အခန်း (၇၂၉-၇၃၀)

အပိုင်း (၇၂၉) စစ်တပ်ဆီသို့ တစ်ဖန်ပြန်လည်ရောက်ရှိခြင်း

"အစ်ကိုလင်း... ကျွန်တော် အစ်ကိုနဲ့ အတူလိုက်ခဲ့မယ်"

ကျောက်ခိုင်က ချက်ချင်း ပြောလိုက်သည်။

လီချင်းဟွာကလည်း ပြောလိုက်၏ "ကျွန်တော်လည်း အတူလိုက်ခဲ့မယ်... ဘာပဲဖြစ်ဖြစ် အဲဒီနေရာက တိမ်မြူကျွန်းလေ... စစ်တပ်ရဲ့ အဓိက အချက်အချာကျတဲ့ နေရာပဲ"

လင်းယွမ်က ပြုံးလိုက်ပြီး သူတို့နှစ်ယောက်၏ စိုးရိမ်ပူပန်မှုကို သဘာဝကျကျပင် နားလည်သဘောပေါက်သည်။

တိမ်မြူကျွန်းက စစ်တပ်၏ အဓိက အခြေစိုက်စခန်းဖြစ်ရာ ဖုန်းကျန့်ကုန်းနှင့် ကျန်းယွီကျန်းတို့လို အဆင့်ရှိသည့် မျိုးရိုးဗီဇ ပြန်လည်ဖွဲ့စည်းခြင်း အစွမ်းပိုင်ရှင်များ ရှိနေသည်ကတော့ ဆိုဖွယ်ရာပင် မရှိတော့ပေ။

ထို့အပြင် သန္ဓေပြောင်းစွမ်းအင်သုံး လက်နက်ကိရိယာများလည်း အမြောက်အမြား ရှိနေသေးသည်။

အကယ်၍ ဖုန်းကျန့်ကုန်းနှင့် ကျန်းယွီကျန်းတို့ကသာ မသမာသော စိတ်ကူးများရှိပြီး လင်းယွမ်အပေါ် အကြံအစည်ဆိုးများဖြင့် တိုက်ခိုက်လာပါက တကယ့်ကို အန္တရာယ်ကြီးမားလှသည်။

သို့သော် လင်းယွမ်ကမူ ခေါင်းယမ်းကာ ငြင်းဆန်လိုက်သည် "မလိုပါဘူး... ဖုန်းကျန့်ကုန်းနဲ့ ကျန်းယွီကျန်းက လူမိုက်တွေ မဟုတ်ကြဘူး... ဒီလိုအချိန်မှာ ငါနဲ့ မျက်နှာပျက်တာက သူတို့အတွက် ဘာအကျိုးကျေးဇူးမှ ရှိမှာ မဟုတ်ဘူး"

"အရေးအကြီးဆုံးက သူတို့ ငါနဲ့ မျက်နှာပျက်ခဲ့ရင်တောင် ဘာပြဿနာမှ ကြီးကြီးမားမား ရှာနိုင်မှာ မဟုတ်ဘူး"

လင်းယွမ်က နောက်ပြောင်နေခြင်း မဟုတ်ပေ။ ယခုအခါ သူ၏ မျိုးရိုးဗီဇ ပြန်လည်ဖွဲ့စည်းခြင်း အဆင့်သည် ၃၀ ရာခိုင်နှုန်းကို ကျော်လွန်သွားခဲ့ပြီ ဖြစ်သည်။ လင်ကျန်းမြို့ တစ်မြို့လုံးတွင် သူ၏ကျေးကျွန် ဖြစ်သွားခဲ့ပြီဖြစ်သော လင်ယွီရုံမှလွဲ၍ သူထက် မျိုးရိုးဗီဇ ပြန်လည်ဖွဲ့စည်းခြင်း အဆင့် ပိုမြင့်မားသူဟူ၍ မရှိတော့ချေ။

လင်ယွီရုံ၏ မျိုးရိုးဗီဇ ပြန်လည်ဖွဲ့စည်းခြင်း အဆင့်က ၄၀ ရာခိုင်နှုန်းအထိ မြင့်မားနေလျှင်တောင်မှ တကယ်တမ်း တိုက်ခိုက်ရပါက လင်ယွီရုံအနေဖြင့် လင်းယွမ်ကို ထိန်းချုပ်နိုင်မည် မဟုတ်ပေ။

အဘယ်ကြောင့်ဆိုသော် ယခုအခါ လင်းယွမ်၏ ခန္ဓာကိုယ်ထဲတွင် မျိုးရိုးဗီဇမျိုးစေ့ ကိုးခုကို ပိုင်ဆိုင်ထားသောကြောင့် ဖြစ်သည်။ အကာအကွယ်ဖြစ်စေ အလျင်ဖြစ်စေ စိတ်စွမ်းအင်ပိုင်းတွင်ဖြစ်စေ သူ့၌ မည်သည့် အားနည်းချက်မျှ မရှိသလောက်ပင် ဖြစ်သည်။

ရန်သူက မည်မျှပင် အစွမ်းထက်ပါစေ တစ်ဖက်တစ်လမ်းတွင်သာ အစွမ်းထက်ကြခြင်း ဖြစ်သည်။

သူကမူ ဘက်ပေါင်းစုံမှ ကြောက်ခမန်းလိလိ အစွမ်းထက်နေခြင်း ဖြစ်၏။

လီချင်းဟွာက သတိပေးစကား ဆိုလာသည် "ဆရာလင်း... အဲဒီ ဖုန်းကျန့်ကုန်းရဲ့ လက်ရှိအခြေအနေက နည်းနည်း ထူးဆန်းနေတယ်... ပေါ့ပေါ့ဆဆ နေလို့ မဖြစ်ဘူးနော်"

ကျောက်ခိုင်ကလည်း အလျင်အမြန် ဝင်ပြောသည် "ဟုတ်တယ်... ဖုန်းကျန့်ကုန်းက မျိုးရိုးဗီဇ ပြန်လည်ဖွဲ့စည်းခြင်း အဆင့်ကို တက်လှမ်းဖို့ ကြိုးစားရင်း ပြဿနာတစ်ခုခု တက်သွားပုံရတယ်... သူ့ခန္ဓာကိုယ် အစိတ်အပိုင်း တချို့က သားရဲပုံစံလို ပြောင်းလဲလာတာကို တွေ့ရတယ်"

"ခန္ဓာကိုယ်က သားရဲပုံစံ ပြောင်းလာရုံတင် မကဘူး... စိတ်ခံစားချက်တွေကိုတောင် မနည်း ထိန်းချုပ်နေရတဲ့ ပုံပဲ"

"ဒီအတိုင်း ဆက်သွားရင် သူက ဆင့်ကဲပြောင်းလဲမှု ကျရှုံးသွားတဲ့ သန္ဓေပြောင်းလူသား တစ်ယောက် ဖြစ်လာမလားတောင် မသိဘူး"

ထိုစကားကို ကြားလိုက်ရသော် လင်းယွမ်က မျက်ခုံးပင့်လိုက်မိသည် "သူ့ရဲ့ မျိုးရိုးဗီဇ ပြန်လည်ဖွဲ့စည်းခြင်းက ကျရှုံးသွားတာလား"

"ဟုတ်တယ်... ဆရာ ကိုယ်တိုင် မြင်ရင် သိပါလိမ့်မယ်... အခု ဖုန်းကျန့်ကုန်းက အရင်က ကျွန်တော်တို့ တွေ့ဖူးတဲ့လူနဲ့ လုံးဝကို တစ်ခြားစီ ဖြစ်နေပြီ"

လင်းယွမ်သည် မျိုးရိုးဗီဇ ပြန်လည်ဖွဲ့စည်းခြင်း ကျရှုံးသွားသူ မည်သို့ဖြစ်သွားသည်ကို တစ်ခါမျှ မမြင်ဖူးခဲ့သဖြင့် စိတ်ထဲတွင် အလွန် စူးစမ်းချင်စိတ် ဖြစ်ပေါ်လာသည်။

သူက ချက်ချင်း မတ်တတ်ထရပ်လိုက်ပြီး ပြောလိုက်သည် "စစ်တပ်က အတော်လေးကို အပူတပြင်း ဖြစ်နေလောက်ပြီ... ငါ အခုပဲ အဲဒီကို သွားပြီး အခြေအနေကို သွားကြည့်လိုက်ဦးမယ်"

ချက်ချင်းပင် လင်းယွမ်သည် မီယွမ်မိုးသစ်တောကျွန်းမှ လျင်မြန်စွာ ထွက်ခွာလာပြီး စစ်တပ်ရှိရာ တိမ်မြူကျွန်းသို့ တိုက်ရိုက် ပျံသန်းသွားလေသည်။

ချန်ချုံးတောင်ပေါ်မှ ဖြတ်ပျံသွားစဉ် တောင်ထိပ်ပိုင်းတွင် ဗုံးကြဲခံထားရသဖြင့် ပြိုကျပျက်စီးနေသည်ကို တွေ့လိုက်ရသည်။

နေရာအနှံ့အပြားတွင် ပြိုကျနေသော တောင်ကုန်းများနှင့် သစ်ပင်များကို တွေ့ရပြီး ဆီးနှင်းများကြားတွင် သန္ဓေပြောင်း သတ္တဝါများ၏ အလောင်းမြောက်မြားစွာ လဲကျနေသည်။

လင်းယွမ်က ထိုယာဉ်ပျံများ၏ တိုက်ခိုက်နိုင်စွမ်းကို အကဲခတ် မှန်းဆကြည့်လိုက်ရာ စိတ်ထဲတွင် အကြမ်းဖျင်း သဘောပေါက်သွားသည်။

"ဖုန်းကျန့်ကုန်းရဲ့ အဏုမြူရောင်ခြည် တိုက်ခိုက်နိုင်စွမ်းနဲ့တော့ သိပ်မကွာလောက်ဘူး"

"ဒါပေမဲ့ အရင်တုန်းက ဖုန်းကျန့်ကုန်းရဲ့ အဏုမြူရောင်ခြည် တိုက်ခိုက်မှု အားအင်နဲ့ဆိုရင် အခုချိန်မှာ ငါ့ကို အထိအခိုက် ဖြစ်အောင်တောင် လုပ်နိုင်မှာ မဟုတ်တော့ဘူး"

"ဝှစ်"

