အခန်း (၁၈၀၃-၁၈၀၄)

အခန်း (၁၈၀၃) -တမန်တော် လူကြီးမင်း... ခင်ဗျား ဘာမှမဖြစ်ဘူးမလား

"အဲဒီတော့... ဖန့်မျိုးနွယ်စုထဲမှာ အဘိညာဉ်ရှင်တစ်ယောက် ပေါ်ထွက်လာတိုင်း ဘာပဲဖြစ်ဖြစ် မဟာကျိုးနိုင်ငံရဲ့ အပြင်ဘက်ကို ခေါ်ဆောင်သွားခံရမှာပေါ့၊ ဟုတ်တယ်မလား"

ဖန့်ချန်က ခပ်ဖွဖွ ပြုံးလျက် မေးလိုက်သည်။

ဝမ်မျိုးနွယ်စု အဘိညာဉ်ရှင်က ခေါင်းကို ဖြည်းဖြည်းချင်း ညိတ်ပြလိုက်ပြီး ဖန့်ချန်၏ ထိုခန့်မှန်းချက်မှာ အမှန်ဖြစ်ကြောင်း အတည်ပြုပေးလိုက်သည်။

ဖန့်မျိုးနွယ်စုဝင်များအားလုံး၏ မျက်နှာတွင် ထိတ်လန့်တုန်လှုပ်မှု အရိပ်အယောင်များ ပေါ်လာကြသည်။ သူတို့လည်း အခြေအနေကို နားလည်သွားကြပြီ ဖြစ်သည်။ ဖန့်မျိုးနွယ်စု၏ ဘိုးဘေးများသည် နတ်ဘုရားနယ်မြေ၏ အပြင်ဘက်တွင် ပုဂ္ဂိုလ်ကြီးတစ်ပါးကို စော်ကားမိခဲ့သဖြင့် ယခုအခါ မိမိတို့၏ ဇာတိမြေသို့ ပြန်မလာနိုင်ကြတော့ပေ။

ဇာတိမြေရှိ ဖန့်မျိုးနွယ်စုခွဲများအားလုံးမှာလည်း အစဉ်တစိုက် ဖိနှိပ်ခံနေကြရသည်။ ဟယ်ချွမ်း ဖန့်မျိုးနွယ်စုသာမက အခြားသော ဒေသအသီးသီးရှိ ဖန့်မျိုးနွယ်စုများပါ တစ်နေ့ထက်တစ်နေ့ အင်အားနည်းပါးလာရခြင်းမှာ အံ့သြစရာ မဟုတ်တော့ပေ။ တစ်ခါတစ်ရံ အဘိညာဉ်ရှင်တစ်ဦး ထွက်ပေါ်လာလျှင်ပင် မဟာကျိုးနိုင်ငံ၏ ဆုလာဘ်အချို့ကိုသာ ရရှိလိုက်ပြီး ထိုအဘိညာဉ်ရှင်ကို တမန်တော် က ခေါ်ဆောင်သွားသည်နှင့် တစ်ပြိုင်နက် မူလအခြေအနေအတိုင်း အင်အားပြန်နည်းသွားကြရမြဲပင်။

"မဟာကျိုးနိုင်ငံရဲ တမန်တော် က ဘယ်လောက်အထိ အစွမ်းထက်လဲ"

ဖန့်ချန်က ခပ်အေးအေး မေးလိုက်သည်။

"တမန်တော် လူကြီးမင်းရဲ့ အစွမ်းက အတိုင်းအဆမရှိ နက်ရှိုင်းလှပါတယ်၊ ကျွန်တော့် ခန့်မှန်းချက်အရ အခြေခံတည်ဆောက်ခြင်း အဆင့်ရဲ့ အထက်မှာ ရှိနေမှာပါ"

ဝမ်မျိုးနွယ်စု အဘိညာဉ်ရှင်က အသံတိုးတိုးဖြင့် ပြောလိုက်သည်။

"ဒီနေရာက လှုပ်ရှားမှုတွေဟာ တမန်တော် ရဲ့ အာရုံစိုက်မှုကို ရသွားလောက်ပါပြီ၊ မကြာခင်မှာ သူ ဒီကို ရောက်လာပြီး ခင်ဗျားတို့ ဖန့်မျိုးနွယ်စုရဲ့ အဘိညာဉ်ရှင်တွေကို ခေါ်သွားလိမ့်မယ်"

ထိုသို့ ပြောနေစဉ်မှာပင် သူ၏ ရင်ထဲ၌ တိတ်တဆိတ် ထိတ်လန့်နေမိသည်။ ဖန့်မျိုးနွယ်စု၏ လဲ့ကျူလက်ဝှေ့မှာ အမှန်တကယ်ပင် အစွမ်းထက်လှသည်။ အဘိညာဉ် အသစ်နိုးထလာသော ကလေးနှစ်ယောက်လုံးမှာ လျှပ်စီးကို ထိန်းချုပ်နိုင်ကြသည်။ နတ်ဘုရားနယ်မြေထဲတွင်ပင် လျှပ်စီးအဘိညာဉ်ဆိုသည်မှာ အလွန်ပင် ရှားပါးလှသည့် အစွမ်းမျိုး...

"အခြေခံတည်ဆောက်ခြင်းရဲ့ အထက်မှာလား"

ဖန့်ချန် စိတ်လှုပ်ရှားသွားပြီး ရုတ်တရက် ခပ်ဖွဖွ ရယ်မောလိုက်ကာ

"မင်းကရော ဘယ်အဆင့်မှာလဲ"

"ကျွန်တော်... ကျွန်တော်က..."

ဝမ်မျိုးနွယ်စု အဘိညာဉ်ရှင်က ထူးဆန်းသော မျက်နှာထားဖြင့် ကြည့်လာသည်။ တစ်ဖက်လူက သူ၏ ကျင့်စဉ်အဆင့်ကို မမြင်နိုင်ဘူးလား။

သူက စိတ်ထဲက အတွေးတွေကို ဖိနှိပ်ထားပြီး အမှန်အတိုင်းပင် ဖြေလိုက်သည်။

"ကျွန်တော်က အခြေခံတည်ဆောက်ခြင်း အဆင့်သုံးဆင့် ထဲက ပထမဆုံးအဆင့်ဖြစ်တဲ့ နိုးထခြင်း အဆင့်မှာပါ"

