ထိုသူများကို ကောင်းကင်ဘုံအကျဉ်းထောင်တွင်သာ ချုပ်နှောင်ပြီး ကွပ်မျက်ရန် တိုက်ရိုက် အမိန့်ပေးလိုက်ခြင်း ဖြစ်သည်။

ချူရွှမ်သည်လည်း စိတ်ကို တက်ကြွအောင် လုပ်ကာ သွေးသောက် အရူးဓားမကို ကိုင်စွဲလျက် ကွပ်မျက်ကွင်းအတွင်းသို့ နောက်တစ်ကြိမ် ဝင်ရောက်လိုက်ပြီး မိစ္ဆာကွပ်မျက်စင်မြင့် ပေါ်သို့ တက်လှမ်းလိုက်သည်။ အကျွမ်းတဝင်ရှိလှသော မိစ္ဆာချီများမှာ ပတ်ဝန်းကျင်၌ ပြည့်နှက်နေဆဲဖြစ်သည်။

ပတ်ဝန်းကျင်ရှိ သာမန်ပြည်သူများမှာလည်း အားရပါးရ အားပေးနေကြသည်။

"ဟိုမှာကြည့်စမ်း... အကျဉ်းထောင်မှူးချူ ကွပ်မျက်တော့မယ် သူက တကယ်ကို တော်တာပဲ၊ ကောင်းကောင်းသတ်ပစ်လိုက်"

"တွက်ကြည့်ရရင် ဒါက အကျဉ်းထောင်မှူးချူ သတ်တဲ့ ဆယ့်တစ်ကောင်မြောက် မိစ္ဆာပဲ။ သူ အသက်ရှင်နေသေးတာ တကယ်ကို အံ့ဩစရာပဲ၊ အကျဉ်းထောင်မှူးချူက တကယ်ကို အစွမ်းထက်တာပဲ"

ပြည်သူများမှာ သူတို့၏ ပေါင်မုန့်လုံးများကို မြှောက်ကိုင်ထားကာ မိစ္ဆာသွေးများ စင်လာမည်ကို စောင့်ဆိုင်းရင်း အားပေးနေကြသည်။ မိစ္ဆာကွပ်မျက်စင်မြင့်ပေါ်ရှိ မိစ္ဆာသုံးကောင်မှာမူ ကြောက်ရွံ့လွန်းသဖြင့် တုန်လှုပ်နေကြတော့သည်။

လွန်ခဲ့သည့် ရက်အနည်းငယ်အတွင်း ကောင်းကင်ဘုံအကျဉ်းထောင်၌ ချုပ်နှောင်ခံထားရစဉ်အတွင်း ကောင်းကင်ဘုံအကျဉ်းထောင်၌ မိစ္ဆာများကို မျက်တောင်မခတ်ဘဲ သတ်ဖြတ်နိုင်သော၊ မိစ္ဆာချီကို မကြောက်ရွံ့သော၊ မိစ္ဆာမြင်လျှင် မြင်သမျှ သတ်ပစ်တတ်သော ကြောက်စရာကောင်းသည့် ကွပ်မျက်သူတစ်ဦး ရှိသည်ကို သူတို့ ကြားသိခဲ့ရပြီး ဖြစ်သည်။

"သွားပြီ... သွားပြီ အကျဉ်းထောင်မှူးကြီး... ကျနော်တို့ အသက်ရှင်ဖို့ မတောင်းဆိုပါဘူး၊ ကျေးဇူးပြုပြီး သနားညှာတာပြီး မြန်မြန်လေးပဲ သတ်ပေးပါ" သူတို့အနက် အကြောက်ဆုံး မိစ္ဆာတစ်ကောင်က မအော်ဟစ်ဘဲ မနေနိုင်တော့ပေ။

ချူရွှမ်က ဘာမှ မပြောဘဲ သွေးသောက် အရူးဓားမကို တိုက်ရိုက် မြှောက်လိုက်သည်။ "မင်းတို့ရဲ့ ဆန္ဒအတိုင်း ဖြစ်စေရမယ် ဒီနေ့ ငါချူရွှမ်... ကောင်းကင်ဘုံကိုယ်စား ကွပ်မျက်ပြီး မိစ္ဆာတွေကို သုတ်သင်မယ်၊ သတ်စမ်း”

အခန်း (၄၁)

သနားစရာကောင်းသော ခေါင်းဆောင်

သတ်စမ်း

သတ်စမ်း

သတ်စမ်း

သွေးသောက် အရူးဓားမ သည် လျှပ်စီးကဲ့သို့ လျင်မြန်လှသော၊ ဆီးနှင်းကဲ့သို့ အေးစက်ထက်မြက်လှသော ဓားချက်သုံးချက်ကို ဆက်တိုက် ထုတ်ဖော်လိုက်သည်။

မိစ္ဆာကွပ်မျက်စင်မြင့်ပေါ်ရှိ မိစ္ဆာသုံးကောင်မှာ ဘာဖြစ်သွားမှန်းပင် မသိလိုက်ခင်မှာပင် စမ်းရေတွင်းမှ ရေများ ပန်းထွက်လာသကဲ့သို့ မိစ္ဆာသွေးများ လေထဲ၌ ပန်းထွက်လာကာ ပတ်ဝန်းကျင်ကို စွန်းထင်းသွားစေသည်။ သွေးချင်းချင်းနီနေသော မိစ္ဆာခေါင်းသုံးလုံးမှာ လှေကားထစ်များအတိုင်း လိမ့်ဆင်းသွားတော့သည်။

တစ်ချိန်တည်းမှာပင် ကွပ်မျက်သူ တစ်ဦးအနေဖြင့် ချူရွှမ်သည် မိစ္ဆာတစ်ကောင်ကို သတ်တိုင်း မိစ္ဆာအသားနှင့် သွေး အနည်းငယ်ကို အပိုဆုအနေဖြင့် ရရှိသည်။ သို့သော် သူသည် မိစ္ဆာခန္ဓာကိုယ်သန့်စင်ခြင်းကျင့်စဉ် ကို စတင်လေ့ကျင့်ကတည်းက သာမန် ကျင့်ကြံခြင်း ပစ္စည်းများသည် သူ့အပေါ်တွင် ထူးထူးခြားခြား အကျိုးသက်ရောက်မှု မရှိတော့ပေ။

ယခုအခါ ချူရွှမ် လိုအပ်သည်မှာ မိစ္ဆာချီသာ ဖြစ်သည်။ သူ ရရှိလိုက်သော အနည်းငယ်သော ကျင့်ကြံမှု သက်တမ်းများကိုပင် ချူရွှမ်က သူ၏ နှိမ်နင်းခြင်းတစ်ချက် ကျင့်စဉ်ထဲသို့ အပျော်သဘောဖြင့် ပေါင်းထည့်လိုက်သည်။