လင်းယွမ်က ချန်ချုံးတောင်ကို ဖြတ်ကျော်ပျံသန်းလာပြီးနောက် တိမ်မြူကျွန်းသို့ လျင်မြန်စွာ ရောက်ရှိသွားသည်။

တိမ်မြူကျွန်း၏ လေပိုင်နက်သို့ ချဉ်းကပ်သွားသည်နှင့် တပြိုင်နက် ကျွန်းပေါ်မှ သတိပေး အချက်ပေးသံများ ချက်ချင်း ထွက်ပေါ်လာတော့သည်။

"ဘယ်သူလဲ... အခုချက်ချင်း ရပ်လိုက်"

လူတစ်ယောက်က အသံချဲ့စက်ကို ကိုင်ကာ လေထဲမှ လင်းယွမ်အား လှမ်း၍ အော်ဟစ် ကြိမ်းမောင်းလိုက်သည်။

တစ်ချိန်တည်းမှာပင် တိမ်မြူကျွန်း၏ အပေါ်ယံကောင်းကင်ယံတွင် စွမ်းအင်အကာအကွယ်များ ချက်ချင်း ပွင့်လာပြီး စစ်တပ်၏ အမြောက်ပြောင်းမြောက်မြားစွာကလည်း လင်းယွမ်ရှိရာဘက်သို့ လှည့်လာကြသည်။

လင်းယွမ်သည် အထဲသို့ ဝင်မသွားဘဲ စစ်တပ်၏ အစီအရင်ကြီးကို စိတ်ဝင်တစားဖြင့် ကြည့်ရှုနေလိုက်သည်။

ခေတ္တမျှ ကြည့်ရှုပြီးနောက် သူက မနေနိုင်ဘဲ ခေါင်းကို ဖြည်းညှင်းစွာ ခါယမ်းလိုက်မိသည်။

"ဒီအစီအရင်က သာမန် အကာအကွယ်တွေကိုပဲ အဓိက အခြေခံထားတာ... ကြည့်ရတာ ရေဓာတ် အကာအကွယ်ကို အသုံးပြုထားပုံပဲ... ရေငွေ့တွေကို စုစည်းပြီး ဖွဲ့စည်းထားတော့ ဒီတိမ်မြူကျွန်းရဲ့ ပတ်ဝန်းကျင်နဲ့ အတော်လေး ကိုက်ညီတယ်"

"ဒါပေမဲ့ ဒီလို အစီအရင်မျိုးက သတ်မှတ်ထားတဲ့ ဓာတ်သဘာဝတွေရဲ့ တန်ပြန်တိုက်ခိုက်မှုကို ပိုပြီး ခံရလွယ်တယ်... ငါတို့ ထိုက်ယန်တောင်က ကောင်းကင်ချိတ်ပိတ် အမြောက်အစီအရင်နဲ့ ယှဉ်ရင်တော့ အများကြီး ကွာခြားသေးတယ်"

အနည်းငယ် နှိုင်းယှဉ်ကြည့်လိုက်ပြီးနောက် တစ်ဖက်လူ၏ အစီအရင်က သိပ်ပြီး အသုံးမကျလှကြောင်း လင်းယွမ် ခံစားမိသွားသည်။

မကြာမီမှာပင် တိမ်မြူကျွန်းထဲမှ စစ်ဝတ်စုံ ဝတ်ဆင်ထားသော ဆံပင်တိုတိုနှင့် အမျိုးသမီးတစ်ဦး ပျံသန်းထွက်ပေါ်လာသည်။

"ကိုလင်းယွမ်"

ဆံပင်တိုနှင့် အမျိုးသမီးသည် လင်းယွမ်မည်သူမည်ဝါဖြစ်ကြောင်း မှတ်မိသွားသည်နှင့် တပြိုင်နက် သူမ၏ မျက်နှာပေါ်တွင် အံ့သြဝမ်းသာသွားသော အရိပ်အယောင်များ ပေါ်လာသည်။

လင်းယွမ်က သူမကို မြင်လိုက်ရသောအခါ သိပ်ပြီး စိတ်ကြည်လင်မှု မရှိလှပေ။

ဤအမျိုးသမီးကား အခြားသူမဟုတ်ဘဲ ကျန်းယွီကျန်း၏ သမီးဖြစ်သူ ကျန်းဝမ်ကျင်းပင် ဖြစ်သည်။

လင်းယွမ်၏ စိတ်ထဲတွင် ဤအမျိုးသမီးအပေါ် ထားရှိသော အမြင်က အတော်လေး ဆိုးရွားလှသည်။

ယခင်က သူနှင့် တွေ့ဆုံခဲ့စဉ်က ဤအမျိုးသမီး၏ အပြုအမူက အလွန် မောက်မာလွန်းလှပြီး နေရာတကာတွင် စစ်တပ်မှ အရာရှိကြီးတစ်ဦး၏ ဟန်ပန်မျိုးဖြင့် သူ့ကို ကြည့်သည့် အကြည့်များကလည်း သာမန် အရပ်သား အသက်ရှင်ကျန်ရစ်သူများ၏ ခေါင်းဆောင်တစ်ယောက်အဖြစ်သာ သဘောထားခဲ့သည်။

ယခုတော့ သူမ၏ အမူအရာက ဖော်ရွေလာသော်လည်း လင်းယွမ်ကမူ ၎င်းကို အရေးတယူပင် မလုပ်ချေ။

"ကျန်းယွီကျန်းရော"

လင်းယွမ်က သူမဖခင်၏ နာမည်ကို တိုက်ရိုက် ခေါ်လိုက်သည်ကို ကြားလိုက်ရသော် ကျန်းဝမ်ကျင်း၏ အပြုံးများ ချက်ချင်း ပျောက်ကွယ်သွားပြီး မျက်ဝန်းထဲတွင် ဒေါသအရိပ်အယောင်တစ်ခု ဖြတ်ပြေးသွားသည်။

သို့သော် လက်ရှိ စစ်တပ်၏ အခြေအနေကို တွေးမိသွားပြီးနောက် သူမက ဒေါသကို ဖိနှိပ်လိုက်ကာ ပြောလိုက်သည် "လင်းယွမ်... ကျွန်မအဖေက ရှင့်ကို တွေ့ချင်နေတာ ကြာပြီ... ဒါပေမဲ့ ရှင့်ရဲ့ မာနက နည်းနည်း ကြီးလွန်းနေတယ်နော်... ရှင့်ကို အကြိမ်ကြိမ် ဖိတ်ခေါ်ခဲ့တာတောင် ရှင်က လုံးဝ ရောက်မလာခဲ့ဘူး"

လင်းယွမ်က သူမကို တစ်ချက် စောင်းငဲ့ကြည့်လိုက်ပြီး တိုက်ရိုက်ပင် ပြောလိုက်သည် "မင်းက အဲဒါကို ဖိတ်ခေါ်တယ်လို့ ခေါ်တာလား... ဖိတ်ခေါ်တယ်ဆိုမှတော့ လာတာ မလာတာက ငါ့ရဲ့ ဆန္ဒအပေါ်မှာပဲ မူတည်တာပေါ့"

"ငါက လာချင်စိတ်မရှိတာကို မင်းတို့က အတင်း လာစေချင်တယ်ဆိုရင် အဲဒါက ဖိတ်ခေါ်တာ မဟုတ်တော့ဘူး... အမိန့်ပေးတာ ဖြစ်သွားပြီ"

"ဘာလဲ... မကျန်းက ငါ့ကို အမိန့်ပေးချင်နေတာလား"

ကျန်းဝမ်ကျင်း၏ စကားများ ဆို့နင့်သွားပြီး အသံက အနည်းငယ် အေးစက်သွားကာ ပြောလိုက်သည် "ဘယ်လုပ်ရဲပါ့မလဲ... ကိုလင်းယွမ်ရဲ့ ထိုက်ယန်တောင် ခိုလှုံရေးစခန်းက အခုဆိုရင် အနီးအနား မြို့တွေမှာတောင် နာမည်ကြီးနေတဲ့ ဧရာမ ခိုလှုံရေးစခန်းကြီး ဖြစ်နေပြီပဲ... ဘယ်သူကများ ကိုလင်းယွမ်ကို အမိန့်ပေးရဲမှာလဲ"

"ဪ... ငါကတော့ တစ်ယောက်ယောက်က အခြေအနေကို သေချာ မခွဲခြားတတ်ဘဲ အခုအချိန်ကို ကမ္ဘာမပျက်ခင် အချိန်လို့များ ထင်နေသေးသလားလို့... ငါ့ရှေ့မှာ အရာရှိကြီးဟန်ဖမ်းပြီး အာဏာရှင်လို လာလုပ်နေတဲ့ သူတွေကို ငါ အမုန်းဆုံးပဲ... မကျန်း အနေနဲ့ ဒီအချက်ကို မှတ်ထားဖို့လိုတယ်"

ထိုအခါ ကျန်းဝမ်ကျင်းမှာ ဒေါသထွက်လွန်းသဖြင့် မျက်နှာတစ်ခုလုံး နီမြန်းသွားပြီး မည်သူ့ကို အာဏာရှင်ဟု ဆဲဆိုနေသလဲဟု မေးပစ်လိုက်ချင်စိတ်များ တဖွားဖွား ပေါ်လာသည်။

လင်းယွမ်က သူမကို ဂရုမစိုက်ဘဲ မေးလိုက်သည် "မင်းရဲ့လူတွေကို အကာအကွယ် ဖွင့်ခိုင်းဖို့ အစီအစဉ် မရှိသေးဘူးလား"

ကျန်းဝမ်ကျင်းက လေကို ပြင်းပြင်းတစ်ချက် ရှူသွင်းလိုက်ပြီး ရင်ထဲမှ ဒေါသကို အတင်းဖိနှိပ်ကာ ခေါင်းလှည့်၍ အော်ဟစ်လိုက်သည် "အကာအကွယ် ဖွင့်လိုက်"

ထို့နောက် သူမ၏ ဦးဆောင်လမ်းပြမှုအောက်တွင် လင်းယွမ်သည် တိမ်မြူကျွန်းအတွင်းသို့ ဝင်ရောက်သွားလေသည်။

တိမ်မြူကျွန်း၏ စစ်စခန်းအတွင်းတွင် စစ်လက်နက်ပစ္စည်းများ၊ မော်တာအမြောက်များ၊ တင့်ကားများ၊ ရဟတ်ယာဉ်များ စသည်ဖြင့် အမြောက်အမြား ရပ်နားထားသည်ကို တွေ့ရသည်။