'ဒီအဆင့်သုံးဆင့်ဟာ အောက်အဆင့်လေးဆင့်၊ အလယ်အဆင့်သုံးဆင့်နဲ့ အထက်အဆင့်သုံးဆင့် နဲ့ ထပ်တူကျနေလောက်မယ်။ ဒါကြောင့် အခြေခံတည်ဆောက်ခြင်းရဲ့ အထက်မှာဆိုရင် အဆင့် ၁ မသေမျိုး အဆင့် ဖြစ်ရမယ်၊ ဒါပေမဲ့ ဒီခေတ်မှာ အဲဒီအဆင့်ကို ဘယ်လို ခေါ်သလဲဆိုတာတော့ မသိသေးဘူး'

ဖန့်ချန်က စိတ်ထဲကနေ တွေးတောနေမိသည်။

စွမ်းအားဆိုသည်မှာ များသောအားဖြင့် တူညီတတ်ကြသည်။ လမ်းစဉ်ချင်း မတူညီလျှင်ပင် အဆင့်တစ်ခုချင်းစီတွင် တူညီသော ဆက်စပ်အချက်များ ရှိနေပေလိမ့်မည်။ ယခုခေတ် လူသားမျိုးနွယ် ကျင့်ကြံနေသော လမ်းစဉ်မှာ ဟင်းလင်ပြင် အမြင့်ဆုံး မဟာမိတ်အဖွဲ့ က ပေးထားသော လမ်းစဉ်အတိုင်း ဖြစ်နေနိုင်သော်လည်း 'အခြေခံတည်ဆောက်ခြင်း' ၏ အထက်မှာမူ နယ်မြေကိုးခု၏ အဆင့် ၁ မှ အဆင့် ၉ မသေမျိုးအထိ အဆင့်များနှင့် ထပ်တူကျနေပေလိမ့်မည်။ ထို့နောက်တွင်မှ ကန့်သတ်ချက်ကျော်လွန်ခြင်း၊ သူတော်စင်တစ်ပိုင်းနှင့် သူတော်စင်အဆင့်များ ဖြစ်လာကြခြင်းပင်။

"အခြေခံတည်ဆောက်ခြင်းရဲ့ ဒုတိယအဆင့်နဲ့ တတိယအဆင့်ကို ဘယ်လိုခေါ်သလဲ "

ဖန့်ချန်က ခပ်အေးအေး မေးလိုက်ပြန်သည်။

"ဒါက..."

ဝမ်မျိုးနွယ်စု အဘိညာဉ်ရှင်မှာ အမှန်တကယ်ပင် မှင်တက်သွားရသည်။ တစ်ဖက်လူက ဘာကြောင့် ဤမျှလောက် အခြေခံကျသော မေးခွန်းမျိုးကို မေးနေရသနည်း။

ဖန့်လုံရှန်း တစ်ယောက်သာလျှင် ဖန့်ချန်၏ ရှင်းပြချက်ကို ကြားဖူးထားသဖြင့် ဖန့်ချန်သည် သူ၏ မှတ်ဉာဏ်များ ကို ပြန်လည် ရှာဖွေနေခြင်း ဖြစ်ကြောင်း သိနေသည်။

"မင်းက အပြင်လောကကနေ ခိုးဝင်လာတဲ့ ဖန့်မျိုးနွယ်စု အဘိညာဉ်ရှင် ဖြစ်နေပြီးတော့ အခြေခံတည်ဆောက်ခြင်း အဆင့်သုံးဆင့်ရဲ့ အခေါ်အဝေါ်ကိုတောင် မသိဘူးလား "

ဝမ်မျိုးနွယ်စု အဘိညာဉ်ရှင် စကားမပြောနိုင်ခင်မှာပင် ကောင်းကင်ယံထက်မှ ဟိန်းထွက်လာသော အသံကြီးတစ်ခု လူတိုင်း၏ နားထဲသို့ တိုးဝင်လာသည်။

လူတိုင်း မော့ကြည့်လိုက်ကြရာ ပညာရှင်ဝတ်စုံကို ဝတ်ဆင်ထားပြီး နတ်ဘုရားတစ်ပါးကဲ့သို့ ခန့်ညားထည်ဝါသော အဖိုးအိုတစ်ဦးက ကောင်းကင်ယံမှနေ၍ လူတိုင်းကို ငုံ့ကြည့်နေသည်ကို မြင်လိုက်ရသည်။

'အပြင်လောကကနေ ခိုးဝင်လာတဲ့ ဖန့်မျိုးနွယ်စု အဘိညာဉ်ရှင် '

ထိုအခိုက်အတန့်တွင် လူတိုင်း၏ စိတ်ထဲရှိ သံသယများအားလုံး ရှင်းလင်းသွားတော့သည်။

မီးမေပယ်အကြီးအကဲမှာ ဖန့်ချန်ကို ကြောင်စီစီဖြင့် စိုက်ကြည့်နေမိသည်။ သူသည် ဤမျက်စိရှေ့မှ ပုဂ္ဂိုလ်မှာ မိမိတို့ ဖန့်မျိုးနွယ်စု၏ ဘိုးဘေးတစ်ဦး ဖြစ်နိုင်သည်ဟု လုံးဝ ထင်မထားခဲ့ပေ။

"တကယ်တော့ သူက ကျွန်မတို့ရဲ့ ဘိုးဘေးကြီး ဖြစ်နေတာပဲ..."

ဖန့်ကူးယွဲ့မှာ ဖန့်ချန်ကို ကြည့်ရင်း ရင်ထဲတွင် အကြီးအကျယ် တုန်လှုပ်နေမိသည်။

ဝမ်မျိုးနွယ်စု အဘိညာဉ်ရှင်မှာမူ အတိုင်းထက်အလွန် ဝမ်းသာသွားပြီး ချက်ချင်းပင် ဦးညွှတ်ဂါရဝပြုလိုက်သည်။

"ဝမ်ဟဲ့ က တမန်တော် လူကြီးမင်းကို ဂါရဝပြုပါတယ် "

တမန်တော်

ဖန့်မျိုးနွယ်စုဝင်များ၏ မျက်နှာများမှာ ဖြူလျော့သွားကြသည်။ မီးမေပယ်မျိုးနွယ်စုဝင်များမှာမူ ရှုပ်ထွေးလှသော မျက်နှာထားများ ရှိနေကြသည်။ တမန်တော် ပေါ်လာခြင်းသည် ဖန့်ဟိုင်၊ ဖန့်လင်းနှင့် ဤမျက်မမြင်ကြီးတို့ကို ခေါ်ဆောင်သွားတော့မည်ကို သူတို့ သိနေကြသည်။