ထို့ကြောင့် ချူရွှမ်သည် မိစ္ဆာအသားနှင့် သွေးများကို ဂရုမစိုက်သလို၊ သူသည် ငွေကြေးလည်း မရှားပါးပေ။ အခြားတစ်ဖက်တွင်မူ ကျန်းလုံ နှင့် ကျောက်ဟူ တို့သည် အရည်အချင်း အကန့်အသတ် ရှိသော်လည်း သတင်းအချက်အလက် စုဆောင်းရာတွင် အလွန်ပင် တော်ကြသည်။

ထို့ကြောင့် ချူရွှမ် ခဏစဉ်းစားပြီးနောက် ကျန်းလုံနှင့် ကျောက်ဟူကို ပြောလိုက်သည်။ "နောက်ပိုင်း ငါ မိစ္ဆာတွေကို သတ်လို့ရတဲ့ အသားနဲ့ သွေးတွေကို မင်းတို့နှစ်ယောက်ပဲ စားလိုက်တော့”

သူတို့၏ ခွန်အား တိုးတက်လာမှသာ ပို၍ အရေးကြီးသော သတင်းအချက်အလက်များကို သူတို့ စုဆောင်းနိုင်မည်ဖြစ်သည်။ ဤသို့ဖြင့် ချူရွှမ်သည် ကောင်းကင်ဘုံအကျဉ်းထောင်တွင် ပို၍ စိတ်အေးလက်အေး နေထိုင်နိုင်မည် မဟုတ်ပါလား။

ထွက်ခွာသွားသော ချူရွှမ်၏ ကျောပြင်ကို ကြည့်ရင်း ကျန်းလုံနှင့် ကျောက်ဟူတို့မှာ ချက်ချင်းပင် မျက်ရည်ဝဲလာကြတော့သည်။

ညီအစ်ကိုသံယောဇဉ်ဆိုတာ ဘာလဲ၊ ဒါဟာ ညီအစ်ကိုသံယောဇဉ်ပဲ။

မိစ္ဆာအသားနှင့် သွေးကဲ့သို့ အဖိုးတန်လှသော အရာမျိုးကို သူကိုယ်တိုင်ပင် မစားဘဲ ငါတို့ကို တမင် ပေးသနားခဲ့တာပဲ။ စကားလုံးတွေ မလိုတော့ဘူး။ နောင်ကျရင် ညီအစ်ကိုရွှမ်က အရှေ့သွားခိုင်းရင် အနောက်ကို လုံးဝ မသွားဘူး၊ ခွေးဖမ်းခိုင်းရင် ကြက်ကို လုံးဝ မမောင်းဘူး။

ဘာလို့လဲဆိုတော့ ညီအစ်ကိုရွှမ်နောက်ကို လိုက်ရင် အသားစားရလို့ပဲ။

ဟီး... ကျန်းလုံနှင့် ကျောက်ဟူတို့သည် ငိုမယောင်ဖြစ်ကာ ထွက်သွားကြသည်။ သိပ်မဝေးသော နေရာမှ ချူရွှမ်မှာမူ ကြောင်တောင်တောင် ဖြစ်သွားရသည်။ ပြီးခဲ့တဲ့အကြိမ်က ငါ့ရဲ့ ဝိညာဉ်ထိန်းချုပ်ခြင်း ကျင့်စဉ်ကြောင့် ဒီကောင်တွေ တုံးအသွားတာလား မသိဘူး။

ထားလိုက်ပါတော့... အချိန်ရရင် အိမ်ပြန်ပြီး ကျင့်ကြံတာကမှ ပိုကောင်းဦးမယ်။

မကြာမီမှာပင် ချူရွှမ်သည် သူ၏ နေအိမ်သို့ ပြန်ရောက်လာခဲ့သည်။ သူသည် တံခါးကို ပိတ်ကာ ကျင့်ကြံခြင်းကို စတင်လိုက်သည်။

မြို့တော်တစ်ခုလုံးသည် မိစ္ဆာတည်းခိုခန်း ပျက်စီးသွားပြီးနောက် အထူးပင် တိတ်ဆိတ်ငြိမ်သက်သွားခဲ့သည်။ အမှန်တကယ် ကံအဆိုးဆုံးမှာ ထျန်းယင်ဂိုဏ်း ဖြစ်သည်။ မြို့တော်ရှိ သူတို့၏ အခြေစိုက်စခန်းများသာမက သူတို့၏ ခြေရာလက်ရာများကိုပင် အကုန်အစင် သုတ်သင်ခြင်း ခံလိုက်ရသည်။

သို့သော်လည်း...

လက်ဝဲအမတ်ချုပ် လင်ချူချန် ကတော့ လွယ်လွယ်နှင့် လွှတ်ပေးမည့်ပုံ မရှိပေ။ နောက်ဆုံးတွင် သူသည် သူ၏သားကို ဆုံးရှုံးခဲ့ရသည့်အပြင်၊ ထိုလမ်းကြုံ မိစ္ဆာလမ်းစဉ်ကျင့်ကြံသူကြောင့် မိစ္ဆာတည်းခိုခန်း၏ အခြေစိုက်စခန်းမှာလည်း မြို့စောင့်အကျဉ်းဌာန၏ လက်ထဲသို့ မတော်တဆ ရောက်သွားခဲ့သည်။

ထိုအချက်ကြောင့်ပင် သူနှင့် မိစ္ဆာလမ်းစဉ်ကျင့်ကြံသူများ လျှို့ဝှက် ဆွေးနွေးထားသည့် အထောက်အထားများ ပေါက်ကြားသွားခဲ့သည်။ ထိုအထောက်အထားများမှာ သူ၏ အမတ်ချုပ် ရာထူးကို လှုပ်ခတ်နိုင်ခြင်း မရှိသေးသော်လည်း...

လင်ချူချန်သည် အမတ်ချုပ် တစ်ဦးအနေဖြင့် အလွန်အမင်း ဒေါသထွက်နေပြီး မျက်လုံးများမှာ နီမြန်းနေသည်။ ထမင်းစားတိုင်း သူ၏ အစီအစဉ်ကောင်းများကို ဖျက်ဆီးခဲ့သည့် ထိုလမ်းကြုံ မိစ္ဆာလမ်းစဉ်ကျင့်ကြံသူကို ကျိန်ဆဲလေ့ရှိသည်။

သူတို့၏ အထက်လူကြီးက ဤကဲ့သို့ ဖြစ်နေသည်ကို မြင်သောအခါ... မိစ္ဆာနှိမ်နင်းရေးဌာန မှ နတ်အဆင့် အရာရှိများ အားလုံးသည် မနားမနေ အလုပ်လုပ်ကြတော့သည်။

မြို့တော်ရှိ ထျန်းယင်ဂိုဏ်းကို မြေလှန်ရှာပြီးနောက်တွင် မိစ္ဆာနှိမ်နင်းရေးဌာနသည် သူတို့ ရရှိထားသော သဲလွန်စများပေါ် မူတည်၍ ရှာဖွေမှု အတိုင်းအတာကို ထျန်းယင်ဂိုဏ်း၏ အခြားသော အခြေစိုက်စခန်းများအထိပါ ချဲ့ထွင်လိုက်သည်။