မူလက သေးငယ်သော လေယာဉ်ကွင်းလေး တစ်ခုသာ ရှိခဲ့သော်လည်း ယခုအခါတွင် များစွာ တိုးချဲ့ထားပြီး ထိုနေရာတွင် ယာဉ်ပျံ အမြောက်အမြားကို ရပ်နားထားသည်။

လင်းယွမ်၏ စိတ်ထဲတွင် လှုပ်ရှားသွားပြီး ၎င်းတို့သည် စစ်တပ်မှ ကိုယ်တိုင် တီထွင်ထုတ်လုပ်ထားသော ယာဉ်ပျံများ ဖြစ်ကြောင်း သူ သိလိုက်သည်။

သို့သော် မိုးကြိုးမုန်တိုင်းများ၏ တိုက်ခိုက်မှုကို ခုခံကာကွယ်နိုင်စွမ်းရှိသော ဤသင်္ကေတနည်းပညာကို စစ်တပ်က မည်သည့်နေရာမှ ရရှိခဲ့သနည်းဆိုသည်ကိုတော့ သူ မသိနိုင်ပေ။

"ကိုလင်းယွမ်... ဒါတွေအကုန်လုံးက ကျွန်မတို့ စစ်တပ်ရဲ့ လျှို့ဝှက်ချက်တွေချည်းပါပဲ... ရှင်က ကျွန်မတို့ စစ်စခန်းကို ကြည့်ရှုခွင့်ရတဲ့ ပထမဆုံး အပြင်လူပဲ"

ကျန်းဝမ်ကျင်းက စကားစလိုက်ပြီး လင်းယွမ်၏ မျက်နှာအမူအရာကို အကဲခတ်နေရင်း သူ၏ မျက်နှာပေါ်တွင် ဂုဏ်ယူဝမ်းမြောက်နေသည့် အရိပ်အယောင်တစ်ခုကို မြင်တွေ့ရရန် မျှော်လင့်နေသည်။

သို့သော် လင်းယွမ်၏ မျက်နှာပေါ်တွင်မူ အထင်အမြင်သေးဟန် ရှိသော အရိပ်အယောင်တစ်ခုသာ ပေါ်လွင်နေလေသည်။

"မကျန်း... စစ်တပ်ရဲ့ လျှို့ဝှက်ချက်ဆိုတာက ရေဘေးကပ်ဆိုး မတိုင်ခင်က ဒီလက်နက်ကိရိယာတွေကို ပြောတာလား"

"ဒါမျိုးသာဆိုရင်တော့ တကယ်ကို စိတ်ပျက်စရာပဲ"

"အခုအချိန်မှာ ဒီလို ယမ်းမှုန့်သုံး လက်နက်တွေကို ထားဦး... အစွမ်းထက်တဲ့ အစွမ်းပိုင်ရှင် တချို့ဆိုရင် ဒုံးကျည်တွေကိုတောင် ခန္ဓာကိုယ်နဲ့ တိုက်ရိုက် ခုခံနိုင်နေပြီ"

"မျိုးရိုးဗီဇ ပြန်လည်ဖွဲ့စည်းခြင်း လုပ်ပြီးလို့ သားရဲပုံစံ ပြောင်းသွားပြီဆိုရင်... ဒီလိုယမ်းမှုန့်သုံး လက်နက်တွေရဲ့ ဖျက်ဆီးနိုင်စွမ်းက သန္ဓေပြောင်း သတ္တဝါတွေရဲ့ အကြေးခွံတွေကိုတောင် ဖောက်ထွင်းနိုင်မှာ မဟုတ်ဘူး"

"မင်းတို့က ဒီလို ရှေးဟောင်းပစ္စည်းတွေကို ရတနာတစ်ခုလို ထိန်းသိမ်းထားချင်သေးတယ် ဆိုရင်တော့... တကယ်ကို ရယ်စရာကောင်းလွန်းလှပြီ"

ထိုစကားကို ကြားလိုက်ရသော် ကျန်းဝမ်ကျင်းမှာ အကြီးအကျယ် ဒေါသထွက်သွားပြီး ချက်ချင်း ပြောလိုက်သည် "ရှင် သေချာ မျက်လုံးဖွင့်ပြီး ကြည့်လိုက်စမ်းပါဦး... ဒီက လက်နက်ကိရိယာတွေက အရင်က ပစ္စည်းတွေ ဖြစ်ပေမဲ့... အထဲမှာ ထည့်ထားတာက ယမ်းမှုန့်တွေ မဟုတ်ဘူး... သင်္ကေတ ကျောက်တုံးတွေရှင်"

"အစွမ်းမျိုးစုံရှိတဲ့ သင်္ကေတ ကျောက်တုံးတွေကို ယမ်းမှုန့်သုံး လက်နက်တွေနဲ့ ပစ်ခတ်လိုက်ရင် ဧရာမ ဖျက်ဆီးနိုင်စွမ်းရှိတယ်"

"အရေးအကြီးဆုံးက... ယမ်းမှုန့်သုံး လက်နက်တွေဟာ စွမ်းအင်ချိတ်ပိတ် သင်္ကေတတွေရဲ့ နှောင့်ယှက်မှုကို မခံရဘူး... ဟမ့်... မုန်ယာကုမ္ပဏီရဲ့ ယာဉ်ပျံတွေကို ကျွန်မတို့ ဘယ်လို ချေမှုန်းနိုင်ခဲ့လဲဆိုတာ ရှင် သိရဲ့လား"

"ရှင့်ပါးစပ်ကပြောတဲ့ အဲဒီ ရှေးဟောင်းပစ္စည်းတွေကို အားကိုးပြီး ချေမှုန်းခဲ့တာပဲ"

ထိုစကားကို ကြားလိုက်ရသောအခါ လင်းယွမ်က မျက်ခုံးတစ်ချက် ပင့်လိုက်မိသည်။

စစ်တပ်က ဤယမ်းမှုန့်သုံး လက်နက်များကို ဆက်လက် ထိန်းသိမ်းထားရခြင်းမှာ အခြားသော ပြုပြင်မွမ်းမံမှုများကို ပြုလုပ်ထားသောကြောင့်ကိုး။

ဒုံးကျည်များကို ပစ်လွှတ်သည့် စနစ်က ယမ်းမှုန့်ကိုပင် အသုံးပြုနေဆဲ ဖြစ်သော်လည်း ထိပ်ဖူးများက သတ္တုမဟုတ်တော့ဘဲ သင်္ကေတ ကျောက်တုံးများ ဖြစ်နေခဲ့သည်။

စွမ်းအင်ချိတ်ပိတ် အစီအရင်ကို ဖွင့်လှစ်လိုက်သည်နှင့် အခြားသော သန္ဓေပြောင်းစွမ်းအင်သုံး လက်နက်များမှာ စွမ်းအင်ချိတ်ပိတ် အစီအရင်၏ နယ်ပယ်အတွင်း၌ အလုပ်မလုပ်နိုင်တော့သော်လည်း ယမ်းမှုန့်သုံး လက်နက်များကမူ ဒုံးကျည်များကို စွမ်းအင်ချိတ်ပိတ် အစီအရင်ကို ဖောက်ထွက်စေပြီး အပြင်ဘက်ရှိ ရန်သူများကို အဝေးမှနေ၍ တိုက်ခိုက်နိုင်စွမ်း ရှိပေသည်။

ဤအကြံဉာဏ်က အတော်လေး ကောင်းမွန်လှပေသည်။

လင်းယွမ်သည် ဤတီထွင်ဖန်တီးမှုကို စိတ်ထဲတွင် တိတ်တဆိတ် မှတ်သားထားလိုက်ပြီး အိမ်ပြန်ရောက်သည့်အခါ လက်နက်စက်ရုံဘက်နှင့် တိုင်ပင်ဆွေးနွေးရမည်ဟု တွေးလိုက်သည်။

အခြားသူများကမူ ဤနည်းလမ်းသည် အနည်းငယ် အသုံးမကျဟု ထင်ကောင်းထင်နိုင်ပေမည်။ အဘယ်ကြောင့်ဆိုသော် ယမ်းမှုန့်သုံး လက်နက်များ၏ အဓိက တွန်းကန်အားမှာ ယမ်းမှုန့်ပင် ဖြစ်သောကြောင့်တည်း။

ရေဘေးကပ်ဆိုးကြီး အပြီးတွင် စစ်တပ်၌သာ သိုလှောင်ထားမှု ရှိနိုင်မည်ဖြစ်ပြီး အခြားမည်သည့်နေရာတွင် ယမ်းမှုန့်များကို ရနိုင်မည်နည်း။

သို့သော် လင်းယွမ်ကမူ ဤအချက်အတွက် စိုးရိမ်ရန် မလိုသည်မှာ ထင်ရှားသည်။ သူ့ထံတွင် စနစ် ရှိနေသည်မဟုတ်ပါလော။

ယမ်းမှုန့် ကုန်ကြမ်းများကို ထုတ်ယူရန်မှာ အလွန် ရိုးရှင်းလွယ်ကူလှသည်။

ဤနည်းလမ်းကို ထိုက်ယန်တောင်၏ ကောင်းကင်ချိတ်ပိတ် အမြောက်အစီအရင်တွင် အသုံးပြုပြီး ရန်သူကို အစီအရင်အတွင်းသို့ ဆွဲသွင်းကာ စွမ်းအင်ချိတ်ပိတ် အစီအရင်ကို တိုက်ရိုက် ဖွင့်လှစ်လိုက်ပါက မည်သူမျှ သန္ဓေပြောင်းစွမ်းအင်ကို အသုံးမပြုနိုင်တော့သည့် အခြေအနေတွင် ယမ်းမှုန့်သုံး ဒုံးကျည်လက်နက်များကို ပစ်ခတ်လိုက်မည် ဆိုပါစို့။

ထိုမြင်ကွင်းကို တွေးကြည့်ရုံဖြင့်ပင် လင်းယွမ် ပြုံးလိုက်မိသည်။

တစ်ဖက်လူကို ချေပလိုက်ပြီးနောက်တွင် ကျန်းဝမ်ကျင်းလည်း လင်းယွမ်ကဲ့သို့သော ပြင်ပလူကို ဤမျှလောက် အများကြီး မပြောပြသင့်ကြောင်း ရုတ်တရက် သတိပြုမိသွားသည်။