ဖန့်မျိုးနွယ်စု၏ အခြေအနေမှာ ယခင်အတိုင်း ပြန်ဖြစ်သွားပေလိမ့်မည်။ မီးမေပယ်မျိုးနွယ်စုမှာလည်း ပြန်လည် အပြစ်ပေးခံရခြင်းမှ လွတ်မြောက်နိုင်ကောင်း လွတ်မြောက်ပေလိမ့်မည်။

သို့သော်... ဒါဟာ တကယ်ပဲ ကောင်းတဲ့အရာလား

တကယ်လို့ အပြင်လောကမှာရှိတဲ့ ဖန့်မျိုးနွယ်စု ဘိုးဘေးတွေက သူတို့ရဲ့ ပြဿနာတွေကို ဖြေရှင်းနိုင်ပြီး မဟာကျိုးနိုင်ငံကို ပြန်ရောက်လာတဲ့အခါ မီးမေပယ်မျိုးနွယ်စုခွဲရဲ့ လုပ်ရပ်တွေကို သိသွားရင် ဘယ်လိုမျိုး တုံ့ပြန်ကြမလဲ။

"ဒီလောက်အထိ တင်းတင်းကျပ်ကျပ် စောင့်ကြည့်နေတဲ့ ကြားကနေ အပြင်လောကကနေ ခိုးဝင်လာရဲတဲ့ ဖန့်မျိုးနွယ်စု အဘိညာဉ်ရှင် ရှိလိမ့်မယ်လို့ တကယ် မထင်ထားခဲ့ဘူး။ မင်း ငါနဲ့အတူ အလိုက်သင့် လိုက်ခဲ့မလား၊ ဒါမှမဟုတ် ငါကိုယ်တိုင်ပဲ တိုက်ခိုက်ပြီး ခေါ်သွားရမလား"

တမန်တော် သည် ဝမ်မျိုးနွယ်စု အဘိညာဉ်ရှင်ကို ဂရုမစိုက်ဘဲ ဖန့်ချန်ကိုသာ လှောင်ပြုံးဖြင့် ကြည့်နေသည်။

ဖန့်ဟိုင်နှင့် ဖန့်လင်းတို့မှာ ထိုစကားကို ကြားသည်နှင့် ထိတ်လန့်သွားကြပြီး မိမိတို့ ခန္ဓာကိုယ်အတွင်းရှိ နတ်ဘုရားလျှပ်စီး စွမ်းအားများကို မသိစိတ်ဖြင့် လှုံ့ဆော်လိုက်ကြရာ ကလေးနှစ်ယောက်မှာ လျှပ်စီးအလင်းတန်းများဖြင့် ဖုံးလွှမ်းသွားပြီး ကောင်းကင်ယံတွင်လည်း လျှပ်စီးများ ဝင်းခနဲ လက်သွားသည်။

တမန်တော် က ထိုမြင်ကွင်းကို ကြည့်ပြီး ပြုံးလျက် ခေါင်းခါလိုက်ကာ

"ဒီအတတ်က အခြေခံတည်ဆောက်ခြင်း ပထမအဆင့် အတွက်တော့ အလုပ်ဖြစ်ကောင်း ဖြစ်နိုင်ပေမဲ့ ငါ့အတွက်ကတော့ ကလေးကစားစရာပဲ"

ကလေးကစားစရာတဲ့လား

တမန်တော် က ဒီလောက်အထိ တောင် အစွမ်းထက်တာလား...

လူတိုင်းမှာ တစ်ဖက်လူ၏ စကားကြောင့် ထိတ်လန့်တုန်လှုပ်နေကြသည်။

နောက်တစ်စက္ကန့်မှာပင် လျှပ်စီးတန်းတစ်ခု ကျဆင်းလာသည်။

တမန်တော် မှာ နာကျင်စွာ အော်ဟစ်လိုက်ပြီး ဝမ်မျိုးနွယ်စု အဘိညာဉ်ရှင်၏ ဘေးသို့ ဒိန်းခနဲ ပြုတ်ကျသွားတော့သည်။ သူသည် ဝမ်မျိုးနွယ်စုဝင်ထက်ပင် ပိုမို ဆိုးရွားစွာ အပစ်ခံလိုက်ရပြီး သူ၏ ခန္ဓာကိုယ်ပေါ်မှ အသားနှင့် သွေးများမှာ တစ်ဝက်နီးပါး အငွေ့ပျံသွားကာ ဖြူဖွေးသော အရိုးများပင် ပေါ်ထွက်နေတော့သည်။

"......"

ဝမ်မျိုးနွယ်စု အဘိညာဉ်ရှင်မှာ တမန်တော် ကို ကြောင်စီစီ ကြည့်ရင်း

"တမန်တော် လူကြီးမင်း... ခင်ဗျား ဘာမှမဖြစ်ဘူးမလား"

လူတိုင်းမှာ ထိတ်လန့်တုန်လှုပ်သွားကြပြီး ဖန့်ဟိုင်နှင့် ဖန့်လင်းဆီသို့ မသိစိတ်ဖြင့် လှမ်းကြည့်လိုက်ကြသည်။

"မဟုတ်... မဟုတ်ဘူး၊ ကျွန်တော်တို့ မဟုတ်ဘူး..."

ဖန့်ဟိုင်နှင့် ဖန့်လင်းမှာ ဘာလုပ်ရမှန်းမသိအောင် ဖြစ်နေကြသည်။

ထိုအခိုက်အတန့်တွင်မှ လူတိုင်းမှာ အခြေအနေမှန်ကို သဘောပေါက်သွားကြပြီး ဖန့်ချန်ကို အလွန်အမင်း ထိတ်လန့်စွာ လှမ်းကြည့်လိုက်ကြသည်။

သူပဲ

မဟာကျိုးနိုင်ငံ အပြင်ဘက်ကနေ ပြန်လာတဲ့ ငါတို့ရဲ့ ဖန့်မျိုးနွယ်စု ဘိုးဘေးကြီးပဲ။

"တမန်တော် တောင်မှ... ဖန့်ဘကြီးရဲ့ တစ်ချက်တည်း တိုက်ခိုက်မှုကို မယှဉ်နိုင်ဘူးလား..."

ဖန့်ကူးယွဲ့မှာ ဖန့်ချန်ကို မယုံနိုင်လောက်အောင် ကြည့်နေမိသည်။ သူမ၏ စိတ်ထဲတွင် အမြဲတမ်း ယုံကြည်ထားသမျှ အရာအားလုံးမှာ ယခုအခါ ပြိုပျက်ကာ ရှုပ်ထွေးကုန်တော့သည်။

"အဆင့် ၉ ... ဒါ မဖြစ်နိုင်ဘူး... မင်းက ဘယ်သူလဲ အပြင်လောကကလူတွေက အဆင့် ၉ ရှိတဲ့သူကို ဘယ်လိုမှ ခိုးဝင်ခွင့် ပေးမှာ မဟုတ်ဘူး၊ ဒါ လုံးဝ မဖြစ်နိုင်တာ..."

