အထူးတည်ရှိမှု ပေါ်ထွက်လာခြင်း

ယန်ချင်းသည် တခဏမျှ အသံတိတ်ဆုတောင်းပြီးနောက် ထုံးစံအတိုင်း သူ၏ဝတ်ရုံများကို သပ်ရပ်သွားစေရန် ဆွဲဆန့်လိုက်လေ၏။ ထိုသို့လုပ်ဆောင်နေစဉ် သူဝတ်ဆင်ထားသည်မှာ သူတော်စင်အဆင့် ရတနာတစ်ခုဖြစ်သည်ဟူသော အချက်ကိုမူ လုံးဝ လျစ်လျူရှုထားလေသည်။

ထိုမျှ မြင့်မားလှသော အဆင့်ရှိသည့် ဝတ်ရုံတစ်ခုတွင် တွန့်ကြေရာများ ရှိနေစရာအကြောင်းမရှိပေ။

သို့သော်လည်း ယင်းက အရေးမကြီးချေ။ ဝတ်ရုံကို သပ်ရပ်အောင် ပြင်ဆင်ခြင်းမှာ ခေတ်အဆက်ဆက် ကျင့်သုံးလာခဲ့ကြသည့် ရှေးဟောင်းအစဉ်အလာတစ်ခု ဖြစ်ပေရာ သူကဲ့သို့ လူတစ်ယောက်အနေဖြင့် ဤမျှ လေးစားဖွယ်ကောင်းသော အစဉ်အလာတစ်ခုကို မည်သို့ ချိုးဖောက်ဝံ့မည်နည်း။

သူ၏ဝတ်ရုံများ သေချာစွာ သပ်ရပ်သွားပြီး သူ၏အမူအရာနှင့် အရှိန်အဝါတို့ကလည်း လက်ရှိအချိန်အခါနှင့် လိုက်ဖက်ညီသွားပြီဟု ခံစားလိုက်ရပြီးနောက် သူသည် စကားစတင်ပြောဆိုရန် ဆုံးဖြတ်လိုက်လေသည်။

သူက ပြောမည့်စကားကို တိုတိုနှင့် လိုရင်းသာပြောရန် ဆုံးဖြတ်ထားသည်။ ပြောမည့်စကား၏ ကြမ်းတမ်းလှသော သဘောသဘာဝနှင့် ပတ်သက်၍မူ နှစ်ပေါင်းများစွာ သူလေ့ကျင့်ထားခဲ့သည့်အတိုင်း အထူးသဖြင့် တရားရုံးတော်ကဲ့သို့သော အင်အားကြီးမားသည့် ရန်သူ့ထံမှ အသက်ရှင်ကျန်ရစ်စေရန် လေ့ကျင့်ထားသည့်အတိုင်း လုပ်ဆောင်ရန် ဆုံးဖြတ်လိုက်လေ၏။

လူအုပ်ကြီးထံသို့ အကြည့်ရောက်သွားချိန်တွင် ယန်ချင်းက "ဖားရတော့မှာပေါ့ " ဟု သူ့ဘာသာ တီးတိုးရေရွတ်လိုက်လေသည်။

“လူကြီးမင်းတို့ အများစု သိကြတဲ့အတိုင်းပါပဲ ကျုပ်က ချမ်းသာကြွယ်ဝတဲ့ မိသားစုကနေ ဆင်းသက်လာခဲ့တာ မဟုတ်ပါဘူး။ ဒီနေ့ ကျုပ်ရရှိထားတဲ့ အောင်မြင်မှုတွေဆိုတာ တရားရုံးတော်ရဲ့ ကူညီစောင်မမှုသာ မပါခဲ့ရင် ဖြစ်လာနိုင်စရာ အကြောင်းမရှိပါဘူး”

“တရားရုံးတော်ကသာ ကျုပ်အတွက် တံခါးဖွင့်မပေးခဲ့ဘူးဆိုရင် ကျုပ်ဟာ ဒီကနေ့ ဒီလိုလူမျိုး ဖြစ်လာမှာ မဟုတ်ပါဘူး။ ဒါ့ကြောင့် ကျုပ် ယန်ချင်းက ကျုပ်နဲ့ မထိုက်တန်တဲ့ ကြင်နာမှုနဲ့ ကျေးဇူးတော်တွေကို ရရှိခဲ့တဲ့အတွက် အတိုင်းထက်လွန် ကျေးဇူးတင်မိပါတယ်။”