သို့သော် သူမ၏ ရည်ရွယ်ချက်က ကြွားဝါရန် မဟုတ်ဘဲ စစ်တပ်၏ အင်အားကို ပြသရန်အတွက်သာ ဖြစ်သည်။

ထိုသို့ဖြင့် လင်းယွမ်နှင့် နောက်ပိုင်း ဆွေးနွေးညှိနှိုင်းမှုများ ပြုလုပ်ရာတွင် အားသာချက်အချို့ ပိုမိုရရှိလာစေရန် ဖြစ်သည်။

ဤအမျိုးသမီးက မတုံးအသည့်အပြင် အတော်လေး ဉာဏ်နီဉာဏ်နက် များသည်ဟုပင် ဆိုရပေမည်။

ဘာပဲဖြစ်ဖြစ် သူမ ယခုလေးတင် ပြောသွားခဲ့သမျှသည် ယမ်းမှုန့်သုံး လက်နက်များအပေါ်တွင် အခြေခံထားခြင်း ဖြစ်သည်။

ရေဘေးကပ်ဆိုးကြီး အပြီးတွင် စစ်တပ်မှလွဲ၍ အခြားမည်သည့် အဖွဲ့အစည်းကမျှ ယမ်းမှုန့်သုံး လက်နက်များ မရှိနိုင်တော့ပေ။

ဤသည်ကား သူတို့ စစ်တပ်၏ အားသာချက်ဖြစ်ပြီး အပြင်သို့ ပေါက်ကြားသွားလျှင်တောင်မှ အခြားသူများက အတုခိုး၍ မရနိုင်ပေ။

ဤနည်းလမ်းကို တထစ်ချ အတုခိုးနိုင်သူ အမှန်တကယ် ရှိနေသည်ကို သူမ မသိခဲ့ပေ။

ထိုလူမှာလည်း သူမ၏ မျက်စိရှေ့တွင်ပင် ရှိနေလေသည်။

သူတို့နှစ်ဦးသည် စစ်တပ်၏ အစည်းအဝေးခန်းမအတွင်းသို့ လျင်မြန်စွာ ဝင်ရောက်သွားကြသည်။

ကျန်းယွီကျန်းက အစည်းအဝေးခန်းမအတွင်း၌ အစောကြီးကတည်းက စောင့်ဆိုင်းနေသည်ကို တွေ့လိုက်ရသည်။

လင်းယွမ် ဝင်လာပြီးနောက် သူက ချက်ချင်း မတ်တတ်ထရပ်လိုက်ပြီး အပြုံးတစ်ခုနှင့်အတူ ပြောလိုက်သည် "ကိုလင်းယွမ်... ကျွန်တော်တို့ရဲ့ စခန်းကို ကြိုဆိုပါတယ်"

လင်းယွမ်က ခပ်အေးအေးပင် တုံ့ပြန်လိုက်သည် "ဒီတစ်ခေါက်တော့ ခင်ဗျား ကျွန်တော့်ကို တကယ် ကြိုဆိုနေတယ် ဆိုတာကို ကြည့်တာနဲ့ သိသာပါတယ်"

ထိုသို့ ပြောလိုက်သော်လည်း သူ၏ အကြည့်များက ဘေးနားရှိ ထိုင်ခုံတစ်လုံးဆီသို့ ရောက်ရှိနေသည်။

ထိုနေရာတွင် စစ်ဝတ်စုံ ဝတ်ဆင်ထားသော လူတစ်ပိုင်း၊ သားရဲတစ်ပိုင်း ဖြစ်နေသည့် အမျိုးသားတစ်ဦး ထိုင်နေသည်။

ထိုလူ၏ အမွေးအမျှင်များ အားလုံး ကျွတ်ထွက်သွားပြီး ကတုံးဖြစ်နေသည်။ စစ်ဦးထုပ်ကို ဆောင်းထားသော်လည်း သူ့၌ ဆံပင်မရှိသည်ကို သိသာစွာ မြင်တွေ့နေရပြီး သူ၏ အရေပြားပေါ်တွင်လည်း ဦးချိုများကဲ့သို့သော အကြေးခွံများ အမြောက်အမြား ပေါ်ထွက်နေသည်။

မျက်လုံးအစုံကလည်း ဒေါင်လိုက် သူငယ်အိမ် ပုံစံမျိုး ဖြစ်နေပြီး နှာခေါင်းက ပိပြားကာ မျက်နှာတစ်ခုလုံး အလွန် ထူးဆန်းနေသည်။

စားပွဲပေါ်တွင် တင်ထားသော သူ၏ လက်နှစ်ဖက်မှာလည်း ယခုအခါတွင် ထက်ရှသော လက်သည်းများ ပါရှိသည့် သားရဲလက်ချောင်း သုံးချောင်းအဖြစ်သို့ ပြောင်းလဲနေခဲ့ပြီ။

လင်းယွမ်က မျက်လုံးများကို မှေးကျဉ်းလိုက်ပြီး မေးလိုက်သည် "ဖုန်းကျန့်ကုန်းလား"

ဖုန်းကျန့်ကုန်းကလည်း မီးဝင်းဝင်းတောက်နေသော အကြည့်များဖြင့် လင်းယွမ်ကို လှမ်းကြည့်လိုက်သည်။ လင်းယွမ်၏ ခန္ဓာကိုယ်ထဲတွင် ကြောက်မက်ဖွယ်ကောင်းသော စွမ်းအင်များ ကိန်းအောင်းနေကြောင်းကို သူ ခံစားလိုက်ရသည်။

ထိုသန္ဓေပြောင်းစွမ်းအင်က သူထက်ပင် ပိုမို မြင့်မားနေသည် မဟုတ်ပါလော။

ဤအချက်ကြောင့် ဖုန်းကျန့်ကုန်း၏ မျက်နှာအမူအရာ အနည်းငယ် ပြောင်းလဲသွားပြီး မျက်နှာပျက်သွားသည်။

"မင်း ထပ်ပြီး အဆင့်တက်သွားပြန်ပြီလား"

လင်းယွမ်က ခေါင်းညိတ်လိုက်သည် "ဟုတ်တယ်... ကံကောင်းလို့ အဆင့်တက်သွားတာ... ခင်ဗျားကတော့ အဆင့်တက်တာ မအောင်မြင်တဲ့ပုံပဲ"

ဖုန်းကျန့်ကုန်းက ဘာမှ မပြောဘဲ ပြန်မေးလိုက်သည် "အခု မင်းရဲ့ မျိုးရိုးဗီဇ ပြန်လည်ဖွဲ့စည်းခြင်း အဆင့်က ဘယ်လောက် ရောက်နေပြီလဲ"

လင်းယွမ်က ခေတ္တ စဉ်းစားလိုက်ပြီး တိုက်ရိုက်ပင် ဖြေလိုက်သည် "၃၀ရာခိုင်နှုန်း"

ထိုစကားကြောင့် ဖုန်းကျန့်ကုန်းသာမက ကျန်းယွီကျန်းနှင့် ကျန်းဝမ်ကျင်းတို့ပါ မျက်နှာပျက်သွားကြတော့သည်။

ဖုန်းကျန့်ကုန်းက လေကို ပြင်းပြင်းတစ်ချက် ရှူသွင်းလိုက်ပြီး မေးလိုက်သည် "မင်း ဘယ်လိုလုပ်လိုက်တာလဲ... ကံကောင်းလို့ဆိုတာမျိုးတော့ လာမပြောနဲ့နော်"

"ငါလည်း မျိုးရိုးဗီဇ ပြန်လည်ဖွဲ့စည်းခြင်း အဆင့်ကို ရောက်ဖူးတဲ့သူဆိုတော့ ဒါက ဘယ်လောက် ခက်ခဲလဲဆိုတာ ငါ ကောင်းကောင်း သိတယ်"

"အဆင့်တစ်ဆင့်တိုင်းမှာ မျိုးရိုးဗီဇတွေကို တိတိကျကျ အာရုံခံပြီး ထိန်းချုပ်နိုင်ဖို့ လိုအပ်တယ်... ကံကောင်းလို့ဆိုတဲ့ ရိုးရှင်းတဲ့ အကြောင်းပြချက်တော့ မဖြစ်နိုင်ဘူး"

လင်းယွမ်က ခေါင်းယမ်းလိုက်ပြီး ပြောလိုက်သည် "ဒါက ကျွန်တော့်ရဲ့ အဓိက အကျိုးစီးပွားနဲ့ သက်ဆိုင်နေတာလေ... ကျွန်တော် ပြောပြမယ်လို့များ ခင်ဗျား ထင်နေလား"

"ငါတို့က ပစ္စည်းတွေနဲ့ လဲလှယ်ပေးလို့ ရပါတယ်"

ဤတစ်ကြိမ်တွင် ဖုန်းကျန့်ကုန်း စကားမပြောရသေးမီ ကျန်းယွီကျန်းက ချက်ချင်းပင် အလောတကြီး လှမ်းအော်လိုက်သည်။

လင်းယွမ်က ပြုံးလိုက်သည် "ခင်ဗျားတို့ဆီမှာ ကျွန်တော်နဲ့ အရောင်းအဝယ် လုပ်စရာ ဘာများ ရှိလို့လဲ... ဟိုယမ်းမှုန့်သုံး လက်နက်တွေဆိုရင်တော့ လာမပြောနဲ့... အခုက အစွမ်းပိုင်ရှင်တွေရဲ့ ခေတ်ရောက်နေပြီ... သင်္ကေတ နည်းပညာကမှ အနာဂတ်ပဲ"

ကျန်းယွီကျန်းက ချက်ချင်း ပြောလိုက်သည် "တကယ်လို့ အဲဒါက သင်္ကေတ နည်းပညာ ဖြစ်နေခဲ့ရင်ကော... ပြီးတော့ ရှေးဟောင်း သင်္ကေတ နည်းပညာနဲ့ ပတ်သက်တဲ့ ဗဟုသုတတွေ ဆိုရင်ရော"

လင်းယွမ်က ကျန်းယွီကျန်းကို ချက်ချင်း လှမ်းကြည့်လိုက်ပြီး သူ၏ မျက်ဝန်းများထဲတွင် စူးရှသော အရောင်တစ်ခု ထွက်ပေါ်လာသည်။

သူ၏ စိတ်ထဲတွင် လှုပ်ရှားသွားပြီး စစ်တပ်ဘက်မှ သူ အာရုံခံမိခဲ့သော ထိုစိတ်ဝိညာဉ် အပိုင်းအစကို ဆက်စပ်တွေးတောမိကာ စိတ်ထဲတွင် ခန့်မှန်းမိသွားပြီ ဖြစ်သည်။

တကယ်ပဲ အရင်တုန်းက စစ်တပ် ရရှိခဲ့တဲ့ ရှေးလူဟောင်းတွေရဲ့ အလောင်းတွေနဲ့ သူတို့ ရှာဖွေတွေ့ရှိခဲ့တဲ့ ရှေးဟောင်းသင်္ချိုင်းကနေ ကြီးမားတဲ့ အကျိုးအမြတ်တွေ ရခဲ့တာပဲ။

ဆက်ရန်...