တမန်တော် သည် သတိပြန်ဝင်လာသော်လည်း မြေပြင်ပေါ်တွင် ဝပ်လျက်သာ ရှိနေသေးပြီး ဖန့်ချန်ကို စိုက်ကြည့်နေသည်။

'အဆင့် ၉ ဒါဆို နယ်မြေကိုးခုက အဆင့်တွေနဲ့ တူနေတာပဲ'

ဖန့်ချန် စိတ်လှုပ်ရှားသွားပြီး အရေးကြီးသော အချက်အလက်သစ်တစ်ခုကို ထပ်မံ ရရှိလိုက်သည်။

သို့သော် သူသည် တမန်တော် ၏ မေးခွန်းကို ပြန်မဖြေခဲ့ပေ။ ခုနက သူ တိုက်ခိုက်လိုက်စဉ်မှာပင် တစ်စုံတစ်ဦးက သူ့ကို စောင့်ကြည့်နေသကဲ့သို့ ခံစားချက်မျိုး ထပ်မံ ပေါ်ပေါက်လာခဲ့သည်။

ဖန့်ချန် ကောင်းကင်ယံကို မော့ကြည့်လိုက်ရာ မသဲမကွဲပင် ခံစားချက်ကင်းမဲ့သော မျက်ဝန်းတစ်စုံကို မြင်လိုက်ရသလို ခံစားလိုက်ရသည်။ သို့သော် အတော်ကြာအောင် စောင့်ဆိုင်းနေသော်လည်း ထိုသူမှာ ပေါ်ထွက်လာပြီး တိုက်ခိုက်မည့် အမူအရာ မရှိပေ။

'ဟုတ်ပြီ... ဒီလူရဲ့ ကျင့်စဉ်အဆင့်က ငါနဲ့ သိပ်မကွာလောက်ဘူး၊ ဒါပေမဲ့ သူ တိုက်ခိုက်မလာတာက အဲဒီအချက်ကြောင့် မဟုတ်ဘူး။ ဟင်းလင်ပြင် အမြင့်ဆုံး မဟာမိတ်အဖွဲ့ အနေနဲ့ လူသားမျိုးနွယ်ရဲ့ အတွင်းရေး အကွဲအပြဲတွေကို ဝင်မစွက်ဖက်ဘူးဆိုတဲ့ အချက်ကြောင့်ပဲ ဖြစ်ရမယ်'

ဤအချက်ကို သေချာသွားသောအခါ ဖန့်ချန် စိတ်အေးသွားသည်။

ဤဟန်ချက်ညီမှုကြောင့်ပင် မဟာကျိုး ဖန့်မျိုးနွယ်စု၏ ဘေးအန္တရာယ်မှာ ပြဿနာ မရှိတော့ပေ။ ထို သူတော်စင်တစ်ပိုင်း ရှိနေသရွေ့ ကျန်သည့်သူများမှာ ဖန့်မျိုးနွယ်စုကို အလွန်အကျွံ မလုပ်ရဲကြပေ။

သူ၏ တည်ရှိမှုမှာမူ ဤနေရာတွင် အပြောင်းအလဲတစ်ခု ဖြစ်လာခဲ့ပြီ။ သို့သော် ဟန်ချက်ညီမှုကို ချိုးဖျက်နိုင်လောက်သည့် အခြေအနေအထိတော့ မရောက်သေးပေ။ တစ်ဖက်လူ သိသွားလျှင်ပင် သူ့တစ်ယောက်တည်းကိုသာ ပစ်မှတ်ထားပေလိမ့်မည်။

"ခုနက မေးခွန်းကိုပဲ ပြန်မေးမယ်၊ အခြေခံတည်ဆောက်ခြင်းရဲ့ ဒုတိယအဆင့်နဲ့ တတိယအဆင့်ကို ဘယ်လိုခေါ်သလဲ "

ဖန့်ချန်က ဝမ်မျိုးနွယ်စု အဘိညာဉ်ရှင်ကို ကြည့်ကာ မေးလိုက်သည်။

ထိုသူမှာ အလွန်အမင်း ထိတ်လန့်တုန်လှုပ်စွာဖြင့် အလောတကြီး ဖြေလိုက်သည်။

"စီနီယာကြီးကို တင်ပြပါတယ်၊ အခြေခံတည်ဆောက်ခြင်း ဒုတိယအဆင့်ကို နတ်ဘုရားနှင့် ဆက်သွယ်ခြင်း လို့ ခေါ်ပြီး တတိယအဆင့်ကိုလမ်းစဉ်နှင့် တစ်သားတည်းဖြစ်ခြင်း လို့ ခေါ်ပါတယ်"

နတ်ဘုရားနှင့် ဆက်သွယ်ခြင်း လမ်းစဉ်နှင့် တစ်သားတည်းဖြစ်ခြင်း

"နတ်ဘုရားနှင့် ဆက်သွယ်ခြင်း အဆင့်ရဲ့ ထူးခြားချက်က ဘာလဲ "

"မိမိရဲ့ ဝိညာဉ် ကို ခွဲထုတ်နိုင်တာပါ၊ အကြီးမားဆုံး ထူးခြားချက်ကတော့ သေဖို့ အလွန်ခက်ခဲသွားတာပါပဲ "

"လမ်းစဉ်နှင့် တစ်သားတည်းဖြစ်ခြင်း ကရော"

"လမ်းစဉ်ပေါင်း ထောင်သောင်းထဲက တစ်ခုကို ရွေးချယ်ပြီး မိမိခန္ဓာကိုယ်နဲ့ တစ်သားတည်းဖြစ်အောင် လုပ်ရတာပါ၊ အဲဒီ လမ်းစဉ်ရဲ့ စွမ်းအားကို ငှားယူသုံးစွဲနိုင်တာပါ "

