ကြိုတင်တွက်ချက်ထားခြင်း

သူတော်စင်အဆင့်တွင် ကျင့်ကြံသူအချို့သည် သူရဲကောင်းဝိညာဉ်များနှင့် စတင်ထိတွေ့ခွင့် ရရှိကြသည်။ သို့သော် ထိုသို့ဖြစ်ရန်မှာ ကြီးမားလှသော ကံတရားလိုအပ်ပြီး ထိုဝိညာဉ်များကို ပိုင်ဆိုင်သူမှာ အလွန်ရှားပါး၏။ ဤနေရာတွင် ရှိနေသူအားလုံးမှာ အင်မော်တယ်ဘုရင်များ ဖြစ်ကြပြီး ကိုယ်စီ ထူးခြားသောအတွေ့အကြုံ ရှိကြသူများဖြစ်သည်။ နှစ်ပေါင်းများစွာ ကြာမြင့်လာပြီးနောက် ၎င်းတို့အားလုံးသည် ကိုယ်ပိုင်သူရဲကောင်းဝိညာဉ်များကို ရရှိထားကြ၏။ ကျင့်ကြံသူတစ်ဦးသည် အများဆုံး သူရဲကောင်းဝိညာဉ် သုံးခုအထိသာ ပိုင်ဆိုင်နိုင်ပြီး တစ်ကြိမ်ရရှိပြီးပါက ပြန်လည်ပြောင်းလဲ၍မရနိုင်ပေ။

လျင်မြန်မှု သူရဲကောင်းဝိညာဉ်မှာ ရရှိရန်အလွန်ခက်ခဲသော အမျိုးအစားဖြစ်သဖြင့် ဂိုဏ်းချုပ်ကျန်းက ဤဝိညာဉ်ကို တိုက်တိုက်ဆိုင်ဆိုင်ပိုင်ဆိုင်ထားသည်ကို မြင်ရသည်မှာ အားလုံးအတွက် အံ့အားသင့်စရာ ဖြစ်နေသည်။

"ဂိုဏ်းချုပ်ကျန်းက ဒီလိုရှားပါးတဲ့ လျင်မြန်မှု သူရဲကောင်းဝိညာဉ်ကို တကယ်ပဲ ပိုင်ဆိုင်ထားလိမ့်မယ်လို့ ငါမထင်ထားခဲ့ဘူး"

အင်မော်တယ်ဘုရင် တုချန်သည် ထိုသူရဲကောင်းဝိညာဉ်ကို ကြည့်ကာ တုန်ရင်သော အသံဖြင့် ပြောလိုက်သည်

“ဒါက အဆင့်မြင့် သူရဲကောင်းဝိညာဉ်ပဲ။ တစ်လောကလုံးမှာရှိတဲ့ ကျင့်ကြံသူပေါင်း မရေတွက်နိုင်အောင်ထဲမှာ ဘယ်အဆင့်ပဲဖြစ်ဖြစ် လူ ၁၅ ယောက်ထက်မပိုဘဲ ပိုင်ဆိုင်နိုင်တဲ့အရာပဲ"

"၁၅ ယောက် ပြည့်သွားပြီဆိုရင် တခြားသူတွေ ဘယ်လောက်ပဲ ပါရမီထူးထူး ရဖို့ဆိုတာ မဖြစ်နိုင်တော့ဘူး"

"ဂိုဏ်းချုပ်ကျန်းက အဲဒီ ၁၅ ယောက်ထဲက တစ်ယောက် ဖြစ်နေလိမ့်မယ်လို့ ဘယ်သူထင်မှာလဲ..."

သူရဲကောင်းဝိညာဉ်များသည် ကျင့်ကြံသူ၏ အဆင့်အတန်းအပေါ် မူတည်ခြင်းမရှိပေ။ ကောင်းကင်ဘုံကို ဆန့်ကျင်နိုင်သော ကံတရားရှိသည့် သူတော်စင်အဆင့် ကျင့်ကြံသူတစ်ဦးသည် အဆင့်မြင့် သူရဲကောင်းဝိညာဉ်ကို စောစီးစွာ ရရှိနိုင်သော်လည်း၊ အင်မော်တယ်ဘုရင် တစ်ဦးမှာမူ တစ်ဘဝလုံး ကြိုးစားသော်လည်း အဆင့်နိမ့် ဝိညာဉ်နှစ်ခုသာ ရရှိနိုင်သည်။ ၎င်းတို့၏ ဆွေးနွေးမှုကို ကြားသောအခါ ကျန်းချန်သည် စိတ်ထဲမှရယ်မောမိ၏။ လျင်မြန်မှု သူရဲကောင်းဝိညာဉ်ကလည်း ကြွားလုံးထုတ်ရန် အသုံးဝင်နေသေးသည်ကိုး။