အပိုင်း(၇၃၀) စစ်တပ်၏ဝှက်ဖဲ

"သင်္ကေတ နည်းပညာ... ခင်ဗျားတို့ဆီမှာ ဘာ သင်္ကေတ နည်းပညာတွေ ရှိလို့လဲ"

လင်းယွမ်က စမ်းသပ်မေးမြန်းလိုက်၏။

ကျန်းယွီကျန်းက ခေတ္တစဉ်းစားလိုက်ပြီး "ဒီအကြောင်းအရာကို မပြောခင်... ကျွန်တော် ခင်ဗျားကို မေးခွန်းတစ်ခုလောက် အရင်မေးချင်တယ်"

လင်းယွမ်က စိတ်ဝင်တစားဖြင့် မေးလိုက်သည်။ "ဘာမေးခွန်းလဲ"

"ရေလွှမ်းမိုးပြီး ကမ္ဘာပျက်တဲ့ကပ်ဘေးက... ဘယ်အချိန်ကတည်းက စတင်ခဲ့တယ်လို့ ခင်ဗျား ထင်လဲ"

လင်းယွမ်က မျက်ခုံးတစ်ချက် ပင့်လိုက်ပြီး "လွန်ခဲ့တဲ့ နှစ်နှစ်ကျော်လောက်က မဟုတ်ဘူးလား"

ကျန်းယွီကျန်းက ခေါင်းအသာခါယမ်းလိုက်ပြီး "တကယ်တော့ ဒါက ပထမဆုံးအကြိမ် ကမ္ဘာပျက် ရေဘေးကြီး မဟုတ်ဘူး... ကျွန်တော်တို့ရဲ့ စုံစမ်းလေ့လာမှုတွေအရ... ရေလွှမ်းမိုးပြီး ကမ္ဘာပျက်တဲ့ကပ်ဘေးက လွန်ခဲ့တဲ့ နှစ်ထောင်ပေါင်းများစွာ ကတည်းက ဖြစ်ပွားခဲ့ဖူးတယ်"

"အစွမ်းပိုင်ရှင်တွေ ပေါ်လာတာကလည်း... ပထမဆုံးအကြိမ် မဟုတ်ဘူး"

"ကျွန်တော်ပြောတဲ့ စကားတွေက ခင်ဗျားအတွက် တော်တော်လေး တုန်လှုပ်စရာ ဖြစ်သွားမယ်ဆိုတာ ကျွန်တော် သိပါတယ်... သာမန်လူတွေအတွက်လည်း ဒါကို လက်ခံနိုင်ဖို့ တကယ်ခက်ခဲမှာပါ"

လင်းယွမ်...

ကျန်းယွီကျန်းက ဆက်ပြောသည်။ "ဖန်ကုက ကမ္ဘာကြီးကို ဖန်တီးခဲ့တာတို့... နွီဝါးက ကောင်းကင်ကို ဖာထေးခဲ့တာတို့ စတဲ့... ရှေးဟောင်း ဒဏ္ဍာရီပုံပြင်တွေက... ရှေးလူကြီးတွေ လိမ်ပြောခဲ့တာ မဟုတ်ဘူး... ဒါတွေက ဒဏ္ဍာရီတွေ မဟုတ်ဘူး..."

"နဦး"

လင်းယွမ်က ကျန်းယွီကျန်း၏ စကားကို ဖြတ်ပြောလိုက်သည်။ "လိုရင်းကိုပဲ တိုက်ရိုက် ပြောပါ... ခင်ဗျားတို့ရဲ့ သင်္ကေတ နည်းပညာတွေက... ရှေးဟောင်း သင်္ချိုင်းတစ်ခုခုကနေ ရလာတာ မဟုတ်လား... ခင်ဗျားတို့ ရှေးဟောင်း အစွမ်းပိုင်ရှင် တစ်ယောက်ယောက်ရဲ့ အလောင်းကို တူးဖော်မိခဲ့တာလား"

ထိုစကားကို ကြားလိုက်ရသည်နှင့် တပြိုင်နက် ကျန်းယွီကျန်း... ကျန်းဝမ်ကျင်းနှင့် ဖုန်းကျန့်ကုန်းတို့ သုံးဦးစလုံး ထိုနေရာ၌ပင် ကြောင်အမ်းအမ်း ဖြစ်သွားကြ၏။

ကျန်းယွီကျန်းက ရုတ်တရက် ခေါင်းမော့လာပြီး အံ့သြတကြီးဖြင့် မေးလိုက်သည်။ "ခင်ဗျား... ခင်ဗျားက ရှေးဟောင်း အစွမ်းပိုင်ရှင်တွေ အကြောင်းကို သိနေတာလား"

ကျန်းဝမ်ကျင်းကလည်း မယုံကြည်နိုင်စွာဖြင့် ဝင်ပြောလေသည်။ "ရှင် ကျွန်မတို့ရဲ့ လျှို့ဝှက်စာရွက်စာတမ်းတွေကို ခိုးယူထားတာလား"

ဖုန်းကျန့်ကုန်းကလည်း လင်းယွမ်ကို စူးရဲသော အကြည့်များဖြင့် စိုက်ကြည့်နေ၏။

လင်းယွမ်က မျက်လုံးတစ်ချက် လှန်ကြည့်လိုက်မိသည်... အထူးသဖြင့် ထိုကျန်းဝမ်ကျင်းဆိုသော အမျိုးသမီးကို ကြည့်ကာ... သူမက ဆေးမမီအောင် အတုံးအအ ဖြစ်နေသည်ဟု ခံစားလိုက်ရသည်။

သူက အေးစက်စက် ပြုံးလိုက်ပြီး "ခင်ဗျားတို့က ရှေးဟောင်း အစွမ်းပိုင်ရှင်တွေနဲ့ ထိတွေ့ဖူးတဲ့... တစ်ခုတည်းသော အဖွဲ့အစည်း မဟုတ်ဘူးဆိုတာကိုရော... မစဉ်းစားမိဘူးလား"

ကျန်းယွီကျန်းတို့မှာ ရုတ်တရက် အသက်ရှူမှားသွားကြပြီးနောက် ကျန်းဝမ်ကျင်းက ချက်ချင်းပင် ထပ်မေးလိုက်သည်။ "ရှင်တို့လည်း ရှေးဟောင်း အစွမ်းပိုင်ရှင်တွေကို တွေ့ထားတာလား"

"ဒါ... ဒါ... ဒါက ဘယ်လိုလုပ် ဖြစ်နိုင်မှာလဲ... ရှေးဟောင်း အစွမ်းပိုင်ရှင်တွေရဲ့ ပုန်းအောင်းနေတဲ့ နည်းလမ်းတွေက သိပ်ကို လျှို့ဝှက်လွန်းတယ်... ကျွန်မတို့သာ မတော်တဆ မတွေ့ခဲ့ဘူးဆိုရင်... သူတို့ ရှိနေမှန်းတောင် သိနိုင်မှာ မဟုတ်ဘူး"

"ရှင်တို့ ထိုက်ယန်တောင်ကရော ဘယ်လိုလုပ်ပြီး တွေ့သွားတာလဲ"

လင်းယွမ်က သူမနှင့် စကားအပိုတွေ ဆက်မပြောချင်တော့ဘဲ ပြောလိုက်သည်။ "ကျန်းယွီကျန်း... ခင်ဗျားသမီးက စကားနည်းနည်း များတယ်... သူ့ကို အပြင်ထွက်ခိုင်းလိုက်ပါ"

"လူယုတ်မာ... ရှင် ဘာပြောလိုက်တယ်" ကျန်းဝမ်ကျင်းက အကြီးအကျယ် ဒေါသထွက်သွားပြီး လင်းယွမ်ကို မျက်လုံးဝိုင်းကြီးများဖြင့် စိုက်ကြည့်ကာ အော်ဟစ်လိုက်သည်။

ကျန်းယွီကျန်းက အလျင်အမြန် ဟန့်တားလိုက်၏။ "ဝမ်ကျင်း"

"အဖေ"

"ငါ့ကို တပ်မှူး လို့ခေါ်"

ကျန်းယွီကျန်းက မျက်နှာကို တင်းမာစွာထားပြီး အော်ဟစ်လိုက်သည်။ "ထွက်သွား... ဒီမှာ နင် ဝင်ပြောစရာ မလိုဘူး"

ကျန်းဝမ်ကျင်းမှာ မတတ်သာတော့ဘဲ လင်းယွမ်ကို ဒေါသတကြီးဖြင့် တစ်ချက် စူးရဲစွာ ကြည့်လိုက်ပြီးနောက်... အစည်းအဝေးခန်းမထဲမှ ခြေလှမ်းကျဲကြီးများဖြင့် ထွက်ခွာသွားလေသည်။

ထိုအခါမှ လင်းယွမ်က ထိုင်ခုံကို ဆွဲယူကာ ဝင်ထိုင်လိုက်ပြီး တည်ငြိမ်စွာဖြင့် ပြောလိုက်သည်။ "ကျွန်တော်တို့ ထိုက်ယန်တောင်က... ရှေးဟောင်း အစွမ်းပိုင်ရှင်တွေ ရှိနေတာကို တွေ့ထားတာ ကြာပြီ... ဒါတင်မကသေးဘူး... အခုချိန်ထိ အသက်ရှင်နေသေးတဲ့ ရှေးဟောင်း အစွမ်းပိုင်ရှင် သုံးယောက်နဲ့တောင် ကျွန်တော် ထိတွေ့ဖူးပြီးပြီ"