'ဒါကြောင့် အခြေခံတည်ဆောက်ခြင်း ဒုတိယအဆင့်ရဲ့ အဓိကသော့ချက်က ဝိညာဉ်ခွဲထုတ်ခြင်း ဖြစ်ပြီး တတိယအဆင့်ရဲ့ သော့ချက်ကတော့ လမ်းစဉ်နဲ့ ပေါင်းစပ်ခြင်း ပဲ။ ဒီအချက်မှာ နယ်မြေကိုးခုက ကျင့်ကြံသူတွေ အားလုံးလည်း ကြုံတွေ့ခဲ့ရဖူးတာပဲ၊ ဒါကြောင့် အခြေခံအားဖြင့် အခြေခံတည်ဆောက်ခြင်း အဆင့်သုံးဆင့်ဟာ အောက်အဆင့်လေးဆင့်၊ အလယ်အဆင့်သုံးဆင့်နဲ့ အထက်အဆင့်သုံးဆင့် နဲ့ ဘာမှ မထူးခြားဘူး။ တိုက်ခိုက်နိုင်စွမ်းမှာတော့ အနည်းငယ် ကွာခြားမှု ရှိနိုင်ကောင်း ရှိနိုင်လိမ့်မယ်'

ဖန့်ချန်က တွေးတောနေမိတော့သည်။

အခန်း (၁၈၀၄) - လော့ရွှယ်မဟာမိတ်အဖွဲ့

တမန်တော်သည် ယခုအခါမှပင် သတိပြန်ဝင်လာဟန်ရှိပြီး သံသယစိတ်များဖြင့် မေးလိုက်သည်။

"ခင်ဗျားက မှတ်ဉာဏ်တွေ ပျောက်ဆုံးနေတာလား"

ထို့နောက် သူက မထိန်းနိုင်ဘဲ ရယ်မောလိုက်ကာ

"ကြည့်ရတာ ခင်ဗျား ပြန်လာတဲ့လမ်းမှာ တစ်ယောက်ယောက်နဲ့ တိုက်ခိုက်ခဲ့ပုံရတယ်၊ မှတ်ဉာဏ်တွေတောင် အထိခိုက်ခံရပြီး ပျောက်ဆုံးသွားတဲ့အထိပဲ။ အဲဒီလိုဆိုရင်တော့ သိပ်မကြာခင်မှာပဲ တစ်ယောက်ယောက်က ခင်ဗျားကို လိုက်ရှာလာတော့မှာပဲ"

စကားအဆုံးတွင် သူသည် ဒဏ်ရာရထားသည့် ခန္ဓာကိုယ်ပျက်ကြီးကို အားယူကာ ထလိုက်ပြီး ပတ်ဝန်းကျင်ရှိ လူများကို အကြည့်ဖြင့် ဝေ့ကြည့်လိုက်သည်။

"ဒီလူ ရှိနေတာက ခင်ဗျားတို့အတွက် ပြဿနာပဲ ယူဆောင်လာလိမ့်မယ်၊ ခင်ဗျားတို့ ဖန့်မျိုးနွယ်စုဟာ ဒီအတွက်ကြောင့် ပေးဆပ်ရလိမ့်မယ်"

လူတိုင်း ထိတ်လန့်သွားကြသည်။

"ခုနက ကျွန်တော့်သမီး ပြောပြီးပြီပဲ၊ ခင်ဗျားတို့က မဆင်မခြင် မလုပ်ရဲကြဘူးလေ၊ အဲဒါကြောင့်လည်း ဝမ်မျိုးနွယ်စု အဘိညာဉ်ရှင်က သွယ်ဝိုက်တဲ့နည်းလမ်းကို သုံးပြီး ကျွန်တော်တို့ ဖန့်မျိုးနွယ်စုရဲ့ အညံ့ဖျင်းဆုံး မျိုးနွယ်စုခွဲနဲ့ ပူးပေါင်းပြီး လဲ့ကျူလက်ဝှေ့ အပြည့်အစုံကို ခိုးယူဖို့ ကြိုးစားခဲ့တာပေါ့"

ဖန့်ယွဲ့က ရုတ်တရက် သတ္တိမွေးကာ ပြောလိုက်သည်။

"ဒါကြောင့် ကျွန်တော်တို့ ဖန့်မျိုးနွယ်စုအတွက် ဘာပြဿနာမှ ရှိလာမှာမဟုတ်ဘူး၊ ဟုတ်တယ်မလား"

မီးမေပယ်အကြီးအကဲနှင့် ဖန့်ရှန့်တို့၏ မျက်နှာများမှာ အလွန်ပင် ကြည့်ရဆိုးသွားတော့သည်။

တမန်တော်သည် ထိုစကားကို ကြားသောအခါ တိတ်ဆိတ်သွားသည်။

ဖန့်ယွဲ့သည် မိမိပြောသည်မှာ မှန်ကန်ကြောင်း ချက်ချင်း သိလိုက်သဖြင့် မျက်နှာတွင် ဝမ်းသာအားရ အရိပ်အယောင်များ ပေါ်လာပြီး ဖန့်မျိုးနွယ်စုဝင်များအားလုံးလည်း စိတ်သက်သာရာရကာ အသက်ရှူချနိုင်ကြတော့သည်။

"ငါ့ရဲ့ မှတ်ဉာဏ်အချို့ ပျောက်ဆုံးနေတာတော့ အမှန်ပဲ၊ ဖန့်မျိုးနွယ်စုရဲ့ ပုဂ္ဂိုလ်ကြီးက သူတော်စင်ကို ဘယ်လို စော်ကားမိခဲ့တာလဲဆိုတာ မင်း ငါ့ကို ပြောပြတာ ပိုကောင်းလိမ့်မယ်"

ဖန့်ချန်က ခပ်ဖွဖွ ပြုံးလျက် ဆိုသည်။

"ငါ မင်းကို ပြောမှာမဟုတ်ဘူး၊ သိချင်ရင် ကိုယ့်ဘာသာကိုယ် သွားမေးကြည့်"

တမန်တော်က ပါးစပ်ကို ဖြဲ၍ ရယ်မောလိုက်သည်။

ဝမ်မျိုးနွယ်စု အဘိညာဉ်ရှင်ကလည်း အလောတကြီးပင်

"ဒီကိစ္စရဲ့ အတွင်းရေးကို ကျွန်တော်မျိုး မသိပါဘူး"

ဟု ဆိုလာသည်။

"မင်းရဲ့ နောက်ကွယ်မှာ ရှိနေတာက မဟာကျိုး ပဲ မဟုတ်လား မဟာကျိုးဆိုတာ မင်းရဲ့ နောက်ကွယ်က မျိုးနွယ်စုပဲ"

ဖန့်ချန်က ရုတ်တရက် ဆိုလိုက်သည်

"တကယ်လို့ ငါက မဟာကျိုးကို အမြစ်ကနေ ဆွဲနုတ်လိုက်ရင် ဖန့်မျိုးနွယ်စုက ဘယ်လိုဖြစ်သွားမလဲ"

"မင်း လုပ်ရဲလား"