ထို့နောက် သူသည် သူ၏ မိုးပြာနဂါးသွေးမျိုးဆက်ရှိ ပုန်းကွယ်နေသော နဂါးတောင်ပံပါရမီကို အသက်သွင်းလိုက်ရာ သူ၏အမြန်နှုန်းမှာ ၄ ဆ ထပ်တိုးလာပြန်သည်။ ဤမျှဆိုလျှင် အနိုင်ရရန် လုံလောက်ပြီဟု သူ ခန့်မှန်းလိုက်၏။

"ကောင်းပြီ၊ မင်းတို့ ပွဲကြည့်စင်ပေါ်သွားပြီး အားပေးလို့ရပြီ"

လူအုပ်ကြီး သတိမဝင်လာခင်မှာပင် ထိုနေရာမှ ပျောက်ကွယ်သွားသည်။ သူပြန်ပေါ်လာသောအခါ သူ၏ လက်ဖဝါးထဲတွင် အရောင်မဲ့လိပ်ပြာကို ကိုင်ထားပြီးဖြစ်၏။ ဖြစ်စဉ်တစ်ခုလုံးမှာ မျက်တောင်တစ်ခတ်စာပင်မကြာဘဲ အလွန်လျင်မြန်လှသည်။ သူ၏ ယခင်ခန့်မှန်းချက်မှာ မှန်ကန်နေသည်၊ လိပ်ပြာကို ဖမ်းမိလိုက်သည်နှင့် ဤအဆင့်ပျောက်ကွယ်သွားပြီး ၎င်းတို့သည် ပြင်ပရှိ ဆဋ္ဌမနယ်ပယ်သို့ ပြန်ရောက်သွားကြသည်။

ကျန်းချန်ကိုယ်တိုင်ပင် အံ့အားသင့်သွား၏၊ သူက ကွင်းအတွင်း အပတ်ပေါင်းရာချီ လိုက်ဖမ်းရမည်ဟု ထင်ထားခဲ့ခြင်းဖြစ်သည်။ အမှန်တကယ်တွင်မူ အပိုဆောင်းစွမ်းရည်များလွန်းသဖြင့် သူ၏ အမြန်နှုန်းမှာ လိုအပ်သည်ထက်ပင်ပိုနေ၏။ အလွန်မြန်လှသောလိပ်ပြာမှာ သူ့အမြန်နှုန်းရှေ့တွင်မူ နှေးကွေးနေတော့သည်။ အခြားသူများမှာမူ အံ့အားသင့်လွန်းသဖြင့် ပါးစပ်အဟောင်းသား ဖြစ်သွားကြသည်။

ဒီအတိုင်းလေးပဲ အောင်မြင်သွားတာလား...

စမ်းသပ်မှုကို ကျော်ဖြတ်နိုင်သွားပြီဆိုတော့ သူဖမ်းမိသွားတာ သေချာသည်။

သို့သော် ပြဿနာမှာ ၎င်းတို့၏ မျက်စိဖြင့် မမြင်ရရုံသာမက အင်မော်တယ်ဝိညာဉ်များပင် ထိုဖြစ်စဉ်တစ်ခုလုံးကို အာရုံခံနိုင်စွမ်း မရှိခဲ့ခြင်းဖြစ်သည်။

ဤသည်မှာ အနည်းငယ် အစွမ်းထက်လွန်းနေသည် မဟုတ်ပါလား...

လျင်မြန်မှု သူရဲကောင်းဝိညာဉ်၏ အကူအညီပါလျှင်ပင် ဤအဆင့်အထိ မရောက်နိုင်သင့်ပေ။ လူတိုင်း သတိပြန်ဝင်လာသောအခါ အင်မော်တယ်ဘုရင် တုချန်သည် သူ၏ ဂုဏ်သိက္ခာကိုပင် ဂရုမစိုက်နိုင်တော့ဘဲ စိတ်လှုပ်ရှားစွာ ပြေးလာသည်။

"ဂိုဏ်းချုပ်ကျန်း... ခင်ဗျားက တကယ်ကို မြန်လွန်းတယ်"

"ခင်ဗျား ဒါကို ဘယ်လိုများ လုပ်လိုက်တာလဲ"