"ဘာ"

"အသက်ရှင်နေသေးတဲ့ ရှေးဟောင်း အစွမ်းပိုင်ရှင်တွေ ဟုတ်လား"

ဤတစ်ကြိမ်တွင် ကျန်းယွီကျန်း တစ်ယောက်တည်း အံ့သြသွားခြင်း မဟုတ်ဘဲ... ဟိုဘက်တွင် ထိုင်နေသော လူတစ်ဝက် သားရဲတစ်ဝက် ဖုန်းကျန့်ကုန်းကပါ ရုတ်တရက် မတ်တတ်ရပ်လိုက်ပြီး... သူ၏ မျက်နှာထက်တွင်လည်း အလွန်အမင်း တုန်လှုပ်အံ့သြမှုများ ပြည့်နှက်သွားလေသည်။

လင်းယွမ်က အေးအေးဆေးဆေးပင် မေးလိုက်သည်။ "ဘာလဲ... ခင်ဗျားတို့က အလောင်းတွေကိုပဲ တွေ့ခဲ့ပြီး... ရှေးဟောင်း အစွမ်းပိုင်ရှင်တွေရဲ့ အသိစိတ်ကို မတွေ့ခဲ့ရဘူးလား"

ကျန်းယွီကျန်းက အလျင်အမြန် မေးလိုက်၏။ "ဘာသဘောလဲ... ရှေးဟောင်း အစွမ်းပိုင်ရှင်တွေက ဘယ်လောက်ပဲ အစွမ်းထက်တယ်ဆိုဆို... အခုချိန်ထိ အသက်ရှင်နေဖို့ဆိုတာ ဘယ်လိုမှ မဖြစ်နိုင်ဘူးလေ"

စစ်တပ်သည် ရှေးဟောင်း အစွမ်းပိုင်ရှင်များနှင့် အမှန်တကယ် ထိတွေ့ခဲ့ဖူးသော်လည်း... ရှေးဟောင်း အစွမ်းပိုင်ရှင်များ၏ အသက်ရှည်ရှည် နေထိုင်နိုင်သော လျှို့ဝှက်ချက်ကိုမူ နက်နက်နဲနဲ သိရှိနားလည်ထားခြင်း မရှိကြောင်း သိသာထင်ရှားနေသည်။

လင်းယွမ်က စိတ်ထဲမှ ခေါင်းခါလိုက်မိသည်... စစ်တပ်အတွင်း၌ ပုန်းအောင်းနေသော ထိုရှေးဟောင်း အစွမ်းပိုင်ရှင်သည်... စောစီးစွာကတည်းက နိုးထလာခဲ့ပြီဖြစ်ကြောင်း သူ ခန့်မှန်းမိလိုက်၏။

ထိုမျှမကသေးဘဲ တိတ်တဆိတ်ပင် မိမိ၏ ခွန်အားများကို ပြန်လည်ရယူနေလောက်ပြီ ဖြစ်သည်။

စစ်တပ်၏ တုံ့ပြန်မှုက အလွန် နှေးကွေးလွန်းနေသည်။

လင်းယွမ်ကလည်း စကားအပိုတွေ ပြောမနေတော့ဘဲ ပြတ်ပြတ်သားသားပင် ရှင်းပြလိုက်သည်။ "ရှေးဟောင်း အစွမ်းပိုင်ရှင်တွေမှာ... သူတို့ရဲ့ စိတ်ဝိညာဉ် အသိစိတ်ကို အစိတ်စိတ်အမွှာမွှာ ခွဲထုတ်ပြီး... မျိုးရိုးဗီဇထဲကို ပေါင်းစပ်ထည့်သွင်းနိုင်တဲ့ နည်းလမ်းတစ်ခု ရှိတယ်"

"မျိုးရိုးဗီဇကနေ တစ်ဆင့် မျိုးဆက်တစ်ခုပြီးတစ်ခု လက်ဆင့်ကမ်းတဲ့ နည်းလမ်းနဲ့... သူတို့က နှောင်းလူတွေရဲ့ သွေးကြောတွေထဲမှာ အိပ်စက်နေကြတာ"

"ရေလွှမ်းမိုးပြီး ကမ္ဘာပျက်တဲ့ကပ်ဘေးကြီး နောက်တစ်ကြိမ် ပြန်ဖြစ်လာလို့... လူသားတွေဆီမှာ အစွမ်းတွေ ပြန်လည်နိုးထလာတဲ့အခါ... မျိုးရိုးဗီဇထဲမှာ ပုန်းအောင်းနေတဲ့ ရှေးဟောင်း အစွမ်းပိုင်ရှင်တွေရဲ့ စိတ်ဝိညာဉ် အသိစိတ်တွေပါ ပြန်လည် နိုးကြားလာတော့တာပဲ"

"အဲဒီအချိန်ကျရင်... ဒီရှေးဟောင်း အစွမ်းပိုင်ရှင်တွေက မျိုးရိုးဗီဇအဆင့် တိုက်ပွဲကနေ တစ်ဆင့်... မူလ ခန္ဓာကိုယ်ပိုင်ရှင်ကို ဝါးမျိုပြီး ဒုတိယဘဝကို ပြန် ရှင်နိုင်တာပေါ့"

ဤနေရာသို့ ရောက်သောအခါ လင်းယွမ်က အလွန်အမင်း အံ့အားသင့်နေကြသော ကျန်းယွီကျန်းနှင့် ဖုန်းကျန့်ကုန်းတို့ကို ကြည့်ကာ ခေါင်းအသာခါလိုက်သည်။ "ခင်ဗျားတို့က ဒါကိုတောင် မသိကြဘူးလား... ဒါဆို ရှေးခေတ်က လျှို့ဝှက်ချက်တွေကိုရော... ဘယ်လိုလုပ်ပြီး သိလာရတာလဲ"

ကျန်းယွီကျန်းနှင့် ဖုန်းကျန့်ကုန်းတို့မှာ လင်းယွမ်ပြောပြခဲ့သော အကြောင်းအရာများကို နားလည်သဘောပေါက်သွားရန် အချိန်အတော်ကြာအောင် ယူလိုက်ရ၏။

ထိုမေးခွန်းကို ကြားသောအခါ ကျန်းယွီကျန်းက လေးနက်သော လေသံဖြင့် ပြန်ဖြေသည်။ "အရင်တုန်းက ခင်ဗျားဆီကို ကျွန်တော် စာပို့ပြီး... ရေအောက် ရှေးဟောင်း သင်္ချိုင်းတစ်ခုကို တွေ့ထားတယ်ဆိုတဲ့ ကိစ္စကို မှတ်မိသေးလား"

"အဲဒီတုန်းက ရှေးဟောင်း သင်္ချိုင်းထဲမှာ ရှေးဟောင်း အစွမ်းပိုင်ရှင်တွေရဲ့ အလောင်းတွေ ရှိနေရုံတင်မကဘဲ... ရှေးဟောင်း မှတ်တမ်းစာရွက်စာတမ်း အများအပြားကိုပါ တွေ့ခဲ့ရတယ်... အဲဒီထဲမှာ ရှေးခေတ်က ရေလွှမ်းမိုးပြီး ကမ္ဘာပျက်တဲ့ ကပ်ဘေးအကြောင်းနဲ့... ရှေးဟောင်း အစွမ်းပိုင်ရှင်တွေ ထွန်းကားလာတဲ့ အကြောင်းတွေကို မှတ်တမ်းတင်ထားတယ်"

"ဒါတင်မကသေးဘူး... ရှေးဟောင်း အစွမ်း သင်္ကေတတွေ အကြောင်းကိုပါ အများကြီး ရေးမှတ်ထားသေးတယ်"

"အဲဒီ မှတ်တမ်းတွေကနေ တစ်ဆင့်ပဲ... ကျွန်တော်တို့က မိုးကြိုးမုန်တိုင်းဒေသကို ဖောက်ထွက်နိုင်မယ့် ယာဉ်ပျံ စက်ကိရိယာတွေကို... လျင်လျင်မြန်မြန် တီထွင်နိုင်ခဲ့တာ"

"အဲဒီလောက်နဲ့ မပြီးသေးဘူး... ရှေးဟောင်း သင်္ချိုင်းရဲ့ အတွင်းပိုင်းမှာလည်း သင်္ကေတ ပန်းပုရုပ်ကြွတွေကို အများကြီး ထွင်းထုထားတယ်... ကြည့်ရတာ ရှေးခေတ်တုန်းကတော့ အဲဒီ သင်္ကေတတွေက အလုပ်လုပ်နိုင်သေးတဲ့ ပုံပဲ"

"ကျွန်တော်တို့က အဲဒါတွေကို လေ့လာပြီး ပြုပြင်ပြောင်းလဲမှုတွေ လုပ်ခဲ့တယ်... ဒါကြောင့်ပဲ စစ်တပ်ရဲ့ သင်္ကေတ နည်းပညာတွေက... အဆက်မပြတ် တိုးတက်လာခဲ့တာ"

လင်းယွမ်က ပြုံးသလိုလို မဲ့သလိုလို အမူအရာဖြင့် ပြောလိုက်သည်။ "အဲဒါကြောင့်မို့လို့... နောက်ပိုင်းကျတော့ ခင်ဗျားက ကျွန်တော့်ကို ဆက်သွယ်ပြီး... ရှေးဟောင်း သင်္ချိုင်းကိစ္စတွေကို မျှဝေမပေးတော့တာပေါ့"

ကျန်းယွီကျန်း၏ မျက်နှာမှာ ချက်ချင်း အနေရခက်သွားတော့၏။ အစပိုင်းတုန်းက ထိုက်ယန်တောင်သို့ သူ စာပို့ခဲ့ရခြင်းမှာ... ရှေးဟောင်း သင်္ချိုင်းဂူထဲတွင် အန္တရာယ်များလှပြီး အစွမ်းထက်သော သန္ဓေပြောင်း သားရဲများ ရှိနေသောကြောင့် ဖြစ်သည်။

သို့သော် ထိုအချိန်က ကျန်းယွီကျန်းတို့အနေဖြင့် ဤရှေးဟောင်း သင်္ချိုင်းထဲတွင် ထိုကဲ့သို့သော အရေးကြီး အချက်အလက်များ ရှိနေမည်ဟု မသိခဲ့ကြပေ။ အတွင်း၌ လျှို့ဝှက်ချက် တစ်ခုခု ရှိနေမည်ဟုသာ ထင်မှတ်ခဲ့ကြသည်။