ထိုအခြေစိုက်စခန်းများရှိ ထျန်းယင်ဂိုဏ်းမှ မိစ္ဆာလမ်းစဉ်ကျင့်ကြံသူများမှာ သနားစရာ ကောင်းလှသည်။ သူတို့မှာ အိမ်မှာ ငြိမ်ငြိမ်လေး ထိုင်နေရင်းနှင့် ကောင်းကင်မှ ဘေးဒုက္ခများ ကျရောက်လာခြင်း ဖြစ်သည်။ သူတို့၏ အခြေစိုက်စခန်းများ ဖျက်ဆီးခံရရုံသာမက သူတို့ကိုယ်တိုင်လည်း ဖမ်းဆီးခံရပြီး မိစ္ဆာနှိမ်နင်းရေးဌာနသို့ ခေါ်ဆောင်ခြင်း ခံရကာ ထိုလမ်းကြုံ မိစ္ဆာလမ်းစဉ်ကျင့်ကြံသူ၏ သတင်းကို ရရန် အမျိုးမျိုးသော နှိပ်စက်ညှဉ်းပန်းမှုများကို ခံစားကြရသည်။

ထျန်းယင်ဂိုဏ်းမှ မိစ္ဆာလမ်းစဉ်ကျင့်ကြံသူ အမြောက်အမြားမှာ သူတို့ ဘာကြောင့် သေရမှန်းပင် မသိဘဲ နှိပ်စက်မှုဒဏ်ဖြင့် သေဆုံးသွားခဲ့ကြသည်။

ထျန်းယင်ဂိုဏ်းချုပ် မှာလည်း အလားတူပင် ဘာဖြစ်နေမှန်း မသိဘဲ ဝေခွဲမရ ဖြစ်နေသည်။

ပုံမှန်ဆိုလျှင် မိစ္ဆာနှိမ်နင်းရေးဌာနသည် မိစ္ဆာများကိုသာ နှိမ်နင်းလေ့ရှိသည်။ မိစ္ဆာဆိုးများနှင့် တစ္ဆေများကို နှိမ်နင်းခြင်းမှာ မြို့စောင့်အကျဉ်းဌာန၏ တာဝန် ဖြစ်သည်။ ထို့ကြောင့် ထျန်းယင်ဂိုဏ်းနှင့် မိစ္ဆာနှိမ်နင်းရေးဌာနတို့သည် အမြဲတမ်း တစ်ဦးနှင့်တစ်ဦး မနှောင့်ယှက်ဘဲ နေခဲ့ကြသော်လည်း၊ ယခုတစ်ကြိမ်တွင်မူ မိစ္ဆာနှိမ်နင်းရေးဌာနက ရူးသွပ်သွားပုံရသည်။ သူတို့သည် ခွေးရူးများကဲ့သို့ ဖြစ်နေကြသည်။

ထျန်းယင်ဂိုဏ်းနှင့် ပတ်သက်သည့် သတင်းစကား အနည်းငယ် ကြားလိုက်ရသည်နှင့် သူတို့သည် ဝုန်းခနဲ ပြေးဝင်လာကြသည်။ သူတို့၏ ကြမ်းတမ်းရက်စက်မှုမှာ မြို့စောင့်အကျဉ်းဌာနမှ ဧကရာဇ်၏ လက်ပါးစေများထက်ပင် သာလွန်နေသေးသည်။

ထို့ပြင် ဆယ်ရက်ကျော်အတွင်းမှာပင် ထျန်းယင်ဂိုဏ်းနှင့် ပတ်သက်သည့် လှုပ်ရှားမှု ရှိသော အခြေစိုက်စခန်း အားလုံးနီးပါးမှာ မိစ္ဆာနှိမ်နင်းရေးဌာန၏ ဖျက်ဆီးခြင်းကို ခံလိုက်ရသည်။ သူတို့၏ လက်အောက်ငယ်သား တစ်ရာထက်မနည်းမှာ နှိပ်စက်ခံရပြီး သေဆုံးသွားခဲ့ကြသည်။

ကြီးမားလှသော ဆုံးရှုံးမှုများကြောင့် ထျန်းယင်ဂိုဏ်းချုပ်မှာ အိပ်မက်ထဲတွင်ပင် နာကျင်မှုကို ခံစားနေရသည်။ အခြားသော မိစ္ဆာလမ်းစဉ်ကျင့်ကြံသူများနှင့် ကျင့်ကြံဖော်များမှာလည်း ထျန်းယင်ဂိုဏ်းအကြောင်း ပြောလျှင်ပင် ထိတ်လန့်နေကြပြီး တတ်နိုင်သမျှ ရှောင်ရှားနေကြသည်။ ဂိုဏ်းအတွင်းရှိ ပညာရှင် အမြောက်အမြားမှာလည်း အိမ်ပြင်မထွက်ရဲလောက်အောင် ကြောက်ရွံ့နေကြသည်။

အခြေအနေအရ အကျပ်ရိုက်လာသဖြင့် ထျန်းယင်ဂိုဏ်းချုပ်သည် နောက်ဆုံးတွင် နှစ်ဖက်အကြား နားလည်မှုလွဲခြင်းကို ဖြေရှင်းရန် မိစ္ဆာနှိမ်နင်းရေးဌာနနှင့် ဆွေးနွေးရန် ကိုယ်တိုင် ရှေ့ထွက်လာခဲ့ရသည်။

သူ မသွားခဲ့လျှင် ပိုကောင်းဦးမည်။

ဆွေးနွေးပွဲအကြောင်း ထပ်မံ ကြားလိုက်ရသောအခါ... ဆွေးနွေးပွဲတစ်ခုအတွင်းမှာပင် သားဖြစ်သူကို ဆုံးရှုံးခဲ့ရသည့် လက်ဝဲအမတ်ချုပ် လင်ချူချန်သည် ချက်ချင်းပင် ဒေါသပေါက်ကွဲသွားတော့သည်။ သူသည် မိစ္ဆာနှိမ်နင်းရေးဌာန၏ အထူးလက်ရွေးစင် တပ်ဖွဲ့များကို တိုက်ရိုက် စေလွှတ်လိုက်ပြီး ထျန်းယင်ဂိုဏ်းချုပ်ကို အသည်းအသန် လိုက်လံ ဖမ်းဆီးခိုင်းတော့သည်။

ထျန်းယင်ဂိုဏ်းချုပ်သည် လမ်းတစ်လျှောက်လုံးတွင် ထိုလမ်းကြုံ မိစ္ဆာလမ်းစဉ်ကျင့်ကြံသူမှာ သူတို့ဂိုဏ်းနှင့် ဘာမှမပတ်သက်ကြောင်း ထပ်ခါတလဲလဲ ကျိန်ဆိုပြီး မျက်ရည်ပင် ကျခဲ့သော်လည်း...