သူ ကျန်းချန်ကို ကြည့်ပုံမှာ နတ်ဘုရားတစ်ပါးကို ကြည့်နေသကဲ့သို့ပင် ဖြစ်နေသည်။ အခြားသူများကလည်း

"ဒီလို အမြန်နှုန်းမျိုးနဲ့ဆိုရင် သူက အင်မော်တယ် ဧကရာဇ်ကိုတောင် မီနေပြီမဟုတ်လား"

"မယုံနိုင်စရာပဲ"

ဟု ထပ်တလဲလဲ ရေရွတ်နေကြသည်။

မြောင်ယွိ၏ မျက်လုံးများတွင်လည်း မထိန်းချုပ်နိုင်သော အံ့အားသင့်မှုများ ရှိနေသည်။ အကယ်၍ ခုနက လူ ၂၀ ခွဲ၍ နေရာယူခဲ့လျှင်ပင် သေချာပေါက် ဖမ်းနိုင်မည်ဟု အာမမခံနိုင်ပေ။ အောင်မြင်မှုနှုန်း ပိုများလာရုံသာရှိမည်။ အောင်မြင်ခဲ့လျှင်ပင် အကြိမ်ပေါင်းများစွာ ကြိုးစားရမည်ဖြစ်သည်။

ဂိုဏ်းချုပ်ကျန်းကဲ့သို့ တစ်ကြိမ်တည်းနှင့် အိတ်ကပ်ထဲမှပစ္စည်းထုတ်သကဲ့သို့ လွယ်ကူစွာမလုပ်နိုင်ပေ။ ဤအမြန်နှုန်းအပြင် သူမကို ပို၍ အံ့အားသင့်စေသည်မှာ ကျန်းချန်၏ ကြိုတင်သိမြင်မှုဖြစ်သည်။ အမှန်အတိုင်းပြောရလျှင် ဤလူသည် ဆဋ္ဌမနယ်ပယ်သို့ ယခင်က ရောက်ဖူးသလားဟုပင် သူမ သံသယဝင်မိသည်။

မှန်ကန်သော ဝင်ပေါက်ကို ကြိုသိနေခြင်း၊ သဲလွန်စများကို ကြိုသိနေခြင်း၊ ဤအဆင့်မှာ လျင်မြန်မှုနိယာမကို စမ်းသပ်ခြင်းဖြစ်ကြောင်း ကြိုသိနေခြင်း... အားလုံးမှာ ပုံမှန်မဟုတ်။ ထို့နောက် ခရီးစဉ်မှာ ချောမွေ့ခဲ့ပြီး နှစ်လအကြာတွင် အဖွဲ့သည် ဆဋ္ဌမနယ်ပယ်၏ အဆုံးသို့ ရောက်ရှိလာ၏။ လမ်းခွဲတစ်ခုတွင် ဝင်ပေါက်နှစ်ခု ထပ်မံပေါ်လာပြန်သည်။

ဤနေရာတွင် မဟာအလောင်းကောင်ဘုရင် သုံးပါးနှင့် အခြားလေးဦးတို့ ရပ်တန့်လိုက်ကြသည်။ ၎င်းတို့သည် သတ္တမနယ်ပယ်၏ မူလစွမ်းအင်ကို မခံနိုင်တော့သဖြင့် ရှေ့ဆက်မသွားနိုင်ကြတော့ပေ။ ကျန်ရှိသော ၁၃ ဦးတွင် ကျန်းချန်ဘက်မှ ၈ ဦးနှင့် ထျန်းရှုခန်းမဘက်မှ ၄ ဦး ပါဝင်သည်။ အင်မော်တယ်ဘုရင် ရဲ့ယန်မှာမူ စတုတ္ထနယ်ပယ်၌ပင် ကျန်ရစ်ခဲ့ပြီဖြစ်သည်။

ရှေ့ရှိ အမည်မသိဝင်ပေါက်နှစ်ခုကိုကြည့်ကာ လူတိုင်းသည် ကျန်းချန်ကို တစ်ပြိုင်နက်တည်း ကြည့်လိုက်ကြ၏။ သူ၏ ယခင်အစွမ်းပြသမှုများမှာ အံ့ဖွယ်ကောင်းလွန်းသဖြင့် အားလုံးက သူ့အပေါ် မျှော်လင့်ချက်အပြည့် ရှိနေကြသည်။ မြောင်ယွိကိုယ်တိုင်ပင် စတင်မေးမြန်းလာသည်။