ထို့ကြောင့် နောက်ဆုံးတွင် မျိုးရိုးဗီဇ ပြန်လည်ဖွဲ့စည်းခြင်း၌ ကျွမ်းကျင်သူ လင်းယွမ်အား... အတူတကွ သွားရောက်စူးစမ်းရန် စာရေးဖိတ်ခေါ်ခဲ့ခြင်း ဖြစ်သည်။

သို့သော် ထိုစဉ်က လင်းယွမ်မှာ မြူခိုးမြို့တော် ကိစ္စဖြင့် အလုပ်များနေသဖြင့် မအားလပ်ခဲ့ပေ။ နောက်ဆုံးတွင် စစ်တပ်ဘက်မှ မိမိဘာသာ စူးစမ်းရှာဖွေခဲ့ကြပြီး... ရှေးဟောင်း အစွမ်းပိုင်ရှင်များ၏ လျှို့ဝှက်ချက် အချို့ကို တွေ့ရှိသွားခဲ့ကြသည်။

ထိုအခါမှ ကျန်းယွီကျန်းက ထိုက်ယန်တောင်နှင့် အဆက်အသွယ်ကို ပြတ်ပြတ်သားသား ဖြတ်တောက်လိုက်ပြီး ဤကိစ္စကို ထပ်မံ မပြောဆိုတော့ခြင်း ဖြစ်သည်။

"ကိုလင်းယွမ်... အဲဒီအချိန်တုန်းက ခင်ဗျားသာ ကျွန်တော့်နေရာမှာဆိုရင်လည်း... ပြဿနာအသစ်တွေ ထပ်မရှာချင်တော့မှာ သေချာပါတယ်"

"ရှေးဟောင်း အစွမ်းပိုင်ရှင်တွေလို လျှို့ဝှက်ချက်မျိုးကို... တခြားသူတွေ အလွယ်တကူ သိခွင့် မပေးသင့်ဘူးလေ... အဲဒီတုန်းက ကျွန်တော့်ရဲ့ ဆုံးဖြတ်ချက်ကို ခင်ဗျားလည်း နားလည်ပေးသင့်ပါတယ်"

လင်းယွမ်က လှောင်ပြုံး ပြုံးလိုက်ပြီး "နားလည်တာပေါ့... ကျွန်တော် သေချာပေါက် နားလည်ပါတယ်... ဒါပေမဲ့ တပ်မှူးကျန်း... နားလည်ပေးတာက နားလည်ပေးတာပဲ... အဲဒါက ကျွန်တော် လက်ခံနိုင်တယ်လို့ ဆိုလိုတာ မဟုတ်ဘူးနော်"

ကျန်းယွီကျန်းက သက်ပြင်းတစ်ချက်ချလိုက်ပြီး... အနည်းငယ် စိတ်ပျက်သွားဟန် ရှိသည်။

ရှေးဟောင်း အစွမ်းပိုင်ရှင်များ၏ လျှို့ဝှက်ချက်များနှင့်... သူတို့ ချန်ထားခဲ့သော သင်္ကေတ နည်းပညာများသည်... မိမိအတွက် အကြီးမားဆုံးသော ဝှက်ဖဲဟု သူ ထင်မှတ်ထားခဲ့သည်။

ယခုအခြေအနေကို ကြည့်ရလျှင် လင်းယွမ်သည် ဤအချက်များကို စောစီးစွာကတည်းက သိရှိထားပြီး ဖြစ်ရာ... သူ၏ ဖဲချပ်များထဲမှ အရေးကြီးဆုံး တစ်ချပ်က ရုတ်တရက် လျော့နည်းသွားခဲ့ပြီ ဖြစ်သည်။

ထိုဖဲချပ်က အရေးအကြီးဆုံး ဖဲချပ်တစ်ခုပင် ဖြစ်နေသေးသည်။ ယခုအချိန်တွင် သူက စိတ်ဓာတ်ကျဆင်းစွာဖြင့် မေးလိုက်သည်။ "ဒါဆိုရင် ကိုလင်းယွမ်... ခင်ဗျားက ဘယ်လိုလုပ်ချင်လို့လဲ"

"လောလောဆယ် ကျွန်တော် ထုတ်ပြနိုင်တဲ့ အရာတွေက... ဒါတွေပဲ ရှိတော့တယ်"

လင်းယွမ်က ခေါင်းအသာခါလိုက်ပြီး "ခင်ဗျားတို့ ရလာတဲ့ ရှေးဟောင်း အစွမ်းပိုင်ရှင်တွေရဲ့ လျှို့ဝှက်ချက်တွေကို ကျွန်တော် စိတ်မဝင်စားပါဘူး... ရှေးဟောင်း အစွမ်းပိုင်ရှင်တွေ ချန်ထားခဲ့တဲ့ သင်္ကေတ နည်းပညာ ဆိုတာကလည်း... ပွင့်ပွင့်လင်းလင်း ပြောရရင်... ဘာမှ ထူးခြားတယ်လို့ ကျွန်တော် မထင်ဘူး"

ဘေးနားတွင် အချိန်အတော်ကြာအောင် စကားမပြောဘဲ နေနေသော ဖုန်းကျန့်ကုန်းက ရုတ်တရက် ဝင်ပြောလိုက်သည်။ "ပျံသန်းရေးယာဉ် နည်းပညာကရော... ခင်ဗျားအတွက် ထူးခြားမှု မရှိဘူးလား"

လင်းယွမ်က သူ့ကို တစ်ချက်ကြည့်လိုက်ပြီး ရယ်မောလိုက်သည်။ "ကျွန်တော်တို့ ထိုက်ယန်တောင်က... ကိုယ်ပိုင် ပျံသန်းရေးယာဉ်တွေကို တီထွင်ပြီးတာ ကြာလှပြီ"

"ခင်ဗျားတို့ တကယ်ကို နောက်ကျကျန်ခဲ့ပြီပဲ"

ထိုစကားကြောင့် ဖုန်းကျန့်ကုန်းနှင့် ကျန်းယွီကျန်းတို့၏ မျက်နှာများ တစ်ဖန် ပြောင်းလဲသွားပြန်သည်။

"မဖြစ်နိုင်တာ... အဲဒီ မိုးကြိုးမုန်တိုင်းဒေသက ဘယ်လောက် ကြောက်စရာကောင်းလဲ ဆိုတာ ကျွန်တော်တို့ အသိဆုံးပဲ... မိုးကြိုးမုန်တိုင်းဒေသကို ဖောက်ထွက်နိုင်မယ့် နည်းပညာကို ခင်ဗျားတို့က ဘယ်ကနေ ရလာတာလဲ"

ကျန်းယွီကျန်းက ချက်ချင်းပင် အော်ဟစ်လိုက်ပြီး... သူ၏ မျက်နှာပေါ်တွင် မယုံကြည်နိုင်မှုများ အထင်းသား ပေါ်လွင်နေ၏။

လင်းယွမ်ကလည်း စကားအပိုတွေ ပြောမနေတော့ဘဲ ဖုန်းကို တိုက်ရိုက် ထုတ်ယူလိုက်ကာ... ဓာတ်ပုံပြခန်းကို ဖွင့်ပြီး တစ်ဖက်လူထံသို့ ပစ်ပေးလိုက်သည်။

ကျန်းယွီကျန်းက မသိစိတ်ဖြင့် လှမ်းဖမ်းလိုက်ပြီး ကြည့်လိုက်ရာ... ထိုအရာက ဗီဒီယိုဖိုင် တစ်ခုဖြစ်နေသည်ကို တွေ့လိုက်ရသည်။

ဗီဒီယိုထဲတွင်... ထိုက်ယန်တောင်၏ ပျံသန်းရေးယာဉ်များ အကြီးအကျယ် စမ်းသပ်ပျံသန်းနေသည့် မြင်ကွင်းများကို ပြသနေသည်။

ပန်းကန်ပြားပျံ ပုံစံရှိသော ပျံသန်းရေးယာဉ်များသည် ကောင်းကင်ယံတွင် လိုရာအရပ်သို့ လွတ်လပ်စွာ လမ်းကြောင်းပြောင်းနိုင်ရုံသာမက... အထက်အောက် ဒေါင်လိုက် ပျံသန်းနိုင်ပြီး အသံထက်မြန်သော အရှိန်ဖြင့် တိမ်တိုက်များထဲသို့ မျက်စိတစ်မှိတ်အတွင်း ထိုးဖောက်ဝင်ရောက်သွားသည်ကို မြင်တွေ့လိုက်ရသည်။

မိုးကြိုးမုန်တိုင်းများကြားတွင် ဘေးကင်းလုံခြုံစွာဖြင့် ဟိုဟိုဒီဒီ သွားလာပျံသန်းနေကြသည်။

ဗီဒီယို၏ နောက်ဆုံးတွင်မူ... လေပေါ်ကျွန်း ၏ မြင်ကွင်းအချို့ပင် ပါဝင်လာခဲ့သည်။

ဤပျံသန်းရေးယာဉ်သည် မိုးကြိုးမုန်တိုင်း တိမ်တိုက်များအထက်သို့ တကယ်ပင် ပျံသန်းရောက်ရှိခဲ့ကြောင်း သေချာသွားလေပြီ။

ဗီဒီယိုထဲမှ အကြောင်းအရာများကို မြင်တွေ့လိုက်ရသောအခါ ကျန်းယွီကျန်း၏ မျက်နှာသည်... အံ့အားသင့်မှုမှ မယုံကြည်နိုင်မှုအဖြစ်သို့... ထိုမှတစ်ဆင့် တဖြည်းဖြည်း ခါးသက်နာကြည်းမှုအဖြစ်သို့ ပြောင်းလဲသွားတော့သည်။

ဖုန်းကျန့်ကုန်းသည် ထိုမြင်ကွင်းကို မြင်လိုက်ရသဖြင့် ချက်ချင်း လျှောက်လာပြီး "ဘာမို့လို့လဲ" ဟု မေးလိုက်သည်။

ကျန်းယွီကျန်းက သက်ပြင်းချလိုက်ပြီး ဗီဒီယိုဖိုင်ကို ဖုန်းကျန့်ကုန်းထံ ကမ်းပေးလိုက်သည်။ "မင်းဘာသာပဲ ကြည့်လိုက်ပါ"