ကံမကောင်းစွာဖြင့် လူသက်သေနှင့် ပစ္စည်းသက်သေများက ရှိနေသည်။ လက်ဝဲအမတ်ချုပ် လင်ချူချန်နှင့် မိစ္ဆာနှိမ်နင်းရေးဌာနတို့က မည်သို့ ယုံကြည်နိုင်မည်နည်း။

လမ်းတစ်လျှောက်တွင် မိစ္ဆာနှိမ်နင်းရေးဌာနသည် ဂိုဏ်းချုပ်နှင့်အတူ လိုက်ပါလာသော မိစ္ဆာလမ်းစဉ်ကျင့်ကြံသူ လက်အောက်ငယ်သား အားလုံးကို သတ်ဖြတ်ပြီးနောက်မှသာ လိုက်လံဖမ်းဆီးခြင်းကို ရပ်တန့်လိုက်သည်။ သေလုမျောပါး ထွက်ပြေးလွတ်မြောက်လာသော ထျန်းယင်ဂိုဏ်းချုပ်မှာ နောက်ဆုံးတွင် အောင့်မထားနိုင်တော့ဘဲ ဒေါသကြောင့် သွေးအချို့ပင် အန်ထွက်လာခဲ့သည်။

ထို့နောက် သူသည် စုရုံးနေသော ထျန်းယင်ဂိုဏ်းမှ အဆင့်မြင့်အကြီးအကဲများကို ဟိန်းဟောက်လိုက်သည်။ "ငါတို့ ထျန်းယင်ဂိုဏ်းရဲ့ အဆင့်မြင့်အကြီးအကဲတွေထဲက အဲဒီ အောက်တန်းကျတဲ့၊ ကျိန်စာသင့်တဲ့ လမ်းကြုံ မိစ္ဆာလမ်းစဉ်ကျင့်ကြံသူက ဘယ်သူလဲဆိုတာ အခုထိ ရှာမတွေ့သေးဘူးလား"

"သူက ဘာဖြစ်နေလို့လဲ... လက်ဝဲအမတ်ချုပ်ရဲ့ သားကို သွားသတ်ပြီး အမတ်ချုပ်နဲ့ မိစ္ဆာတွေရဲ့ ဆွေးနွေးပွဲကို သွားဖျက်ဆီးရတာလဲ မင်းတို့ သိထားရမှာက အဲဒီ မိစ္ဆာသံတမန်ဆိုတာ ငါကိုယ်တိုင်တောင် သေသေချာချာ ဆက်ဆံနေရတဲ့သူ... ဝိုး..."

စကားမပြောတာကမှ ပိုကောင်းဦးမည်။ ယခုတစ်ကြိမ်တွင် သူသည် မိစ္ဆာနှိမ်နင်းရေးဌာန၏ သတ်ဖြတ်ခြင်းကို ခံရလုနီးပါး ဖြစ်ခဲ့ပြီး၊ သူ့ကို တုန်လှုပ်စေသည့် မိစ္ဆာတစ်ကောင်ကိုပင် ပြစ်မှားမိနိုင်သည်ကို တွေးမိသောအခါ ထျန်းယင်ဂိုဏ်းချုပ်မှာ တစ်ယောက်ယောက်ကို သတ်ပစ်ချင်သည့် စိတ်ပင် ပေါက်သွားသည်။

မိစ္ဆာလမ်းစဉ်ကျင့်ကြံသူ လက်အောက်ငယ်သား တစ်စုမှာလည်း အလွန်ပင် ဝေခွဲမရ ဖြစ်နေကြသည်။ အကြောင်းမှာ လွန်ခဲ့သည့် ရက်အနည်းငယ်အတွင်း ထျန်းယင်ဂိုဏ်း၏ မှတ်တမ်းအားလုံးကို ရှာဖွေခဲ့သော်လည်း ထိုလမ်းကြုံ မိစ္ဆာလမ်းစဉ်ကျင့်ကြံသူမှာ မည်သည့် အဆင့်မြင့်အကြီးအကဉဖြစ်သည်ကို ရှာမတွေ့ခဲ့သောကြောင့် ဖြစ်သည်။

နောက်ဆုံးတွင် ယုံကြည်ရသော လက်အောက်ငယ်သား တစ်ဦးက ကြောက်ရွံ့စွာဖြင့် ဒူးထောက်ကာ ပြောလိုက်သည်။ "ဂိုဏ်းချုပ်ကြီး... ကျနော်မျိုးကို ခွင့်လွှတ်ပါ။ စုံစမ်းစစ်ဆေးပြီးနောက်မှာ ကျနော် သံသယဖြစ်မိတာကတော့ အဲဒီလမ်းကြုံ မိစ္ဆာလမ်းစဉ်ကျင့်ကြံသူဟာ ကျနော်တို့ဂိုဏ်းက မဟုတ်ဘဲ ကျွန်တော်တို့ဂိုဏ်းရဲ့ အဆင့်မြင့်အကြီးအကဲ တစ်ယောက်အဖြစ် ဟန်ဆောင်နေတဲ့ တခြားလူတစ်ယောက် ဖြစ်ဖို့ များပါတယ်"

"ပေါက်ကရ လူတစ်ယောက်ကိုတော့ ဟန်ဆောင်လို့ ရနိုင်ပေမဲ့ ယင်ကိုးပါး အရိုးဖြူလက်သည်းဆိုတာ ငါတို့ဂိုဏ်းရဲ့ အဆင့်မြင့်အကြီးအကဲတွေပဲ ကျင့်ကြံနိုင်တဲ့ လျှို့ဝှက်ကျင့်စဉ်ပဲ။ အဲဒါကိုရော ဟန်ဆောင်လို့ ရနိုင်လို့လား"

ထျန်းယင်ဂိုဏ်းချုပ်သည် ၎င်းကို ကြားသောအခါ ဒေါသထွက်သွားသော်လည်း၊ နောက်မှ ပြန်စဉ်းစားကြည့်သောအခါ အကျိုးအကြောင်း ဆီလျော်သည်ဟု ခံစားလိုက်ရသည်။ သူ၏ အကြည့်မှာ ချက်ချင်းပင် အေးစက်သွားကာ ပတ်ဝန်းကျင်ကို ကြည့်ပြီး ပြောလိုက်သည်။ "ယင်ကိုးပါး အရိုးဖြူလက်သည်း ဆိုတာ ငါတို့ဂိုဏ်းရဲ့ လျှို့ဝှက်ချက်ပဲ။ အဲဒါကို ပေါက်ကြားအောင် လုပ်တဲ့သူ ဘယ်သူမဆို အသေသတ်ရမယ် လက်ဝဲသံတမန် ယန်... ဒီကျင့်စဉ်ကို သိတဲ့သူတွေ အကုန် ဒီမှာ ရှိနေတာလား"

"ဂိုဏ်းချုပ်ကို တင်ပြပါတယ်... အရိုးဖြူလက်သည်း ကျင့်စဉ်ကို သိတဲ့ အဆင့်မြင့်အကြီးအကဲတွေ အားလုံး ဒီမှာ ရှိနေကြပါတယ်၊ ဘယ်သူမှ ပေါက်ကြားအောင် မလုပ်ခဲ့ပါဘူး။ ဒါပေမဲ့ အလောင်းကောက်သခင်မကလွဲရင်ပေါ့..." နောက်ထပ် ယုံကြည်ရသော လက်အောက်ငယ်သား တစ်ဦးက အမြန် ဒူးထောက်လိုက်သည်။