“အရှင်တို့က ကျုပ်ကို အဝတ်အစားတွေ ဆင်ယင်ပေးခဲ့တယ်၊ ပညာသင်ကြားပေးခဲ့တယ်၊ ကျုပ်လိုအပ်မှန်းတောင် မသိခဲ့တဲ့ ရည်ရွယ်ချက်တစ်ခုကိုလည်း ပေးအပ်ခဲ့ပါတယ်။ ပြီးတော့ ကျုပ်ကို အကောင်းဆုံးဖြစ်လာစေဖို့ အမြဲတမ်း တွန်းအားပေးခဲ့တဲ့ စီနီယာတွေလည်း ရှိခဲ့ပါတယ်..." ဟု ပြောရင်း ယန်ချင်းက ခေတ္တရပ်တန့်လိုက်လေ၏။

ထိုအချိန်တွင် သူ၏အကြည့်များက အမြဲတမ်း တင်းမာခက်ထန်နေတတ်သည့် မိစ္ဆာအိုကြီး လဲ့ဝေယွမ်ထံသို့ ကျရောက်သွား၏။ ထိုမိစ္ဆာအိုကြီး၏ မျက်နှာပေါ်တွင် အမြဲတမ်း တင်းမာနေတတ်သည့် အမူအရာမျိုး ရှိနေဆဲဖြစ်သော်လည်း ခြွင်းချက်တစ်ခုအနေဖြင့် အပြုံးသဲ့သဲ့လေးတစ်ခုပေါ်လာပြီး သိပ်မကြာခင် ပြန်လည်ပျောက်ကွယ်သွားတော့သည်။

...

ဤသို့ ဖြစ်ပျက်နေစဉ်တွင် ယန်ချင်း၏ မိခင်၊ အဘိုးနှင့် ယန်မျိုးနွယ်စုမှ အခြားသော အကြီးအကဲများကမူ သူ့ကို သတ်ပစ်တော့မည့် အကြည့်များဖြင့် စူးစိုက်ကြည့်နေကြလေ၏။

"မိုင်အာ၊ မင်းက သားကောင်းရတနာလေးကို ပြုစုပျိုးထောင်ခဲ့တာပဲ။ သူက မိသားစုအတွက် ဘယ်လိုပြောရမလဲဆိုတာ သေချာသိတာပဲ "

"မင်းက အဘိုးတစ်ယောက်အနေနဲ့ ကျရှုံးနေပြီပဲ… ယန်ဖန်။ ဒီအဘိုးကြီးကတော့လေ မင်းရဲ့မြေး ဘာတွေပြောနေလဲဆိုတာ ကြည့်စမ်းပါဦး။ တစ်သက်လုံး သူ့ကို အဝတ်အစားမပါဘဲ လိုဏ်ဂူတစ်ခုထဲမှာများ ငါတို့က ပြုစုပျိုးထောင်ခဲ့သလိုလို လူတိုင်းက ထင်ကုန်ကြတော့မှာပဲ "

"အနည်းဆုံးတော့ ဟိုအပေါ်မှာ ငါ့မြေးတစ်ယောက် ရှိနေသေးတယ်လေ မင်းတို့ရဲ့ မြေးတွေကကော ဘယ်ရောက်နေလို့လဲ"

ယန်ဖန်ကလည်း အရှုံးမပေးလိုသဖြင့် လှောင်ပြောင်နေကြသော အကြီးအကဲများကို စကားအချို့ဖြင့် ပြန်လည်‌ချေပလိုက်၏။

မိုင်ဟက သူမနှင့် ယန်ကန်းတို့ဘေးတွင် ထိုင်နေသော အသက်လေးဆယ်ကျော်အရွယ် အမျိုးသားတစ်ဦးကို "ဝမ်လိုင်၊ ရှင် တစ်ချက်လေးတောင် မလှုပ်မိစေနဲ့" ဟု ပြောလိုက်လေ၏။