တမန်တော်မှာ ဒေါသနှင့် ထိတ်လန့်မှုတို့ ရောပြွမ်းသွားသည်။

"ငါ လုပ်ရဲ၊ မလုပ်ရဲဆိုတာကို ခင်ဗျား တစ်ချက်လောက် လောင်းကြေးထပ်ကြည့်မလား"

ဖန့်ချန်က ခေါင်းညိတ်ပြလိုက်သည်။

စက္ကန့်အနည်းငယ်မျှ တိတ်ဆိတ်သွားပြီးနောက် တမန်တော်က အေးစက်စွာ ပြောလာသည်။

"မင်းကို ပြောပြလည်း ဘာမှမထူးပါဘူး၊ မင်းတို့ ဖန့်မျိုးနွယ်စုရဲ့ အဲဒီ လဲ့ကျူ က မယူသင့်တဲ့ အရာတစ်ခုကို ယူခဲ့လို့ပဲ၊ အဲဒါက ဆယ့်ရှစ်ဆင့် လောရှီယန် ငရဲမျှော်စင်ပဲ။

လော့ရွှယ် သူတော်စင်က သူ့ကို အဲဒီအရာ ပြန်ပေးဖို့ တောင်းဆိုခဲ့ပေမဲ့ သူက မပေးချင်ဘူး၊ အဲဒါကြောင့်ပဲ ပြစ်မှုကျူးလွန်သူများ ဖြစ်လာခဲ့ကြတာ။

ဒါတွေကို သိရလို့ မင်းအတွက် ဘာထူးမှာလဲ။ မင်းက အဆင့် ၉ ပဲ ရှိသေးတာ၊ ကန့်သတ်ချက်ကျော်လွန်သူ မဟုတ်ဘူး။ ကန့်သတ်ချက်ကျော်လွန်သူ ဖြစ်နေရင်တောင် ဒီကိစ္စမှာ မင်း ဝင်ပါလို့မရဘူး၊ ဘာမှလည်း ပြောင်းလဲနိုင်မှာ မဟုတ်ဘူး"

ဖန့်ချန်သည် ဆယ့်ရှစ်ဆင့် လောရှီယန် ငရဲမျှော်စင် အကြောင်း ကြားလိုက်ရချိန်တွင် မျက်နှာ၌ ထူးခြားသော အမူအရာ မပြသော်လည်း ရင်ထဲ၌မူ လှိုင်းလုံးကြီးတစ်ခု တိုးဝင်လာသကဲ့သို့ ခံစားလိုက်ရသည်။

'ဆယ့်ရှစ်ဆင့် လောရှီယန် ငရဲမျှော်စင်' က ဒီခေတ်မှာလည်း ရှိနေတာလား အဲဒါက ဖန့်မျိုးနွယ်စုရဲ့ အဲဒီ သူတော်စင်တစ်ပိုင်း လက်ထဲမှာ ရှိနေတာလား။

ဒါက တိုက်ဆိုင်မှုလား

ဒါမှမဟုတ် သံသရာမသေမျိုးဂိုဏ်း က ဘိုးဘေးတွေ တမင်တကာ လုပ်ဆောင်ခဲ့တာလား။

'ပြီးပြည့်စုံတဲ့ သမိုင်းဝင်မသေမျိုးမှတ်တမ်း ထဲမှာ ဒီခေတ်အကြောင်းကို ရေးသားနိုင်တယ်ဆိုကတည်းက ဒီအချိန်မှာ သံသရာမသေမျိုးဂိုဏ်း ဆိုတာ ရှိနေခဲ့ပြီပဲ...'

ထိုအချက်ကို တွေးမိသဖြင့် ဖန့်ချန်က ခပ်အေးအေး မေးလိုက်သည်။

"လူသားမျိုးနွယ်မှာ စုစုပေါင်း သူတော်စင် ဘယ်နှစ်ပါး ရှိသလဲ"

"ကိုးပါး"

တမန်တော်က ဖြည်းဖြည်းချင်း ဆိုသည်။

သူ့ရင်ထဲ၌မူ အံ့သြသံသယ ဖြစ်နေမိသည်။

တစ်ဖက်လူက ဒဏ်ရာ အလွန်ပြင်းထန်သဖြင့် ဒီလောက်အထိ မှတ်ဉာဏ်တွေ ပျောက်ဆုံးနေတာတောင်မှ သူ့ကို တစ်ချက်တည်းနဲ့ နှိမ်နင်းနိုင်ခဲ့သည်။ ဒီလူက အမှန်တကယ်တော့ ဘယ်နှစ်ဆင့် များ ရှိနေတာလဲ။

'သူတော်စင် ကိုးပါးထဲမှာ သံသရာမသေမျိုးဂိုဏ်းက ဘိုးဘေးတစ်ယောက်ယောက် ပါဝင်နေမလား'

'ဒါမှမဟုတ် သံသရာမသေမျိုးဂိုဏ်း က ဒီခေတ်မှာ သူတော်စင်အဆင့်ကိုတောင် ကျော်လွန်နေပြီလား...'

ဖန့်ချန်သည် သံသရာမသေမျိုးဂိုဏ်း တွင် လျှို့ဝှက်ချက်များစွာ ရှိနေသည်ဟု ပို၍ ပို၍ ခံစားလာရသည်။ ဤကဲ့သို့သော အင်အားစုမျိုးက တကယ်ပဲ ပျက်သုဉ်းသွားနိုင်ပါ့မလား။

သံသရာမသေမျိုးဂိုဏ်း ကိုတောင် ပျက်သုဉ်းစေနိုင်တာက နောက်ပိုင်း လူသားမျိုးနွယ်တွေ ပြင်ပရန်သူရဲ့ ကျူးကျော်မှုကို ခံခဲ့ရလို့လား ဒါမှမဟုတ် သံသရာမသေမျိုးဂိုဏ်း တောင် ဝင်မစွက်ဖက်နိုင်တဲ့ ပြဿနာမျိုးနဲ့ ကြုံခဲ့ရလို့လား။

"ဖန့်မျိုးနွယ်စု ခေါင်းဆောင်... ဒီနေ့ ဘိုးဘေးကန်တော့ပွဲက ပြီးဆုံးသွားပြီ၊ ခင်ဗျား ဟယ်ချွမ်းဒေသရဲ့ အတွင်းရေးကိစ္စတွေကို စတင် စီမံသင့်ပြီ"

ဖန့်ချန်က စိတ်ထဲမှ အတွေးများကို ဖိနှိပ်ထားကာ ဖန့်လုံရှန်းကို ကြည့်၍ ခပ်ဖွဖွ ပြုံးလျက် ဆိုလိုက်သည်။