"ဂိုဏ်းချုပ်ကျန်း... ဒီဝင်ပေါက်နှစ်ခုအတွက် အကြံပြုချက်ရှိသလား"

ကျန်းချန်တွင် ဘာအကြံပြုချက်မှ မရှိပေ။ ဝင်ပေါက်နှစ်ခုမှာ ထပ်တူညီနေပြီး မဝင်ခင်အထိ အတွင်းမှာ ဘာရှိမှန်း မည်သူမျှ မသိနိုင်ပေ။ မှန်းဆချက်မှလွဲ၍ အခြားနည်းလမ်းမရှိ။

"မှန်ကန်တဲ့ ဝင်ပေါက်က ဒါပဲ"

သူသည် ညာဘက်ဝင်ပေါက်ကို ညွှန်ပြကာ ငြင်းပယ်၍မရသော အမှန်တရားတစ်ခုကဲ့သို့ အပြည့်အဝ ယုံကြည်ချက်ရှိရှိ ပြောလိုက်၏။ လူတိုင်းကလည်း သူ၏မိုက်မဲသောစကားကို ယုံကြည်သွားကြသည်။ သို့သော် သူ၏ ဦးဆောင်မှုဖြင့် ဝင်သွားသောအခါ မူလစွမ်းအင်မှာ လျော့နည်းသွားသည်။ ဤသည်မှာ ပဉ္စမနယ်ပယ်ဖြစ်ပြီး ငါးဆယ်-ငါးဆယ် အခွင့်အရေးရှိသော်လည်း သူ မှားယွင်းစွာ ခန့်မှန်းမိသွားသည်။

အားလုံးမှာ ဆွံ့အသွားကြ၏။

ဒါဆို ခင်ဗျားက တကယ်ပဲ လျှောက်ခန့်မှန်းနေတာလား...

မှန်းဆနေတာဆိုရင် ဘာလို့ ခုနက ယုံကြည်ချက်တွေ အရမ်းရှိနေရတာလဲ...

မြောင်ယွိ၊ တုချန်နှင့် အခြားသူများ၏ စိတ်ပျက်အားလျော့နေသော အကြည့်များကို ကြည့်ကာ ကျန်းချန်၏ မျက်နှာမှာ အနည်းငယ် နီမြန်းလာသည်၊ သူ အမှားလုပ်မိသွားပြီ။

ပြန်လုပ်မယ်၊ ပြန်လုပ်မယ်...

သူသည် အချိန်ပြန်လှည့်ခြင်းကို အမြန်အသက်သွင်းလိုက်ပြန်သည်။ ဝုန်းခနဲပင် လူတိုင်း ယခင်အချိန်သို့ ပြန်ရောက်သွား၏။ ဝင်ပေါက်နှစ်ခုရှေ့တွင် မြောင်ယွိက သူ့ကို ထပ်မံမေးမြန်းပြန်သည်။

"ဂိုဏ်းချုပ်ကျန်း... ဒီဝင်ပေါက်နှစ်ခုအတွက် အကြံပြုချက် ရှိပါသလား"

"ဘယ်ဘက်"

ကျန်းချန်သည် ဘယ်ဘက်သို့ ရုတ်တရက် ညွှန်ပြလိုက်သည်

"မှန်ကန်တဲ့ ဝင်ပေါက်က ဒါပဲ"

"ငါ့ရဲ့ တစ်ဘဝစာ ကျင့်ကြံမှုကို လောင်းကြေးထပ်ရဲတယ်၊ အကယ်၍ ငါမှားသွားခဲ့ရင် ငါ့ရဲ့ ကျင့်ကြံမှုတွေ အကုန်ဆုံးရှုံးပါစေ၊ ဒီဘဝမှာ ရှေ့ဆက်တိုးတက်ဖို့ အခွင့်အရေး မရှိပါစေနဲ့"

ဤကျိန်ဆိုမှုကြောင့် လူတိုင်း ကြောက်လန့်သွားကြသည်။ ကျိန်ဆိုမှုကို ဖောက်ဖျက်နိုင်သော်လည်း ၎င်းတို့၏ အဆင့်တွင် ကျိန်ဆိုမှုဖောက်ဖျက်ခြင်းက တာအိုနှလုံးသားကို ထိခိုက်စေနိုင်သည်။ နောင်တစ်ချိန် အဆင့်တက်ရာတွင် နှလုံးသားမိစ္ဆာများ ပေါ်လာနိုင်သည်။ ထို့ကြောင့် အင်မော်တယ်များသည် ယေဘုယျအားဖြင့် ကျိန်ဆိုမှု မပြုလုပ်ကြပေ။

"ဂိုဏ်းချုပ်ကျန်း... ခင်ဗျား ဒီလောက်အထိ လုပ်စရာမလိုပါဘူး..."