ထိုအမျိုးသားထံတွင် စာပေပညာရှင်တစ်ဦး၏ အရှိန်အဝါမျိုး ရှိနေပြီး ယင်းနှင့် လိုက်ဖက်သော ခန္ဓာကိုယ်ဖွဲ့စည်းပုံမျိုးလည်း ရှိလေသည်။ သူသည် အရပ်ရှည်ရှည် ပိန်သွယ်သွယ်ဖြစ်ကာ ယန်ချင်းနှင့် ယန်ကန်းတို့ နှစ်ဦးစလုံးနှင့် ရုပ်ဆင်းသဏ္ဌာန် ဆင်တူပေသည်။ သူကား ယန်ချင်းနှင့် ယန်ကန်းတို့၏ ဖခင်ဖြစ်သူ ယန်ဝမ်လိုင်ပင် ဖြစ်ပေသည်။

ယန်ဝမ်လိုင်သည် သူ၏ဇနီးဖြစ်သူထံမှ သဲ့သဲ့မျှ ထွက်ပေါ်လာသော သတ်ဖြတ်လိုသည့် ရည်ရွယ်ချက်ကို ခံစားမိလိုက်သဖြင့် ရှက်ကိုးရှက်ကန်း ပြုံးကာ အလျင်အမြန် ထိုင်ချလိုက်လေသည်။ ဤသည်မှာ နှစ်အနည်းငယ်အတွင်း သူ၏ဖခင်ဖြစ်သူ ယန်ချင်း၏အဘိုး ယန်ဖန်နှင့် အနီးကပ်ဆုံး ရှိနေခဲ့သည့် ပထမဆုံးအကြိမ်ပင် ဖြစ်ပေ၏။

သူသည် ဤအခမ်းအနားကို မတက်ရောက်ရန် တစ်ပိုင်းတစ်စ တွေးတောခဲ့ဖူးသော်လည်း သူ၏ဖခင်က သူ့ကို မည်သို့လုပ်မည်နည်းဟု ကြောက်ရွံ့နေသည့်အရာထက် သူ၏ဇနီးဖြစ်သူထံမှ ပို၍ဆိုးရွားသော ကံကြမ္မာကို ခံစားရမည်ကို သူ ကောင်းကောင်းသိနေပေသည်။

သို့သော်လည်း သူ လာရန် သဘောတူခဲ့လျှင်ပင် အချိန်တစ်လျှောက်လုံး စိတ်မသက်မသာ ဖြစ်နေခဲ့ရပြီး အထူးသဖြင့် သူ၏ဖခင်က ခန္ဓာပြန်လည်မွေးဖွားခြင်းဆေးရည်နှင့် ပတ်သက်၍ သုတေသနပြုလုပ်နေကြောင်း သတင်းရရှိပြီးနောက်တွင် ပို၍ပင် ဆိုးရွားလာခဲ့လေ၏။

သူသည် ဖခင်ဖြစ်သူကို တစ်သက်လုံး ရှောင်ဖယ်နေရန် သို့မဟုတ် မကြာမီ နန်းတော်အဆင့်သို့ ထိုးဖောက်ဝင်ရောက်နိုင်ရန် အသေအချာ ဆုံးဖြတ်ထားပြီးဖြစ်ချေသည်။

ယန်ချင်း၏ အကြည့်များက ရုတ်ရုတ်သဲသဲဖြစ်နေသော သူ၏မိသားစုထံသို့ ရောက်သွားချိန်တွင် အနည်းငယ် ရှက်ရွံ့နေသည့် ယန်ချင်း၏ မျက်နှာထားကို မြင်လိုက်ရသဖြင့် ယန်ကန်းက အားနာဟန်ရှိသော အပြုံးတစ်ခုဖြင့် "တောင်းပန်ပါတယ် အစ်ကိုရာ" ဟု တီးတိုးပြောလိုက်လေ၏။

သူတို့၏အဘိုးဖြစ်သူမှာ အခြားအကြီးအကဲများနှင့် မုတ်ဆိတ်မွေးချင်း ဆွဲနေကြပြီဖြစ်ကာ ဖခင်ဖြစ်သူမှာလည်း မိခင်ဖြစ်သူ၏ တံတောင်ဆစ်ဖြင့် ချုပ်ခြင်းကို ခံရတော့မည့်ပုံ ပေါ်နေပေသည်။

...