ဤစကားများက ထျန်းယင်ဂိုဏ်းချုပ်၏ မျက်ခုံးကို လှုပ်သွားစေသည်။ "အလောင်းကောက်သခင်မလား၊ ငါ ဘယ်လိုလုပ် မစဉ်းစားမိတာလဲ၊ သူမရဲ့ခင်ပွန်း တုယင် က ငါတို့ဂိုဏ်းရဲ့ အဆင့်မြင့်အအကဲ ဖြစ်သလို အရိုးဖြူလက်သည်း ကျင့်စဉ်ကိုလည်း သိတယ်။ ပြီးတော့ အဲဒီ မိစ္ဆာလမ်းစဉ်ကျင့်ကြံသူကလည်း မြို့တော်မှာ ပေါ်လာခဲ့တာ... ဒီနှစ်ခုက ဆက်စပ်မှု ရှိဖို့ အရမ်းများတယ်။ လက်ဝဲသံတမန် ယန်... မင်း ချက်ချင်း မြို့တော်ကို သွားပြီး အလောင်းကောင်သခင်မကို ရှာပါ၊ ပြီးတော့ ဒီကိစ္စကို စုံစမ်းစမ်း"

လက်ဝဲသံတမန် ယန်၏ မျက်နှာမှာ ပျက်သွားသည်။ ယခုကဲ့သို့ အချိန်မျိုးတွင် မြို့တော်သို့ သွားခြင်းမှာ မိစ္ဆာနှိမ်နင်းရေးဌာန၏ လက်ထဲသို့ ကိုယ်တိုင် သွားအပ်သလို ဖြစ်မနေဘူးလား။

ယန်က အမြန် ဆင်ခြေပေးလိုက်သည်။ "ဂိုဏ်းချုပ်ကြီး... ကျနော်မျိုးကို ခွင့်လွှတ်ပါ။ မြို့တော် အခြေစိုက်စခန်း ပျက်စီးသွားကတည်းက အလောင်းကောင်သခင်မ ပျောက်ဆုံးနေတာပါ။ သူမ အသက်ရှင်နေသေးလား၊ သေသွားပြီလားတောင် မသိရတာကို ကျနော်မျိုး ဘယ်လို ရှာရမလဲ"

"ဟားဟားဟား... အဲဒါအတွက် စိတ်မပူပါနဲ့။ အလောင်းကောင်သခင်မက ငါတို့ဂိုဏ်းရဲ့ အထွတ်အမြတ်ထားတဲ့ ရေစွမ်းအင်ပုလဲကို ယူသွားတာလေ။ အဲဒါက အရှိန်အဝါကို ဖုံးကွယ်ရာမှာ အရမ်းတော်တယ်။ မဟာဆရာသခင် တစ်ယောက်က လက်မလှုပ်သရွေ့ သူမကို ဘယ်သူမှ မသတ်နိုင်ဘူး"

"သူမကို ဘယ်လိုရှာရမလဲ ဆိုတာကလည်း လွယ်ပါတယ်…”

အခန်း (၄၂)

ဧကရာဇ်အိုကြီး

"လက်ဝဲသံတမန် ယန်... ငါအခု မင်းကို ငါတို့ဂိုဏ်းရဲ့ ဒုတိယမြောက် အထွတ်အမြတ် ရတနာကို ထပ်မံ ပေးအပ်မယ်။ ဒီရတနာသာ ရှိရင် အဲဒီ အလောင်းကောင်သခင်မက ပြာဖြစ်သွားရင်တောင် မင်း သူမကို ရှာတွေ့နိုင်ရမယ်”

"စုံစမ်းတာတွေ ပြီးသွားပြီဆိုရင်တော့ ငါကိုယ်တိုင် လက်လှုပ်ပြီး သူ့ရဲ့ အရေခွံကို ခွာမယ်၊ အကြောတွေကို ဆွဲထုတ်မယ်၊ ပြီးတော့ ငါ့ရင်ထဲက အာဃာတတွေ ပြေပျောက်သွားအောင် သူ့ကို အပိုင်းပိုင်း အတစ်တစ် ခုတ်ထစ်ပစ်မယ်... အား..."

ထျန်းယင်ဂိုဏ်းချုပ်သည် မြေအောက်နန်းတော်အတွင်း၌ ရူးသွပ်စွာ ဟိန်းဟောက်နေစဉ်...

နန်းတော်အတွင်း၌ တိတ်ဆိတ် ငြိမ်သက်နေသော နန်းဆောင်တစ်ခုတွင် မျက်နှာကို ကောင်းစွာ မမြင်ရသော အဖိုးအိုတစ်ဦး ထိုင်နေသည်။ သူသည် အဆက်မပြတ် ချောင်းဆိုးနေပြီး သူ၏ ခန္ဓာကိုယ်မှ ထူးခြားသော ဆေးနံ့များ ထွက်ပေါ်နေသည်။

ထိုအချိန်တွင် ဆံပင်ဖြူဖြူနှင့် မိန်းမစိုးကြီးသည် လှေကားခြေရင်းတွင် ပျာပျာသလဲ ဒူးထောက်ကာ အကြိမ်ကြိမ် ဦးတိုက်နေသည်။ "ကျနော်မျိုးတို့ အပြစ်ပါ၊ ကျနော်မျိုးတို့ အပြစ်ပါ ဘုရား..."

"တော်ပြီ... ထတော့။ လူဆိုတာ တစ်နေ့တော့ အိုရမှာပဲ၊ ဒါက ကံကြမ္မာပဲ၊ မင်းအပြစ် မဟုတ်ဘူး။ ဒါနဲ့... မြို့စောင့်အကျဉ်းဌာနကို ပို့လိုက်တဲ့ ဧကရာဇ်အမိန့်တော် ကိစ္စက ဘယ်လိုလဲ ချူရွှမ် ဆိုတဲ့ အဲဒီ ကွပ်မျက်သူက တကယ်ပဲ အသုံးဝင်ရဲ့လား"

"ဒါကတော့..."