"ဟုတ်ကဲ့ပါ"

ဖန့်လုံရှန်းက ရိုသေစွာဖြင့် ခေါင်းညိတ်ပြလိုက်ပြီးနောက် မီးမေပယ်အကြီးအကဲကို ကြည့်လိုက်သည်။

"မီးမေပယ်မျိုးနွယ်စုခွဲ... လက်ထဲမှာရှိတဲ့ လုပ်ငန်းဆောင်တာတွေရဲ့ ၉၉ ရာခိုင်နှုန်းကို ပြန်အပ်ရမယ်၊ ဘာသဘောထားရှိလဲ"

"ဘာသဘောထားမှ မရှိပါဘူး"

မီးမေပယ်အကြီးအကဲက ဖြူလျော့သော မျက်နှာဖြင့် ပြောလိုက်သည်။

မီးမေပယ်မျိုးနွယ်စုဝင်များမှာလည်း ယခုအချိန်တွင် ဘာမှမပြောရဲကြတော့ဘဲ ဖန့်လုံရှန်း၏ စီရင်ချက်ကိုသာ နာခံလိုက်ကြရသည်။

"နောက်လာမယ့် နှစ်ပေါင်း ၃၀၀ အတွင်းမှာ ခင်ဗျားရဲ့ တိုက်ရိုက်မျိုးဆက်တွေကို လဲ့ကျူလက်ဝှေ့ ကျင့်ကြံခွင့် မပြုတော့ဘူး"

ဖန့်လုံရှန်းက ဆက်၍ ဆိုသည်

"ဖန့်ရှန့်နဲ့ ဖန့်ကျီတို့ရဲ့ ကျင့်စဉ်တွေကိုလည်း ဖျက်ဆီးပစ်ရမယ်"

ဖန့်ရှန့်မှာ ဖန့်လုံရှန်းကို မယုံနိုင်လောက်အောင် ကြည့်နေမိသည်။

မီးမေပယ်အကြီးအကဲမှာမူ ဤအခိုက်အတန့်တွင် ဆယ်နှစ်ခန့် အိုမင်းသွားဟန်ရှိကာ တိုးတိုးလေး ရေရွတ်နေမိသည်။

"အသက်ရှင်ခွင့် ရရင်ပဲ တော်ပါပြီ... အသက်ရှင်ခွင့် ရရင်ပဲ တော်ပါပြီ"

"ဖန့်ယွဲ့... မျိုးနွယ်စုဝင်တွေကို ခေါ်သွားပြီး မီးမေပယ်မျိုးနွယ်စုရဲ့ ပိုင်ဆိုင်မှုတွေကို စာရင်းစစ်လိုက်၊ တစ်လအတွင်း ပိုင်ဆိုင်မှု လွှဲပြောင်းတာတွေ အားလုံး ပြီးစီးရမယ်။

မီးမေပယ်မျိုးနွယ်စုနဲ့ ပြင်ပက ဆက်ဆံရေးတွေကိုလည်း ဖြတ်တောက်ရမယ်၊ ပြင်ပက အာဏာရှိတဲ့ မျိုးနွယ်စုတွေနဲ့ ပတ်သက်နေတဲ့သူတွေဟာ ဇနီးကို ကွာရှင်းမလား၊ ဒါမှမဟုတ် ဟယ်ချွမ်း ဖန့်မျိုးနွယ်စုကနေ ကိုယ့်ဘာသာ ထွက်သွားမလားဆိုတာ ရွေးချယ်ရမယ်။

ပြင်ပက အာဏာရှိတဲ့ မျိုးနွယ်စုတွေဆီကို လက်ထပ်သွားတဲ့သူတွေဆိုရင် သူတို့နဲ့ သူတို့ရဲ့ သားသမီးတွေပါ တစ်သက်လုံး ဖန့်မျိုးနွယ်စုထဲကို ခြေပြန်မချရတော့ဘူး၊ မျိုးနွယ်စုကနေ အမည်ပယ်ဖျက်လိုက်ပြီ"

ဖန့်လုံရှန်းသည် အမိန့်တစ်ခုပြီးတစ်ခုကို ထုတ်ပြန်လိုက်သည်။

ဖန့်ယွဲ့က ထိုအမိန့်များကို သေချာမှတ်သားပြီးနောက် သူ၏ လူများကို ခေါ်ကာ မီးမေပယ်မျိုးနွယ်စုဝင်များကို ခေါ်ဆောင်သွားတော့သည်။

ဖန့်ရှန့်နှင့် ဖန့်ကျီတို့၏ ကျင့်စဉ်များကိုလည်း ဖန့်ယွဲ့က ထိုနေရာမှာပင် ဖျက်ဆီးပစ်လိုက်သည်။

ဖန့်ရှန့်မှာ အစမှအဆုံးအထိ ပြန်လည်ခုခံဖို့ မရဲခဲ့ပေ။

ထျန်းဖန့်တောင်ပေါ်ရှိ ဖန့်မျိုးနွယ်စုဝင်များမှာ တစ်ယောက်ပြီးတစ်ယောက် ထွက်ခွာသွားကြပြီး နောက်ဆုံးတွင် ဖန့်လုံရှန်းပင်လျှင် တောင်ပေါ်မှ ဆင်းသွားတော့သည်။

အကြောင်းမှာ ဖန့်ချန်သည် တမန်တော်ကို မေးမြန်းစရာများ ရှိနေသေးသည်ကို သူ သိနေသောကြောင့် ဖြစ်သည်။ ထိုစကားများသည် ဖန့်မျိုးနွယ်စုမှ သာမန်လူများ ကြားသင့်သည့် စကားများ မဟုတ်ပေ။

"ဝမ်ဟဲ့... မင်းကို ဖန့်မျိုးနွယ်စုဆီကနေ လဲ့ကျူလက်ဝှေ့ကို လုယူဖို့ ခိုင်းစေခဲ့တဲ့သူက ဘယ်သူလဲ"

ဖန့်ချန်က ခပ်ဖွဖွ ပြုံးလျက် မေးလိုက်သည်။

ဝမ်ဟဲ့က မသိစိတ်ဖြင့် တမန်တော်ကို လှမ်းကြည့်လိုက်သည်။

ဖန့်ချန်က ခပ်ဖွဖွ ခေါင်းညိတ်ပြလိုက်ပြီးနောက် တမန်တော်ကို ပြန်ကြည့်ကာ

"မင်းက လော့ရွှယ်သူတော်စင်ရဲ့ လက်အောက်က အဘိညာဉ်ရှင်ပဲ၊ ဟုတ်တယ်မလား"