သူက စိတ်ဓာတ်ကျဆင်းစွာဖြင့် ဝင်ထိုင်လိုက်ရာ... ခန္ဓာကိုယ်ထဲမှ ခွန်အားများ ရုတ်တရက် စုပ်ယူခံလိုက်ရသကဲ့သို့ ဖြစ်သွားလေသည်။

စစ်တပ်က အချိန်အတော်ကြာအောင် ပင်ပင်ပန်းပန်း လေ့လာစူးစမ်းခဲ့ရသော နည်းပညာများကို... အရပ်ဘက် အဖွဲ့အစည်းတစ်ခု၏ ခိုလှုံရေးစခန်းလေးက စောစီးစွာကတည်းက အောင်မြင်စွာ တီထွင်နိုင်ခဲ့လိမ့်မည်ဟု မထင်မှတ်ထားခဲ့ပေ။

ဤအရာက သူ၏စိတ်ကို အမှန်တကယ်ပင် လက်ခံနိုင်ရန် ခက်ခဲစေခဲ့သည်။

ဖုန်းကျန့်ကုန်းသည်လည်း ကြည့်ရှုပြီးသွားသောအခါ ဖုန်းကိုချလိုက်ပြီး... ဘာပြောရမှန်း မသိတော့ဘဲ တိတ်ဆိတ်သွားလေသည်။

လင်းယွမ်က လက်တစ်ချက် ဝှေ့ယမ်းလိုက်ရာ... ဖုန်းသည် သူ၏ လက်ထဲသို့ ပြန်လည်ပျံသန်း ရောက်ရှိလာသည်။

"ဒါတွေက ကျွန်တော်တို့ ထိုက်ယန်တောင်ရဲ့ ပျံသန်းရေးယာဉ် လေ့ကျင့်ရေး ဗီဒီယိုတွေနဲ့... မိုးကြိုးမုန်တိုင်း တိမ်တိုက်တွေ အထက်ကို စူးစမ်းလေ့လာခဲ့တဲ့ အခြေအနေတွေပဲ"

"အခုဆိုရင် ခင်ဗျားတို့ရဲ့ ရှေးဟောင်း အစွမ်း သင်္ကေတ နည်းပညာတွေအပေါ်... ကျွန်တော် တကယ်ကို စိတ်မဝင်စားဘူး ဆိုတာကို သေချာသိလောက်ပြီပေါ့"

ဖုန်းကို သိမ်းဆည်းလိုက်ပြီးနောက် လင်းယွမ်က မတ်တတ်ရပ်လိုက်ကာ ပြောလိုက်သည်။ "တပ်မှူးကျန်း... ခင်ဗျားက ကျွန်တော့်ကို ဖိတ်ခေါ်ခဲ့ပြီး... ဒီလောက်လေးပဲ စေတနာပြနိုင်မယ်ဆိုရင်တော့... ခင်ဗျားတို့နဲ့ ပူးပေါင်းပြီး ဟို... မုန်ယာအဖွဲ့အစည်း ကို တိုက်ခိုက်ဖို့ ကျွန်တော်တို့ ထိုက်ယန်တောင်ကို အကူအညီ တောင်းချင်တာ..."

သူက ပြုံးလိုက်ပြီး "အားနာပါတယ်... ဒီတန်ဖိုးက အရမ်းနည်းလွန်းနေတယ်"

"အရင်တုန်းက ကျွန်တော်တို့ ထိုက်ယန်တောင်ကို ဘာသာရေးဂိုဏ်းကြီး သုံးခုက ဝိုင်းရံတိုက်ခိုက်ခဲ့တုန်းက... ခင်ဗျားတို့ကို ကူညီပေးဖို့အတွက်... ကျွန်တော်တို့ ဘယ်လောက်အထိ တန်ဖိုးပေးဆပ်ခဲ့ရလဲ ဆိုတာ... ခင်ဗျားက ကျွန်တော့်ထက် ပိုပြီး ရှင်းရှင်းလင်းလင်း သိမယ်ထင်ပါတယ်"

"ကဲပါ... ခင်ဗျားတို့မှာ ထုတ်ပြစရာ ဒီလောက်ပဲ ရှိတယ်ဆိုရင်လည်း... ကျွန်တော် အရင် ပြန်လိုက်ပါဦးမယ်"

ကျန်းယွီကျန်းက လင်းယွမ် ပြန်တော့မည်ကို မြင်လိုက်ရသဖြင့် အလျင်အမြန် မတ်တတ်ရပ်ကာ ချက်ချင်း အော်ဟစ်လိုက်သည်။ "နေ... နေပါဦး"

လင်းယွမ်က ပြုံးလိုက်ပြီး ကျန်းယွီကျန်းကို လှမ်းကြည့်လိုက်သည်။

ကျန်းယွီကျန်း၏ မျက်နှာအမူအရာက အဆက်မပြတ် ပြောင်းလဲနေပြီး ရုတ်တရက် မေးလိုက်သည်။ "ကျွန်တော် ရဲရဲဝံ့ဝံ့ပဲ မေးလိုက်ပါရစေ... အခု ခင်ဗျားရဲ့ မျိုးရိုးဗီဇ ပြန်လည်ဖွဲ့စည်းခြင်း အဆင့်က ဘယ်လောက်အထိ ရောက်နေပြီလဲ"

ထိုစကားကြောင့် ဖုန်းကျန့်ကုန်းသည်လည်း ချက်ချင်း ခေါင်းမော့လာပြီး... လင်းယွမ်ကို စူးရဲသော အကြည့်များဖြင့် စိုက်ကြည့်နေတော့သည်။

လင်းယွမ်က ခေတ္တစဉ်းစားလိုက်ပြီး ဖုံးကွယ်မနေတော့ဘဲ ပြတ်ပြတ်သားသားပင် ဖြေလိုက်သည်။ "၃၀% ရှိသွားပြီ"

"ဘာ"

ဤတစ်ကြိမ်တွင် ဖုန်းကျန့်ကုန်းက အရင်ဆုံး အံ့သြတကြီး အော်ဟစ်လိုက်ပြီး... သူ၏ မျက်နှာပေါ်တွင် မယုံကြည်နိုင်မှုများ အပြည့်အဝ ပေါ်လွင်နေ၏။

သူက ချက်ချင်း မေးလိုက်သည်။ "ခင်ဗျား ဘယ်လိုလုပ်လိုက်တာလဲ"

ကျန်းယွီကျန်းကလည်း ရှုပ်ထွေးသော မျက်နှာထားဖြင့် လင်းယွမ်ကို ကြည့်ကာ မေးလိုက်သည်။ "ကျွန်တော် မှတ်မိတာ မမှားဘူးဆိုရင်... ခင်ဗျားမှာ အစွမ်းတွေ အများကြီးကို တစ်ပြိုင်နက်တည်း ပိုင်ဆိုင်ထားတယ် မဟုတ်လား"

"ယုတ္တိကျကျ တွေးကြည့်မယ်ဆိုရင်... ခင်ဗျားလို အစွမ်းပိုင်ရှင်မျိုးက မျိုးရိုးဗီဇ ပြန်လည်ဖွဲ့စည်းခြင်း အဆင့်ကို... ဒီလောက် မြန်မြန်ဆန်ဆန် မြှင့်တင်နိုင်စရာ အကြောင်းမရှိဘူး"

"ပိုင်ဆိုင်ထားတဲ့ အစွမ်းတွေက ရှုပ်ထွေးလေလေ... မျိုးရိုးဗီဇကလည်း ပိုရှုပ်ထွေးလေလေဖြစ်ပြီး... အဆင့်မြှင့်တင်ရတာ ပိုနှေးကွေးရမှာ မဟုတ်ဘူးလား"

"ခင်ဗျားမှာ ထူးခြားတဲ့ နည်းလမ်းတစ်ခုခုများ ရှိနေလို့လား"

လင်းယွမ်က မေးလိုက်သည်။ "ဒါက ခင်ဗျားတို့နဲ့ ဘာဆိုင်လို့လဲ"

"ခင်ဗျားဆီမှာ တကယ်ပဲ အဲဒီလိုနည်းလမ်း ရှိနေတာလား" ကျန်းယွီကျန်းက ခေါင်းမော့ကာ လင်းယွမ်ကို စိုက်ကြည့်လိုက်သည်။

ဖုန်းကျန့်ကုန်းသည်လည်း အသက်ရှူသံများ မြန်ဆန်လာပြီး လင်းယွမ်ကို ကြည့်နေ၏။

လင်းယွမ်က တည်ငြိမ်စွာပင် ဖြေလိုက်သည်။ "ရှိတယ်လို့ပဲ မှတ်လိုက်ပါ"

ဖုန်းကျန့်ကုန်းနှင့် ကျန်းယွီကျန်းတို့မှာ ချက်ချင်းပင် စိတ်လှုပ်ရှားသွားကြသည်။

မသိစိတ်၏ စေ့ဆော်မှုကြောင့်... သူတို့နှစ်ဦးစလုံးက ပြိုင်တူနီးပါး မေးလိုက်ကြသည်။ "ဘာနည်းလမ်းလဲ"

လင်းယွမ်က တဟဲဟဲ ရယ်မောလိုက်သော်လည်း ဘာမှ ဆက်မပြောပေ။

သူတို့နှစ်ဦးလည်း ချက်ချင်း သတိပြန်ဝင်လာကြသည်။ မျိုးရိုးဗီဇ ပြန်လည်ဖွဲ့စည်းခြင်း အဆင့်ကို မြှင့်တင်ပေးနိုင်သည့် နည်းလမ်းမျိုးကို... လင်းယွမ်က ဘယ်လိုလုပ်ပြီး အလွယ်တကူ ထုတ်ပြောပြပါမည်နည်း။

ကျန်းယွီကျန်း၏ မျက်နှာအမူအရာများ ပြောင်းလဲသွားပြီး... လင်းယွမ် စိတ်မရှည်တော့ဘဲ ထွက်ခွာရန် ပြင်လိုက်ချိန်တွင်ပင်...

သူက ရုတ်တရက် စကားစလိုက်သည်။ "ကိုလင်းယွမ်... ခင်ဗျားနဲ့ အပေးအယူလုပ်ဖို့ ကျွန်တော့်ဆီမှာ ထုတ်ပြစရာ ပစ္စည်းတစ်ခု ကျန်သေးတယ်"

ဆက်ရန်...