ဆံပင်ဖြူ မိန်းမစိုးသည် အနည်းငယ် တွန့်ဆုတ်သွားပြီး ခေတ္တစဉ်းစားကာ ဦးတိုက်၍ လျှောက်တင်လိုက်သည်။ "ကျနော်မျိုးရဲ့ စမ်းသပ်ချက်အရတော့ ချူရွှမ်ရဲ့ ကိုယ်ခံပညာ အဆင့်အတန်းဟာ လူသားအဆင့် ကိုးလွှာသာ ရှိပါသေးတယ်၊ အမှန်အတိုင်း ပြောရရင် ပြောပလောက်စရာ မရှိပါဘူး ဘုရား”

"ဒါ့အပြင် ဒီလူဟာ ကောင်းကင်ဓားမ ချန်ထားခဲ့တဲ့ ပြိုင်ဘက်ကင်း ကျိန်စာလက်နက်ဆိုးကြီးကို ကံကောင်းထောက်မစွာ ရရှိထားတာမို့ ကြိုးကြိုးစားစား ကျင့်ကြံပြီး အဆင့်တက်အောင် လုပ်သင့်တာပါ။ ဒါပေမဲ့ ကျနော်မျိုး စုံစမ်းရသလောက်တော့ ဒီကောင်လေးဟာ အပေါ်ယံမှာ သတ္တိရှိပုံရပေမဲ့ တကယ်တမ်းတော့ အောက်တန်းကျပြီး ဧကရာဇ်ရဲ့ အာဏာကိုတောင် ရိုသေမှု မရှိပါဘူး။ ပိုပြီး ရယ်စရာကောင်းတာက ဒီကောင်လေးဟာ ကောင်းကင်ဘုံအကျဉ်းထောင်မှာ နေ့တိုင်း အလုပ်လုပ်နေပေမဲ့ ကွပ်မျက်တာကလွဲရင် ကျန်တဲ့အချိန်တွေမှာ အလုပ်ကို ပစ်ထားပြီး အပျော်အပါးပဲ လိုက်နေပါတယ်။ ကြိုးစားပြီး ကျင့်ကြံချင်တဲ့ စိတ်ဓာတ် အနည်းငယ်မှ မရှိပါဘူး ဘုရား”

"ဒါကြောင့် ကျနော်မျိုးရဲ့ သုံးသပ်ချက်အရဆိုရင် ဒီကောင်လေးဟာ အရေးပါတဲ့ နေရာမှာ သုံးလို့မရနိုင်သလို၊ ကွပ်မျက်သူရဲ့ လမ်းဆုံးကိုလည်း သိပ်ပြီး ဝေးဝေးရောက်နိုင်မှာ မဟုတ်ပါဘူး”

ထိုစကားများကို ကြားသောအခါ အဖိုးအိုကြီးသည် သက်ပြင်းတစ်ချက်ချကာ ခေါင်းခါလိုက်သည်။ "ဒါဆိုရင်လည်း ဒီကောင်လေးက ကုသိုလ်အနည်းငယ် ရခဲ့ဖူးပေမဲ့ တကယ်တမ်း ပျိုးထောင်ပေးရမယ့် ပါရမီရှင်တော့ မဟုတ်ဘူးပေါ့။ သူ့ကို ဆက်ထားတာဖြစ်စေ၊ စွန့်ပစ်လိုက်တာဖြစ်စေ ဘာမှ ထူးမှာ မဟုတ်ဘူး"

"နောက်ဆုံးတော့ ငါလည်း အိုလှပြီ... ဒီသန်းပေါင်းများစွာ ကျယ်ဝန်းတဲ့ အင်ပါယာကြီး တဖြည်းဖြည်း မှေးမှိန်လာတာကိုပဲ ကြည့်နေရတော့မယ်။ တကယ့် အစွမ်းထက်တဲ့လူတွေကို ရှာမတွေ့နိုင်တော့ဘူးလား... အဟွတ် အဟွတ် အဟွတ်..."

လှေကားပေါ်မှ ပြင်းထန်သော ချောင်းခြောက်ဆိုးသံများ ထပ်မံ ထွက်ပေါ်လာသည်။

ဆံပင်ဖြူ မိန်းမစိုးက အမြန် ဦးတိုက်လိုက်ကာ "အရှင်မင်းကြီး... ကျန်းမာရေးကို ဂရုစိုက်ဖို့က အဓိကပါ။ ချူရွှမ်ကို ပျိုးထောင်လို့ မရဘူးဆိုရင်လည်း ထားလိုက်ပါတော့။ ကျွန်တော်မျိုးတို့ မဟာချင်အင်ပါယာရဲ့ မိစ္ဆာနှိမ်နင်းရေးဌာနနဲ့ မြို့စောင့်အကျဉ်းဌာနမှာ လူငယ်ပါရမီရှင်တွေ အများကြီး ရှိပါသေးတယ်။ စိတ်ရှည်ရှည်နဲ့ ရှာဖွေမယ်ဆိုရင် ပျိုးထောင်လို့ရမယ့် လူတွေ အများကြီး တွေ့မှာပါ”

"လက်ယာအမတ်ချုပ် ကိစ္စကိုတော့ ကျနော်မျိုး သွားပြောပေးပါ့မယ်။ လက်ယာအမတ်ချုပ်က အရှင်မင်းကြီးအပေါ် အမြဲတမ်း သစ္စာရှိခဲ့တာမို့ ကွပ်မျက်သူ တစ်ယောက်အတွက်နဲ့ အရှင်မင်းကြီးနဲ့ စိတ်ဝမ်းကွဲမှာ မဟုတ်ပါဘူး။ ဒါ့အပြင် ဒီကောင်လေးကလည်း ပျက်စီးမယ့်လမ်းကို ရွေးထားတာဆိုတော့ မတော်တဆ စောစောစီးစီး သေသွားရင်တောင် သူ ဘာမှ ပြောနိုင်မှာ မဟုတ်ပါဘူး”

ဆံပင်ဖြူ မိန်းမစိုးက စကားအဆုံးတွင် သူ၏ အကြည့်မှာ ထူးဆန်းသော အရိပ်အယောင်တစ်ခု ပေါ်လာကာ နောက်တစ်ကြိမ် ဦးတိုက်လိုက်ပြန်သည်။

ဤစကားများက အဖိုးအိုကြီးကို စိတ်သက်သာရာ ရသွားစေပုံရသဖြင့် သူသည် ခေါင်းကို အနည်းငယ် ငြိမ့်လိုက်ကာ။ "ဒါဆိုရင်လည်း အဲဒီကိစ္စကို လက်ဝဲအမတ်ချုပ် တင်ပြထားတဲ့အတိုင်းပဲ လုပ်လိုက်တော့။ နောင်ကို ဒီလိုကိစ္စသေးသေးလေးတွေနဲ့ ငါ့ကို လာမနှောင့်ယှက်နဲ့တော့။ ငါ အိုပြီ... အင်ပါယာအတွက်တောင် ငါ့မှာ အလိုရှိပေမဲ့ အင်အား မရှိတော့ဘူး၊ သာမန် ကွပ်မျက်သူ တစ်ယောက်အကြောင်းကိုတော့ ထားလိုက်ပါတော့”

"သွားကြတော့”

အဖိုးအိုက လက်ဝှေ့ယမ်းလိုက်ရာ ကျယ်ဝန်းလှသော နန်းဆောင်ကြီးသည် ချက်ချင်းပင် တိတ်ဆိတ်သွားတော့သည်။

နောက်ရက်အနည်းငယ်အတွင်း ကောင်းကင်ဘုံအကျဉ်းထောင်တွင် ထူးထူးခြားခြား ဘာမှ မဖြစ်ခဲ့ပေ။