"သိလျက်နဲ့ မေးနေတာပဲ"

တမန်တော်က ဖြည်းဖြည်းချင်း ဆိုသည်။

"ကြီးကျယ်မြင့်မြတ်တဲ့ သူတော်စင်တစ်ပါးကတော့ သာမန် အခြေခံတည်ဆောက်ခြင်း လက်ဝှေ့ကျမ်းကို မျက်စိကျနေမှာ မဟုတ်ဘူး။ ဒါဆိုရင် ဖန့်မျိုးနွယ်စုမှာ သူတော်စင်တစ်ပိုင်း ပေါ်ထွက်လာရခြင်းရဲ့ အကြောင်းရင်းက လဲ့ကျူလက်ဝှေ့ကြောင့်လို့ မင်းက ထင်နေလို့ လုယူဖို့ ကြိုးစားတာလား ဒါမှမဟုတ် မင်းရဲ့ နောက်ကွယ်မှာ တခြားလူ ရှိနေသေးတာလား"

ဖန့်ချန်က ခပ်ဖွဖွ ပြုံးလျက်

"သေချာ စဉ်းစားပြီးမှ ဖြေပါ၊ မင်းရဲ့ အဆင့်အတန်းက နိမ့်လွန်းပါတယ်၊ အများကြီး စဉ်းစားနေဖို့ မလိုပါဘူး။ မင်း လိုချင်တာက အသက်ရှင်ဖို့ပဲ မဟုတ်လား"

တမန်တော်သည် ခဏမျှ တိတ်ဆိတ်သွားပြီးနောက် အသံအက်ရှရှဖြင့် ပြောလာသည်။

"နတ်ဘုရားနယ်မြေက ပုဂ္ဂိုလ်ကြီးတစ်ယောက်က ကျွန်တော့်ကို ခိုင်းတာပါ။ ကျွန်တော် သိသလောက်တော့ အဲဒီပုဂ္ဂိုလ်ကလည်း လော့ရွှယ်သူတော်စင်ရဲ့ လက်အောက်ခံဖြစ်တဲ့ လော့ရွှယ်မဟာမိတ်အဖွဲ့ ထဲကပဲ။

အစမှအဆုံးအထိ ကျွန်တော်ဟာ စာကိုပဲ မြင်ဖူးတာပါ၊ ဘယ်ပုဂ္ဂိုလ်ကြီးရဲ့ အကြံလဲဆိုတာတော့ ကျွန်တော်လည်း မသိပါဘူး"

"ဒါဆိုရင်... မင်း ငါ့ကို သူတော်စင် ကိုးပါးရဲ့ နောက်ခံအကြောင်းရင်းကို ပြောပြပါဦး"

ဖန့်ချန်က ရယ်မောလိုက်သည်။

"သူတော်စင် ကိုးပါးရဲ့ နောက်ခံအကြောင်းရင်း"

တမန်တော်မှာ ကြောင်အသွားပြီးနောက် ထူးဆန်းသော မျက်နှာထားဖြင့် ပြောလိုက်သည်။

"ကျွန်တော်က ပါးမွှာလေးပဲ ရှိပါသေးတယ်၊ သူတော်စင် ကိုးပါးရဲ့ နောက်ခံအကြောင်းရင်းကို ဘယ်လိုလုပ် သိနိုင်မှာလဲ။ ကျွန်တော် သိထားတာကတော့ ခင်ဗျားတို့ ဖန့်မျိုးနွယ်စုပဲဖြစ်ဖြစ်၊ ကျွန်တော့်ရဲ့ မဟာကျိုးပဲဖြစ်ဖြစ် အားလုံးဟာ လော့ရွှယ်မဟာမိတ်အဖွဲ့ရဲ့ အုပ်ချုပ်မှုအောက်မှာပဲ ရှိနေတယ်ဆိုတာပါပဲ။

ကျန်တဲ့ သူတော်စင် ရှစ်ပါးအကြောင်းကိုတော့ ကျွန်တော် ဘာမှမသိပါဘူး။ ကန့်သတ်ချက်ကျော်လွန်ခြင်း အဆင့်သုံးဆင့် ကို ရောက်မှပဲ ကျန်တဲ့ သူတော်စင် ရှစ်ပါးရဲ့ သတင်းအချက်အလက်တွေကို သိနိုင်ကောင်း သိနိုင်ပါလိမ့်မယ်။

အခုအချိန်မှာတော့ ကျွန်တော့်ရဲ့ အမြင်ဟာ လော့ရွှယ်မဟာမိတ်အဖွဲ့ရဲ့ ဘောင်အတွင်းမှာပဲ ရှိနေပါသေးတယ်၊ လော့ရွှယ်မဟာမိတ်အဖွဲ့ရဲ့ အခြေအနေအရပ်ရပ်ကိုတောင် အကုန် မမြင်နိုင်သေးပါဘူး"

"ဒါဆိုရင် ဖန့်မျိုးနွယ်စုရဲ့ အဘိညာဉ်ရှင်တွေ အခု အပြင်လောကမှာ ဘယ်လို အခြေအနေမျိုးနဲ့ ရင်ဆိုင်နေရသလဲဆိုတာကို ပြောပြပါဦး"

"ဒါကတော့... လော့ရွှယ်မဟာမိတ်အဖွဲ့ရဲ့ လိုက်လံသတ်ဖြတ်ခြင်းကို ခံနေရတာပါ။ အသေးစိတ် အခြေအနေကိုတော့ ကျွန်တော်လည်း မသိပါဘူး။ သိသလောက်ကတော့ ခင်ဗျားတို့ ဖန့်မျိုးနွယ်စုမှာ အဲဒီ သူတော်စင်တစ်ပိုင်းအပြင် ကျန်တဲ့ ကန့်သတ်ချက်ကျော်လွန်သူ ၁၀ ယောက်ကျော် ရှိနေသေးတယ်ဆိုတာပါပဲ။

ဒီလောက်အထိ အင်အားရှိတာဟာ ဘယ်သူတော်စင်ရဲ့ လက်အောက်မှာပဲဖြစ်ဖြစ် ထိပ်တန်းနေရာမှာ ရှိနေသင့်တာပါ။ မယူသင့်တဲ့အရာကိုသာ မယူခဲ့ဘူးဆိုရင် ဒီမဟာကျိုးနိုင်ငံဟာ ခင်ဗျားတို့ ဖန့်မျိုးနွယ်စုကပဲ အုပ်ချုပ်နေရမှာပါ"

တမန်တော်က ထူးဆန်းသော မျက်နှာထားဖြင့် ဆိုလိုက်တော့သည်။