အားလုံးက တားဆီးကြသည်။ သူမှားသွားခဲ့လျှင် ဘာဖြစ်မည်ကို မည်သူမျှမပြောခဲ့ကြသော်လည်း သူက အလေးအနက်ထားလွန်းနေသည်။

"မဟုတ်ဘူး"

ကျန်းချန်က လေးနက်သော အသံဖြင့် ပြောလိုက်သည်

"ငါသာ မှားသွားရင် နောက်ပိုင်းမှာ ပြဿနာတွေ အများကြီး ဖြစ်လာလိမ့်မယ်... လူတိုင်းရဲ့ ကံကြမ္မာက ငါ့အပေါ်မှာ မူတည်နေတဲ့အတွက် ငါ တာဝန်ယူရမယ်... ဒါက ငါ့ရဲ့မူဝါဒပဲ"

လူတိုင်းသည် ချက်ချင်းပင် လေးစားမှုများဖြင့် ပြည့်နှက်သွားကြသည်။ ကျန်းချန်မှာမူ စိတ်ထဲမှ ကြိတ်ရယ်မောနေ၏။ သူက ညာဘက်ကို စမ်းကြည့်ပြီးသားဖြစ်ရာ ဘယ်ဘက်မှာ သေချာပေါက် မှန်နေပြီဖြစ်သဖြင့် တမင်ကြွားလုံးထုတ်နေခြင်းသာ။ သူသည် ဘယ်ဘက်ဝင်ပေါက်သို့ ပထမဆုံး စတင်ဝင်ရောက်လိုက်ရာ အမှန်တကယ်ပင် ဤဘက်မှာ သတ္တမနယ်ပယ် ဖြစ်သည်။

ကျန်သော ၁၂ ဦး ဝင်လာသောအခါ ၎င်းတို့အားလုံး အပြည့်အဝ ယုံကြည်သွားကြတော့သည်။

"ဂိုဏ်းချုပ်ကျန်း ထပ်ပြီး မှန်ကန်စွာ ရွေးချယ်နိုင်ခဲ့ပြန်ပြီ"

"ဒါက တကယ်ကို နတ်ဘုရားတစ်ပါးလိုပါပဲ"

"ခုနက ဂိုဏ်းချုပ်ကျန်း ဘယ်လောက်တောင် သေချာနေလဲဆိုတာ ကြည့်ရင် ဝင်ပေါက်ကို ကြိုမြင်နိုင်တဲ့ ထူးခြားတဲ့ နည်းလမ်းတစ်ခုခု ရှိနေတာလား"

မြောင်ယွိက မအောင့်နိုင်တော့ဘဲ မေးမြန်းလိုက်သည်

"ဂိုဏ်းချုပ်ကျန်း... ရှင် သတ္တမနယ်ပယ်ကို အရင်က ရောက်ဖူးတာလား"

ဤမျှအထိ ကြိုတင်သိမြင်မှုများ ရှိနေခြင်းမှာ တိုက်ဆိုင်မှုဟုပြောရန် ခက်ခဲလှသည်။ ယခု ကျန်းချန်က မှန်းဆခဲ့ခြင်းဖြစ်သည်ဟု ပြောလျှင်ပင် သူမ ယုံကြည်တော့မည်မဟုတ်ပေ။

"ဟူး... ဒါကို ဖုံးကွယ်ထားလို့ မရတော့ဘူး ထင်ပါရဲ့"

ကျန်းချန်က သက်ပြင်းချကာ ဖြည်းညှင်းစွာ ပြောလိုက်သည်

"ငါ ဒီကို မရောက်ဖူးပါဘူး။ ငါ ဝင်ပေါက်ကို ကြိုမြင်နိုင်တဲ့ အကြောင်းရင်းက ငါက တွက်ချက်ခြင်းနိယာမို ကျွမ်းကျင်လို့ပဲ။ ဒီဝင်ပေါက်နှစ်ခုလုံးကို ငါ ကြိုတင်တွက်ချက်ထားခဲ့တာ"

သူသည် အချိန်ပြန်လှည့်ခဲ့ခြင်းကိုမပြောဘဲ ဤအခွင့်အရေးကိုသုံးကာ နောက်ထပ်တစ်ကြိမ် ကြွားလုံးထုတ်လိုက်ပြန်တော့သည်။