ချူရွှမ်သည် သူ၏ ပုံမှန်အတိုင်း အလုပ်ကို ပစ်ထားပြီး အေးအေးလူလူ နေထိုင်သည့် ဘဝထဲသို့ ပြန်ရောက်သွားခဲ့သည်။ အခြားတစ်ဖက်တွင်မူ ကျန်းလုံ နှင့် ကျောက်ဟူ တို့မှာ အလွန် အလုပ်များနေကြသည်။ သူတို့သည် ကိုယ်ခံပညာကို ကြိုးစားလေ့ကျင့်နေကြသလို ကောင်းကင်ဘုံအကျဉ်းထောင်၏ အထွေထွေကိစ္စများကိုလည်း ကိုင်တွယ်နေကြရသည်။

အထူးသဖြင့် ပြီးခဲ့သည့်အကြိမ်က ကောင်းကင်ဘုံအကျဉ်းထောင်၏ မော်ကွန်းတိုက် မီးလောင်သွားသဖြင့် မြို့စောင့်အကျဉ်းဌာနသည် အကျဉ်းသား သတင်းအချက်အလက် အမြောက်အမြား ဆုံးရှုံးခဲ့ရရာ ၎င်းတို့ကို အသစ် ပြန်လည် မှတ်ပုံတင်ရန် လိုအပ်နေသည်။

ထိုအကြောင်းကြောင့်...

တစ်နေ့တွင် ကျန်းလုံနှင့် ကျောက်ဟူတို့သည် ချူရွှမ်ကို လာရှာကြသည်။ "ညီအစ်ကိုရွှမ်... ဒီနေ့ အားလား ကျနော်တို့ ကောင်းကင်ဘုံအကျဉ်းထောင်ရဲ့ ဆဋ္ဌမမြောက် အထပ်အောက်ကို သွားပြီး အကျဉ်းသားတွေကို အသစ်ပြန်ပြီး မှတ်ပုံတင်မလို့။ ထောင်ထဲမှာ ဆက်ထားသင့်တဲ့သူကို ထားမယ်၊ သတ်သင့်တဲ့သူကိုတော့ သတ်ဖို့ စာရင်းလုပ်မယ်။ ဒါမှ ညီအစ်ကိုရွှမ်လည်း စောစောစီးစီး ကွပ်မျက်ရမှာလေ”

ကွပ်မျက်ရမည်ဟု ကြားလိုက်ရသောအခါ...

ချူရွှမ်၏ စိတ်ဓာတ်မှာ ချက်ချင်းပင် တက်ကြွသွားတော့သည်။

နောက်ဆုံးတော့ မိစ္ဆာတွေကို နေ့တိုင်း သတ်ခွင့်ရတာ မဟုတ်ပေမဲ့ မိစ္ဆာလမ်းစဉ်ကျင့်ကြံသူအချို့ကို ရံဖန်ရံခါ သတ်ဖြတ်ခြင်းကလည်း ကျင့်ကြံမှု သက်တမ်း အတော်အတန် ရရှိနိုင်သည် မဟုတ်ပါလား။ ချူရွှမ်သည် ချက်ချင်းပင် သူတို့နှစ်ဦးနောက်သို့ လိုက်ကာ ကောင်းကင်ဘုံအကျဉ်းထောင်၏ ဆဋ္ဌမထပ်သို့ ဆင်းသွားခဲ့သည်။

ကျန်းလုံနှင့် ကျောက်ဟူတို့က သူတို့၏ အရာရှိတံဆိပ်များကို ပြသလိုက်ကြသည်။ သူတို့သည် ချောချောမွေ့မွေ့ပင် အတွင်းသို့ ဝင်သွားနိုင်ခဲ့ကြသည်။

ချူရွှမ်သည် ထုံးစံအတိုင်း အရှိန်အဝါ အာရုံခံခြင်းမှတစ်ဆင့် အကျဉ်းသားများ၏ ကျင့်ကြံမှု အဆင့်အတန်းကို အာရုံခံကြည့်လိုက်သည်။ ခဏကြာ စောင့်ကြည့်ပြီးနောက် ချူရွှမ် အနည်းငယ် စိတ်ပျက်သွားရသည်။ ဆဋ္ဌမထပ်တွင် ချုပ်နှောင်ထားသော မိစ္ဆာအများစုမှာ လူသားအဆင့် ကိုးလွှာ သာ ရှိကြပြီး နတ်အဆင့်ပညာရှင် တစ်ယောက်မှ မရှိပေ။ သူတို့ကို သတ်လျှင်ပင် ကျင့်ကြံမှု သက်တမ်း အများကြီး ရလိမ့်မည် မဟုတ်ပေ။

ထို့အပြင် မြို့စောင့်အကျဉ်းဌာနတွင် ၎င်း၏ စည်းမျဉ်းများ ရှိသည်။ ကောင်းကင်ဘုံအကျဉ်းထောင်ရှိ အကျဉ်းသားများကို စိတ်ကြိုက် သတ်၍မရပေ။ သူတို့အနက် အများစုမှာ တန်ဖိုးအချို့ ရှိနေသေးသလို၊ အချို့မှာ တရားရေးဝန်ကြီးဌာန၏ စစ်ဆေးမှုကို စောင့်ဆိုင်းပြီးမှ ကွပ်မျက်ရန် ဆုံးဖြတ်ရခြင်း ဖြစ်သည်။

မိစ္ဆာများသာ ချွင်းချက်ဖြစ်သည်။ သူတို့ကို မြို့စောင့်အကျဉ်းဌာနက ဖမ်းမိပြီဆိုလျှင် ပုံမှန်အားဖြင့် ဖမ်းမိသည့်နေ့မှာပင် ခေါ်လာလေ့ရှိပြီး ရက်အနည်းငယ်အကြာ မင်္ဂလာရှိသော နေ့တစ်နေ့တွင် တိုက်ရိုက် ကွပ်မျက်ပစ်လေ့ ရှိသည်။

ဤသို့ဖြင့် လမ်းလျှောက်ရင်း ဆဋ္ဌမထပ်ရှိ အကျဉ်းသားများကို စစ်ဆေးခြင်းမှာ ပြီးဆုံးလုနီးပါး ဖြစ်သွားသည်။ ကျန်းလုံနှင့် ကျောက်ဟူတို့ကလည်း ပုံဆွဲကာ အသစ်ပြန်လည် မှတ်ပုံတင်နေကြသည်။

ရုတ်တရက်... ချူရွှမ်သည် သူ၏ နှာခေါင်းမှတစ်ဆင့် အလွန် ထူးခြားသော အရှိန်အဝါတစ်ခုကို ခံစားလိုက်ရသည်။ ထိုအရှိန်အဝါမှာ ပြင်းထန်လွန်းခြင်းလည်း မရှိသလို အားနည်းလွန်းခြင်းလည်း မရှိပေ။

ချူရွှမ်၏ အကြည့်မှာ ဆဋ္ဌမထပ်၏ နောက်ဆုံး အကျဉ်းခန်းဆီသို့ အလိုအလျောက် ရောက်သွားသည်။ ထိုနေရာတွင် လူတစ်ယောက်သည် အကျဉ်းခန်း၏ အရိပ်ထဲတွင် နံရံကို မျက်နှာမူကာ ထိုင်နေသည်ကို သူ တွေ့လိုက်ရသည်။ နံရံတစ်ခုလုံးမှာ သွေးဖြင့် ရေးထားသော 'သတ်' ဟူသော စာလုံးများဖြင့် ပြည့်နှက်နေသည်။