ပြဿနာတစ်ခုလုံးကို မြင်လိုက်ရချိန်တွင် ယန်ချင်းက 'ဒီလူတွေက ပြဿနာမရှာဘဲ တစ်ရက်လေးတောင် အေးအေးချမ်းချမ်း နေခွင့်မပေးနိုင်ကြတော့ဘူးလား' ဟု တွေးလိုက်လေသည်။

ထို့နောက် သူသည် မည်သည့်အရာကိုမျှ မသိလိုက်ယောင်ဆောင်ကာ သူ၏မိန့်ခွန်းကိုသာ ဆက်ပြောရန် ဆုံးဖြတ်လိုက်လေ၏။

"ကျုပ်က ငယ်ရွယ်ပြီး ရင့်ကျက်မှု မရှိသေးပါဘူး။ ကျုပ်ရဲ့ ရလဒ်တွေက ဘယ်လောက်ပဲ ကောင်းမွန်နေပါစေ လေ့လာစရာတွေ အများကြီး ကျန်နေသေးတယ်ဆိုတာကို ကျုပ် သိပါတယ်။ ပြီးတော့ ကျုပ်ရဲ့ စီနီယာတွေကလည်း ဆက်လက်ပြီးတော့ ကူညီဖေးမပေးကြဖို့နဲ့ တရားရုံးတော်ရဲ့ သင့်တော်မှန်ကန်တဲ့ တရားသူကြီးတစ်ယောက် ဖြစ်လာအောင် လမ်းညွှန်ပြသပေးကြဖို့ မျှော်လင့်ပါတယ်..."

ဤနေရာသို့ ရောက်ချိန်တွင် သူ၏အကြည့်များက ကြယ်ပုံသဏ္ဌာန် မျက်ဝန်းအိမ်များနှင့် မျက်လုံးတစ်ဖက်စီတွင် သူငယ်အိမ်ငါးခုစီ ပါရှိသော အတွင်းပိုင်းနယ်မြေ တရားရုံးတော် တရားသူကြီး ဟိုထယ်ဟွေ့ထံသို့ အဆင်ပြေပြေပင် ကျရောက်သွားလေသည်။

ထို့နောက် သူ၏အကြည့်များက ရွှေဝါးကျောင်းဆောင်ကို တည်ထောင်သူများထဲမှ တစ်ဦးဖြစ်သည့် လင်းကွေ့ရန် ထိုင်နေသည့်နေရာသို့ ချက်ချင်းဆိုသလို ပြောင်းလဲသွား၏။ သူပေးလိုက်သော အရိပ်အမြွက်မှာ ထိုထက် ပို၍ ပေါ်လွင်နိုင်စရာ အကြောင်းမရှိတော့ပေ။

'စီနီယာကြီး၊ ရွှေဝါးကျောင်းဆောင်ကို စီနီယာ့လက်ထဲပဲ အပ်ထားခဲ့ပါတယ်နော်။ စီနီယာ့ရဲ့ ရုပ်ချောချော ဂျူနီယာလေးက စီနီယာ့အကူအညီကို လိုအပ်နေလို့ပါ။'

"အပြင်ဘက်နန်းတော် တရားရုံးတော် တရားသူကြီးတစ်ယောက် ဖြစ်ရတာက လွယ်ကူမှာ မဟုတ်သလို စိန်ခေါ်မှုတွေနဲ့ တောင်းဆိုမှုတွေ အများကြီး ရှိလာမယ်ဆိုတာကို ကျုပ် သိပါတယ်။ ဒါပေမဲ့ တရားရုံးတော်ရဲ့ စည်းမျဉ်းတွေနဲ့ လမ်းညွှန်ချက်တွေကို သေချာပေါက် လိုက်နာကျင့်သုံးနိုင်ဖို့အတွက် ကျုပ်ကိုယ်တိုင် အစွမ်းကုန် ကြိုးစားသွားမှာပါ။

“ဒီကနေ့ ရောက်လာကြတဲ့သူတွေကိုလည်း ခင်ဗျားတို့ရဲ့ တက်ရောက်မှုအတွက် ကျုပ်အနေနဲ့ နှိမ့်ချစွာနဲ့ အထူးပဲ ကျေးဇူးတင်ရှိပါတယ် ဒါကို ကျုပ် ဘယ်တော့မှ မေ့မှာမဟုတ်ပါဘူး”

“ရှေ့ဆက်လာမယ့် ရက်တွေ၊ လတွေနဲ့ နှစ်တွေမှာ လူကြီးမင်းတို့အားလုံး ကောင်းမွန်တဲ့ သတင်းကောင်းတွေ ရရှိကြပါစေလို့ ဆုတောင်းပေးပါတယ်။ ပြီးတော့ အမှောင်မိုက်ဆုံး အချိန်တွေမှာတောင် တရားရုံးတော်က လူကြီးမင်းတို့ကို ကာကွယ်စောင့်ရှောက်ပေးနိုင်ပါစေ”