သူ၏ ကျောပြင်တွင်လည်း အမာရွတ်များစွာ ရှိနေသည်။ အကျဉ်းထောင်စောင့်များ ချဉ်းကပ်လာသည်ကို အာရုံခံမိပုံရသဖြင့် သူသည် ရုတ်တရက် လှည့်ကြည့်လိုက်ရာ၊ ကြောက်စရာကောင်းပြီး ရုပ်ပျက်ဆင်းပျက် ဖြစ်နေသော မျက်နှာကြီး ပေါ်လာသည်။ "အသား... အသားတွေ အများကြီးပဲ၊ ငါ အသားစားချင်တယ်"

ကျန်းလုံနှင့် ကျောက်ဟူတို့က ချက်ချင်းပင် တံတွေးထွေးလိုက်ကြသည်။ "ဒီ သစ္စာဖောက် ဗိုလ်ချုပ်ကြီးက အခုထိ အသားစားချင်နေတုန်းပဲလား ဟောဒီမှာ လမ်းဘေးကြွက်တစ်ကောင် ရှိတယ်၊ မင်း စားချင်လား"

ဖြန်း

ထိုစဉ်မှာပင် ကြွက်တစ်ကောင်သည် အကျဉ်းခန်းအနားမှ ဖြတ်ပြေးသွားရာ ကျန်းလုံက ကန်ထည့်လိုက်သည်။ ထိုသန်မာသော လူကြီး၏ ကြောက်စရာကောင်းသော မျက်လုံးများမှာ ချက်ချင်းပင် အရောင်တောက်သွားသည်။ သူသည် အော်ဟစ်နေဆဲဖြစ်သော အရှင်လတ်လတ် ကြွက်ကို လျင်မြန်စွာ ဖမ်းယူကာ ပါးစပ်ထဲသို့ တစ်လုတ်တည်း ထည့်လိုက်တော့သည်။

သူသည် ကြွက်ကို အရှင်လတ်လတ် မျိုချပစ်လိုက်ခြင်းပင်။

ချူရွှမ် ကြည့်ရင်းနှင့်ပင် ဦးရေပြားများ ထုံကျင်သွားရသည်။ ကျန်းလုံနှင့် ကျောက်ဟူတို့မှာလည်း ပျို့အန်ချင်သလို ဖြစ်သွားကြသည်။ "ဒီ လူသားစား မိစ္ဆာက ပိုပိုပြီး ရွံစရာကောင်းလာပြီ။ ပြီးတော့ ဒီကောင်းကင်ဘုံအကျဉ်းထောင်ထဲမှာ ကြွက်တွေကလည်း အရင်ထက် ပိုများလာသလိုပဲ။ မှတ်ပုံတင်တာ ပြီးရင် မြန်မြန် ထွက်သွားမှ ဖြစ်မယ်”

ထိုသို့ ပြောဆိုပြီးနောက် သူတို့သည် အရာရှိစာရွက်ပေါ်တွင် ကြမ်းကြမ်းတမ်းတမ်း ပုံဆွဲကာ မှတ်ပုံတင်လိုက်ကြသည်။ အကျဉ်းသား မှန်ကန်ကြောင်း အတည်ပြုပြီးနောက် သူတို့သည် လှည့်၍ အမြန် ထွက်ခွာသွားကြတော့သည်။ အကျဉ်းခန်းအတွင်းမှာတော့ ထိုလူသည် သူ၏ ပါးစပ်မှ ကြွက်မြီးတစ်ချောင်းကို ဆွဲထုတ်လိုက်ရင်း တစ္ဆေတစ်ကောင်ကဲ့သို့ ရူးသွပ်စွာ ရယ်မောနေတော့သည်။

ချူရွှမ်သည် ထိုခဏ၌ ကောင်းကင်ဘုံ ပြစ်ဒဏ်ခတ်ခြင်း ရတနာ အနည်းငယ် တုန်ခါသွားသည်ကို ခံစားလိုက်ရသည်။ သိသာလှသည်မှာ ဤသူသည်လည်း အပြစ်ကြီးမားသူတစ်ဦးပင် ဖြစ်သည်။

ထို့အပြင် သူ၏ အရှိန်အဝါကို အာရုံခံကြည့်ပြီးနောက် ချူရွှမ်သည် ဤသူမှာ တကယ်တမ်းတွင် နတ်အဆင့်ပညာရှင် တစ်ဦး ဖြစ်နေသည်ကို အံ့ဩဖွယ် တွေ့ရှိလိုက်ရသည်။ သို့သော် သူ၏ ဒဏ်ရာမှာ အလွန် ပြင်းထန်လွန်းလှသဖြင့် သူ၏ အရှိန်အဝါမှာ အားကောင်းလိုက်၊ အားနည်းလိုက် ဖြစ်နေခြင်းပင်။

ချူရွှမ်သည် သူတို့ကို သတိပေးချင်သော်လည်း မိမိကိုယ်ကိုယ် ဖော်ပြမိမှာကို စိုးရိမ်နေသည်။ နောက်ဆုံးတော့ လက်ရှိ မိစ္ဆာနှိမ်နင်းရေးဌာနမှာ မျက်လုံးနီကြီးတွေနှင့် လမ်းကြုံ မိစ္ဆာလမ်းစဉ်ကျင့်ကြံသူကို လိုက်ရှာနေသလို၊ အကျဉ်းထောင်မှူး ဝမ်ရှန့်ကလည်း တိတ်တဆိတ် စုံစမ်းမှုတွေ လုပ်နေသည် မဟုတ်ပါလား။

ဤကဲ့သို့ အချိန်မျိုးတွင် သူသာ သတိမထားလျှင် မိနစ်ပိုင်းအတွင်း သူ၏ အမှန်တရား ပေါက်ကြားသွားနိုင်သည်။ ချူရွှမ်သည် ဘာမှ မသိသလို ဟန်ဆောင်ကာ မေးလိုက်သည်။ "အဲဒီ အကျဉ်းခန်းထဲမှာ ရှိနေတဲ့သူက ဘယ်သူလဲ သူက ဘာအပြစ် လုပ်ထားတာလဲ"

ကျောက်ဟူက ခနဲ့တဲ့တဲ့ ရယ်လိုက်သည်။ "ဟီးဟီး... ညီအစ်ကိုရွှမ်၊ ဒါကို မေးတာ လူမှန်ကို မေးတာပဲ။ ကျနော် မပြောပြရင် ခင်ဗျား သိမှာ မဟုတ်ဘူး၊ ဒါပေမဲ့ ပြောပြလိုက်ရင်တော့ ခင်ဗျား တကယ်ကို ထိတ်လန့်သွားလိမ့်မယ်လို့ ကျနော် အာမခံတယ်”