“အားလုံးကို ကျေးဇူးတင်ပါတယ်" ဟု ပြောလိုက်ရင်း ယန်ချင်းက ကိုးဆယ်ဒီဂရီ ဦးညွှတ်အရိုအသေပေးလိုက်လေ၏။

သူသည် ထိုအနေအထားအတိုင်း အသက်ဆယ်ရှိုက်ခန့်ကြာအောင် နေပြီးနောက် ခေါင်းမော့လိုက်၏။

သူ ထိုသို့ပြုလုပ်လိုက်သည်နှင့် တစ်ပြိုင်နက် သိမ်မွေ့ညင်သာသော အသံတစ်ခု ထွက်ပေါ်လာလေ၏။

"ယန်ချင်းရဲ့ ရာထူးတိုးမြှင့်ခြင်းကို အသိအမှတ်ပြုပါတယ်။ ခွင့်ပြုတယ်… ပြီးတော့ ချီးကျူးဂုဏ်ပြုပါတယ်”

“အစစအရာရာ အဆင်ပြေပါစေ လူငယ်လေး”

“ရှောင်ယဲ့ ငါတို့ရဲ့ မိတ်ဆွေတွေကို ပြုစုစောင့်ရှောက်ဖို့ မင်းကို တာဝန်ပေးခဲ့မယ်။ စုလီချူးကလည်း ငါ့ကိုယ်စား တက်ရောက်ပေးပါလိမ့်မယ်။ ကဲ ဒါဆိုရင် ငါ သွားလိုက်ဦးမယ်၊ ဂရုစိုက်ကြပါဦး”

ထိုအသံ ပေါ်လာချိန်တွင် လူများမှအစ ကောင်းကင်၊ မြေကြီးနှင့် ဝိညာဉ်ချီများအပါအဝင် ဧရိယာတစ်ခုလုံးရှိ အရာခပ်သိမ်းသည် စိတ်လှုပ်ရှားမှုကြောင့် တုန်ခါသွားသကဲ့သို့ ဖြစ်သွားခဲ့ပြီး အသံပျောက်ကွယ်သွားချိန်တွင်မှ ပုံမှန်အတိုင်း ပြန်လည်ဖြစ်သွားလေ၏။

လူအုပ်ကြီးအပေါ် သက်ရောက်သွားသည့် အသံတစ်ခုတည်း၏ လွှမ်းမိုးနိုင်မှုကို အကဲခတ်လိုက်ရင်း ယန်ချင်းက 'ဥက္ကဋ္ဌကတော့ ဥက္ကဋ္ဌပါပဲလား။' ဟု လေးစားစွာဖြင့် သူ့ဘာသာ တွေးလိုက်လေ၏။

တရားရုံးတော်၏ ဥက္ကဋ္ဌဆိုသည်မှာ အဖွဲ့အစည်းတစ်ခုလုံးကို ဦးဆောင်နေသည့် ပုဂ္ဂိုလ်ဖြစ်သော်လည်း သူ့ကို မြင်ဖူးသူဟူ၍ အလွန်နည်းပါးလှပေသည်။ သူ၏လိင်အမျိုးအစားကိုသာ သိရှိရပြီး နာမည်အပါအဝင် အခြားသောအရာအားလုံးမှာမူ လျှို့ဝှက်နက်နဲမှုများဖြင့် ဖုံးလွှမ်းနေလေ၏။

ယန်ချင်းက တစ်ခါတစ်ရံတွင် ယင်းက အကြောင်းပြချက်တစ်ခုခုကြောင့်များလား သို့မဟုတ် တောင်ပိုင်းတိုက်ကြီးအတွင်းရှိ မရေမတွက်နိုင်သော အဖွဲ့အစည်းများကို ထိန်းချုပ်ဟန့်တားထားနိုင်ရန်အတွက် လျှို့ဝှက်နက်နဲမှုများဖြင့် ပြည့်နှက်နေသည့် မှန်းဆ၍မရသော ပုဂ္ဂိုလ်တစ်ဦးအဖြစ် ဖန်တီးရန် တွက်ချက်ထားသော လှုပ်ရှားမှုသက်သက်လားဟု တွေးတောမိတော့သည်။